አዲስ አበባ፤ ህዳር 1/2019 (ኢዜአ)፦ ኤልሳቤጥ አማረ በ1500 ሜትር ሴቶች ለኢትዮጵያ አምስተኛውን የወርቅ ሜዳልያ አስገኝታለች። አትሌት ኤልሳቤጥ 4 ደቂቃ ከ28 ሴኮንድ 02 ማይክሮ ሴኮንድ በመግባት አንደኛ ወጥታለች። አራተኛው የወጣቶች ኦሊምፒክ ጨዋታዎች በሴኔጋል ዳካር እየተካሄደ ይገኛል።

አዲስ አበባ ፤ ህዳር 1/2019 (ኢዜአ) ፦በከተሞች እየተካሄደ ያለው የኮሪደር ልማት የአካል ጉዳተኞችን ፍላጎት ያገናዘበና ሁለገብ ተጠቃሚነትን ያረጋገጠ መሆኑን የተለያዩ የስፖርት ዘርፍ አመራሮች ገለፁ። በመደመር መንግሥት እይታ በአዲስ አበባ የተጀመረው የኮሪደር ልማት የአፍሪካ መዲናዋን ሁለንተናዊ ገጽታ በመቀየር ለነዋሪዎች ምቹ እንዲሁም አካል ጉዳተኞችን ጨምሮ ሁሉንም የሕብረተሰብ ክፍል ተጠቃሚ አድርጓል። በዓይነቱ ልዩ የሆነው ይህ አጠቃላይ የልማት እንቅስቃሴ ከአዲስ አበባ ባለፈ በሁሉም የክልል ከተሞች ተስፋፍቷል። እነዚህ ሁለንተናዊ የልማት እንቅስቃሴዎች ኢትዮጵያ በተለያዩ የኢኮኖሚና የማኅበራዊ መስኮች በዓለም አቀፍ ደረጃ ተመራጭ ሀገር እንድትሆን አስችለዋታል። የኢትዮጵያ ዊልቸር ቅርጫት ኳስ ማህበር ፕሬዝዳንት አቶ አባይነህ ጉጆ ለኢዜአ እንዳሉት፣ በሀገሪቱ እየተከናወኑ ያሉ የኮሪደር ልማት ሥራዎች ለአካል ጉዳተኞች ትልቅ ፋይዳ ያላቸው ናቸው።   የኮሪደር ልማት ገና ከጅምሩ የአካል ጉዳተኞችን ተሳትፎ ያካተተ በመሆኑ፣ የእግረኛ መንገዶች፣ ማረፊያዎች፣ መናፈሻዎች እና መጸዳጃ ቤቶች ሙሉ በሙሉ ምቹ ሆኖ እንዲሆኑ አስችሏል። ቀደም ሲል በነበሩት የመሠረተ ልማት አካታችነት ችግር ምክንያት አካል ጉዳተኞች እንግልት ይደርስባቸው እንደነበርም አስታውሰዋል። የአሁኑ የልማት እንቅስቃሴ ይህንን ችግር በመቅረፍ የህብረተሰቡን አካታችነት በተግባር ያረጋገጠ በመሆኑ የሚደነቅ ነው ብለዋል። ይህም የዜጎችን እኩል ተጠቃሚነት በማረጋገጥ ረገድ ለቀጣይ ለሚከናወኑ የልማት ሥራዎች አርአያ ሊሆን እንደሚገባ አስገንዝበዋል። የኢትዮጵያ ፓራሊምፒክ ኮሚቴ የቦርድ አባል እና አቃቢነዋይ አቶ ጥላሁን ጀማነህ በበኩላቸው፣ በአዲስ አበባ እየተከናወነ ያለው የኮሪደር ልማት የከተማዋን የቀድሞ ገጽታ በከፍተኛ ደረጃ አሻሽሏል። ልማቱ ቀደም ሲል በግንባታዎች ወቅት ትኩረት አጥተው የተዘነጉ አበይት ጉዳዮችን ባካተተ መልኩ በአስደናቂ ሁኔታ መከናወኑንም አብራርተዋል።   በተለይም መሰረተ ልማቶቹ ለአካል ጉዳተኞች ምቹ እና የሁሉንም የማኅበረሰብ ክፍል ፍላጎት ያገናዘቡ ሆነው መገንባታቸውን አድንቀዋል። በመሆኑም ይህ አካታች የልማት ሥራ ኢትዮጵያ ወደፊት ለሚካሄዱ ታላላቅ ዓለም አቀፍ ውድድሮች በአስተማማኝ ሁኔታ ተመራጭ እንድትሆን ትልቅ በር የከፈተ መሆኑን ገልጸዋል። በመደመር መንግሥት እይታ በአዲስ አበባ የተጀመረው የኮሪደር ልማት የአፍሪካ መዲናዋን ሁለንተናዊ ገጽታ በመቀየር ለነዋሪዎች ምቹ እንዲሁም አካል ጉዳተኞችን ጨምሮ ሁሉንም የሕብረተሰብ ክፍል ተጠቃሚ አድርጓል። በዓይነቱ ልዩ የሆነው ይህ አጠቃላይ የልማት እንቅስቃሴ ከአዲስ አበባ ባለፈ በሁሉም የክልል ከተሞች ተስፋፍቷል። እነዚህ ሁለንተናዊ የልማት እንቅስቃሴዎች ኢትዮጵያ በተለያዩ የኢኮኖሚና የማኅበራዊ መስኮች በዓለም አቀፍ ደረጃ ተመራጭ ሀገር እንድትሆን አስችለዋታል። የኢትዮጵያ ዊልቸር ቅርጫት ኳስ ማህበር ፕሬዝዳንት አቶ አባይነህ ጉጆ ለኢዜአ እንዳሉት፣ በሀገሪቱ እየተከናወኑ ያሉ የኮሪደር ልማት ሥራዎች ለአካል ጉዳተኞች ትልቅ ፋይዳ ያላቸው ናቸው። የኮሪደር ልማት ገና ከጅምሩ የአካል ጉዳተኞችን ተሳትፎ ያካተተ በመሆኑ፣ የእግረኛ መንገዶች፣ ማረፊያዎች፣ መናፈሻዎች እና መጸዳጃ ቤቶች ሙሉ በሙሉ ምቹ ሆኖ እንዲሆኑ አስችሏል። ቀደም ሲል በነበሩት የመሠረተ ልማት አካታችነት ችግር ምክንያት አካል ጉዳተኞች እንግልት ይደርስባቸው እንደነበርም አስታውሰዋል። የአሁኑ የልማት እንቅስቃሴ ይህንን ችግር በመቅረፍ የህብረተሰቡን አካታችነት በተግባር ያረጋገጠ በመሆኑ የሚደነቅ ነው ብለዋል። ይህም የዜጎችን እኩል ተጠቃሚነት በማረጋገጥ ረገድ ለቀጣይ ለሚከናወኑ የልማት ሥራዎች አርአያ ሊሆን እንደሚገባ አስገንዝበዋል።   የኢትዮጵያ ፓራሊምፒክ ኮሚቴ የቦርድ አባል እና አቃቢነዋይ አቶ ጥላሁን ጀማነህ በበኩላቸው፣ በአዲስ አበባ እየተከናወነ ያለው የኮሪደር ልማት የከተማዋን የቀድሞ ገጽታ በከፍተኛ ደረጃ አሻሽሏል። ልማቱ ቀደም ሲል በግንባታዎች ወቅት ትኩረት አጥተው የተዘነጉ አበይት ጉዳዮችን ባካተተ መልኩ በአስደናቂ ሁኔታ መከናወኑንም አብራርተዋል። በተለይም መሰረተ ልማቶቹ ለአካል ጉዳተኞች ምቹ እና የሁሉንም የማኅበረሰብ ክፍል ፍላጎት ያገናዘቡ ሆነው መገንባታቸውን አድንቀዋል። በመሆኑም ይህ አካታች የልማት ሥራ ኢትዮጵያ ወደፊት ለሚካሄዱ ታላላቅ ዓለም አቀፍ ውድድሮች በአስተማማኝ ሁኔታ ተመራጭ እንድትሆን ትልቅ በር የከፈተ መሆኑን ገልጸዋል።          

