አዋሽ መልካሣ ፣ጥቅምት 28/2019(ኢዜአ )፡- የከተማ ግብርና የምግብ ዋስትናን ለማረጋገጥ፣ የገቢ አቅምን ለማሳደግና የስራ እድልን ለመፍጠር እያገዘ መሆኑ ተገለጸ። በአዋሽ መልካሣ ወረዳ ፓፓያን በክላስተር ያለሙ አርሶ አደሮች በተፈጠረላቸው የገበያ ትስስር ምርቱን ለውጭና ለሀገር ውስጥ ገበያ አቅራቢዎች በማሳቸው ላይ ማስረከብ ጀምረዋል።   የአዳማ ከተማ አስተዳደር ከንቲባ አቶ ሃይሉ ጀልዴ በወቅቱ እንደገለፁት የከተማ ግብርና የምግብ ዋስትናን ለማረጋገጥ፣ የገቢ አቅምን ለማሳደግና የስራ እድል ለመፍጠር እያገዘ ነው። አርሶ አደሩ በተለይም በመስኖ በመታገዝ የተለያዩ ሰብሎች፣ አትክልትና ፍራፍሬ በማምረት ተጠቃሚ እንዲሆን እየተደረገ መሆኑን ተናግረዋል። በከተማዋ ለመስኖ አመቺ የሆነ 17 ሺህ ሄክታር መሬት መኖሩን ጠቁመው አርሶ አደሩ ያለውን አመቺ አቅም በመጠቀም የምግብ ዋስትናውን እንዲያረጋግጥና ኑሮውን እንዲያሻሽል እየተደረገ መሆኑን አመልክተዋል። የግብርናውን አሰራር ለማዘመን መስኖን ከማስፋፋት ጎን ለጎን ሜካናይዜሽንና ቴክኖሎጂ ተደራሽ እየተደረገ መሆኑን አክለዋል። በዛሬው እለት ለምርት የበቃ ፓፓያ እየተሰበሰበና ለገበያ እየቀረበ መሆኑን ጠቁመው በዘርፉ ለተሰማሩ አርሶ አደሮች የገበያ ትስስር መፈጠሩን ተናግረዋል። የተፈጠረው የገበያ ትስስር አርሶአደሩን ከግብርና ምርት ላኪዎችና አከፋፋዮች ጋር በቀጥታ በማገናኘት የጋራ ተጠቃሚነት እንዲረጋገጥ ያለመ መሆኑንም ገልጿል ። በዚህም የህገ ወጥ ደላሎችን ጣልቃ ገብነትን በማስወገድና አርሶአደሩ ለምርቱ የተሻለ ዋጋ አግኝቶ የተሻለ ገቢ በማግኘት ተጠቃሚ እንዲሆን ነው ብለዋል።   የኦሮሚያ ግብርና ቢሮ ምክትል ሃላፊ አለሙ ደሳ (ዶ/ር) እንደገለፁት መሬትና የሰው ጉልበትን አቀናጅቶ በመጠቀም የብልጽግና ጉዞን ማረጋገጥ አለብን ብለዋል። የአዳማ ከተማ አርሶአደሮች ከተፈጥሮ ዝናብ በመላቀቅ በሜካናይዜሽን በመጠቀም በስፋት በመስኖ መሳተፍ አለባችሁ ሲሉ አሳስበዋል ። ቢሮው የአርሶአደሩን ምርትና ምርታማነት ለማሳደግ በጥናትና ምርምር የታገዘ የመስኖ ልማት ስራዎች በስፋት ለማከናወን እየሰራ እንደሚገኝ ገልጿል ።   የአዳማ ከተማ ግብርና ጽሕፈት ቤት ሃላፊ አቶ አለሙ ቂልጡ በበኩላቸው በከተማዋ በተለይ የዝናብ እጥረት በሚታይባቸው አከባቢዎች በመስኖ ስንዴና ፍራፍሬ እየለማ መሆኑን ተናግረዋል። በተለይ ስንዴ፣ ፓፓያ፣ ሙዝ፣ ብርትኳንና ሎሚ በክላስተር እየለማ ይገኛል ነው ብለዋል። አስተዳደሩ 22 የእርሻ ትራክተሮችን በመግዛት ለአርሶአደሩ መስጠቱንም አስታውቀዋል።   በዘርፉ ከተሰማሩ አርሶአደሮች መካከል ቦሩ ቁምቢ በሰጡት አስተያየት በአሁኑ ወቅት መስኖን በመጠቀም ስንዴ፣ አትክልትና ፍራፍሬ በማልማት ተጠቃሚ እየሆኑ መምጣታቸውን ገልጸዋል። በአሁኑ ወቅት የገበያ ትስስር ተፈጥሮልን በማሳችን ላይ ምርቱን ለገበያ እያቀረብን እንገኛለን ሲሉም አክለዋል።  

1. ከጎሮ–ኮዬ ፈጬ እስከ ቱሉ ዲምቱ የሚዘልቀው የኮሪደር ልማት፣ እና 2. ከካራ–ቦሌ አየር ማረፊያ መንገድ በጎሮ እስከ አቃቂ የሚዘልቀው 22 ኪ.ሜ. የወንዝ ዳርቻ ልማት ፤ የመንገድ ልማት፦ * ከጎሮ–ኮዬ ፈጬ–ቱሉ ዲምቱ 15 ኪ.ሜ. ርዝመት ያለው መንገድ ነው። * የመንገዱ ስፋት 114 ሜትር ነው። * በአንድ ጊዜ 8 ተሽከርካሪዎችን ያስተናግዳል። * ሰፋፊ የእግረኛና የሳይክል መንገዶች ሥራን ያካትታል።   የአረንጓዴ ልማት፦ * በ30 ሜትር ስፋት የሚዘረጋ፣ 70 ሄክታር መሬትን የሚሸፍን የመንገድ ዳር የአረንጓዴ ልማት ሥራን ያካትታል። የውኃና የፍሳሽ ልማት፦ * በ12 ጥልቅ ጉድጓዶች ቁፋሮ በቀን 106 ሺህ ሜትር ኪዩብ የመጠጥ ውኃ ለማምረት የሚያስችል ሥራን ያካትታል። * የፍሳሽ ውኃ ማጣሪያ ጣቢያ ተገንብቷል። * 206 ኪ.ሜ. የፍሳሽ መስመር ሥራን ያካትታል። የወንዝ ዳርቻ ልማት፦ * ከካራ–ቦሌ አየር ማረፊያ መንገድ በጎሮ እስከ አቃቂ የሚዘልቀው 22 ኪ.ሜ. የወንዝ ዳርቻ ልማት ፣ 11.2 ሄክታር የአፈርና ውሀ ጥበቃ ሥራ እየተከናወነ ነው። * 324 ሄክታር የሚሆን መሬትን የሚሸፍን የአካባቢ ጥበቃና የአረንጓዴ ልማት ሥራ ወንዙን ተከትሎ እየተከናወነ ይገኛል። * 4,100 ሜትር ኪዩብ የጋቢዮን ሥራ እየተሰራ ነው።   * 1,500 ሜትር ኪዩብ የእርከን ሥራን ያካትታል። ⁠በአጠቃላይ ስራው እየተፋጠነ ስለሆነ በአካባቢው ቅድሚያ የማልማት መብት ያገኛችሁ የግል አልሚዎችም እድታፋጥኑ እናሳስባለን - ከንቲባ አዳነች አቤቤ

ባህር ዳር፤ ጥቅምት 28/2019(ኢዜአ)፡- በአማራ ክልል የማዕድን ሃብትን በጥናትና ምርምር በመታገዝ በተሻለ መልኩ ለማልማት የከፍተኛ ትምህርት ተቋማት ትብብርና እገዛ ወሳኝ መሆኑን የክልሉ የማዕድን ቢሮ ሃላፊ ሐይሌ አበበ ገለጹ። የአማራ ክልል የማዕድን ቢሮ ከተለያዩ ዩኒቨርሲቲዎች ጋር የሥነ-ምድር ጥናትና የካርታ ሥራ እንዲሁም የማዕድን ፋለጋና ክምችት ግምታዊ ጥናት ላይ በትብብር ለመስራት በሚቻልበት ሁኔታ ላይ ምክክር አድርጓል።   በዚሁ መርሃ ግብር ላይ የተገኙት የክልሉ የማዕድን ቢሮ ሃላፊ ሐይሌ አበበ፤ የማእድን ዘርፍ ከመሰረታዊ የልማትና እድገት ምሰሶዎች መካከል አንዱ ሆኖ እየተሰራበት መሆኑን ገልጸዋል። በመሆኑም በአማራ ክልል ያለውን እምቅ የማእድን ሃብት በማልማት ጥቅም ላይ ለማዋል የተቀናጀ ጥረት እየተደረገ መሆኑን ተናግረዋል። ለዚህም ዩኒቨርሲቲዎች ወሳኝ ድርሻ ያላቸው መሆኑን ጠቁመው በክልሉ ከሚገኙ ዩኒቨርሲቲዎች ጋር ይበልጥ ተቀራርቦ ለመስራት ምክክር መደረጉን ገልጸዋል። በክልሉ የማዕድን ሃብትን በተሻለ መልኩ ለማልማት በሚደረገው ጥረት የከፍተኛ ትምህርት ተቋማት አስተዋጽኦ ወሳኝ መሆኑን አንስተው በጥናትና ምርምር የሚያደርጉት እገዛ እንዲጠናከር ጠይቀዋል። የማዕድን ሀብትን በእውቀትና በቴክኖሎጂ ታግዞ ማልማት ከተቻለ በዘርፉ የላቀ ስኬት ማስመዝገብ የሚቻል መሆኑን ተናግረዋል። በዘንድሮው በጀት ዓመት በክልሉ 2 ሺህ ኪሎ ግራም ወርቅ ለማምረት ታቅዶ በሩብ ዓመቱ 431 ኪሎ ግራም ማምረት መቻሉን ጠቅሰው እቅዱን ለማሳካት ጥረት የሚደረግ ይሆናል ብለዋል። የዩኒቨርሲቲዎቹ ተወካዮችም የዘርፉን ልማት በጥናትና ምርምር በማገዝ ለተሻለ ስኬት አስተዋጽኦ ለማድረግ መዘጋጀታቸውን አረጋግጠዋል። በመድረኩ ላይ የወሎ፣ የባህር ዳር፣ የጎንደር፣ የእንጅባራ፣ የወልዲያ፣ የደብረብርሃን እና ደብረ ማርቆስ ዩኒቨርሲቲ ተወካዮች ተገኝተዋል።

