አዲስ አበባ፤ ጥቅምት 1 /2019 (ኢዜአ):- በአዲስ አበባ ከተማ የሥራ አፈጻጸም በህብረተሰቡ ዘንድ በተገኙ ተጨባጭ ውጤቶችና ጥቅሞች ላይ ተመስርቶ እንዲመዘን ይደረጋል ሲሉ የአዲስ አበባ ከተማ አስተዳደር ከንቲባ አዳነች አቤቤ ገለጹ፡፡ የአዲስ አበባ ከተማ አስተዳደር ለሁለት ተከታታይ ቀናት ሲያካሒድ የቆየውን የ2019 በጀት ዓመት የ1ኛ ሩብ ዓመት ዕቅድ አፈጻጸም ገምግሞ የቀጣይ ሶስት ወራት የትኩረት አቅጣጫ በማስቀመጥ አጠናቋል፡፡   ከንቲባ አዳነች አቤቤ በዚሁ ወቅት፤ በመጀመሪያው ሩብ ዓመት የከተማዋ ነዋሪዎች የሰጡንን ኃላፊነት በታማኝነትና በብቃት ተወጥተናል ብለዋል፡፡ በነዋሪዎች የኑሮ ሁኔታና ተጠቃሚነት ላይ አዎንታዊ ለውጥ ያመጡ እና ለቀጣይ ሥራዎች መሠረት የጣሉ ውጤታማ ተግባራት መከናወናቸውን ገልጸዋል፡፡ በክረምት የበጎ ፈቃድ አገልግሎት ከታቀደው በላይ በመፈጸም አበረታችና ምሳሌ የሚሆኑ ውጤቶች መመዝገባቸውን ተናግረዋል፡፡ በሩብ ዓመቱ 2 ሺህ 500 ያህል አዳዲስ ቤቶችን ለመገንባት ታቅዶ ከ4 ሺህ 200 በላይ ቤቶች ተገንብተው መጠናቀቃቸውን አብራርተዋል። ማህበራዊ ደግነትን እና ርህራሄን በማጎልበት በኩልም የማዕድ ማጋራት መርሃ ግብር በተቀመጠው ስታንዳርድ መሰረት በስኬት መከናወኑን ተናግረዋል።   በርካታ ሜጋ ፕሮጀክቶችን ማከናወንን ጨምሮ ሳይጠናቀቁ የነበሩ በርካታ ግንባታዎች ተጠናቀው አገልግሎት መስጠት እንዲጀምሩ መደረጉን ጠቅሰዋል። የትምህርት ጥራትን ለማረጋገጥ በተሰራው ሥራ በፈረቃ ይሰጡ የነበሩ የትምህርት መርሃ ግብሮች ወደ ተቀመጠው ስታንዳርድ እንዲመጡ መደረጉን አንስተዋል፡፡ አዳዲስ የጤናና የትምህርት ተቋማት ተገንብተው ወደ ሥራ መግባታቸውን እንዲሁም ለበርካታ ዜጎች የሥራ እድል መፈጠሩን አመልክተዋል፡፡ በከተማዋ የሥራ አፈጻጸምን በቁጥርና በመቶኛ ብቻ ከማስቀመጥ ባለፈ ለህብረተሰቡ የተገኘውን ትክክለኛ ውጤት እና ጥቅም መሰረት ባደረገ መልኩ እንዲመዘን ይደረጋል ብለዋል፡፡ ሪፖርቶችን በዲጂታል መንገድ በመደገፍ ተግባራዊ የማድረግ ስራዎች ተጠናክረው እንደሚቀጥሉም አረጋግጠዋል፡፡ ይህ አቅጣጫ ከተማዋ ያስመዘገበችውን ስኬት አስቀጥሎ በሀገር አቀፍ ደረጃ በሚከናወኑ ሰፊ የሥራ እንቅስቃሴዎች ውስጥ ውጤታማ ሥራዎችን ማከናወን እንደሚያስችል ገልጸዋል።   የአዲስ አበባ ከተማ ምክትል ከንቲባ እና ፕላን ልማት ቢሮ ሃላፊ አቶ ሳሙኤል ሞላልኝ በበኩላቸው፤ የሚዘጋጁ ሪፖርቶች ይበልጥ እውነተኛ፣ ጥራት ያላቸውና በማስረጃ የሚደገፉ እንዲሆኑ በትኩረት ይሰራል ብለዋል፡፡ በሁሉም ተቋማት የሚቀርቡ ሪፖርቶች አንድ ዓይነትና ወጥነት ያለው ፎርማት እንዲኖረው እንደሚደረግ ተናግረዋል።   በምክትል ከንቲባ ማዕረግ የአዲስ አበባ ከተማ ብልፅግና ፓርቲ ቅርንጫፍ ጽህፈት ቤት ሃላፊ ጀማሉ ጀንበር (ዶ/ር) ፤ ሩብ ዓመቱ ከከተማ እስከ ወረዳ ያለው አመራር በሙሉ ትኩረትና አቅም ስራዎችን ያከናወነበት ህብረተሰቡም በንቃት የተሳተፈበት መሆኑን ገልጸዋል፡፡ እንዲሁም ከመላው የኢትዮጵያ ክፍል የተወጣጡ የህብረተሰብ ክፍሎች በከተማዋ ተገኝተው በሀገራዊ የቀጣይ ዕጣ ፈንታ ዙሪያ የመከሩበትና ውጤት የተመዘገበበት እንደነበር አውስተዋል፡፡

ደብረ ብርሃን/ ባህር ዳር ፤ ጥቅምት 1 /2019 (ኢዜአ):-በአማራ ክልል በክረምት የበጎ ፈቃድ አገልግሎት አቅመ ደካሞችንና ተጋላጭ የህብረተሰብ ክፍሎችን ተጠቃሚ ያደረገ ከ31 ቢሊዮን ብር በላይ የሚገመት የልማት ሥራ መሠራቱን የክልሉ ሴቶች፣ ወጣቶችና ማህበራዊ ጉዳይ ቢሮ አስታወቀ። የአማራ ክልል ጤና ቢሮ የክረምት በጎ ፈቃድ አገልግሎት ማጠቃለያና የበጋ በጎ ፈቃድ አገልግሎት ማስጀመሪያ መርሐ ግብር ዛሬ በደብረ ብርሃን ከተማ አካሄዷል።   የክልሉ ሴቶች፣ ወጣቶችና ማኅበራዊ ጉዳይ ቢሮ ኃላፊ ወይዘሮ ብርቱካን ሲሳይ እንደገለፁት፤ በክልሉ በክረምት የበጎ ፈቃድ አገልግሎት ከ31 ቢሊዮን ብር በላይ የሚገመት የልማት ሥራ ተሰርቷል። በክልሉ በክረምቱ ወቅት ከ10 ሚሊዮን በላይ በጎ ፈቃደኞችን በማሳተፍ ከ31 ቢሊዮን ብር በላይ የሚገመት ኢኮኖሚያዊና ማኅበራዊ የልማት ሥራዎችን ማከናወን መቻሉን ገልጸዋል። በጤና፣ በትምህርት፣ በግብርናና በሌሎች ዘርፎች አቅመ ደካሞችን ተጠቃሚ ማድረግ መቻሉን ጠቁመው፣ የጤና ተቋማትና ባለሙያዎች ያበረከቱት አስተዋጽኦ አርዓያነት ያለው ተግባር መሆኑን ገልጸዋል።   በኢፌዴሪ ጤና ሚኒስቴር የዓለም አቀፍና የሀገር ውስጥ የጤና የበጎ ፈቃድ ሕክምና አገልግሎት አስተባባሪ ዶክተር ሐብታሙ መንጌ በበኩላቸው፣ አገልግሎቱ ለዜጎች የጤና ግልጋሎትን በሰፊው ተደራሽ ለማድረግ እያስቻለ መሆኑን ተናግረዋል። በተለይም ከፍለው መታከም ለማይችሉ የሕብረተሰብ ክፍሎች ነፃ የምርመራና የሕክምና አገልግሎት በመስጠት ተላላፊና ተላላፊ ያልሆኑ በሽታዎችን ለመከላከል ማገዙን አስረድተዋል። ይህም በየደረጃው ጤናማና አምራች ሕብረተሰብን በመፍጠር እየተመዘገበ ለሚገኘው ሀገራዊ ዕድገት አስተዋጽኦ ማበርከቱን አብራርተዋል።   የአማራ ክልል ጤና ቢሮ ኃላፊ አቶ አብዱልከሪም መንግሥቱ በበኩላቸው፣ የበጎ ፈቃድ አገልግሎት የሕክምና ተደራሽነትን እያረጋገጠ መሆኑን ገልጸው በክረምቱ የተካሄደውን የበጎ ፈቃድ አገልግሎት በበጋም በማስቀጠል ሕብረተሰቡን ተጠቃሚ ለማድረግ በትኩረት ይሰራል ብለዋል።   በክረምትና በበጋ ወራት እየተካሄዱ የሚገኙ የበጎ ፈቃድ አገልግሎት ተግባራትን አጠናክሮ በማስቀጠል የህብረተሰቡን ተጠቃሚነት ለማሳደግ አስተዳደሩ አስፈላጊውን ድጋፍ እንደሚያደርግ የገለጹት ደግሞ የደብረ ብርሃን ከተማ አስተዳደር ተቀዳሚ ምክትል ከንቲባ አቶ በድሉ ውብሸት ናቸው።   በባሕር ዳር ከተማ በተካሄደው ተመሳሳይ መድረክ ላይ የተገኙት የከተማ አስተዳደሩ ተቀዳሚ ምክትል ከንቲባ አቶ ጎሹ እንዳለማው በበኩላቸው በጎ ፈቃደኞች በመሠረተ ልማት ጥገና፣ በማኅበራዊና ኢኮኖሚያዊ ዘርፎች እያከናወኑት ያለው ተግባር እንዲቀጥል ድጋፍ ይደረጋል ብለዋል።   የባሕር ዳር ከተማ ሴቶች፣ ወጣቶችና ማኅበራዊ ጉዳይ መምሪያ ኃላፊ ወይዘሮ ሰብለ ዘውዱ በበኩላቸው፣ በከተማዋ በክረምቱ ከ239 ሺህ በላይ በጎ ፈቃደኞችን በማሳተፍ ከ251 ሺህ በላይ የሕብረተሰብ ክፍሎችን ተጠቃሚ ማድረግ መቻሉን ገልጸዋል። በጎ ፈቃደኞቹ ከ661 ሚሊዮን ብር በላይ የሚገመት የልማት ሥራ በነፃ ማበርከታቸውን ጠቁመው፣ በበጋው ወቅትም የበጎ ፈቃድ ሥራው ተጠናክሮ እንደሚቀጥልም አረጋግጠዋል።