አዲስ አበባ፤ ጥቅምት 30 /2019 (ኢዜአ)፦ አራተኛው የወጣቶች ኦሊምፒክ ጨዋታዎች በሴኔጋል ዳካር መካሄዱን ቀጥሏል። ማምሻውን በተካሄደ የ1500 ሜትር ወንዶች ፍጻሜ አትሌት ዋቢ ወጂራ አሸንፏል። 3 ደቂቃ ከ58 ሴኮንድ ከ73 ማይክሮ ሴኮንድ አትሌቱ የገባበት ጊዜ ነው። በዚህም ኢትዮጵያ በወጣቶች ኦሊምፒክ ሁለተኛውን የወርቅ ሜዳሊያ አግኝታለች። ዛሬ በተካሄደ የ2000 ሜትር መሰናክል ወንዶች ፍጻሜ አትሌት ጁነዲን አብዶ ለኢትዮጵያ የመጀመሪያውን የወርቅ ሜዳሊያ አስገኝቷል።

አዲስ አበባ፤ ጥቅምት 30 /2019 (ኢዜአ)፦ አትሌት ጁነዲን አብዶ ለኢትዮጵያ በአራተኛው የወጣቶች ኦሊምፒክ ጨዋታዎች የመጀመሪያውን የወርቅ ሜዳሊያ አስገኝቷል። የወጣቶች ኦሊምፒክ ከጥቅምት 21/ 2019 ዓ.ም አንስቶ በሴኔጋል ዳካር አስተናጋጅነት እየተካሄደ ይገኛል። በውድድሩ ላይ ኢትዮጵያ እየተሳተፈች ትገኛለች።   ዛሬ በተካሄደው በ2000 ሜትር መሰናክል ወንዶች ፍጻሜ በ5 ደቂቃ ከ29 ሰከንድ ከ30 ማይክሮ ሰከንድ አሸናፊ ሆኗል። ይህም ኢትዮጵያ በውድድሩ ያገኘችው የመጀመሪያው የወርቅ ሜዳሊያ ሆኖ ተመዝግቧል። ኢትዮጵያ በአትሌቲክስ፣ ውሃ ዋና፣ ብስክሌት፣ ወርልድ ቴኳንዶ እና ውሹ ስፖርቶች እየተሳተፈች ትገኛለች። አራተኛው የወጣቶች የኦሊምፒክ ጨዋታዎች እስከ ህዳር 4 2019 ዓ.ም ይቆያል። የወጣቶች ኦሊምፒክ በአፍሪካ ምድር ሲካሄድ የሴኔጋሉ የመጀመሪያ ጊዜ ነው።