ሠመራ፣ጥቅምት 28/2019 (ኢዜአ)፡- የኢትዮጵያ የባህር በር ጥያቄ በታሪክ፣ በመልክዓ ምድርና በዓለም አቀፍ ህግ ተቀባይነት ስላለው በዲፕሎማሲ የተጀመረው ጥረት ሊጠናከር ይገባል ሲሉ የሠመራ ዩኒቨርሲቲ ምሁራን ገለጹ። የኢትዮጵያ የባህር በር ጥያቄ በታሪክ፣ በመልክዓ ምድርና በዓለም አቀፍ ህግ ተቀባይነት ያለውና የማያሻማ ጉዳይ ነው። ይህ ጥያቄ አሁን ላይ እየገፋና የዚህ ዘመን ትውልድ ጥያቄ ወደ መሆን ደረጃ ደርሷል። የባህር በር ባለቤትነት ጥያቄ እውን ሆኖ ምላሽ እንዲያገኝ የተለያዩ ዲፕሎማሲያዊ ጥረቶች እየተካሄዱ ሲሆን፣ የሰጥቶ መቀበል መርህ እንዲተገበርም ትኩረት ተሰጥቶ እየተሰራ ነው። ይህንን አስመልክተው ለኢዜአ አስተያየታቸውን የሰጡ የሠመራ ዩኒቨርሲቲ ምሁራን እንደገለፁት፤ የኢትዮጵያ የባህር በር ጥያቄ በታሪክ፣ በመልክዓ ምድርና በዓለም አቀፍ ህግ ተቀባይነት ያለው በመሆኑ በዲፕሎማሲያዊ መንገድ የተጀመረው ጥረት ሊጠናከር ይገባል። የኢትዮጵያ የባህር በር ባለቤትነት ጉዳይ በየትኛውም መመዘኛ ተገቢና ትክክለኛ ጥያቄ በመሆኑ ምላሽ ሊሰጠው ይገባል ሲሉም ምሁራኑ አክለዋል። በዩኒቨርሲቲው የውሃ ሀብትና መስኖ ምህንድስና ትምህርት ክፍል መምህርና ተመራማሪ እንዲሁም የመስክና ቤተ ሙከራ አስተዳደር ዳይሬክተር አብዱልወሀብ አቤ፣ የባህር በር የማግኘት ጉዳይ ዓለም አቀፋዊ ይዘትን የተላበሰ መብት መሆኑን ጠቅሰው፣ በሰጥቶ መቀበል መርህ የተጀመረው ጥረት የሚደገፍ መሆኑን ተናግረዋል። በዩኒቨርሲቲው የሚዲያና ኮሙኒኬሽን ትምህርት ክፍል መምህር መሐመድ አህመድ ኢትዮጵያ በሴራ ባጣችው የባህር በር የጂኦግራፊ እስረኛ ሆና ልትቀጥል አይገባም ብለዋል።   የባህር በር የማግኘት ጉዳይ የትውልዱ ጥያቄ መሆኑን ከግንዛቤ በማስገባት የተጀመረው ዲፕሎማሲያዊ አካሄድ የሚደነቅና ተጠናክሮ ሊቀጥል እንደሚገባውም አመልክተዋል።    

ጋምቤላ፣ ጥቅምት 28 / 2019 (ኢዜአ)፡- በክልሉ የተጀመሩ የልማት ስራዎች ተጠናክረው እንዲቀጥሉ የሚጠበቅብንን ግብር በመክፈል ኀላፊነታችንን እንወጣለን ሲሉ በጋምቤላ ክልል ግብር ከፋዮች ገለጹ። ኢዜአ ያነጋገርናቸው ግብር ከፋይ አቶ ተማም አያሌው፤ የግብር መክፈል ጉዳይ የቀጣዩ ትውልድ መሰረት የሚገነባበት የሀገር አደራና ሃላፊነት መሆኑን ገልጸዋል። በመሆኑም የሚጠበቅብንን ግብር በወቅቱና በአግባቡ በመክፈል ሃላፊነታችንን መወጣት ይኖርብናል ብለዋል። ግብራቸውን በወቅቱ መክፈላቸውን አስታውሰው ሌሎችም ለግብር ልዩ ትኩረት መስጠት እንዳለባቸው ተናግረዋል። በጋምቤላ ክልል የተጀመሩ የልማት ስራዎች ትልቅ ተስፋ የተሰነቀባቸው መሆኑን ያነሱት አቶ ተማም፤ የክልሉ ግብር ከፋዮች ለልማት ሃላፊነታችንን መወጣት አለብን ሲሉ ገልጸዋል።   ሌላኛው ግብር ከፋይ አቶ ቴወድሮስ መኮንን፤ የሀገር እድገት ሊሳካ የሚችለው ከዜጎች በሚሰበሰብ ግብር መሆኑን አንስተው ግብራችንን በወቅቱ በመክፈል ለክልላችን ልማት አጋርነታችንን ማሳየት አለብን ብለዋል። በክልሉ የተጀመሩ የመሰረተ ልማት ግንባታዎች፣ የማህበራዊ አገልግሎት ተቋማት እመርታ እየታየባቸው መሆኑን አንስተው ግብር በመክፈል አጋዥነታችንን በተግባር እናሳያለን ሲሉ ተናግረዋል። በመሆኑም በክልላችን የተጀመሩ የልማት ስራዎች ተጠናክረው እንዲቀጥሉ የሚጠበቅብንን ግብር በመክፈል አደራችንን እንወጣለን ብለዋል።   የጋምቤላ ክልል ገቢዎች ቢሮ ኃላፊ አቶ ቸንኳት ደቪድ፤ በክልሉ የተጀመሩ የልማት ስራዎች ከዳር እንዲደርሱ በተለይም ዜጎች የሚጠበቅባቸውን ግብር በታማኝነት መክፈል እንዳለባቸው ገልጸዋል። የክልሉን የገቢ አቅምን በማሳደግ የታቀዱ የልማት ግቦችን ለማሳካት በትኩረት እየተሰራ ነው ብለዋል። በክልሉ በዘንድሮው በጀት ዓመት ከተለያዩ የገቢ አርዕስቶች ከ11 ነጥብ 4 ቢሊዮን ብር በላይ ለመሰብሰብ ታቅዶ እየተሰራ መሆኑን ያነሱት ሃላፊው እቅዱን ለማሳካት የባለድርሻ አካላትና የግብር ከፋዮች የጋራ ጥረት ወሳኝ መሆኑን አንስተዋል። የገቢ አሰባሰብ ስርዓቱን በማጠናከር በበጀት ዓመቱ ለመሰብሰብ የታቀደውን ግብ ለማሳካት በትኩረት እየተሰራ ስለመሆኑም ተናግረዋል። በክልሉ ሶስት ዞኖችን በዘመናዊ ቴክኖሎጂ በማስተሳሰርና የገቢ ማዕከላትን በማስፋት የገቢ አሰባሰብ ስርዓቱን ፈጣንና ቀልጣፋ ለማድረግ የተቀናጀ ጥረት እየተደረገ መሆኑንም ገልጸዋል። የክልሉ መንግስት የልማት እቅዶች የሚሳኩት በግብር ከፋዮች እገዛ በመሆኑ ግብር ከፋዮች በታማኝነት የሚጠበቅባቸውን አደራና ሃላፊነት እንዲወጡ አስገንዝበዋል።

ሀረር፣ጥቅምት 28/2019 (ኢዜአ)፡- በሐረሪ ክልል የምርታማነት አቅምን በማሳደግ የምግብ ሉዓላዊነትን ለማረጋገጥ የተቀናጀ ጥረት እየተደረገ መሆኑን የክልሉ ምክትል ርእሰ መስተዳድር ሮዛ ኡመር ገለጹ። የሐረሪ ክልል ርዕሰ መስተዳድር ኦርዲን በድሪ፤ በክልሉ ሶፊ ወረዳ ቂሌ ቀበሌ በመገኘት የዘንድሮውን የበጋ መስኖ ልማት በይፋ አስጀምረዋል።   በማስጀመሪያ መርሃ ግብሩ ላይ የክልሉ ምክትል ርዕሰ መስተዳድር እና የግብርና ልማት ቢሮ ኃላፊ ሮዛ ኡመር እንዲሁም ሌሎች የክልሉ የስራ ሃላፊዎች ተገኝተዋል። የክልሉ ምክትል ርዕሰ መስተዳድርና የግብርና ልማት ቢሮ ሃላፊ ሮዛ ኡመር፤ በክልሉ በዘንድሮው የበጋ መስኖ ልማት ከ5 ሺህ ሄክታር በላይ መሬት ይለማል ብለዋል። በዚህም በዘንድሮው የበጋ መስኖ ልማት ከ1 ሚሊዮን ኩንታል በላይ ምርት ለመሰብሰብ የሚያስችል የተሟላ ዝግጅት መደረጉን ተናግረዋል። ለአርሶ አደሮች የተሻሻሉ ምርጥ ዘሮች፣ የአፈር ማዳበሪያ፣ የውኃ መሳቢያ ሞተሮች እና ሌሎችንም በማሟላት ለተሻለ ስኬት እየተሰራ መሆኑን ገልጸዋል። በበጋ መስኖ ስንዴን ጨምሮ የተለያዩ ሰብሎች እንዲሁም የአትክልትና ፍራፍሬ ልማት ይከናወናል ብለዋል።   ከዘመናዊ የከርሰ-ምድር ውኃ አጠቃቀም ጋር በማቀናጀት በዓመት እስከ ሦስት ጊዜ የማምረት ልምድ እየዳበረ መምጣቱን ያነሱት ምክትል ርእሰ መስተዳድሯ ዘንድሮም ተጠናክሮ መቀጠሉን ተናግረዋል። በክልሉ ምርትና ምርታማነትን በማሳደግ የምግብ ሉዓላዊነትን የማረጋገጥ ጥረት ተጠናክሮ የሚቀጥል መሆኑንም ገልጸዋል።

