አዲስ አበባ፤ ጥቅምት 3/2018(ኢዜአ)፦ የኢትዮጵያ ጉዞ በምኞት ላይ የተመሰረተ ሳይሆን ዓለም በሚያየው፣ በሚዳስሰውና በሚመሰክርላቸው ስኬቶች የተደገፈ መሆኑን ፕሬዝዳንት ታዬ አጽቀሥላሴ ገለጹ። 18ኛው ብሔራዊ የሠንደቅ ዓላማ ቀን ’’ሠንደቅ ዓላማችን ለኢትዮጵያ ታላቅ የከፍታ ዘመን ብስራት፣ ለብሔራዊ አንድነታችን፣ ለሉዓላዊነትና ለኢትዮጵያ ሕዳሴ’’ በሚል መሪ ሃሳብ በሕዝብ ተወካዮች ምክር ቤት ተከብሯል።   በዚሁ ወቅት ፕሬዝዳንት ታዬ አጽቀሥላሴ፤ የሠንደቅ ዓላማ ቀን ኢትዮጵያውያን የሀገራቸውን ፍቅር፣ ክብርና ቃል ኪዳን በልባቸው የሚያድሱበት የጋራ ማንነታቸውን የሚያጎለብቱበትና የነገ ተስፋን የሚያጸኑበት ነው ብለዋል። ክብረ በዓሉ ያለፈውን የጀግንነት ገድል፣ የዛሬውን የልማት ጥረት፣ የነገውን የዕድገትና ብልጽግና ትልም በማጣመር ፈጣን ዕድገት ለምታስመዘግበው ኢትዮጵያ ድል አብሳሪና የጉዞ ህያው ምስክር መሆኑን ገልጸዋል። ኢትዮጵያ ያጋጠሟትን የህልውና ፈተናዎች በህዝቦቿ የአንድነት ብርቱ ክንድ በጽናት ተሻግራ የራሷን ዕድል የመወሰን ብቃት እያስመሰከረች መሆኗንም አብራርተዋል። የኢትዮጵያ ጉዞ በምኞት ላይ የተመሰረተ ሳይሆን ዓለም በሚያየውና በሚዳስሰው ብሎም በሚመሰክርላቸው ሀገራዊ ስኬቶች የተደገፈ ነው ብለዋል።   የዚህ ብስራት መቅረዝና ከፍታም የዘመናት ህልም የነበረው ታላቁ የኢትዮጵያ ሕዳሴ ግድብ ተጠናቆ የሀገርንና ቀጣናዊ የኃይል አቅርቦትን በማረጋገጥ የኢንዱስትሪ የደም ስር ለመሆን መብቃቱን ገልጸዋል። ታላቁ ሕዳሴ ግድብ ከብርሃን ምንጭነት ባሻገር ኢትዮጵያውያን በአንድነት ሲቆሙ ታላላቅ ሀገራዊ የልማት ገድሎችን ማስመዝገብ እንደሚቻል በተግባር የተረጋገጠበት የሉዓላዊነት ማህተም መሆኑን ተናግረዋል። በአረንጓዴ ዐሻራም በቢሊዮን የሚቆጠሩ ችግኞች መትከሏን አስታውሰው፤ ይህም የኢትዮጵያን ገጽታ በመቀየርና ለዓለም የአየር ንብረት ለውጥ መፍትሔ በማበርከት ዓለም አቀፍ ከበሬታና ሞገስ ያስገኘላት የልማት ገድል ነው ብለዋል።   የዕድገት ጉዟችን ቀጣይ ምዕራፍ የኢኮኖሚ ብርታትን ማረጋገጥ ነው ያሉት ፕሬዝዳንቱ፤ የአፈር ማዳበሪያ ፋብሪካ ግንባታውም በግብርና ምርታማነት የምግብ ሉዓላዊነት ማረጋገጥ የሚስችል መሆኑን ገልጸዋል። ይህም ከውጭ ከሚገባ የማዳበሪ ጥገኝነት በማላቀቅ ሀገራዊ ኢኮኖሚን የሚያጠናክር ታላቅ ተግባር መሆኑን ተናግረዋል። የተፈጥሮ ጋዝ ሃብትን በመጠቀም ለኢንዱስትሪ ግብዓትና ለኃይል ምንጭነት እንዲውል የማድረግ ውጥንም በአዲስ የኃይል ምንጭ የኢኮኖሚ ዕድገትና ብልጽግና ጉዞን እንደሚያፋጥን አብራርተዋል። የኢትዮጵያ ግዙፍ ሀገራዊ ፕሮጀክቶች ሲጠናቀቁ ለወጣቶች የሥራ ዕድል እንደሚፈጥሩና የሀገርን የከፍታ ዘመን በማይናወጥ መሠረት ለማስቀመጥ እንደሚረዱ ገልጸዋል። የኢትዮጵያን ውጤታማነት ለማስቀጠልም በልዩነት ውስጥ ያለን ወርቃማ ውበት በማክበር የሀገራዊ ምክክር ሂደት ለዴሞክራሲያዊ ሥርዓት ግንባታና ዘላቂ ሰላም መሠረት እየጣለ እንደሚገኝ ተናግረዋል። የኢትዮጵያ ሉዓላዊነት የሚከበረው በጠንካራ አንድነትና በበለጸገ ኢኮኖሚ ላይ ማቆም ሲቻል እንደሆነም አስገንዝበዋል። ለዚህም ቀጣናዊ የጋራ ተጠቃሚነትና ትብብር ላይ የተመሰረተ ፍትሐዊ የባሕር በር የማግኘትና የመጠቀም መብታችን በሰላማዊ፣ ዲፕሎማሲያዊና በሰጥቶ መቀበል መርህ ማስከበራችን ይቀጥላል ብለዋል። ኢትዮጵያውያንም በአዕምሯቸው ሰላምን በማጽናት በልባቸው የተስፋ ወጋገን አጥብቆ በመያዝ በክንዳቸው ብርታትም ሠንደቅ ዓላማና ሀገራቸውን መጠበቅ እንደሚኖርባቸው አስገንዝበዋል።