አዲስ አበባ ፤ ጥቅምት 1/2019 (ኢዜአ)፦ የመደመር መንግሥት ሁሉንም አቅሞች በማሰባሰብ የሕዝብን የላቀና ዘላቂ ተጠቃሚነት ለማረጋገጥ ዝግጁ መሆኑን የአዲስ አበባ ከተማ አስተዳደር ከንቲባ አዳነች አቤቤ ገለጹ። ከንቲባዋ ይህንን ያሉት ዛሬ ማለዳ ከከተማው ምክር ቤት አባላትና ከነዋሪዎች ጋር በመሆን ባደረጉት የማህበረሰብ ስፖርታዊ እንቅስቃሴ ወቅት ነው። ሙሉ ጤንነቱ የተጠበቀና አምራች ትውልድ ለመገንባት በከተማዋ በርካታ የስፖርት ማዘውተሪያ ስፍራዎች መገንባታቸውን ገልጸዋል።   የከተማው ነዋሪ እነዚህን መሰረተ ልማቶች ዘወትር በአግባቡና በባለቤትነት ሊጠቀምባቸው እንደሚገባ መክረዋል። በዘርፉ የሚደረጉ ጥረቶችና የሚሰሩ ሥራዎችም ተጠናክረው እንደሚቀጥሉ ገልጸው የኢትዮጵያን የብልጽግና ጉዞ የሚያስቆም ምንም ዓይነት ምድራዊ ኃይል እንደሌለ ተናግረዋል።   የሀገራችንን ሉዓላዊነት፣ የከተማችንን ዘላቂ ልማትና ሰላም ለማስጠበቅ ሁሉም ሰው በጋራና በትብብር መስራት እንዳለበት አስገንዝበዋል።  

አዲስ አበባ ፤ መስከረም 30/2019 (ኢዜአ) ፦ በአላማጣ ከተማ ለችግር ለተጋለጡ ዜጎች የሰብአዊ ድጋፍ ማድረስ ተጀምሯል። የሰብአዊ ድጋፉ ሙሉ በሙሉ በፌዴራል መንግሥት የተሸፈነ ሲሆን በአጭር ቀናት ውስጥ የሰብአዊ ድጋፉ እንዲደርስ መደረጉ መንግሥት ለዜጎች ፈጥኖ ደራሽ መሆኑን ያሳየበት ስለመሆኑም የከተማዋ ነዋሪዎች ተናግረዋል።  

ሠመራ፤ መሰከረም 30/2019(ኢዜአ)፡-በአፋር ክልል የአገር ባለውለታ የሆኑ አረጋዊያንን የመደገፍና የመንከባከብ ሥራው ተጠናክሮ እንደሚቀጥል የክልሉ ሴቶችና ማህበራዊ ጉዳይ ቢሮ ገለጸ። "እንክብካቤና ዘላቂ ደህንነት ለአረጋውያን ሰላማዊ ሕይወት" በሚል መሪ ሐሳብ በአፋር ክልል ደረጃ የዓለም የአረጋውያን ቀን ዛሬ በሰመራ ሎጊያ ከተማ ተከብሯል። በመርሃ ግብሩ ላይ የተገኙት የክልሉ ሴቶችና ማህበራዊ ጉዳይ ቢሮ ኀላፊ ወይዘሮ አሲያ ከማል እንዳሉት፣ አረጋውያን በጉብዝና ጊዜያቸው ለአገርና ለወገን ጠቃሚ ተግባራትን በማከናወን ሚናቸውን ተወጥተዋል። ዛሬ በእርጅና ጊዜያቸው የሁሉንም ድጋፍና እገዛ እንደሚሹ ገልጸው፣ በክልሉ ህብረተሰቡንና የተለያዩ አካላትን በማስተባበር ለአረጋውያን የሚደረገው ድጋፍና እንክብካቤ በቀጣይም ተጠናክሮ ይቀጥላል ብለዋል። ለዚህም ህብረተሰቡና ሌሎች አጋር አካላት የሚያደርጓቸውን ድጋፍ አጠናክረው እንዲቀጥሉ አስገንዝበዋል። በዛሬው ዕለት በክልሉ በሚገኙ ከተሞች ከተውጣጡ የአረጋውያን ማህበራት ጋር በመሆን በዓሉ መከበሩን የገለፁት ደግሞ የክልሉ ሴቶችና ማህበራዊ ጉዳዮች ቢሮ የማህበራዊ ዘርፍ ምክትል ኀላፊ ወይዘሮ ነስሮ ኡዳ ናቸው።   የአረጋዊያንን ቀን ምክንያት በማድረግ በአዋሽ ሰባት ከተማ ለሚገኘው "አቡነ አባቢ የአረጋውያን መርጃ ድርጅት" እና በአዋሽ አርባ ከተማ ለሚገኘው "አቡነ ዮናስ የአረጋውያንና ሕፃናት መርጃ ማዕከል" ለእያንዳንዳቸው 100 ሺህ ብር መለገሱን ገልጸዋል። በቀጣይም ለአረጋዊያን በተለያየ መልክ የሚደረገው ድጋፍ ተጠናክሮ ይቀጥል ብለዋል። የሰመራ ሎጊያ ከተማ አስተዳደር የሴቶችና ማህበራዊ ጉዳዮች ጽህፈት ቤት ኀላፊ ወይዘሮ ራሩባ መሐመድ በበኩላቸው በዛሬው ዕለት በከተማው ቤት ለቤት በመሄድ አቅመ ደካማ አረጋዊያንን መደገፋቸውን አንስተዋል። በተመሳሳይ የዓለም የአረጋዊያን ቀን ከሰመራ ለጎጊያ ከተማ በተጨማሪ በክልሉ አሚበራ፣ አብአላ፣ ጎሊና፣ ደዌ እና ሲባቢ ወረዳዎችም ዛሬ ተከብሯል። ቀኑ የተከበረው በዓለም ለ36ኛ ፤ በኢትዮጵያ ደግሞ ለ35ኛ ጊዜ መሆኑም ታውቋል።