አዲስ አበባ በከተማ ልማት የጀመረችው ጉዞ የአንድን ከተማ ገጽታ ከመቀየር ባለፈ፣ የከተማ ልማት ምን ያህል የዜጎችን ሕይወት መለወጥ፣ የኢኮኖሚ እድገትን ማፋጠን እና ለቀጣይ ትውልድ የተሻለ ከተማ መገንባት እንደሚችል የሚያሳይ ተግባራዊ ምሳሌ ሆኗል። በተቋማዊ አቅም ግንባታ፣ በተቀናጀ መሠረተ ልማት ዝርጋታ፣ በአገልግሎት አሰጣጥ ማዘመን፣ በቴክኖሎጂ አጠቃቀምና በከተማ አስተዳደር ብቃት ረገድ የተከናወኑ ሥራዎች ከተማዋን ወደ አዲስ የልማት ምዕራፍ አሸጋግረዋል።   የመንገድ፣ የውሃ፣ የፍሳሽ፣ የመብራት፣ የትራንስፖርትና የዲጂታል መሠረተ ልማቶችን በተቀናጀ መልኩ ማስፋፋት የከተማዋን ተደራሽነት፣ የኢኮኖሚ እንቅስቃሴና የአገልግሎት ጥራት እያሳደጉ ነው። በአካባቢ ጥበቃና በአረንጓዴ ልማት ረገድ የተከናወኑ ሥራዎችም የከተማዋን ውበት ከማሻሻል ባለፈ፣ ለአየር ንብረት ለውጥ መላመድና ተፅዕኖውን መቀነስ ጉልህ አስተዋፅኦ እያደረጉ ነው። በዚህም አዲስ አበባ በአለምአቀፍ ደረጃ እውቅናዎችን በተከታታይ አመታት በተለያዩ ዘርፎች እንድታገኝ አድርገዋታል። በተለይም የተበከሉ ወንዞችን በማጽዳት፣ የወንዝ ዳርቻዎችን በማልማትና ወደ መዝናኛ፣ መስተንግዶና የቱሪዝም ማዕከላት በመቀየር ከተማዋ ከተፈጥሮ ጋር ያላትን ግንኙነት እያደሰች ትገኛለች። ከዚህም በላይ የመዝናኛ ስፍራዎችን፣ የቱሪዝም መዳረሻዎችን፣ የባህልና ታሪካዊ ቅርሶችን በተቀናጀ የመንገድና የእግረኛ መሠረተ ልማት ማገናኘት የከተማዋን የመሠረተ ልማት መስተጋብር (Connectivity) በማሳደግ ለነዋሪዎችና ለጎብኚዎች የተሻለ የእንቅስቃሴና የመዝናኛ አማራጭ ፈጥሯል። የእነዚህ ልማቶች ዋነኛ ዓላማ ዜጎችን ሁለንተናዊ ተጠቃሚ ማድረግ፣ ለሁሉም እኩል የሆነ የእድል ተደራሽነት መፍጠር፣ የሥራ እድልን ማስፋፋትና አካታች የኢኮኖሚ እድገትን ማረጋገጥ መሆኑን የከንቲባ ጽህፈት ቤት መረጃ ያመለክታል።   ዛሬ አዲስ አበባ እየተጓዘችበት ያለው የልማት ጉዞና ያስመዘገበችው ውጤት ለሌሎች የአፍሪካ ከተሞች የመነቃቃት፣ የመማርና የመለወጥ ተስፋ እየፈጠረ ነው። ይህም አዲስ አበባ የአፍሪካውያን የጋራ መዲና ብቻ ሳትሆን፣ የዘመናዊ ከተማ ልማት፣ የሥልጣኔ፣ የአካታችነትና የዘላቂ እድገት ማሳያ እየሆነች መምጣቷን ያረጋግጣል።

አርባ ምንጭ፣ ጥቅምት 28/2019 (ኢዜአ)፡- በደቡብ ኢትዮጵያ ክልል ዘመናዊና የተቀናጀ የግብርና ልማትን በመተግበር የምግብ ሉአላዊነትን ለማረጋገጥ ትኩረት መሰጠቱን የክልሉ ርእሰ መስተዳድር ተስፋዬ በልጅጌ (ዶ/ር) ገለጹ፡፡ "የውሃ ፀጋችንን አሟጠን በመጠቀም ከዝናብ ጥገኝነት የተላቀቀ ግብርናን እውን ለማድረግ እንሠራለን" በሚል መሪ ሃሳብ የደቡብ ኢትዮጵያ ክልል የ2019 የመስኖ ልማት ንቅናቄ መድረክ በአርባ ምንጭ ከተማ ተካሂዷል።   በመድረኩ ላይ የተገኙት የደቡብ ኢትዮጵያ ክልል ርዕሰ መስተዳድር ባደረጉት ንግግር የግብርና ዘርፉን በማዘመንና የምርት አማራጮችን በማስፋት ከተረጅነት የመውጣት ጥረት ተጠናክሮ ይቀጥላል ብለዋል። ርእሰ መስተዳድሩ በመልእክታቸው ምርታማነትን ማሳደግና የክልሉን ነዋሪዎች የኑሮ ሁኔታ ማሻሻል ዋነኛ ትኩረታችን ነው ብለዋል። በክልሉ ሊለማ የሚችል እምቅ አቅም መኖሩን የጠቀሱት ርእሰ መስተዳድሩ የግብርና ልማትና ምርታማነትን የማሳደግ ጥረት ተጠናክሮ የሚቀጥል መሆኑን ተናግረዋል። የግብርና እና ገጠር ልማት ላይ በማተኮር ምርታማነትን የማሳደግ፣ የሥራ ዕድል ፈጠራንና የገቢ ምንጮችን የማስፋት ጉዳይ ወሳኝ መሆኑንም አንስተዋል።   የክልሉ ግብርና ቢሮ ሃላፊ ካርታ ካስኬ (ዶ/ር) በበኩላቸው ምርታማነትን በማሳደግ የምግብ ዋስትናን ለማረጋገጥ በሚደረገው ጥረት የመስኖ ልማት ተጨባጭ ውጤት እያመጣ መሆኑን ገልጸዋል። በክልሉ በዘንድሮው የመስኖ ልማት ከ186 ሺህ ሄክታር በላይ የሚለማ መሆኑን ጠቅሰው የበጋ መስኖን ጨምሮ ሌሎችንም ለማልማት ከፍተኛ ጥረትና ርብርብ ይደረጋል ብለዋል።

ሀዋሳ፣ ጥቅምት 28/2019 (ኢዜአ)፡- የግብርና ዘርፉን በማዘመን ልማቱን የማሳለጥና ምርታማነትን የማሳደግ ጥረት ለማሳካት የአልሚ ባለሃብቶች ተሳትፎ ወሳኝ መሆኑን የግብርና ሚኒስትር ዴኤታ ሶፊያ ካሳ (ዶ/ር) ገለጹ። የሲዳማ ክልል ኢንቨስትመንት ፎረም፤ የግብርና ሚኒስቴር ከፍተኛ የስራ ሃላፊዎችና ባለሙያዎች፣ የዓለም ምግብ ድርጅት ተወካዮች፣ የክልሉ አመራሮች፣ የተለያዩ ባለሀብቶች በተገኙበት እየተካሄደ ይገኛል።   በፎረሙ ላይ የተገኙት የግብርና ሚኒስትር ዴኤታ ሶፊያ ካሳ (ዶ/ር)፤ በአርሶና አርብቶ አደሮች ልማት ብቻ ምርታማነትን ማሳደግና የምግብ ዋስትናን ማረጋገጥ የማይቻል መሆኑን አንስተው ለዘርፉ ስኬት የተቀናጀ ጥረት ያስፈልጋል ብለዋል። በመሆኑም የግብርና ዘርፉን ይበልጥ በማዘመን ልማቱን የማሳለጥና ምርታማነትን የማሳደግ ጥረት በማገዝ ረገድ በተለይም የባለሀብቱ ሚና ወሳኝ መሆኑን ገልጸዋል። የግብርና ልማት ኢንቨስትመንትን በማበረታታት የማስፋፋትና ምርታማነትን የማሳደግ ጥረት ተጠናክሮ መቀጠል እንዳለበት በማንሳት ለዚህም የሁሉም ጥረት ሊታከልበት ይገባል ብለዋል። የግል ባለሀብቱን የመደገፍና በዘርፉ ልማትየማሳተፍ ጉዳይ በመደመር መንግሥት ከፍተኛ ትኩረት የተሰጠው መሆኑን ተናግረው አሁን ላይ በግብርናው ዘርፍ ኢንቨስተሮች ከ3 ነጥብ 5 ሚሊዮን ሄክታር በላይ መሬት እየለማ እንደሚገኝ ተናግረዋል። የግብርናውን ዘርፍ ስኬታማ ለማድረግ መንግስት ምቹና አስቻይ ሁኔታዎችን ከመፍጠር ባለፈ ድጋፍ እያደረገ መሆኑንም ገልጸዋል።   የሲዳማ ክልል ምክትል ርዕሰ መስተዳድርና የገንዘብ ቢሮ ሃላፊ ዳዊት ሀዬሶ (ዶ/ር)፤ በክልሉ የግብርና ኢንቨስትመንትን ለማበረታታት የሚያስችሉ ምቹ ሁኔታዎች ተፈጥረው የዘርፉ ልማት እመርታዊ ውጤት እያመጣ መሆኑን ገልጸዋል። በክልሉ ለግብርና ልማት አመች መሬት መኖሩን እንዲሁም ሰፊ የገበያ እድሎች መኖራቸውን አንስተው ሌሎች አልሚዎችም እንዲሳተፉ ጥሪ አቅርበዋል።