አርባ ምንጭ፣ዲላ፣ ቦንጋ ጥቅምት 3/2018 (ኢዜአ) :- የሰንደቅ ዓላማውን ክብር በሚመጥን የስራ ትጋት የበለፀገችና ሉዓላዊነቷ የተጠበቀች ሀገርን ለቀጣዩ ትውልድ ማስረከብ እንደሚገባ ተመላከተ። 18ኛው የሠንደቅ ዓላማ ቀን “ሠንደቅ ዓላማችን ለኢትዮጵያ ታላቅ የከፍታ ዘመን ብሥራት፣ ለብሔራዊ አንድነታችን፣ ለሉዓላዊነታችንና ለኢትዮጵያ ሕዳሴ” በሚል መሪ ሐሳብ በቦንጋ፣ ዲላና አርባ ምንጭ ከተሞች በተለያዩ ሁነቶች ተከብሯል። በቦንጋ ከተማ በተከበረው የሰንደቅ ዓላማ ቀን ላይ መልእክት ያስተላለፉት የካፋ ዞን ምክር ቤት ዋና አፈ-ጉባኤ አቶ ግርማ ደፋር የሰንደቅ ዓላማ ቀንን ስናከብር በየዘመኑ ለሀገር ነፃነትና ክብር የተከፈለውን ዋጋ በማሰብ ሊሆን እንደሚገባ ገልጸዋል፡፡ ሰንደቅ ዓላማ የአንድ ሀገር ሉዓላዊነትና የነፃነት ምልክት መሆኑን ጠቅሰው ክብሩን በሚመጥን የስራ ትጋት በርትቶ በመስራት የበለፀገችና ሉዓላዊነቷ የተጠበቀች ሀገር ለትውልድ ማስተላለፍ ይገባል ብለዋል፡፡ በመርሃ ግብሩ ላይ ሰነድ ያቀረቡት የደቡብ ምዕራብ ኢትዮጵያ ህዝቦች ክልል ፐብሊክ ሰርቪስና የሰው ሀብት ልማት ቢሮ ሀላፊ አቶ ንጉሴ ወልደጊዮርጊስ በበኩላቸው ለሰንደቅ ዓላማ ከፍታ የተከፈለው ዋጋ የማይረሳና በየዘመኑ እየተዘከረ የሚኖር መሆኑን ገልፀዋል። የቀኑ መከበር ሀገራዊ እሴቶችን አጠናክሮ ለትውልድ በማስተላለፍ አንድነታችንንና ህብረታችንን በማጠናከር ህብረ-ብሔራዊነትን ለማጠናከር ትልቅ ፋይዳ አለው ብለዋል። የካፋ ዞን ዋና አስተዳዳሪ አቶ እንዳሻው ከበደ በበኩላቸው፣ ሰንደቅ ዓላማ የሀገር ምልክትና የሉዓላዊነት መገለጫ መሆኑን አንስተው ቀኑ ከሌሎች በዓላት በተለየ መልኩ በሰፊው መከበር እንዳለበት አንስተዋል። በአርባ ምንጭ ከተማ በተከበረው የሰንደቅ ዓላማ ቀን የደቡብ ኢትዮጵያ ክልል ምክር ቤት ምክትል አፈ-ጉባኤ ወላይቴ ቢቶ ሰንደቅ ዓላማ የሀገር መለያ፣ የሉዓላዊነትና የአንድነታችን መገለጫ ነው ብለዋል፡፡ የሃገሪቱን የማንሠራራት ጉዞ ለማስቀጠልም ሁሉም በተሰማራበት መስክ ሰንደቅ ዓላማን ከፍ የሚያደርግ ተግባር መፈጸም እንዳለበትም አሳስበዋል፡፡ በተመሳሳይም በዲላ ከተማ በዓሉ ሲከበር የጌዴኦ ዞን ዋና አፈ-ጉባኤ ወይዘሮ ምስጋና ዋቃዮ እንዳሉት ቀኑ ህገ መንግስታዊ መሰረት ያለውና ህብረተሰቡን በቅንነት ለማገልገል ዳግም ቃላችንን የምናድስበት ነው። የህብረ ብሔራዊትንና ሉዓላዊነት መገለጫ የሆነውን ሰንደቅ ዓላማ ማክበርና ማጉላት እንደሚገባም አመልክተዋል። ሰንደቅ ዓላማ የሃገራችን ኩራትና ነጻነት በመሆኑ የሚገባውን ክብር ልንሰጠው ይገባል ያሉት ደግሞ የጌዴኦ ዞን ምክትል አስተዳዳሪና ግብርና መምሪያ ኃላፊ አቶ ታጠቅ ዶሪ በተሰማራንበት ዘርፍ ውጤታማ በመሆን የሰንደቅ ዓላማ ክብርን ማጎልበት እንደሚገባም አንስተዋል።  

ቦንጋ/ወላይታ ሶዶ/ወልቂጤ፤ ጥቅምት 3/2018(ኢዜአ)፡- ሠንደቅ ዓላማችንን በክብር ለትውልድ ለማስተላለፍ በሕብረ ብሔራዊ አንድነት ተግተን መስራት አለብን ሲሉ የደቡብ ምዕራብ ኢትዮጵያ ሕዝቦች ክልል ርዕሰ መስተዳድር ኢንጂነር ነጋሽ ዋጌሾ (ዶ/ር) ገለጹ። 18ኛው የሠንደቅ ዓላም ቀን በቦንጋ፣ በወላይታ ሶዶና ወልቂጤ ከተሞች በድምቀት ተከብሯል። በቦንጋ በተከበረው በዓል ላይ ርዕሰ መስተዳድር ኢንጂነር ነጋሽ ዋጌሾ (ዶ/ር) ፤ የኢትዮጵያ ብሔሮች፣ ብሔረ ሰቦችና ሕዝቦች ህብር መገለጫ የሆነውን ሠንደቅ ዓላማን በክብር መጠበቅ እንደሚገባ ተናግረዋል።   በቀደምት አያቶቻችን አኩሪ ገድል ተጠብቆ የቆየውን ሠንደቅ ዓላማችንን በክብር ለትውልድ ለማስተላለፍ በሕብረ ብሔራዊ አንድነት ተግተን መሠራት አለብን ብለዋል። የቀኑ መከበር ለሠንደቅ ዓላማ መስዋእትነት የከፈሉ ጀግኖችን ለማሠብና ለትውልዱ ለማስተላለፍ ትልቅ ፋይዳ እንዳለው የገለጹት ደግሞ የካፋ ዞን ምክር ቤት ዋና አፈ ጉባኤ አቶ ግርማ ደፋር ናቸው። ሁሉም ዜጋ በተሠማራበት መስክ ሕዝቡን በታማኝነትና በቅንነት ለማገልገል በየዓመቱ ቃሉን የሚያድስበት መሆኑንም አመልክተዋል። ሠንደቅ ዓላማ ክብርና መለያችን ነው ያሉት ደግሞ የክልሉ ፖሊስ አባል ኮማንደር በድሩ ማሞ ናቸው። ቀደምት አያቶቻችን በክብር ያስረከቡንን ሠንደቅ ዓላማ ለቀጣዩ ትውልድ ለማስተላለፍ ተግተን እንሠራለን ብለዋል። በተመሳሳይ በዓሉ በወላይታ ሶዶ በተከበረበት ወቅት የደቡብ ኢትዮጵያ ክልል መንግስት ዋና ተጠሪ አቶ ገብረመስቀል ጫላ ፤ የኢትዮጵያ ሠንደቅ ዓላማ ጀግኖች አያቶች የሀገርን ነፃነት ያስከበሩበት ምልክት መሆኑን ተናግረዋል። የዘንድሮው የሠንደቅ ዓላማ ቀን ታላቁ የኢትዮጵያ ህዳሴ ግድብ በተመረቀበት እንዲሁም ሌሎች ታላላቅ ፕሮጀክቶች በተጀመሩበት ወቅት መሆኑ ልዩ እንደሚያደርገው አውስተው፤ ይህም የስኬቶቻችን ከፍታ ማሳያ ነው ብለዋል።   