አዲስ አበባ ፤ ጥቅምት 24 /2019 (ኢዜአ)፦ የአውሮፓ ሻምፒዮንስ ሊግ የአራተኛ ዙር መርሐ ግብር ዛሬ ማምሻውን ተጀምሯል። በራምስ ፓርክ በተካሄደው ጨዋታ ጋላታሳራይ አሌክሲ ባትራኮቭ ባስቆጠራቸው ጎሎች ስቱትጋርትን 2 ለ 0 አሸንፏል። ጋላታሳራይ ሁለተኛ ድሉን ሲያስመዘግብ ስቱትጋርት የመጀመሪያ ሽንፈቱን አስተናግዷል። በሌላኛው መርሐ ግብር ስፖርቲንግ ሊዝበን ሻካታር ዶኔስክን 1 ለ 0 ረትቷል። በስታምፎርድ ብሪጅ በተደረገው ጨዋታ ኢሳ ዱምቢያ የማሸነፊያ ግቧን ከመረብ ላይ አሳርፏል። ስፖርቲንግ ሶስተኛ የሻምፒዮንስ ሊግ ድሉን ሲያሳካ የዩክሬኑ ክለብ ለሁለተኛ ጊዜ ተሸንፏል።

አዲስ አበባ፤ ጥቅምት 24 /2019 (ኢዜአ)፦ በመዲናዋ የተቀናጀ የስፖርት ማዘውተሪያ ሥፍራዎች ግንባታ የኢትዮጵያን የስፖርት ገጽታ ወደ ላቀ ደረጃ እያሸጋገረ እንደሚገኝ የተለያዩ ስፖርት ዘርፍ አመራሮች ገለጹ። የመደመር መንግሥት በከተሞች ልማት ማዕቀፍ ውስጥ ትውልድን ታሳቢ ያደረጉ ዘመናዊና አካታች የስፖርት መሠረተ ልማቶችን በመገንባት የከተሞችን ገጽታ በተጨባጭ እያዘመነ ይገኛል። በተለይም በአዲስ አበባ የተገነቡት አዳዲስ የስፖርት ማዘውተሪያ ማዕከላት ሕፃናትን፣ ወጣቶችን እና ሌሎች የህብረተሰብ ክፍሎችንም ተጠቃሚ ማድረግ ችለዋል። እነዚህ ዘመናዊ መሠረተ ልማቶች የከተሞችን ኢኮኖሚያዊ ዕድገት ከመደገፍ ባለፈ ጤናማና አምራች ተተኪ ትውልድ ለማፍራት የሚያስችል ዕድል ፈጥረዋል።   የኢትዮጵያ አትሌቲክስ ፌዴሬሽን ፕሬዚዳንት ኮማንደር አትሌት ስለሺ ስህን ለኢዜአ እንዳሉት፤ ዘመናዊ የስፖርት ማዘውተሪያ ስፍራዎችና ስታዲየሞች መገንባት ለአትሌቶች ውጤታማነት እና ታላላቅ ውድድሮችን ለማዘጋጀት ከፍተኛ ሚና አላቸው። አደይ አበባ ስታዲየም ዓለም አቀፍ የጥራት ደረጃ ጠብቆ እየተገነባ የሚገኝ መሆኑን ጠቅሰው፣ ይህም ለሀገሪቱ ስፖርት ዘርፍ ዕድገት ትልቅ አቅም እንደሚፈጥር በአብነት ጠቅሰዋል። በመዲናዋ የሚከናወኑ ዘርፈ ብዙ የስፖርት መሠረተ ልማቶች ለወደፊት ትውልድ እና ተተኪ አትሌቶችን ለማፍራት ወሳኝ አስተዋጽኦ እንዳላቸውም ነው የተናገሩት። ጥራቱን የጠበቀ የስፖርት መሠረተ ልማት ዝርጋታ ኢትዮጵያ ዓለም አቀፍ ውድድሮችን በባለቤትነት ለማዘጋጀት የሚያስችል መሆኑንም አስገንዝበዋል።   የኢትዮጵያ ውሹ ፌዴሬሽን ምክትል ፕሬዚዳንት አቶ እያሱ ሰለሞን በበኩላቸው፣ በአዲስ አበባ ከተማ አጠቃላይ የስፖርት ማዘውተሪያ ሥፍራዎች በከተማ ልማት ተካተው መገንባታቸው በዘርፉ ላይ ከፍተኛ ለውጥ ማምጣት ችለዋል። ቀደም ሲል በከተማዋ የማዘውተሪያ ሥፍራዎች እጥረት በመኖሩ ወጣቶች በጎዳናዎች ላይ ስፖርታዊ እንቅስቃሴዎችን ለማድረግ ይገደዱ ነበር ብለዋል።   አሁን ላይ የወጣቶችን ፍላጎት የሚመጥኑ የስፖርት ማዘውተሪያዎች በብዛትና በጥራት መገንባታቸው ቀደም ሲል የነበሩ ችግሮችን መቅረፍ መቻሉን ተናግረዋል። እነዚህ የስፖርት መሠረተ ልማቶች ለከተማዋ ውበትና ገጽታ ግንባታ ከፍተኛ አስተዋጽኦ ከማበርከታቸውም ባለፈ በአካል፣ በአእምሮ እና በጤና የበለጸገ አምራች ዜጋን በማፍራት ረገድ ትልቅ ሚና እያበረከቱ መሆኑንም አንስተዋል።

