አዲስ አበባ፤ ጥቅምት 25 /2019 (ኢዜአ)፦ የኢትዮጵያ ብሔራዊ ስትራቴጂ ሚኒስቴር ከኢትዮጵያ ስታቲስቲክስ አገልግሎት ጋር በመቀናጀት የኢትዮጵያን አጠቃላይ ሀገራዊ ምርት (GDP) ከ2019 ዓ.ም ጀምሮ መለካት የሚያስችል አዲስ ስሌት በዛሬው ዕለት ይፋ ተደርጓል። ‎ጠቅላላ ሀገራዊ ምርት (GDP) አንድ ሀገር በተወሰነ ጊዜ፣ በአብዛኛው በአንድ ዓመት በሀገር ውስጥ ያመረታቸውን ሁሉንም የመጨረሻ ሸቀጦች እና አገልግሎቶች በገበያ ዋጋ የሚለካ ኢኮኖሚያዊ መለኪያ ነው። ‎በዚህ መለኪያ ውስጥ የቤተሰቦች ፍጆታ፣ የንግድ ተቋማት እና የግል ባለሀብቶች ኢንቨስትመንት፣ የመንግሥት ወጪ እንዲሁም ከወጪ ንግድ የሚገኘው የተጣራ ውጤት ተደምረው ይሰላሉ። ‎ኢትዮጵያም ከፈረንጆቹ 1960 ጀምሮ የጠቅላላ ሀገራዊ ምርት መረጃዋን በይፋ ስታሳውቅ ቆይታለች። ሆኖም እስካሁን ሥራ ላይ የነበረው የ2008 ዓ.ም የመነሻ ዓመት ስሌት በኢኮኖሚው የተፈጠሩ አዳዲስ ለውጦችን እና የዘርፎችን መስፋፋት በበቂ ሁኔታ የሚያንፀባርቁ አለመሆናቸው ተገልጿል።  

ቁሊቶ፤ ጥቅምት 25/2019 (ኢዜአ):-በማዕከላዊ ኢትዮጵያ ክልል በግብርና ዘርፍ ያሉ ጸጋዎችን ለይቶ በማልማት የማህበረሰቡን ምርታማነት ለማሳደግና ኢኮኖሚያዊ ተጠቃሚነቱን ለማረጋገጥ ትኩረት መሰጠቱን የክልሉ ግብርና ቢሮ አስታወቀ። በቢሮው የብሔራዊ የአቮካዶ ልማት ፕሮግራም ክልላዊ ስትሪንግ ኮሚቴ በቀጣይ የትኩረት አቅጣጫ ላይ ያተኮረ የውይይት መድረክ በሀላባ ዞን ቁሊቶ ከተማ አካሂዷል።   በምክትል ርዕሰ መስተዳድር ማዕረግ የግብርናና ገጠር ልማት ክላስተር አስተባባሪና የክልሉ ግብርና ቢሮ ሀላፊ አቶ ኡስማን ሱሩር በመድረኩ እንደገለፁት፣ በክልሉ በግብርናው ዘርፍ ያሉ ፀጋዎች አልምቶ በመጠቀም ማህበረሰቡ ተጠቃሚ ለማድረግ እየተሰራ ነው። በዚህም በክልሉ ባለፉት ዓመታት በግብርናው ዘርፍ የተከናወኑ ሀገራዊና ክልላዊ ኢንሼቲቮች የህብረተሰቡን የምግብ ዋስትናን በማረጋገጥ እና የገቢና የወጪ ምርቶችን በጥራት በማምረት ተጨባጭ ውጤት ማምጣታቸውን ገልጸዋል። ኢትዮጵያ በዓለም አቀፍ ደረጃ የአቮካዶ ምርትን በስፋት አምርታ ለዓለም አቀፍ ገበያ ማቅረብ የሚያስችላትና ለ15 ዓመታት የሚተገበር ብሔራዊ የአቮካዶ ልማት ፕሮግራም ቀርፃ ወደ ትግበራ ምዕራፍ መግባቷንም አስታውሰዋል። በፕሮግራሙ የአቮካዶ ምርትን ለኤክስፖርት፣ ለኢንዱስትሪ ግብዓትነትና ለሀገር ውስጥ ፍጆታ በማዋል የምግብ ዋስትናን ያረጋገጠ ማህበረሰብ ለመፍጠር ግብ መያዙንም ጠቁመዋል። በፕሮግራሙ በክልሉ በ10 ወረዳዎች አቮካዶ የማልማት ሥራ እየተከናወነ መሆኑን የገለጹት አቶ ኡስማን፣ ሥራውን ይበልጥ ለማስፋት በ44 ወረዳዎች የአቮካዶ ልማት መጀመሩን አስረድተዋል። በክልሉ በግብርናው ዘርፍ ያሉ ጸጋዎችን ለይቶ በማልማት የማህበረሰቡን ምርታማነትና ኢኮኖሚያዊ ተጠቃሚነት ለማሳደግ ትኩረት መሰጠቱንም አስታውቀዋል።   በክልሉ የብሔራዊ አቮካዶ ልማት ፕሮግራም አስተባባሪ አቶ ሰላሙ አብርሃም በበኩላቸው እንዳሉት የፕሮግራሙ ትግበራ ክልሉ በዘርፉ ያለውን እምቅ አቅም በማሳደግ የማህበረሰቡን ተጠቃሚነት ያሳድገዋል። በክልሉ በባለፉት 3 ወራት 350 ኩንታል የአቮካዶ ምርት ለውጪ ገበያ ተልኮ የውጪ ምንዛሬን ለማግኘት ተችሏል ብለዋል። በአቮካዶ ልማት እየተመዘገቡ ያሉ ውጤቶችን በግለሰብና በተቋማት ጀረጃ በማስፋት በሀገር አቀፍ ደረጃ የተያዙ ግቦችን ለማሳካት ትኩረት ተሰጥቶ እንደሚሰራም ገልጸዋል። የስልጤ ዞን ምክትል አስተዳዳሪና የግብርና መምሪያ ሀላፊ አቶ ሙበራ ከማል እንደገለፁት የፕሮግራሙ ትግበራ በአካባቢ ያለን ፀጋ ለይቶ በመጠቀም ረገድ ተጨባጭ ለውጥ አምጥቷል። በዞኑ በስልጢ ወረዳ 10 ሄክታር ማሳ በአቮካዶ እየለማ እንደሚገኝ ጠቁመው፣ የፕሮግራሙ ትግበራ አርሶ አደሩን በልማቱ ያለውን ተሳትፎና ተጠቃሚነት በማሳደጉ አዎንታዊ ሚና እየተጫወተ ነው ብለዋል። በመርሃ ግብሩ የክልል፣ የዞን ከፍተኛ አመራሮችና የፕሮግራሙ ስትሪንግ ኮሚቴዎች ተሳትፈዋል።    

አዲስ አበባ፤ ጥቅምት 25 /2019 (ኢዜአ)፦ የየኢትዮጵያ የተሻሻለው ጠቅላላ የሀገር ውስጥ ምርት ስሌት ወቅታዊ የማድረግ ሥራ የሀገርን ኢኮኖሚ ትክክለኛ መጠንና ዕድገት ተዓማኒነት የሚያረጋገጥ መሆኑን የኢትዮጵያ ብሔራዊ ባንክ ገዥ ኢዮብ ተካልኝ (ዶ/ር) ገለጹ። ትልቅ ሀገር፤ ትልቅ ሕዝብ፤ ታላቅ ርዕይ የብሔራዊ ስትራቴጂ ሚኒስቴር የተሻሻለውን ጠቅላላ የሀገር ውስጥ ምርት ግምገማ ወቅታዊ የማድረግ ሥራ ይፋ ያደረገ ሲሆን፤ የተሻሻለው የጠቅላላ ሀገር ውስጥ ምርት መረጃ ቋሚ ዓመት ከ2008 ወደ 2017 ዓ.ም ተቀይሯል።   የኢትዮጵያ ብሔራዊ ባንክ ገዥ ኢዮብ ተካልኝ (ዶ/ር) በዚህ ወቅት፤ ጠቅላላ የሀገር ውስጥ ምርት የሁሉም ነገር መለኪያ በመሆኑ የጠቅላላ የሀገር ውስጥ ምርት ስሌት ጊዜውን ካልዋጀ ትክክለኛ ዕቅድና መረጃ ማግኘት ያስቸግራል ብለዋል። በኢትዮጵያ የተደረገው የቋሚ ዓመት ለውጥ መሠረታዊ መረጃን መሠረት ያደረገና ብዙ አዳጊ የኢኮኖሚ ዘርፎችን ያካተተ መሆኑን ገልጸዋል። ይህም ሀገራዊ የፋይናንስ ጥልቀትን ለመለካት ወሳኝ አቅምን በመፍጠር ቁጠባን ወደ ምርታማ ዘርፍ ለማሸጋገር እንደሚያስችል ተናግረዋል። የኢንዱስትሪ፣ የግብርና፣ የቴክኖሎጂ እና ሌሎችም የኢኮኖሚ ዘርፎችን ትክክለኛ ዋጋና ቦታ አመላካች መሆኑን ገልጸዋል። የኢትዮጵያን ኢኮኖሚ አቅጣጫ የሚያቀላጥፍ፣ ትንበያና የዕድገት ግምትን ወቅታዊ የሚያደርግ መሆኑንም ተናግረዋል። ለውጡ ዓለም አቀፍ ደረጃውን የጠበቀ መሆኑን ገልጸው፤ የኢትዮጵያን ኢኮኖሚ በተሻለ ሁኔታ ማወቅ ያስችላል ብለዋል። የኢትዮጵያን የተሟላ ኢኮኖሚ በአግባቡ የለካ፣ በማደግ ላይ ያሉ አዳዲስ የኢኮኖሚ ዘርፎችን ያካተተ መሆኑንም ገልጸዋል። የኢትዮጵያ ኢኮኖሚ ተዓማኒነትን ለዓለም አቀፍ ኢንቨስትመንት የሚያስተዋውቅ፣ ተዓማኒና ለኢትዮጵያ ብሔራዊ ባንክ ሥራ ትልቅ ትርጉም ያለው ነው ብለዋል።   የብሔራዊ ስትራቴጂ ሚኒስትር ዴኤታ አባስ መሐመድ በበኩላቸው፤ የተሻሻለው ጠቅላላ የሀገር ውስጥ ምርት ስሌት የኢኮኖሚ መጠን፣ መዋቅርና የዘርፎችን ዕድገት በአግባቡ መረዳት የሚያስችል ነው ብለዋል። የተሻሻለው ስሌት ለማክሮ ኢኮኖሚና ለልማት ዕቅድ ዝግጅት፣ ለኢኮኖሚ ፖሊሲ አወጣጥ፣ ለኢንቨስትመንት መስፋፋትና ለልማት ክትትል የሚያግዝ የተሻለ የመረጃ መሰረት ይፈጥራል ብለዋል።   በዓለም አቀፍ የገንዘብ ድርጅት የኢትዮጵያ ተወካይ ኪዩንግሱክ ሊ በበኩላቸው፤ የጠቅላላ ሀገራዊ ምርት ስሌትን ማሻሻል የኢኮኖሚውን እውነተኛ ሁኔታ በተሻለ ለመረዳትና የስታቲስቲክስ ጥራትን ለማሳደግ ወሳኝ እርምጃ መሆኑን ገልጸዋል። ኢኮኖሚ እያደገና እየተለወጠ ሲሄድ አዳዲስ የኢኮኖሚ እንቅስቃሴዎችን፣ የምርትና የፍጆታ ለውጦችን እና የተሻሻሉ መረጃዎችን ለማካተት የኢኮኖሚ ስሌቱ ጊዜውን ጠብቆ መዘመን አለበት ብለዋል።   በአዲስ አበባ ዩኒቨርሲቲ ተባባሪ ፕሮፌሰር ታደለ ፈረደ (ዶ/ር)፤ በአዲስ መረጃ፣ በተሻሻለ የአሰራር ዘዴና በአዲስ መነሻ ዓመት የተዘጋጀው ስሌቱ መዋቅራዊ የኢኮኖሚ ስብጥርን በተሻለ ጥራት መረዳት ያስችላል ብለዋል። የኢኮኖሚ ዘርፎች ለመዋቅራዊ ሽግግር ያላቸውን ሚና በተሻለ መረጃ ለመለካት እንደሚያስችል ገልጸው፤ ለዩኒቨርሲቲዎች የምርምርና የማስተማር ሥራዎች ጠቃሚ መረጃ ይሆናል ብለዋል።  