በርዕሰ መስተዳድር ጽሕፈት ቤት የመልካም አስተዳደር ጉዳዮች ዘርፍ ኃላፊ አቶ ተመስገን ጌታቸው፤ ሠንደቅ ዓላማ የኢትዮጵያዊነት መገለጫ ነው ብለዋል። ሁላችንም በየተሠማራንበት ጠንክረን በመስራት የህዳሴ ግድብን እንዳሳካን ሁሉ ሌሎችንም የጋራ ፕሮጀክቶች በመፈፀም ደምቀን ለመታየት ትጋታችንን አጠናከረን መቀጠል አለብን ሲሉ ተናግረዋል። በርዕሰ መስተዳድር ጽሕፈት ቤት የስነ ምግባር እና ፀረ ሙስና ዳይሬክተር አሠለፈች መብራቱ ፤ ሠንደቅ ዓላማ ከኢትዮጵያዊያን አልፎ ለሌሎች አፍሪካዊያንም የከፍታ ዘመን ማሳያ ዓርማ ነው ብለዋል። ይህንን ደግሞ ህዝቡን በታማኝነትና በሐቀኝነት በማገልገል እንዲሁም በሁሉም ዘርፎች መልካም አስተዳደርን በማስፈን የሠንደቅ ዓላማን ክብር በተግባር ለመግለጽ እየሠሩ እንደሚገኙ ገልጸዋል። ይህ በእንዲህ እንዳለ በዓሉ በማዕከላዊ ኢትዮጵያ ክልል በተከበረበት ወቅት የክልሉ ምክር ቤት ምክትል አፈ ጉባኤ መነቴ ሙንዲኖ ፤ ጀግኖች አያቶቻችን የነፃነት ምልክት የሆነውን ሠንደቅ ዓላማ ለአዲሱ ትውልድ ማስረከባቸውን ተናግረዋል። ትውልዱም አብሮነቱንና ሀገራዊ አንድነቱን በማጠናከርና ልማትን በማፋጠን ኢትዮጵያን ከፍ የማድረግ አደራውን ማጠናከር አለበት ብለዋል።

አዲስ አበባ፤ ጥቅምት 3/2018(ኢዜአ)፡- የግብጽ የእኔ ብቻ ልጠቀም ባይነት ዘመን አብቅቶ በናይል ወንዝ ላይ በጋራ የመልማት አዲስ የትብብር ምዕራፍ ተከፍቷል። የውሃና ኢነርጂ ሚኒስቴር ባወጣው መግለጫ ግብጽ በታላቁ የኢትዮጵያ ህዳሴ ግድብና የአባይ ወንዝ ዙሪያ የምታደርጋቸውን ጠብ አጫሪ ንግግሮች በጽኑ አውግዟል። ግብጽ በቅኝ ግዛት ዘመን ውሎች የብቸኛ ተጠቃሚነት አባዜ መጠመዷን እንደቀጠለችበት አመልክቷል። የግብጽ ከፍተኛ ባለስልጣን ሀገራቸው በናይል ተፋሰስ ሀገራት በፀሐይ ኃይል የሚሰሩ የውሃ ጉድጓድ መቆፈሪያ እና የዝናብ መሰበብሰቢያ መሰረተ ልማቶችን ጨምሮ አነስተኛ ይዞታ ያላቸውን ፕሮጀክቶችን በመገንባት ከአፍሪካ ጋር አጋርነቷን እያሳየች ነው ማለታቸው እውነተኛ የቀጣናዊ ትብብር ፍላጎት ማሳያ አለመሆኑንም ገልጿል። እውነተኛ የአፍሪካ አጋርነት በውሃ ሀብቶች ፍትሃዊነት እና እኩልነትን በመጠቀም ማመንና የሁሉም የተፋሰሱ ሀገራት የመልማት መብትን እውቅና መስጠትን የሚጠይቅ መሆኑንም ሚኒስቴሩ በመግለጫው አመላክቷል። ግብጽ በናይል ወንዝ ጊዜው ያለፈበትን የታሪካዊ መብቶች እሳቤ የሙጥኝ ብላ መቀጣሏን ገልጾ፤ ይህም ዓለም አቀፍ ህግን ያላከበረና የተፋሰሱን ሀገራት ህጋዊ መብቶች ከግምት ውስጥ ያላስገባ መሆኑን አብራርቷል። የኢትዮጵያ መንግስት የናይል ወንዝ የመልማት መብቷን በመጠቀም እያደገ የመጣውን የኢነርጂ እና የውሃ ፍላጎቶቿን ለመመለስ እያከናወነች ያለውን ስራ በየትኛውም አይነት ጫና እንደማታቆምና አጠናክራ እንደምትቀጥል አስታውቋል። ሚኒስቴሩ በመግለጫው ግብጽ በታላቁ የኢትዮጵያ ህዳሴ ግድብ ግንባታ እና የናይል ቤዚን የትብብር ማዕቀፍ ስምምነት ላይ ስታደርጋቸው የነበሩ ድርድሮች ታማኝነት የጎደላቸው እንደነበሩም ገልጿል። የናይል ቤዚን የትብብር ማዕቀፍ ስምምነት በተፋሰሱ ሀገራት መካከል ብቸኛ የጋራ የውሃ ተጠቃሚነት ማዕቀፍ መሆኑንም አስረድቷል። ኢትዮጵያ አለመግባባቶችን በሰላማዊ መንገድ ለመፍታት ሁሌም ዝግጁ መሆኗንም ገልጿል። ታላቁ የኢትዮጵያ ህዳሴ ግድብ የኢትዮጵያ የመልማት መብት እና ቀጣናዊ ትብብር መገለጫ መሆኑንም ሚኒስቴሩ በመግለጫው አስታውቋል። ማስፈራሪያዎችንና ከመሰረታዊ የትብብር እሳቤዎች ያፈነገጡ አካሄዶችን በማቆም ከሁሉም የተፋሰሱ ሀገራት ጋር በጋራ መከባበር እና ፍትሃዊ መርሆዎች አብሮ መስራት እንደሚገባ አመላክቷል። ኢትዮጵያ በህዳሴው ግድብ ዘላቂ አጠቃቀም ላይ ከተፋሰሱ አገራት ጋር በትብብር ለመስራት ዝግጁ መሆኗንም ነው ሚኒስቴሩ በመግለጫው ያረጋገጠው።