አእምሮ የሰው ልጅ የሚያስብበት፣ ስሜቱን የሚረዳበት፣ በራስ ህይወትም ይሁን በተለያዩ አጋጣሚዎች በሌሎች ላይ የሚወስንበት በመሆኑ የአይምሮ ጤና ትኩረት ሊሰጠው እንደሚገባ ይነገራል። የአእምሮ ጤና ሲጎዳ እነዚህና ተያያዥ ችግሮችን የሚያመጣ ብሎም የሥራ አፈጻጸም፣ የቤተሰብ ግንኙነት፣ የትምህርት ተሳትፎና የዕለት ተዕለት ኑሮ ሊነካ ይችላል። ስለዚህ ለአእምሮ ጤና የሚሰጠው ትኩረት እንደ አካላዊ ጤና ሁሉ ተመሳሳይ አስፈላጊነት ሊኖረው እንደሚገባ ይታመናል። በመሆኑም እ.ኤ.አ. በየዓመቱ ጥቅምት 10 የዓለም የአእምሮ ጤና ቀን ሆኖ ይከበራል። እለቱ የሚከበረው ለአእምሮ ጤና ተገቢውን ትኩረት ለመስጠት፣ ስለ ህመሙ በቂ ግንዛቤ እንዲኖር ለማድረግና ለታማሚዎች የድጋፍና እንክብካቤ ስራን ለማሳደግ መሆኑ ይነገራል። የአእምሮ ጤና ችግር ሲነሳ በአንዳንዶች ዘንድ የተሳሳቱ አመለካከቶችና ግንዛቤዎች ይስተዋላሉ። የችግሩን መንስኤ ከድክመት፣ ከግል ባህሪ ወይም ከፈቃደኝነት ጉድለት ጋር በማያያዝ የተሳሳተ ትርጉም የሚሰጥበት ሁኔታ እውነታውን አያመላክትም። የአእምሮ ጤና ችግር ከሥነ-ልቦናዊና ከማኅበራዊ ሁኔታዎች ጋር በተያያዘ ሊከሰት የሚችልበት አጋጣሚም የሰፋ ነው። በውጥረትና የሕይወት ፈተናዎች ውስጥ ለረጅም ጊዜ መዝለቅ፣ የሚወዱትን ሰው በማጣት በሀዘን ውስጥ ለረጅም ጊዜ መዝለቅ፣ ግጭት፣ የኢኮኖሚ ችግርና ሌሎችም ምክንያቶች የህመሙ መንስኤዎች ሊሆኑ ይችላሉ። ከመጠን በላይ ጭንቀትና ድብርት፣ ቀድሞ በደስታ ይሳተፍባቸው የነበሩ ነገሮች ላይ ፍላጎት ማጣት፣ የእንቅልፍ ለውጥ፣ የምግብ ፍላጎት መቀነስ ወይም መጨመር፣ የትኩረት ችግርና የተስፋ መቁረጥ ስሜት በተደጋጋሚ ከታዩ ለአይምሮ ህመም ሊያጋልጡ ይችላሉ። የአእምሮ ጤና ችግር ውጤታማ የሆኑ የሥነ-ልቦና ሕክምናዎችና ሌሎች የሕክምና አማራጮች ያሉት ስለመሆኑ የዓለም ጤና ድርጅት ይመክራል። የምክር አገልግሎት፣ የሥነ-ልቦና ሕክምና፣ በሀኪም ትእዛዝ መድኃኒት መውሰድና የማኅበራዊ ድጋፍ አገልገሎቶች መፍትሄዎች መሆናቸውንም ያመላክታል። በመሆኑም የአእምሮ ጤና ጉዳይ የጤና ተቋማት ብቻ ኃላፊነት ባለመሆኑ የቤተሰብ፣ የትምህርት ቤት፣ የሥራ ቦታ፣ የማህበራዊ ተቋማት፣ የሚዲያና ሌሎችም ተሳትፎ ማደግ እንዳለበት ይመከራል። በዚህ ችግር ውስጥ ያለን ሰው ስሜቱን ማክበር፣ ለባለሙያ እርዳታ እንዲያገኝ ማበረታታትና ከማኅበራዊ ግንኙነት እንዳይገለል ማድረግም አስፈላጊ ነው። የችግሩ ሰለባ የሆነን ሰው ማግለልና መሳለቅ ወይም ችግሩን በደካማነት መተርጎም ተገቢነት የለውም። በመሆኑም የዘንድሮው የዓለም የአእምሮ ጤና ቀን የአእምሮ ጤና ችግር አጋጥሟቸው የነበሩ ሰዎችን ተሞክሮ ማጋራትና ለህመሙ ትኩረት በሚሰጥ መልኩ እየተከበረ ይገኛል። በኢትዮጵያም የአእምሮ ጤናን ለማሻሻል የግንዛቤ ማሳደግ፣ የጤና አገልግሎት ተደራሽነትን ማስፋት፣ የሰለጠኑ ባለሙያዎችን አቅም ማጠናከርና የማኅበረሰብ ድጋፍን ማሳደግ አስፈላጊ ይሆናል። በተለይም ከከተማ ርቀው በገጠር የሚኖሩ ህሙማን የአእምሮ ጤና ምርመራና የሕክምና አገልገሎት እንዲያገኙ መደገፍና ማበረታታት ይገባል። አእምሮን የመንከባከብ ጉዳይ በሕክምና ብቻ ባለመሆኑ በቂ እንቅልፍ ማግኘት፣ አዘውትሮ የአካል እንቅስቃሴ ማድረግ፣ ጤናማ ምግብ መመገብ፣ ከቤተሰብና ከጓደኞች ጋር ጥሩ ግንኙነት መፍጠር፣ የዕረፍት ጊዜ መመደብና የውጥረት ምክንያቶችን በተቻለ መጠን መቀነስ እንደሚገባ ይመከራል። እነዚህ ልምዶች ግን በዘላቂነት የባለሙያ ሕክምናን የሚተኩ ባለመሆናቸው ተገቢውን ሕክምና ማድረግ የግድ ይላል። የዓለም የአእምሮ ጤና ቀን በዓመት አንድ ቀን የሚዘከር ብቻ ሳይሆን በየዕለቱ በተግባር ሊተረጎም የሚገባ ማኅበራዊ ጉዳይ መሆን አለበት። ለአእምሮ ጤና ትኩረት መስጠት፣ ችግሮችን ቀድሞ ማወቅ፣ የሕክምና አገልግሎትን ማስፋት የተጎጂዎችን ክብር መጠበቅ እንደሚገባ ይመከራል።

ጂንካ፤ መስከረም 30/2019 (ኢዜአ)፡-በደቡብ ኢትዮጵያ ክልል ጥራትና ደህንነታቸውን የጠበቁ የምግብና የመድኃኒት ምርቶችን ለህብረተሰቡ ለማቅረብ የክትትልና የቁጥጥር ሥራን አጠናክሮ መቀጠሉን የክልሉ ጤና ቢሮ አስታወቀ። የጤና ቢሮው ምክትል ኃላፊና የምግብ፣ መድኃኒት፣ ጤናና ጤና ነክ አገልግሎቶች ቁጥጥር ዋና ዳይሬክተር አቶ ዮሴፍ ሶንቆ እንዳሉት፣ በክልሉ የቁጥጥር ስርዓትን በማጠናከር ጥራትና ደህንነታቸው የተጠበቀ የምግብና የመድኃኒት ምርቶች ለህብረተሰቡ ተደራሽ እንዲሆን እየተሰራ ነው። ቢሮው የአገልግሎት ጊዜያቸው ያለፈባቸው መዲኃኒቶችና የተሻጉ ምግቦች፣ ባዕድ ነገር የተቀላቀለባቸው ምግቦች እንዲሁም ህጋዊ ምዝገባ ባልተደረገባቸው መድኋኒቶች ላይ የተጠናከረ የቁጥጥርና የክትትል ሥራ እንደሚያከናውን ገልጸዋል። በዚህም በክልሉ በሚገኙ ከ2ሺህ 300 በላይ የግል መድኃኒት ቤቶች ላይ በየጊዜው ክትትልና ቁጥጥር እንደሚያደረግ ተናግረዋል። በተያዘው በጀት ዓመቱ ያለፉት ሦስት ወራት ውስጥ ቢሮው ባደረገው ድንገተኛ ፍተሻና ቁጥጥር ከ19 ሚሊዮን ብር በላይ ግምት ያላቸው ህገ ወጥ የመድሀኒት ምርቶች እና የመጠቀሚያ ጊዜ ያለፈባቸው የታሸጉ ምግቦች እንዲወገዱ ማድረጉን ገልፀዋል። ህገወጥ ድርጊቱን በፈጸሙ የግል መድሃኒት ቤቶች እንደጥፋት መጠናቸው የጽሑፍ ማስጠንቀቂያ የመስጠት፣ የማሸግ እና በህግ ተጠያቂ የማድረግ እርምጃዎች መወሰዳቸውንም ዳይሬክተሩ አቶ ዮሴፍ አመልክተዋል። በህገወጥ የመድሃኒት ቁጥጥር ሥራው የህብረተሰቡ ተሳትፎ የላቀ መሆኑን ዋና ዳይሬክተሩ ጠቁመው፣ በሦስት ወራት ውስጥ ብቻ 174 ጥቆማዎች ከሕብረተሰቡ መድረሱን ገልጸዋል፡፡ ፈዋሽነታቸውና ጤንነታቸው ያልተረጋገጡ የመድኃኒትና የምግብ ምርቶች በህብረተሰቡ እና በሕጻናት ላይ የሚያደርሱት ጉዳት ከፍተኛ በመሆኑ መላው የክልሉ ህዝብ ትብብሩን አጠናክሮ እንዲቀጥልም ጠይቀዋል።

ባህር ዳር ፣መስከረም 30/2019(ኢዜአ)፡- በኢትዮጵያ ግልጽነትና ተጠያቂነት ያለው ጠንካራ የፍትህ ስርአት እየተገነባ መሆኑን የጠቅላይ ፍርድ ቤት ፕሬዝዳንቶች ገለጹ። የፌዴራል ጠቅላይ ፍርድ ቤት ፕሬዝዳንት አቶ ቴዎድሮስ ምህረት ጨምሮ የክልሎች ጠቅላይ ፍርድ ቤት ፕሬዝዳንቶች በተገኙበት ሀገር አቀፍ የህግ ተርጓሚዎች ልዩ ጉባኤ በባህር ዳር ከተማ ተካሂዷል።   ከመድረኩ ተሳታፊዎች መካከል ኢዜአ ያነጋገራቸው የተለያዩ ክልሎች ጠቅላይ ፍርድ ቤት ፕሬዝዳንቶች በኢትዮጵያ ግልጽነትና ተጠያቂነት ያለው ጠንካራ የፍትህ ስርአት እየተገነባ መሆኑን ገልጸዋል። ከአስተያየት ሰጪዎቹ መካከል የኦሮሚያ ክልል ጠቅላይ ፍርድ ቤት ፕሬዝዳንት ኦቱከና ኦዳ (ዶ/ር)፤ የፍትህ አገልግሎት ወሰን የሌለው መሆኑን በመግለጽ በሁሉም አካባቢዎች ፍትሃዊ፣ ግልጽነትና ተጠያቂነት ያለበት አሰራር መዘርጋቱን ተናግረዋል። የመድረኩም አላማ ይህንኑ ማስቀጠል መሆኑን አንስተው ለፍትህ መፋጠን፣ ጥራትና ተደራሽነት በጋራ መስራት አስፈላጊ መሆኑን ገልጸዋል።   የደቡብ ምእራብ ኢትዮጵያ ህዝቦች ክልል ጠቅላይ ፍርድ ቤት ፕሬዝዳንት አቶ ቆጭቶ ገብረማሪያም፤ የፍትህ ስርአቱ ማሻሻያ በነፃነት መስራት የሚያስችል አቅም መገንባቱ የሚጨበጥ ውጤት አምጥቷል ብለዋል። ለዘርፉ ስኬት ተጠያቂነትና ግጽነት ባለው መልኩ ቀጣይነት ያለው የፍትህ ስርአት መገንባት ወሳኝ መሆኑን በማንሳት ለዚህም በትብብር እየተሰራ መሆኑን ገልጸዋል። የአማራ ክልል ጠቅላይ ፍርድ ቤት ፕሬዝዳንት አቶ አለምአንተ አግደው፤ የፍትህ ስርአት ሪፎርም መከናወኑና በድጅታል አሰራር መታገዙ ወጪ ቆጣቢ፣ ግልጽና ተጠያቂነት የሰፈነበት አሰራር እንዲፈጠር አድርጓል ብለዋል።   በክልሉም በዲጅታል ላይ የተመሰረተ ዳኝነት በተጠናከረ መልኩ እየተተገበረ መሆኑን ገልጸዋል። የፌደራል ጠቅላይ ፍርድ ቤት ፕሬዝዳንት አቶ ቴዎድሮስ ምህረት፤ የኢ-ፋይሊንግ አገልግሎቶችን በሁሉም ክልሎች ተደራሽ በማድረግ እንደ ሀገር ወጥ የሆነ አገልግሎት መስጠት እያስቻለ መሆኑን ጠቁመዋል።   በቀጣይም የዜጎችን የፍትህ አገልግሎት ፈጣን፣ ቀልጣፋና ሚዛናዊ ለማድረግ የሚያስችሉ አሰራሮች ተጠናክረው ይቀጥላሉ ብለዋል። በቀጣይ ሀገር በቀል የተቀናጀ የፍርድ ቤቶች መረጃ አስተዳደር ስርአትን ወደ ስራ በማስገባት ዜጎች በቅርበት አገልግሎት እንዲያገኙ ይደረጋል ሲሉ ተናግረዋል።  

