አዲስ አበባ፤ ጥቅምት 17/2019 (ኢዜአ)፦ በኢትዮጵያ ፕሪሚየር ሊግ የአራተኛ ሳምንት መርሐ ግብር መቻል ኢትዮጵያ መድንን 3 ለ 1 ረትቷል። በአዲስ አበባ ስታዲየም በተካሄደው ጨዋታ ቸርነት ጉግሳ፣ ፈቱዲን ጀማል (ፍጹም ቅጣት ምት) እና መሐመድ አበራ ግቦቹን አስቆጥረዋል። ናይጄሪያዊው አማኑኤል ኦሊሳ የኢትዮጵያ መድንን ብቸኛ ጎል ከመረብ ላይ አሳርፏል። በሊጉ ሶስተኛ ድሉን ያስመዘገበው መቻል በዘጠኝ ነጥብ ደረጃውን ከአምስተኛ ወደ አንደኛ ከፍ አድርጓል። በውድድር ዓመቱ የመጀመሪያ ሽንፈቱን ያስተናገደው ኢትዮጵያ መድን በአራት ነጥብ 10ኛ ደረጃን ይዟል። ቡድኑ አንድ ቀሪ ጨዋታ አለው። ጨዋታውን ተከትሎ የአራተኛ ሳምንት መርሐ ግብር ተጠናቋል። የአምስተኛ ሳምንት ጨዋታዎች ከጥቅምት 20 2019 ዓ.ም አንስቶ ይካሄዳሉ።

አዲስ አበባ፤ ጥቅምት 17/2019 (ኢዜአ)፦ በአገሪቱ የተገነቡና በግንባታ ላይ የሚገኙ የስፖርት መሠረተ ልማቶችን ኃላፊነት በተሞላበት መንገድ በመጠቀም፣ ለሀገራዊ ኢኮኖሚያዊና ማህበራዊ ልማት የሚኖራቸውን ሁለገብ ሚና ማጠናከር እንደሚገባ የወጣቶችና ስፖርት ሚኒስትር አክሊሉ ታደሰ (ዶ/ር) ገለጹ። የወጣቶችና ስፖርት ሚኒስቴር ከሀገር አቀፍ የስፖርት ማኅበራትና ከባለድርሻ አካላት ጋር የምክክር መድረክ እያካሄደ ነው።   የወጣቶችና ስፖርት ሚኒስትር አክሊሉ ታደሰ (ዶ/ር) በዚሁ ወቅት፣ ስፖርትን እንደ መዝናኛና ውድድር ብቻ ሳይሆን፣ እንደ ሀገራዊ ልማት ስትራቴጂካዊ ዘርፍና የማኅበራዊ ለውጥ መሣሪያ አድርጎ መመልከት እንደሚገባ አስገንዝበዋል። ስፖርት ዜጎችን የሚያቀራርብ፣ የሥራ ባህልን የሚያጎለብት፣ ወጣቶች በአዎንታዊ ተግባራት እንዲሳተፉ የሚያበረታታ፣ የኢኮኖሚ እንቅስቃሴን የሚያነቃቃ እንዲሁም ሀገራዊና ዓለም አቀፋዊ ተሳትፎን የሚያጠናክር አቅም መሆኑንም ጠቁመዋል። ይህንን ለማሳካት የመንግሥት ጥረት ብቻ በቂ ባለመሆኑ፣ የስፖርት ማኅበራትና በዘርፉ የሚሳተፉ ሌሎች ተቋማት በጋራ ኃላፊነት፣ በተቀናጀ አሠራርና በተጠያቂነት መርህ መሥራት እንዳለባቸው አመልክተዋል። በተጨማሪም የስፖርት ልማት ዘላቂ ውጤት እንዲያመጣ በፖሊሲ፣ በሕግ፣ በተቋማዊ አቅም፣ በሰው ኃይል፣ በመሠረተ ልማትና በውጤታማ አስተዳደር መደገፍ እንደሚያስፈልግ ገልጸዋል። የስፖርት ማኅበራት ውድድሮችን ከማዘጋጀት ባለፈ፣ ተተኪ ስፖርተኞችን በማፍራት፣ የስፖርት ሥርዓቱን በማጠናከር፣ ለሁሉም የማኅበረሰብ ክፍሎች እኩል የተሳትፎ ዕድል በመፍጠርና የሚገነቡ የስፖርት መሠረተ ልማቶችን በኃላፊነት በመጠቀም ለሀገራዊ ልማት የሚኖራቸውን ሚና ማጠናከር እንዳለባቸው አሳስበዋል። የስፖርት ዘርፉ ለሀገራዊ ልማት የሚያበረክተውን አስተዋጽኦ ለማሳደግ፣ የስፖርት ማኅበራት በጋራ ራዕይ፣ በተቀናጀ እቅድና በተጨባጭ ውጤት ላይ ተመስርተው መሥራት እንደሚገባቸው አስረድተዋል።  

አዲስ አበባ፤ ጥቅምት 17/2019 (ኢዜአ)፦ የእንግሊዝ ካራባኦ ካፕ አራተኛ ዙር መርሐ ግብር ዛሬ ይጀመራል። ምሽት አምስት ሰዓት ላይ በሀይበሪ ስታዲየም ፍሊትውድ ታውን አርሰናልን ያስተናግዳል። በሊግ ቱ (የእንግሊዝ አራተኛ የሊግ እርከን) የሚገኘው ፍሊትውድ ታውን በሶስተኛው ዙር ሼፍልድ ዩናይትድን 1 ለ 0 አሸንፏል። ክለቡ ወደ አራተኛው ዙር ሲያልፍ በካራባኦ ካፕ ተሳትፎው ለመጀመሪያ ጊዜ ነው። ተጋጣሚው አርሰናል በሶስተኛው ዙር ኤፕስዊች ታውንን 4 ለ 2 በመርታት 16ቱን ተቀላቅሏል። ሁለቱ ክለቦች እርስ በእርስ ሲገናኙ በታሪክ ለመጀመሪያ ጊዜ ነው። አርሰናል የማሸነፉን ከፍተኛ ግምት ወስዷል። መድፈኞቹ ለመጨረሻ ጊዜ ዋንጫውን ያነሱት እ.አ.አ በ1993 የውድድር ዓመት ነው። የጨዋታው አሸናፊ ወደ ሩብ ፍጻሜ ያልፋል። በሌላኛው መርሐ ግብር ብራድፎርድ ሲቲ ከፒተርቦሮው ምሽት አምስት ሰዓት ላይ በኖርዝ ኮሜርሻልስ ስታዲየም ጨዋታቸውን ያደርጋሉ። የካራባኦ ካፕ የአራተኛ ዙር መርሐ ግብር እስከ ጥቅምት 19 2019 ዓ.ም ይቆያል። አሸናፊ ክለቦች ሩብ ፍጻሜውን ይቀላቀላሉ።