ዲላ፣ ጥቅምት 25/2019 (ኢዜአ)፡-በደቡብ ኢትዮጵያ ክልል የገጠር መንገድ ተደራሽነትን በማሳደግ የህብረተሰቡን የልማት ጥያቄ ለመመለስ የሚያስችሉ ተግባራት እየተከናወኑ መሆኑን የክልሉ ትራንስፖርትና መንገድ ልማት አስተዳደር ቢሮ ገለጸ። ቢሮው የ2019 በጀት ዓመት የቀጣይ100 ቀናት ዕቅድ ላይ ከባለድርሻ አካላት ጋር በዲላ ከተማ መክሯል።   በምክትል ርዕሰ መስተዳድር ማዕረግ የክልሉ ትራንስፖርትና መንገድ ልማት አስተዳደር ቢሮ ሃላፊ አቶ ንጋቱ ዳንሳ በወቅቱ እንዳሉት፣ በክልሉ የገጠር መንገድ ተደራሽነትን በማሳደግ የህብረተሰቡን የልማት ጥያቄ ለመመለስ እየተሰራ ነው። በበጀት ዓመቱ በተለያዩ የክልሉ አካባቢዎች ከ1ሺህ 700 ኪሎ ሜትር በላይ የጠጠር መንገድ ግንባታ እየተፋጠነ መሆኑን አንስተው፣ ከዚህ ውስጥ 1ሺህ 100 ኪሎ ሜትሩ በመንግስት በጀት የሚከናወን መሆኑን ገልጸዋል። ቀሪው 600 ኪሎ ሜትር መንገድ በህብረተሰቡ ተሳትፎ የሚገነባ መሆኑንም አመልክተዋል። በክልሉ ዛሬም በርካታ የህብረተሰብ ክፍሎች የትራንስፖርት አገልግሎት ለማግኘት በአማካይ ከአንድ ሰዓት በላይ በእግር እንደሚጓዙ ያስታወሱት አቶ ንጋቱ፣ የመንገድ ልማትን በማስፋፋት ህብረተሰቡ በትራንስፖርት ሲደርስበት የነበረን እንግልት ለማስቀረት የተጀመረው ሥራ ይጠናከራል ብለዋል።   በተለይ ከብልሹ አሰራርና ከሌብነት በመራቅ ፕሮጀክቶችን በጥራትና በፍጥነት አጠናቆ ለአገልግሎት ለማብቃት ይሰራል ብለዋል። ህብረተሰቡም ለመንገድ ግንባታ በአይነት፣ በገንዘብና መሰረተ ልማቶችን ከጉዳት በመጠበቅ እያደረገ ያለውን እገዛ እንዲያጠናክር ጥሪ አቅርበዋል። ወደከተማ የተካለሉ የገጠር አካባቢዎችን በመንገድ መሰረተ ልማት በማስተሳሰር ረገድ ከቢሮው ጋር በቅንጅት እየሰሩ መሆናቸውን ያነሱት ደግሞ የዲላ ከተማ አስተዳደር ከንቲባ ብዙአየሁ ታደሰ ናቸው።   በከተማው እየተገነባ የሚገኝውን የደረቅ ጭነት ተሽከርካሪ መናኸሪያ በቀጣይ አንድ ወር ጊዜ ውስጥ አጠናቆ ለአገልግሎት ለማብቃትም የጋራ ጥረት እየተደረገ መሆኑን አመልክተዋል። በመድረኩ በየደረጃው የሚገኙ የዘርፉ አመራሮችና ባለድርሻ አካላት ተሳትፈዋል።      

አዲስ አበባ፤ ጥቅምት 25 /2019 (ኢዜአ)፦የሌማት ትሩፋት መርሃ ግብር አርሶና አርብቶ አደሩ በአነስተኛ የመሬት ይዞታ ላይ ብዝኅ የግብርና ምርቶችን በማምረት አዲስ የምግብና ሥርዓተ-ምግብ ደኅንነት ባህል እየገነባ መሆኑን የግብርና ሚኒስቴር ገለጸ። ትልቅ ሀገር፤ ትልቅ ሕዝብ፤ ታላቅ ርዕይ የኢትዮጵያ የብዝኅ ኢኮኖሚ ልማት አቅጣጫ የግብርና፣ ኢንዱስትሪ፣ ማዕድን፣ ቱሪዝምና የዲጂታል ዘርፍ የምርታማነት አቅምን በማጎልበት የተሰናሰለ የዕድገት አቅም ፈጥሯል። በግብርናው ዘርፍ ተግባራዊ የተደረጉ የልማት ተነሳሽነቶችም የእርሻ ሜካናይዜሽንና የቴክኖሎጂ አጠቃቀምን በማጎልበት የምግብ ሉዓላዊነትን እያረጋገጡ ይገኛል። የበጋ መስኖ ስንዴ፣ የሌማት ትሩፋት፣ የአረንጓዴ ዐሻራ እና የተለያዩ ወቅቶች የግብርና ልማት መርሃ ግብሮች የአርሶና አርብቶ አደሩን ሁለንተናዊ ተጠቃሚነት አሻሽለዋል። በጠቅላይ ሚኒስትር ዐቢይ አሕመድ (ዶ/ር) አነሳሽነት ጥቅምት 23 ቀን 2015 ዓ.ም በዓርባ ምንጭ ከተማ የተበሰረው የሌማት ትሩፋት መርሃ ግብር የግብርና ምርታማነትን በከፍተኛ ደረጃ እያሻሻለ ይገኛል። መርሃ ግብሩም የእንስሳትና የእንስሳት ተዋጽኦ፣ የዓሳና የንብ ማነብ፣ የአትክልትና ፍራፍሬ ምርታማነት አቅምን በማሳደግ በሀገሪቱ የምግብና ሥነ-ምግብ ደኅንነት ላይ ተጫባጭ ውጤት ማስገኘቱን ቀጥሏል።   ይህም የቤተሰብ ብልፅግናን በማረጋገጥና በምግብና ሥነ-ምግብ ደኅንነት ዘርፍ የአርሶና አርብቶ አደሩን ተጠቃሚነት በማሻሻል እመርታዊ የምርታማነት ምኅዳር ፈጥሯል። በግብርና ሚኒስቴር የምግብና ሥርዓተ-ምግብ ጽሕፈት ቤት የምግብና ሥርዓተ-ምግብ አቅም ግንባታ ዴስክ ኃላፊ ያሬድ አዲሱ ለኢዜአ እንዳሉት፤ ኢትዮጵያ ለብዝኅ የግብርና ልማት አመቺ ሀገር ናት። የኢትዮጵያ የተለያየ የአየር ጠባይና የሥነ-ምኅዳር ከባቢም የአትክልትና ፍራፍሬ፣ የአዝዕርትና ጥራጥሬ፣ የእንስሳትና የእንስሳት ተዋጽኦ ምርታማነትን በማላቅ የምግብ ዋስትናን ማረጋገጥ የሚያስችል ነው ብለዋል።   የመደመር መንግሥት የብዝኅ ኢኮኖሚ ልማት አቅጣጫም ከዚህ ቀደም የነበረውን በኃይል ሰጪ የሰብል ልማት ላይ ብቻ ያተኮረ የግብርና ምርታማነት ባህል መቀየር እንዳስቻለ አስረድተዋል። ይህም የአርሶና አርብቶ አደሩን የግብርና ምርታማነት ብዝኅ ስብጥር በማላቅ ከራስ የምግብ ፍጆታ ባሻገር ለገበያ የሚያቀርቡበትን የተጠቃሚነት አቅም እየገነባ መሆኑን ገልጸዋል። የበጋ መስኖ ስንዴ፣ የሌማት ትሩፋት፣ የአረንጓዴ ዐሻራና የተለያዩ ወቅቶች የግብርና ልማት መርሃ ግብሮች የምግብ ሉዓላዊነትን ማረጋገጥ የሚያስችል የዕድገት ከባቢ መፍጠራቸውን አንስተዋል።   የሌማት ትሩፋት መርሃ ግብርም የአርሶና አርብቶ አደሩን በንጥረ ነገር የበለጸገ የምግብና ሥነ-ምግብ ምርቶችን በማስገኘት ከራስ አልፎ ለገበያ ጭምር የሚያቀርቡበት አመርቂ ውጤት እያስገኘ ነው ብለዋል። የግብርና ብዝኅ ልማት ምኅዳሩም ምርታማነትን በማላቅ በዜጎች የኑሮ ሥርዓት ላይ ቀጥተኛ ፋይዳ ያለው ለውጥ በማምጣት ጤናማ ትውልድን ማፍራት እያስቻለ መሆኑን ጠቅሰዋል።   በአሁኑ ወቅትም አርሶና አርብቶ አደሩ ማህበረሰብ የራሱን የምግብ ፍጆታ በማሟላት የገበያ የምርት አቅርቦት ፍላጎት ላይ ጭምር በስፋት እየተሰራ ነው። በግብርና ሚኒስቴር የእንስሳትና ዓሳ ሀብት ልማት መሪ ሥራ አስፈጻሚ አዚዝ አያሌው በበኩላቸው፤ የሌማት ትሩፋት መርሃ ግብር የግብርና ምርታማነትን በማሻሻል አዲስ ባህል ፈጥሯል ብለዋል።   በጠቅላይ ሚኒስትር ዐቢይ አሕመድ (ዶ/ር) አነሳሽነት በዓርባ ምንጭ ከተማ የተበሰረው የሌማት ትሩፋት መርሃ ግብር በአትክልትና ፍራፍሬ፣ የእንስሳትና እንስሳት ተዋጽኦ ከፍተኛ ውጤት ማምጣቱን ገልጸዋል። ይህም አርሶና አርብቶ አደሩ በአነስተኛ ማሳ ላይ የግብርና ምርታማነቱን በማላቅ በሥርዓተ-ምግብ ላይ እመርታዊ ለውጥ እንዲያስገኝ ታስቦ እየተሰራ መሆኑን አንስተዋል።    

