ሰመራ፣ ጥቅምት22/2019 (ኢዜአ):-በአፋር ክልል ያለውን የተፈጥሮ ሀብት ለይቶ ጥቅም ላይ ለማዋል የተጀመሩ ሥራዎች ተጨባጭ ውጤት ማምጣታቸውን የክልሉ ርዕሰ መስተዳድር አወል አርባ ገለጹ። ርዕሰ መስተዳድሩ አቶ አወል አርባ እና ሌሎች የክልሉ ከፍተኛ አመራሮች በገቢ ረሱ ዞን ዱለሳ፣ በሃንሩካ እና ገለአሎ ወረዳዎች የተከናወኑ የመስኖ ልማት ሥራዎችን ዛሬ ተመልክተዋል። በዚህ ወቅት ርዕሰ መስተዳድር አወል እንደገለጹት በወረዳዎቹ እየተከናወኑ ያሉ የግብርና ልማት ሥራዎች የህብረተሰብ ተጠቃሚነትን የሚያሳድጉ ናቸው። ክልሉ ያለውን የተፈጥሮ ሀብት ለይቶ ጥቅም ላይ ለማዋል የተጀመሩ ሥራዎች ተጨባጭ ውጤት እያመጡ መሆናቸውን ገልጸው፣ ዛሬ በወረዳዎቹ በመስኖ ልማት እየተከናወኑ ያሉ ተግባራት ለዚህ ማሳያ ናቸው ብለዋል።   በወረዳዎቹ በመስኖ እየለሙ ካሉ የአትክልትና ፍራፍሬ ልማቶች አርብቶ አደሩ ተጠቃሚነቱን እያሳደገ መምጣቱንም ተናግረዋል። እንደ አቶ አወል ገለጻ፣ በወረዳዎቹ ሰፋፊ የእርሻ መሬቶችን ተረክበው ወደሥራ የገቡ ባለሀብቶችም ለአካባቢው ነዋሪዎች የሥራ ዕድል ከመፍጠር ባለፈ በጥጥና ሙዝ ልማት የግብርና ቴክኖሎጂዎችን እያሸጋገሩ ይገኛሉ። ክልሉ በተለይ በመስኖ ውጤታማ ሥራ መስራት እንደሚቻል የዛሬው የመስክ ምልከታ አንድ ማሳያ ነው ያሉት አቶ አወል፣ ይህም ቀደም ሲል በልማት የነበሩ አመላካከትና ትርክቶች እየተቀየሩ መምጣታቸውን ያሳያል ብለዋል።   በመደመር መንግስት በክልሉ ያለውን የተፈጥሮ ሀብት ለይቶ በአግባቡ ጥቅም ላይ ለማዋል የተጀመሩ ጥረቶች ውጤታማ በመሆናቸው ተጠናክረው ይቀጥላሉ ሲሉም አስታውቀዋል። በውሃና ኢነርጂ ሚኒስቴር የአዋሽ ቤዝን አስተዳደር ጽህፈት ቤት ሀላፊ ኢንጂነር አደን አብዶ በበኩላቸው፣ "በገቢ ረሱ ዞን በተከናወኑ የጎርፍ መከላከል ሥራዎች አካባቢውን ከሥጋት ነፃ እና የልማት ተጠቃሚ ማድረግ ተችሏል" ብለዋል። ለዚህም በዞኑ ዱለሳ፣ ሃንሩካና ገለአሎ ወረዳዎች 4 ሺህ 500 ሄክታር መሬትን ከጎርፍ አደጋ ነፃ በማድረግ ወደምርት ማስገባት መቻሉን አንስተዋል። በአሁኑ ወቅት በወረዳዎቹ ሙዝ፣ በቆሎ፣ ጥጥ፣ ሽንኩርትና ቲማቲም እየለማ መሆኑን ጠቁመው፣ በአካባቢው የውሃ ዕጥረት እንዳይከሰት ለአልሚዎቹ ውሃን በፍትሃዊነት የማከፋፈል