አዲስ አበባ፤ ጥቅምት 24 /2019 (ኢዜአ)፦ የአውሮፓ ሻምፒዮንስ ሊግ የአራተኛ ዙር መርሐ ግብር ዛሬ ይጀመራል። ምሽት አምስት ሰዓት ላይ በስታዲዮ ዴላ ሴራሚካ ቪያሪያል ከፒኤስጂ ይጫወታሉ። ባለሜዳው ቪያሪያል በሶስት ነጥብ 19ኛ ደረጃ ላይ ይገኛል። ፒኤስጂ በሊግ ምዕራፉ እስከ አሁን ያደረጋቸውን ሶስት ጨዋታዎችን በማሸነፍ በዘጠኝ ነጥብ አንደኛ ደረጃን ይዟል። ያለፉትን ተከታታይ የሻምፒዮንስ ሊግ ዋንጫን ያነሳው ፒኤስጂ ጨዋታውን የማሸነፍ የቅድሚያ አግኝቷል። በሌላኛው መርሐ ግብር ባርሴሎና ከአስቶንቪላ ምሽት አምስት ሰዓት ላይ በካምፕ ኑ ስታዲየም የሚያደርጉት ጨዋታ ተጠባቂ ነው። ባርሴሎና በስድስት ነጥብ ስምንተኛ ደረጃ ላይ ተቀምጧል። አስቶንቪላ በዘጠኝ ነጥብ ሁለተኛ ደረጃ ላይ ይገኛል። በሶስተኛው ዙር መርሐ ግብር በፒኤስጂ የ4 ለ 2 ሽንፈት ያስተናገደው ባርሴሎና ወደ አሸናፊነት ለመመለስ ይጫወታል። ተጋጣሚው አስቶንቪላ በድል ጉዞው ለመቀጠል ይፋለማል። ጨዋታው ተመልካችን የሚያዝናና እንቅስቃሴ ይደረግበታል ተብሎ ይጠበቃል። በዋንዳ ሜትሮፖሊታኖ ስታዲየም አትሌቲኮ ማድሪድ ከባየር ሙኒክ የሚያደርጉት ጨዋታም ትኩረትን ስቧል። የማድሪዱ ክለብ በአራት ነጥብ 16ኛ ደረጃን ሲይዝ ባየርን በአምስት ነጥብ 14ኛ ደረጃ ላይ ተቀምጧል። ሁለቱ ክለቦች በተመሳሳይ ባለፉት ሁለት የሻምፒዮንስ ሊግ ጨዋታዎች አላሸነፉም። ቡድኖቹ ወደ አሸናፊነት ለመመለስ የሚያደርጉት ጨዋታ ተመጣጣኝ ፉክክር ይደረግበታል ተብሎ ይጠበቃል። ማንችስተር ዩናይትድ ምሽት አምስት ላይ ሮማን በኦልድትራፎርድ ስታዲየም ያስተናገዳል። ባለፉት ሁለት የሻምፒዮንስ ሊግ ሽንፈት ያስተናገደው ዩናይትድ በሶስት ነጥብ 20ኛ ደረጃን ይዟል። በሶስተኛው ዙር በኮሞ ያስተናገደው የ4 ለ 1 ሽንፈት ቡድኑን የበለጠ ጫና ውስጥ ከቶታል። ሮማ በአራት ነጥብ 15ኛ ደረጃ ላይ ተቀምጧል። በሶስተኛው ዙር መርሐ ግብር ስሎቫን ብራቲስላቫን 4 ለ 0 ረትቷል። ጨዋታው ዩናይትድ ወደ ድል መንገድ ለመመለስ፣ ሮማ ተከታታይ ድሉን ለማስመዝገብ የሚያደርጉት ነው። በሌሎች መርሐ ግብሮች ፌይኖርድ ከኢንተር ሚላን፣ ቦዶ ግሊምት ከሊል እና ላስክ ከስሎቫን ብራቲስላቫ በተመሳሳይ ምሽት አምስት ሰዓት ላይ ይጫወታሉ። ምሽት 2 ሰዓት ከ45 ጋላታሳራይ ከስቱትጋርት እና ሻካታር ዶኔስክ ከስፖርቲንግ ሊዝበን ጨዋታቸውን ያደርጋሉ።

3አዲስ አበባ፤ ጥቅምት 24/2019 (ኢዜአ)፦ በእንግሊዝ ፕሪሚየር ሊግ የዘጠነኛ ሳምንት መርሐ ግብር ኤቨርተን ኒውካስትል ዩናይትድን 1 ለ 0 አሸንፏል። ትናንት ማምሻውን በሴንት ጀምስ ፓርክ ስታዲየም በተካሄደው ጨዋታ ቲዬርኖ ባሪ በ49ኛው ደቂቃ ግቧን አስቆጥሯል። በጨዋታው ኤቨርተን የተሻሉ የግብ ማግባት እድሎችን ፈጥሯል። ተጋጣሚው ኒውካስትል የኳስ ቁጥጥር ብልጫውን ወደ ግብ መቀየር አልቻለም። የኒውካስትሉ ጃኮብ ራምሴይ በ98ኛው ደቂቃ በሁለት ቢጫ በቀይ ካርድ ወጥቷል። ከሶስት ጨዋታዎች በኋላ ወደ አሸናፊነት የተመለሰው ኤቨርተን በ13 ነጥብ ደረጃውን ከ13ኛ ወደ 7ኛ ከፍ አድርጓል። ኒውካስትል ዩናይትድ በ11 ነጥብ ከነበረበት 12ተኛ ደረጃ ወደ 13ኛ ዝቅ ብሏል። ጨዋታውን ተከትሎ ዘጠነኛ ሳምንት ተጠናቋል። የ10ኛ ሳምንት መርሐ ግብር ከጥቅምት 27 2019 ዓ.ም አንስቶ ይካሄዳል።