አዲስ አበባ ፤ ጥቅምት 25/2019 (ኢዜአ) ፦ አፍሪካ በጋራ ስትቆም ትጠነክራለች፤ በጋራ ስትሠራ ታድጋለች፤ በጋራ ስትወስን የወደፊት ዕጣ ፈንታዋን ትቀርፃለች። አዲስ አበባ የአፍሪካ የጋራ ቤት ብትሆንም እስከ ቅርብ ጊዜ ድረስ አህጉራዊ መድረኮች በብዛት የሚስተናገዱባት አልነበረችም። ለዚህ ምክንያቱ ደግሞ የከተማዋ መሰረተ ልማቶች እጥረትና አለመዘመን ብሎም ምቹ አገልግሎት መስጫ ተቋማት ያለመፈጠራቸው ነው። ይህን ጉድለት ለመሙላትና በሁሉም መስክ አዲስ አበባን የስበት ማዕከል ለማድረግ በጥቂት ዓመታት የተሰራው ስራ ዛሬ በርካታ ውጤቶችን እያስመለከተን ይገኛል። በአጭር ጊዜ በከተማዋ የተገነቡ ደረጃቸውን የጠበቁ መሰረተ ልማቶችና የዘመኑ አገልግሎት መስጫዎች ከተማዋን ተመራጭ የኮንፍረንስ ቱሪዝም ማዕከል አድርጓታል። አዲስ አበባ አሁን በመቶዎች ብቻ ሳይሆን በአስር ሺዎች ተሳታፊ የሚገኙባቸውን አህጉራዊና ዓለም አቀፋዊ ስብሰባዎች ለማስተናገድ የሚያስችል አስተማማኝ አቅም ፈጥራለች፤ ስብሰባዎቹንም እያስተናገደች ትገኛለች። በዚህ ሳምንትም አንድ ወሳኝ አህጉራዊ ጉባኤ በከተማዋ ይስተናገዳል። ይሄውም የአፍሪካ የፖለቲካ ፓርቲዎች ጉባኤ “ለዕድገት መምራት፡ የፖለቲካ ፓርቲዎች የአፍሪካ ኢኮኖሚያዊ የወደፊት እጣ ፈንታ ቀያሾች ሆነው! (Governing for Growth: Political Parties as Architects of Africa’s Economic Future)" በሚል መሪ ቃል በመዲናችን ከጥቅምት 26 እስከ 28/2019 የአፍሪካውያን የድል ምሳሌ በሆነው በታሪካዊው የአድዋ ድል መታሰቢያ ሙዚየም ይካሄዳል። ይህም የሚያሳየው አዲስ አበባ የተለያዩ ሀሳቦች፣ አመለካከቶችና ልምዶች በአንድነት የሚገናኙባት፤ ለአፍሪካና ለዓለም የጋራ መፍትሔዎች የሚፈለጉባት የሰላምና የውይይት ከተማ መሆኗን ነው። አዲስ አበባም የአፍሪካ አንድነትና የጋራ ዕጣ ፈንታ መለያ ከተማ እንደመሆኗ፣ የአፍሪካ ሕዝቦች በሰላም፣ በትብብርና በጋራ ብልፅግና የሚገናኙባት የዲፕሎማሲና የውይይት ማዕከልነቷን እንደምታጠናክር ከከንቲባ ጽሕፈት ቤት የተገኘው መረጃ ያመለክታል። አዲስ አበባ የአፍሪካ የጋራ ራዕይ መገናኛ፤ የአፍሪካ ትብብር የጋራ ጥንካሬ፤ የአፍሪካ ብልፅግና የጋራ ግብ መሆኗ ተጠናክሮ ይቀጥላል።

ጎንደር፣ ጥቅምት 25/2019 (ኢዜአ)፡- በአሰሪና ሠራተኛ መካከል ጠንካራና ጤናማ ግንኙነት መፍጠር ለተቋማት ምርታማነት ወሳኝ መሆኑን የአማራ ክልል ስራና ክህሎት ቢሮ አመለከተ። በጎንደር ከተማ በአሰሪና ሠራተኛ ደህንነት ሕግ አፈጻጸም ላይ ከባለድርሻ አካላት ጋር የውይይት መድረክ ተካሄዷል።   የቢሮው ምክትል ኃላፊ አቶ አማረ ዓለሙ በመድረኩ እንዳሉት፣ በአሰሪና ሠራተኛ መካከል ጠንካራና ጤናማ ግንኙነት መፍጠር ለተቋማት ምርታማነት ማደግ ወሳኝ ነው። ለዚህም በክልሉ በሚገኙ ትልልቅ ከተሞች ከሠራተኞች መብት፣ ደህንነትና ከኢንዱስትሪ የሥራ ሥነ ምህዳር ጋር የተያያዙ ጉዳዮችን በተመለከተ ሰፊ ውይይት መካሄዱን አስታውሰዋል።   የአሰሪዎችንና የሠራተኞችን መብትና ግዴታዎች የማስገንዘብ፣ በተቋማት ውስጥ የደህንነት ባለሙያዎችን የማሠልጠንና የሕግ ማዕቀፍ የማዘጋጀት ሥራዎች እየተከናወኑ መሆናቸውንም ተናግረዋል። የጎንደር ከተማ ሥራና ክህሎት መምሪያ ኃላፊ አቶ አበበ ላቀው በበኩላቸው፣ የሰው ኃይል ምርታማነትን ለማሳደግ የሠራተኞችን ደህንነትና ጤንነት መጠበቅ ተገቢ መሆኑን ገልጸዋል።   በዚሁ መሠረት በመጀመሪያው ሩብ ዓመት ከ153 በላይ በሚሆኑ ድርጅቶች ላይ የሥራ ቦታ ቁጥጥርና ክትትል የተደረገ ሲሆን፣ ጉድለት የታየባቸው ድርጅቶች በአጭር ጊዜ ውስጥ እንዲያስተካክሉ ግብረ መልስ ተሰጥቷል። የጎንደር ብቅል ፋብሪካ የሰው ሀብት ልማትና አስተዳደር ሥራ አስኪያጅ አቶ ዘላለም ታምሩ እንዳሉት፣ ፋብሪካው ከሠራተኛ ማህበሩ ጋር በመቀናጀት የሠራተኞችን መብት፣ ደህንነትና ጥቅማ ጥቅም እያስከበረ ይገኛል።   በተለይም የሙያ ደህንነት መጠበቂያዎችን በማሟላትና በሥራ ቦታዎች ሊነሱ የሚችሉ የባህሪና ሌሎች ጥያቄዎችን ከሠራተኛ ማህበሩ ጋር በውይይት በመፍታት የኢንዱስትሪ ሰላም የማስፈን ሥራ እየተሠራ ነው ብለዋል።   በዳሸን ቢራ ፋብሪካ አክሲዮን ማህበር የጎንደር ቅርንጫፍ የሠራተኞች ማህበር ሊቀመንበር አቶ ዮናስ አዲሱ፣ የሠራተኞችን መብት፣ ደህንነትና ሌሎች ችግሮችን በመነጋገር የመፍታት ሥራ እየተሠራ መሆኑን ተናግረዋል። በተለይም በፋብሪካ ደረጃ ከሚሰጡ ጥቅማ ጥቅሞች በተጨማሪ የሠራተኞችን ደህንነት፣ ጤናና የሥራ ላይ ፕሮቶኮል ሁኔታዎች ለማሻሻል በማህበራቸው ሰፊ ሥራዎች እየተሠሩ መሆኑን አስረድተዋል።  

