ሰመራ፤ ጥቅምት 21/2019 (ኢዜአ) ፦ በአፋር ክልል የመስኖ ልማት የምግብ ዋስትናን ለማረጋገጥ እያገዘ መሆኑን የክልሉ ርዕሰ መስተዳድር አወል አርባ አስታወቁ። ርዕሰ መስተዳድር አወል አርባ በክልሉ ገቢ ረሱ ዞን በአዋሽ ፈንታሌ ወረዳ እየተከናወኑ ያሉ የልማት ስራዎችን ተመልክተዋል ። ርዕሰ መስተዳድሩ በወቅቱ እንደገለጹት፤ በክልሉ የመስኖ ልማት ስራ የምግብ ዋስትናን ለማረጋገጥ እያገዘ ነው። በአዋሽ ፈንታሌ ወረዳ እየተካሄደ ያለው የመስኖ ልማት ስራም የዚሁ ማሳያ መሆኑን ተናግረዋል።   በወረዳው በ100 ሄክታር መሬት ላይ እየለማ ያለው ጤፍ ጥሩ ጅማሮ መሆኑን ጠቁመው በተመሳሳይ በ150 ሄክታር መሬት ላይ እየለማ ያለው በቆሎም በመልካም ተሞክሮነት የሚወሰድ መሆኑን ለአብነት ጠቅሰዋል። የመስኖ ልማቱ ተጠናክሮ ሊቀጥል እንደሚገባም አስገንዝበዋል። የአዋሽ ፈንታሌ ወረዳ አስተዳዳሪ አቶ አደን በልአ በበኩላቸው እንዳሉት፤ በወረዳው ዘንድሮ በበጋ መስኖ 9 ሺህ 200 ሄክታር መሬት ላይ የተለያዩ ሰብሎች እንዲሁም አትክልትና ፍራፍሬ ለማልማት ታቅዶ ተግባራዊ እየተደረገ ነው። እስካሁን ባለው ሂደት 4 ሺ 500 ሄክታር መሬት መልማቱን ተናግረዋል።   የበጋ መስኖ ልማት አርብቶ አደሩን ከእንስሳት እርባታ በተጓዳኝ በግብርና ስራ በመሰማራት ተጠቃሚ እያደረገው መሆኑን አመልክተዋል። የወረዳው አርብቶ አደሮች በመስኖ በመታገዝ ጤፍ፣ በቆሎ፣ ስንዴ፣ ሽንኩርት፣ ቲማቲም እንዲሁም ሀብሀብና ሙዝ በሰፊው በማምረት ለገበያ በማቅረብ ተጠቃሚ እየሆኑ መምጣታቸውን አስታውቀዋል። በመስክ ምልከታው የክልሉ፣ የዞንና የወረዳ የስራ ኀላፊዎች ተገኝተዋል።

ወልቂጤ፤ ጥቅምት 21/2019 (ኢዜአ) ፦ የወልቂጤ ግብርና ምርምር ማዕከል በአሲዳማነት የተጎዳ መሬትን በኖራ በማከም ለአርሶ አደሩ ምርታማነትና ተጠቃሚነት ማደግ እየሰራ መሆኑን ገለጸ። የተለያዩ ባለድርሻ አካላት በተገኙበት በጉራጌ ዞን በምሁር አክሊልና ጉመር ወረዳዎች ማኅበረሰብ አቀፍ የዘር ብዜት ማሳዎች ጉብኝት ተካሂዷል።   የወልቂጤ ግብርና ምርምር ማዕከል ዳይሬክተር አቶ ቤተል ነክር እንደገለጹት፣ ማዕከሉ በአሲዳማነት የተጎዳ መሬትን በኖራ በማከም ለአርሶ አደሩ ምርታማነትና ተጠቃሚነት ማደግ እየሰራ ነው።   ማዕከሉ አዳዲስ ቴክኖሎጂዎችን ከማፍለቅ ባሻገር የዘር ብዜትን በማስፋፋትና በአሲዳማነት የተጎዳን መሬት በኖራ በማከም በተለያዩ የሰብል ዓይነቶች እንዲሸፈኑ ማድረግ ማስቻሉን ገልጸዋል። በዚህም ከምርት ውጪ የነበረን 72 ሄክታር መሬት በኩታ ገጠም በአጭር ጊዜ በሚደርሱ፣ በሽታንና አሲዳማ መሬትን በሚቋቋሙ ሰብሎች ማልማት መቻሉን አንስተዋል። የጉመር ወረዳ ምክትል አስተዳዳሪና የግብርና ጽሕፈት ቤት ኃላፊ አቶ ደገሙ አለሙ በበኩላቸው፣ ግብርናን በማዘመን የምግብ ሉዓላዊነትን ለማረጋገጥ የሚያስችሉ ተግባራት እየተከናወኑ ነው ብለዋል። የግብርና ምርምር ተቋማት ቴክኖሎጂን በማፍለቅና በማስፋፋት፣ ዝርያዎችን በማባዛትና ተደራሽ በማድረግ በምርትና ምርታማነት ዕድገት ላይ ተጨባጭ ውጤት እንዲመጣ እየሰሩ መሆኑንም ተናግረዋል።   የጉመር ወረዳ አርሶ አደር አቶ ዓለማየሁ አርጋው፣ ከዚህ ቀደም መሬታቸው በአሲዳማነት በመጠቃቱ ካላቸው 1 ነጥብ 5 ሄክታር መሬት 25 ኩንታል ገብስ ብቻ ያገኙ እንደነበር ገልጸው፣ አሁን በኖራ ከታከመው እስከ 40 ኩንታል ምርት እንደሚጠብቁ ተናግረዋል።   የምሁር አክሊል ወረዳ አርሶ አደር ነስሩ ከማል በበኩላቸው፤ ጦም ያድር በነበረ 15 ሄክታር መሬት ላይ ስንዴን በኩታ ገጠም ለማምረት እየሰሩ መሆናቸውን ገልጸዋል። ይህም የምግብ ሉዓላዊነታቸውን ከማረጋገጥ ባለፈ የስንዴ ምርጥ ዘር በማቅረብ ኢኮኖሚያዊ ተጠቃሚ እንደሚያደርጋቸው ተናግረዋል።

አዲስ አበባ ፤ ጥቅምት 21/2019 (ኢዜአ) ፦የአዲስ አበባ ከተማ አስደናቂ ክትመትና የመሰረተ ልማት ዕድገት ለሌሎች የአፍሪካ ሀገራት አርዓያ ይሆናል ሲሉ የታንዛኒያ የካፒታል ገበያ ፍርድ ቤት ልዑካን ቡድን አባላት ገለጹ። ከጥቅምት 18 ጀምሮ ለሶስት ተከታታይ ቀናት በአዲስ አበባ ሲካሄድ የቆየው የኢትዮጵያ እና ታንዛኒያ የካፒታል ገበያ ፍርድ ቤቶች የልምድ ልውውጥ መድረክ ተጠናቋል።   የታንዛኒያ የካፒታል ገበያ ፍርድ ቤት ልዑካን ቡድን አባላት ከልምድ ልውውጡ ባሻገር በአዲስ አበባ የሚገኙ የቱሪስት መዳረሻዎችን ጎብኝተዋል። በጉብኝታቸውም በመዲናዋ ባለው ፈጣን የመሰረተ ልማትና የከተሜነት ዕድገት እንዲሁም በሳቢነቷ ተደንቀዋል። የልዑካን ቡድኑ አባል ዶርካስ ዳዊዶ ለኢዜአ እንዳሉት፤ የአዲስ አበባ የኮሪደር ልማት ለነዋሪዎች ምቹ፣ ለጎብኝዎች ደግሞ አስደማሚ ነው።   በሁሉን አቀፍ መሰረተ ልማትና በአረንጓዴ ሥፍራዎች ያጌጠች መሆኗን ገልጸው፤ ታንዛኒያ የኢትዮጵያ የልማት ተሞክሮ እንድትወስድ የድርሻዬን እወጣለሁ ብለዋል። የታንዛኒያ የካፒታል ገበያ ፍርድ ቤት የሕግ ባለሙያ ኤልያድ ኢ-መንደም፤ የከተማዋን ፈጣን ዕድገትና የኢትዮጵያውያንን ታሪካዊ አርበኝነት የሚያስደንቅ መሆኑን ገልጸዋል።   በአዲስ አበባ ከተማ በእግር ጉዞ የተለያዩ አካባቢዎችን መጎብኘታቸውን ገልጸው፤ የመዲናዋ መሠረተ ልማት፣ የመንገዶችና የሕንፃዎች ግንባታ በማራኪ ሁኔታ ተለውጧል ብለዋል። አንድነት ፓርክንና የዓድዋ ድል መታሰቢያን በጎበኙበት ወቅት ያዩት የኢትዮጵያውያን ጽናት እና ቁርጠኝነት ለአፍሪካውያን ትልቅ ትምህርት እንደሚሰጥ አንስተዋል። የታንዛኒያ ፋይናንስ ሚኒስቴር የዕቅድ መምሪያ ኃላፊ ኤልያስ ሬይመንድ ማፑንዳ በበኩላቸው፤ ኢትዮጵያ በከተማ ዕቅድና በልማት ዘርፍ ያሳየችው ስኬት ለአፍሪካ ሀገራት ትልቅ ትምህርት ይሆናል ብለዋል።   የታንዛኒያ መንግሥት ከኢትዮጵያ የልማትና የቢዝነስ እንቅስቃሴዎች በርካታ ልምዶች መቅሰም እንደሚችል ገልጸዋል። ኢትዮጵያውያን በታሪካቸው ያሳዩትና አሁንም የሚያንፀባርቁት አንድነት ለሀገር ዕድገትና ልማት መሰረት መሆኑን ገልጸው፤ በምሥራቅ አፍሪካ ሀገራት መካከል ያለው ትብብር ተጠናክሮ መቀጠል አለበት ብለዋል። ትልቅ ሀገር፣ ትልቅ ህዝብ ፤ታላቅ ርዕይ #የመደመር_መንግሥት