አዲስ አበባ፤ ጥቅምት 30/2019 (ኢዜአ)፦ በስፔን ላሊጋ የ12ኛ ሳምንት ተጠባቂ መርሐ ግብር ባርሴሎና አትሌቲኮ ማድሪድን 2 ለ 1 አሸንፏል። ትናንት ማምሻውን በዋንዳ ሜትሮፖሊታኖ ስታዲየም በተካሄደው ጨዋታ ጁሊያኖ ሲሚዮኒ በ10ኛው ደቂቃ ባስቆጠረው ጎል አትሌቲኮ ማድሪድን መሪ አድርጓል። ፌርሚን ሎፔዝ በ45ኛው እና በ66ኛው ደቂቃ ከመረብ ላይ ባሳረፋቸው ግቦች ባርሴሎና አሸናፊ ሆኗል። በጨዋታው ባርሴሎና አንጻራዊ ሊባል የሚችል ብልጫ ወስዷል። በውድድር ዓመቱ 11ኛ ድሉን ያስመዘገበው ባርሴሎና በ33 ነጥብ የሊግ መሪነቱን አጠናክሯል። በአንጻሩ በሊጉ ሁለተኛ ሽንፈቱን ያስተናገደው አትሌቲኮ ማድሪድ በ28 ነጥብ ከነበረበት ሁለተኛ ደረጃ ወደ ሶስተኛ ዝቅ ብሏል። ከብሔራዊ ቡድን ጨዋታዎች በኋላ በ13ኛ ሳምንት አትሌቲኮ ማድሪድ ከጌታፌ፣ ባርሴሎና ከቪያሪያል ጨዋታቸውን ያደርጋሉ።

አዲስ አበባ፤ ጥቅምት 30/2019 (ኢዜአ)፦ በኢትዮጵያ ሴቶች ፕሪሚየር ሊግ ሶስተኛ ሳምንት ኢትዮጵያ ንግድ ባንክ ኢትዮ ኤሌክትሪክን 2 ለ 0 ረትቷል። በአበበ ቢቂላ ስታዲየም በተካሄደው ጨዋታ ምህረት አየለ እና እሙሽ ዳንኤል ግቦቹን አስቆጥረዋል። የወቅቱ ሻምፒዮን ኢትዮጵያ ንግድ ባንክ በዘጠኝ ነጥብ መሪነቱን አጠናክሯል። በሊጉ የመጀመሪያ ሽንፈቱን ያስተናገደው ኢትዮ ኤሌክትሪክ በ4 ነጥብ ዘጠነኛ ደረጃ ላይ ይገኛል። ሁለቱ ክለቦች አምና እስከ መጨረሻው ሳምንት የዋንጫ ተፎካካሪ ነበሩ። በሌሎች መርሐ ግብሮች መቻል ድሬዳዋ ከተማን 7 ለ 0 በሆነ ሰፊ የግብ ልዩነት አሸንፏል። አዳማ ከተማ ጉለሌ ክፍለ ከተማን 3 ለ 1፣ ባህር ዳር ከተማ ጥሩነሽ ዲባባ ማሰልጠኛ ማዕከልን 2 ለ 0 አሸንፈዋል። ሀዋሳ ከተማ ከቦሌ ክፍለ ከተማ እና ልደታ ክፍለ ከተማ ከሸገር ከተማ በተመሳሳይ አንድ አቻ ተለያይተዋል። ጨዋታዎቹን ተከትሎ ሶስተኛ ሳምንት ፍጻሜውን አግኝቷል። የአራተኛ ሳምንት መርሐ ግብር ህዳር 5 እና 6 2019 ዓ.ም ይካሄዳል።

አዲስ አበባ፤ ጥቅምት 29/2019 (ኢዜአ)፦ በእንግሊዝ ፕሪሚየር ሊግ የ10ኛ ሳምንት መርሐ ግብር ማንችስተር ዩናይትድ እና አስቶንቪላ ያደረጉት ጨዋታ አራት አቻ በሆነ ውጤት ተጠናቋል። ማምሻውን በኦልትራፎርድ ስታዲየም በተካሄደው ጨዋታ ብሩኖ ፈርናንዴዝ በፍጹም ቅጣት ምት፣ ዩሪ ቲሊማንስ፣ጆሹዋ ዚርኪዜ እና ፓትሪክ ዶርጉ የዩናይትድን ጎሎች ከመረብ ላይ አሳርፈዋል። አሊሰን ኤድዋርድ፣ ኒኮላስ ጃክሰን፣ ጆን ማጊን (ፍጹም ቅጣት ምት) እና ሊዮን ጎሬትዝካ ለአስቶንቪላ ግቦቹን አስቆጥረዋል። ዚርኪዜና ዶርጉ በባከኑ ደቂቃዎች ያስቆጠሯቸው ጎሎች ዩናይትድን አቻ አድርገዋል። ማንችስተር ዩናይትድ በስምንት ነጥብ 18ኛ ደረጃን ይዞ ወራጅ ቀጠና ውስጥ ይገኛል። ባለፉት ስምንት የሊግ ጨዋታዎች ከድል የራቀው ዩናይትድ የውጤት ማጣት ቀውስ ውስጥ ይገኛል። ወራጅ ቀጠና ሲገባም ከ40 ዓመት በኋላ ለመጀመሪያ ጊዜ ነው። አስቶንቪላ በ13 ነጥብ 10ተኛ ደረጃን ይዟል። ዛሬ በተደረጉ ሌሎች መርሐ ግብሮች ሊቨርፑል ክሪስታል ፓላስን 3 ለ 1 ሲረታ ቼልሲ በሰንደርላንድ የ1 ለ 0 ሽንፈት አስተናግዷል። ብራይተን ብሬንትፎርድን 2 ለ 0 እና ቦርንማውዝ ኤፕስዊች ታውንን 2 ለ 1 አሸንፈዋል። ጨዋታዎቹን ተከትሎ 10ኛ ሳምንት የተጠናቀቀ ሲሆን ፕሪሚየር ሊጉ በብሔራዊ ቡድን ጨዋታዎች ምክንያት ይቋረጣል። ሊጉ ህዳር 12 2019 ዓ.ም በ11ኛ ሳምንት ይመለሳል።