አዲስ አበባ፤ ጥቅምት 23/2019 (ኢዜአ)፦ በኢትዮጵያ ፕሪሚየር ሊግ የአምስተኛ ሳምንት መርሐ ግብር ኢትዮጵያ መድን ኢትዮጵያ ንግድ ባንክን 3 ለ 1 ረትቷል። በአዲስ አበባ ስታዲየም በተካሄደው ጨዋታ ሳሙኤል ሳሊሶ፣ ዳዊት አውላቸው እና ወገኔ ገዛኸኝ ግቦቹን አስቆጥረዋል። ሄኖክ ኤርሚያስ የንግድ ባንክን ብቸኛ ጎል ከመረብ ላይ አሳርፏል። ከሁለት ጨዋታዎች በኋላ ወደ ድል መንገድ የተመለሰው ኢትዮጵያ መድን በሰባት ነጥብ ደረጃውን ከ12ኛ ወደ 6ኛ ከፍ አድርጓል። በውድድር ዓመቱ ሁለተኛ ድሉን አሳክቷል። በአንጻሩ በሊጉ የመጀመሪያ ሽንፈቱን ያስተናገደው ኢትዮጵያ ንግድ ባንክ በስምንት ነጥብ አራተኛ ደረጃን ይዟል። ጨዋታውን ተከትሎ የአምስተኛ ሳምንት መርሐ ግብር ተጠናቋል።

አዲስ አበባ፤ ጥቅምት 23/2019 (ኢዜአ)፦ በሳምንቱ መጨረሻ በተለያዩ አገራት በተካሄዱ ውድድሮች ኢትዮጵያውያን አትሌቶች አሸናፊ ሆነዋል። በቻይና ሃንግዡ ማራቶን የሴቶች ውድድር ኩፍቱ ጣሂር አንደኛ በመውጣት ድል ተቀዳጅታለች። በደቡብ ኮሪያ ሴኡል ማራቶን ሚኪያስ ባረጋ አንደኛ በመውጣት ሲያሸንፍ፣ አበባው ሙንየ ሁለተኛ ደረጃን ይዞ አጠናቋል። በኢስታንቡል ማራቶን በሴቶች ውድድር ካሳነሸ አየነው አንደኛ ወጥታለች። አዝመራ አብርሃ ሁለተኛ እና ድርቤ ሂርቆ ሶስተኛ ደረጃን ይዘዋል። በሌላ በኩል የተባበሩት አረብ ኤምሬቶች የአምስት ኪሎ ሜትር ውድድር በወንዶች ፈይሳ ቡሎ አሸናፊ ሲሆን፣ ገብሩ አብርሃ እና ጫላ ጉደታ ሁለተኛና ሶስተኛ ደረጃን ይዘዋል። በሴቶች ሃና መኮንን ስታሸንፍ፣ ማርታ ቦሬማ እና ሴና ተሰማ ሁለተኛና ሶስተኛ ደረጃን ይዘው ጨርሰዋል። በአቡዳቢ 10 ኪሎ ሜትር ውድድር በወንዶች ሰውመሆን አንተነህ አንደኛ ሲወጣ፣ አባይነህ አየል ሁለተኛ ደረጃን በመያዝ ውድድሩን አጠናቋል። በሴቶች አልማዝ ባራኪ ሁለተኛ፣ መገርቱ ሚዴቅሳ ደግሞ ሶስተኛ ደረጃን ይዘዋል። በስፔን በተካሄደው የሴባስቲያን ሀገር አቋራጭ ውድድር ወገኔ አዲሱ ሶስተኛ ደረጃን ይዞ መጨረሱን የኢትዮጵያ አትሌቲክስ ፌዴሬሽን መረጃ ያመለክታል።

አዲስ አበባ፤ ጥቅምት 23/2019 (ኢዜአ)፦ የእንግሊዝ ፕሪሚየር ሊግ የዘጠነኛ ሳምንት የመጨረሻ ጨዋታ በኒውካስትል ዩናይትድ እና በኤቨርተን መካከል ዛሬ ይደረጋል። ጨዋታው ምሽት አምስት ላይ በሴንት ጀምስ ፓርክ ስታዲየም ይካሄዳል። ባለሜዳው ኒውካስትል ዩናይትድ በ11 ነጥብ 12ተኛ ደረጃን ይዟል። ተጋጣሚው ኤቨርተን በ10 ነጥብ 14ኛ ደረጃ ላይ ይገኛል። ሁለቱ ክለቦች በሊጉ ሲገናኙ የአሁኑ ለ59ኛ ጊዜ ነው። ከዚህ ቀደም ባደረጓቸው 58 ጨዋታዎች ኤቨርተን 24 ጊዜ ድል ሲቀናው ኒውካስትል ዩናይትድ በ21ዱ አሸንፏል። በቀሪ 13 ጨዋታዎች አቻ ተለያይተዋል። ኤቨርተን በ58ቱ ጨዋታዎች ላይ 86 ግቦችን ከመረብ ላይ ሲያሳርፍ ኒውካስትል በበኩሉ 82 ጎሎችን ከመረብ ላይ አሳርፏል። ኒውካስትል ዩናይትድ በስምንተኛ ሳምንት መርሐ ግብር ክሪስታል ፓላስን 2 ለ 0 ያሸነፈ ሲሆን ተከታታይ ድሉን ለማስመዝገብ ይጫወታል። ባለፉት ሶስት የሊግ ጨዋታዎች ከድል የራቀው ኤቨርተን ወደ አሸናፊነት ለመመለስ ይፋለማል። ሁለቱ ቡድኖች ባለፈው ሳምንት በካራባኦ ካፕ ባደረጉት ጨዋታ ኤቨርተን ኒውካስትል ዩናይትድን 3 ለ 1 በማሸነፍ ወደ ሩብ ፍጻሜ ማለፉ የሚታወስ ነው። የ36 ዓመቱ ጆን ብሩክስ ጨዋታውን በዋና ዳኝነት እንዲመሩ ተመድበዋል።