አሶሳ፤ መስከረም 30/2019 (ኢዜአ)፦ ኢሬቻ ማህበራዊ ትስስርን በማጠናከር በህዝቦች መካከል አብሮነት እንዲጎለብት እያደረገ መሆኑን የቤኒሻንጉል ጉሙዝ ክልል ባህልና ቱሪዝም ቢሮ ኃላፊ አቶ ከማል ሀሰን ገለጹ። በኦሮሞ ህዝብ ዘንድ በድምቀት የሚከበረው የዘንድሮው እሬቻ በዓል "ኢሬቻ ለሀገራዊ መግባባት" በሚል መሪ ሃሳብ በአሶሳ ከተማ በተለያዩ ዝግጅቶች እየተከበረ ይገኛል።   በዓሉን አስመልክቶ በተዘጋጀ የፓናል ውይይት ላይ የተገኙት የቤኒሻንጉል ጉሙዝ ክልል ባህልና ቱሪዝም ቢሮ ኃላፊ ከማል ሀሰን እንደገለጹት ኢሬቻ የሰላም ፣ የአብሮነት እና የይቅርታ እሴቶችን የያዘ ነው ። ኢሬቻ በህዝቦች መካከል ማህበራዊ ትስስርን የሚያጠናክሩ የይቅርታ እና የመከባበር እሴቶችን የያዘ በመሆኑ ለማህበረሰብ እሴት ግንባታ አስተዋጽኦ እንዳለው ገልጸዋል።   በዓሉ በኦሮሞ ህዝብ ዘንድ በድምቀት ሲከበር የህዝቦችን አብሮነት እና ባህላዊ እሴቶች እንዲተዋወቁ እያደረገ ነው ብለዋል። የኦሮሚያ፣ የቤኒሻንጉል ጉሙዝ እና የጋምቤላ ክልሎች የጋራ የሰላምና ልማት ማስተባበሪያ ጽህፈት ቤት ኃላፊ ፍሮምሳ ሰለሞን በበኩላቸው፣ የኢሬቻ በዓል በአሶሳ ከተማ ለ6ኛ ጊዜ እየተከበረ መሆኑን ገልጸው፥ በዓሉ የጋራ የሆኑ የባህል እሴቶችን በማጎልበት እየተከበረ መሆኑን ተናግረዋል።   ኢሬቻ የሰላም እና የወንድማማችነት በዓል በመሆኑ በዓሉን ከሌሎች የህብረተሰብ ክፍሎች ጋር በአብሮነት እያከበሩ መሆኑን ገልጸዋል። በፓናል ውይይቱ ላይ የክልሉ ከፍተኛ አመራሮችና የተለያዩ የህብረተሰብ ክፍሎች የተገኙ ሲሆን የኢሬቻ በዓል በነገው ዕለት በመልካ አሶሳ በድምቀት እንደሚከበር ተመላክቷል።

አዲስ አበባ፤መስከረም 30/2018 (ኢዜአ)፦በኢትዮጵያ ለአዕምሮ ህመም የሕክምና አገልግሎት ተገቢው ትኩረት መሰጠቱን ጤና ሚኒስቴር ገለጸ። የአዕምሮ ጤና አገልግሎትን በማስፋት የአዕምሮ ጤና እክል ያጋጠማቸው ሰዎች መገለል እንዳይደርስባቸው ማኅበረሰባዊ ግንዛቤን ማሳደግ እንደሚያስፈልግም ጥሪ ቀርቧል። ትልቅ ሀገር፣ ትልቅ ሕዝብ፣ ታላቅ ርዕይ የዓለም የአዕምሮ ጤና ቀን ''እውነተኛ ድምፆች፤ ለእውነተኛ ለውጥ፤ የሕይወት ተሞክሮ ተደማጭነት ይረጋገጥ” በሚል መሪ ሃሳብ ተከብሯል።   መሪ ሃሳቡም የአዕምሮ ጤና ችግር ያጋጠማቸውን ሰዎች የሕይወት ተሞክሮ ማዳመጥ፣ ድምጽ ማሰማትና የሕክምና አገልግሎትና ማኅበረሰብ ድጋፍ ክፍተቶችን ለመፍታት ያለውን ወሳኝ ሚና ያመለክታል። በጤና ሚኒስቴር የበሽታዎች መከላከልና መቆጣጠር መሪ ሥራ አስፈጻሚ ዶክተር ሕይወት ሰለሞን በዚሁ ወቅት እንዳሉት፣ በኢትዮጵያ ለአዕምሮ ጤና ሕክምና አገልግሎት ትኩረት ተሰጥቷል። በሀገር አቀፍ ደረጃ የአዕምሮ ጤና ሕክምና አገልግሎት ተደራሽነትን ለማስፋት በተከናወኑ ሥራዎች አበረታች ውጤቶች እየተመዘገቡ መሆኑንም ገልጸዋል። ከአገልግሎት ተደራሽነት ማስፋት በተጨማሪ፣ በዘርፉ የሚታየውን የባለሙያ እጥረት ለመቅረፍ ብቁ የአዕምሮ ጤና ባለሙያዎችን ለማፍራት የሚያስችሉ ተግባራትም እየተከናወኑ እንደሚገኙ አስረድተዋል። በሀገሪቱ በሚገኙ የጤና ተቋማት የአዕምሮ ጤና ሕክምና አገልግሎት እየተሰጠ መሆኑን ገልጸዋል። ሕብረተሰቡ ለአዕምሮ ጤና ችግር ሊያጋልጡ ከሚችሉ ሁኔታዎች በተለይም ከሱስና ሱስ አምጪ ነገሮች በመቆጠብ ጤንነቱን መጠበቅ እንደሚገባው አሳስበዋል። የአዕምሮ ጤና ጥበቃ ማለት ሕክምና ከማግኘት በላይ ሰዎች ያለ ማኅበራዊ መገለልና ፍርሃት ስለ ሚያጋጥሟቸው ችግሮች መናገር የሚችሉበትን ምቹ ሁኔታ መፍጠርንም ይጠይቃል። ስለሆነም የአዕምሮ ጤና ችግሮችን በተመለከተ የሕብረተሰቡን ግንዛቤ ማሳደግ የተሳሳቱ አመለካከቶችን ማስወገድና ድጋፍ የሚያስፈልጋቸው ሰዎች ያለ ማመንታት ወደ ሕክምና እንዲቀርቡ ማበረታታት ወሳኝ ነው።   የኤካ ኮተቤ ሆስፒታል ዋና ሥራ አስኪያጅ ዶክተር መገርሳ አለሙ በበኩላቸው፣ የአዕምሮ ጤና ችግሮች በተገቢው ሕክምና ሊድኑ የሚችሉ የጤና እክሎች መሆናቸውን ገልጸዋል። የአዕምሮ ጤናን የመጠበቅ ሥራ የአንድ ተቋም ወይም የጤና ባለሙያዎች ብቻ ኃላፊነት እንዳልሆነ አስገንዝበዋል። በዚህም ሕብረተሰቡ ግንዛቤውን በማሳደግ ለአዕምሮ ጤና እክል ላጋጠማቸው ሰዎች ተገቢውን ድጋፍ በመስጠት የበኩሉን ድርሻ መወጣት እንዳለበት አሳስበዋል። የአዕምሮ ጤናን መጠበቅ የግለሰብ፣ የቤተሰብ፣ የጤና ተቋማትና የመላው ሕብረተሰብ የጋራ ኃላፊነት ነው ብለዋል። የአዕምሮ ጤና ችግር ያጋጠማቸውን ሰዎች ድምፅ ማዳመጥ፣ ተደራሽና ጥራት ያለው ሕክምና ማስፋትና ማኅበራዊ መገለልን መቀነስ ጤናማና ተስፋ ያለው ማኅበረሰብ ለመገንባት ወሳኝ መሆናቸውን አብራርተዋል።  