ሥራ እየተሰራ ነው ብለዋል። የዱለሳ ወረዳ አስተዳዳሪ አቶ አሊ ደስታ በበኩላቸው እንደተናገሩት፣ በወረዳው በ1ሺህ 28 ሄክታር መሬት ላይ በቆሎ፣ ማሽላ፣ ሽንኩርት፣ ቲማቲምና ጥጥ እየለማ ይገኛል። አርብቶ አደሩ ማህበረሰብ በመስኖ ልማት ተሰማርቶ ውጤታማ መሆኑ ገቢውን በማሳደግ ተጠቃሚ እያደረገው መሆኑን ተናግረዋል። በገለአሎ ወረዳ በጥጥ እና ሙዝ ልማት የተሰማሩት ሁመድ ጅብሪል በበኩላቸው በመሰኖ ልማት ሥራ ተጠቃሚ በመሆናቸው ልማቱን እያስፋፉ መሆናቸውን ገልጸዋል። በዘንድሮው ዓመት ብቻ በ150 ሄክታር መሬት ላይ ሙዝ እንዲሁም በ600 ሄክታር መሬት ላይ ጥጥ እያለሙ መሆናቸውንና ለ630 ሰዎች የሥራ ዕድል መፍጠራቸውን ተናግረዋል።

ደብረ ብርሃን፤ ጥቅምት 22/2019 (ኢዜአ)፡-የአማራ ክልል ከተሞችን ከማስዋብ ጎን ለጎን ለነዋሪዎችና ለጎብኚዎች ምቹ የማድረግ የተቀናጀ የልማት ሥራ እየተከናወነ መሆኑን የክልሉ ርዕሰ መስተዳድር አቶ አረጋ ከበደ ከለጹ። የደብረ ብርሃን ከተማን እድገት ለማፋጠን የሚያስችሉ ከ1 ነጥብ 8 ቢሊዮን ብር በላይ ወጪ የተገነቡ የተለያዩ የመሰረተ ልማት ፕሮጀክቶች ተመርቀው ለአገልግሎት በቅተዋል።   በአማራ ክልል ርዕሰ መስተዳድር አቶ አረጋ ከበደ ዛሬ ተመርቀው ለአገልግሎት ከበቁት የልማት ፕሮጀክቶች መካከል መሶብ የአንድ ማዕከል አገልግሎት፣ የደብረ ብርሀን ከተማ ዘመናዊ የፍሳሽ ቆሻሻ ማጣሪያና ማስወገጃ ፣ የኮሪደር ልማት፣ የከተማ አሥተዳደሩ ፖሊስ መምሪያ ሕንጻ ግንባታና ሌሎች ፕሮጀክቶች ይገኙበታል።   የክልሉ ርዕሰ መሥተዳድር አረጋ ከበደ በዚህ ወቅት እንዳሉት በክልሉ ከተሞችን ከማስዋብ ባለፈ ለነዋሪዎችና ለጎብኚዎች የተመቹ ለማድረግ የተቀናጀ የልማት ሥራ እየተከናወነ ነው። ጽዱ፣ ደኅንነቱ የተጠበቀ እና ጤናው የተጠበቀ ማኅበረሰብ እንዲኖር እንዲህ አይነት የልማት ሥራዎች አስፈላጊ መሆናቸውንም ገልጸዋል። ዛሬ በከተማዋ ከተመረቁት ውስጥ በተለይ የፍሳሽ ቆሻሻ ማጣሪያና ማስወገጃ ፕሮጀክት ጽዱ ከተማን ለመፍጠር ጠቀሜታው የጎላ እንደሆነም አንስተዋል።   