አዲስ አበባ ፤ ጥቅምት 21/2019 (ኢዜአ) ፦አዲስ አበባ የ2026 የከተሞች ዘላቂ ልማት ዓለም አቀፍ ሽልማትን (2026 Global Award for Sustainable Development in Cities) ማግኘቷ፣ በከተማዋ የታየውን እድገት፣ ዘላቂ ልማትና ቀጣይነት ያለው ለውጥ የሚያረጋግጥ በመሆኑ ለኢትዮጵያ ታላቅ ኩራት መሆኑን የጠቅላይ ሚኒስትር ጽህፈት ቤት ገለጸ፡፡ ይህ ደግሞ ወደፊት ለመመልከት መልካም አጋጣሚ ነው ሲል የጠቅላይ ሚኒስትር ጽሕፈት ቤት በማኅበራዊ ትስስር ገጹ አስታውቋል። የእያንዳንዱን ከተማ ልዩ ታሪክ፣ ቅርስና ማንነትን እየጠበቅን ዘመናዊ፣ አካታችና ዘላቂ ከተሞችን መገንባታችንን መቀጠል ይኖርብናል ያለው ጽህፈት ቤቱ የከተማ ልማት ከመሠረተ ልማት በላይ መሆኑንም አመልክቷል። የከተሜነት ባህልን ማሳደግ፣ ጥራት ያላቸው የሕዝብ መዝናኛ ቦታዎችን መፍጠር እና ከተሞቻችንን ለመኖርና ለመሥራት የተሻሉ ቦታዎች ማድረግ ማለት ነውም ብሏል። ራዕያችን ከአዲስ አበባ ባሻገር ሊሰፋ ይገባል፤ ከሐረር እስከ ባሕር ዳር፣ ከሐዋሳ እስከ ጅማ፣ ከአርባ ምንጭ እስከ ድሬዳዋ እያንዳንዱ የኢትዮጵያ ከተማ የዘላቂ ከተማ ልማት ማሳያ የመሆን አቅም አለው ሲልም ገልጿል። ዛሬ አዲስ አበባ፤ ነገ ደግሞ ለእያንዳንዱ የኢትዮጵያ ከተማ አዲስ ምዕራፍ። ከታሪካቸው ሳይነጠሉ የወደፊቱን ጊዜ የሚመጥኑ ከተሞችን እንገንባ ሲል የጠቅላይ ሚኒስትር ጽህፈት ቤት መልዕክት አስተላልፏል።

ደብረ ብርሃን ፤ ጥቅምት 21/2019 (ኢዜአ) ፦በሰሜን ሸዋ ዞን ከ76 ሺህ ሄክታር በላይ መሬት በበጋ መስኖ እንደሚለማ የዞኑ አስተዳደር አስታወቀ። የሰሜን ሸዋ ዞን ግብርና መምሪያ የ2019 የበጋ መስኖ የንቅናቄ መድረክ በደብረ ብርሃን ከተማ አካሂዷል።   የዞኑ ዋና አስተዳዳሪ አቶ መካሻ ዓለማየሁ በመድረኩ ላይ እንደገለጹት፣ የበጋ መስኖ ልማት በምግብ ራስን ከመቻል ባለፈ ለኢንዱስትሪ ግብዓትና ለገበያ የሚተርፍ ምርት ለማምረት ምቹ ሁኔታ ፈጥሯል። በዘንድሮው በጋ ለሚካሄደው የመስኖ ልማትም አርሶ አደሩን በማንቃት፣ ግብዓትን በወቅቱ በማቅረብና አዳዲስ አሠራሮችን በመተግበር ውጤታማ ለማድረግ እየተሰራ ነው ብለዋል። በተያዘው ዓመትም በዞኑ ከ76 ሺህ ሄክታር በላይ መሬት በበጋ መስኖ ለማልማት ዕቅድ ተይዞ ወደ ተግባር መገባቱን ገልጸዋል። የዞኑ ግብርና መምሪያ ኃላፊ አቶ ታደሰ ማሙሻ በበኩላቸው፣ በበጋ መስኖ የሚለማው ስንዴ፣ አትክልትና ፍራፍሬ ለምግብ ብቻ ሳይሆን ለኢንዱስትሪዎች ግብዓት እንደሚውል ተናግረዋል።   የዛሬው የንቅናቄ መድረክም የተጀመሩ የመስኖ ልማት ሥራዎችን ይበልጥ አጠናክሮ በማስቀጠል የታቀደውን ለማሳካት ያለመ መሆኑንም አመልክተዋል። በመስኖ ከሚለማው 76 ሺህ ሄክታር መሬት ውስጥም 60 ሺህ ሄክታሩን በኩታ ገጠም ስንዴ በማልማት 2 ነጥብ 4 ሚሊዮን ኩንታል ምርት ለማምረት መታቀዱን አስታውቀዋል።   የቀወት ወረዳ ግብርና ጽሕፈት ቤት የመስኖ መሐንዲስ አቶ ታምሩ አሽኔ፣ የገጽና ከርሰ ምድር ውሃን በመጠቀም 4 ሺህ 438 ሄክታር መሬት በመስኖ ለማልማት እየተሰራ ይገኛል ብለዋል። እስካሁን በተደረገ ጥረትም 837 ሄክታር መሬት በበጋ ስንዴ ዘር መሸፈኑን አስረድተዋል።   በአጎለላና ጠራ ወረዳ ግብርና ጽሕፈት ቤት የመስኖ መሐንዲስ አቶ በላይነሀ ሲገኝ በበኩላቸው፣ በወረዳው በኩታ ገጠም ስንዴን በመስኖ የማልማት ሥራ መጀመሩን ተናግረዋል።

አዲስ አበባ ፤ ጥቅምት 21/2019 (ኢዜአ) ፦አዲስ አበባ በተባበሩት መንግሥታት የሰዎች ሰፈራ ፕሮግራም (UN-Habitat) በቻይና ያዘጋጀውን የ2026 እ.ኤ.አ የዓለም ከተሞች ቀን “የሸንሃይ አዋርድ” ሽልማት ማሸነፏን የአዲስ አበባ ከተማ ከንቲባ አዳነች አቤቤ ገለጹ፡፡ ከንቲባ አዳነች አቤቤ በማኅበራዊ ትስስር ገጻቸው ባስተላለፉት መልዕክት ፣ ይህ ድል ለአዲስ አበባ ብቻ ሳይሆን፣ ለመላው ኢትዮጵያ ታላቅ ኩራት ነው ብለዋል፡፡ በተባበሩት መንግሥታት የሰዎች ሰፈራ ፕሮግራም (UN-Habitat) በቻይና ያተዘጋጀው የሸንሃይ ሽልማት፣ በዘላቂ፣ አካታች፣ ሰው ተኮርና አይበገሬ የከተማ ልማት ውጤታማ ሥራዎችን ላከናወኑ በየዓመቱ ለአምስት ከተሞች የሚሰጥ ዓለም አቀፋዊ ዕውቅና ነው ያሉት ከንቲባዋ በዚህም አዲስ አበባ በ2026 ከተሸላሚ ከተሞች አንዷ ሆናለች ብለዋል። ይህ ለከተማችን የመጀመሪያ ዓለም አቀፍ ዕውቅና አይደለም ያሉት ከንቲባ አዳነች አቤቤ በ2024 በUN-Habitat እና በደቡብ ኮሪያዋ ሴኡል ከተማ የተዘጋጀው “የሴኡል ከተማ ሽልማት”አሸናፊ መሆኗን አስታውሰዋል።   እነዚህ ተከታታይ ዕውቅናዎች በከተማ ልማት የተከናወኑ ሥራዎችንና የከተማዋን ዓለም አቀፍ ተወዳዳሪነት ያመለክታሉ ብለዋል። ሽልማቱ በተለይም ባለፉት የለውጥ ዓመታት የተከናወኑት የከተማ ልማት ሥራዎች ውጤታማነት፣ ዘላቂነትና ለነዋሪዎች ያላቸው ጠቀሜታ ዓለም አቀፍ ዕውቅና ማግኘታቸውን እንደሚያሳይም ገልጸዋል። ለዚህ ስኬት ካበቋት ዋና ዋና የልማት አቅጣጫዎች መካከል፦ሰው ተኮር አቀራረብን ከከተማ መልሶ ማልማት ጋር በማቀናጀት የነዋሪዎችን ፍላጎት ቅድሚያ መስጠት፤ የመኖሪያ ቤት አቅርቦትን ለማሻሻል የተከናወኑ ሥራዎች፤ በከተማ ኮሪደሮችና በወንዝ ዳርቻ ፕሮጀክቶች አካታችና የተቀናጀ ልማትን ማረጋገጥ፤ የትራንስፖርት አገልግሎትንና ተደራሽነትን ለማሳደግ የተወሰዱ እርምጃዎች፤ አረንጓዴነትን፣ ጽዳትንና የከተማ ውበትን በማሻሻል ምቹና ለኑሮ ተስማሚ አካባቢ መፍጠር እንደሚገኙበትም አብራርተዋል። እነዚህ ተግባራት የከተማዋን እምቅ አቅም ወደ ተጨባጭ ውጤት በመቀየር፣ የነዋሪዎችን ተጠቃሚነት በማሳደግና አዲስ አበባን ተወዳዳሪ ከተማ በማድረግ ረገድ ያላቸውን አስተዋጽኦ ያሳያሉም ብለዋል። በተለይም በታዳጊ አገራት ከባድ ፈተና የሆነውን የከተማ መልሶ ማልማት በስኬት ማከናወን እንደሚቻል ያሳየችው ተሞክሮ፣ ለሌሎች ከተሞችም ተግባራዊ ትምህርት የሚሰጥ ምሳሌ ሆኗል ሲሉም ገልጸዋል። ይህ ድል የተግባር ስኬት፣ የጋራ ጥረትና የጋራ ውጤት ነውና ሁላችንም በድጋሚ እንኳን ደስ አለን ሲሉም ገልጸዋል፡፡