አዲስ አበባ፤ ጥቅምት 23/2019 (ኢዜአ)፦ የኢትዮጵያ ፕሪሚየር ሊግ የአምስተኛ ሳምንት የመጨረሻ መርሐ ግብር በኢትዮጵያ ንግድ ባንክ እና በኢትዮጵያ መድን መካከል ዛሬ ይካሄዳል። ጨዋታው ከቀኑ 9 ሰዓት ላይ በአዲስ አበባ ስታዲየም ይደረጋል። ኢትዮጵያ ንግድ ባንክ ዘንድሮ በሊጉ ካደረጋቸው አራት ጨዋታዎች ስምንት ነጥብ በማግኘት አራተኛ ደረጃን ይዟል። አንድ ተስተካካይ ጨዋታ ያለው ኢትዮጵያ መድን በአራት ነጥብ 12ኛ ደረጃን ይዟል። ሁለቱም ክለቦች በተመሳሳይ ባለፉት ሁለት የሊግ ጨዋታዎች ድል አልቀናቸውም። ኢትዮጵያ ንግድ ባንክ በሁለቱ ጨዋታዎች አቻ ሲወጣ፣ መድን በበኩሉ በአንዱ ተሸንፎ በቀሪው ጨዋታ አቻ ተለያይቷል። ሁለቱ ክለቦች በ2018 ዓ.ም የውድድር ዓመት ባደረጓቸው ሁለት ጨዋታዎች በተመሳሳይ አንድ ጊዜ አሸንፈዋል። የዛሬው ጨዋታ ሁለቱ ቡድኖች ወደ አሸናፊነት ለመመለስ የሚያደርጉት ነው።

አዲስ አበባ፤ ጥቅምት 23/2019(ኢዜአ)፦ በእንግሊዝ ፕሪሚየር ሊግ የዘጠነኛ ሳምንት ተጠባቂ መርሃ ግብር አርሰናል ሊቨርፑል አሸንፏል። ትናንት ማምሻውን በአንፊልድ ሮድ ስታዲየም በተካሄደው ጨዋታ ካይ ሃቫርትዝ በ16ኛው ደቂቃ ግቧን አስቆጥሯል። ዴክላን ራያስ ለግብ የሆነውን ኳስ አመቻችቶ አቀብሏል። በጨዋታው አርሰናል የተሻሉ የግብ እድሎች ፈጥሯል። ባለሜዳው ሊቨርፑል በጨዋታው የነበረውን የኳስ ቁጥጥር ብልጫ ወደ ግብ መቀየር አልቻለም። አርሰናል በሊጉ አንፊልድ ሮድ ላይ ከ14 ዓመት በኋላ ለመጀመሪያ ጊዜ አሸንፏል። ውጤቱን ተከትሎ አርሰናል በ24 ነጥብ የሊጉን መሪነት ከማንችስተር ሲቲ ተረክቧል። ከሲቲ ያለውን የነጥብ ልዩነትም ሶስት ሆኗል። ሊቨርፑል በ15 ነጥብ አምስተኛ ደረጃን ይዟል።

አዲስ አበባ፤ ጥቅምት 23/2019 (ኢዜአ)፦ በኢትዮጵያ ፕሪሚየር ሊግ የአምስተኛ ሳምንት ተጠባቂ መርሐ ግብር ሲዳማ ቡና እና መቻል ያደረጉት ጨዋታ ያለ ግብ በአቻ ውጤት ተጠናቋል። ጨዋታው ትናንት ማምሻውን በሀዋሳ ዩኒቨርሲቲ ስታዲየም ተካሄዷል። ውጤቱን ተከትሎ የወቅቱ የሊጉ አሸናፊ ሲዳማ ቡና በአንድ ነጥብ 16ኛ ደረጃን ይዞ ወራጅ ቀጠና ውስጥ ይገኛል። ቡድኑ ሶስት ተስተካካይ ጨዋታዎች ይቀሩታል። መቻል በ10 ነጥብ ሁለተኛ ደረጃ ላይ ይገኛል። በአዲስ አበባ ስታዲየም በተካሄደው ሌላኛው መርሐ ግብር ቅዱስ ጊዮርጊስ በቢላል ገመዳ ጎል ኢትዮ ኤሌክትሪክን 1 ለ 0 በመርታት የሊጉን የመጀመሪያ ድል አስመዝግቧል። ወላይታ ድቻ ወልዋሎ አዲግራት ዩኒቨርሲቲን 2 ለ 0፣ ሀዋሳ ከተማ ጋሞ ጨንቻን 2 ለ 1 አሸንፈዋል። የአምስተኛ ሳምንት መርሐ ግብር ኢትዮጵያ ንግድ ባንክ ከኢትዮጵያ መድን ነገ በሚያደርጉት ጨዋታ ይጠናቀቃል።