አዲስ አበባ ፣ ጥቅምት 29/2019 (ኢዜአ)፦ በእንግሊዝ ፕሪሚየር ሊግ ሊቨርፑል ዛሬ ባደረገው የሊግ መርሐ ግብር ክሪስታል ፓላስን 3 ለ 1 በማሸነፍ ሶስት ነጥብ ማግኘት ችሏል። በጨዋታው የሊቨርፑልን የድል ግቦች ማክ አሊስተር፣ አሌክሳንደር አይሳክ እና ፍሎሪያን ቨርትዝ አስቆጥረዋል። በሌላ የሊጉ መርሐ ግብር ቼልሲ ከሰንደርላንድ ጋር ባደረገው ጨዋታ 1 ለ 0 ተሸንፏል። በተመሳሳይ ብራይተን ብሬንትፎርድን 2 ለ 0 በማሸነፍ በሊጉ ደረጃ ሰንጠረዥ ወደ ሁለተኛ ደረጃ ከፍ ብሏል። በሌላ ጨዋታ በርንማውዝ ኢፕስዊች ታውንን 2 ለ 1 በማሸነፍ ሙሉ ሦስት ነጥብ ወስዷል። በውጤቶቹ መሠረት በሊጉ ደረጃ ሰንጠረዥ ብራይተን በ22 ነጥብ ሁለተኛ ደረጃን ሲይዝ፣ ሊቨርፑል በ18 ነጥብ አራተኛ ደረጃን ይዟል።ቼልሲ በበኩሉ በ16 ነጥብ አምስተኛ ደረጃ ላይ ይገኛል።

አዲስ አበባ፤ ጥቅምት 29/2019 (ኢዜአ)፦ በኢትዮጵያ ሴቶች ፕሪሚየር ሊግ የሶስተኛ ሳምንት ልደታ ክፍለ ከተማ እና ሸገር ከተማ ያደረጉት ጨዋታ አንድ አቻ በሆነ ውጤት ተጠናቋል። በአበበ ቢቂላ ስታዲየም በተካሄደው ጨዋታ ምህረት ቶንጆ በ48ኛው ደቂቃ ባስቆጠረችው ጎል ሸገር ከተማ መሪ ሆኗል። ብሩክታዊት አየለ በ87ኛው ደቂቃ ከመረብ ላይ ያሳረፈችው ጎል ልደታ ክፍለ ከተማን አቻ አድርጓል። ውጤቱን ተከትሎ ሸገር ከተማ በሶስት ነጥብ ደረጃውን ከዘጠነኛ ወደ ስምንተኛ ከፍ አድርጓል። ቡድኑ እስከ አሁን በሊጉ ማሸነፍ አልቻለም። ልደታ ክፍለ ከተማ በአምስት ነጥብ ከአራተኛ ደረጃ ወደ ሶስተኛ ከፍ ብሏል።

አዲስ አበባ፤ ጥቅምት 29/2019 (ኢዜአ)፦ በኢትዮጵያ ሴቶች ፕሪሚየር ሊግ ሶስተኛ ሳምንት ስድስት ጨዋታዎች ይደረጋሉ። ከቀኑ 10 ሰዓት ኢትዮጵያ ንግድ ባንክ ከኢትዮ ኤሌክትሪክ በአበበ ቢቂላ ስታዲየም የሚያከናውኑት ጨዋታ ትኩረትን ስቧል። የወቅቱ ሻምፒዮን ኢትዮጵያ ንግድ ባንክ በስድስት ነጥብ ሊጉን እየመራ ነው። ኢትዮ ኤሌክትሪክ በአራት ነጥብ አምስተኛ ደረጃ ይዟል። ሁለቱ ክለቦች በ2018 ዓ.ም የውድድር ዓመት ዋንጫውን ለማንሳት ያደረጉት ጠንካራ ፉክክር አጓጊ የሚባል ነበር። በመጨረሻ ሳምንት (25ኛ ሳምንት) ባደረጉት ጨዋታ ኢትዮጵያ ንግድ ባንክ ኢትዮ ኤሌክትሪክን 2 ለ 0 አሸንፏል። እሙሽ ዳንኤል እና ረድኤት አስረሳኸኝ ግቦቹን አስቆጥረዋል። ይህን ተከትሎ ኢትዮጵያ ንግድ ባንክ በ69 ነጥብ ሻምፒዮን ሆኗል። እስከ መጨረሻው ለዋንጫ የተፎካከረው ኢትዮ ኤሌክትሪክ በ66 ነጥብ ሁለተኛ ሆኖ አጠናቋል። ሁለቱ ቡድኖች በጨዋታው ጠንካራ ፉክክር ያደርጋሉ ተብሎ ይጠበቃል። በሌሎች መርሐ ግብሮች ልደታ ክፍለ ከተማ ከሸገር ከተማ ከረፋዱ አራት ሰዓት፣ መቻል ከድሬዳዋ ከተማ ከቀኑ ስምንት ሰዓት በአበበ ቢቂላ ስታዲየም ይጫወታሉ። ሀዋሳ ከተማ ከቦሌ ክፍለ ከተማ ከቀኑ 10 ሰዓት በሀዋሳ አርቴፊሻል ሜዳ ጨዋታቸውን ያደርጋሉ። አዳማ ከተማ ከጉለሌ ክፍለ ከተማ በወንጂ ስታዲየም እና ጥሩነሽ ዲባባ ማሰልጠኛ ማዕከል ከባህር ዳር ከተማ በማዕከሉ ሜዳ በተመሳሳይ 9 ሰዓት ጨዋታቸውን ያከናውናሉ።