አምቦ/ ነቀምቴ ፤ ጥቅምት 3/2018(ኢዜአ)፡- ሰንደቅ ዓላማ የአገር አንድነት ማስጠበቂያ ብሔራዊ ዓርማና የነጻነታችን ምልክት ነው ሲሉ የሆሚቾ አሙኒሽን ኢንጂነሪንግ ኢንዱስትሪ የስራ አመራሮች እና ሰራተኞች ተናገሩ። 18ኛው የሰንደቅ ዓላማ ቀን የመከላከያ ሰራዊት አባላት፣ የኢንዱስትሪው ሰራተኞችና አመራሮች በተገኙበት ተከብሯል። በመከላከያ ኢንጂነሪንግ ኢንዱስትሪ ኮርፖሬሽን የሆሚቾ አሙኒሽን ኢንጂነሪንግ ኢንዱስትሪ ዋና ስራ አስኪያጅ ኮሎኔል ስለሺ ነገራ፣ ሰንደቅ ዓላማ የነጻነት ምልክት ነው ብለዋል። የሰንደቅ ዓላማ ቀን ስናከብር ለሀገር አንድነት እና ሉዓላዊነት ዋጋ የከፈሉትን በማሰብ መሆኑን ጠቅሰው፤ ሰንደቅ ዓላማ የሀገር ነጻነት ምልክት መሆኑን ገልጸዋል። የዛሬው ትውልድም የቀደምት አያቶች ፈለግ ተከትሎ የሀገር ሉዓላዊነት እና አንድነትን ለማስጠበቅ ከፊት መሰለፍ አለበት ሲሉም ተናግረዋል። ከበዓሉ ተሳታፊዎች ሌተናል ኮሎኔል ጌቱ ብርሃኑ በበኩላቸው ሰንደቅ ዓላማ የሀገር አንድነት ማስጠበቂያ ብሔራዊ አርማ ነው ሲሉ ገልጸዋል። ቀደምት ጀግኖች አባቶች ሀገርን በክብር ያወረሱን ለሰንደቅ ዓላማ ባላቸው ፍቅር መሆኑን ጠቅሰው፤ የዛሬው ትውልድም ለዚህ በጎ ዓላማ መቆም አለበት ብለዋል። ሀምሳ አለቃ አዲሱ ጉዲና፣ ለሰንደቅ ዓላማ ክብር እና ለሀገር ሉዓላዊነት የሚጠበቅባቸውን መሰዋእትነት ለመክፈል ምንጊዜም ዝግጁ መሆናቸውን ገልጸዋል። ምክትል አስር አለቃ ላቀች ሙሉዓለም ወታደር በጀግንነት ወጥቶ ለሀገሩ ዳር ድንበር መስዋትነት የሚከፍለው ለሰንደቅ ዓላማ በመታመኑ እንደሆነ ጠቅሰው፤ ለስንደቅ ዓላማ ክብር ሁሉም ዘብ መቆም አለበት ነው ያሉት። በተመሳሳይ በነቀምቴ ከተማ የሰንደቅ ዓላማ ቀን አካባበር ላይ የተገኙት የነቀምቴ ከተማ ምክር ቤት አፈ ጉባኤ ወይዘሮ መሰረት ታደሰ እንደተናገሩት ሰንደቅ ዓላማ የአንድ ሀገር መገለጫ ነው ብለዋል። የሀገርን ክብር እና ሉዓላዊነት ለማስከበር ቀደምት አባቶች ብዙ ዋጋ ከፍለዋል ያሉት አፈ ጉባኤዋ አሁን ያለው ትውልድም በልማት ስራዎች ላይ በመሳተፍ ሀገር ወዳድነቱን ማረጋገጥ አለበት ብለዋል። የነቀምቴ ከተማ ከንቲባ ተወካይ ረዳት ፕሮፌሰር መላኩ ጌታሁን በበኩላቸው የሰንደቅ ዓላማ ቀን ስናከብር ሀገራችን የጀመረችውን የልማት ስራዎች በመደገፍ ለውጤታማነቱ በመረባረብ መሆን አለበት ሲሉ ገልጸዋል።  

አዲስ አበባ፤ ጥቅምት 3/2018 (ኢዜአ)፡- ሠንደቅ ዓላማችን መላው ኢትዮጵያውያንን ለጋራ ዓላማ የሚያሰባስብ የማንነት መገለጫ ዓርማ ነው ሲሉ የብሔራዊ መረጃና ደኅንነት አገልግሎት ምክትል ዳይሬክተር ጀነራል አቶ ሲሳይ ቶላ ገለጹ። አገልግሎት መሥሪያ ቤቱ 18ኛውን የሠንደቅ ዓላማ ቀን "ሰንደቅ ዓላማችን ለኢትዮጵያ ታላቅ የከፍታ ዘመን ብስራት፣ ለብሔራዊ አንድነታችን ለሉዓላዊነታችንና ለኢትዮጵያ ሕዳሴ" በሚል መሪ ሐሳብ በተለያዩ ዝግጅቶች አክብሯል፡፡   በዚሁ ወቅት የአገልግሎት መሥሪያ ቤቱ ምክትል ዳይሬክተር ጀነራል አቶ ሲሳይ ቶላ ባደረጉት ንግግር፤ የኢትዮጵያ ሠንደቅ ዓላማ ሀገርን ከወራሪዎች ለመከላከልና ነጻነትን ለማስጠበቅ ሲደረግ የነበረው ተጋድሎ ምልክት መሆኑን አስገንዝበዋል። የመረጃና ደኅንነት ተቋሙ አባላትም የኢትዮጵያን ብሔራዊ ጥቅም፣ ሉዓላዊነትና ክብር ለማስጠበቅ በሚያደርጉት ስምሪት የሠንደቅ ዓላማውን ትልቅ አደራ በልባቸው በመያዝ በከፍተኛ የሀገር ፍቅር መንፈስ እስከ መስዋዕትነት ድረስ ዋጋ ይከፍላሉ ብለዋል፡፡   ሠንደቅ ዓላማው መላው ኢትዮጵያውያንን ለጋራ ዓላማ የሚያሰባስብ የማንነት መገለጫ ዓርማ ነው ማለታቸውን አገልግሎት መሥሪያ ቤቱ ለኢዜአ በላከው መረጃ አመላክቷል። ከተለያዩ የሀገሪቱ ክፍሎች የተወጣጡትና በኅብረ-ብሔራዊ ስብጥር ለአንድ ሀገራዊ ዓላማ የተሰለፉት የተቋሙ አባላትም፤ በሠንደቅ ዓላማው ጥላ ስር ሀገራዊ ደኅንነትን የማረጋገጥ ተልዕኮን በላቀ መንፈስ የሚወጡ መሆኑን አስታውቀዋል። በብሔራዊ መረጃና ደኅንነት አገልግሎት በተከበረው 18ኛው የሠንደቅ ዓላማ ቀን የተቋሙ ከፍተኛ አመራሮችና አባላት ተሳትፈዋል።