አዲስ አበባ፤ ጥቅምት 28/2019 (ኢዜአ) ፦የመንግሥት ኤሌክትሮኒክ ግዥ (e-GP) ሥርዓት የሕዝብና የሀገርን ሃብት በውጤታማ አስተዳደር መምራት እያስቻለ መሆኑን የኢፌዴሪ መንግስት ግዥና ንብረት ባለስልጣን ዋና ዳይሬክተር መሰረት መስቀሌ ገለጹ። ትልቅ ሀገር፤ ትልቅ ሕዝብ፤ ታላቅ ርዕይ የመንግሥት ግዥና ንብረት ባለሥልጣን በተሻሻለው የመንግሥት ግዥና ንብረት አዋጅ፣ የአሠራር መመሪያና የዲጂታል ሥርዓቶች ላይ በቢሾፍቱ ከተማ የግንዛቤ ማስጨበጫ መድረክ እያካሄደ ነው።   መድረኩም የግዥና የንብረት አስተዳደር ውጤታማነትን በማሳደግ ግልጽና ተጠያቂነት ያለው የአፈጻጸም ሥርዓት በመዘርጋት ልምድን ለመለዋወጥና የቀጣይ የጋራ ሥራን ለመወሰንም ያለመ ነው። የባለሥልጣኑ ዋና ዳይሬክተር መሰረት መስቀሌ እንዳሉት፤ ባለሥልጣኑ የግዥ ሥርዓቱን ዲጂታላይዝ በማድረግና በማዘመን ከእጅ ንክኪ ነፃ የሆነ አሠራር ተግብሯል። በግዥና ንብረት አስተዳደር የተያዘው ሀገራዊ ርዕይ ለማሳካት የተቋማትን አቅም፣ እውቀትና ልምድ በመደመር እሳቤ በማቀናጀት ውጤታማ ሥራን ማሳለጥ ያስፈልጋል ብለዋል። የመደመር እሳቤ የፈጠረው የዲጂታል ኢኮኖሚ ሥርዓትም በፌዴራል ተቋማት የኤሌክትሮኒክ የግዥ ሥርዓት ተግባራዊ የሆነበትን ዕድል ፈጥሯል። የመንግሥት ግዥ የሀገርና ሕዝብን ሀብት በብቃት ለመጠቀም፣ የልማት ግቦችን ለማሳካትና የሕዝብ አገልግሎትን ለማሻሻል ወሳኝ ስትራቴጂያዊ መሣሪያ መሆኑን ጠቁመዋል።   የመንግሥት ኤሌክትሮኒክ ግዥን (e-GP) የአሠራር ሥርዓቱንም ከፌዴራል ተቋማት አልፎ ወደ ክልሎችና ከተማ አስተዳደሮች በማስፋት ሥራ ላይ እንዲውል መደረጉን ተናግረዋል። ከክልሎችና ከተማ አስተዳደሮች ጋር የተጣጣመ የሕግ ማዕቀፍ እንዲኖር ለማድረግም የተቋማትን አቅም በማሳደግ የዲጂታል ሥራዎችን ውጤታማነት ለማላቅ እየተሠራ መሆኑን አንስተዋል። የግዢና ንብረት አስተዳደር አዋጁም በሀገር አቀፍ ደረጃ ወጥነት ያለው ውጤታማ የአሠራር ሥርዓት ለመዘርጋት ወሳኝ እንደሆነም አስገንዝበዋል። ክልሎችና ከተማ አስተዳደሮችም የራሳቸውን የሕግና የአሠራር ማዕቀፍ እንዲያዘጋጁ የሚያግዝ ሞዴል መመሪያ ሥርዓት መዘጋጀቱን አብራርተዋል። በቀጣይም የፌዴራል፣ የክልልና ከተማ አስተዳደር ተቋማትን ቅንጅት በማጠናከር የዲጂታል ግዥ ሥርዓት ማስፋፋት፣ የተቋማትን አቅም ማጎልበት፣ የአፈጻጸም ክትትልና ተጠያቂነትን መጠናከር እንዳለበት አሳስበዋል።

ጂንካ፤ ጥቅምት 28/2019 (ኢዜአ)፡- በጂንካ ከተማ የሌማት ትሩፋት መርሐ ግብር የዓሳ እርባታን ውጤታማ በማድረግ ሥርዓተ ምግብን ከማጎልበት ባሻገር የገቢ ምንጭን እያሳደገ መሆኑን በዓሳ ዕርባታ ላይ የተሰማሩ ግለሰቦችና ተቋማት ገለጹ። የሌማት ትሩፋት ኢንሼቲቭ የምግብ ዋስትናን ከማረጋገጥ ባለፈ የዜጎችን የአመጋገብ ስርዓት በማሻሻል በገበታቸው የተመጣጠነ ምግብ መመገብ እንዲችሉ እገዛ እያደረገ ነው። በጂንካ ከተማ በሌማት ትሩፋት መርሐ ግብር በዓሳ እርባታ ስራ የተሰማሩ ግለሰቦችና ተቋማትም በመርሐ ግብሩ አማካኝነት በዘመናዊ መልክ የሚያከናውኑት የዓሳ እርባታ ስራ ውጤታማ እያደረጋቸው መሆኑን ለኢዜአ ገልጸዋል። ተጠቃሚዎቹ አክለውም፣ በከተማው የሌማት ትሩፋት መርሐ ግብር የዓሳ እርባታን ውጤታማ በማድረግ ስርዓተ ምግብንና የገቢ ምንጭን እያሳደገ ነው ብለዋል። የኔሪ ወንዝን በመጥለፍ በከተማው በአነስተኛ ቦታ ላይ በዘመናዊ መልክ የዓሳ እርባታ ስራን እያከናወነ የሚገኘው የጂንካ ከተማ ነዋሪው ሙሴ ሽፈራው፣ በከተማ ግብርና በተፈጠረለት ግንዛቤ በ2000 የዓሳ ጫጩቶች የጀመረው የእርባታ ስራ ውጤታማ እንዳደረገው ገልጿል።   የከተማው ግብርና ጽህፈት ቤት ከውሃ ገንዳ አዘገጃጀት፣ ከዓሳ እንክብካቤ፣ አያያዝና አመጋገብ ላይ ስልጠና ማግኘቱን ጠቁሞ፣ በጊቢው ዓሳ በማርባት ለግለሰቦችና ለተቋማት የዓሳ ጫጩቶችን በማከፋፈል ጭምር ገቢ እያገኘ መሆኑን ተናግሯል። አሁን ላይ የዓሳዎች ቁጥር እያደገ መምጣቱን ጠቁሞ፣ ለተቋማት ጫጩቶችን በማቅረብ ድጋፍ እያደረገ እንደሚገኝም ገልጿል። በከተማው በሌማት ትሩፋት መርሐ ግብር በዓሳ እርባታ ስራ ላይ ከተሰማሩ ተቋማት የጂንካ ማረሚያ ተቋም አንዱ ሲሆን፣ የተቋሙ አዛዥ ኮማንደር አስቻለው ነሬሬ የዓሳ እርባታው ከታራሚዎች አልፎ ለአካባቢው ማህበረሰብ ጥቅም እየሰጠ ነው ብለዋል።   ታራሚዎች በአነስተኛ ዋጋ ዓሳ በመግዛት መመገብ እንዲችሉ መደረጉን ጠቁመው፣ በዓሳ እርባታው ላይ የተሰማሩ ታራሚዎችም ለአካባቢው ማህበረሰብ ጭምር ዓሳ በማቅረብ ገቢ እንዲያገኙ መደረጉን ገልጸዋል። የጂንካ ፖሊ ቴክኒክ ኮሌጅ በበኩሉ በጊቢው ለተግባር ልምምድ እገዛ እንዲያደርግ በዘመናዊ መልክ የዓሳ እርባታ ስራ እያከናወነ እንደሚገኝ የገለጹት ደግሞ የኮሌጁ ዲን አቶ ካሳሁን ጌታቸው ናቸው።   ኮሌጁ ለአካባቢው ማህበረሰብ በተግባር የተደገፈ ትምህርት በመስጠት የግብርና ስራውን ለማዘመንና የምግብ ዋስትናን ለማረጋገጥ እየሰራ እንደሚገኝ ገልጸዋል። በጂንካ ከተማ አስተዳደር ግብርና ዩኒት የዓሳ እርባታ ስራ ሂደት ባለሙያ ሳሊማ ከድር፣ በከተማው ዘጠኝ የሚሆኑ ተቋማትና ግለሰቦች በዓሳ እርባታ ስራ ላይ መሰማራታቸውን ጠቁመዋል።   በአካባቢው ከዚህ ቀደም የዓሳ እርባታ ስራ እምብዛም እንደማይታወቅ ጠቅሰው፣ አሁን በተቋማትና ግለሰቦች የዓሳ እርባታ ስራው እውቅና እያገኘ መምጣቱን ተናግረዋል። በዓሳ እርባታ ላይ የክህሎት ስልጠና በመስጠት ግለሰቦችንና ተቋማትን የማብቃት ስራ እየሰሩ መሆኑን ጠቁመው፣ ከሌሎች አካባቢዎች የዓሳ ጫጩቶችን ጭምር በማምጣት ድጋፍ እያደረጉ እንደሚገኙም አስረድተዋል።