አዲስ አበባ፤ ጥቅምት 17/2019 (ኢዜአ)፦ የኢትዮጵያ ፕሪሚየር ሊግ አራተኛ ሳምንት ዛሬ ፍጻሜውን ያገኛል። ከቀኑ 9 ሰዓት ኢትዮጵያ መድን ከመቻል በአዲስ አበባ ስታዲየም ከቀኑ ዘጠኝ ሰዓት ላይ የሚያደርጉት ጨዋታ ተጠባቂ ነው። አንድ ተስተካካይ ጨዋታ ያለው ኢትዮጵያ መድን በአራት ነጥብ 10ኛ ደረጃን ይዟል። ተጋጣሚው መቻል በበኩሉ በስድስት ነጥብ አምስተኛ ደረጃ ላይ ተቀምጧል። ኢትዮጵያ መድን በሶስተኛ ሳምንት ከሲዳማ ቡና ጋር ሊያደርግ የነበረው መርሐ ግብር በካፍ ሻምፒዮንስ ሊግ ማጣሪያ ምክንያት ወደ ሌላ ጊዜ መተላለፉ ይታወቃል። በሶስተኛ ሳምንት መርሐ ግብር አዲስ አዳጊውን ጋሞ ጨንቻን 1 ለ 0 ያሸነፈው መቻል ተከታታይ ድሉን ለማስመዝገብ ይጫወታል። ሁለቱ ክለቦች በ2018 ዓ.ም የውድድር ዓመት ያደረጓቸው ሁለት ጨዋታዎች በመቻል አሸናፊነት ተጠናቀዋል። መቻል በጨዋታዎቹ በተመሳሳይ 1 ለ 0 በማሸነፍ ከመድን ጋር ካደረጋቸው ጨዋታዎች ስድስት ነጥብ ወስዷል። ባለፈው የውድድር ለመጨረሻ ጊዜ በተገናኙበት የ36ኛ ሳምንት መርሐ ግብር መቻል በመሐመድ አበራ ጎል ማሸነፉ የሚታወስ ነው። የዛሬው ጨዋታ ተመጣጣኝ ፉክክር ይደረግበታል የሚል ግምት አግኝቷል።

አዲስ አበባ፤ ጥቅምት 17 /2019 (ኢዜአ)፦ እንግሊዛዊው የባየር ሙኒክ ተጫዋች ሃሪ ኬን የ70ኛው የፍራንስ ፋትቦል የወንዶች ባሎን ዶር ሽልማት አሸናፊ ሆኗል። የባሎን ዶር የሽልማት ስነ ስርዓት ትናንት ማምሻውን በለንደን ተካሄዷል። ሽልማቱ የ2025/26 የተጫዋቾች እና አሰልጣኞች ብቃት መሰረት በማድረግ የተበረከተ ነው። የ33 ዓመቱ የባየር ሙኒክ አጥቂ ሃሪ ኬን በጉጉት ሲጠበቅ የነበረውን የባሎንዶር ሽልማትን አግኝቷል። ኬን ባለፈው የውድድር ዓመት 73 ግቦችን ያስቆጠረ ሲሆን ሶስት ዋንጫዎችን ከቡድኑ ጋር አንስቷል። በተጨማሪም ተጫዋቹ ስምንት ግብ የሆኑ ኳሶችን አቀብሏል። እ.አ.አ በ2001 ማይክል ኦውን ካሸነፈ በኋላ ትልቁን ክብር ያገኘ እንግሊዛዊ ተጫዋች ሆኗል። ኬን በተጨማሪም የዓመቱ ምርጥ አጥቂ (ገርድ ሙለር አዋርድ) ሽልማትንም አግኝቷል። የሪያል ማድሪዱ ኪሊያን ምባፔ ሁለተኛ እና የባርሴሎናው ላሚን ያማል ሶስተኛ ደረጃን ይዘዋል። የባርሴሎናው ሮድሪ አራተኛ እና የኢንተር ሚያሚው ሊዮኔል አምስተኛ ደረጃን ይዘው አጠናቀዋል። የ33 ዓመቷ የአማካይ ተጫዋች አሌክሲያ ፑቴያስ (ለንደን ሲቲ ላዮንስ/ ባርሴሎና) የሴቶች የባሎን ዶር ሽልማት አሸናፊ ሆናለች። ከአይታና ቦንማቲ በመቀጠል ሽልማቱን ለሶስተኛ ጊዜ ያሸነፈች ሁለተኛዋ ሴት ተጫዋች ሆናለች። ኤዋ ፓጆር (ባርሴሎና) ሁለተኛ እና ከድጃ ሾው (ማንችስተር ሲቲ) ሶስተኛ ደረጃን ይዘዋል። የባርሴሎና ተጫዋቾች ያለፉትን ስድስት የሴቶች የባሎን ዶር ሽልማት በመውሰድ የበላይነቱን ይዘዋል። የ65 ዓመቱ ስፔናዊ የስፔን ብሔራዊ ቡድን አሰልጣኝ ሉዊስ ዴላ ፉዌንቴ የዓመቱ ምርጥ ወንድ አሰልጣኝ እና የ32 ዓመቱ የባርሴሎና አሰልጣኝ ፔሬ ሮሜዉ የዓመቱ ምርጥ ሴት አሰልጣኝ ሽልማትን አግኝተዋል። የ18 ዓመቱ የባርሴሎና ተጫዋች ላሚን ያማል የዓመቱ ምርጥ ታዳጊ ሽልማት (ኮፓ ትሮፊ) አግኝቷል። በሴቶች የባርሴሎናዋ ቪኪ ሎፔዝ አሸናፊ ሆናለች። የስፔን ብሔራዊ ቡድን የግብ ዘብ ኡናይ ሲሞን የወንዶች የዓመቱ ምርጥ ግብ ጠባቂ ሽልማት (ያሺን ትሮፊ) ሲያገኝ በሴቶች በተካሄደው ሽልማት የባርሴሎናዋ ግብ ጠባቂ ካታ ኮል አሸናፊ ሆናለች። ሜክሲካዊቷ የፓቹካ አጥቂ ቻርሊን ኮራል የዓመቱ ከፍተኛ ግብ አስቆጣሪ ሽልማት (ገርድ ሙለር አዋርድ) ተሸላሚ ሆናለች። ፒኤስጂ የዓመቱ ምርጥ የወንድ ክለብ እንዲሁም ባርሴሎና የዓመቱ ምርጥ ሴት ክለብ በመሆን ተመርጠዋል። የአርሰናሉ ቡካዮ ሳካ የሰብዓዊ ሽልማት (ሶክራትስ አዋርድ) ተሸላሚ ሆኗል። የባሎን ዶር አሸናፊ የተለየው በፊፋ የአገራት የእግር ኳስ ደረጃ ከአንድ እስከ 100 የሚገኙ አገራት የተመረጡ 100 ጋዜጠኞች (ከእያንዳንዱ አገር አንድ ጋዜጠኛ) በሰጡት ድምጽ አማካኝነት ነው። የግል ብቃት፣፣ የቡድን ስኬት እንዲሁም ስፖርታዊ ጨዋነት ለባሎን ዶር ሽልማት የሚያበቁ ዋነኛ መመዘኛ መስፈርቶች ናቸው። ባሎን ዶር ከእ.አ.አ ከ1956 አንስቶ በፍራንስ ፋትቦል መፅሔት በዓመት ውስጥ የተሻለ ብቃት ላሳየ ተጫዋች የሚሰጥ ሽልማት ነው። እ.አ.አ በ2023 የአውሮፓ እግር ኳስ ማህበር (ዩኤፋ) እና የፈረንሳይ የስፖርት መፅሔት ፍራንስ ፋትቦል ባለቤት ግሩፕ አማውሪ ጋር በተፈረመ የትብብር ስምምነት ሽልማቱን ከ2024 ጀምሮ በጋራ መስጠት ጀምረዋል። ፍራንስ ፋትቦል በስምምነቱ መሰረት ድምጽ የመስጠት መብቱን ይዞ ቀጥሏል።