ቦንጋ፤ ጥቅምት 25 /2019 (ኢዜአ)፦በደቡብ ምዕራብ ኢትዮጵያ ሕዝቦች ክልል የግብርና ምርትና ምርታማነትን በማሳደግ የምግብ ሉዓላዊነትን ለማረጋገጥ የሚከናወኑ ተግባራት ተጠናክረው እንደሚቀጥሉ ተገለጸ። ክልል አቀፍ የግብርና ልማት የንቅናቄ መድረክ "ምርታማነትን ማረጋገጥ ለክልላችን ማንሰራራትና ከፍታ"! በሚል መሪ ሀሳብ በቦንጋ ከተማ እየተካሄደ ነው።   በመድረኩ የተገኙት ደቡብ ምዕራብ ኢትዮጵያ ሕዝቦች ክልል የመንግስት ዋና ተጠሪ አቶ ተክሌ በዛብህ እንዳሉት፣ በክልሉ ግብርና ከኢኮኖሚ የልማት ሴክተሮች መካከል ግንባር ቀደምና ሰፊ ትኩረት የተሰጠው ነው። በክልሉ የሚከናወኑ የግብርና ልማት ሥራዎችን በንቅናቄ በመምራት ምርትና ምርታማነትን በማሳደግ የምግብ ሉዓላዊነትን ለማረጋገጥ የሚከናወኑ ተግባራት ተጠናክረው እንደሚቀጥሉ ተናግረዋል። በክልሉ አርሶ አደሩ ኩታ ገጠም እርሻ፣ የግብርና ፓኬጅና የሌማት ትሩፋትን በመጠቀም ምርትና ምርታማነቱን እያሳደገ መምጣቱንም ተናግረዋል። በቀጣይም በገጠርና በከተማ የሥራ ዕድል ፈጠራን ለማረጋገጥ እና የገጠር ትራንስፎርሜሽንን ለማፋጠን የክልሉን ፀጋ ለይቶ ወደ ሀብትነት መቀየር ያስፈልጋል ብለዋል። ለዚህም አመራሮችና የዘርፉ ባለሙያዎች የአርብቶና አርሶ አደሩን ግንዛቤ ከመለወጥ ጀምሮ የተሻሻሉ አሰራሮችን መከተልና የቴክኖሎጂ አጠቃቀምን ማሳደግ ላይ ሊያተኩሩ እንደሚገባ አቶ ተክሌ አሳስበዋል።   የክልሉ ምክትል ርዕሰ መስተዳድርና የግብርና ቢሮ ሀላፊ አቶ ማስረሻ በላቸው በበኩላቸው እንዳሉት፣ በክልሉ የግብርና ምርታማነትን በማሳደግ የምግብ ዋስትናን ለማረጋገጥና ገበያን ለማረጋጋት የተደረጉ ጥረቶች ውጤት እያስገኙ ነው። በክልሉ አርሶ አደሩ ከተለመደው የመኸርና የበልግ አዝመራ በተጨማሪ የበጋ መስኖ ስንዴን በማልማት ተጠቃሚነቱ እያደገ መምጣቱን ተናግረዋል። በክልሉ 93 የመስኖ አውታሮች እንዳሉ ያመለከቱት አቶ ማስረሻ፣ እነዚህና ተጨማሪ የውሃ አማራጮችን በመጠቀም በመስኖ በዓመት 18 ሺህ ሄክታር መሬት የማልማት አቅም ላይ ተደርሷል ብለዋል። በዚህም ከአራት ዓመት በፊት በክልሉ በ433 ሄክታር መሬት የተጀመረው የበጋ መስኖ ስንዴ ልማት በ2018 የምርት ዘመን ወደ 5 ሺህ 778 ሄክታር ማደጉንና 190 ሺህ ኩንታል ምርት መገኘቱን ጠቁመዋል። ዘንድሮም 10 ሺህ ሄክታር መሬት በማልማት የሚገኘውን ምርት ወደ 350 ሺህ ኩንታል ለማሳደግ መታቀዱን ጠቅሰዋል፡ በመደበኛ በልግ አዝመራም ልዩ ትኩረት በመስጠት የማሳ ሽፋንን አምና ከነበረበት በአሥር በመቶ በማሳደግ ከ18 ነጥብ 1 ሚሊዮን ኩንታል በላይ ምርት ለመሰብሰብ ግብ መያዙን አቶ ማስረሻ ተናግረዋል። በሌማት ትሩፋት መርሀግብር የተመዘገበውን ምርታማነት ለማላቅ የተደራጁ መንደሮችን ሞዴል የማድረግ ሥራ እንደሚሰራ ገልጸው፤ የቡና፣ ሻይና ቅመማ ቅመም ልማትም ለማስፋት በልዩ ትኩረት ይሰራል ብለዋል። እነዚህን ግብች ለማሳካት በቴክኖሎጂ የታገዙና የተሻሻሉ አሠራሮችን መከተል ይገባል ያሉት አቶ ማስረሻ፣ ምርጥ ዘርና ሌሎች ግበዓቶችን የማቅረብና የአርሶ አደር ማሰልጠኛ ማዕከላትን ሞዴል የማድረግ ሥራም ትኩረት እንደተሰጠው አስታውቀዋል። በመድረኩ የክልል፣ የዞንና የወረዳ አመራሮች እና ባለድርሻ አካላት ተገኝተዋል።

አዲስ አበባ፤ ጥቅምት 25 /2019 (ኢዜአ)፦ኢኮኖሚያችን አይበገሬ ሆኖ ሰው ሠራሽና ተፈጥሯዊ ፈተናዎችን እንዲቋቋም፣ ቀድሞ መዘጋጀትና አማራጮችን ማስፋት የግድ ነው ሲሉ ጠቅላይ ሚኒስትር ዐቢይ አሕመድ (ዶ/ር) ገለጹ፡፡   ጠቅላይ ሚኒስትር ዐቢይ አሕመድ (ዶ/ር) በማኅበራዊ ትስስር ገጻቸው ባስተላለፉት መልዕክት፤ በባሌ ዞን የክረምት እርሻ አፈጻጸምን መመልከታቸውን አስታውቀዋል። በዘንድሮው ክረምት ከፍተኛ የዝናብ እጥረት ሥጋት የነበረ ቢሆንም በመንግሥትና በሕዝብ የቅድመ ዝግጅት ሥራ መልካም የሚባል አፈጻጸም ተመዝግቧል ብለዋል።   ኢኮኖሚያችን አይበገሬ ሆኖ ሰው ሠራሽና ተፈጥሯዊ ፈተናዎችን እንዲቋቋም፣ ቀድሞ መዘጋጀትና አማራጮችን ማስፋት የግድ ነው ሲሉም ገልጸዋል።

አዲስ አበባ፤ ጥቅምት 25 /2019 (ኢዜአ)፦የሀገር ውስጥ ምርትን አለካክ ወቅታዊ የማድረግ ስራ ዘመኑን የዋጀ፣ የኢትዮጵያን ኢኮኖሚ ትክክለኛ መጠንና እድገት በአግባቡ የለካ እንዲሁም ተዓማኒነት ያለው ስሌት መሆኑን የኢትዮጵያ ብሔራዊ ባንክ ገዥ ኢዮብ ተካልኝ (ዶ/ር) ገለጹ። የብሔራዊ ስትራቴጂ ሚኒስቴር በዛሬው ዕለት የተሻሻለውን ጠቅላላ የሀገር ውስጥ ምርት ግመታን ወቅታዊ የማድረግ ስራ ይፋ አድርጓል። በዚህም የተሻሻለው የጠቅላላ ሀገር ውስጥ ምርት መረጃ ቋሚ ዓመት ከ2008 ወደ 2017 ዓ.ም እንዲቀየር ተደርጓል። በመርሀ ግብሩ ላይ የብሔራዊ ስትራቴጂ ሚኒስትር በረከት ፍስሀጽዮን ፣ የገንዘብ ሚኒስትር ፍጹም አሰፋ (ዶ/ር)፣ የትምህርት ሚኒስትር ፕሮፌሰር ብርሃኑ ነጋ፣ የኢትዮጵያ ብሔራዊ ባንክ ገዥ ኢዮብ ተካልኝ (ዶ/ር) እና ሌሎችም ከፍተኛ የሥራ ሀላፊዎች ተገኝተዋል።   የኢትዮጵያ ብሔራዊ ባንክ ገዥ ኢዮብ ተካልኝ (ዶ/ር) በዚህ ወቅት እንዳሉት፤ ጠቅላላ የሀገር ውስጥ ምርት የሁሉም ነገር መለኪያ ነው። የጠቅላላ የሀገር ውስጥ ምርት ስሌት የተሳሳተ ወይም ጊዜውን ያልዋጀ ከሆነ ትክክለኛ ዕቅድና መረጃ ለማግኘት ያስቸግራል ብለዋል። በኢትዮጵያ የተደረገው የቋሚ ዓመት ለውጥ መሠረታዊ መረጃን መሠረት ያደረገና ብዙ አዳጊ የኢኮኖሚ ዘርፎችን ያካተተ መሆኑን ገልጸዋል። ሀገራዊ የፋይናንስ ጥልቀትን ለመለካት ወሳኝ መሆኑን ገልጸው፤ ቁጠባን ወደ ምርታማ ዘርፍ ለማሸጋገር ያስችላል ብለዋል። የኢንዱስትሪ፣ የግብርና፣ የቴክኖሎጂ እና ሌሎችም የኢኮኖሚ ዘርፎችን ትክክለኛ ዋጋና ቦታ አመላካች መሆኑን ገልጸዋል።   የኢትዮጵያን ኢኮኖሚ አቅጣጫ የሚያቀላጥፍ፣ ትንበያና የዕድገት ግምትን ወቅታዊ የሚያደርግ መሆኑን ተናግረዋል። ለውጡ ዓለም አቀፍ ደረጃውን የጠበቀ መሆኑን ገልጸው፤ የኢትዮጵያን ኢኮኖሚ በተሻለ ሁኔታ ማወቅ ያስችላል ብለዋል። የኢትዮጵያን የተሟላ ኢኮኖሚ በአግባቡ የለካ፣ በማደግ ላይ ያሉ አዳዲስ የኢኮኖሚ ዘርፎችን ያካተተ መሆኑንም ገልጸዋል። የኢትዮጵያ ኢኮኖሚ ተዓማኒነትን ለዓለም አቀፍ ኢንቨስትመንት የሚያስተዋውቅ፣ ተዓማኒና ለኢትዮጵያ ብሔራዊ ባንክ ሥራ ትልቅ ትርጉም ያለው ነው ብለዋል፡፡