ቦንጋ ፤ ጥቅምት 21/2019 (ኢዜአ) ፦ በመደመር መንግሥት የግብርናውን ዘርፍ ለማዘመንና ተወዳዳሪ ለማድረግ የተከናወኑ ተግባራት ውጤታማ መሆናቸውን የደቡብ ምዕራብ ኢትዮጵያ ሕዝቦች ክልል ርዕሰ መስተዳድር ፍቅሬ አማን ገለጹ። የክልሉ ግብርና ቢሮ ከኢትዮጵያ ግብርና ትራንስፎርሜሽን ኢንስቲትዩት ጋር በመተባበር የግብርና ቢዝነስ ኩባንያ አዋጅ የማስተዋወቂያ መድረክ በቦንጋ ከተማ አካሂዷል።   በመድረኩ የተገኙት ርዕሰ መስተዳድር ፍቅሬ አማን እንዳሉት፣ የመደመር መንግሥት ግብርናውን ከልማዳዊና ከእጅ ወደ አፍ አሠራር በማላቀቅ ዘመናዊና ተወዳዳሪ ለማድረግ የዘረጋቸው አሠራሮች ተጨባጭ ውጤቶችን እያመጡ ነው። በዚህም ረገድ የግብርናው ዘርፍ ሀገራዊ የኢኮኖሚ ሪፎርምን በመከተል፣ የዘርፉን ዕድገት እውን ለማድረግ አስቻይ የፖሊሲና የሕግ ማዕቀፎችን እንዲሁም የልማት ኢኒሼቲቮችን በመቅረጽ ተግባራዊ በማድረግ ላይ ይገኛል ብለዋል። ይህም የመልማት ጸጋን በአግባቡ በመጠቀም የግብርናና የገጠር ትራንስፎርሜሽን ብሎም ሁለንተናዊ ብልጽግናን ለማረጋገጥ የሚያስችል መሆኑን ገልጸው፣ የዘርፉን ተዋንያን ተጠቃሚነት የሚያሳድግ መሆኑን አመልክተዋል። የግብርና ቢዝነስ ኩባንያዎች መስፋፋት የገጠር ኢኮኖሚን በማነቃቃት የሥራ ዕድሎችን የሚያሰፋ፣ የኢንዱስትሪና የግብርና ትስስርን በዘላቂነት የሚያጠናክርና የገጠር ትራንስፎርሜሽን እውን እንዲሆን የሚያስችል ነውም ብለዋል።   የኢትዮጵያ ግብርና ትራንስፎርሜሽን ኢኒስቲትዩት ዋና ዳይሬክተር ማንደፍሮ ንጉሴ(ዶ/ር) በበኩላቸው፡ አዋጁ ለአርሶና አርብቶ አደሩ በቂ ድጋፍ በማድረግ ተጠቃሚነታቸውን በዘላቂነት ማረጋገጥን ታሳቢ ያደረገ መሆኑን ተናግረዋል። ለግብርናው ዘርፍ በተሰጠው ትኩረት አርሶ አደሩ ቀደም ሲል ከነበረው የተበታተነ አሠራር ተላቅቆ በክላስተር ማምረት በመቻሉ ምርታማነቱ እየጨመረ ቢመጣም፣ ተጠቃሚነቱን በዘላቂነት ለማረጋገጥ ሕጋዊ ሰውነት ማግኘት ወሳኝ ነው ብለዋል። ይህን መነሻ በማድረግ አዋጁ መዘጋጀቱን አንስተው አዋጁ የአነስተኛ ይዞታ አምራቾችን ማደራጀት ወደ መካከለኛ አልሚነት በማሻገር እንዲሁም የግብዓትና ቴክኖሎጂ አቅርቦትን በማሳለጥ ገቢን የሚያሳድግ ነው ብለዋል።   የክልሉ ምክትል ርዕሰ መስተዳድርና የግብርና ቢሮ ኃላፊ አቶ ማስረሻ በላቸው፣ አርሶ አደሩ ከተለመደው አመራረት ተላቅቆ በክላስተር በማልማት አምርቶ ከመብላትና ከመሸጥ ባለፈ ወደ ኩባንያ ደረጃ እንዲሸጋገር እየተደረገ መሆኑን ጠቁመዋል። በዚህም በክልሉ ከ3 ሺህ 400 በላይ አርሶ አደሮችን በሁለት ኩባንያዎች በማደራጀት ተግባራዊ እንቅስቃሴ መጀመሩን ገልጸዋል። በመድረኩም የክልሉ የመንግሥት ዋና ተጠሪ አቶ ተክሌ በዛብህን ጨምሮ የክልልና የኢንስቲትዩቱ የሥራ ኃላፊዎችና ባለሙያዎች ተሳትፈዋል።

ዱራሜ ፤ ጥቅምት 21/2019 (ኢዜአ) ፦ በማዕከላዊ ኢትዮጵያ ክልል በግብርናው መስክ ያሉ እድሎችን በመለየት የማህበረሰቡን ተጠቃሚነት ለማረጋገጥ የተጀመሩ ተግባራት ተጠናክረው እንደሚቀጥሉ የክልሉ ግብርና ቢሮ ገለፀ። የክልሉ መስኖና ቆላማ አካባቢዎች ልማት ቢሮ የ2019 በጀት ዓመት የበጋ መስኖ ንቅናቄ መድረክ በዱራሜ ከተማ አካሂዷል።   በወቅቱም የክልሉ ግብርና ቢሮ ኃላፊ አቶ ዑስማን ሱሩር እንደገለፁት፣ ክልሉ በግብርናው መስክ ያሉትን ዕድሎች በመጠቀም ምርትና ምርታማነትን በማሳደግ የሕዝቡን ኑሮ ለማሻሻል በትጋት እየሰራ ነው። በዚህም ከድህነት የተላቀቀ፣ የምግብ ሉዓላዊነቱን ያረጋገጠና በኢኮኖሚ ራሱን የቻለ ማኅበረሰብ መፍጠር የሚያስችለውን የመደመር መንግሥት እሳቤ እየተገበረ ይገኛል ብለዋል። በቴክኖሎጂ የተደገፈ፣ ከዝናብ ጥገኝነት የተላቀቀና በውሃ አማራጮች ላይ የተመሠረተ የግብርና አሠራርን ተግባራዊ በማድረግ ትርፍ አምርቶ ለገበያ በማቅረብ የኑሮ ውድነቱን በማረጋጋት ረገድ ተጨባጭ ውጤት እየተመዘገበ እንደሚገኝም ተናግረዋል። አመራሩ በግብርናው መስክ እየተመዘገቡ የሚገኙ ስኬቶችን አጠናክሮ በማስቀጠል የሚጠበቅበትን ሚና ሊወጣ እንደሚገባም አሳስበዋል። የመስኖ ተቋማትን በማጠናከር የግብርና ምርትና ምርታማነትን የማሳደግና ለሥራ ዕድል ፈጠራ እንዲውሉ የማድረግ ሥራ እንደሚሠራ የገለጹት ደግሞ የክልሉ መስኖና ቆላማ አካባቢዎች ልማት ቢሮ ኃላፊ አቶ ሰላሙ አማዶ ናቸው።   የንቅናቄ መድረኩ በክልሉ የሚገኙ የመስኖ መሠረተ ልማት አውታሮች ያሉባቸውን ማነቆዎች በመፍታት በሙሉ አቅማቸው እንዲያለሙ በማድረግ በዘርፉ የተያዘውን ግብ ለማሳካት የጋራ ተግባቦት መፍጠርን ያለመ መሆኑን ገልጸዋል። በክልሉ 12 የመስኖ ፕሮጀክቶች በሙሉ አቅማቸው፣ 88ቱ ደግሞ በከፊል እያለሙ እንደሚገኙ፣ እንዲሁም ግንባታቸው ተጠናቆ አገልግሎት መስጠት ያልጀመሩ 11 የመስኖ ፕሮጀክቶች መኖራቸውን ጠቁመዋል። የመስኖ ፕሮጀክቶቹን ከደለል የመታደግ፣ የመጥረግና የውሃ አጠቃቀም ሂደቱን በዕውቀት ላይ የተመሠረተ በማድረግ በዘርፉ የሚፈለገውን ውጤት ለማስመዝገብ በቅንጅት መስራት እንደሚገባም አስረድተዋል። ከመድረኩ ተሳታፊዎች መካከል የምሥራቅ ጉራጌ ዞን ውሃ፣ ማዕድንና ኢነርጂ መምሪያ ኃላፊ አቶ መሐመድ አማን እንደገለጹት፣ በዞኑ ከ1 ሺህ 300 ሄክታር በላይ ማሳ በተለያዩ ሰብሎች በመስኖ ይለማል። የመስኖ ልማቱ አርሶ አደሩ በወቅት ሳይገደብ አልምቶ እንዲጠቀም ከማስቻሉም በተጨማሪ ገበያን በማረጋጋት ረገድ ዋነኛ ሚና እየተጫወተ እንደሚገኝ ጠቅሰዋል። በክልሉ በ2019 የበጋ መስኖ ልማት ሥራ 149 ሺህ ሄክታር ማሳን በተለያዩ ሰብሎች በማልማት ከ38 ሚሊዮን ኩንታል በላይ ምርት ለማግኘት ግብ ተጥሎ ወደ ትግበራ ምዕራፍ መገባቱን ከክልሉ ግብርና ቢሮ የተገኘው መረጃ ያመለክታል።