አዲስ አበባ፤ ጥቅምት 16/2019 (ኢዜአ)፦ በኢትዮጵያ ፕሪሚየር ሊግ አራተኛ ሳምንት ወላይታ ድቻ ሀላባ ከተማን 6 ለ 0 አሸንፏል። ማምሻውን በሀዋሳ ዩኒቨርሲቲ ስታዲየም በተካሄደው ጨዋታ መሳይ ሰለሞን ሶስት ግቦችን በማስቆጠር ሀትሪክ ሰርቷል። መሳይ በዘንድሮው የውድድር ዓመት ሀትሪክ የሰራ የመጀመሪያው ተጫዋች ሆኗል። ሱሌይማን ሀሚድ፣ ቴዎድሮስ ታፈሰ እና ቶጓዊው ያኦቪ ጆሴፍ ቀሪዎቹን ጎሎች ከመረብ ላይ አሳርፈዋል። ቤኒናዊው የሀላባ ከተማ ግብ ጠባቂ ራያን ኦቢን በ82ኛው ደቂቃ በቀይ ካርድ ከሜዳ ወጥቷል። በጨዋታው ወላይታ ድቻ ከፍተኛ ብልጫ ወስዷል። መርሐ ግብሩ በዘንድሮው የውድድር ከፍተኛ የግብ መጠን የተቆጠረበት ጨዋታ ሆኗል። በሊጉ የመጀመሪያ ድሉን ያስመዘገበው ወላይታ ድቻ በአምስት ነጥብ ደረጃውን ከ15ኛ ወደ 6ኛ ከፍ አድርጓል። በአንጻሩ በውድድር ዓመቱ የመጀመሪያ ሽንፈቱን ያስተናገደው አዲስ አዳጊው ሀላባ ከተማ በአምስት ነጥብ ከነበረበት 6ኛ ደረጃ ወደ 9ኛ ዝቅ ብሏል። በአምስተኛ ሳምንት ወላይታ ድቻ ከወልዋሎ አዲግራት ዩኒቨርሲቲ፣ ሀላባ ከተማ ከሀዲያ ሆሳዕና ይጫወታሉ። የኢትዮጵያ ፕሪሚየር ሊግ አራተኛ ሳምንት ነገ ኢትዮጵያ መድን እና መቻል በሚያደርጉት ጨዋታ ፍጻሜውን ያገኛል።

አዲስ አበባ ፤ ጥቅምት 16/2019 (ኢዜአ) ፦ በኢትዮጵያ ሴቶች ፕሪሚየር ሊግ የመጀመሪያ ሳምንት መርሐ ግብር ኢትዮ ኤሌክትሪክ ድሬዳዋ ከተማን 1 ለ 0 አሸንፏል። በአበበ ቢቂላ ስታዲየም በተካሄደው ጨዋታ ቤተልሄም መንተሎ በ47ኛው ደቂቃ ግቡን አስቆጥራለች። ውጤቱን ተከትሎ አምና ሁለተኛ ደረጃን ይዞ ያጠናቀቀው ኢትዮ ኤሌክትሪክ የመጀመሪያ ሶስት ነጥቡን አግኝቷል። ድሬዳዋ ከተማ ሊጉን በሽንፈት ጀምሯል። ጨዋታውን ተከትሎ የአንደኛ ሳምንት መርሐ ግብር ተጠናቋል።