ጅግጅጋ፤ ጥቅምት 25 /2019 (ኢዜአ)፦ በሶማሌ ክልል የሚገኙ የቱሪስት መዳረሻዎችን በመገንባት፣ በማስተዋወቅና መሠረተ ልማትን በማሟላት ከዘርፉ የሚገኘውን ገቢ ለማሳደግ ትኩረት መሰጠቱን የክልሉ ባህልና ቱሪዝም ቢሮ አስታወቀ። የክልሉ ባህልና ቱሪዝም ቢሮ ምክትል ሃላፊ አቶ መሀሙድ በይነህ ለኢዜአ እንደገለጹት፣ በክልሉ የቱሪዝም መዳረሻዎችን በማልማት ኢኮኖሚያዊ ተጠቃሚነትን ለማሳደግ ትኩረት ተሰጥቷል።   ለዚህም የቱሪዝም መዳረሻ ሥፍራዎችን በመገንባት፣ በማስተዋወቅና መሰረተ ልማትን በማሟላት የዘርፉን ገቢና ተጠቃሚነት ለማሳደግ ትኩረት ተሰጥቶ እየተሰራ መሆኑን አስታውቀዋል። ክልሉን የቱሪዝም ስበት ማዕከል ለማድረግ የተሠሩ ሥራዎችን ያነሱት አቶ መሀመድ፣ በጠቅላይ ሚኒስትር ዐቢይ አሕመድ (ዶ/ር) ኢኒሼቲቭ የተሰራውና የገበታ ለትውልድ አካል የሆነው የሸበሌ ሪዞርትን በማሳያነት ጠቅሰዋል። ሪዞርቱ ከጂግጂጋ ከተማ በቅርብ ርቀት ላይ የሚገኝ በመሆኑ ለመዝናኛነት በብዙዎች ተመራጭ መሆኑን ገልጸው፣ ቀጣናዊ የቱሪዝም ልማትን በማሳደግ በክልሉ የጎብኚዎች ቁጥር እንዲጨምር አድርጓል ብለዋል።   የክልሉ የቱሪዝም ልማት ሥራዎች ከዘርፉ የሚገኘውን ጠቀሜታ ለማሳደግ ከፍተኛ አስተዋጽኦ እያበረከቱ መሆኑን ጠቅሰው፣ በጂግጂጋ ከተማ የተከናወነው የኮሪደር ልማት ሥራም ለቱሪስት ፍሰት መጨመር አስተዋጽኦ አድርጓል ብለዋል። በክልሉ ያሉ የቱሪዝም ሀብቶችን ከባለድርሻ አካላት ጋር በመቀናጀት የማስተዋወቅ ሥራዎች እየተከናወኑ መሆኑን ገልጸዋል። ዘርፉ ለሥራ ዕድል ያለውን ጠቀሜታ ከግምት ውስጥ በማስገባት ኢኮኖሚያዊ ፋይዳውን ይበልጥ ለማሳደግ ትኩረት መሰጠቱን አመልክተዋል።   እንደ አቶ መሀሙድ ገለጻ፣ በክልሉ የኤረር ጎታ እና የአራቢ ፍልውሃ የቱሪስት መስህብ ሥፍራዎችን መሠረተ ልማት የማሟላትና የማስተዋወቅ ተግባራት በመከናወን ላይ ናቸው። በክልሉ ታሪካዊ ቅርሶች ከመጠበቅና ከመንከባከብ ባለፈ በአግባቡ እንዲተዋወቁ የማድረግ ሥራ ተጠናክሮ እንደሚቀጥልም አስታውቀዋል።

ነቀምቴ፤ ጥቅምት 25 /2019 (ኢዜአ)፦ የራስን አቅም የመጠቀምና የማሳደግ ዕቅድን በቁርጠኝነት መተግበር የሕዝቡን ሁለንተናዊ ዕድገትና ተጠቃሚነት ወደ ላቀ ደረጃ ለማሸጋገር እንደሚያግዝ የምዕራብ ኦሮሚያ ዞን አስተዳዳሪ አቶ መስፍን መላኩ ገለጹ። በምዕራብ ኦሮሚያ ዞን የሚገኙ የዞን፣ የከተማ እና የወረዳ የመንግሥትና የፓርቲ አመራሮች የራስን አቅም የመጠቀም ስትራቴጂካዊ ዕቅድን በውጤታማነት ለመተግበር የሚያስችላቸው ሥልጠና እየተሰጠ ነው።   በምክትል ፕሬዚዳንት ማዕረግ የምዕራብ ኦሮሚያ ዞን አስተዳዳሪ አቶ መስፍን መላኩ በዚሁ ወቅት፤ ባለፉት ዓመታት በፖለቲካ፣ በኢኮኖሚ እና በማኅበራዊ ዘርፎች የተመዘገቡ በርካታ ድሎች ሕዝቡን ወደ ከፍተኛ የልማት ደረጃ የሚያሸጋግሩ ጠንካራ መሠረቶችን የጣሉ መሆናቸውን ገልጸዋል። በተለይም ኢኮኖሚውን በብቃት መምራት የሚችል አቅም ያለው አመራር በማፍራት፤ የተለያየ መሠረት ያለውና የተለያዩ ጫናዎችን መቋቋም የሚችል ጠንካራ ኢኮኖሚ ለመገንባት የተደረገው ጥረት ተጨባጭ ውጤት እያሳየ መሆኑን ገልጸዋል። ከተያዙት የልማት ግቦች አንጻር አሁንም መድረስ ከሚገባው ደረጃ ላይ ሙሉ በሙሉ እንዳልተደረሰ አመልክተዋል። ችግሮችን ከሥር መሠረታቸው ለመፍታት በሚቀጥሉት አምስት ዓመታት የራስን አቅም ለማሳደግ በወጣው ዕቅድ በመመራት ሁለንተናዊ ሽግግርን ለማረጋገጥ እንደሚሠራም አመልክተዋል።   የራስን አቅም የማሳደግ ዕቅድ ምርታማነትን ከማረጋገጥ ባለፈ በሁሉም ዘርፎች ዘላቂ ዕድገት ለማምጣት የሚያስችል መሆኑንም አቶ መስፍን ገልጸዋል። በዞኑ እየተሰጠ ያለው ሥልጠና የዕቅዱን ዓላማ፣ ስትራቴጂካዊ አቅጣጫዎችና መሠረታዊ መርሆዎች በተመለከተ የአመራሮችን ግንዛቤ ለማጠናከርና ዕቅዱን በሁሉም የአስተዳደር እርከኖች ወደ ተግባር ለመቀየር ዝግጁነት ለመፍጠር ያለመ ነውም ብለዋል። ዕቅዱን ለማሳካት ያሉ የልማት ዕድሎችን በአግባቡ መጠቀም፣ የሰው ኃይልን በእውቀትና በሙያ ማብቃት፣ ምርታማነትን ማሳደግ፣ ኢንዱስትሪያላይዜሽንን ማስፋፋትና ተጠያቂነት ያለው የአሠራር ሥርዓት መዘርጋት ትኩረት እንደሚሰጣቸው ጠቁመዋል። ከሥልጠናው በኋላ ተሳታፊዎች ያገኙትን ግንዛቤ በዕለት ተዕለት ሥራቸው በመተግበር ዕቅዱ በማኅበረሰብና በቤተሰብ ደረጃ ተጨባጭ ውጤት እንዲያመጣ የድርሻቸውን እንዲወጡ ይጠበቃልም ብለዋል።

ቦንጋ ፤ ጥቅምት 25 /2019 (ኢዜአ)፦ በደቡብ ምዕራብ ኢትዮጵያ ህዝቦች ክልል በካፋ ዞን የደረሱ ሰብሎች ወቅቱን ባልጠበቀ ዝናብ እንዳይበላሹ ከብክነት በፀዳ መልኩ የመሰብሰብ ስራ እየተከናወነ መሆኑን የዞኑ ግብርና፣ አካባቢ ጥበቃና ሕብረት ስራ መምሪያ አስታወቀ። በዞኑ የሺሾእንዴ ወረዳ አርሶ አደሮች የደረሰ የጤፍ ሰብላቸውን በተደራጀ መልኩ በጥንቃቄ እየሰበሰቡ መሆናቸውን ገልጸዋል። የዞኑ ግብርናና አካባቢ ጥበቃና ህብረት ሥራ መምሪያ ኃላፊ አቶ አትርሴ ሸታቸው፣ ዞኑ ለግብርና ሥራ ምቹና ሰፊ የመልማት አቅም ያለው መሆኑን ገልጸው፣ ይህንን አቅም በተገቢው በማልማት የምግብ ዋስትናን ለማረጋገጥ እየተሰራ ነው ብለዋል። ባለፉት ጊዜያት ዘርፉን የማዘመን፣ የግብዓት አጠቃቀምን የማሳደግና የማይታረስ መሬትን ዜሮ የማድረግ ሥራ በትኩረት እየተከናወነ መሆኑንም ተናግረዋል። በ2018/19 የመኸር ወቅት ስንዴ፣ ገብስ፣ ጤፍ፣ ባቄላ፣ አተርን በመሳሰሉ ዋና ዋና ሰብሎች ከ131 ሺህ ሄክታር በላይ መሬት በዘር መሸፈን መቻሉን ኃላፊው ገልጸዋል። ምርታማነትን በሄክታር ወደ 25 ኩንታል በማሳደግ በአጠቃላይ ከለማው ማሳ 3 ሚሊዮን 361 ሺህ ኩንታል ምርት ለማግኘት ግብ መጣሉን ተናግረዋል። ከጥቅምት አጋማሽ ጀምሮ ቀድመው የሚደርሱ ጤፍና አተርን የመሳሰሉ ሰብሎችን የመሰብሰብ ሥራ ከብክነት በፀዳ መልኩ በጥንቃቄ እየተከናወነ መሆኑንም አመልክተዋል። በዚህም እስካሁን ከ3 ሺህ 232 ሄክታር በላይ ማሳ ላይ ያለ አተርና ጤፍ መሰብሰቡንና ከዚህም 52 ሺህ 972 ኩንታል ምርት ማግኘት መቻሉን ተናግረዋል። በዞኑ የሺሾእንዴ ወረዳ አርሶ አደሮች በበኩላቸው፣ የደረሰ ጤፍና ሌሎች ሰብሎችን በተደራጀና በተቀናጀ መልኩ ከብክነት በፀዳ ሁኔታ በጥንቃቄ እየሰበሰቡ መሆናቸውን ገልጸዋል። በወረዳው የዋረታ ቀበሌ ነዋሪ አርሶ አደር አዱኛ ገብረየሱስ፣ ለ14 ሆነው በማህበር በተመቻቸላቸው ሰባት ሄክታር መሬት ላይ በባለሙያ ምክረ ሀሳብ ታግዘው በመኸር ወቅት በሙሉ ፓኬጅ ጤፍና ቦሎቄ ማልማታቸውን ተናግረዋል። ከዚህ ቀደም በቆሎ አምርተው ጥሩ ጥቅም ማግኘታቸውን ጠቁመው፣ ምርቱ ወቅቱን ባልጠበቀ ዝናብ እንዳይበላሽ በተደራጀ መልኩ በጥንቃቄ እየሰበሰቡ መሆናቸውንም አመልክተዋል። ሌላኛው የወረዳው ነዋሪ አርሶ አደር ዝናቡ አማረ፣ ለሰባት ሆነው በስድስት ሄክታር መሬት ላይ ያለሙትን የጤፍ ምርት በመሰብሰብ ላይ መሆናቸውን ተናግረዋል። ምርቱን ከብክነት በፀዳ መልኩ እየሰበሰቡ መሆናቸውን ጠቅሰው፣ ከማሳ ዝግጅት ጀምሮ ተከታታይነት ያለው የባለሙያ ድጋፍ እየተደረገላቸው መሆኑንም ገልጸዋል። የደረሰውን ምርት ካነሱ በኋላ በቆሎ ለመዝራት የማሳ ዝግጅት መጀመራቸውንም አርሶ አደሮቹ ተናግረዋል፡፡