ጅማ፣ ጥቅምት 28/2019 (ኢዜአ)፡- በደቡብ ምዕራብ ኦሮሚያ ዞን እየተሰበሰበ ካለው የሩዝ ሰብል ከ23 ነጥብ 8 ሚሊዮን ኩንታል በላይ ምርት እንደሚጠበቅ የዞኑ ግብርና ጽሕፈት ቤት ገለጸ።   የዞኑ ግብርና ጽሕፈት ቤት ኃላፊ አቶ ቲጃኒ ተማም ለኢዜአ እንደገለፁት፣ በዞኑ በ2018/19 ምርት ዘመን መኸር ወቅት ከ594 ሺህ 400 ሄክታር በላይ መሬት በሩዝ ሰብል ለምቷል። አሁን ላይ በዞኑ በሁሉም ወረዳዎች የደረሰ የሩዝ ሰብል የመሰብሰብ ሥራ እየተከናወነ መሆኑን ተናግረዋል።   የሩዝ ሰብል የመሰብሰብ ሥራው በኮምባይነር የታገዘ በመሆኑ የምርት ብክነትን ለመከላከል ያስችላል ብለዋል። በዞኑ በመኸር ወቅቱ ከለማውና በመሰብሰብ ላይ ካለው የሩዝ ሰብል ከ23 ነጥብ 8 ሚሊዮን ኩንታል በላይ ምርት እንደሚጠበቅ አስታውቀዋል።   በዞኑ ሊሙ ኮሳ ወረዳ ሩዝ ከሚያለሙ አርሶ አደሮች መካከል አቶ ናስር ጀማል፣ የሩዝ ልማቱ ከመጀመሪያው ጀምሮ በጥንቃቄና በባለሙያዎች ድጋፍ መከናወኑ ለሰብሉ ጥሩ ዕድገት አስተዋጽኦ ማድረጉን ተናግረዋል። ሰብላቸው በጥሩ ሁኔታ አድጎ እየተሰበሰበ መሆኑን የጠቀሱት አርሶ አደሩ፣ ከሩዝ ልማቱ ተጠቃሚ መሆናቸውን ገልጸዋል።   አርሶ አደር ፀጋዬ ሰይፉ በበኩላቸው፣ ሩዝን በተደራጀ መንገድ ማልማታቸው ተጠቃሚነታቸውን እንዳሳደገው አመልክተዋል። በዘንድሮው ዓመት የተሻለ ምርት እንደሚጠብቁ ጠቅሰው፣ በግብርና ጽሕፈት ቤት ድጋፍ ምርቱ በኮምባይነር የሚሰበሰብ መሆኑ ያለብክነት ለገበያ ለማቅረብ ምቹ ሁኔታ እንደሚፈጥርላቸው ተናግረዋል።

አዲስ አበባ፤ ጥቅምት 28/2019 (ኢዜአ)፦ በመዲናዋ የተገነቡ የተለያዩ ዘመናዊ የመሠረተ ልማት አውታሮች የመዲናዋን የትራንስፖርት ሥርዓት ማዘመናቸውን የአዲስ አበባ ከተማ ትራንስፖርት ቢሮ ገለጸ። የመደመር መንግሥት ለከተሞዋ ልማት በሰጠው ትኩረት ዘርፈ ብዙ ፋይዳ ያላቸው የልማት ሥራዎች ተከናውነዋል። በተለይም የኮሪደር እና የወንዝ ዳርቻ ልማት የከተሞችን የቀድሞ ገጽታ በመቀየር ለዜጎች ምቹ፣ ጽዱ እና ተስማሚ አኗኗርን መፍጠር ችለዋል። የዚህ በጎ ለውጥ ዋና አብነት የሆነችው አዲስ አበባ ከተማ፣ ቀደም ሲል በእግረኛ መንገድ እና በፓርኪንግ እጥረት ምክንያት ያጋጥሙ የነበሩ የትራፊክ አደጋዎችን በከፍተኛ ደረጃ መቅረፍ ተችሏል።   የአዲስ አበባ ከተማ ትራንስፖርት ቢሮ ምክትል ቢሮ ኃላፊ አቶ ዳኛቸው ሽፈራው ለኢዜአ እንዳሉት፣ በመዲናዋ የተከናወኑ ፈጣን እና አስደናቂ የልማት ሥራዎች ተስማሚ እና ደህንነቷ የተረጋገጠ ተመራጭ ከተማ አድርጓታል። በተለይም በኮሪደር ልማት ሰፋፊ የእግረኛ መንገዶች መገንባታቸው በእግር የመጓዝ ልምድን በማዳበር አዲስ የህይወት ዘይቤን አምጥቷል ብለዋል። ይህም ለጤና፣ ለወጪ እንዲሁም ለአየር ብክለት መቀነስ ከፍተኛ አስተዋጽኦ እያበረከተ ይገኛል። ከዚህ ቀደም በከተማዋ ያልተለመዱ እንደ ስኩተርና ሳይክል የመሰሉ የሞተር አልባ ትራንስፖርት አገልግሎቶች አሁን ላይ በስፋት መጀመራቸውንም ጠቅሰዋል።   እነዚህ አዳዲስ አማራጮች የነዋሪዎችን የትራንስፖርት እንግልት ከመቅረፋቸው ባሻገር አረንጓዴ ትራንስፖርትን ለመገንባት ትልቅ ፋይዳ እንዳላቸው ተናግረዋል። በአጠቃላይ የተከናወኑት የልማት ሥራዎች የከተማዋን የትራንስፖርት አማራጮች በማስፋት የነዋሪዎችን የዕለት ተዕለት ሕይወት እያቃለሉ ይገኛሉ ብለዋል። በከተማዋ ቀደም ሲል ከሁለት የማይልበጡ ፓርኪንጎች ብቻ የነበሩ መሆኑን አስታውሰው፣ አሁን ግን በአንድ ጊዜ በሺዎች የሚቆጠሩ ተሽከርካሪዎችን ማስተናገድ የሚችሉ በርካታ ፓርኪንጎች መገንባታቸውን አብራርተዋል። ይህም ተሽከርካሪዎች አለአግባብ በመንገድ ላይ በመቆም ያጋጥም የነበረውን የትራፊክ አደጋ መከላከሉን አንስተዋል።   አሁን የተገነቡት የህንፃ ሥር ተርሚናሎች እና ዘመናዊ ፓርኪንጎች በአደጉት አገሮች እንደሚታየው የከተማዋን መልክ በማስተካከል የትራፊክ ደኅንነትን ማረጋገጥ ችለዋል ብለዋል። እነዚህ አዳዲስ መሠረተ ልማቶች የከተማዋን የትራንስፖርት ሥርዓት ዘመናዊና ቀልጣፋ በማድረግ ረገድ ትልቅ ለውጥ እያመጡ መሆኑን አቶ ዳኛቸው አረጋግጠዋል። እግረኞች በሚበዙባቸው ስፍራዎች ከመሬት በታች መተላለፊያዎች መገንባታቸውን ገልጸው፤ ይህም የከተማዋን የትራፊክ እንቅስቃሴ ደኅንነቱ የተጠበቀና ቀልጣፋ ለማድረግ ከፍተኛ አስተዋጽኦ ማበርከቱን አብራርተዋል።

አርባምንጭ፣ ጥቅምት 28/2019 (ኢዜአ)፡- የደቡብ ኢትዮጵያ ክልል ርዕሰ መስተዳድር ተስፋዬ በልጅጌ (ዶ/ር) የክልሉን የበጋ መስኖ ስንዴ ልማት አስጀመሩ። የክልሉ ርዕሰ መስተዳድር ተስፋዬ በልጅጌ (ዶ/ር) በተገኙበት የደቡብ ኢትዮጵያ ክልል የ2019 የበጋ መስኖ ስንዴ ልማት ማስጀመሪያ መርሃ-ግብር በጋሞ ዞን ተካሂዷል።   የማስጀመሪያ መርሀ ግብሩ "የውሃ ፀጋችንን አሟጠን በመጠቀም ከዝናብ ጥገኝነት የተላቀቀ ግብርናን እውን ለማድረግ እንሠራለን" በሚል መሪ ሃሳብ ነው፡፡ በመርሃ-ግብሩ ላይ የክልል፣ የጋሞ ዞንና የአርባምንጭ ዙሪያ ወረዳ የመንግስት የስራ ሃላፊዎች እና አርሶ አደሮች ተገኝተዋል።   ርዕሰ መስተዳድሩ በአርባምንጭ ዙሪያ ወረዳ ሉሲ እርሻ ልማት ድርጅት እየለማ የሚገኝ የማንጎ ማሳንም ጎብኝተዋል፡፡  