አዲስ አበባ ፤ ጥቅምት 16/2019 (ኢዜአ) ፦ በኢትዮጵያ ፕሪሚየር ሊግ የአራተኛ ሳምንት ጨዋታ ጋሞ ጨንቻ እና ኢትዮጵያ ንግድ ባንክ ያለ ግብ አቻ ተለያይተዋል። የሁለቱ ቡድኖች ጨዋታ በአርባምንጭ ዩኒቨርሲቲ አባያ ካምፓስ ስታዲየም ተካሄዷል። በሊጉ የመጀመሪያ ነጥቡን ያገኘው ጋሞ ጨንቻ 17ኛ ደረጃን ይዞ ወራጅ ቀጠና ውስጥ ይገኛል። ቡድኑ አንድ ተስተካካይ ጨዋታ ይቀረዋል። በተከታታይ ጨዋታዎች አቻ የወጣው ኢትዮጵያ ንግድ ባንክ በስምንት ነጥብ ሁለተኛ ደረጃ ላይ የሚገኝ ሲሆን መሪነቱን ለነገሌ አርሲ አስረክቧል። በአምተኛ ሳምንት ጋሞ ጨንቻ ከሀዋሳ ከተማ፣ ኢትዮጵያ ንግድ ባንክ ከኢትዮጵያ መድን ጨዋታቸውን ያደርጋሉ።

አዲስ አበባ ፤ ጥቅምት 16/2019 (ኢዜአ) ፦ በኢትዮጵያ ፕሪሚየር ሊግ የአራተኛ ሳምንት መርሐ ግብር ቅዱስ ጊዮርጊስ እና ሸገር ከተማ ያደረጉት ጨዋታ ሁለት አቻ በሆነ ውጤት ተጠናቋል። በአዲስ አበባ ስታዲየም በተካሄደው ጨዋታ አማኑኤል ኤርቦ እና ናትናኤል ዳንኤል ለቅዱስ ጊዮርጊስ ግቦቹን አስቆጥረዋል። አሚር አብዶ እና ቢኒያም ፍቅሩ የሸገር ከተማን ጎሎች ከመረብ ላይ አሳርፈዋል። ቅዱስ ጊዮርጊስ በሊጉ የመጀመሪያ ድሉን የማስመዝገብ እድሉን አልተጠቀመበትም። እስከ አሁን ባደረጋቸው አራት ጨዋታዎች ያገኘው ሶስት ነጥብ ብቻ ነው። በውድድር ዓመቱ ለሁለተኛ ጊዜ አቻ የወጣው ሸገር ከተማ ነጥቡን ወደ አምስት ከፍ አድርጓል። በአምስተኛ ሳምንት ቅዱስ ጊዮርጊስ ከኢትዮ ኤሌክትሪክ፣ ሸገር ከተማ ከነገሌ አርሲ ጨዋታቸውን ያደርጋሉ። በሌላኛው መርሐ ግብር ነገሌ አርሲ አዳማ ከተማን 1 ለ 0 ረትቷል። በሀዋሳ ዩኒቨርሲቲ ስታዲየም በተደረገው ጨዋታ ካሜሮናዊው የመሐል ተከላካይ ዴዚሬ ፓስካል በ33ኛው ደቂቃ ጎሉን አስቆጥሯል። ነገሌ አርሲ በሊጉ ሁለተኛ ድሉን ሲያስመዘግብ አዳማ ከተማ የመጀመሪያ ሽንፈቱን አስተናግዷል።

አዲስ አበባ፤ ጥቅምት 16/2019(ኢዜአ)፦ ኢትዮጵያውያን አትሌቶች በጀርመን እና በአየርላንድ በተካሄዱ ማራቶኖች በሁለቱም ጾታዎች የውድድሩ አሸናፊ በመሆን ደምቀዋል። በጀርመን በተደረገው የፍራንክፈርት ማራቶን በወንዶች ምድብ አትሌት ጂራ ታሌሊሳ የራሱን የግል ምርጥ ሰዓት በማሻሻል 2 ሰዓት ከ05 ደቂቃ ከ26 ሰከንድ አሸናፊ ሆኗል። በወንዶች ምድብ የተሳተፈው አትሌት አቤ ጋሻሁን 2 ሰዓት ከ07 ደቂቃ ከ19 ሰከንድ በመግባት 6ኛ ደረጃን ይዞ አጠናቋል። በዚሁ የፍራንክፈርት ማራቶን በሴቶች ምድብ አትሌት ዘይነባ ይመር 2 ሰዓት ከ19 ደቂቃ ከ45 ሰከንድ አሸንፋለች። አትሌት በሪሃ ገብረ ዮሐንስ በ2:22:46 3ኛ፣ አትሌት አሰለፍ አማረ 2:25:31 4ኛ፣ አትሌት ስራነሽ ይርጋ 2:26:05 5ኛ፣ አትሌት ምህረት ገመዳ 2:26:49 6ኛ፣ እንዲሁም አትሌት ብርቄ በየነ 2:31:00 9ኛ ደረጃን በመያዝ አጠናቀዋል። በተያያዘም በአየርላንድ በተካሄደው የደብሊን ማራቶን ኢትዮጵያውያን አትሌቶች በሁለቱም ጾታዎች አሸንፈዋል። በወንዶች ምድብ አትሌት አባይ አለሙ 2 ሰዓት ከ10 ደቂቃ ከ29 ሰከንድ ውድድሩን በአንደኝነት አጠናቋል። በሴቶች ምድብ ደግሞ አትሌት ዘነቡ ፍቅዳው 2 ሰዓት ከ24 ደቂቃ ከ26 ሰከንድ የደብሊን ማራቶን አሸናፊ መሆኗን የኢትዮጵያ አትሌቲክስ ፌዴሬሽን መረጃ ያመለክታል።

አዲስ አበባ፤ ጥቅምት 16/2019 (ኢዜአ)፦ የኢትዮጵያ ሴቶች ፕሪሚየር ሊግ የመጀመሪያ ሳምንት ዛሬ ይጠናቀቃል። ኢትዮ ኤሌክትሪክ ከድሬዳዋ ከተማ በአበበ ቢቂላ ስታዲየም ከቀኑ 10 ሰዓት ላይ ይጫወታሉ። አምና እስከ መጨረሻው ሳምንት ዋንጫ ለማንሳት ፉክክር ያደረገው ኢትዮ ኤሌክትሪክ በ66 ነጥብ ሁለተኛ ደረጃን ይዞ አጠናቋል። ተጋጣሚው ድሬዳዋ ከተማ ባለፈው የውድድር ዓመት በ28 ነጥብ ስምንተኛ ደረጃ ይዞ መጨረሱ የሚታወስ ነው። ሁለቱ ክለቦች በ2018 ዓ.ም ባደረጓቸው የእርስ የእርስ የሊግ ጨዋታዎች ኢትዮ ኤሌክትሪክ በማሸነፍ ከተጋጣሚው ስድስት ነጥብ ወስዷል። ባለፈው የውድድር ዓመት ለመጨረሻ ጊዜ በተገናኙበት የ17ኛ ሳምንት መርሐ ግብር ኢትዮ ኤሌክትሪክ ድሬዳዋ ከተማን 3 ለ 1 አሸንፏል። ዙፋን ደፈርሻ፣ ማህሌት ምትኩ እና ዳግማዊት ሰለሞን የማሸነፊያ ግቦቹን ያስቆጠሩ ተጫዋቾች ናቸው። ዝናሽ ሰለሞን ለድሬዳዋ ከተማ ብቸኛውን ጎል ከመረብ ላይ አሳርፋለች። ሁለቱ ቡድኖች ዓመቱን በድል ለመጀመር ይጫወታሉ።