መሶብ አንድ ማዕከል አገልግሎትን በማስፋፋትና በዲጂታል የታገዘ አገልግሎት በመስጠት የተገልጋይ እርካታን የማረጋገጥ ሥራም ተጠናክሮ እንደሚቀጥልም አስታውቀዋል። ደብረብርሃን ከተማ ለኢንዱስትሪና ለኢንቨስትመንት ተመራጭ እንደመሆኗ የተገነቡት መሰረተ ልማቶች ባለሀብቱና ማህበረሰቡ ፈጣንና የተሻለ አገልግሎት እንዲያገኙ ያስችላቸዋል ብለዋል። መሰረተ ልማቶቹን በአግባቡ መጠቀም ከተማዋን የኢንዱስትሪ እና የአገልግሎት መስጫ ማዕከል ለማድረግ እንደሚያስችላት ገልጸው፣ ለአገልግሎት የበቁትን ፕሮጀክቶች በአግባቡ መጠበቅ ይገባል ሲሉ አሳስበዋል።   የደብረ ብርሃን ከተማ አስተዳደር ተቀዳሚ ምክትል ከንቲባ አቶ በድሉ ውብሸት እንደገለጹት፣ ደብረ ብርሃን ከተማን በኢንዱስትሪ፣ በኢንቨስትመንትና በቱሪዝም ተመራጭ ለማድረግ እየተሰራ ነው። ዛሬ የተመረቁት መሶብ የአንድ ማዕከል አገልግሎት፣ ዘመናዊ የፍሳሽ ቆሻሻ ማጣሪያና ማስወገጃ፣ የኮሪደር ልማትና ሌሎች ፕሮጀክቶች ለዚህ ማሳያ መሆናቸውን ጠቅሰዋል። የልማት ፕሮጀክቶቹ የከተማዋን አድገት ለማፋጠንና ፍትሃዊ የልማት ተጠቃሚነትን በማረጋገጥ የዜጎችን የኑሮ ደረጃ ለማሻሻል ፋይዳቸው የጎላ መሆኑን ገልጸዋል። ወደሥራ በገባው መሶብ የአንድ ማዕከል አገልግሎት 12 ተቋማት 65 የተለያዩ አገልግሎቶችን መስጠት መጀመራቸውን ጠቁመው፣ ይህም ብልሹ አሰራርን ለማስቀረት ያስችላል ብለዋል።   በምርቃቱ ላይ የአማራ ክልል ምክር ቤት ዋና አፈ ጉባኤ ፋንቱ ተስፋዬ፣ በብልጽግና ፓርቲ የአማራ ክልል ቅርንጫፍ ጽህፈት ቤት ሃላፊ አቶ ይርጋ ሲሳይና ሌሎች ከፍተኛ የስራ ሃላፊዎች ተገኝተዋል።        

ሆሳዕና፤ ጥቅምት 22/2019 (ኢዜአ)፦ በማዕከላዊ ኢትዮጵያ ክልል ግብርናን በማዘመን የማህበረሰቡን ተጠቃሚነት ለማሳደግ በተሰሩ ሥራዎች የተገኙ ውጤቶች ተጠናክረው እንደሚቀጥሉ በምክትል ርዕሰ መስተዳድር ማዕረግ የገጠር ክላስተር አስተባባሪና የክልሉ ግብርና ቢሮ ሀላፊ አቶ ኡስማን ስሩር ገለጹ። በክልሉ ግብርና ቢሮ የምግብ ማጠናከሪያ ፕሮግራም እየተከናወኑ ያሉ ሥራዎችን የተመለከተ የመስክ ምልከታና ውይይት አካሂዷል።   በምክትል ርዕሰ መስተዳድር ማዕረግ የገጠር ክላስተር አስተባባሪና የክልሉ ግብርና ቢሮ ኃላፊ አቶ ኡስማን ስሩር በዚህ ወቅት እንዳሉት በክልሉ ግብርናን በማዘመን የማህበረሰቡን ተጠቃሚነት ለማረጋገጥ በተከናወኑ ተግባራት ውጤት ተመዝግቧል። በመደመር መንግሥት በግብርና ዘርፍ ምርትና ምርታማነትን ይበልጥ በማሳደግ የአርሶ አደሩን ኑሮ ለማሻሻልና ገበያን ለማረጋጋት በተከናወኑ ሥራዎች ተጨባጭ ውጤት መገኘቱንም ገልጸዋል። በዚህም በክልሉ ግብርናን በማዘመን ምርትና ምርታማነትን ከማሳደግ ባለፈ እሴት ጨምሮ ለገበያ በማቅረብ ተጠቃሚነቱን የሚያረጋግጥ ማህበረሰብ እየተፈጠረ መጥቷል ብለዋል።   