ደብረ ማርቆስ፤ ጥቅምት 21/2019 (ኢዜአ) ፦ በምስራቅ ጎጃም ዞን አርሶ አደሩ ከሰብል ልማቱ ጎን ለጎን በቡናና ፍራፍሬ ልማት ዘላቂ ተጠቃሚነቱን የማረጋገጥ ተግባር ተጠናክሮ መቀጠሉን የዞኑ ግብርና መምሪያ አስታወቀ። በመምሪያው የመስኖ ልማት ቡድን መሪ አቶ ሃብታሙ ማሕመድ ለኢዜአ እንደገለጹት፤ በዞኑ አርሶ አደሩ ከሰብል ልማቱ ጎን ለጎን በቡናና ፍራፍሬ ልማት ዘላቂ ተጠቃሚነቱን የማረጋገጥ ተግባር እየተከናወነ ነው።   በዚህም ለመስኖና ለመኸር ችግኝ ተከላ ከ5 ሚሊዮን በላይ የፍራፍሬ ችግኝ ማዘጋጀት መቻሉን ጠቁመው፣ ከዚህ ውስጥ ከ100 ሺህ በላይ የሚሆነውን በመስኖ የመትከል ሥራ እየተካሄደ ነው ብለዋል። ባለፈው ዓመት ከ50 ሺህ በላይ የፍራፍሬና የቡና ችግኝ በመስኖ ማልማት መቻሉን ጠቁመው፣ ዘንድሮ ይህንን በእጥፍ ለማሳደግ እየተሰራ እንደሚገኝ አስረድተዋል። ይህም አርሶ አደሩ ከሰብል ልማቱ ጎን ለጎን በቆላ ፍራፍሬ ልማት ዘላቂ ተጠቃሚነቱን ለማረጋገጥ የሚያስችል መሆኑንም አስረድተዋል። በደብረ ኤሊያስ ወረዳ የገነቴ ቀበሌ ነዋሪ አርሶ አደር ያደለው ገዳሙ በበኩላቸው ቡና፣ አቮካዶና ማንጎ በክረምትና በበጋ በመትከል እያለሙ መሆኑን ተናግረዋል።   በዚህ ዓመት ደግሞ አቮካዶን በመስኖ ለማልማት ከሩብ ሄክታር በላይ መሬት ማዘጋጀታቸውን ገልጸዋል። በባሶ ሊበን ወረዳ የልምጭም ቀበሌ ነዋሪ የሆኑት አርሶ አደር ጌታቸው ቢሻው በበኩላቸው፤ በዚህ ዓመት ከ50 በላይ የፓፓያና የማንጎ ችግኝ በመስኖ ለማልማት ዝግጅት እያደረጉ መሆናቸውን ተናግረዋል። በዞኑ ከ6 ሺህ ሄክታር በላይ መሬት በቆላ ፍራፍሬ የተሸፈነ መሆኑንም ከመምሪያው የተገኘው መረጃ ያመላክታል።

አዲስ አበባ ፤ ጥቅምት 21/2019 (ኢዜአ) ፦ በዘንድሮው የበጋ መስኖ ስንዴ ልማት መርሐ ግብር ከአራት ነጥብ አምስት ሚሊዮን ሔክታር በላይ መሬት በዘር እንደሚሸፈን የግብርና ሚኒስቴር አስታወቀ። ትልቅ ሀገር፣ ትልቅ ሕዝብ፣ ታላቅ ርዕይ የሰነቀችው ኢትዮጵያ ዓመታዊ የስንዴ ምርት ፍላጎቷ ከ107 ሚሊዮን ኩንታል በላይ እንደነበር የቅርብ ጊዜ ትውስታ ነው። ይህንን የሀገር ውስጥ የፍጆታ ፍላጎት ለማሟላትም ለዓመታት ከ700 ሚሊዮን እስከ 1 ቢሊዮን የአሜሪካ ዶላር በሚደርስ የውጭ ምንዛሬ ወጪ ለስንዴ ግዢ ስታወጣ ቆይታለች። የኢትዮጵያ የለውጥ መሻት የወለደው የመደመር መንግሥት የዘመናት የተረጅነት እሳቤን ለመስበር የተገበራቸው የግብርና ልማት መርሐ ግብሮችም ከራስ ፍላጎት የተሻገረ የምርት አቅም ፈጥረዋል።   በጠቅላይ ሚኒስትር ዐቢይ አሕመድ (ዶ/ር) አነሳሽነት ተግባራዊ የተደረገው የበጋ መስኖ ስንዴ ልማት ተጨባጭ ውጤት አምጥቷል። ይህም ከ2014 ዓ.ም ጀምሮ ኢትዮጵያ በከፍተኛ የውጭ ምንዛሬ የገንዘብ ወጪ የምታስገባውን የስንዴ ምርት ሙሉ በሙሉ በማቆም ለውጭ ገበያ ማቅረብ የምትችልበትን አስተማማኝ ምኅዳር ገንብቷል። በግብርና ሚኒስቴር የሰብል ልማት መሪ ሥራ አስፈጻሚ አቶ ተሾመ ገለቱ ለኢዜአ እንዳሉት፤ የግብርና ዘርፍ እመርታ የአርሶና አርብቶ አደሩን የዝናብ ጥገኝነት በማስቀረት አዲስ የልማት ባህል ፈጥሯል። በተለይም በጠቅላይ ሚኒስትር ዐቢይ አሕመድ (ዶ/ር) የተበሰረው የበጋ መስኖ ስንዴ ልማት አርሶና አርብቶ አደሩ የተለዩ አማራጮችን በመጠቀም በዓመት ሦስት ጊዜ የሚያመርቱበትን ዕድል እንደፈጠረ ገልጸዋል። ይህም ከዚህ ቀደም በደጋና ወይና ደጋ አካባቢ በአንድ ወቅት ብቻ ተወስኖ ነበረውን የስንዴ ሰብል ልማት ባህል በመስበር በሰፋፊ የቆላማ አካባቢዎች አዲስ የምርታማነት ባህል መፍጠሩን ተናግረዋል።   በዚህም የበጋ መስኖ ስንዴ ልማት መርሐ ግብር ሲበሰር የነበረው 20 ሺህ ሔክታር መሬት አሁን ላይ ከ3 ነጥብ 78 ሚሊዮን ሔክታር መሬት በላይ ማድረስ መቻሉን አስረድተዋል። የበጋ መስኖ ስንዴ ልማት ውጤታማ ልምምድም የአርሶና አርብቶ አደሩን የኢኮኖሚ ተጠቃሚነት በማላቅ የዘመናት የተረጅነት አስተሳሰብን የሰበረ አዲስ የምርታማነት ባህል መገንባቱን አብራርተዋል። በ2018 ዓ.ም የበጋ መስኖ ስንዴ ልማት 3 ነጥብ 78 ሚሊዮን ሔክታር መሬት በዘር በመሸፈን 149 ሚሊዮን ኩንታል ምርት ማግኘት እንደተቻለ አስታውሰዋል። በዘንድሮው የበጋ መስኖ ስንዴ ልማት መርሐ ግብርም ከሚቀጥለው ሕዳር ወር ጀምሮ ከ4 ነጥብ 5 ሚሊዮን ሔክታር በላይ መሬት በዘር በመሸፈን 189 ሚሊዮን ኩንታል ለማምረት ዕቅድ መያዙን አስታውቀዋል።

አዲስ አበባ፤ ጥቅምት 21/2019 (ኢዜአ)፦‎ በመደመር መንግሥት ለተኪ ምርትና ወጭ ንግድ የተሰጠው ትኩረት ምርትና ምርታማነትን ከማሳደጉም ባሻገር ዓለም አቀፍ ተወዳዳሪነት እንዲያድግ ማስቻሉን አምራቾች ገለጹ። በኢንዱስትሪ ዘርፍ የነበሩ ማነቆዎችን ለማሻሻል ሀገር በቀል የኢኮኖሚ ማሻሻያ፣ የማክሮ ኢኮኖሚ ሪፎርምና ኢትዮጵያ ታምርት ንቅናቄ ተተግብረዋል። በዚህም ከውጭ በሚገቡ ምርቶች ላይ ያለውን ጥገኝነት ለመቀነስ እና የሀገሪቱን የንግድ ሚዛን መዛባት በዘላቂነት ለማስተካከል መዋቅራዊ የኢኮኖሚ ለውጥ ተካሂዷል። የኢትዮጵያ ታምርት ሀገራዊ ንቅናቄ በተለይ በአምራች ዘርፉ የነበሩ ማነቆዎችን በመፍታት ተኪ ምርትና የወጪ ንግድ እንዲያድግ እያስቻለ ይገኛል።   የስርጉ ኑሪ ኢብራሂም ድርጅት ምክትል ስራ አስኪያጅ ሙራድ በድሩ እንዳሉት፤ ድርጅቱ በስሩ ባሉት አልፋ ፉድስ ኮምፕሌክስና ኦሜጋ ኢምፖርት ኤክስፖርት ድርጅቶች ተኪ ምርትና የወጭ ንግድ ላይ ተሰማርቷል። ድርጅቱ በምግብ ማቀነባበርና በላኪና አስመጪነት የተሰማራ ሲሆን ለ800 ቋሚና ከ100 በላይ ጊዜያዊ የስራ ዕድል ፈጥሯል። የመደመር መንግሥት ለአምራች ዘርፉ ትኩረት በመስጠት በሀገር በቀል ኢኮኖሚ ማሻሻያ፣ ኢትዮጵያ ታምርት ንቅናቄና የማክሮ ኢኮኖሚ ሪፎርም መደረጉ ለዘርፉ እድገት አስተዋፅኦ አድርጓል ብለዋል። ድርጅቱ ስጋ ወደውጭ እንደሚልክ ተናግረው የተደረጉ ማሻሻያዎች የስጋ ወጭ ንግድ እንዲያድግ ማስቻሉን ተናግረዋል።   የኒውዊንግ አዲስ ጫማ ፋብሪካ የሰው ኃይል ስራ አስኪያጅ ብዙአየሁ ወርቁ በበኩላቸው፤ ድርጅቱ ቆዳና የቆዳ ውጤቶችን ለሀገር ውስጥ ፋብሪካዎችና ለአውሮፓና አሜሪካ ገበያ እያቀረበ መሆኑን ተናግረዋል። ለአምራች ዘርፉ የተሰጠው ትኩረትና የተደረጉ ማሻሻያዎች ከዚህ ቀደም ይገጥም የነበረው የውጭ ምንዛሬ እጥረት ችግር እንዲፈታ ማስቻሉንም ገልጸዋል። ኢትዮጵያ የአፍሪካ አህጉራዊ የነጻ ንግድ ቀጣና ስምምነት መተግበሯም የበለጠ ዓለም አቀፍ ተወዳዳሪነትን የሚያሳድግ እንደሆነም አስረድተዋል።   የኢትዮጵያ ስጋ አምራችና ላኪዎች ማህበር ቦርድ ፕሬዝዳንት ከሊፋ ሁሴን፤ በአምራች ኢንዱስትሪው ዘርፍ የተደረጉ ማሻሻያዎች ምርትና ምርታማነት እንዲጨምር እያስቻሉ መሆኑን ተናግረዋል። የተደረጉ ማሻሻያዎች በዘርፉ ለነበሩ ችግሮች መፍትሄ በማበጀት ዓለም አቀፍ ተወዳዳሪነት እያሳደገ መምጣቱን ተናግረዋል።   የኢንዱስትሪ ሚኒስትር ዴኤታ ሀሰን መሐመድ (ዶ/ር) በበኩላቸው እንደገለጹት፤ ለአምራች ዘርፉ በተሰጠው ትኩረት የሀገር ውስጥ አምራቾች በገበያ ላይ ያላቸው የምርት ድርሻ ወደ 45 በመቶ ያደገ ሲሆን፣ የፋብሪካዎች አማካይ የማምረት አቅምም ከነበረበት 47 በመቶ ወደ ከ69 በመቶ በላይ ከፍ ብሏል። የማምረቻው ዘርፍ እድገት በ2013 ዓ.ም 4 ነጥብ 8 ከነበረው በ2018 ዓ.ም 15 ነጥብ 8 በመቶ መድረሱን አንስተው ይህንን እድገት በዘላቂነት ለማስቀጠል የተጀመሩ ስራዎች ተጠናክረው ይቀጥላሉ ብለዋል።