አዲስ አበባ፤ ጥቅምት 16/2019 (ኢዜአ)፦ 70ኛው የባሎንዶር የሽልማት ሥነ-ሥርዓት ዛሬ ማምሻውን በለንደን ይከናወናል። ይህ ግዙፍ የሽልማት መድረክ ከፈረንሳይ ውጭ ለታሪክ መጀመሪያ ጊዜ በለንደን ፓላዲየም ቴአትር ከምሽቱ አራት ሰዓት አንስቶ ይደረጋል። የቀድሞው የፈረንሳይ እና አርሰናል ኮከብ ቲዬሪ ኦንሪ እና ዝነኛዋ የስፖርት አቅራቢ ኬት ስኮት የዘንድሮውን ፕሮግራም በጋራ በመሆን በዋና አቅራቢነት ይመሩታል። በጉጉት በሚጠበቀው የወንዶች ኮከብ ተጫዋች ዘርፍ የእንግሊዙ አጥቂ ሀሪ ኬን እና የስፔኑ ወጣት ላሚን ያማል የማሸነፍ የቅድሚያ ግምቱን ወስዷል። ባለፈው ዓመት ለክለብና ለሀገሩ 73 ጎሎችን ያስቆጠረው ሀሪ ኬን በድምጽ አሰጣጥ ሂደቱ እየመራ እንደሚገኝ የተለያዩ ዘገባዎች ያመለክታሉ። የዓለም ዋንጫ ኮከቡ ኪሊያን ምባፔ፣ አርጀንቲናዊው ሊዮኔል ሜሲ እና ፈረንሳዊው ማይክል ኦሊሴ የዓመቱን ምርጥ ተጫዋች ክብር ለማሸነፍ ግምት የተሰጣቸው ሌሎች ተጫዋቾች ናቸው። የዘንድሮው የወንዶች ፉክክር በሀሪ ኬን ታሪካዊ የጎል ብዛት እና በላሚን ያማል የዓለም ዋንጫ ስኬት መካከል የሚደረግ ፍልሚያ እንደሚሆን በስፋት እየተነገረ ይገኛል። በሴቶች ዘርፍ ስፔናዊቷ አሌክሲያ ፑቴላስ ባርሴሎናን ለአራት ዋንጫዎች ስኬት በመምራቷ የዘንድሮዋ ቁጥር አንድ ተመራጭ አድርጎታል። ፑቴላስ ይህንን ክብር የምታሸንፍ ከሆነ በታሪኳ 3ኛ የባሎንዶር ዋንጫዋን በማንሳት አዲስ ታሪክ ትጽፋለች። ከ21 ዓመት በታች ባሉ ምርጥ ወጣቶች የሚሰጠውን የኮፓ ትሮፊ (Kopa Trophy) ሽልማት ላሚን ያማል የማሸነፍ የቅድሚያ ግምቱን አግኝቷል። ሌላኛው የባርሴሎና ወጣት ተከላካይ ፓው ኩባርሲ ለአሸናፊነት ይጠበቃል። የዓመቱ ምርጥ ግብ ጠባቂ የሚለይበት የያሲን ትሮፊ (Yashin Trophy) ፉክክር በአርሰናሉ ዴቪድ ራያ እና በስፔኑ ኡናይ ሲሞን መካከል እንደሚሆን ይጠበቃል። የኬፕ ቨርዴው ግብ ጠባቂ ቮዚኒሃም ግምት አግኝቷል። በአሰልጣኞች ዘርፍ ስፔንን ለዓለም ዋንጫ ስኬት ያበቃው ሉዊስ ደ ላ ፉኤንቴ፣ የፒኤስጂው ሉዊስ ኤንሪኬ እና የአርሰናሉ ሚኬል አርቴታ ይፋለማሉ። ፒኤስጂ እና አርሰናል የዓመቱ ምርጥ ክለብ ሽልማትን ለመውሰድ ትልቅ ግምት አግኝተዋል። ይህን ታላቅ ሽልማት የሚያሸንፈውን ኮከብ ለመለየት ገለልተኛ የሆነ ድምፅ አሰጣጥ ሂደት ስራ ላይ ውሏል። በፈረንሳይ እግር ኳስ መጽሔት በኩል መጀመሪያ 30 ምርጥ እጩዎች ከተለዩ በኋላ፣ የወንዶቹን አሸናፊ ለመምረጥ በፊፋ ደረጃ ከመጀመሪያዎቹ 100 ሀገራት የተውጣጡ 100 ጋዜጠኞች ድምፅ የሚሰጡ ሲሆን፤ የሴቶቹን አሸናፊ ለመለየት ደግሞ በፊፋ ደረጃ ከመጀመሪያዎቹ 50 ሀገራት የተመረጡ 50 የስፖርት ጋዜጠኞች በምርጫው ላይ ይሳተፋሉ። በዚህ የምርጫ ሂደት ላይ ተጫዋቾችም ሆኑ አሰልጣኞች በቀጥታ ድምፅ የመስጠት መብት የሌላቸው ሲሆን፣ ምርጫው ሙሉ በሙሉ በጋዜጠኞች ብቻ የሚወሰን ነው። እያንዳንዱ መራጭ ጋዜጠኛ ከ30 እጩዎች ውስጥ የራሱን ምርጥ 10 ተጫዋቾች በደረጃ (ከ1ኛ እስከ 10ኛ) ይመርጣል። በጋዜጠኞቹ ድምጽ አሰጣጥ ከፍተኛ ነጥብ ያገኘው ተጫዋች አሸናፊ ይሆናል። አሸናፊውን ለመለየት ጋዜጠኞቹ የግል ብቃትን፣ የቡድን ዋንጫ ስኬትን እንዲሁም የተጫዋቹን ስፖርታዊ ጨዋነት እና ስነ-ምግባር እንደ ዋና መመዘኛ ይጠቀማሉ። ሽልማቱ የሚሰጠው ተጫዋቾች ለአንድ የውድድር ዓመት ባሳዩት ብቃት ላይ ብቻ ተመስርቶ ነው። የዘንድሮው ባሎንዶር ለ70ኛው ጊዜ የሚካሄድ መሆኑ ለእግር ኳስ ቤተሰቡ ልዩ ትርጉም አለው። የመጀመሪያው ታሪካዊ የባሎንዶር ሽልማት በፈረንጆቹ 1956 ለእንግሊዙ ኮከብ ሰር ስታንሊ ማቲውስ መሰጠቱ የሚታወስ ነው። የባሎንዶር ሽልማት በየዓመቱ በዓለም እግር ኳስ መድረክ የላቀ ብቃት ያሳዩ ኮከቦችን በመምረጥ፣ ታሪካዊው የወርቅ ኳስ (Ballon d'Or) የክብር ሽልማት የሚሰጥበት ነው።