አዲስ አበባ፤መስከረም 30/2018 (ኢዜአ)፦በተያዘው የትምህርት ዘመን የተሻለ ዕውቀትና ክህሎት ለመጨበጥ ትምህርታቸውን በትጋት እየተከታተሉ መሆናቸውን በአዲስ አበባ የ2ኛ ደረጃ ትምህርት ቤት ተማሪዎች ገለጹ። ትልቅ ሀገር፣ ትልቅ ሕዝብ፣ ታላቅ ርዕይ የተማሪዎችን የማለፍ ምጣኔ ለማሻሻል ንድፈ ሐሳብን ከተግባር ጋር ያጣመረ የመማር ማስተማር ምኅዳር በመፍጠር ትምህርት እየተሰጠ መሆኑን የትምህርት ቤት መምህራንና ርዕሳነ መምህራን አስታውቀዋል። ፕሬዝዳንት ታዬ አጽቀሥላሴ በሁለቱ ቤቶች የጋራ ስብሰባ የመንግሥትን የ2019 ዓ.ም በጀት ዓመት ዕቅድ ይፋ ሲያደርጉ በጀት ዓመቱ የኢትዮጵያን ሁለንተናዊ ብልፅግና ለማረጋገጥ ትኩረት የሚደረግበት ነው። በሁለቱ ቤቶች የጋራ ስብሰባ የመንግሥትን የ2019 ዓ.ም በጀት ዓመት ዕቅድ ይፋ ሲያደርጉ በጀት ዓመቱ የኢትዮጵያን ሁለንተናዊ ብልጽግና ለማረጋገጥ ትኩረት የሚደረግበት መሆኑን ገልጸዋል። በበጀት ዓመቱም በማኅበራዊ መስክ በዕውቀትና ክህሎት የበለጸገ ብቁ ዜጋን ለማፍራት፣ ትውልድን የሚቀርጽ የትምህርት ጥራትን ለማረጋገጥ በቁልፍ ጉዳይነት የሚሠራበት መሆኑን ተናግረዋል። በአዲስ አበባ የሁለተኛ ደረጃ ትምህርት ቤት መምህራንና ተማሪዎች ለኢዜአ እንዳሉት፣ መንግሥት የትምህርት ጥራትን ለማረጋገጥ የሚወስዳቸው እርምጃዎች ብቁ ዜጋን ማፍራት የሚያስችሉ ናቸው። በዚህም በተያዘው በጀት ዓመት መምህራን በማስተማር፣ ተማሪዎች ደግሞ በትጋት በማጥናት ውጤታማ የትምህርት ዘመን ለማሳለፍ እየሠሩ መሆናቸውን ገልጸዋል። በለም 2ኛ ደረጃ ትምህርት ቤት የ12ኛ ክፍል የተፈጥሮ ሳይንስ ተማሪ ሙሉዓለም መለሰ እንዳለው፣ መደበኛ የመማሪያና አጋዥ መጽሐፍትን በማጥናት ትምህርቱን በትጋት እየተከታተለ መሆኑን ገልጿል። በትምህርት ቤቱ የ11ኛ ክፍል የተፈጥሮ ሳይንስ ተማሪ ብርቱካን እውነቱ በበኩሏ፣ ከመደበኛ የትምህርት ክፍለ ጊዜ በተጨማሪ በዲጂታልና ሌሎች አማራጮች ዕውቀትና ክህሎቷን እያዳበረች መሆኗን ተናግራለች።   ሀገር አቀፍ መልቀቂያ ፈተናን በብቃት ማለፍ የሚያስችለኝን ዝግጅት ከወዲሁ እያደረኩ ነው ያለው ደግሞ በድልበር አጠቃላይ 2ኛ ደረጃ ትምህርት ቤት የ12ኛ ክፍል የማኅበራዊ ሳይንስ ተማሪ ተስፋ ዋጋዬ ነው።   ለዚህም የትምህርት ዘመኑን የመልቀቂያ ፈተና ለማለፍ ከመደበኛ መማር ማስተማር ባሻገር በማጠናከሪያ ትምህርትና በቤተ-መጽሐፍት ጥናት ራሱን እያዘጋጀ መሆኑን ገልጿል። በትምህርት ቤቱ የ12ኛ ክፍል የተፈጥሮ ሳይንስ ተማሪ በአምላክ ቸርነት በበኩሏ፣ በትጋት ማጥናት የተሻለ ውጤት እንደሚያስገኝ በመጠቆም፣ ለዚህም እርስ በእርስ በመተጋገዝ ትምህርታቸውን እየተከታተሉ መሆናቸውን ተናግራለች።   የድልበር አጠቃላይ 2ኛ ደረጃ ትምህርት ቤት መምህር ሀብታሙ ግዛው እንዳሉት፣ የተማሪዎችን ዕውቀት የሚያንጽ ቀላልና ግልጽ የመማር ማስተማር ሥነ-ዘዴ እየሰጡ መሆኑን ገልጸዋል።   የለም 2ኛ ደረጃ ትምህርት ቤት መምህር ኃይማኖት በጋሻው በበኩላቸው፣ የተማሪዎችን የትምህርት ተወዳዳሪነት በማላቅ፣ በዕውቀትና ክህሎት የዳበረ ትውልድ ለማፍራት በኃላፊነት እየሰራን ነው ብለዋል።   የለም 2ኛ ደረጃ ትምህርት ቤት ዋና ርዕሰ መምህር ሰለሞን ዲሮ፣ ከትምህርት ማኅበረሰቡ ጋር በመተባበር የትምህርት ውጤታማነትን ለማሻሻል በትብብር እየተሰራ ነው ብለዋል። በዘንድሮው የትምህርት ዘመንም የተማሪዎችን የማለፍ ምጣኔ ለማሻሻል የትምህርት ግብዓቶችን በማሟላት፣ ተማሪዎች በመደበኛና በማጠናከሪያ ትምህርት ራሳቸውን እንዲያበቁ እየተደረገ መሆኑን ገልጸዋል። የድልበር አጠቃላይ 2ኛ ደረጃ ትምህርት ቤት ዋና ርዕሰ መምህር ደጀኔ ተስፋዬ በበኩላቸው፣ የትምህርት ጥራትን ለማረጋገጥ ለተማሪዎች ንድፈ ሐሳብን ከተግባር ጋር ያጣመረ ትምህርት እየተሰጠ ነው ብለዋል።   በ2019 የትምህርት ዘመን ቤተ-ሙከራ፣ ቤተ-መጽሐፍትና ሌሎች ግብዓቶችን በማሟላት፣ የተማሪዎችን የማለፍ ምጣኔ የሚያጠናክር የመማር ማስተማር ምኅዳር መፈጠሩን ገልጸዋል። ወላጆችም ተማሪዎችን ውጤታማ ለማድረግ በሚከናወኑ ተግባራት ላይ ሚናቸውን መወጣት፣ እንዲሁም የልጆቻቸውን የትምህርት አቀባበል በትኩረት መከታተል እንደሚጠበቅባቸው አስገንዝበዋል።  

ሰመራ ፤መስከረም 30/2019 (ኢዜአ) ፦ በአፋር ክልል በአየር ንብረት ለውጥ ተጽእኖ ምክንያት ድጋፍ ለሚፈልጉ ወገኖች የሰብአዊ ድጋፍ ተደራሽ እያደረገ መሆኑን የኢትዮጵያ አደጋ ስጋት ስራ አመራር ኮሚሽን አስታወቀ። ከአዳማ የእህል ማከማቻ ማእከላዊ መጋዘን የተጫነ አስቸኳይ ሰብአዊ ድጋፍ ወደ አፋር ክልል በመጓጓዝ ላይ መሆኑንም ኮሚሽኑ ገልጿል።   ለተፈጥሮና ሰው ሰራሽ አደጋዎች ክልሎች በራሳቸው አቅም ምላሽ ለመስጠት እየተረባረቡ ሲሆን ኮሚሽኑም የቅድሚያ ቅድሚያ በሚሰጣቸው አካባቢዎች ተጨማሪ የሰብአዊ ድጋፍ እያደረገ ይገኛል። በዚሁ መሰረትም በአፋር ክልል የቅድሚያ ቅድሚያ ድጋፍ ለሚሹ ወገኖች የሰብአዊ ድጋፍ በማድረስ ላይ መሆኑን ኮሚሽኑ አስታውቋል። የአፋር ክልል በራሱ አቅም የሚያደርገው ድጋፍና ክትትል እንደተጠበቀ ሆኖ ኮሚሽኑም የቅርብ ድጋፍና ክትትል እያደረገ መሆኑ ተገልጿል። በዚህም ከአዳማ የመጠባበቂያ መጋዘን ሰብአዊ ድጋፍ የጫኑ ተሽከርካሪዎች ወደ የአፋር ክልል ተንቀሳቅሰዋል።