ደብረ ማርቆስ፤ ጥቅምት 25 /2019 (ኢዜአ)፦ በምስራቅ ጎጃም ዞን የአካባቢን ጸጋ በመጠቀም የሥራ እድል የመፍጠር ሥራ ውጤት እያመጣ መሆኑን የዞኑ ሥራ እና ክህሎት መምሪያ ገለፀ። የመምሪያው ኃላፊ አቶ ፀሐይ ቦጋለ ለኢዜአ እንደገለጹት፣ በምስራቅ ጎጃም ዞን የአካባቢን ጸጋ በመጠቀም የሥራ እድል የመፍጠር ሥራ ውጤት እያመጣ ነው። በዚህም በበጀት ዓመቱ ከ141 ሺህ በላይ ለሚሆኑ ዜጎች የሥራ እድል ለመፍጠር ታቅዶ እየተተገበረ ሲሆን፣ ባለፉት ሦስት ወራት ለ14 ሺህ 476 ወገኖች የሥራ እድል መፍጠር ተችሏል።   በተፈጠረው የሥራ እድል ተጠቃሚ ለሆኑ ዜጎችም ከ23 ነጥብ 5 ሚሊዮን ብር በላይ ብድር እና ከ180 በላይ የመስሪያና መሸጫ ኮንቴይነሮችን ማመቻቸት መቻሉን ተናግረዋል። ሥራ የተፈጠረላቸው ወጣቶች በማኑፋክቸሪንግ፣ በማዕድን፣ በኮንስትራክሽን፣ በግብርና፣ በአገልግሎት እና በመሳሰሉት ዘርፎች መሰማራታቸውን ገልጸዋል። በቀሪ ወራትም እቅዱን ሙሉ በሙሉ ለማሳካት ባለድርሻ አካላትን ያሳተፈ እንቅስቃሴ እየተደረገ መሆኑን ተናግረዋል። በባሶሊበን ወረዳ የጁቤ ከተማ ነዋሪ ወጣት ትዕግስት በለጠ እንደገለጸችው፣ አራት ሆነው በመደራጀት በእንቁላል ጣይ ዶሮ እርባታ ሥራ ተሰማርተው እየሰሩ ነው። በአሁኑ ወቅትም በተመቻቸላቸው የብድርና የመስሪያ ቦታ ከሁለት ወር በኋላ እንቁላል መጣል የሚጀምሩ ከአንድ ሺህ በላይ ዶሮዎችን የመንከባከብ ሥራ እየሰሩ እንደሆነ ተናግራለች።   በዚህ ዓመት አምስት ሆነው በመደራጀት በኮንስትራክሽን ዘርፍ ተሰማርተው እየሰሩ መሆናቸውን የገለጸው ደግሞ በአዋበል ወረዳ የሉማሜ ከተማ ነዋሪው ወጣት ዘላለም ልየው ነው። ሥራውን ከጀመሩ አጭር ጊዜ ቢሆንም ውጤታማ ሆነው ለመዝለቅ በትጋት እየሰሩ መሆናቸውን ገልጿል። በዞኑ ባለፈው በጀት ዓመት ከ115 ሺህ በላይ ለሚሆኑ ዜጎች የሥራ እድል በመፍጠር ተጠቃሚ ማድረግ እንደተቻለም ተመላክቷል።

ሮቤ፤ ጥቅምት 25 /2019 (ኢዜአ)፦ በደቡብ ምስራቅ ኦሮሚያ ዞን ያሉ የልማት ዕድሎችን በአግባቡ በመጠቀም፣ የሰው ኃይልን በዕውቀትና በሙያ በማብቃትና ምርታማነትን በማሳደግ በኢኮኖሚ ራስን ለመቻል የተለያዩ ተግባራት በመከናወን ላይ መሆናቸው ተገለጸ። በደቡብ ምሥራቅ ኦሮሚያ ዞን ለሚገኙ አመራሮች የራስን አቅም የመጠቀም ዕቅድን ውጤታማ ለማድረግ የተዘጋጀ ስልጠና በባሌ ሮቤ እየተሰጠ ነው። በኢኮኖሚ ራስን የመቻል ስትራቴጂያዊ አቅጣጫዎችና መሠረታዊ መርሆዎች በተመለከተ በሚሰጠው ስልጠና የክልል፣ የዞኖች፣ ከተሞችና ወረዳዎች የመንግሥትና የፓርቲ አመራሮች ተሳታፊ ሆነዋል።   ስልጠናው የአመራሩን ግንዛቤ በማጠናከር ዕቅዱን በሁሉም የአስተዳደር እርከኖች ወደ ተግባራዊ ሥራ ለመቀየር በቂ ዝግጅት ለመፍጠር ያለመ መሆኑም ተገልጿል። ስልጠናው የመደመር መንግሥትን ራዕይ ወደ ተግባር በመቀየር፣ የሀገር ውስጥ ሀብቶችን፣ የጋራ አቅምንና ያሉትን የልማት ዕድሎች በአግባቡ በመጠቀም በኢኮኖሚ ራስን መቻልን ማረጋገጥ ላይ ያተኩራል። በምክትል ፕሬዚዳንት ማዕረግ የደቡብ ምሥራቅ ኦሮሚያ ዞን አስተዳዳሪ አቶ አህመድ ኢድሪስ ፤ ዕቅዱን ለማሳካት አመራሮች በውጤት ላይ የተመሠረተ ዕቅድ በማዘጋጀት የታቀዱ ሥራዎችን በጊዜና በጥራት መፈጸም እንዳለባቸው አሳስበዋል። እንዲሁም የጋራ ግንዛቤን፣ የሥራ ቅንጅትን፣ የሕዝብ ተሳትፎንና ተጠያቂነትን ማጠናከር የዕቅዱን ግብ ለማሳካት ወሳኝ መሆኑን ገልጸዋል። በተለይም በዞኑ ያሉትን የልማት ዕድሎች በአግባቡ መጠቀም፣ የሰው ኃይልን በዕውቀትና በሙያ ማብቃት፣ ምርታማነትን ማሳደግ፣ ኢንዱስትሪያላይዜሽንን ማስፋፋትና ተጠያቂነት ያለውን አሠራር መዘርጋት ትኩረት የሚሰጣቸው ጉዳዮች እንደሆኑ ተመላክቷል።   በስልጠናው በዞኑ ራስን የመቻል አቅም የመጠቀም ዕቅድ፣ እንዲሁም በዞኖች፣ ወረዳዎችና ከተሞች ዕቅድ ላይ ውይይት ይካሄዳል። ከስልጠናው በኋላ ተሳታፊዎች ያገኙትን ግንዛቤ በዕለት ተዕለት ሥራቸው በመተግበር ዕቅዱ በማኅበረሰብና በቤተሰብ ደረጃ ተጨባጭ ውጤት እንዲያመጣ የድርሻቸውን እንዲወጡ ይጠበቃል። በሮቤ ክላስተር እየተሰጠ በሚገኘው የአመራር ሥልጠና ላይ ከክልሉ፣ ከዞኑና ወረዳዎች የተውጣጡ በየደረጃው የሚገኙ አመራሮች እየተሳተፉ ናቸው።