በኢትዮጵያ የኮሪደር ልማት የተጀመረው በጠቅላይ ሚኒስትር ዐቢይ አሕመድ (ዶ/ር) ሀሳብ አመንጪነት ነው። የኮሪደር ልማት የተጀመረባት ከተማ የአፍሪካ መዲናዋ አዲስ አበባ ናት። በመዲናዋ የተገኘውን ምርጥ ተሞክሮ በመውሰድ ወደ ክልል ከተሞች እንዲስፋፋ ተደርጓል። ይህ ዘመናዊ የከተማ ልማት ስራ የህዝብ ተጠቃሚነት፣ የአካባቢ ጥበቃ እና የኢኮኖሚ እድገትን ያጣመረ አዲስ ምዕራፍ ፈጥሯል። የህዝብን የኑሮ ዘይቤ ማሻሻል፣ ለአካል ጉዳተኞችና እግረኞች ምቹ የሆኑ መንገዶችን መፍጠር፣ የአረንጓዴ ስፍራዎችን ማስፋፋት እና ከተማዋን ለነዋሪዎቿም ሆነ ለጎብኝዎች ምቹ፣ ፅዱ እና ሁሉንም አካታች የማድረግ ስራ ትኩረት ተሰጥቶታል። በአዲስ አበባ እየተከናወነ የሚገኘው የኮሪደር ልማት ስራ መዲናዋን እንደ ስሟ አዲስ በማድረግ ገጽታዋን በፍጥነት እንዲቀየር አድርጓል። በከተማ ከተሰሩ የኮሪደር ልማቶች መካከል የፒያሳ - አራት ኪሎ - ካዛንቺስ መስመር ይጠቀሳል። ይህ መስመር ጥንታዊውንና ታሪካዊውን የከተማዋን ማዕከል ከዘመናዊ የስነ-ህንጻ ጥበብ ጋር ያቀናጀ ሲሆን፣ ሰፋፊ የእግረኛ መንገዶች፣ የብስክሌት መስመሮች እና ማራኪ የጎዳና ላይ መብራቶች ተገጥመውለት የመዲናዋ ዋነኛ የቱሪስትና የንግድ መናኸሪያ ሆኗል። የቦሌ - መስቀል አደባባይ ኮሪደር የመንገድ መሰረተ-ልማቱ ደረጃውን የጠበቀ እንዲሆን ከማድረጉም በላይ፣ ዘመናዊ መናፈሻዎች እና የህዝብ ማረፊያ ቦታዎች ተገንብተው የምሽት ኢኮኖሚው በከፍተኛ ሁኔታ እንዲነቃቃ አድርጓል። በሌላ በኩል ከፍተኛ የትራፊክ መጨናነቅ ይስተዋልበት የነበረው የሜክሲኮ - ሳርቤት ኮሪደር ከመሬት በታች የሚተላለፉ ዘመናዊ የፍሳሽና የኬብል መስመሮችን (Utility Ducts) በመዘርጋት እና መንገዶቹን በማስፋፋት የከተማዋን የትራንስፖርት ፍሰት በከፍተኛ ደረጃ አቅልሏል። የለገሃር-አምባሳደር-ጊዮን-ኢሬቻ-ባምቢስ የወንዝ ዳርቻ ኮሪደር ልማት ፕሮጀክት ለመዲናዋ ሌላ አዲስ ውበት ሰጥቶታል። ይህ ግዙፍ ፕሮጀክት የአካባቢ ጥበቃን፣ ዘመናዊ መናፈሻዎችን እና የህዝብ መዝናኛዎችን ያካተተ ነው። ልማቱ ዘመናዊ፣ አረንጓዴ እና ሁሉንም አካታች የሆነች አዲስ አበባን የመገንባት ራዕይ እውን የሚያደርግ ትልቅ ፕሮጀክት ነው። ይህ ልዩ የኮሪደር ልማት አዳዲስ የኢኮኖሚ ዕድሎችንም መፍጠር ያስቻለ ነው። በአጠቃላይ የኮሪደር ልማት አዲስ አበባን የአፍሪካ መዲናነቷን የሚመጥን የዲፕሎማሲና የቱሪዝም ማዕከል አድርጓታል።

ኢትዮጵያ ፈተናዎችና ተግዳሮቶችን በአይበገሬነትና በብቃት በመሻገር፣ በታቀዱ እና ስትራቴጂካዊ በሆኑ ሀገራዊ ፕሮግራሞች አማካኝነት ውጥኖቿን በተግባር ማሳካት የምትችል ታላቅ ሀገር መሆኗን እያረጋገጠች ትገኛለች። ባለፉት ጥቂት ዓመታት ውስጥ ያስመዘገበቻቸው ሁለንተናዊ ድሎች፣ ታላላቅ ራዕዮች ወደ ተጨባጭ ውጤት መለወጥ እንደሚችሉ ማሳያ ናቸው። ሀገሪቱ በኢኮኖሚ፣ በአካባቢ ጥበቃ፣ በግብርና፣ በቴክኖሎጂ፣ በመሠረተ ልማትና በአቪዬሽን ዘርፎች ያስመዘገበቻቸው ስኬቶች የዚህ ማረጋገጫዎች ናቸው። በሀገር በቀል የኢኮኖሚ ማሻሻያ ፕሮግራም አማካኝነት የተመዘገበው ስኬት የሀገሪቱን የመፈጸም አቅም በግልጽ ያሳያል። በታሪክ ለመጀመሪያ ጊዜ አጠቃላይ የሸቀጦች ወጪ ንግድ ባለፈው በጀት ዓመት 11 ቢሊዮን ዶላር የደረሰ ሲሆን፣ ይሄም ለ17 ዓመታት የተገኘውን ገቢ ድምር (ማለትም ከ1984 እስከ 2000 ዓ.ም) ያለውን በአንድ ዓመት ብቻ ያሳካም ነው ። የተወሰደውን የፖሊሲ ማሻሻያ ተከትሎ የሀገሪቱ የውጭ ምንዛሬ ክምችት ከሃያ እጥፍ በላይ ዕድገት አሳይቷል። በግብርናው ዘርፍ የተመዘገበው ምርታማነት ዕድገት ሀገሪቱ ከጥገኝነት ተላቃ ራሷን መቻል እንደምትችል ያሳየችበት ሌላው ስኬት ነው። ኢትዮጵያ ለብዙ አሥርት ዓመታት ስንዴን ከውጭ በዕርዳታና በግዢ ታስገባ የነበረ ቢሆንም፣ በበጋ መስኖ ስንዴ ልማት ባደረገችው ከፍተኛ ርብርብ ራሷን ችላ ምርቱን ወደ ውጭ መላክ ጀምራለች። በተጨማሪም በሌማት ትሩፋት መርሐ-ግብር በተከናወኑ ዘመናዊ የግብርና ሥራዎች ለስርዓተ ምግብ መጠናከር የበኩሉን ሚና እየተወጣም ይገኛል። ይሄንን ተሞክሮዋን ለአፍሪካውያን እና ለተለያዩ የዓለም ክፍሎች እያጋራች ትገኛለች ። በተጨባጭ ወደ ኢትዮጵያ በመምጣትም የልምድ ልውውጥ ለማድረግ ለሚሹ አካላት የስኬቷን እንዴትነት እያሳየች ልምዷንም ታካፍላለች። ከሳምንታት በፊት ወደ አዲስ አበባ በመምጣት የኢትዮ ናይጄሪያ የስነ ምግብ አመራር የልምድ ልውውጥ/Nigeria-Ethiopia Nutrition Leadership Exchange/ ለማድረግ የመጡትን የናይጄሪያ ምክትል ፕሬዝዳንት ካሺም ሼቲማ እና ልኡካቸውን ጨምሮ የኢትዮጵያ የምግብ ሉዓላዊነት የማረጋገጥ ተሞክሮ ወስደዋል። ይህ በግብርና የታየው አቅም በአረንጓዴ አሻራ ኢኒሼቲቭም ተደግሟል። ባለፉት ስምንት ዓመታት በመርሐ ግብሩ አማካኝነት ከ56 ቢሊዮን በላይ ችግኞች የተተከሉ ሲሆን፣ በአንድ ጀምበር ብቻ ከ26 ሚሊዮን በላይ ሕዝብ በማሳተፍም 805 ነጥብ3 ሚሊዮን ችግኞችን በመትከል አስደማሚ ስኬት ተመዝግቧል። ይህ ታላቅ ሀገራዊ ንቅናቄ የሀገሪቱን የደን ሽፋን ከነበረበት 17 ነጥብ 2 በመቶ ወደ 23.6 በመቶ ከፍ በማድረግ የአየር ንብረት ለውጥን በተጨባጭ መከላከል እንደሚቻል በተግባር አስመስክሯል። የግዙፍ መሠረተ ልማቶች ግንባታ አፈጻጸም ኢትዮጵያ የጀመረችውን ዳር ማድረስ የምትችል ፅኑ ሀገር መሆኗን ይመሰክራል። በኢትዮጵያውያን ገንዘብ፣ ጉልበትና ዕውቀት ተገንብቶ በአሁኑ ወቅት ኃይል ማመንጨት የጀመረው ታላቁ የኢትዮጵያ ሕዳሴ ግድብ እና ግንባታ ላይ የሚገኘውና 1 ሺህ 800 ሜጋ ዋት የማመንጨት አቅም ያለው የኮይሻ የሃይድሮ ኤሌክትሪክ ፕሮጀክት የዚህ እውነት ሕያው ምስክሮች ናቸው። በአቪዬሽን ዘርፍ የተመዘገቡት ዓለም አቀፋዊ ስኬቶችም የሀገሪቱን ስትራቴጂካዊ ተወዳዳሪነት ይበልጥ የሚያጎሉ ናቸው። በ12 ነጥብ 5 ቢሊዮን ዶላር ወጪ ግንባታው የተጀመረው አዲሱ የቢሾፍቱ ሜጋ አየር ማረፊያ (BIA) የኢትዮጵያ አየር መንገድን የመንገደኞች የማስተናገድ አቅም በዓመት ወደ 60 ሚሊዮን የሚያሳድግ ሲሆን፣ ይህም የሀገሪቱን የአፍሪካ የአቪዬሽን ማዕከልነት ያጠናክራል። ከዚህ ጎን ለጎን የዓለማችን ግዙፉ የአቪዬሽን ኩባንያ ቦይንግ (Boeing) የአፍሪካ አህጉራዊ ዋና መሥሪያ ቤቱን በአዲስ አበባ መክፈቱ፣ ኢትዮጵያ ያሰበችውን የረጅም ጊዜ ስትራቴጂካዊ ዕቅድ ማሳካት የምትችልና በዓለም አቀፍ ደረጃ ከፍተኛ ተአማኒነት ያላት ሀገር መሆኗን በይፋ የሚያረጋግጥ ታላቅ ምዕራፍ ነው።