አዲስ አበባ፤ ጥቅምት 23/2019 (ኢዜአ)፦‎ በኢትዮጵያ ሴቶች ፕሪሚየር ሊግ የሁለተኛ ሳምንት ተጠባቂ መርሐ ግብር ኢትዮጵያ ንግድ ባንክ ቦሌ ክፍለ ከተማን 3 ለ 1 አሸንፏል። በአበበ ቢቂላ ስታዲየም በተደረገው ጨዋታ የምስራች ላቀው፣ እጸገነት ግርማ እና ሰናይት ቦጋለ ግቦቹን አስቆጥረዋል። መታሰቢያ ኃያሉ የቦሌ ክፍለ ከተማን ብቸኛ ጎል ከመረብ ላይ አሳርፋለች። ውጤቱን ተከትሎ የወቅቱ ሻምፒዮን ኢትዮጵያ ንግድ ባንክ በስድስት ነጥብ በሊጉ መሪነት ቀጥሏል። ቦሌ ክፍለ ከተማ በሶስት ነጥብ ሰባተኛ ደረጃ ላይ ይገኛል። የኢትዮጵያ ንግድ ባንኳ እጸገነት ግርማ በሶስት ግቦች የከፍተኛ ግብ አስቆጣሪነቱን መምራት ጀምራለች። በሌሎች መርሐ ግብሮች ጉለሌ ክፍለ ከተማ ጥሩነሽ ዲባባ ማሰልጠኛ ማዕከልን 2 ለ 0፣ ልደታ ክፍለ ከተማ ድሬዳዋ ከተማን 3 ለ 2 እና ባህር ዳር ከተማ ሲዳማ ቡናን 1 ለ 0 አሸንፈዋል። ጨዋታዎቹን ተከትሎ ሁለተኛ ሳምንት ተጠናቋል። የሶስተኛ ሳምንት መርሐ ግብር ከጥቅምት 28 2019 ዓ.ም አንስቶ ይካሄዳል።

አዲስ አበባ፤ ጥቅምት 22/2019 (ኢዜአ)፦ በሲቢኢ የኢትዮጵያ ፕሪሚየር ሊግ 5ኛ ሳምንት መርሐ ግብር ቅዱስ ጊዮርጊስ ኢትዮ ኤሌክትሪክን 1 ለ 0 በሆነ ውጤት አሸንፏል። ዛሬ ቀን 9 ሰዓት ላይ በአዲስ አበባ ስታዲየም በተደረገው ጨዋታ የቅዱስ ጊዮርጊስን የማሸነፊያ ግብ ቢላል ገመዳ በ80ኛው ደቂቃ አስቆጥሯል። በተመሳሳይ ሰዓት በተካሄደ ሌላ ጨዋታ ደግሞ ሀዋሳ ከተማ ጋሞ ጨንቻን 2 ለ 1 በሆነ ውጤት አሸንፏል። በጨዋታው ቃልኪዳን ዘላለም የሀዋሳ ከተማን ግቦች ሲያስቆጥር የትምጌታ ታደሰ የጋሞ ጨንቻን ብቸኛ ግብ ከመረብ አሳርፏል።

አዲስ አበባ፤ ጥቅምት 22/2019 (ኢዜአ)፦ በኢትዮጵያ ፕሪሚየር ሊግ አምስተኛ ሳምንት የሶስተኛ ቀን ውሎ አራት ጨዋታዎች ይደረጋሉ። ምሽት 12 ሰዓት ላይ ሲዳማ ቡና ከመቻል በሃዋሳ ዩኒቨርሲቲ ስታዲየም የሚያደርጉት ጨዋታ ተጠባቂ ነው። የወቅቱ ሻምፒዮን ሲዳማ ቡና እስከ አሁን አንድ ጨዋታ አድርጎ ያለ ምንም ነጥብ የመጨረሻውን 18ኛ ደረጃን ይዟል። ሲዳማ ቡና ከጋሞ ጨንቻ፣ ኢትዮጵያ መድን እና ሀዋሳ ከተማ ሊያደርጓቸው የነበሩ ጨዋታዎች በሲዳማ ቡና የካፍ ሻምፒዮንስ ሊግ ተሳትፎው ምክንያት ላልተወሰነ ጊዜ መራዘማቸው የሚታወስ ነው። ሲዳማ ቡና በመጀመሪያ ሳምንት ከኢትዮጵያ ንግድ ባንክ ጋር ባደረገው ጨዋታ የ1 ለ 0 ሽንፈት አስተናግዷል። ተጋጣሚው መቻል በሊጉ ካደረጋቸው አራት ጨዋታዎች መካከል ዘጠኝ ነጥብ በማግኘት ሁለተኛ ደረጃን ይዟል። ሁለቱ ክለቦች በ2018 ዓ.ም በተገናኙባቸው የሊግ ጨዋታዎች በተመሳሳይ አንድ ጊዜ አሸንፈዋል። ጨዋታው ሲዳማ ቡና በውድድር ዓመቱ የመጀመሪያ ድሉን ለማግኘት፣ መቻል በድል ጉዞው ለመቀጠል የሚያደርጉት ነው። ጨዋታው ጠንካራ ፉክክር ይታይበታል ተብሎ ይጠበቃል። በሌላኛው መርሐ ግብር ኢትዮ ኤሌክትሪክ ከቅዱስ ጊዮርጊስ ከቀኑ ዘጠኝ ሰዓት በአዲስ አበባ ስታዲየም ይጫወታሉ። ኢትዮ ኤሌክትሪክ በሰባት ነጥብ ስድስተኛ ደረጃ ይዟል። ቅዱስ ጊዮርጊስ በሶስት ነጥብ 13ኛ ደረጃ ላይ ይገኛል። ባለፉት ሁለት ጨዋታዎች ያሸነፈው ኢትዮ ኤሌክትሪክ በድል ጉዞው ለመቀጠል ወደ ሜዳ ይገባል። የ16 ጊዜ የሊጉ አሸናፊ ቅዱስ ጊዮርጊስ በውድድር ዓመቱ የመጀመሪያ ድሉን ለማግኘት ይፋለማል። ወላይታ ድቻ ከወልዋሎ አዲግራት ዩኒቨርሲቲ ከቀኑ 10 ሰዓት በሀላባ ኢንተርናሽናል ስታዲየም ጨዋታቸውን ያከናውናሉ። በአራተኛ ሳምንት ሀላባ ከተማን 6 ለ 0 በመርታት የመጀመሪያ ድሉን ያሳካው ወላይታ ድቻ በአምስት ነጥብ ስምንተኛ ደረጃን ይዟል። ወልዋሎ አዲግራት ዩኒቨርሲቲ በአንድ ነጥብ 16ኛ ደረጃን ይዞ ወራጅ ቀጠና ውስጥ ይገኛል። ወልዋሎ ከፋሲል ከነማ፣ ሀዲያ ሆሳዕና እና ባህር ዳር ከተማ ጋር ሊያደርጋቸው የነበሩ የሊግ ጨዋታዎች በካፍ ኮንፌዴሬሽን ዋንጫ ምክንያት መራዘማቸው አይዘነጋም። ወላይታ ድቻ ተከታታይ ድሉን ለማግኘት ወልዋሎ የመጀመሪያ ሶስት ነጥቡን ለማግኘት ይጫወታሉ። ሌላኛው የዕለቱ መርሐ ግብር ሀዋሳ ከተማ እና ጋሞ ጨንቻን ከቀኑ ዘጠኝ ሰዓት በሀዋሳ ዩኒቨርሲቲ ስታዲየም ያገናኛል። ሀዋሳ ከተማ በሁለት ነጥብ 15ኛ ደረጃን ይዞ ወራጅ ቀጠና ውስጥ ይገኛል። አዲስ አዳጊው ጋሞ ጨንቻ በአንድ ነጥብ 17ኛ ደረጃን ይዞ ወራጅ ቀጠና ውስጥ ይገኛል። ሁለቱም ክለቦች በውድድር ዓመቱ የመጀመሪያ ድላቸውን ለማግኘት ይፋለማሉ። ቡድኖቹ በተመሳሳይ አንድ አንድ ተስተካካይ ጨዋታ አላቸው።