አዲስ አበባ፤ ጥቅምት 25 /2019 (ኢዜአ)፦የኢትዮጵያ ጠቅላላ የሀገር ውስጥ ምርት አለካክ ቋሚ ዓመት የማድረግ ሥራ ለተሻለ የኢኮኖሚ ፖሊሲ ቀረጻና የልማት ዕቅድ የሚያግዝ መሆኑን የገንዘብ ሚኒስትር ፍጹም አሰፋ (ዶ/ር) ገለጹ። የብሔራዊ ስትራቴጂ ሚኒስቴር የተሻሻለውን ጠቅላላ የሀገር ውስጥ ምርት ግመታን ወቅታዊ የማድረግ ስራ ይፋ አድርጎል። በዚህም የተሻሻለው ጠቅላላ የሀገር ውስጥ መረጃ ቋሚ ዓመት ከ2008 ወደ 2017 ዓ.ም እንዲቀየር ተደርጓል። በመርሀ ግብሩ ላይ የብሔራዊ ስትራቴጂ ሚኒስትር በረከት ፍስሀጽዮን ፣ የትምህርት ሚኒስትር ፕሮፌሰር ብርሃኑ ነጋ፣ የኢትዮጵያ ብሔራዊ ባንክ ገዥ ኢዮብ ተካልኝ (ዶ/ር) እና ሌሎችም ከፍተኛ የሥራ ሀላፊዎች ተገኝተዋል።   የገንዘብ ሚኒስትር ፍጹም አሰፋ (ዶ/ር) በዚህ ወቅት እንዳሉት ፤ የተሻሻለው የጠቅላላ የሀገር ውስጥ ምርት ስሌት ቋሚ ዓመት ለውጥ የሀገሪቱን ኢኮኖሚ መጠንና መዋቅራዊ ለውጦች በተሻለ ሁኔታ ለማሳየት፣ ለፊስካልና ለገንዘብ ፖሊሲ ቀረጻ፣ ለዕዳ ዘላቂነት ግምገማና ለኢኮኖሚ ውሳኔዎች የተሻለ መረጃ ማቅረብ ያስችላል። የኢትዮጵያ ጠቅላላ የሀገር ውስጥ ምርት ስሌት የ2017 በጀት ዓመትን በመውሰድ እንደገና ሲሰላ የሀገሪቱ ኢኮኖሚ መጠን ወደ 24 ነጥብ 03 ትሪሊዮን ብር ከፍ ማለቱን አመልክተዋል። በ2018 በጀት ዓመት ደግሞ የሀገሪቱ ኢኮኖሚ መጠን 31 ነጥብ 86 ትሪሊዮን ብር አድጓል ብለዋል። የቋሚ ዓመት ለውጡ በኢትዮጵያ የኢኮኖሚ መዋቅር ውስጥ የተፈጠሩ የዲጂታል ፋይናንስ፣ ኢንዱስትሪ፣ ማዕድንና ዘመናዊ የግብር ለውጦችና ዕድገቶችን በአግባቡ ለማካተት እንደሚያስችል ገልጸዋል።   የተሻሻለው የኢኮኖሚ ስሌት ከዓለም አቀፉ የ2008 ብሔራዊ አካውንት ሥርዓት መመዘኛዎች ጋር የተጣጣመ መሆኑ የሀገሪቱ የኢኮኖሚ መረጃ ተአማኒነት እንዲኖረው ያግዛል ብለዋል። ስራው በሀገር ውስጥ ባለሙያዎች በራስ አቅም መከናወኑ የኢትዮጵያን የስታትስቲክስ ሉዓላዊነት ከማጠናከሩም በላይ ዘላቂ ተቋማዊ አቅም ለመፍጠር እንደሚያስችል ገልጸዋል። አዲሱ የጠቅላላ የሀገር ውስጥ ምርት መረጃ በመንግሥት ተቋማት፣ በክልሎች፣ በልማት አጋሮችና በግሉ ዘርፍ በዕቅድ፣ በበጀት፣ በኢንቨስትመንትና በፖሊሲ ውሳኔዎች ላይ በአግባቡ እንዲውል ጥሪ አቅርበዋል። ይህ የኢኮኖሚ መረጃ የሀገሪቱን የእዳና የታክስ ምጣኔዎች በተሻለ መልኩ ለመገምገም፣ የታክስ መሠረትን ለማስፋትና የሀገር ውስጥ ገቢ የማሰባሰብ አቅምን ለማጠናከር ያስችላል ብለዋል።

ሸገር ፤ ጥቅምት 25 /2019 (ኢዜአ)፦ በሸገር ከተማ የተለያዩ የግብርና ልማት ኢንሸቲቮችን ተግባራዊ በማድረግ ህዝቡን ተጠቃሚ ያደረጉ ተጨባጭ ውጤቶች እየተመዘገቡ መሆኑን የከተማዋ ከንቲባ ተሾመ አዱኛ (ዶ/ር) ገለጹ። የሸገር ከተማ ከንቲባ ተሾመ አዱኛ (ዶ/ር)፤ የከተማዋን ነዋሪዎች ተጠቃሚነት የሚያረጋግጡና ዘመናዊ አገልግሎትን መሰረት ያደረጉ የተለያዩ ኢንሸቲቮች ተነድፈው ወደ ስራ መገባቱን ገልጸዋል። በተለይም የግብርና፣ የትምህርት፣ የጤና እና የቴክኖሎጂ ዘርፎች ላይ ልዩ ትኩረት በማድረግ ስኬታማ ተግባራት መከናወናቸውን ተናግረዋል።   በመሆኑም በከተማዋ የህዝብን የልማት ጥያቄዎች መሰረት በማድረግ በሂደት ምላሽ የመስጠትና ተጠቃሚነትን የማረጋገጥ ስራ ተጠናክሮ የሚቀጥል መሆኑን ገልጸዋል። የምግብ ዋስትናን ለማረጋገጥ ምርትን በብዛትና በስፋት ማምረት አስፈላጊ መሆኑን ያነሱት ከንቲባው፤ በተለይም ለስንዴ ልማት፣ የሌማት ትሩፋት እንዲሁም የአትክልትና ፍራፍሬ ልማት ላይ በትኩረት እየተሰራ ይገኛል ብለዋል። የስንዴ ልማትን በመደበኛ ወቅቶች እና በበጋ የመስኖ ልማት ተግባራዊ በማድረግ ምርታማነትን በማሳደግ በምግብ ራስን የመቻል ጥረት ተጠናክሮ መቀጠሉን አንስተዋል። ከዚህ ቀደም ከተሞችን ለኢንዱስትሪ ምርት ብቻ ማዋል የሚለውን አመለካከት በመቀየር የግብርና ልማትም የምግብ ዋስትና መሰረት እንዲሆኑ እየተሰራ መሆኑን አስረድተዋል።   የከተማ ግብርና የመሬትና የውኃ አስተዳደር የሚፈልግ በመሆኑ ለአርሶ አደሮች በቂ ሥልጠና በመስጠት በልማቱ ስኬታማ እንዲሆኑ መደረጉንም ተናግረዋል። በአጠቃላይ የማኅበረሰቡን ተጠቃሚነት ለማረጋገጥ የሚያስችሉ አዳዲስ ኢንሸቲቮች ተነድፈው ወደ ስራ በመግባት ተጨባጭ ውጤት እየተመዘገበ መሆኑን አስረድተዋል።

አዲስ አበባ፤ ጥቅምት 25 /2019 (ኢዜአ)፦የሀገር ውስጥ ምርት አለካክን ወቅታዊ የማድረግ ስራ ኢትዮጵያ ያላትን ዕምቅ አቅም በማሰባሰብ ወደ ተጨባጭ ለውጥና ሁለንተናዊ ብልፅግና የሚያሸጋግር መሆኑን የብሔራዊ ስትራቴጂ ሚኒስትር በረከት ፍስሀጽዮን ገለጹ። የብሔራዊ ስትራቴጂ ሚኒስቴር የተሻሻለውን ጠቅላላ የሀገር ውስጥ ምርት ግመታን ወቅታዊ የማድረግ ስራ ይፋ አድርጓል። በዚህም የተሻሻለው ጠቅላላ የሀገር ውስጥ መረጃ ቋሚ ዓመት ከ2008 ወደ 2017 ዓ.ም እንዲቀየር ተደርጓል። በመርሀ ግብሩ ላይ የገንዘብ ሚኒስትር ፍጹም አሰፋ (ዶ/ር)፣ የትምህርት ሚኒስትር ፕሮፌሰር ብርሃኑ ነጋ፣ የኢትዮጵያ ብሔራዊ ባንክ ገዥ ኢዮብ ተካልኝ (ዶ/ር) እና ሌሎችም ከፍተኛ የሥራ ሀላፊዎች ተገኝተዋል።   የብሔራዊ ስትራቴጂ ሚኒስትር በረከት ፍስሀጽዮን በዚህ ወቅት እንዳሉት፤ ዜጎች በክብር የሚኖሩባት የበለጸገች ኢትዮጵያን ዕውን ለማድረግ የሚደረገው ጥረት ተጠናክሮ ቀጥሏል። የሀገር ውስጥ ምርት አለካክን ወቅታዊ የማድረግ ስራ ኢትዮጵያ ያላትን ዕምቅ አቅም በማሰባሰብ ወደ ተጨባጭ ለውጥና ሁለንተናዊ ብልፅግና የሚያሸጋግር መሆኑን ገልጸዋል። ኢትዮጵያ እስከ 2050 የምትመራበት የመደመር መንግሥት ስትራቴጂ ኢኮኖሚውን በመሰረታዊነት የሚቀይር መሆኑንም ተናግረዋል። የኢትዮጵያ ጠቅላላ የሀገር ውስጥ ምርት ስሌት መሰረታዊ የቋሚ ዓመት ለውጥ ወደ ትክክለኛ ግመታ ያደርሳል ብለዋል። በኢትዮጵያ ባለፉት አስር ዓመታት በግብርና በኢንዱስትሪና በሌሎችም ዘርፎች አዎንታዊ ለውጥ መመዝገቡን ገልጸዋል። ይሁን እንጂ በሀገራችን የተመዘገቡ ዘርፈ ብዙ ለውጦች በኢኮኖሚ አለካክ ስርዓቱ ላይ ክፍተት ፈጥሮ ነበር ብለዋል።   ስለሆነም በ2017 ዓ.ም ማክሮ ኢኮኖሚ መረጋጋት፣ አንፃራዊ የዋጋ ግሽበትና የተሻለ የመረጃ ምንጭ፣ የተሻለ የቤተሰብ ጥናት በመገኘቱ የጠቅላላ የሀገር ውስጥ ምርት መለኪያ ቋሚ ዓመት እንዲሆን መደረጉን ገልጸዋል። ከመስከረም 2018 እስከ መስከረም 2019 ዓ.ም ባለው አንድ ዓመት በተደረገ ስራ እንዲቀየር መደረጉን ተናግረዋል። የኢትዮጵያ ጠቅላላ የሀገር ውስጥ ምርት መለኪያ ቋሚ ዓመት ለመቀየር ዘጠኝ ዓመት የቆየ መሆኑን ገልጸው፤ በየአምስት ዓመቱ መቀየር የተሻለ እንደሆነ አንስተዋል። የጠቅላላ የሀገር ውስጥ ምርት ቋሚ ዓመት ለውጥ ወቅታዊ ግምት መሰረት ጠቅላላ የሀገር ውስጥ ምርቱ 59 ነጥብ 2 በመቶ ማደጉን ገልጸዋል።