አዲስ አበባ፣ ጥቅምት 29/2019 (ኢዜአ)፡- በስፔን ላሊጋ የ12ኛ ሳምንት መርሐ ግብር አትሌቲኮ ማድሪድ እና ባርሴሎና ዛሬ የሚያደርጉት ጨዋታ የእግር ኳስ አፍቃሪያንን ትኩረት ስቧል። ጨዋታው ምሽት አምስት ሰዓት ላይ 70 ሺህ 692 ተመልካች በሚያስተናግደው ዋንዳ ሜትሮፖሊታኖ ስታዲየም ይካሄዳል። አትሌቲኮ ማድሪድ በሊጉ እስከ አሁን ካደረጋቸው 11 ጨዋታዎች በዘጠኙ ድል ሲቀናው አንድ ጊዜ ሽንፈት አስተናግዷል። በቀሪው ጨዋታ አቻ ተለያይቷል። በጨዋታዎቹ ላይ 22 ግቦችን ሲያስቆጥር 8 ጎሎችን አስተናግዷል። የማድሪዱ ክለብ በ28 ነጥብ ሶስተኛ ደረጃን ይዟል። ተጋጣሚው ባርሴሎና በበኩሉ 11 ጨዋታዎችን አከናውኖ በ10ሩ አሸንፎ በአንዱ ሽንፈት አስተናግዷል። 46 ጎሎችን ከመረብ ጋር ሲያገናኝ 12 ግቦች ተቆጥረውበታል። የካታላኑ ክለብ በ30 ነጥብ ሊጉን እየመራ ይገኛል። ሁለቱ ክለቦች በሁሉም ውድድሮች ሲገናኙ የዛሬው ለ255ኛ ጊዜ ነው። ከዚህ በፊት ባደረጓቸው 254 የእርስ በእርስ ጨዋታዎች ባርሴሎና 116 ጊዜ በማሸነፍ የበላይነቱን ይዟል። አትሌቲኮ ማድሪድ 81 ጊዜ ድል ቀንቶታል። 57 ጊዜ ደግሞ አቻ ተለያይተዋል። በላሊጋው እስከ አሁን 178 ጊዜ ተገናኝተው ባርሴሎና 83 ጊዜ አሸንፏል። አትሌቲኮ ማድሪድ 53 ጊዜ ሲያሸንፍ 42 ጊዜ ደግሞ ነጥብ ተጋርተዋል። ባርሴሎና ድል ከቀናው የሊጉን መሪነት ያጠናክራል። አትሌቲኮ ማድሪድ ባርሴሎናን በልጦ የሊጉ አናት ላይ ለመቀመጥ ይፋለማል። ጨዋታው ጠንካራ ፉክክር ይታይበታል ተብሎ ይጠበቃል።

አዲስ አበባ፤ ጥቅምት 29/2019 (ኢዜአ)፦‎ የእንግሊዝ ፕሪሚየር ሊግ የ10ኛ ሳምንት መርሐ ግብር ዛሬ ይጠናቀቃል። በዕለቱ አምስት ጨዋታዎች ይደረጋሉ። ምሽት 1 ሰዓት ከ30 ላይ ማንችስተር ዩናይትድ ከአስቶንቪላ በኦልድትራፎርድ ስታዲየም ይጫወታሉ። ባለሜዳው ማንችስተር ዩናይትድ በሰባት ነጥብ 18ኛ ደረጃን ይዞ ወራጅ ቀጠና ውስጥ ይገኛል። ቡድኑ ወራጅ ቀጠና ሲገባ ከእ.አ.አ 1986/87 የውድድር ዓመት በኋላ ለመጀመሪያ ጊዜ ነው። አስቶንቪላ በ12 ነጥብ 12ኛ ደረጃ ላይ ይገኛል። ዩናይትድ ባለፉት ሰባት የሊግ ጨዋታዎች ከድል ርቋል። ቡድኑ ከውጤት ማጣት ቀውስ እና ከወራጅ ቀጠና ለመውጣት ዛሬ ማሸነፍ ይኖርበታል። በዘጠነኛ ሳምንት ከፉልሃም ጋር አንድ አቻ የተለያየው አስቶንቪላ የድል መንገዱን ለማግኘት ይጫወታል። በሌላኛው መርሐ ግብር ሰንደርላንድ ከቼልሲ ከቀኑ 11 ሰዓት በስታዲየም ኦፍ ላይት ጨዋታቸውን ያደርጋሉ። ሰንደርላንድ በአምስት ነጥብ የመጨረሻውን 20ኛ ደረጃ ይዟል። ባለፉት ሰባት የሊግ ጨዋታዎች ማሸነፍ አልቻለም። ተጋጣሚው ቼልሲ በ16 ነጥብ አራተኛ ደረጃን ይዟል። በዘጠነኛ ሳምንት ማንችስተር ዩናይትድ 2 ለ 0 ማሸነፉ ይታወሳል። ጨዋታው ሰንደርላንድ ከውጤት ቀውሱ ለመውጣት፣ ቼልሲ በድል ጉዞ ለመቀጠል የሚያደርጉት ነው። ክሪስታል ፓላስ ከሊቨርፑል ከቀኑ 11 ሰዓት በሰልኸረስት ፓርክ የሚያደርጉት ጨዋታ ሌላኛው የዕለቱ መርሐ ግብር ነው። ባለሜዳው ክሪስታል ፓላስ በሰባት ነጥብ 19ኛ ደረጃን ይዞ ወራጅ ቀጠና ውስጥ ይገኛል። ሊቨርፑል በ15 ነጥብ ስድስተኛ ደረጃ ላይ ተቀምጧል። ፓላስ ባለፉት ሶስት ተከታታይ ጨዋታዎች ሽንፈት አስተናግዷል። ተጋጣሚው ሊቨርፑልም በዘጠነኛ ሳምንት በአርሰናል 1 ለ 0 ተሸንፏል። ጨዋታው ሁለቱ ቡድኖች ወደ አሸናፊነት ለመመለስ የሚያደርጉት ነው። ከቀኑ 11 ላይ ብራይተን ከብሬንትፎርድ በአሜክስ ስታዲየም ጨዋታቸውን ያከናውናሉ። በጠንካራ ግስጋሴ ላይ የሚገኘው ብራይተን በ19 ነጥብ ሶስተኛ ደረጃን ይዟል። ብሬንትፎርድ በ14 ነጥብ ሰባተኛ ደረጃ ላይ ይገኛል። በዘጠነኛ ሳምንት ብራይተን ማንችስተር ሲቲን 1 ለ 0፣ ብሬንትፎርድ ኖቲንግሃም ፎረስትን 2 ለ 0 አሸንፈዋል። ጨዋታው ተመጣጣኝ ፉክክር ይደረግበታል የሚል ሰፊ ግምት አግኝቷል።