አዲስ አበባ፤ ጥቅምት 3/2018(ኢዜአ)፦ የኢትዮጵያ ሠንደቅ ዓላማ ፈተናዎችን በጽናት በመሻገር አፍሪካዊት የብልጽግና ተምሳሌት ሀገር የመገንባት አቅም የሚጎለብትበት የማንሰራራት ጉዞ ዓርማ መሆኑን የኢፌዴሪ የሕዝብ ተወካዮች ምክር ቤት አፈ ጉባኤ አቶ ታገሰ ጫፎ ገለጹ። 18ኛው የሠንደቅ ዓላማ ቀን ’’ሠንደቅ ዓላማችን ለኢትዮጵያ ታላቅ የከፍታ ዘመን ብስራት፣ ለብሔራዊ አንድነታችን፣ ለሉዓላዊነትና ለኢትዮጵያ ሕዳሴ’’ በሚል መሪ ሃሳብ በሕዝብ ተወካዮች ምክር ቤት ተከብሯል።   የኢፌዴሪ የሕዝብ ተወካዮች ምክር ቤት አፈ ጉባኤ አቶ ታገሰ ጫፎ በዚሁ ወቅት፤ በሕገ መንግስቱና በሠንደቅ ዓላማ አዋጅ ድንጋጌ መሠረት የሠንደቅ ዓላማ ቀን በጥቅምት ወር መጀመሪያ ሳምንት ሰኞ በየዓመቱ ይከበራል ብለዋል። የኢትዮጵያ ሠንደቅ ዓላማ የዜጎች የብዝሃነት፣ የእኩልነትና የሕብረብሔራዊ አንድነት መገለጫ መሆኑን ተናግረዋል። የሠንደቅ ዓላማ ቀንም ለሠንደቅ ዓላማችን ልንሰጠው የሚገባውን ክብር የምናድስበት፣ ቃልኪዳናችንን የምናጸናበትና ብሔራዊ የአርበኝነታችንን የምንቀሰቅስበት ነው ብለዋል።   ለሠንደቅ ዓላማ ቀን የተሰጠው መሪ ሀሳብም የዛሬውን ተግባር፣ የነገውን ምኞትና ትልም በግልጽ የሚያሳይ መሆኑን ተናግረዋል። የኢትዮጵያ ሠንደቅ ዓላማም የውስጥና የውጭ ጠላቶች ሊሰብሩት የማይችሉት የሕብረብሔራዊ አንድነትና የሉዓላዊነት ምሽግ መሆኑን አስገንዝበዋል። የኢትዮጵያ ሠንደቅ ዓላማ ፈተናዎችን በጽናት በመሻገር አፍሪካዊት የብልጽግና ተምሳሌት ሀገር የመገንባት አቅም የሚጎለብትበትና ዓለም አቀፍ ተጽዕኖ ፈጣሪነት የሚታይበት የማንሰራራት ጎዞ ዓርማ መሆኑን አንስተዋል። ሠንደቅ ዓላማችን በታሪክ ውጣ ውረዶች ውስጥ የጽናታችን ምልክት ነው ያሉት አፈጉባኤ ታገሠ፤ ዛሬም በዘላቂ ልማትና ብልጽግና ወደ ብሩህ የከፍታ ዘመን እየተሻገርን መሆኑን የምናውጅበት ነው ብለዋል። በሠንደቅ ዓላማ ቀን አከባበር ላይ የታደሙ የሕዝብ ተወካዮች ምክር ቤት አባላትም የኢትዮጵያ ሠንደቅ ዓላማ ቅድመ አያቶች የታመኑላት የአሁኑ ትውልድም ለመጪው የሚያስረክባት ደማቅ ዓርማ መሆኗን ገልጸዋል።   በሕዝብ ተወካዮች ምክር ቤት የመንግስት ወጪ አስተዳደርና ቁጥጥር ጉዳዮች ቋሚ ኮሚቴ ምክትል ሰብሳቢ አራሬ ሞሲሳ፤ የኢትዮጵያ ሠንደቅ ዓላማ ቅድመ አያቶች በደምና አጥንታቸው ጠብቀው ያቆዩት የጥቁር ህዝቦች የነፃነት ዓርማ ምልክት ነው ብለዋል። የአሁኑ ትውልድም ድህነትን ድል በመንሳት ለመጪው ትውልድ ዕድገትና ብልጽግናን ማውረስ እንደሚኖርበት አስገንዝበዋል። የህዳሴ ግድብ መጠናቀቅና የመሰረት ድንጋይ የተቀመጠላቸው ግዙፍ ፕሮክቶችም ዘመን ተሻጋሪ የሉዓላዊነት መገለጫና የኩራት ምንጭ በመሆናቸው የዘንድሮውን የሠንደቅ ዓላማ ቀን ልዩ ያደርገዋል ብለዋል።   የሕዝብ ተወካዮች ምክር ቤት አባል አወቀ አምዛ (ዶ/ር)፤ የኢትዮጵያ ሠንደቅ ዓላማ ቅድመ አያቶች የሀገርን ሉዓላዊ ነፃነትና ክብር በማስጠበቅ ለትውልድ ያሻገሯት ዓርማ ናት ብለዋል።   ሌላኛዋ የሕዝብ ተወካዮች ምክር ቤት አባል ከድጃ ሐሺም፤ የሠንደቅ ዓላማ ክብረ በዓል ታሪካችን የምናስታውስበት ለመጪው ትውልድ የተሻለች ሀገር ለማስረከብ የምንተጋበት ነው ብለዋል።

የአፍሪካ ቀንድ ለበርካታ አስርት ዓመታት በዕድሎችና ፈተናዎች መንታ መንገድ ላይ የቆመ ቀጣና ነው። የቀጣናው ሰፊ ዕድሎች በግጭት፣ በስጋት ተጋላጭነት እና በአለመተማመን ሲሸፈኑ ይታያል። ኢትዮጵያ እና ሶማሊያ በጋራ የትብብር መንፈስ ለጋራ ብልጽግና እያደረጉት ያለው ዲፕሎማሲያዊ ግንኙነት እንደአዲስ እየጎለበት መጥቷል። የአፍሪካ ቀንድ ቀጣና ስትራቴጂካዊ አካባቢ ሲሆን ከኤደን ባህረ ሰላጤ እስከ ታላቁ ስምጥ ሸለቆ ከ160 ሚሊዮን በላይ ዜጎች መኖሪያም ነው። ቀጣናው ሰፊ የተፈጥሮ ሀብቶችና ለም የግብርና መሬት የታደለ እንዲሁም አፍሪካን ከመካከለኛው ምስራቅ ብሎም ከሌሎች ጋር የሚያስተሳስሩ የውሃ ኮሪደሮች ያሉበት ነው። በቀጣናው ከትጥቅ ትግሎች እና ሽብርተኝነት የሚመነጩ የደህንነት ስጋቶች፣ ህገ-ወጥ ዝውውር፣ በተደጋጋሚ የሚከሰቱ ድርቆች፣ መፈናቀሎች፣ የምግብ ዋስትና አለመረጋገጥ፣ የአየር ንብረት ለውጥና ሌሎችም የቀጣናውን ሀገራት