ለዚህም ባለቤትነታቸው የአርሶ አደር የሆኑ 27 የወተት፣ የማር፣ የእንሰት እና ቅመማ ቅመም ማቀነባበሪያ ኢንዱስትሪዎችን ወደ ሥራ የማስገባት ሥራ መከናወኑን በማሳያነት ጠቅሰዋል። በቀጣይም እነዚህን ውጤቶች አጠናክሮ ለማስቀጠል ትኩረት ተሰጥቶ ይሰራል ብለዋል። በቢሮው የምግብ ሥርዓት ማጠናከሪያ ፕሮግራም ማናጀር አቶ ከድር መሀመድ በበኩላቸው፣ ፕሮግራሙ የግብርና ቴክኖሎጂን ተግባራዊ በማድረግ ምርትና ምርታማነትን የማሳደግ ዋና ዓላማ እንዳለው ገልጸዋል። በበጀት ዓመቱም በክልሉ ከ1 ነጥብ 1 ሚሊዮን በላይ የማህበረሰብ ክፍሎችን በግብርናው ዘርፍ በመደገፍ ተጨባጭ ውጤት ለማስመዝገብ ግብ ተይዞ እየተሰራ መሆኑንም አመልክተዋል። በምዕራብ አዘርነት በርበሬ ወረዳ ሌራ ከተማ ነዋሪ አርሶ አደር ከማል ሀሰን፣ በተያዘው በጀት ዓመት በማር ማቀነባበር ሥራ በኢንተፕራይዝ ተደራጅተው ወደ ሥራ መግባታቸውን ተናግረዋል። በተሰማሩበት ዘርፍ ውጤታማ እንዲሆኑ በመንግሥት ምቹ ሁኔታ እንደተፈጠረላቸው ገልጸዋል። ከመደበኛ የግብርና ሥራቸው ጎን ለጎን ተጨማሪ ገቢ እንዲያገኙ በመንግስት የተፈጠረላቸው ዕድል ነገን በተሻለ ተስፋ አሻግረው እንዲያዩ ያደረጋቸው መሆኑን ተናግረዋል። በመንግሥት የገንዘብ ብድርና የመስሪያ ቦታ ተመቻችቶላቸው በንብ ማነብ ዘርፍ በማህበር ተደራጅተው ወደሥራ እንደገቡ የገለጸው ደግሞ በሌራ ከተማ የፍረኮት የንብ ማነብ ማህበር ሰብሳቢ ወጣት ኡስማን መለሰ ነው። የማር ምርታቸውን በወረዳው ለሚገኝ የማር ማቀነባበሪያ ማዕከል በማቅረብ የተሻለ ገቢ እያገኙ መሆናቸውን ገልጾ፣ የመንግስት ድጋፍ ውጤታማ እያደረጋቸው መሆኑን ተናግረዋል። በመስክ ምልከታውና የውይይት መድረክ ላይ ከክልል እስከ ወረዳ ያሉ አመራሮች፣ አርሶ አደሮች እና የሚመለከታቸው አካላት ተሳትፈዋል።