‎ባህርዳር ፤ ጥቅምት 21/2019 (ኢዜአ) ፦ በአማራ ክልል በበጀት ዓመቱ ሦስት ወራት በሌማት ትሩፋት ስራዎች ከፍተኛ ውጤት መመዝገቡን የክልሉ እንስሳትና ዓሣ ሃብት ልማት ቢሮ አስታወቀ። ቢሮው በበጀት ዓመቱ ሦስት ወራት በሌማት ትሩፋት መርሃ ግብር ከዕቅድ በላይ የእንቁላል ምርት ለገበያ መቅረቡን ገልጿል። የቢሮው ምክትል ኃላፊ አቶ ነጋ ይስማው ለኢዜአ እንደገለጹት፤ የሌማት ትሩፋት መርሃ ግብር የከተማና የገጠሩን ማኅበረሰብ ምርታማነት በማሳደግ ተጠቃሚ እያደረገ ነው። በዚህም በበጀት ዓመቱ ከ26 ሚሊዮን በላይ የአንድ ቀን ጫጩቶችን ለአሳዳጊዎች ለማቅረብ ታቅዶ በተደረገ ጥረት በሦስት ወራት ብቻ ከ3 ነጥብ 7 ሚሊዮን በላይ ማሰራጨት መቻሉን ገልጸዋል።   ጫጩቶቹን ማሰራጨት የተቻለውም ለ2 ሺህ 567 አሳዳጊዎች መሆኑን ጠቁመው የተገኙትም ከኢትዮ-ችክን፣ ከአንዳሳ፣ ከዳባትና ከኮምቦልቻ የዶሮ ብዜት ማዕከላት መሆኑን አስረድተዋል። በተጨማሪም በሩብ ዓመቱ 480 ሚሊዮን የእንቁላል ምርት ለገበያ ለማቅረብ ታቅዶ በተሰራው ሥራ ከዕቅድ በላይ ምርት ቀርቦ ለተጠቃሚዎች መሰራጨቱን አስረድተዋል። ለዶሮና እንቁላል ምርትና ተጠቃሚነት የተሰጠውን ትኩረት ለማስቀጠል በሰቆጣ ከተማ ለተገነባው የጫጩት ማስፈልፈያ ማዕከል ማሽኖች ተሟልተው እንዲገቡ መደረጉን ተናግረዋል። በጎንደር ከተማ ለሚገነባው የዶሮ ጫጩት ማስፈልፈያ ቦታ በመረከብ ግንባታውን ለመጀመር ዝግጅት እየተደረገ እንደሚገኝ ገልጸዋል። በሌማት ትሩፋት መርሃ ግብር የተያዙ ግቦችን በማሳካት የሥርዓተ ምግብ ችግርን ለማሻሻልና ገበያን ለማረጋጋት በትኩረት እየተሰራ እንደሚገኝ ገልጸዋል። የደሴ ከተማ ነዋሪው ወጣት አስናቀ ክንዴ፣ አምስት ሆነው በመደራጀት ባገኙት የመስሪያ ሼድ 550 እንቁላል ጣይ ዶሮዎችን በመግዛት የእንቁላል ምርት ለገበያ እያቀረቡ መሆኑን ገልጿል።   በቀን ከ430 በላይ እንቁላል በመሰብሰብ ለአካባቢው ነዋሪዎችና ነጋዴዎች እያቀረቡ መሆኑን ጠቁሞ፣ በ100 ሺህ ብር ካፒታል የጀመሩት ሥራ በአጭር ጊዜ ውስጥ ከ600 ሺህ ብር በላይ መድረስ መቻሉን አስረድቷል። የአንድ ቀን ጫጩት ተረክበው በማሳደግ ለተለያዩ ድርጅቶች፣ ግለሰቦችና ለሌሎች አርቢዎች በመሸጥ ተጠቃሚ መሆን መቻላቸውን የገለጸው ደግሞ ሌላኛው የከተማው ነዋሪ ወጣት መሀመድ ሰይድ ነው።   በአሁኑ ወቅትም እያሳደጓቸው የሚገኙ ከ1 ሺህ 500 በላይ የ45 ቀን ዶሮዎችን ለመሸጥ ገበያ እያፈላለጉ መሆኑንም ጠቁሟል።

ኢትዮጵያ በነዳጅ ምርቶች ላይ ያላትን ከፍተኛ የውጭ ምንዛሬ ወጪ ለመቀነስ እና የአረንጓዴ ልማት ስትራቴጂዋን ለማሳካት በሀገር ውስጥ የተፈጥሮ ጋዝ ወደመጠቀም የመሸጋገር ሰፊ ሀገራዊ ስራዎችን እያከናወነች ትገኛለች። ይህ ስትራቴጂ ሀገሪቱ በራሷ የተፈጥሮ ሀብት በስፋት ለመጠቀምና የትራንስፖርት ዘርፉን ዘላቂና ወጪ ቆጣቢ በሆነ የኃይል አማራጭ ለማዘመን የያዘችውን የረጅም ጊዜ ሀገራዊ ራዕይ የሚያሳካ ነው። ጠቅላይ ሚኒስትር ዐቢይ አሕመድ (ዶ/ር) በሶማሌ ክልል ካሉብ የተገነባውን የመጀመሪያው ምዕራፍ የኦጋዴን ፈሳሽ የተፈጥሮ ጋዝ ፕሮጀክት በይፋ በመረቁበት ወቅት ሀገሪቱ በራሷ አቅም የምታመርተውን የተፈጥሮ ጋዝ ወደ ገበያ በማውጣት ለሀገር ውስጥ ኢንዱስትሪዎች እና ለአውቶብስ ትራንስፖርት አገልግሎት ለሚሰጡ ተሽከርካሪዎች ማዋል እንደሚጀመርና ይህም የኢትዮጵያ የማንሰራራት ጅማሮ ተጨማሪ ብስራት መሆኑን ገልጸው ነበር። ይህንን ሀገራዊ ራዕይ ወደ መሬት ለማውረድም ባለፉት ወራት በርካታ የተቀናጁ የሎጂስቲክስ ስራዎች ሲከናወኑ ቆይተዋል። ከእነዚህም መካከል የተፈጥሮ ጋዝ ምርትን ከሚመረትበት ስፍራ ወደ አዲስ አበባ የማጓጓዝ፣ ልዩ የጋዝ ማደያ ጣቢያዎችን የመገንባት እና ነባር ተሽከርካሪዎችን ወደ ጋዝ ቴክኖሎጂ ለመቀየር የሚያስችሉ ሰፊ የቅድመ-ዝግጅትና የመሠረተ ልማት ስራዎች በስፋት ሲከናወኑ ቆይተዋል። እነዚህ ሰፊ ዝግጅቶች ከተጠናቀቁ በኋላ፣ ይህን ሀገራዊ ራዕይ በተግባር ያረጋገጡት የመጀመሪያዎቹ 26 የከተማ አውቶብሶች ከነዳጅ ወደ ተፈጥሮ ጋዝ የመለወጥ ስራ ተጠናቆ ዛሬ በይፋ ሥራ ላይ መዋላቸውን ጠቅላይ ሚኒስትር ዐቢይ አሕመድ (ዶ/ር) አብስረዋል። በነዳጅ አገልግሎትር የሚሰሩ ተሽከርካሪዎችን በሀገር ውስጥ ባለሙያዎችና መሐንዲሶች በራስ አቅም ወደ ተፈጥሮ ጋዝ የመለወጡ ተግባር ደግሞ የሀገር ውስጥ አቅምንና የቴክኖሎጂ ሽግግርን በተግባር ያረጋገጠ ታሪካዊ እርምጃ መሆኑንም ገልጸዋል። በአሁኑ ወቅት በተግባር የተጀመረው ይህ ስራ ለነዳጅ ግዢ የሚወጣውን የውጭ ምንዛሬ በከፍተኛ ደረጃ በመቀነስ ለሀገራችን ኢኮኖሚ ከፍታ ያለው ጠቀሜታ የጎላ ነው። በሚቀጥሉት ሶስት ወራት 400 የሚደርሱ በተፈጥሮ ጋዝ የሚሰሩ የከተማ አውቶብሶች ወደ ሀገር ቤት እንደሚገቡ ጠቅላይ ሚኒስትር ዐቢይ አሕመድ (ዶ/ር) አስታውቀዋል።