አዳማ፤ መስከረም 30/2019(ኢዜአ )፡-የኦሮሚያ የሕግ ስልጠናና ምርምር ኢንስቲትዩት ጥራት ያለውን የፍትህ አገልግሎት ተደራሽ ለማድረግ በሕግ ክህሎትና ስነ ምግባር የታነጹ ብቁ ባለሙያዎችን እያፈራ መሆኑን አስታወቀ። ኢንስቲትዩቱ ረዳት ዐቃቤ ሕጎችና ጠበቆችን ዛሬ አስመርቋል ።   በምረቃ ሥነ ስርዓቱ ላይ በክብር እንግድነት የተገኙት የኦሮሚያ ጠቅላይ ዐቃቤ ህግ ቢሮ ሃላፊ አቶ ጉዮ ዋሪዮ እንደገለፁት የክልሉን የፍትህ ስርዓት ሪፎርም ለማሻሻልና ውጤታማ ለማድረግ እየተከናወነ ባለው ተግባር ኢንስቲትዩቱ ጉልህ ድርሻ አበርክቷል። በተለይ የፍትህ ስርዓቱን ስነ ምግባርና ብቃት ባላቸው የሰው ሃይል ለመምራት ከስልጠና በተጓዳኝ በርካታ የጥናትና ምርምር ስራዎችን እያከናወነ ይገኛል ብለዋል። ለማህበረሰቡ ጥራት ያለውን የፍትህ አገልግሎት መስጠት የሚቻለው ሙያዊ ስነ ምግባርና እውቀት ያለው የሰው ሃይል ማፍራት ነው ብለዋል። በመሆኑም የዛሬው ምሩቃን ያገኙትን ዕውቀት ሥራ ላይ በማዋል ማህበረሰቡን በሥነምግባርና በታማኝነት ማገልገል አለባቸው ብለዋል። ራሳቸውን ዘመኑ ከሚጠይቀው ቴክኖሎጂ ጋር በማዋሃድ ክህሎትና ብቃታቸውን ማጎልበትና የተሻለ ደረጃ ላይ መገኘት እንዳለባቸው አሳስበዋል።   የኢንስቲትዩቱ ዋና ዳይሬክተር ወይዘሮ አዱኛ አህመድ በበኩላቸው ተመራቂዎች በቀጣይ ወደሥራ ሲሰማሩ ህዝብን በፍትሃዊነት በቅንነት ማገልገል አለባቸው ብለዋል። በተለይ ስነ ምግባርና የአገልጋይነት መንፈስ በመላበስ ሙያዊ ሃላፊነታቸውን መወጣት አለባቸው ያሉት ዳይሬክተሯ ኢንስቲትዩቱ ከስልጠና በተጓዳኝ ለክልሉ የፍትህ ሪፎርም ማሻሻያ ወሳኝ ግብዓት የሆኑ የጥናትና ምርምር ሥራዎች ማከናወኑን ገልጸዋል። በተለይ ዳኞች፣ ዐቃቤ ሕጎችና ጠበቆች ተገቢውን ስነ ምግባርና ዕውቀት እንዲላበሱ ከማድረግ ባለፈ ብቁ የህግ ባለሙያዎችን በማፍራት ረገድ ወሳኝ ሚና እየተጫወተም ይገኛል ነው ያሉት።   የኦሮሚያ ጠቅላይ ፍርድ ቤት ምክትል ፕሬዚዳንት አቶ ታደሰ ቀነኒ በበኩላቸው እንዳሉት ተመራቂዎች በስልጠና ቆይታቸው ያገኙትን የህግ ዕውቀትና ክህሎት ወደ ተግባር ሊቀይሩ ይገባል። ሙያዊ ሃላፊነታቸውን በአግባቡ በመወጣትም የህብረተሰቡን የፍትህ አገልግሎት ጥራትና የተደራሽነት ጥያቄ ለመመለስ የሚደረገውን ጥረት ማገዝ ይጠበቅባቸዋል ብለዋል። በስነ ምግባርና በአገልጋይነት መንፈስ ህዝብን በሙሉ አቅማቸው ማገልገል እንደሚገባቸውም አስገንዝበዋል።

ሰመራ፣ መስከረም 30/2019(ኢዜአ) ፡-የሠመራ ጤና ሳይንሰ ኮሌጅ ለ14ኛ ጊዜ ያሰለጠናቸውን 239 የህክምና ተማሪዎችን አስመረቀ። በምርቃት ስነ ስርአቱ ላይ በመገኘት ንግግር ያደረጉት በምክትል ርዕሰ መስተዳድር ማዕረግ የማህበራዊ ክላስተር አስተባባሪና የክልሉ ወጣቶችና ስፖርት ቢሮ ኃላፊ አህመድ ኢብራሂም፤ የተመረቁት የጤና ባለሙያዎች የክልሉን የጤና አገልግሎት አሰጣጥና ተደራሽነቱን ለማስፋት አስተዋጽኦ የሚኖራቸው መሆኑን ገልጸዋል። በመሆኑም የህክምና ባለሙያዎቹ ህዝባቸውን በቅንነትና በታታሪነት በማገልገል ግዴታቸውን በአግባቡ መወጣት እንዳለባቸው አስገንዝበዋል።   የአፋር ክልል ጤና ቢሮ ኀላፊ ያሲን ሀቢብ፤ ተመራቂዎች የክልሉን ህዝብ የጤና አገልግሎት ለማሻሻልና ህዝባቸውን ለማገልገል መትጋት እንዳለባቸው ተናግረዋል። የዋንጫና ሜዳሊያ ተሸላሚ በመሆን በከፍተኛ ማእረግ የተመረቀው አሊ ኢብራሂም፤ በተመረቀበት የክሊኒካል ነርስ ሙያ በቅንነት፣ በታታሪነትና በታማኝነት ለማገልግል ዝግጁ መሆኑን ገልጿል።   ሌላኛዋ በከፍተኛ ውጤት የተመረቀችውና የሜዳሊያ ተሸላሚ የሆነቸው ዘሀራ መሐመድ አደን፤ በህክምና ሙያ ህዝብን ማገልገል መታደል መሆኑን በማንሳት ሙያዊ ሃላፊነቷን በብቃት የምትወጣ መሆኑን ተናግራለች።

አምቦ፤መስከረም 30/2019(ኢዜአ)፡- የ'ሆራ አየቱ' ኢሬቻ በዓል አባ ገዳዎች፣ሃዳ ስንቄዎች እና በርካታ የበዓሉ ታዳሚዎች በተገኙበት በአምቦ ከተማ ተከበረ። የ'ሆራ አየቱ' ኢሬቻ በዓል ላይ የተገኙት የቱላማ አባ ገዳ ጌቱ ተሊላ፤ የኢሬቻ በዓል በአብሮነት በመሰባሰብ ለፈጣሪ ምስጋና የሚቀርብበት የፍቅርና መልካምነት እሴት መገለጫ መሆኑን ገልጸዋል። በመሆኑም የበዓሉን እሴት ጠብቆ ማክበርና ለትውልድ ማስተላለፍ እንደሚገባ ተናግረዋል። ከበዓሉ ታዳሚዎች መካከል ሀዳ ስንቄ አየሉ ዊርቱ፤ የ'ሆራ አየቱ' ኢሬቻ በዓል የአብሮነት፣ የሰላም፣ የፍቅርና የመልካም ተስፋ መገለጫ መሆኑን ተናግረዋል።   የኢሬቻ በዓል አከባበር ከዘመን ወደ ዘመን በሰላም ላሸጋገረው አምላክ ምስጋና የሚቀርብበት ስለመሆኑ አንስተው በዓሉን በመጠበቅ እና በመከባከብ ለመጪው ትውልድ በማስተላለፍ ይገባል ብለዋል። የኢሬቻ በዓል በየዓመቱ በአዲስ አበባ (ሆራ ፊንፊኔ) እንዲሁም በቢሾፍቱ (ሆራ አርሰዲ) ከተከበረ በኋላ በየአካባቢው መከበሩን የሚቀጥል ሲሆን በዛሬው እለትም በአምቦ ሆራ አየቱ የኢሬቻ በዓል ተከብሯል።

ቢሾፍቱ ፤መስከረም 30/2019 /ኢዜአ/፡-በኦሮሚያ ክልል በ2018 የትምህርት ዘመን በ12ኛ ክፍል ሀገር አቀፍ ፈተና የላቀ ውጤት ላስመዘገቡ ተማሪዎች ዕውቅና እና ሽልማት ተሰጠ። የኦሮሚያ ትምህርት ቢሮ በቢሾፍቱ ከተማ ባዘጋጀው መድረክ ዕውቅና እና ሽልማቱ የተሰጠው በ2018 የትምህርት ዘመን በ12ኛ ክፍል ሀገር አቀፍ ፈተና ከ550 በላይ ውጤት ላስመዘገቡ 165 የተፈጥሮና ማህበራዊ ሳይንስ ተማሪዎች ነው። ለተማሪዎቹ የገንዘብ ሽልማትና ሰርተፊኬት የሰጡት የጨፌ ኦሮሚያ ምክር ቤት አፈ ጉባኤ አብዱሰላም ዋሪዮ እና የኦሮሚያ ትምህርት ቢሮ ሃላፊ ቡልቶሳ ሂርኮ (ዶ/ር) ናቸው።   የኦሮሚያ ክልል ትምህርት ቢሮ ሃላፊ ቡልቶሳ ሂርኮ (ዶ/ር) በወቅቱ እንዳሉት በክልሉ የትምህርት ተደራሽነትን ለማስፋት እና ጥራቱን ለማሻሻል ዘርፈ ብዙ ተግባራት ተከናውነዋል። በመንግስትና በህብረተሰቡ ተሳትፎ 19 ሺህ 352 የኢፋ ቦሩ ቅድመ መደበኛ ትምህርት ቤቶችን በገጠርና በከተማ በመገንባት በደረጃው የትምህርት ተደራሽነትን ማረጋገጥ መቻሉን ለአብነት ጠቅሰዋል። በመጀመሪያ ደረጃ ትምህርት ቤቶች የሚታየውን የተማሪዎች የማንበብ፣ የመፃፍና የማስላት ክህሎት ለማሳደግ እንዲቻል ከውጭ ሀገር ተሞክሮ በመውሰድና 59 ሺህ መምህራንን በማሰልጠን በ13 ሺህ 293 አንደኛ ደረጃ ትምህርት ቤቶች በማሰማራት አበረታች ውጤት መገኘቱን አመልክተዋል። በክልሉ ወደ ከፍተኛ ትምህርት ተቋማት የሚገቡ ተማሪዎችን ቁጥር ለማሳደግም ሰባት ብቻ የነበረውን ልዩ አዳሪ ትምህርት ቤቶችን ቁጥር ባለፉት ጥቂት አመታት ወደ 46 ማስፋፋት መቻሉን አስታውቀዋል። የትምህርት ጥራትና ተደራሽነትን ለማረጋገጥ የከተማና የገጠር መምህራንን የመኖሪያ ቤት ችግር ለማቃለል የክልሉ መንግስት መስራቱንም አስታውቀዋል። በ2018 የትምህርት ዘመን በ12ኛ ክፍል ሀገር አቀፍ ፈተና ከፍተኛ ውጤት ያስመዘገቡ ተማሪዎች ቁጥር እየተሻሻለ መምጣቱን ገልፀዋል። ዛሬ እውቅናና ሽልማት የተሰጣቸው ተማሪዎች በርትተው በመስራት ለውጤት መብቃታቸውን ጠቁመው ተምሳሌታቸውም ለሌሎች ተማሪዎች መነሳሳት እንደሚፈጥር አስታውቀዋል። ተሸላሚ ተማሪዎች ይህ የመጨረሻ ስኬት ሳይሆን የመጀመሪያ ምእራፍ መሆኑን በመገንዘብ በቀጣይ በዩኒቨርሲቲ ቆይታቸው በስነምግባር ታንፀው ጊዜን በአግባቡ በመጠቀም ለተሻለ ውጤት እንዲተጉ አሳስበዋል።   ከፍተኛ ውጤት በማስመዝገብ ከተሸለሙት መካከል ከማያ ከተማ ሀረማያ ቦርዲንግ ልዩ አዳሪ ትምህርት ቤት ተማሪ ሀምዛ መሀመድ በሰጠው አስተያየት በተፈጥሮ ሳይንስ 576 ነጥብ ማምጣቱን ተናግሯል። ውጤቱን ተከትሎ የተሰጠኝ ሽልማትና እውቅና በቀጣይ በዩኒቨርሲቲ ትምህርት ቆይታዬ የተሻለ ውጤት ለማስመዝገብ መነሳሳትና የሞራል ስንቅ ይሆነኛል ብሏል። በዕውቅና እና ሽልማት ስነ ስርአቱ ላይ የክልሉ ፕሬዝዳንት ሽመልስ አብዲሳን ጨምሮ የክልሉ ከፍተኛ የሥራ ኃላፊዎችና የተማሪ ወላጆች ተገኝተዋል።    