አዲስ አበባ፤ ጥቅምት 28/2019 (ኢዜአ)፦ በእንግሊዝ ፕሪሚየር ሊግ የ10ኛ ሳምንት መርሐ ግብር ኖቲንግሃም ፎረስት ማንችስተር ሲቲን 3 ለ 1 ረትቷል። ማምሻውን በሲቲ ግራውንድ ስታዲየም በተካሄደው ጨዋታ ሊያም ዴላፕ ሁለት ግቦችን ሲያስቆጥር ጃር ኩንያ ቀሪዋን ጎል ከመረብ ላይ አሳርፏል። ራያን ቼርኪ የሲቲን ብቸኛ ግብ አስቆጥሯል። ማንችስተር ሲቲ በጨዋታው የወሰደውን የኳስ ቁጥጥር ብልጫ በሚገባ ወደ ግብ እድሎች መቀየር አልቻለም። ባለሜዳው ፎረስት ያገኛቸውን የግብ እድሎች ውጤታማ በሆነ መልኩ ተጠቅሟል። በሊጉ ሶስተኛ ተከታታይ ሽንፈት ያስተናገደው ማንችስተር ሲቲ በ21 ነጥብ ሁለተኛ ደረጃን ይዟል። ከሊጉ መሪ አርሰናል ጋር ያለው የነጥብ ልዩነት ወደ ስድስት ነጥብ ከፍ ብሏል። ከአምስት ተከታታይ ሽንፈቶች በኋላ ወደ አሸናፊነት የተመለሰው ኖቲንግሃም ፎረስት በዘጠኝ ነጥብ ከነበረበት 19ኛ ደረጃ ወደ 16ኛ ከፍ በማለት ከወራጅ ቀጠና ወጥቷል። በ11ኛ ሳምንት ኖቲንግሃም ፎረስት ከቦርንማውዝ፣ ማንችስተር ሲቲ ከፉልሃም ጨዋታቸውን ያደርጋሉ።

አዲስ አበባ፤ ጥቅምት 28/2019 (ኢዜአ)፦ በእንግሊዝ ፕሪሚየር ሊግ የ10ኛ ሳምንት መርሐ ግብር አርሰናል ሁል ሲቲን 1 ለ 0 ረትቷል። ማምሻውን በኤምሬትስ ስታዲየም በተደረገው ጨዋታ አምበሉ ማርቲን ኦዴጋርድ በ72ኛው ደቂቃ ግቧን አስቆጥሯል። ባለሜዳው አርሰናል በጨዋታው ከፍተኛ የጨዋታ ብልጫ ወስዷል። አርሰናል በ27 ነጥብ መሪነቱን አጠናክሯል። ከተከታዩ ማንችስተር ሲቲ ጋር ያለውን የነጥብ ልዩነት ወደ ስድስት ከፍ አድርጓል። ሁል ሲቲ በ11 ነጥብ 13ኛ ደረጃ ላይ ይገኛል። በሌላኛው መርሐ ግብር ፉልሃም እና ኒውካስትል ዩናይትድ አንድ አቻ ተለያይተዋል። ምሽት 2 ሰዓት ከ30 ኖቲንግሃም ፎረስት ከማንችስተር ሲቲ በሲቲ ግራውንድ ስታዲየም ጨዋታቸውን ያደርጋሉ።