አይበገሬነትና አቅም እየፈተኑት ይገኛሉ። በተጨማሪም በዓለም አቀፍ ጫናዎችና በየጊዜው የሚቀያየሩ የኃይል አሰላለፎች በቀጣናው የሚታዩ ፈተናዎችን የበለጠ አክብደውታል። የአፍሪካ ቀንድ ከውስጣዊ ትብብር ይልቅ የውጭ አካላት ፍላጎታቸውን ለማሳካት የሚራኮቱበት ቀጣና በሚል የሚፈርጁትም አሉ። አሁን አሁን በቀጣናው ከሚስተዋሉ ችግሮች ለየት ያለ አዲስ ነገር መታየትም መሰማትም እየጀመረ መጥቷል። በቀጣናው የሚስተዋሉ ችግሮችን ለመቀየር ትብብርና ትስስር፣ ለመከባበርና የሰላም መንገድን ለመከተል ያሉ ፍላጎቶች እያደጉ መጥተዋል። ቀጣናዊ ትስስር የሚለው አጀንዳ ተገቢው ትኩረት እየተሰጠው መሆኑም እየተስተዋለ ይገኛል። የቀጣናው ሀገራት ወደ ውስጣቸው በመመልከት ፈተናዎችን በስክነት የመፍታት መንገድን መከተል ጀምረዋል። ለአፍሪካ ፈተናዎች አፍሪካዊ መፍትሄዎች የሚለውን መርህ ሀገራት እየገዙት ያለ አህጉራዊ ማዕቀፍ እና እሳቤ ሆኗል።   ለመሰረተ ልማት፣ ለኢነርጂ ትስስሮችና ለድንበር ተሻጋሪ ንግድ እየፈሰሰ ያለው መዋዕለ ንዋይ ቀጣናው የበለጠ እንዲተሳሰር መልካም አጋጣሚ ፈጥረዋል። ኢትዮጵያ በቅርቡ ያስመረቀችው የታላቁ የኢትዮጵያ ሕዳሴ ግድብ የቀጣናዊ ትብብርና ኢኮኖሚያዊ ትስስር ተምሳሌት ተደርጎ የሚወሰድ ነው። የአፍሪካ አህጉራዊ ነጻ የንግድ ቀጣና ለቀጣናው ገበያዎች አዳዲስ እድሎችን ይዞ መጥቷል። ከቅርብ ጊዜ ወዲህ የዲፕሎማሲ ሁነቶች ሀገራት ለውይይት ያላቸውን ዝግጁነት የሚያመላክት ነው። የኢትዮጵያ የውጭ ግንኙነት ፖሊሲም ቅድሚያ ለጎረቤት የሚሰጥ ነው። ከቀጣናው ሀገራት ጋር በጋራ መልማትና ማደግ አበይት የፖሊሲው ምሰሶ ሆኖ በግልጽ ተቀምጧል። ፕሬዚዳንት ታዬ አጽቀ ሥላሴ በ6ኛው የሕዝብ ተወካዮች እና የፌዴሬሽን ምክር ቤት 5ኛው የሥራ ዘመን የ2018 የጋራ የመክፈቻ ሥነ-ሥርዓት ላይ ባደረጉት ንግግር መንግስት በውጭ ጉዳይ ፖሊሲው ቅድሚያ ለጎረቤት የሚለውን መርህ አጠናክሮ እንደሚቀል ገልጸዋል። ባለፉት ዓመታት ከጎረቤት ሀገራት ጋር ዘርፈ ብዙ ትብብር ለመፍጠር ጥረት መደረጉንና ከጎረቤት ሀገራት ጋር ግጭት እንዳይፈጠር ጥረቶች ሲደረጉ መቆየታቸውን አውስተዋል። ቀጣናዊ ትስስርን የሚያጠናክሩ የመሰረተ ልማት ስራዎች መከናወነቸውን ጠቅሰው በቀጣይነትም ኢኮኖሚያዊ ትብብርን የሚያጎለብቱ የመሰረተ ልማት ዝርጋታና የንግድ ልውውጥ እንዲጠናከሩ ይደረጋል ብለዋል። በዚህ ረገድ መንግስት የጀመራቸውን ትብብሮች አጠናክሮ እንደሚቀጭልና በአካባቢያችን ሰላምን ለማረጋገጥ አለመግባባቶችን በዲፕሎማሲያዊ መንገድ ለመፍታት አበክሮ እንደሚሰራም ነው ፕሬዚዳንቱ የገለጹት።   በቀጣናው እየተቀየረ ባለው ምህዳር ውስጥ የኢትዮጵያ እና ሶማሊያ ትብብር በቅርቡ ከታዩ መልካም የዲፕሎማሲ ጉዳዮች መካከል የሚጠቀስ ነው። ሁለቱ ሀገራት ከቅርብ ዓመታት ወዲህ የጋራ ፍላጎትና የጋራ ብልጽግናን መሰረት ባደረገ መልኩ ትብብራቸውን ለማጠናከር እየሰሩ ይገኛሉ። የሶማሊያ ፌደራል ፕሬዚዳንት ሀሰን ሼክ መሃሙድ ትናንት ጥቅምት 2/2018ዓም በኢትዮጵያ ጉብኝት ማድረጋቸውና ከጠቅላይ ሚኒስትር ዐቢይ አሕመድ(ዶ/ር) ጋር በሁለትዮሽ እና ቀጣናዊ ጉዳዮች ላይ መምከራቸው ይታወሳል። የሁለቱ ሀገራት መሪዎች ውይይት በቅርብ ጊዜ በሀገራቱ ከፍተኛ ባለስልጣናት መካከል የተደረጉ ውይይቶች ቀጣይ አካል ሆኖ ሊወሰድ የሚችል ሲሆን በታህሣሥ 2017 ዓ.ም ላይ በቱርኪዬ ፕሬዝዳንት ረሲፕ ጣይብ ኤርዶሃን አሸማጋይነት የተደረገው የአንካራ ስምምነት በኢትዮጵያና ሶማሊያ መካከል ተፈጥሮ የነበረውን አለመግባባት የቀረፈ ስምምነት ነበር። ስምምነቱ በሁለቱ ሀገራት መካከል ሰላምና ትብብርን የሚያጎለብት፣ የሀገራቱን ሕዝቦች ትስስር ይበልጥ የሚያጠናክር፣ ለቀጣናው ሰላም፣ ልማትና ብልጽግና የሚበጅ ታሪካዊ ስምምነት እንደነበርም ይታወሳል። የአንካራ ስምምነት ኢትዮጵያ የባህር በር እንድታገኝ ለምታደርገው ጥረት በር ከፋች ሆኗል። በዚህም የኢትዮጵያ የባህር በር የማግኘት መሻት ዓለም አቀፍ ዕውቅና እንዲያገኝም አስችሏል። በዚህም የኢትዮጵያ የባህር በር የመሻት ጥያቄ ህጋዊ፣ ሞራላዊና ፖለቲካዊ መሰረት ያለው ነው። ይህም ትልቅ ዲፕሎማሲያዊ ስኬት ተደርጎ የሚወሰድ ነው፡፡ የዘርፉ ምሁራንም ስምምነቱ ከሁለቱ ሀገራት ባሻገር ለወዳጅ ሀገራት ጭምር ተስፋ የፈነጠቀ ክስተት ነው ሲሉም ገልጸውታል።   