አዲስ አበባ፤ ጥቅምት 22/2019(ኢዜአ)፦ በእንግሊዝ ፕሪሚየር ሊግ የዘጠነኛ ሳምንት መርሃ ግብር ሊቨርፑል እና አርሰናል ዛሬ የሚያደርጉት ጨዋታ የተመልካቾችን ቀልብ ስቧል። የሁለቱ ክለቦች ጨዋታ ምሽቱ 1 ሰዓት ከ30 ላይ በአንፊልድ ሮድ ስታዲየም ይካሄዳል። ሊቨርፑል በዘንድሮው የውድድር ዓመት ባደረጋቸው ስምንት ጨዋታዎች አራት ጊዜ ሲያሸንፍ በአንዱ ተሸንፎ በሶስቱ አቻ ተለያይቷል። ቀያዮቹ በጨዋታዎቹ 11 ጎሎችን ሲያስቆጥሩ ስምንት ግቦች ተቆጥሮባቸው በ15 ነጥብ አምስተኛ ደረጃን ይዘዋል። የወቅቱ ሻምፒዮን አርሰናል በሊጉ ባደረጋቸው ስምንት ጨዋታዎች በሰባቱ ድል ሲቀናው አንድ ጊዜ ሽንፈት አስተናግዷል። በጨዋታዎቹ ላይ 13 ግቦችን ከመረብ ጋር ሲያገናኝ አምስት ጎሎችን አስተናግዷል። አርሰናል በ21 ነጥብ ሁለተኛ ደረጃ ላይ ተቀምጧል። አርሰናል እና ሊቨርፑል በሁሉም ውድድሮች እስከ አሁን 246 ጊዜ ተገናኝተዋል። ሊቨርፑል 96 ጊዜ በማሸነፍ የበላይነቱን ሲይዝ አርሰናል በበኩሉ በ83ቱ ጨዋታዎች ድል ቀንቶታል። በቀሪ 67 ጨዋታዎች ተለያይተዋል። በፕሪሚየር ሊጉ 68 ጊዜ ተገናኝተው ሊቨርፑል 26 ጊዜ ሲያሸንፍ አርሰናል በ18ቱ ድል ቀንቶታል። በቀሪ 24 ጨዋታዎች አቻ ተለያይተዋል። ባለፉት አምስት የሊግ የእርስ በርስ ጨዋታቸው ሁለቱም በተመሳሳይ አንድ ጊዜ ሲያሸንፉ በቀሪ ሶስት ጨዋታዎች አቻ ተለያይተዋል። ሁለቱ ቡድኖች ባለፈው የውድድር ባደረጓቸው ጨዋታዎች ሊቨርፑል አንድ ጊዜ ሲያሸንፍ በቀሪ ጨዋታ ነጥብ ተጋርተዋል። አርሰናል ካሸነፈ ወይም አቻ ከወጣ የሊጉን መሪነት ከማንችስተር ሲቲ ይረከባል። ሊቨርፑል ተከታታይ ድሉን ለማስመዝገብ ይጫወታል። ጨዋታው ተመጣጣኝ ፉክክር ይታይበታል የሚል ሰፊ ግምት አግኝቷል። የ43 ዓመቱ አንዲ ማድሊ የሁለቱን ቡድኖች ተጠባቂ ጨዋታ በዋና ዳኝነት ይመሩታል።