አዲስ አበባ ፤ ጥቅምት 27/2019 (ኢዜአ) ፦ በኢትዮጵያ በመደመር ፍልስፍና በማዕድን ዘርፍ የተመዘገበው ዕመርታ የሀገሪቱ የፖለቲካና ኢኮኖሚ ሽግግር ማሳያ መሆኑን የማዕድን ሚኒስትር ዓለምፀሐይ ጳውሎስ ገለጹ። ትልቅ ሀገር፤ ትልቅ ሕዝብ፤ ታላቅ ርዕይ 2ኛው የአፍሪካ ፖለቲካ ፓርቲዎች ጉባዔ "ዕድገትን መምራት፡ ፖለቲካ ፓርቲዎች እንደ የአፍሪካ መጻኢ ኢኮኖሚ መሃንዲሶች" በሚል መሪ ሀሳብ በዓድዋ ድል መታሰቢያ መካሄድ ጀምሯል። በጉባኤው መክፈቻ ላይ ጠቅላይ ሚኒስትር ዐቢይ አሕመድ (ዶ/ር)፣ በርካታ የአፍሪካ ሀገራት የፖለቲካ ፓርቲ አመራሮች፣ ከፍተኛ የመንግሥት የሥራ ኃላፊዎችና ተጋባዥ እንግዶች ታድመዋል። ከዚህም ባሻገር "የአፍሪካ የተፈጥሮ ሀብት ከብዝበዛ ወደ ኢኮኖሚ አቅም" በሚል ርዕሰ ጉዳይ ላይ የፓናል ውይይት ተደርጓል። የማዕድን ሚኒስትር ዓለምፀሐይ ጳውሎስ በዚህ ወቅት እንዳሉት፤ የአፍሪካ ዕምቅ የተፈጥሮ ሀብትና ማዕድናት ለብዙ ዓመታት የሌሎች ሀገራት የሀብት ምንጭ ሆነው ቆይተዋል። አፍሪካ ያላትን የማዕድን ሀብት እሴት ከመጨመርና ከማቀነባበር ይልቅ ጥሬውን ወደ ውጭ እየላከች ስትበዘበዝ ኖራለች ብለዋል። አፍሪካ የማዕድን ሀብት፣ አቅም፣ ካፒታል፣ ዕውቀት እንዳላት አስታውሰው፤ ነገር ግን ሀብቷን ሌሎች ሲጠቀሙበት እንደነበር ገልጸዋል። ይሁን እንጂ ከቅርብ ዓመታት ወዲህ አፍሪካ የተፈጥሮ ሀብቷን እሴት በመጨመር፣ ወጣቶችን በክህሎት በማብቃትና በማቀነባበር ጥቅም ላይ ማዋል ጀምራለች ብለዋል። ኢትዮጵያ የማዕድን ማጣሪያ፣ የጋዝ ማምረቻ፣ የነዳጅ ማጣሪያ ፕሮጀክቶችን ሥራ ላይ ማዋል መጀመሯን ገልጸዋል። የተፈጥሮ ሀብታችንን እሴት በመጨመርና በማቀነባበር ለውጭ ገበያ በማቅረብ ኢንዱስትሪው በፍጥነት እንዲያድግ ተደርጓል ብለዋል። የማዕድን ማጣሪያ ፋብሪካው ለአፍሪካ የማዕድን ዘርፍ መነቃቃት ተጨማሪ አቅም የሚፈጥር መሆኑን ገልጸዋል። በኢትዮጵያ ከለውጡ በፊት ለውጭ ገበያ የነበረው የወርቅ ምርት በዓመት 300 ሚሊዮን ዶላር ብቻ እንደነበር ገልጸው፤ በመደመር እሳቤ ዘርፉ እመርታ በማስመዝገብ ወደ 5 ነጥብ 6 ቢሊዮን ዶላር አድርጓል ብለዋል። የመደመር ፍልስፍና ያመጣው የሚታይና የሚጨበጥ ለውጥ የኢትዮጵያ የፖለቲካና ኢኮኖሚ ሽግግር ማሳያ መሆኑን ገልጸዋል። ኢትዮጵያ ውስጥ በገጠርና በከተማ ኮሪደር ልማት፣ በመሠረተ ልማት ግንባታ፣ ስምንት ሚሊዮን ሕፃናትን በቀን ሁለት ጊዜ በመመገብ በህዝብ ዘንድ እምነት የሚጣልበት ሥርዓት ተፈጥሯል ብለዋል። በኢትዮጵያ ወጣቶችን በቴክኒክና ሙያ ሥልጠና በማብቃት ዜጎችን የልማቱ ተሳታፊ በማድረግ የሚታይና የሚጨበጥ ግልጽነት መፈጠሩንም ገልጸዋል።

አዲስ አበባ፤ ጥቅምት 27/2019 (ኢዜአ):- የሀገርን ዕድገት ለማፋጠን ወጣቶችን በኃላፊነትና ውሳኔ አሰጣጥ በማብቃት አዳዲስና ተተኪ መሪዎችን ማፍራት አለብን ሲሉ የብልፅግና ፓርቲ ፕሬዝዳንትና የኢፌዴሪ ጠቅላይ ሚኒስትር ዐቢይ አሕመድ (ዶ/ር) ገለጹ። ጠንካራ መሪዎች ተተኪዎችን ማዘጋጀት ባልተቻለበት ወቅት ሀገራት የዕድገት ፍጥነታቸውን ሲያጡ ተመልክተናል ሲሉም አጽንኦት ሰጥተዋል።   ትልቅ ሀገር፤ ትልቅ ሕዝብ፤ ታላቅ ርዕይ 2ኛው የአፍሪካ ፖለቲካ ፓርቲዎች ጉባዔ "ዕድገትን መምራት ፖለቲካ ፓርቲዎች እንደ የአፍሪካ መጻኢ ኢኮኖሚ መሃንዲሶች" በሚል መሪ ሀሳብ በዓድዋ ድል መታሰቢያ መካሄድ ጀምሯል። የብልፅግና ፓርቲ ፕሬዝዳንትና የኢፌዴሪ ጠቅላይ ሚኒስትር ዐቢይ አሕመድ (ዶ/ር) ባስተላለፉት መልዕክት፤ የብልፅግና ፓርቲ በመደመር ፍልስፍና የተለያዩ አቅሞችን በማቀናጀት የህዝብን ጥንካሬ ለጋራ ዓላማ በማሰባሰብ አስደማሚ ስኬትን እያመጣ መሆኑን ገልጸዋል። ኢትዮጵያ ከዓመታት በፊት በመደመር እሳቤ የተለያዩ ክልላዊ የፖለቲካ ድርጅቶች አንድ ሀገራዊ ፓርቲ ማምጣት እንደተቻለ አስረድተዋል። በአሁኑ ወቅትም ወደ 17 ሚሊዮን የሚጠጉ ኢትዮጵያውያን የብልፅግና ፓርቲ አባላት መሆናቸውን አስረድተዋል። በዘንድሮው ምርጫም በሕዝብ ተወካዮች ምክር ቤት ከሚገኙት ወንበሮች 15 በመቶው ላይ እጩዎችን ላለማቅረብ በመወሰን የተፎካካሪ ፓርቲ መሪዎችን በማካተት አዲሱን የመደመር መንግሥት መስርተናል ብለዋል። በተፎካካሪ ፓርቲዎች መካከል የፖሊሲ ልዩነትና የማያግባቡ ጉዳዮች ቢኖሩም በሀገራዊ ጉዳዮች ላይ በትብብር ከመስራት የሚያግድ ነገር እንደሌለ በተግባር ማስመስከር እንደተቻለ አንስተዋል። ሕዝብን ማገልገል ከባድ የኢኮኖሚ ውሳኔዎችን መውሰድ ማለት ነው ያሉት ጠቅላይ ሚኒስትሩ፤ ለዚህም በንግድና ኢንቨስትመንት ምርታማነትና የሥራ ዕድል ተጠቃሚነትን የሚያጎለብት ምቹ ሁኔታ መፍጠሩን ጠቅሰዋል።   የኢትዮጵያ ሀገር በቀል የኢኮኖሚ ማሻሻያም የቴሌኮምና የባንክ ኢንዱስትሪውን ለኢንቨስትመንት ክፍት በማድረግ በገበያ የተመሰረተ የውጭ ምንዛሬ ተመን ሥርዓት መፍጠር እንዳስቻለ አብራርተዋል። በዲጂታል ኢኮኖሚ ግንባታም ከ53 ሚሊዮን በላይ ዜጎች የፋይዳ መታወቂያ ባለቤት በማድረግ አርሶአደርና ተማሪን ጨምሮ ማንኛውም ዜጋ ቀልጣፋ አገልግሎት የሚያገኝበትን ዕድል መፈጠሩን አንስተዋል። መደመር ሌሎች የጀመሩትን ሥራ መገንባትንም ይመለከታል ያሉት ጠቅላይ ሚኒስትሩ፤ በሀገር ውስጥና በውጭ የሚኖሩ ኢትዮጵያውያን ለታላቁ የኢትዮጵያ ሕዳሴ ግድብ ግንባታ ያደረጉትን ድጋፍ በመጠቀም ቆሞ የነበረን ፕሮጀክት ማጠናቀቅ እንደተቻለ አስታውሰዋል። በአሁኑ ወቅትም ንጋት ሐይቅን የፈጠረው ሕዳሴ ግድብ በመላው ኢትዮጵያና ለጎረቤት ሀገራት የተረፈ የኤሌክትሪክ ኃይል በረከት እየስገኘ መሆኑን አንስተዋል። በአረንጓዴ ዐሻራ መርሃ ግብርም ባለፉት ዓመታት ከ56 ቢሊዮን በላይ ችግኞችን በመትከል የአየር ንብረት ለውጥን መከላከል፣ ጤናማ አፈርና አስተማማኝ የውሃ አቅርቦት መገንባት እየተቻለ መምጣቱን አንስተዋል። ገዢውና ተፎካካሪ ፓርቲዎች ሕዝቡ እድገታቸውን ሊከታተል በሚችልባቸው ግልጽ ምዕራፎች የተደገፉ የረጅም ጊዜ ግቦች ላይ መስማማት እንዳለባቸውም አስገንዝበዋል። ፖሊሲዎቻችን ሊለያዩ ይችላሉ፤ መራጮችም የሚፈልጉትን ይመርጣሉ፤ ነገር ግን ብሔራዊ ጥቅሞች መንግሥት ቢቀየርም ቀጣይነታቸውን ማስጠበቅ ይገባል ብለዋል። ተፎካካሪዎች ዕቅዱን እየተቹ ግቡን መደገፍ ይችላሉ ያሉት ጠቅላይ ሚኒስትሩ፤ ይህ እቅድ እንዴት ይሰራል? ምን ያህል ወጪ ይጠይቃል? ማንስ ይተገብረዋል? የሚሉትን ጥያቄዎች ማንሳት እንደሚችሉ አስረድተዋል። መንግሥትም ለእነዚህ ጥያቄዎች መልስ መስጠትና ውጤቶችን ለማሻሻል እንደ መነሻ መጠቀም እንዳለበት አብራርዋል። ጠንካራ መሪዎች አዳዲስና ተተኪዎችን ማዘጋጀት ባልቻሉበት ወቅት ሀገራት የዕድገት ፍጥነታቸውን ሲያጡ ተመልክተናል ሲሉም አስገንዝበዋል። ለወጣቶች ኃላፊነት በመስጠት ጥሩ የውሳኔ አሰጣጥ ብቃትና የታማኝነት ባህል መገንባት አለብን፤ ለዚህም ኢትዮጵያ በአፍሪካ የአመራር ልህቀት አካዳሚ አስተዋጽኦ ታደርጋለች ብለዋል። የልህቀት አካዳሚውም ስልጠናውን በመላው አህጉሪቷ ላሉ ሁሉም ፓርቲዎች ክፍት ማድረግን አብራርተዋል።  