ቢሾፍቱ ፤መስከረም 30/2019 (ኢዜአ)፡- በኦሮሚያ ክልል በትምህርት ዘርፍ በቅንጅት በተከናወኑ ተግባራት አበረታች ውጤት መገኘቱን የክልሉ ፕሬዝዳንት ሽመልስ አብዲሳ አስታወቁ። የኦሮሚያ ክልል ትምህርት ቢሮ በ2018 ትምህርት ዘመን በ12ኛ ክፍል ሀገር አቀፍ ፈተና ከፍተኛ ውጤት ላስመዘገቡ ተማሪዎች ዛሬ በቢሾፍቱ ከተማ እውቅናና ሽልማት አበርክቷል።   በመድረኩ ላይ የተገኙት የኦሮሚያ ክልል ፕሬዝዳንት ሽመልስ አብዲሳ እንዳስታወቁት የክልሉ መንግስት የትምህርት ስብራትን ለመጠገን ቋሚ አጀንዳ አድርጎ እየሰራ ይገኛል። በዚህም አበረታች ውጤት መገኘቱን ጠቅሰው በቀጣይ ብዙ ስራ እንደሚጠይቅ አመልክተዋል። በተለይ የትምህርት ጥራትን ከታችኛው እርከን አንስቶ ለማረጋገጥ ቅድመ መደበኛ ትምህርት ቤቶችን ለማስፋፋት በመንግስትና በህዝብ በተደረገው ርብርብ በሚሊዮን ለሚቆጠሩ ህፃናት የትምህርት ተደራሽነትን ማረጋገጥ መቻሉን አንስተዋል። የተማሪዎችን ውጤት ለማሻሻል በክልሉ ልዩ አዳሪ ትምህርት ቤቶችን በማስፋፋት በየአመቱ ዩኒቨርሲቲ የሚገቡ ተማሪዎችን ቁጥር ማሻሻል መቻሉን አመልክተዋል። ትምህርትና ቴክኖሎጂ ለሀገር ግንባታ የሚያበረክተው አስተዋፅኦ ከፍተኛ በመሆኑ በዘርፉ የሚሰሩ ተግባራት ተጠናክረው እንደሚቀጥሉ ፕሬዝዳንቱ አስታውቀዋል። የክልሉ መንግስት በቀጣይ በየደረጃው የሚሰጠው ትምህርት ከቴክኖሎጂ ጋር የሚጣጣምና ችግር ፈቺ እንዲሆን አበክሮ ይሰራል ብለዋል።   እንዲሁም የክልሉ መንግስት በገጠርና በከተማ በተለያየ እርከን የትምህርት ተደራሽነትን፣ ጥራትን እና ብቃትን ለማሻሻል በትኩረት እንደሚሰራም አመላክተዋል። ዛሬ ለሽልማት የበቁ ተማሪዎች በትምህርት ገበታ ላይ ጠንከረው በመትጋታቸው ያመጡት ውጤት ስለሆነ የክልሉ መንግስት ያበረታታል፤ በቀጣይም ከጎናቸው ይቆማል ብለዋል። በዩኒቨርስቲ ቆይታቸውም በማናቸውም ሁኔታ ሳይበገሩ በርትተው በመስራት ለሀገራቸው ኩራት መሆን እንደሚጠበቅባቸው አመልክተዋል። የትምህርት ባለድርሻ አካላትም የትምህርት ጥራትን ይበልጥ ለማሻሻል እንዲሁም የዘርፉን አሠራር ለማዘመን እየተሠሩ የሚገኙ ሥራዎችን በማጠናከር የተማሪዎችን ውጤት ለማሻሻል እንዲተጉ አሳስበዋል። የኦሮሚያ ትምህርት ቢሮ በቢሾፍቱ ከተማ ባዘጋጀው መድረክ በ2018 የትምህርት ዘመን በ12ኛ ክፍል ሀገር አቀፍ ፈተና ከ550 በላይ ውጤት ላስመዘገቡ 165 የተፈጥሮና ማህበራዊ ሳይንስ ተማሪዎች እውቅናና ሽልማት ተሰጥቷል።    

አዲስ አበባ፤መስከረም 30/2018 (ኢዜአ)፦የመደመር መንግሥት ለቱሪዝም ዘርፉ ልማት የሰጠው ትኩረት ኢትዮጵያ ያላትን እምቅ የቱሪዝም ሀብት ለዓለም ለማስተዋወቅ ጉልህ ሚና እየተጫወተ መሆኑን አስተያየታቸውን ለኢዜአ የሰጡ የመዲናዋ ነዋሪዎች ገለፁ። ትልቅ ሀገር፣ ትልቅ ሕዝብ፣ ታላቅ ርዕይ የመደመር መንግሥት ከለያቸው ዋና ዋና የልማት ዘርፎች መካከል ቱሪዝም አንዱ በመሆኑ፣ በመላ ሀገሪቱ የሚገኙ ሀብቶችን በማልማት የኢኮኖሚ ምንጭነታቸውን ለማጎልበት በትኩረት እየሰራ ይገኛል። በተጨማሪም በቱሪዝም ዘርፉ ያሉ እምቅ ሀብቶችን በዓለም አቀፍ ደረጃ ለማስተዋወቅና የሀገር ውስጥ ገጽታን ለመገንባት ዘርፈ ብዙ ተግባራትን እያከናወነ ነው። አስተያየታቸውን ለኢዜአ የሰጡ የአዲስ አበባ ነዋሪዎች እንደገለጹት፣ መንግሥት ለቱሪዝም ዘርፉ የሰጠው ትኩረት ኢትዮጵያ ያሏትን ታሪካዊ ቅርሶችና ቱባ ባህል ለመላው ዓለም ለማስተዋወቅ ትልቅ ዕድል ፈጥሯል። አቶ ውብአንተነህ ብሩ የተባሉ አስተያየት ሰጪ፣ ቱሪዝም የአንድን ሀገር ቅርስና ባህል ለተቀረው ዓለም የሚያስተዋውቅበት ሰፊ መድረክ መሆኑን ጠቁመው፣ መንግሥት ባለፉት ዓመታት የቱሪዝም ዘርፉን ለማሳደግ የሰጠው ትኩረት ውጤታማ መሆኑን ገልጸዋል። በዘርፉ የሚገኙ ተፈጥሯዊም ሆነ ሰው ሠራሽ ሀብቶች ይበልጥ ሳቢና ታሪክ ነጋሪ እንዲሆኑ በመሠረተ ልማት ዝርጋታ ላይ ባከናወናቸው ተግባራት ለዘርፉ ዕድገት ትልቅ አስተዋጽኦ ማድረጉን ተናግረዋል። ይህም ኢትዮጵያ ያሏትን እምቅ የቱሪዝም ሀብቶችና ታሪክ ለመላው ዓለም ለማስተዋወቅ፣ ብሎም ኢኮኖሚያዊ አስተዋጽኦውን ለማሳደግ እንደሚረዳ ጠቁመዋል።   ሌላኛዋ አስተያየት ሰጪ እመቤት ማስረሻ በበኩላቸው፣ አዲስ አበባን ጨምሮ በመላ ሀገሪቱ የተገነቡ የቱሪዝም መዳረሻዎች ለሀገር ውስጥና ለውጭ ጎብኚዎች ቁጥር መጨመር ትልቅ አስተዋጽኦ እንዳላቸው ገልጸዋል። የቱሪዝም ዘርፉን በላቀ መልኩ በማልማት፣ ዘርፉ ለሀገር ኢኮኖሚያዊ ዕድገት የበኩሉን እያበረከተ መምጣቱን አብራርተዋል። አቶ መላኩ ገብረየስ እንደሚናገሩት፣ ባለፉት ዓመታት መንግሥት ለቱሪዝም ዘርፉ ትኩረት በመስጠት በተከናወኑ ውጤታማ ተግባራት፣ በዘርፉ ይስተዋሉ የነበሩ ችግሮችን ከመሠረታቸው ለማቃለል ዕድል መፍጠሩን ገልጸዋል።   ይህ የመንግሥት ትኩረት ሀገሪቱ ከዘርፉ ተገቢውን ኢኮኖሚያዊ ጥቅም እንድታገኝ እያስቻለ መሆኑንም ተናግረዋል። ወይዘሪት መሠረት እንዳለ በበኩላቸው፣ በአሁኑ ወቅት መንግሥት ዘርፉን ለማሳደግ እያደረገ ያለው ጥረት የሚደነቅ መሆኑን ጠቁመው፣ በመላ ሀገሪቱ የተጀመሩ የልማት እንቅስቃሴዎች ለኢትዮጵያ ሁሉን አቀፍ ብልጽግና መረጋገጥ ከፍተኛ አስተዋጽኦ እንዳላቸው ገልጸዋል።   ኢትዮጵያ ከቱሪዝም ዘርፉ ተገቢውን ኢኮኖሚያዊ ጥቅም እንድታገኝ፣ በዘርፉ የተከናወኑና እየተከናወኑ የሚገኙ የመዳረሻ ልማቶችን የማስተዋወቅ ሥራ ባለድርሻ አካላት የሚያደርጉት ጥረት መጠናከር እንዳለበት ገልጸዋል።  