አዲስ አበባ፤ ጥቅምት 16/2019 (ኢዜአ)፦ በኢትዮጵያ ፕሪሚየር ሊግ አራተኛ ሳምንት የሶስተኛ ቀን ውሎ አራት ጨዋታዎች ይደረጋሉ። ከቀኑ 10 ሰዓት ላይ ጋሞ ጨንቻ ከኢትዮጵያ ንግድ ባንክ በአርባምንጭ ዩኒቨርሲቲ አባያ ካምፓስ ስታዲየም ይጫወታሉ። አዲስ አዳጊው ጋሞ ጨንቻ በሊጉ ባደረጋቸው ሁለት ጨዋታዎች ሽንፈት አስተናግዶ ያለ ምንም ነጥብ የመጨረሻውን 18ኛ ደረጃን ይዟል። ከሶስት ጨዋታዎች ሰባት ነጥብ ያገኘው ኢትዮጵያ ንግድ ባንክ ሊጉን እየመራ ነው። ሁለቱ ክለቦች በሊጉ ሲገናኙ በታሪክ ለመጀመሪያ ጊዜ ነው። አንድ ተስተካካይ መርሐ ግብር ያለው ጋሞ ጨንቻ የመጀመሪያ ሶስት ነጥቡን ለማግኘት ይፋለማል። በሶስተኛ ሳምንት ከሀዋሳ ከተማ ጋር አንድ አቻ የተለያየው ኢትዮጵያ ንግድ ባንክ ዛሬ ድል ከቀናው የሊጉን መሪነት ያጠናክራል። በሌላኛው መርሐ ግብር ቅዱስ ጊዮርጊስ ከሸገር ከተማ በአዲስ አበባ ስታዲየም ከቀኑ 9 ሰዓት ላይ ጨዋታቸውን ያደርጋሉ። የ16 ጊዜ የሊጉ አሸናፊ ቅዱስ ጊዮርጊስ ከሶስት ጨዋታዎች ሁለት ነጥብ በማግኘት 13ኛ ደረጃን ይዟል። ተጋጣሚው ሸገር ከተማ በበኩሉ በአራት ነጥብ 9ኛ ደረጃ ላይ ይገኛል። ቅዱስ ጊዮርጊስ በውድድር ዓመቱ የመጀመሪያ ሶስት ነጥቡን ለማግኘት ይጫወታል። በሶስተኛ ሳምንት በኢትዮ ኤሌክትሪክ የ1 ለ 0 ሽንፈት ያስተናገደው ሸገር ከተማ ወደ ድል መንገድ ለመመለስ ይፋለማል። ሌላኛው መርሐ ግብር ነገሌ አርሲ እና አዳማ ከተማን ከቀኑ 9 ሰዓት በሀዋሳ ዩኒቨርሲቲ ስታዲየም ያገናኛል። ነገሌ አርሲ በአምስት ነጥብ አምስተኛ ደረጃ ላይ ተቀምጧል። አዳማ ከተማ በተመሳሳይ አምስት ነጥብ በግብ ክፍያ ተበልጦ ሰባተኛ ደረጃ ላይ ይገኛል። በሶስተኛ ሳምንት መርሐ ግብር ኢትዮጵያ ቡናን 3 ለ 0 በማሸነፍ የመጀመሪያ ድሉን ያሳካው ነገሌ አርሲ ተከታታይ ድሉን ለማስመዝገብ ይጫወታል። አዳማ ከተማ በሶስተኛ ሳምንት ከቅዱስ ጊዮርጊስ ጋር አንድ አቻ የተለያየ ሲሆን ወደ አሸናፊነት ለመመለስ ይፋለማል። ምሽት 12 ሰዓት ላይ ወላይታ ድቻ ከሀላባ ከተማ በሃዋሳ ዩኒቨርሲቲ ስታዲየም ጨዋታቸውን ያከናውናሉ። ወላይታ ድቻ በሁለት ነጥብ 15ኛ ደረጃን ይዞ ወራጅ ቀጠና ውስጥ ይገኛል። አዲስ አዳጊው ሀላባ ከተማ በአምስት ነጥብ ስድስተኛ ደረጃን ይዟል። በሶስተኛ ሳምንት ወላይታ ድቻ በባህር ዳር ከተማ የ3 ለ 1 ሽንፈት ሲያስተናግድ ሀላባ ከተማ ከፋሲል ከነማ አንድ አቻ ተለያይቷል። ጨዋታው ወላይታ ድቻ የመጀመሪያ ሶስት ነጥቡን ለማግኘት፣ ሀላባ ከተማ ወደ አሸናፊነት ለመመለስ የሚያደርጉት ነው።