ጎንደር፣ ጥቅምት 20/2019(ኢዜአ)፡- በአማራ ክልል በተለያዩ ከተሞች የተጀመረው መሶብ የአንድ ማእከል አገልግሎት የመንግስት አገልግሎት አሰጣጥን በማሻሻልና ብልሹ አሰራርን በመቅረፍ አበረታች ውጤት እያስገኘ መሆኑን የክልሉ ሲቪል ሰርቪስና የሰው ሀብት ልማት ቢሮ አስታወቀ። ቢሮው የ2019 በጀት ዓመት የመጀመሪያ ሩብ ዓመት የስራ አፈጻጸም ግምገማውን በጎንደር ከተማ አካሒዷል።   የቢሮው ኃላፊ ባንቺአምላክ ገብረማርያም በወቅቱ እንደገለጹት በክልሉ እየተካሄደ የሚገኘው የሪፎርም ትግበራ የአገልግሎት አሰጣጡን ለማሻሻልና የህብረተሰቡን ችግርለመቅረፍ እያስቻለ ነው። በዚህም የመንግስት አገልግሎት አሰጣጥን ዲጅታላይዝ በማድረግ በዘርፉ የላቀ ውጤት መመዝገቡን ገልጸዋል።   በተለይም መሶብ የአንድ ማእከል አገልግሎት ህዝቡ በአንድ ቦታ በተደራጀ ሁኔታ ፈጣን፣ ግልጽና ፍትሃዊ አገልግሎት የሚያገኝበትን እድል መፍጠሩን አስረድተዋል። ይህም የአገልግሎት ሰጭ ባለሙያዎችን ስነ ምግባር በማሻሻል በህብረተሰቡ ዘንድ የአገልግሎት እርካታ መፍጠር መቻሉንም አስገንዝበዋል።   የጎንደር ከተማ ሲቪል ሰርቪስ እና የሰው ሀብት መምሪያ ኃላፊ አቶ ነፃነት መንግስቴ በበኩላቸው ሙያተኞችን ከዘመናዊ ቴክኖሎጂ ጋር በማላመድ ፈጣንና ቀልጣፋ አገልግሎት መስጠት ተችሏል ብለዋል። ፈጣንና ቀልጣፋ አገልግሎትን ታች ድረስ ለማድረስ የተጀመረው ስራ ተጠናክሮ ይቀጥላል ሲሉም አክለዋል። "ባለሙያዎችን በበቂ እውቀት፣ ክህሎትና በስነ-ምግባር በማነጽ ህብረተሰቡን በብቃት እንዲያገለግሉ እየተሰራ ነው" ያሉት ደግሞ የማዕከላዊ ጎንደር ዞን ሲቪል ሰርቪስ መምሪያ ተወካይ ኃላፊ አቶ ሳልህ ኑር ሁሴን ናቸው። በመድረኩ ላይ የክልሉ ሲቪል ሰርቪስና የሰው ኃብት ልማት ቢሮ ኃላፊዎች፣ የጎንደር ቀጠና የዘርፉ መምሪያ ኃላፊዎችና ሙያተኞች ተሳትፈዋል።

ባህር ዳር፣ ጥቅምት 20/2019 (ኢዜአ):-በባህር ዳር ከተማ የኢንዱስትሪ ሰላምን እና የሠራተኞችን ደህንነት በማረጋገጥ ምርታማነትን የሚያሳድጉ ተግባራት እየተከናወኑ መሆኑን የከተማ አስተዳደሩ ተቀዳሚ ምክትል ከንቲባ ገለፁ። በኢንዱስትሪዎች የሥራ ላይ አደጋ የአሰሪና ሠራተኛ ጉዳይ አዋጅ አተገባበር ላይ ያተኮረ የምክክር መድረክ ዛሬ ተካሄዷል።   ተቀዳሚ ምክትል ከንቲባው ጎሹ እንዳለማው በመድረኩ እንደገለጹት፤ ለኢንዱስትሪ ሠራተኞች የሥራ ላይ ደህንነት የጎደለው ስምሪት እየተሰጠ እንደሚገኝ በምልከታ ተረጋግጧል። ይህን ህግ ያልተከተለ አሰራር መስተካከል እንዳለበት ጠቅሰው፤ ለሠራተኞች የደህንነት አልባሳትና ጫማዎችን ማቅረብ የኢንዱስትሪውን ሰላም ከማስጠበቅ ባለፈ ለምርታማነት ማደግ ወሳኝ ነው ብለዋል። በከተማዋ በተለያየ ደረጃ የሚገኙ ከ300 በላይ ኢንዱስትሪዎች ግንባታቸው ተጠናቆ ወደማምረት ሥራ እንደገቡ አስታውሰው፣ ከ700 በላይ የሚሆኑ አዳዲስ የኢንዱስትሪዎች ግንባታ ሂደት ላይ መሆናቸውን ጠቅሰዋል። እንደ ተቀዳሚ ምክትል ከንቲባው ገለጻ፣ በክልሉ የኢንዱስትሪ ሰላምን ለማረጋገጥ የሚሰሩ ሥራዎች የበለጠ ተጠናክረው ይቀጥላሉ። በተጨማሪም የግንባታ ቦታ ተረክበው በሚፈለገው ፍጥነት ወደተግባር ያልገቡ ባለሃብቶችን በመደገፍ ወደ ሥራ ለማስገባት እየተሰራ መሆኑን አስታውቀዋል። የአማራ ክልል ሥራና ክህሎት ቢሮ ኃላፊ ስቡህ ገበያው (ዶ/ር) በበኩላቸው እንዳሉት፤ የኢንዱስትሪ ሰላም እንዲረጋገጥ በላቀ ቅንጅትና ትብብር መስራት ያስፈልጋል። ሠራተኞች የሥራ ላይ ደህንነታቸውን ለማስጠበቅ ተደራጅተው መንቀሳቀስ እንዳለባቸው ገልፀው፤ ይህን የመደራጀት መብት የሚከለክሉ አሠሪዎች ላይ ቢሮው ጥብቅ እርምጃ ይወሳዳል ብለዋል። የኢንዱስትሪዎችን የማምረት አቅም ለማሳደግ ለሠራተኞች ነጻ የአቅም ግንባታ ስልጠና እንደሚሰጥም አመልክተዋል። የክልሉ ኢንዱስትሪና ኢንቨስትመንት ቢሮ ምክትል ሃላፊ አቶ ተፈሪ ታረቀኝ በበኩላቸው እንዳሉት፤ የኢንዱስትሪ ባለሀብቶች የሠራተኛውን መብት ከማክበር ባለፈ የሥራ ላይ ደህንነት መጠበቂያ ቁሶችን ሊያሟሉ ይገባል። መንግስት መሬት በማቅረብ የኢንዱስትሪውን ችግር እየፈታ መሆኑን አስታውሰው፣ አሰሪና ሠራተኛው ተቀናጅተው በመንቀሳቀስ ምርታማነትን ለማሳደግ ሊሰሩ ይገባል ብለዋል።  

ሆሳዕና ፤ ጥቅምት 20/2019 (ኢዜአ)፦ በማዕከላዊ ኢትዮጵያ ክልል የህዝቡን ኢኮኖሚያዊ ተጠቃሚነት ለማረጋገጥ የተጀመሩ ተግባራት ተጠናክረው እንደሚቀጥሉ የክልሉ ርዕሰ መስተዳድር የትምጌታ አስራት (ዶ/ር) ገለጹ። የክልሉ የከተማና የኢኮኖሚ ዘርፍ ምክክር መድረክ በሆሳዕና ከተማ ተካሂዷል።   ርዕሰ መስተዳድሩ በወቅቱ እንደገለጹት በክልሉ የህዝቡን ኢኮኖሚያዊ ተጠቃሚነት ለማረጋገጥ የተጀመሩ ስራዎች ይጠናከራሉ። ከተሞችን በኮሪደር ልማት ምቹና ሳቢ ከማድረግ በተጨማሪ ለኢንቨስትመንት ተመራጭነታቸውን የማሳደግ ተግባር ተጠናክሮ እንደሚቀጥል አመላክተዋል። ገቢን አሟጦ በመሰብሰብ የህዝቡን የልማት ጥያቄ የመመለስ ፣ የዋጋ ንረትን የመከላከል ፣ የኢንቨስትመንት አማራጮችን በማስፋት ተኪ ምርቶችን ከማምረት በተጨማሪ ዜጎችን በስራ እድል ተጠቃሚ የማድረግ ተግባር ተጠናክሮ ቀጥሏል ብለዋል።   በምክትል ርዕሰ መስተደድር ማዕረግ የኢኮኖሚ ክላስተር አስተባባሪና የክልሉ ከተማ ልማትና ኮንስትራክሽን ቢሮ ሀላፊ አቶ ሞገስ ባልቻ በበኩላቸው የመደመር መንግሥት በኮሪደር ልማት ፅዱ ፣ ውብና ማራኪ ከተሞች እንዲፈጠሩ እያደረገ መሆኑን ተናግረዋል ። በዚህም በክልሉ በመጀመሪያው ምዕራፍ 74 ኪሎ ሜትር በላይ የኮሪደር ልማትና 10 ሄክታር የወንዝ ዳርቻ ልማት ስራ ተጠናቆ ለአገልግሎት ክፍት ስለመደረጉም ጠቅሰዋል። የከተሞችን እድገት በማፋጠን የማህበረሰቡን ተጠቃሚነት ለማረጋገጥ በተጀመሩ ስራዎች ተስፋ ሰጪ ዉጤት እየተመዘገበ እንደሚገኝ ጠቅሰው በዘርፉ እየተመዘገቡ የሚገኙ ውጤቶች ተጠናክረው እንደሚቀጥሉ አስታውቀዋል፡፡ በመድረኩ የክልሉ መንግስት ዋና ተጠሪ ዲላሞ ኦቶሬ (ዶ/ር) ጨምሮ የክልል ፣ የዞን ፣ የልዩ ወረዳ ፣ የወረዳና ከተማ አስተዳደር የስራ ኃላፊዎች ተሳትፈዋል።  