ድሬዳዋ፤ መስከረም 30/2019(ኢዜአ):-በጤና ሚኒስቴር የተጀመረው የሕክምና ኦክሲጅንን ተደራሽነት የማስፋፋት ሥራ ጥራቱን የጠበቀ የጤና አገልግሎት በሀገር አቀፍ ደረጃ ዕውን ለማድረግ እያስቻለ መሆኑ ተገለጸ። ዓለም አቀፍ የኦክሲጅን ግንዛቤ ማሳደጊያ ቀን በድሬዳዋ የኦክሲጅን ማምረቻ ማዕከልን (ፕላንት) በመመረቅና በተለያዩ የግንዛቤ ማሳደጊያ ሥራዎች እየተከበረ ነው። በድሬዳዋ በድል ጮራ ሆስፒታል ሥር በሚገኘው የፈረንሳይ ድንገተኛ ሕክምና ማዕከል የተገነባው ዘመናዊ የሕክምና ኦክሲጅን ማምረቻ ማዕከል (ፕላንት) ዛሬ ተመርቆ ለአገልግሎት በቅቷል።   በጤና ሚኒስቴር የሜዲካል አገልግሎት መሪ ሥራ አስፈፃሚ ዶክተር ኢሊባቦር ቡኖ በምረቃ ሥነ ስርዓቱ ላይ እንዳሉት፤ መንግስት በመላው አገሪቱ ጥራት ያለው የጤና አገልግሎት ተደራሽ ለማድረግ ባለፉት ዓመታት አበረታችና ውጤታማ ተግባራትን አከናውኗዋል። የጤና አገልግሎት ተደራሽነትና ጥራትን ከሚያረጋግጡት ወሳኝ ተግባራት መካከል አንዱ የሕክምና ኦክሲጅን አቅርቦትና ምክንያታዊ የኦክሲጅን አጠቃቀም ነው።   ይህም ባለፉት ዓመታት በከፍተኛ ደረጃ እንዲጎለብት ሲሰራ መቆየቱን የገለጹት መሪ ሥራ አስፈፃሚው ዶክተር ኢሊባቦር፤ በሀገር አቀፍ ደረጃ ከኮቪድ-19 በፊት የሕክምና ኦክሲጅን ማምረቻ ማዕከላት 3 ብቻ እንደነበሩ አስታውሰዋል። በአሁኑ ወቅት የማዕከላቱን ቁጥር ወደ 85 ማሳደግ መቻሉን ጠቁመው፣ የሕክምና ኦክሲጅን ግብአት ማኔጅመንትን ለማሻሻል የተሰሩ ሥራዎች ተጨባጭ ውጤት እንዲመጣ ማድረጉን አስረድተዋል። ባለፉት ዓመታት የሕክምና ኦክሲጅንን ተደራሽነት ለማስፋፋት የተከናወነው ተግባር ጥራቱን የተጠበቀ የሕክምና አገልግሎት በሀገር አቀፍ ደረጃ ዕውን ለማድረግ እያስቻለ መሆኑንም አስታውቀዋል።   የድሬዳዋ አስተደዳደር ከንቲባ አብዱላሂ አደን በበኩላቸው የኦክሲጅን ማምረቻ ማዕከሉ ወደ አገልግሎት መግባቱ ብሔራዊ የጤና ስርአትን ለማዘመንና ዜጎች ጥራት ያለው የጤና አገልግሎት ተጠቃሚ እንዲሆኑ ያስቻላል ብለዋል። ማዕከሉ ግንባታው ተጠናቆ ወደ ስራ መግባቱ በድንገተኛ አደጋ፣ በጽኑ ህሙማን እንክብካቤ፣ በወሊድና በከባድ ቀዶ ሕክምና ላይ የሚገኙ የዜጎችን ህይወት ለመታደግ ያስችላል ብለዋል። ማዕከሉ ኦክስጅንን ማምረት መጀመሩ በኦክሲጅን እጥረት ምክንያት አንድም ሰው እንዳይሞት ያግዛል ያሉት ደግሞ የድሬዳዋ አስተዳደር ጤና ቢሮ ኃላፊ ዶክተር ዩሱፍ መሐመድ ናቸው።   የኦክሲጅን ማምረቻ ማዕከሉ በምርቱ የድሬዳዋ ተጎራባች ክልሎች ጤና ተቋማትን ጭምር ተጠቃሚ የሚያደርግ መሆኑን ገልጸዋል። ዓለም አቀፉ የኦክሲጅን የግንዛቤ ማሳደጊያ ቀን በተለያዩ ዝግጅቶች እየተከበረ ሲሆን በሥነስርዓቱ ላይ የጤና ሚኒስቴር እና የድሬዳዋ አስተዳደር ከፍተኛ አመራሮች ተሳትፈዋል ዓለም አቀፍ የኦክሲጅን ቀን በዓለም አቀፍ ደረጃ ለ4ተኛ ጊዜ፤ በአገራችን ደግሞ ለ3ተኛ ጊዜ እየተከበረ ይገኛል።  

ደሎ መና፤ መስከረም 30/2019 (ኢዜአ)፦የአካባቢያቸውን ሰላምና ልማትን አጠናክሮ ለማስቀጠል ከመደመር መንግስት ጎን ሆነው ሚናቸውን እንደሚወጡ የደቡብ ምሥራቅ ኦሮሚያ ዞን ነዋሪዎች ገለጹ። የመደመር መንግሥት ለሀገራዊ ሰላም፣ ለዘላቂ ልማትና ለሕዝብ ተጠቃሚነት የጀመራቸው ሥራዎች ግባቸውን እንዲመቱ የመንግሥትና የሕዝብ ቅንጅታዊ እንቅስቃሴ ወሳኝ ነው። በዞኑ ኢዜአ ያነጋገራቸው የደሎ መና ወረዳ ነዋሪዎች በአካባቢያቸው የሚከናወኑ የሰላምና የልማት ሥራዎችን ከመደገፍ ባሻገር ለስኬታማነታቸው የራሳቸውን ሚና ለመወጣት ዝግጁ መሆናቸውን ገልጸዋል። ከነዋሪዎቹ መካከል አቶ አብዱሰቡር ሐጅ ማማ እንዳሉት ሰላም ለማኅበራዊና ለኢኮኖሚያዊ ልማት መሠረት በመሆኑ ለሰላም መጠናከር ሁሉም ዜጋ የድርሻውን መወጣት ይኖርበታል። የልማት ዕቅዶች በተሳካ ሁኔታ እንዲተገበሩ ነዋሪዎች የአካባቢያቸውን ሰላም በመጠበቅ፣ ሕግን በማክበርና ከመንግሥት ጋር በመተባበር የድርሻቸውን ለመወጣት ቁርጠኛ መሆናቸውን ገልጸዋል።   አቶ ሐሰን አህመድ የተባሉ ሌላው ነዋሪ በበኩላቸው፣ የመደመር መንግሥት ሁለንተናዊ የልማት ግቦች ዘላቂ ውጤት እንዲያስገኙ የሕዝብ ተሳትፎ አስፈላጊ መሆኑን ተናግረዋል። የልማት ሥራ ለመንግሥት ብቻ የሚተው ሳይሆን የሁሉንም ዜጋ ቁርጠኛ ተሳትፎ የሚጠይቅ በመሆኑ፣ በልማት ሥራ በንቃት በመሳተፍ የአካባቢያቸውን እድገት ለማፋጠን እንደሚሠሩ ጠቁመዋል። ሼህ አብዱላሂ ኡስማን በበኩላቸው ሰላምን ማጽናት፣ ማኅበራዊ አንድነትን ማጠናከርና ለሕዝብ የሚጠቅሙ ሥራዎችን መደገፍ ከሁላችንም የሚጠበቅ ነው ብለዋል።   በተለይም የማኅበረሰቡ የሃይማኖትና የማኅበራዊ መሪዎች ሰላምን በማስፈን፣ ለልማት የሚያፋጥኑ እሴቶችን በማጠናከርና ሕዝቡን በማስተባበር ረገድ ሚና ከፍተኛ መሆኑን ገልጸዋል። በዚህ ረገድ የሚጠበቅባቸውን ድርሻ ለመወጣትና ማኅበረሰቡን ለጋራ ዓላማና ተጠቃሚነት ለማስተባበር ዝግጁ መሆናቸውን አረጋግጠዋል። ነዋሪዎቹ አክለው እንደገለጹት፣ በመንግሥት የሰላምና የልማት ጥረቶች የሕዝብ ተሳትፎን ከማጠናከር ባሻገር የተገኙ ውጤቶችን ለማስቀጠል ጠንክረው ይሰራሉ። በተለይ የመደመር መንግሥት የሰላምና የልማት አጀንዳዎች ዘላቂ ስኬት እንዲያስገኙ መንግሥትና ሕዝብ በጋራ ከመስራት ባለፈ ሁሉም ዜጋ የበኩሉን እንዲወጣም ይጠይቃል። ለእዚህም ሰላምን በዘላቂነት ከማጠናከር ባለፈ በልማት የህዝብን ተጠቃሚነት ለማረጋገጥ በሚደረገው ጥረት በቁርጠኝነት ለመሳተፍ ዝግጁነታቸውን አረጋግጠዋል።