አዲስ አበባ፤ ጥቅምት 22/2019 (ኢዜአ)፦‎ የኢትዮጵያ ሴቶች ፕሪሚየር ሊግ ሁለተኛ ሳምንት ዛሬ ይጠናቀቃል። ቦሌ ክፍለ ከተማ ኢትዮጵያ ንግድ ባንክ ከቀኑ 10 ሰዓት በአበበ ቢቂላ ስታዲየም የሚያደርጉት ጨዋታ ተጠባቂ ነው። በሊጉ የመጀመሪያ ሳምንት መርሐ ግብር ቦሌ ክፍለ ከተማ መቻልን 2 ለ 1 አሸንፏል። የወቅቱ ሻምፒዮን ኢትዮጵያ ንግድ ባንክ በመክፈቻው ጨዋታ ይርጋጨፌ ቡናን 2 ለ 0 ረትቷል። ሁለቱ ክለቦች አምና ባደረጓቸው ሁለት የሊግ ጨዋታዎች ኢትዮጵያ ንግድ ባንክ በማሸነፍ የበላይነቱን ይዟል። ቡድኖቹ መጋቢት 1 /2018 ዓ.ም ለመጨረሻ ጊዜ በተገናኙበት የ18ኛ ሳምንት የጨዋታ ኢትዮጵያ ንግድ ባንክ ቦሌ ክፍለ ከተማን 2 ለ 1 አሸንፏል። እፀገት ግርማ እና እሙሽ ዳንኤል የማሸነፊያ ግቦቹን አስቆጥረዋል። ፅግነሽ አዴ ለቦሌ ክፍለ ከተማ ብቸኛውን ጎል ከመረብ ላይ አሳርፋለች። ጨዋታው ጥሩ ፉክክር ይታይበታል የሚል ግምት አግኝቷል። በሌሎች መርሐ ግብሮች ጉለሌ ክፍለ ከተማ ከጥሩነሽ ዲባባ ማሰልጠኛ ማዕከል ከቀኑ 8 ሰዓት በአበበ ቢቂላ ስታዲየም ይጫወታሉ። ባህር ዳር ከተማ ከሲዳማ ቡና ከቀኑ 9 ሰዓት በባህር ዳር ስታዲየም እና ድሬዳዋ ከተማ ከልደታ ክፍለ ከተማ ከቀኑ 10 ሰዓት በድሬዳዋ ስታዲየም ጨዋታቸውን ያደርጋሉ።

አዲስ አበባ፤ ጥቅምት 22/2019 (ኢዜአ)፦ በጣልያን ሴሪአ የ10ኛ ሳምንት ተጠባቂ መርሐ ግብር ኤሲ ሚላን ኢንተር ሚላንን 3 ለ 1 ረትቷል። ትናንት ማምሻውን በሳንሲሮ ስታዲየም በተካሄደው ጨዋታ ክሪስቲያን ፑሊሲች፣ አድሪያን ራቢዮት እና ዲያጎ ሞሬራ ግቦቹን አስቆጥረዋል። አሌሳንድሮ ባስቶኒ የኢንተር ሚላንን ግቦችን ከመረብ ላይ አሳርፏል። በጨዋታው ኤሲ ሚላን ያደረጋቸውን ኢላማቸውን የጠበቁ ሙከራዎች ወደ ግብ ቀይሯል። በአንጻሩ ኢንተር ሚላን የግብ እድሎቹን በሚገባ አልተጠቀመም። ድሉን ተከትሎ ኤሲ ሚላን በ21 ነጥብ ደረጃውን ከአምስተኛ ወደ አራተኛ ከፍ አድርጓል። በሊጉ የመጀመሪያ ሽንፈቱን ያስተናገደው ኢንተር ሚላን በ25 ነጥብ ከነበረበት አንደኛ ደረጃ ወደ ሁለተኛ ዝቅ ብሏል። የሊጉን መሪነትም ለላዚዮ አስረክቧል።

አዲስ አበባ፤ ጥቅምት 22/2019(ኢዜአ):- በጀርመን ቡንድስሊጋ የስምንት ሳምንት መርሃ ግብር ባየር ሙኒክ ከቦሩሲያ ዶርትሙንድ ያደረጉት ጨዋታ ሁለት አቻ በሆነ ውጤት ተጠናቋል። ትናንት ማምሻውን በአሊያንዝ አሬና ስታዲየም በተካሄደው ጨዋታ ኮንራድ ላይመር እና ዳዮት ኡፓሜካኖ የሙኒክን ጎሎች አስቆጥረዋል። ሴርሁ ጉይራሲ እና ፋቢዮ ሲልቫ የዶርትሙንድን ግቦች ከመረብ ላይ አሳርፈዋል። የባሎንዶር አሸናፊው ሃሪ ኬን በ56ኛው ደቂቃ ፍጹም ቅጣት ምት ስቷል። ባለሜዳው ባየር ሙኒክ ጨዋታውን ሁለት ጊዜ ቢመራም ውጤቱን ማስጠበቅ አልቻለም። ውጤቱን ተከትሎ ባየር ሙኒክ በ18 ነጥብ ሊጉን እየመራ ነው። ቦሩሲያ ዶርትሙንድ በተመሳሳይ 18 ነጥብ በግብ ክፍያ ተበልጦ ሁለተኛ ደረጃን ይዟል።