አዲስ አበባ፤ ጥቅምት 27/2019 (ኢዜአ):-የአዲስ አበባ ፈጣን እድገትና ዘመናዊ ገጽታ የዓለም አቀፍ ከተሞችን ደረጃ የሚያሟላ መሆኑን የዚምባቡዌው ዲሞክራሲያዊ ለውጥ ንቅናቄ (Movement for Democratic Change) ፓርቲ ፕሬዝዳንት ሴናተር ዳግላስ ምዎንዞራ ገለጹ። ሁለተኛው የአፍሪካ የፖለቲካ ፓርቲዎች ጉባኤ በአዲስ አበባ መካሄዱን ቀጥሏል። የጉባኤው ተሳታፊ የሆኑት የዚምባቡዌው ዲሞክራሲያዊ ለውጥ ንቅናቄ (Movement for Democratic Change) ፓርቲ ፕሬዝዳንት ሴናተር ዳግላስ ምዎንዞራ በኢትዮጵያ በተለይም በመዲናዋ አዲስ አበባ የታየው የመሰረተ ልማት እና ሁለንተናዊ እድገት እጅግ የሚደንቅና ለአህጉሪቱ አገራት ከፍተኛ መነቃቃትን የሚፈጥር መሆኑን ገልጸዋል።   ጉባኤውን አስመልክቶ አስተያየታቸውን የሰጡት የፓርቲው ፕሬዝዳንት፤ አውሮፕላን ማረፊያ ከደረሱበት ቅጽበት ጀምሮ የተደረገላቸው አቀባበል እና እንግዳ ተቀባይነት እንዳስገረማቸው ተናግረዋል።   በተለይም በአገሪቱ እየተከናወነ ያለው የመሰረተ ልማት ግንባታ አስደናቂ ደረጃ ላይ መድረሱን የገለጹት ተወካዩ፤ ከተማዋ ካደጉትና ከበለጸጉ አገራት ከተሞች ጋር የሚስተካከል ገጽታ እየተላበሰች መሆኗን መመልከታቸውን ነው ያመለከቱት። ከጥቂት ዓመታት በፊት የነበረውን ሁኔታ በማስታወስም፣ በአጭር ጊዜ ውስጥ የተመዘገበው ይህ ፈጣን ለውጥ እጅግ እንዳስደነቃቸውና በኢትዮጵያ ያዩት ነገር ትልቅ ተስፋና መነሳሳትን የፈጠረባቸው መሆኑን አስረድተዋል። በተጨማሪም የመሰረተ ልማት ጥራቱ እጅግ የላቀ ከመሆኑም ባሻገር የአዲስ አበባ ከተማ እጅግ ንጹህ እና ውብ መሆኗ ትኩረታቸውን እንደሳበው ጠቅሰው፣ በቆይታቸው እጅግ ደስተኛ መሆናቸውን ሴናተሩ ገልጸዋል።

ዲላ፣ ጥቅምት 27/2019 (ኢዜአ)፡-በደቡብ ኢትዮጵያ ክልል ስድስት ከተሞች የደረቅ ጭነት መናኸሪያዎች ግንባታ ሥራ እየተፋጠነ መሆኑን የክልሉ ትራንስፖርትና መንገድ ልማት አስተዳደር ቢሮ አስታወቀ። የህዝብ መናኸሪያዎችን ደረጃ በማሻሻልና በማዘመን ለህዝብ ቀልጣፋ የትራንስፖርት አገልግሎት ተደራሽ ለማድረግ እየተሰራ መሆኑም ተመላክቷል። በቢሮው የትራንስፖርትና ሎጂስቲክ ዘርፍ ምክትል ቢሮ ሃላፊ ብርሃኑ ጌቦ (ዶ/ር) ለኢዜአ እንደገለጹት በክልሉ በሎጅስቲክስ ዘርፍ የሚስተዋሉ ውሱንነቶችን ለመፍታት በስድስት የክልሉ ከተሞች የደረቅ ጭነት መናኸሪያዎች ግንባታ እየተፋጠነ መሆኑንና በተያዘው በጀት ዓመትም አጠናቆ ለአገልግሎት ለማብቃት እየተሰራ መሆኑን ገልጸዋል። ግንባታቸው እየተፋጠነ ካሉ መናኸሪያዎች መካከል የዲላ እና የጂንካ ከተሞች የደረቅ ጭነት መናኸሪያዎች በቀጣይ አንድ ወር ጊዜ ውስጥ ተጠናቀው ለአገልግሎት ክፍት ይሆናሉ ብለዋል። የተቀሩት የካራት፣ የወላይታ ሶዶ፣ የአርባ ምንጭና ጎፋ መናኸሪያዎች በቀጣይ መቶ ቀናት ለማጠናቀቅ በርብርብ እየተሰራ መሆኑንም ምክትል ቢሮ ሀላፊው አስታውቀዋል። እንደ ብርሀኑ (ዶ/ር) ገለጻ ለዲላ ከተማ መናኸሪያ 60 ሚሊዮን በጀት የተያዘ ሲሆን የጂንካው የደረቅ ጭነት መናኸሪያም በ33 ሚሊዮን ግንባታው እየተፋጠነ ይገኛል። መናኸሪያዎቹ የትራፊክ ፍሰትን ከማቀላጠፍ በተጨማሪ ለተሽከርካሪዎች ደህንነትና ለከተሞች መሰረተ ልማት ጥበቃ የጎላ ድርሻ እንደሚኖራቸውም አመልክተዋል። በተያያዘ በክልሉ ከ68 በላይ የህዝብ መናኸሪያዎች እንዳሉ ያነሱት ብርሀኑ (ዶ/ር)፣ እነዚህ መናኸሪያዎች አስፈላጊ መሰረተ ልማት እና ቴክኖሎጂ የተሟላላቸው ባለመሆኑ ቀልጣፋ አገልግሎት እየሰጡ እንዳልሆነ ገልጸዋል። ችግሩን ለማቃለል በተለያዩ የክልሉ ከተሞች ያሉ የህዝብ መናኸሪያዎችን ደረጃ የማሻሻል ሥራ ትኩረት ተሰጥቶት እንደሚከናወንም አመልክተዋል። በተለይ በህብረተሰብ ተሳትፎ በዲላ፣ ወላይታ ሶዶ እና አርባ ምንጭ ከተሞች ደረጃቸውን የጠበቁ ዘመናዊ መናኸሪያዎችን ግንባታ ለማከናወን የቦታና የዲዛይን ርክክብ ሥራ ተከናውኗል ብለዋል።   ዲላ ከተማ በርካታ የጭነት ተሽከርካሪዎች የሚያርፉበት መሆኑን የገለጹት ደግሞ የዲላ ከተማ ትራንስፖርትና ሎጂስቲክ መምሪያ ሃላፊ አቶ አብነት ሽፈራው ናቸው። በከተማዋ የደረቅ ጭነት ተሽከርካሪዎች መናኸሪያ ባለመኖሩ አሽከርካሪዎች በመንገድ ዳር መኪና ለማቆም መገደዳቸውን ነው የተናገሩት። ይህም ለመንገድ ዳር ትቦዎች መበላሸት፣ ለአስፓልት መንገድ መቦርቦር እና ለመሰረተ ልማት ውድመት ከማጋለጡ ባለፈ በትራፊክ ፍሰቱ ላይ ጫና ማሳደሩን አስረድተዋል። በአሁኑ ወቅት በከተማው ግንባታው በመጠናቀቅ ላይ ያለው የደረቅ ጭነት መናኸሪያ ይህን ችግር ከመፍታት ባለፈ ለወጣቶች የሥራ ዕድል የሚፈጥር መሆኑን ጠቁመዋል። በዲላ ከተማ አሽከርካሪው ወጣት ደረጀ ዓለሙ በበኩሉ ከባድ የጭነት መኪኖች ለረጅም ሰዓት በከተማው ዋና ዋና ጎዳናዎች ላይ መቆማቸው ለትራፊክ አደጋ መንስኤ እየሆኑ መምጣታቸውን ተናግሯል። ለጭነት ተሽከርካሪዎች የማሪፈያ ቦታ መዘጋጀቱ የትራፊክ ፍሰቱን እንደሚያቀላጥፍና የሚያገኙትን ገቢም ያሳድጋል የሚል ተስፋ ማድረጋቸውን ተናግረዋል።