አዳማ ፣ጥቅምት 22/2019( ኢዜአ)፡- በደቡብ ምስራቅ ኦሮሚያ ዞን በዘንድሮው የመኸር አዝመራ የሚጠበቀውን ምርት ለማሳካት የሰብል እንክብካቤና ጥበቃ ስራ በትኩረት እየተከናወነ እንደሚገኝ የዞኑ ግብርና ጽሕፈት ቤት አስታወቀ። ደቡብ ምስራቅ ኦሮሚያ ዞን በዋናነት በስንዴ፣ በጤፍ፣ በበቆሎ፣ በገብስ እና በቦሎቄ ምርታማነቱ የሚታወቅ ነው። የዞኑ ግብርና ጽህፈት ቤት ከአርሶ አደሩ ጋር ሆኖ የተቀናጀ የሰብል ጥበቃና የእንክብካቤ ዘመቻ በማካሄድ ላይ ይገኛል። ይህ እንቅስቃሴም የዞኑን የግብርና ምርታማነት ከማሳደጉም በላይ፣ የአካባቢውን የምግብ ዋስትና በዘላቂነት ለማረጋገጥ በሚደረገው ጥረት ውስጥ ትልቅ ድርሻ እንዳለው ይታመናል።   የደቡብ ምስራቅ ኦሮሚያ ዞን ግብርና ጽሕፈት ቤት ሃላፊ አቶ ኢብራሂም ቃሶ ለኢዜአ እንደገለጹት በዞኑ ለ2018/19 የምርት ዘመን ከ2 ነጥብ 5 ሚሊዮን ሄክታር በላይ መሬት በዋና ዋና ሰብሎች ለምቷል። በዘንድሮው የምርት ዘመን ዋና ዋና ሰብሎች በተለይ ስንዴና የቢራ ገብስ አብዛኛው በኩታ ገጠም መልማቱንም ገልጸዋል። ለዚህም የአፈር ማዳበሪያን ጨምሮ ምርትና ምርታማነትን የሚያሳድጉ ግብዓቶችና አዳዲስ የአሰራር ቴክኖሎጂዎችን በጥቅም ላይ መዋላቸውን ተናግረዋል። በአሁኑ ወቅት በአሰላና ሻሸመኔ ክላስተር ቆላማና ወይናደጋ የዞኑ አከባቢዎች የመኸር ሰብል እየደረሰ በመሆኑ አብዛኛውን በሜካናይዜሽንና በሰው ሃይል በመሰብሰብ ላይ መሆናቸውን ተናግረዋል። በተመሳሳይ በአሰላ ክላስተር ደጋማ አከባቢዎች እንዲሁም በሮቤና ግንዲሪ ደጋማ አከባቢዎች ስንዴና የቢራ ገብስን ጨምሮ ሌሎች ሰብሎች እየዘረዘሩ በመሆኑ ብጫ ዋግን ጨምሮ ምርትና ምርታማነትን የሚቀንሱ የስንዴ ራስ አድርቅ በሽታዎችና አረሞችን ለመከላከል በትኩረት እየሰራን እንገኛለን ብለዋል።   በተለይም ፀረ ተባይና ፀረ አረም መድሃኒቶች በሰፋፊ የኩታ ገጠም የስንዴ ሰብሎች ላይ አውሮፕላኖችን ጭምር በመጠቀም የመርጨት ስራ እየተሰራ እንደሚገኝ ጠቅሰዋል። በተጨማሪም የቤተሰብ ጉልበት በመጠቀም የሰብል ጥበቃና እንክብካቤ ስራ እየተከናወነ ይገኛል ብለዋል። በዞኑ ደጋማው አካባቢዎች ሰብሉ ምርትና ምርታማነትን በሚቀንሱ በሽታዎች እንዳይጠቃ አርሶ አደሩ በማሳው ላይ የእለት ተእለት ክትትል ማድረግ እንደሚገባውም ሃላፊው አስገንዝበዋል። በዞኑ በዘንድሮው የምርት ዘመን በመኸር ከለማው ዋና ዋና ሰብሎች ከ96 ነጥብ 8 ሚሊዮን ኩንታል በላይ ምርት እንደሚጠበቅ አቶ ኢብራሂም ጨምረው ገልጸዋል።