አዲስ አበባ፤ ጥቅምት 22/2019 (ኢዜአ)፦ በእንግሊዝ ፕሪሚየር ሊግ ዘጠነኛ ሳምንት መርሐ ግብር ቶተንሃም ክሪስታል ፓላስን 2 ለ 0 አሸንፏል። ትናንት ማምሻውን በቶተንሃም ሆትስፐርስ ስታዲየም በተካሄደው ጨዋታ አርቺ ግሬይ እና ጃን ፖል ቫንሄከ ግቦቹን አስቆጥረዋል። የክሪስታል ፓላሱ አጥቂ ጂን-ፍሊፕ ማቴታ በ13ኛው ደቂቃ በቀይ ካርድ ከሜዳ ተሰናብቷል። የተጫዋቹ መውጣት በክሪስታል ፓላስ ጨዋታ ላይ ተጽእኖ አሳድሯል። ሶስተኛ ተከታታይ ድሉን ያስመዘገበው ቶተንሃም ሆትስፐርስ በ12 ነጥብ ስምንተኛ ደረጃን ይዟል። በውድድር ዓመቱ ስድስተኛ ሽንፈቱን ያስተናገደው ክሪስታል ፓላስ በሰባት ነጥብ 18ኛ ደረጃን ይዞ ወራጅ ቀጠና ውስጥ ይገኛል። በሌላኛው መርሐ ግብር አስቶንቪላ ከፉልሃም አንድ አቻ ተለያይተዋል። በቪላ ፓርክ በተካሄደው ጨዋታ ኒኮላስ ጃክሰን የአስቶንቪላን ጎል ከመረብ ላይ አሳርፏል። የአስቶንቪላው ግብ ጠባቂ ዛዮን ሱዙኪ በራሱ ላይ የፉልሃምን ግብ አስቆጥሯል። ውጤቱን ተከትሎ አስቶንቪላ በ12 ነጥብ ዘጠነኛ፣ ፉልሃም በዘጠኝ ነጥብ 15ኛ ደረጃን ይዘዋል።

አዲስ አበባ፤ ጥቅምት 21/2019 (ኢዜአ)፦‎ በኢትዮጵያ ሴቶች ፕሪሚየር ሊግ ሁለተኛ ሳምንት የመጀመሪያ ቀን ውሎ ሶስት ጨዋታዎች ተደርገዋል። በአበበ ቢቂላ ስታዲየም በተካሄደው ጨዋታ ኢትዮ ኤሌክትሪክ ከመቻል ያለ ግብ አቻ ተለያይተዋል። ይርጋጨፌ ቡና እና ሀዋሳ ከተማ ያደረጉት ጨዋታ ሶስት አቻ በሆነ ውጤት ተጠናቋል። በሃዋሰ አርቴፊሻል ሜዳ በተደረገው ጨዋታ ቃልኪዳን ዘላለም ሁለት ግቦችን ስታስቆጥር ቤተልሄም ፈርኦን ቀሪዋን ጎል ለይርጋጨፌ አስቆጥራለች። ስራ ይርዳው፣ ብርቱካን ገብረክርስቶስ እና ቤተልሄም ታምሩ የሃዋሳ ከተማን ግቦች ያስቆጠሩ ተጫዋቾች ናቸው። ሸገር ከተማ ከአዳማ ከተማ አንድ አቻ ተለያይተዋል። በአበበ ቢቂላ ስታዲየም በተከናወነው መርሐ ግብር ማያ አስራት ለሸገር ከተማ፣ ምስር ኢብራሂም ለአዳማ ከተማ ግቦቹን አስቆጥረዋል።

አዲስ አበባ፤ ጥቅምት 21/2019 (ኢዜአ)፦ በእንግሊዝ ፕሪሚየር ሊግ ዘጠነኛ ሳምንት መርሐ ግብር ብራይተን ማንችስተር ሲቲን 1 ለ 0 አሸንፏል። ማምሻውን በኢትሃድ ስታዲየም በተካሄደው ጨዋታ ያሲን አያሪ በ11ኛው ደቂቃ ግቡን አስቆጥሯል። ማንችስተር ሲቲ በሁለተኛው አጋማሽ ወደ ጨዋታው ለመመለስ ጥረት ቢያደርግም ሊሳካላት አልቻለም። ተከታታይ ሽንፈቱን ያስተናገደው ማንችስተር ሲቲ በ21 ነጥብ ሊጉን እየመራ ይገኛል። ከተከታዩ አርሰናል ጋር ያለውን የነጥብ ልዩነት ወደ ሶስት ከፍ የማድረግ እድል አልተጠቀመበትም። የወቅቱ ሻምፒዮን አርሰናል ነገ ሊቨርፑልን ካሸነፈ ወይም አቻ ከወጣ የሊጉን መሪነት ከሲቲ ይረከባል። ወሳኝ ድል የተቀዳጀው ብራይተን በ19 ነጥብ ሶስተኛ ደረጃን ይዟል። በሌሎች መርሐ ግብሮች ብሬንትፎርድ ኖቲንግሃም ፎረስትን 2 ለ 0፣ ኮቨንተሪ ሲቲ ሰንደርላንድን 3 ለ 1 እና ቦርንማውዝ ሊድስ ዩናይትድን 2 ለ 0 አሸንፈዋል። ሁል ሲቲ ከኤፕስዊች ታውን ሁለት አቻ ተለያይተዋል። ምሽት 2 ሰዓት ከ30 ቶተንሃም ሆትስፐርስ ከክሪስታል ፓላስ፣ አስቶንቪላ ከፉልሃም ምሽት አምስት ላይ ጨዋታቸውን ያደርጋሉ።