ጠቅላይ ሚኒስትር ዐቢይ አሕመድ(ዶ/ር) በወቅቱ እንደተናገሩት፤ ሶማሊያን ከአሸባሪዎች ለመከላከልና ሠላሟን ለማረጋገጥ ሲባል በሺዎች የሚቆጠሩ የኢትዮጵያ መከላከያ ኃይል አባላት በከፈሉት መስዋዕትነት ጭምር የተሳሰረ መሆኑን ነው የገለጹት። ኢትዮጵያ ለጋራ ሠላምና ልማት ከሶማሊያ ጋር ለመስራት ቁርጠኛ መሆኗንም ጠቅላይ ሚኒስትሩ በወቅቱ አረጋግጠዋል። የሶማሊያው ፕሬዝዳንት ሐሰን ሼክ ሞሐሙድም ለዚህ ሀቅ ጠንካራ እማኝነታቸውን ሰጥተው የኢትዮጵያ መከላከያ ሰራዊት ለሀገሪቱ ሠላም መጠበቅ ለዓመታት የከፈለውን ዋጋ መቼም አይዘነጋም ሲሉ የሚገባውን ክብር መስጠታቸውም ይታወሳል። ሶማሊያ የኢትዮጵያ እውነተኛ ወዳጅ ሆና ትቀጥላለች ሲሉም ማረጋገጣቸው እንዲሁ። ሁለቱ ሀገራት በቀጣይም ሠላምን ለማፅናት በሚያደርጉት ጥረት መንግሥታቸው ቁርጠኛ መሆኑን ተናግረው ነበር። ከስምምነቱ በኋላ በሁለቱ ሀገራት መሪዎች መካከል የጉብኝት ልውውጦች ተደርገዋል። የሶማሊያው ፕሬዝዳንት ሀሰን ሼክ መሐሙድ በጥር ወር 2017 ዓ.ም ኢትዮጵያን መጎብኘታቸው ይታወሳል። ሀሰን ሼክ ማሃሙድ ከጠቅላይ ሚኒስትር ዐቢይ አሕመድ(ዶ/ር) ጋር መወያየታቸውና የጋራ መግለጫ ማውጣቸው አይዘነጋም። በውይይቱ ሁለቱ ሀገራት በየሀገራቱ ያላቸው ሙሉ የዲፕሎማሲ ውክልና በመመለስ ያላቸውን የሁለትዮሽ ግንኙነት ወደ ነበረበት ለመመለስ እና ለማሻሻል ከስምምነት ላይ ደርሰዋል። የሀገራቱ መሪዎች የዲፕሎማሲ ሚሲዮኖቻቸው በባለብዝሃ ወገንና በቀጣናዊ ፎረሞች ላይ የሀገራቱ የጋራ ፍላጎቶች ላይ በቅርበት መስራት እንዳለባቸውም አጽንኦት መስጠታቸው ይታወሳል። መሪዎቹ ለቀጣናው መረጋጋት የሁለቱ ሀገራት በጋራ መተማመንና መከባበር ላይ የተመሰረተ ጠንካራ ትብብር እንደሚያስፈልግም ገልጸዋል። በቀጣናዊ ጉዳዮች ላይ ያላቸውን ትብብር ለማሻሻል፣ የጋራ መግባባት ለመፍጠርና የጋራ ግቦችን እውን ለማድረግ በትብብር ለመስራት ከስምምነት ላይ ደርሰዋል። በተጨማሪም በውይይቱ ላይ ኢትዮጵያ እና ሶማሊያ የጸጥታና ደህንነት ትብብራቸውን ለማጠናከር ቀጣይነት ያለው ስራ ማከናወን እንደሚያስፈልግም ተመላከቷል። በየጊዜው እያደገ የመጣውና አሳሳቢ የሆነው የታጠቁ ቡድኖች በቀጣናው ላይ የደቀኑት ስጋት በውይይቱ መነሳቱም ይታወሳል። በተጨማሪም መሪዎቹ ሁለቱ ሀገራት በኢኮኖሚ፣ ኢንቨስትመንት እና ንግድ ያላቸውን ትብብር ይበልጥ ለማጠናከር መስራት እንዳለባቸውም ገልጸዋል። ኢትዮጵያ እና ሶማሊያ ጠንካራ የኢኮኖሚ ትብብር በመፍጠር የንግድ ትስስራቸውን የሚያሳልጡ የመሰረተ ልማት መስመሮችን ለማስፋት እና የጋራ ብልጽግናቸውን ለማረጋገጥ ከስምምነት ላይ መድረሳቸው በጋራ መግለጫው ላይ ተጠቅሷል። መሪዎቹ ለአንካራው ስምምነት ትግበራ በቁርጠኝነት እንደሚሰሩ ገልጸው ስምምነቱ ከሀገራቱ የወዳጅነት እና የአጋርነት መንፈስ የመነጨ እንደሆነም ተወስቷል። በስምምነቱ የተቀመጠውን የቴክኒክ ድርድሮች በፍጥነት እንዲጀመሩ ለማድረግ ከስምምነት ላይ መድረሳቸውን በጋራ መግለጫው መመላከቱም እንዲሁ። ጠቅላይ ሚኒስትር ዐቢይ አሕመድ(ዶ/ር) እና የልዑካን ቡድናቸው በየካቲት ወር 2017 ሶማሊያን መጎብኘታቸው የሚታወስ ነው። የውጭ ጉዳይ ሚኒስትር ጌዲዮን ጢሞቲዎስ(ዶ/ር) ጠቅላይ ሚኒስትር ዐቢይ አሕመድ(ዶ/ር ) በሶማሊያ ያደረጉትን ጉብኝት አስመልክቶ በወቅቱ በሰጡት ማብራሪያ ጉብኝቱ የሁለቱን ጎረቤት ሀገራት ትብብርና ትስስር ወደ ላቀ ደረጃ ከፍ በማድረግ ረገድ ትልቅ ትርጉም የሚሰጠው እንደሆነ አንስተው ነበር። ጉብኝቱ ሀገራቱ ወደ አዲስ የትብብር እና የወዳጅነት ምዕራፍ እንደደረሱ የሚያመላክት መሆኑን ጠቁመው ቀደም ብሎ በተለያየ ደረጃ ሲደረጉ የነበሩ ውይይቶችና ጉብኝቶች የሀገራቱን ትብብር ይበልጥ መጠናከሩን የሚያሳዩ በተለይም በፀጥታው ዘርፍ እና በሰላም ማስከበር ኢትዮጵያ ያላትን ተሳትፎና