አዲስ አበባ፤ ጥቅምት 25 /2019 (ኢዜአ)፦ የኢትዮጵያ ብሔራዊ ስትራቴጂ ሚኒስቴር ከኢትዮጵያ ስታቲስቲክስ አገልግሎት ጋር በመቀናጀት የኢትዮጵያን አጠቃላይ ሀገራዊ ምርት (GDP) ከ2019 ዓ.ም ጀምሮ መለካት የሚያስችል አዲስ ስሌት በዛሬው ዕለት ይፋ ተደርጓል። ‎ጠቅላላ ሀገራዊ ምርት (GDP) አንድ ሀገር በተወሰነ ጊዜ፣ በአብዛኛው በአንድ ዓመት በሀገር ውስጥ ያመረታቸውን ሁሉንም የመጨረሻ ሸቀጦች እና አገልግሎቶች በገበያ ዋጋ የሚለካ ኢኮኖሚያዊ መለኪያ ነው። ‎በዚህ መለኪያ ውስጥ የቤተሰቦች ፍጆታ፣ የንግድ ተቋማት እና የግል ባለሀብቶች ኢንቨስትመንት፣ የመንግሥት ወጪ እንዲሁም ከወጪ ንግድ የሚገኘው የተጣራ ውጤት ተደምረው ይሰላሉ። ‎ኢትዮጵያም ከፈረንጆቹ 1960 ጀምሮ የጠቅላላ ሀገራዊ ምርት መረጃዋን በይፋ ስታሳውቅ ቆይታለች። ሆኖም እስካሁን ሥራ ላይ የነበረው የ2008 ዓ.ም የመነሻ ዓመት ስሌት በኢኮኖሚው የተፈጠሩ አዳዲስ ለውጦችን እና የዘርፎችን መስፋፋት በበቂ ሁኔታ የሚያንፀባርቁ አለመሆናቸው ተገልጿል። ‎የብሔራዊ ስትራቴጂ ሚኒስትር አቶ በረከት ፍስሃጽዮን የቀድሞው የኢኮኖሚ መለኪያ የዲጂታል የገንዘብ ልውውጦችን፣ እንደ ካፒታል ገበያ፣ የበጋ መስኖ ልማትና የኮሪደር ልማት ያሉ አዳዲስ የኢኮኖሚ ልማቶች መረጃዎች ያልተካተቱበት፣ አዲስ የኢኮኖሚ ቅርፅ በአሮጌ መለኪያ ሲለካ የቆየበት መሆኑን ተናግረዋል። ‎አዲሱ የሀገር ውስጥ ጠቅላላ ኢኮኖሚ ስሌት በቅርቡ የተካሄዱ የግብርና ቆጠራን፣ የኢኮኖሚ ድርጅቶች ቆጠራን እና የተቀናጀ የቤተሰብ ጥናት መረጃዎች የተካተተበት ወቅታዊ የሆነ የኢኮኖሚ ሁኔታን የሚያመለክት መሆኑን ገልጸዋል። በአዲሱ ስሌት የኢትዮጵያ የ2018 በጀት ዓመት አጠቃላይ የሀገር ውስጥ ምርት 210 ቢሊዮን ዶላር መድረሱም በዚሁ ወቅት ተገልጿል። ‎አዲሱ ስሌት የሀገራችንን አሁናዊ የኢኮኖሚ ሁኔታን የሚያመላክት፣ ለፖሊሲና ዕቅድ ትክክለኛ ግብዓት በመሆን እንዲሁም ከአጋር አካላት ጋር የምታደርገውን ድርድር አቅም ከፍ የማድረግ ጠቀሜታ እንዳለው ተመላክቷል።

አዲስ አበባ፤ ጥቅምት 24 /2019 (ኢዜአ)፦የንግድና ቀጣናዊ ትስስር ሚኒስቴር የአፍሪካ አህጉራዊ ነጻ ንግድ ቀጣናን ትግበራ ለመደገፍና የአፍሪካ ቀጣናዊ ትስስር ማዕከልን ለማቋቋም የሚያስችል ስምምነት ከሁለት ተቋማት ጋር ተፈራረመ። ሚኒስቴሩ ስምምነቱን የተፈራረመው ከአዲስ አበባ ዩኒቨርስቲና ኤክስፐርታይዝ ፍራንስ ከተሰኘ የልማት ድርጅት ጋር ነው። የንግድና ቀጣናዊ ትስስር ሚኒስትር ያስሚን ወሃብረቢ ስምምነቱን አስመልክቶ በሰጡት ማብራሪያ፤ ከኤክስፐርታይዝ ፍራንስ ጋር የተደረገው ሥምምነት የአፍሪካ አህጉራዊ ነጻ የንግድ ቀጣና ትግበራን ለማሳለጥ ያለመ ነው ብለዋል።   የልማት ድርጅቱ ለትግበራው ውጤታማነት በአውሮፓ ህብረት በኩል የቴክኒክና የፋይናንስ ድጋፍ እንደሚያደርግም ጠቅሰዋል። ኢትዮጵያ የነጻ አህጉራዊ የንግድ ትግበራውን የሚያሳልጥ ብሄራዊ ስትራቴጂ አዘጋጅታ ወደ ግብይት ገብታለች ያሉት ሚኒስትር ያስሚን፤ ትግበራውን ውጤታማ ለማድረግ የንግድና ቀጣናዊ ትስስር አጀንዳችን በጠንካራ ተቋማት እና በሰለጠነ የሰው ኃይል ሊደገፍ ይገባል ብለዋል። ለዚህም ከኤክስፐርታይዝ ፍራንስ ጋር የተፈረመው ስምምነት መሰል ጉዳዮች ላይ በጋራ በመስራት የኢትዮጵያን የትግበራ አቅም ያሳድጋል ብለዋል። በኢኮኖሚው ውስጥ የእሴት ሰንሰለት እድገትን ያፋጥናል እንዲሁም ቀጣናዊ ትስስርን ለማጎልበት እና ወጪ ንግድን ለማሳደግ ይረዳል ሲሉም ገልጸዋል። ኢትዮጵያ የዓለም የንግድ ድርጅት አባል ለመሆን እየሰራች መሆኑን አስታውሰው፤ ስምምነቱ ይሄ ውጥን እንዲሳካም አዎንታዊ አስተዋጽኦ ይኖረዋል ብለዋል።   ሙሉ የንግድ ትስስር ጥቅሞችን ለማግኘት ጥራት ያላቸው ፖሊሲዎችን የማውጣት፣ በምርምርና መረጃ ላይ የተመሠረቱ የንግድ ድርድሮችን የማካሄድ፣ የድንበር አስተዳደርን ውጤታማ ማድረግ እና ጠንካራ የመንግሥትና የግል ዘርፍ ውይይትን የማጎልበት አቅምን ይጠይቃል ሲሉም ተናግረዋል። ከኤክስፐርቲዝ ፍራንስ የምናገኘው ድጋፍ በትክክል እነዚህን መሠረቶች እንድንገነባ ይረዳናል ብለዋል። ሌላው ስምምነት የአፍሪካ ቀጣናዊ ትስስር ማዕከል በአዲስ አበባ ዩኒቨርስቲ ስር ማቋቋምን ያካተተ መሆኑን አስረድተዋል። እንደ ሚኒስትር ያስሚን ገለጻ፤ የማዕከሉ መቋቋም ለተወሰነ የሙያ ዘርፍ የሚያስፈልግ የሰው ኃይል ልማት እና የፖሊሲ ምርምር ጠንካራ መሠረት ይጥላል። ማዕከሉ አዳዲስ የንግድ ተደራዳሪዎችን እና የፖሊሲ ተንታኞችን የአቅም ግንባታ ስልጠና የሚሰጥ ሲሆን፤ በቀጣናዊ ትስስርና ልማት ዙሪያ ልዩ የሁለተኛ ዲግሪ ፕሮግራም ይጀምራል። እንዲሁም ሀገራዊ የንግድ ስትራቴጂዮችን በቀጥታ የሚደግፉ መደበኛ የመንግሥትና የግል ዘርፍ ፖሊሲ ውይይቶችን ያመቻቻል፤ በተጨማሪም ጽኑ የቀጣናዊ እሴት ሰንሰለቶችን እንድንገነባ ያስችለናል ሲሉም አብራርተዋል። የምናቋቁመው ማዕከል ለመላው አህጉር የእውቀት፣ የምርምር እና የክህሎት ምንጭ ሆኖ የሚያገለግል ነው ያሉ ሲሆን፤ በሙሉ አፍሪካ ነጻ ንግድ ትግበራን የሚደግፍ እና በአጀንዳ 2063 ስር ያሉትን የጋራ ምኞቶቻችንን የሚያስቀጥል ይሆናል ብለዋል።   የኤክስፐርታይዝ ፍራንስ የልማት ድርጅት የኢትዮጵያ ዳይሬክተር ዣን-ባፕቲስት ፔቲኚ በበኩላቸው፤ የልማት ድርጅቱ የመንግሥት ተቋማትን አቅም ማሳደግ፣ አነስተኛና መከካለኛ ኢንተርፕራይዞች እንዲጠናከሩ እና ወደ አፍሪካ ገበያ እንዲገቡ አስፈላጊውን ድጋፍ ያደርጋል ብለዋል። የተቋማት ቅንጅት እንዲሳለጥ መደገፍ በኛ በኩል የሚጠበቅ ኃላፊነት ነው ያሉት ዳይሬክተሩ፤ የእውቀት ሽግግሩን መደገፍ፣ ባለሙያዎችን ማምጣትና እንዲያሰለጥኑ በማድረግ ዘላቂ ብሄራዊ የአቅም ግንባታዎች ላይ በትብብር እንሰራለን ብለዋል።   የአዲስ አበባ ዩኒቨርሲቲ ተጠባባቂ ፕሬዝዳንት ሳሙኤል ክፍሌ (ዶ/ር) በበኩላቸው፤ ኢትዮጵያ በአፍሪካ አህጉራዊ ነጻ ንግድ ቀጣና ትግበራ የጎላ ሚና እንዲኖራት ዩኒቨርሲቲው በጥናትና ምርምር እና በአቅም ግንባታ ረገድ የሚጠበቅበትን ድርሻ እንደሚወጣ አረጋግጠዋል።