አዲስ አበባ፤ ጥቅምት 20/2019 (ኢዜአ)፦ለሕዝቡ ዘመናዊ፣ ቀልጣፋ እንዲሁም ደህንነቱ የተጠበቀ የሕዝብ ትራንስፖርት አገልግሎት ተዳራሽ ለማድረግ የሚያስችሉ ተግባራትን ቀጣይነት ባለው መልኩ እየተከናወነ እንደሚገኝ የአዲስ አበባ ከተማ አስተዳደር ከንቲባ አዳነች አቤቤ ገለጹ። ጠቅላይ ሚኒስትር ዐቢይ አሕመድ (ዶ/ር) የመጀመሪያዎቹን 26 ከነዳጅ ወደ ተፈጥሮ ጋዝ የተለወጡ አውቶብሶች ሥራ አስጀምረዋል።   የአዲስ አበባ ከተማ ከንቲባ አዳነች አቤቤ ይህን አስመልክተው ባደረጉት ንግግር፣ ለከተማዋ ነዋሪዎች ዘመኑን በዋጀ፣ ቀልጣፋ እና ተደራሽነታቸውን ባረጋገጠ መንገድ የትራንስፖርት አገልግሎት እንዲያገኙ የሚያስችሉ ተግባራት ሲከናወኑ መቆየታቸውን ገልጸዋል። በዚህም አዳዲስ የኤሌክትሪክ አውቶብሶችን በመግዛት ማቅረብ መቻሉን በአብነት ጠቅሰዋል። ዛሬ በጠቅላይ ሚኒስትር ዐቢይ አሕመድ (ዶ/ር) አነሳሽነት ለመጀመሪያ ጊዜ በተፈጥሮ ጋዝ የሚሠሩ አውቶብሶች ለአገልግሎት መብቃታቸውን ተናግረዋል። በተፈጥሮ ጋዝ የትራንስፖርት አገልግሎት የመስጠት አቅም መፍጠራችን የአየር ብክለትን ለመከላከል ጉልህ ሚና እንደሚጫወትም ገልጸዋል። መንግሥት የማኅበረሰቡን የትራንስፖርት ጫና ለማቃለልና የከተማ አውቶብስ ትራንስፖርትን ለማቀላጠፍ በቢሊዮኖች የሚቆጠር ከፍተኛ የገንዘብ ድጎማ በማድረግ ነዋሪዎች ዝቅተኛ ክፍያ እንዲከፍሉ እየሠራ ቢሆንም፣ አሁንም የአገልግሎቱ ተደራሽነት ዋና ማነቆ እንደሆነ ጠቁመዋል።   ይህን ጫና ከማቃለል አንጻር በተፈጥሮ ጋዝ የሚሠሩ አውቶብሶችን ተደራሽ ማድረግ ከፍተኛ ሚና እንደሚጫወት አስረድተዋል። ሕዝቡ ቀልጣፋ የትራንስፖርት አገልግሎት የሚያገኝበትን ምቹ ሁኔታ ለመፍጠር የሚያስችሉ ተግባራት ቀጣይነት ባለው መልኩ ተጠናክረው እንደሚቀጥሉም አረጋግጠዋል። ከንቲባዋ አንበሳ አውቶብሶችን ወደ ተፈጥሮ ጋዝ የማሸጋገር ሥራ ውጤታማ እንዲሆን አስተዋጽኦ ላደረጉ አካላትም ምስጋና አቅርበዋል። ጠቅላይ ሚኒስትር ዐቢይ አሕመድ (ዶ/ር) የመጀመሪያዎቹን 26 ከነዳጅ ወደ ተፈጥሮ ጋዝ የተለወጡ አውቶብሶች ወደ ሥራ ባስገቡበት ወቅት፣ ሀገሪቱ በነዳጅ ላይ ያላትን ጥገኝነት ሙሉ በሙሉ ለማስቀረት እና ሀገር ውስጥ እየተመረተ ያለውን የተፈጥሮ ጋዝ በስፋት ጥቅም ላይ ለማዋል የሚያስችሉ 400 አዳዲስ በተፈጥሮ ጋዝ የሚሠሩ አውቶብሶች በቅርቡ ወደ ሀገር ውስጥ እንደሚገቡ አስታውቀዋል።

አዲስ አበባ፤ ጥቅምት 20/2019 (ኢዜአ)፦ኢትዮጵያ መሻትና ፍላጎቷን በተባበረ ፍጥነት ማሳካት መለያ መታወቂያዋ እያደረገች ነው ሲሉ ጠቅላይ ሚኒስትር ዐቢይ አሕመድ (ዶ/ር) ገለጹ፡፡ ትልቅ ሀገር፤ ትልቅ ሕዝብ፤ ታላቅ ርዕይ ጠቅላይ ሚኒስትር ዐቢይ አሕመድ (ዶ/ር) በአዲስ አበባ ከተማ በነዳጅ ይሰሩ የነበሩ የመጀመሪያዎቹን 26 የከተማ አውቶብሶች ወደ ተፈጥሮ ጋዝ ተለውጠው ሥራ አስጀምረዋል።   በዚሁ ወቅት እንዳሉትም፤ ኢትዮጵያ ውስጥ የትራንስፖርትና የቤት ዋጋ ነው ከፍተኛው። ለዚህም የምግብ፣ የትራንስፖርት፣ የቤት ጥያቄዎች በተጀመረው ስኬታማ ጉዞ እየተፈቱ ሲሄዱ ሰዎች ባላቸው ገቢ ልክ የተሻለ ለመኖር የሚያስችል ዕድል እንደሚያስገኝ አስረድተዋል። የጋዝ ምርትን ወደ ውጤት የመቀየር ሂደት ለመንግሥት በጣም ወሳኝ ነው ያሉት ጠቅላይ ሚኒስትሩ፤ ከመናገር ባሻገር ለህዝብ ጥቅም ማዋልም የአንድ መንግሥት መለኪያ መሆኑን አንስተዋል። እኛ የምንታወቀው በመጀመር ሳይሆን ፕሮጀክትን በጥራትና በፍጥነት መጨረስ ላይ ነው፤ ማቀድ ብቻ ሳይሆን ፈጽመን ማሳየት ነው፤ የምንናገረውን ወደ ተግባር መቀየር ነው፤ ይኸም መለያ መታወቂያችን ነው ብለዋል። ከኢትዮጵያ ባሻገርም በአፍሪካ የኢትዮጵያ መንግሥት መለያ የሚናገረውን ይፈጽማል የሚል እሳቤ እየጎላ መምጣቱን አብራርተዋል። የሕዝብ መሻት በጣም ብዙ ስለሆነም ጥራትን ከፍጥነት ጋር ያነጻጸረ አፈጻጸምን በመከተል የዜጎችን የሕይወት ጫና በማቃለል የሚጨበጥ ለውጥ ለማምጣት እንደሚሠሩ አረጋግጠዋል። የእኛ ፍላጎት ምግብን በበቂ ደረጃ አምርቶ ራስን መመገብ፣ የትራንስፖርት ሥርዓቱን ወደ እኛ አቅም መቀየር፣ ሀገር ውስጥ ያሉ ምርቶችን በሀገር ውስጥ ግብዓት በመጠቀም ዋጋቸውን መቀነስ ነው ብለዋል። የሞጆና የደብረ ብርሃን የሴራሚክስ ፋብሪካዎች የኢትዮጵያን ፍላጎት መቶ በመቶ እንደሚያሟሉ በመጠቆም፤ እስከ ቅርብ ጊዜም የፊዩል ነዳጅ እንደሚጠቀሙ አስረድተዋል።   በአሁኑ ወቅትም ሁለቱንም ወደ ተፈጥሮ ጋዝ በመቀየር ለፋብሪካዎቹ ተብሎ የሚገባውን ናፍጣ በማስቀረት በጋዝ ባነሰ ዋጋም ስለሚያመርቱ ሴራሚክሱ በተመጣጣኝ ዋጋ ለሕዝብ እንደሚደርስ አንስተዋል። ይህም በሚገነባው ቤት ላይ የሚጨበጥ ለውጥ ማምጣት የሚያስችል መሆኑን አብራርተዋል። በሚቀጥሉት ሁለትና ሦስት ወራት የተፈጥሮ ጋዝ የሚጠቀሙ 100 የሚጠጉ የሴራሚክ ማጓጓዣ መኪኖች ወደ ሀገር ቤት እንደሚገቡ አስታውቀዋል። ከፋብሪካ ወደሚሰራው ቤት መጓጓዣውም ሆነ የሴራሚክ ምርቱ ዋጋው ያነሰ፣ ቤት በማምረትም ሆነ ምግብን ከገጠር ወደ ከተማ በማምጣትም በከተማ ያለ እንቅስቃሴ ላይም የሚጨበጥ ለውጥ ማምጣት እንደሚችል አንስተዋል። ይህም ግሽበትን በመቆጣጠር ከውጭ የሚገቡ ምርቶችን የውጭ ምንዛሬ ወጪ ፍላጎት ለመቀነስ እንደሚያግዝ ጠቁመዋል። የኢትዮጵያ ሕዝብም ይህንን መልካም ጅምር ማወቅ አለበት፤ መልካም ጅምርም ፍጻሜ አይደለም፤ የተፈጥሮ ጋዝ መጀመራችን አስደሳች ነገር ነው፤ ያንንም ወደ ተጠቃሚና ፋብሪካ ግብዓት ማድረስ በጣም ጠቃሚ ነገር ነው፤ መስፋትም አለበት ብለዋል። የተፈጥሮ ጋዝ ማምረት ምዕራፍ ሁለት መጀመሩን በመጠቆም፤ ይኸ ሲደርስም ለማዳበሪያ ግብዓት ይሆናል፣ ለኃይል ግብዓት ይሆናል፣ ኃይልም ይመረትበታል ሲሉ አጽንኦት ሰጥተዋል። ኢትዮጵያውያን መልካም ጅምሮችን በማላቅ አጋርና ተባባሪነቱን በማስቀጠል የኢትዮጵያ ተስፋ በብዙ መንገድ እየታየ ነው ያሉት ጠቅላይ ሚኒስትሩ፤ በልማቷ በጣም አመርቂ ውጤቶች እየታዩ ነው፤ በሰላሟም ለውጦች አሉ ብለዋል። ይህንን አጠናክሮና አስፍቶ መስራት ልጆቻችን የተሻለ ሀገር ይኖራቸዋል፤ ሀገር በአንድ ጀምበርም ሆነ በአንድ ትውልድ አትገነባም፤ ሀገር መገንባትም ውስብስብ ሂደት እንዳለው አስገንዝበዋል። የተለያየውን ሀገር መገንቢያ ምሰሶዎች እኩል በማሳደግ እኩል መገንባትና እኩል መጠበቅ እንደሚፈልግ አጽንኦት ሰጥተዋል። የሕግ ማስከበር ሥራ ሲሰራ ልማት ከቀረ፣ ልማት ሲሰራም የዜጎችን ሕይወት የማይለውጥ ከሆነ አብሮ አይሄድም ብለዋል። ይህንን አስተሳስሮ ለመሄድም የአዲስ አበባ ከተማ አውቶቡሶች ወደ ተፈጥሮ ጋዝ ተጠቃሚነት የመቀየር ተግባር ተስፋ ሰጪ ውጤት መሆኑን አስረድተዋል።   ጎዴ ያየነው አዲስ አበባ ላይ ስላየን፤ አዲስ አበባ ያየነው ደግሞ በዜጎቻችን ሕይወት ነገ ስለምናየው ደስ ብሎኛል፤ አሁንም ብዙ ሥራ ይጠይቀናል፤ የዜጎቻችንን ሕይወት ማቅለል ይኖርብናል ብለዋል። ዜጎቻችንም ይህንን ተስፋ እያዩ የሰው ልጅ መኖሪያና ሕይወት ማስቀጠያ መንገድ ተስፋ ነው፤ ተስፋን እያዩና ብሩህ ነገር እያዩና እያሰቡ በትጋት መስራት እንደሚጠቅባቸው አስገንዝበዋል። ይህ ጊዜ በኢትዮጵያ ለልጆቻችን በጣም በጣም ተስፋ ሰጪ እና ብሩህ ነው፤ በርትተን እንስራ። ከጥረት፣ ከስራ፣ ከድካሞች የሚገኙት የተሻሉ ውጤቶች የሚታዩት በልፋት ብቻ ነው ብለዋል። ሀገር የምንቀይረው በጋራ ጥረት፣ ስንደመር ብዙ ጉልበት፣ ብዙ አቅም፣ ብዙ እውቀት፣ ብዙ ሀብት ይሰበሰባል፤ ያንን ለሀገር ግንባታ እናውለዋለን ብለዋል። ኢትዮጵያ ተስፋ አላት፤ ኢትዮጵያ ትበለጽጋለች፤ ትጸናለች፤ መሻቶቿም ፍላጎቶቿም በተባበረ ፍጥነት ታሳካለች ሲሉም አስገንዝበዋል።