አዲስ አበባ፤ ጥቅምት 28/2019 (ኢዜአ)፦ በኢትዮጵያ ሴቶች ፕሪሚየር ሊግ የሶስተኛ ሳምንት መርሐ ግብር ሲዳማ ቡና ይርጋጨፌ ቡናን 2 ለ 1 አሸንፏል። በሀዋሳ አርቴፊሻል ሜዳ በተካሄደው ጨዋታ መስከረም መኮንን በስድስተኛው ደቂቃ ባስቆጠረችው ጎል ይርጋጨፌ ቡና መሪ ሆኗል። ቢታኒያ አስተረፍ በ78ኛው በፍጹም ቅጣት ምት እና ምንትዋብ ዮሐንስ በ91ኛው ደቂቃ ከመረብ ላይ ባሳረፏቸው ጎሎች ሲዳማ ቡና ድል ተቀዳጅቷል። በውድድር ዓመቱ የመጀመሪያ ድሉን ያስመዘገበው ሲዳማ ቡና በሶስት ነጥብ ደረጃውን ከ14ኛ ወደ 7ኛ ከፍ በማድረግ ከወራጅ ቀጠና ወጥቷል። በሊጉ ሁለተኛ ሽንፈቱን ያስተናገደው ይርጋጨፌ ቡና በአንድ ነጥብ ከነበረበት 12ኛ ደረጃ ወደ 13ኛ ዝቅ በማለት ወራጅ ቀጠና ውስጥ ይገኛል።

አዲስ አበባ፤ ጥቅምት 28/2019 (ኢዜአ):- በእንግሊዝ ፕሪሚየር ሊግ 10ኛ ሳምንት መርሐ ግብር ሊድስ ዩናይትድ ቶተንሃም ሆትስፐርስን 1 ለ 0 ረትቷል። በኢላንድ ሮድ ስታዲየም በተካሄደው ጨዋታ ኖሃ ኦካፎር በ79ኛው ደቂቃ ግቡን አስቆጥሯል። ውጤቱን ተከትሎ ሊድስ ዩናይትድ በ14 ነጥብ ስምንተኛ ደረጃን ይዟል። ቶተንሃም ሆትስፐርስ በ12 ነጥብ 10ኛ ደረጃ ላይ ይገኛል። በ11ኛ ሳምንት ሊድስ ዩናይትድ ከቼልሲ፣ ቶተንሃም ሆትስፐርስ ከኤፕስዊች ታውን ጋር ጨዋታቸውን ያደርጋሉ።

ዲላ፣ ጥቅምት 28/2019 (ኢዜአ):- ከፍተኛ የትምህርት ተቋማት የተተኪ ስፖርተኞችና የብቁ ስፖርት ባለሙያዎች መፍለቂያ ማዕከላት እንዲሆኑ በቅንጅት እየሰራ መሆኑን የኢትዮጵያ ዩኒቨርሲቲዎች ስፖርት ማህበር ገለጸ። ማህበሩ መደበኛ ጠቅላላ ጉባኤውን በዲላ ዩኒቨርሲቲ እያካሄደ ነው።   የማህበሩ ፕሬዚዳንት አቶ አባይ በላይሁን በወቅቱ እንዳሉት፣ ዩኒቨርሲቲዎች የእውቀትና የጥናት ተቋማት ከመሆናቸው ባለፈ የተተኪ ስፖርተኞች መፍለቂያ መሆናቸውን ገልጸዋል። ስፖርት በአካል፣ በስብዕናና በስነ ልቦና የተገነባ ትውልድ መፍጠሪያ መድረክ ነው ያሉት ፕሬዚዳንቱ፣ ማህበሩ የከፍተኛ ትምህርት ተቋማት ስፖርት ፌስቲቫልን በማዘጋጀት ሀገራዊ ሰላም፣ አንድነትና አካታችነትን ማጎልበት መቻሉን ተናግረዋል። በዚህም ከፍተኛ ትምህርት ተቋማት የተተኪ ስፖርተኞችና የብቁ ስፖርት ባለሙያዎች መፍለቂያ ማዕከላት እንዲሆኑ ውጤታማ ተግባራት መከናወናቸውን ተናግረዋል። ጉባኤው ተቋማዊ አቅምን ከማጎልበት ባለፈ የ2019 የኢትዮጵያ ዩኒቨርሲቲዎች ስፖርት ፌስቲቫል አዘጋጅና የማህበሩ ስራ አስፈጻሚዎች ምርጫን ጨምሮ ሌሎች አጀንዳዎች ላይ መክሮ ውሳኔ የሚያሳልፍ መሆኑንም ገልጸዋል።   የከፍተኛ ትምህርት ተቋማት ስፖርት ፌስቲቫል ትልቅ ሀገራዊ እሴት ነው ያሉት ደግሞ የዲላ ዩኒቨርሲቲ ፕሬዚዳንት ቶሎሳ ዲዳ (ዶ/ር) ናቸው። በተለይ የተማሪዎችና የባለሙያዎች ስፖርት አቅምን ከማጎልበት ባለፈ ለባህል ልውውጥና ለሰላም እሴት ግንባታ ትልቅ ፋይዳ አለው ብለዋል። ዩኒቨርሲቲው በማህበሩና በፌስቲቫሉ የነቃ ተሳትፎ በማድረግ ለሀገራዊ አንድነት መጎልበት የበኩሉን እንደሚወጣም አንስተዋል። በጉባኤው የሁሉም ከፍተኛ ትምህርት ተቋማት ተወካዮች፣ አጋርና ባለድርሻ አካላት ተገኝተዋል።  