አዲስ አበባ፤ ጥቅምት 16/2019 (ኢዜአ)፦ በኢትዮጵያ ሴቶች ፕሪሚየር ሊግ የመጀመሪያ ቀን ጨዋታዎች ትናንት ተደርገዋል። በአበበ ቢቂላ ስታዲየም በተከናወነው ጨዋታ ቦሌ ክፍለ ከተማ መቻልን 2 ለ 1 አሸንፏል። ሊድያ ሰለሞን እና ትርሲት ወንድወሰን ግቦቹን አስቆጥረዋል። ትንቢተ ሳሙኤል የመቻልን ብቸኛ ጎል ከመረብ ላይ አሳርፋለች። ጉለሌ ክፍለ ከተማ ሲዳማ ቡናን 2 ለ 0 ረትቷል። በሃዋሳ አርቴፊሻል ሜዳ በተካሄደው ጨዋታ ፍጹም ፈለሀ ግቦቹን አስቆጥራለች። በሌሎች መርሐ ግብሮች አዳማ ከተማ ከልደታ ክፍለ ከተማ ያለ ግብ አቻ ሲለያዩ አዲስ አዳጊው ጥሩነሽ ዲባባ ማሰልጠኛ ማዕከል እና ሸገር ከተማ ያደረጉት ጨዋታ ሶስት አቻ በሆነ ውጤት ተጠናቋል። በሊጉ መክፈቻ ቀን በተደረጉ ጨዋታዎች ኢትዮጵያ ንግድ ባንክ ይርጋጨፌ ቡናን 2 ለ 0፣ ሀዋሳ ከተማ ባህር ዳር ከተማን 2 ለ 1 አሸንፈዋል። የኢትዮጵያ ሴቶች ፕሪሚየር ሊግ የመጀመሪያ ሳምንት ኢትዮ ኤሌክትሪክ ከድሬዳዋ ከተማ ዛሬ በሚያደርጉት ጨዋታ ይጠናቀቃል።

አዲስ አበባ፤ ጥቅምት 16/2019 (ኢዜአ)፦ በስፔን ላሊጋ የ10ኛ ሳምንት ተጠባቂ መርሐ ግብር ሪያል ማድሪድ ባርሴሎናን 2 ለ 1 አሸንፏል። ትናንት ማምሻውን በካምፕ ኑ ስታዲየም በተካሄደው ጨዋታ ኪሊያን ምባፔ በ41ኛው ደቂቃ ያስቆጠረው ጎል ማድሪድን መሪ አድርጓል። ራፊኒሃ በ61ኛው ደቂቃ ከመረብ ላይ ባሳረፈው ጎል ባርሴሎና አቻ ሆኗል። ይሁንና በ87ኛው ደቂቃ ኪሊያን ምባፔ ባስቆጠረው ጎል ማድሪድ ጣፋጭ ድል ተቀዳጅቷል። 265ኛው የኤል ክላሲኮ ደርቢ በሪያል ማድሪድ አሸናፊነት ተጠናቋል። ሪያል ማድሪድ በ24 ነጥብ ሶስተኛ ደረጃን የያዘ ሲሆን ከባርሴሎና ጋር ያለውን የነጥብ ልዩነት ወደ ሶስት ዝቅ አድርጓል። በሊጉ የመጀመሪያ ሽንፈቱን ያስተናገደው ባርሴሎና በ27 ነጥብ አሁንም ሊጉን እየመራ ነው። በ11ኛ ሳምንት ባርሴሎና ከዲፖርቲቮ አላቬስ፣ ሪያል ማድሪድ ከሬሲኒግ ሳንታንዴር ጋር ይጫወታሉ።

አዲስ አበባ፤ ጥቅምት 16/2019 (ኢዜአ):- በካፍ ሻምፒዮንስ ሊግ የሁለተኛ ዙር ማጣሪያ የመልስ ጨዋታ ሲዳማ ቡና በሱዳኑ አል ሂላል ኦምዱርማን የ2 ለ 0 ሽንፈት አስተናግዷል። ትናንት ማምሻውን በሩዋንዳ አማሆሮ ስታዲየም በተደረገው ጨዋታ መሐመድ አብዱልራህማን እና አርነስት ሉዞሎ ሲታ ጎሎቹን ከመረብ ላይ አሳርፈዋል። ውጤቱን ተከትሎ ሲዳማ ቡና በድምር ውጤት 4 ለ 0 ተሸንፎ ከውድድሩ ውጪ ሆኗል። የሱዳኑ አል አህሊ ኦምዱርማን በበኩሉ የምድብ ድልድል ተሳትፎውን አረጋግጧል። የካፍ ሻምፒዮንስ ሊግ የምድብ ጨዋታዎች ከህዳር ወር 2019 ዓ.ም ይካሄዳሉ።

አዲስ አበባ፤ ጥቅምት 15/2019 (ኢዜአ)፦ በእንግሊዝ ፕሪሚየር ሊግ ስምንተኛ ሳምንት መርሐ ግብር ሊቨርፑል ብራይተንን 2 ለ 0 ረቷል፡፡ በአንፊልድ ሮድ ስታዲየም በተካሄደው ጨዋታ አሌክሳንደር ኢሳቅ እና የብራይተኑ ፓስካል ግሮስ ግቦቹን አስቆጥረዋል። በውድድር ዓመቱ አራተኛ ድሉን ያስመዘገበው ሊቨርፑል በ15 ነጥብ ደረጃውን ከአምስተኛ ወደ አራተኛ ከፍ አድርጓል። ሊቨርፑል በአንፊልድ የመጀመሪያ ድሉን አሳክቷል። በአንጻሩ በሊጉ ሁለተኛ ሽንፈት ያስተናገደው ብራይተን በ16 ነጥብ ሶስተኛ ደረጃን ይዟል። በሌላኛው መርሐ ግብር ቦርንማውዝ ማንችስተር ዩናይትድን 3 ለ 0 ረትቷል። በኦልትራፎርድ ስታዲየም በተካሄደው ጨዋታ ራያን፣ ማርከስ ታቨርኒየር እና ኢቫኒልሰን ግቦቹን አስቆጥረዋል። በሊጉ ሶስተኛ ሽንፈቱን ያስተናገደው ማንችስተር ዩናይትድ በሰባት ነጥብ ከነበረበት 15ኛ ደረጃ ወደ 16ኛ ዝቅ ብሏል። ዩናይትድ ባለፉት ስድስት የሊግ ጨዋታዎች ከድል ርቋል። ሽንፈቱን ተከትሎ የክለቡ አሰልጣኝ ማይክል ካሪክ ሊሰናበቱ ይችላሉ የሚሉ መረጃዎች በስፋት እየወጡ ነው። ተከታታይ ድሉን ያስመዘገበው ቦርንማውዝ በዘጠኝ ነጥብ ደረጃውን ከ17ኛ ወደ 13ኛ ከፍ አድርጓል። በሌሎች መርሐ ግብሮች ኒውካስትል ዩናይትድ ክሪስታል ፓላስን 2 ለ 0 ሲረታ ሁል ሲቲ እና ብሬንትፎርድ አንድ አቻ ተለያይተዋል። የእንግሊዝ ፕሪሚየር ሊግ የስምንተኛ ሳምንት መርሐ ግብር በሰንደርላንድ እና ሊድስ ዩናይትድ መካከል ምሽት 1 ሰዓት ከ30 በስታዲየም ኦፍ ላይት ይደረጋል።