የሀገራቱን ትብብር መልክ ያስያዙ መናቸውንም እንዲሁ። የመሪዎቹ የጉብኝት ልውውጦች የሁለትዮሽ ግንኙነታቸው እንዲሻሻል የሰጡትን ትኩረትና ያላቸውን የፖለቲካ ቁርጠኝነት እንደሚያሳይም ተናግረው ነበር። የጠቅላይ ሚኒስትሩ ጉብኝት፥ በሁለቱ ሀገራት መካከል ባለፉት ጥቂት ወራት የነበራቸውን ገንቢ ውይይቶች ተከትሎ የመጣ እና የሀገራቱን የሁለትዮሽ ግንኙነት ወደ ነበረበት የመመለስን ስራ የሚያጠናክር መሆኑን የሀገራቱ መንግስታት የጋራ አቋም መግለጫ አመልክቷል። የሁለቱ መሪዎች የሀገራቱን የጋራ ተጠቃሚነት ባረጋገጠ መልኩ ትብብራቸውን ለማጠናከር ቁርጠኛ መሆናቸውን ገልጸዋል። የሀገራቱ ህዝቦች ጥልቅ የሆነ ታሪካዊ ግንኙነትና የሚያስተሳስራቸው የጋራ ድንበር እንዳላቸው ያወሳው መግለጫው፥ በዚህ ረገድም በዲፕሎማሲያዊ፣ ኢኮኖሚያዊና ማህበራዊ ትብብር መተማመንን መገንባት ወሳኝ መሆኑ እንደታመነበትም ተመላክቷል። ኢትዮጵያ እና ሶማሊያ ለቀጣናዊ መረጋጋት እና ብልጽግናን እውን የማድረግ የጋራ ራዕይ ያላቸው ሀገራት መሆናቸውንም አመላክቷል። በዚህ ረገድ የሀገራቱ መሪዎች ዘላቂ ልማትን የሚያረጋግጡ፣ የኢኮኖሚ ትስስርን የሚያሳልጡና የህዝብ-ለህዝብ ትስስርን የሚያጠናክሩ ስትራቴጂካዊ የመሰረተ ልማት ፕሮጀክቶችን ለመተግበር ከስምምነት ላይ መድረሳቸውን ነው መግለጫው ያመለከተው። በተጨማሪም መሪዎቹ በአንካራ የኢትዮጵያ እና የሶማሊያ የቴክኒክ ውይይት መጀመሩ መልካም የሚባል መሆኑንና ይህም ሀገራቱ ገንቢ ውይይትና ትብብር ለመፍጠር ያላቸውን ጽኑ ፍላጎት የሚያሳይ መሆኑ ተመላክቷል። መሪዎቹ በሶማሊያ ብሔራዊ ወታደራዊ ኃይል እና በኢትዮጵያ የሀገር መከላከያ ሰራዊት አዛዦች መካከል የደህንነት ትብብር ለማጠናከር ብሎም ቀጣናዊ መረጋጋትን ለማስፈን ለደረሱበት የጋራ መግባባት እውቅና ሰጥተዋል። ሁለቱ ወገኖች የጋራ ፍላጎታቸውን በማራመድ፣ ሰላም እና ደህንነትን በማረጋገጥ እንዲሁም የሁለትዮሽ ግንኙነታቸውን ይበልጥ በማጠናከር ዜጎቻቸውን አልፈውም የአፍሪካ ቀንድን ተጠቃሚ ለማድረግ በጋራ እንደሚሰሩ መግለጻቸውም በመግለጫው ተንጸባርቋል። የሶማሊያ ፕሬዚዳንት ሀሰን ሼህ መሃሙድ በጳጉሜን ወር 2017 ዓ.ም በኢትዮጵያ በነበራቸው ጉብኝት በቀጣናችን ፀጥታ እና መረጋጋት ብሎም ልማትን ለማረጋገጥ ያለንን ፅኑ አቋም በድጋሜ አረጋግጠናል ሲሉ በወቅቱ ጠቅላይ ሚኒስትር ዐቢይ አሕመድ(ዶ/ር) ገልጸዋል። የኢትዮጵያ እና ሶማሊያ መልካም ጉርብትና ትስስር ማደግ ለሀገራቱ መጻኢ ጊዜ አጋርነት መሰረትን የሚጥል በጎ ጅማሮ ነው። ከሀገራቱ ባለፈ ለአፍሪካ ቀንድ መልካምና ተስፋ ሰጪ ብስራት ነው ማለት ይቻላል። የሁለቱ ሀገራት የዲፕሎማሲ፣ ኢኮኖሚያዊና የደህንነት ትብብር ማደግ ለቀጣናው መረጋጋት፣ ንግድ ትስስር መጠናከር እና የጋራ እድገትን የሚያሳልጥ ነው። የሀገራቱ ትስስር መጠናከር እንደ መልካም የዲፕሎማሲ እርምጃ የሚታይ ብቻ ሳይሆን በአፍሪካ ቀንድ መረጋጋት፣ አንድነት እና የኢኮኖሚ እድገትን ለማረጋገጥ ስትራቴጂካዊ እድል ይዞ መጥቷል። የሶማሊያው ፕሬዝዳንት ሀሰን ሼክ መሐሙድ በቅርቡ በታላቁ የኢትዮጵያ ሕዳሴ ግድብ ምርቃት ላይ ያደረጉት ንግግርም ይህንኑ ሀሳብ የሚያጠናክር ነው። በዚህ ወቅትም የግድቡ ተገንብቶ መመረቅ ለቀጣናው ኩራት መሆኑን ማንሳታቸው ይታወሳል። የግድቡ ግንባታ መጠናቀቅ ኢትዮጵያ እየሄደችበት ላለው የብልጽግና ጉዞ ወሳኝ መሆኑንና ፕሮጀክቱ ከአንድ ግድብነት ያለፈ መሆኑንም ተናግረዋል። በንግግራቸውም የሶማሊያ ፍላጎት በትብብር መልማትና ማደግ መሆኑን አሳውቀዋል። ኢትዮጵያ በራሷ አቅም ያከናወነችው ሥራ ትልቅ ታሪክ መሆኑን በመግለጽ፤ ለሀገራቸው የሚጠቅም ተነሳሽነት መሆኑንም ነው ያስረዱት። የትብብሩ እድገት ለመሰረተ ልማት ትብብር፣ ለድንበር ተሻጋሪ የንግድ ልውውጥና የደህንነት ስጋቶች እንዲሁም አየር ንብረት ለውጥን ጨምሮ ለጋራ ፈተናዎች በተቀናጀ መልኩ ምላሽ ለመስጠት በር ይከፍታል። የኢትዮጵያ እና የሶማሊያ የሁለትዮሽ ግንኙነት ለአፍሪካ እና ለምስራቅ አፍሪካ ቀጣና ትስስር ግቦች መሳካት ትልቅ ድርሻ ይወጣል።