አዲስ አበባ፤ ጥቅምት 20/2019 (ኢዜአ)፦በሚቀጥሉት ሶስት ወራት 400 የሚደርሱ በተፈጥሮ ጋዝ የሚሰሩ የከተማ አውቶብሶች ወደ ሀገር ቤት እንደሚገቡ ጠቅላይ ሚኒስትር ዐቢይ አሕመድ (ዶ/ር) አስታወቁ። ጠቅላይ ሚኒስትር ዐቢይ አሕመድ (ዶ/ር) በአዲስ አበባ ከተማ በነዳጅ ይሰሩ የነበሩ የመጀመሪያዎቹን 26 የከተማ አውቶብሶች ወደ ተፈጥሮ ጋዝ ተለውጠው ሥራ አስጀምረዋል።   በዚሁ ወቅት እንዳሉትም፤ ከጥቂት ወራት በፊት ጎዴ የሚገኘው የመጀመሪያው ምዕራፍ የተፈጥሮ ጋዝ ማምረት መበሰሩን አስታውሰዋል። የጎዴ የተፈጥሮ ጋዝ ምርት ውጤትም ወደ ተጠቃሚ ለማድረስ ላለፉት ወራት ሰፋፊ ተግባራት ሲከናወኑ መቆየታቸውን አስረድተዋል። የተፈጥሮ ጋዝ እና ፈሳሽ ጋዝ ባሕሪያቸው ይለያያል ያሉት ጠቅላይ ሚኒስትሩ፤ ለዚህም ከጎዴ የጋዝ ምርትን በማጓጓዝ ለየት ያለ ማከማቻና ማደያዎችን የማዘጋጀት ሥራ መሰራቱን አንስተዋል። እስካሁን በቤንዚንና ናፍጣ ይሰሩ የነበሩ አውቶቡሶችን ወደ ተፈጥሮ ጋዝ መቀየርም ተጨማሪ ሥራ በመሆኑ፤ ኢንጂኖችን ከተለያዩ ሀገራት በማስመጣት የአዲስ አበባ ከተማ 26 የከተማ አውቶቡሶችን ለጋዝ ምቹ የማድረግ ሥራ መሰራቱን አንስተዋል።   በዚህ መንገድ ከሄድን ረጅም ጊዜ ስለሚወስድ 400 በተፈጥሮ ጋዝ የሚሰሩ የከተማ አውቶቡሶች ታዘዋል፤ በሚቀጥሉት ሦስት ወራትም ይገባሉ ብለዋል። ጎን ለጎንም በቤንዚንና ናፍጣ የሚሰሩ አውቶቡሶችን ኢንጂን በመቀየር ወደ ተፈጥሮ ጋዝ የመቀየሩ ሥራ ተጠናክሮ እንደሚቀጥል አረጋግጠዋል። ይህም በጥቂት ዓመታት ውስጥ አዲስ አበባ ያለውን የናፍጣ ተጠቃሚ አውቶቡስ ሙሉ በሙሉ ወደ ጋዝ እንድንቀይር ያስችለናል ብለዋል።  

አዲስ አበባ፤ ጥቅምት 20/2019 (ኢዜአ)፦የትራንስፖርት አገልግሎታችንን የበለጠ ፈጣን፣ ተደራሽና ቀልጣፋ ለማድረግ የጀመርነውን ሥራ አጠናክረን እንቀጥላለን ሲሉ የአዲስ አበባ ከተማ ከንቲባ አዳነች አቤቤ ገለጹ፡፡ ጠቅላይ ሚኒስትር ዐቢይ አሕመድ (ዶ/ር) የመጀመሪያዎቹን 26 ከነዳጅ ወደ ተፈጥሮ ጋዝ የተለወጡ አውቶብሶች ዛሬ ሥራ አስጀምረዋል፡፡ ይህንን አስመልክተው ከንቲባ አዳነች አቤቤ በማኅበራዊ ትስስር ገጻቸው ባስተላለፉት መልዕክት፡- ይህ ለሀገራችን የመጀመሪያ የሆነ ታላቅ ርምጃ ሲሆን፣ የትራንስፖርት ወጪንና የአየር ብክለትን ለመቀነስ፣ የዜጎችን ጊዜ ለመቆጠብና የሀገር ውስጥ ሀብትን በአግባቡ ለመጠቀም የሚያግዝ ተጨባጭ የቴክኖሎጂ ሽግግር ነው ሲሉ ገልጸዋል።   በራሳችን አቅም የተጀመረው ይህ ሥራ በቀጣይም ተጠናክሮ ይቀጥላል ያሉት ከንቲባዋ ፤ በቅርቡም 400 አዳዲስ በተፈጥሮ ጋዝ የሚሠሩ አውቶብሶች ወደ ሀገር ውስጥ እንደሚገቡ አስታውቀዋል። ዓላማችን ወጪ ቆጣቢ፣ አካባቢን የሚጠብቅ፣ ፈጣንና ተደራሽ የሕዝብ ትራንስፖርት በመገንባት የዜጎችን የዕለት ተዕለት ኑሮ ማሻሻል ነው ሲሉም ገልጸዋል።   ለዚህም የትራንስፖርት አገልግሎታችንን የበለጠ ፈጣን፣ ተደራሽና ቀልጣፋ ለማድረግ የጀመርነውን ሥራ አጠናክረን እንቀጥላለን ብለዋል። በራሳችን አቅም፣ በዘመናዊ ቴክኖሎጂና በተጨባጭ ውጤት ማስመዝገብን አጠናክረን እንቀጥላለን ሲሉም ገልጸዋል፡፡