አዲስ አበባ፤ ጥቅምት 15/2019 (ኢዜአ)፦ በኢትዮጵያ ፕሪሚየር ሊግ አራተኛ ሳምንት ኢትዮ ኤሌክትሪክ ኢትዮጵያ ቡናን 1 ለ 0 አሸንፏል። በአዲስ አበባ ስታዲየም በተደረገው ጨዋታ አቤል ሀብታሙ በመጀመሪያ አጋማሽ ግቡን አስቆጥሯል። በሊጉ ተከታታይ ሽንፈቱን ያስተናገደው ኢትዮጵያ ቡና በሶስት ነጥብ 11ኛ ደረጃን ይዟል። ቡናማዎቹ በውድድር ዓመቱ ሶስተኛ ሽንፈታቸውን አስተናግደዋል። በአንጻሩ ተከታታይ ድሉን ያስመዘገበው ኢትዮ ኤሌክትሪክ በሰባት ነጥብ ደረጃውን ከ8ኛ ወደ 2ኛ ከፍ አድርጓል።

አዲስ አበባ፤ ጥቅምት 15/2019 (ኢዜአ)፦ የ2019 የኢትዮጵያ ሴቶች ፕሪሚየር ሊግ ዛሬ ጅማሮውን አግኝቷል። በአበበ ቢቂላ ስታዲየም በተካሄደው ጨዋታ ኢትዮጵያ ንግድ ባንክ ይርጋጨፌ ቡናን 2 ለ 0 አሸንፏል። እፀገነት ግርማ ግቦቹን አስቆጥራለች። ኢትዮጵያ ንግድ ባንክ የዋንጫ ክብሩን የማስጠበቅ ጉዞውን በአሸናፊነት ጀምሯል። በሌላኛው መርሐ ግብር ሀዋሳ ከተማ ባህር ዳር ከተማን 2 ለ 1 ረትቷል። ቤተልሄም ታምሩ እና ታደለች አብርሃም ጎሎቹን ከመረብ ላይ አሳርፈዋል። ዳሳሽ ሰውአገኝ የባህር ዳር ከተማን ግብ አስቆጥራለች።

አዲስ አበባ፤ ጥቅምት 15/2019 (ኢዜአ):- በስፔን ላሊጋ የ10ኛ ሳምንት መርሐ ግብር ባርሴሎና ከሪያል ማድሪድ የሚያደርጉት ፍልሚያ በጉጉት ይጠበቃል። የሁለቱ ቡድኖች ጨዋታ ከምሽቱ አምስት ሰዓት ላይ በካምፕ ኑ ስታዲየም ይካሄዳል። በደረጃ ሰንጠረዡ ባርሴሎና በ27 ነጥብ በአንደኝነት ሲመራ፣ ሪያል ማድሪድ በ21 ነጥብ ሶስተኛ ደረጃን ይዟል። ባርሴሎና እስካሁን ያደረጋቸውን ዘጠኝ ጨዋታዎች አሸንፏል። በእነዚህ ጨዋታዎች 39 ጎሎችን ሲያስቆጥር፣ 9 ግቦች ደግሞ ተቆጥረውበታል። ሪያል ማድሪድ ካደረጋቸው ዘጠኝ ጨዋታዎች መካከል ሰባቱን ሲያሸንፍ በሁለቱ ሸንፈት አስተናግዷል። 23 ግቦችን ከመረብ ላይ ሲያሳርፍ 9 ግቦች ተቆጥረውበታል። የሪያል ማድሪድ እና ባርሴሎና ታሪካዊ ተቀናቃኝነት ከ124 ዓመታት በላይ የዘለቀ ነው። ሁለቱ ክለቦች እ.አ.አ በ1902 ባደረጉት የመጀመሪያ ጨዋታ ባርሴሎና 3 ለ 1 አሸንፏል። ቡድኖቹ በሁሉም ውድድሮች እስከ አሁን 264 ጊዜ ተገናኝተዋል። ሁለቱ ቡድኖች በተመሳሳይ 106 ጊዜ አሸንፈዋል። 52 ጊዜ አቻ ወጥተዋል። በጨዋታዎቹ ላይ ባርሴሎና 440፣ ሪያል ማድሪድ 450 ግቦችን ከመረብ ላይ አሳርፈዋል። በላሊጋው 192 ጊዜ ተገናኝተው ሪያል ማድሪድ 80 ጊዜ ሲያሸንፍ ባርሴሎና 78 ጊዜ አሸንፏል። 35 ጊዜ ደግሞ ነጥብ ተጋርተዋል። በአስደናቂ ብቃት ላይ የሚገኘው ባርሴሎና ካሸነፈ ከማድሪድ ጋር ያለውን የነጥብ ልዩነት ወደ ዘጠኝ ከፍ ያደርጋል። ማድሪድ ድል ከቀናው የነጥብ ልዩነቱ ወደ ሶስት ዝቅ ይላል። ራፊኒሃ፣ ላሚን ያማል እና ፔድሪ ከባርሴሎና፣ ኪሊያን ምባፔ፣ ጁድ ቤሊንግሃም እና ቪኒሸስ ጂኒየር ከሪያል ማድሪድ በጨዋታው ላይ ልዩነት ይፈጥራሉ ተብለው የሚጠበቁ ተጫዋቾች ናቸው። የ44 ዓመቱ ሁዋን ማርቲኔዝ ሙኑዌራ ተጠባቂውን የደርቢ ጨዋታ በዋና ዳኝነት ይመሩታል።