አዲስ አበባ፤ ጥቅምት 28/2019 (ኢዜአ):- በእንግሊዝ ፕሪሚየር ሊግ 10ኛ ሳምንት የሁለተኛ ቀን ውሎ አራት ጨዋታዎች ይደረጋሉ። ምሽት 12 ሰዓት ላይ የሊጉ መሪ አርሰናል በኤምሬትስ ስታዲየም ሁል ሲቲን ያስተናግዳል። አርሰናል በ24 ነጥብ አንደኛ፣ ሁል ሲቲ በ11 ነጥብ 11ኛ ደረጃን ይዘዋል። መድፈኞቹ ካሸነፉ የሊጉን መሪነታቸውን ያጠናክራሉ። ባለፉት ሰባት የሊግ ጨዋታዎች ከድል የራቀው ሁል ሲቲ ወደ አሸናፊነት የመመለስ ከባድ የቤት ስራ ይጠብቀዋል። በሌላኛው መርሃ ግብር ኖቲንግሃም ፎረስት ከማንችስተር ሲቲ ምሽት 2 ሰዓት ከ30 ላይ በሲቲ ግራውንድ ስታዲየም ጨዋታቸውን ያደርጋሉ። ኖቲንግሃም ፎረስት በስድስት ነጥብ 19ኛ ደረጃን ይዞ ወራጅ ቀጠና ውስጥ ይገኛል። ቡድኑ ባለፉት አምስት ተከታታይ የሊግ ጨዋታዎች ድል አልቀናውም። ማንችስተር ሲቲ በ21 ነጥብ ሁለተኛ ደረጃ ላይ ይገኛል። ሰማያዊዎቹ ባለፉት ሁለት ጨዋታዎች ተሸንፈዋል። ሲቲ በዋንጫ ፉክክሩ ለመቀጠል የዛሬውን ጨዋታ ማሸነፍ ወሳኝ ነው። ኖቲንግሃም ፎረስትም ወደ ድል መንገድ ለመመለስ ይፋለማል። ሊድስ ዩናይትድ ከቶተንሃም ሆትስፐርስ ከቀኑ 9 ሰዓት ከ30 ፣ ፉልሃም ከኒውካስትል ዩናይትድ ምሽቱ 12 ሰዓት ላይ ጨዋታቸውን ያደርጋሉ።

አዲስ አበባ፤ ጥቅምት 28/2019 (ኢዜአ)፦ የኢትዮጵያ ሴቶች ፕሪሚየር ሊግ የሶስተኛ ሳምንት የመጀመሪያ መርሐ ግብር በሲዳማ ቡና እና ይርጋጨፌ ቡና መካከል ይደረጋል። ጨዋታው ከቀኑ 10 ሰዓት በሀዋሳ አርቴፊሻል ሜዳ ይካሄዳል። ሲዳማ ቡና ያለ ምንም ነጥብ የመጨረሻውን 14ኛ ደረጃ ይዟል። ቡድኑ በሊጉ ባደረጋቸው ጨዋታዎች በባህር ዳር ከተማ እና ጉለሌ ክፍለ ከተማ ሽንፈት አስተናግዷል። ተጋጣሚው ይርጋጨፌ ቡና በአንድ ነጥብ 12ኛ ደረጃ ላይ ይገኛል። እስከ አሁን ባከናወናቸው ሁለት ጨዋታዎች በኢትዮጵያ ንግድ ባንክ ሽንፈት ሲያስተናግድ ከሃዋሳ ከተማ ጋር አቻ ተለያይቷል። ሁለቱም ቡድኖች በውድድር ዓመቱ የመጀመሪያ ድላቸውን ለማስመዝገብ ይጫወታሉ። የኢትዮጵያ ሴቶች ፕሪሚየር ሊግ ሶስተኛ ሳምንት እስከ ነገ ይቆያል። ኢትዮጵያ ንግድ ባንክ በስድስት ነጥብ ሊጉን እየመራ ይገኛል። የከፍተኛ ግብ አስቆጣሪነቱን የኢትዮጵያ ንግድ ባንኳ እጸነት ግርማ በሶስት ግቦች እየመራች ነው። ማርታ ወልዴ (ሸገር ከተማ)፣ ፍጹም ፈለሃ (ጉለሌ ክፍለ ከተማ) ፣ አልማዝ ግርማይ (ድሬዳዋ ከተማ) ፣ ቃልኪዳን ዘላለም (ይርጋጨፌ ቡና) እና ቤተልሄም ታምሩ (ሀዋሳ ከተማ) በተመሳሳይ ሁለት ግቦችን በማስቆጠር ይከተላሉ።

አዲስ አበባ፤ ጥቅምት 28/2019 (ኢዜአ)፦ በእንግሊዝ ፕሪሚየር ሊግ የ10ኛ ሳምንት የመጀመሪያ መርሐ ግብር ኤቨርተን ኮቨንተሪ ሲቲን 3 ለ 1 አሸንፏል። ትናንት ማምሻውን በሂል ዲኪንሰን ስታዲየም በተካሄደው ጨዋታ ቲዬርኖ ባሪ ሁለት ግቦችን ሲያስቆጥር ኪርናን ዴውስበሪ-ሆል ቀሪዋን ጎል ከመረብ ላይ አሳርፏል። ያን ግቦሆ የኮቨንተሪ ሲቲን ብቸኛ ግብ አስቆጥሯል። ተከታታይ ድሉን ያስመዘገበው ኤቨርተን በ16 ነጥብ ደረጃውን ከሰባተኛ ወደ አምስተኛ ከፍ አድርጓል። በውድድር ዓመቱ አራተኛ ድላቸውን አሳክተዋል። በሊጉ ሰባተኛ ድሉን ያስመዘገበው ኮቨንተሪ ሲቲ በዘጠኝ ነጥብ 16ኛ ደረጃ ላይ ይገኛል። በ11ኛ ሳምንት ኤቨርተን ከብሬንትፎርድ እና ኮቨንተሪ ሲቲ ከክሪስታል ፓላስ ይጫወታሉ።