አዲስ አበባ፤ ጥቅምት 22/2019 (ኢዜአ)፦ የምንገነባት አዲስ አበባ ነዋሪዎቿን በእኩል የልማት ተጠቃሚ የምታደርግ ከተማ እንድትሆን ቁርጠኛ ነን አሉ የአዲስ አበባ ከተማ አስተዳደር ከንቲባ አዳነች አቤቤ፡፡ ከንቲባዋ በማህበራዊ ትስስር ገጻቸው ባስተላለፉት መልእክት ዛሬ የቦሌ ሹቡ ኤጀርሳ የተቀናጀ ነዋሪዎች መንደርን ለአካባቢው የልማት ተነሺዎች አስረክበናል ብለዋል።   የከተማ ልማት ዋነኛ ዓላማ መሠረተ ልማትን መገንባት ብቻ ሳይሆን የዜጎችን ኑሮ ማሻሻል፣ መብትና ጥቅም ማስጠበቅ እና የተሻለ የኑሮ ዕድል መፍጠር ነው ሲሉም ገልጸዋል። በአዲስ አበባ እየተገነባ የሚገኘው የሰው ሠራሽ አስተውሎት (AI) ዩኒቨርሲቲ የሀገራችንን የቴክኖሎጂና የኢኮኖሚ እድገት የሚያፋጥን ትልቅ ሀገራዊ ፕሮጀክት ነው።ሆኖም ፕሮጀክቱ ቀደም ሲል መሬቱን ለእርሻ፣ ለግጦሽና ለመኖሪያነት ሲጠቀሙ የነበሩ አርሶ አደሮችን ሕይወት የሚነካ በመሆኑ፣ የልማቱ ተጠቃሚ እንጂ ተጎጂ እንዳይሆኑ ልዩ ትኩረት ሰጥተናል ብለዋል። በዚህም መሠረት ለሰው ሠራሽ አስተውሎት (AI) ዩኒቨርሲቲ የልማት ከእርሻና መኖሪያ ቦታቸው ተነሺ ለሆኑ የቦሌ ሹቡ ኤጀርሳ አርሶ አደሮች የተቀናጀ መኖሪያ መንደር ገንብተን፣ የኑሮና የገቢ ምንጮቻቸውን የሚያሳድጉ አቅርቦቶችንም አካተናል ነው ያሉት።   ይህም የነዋሪዎቹን ማኅበራዊ ትስስር ጠብቆ ወደ ተሻለ የአኗኗር ሁኔታ የሚያሸጋግር ሰው ተኮር የልማት አሠራር ነው ብለዋል። ከመኖሪያ ቤቶች በተጨማሪ መንደሩ የሚከተሉትን አቅርቦቶች ይዟል፦ የወተት ላሞችን የሚይዙ የከብት ሼዶችና የእንስሳት መኖ ማቀነባበሪያ። የንግድ ሱቆች፣ የምርት ማከፋፈያና መሸጫ መጋዘን እንዲሁም ወፍጮዎች። የስፖርት ማዘውተሪያ፣ የሕፃናት መጫወቻና ማቆያ ማዕከል። የስብሰባ አዳራሽ። እነዚህ አቅርቦቶች ነዋሪዎቹ የተሻለ መኖሪያ እንዲኖራቸው፣ የወተት ልማትና ሌሎች የገቢ ምንጮቻቸውን እንዲያሳድጉ፣ ማኅበራዊ ትስስራቸውን እንዲጠብቁ እና ልጆቻቸው ምቹ አካባቢ እንዲያገኙ የተዘጋጁ ናቸው ብለዋል። ልማት ማለት ሰውን ከነበረበት ቦታ ማንሳት ብቻ ሳይሆን የኑሮ ደረጃውን ማሻሻል፣ የኢኮኖሚ አቅሙን ማጠናከርና የነገ ተስፋውን ማለምለም ጭምር መሆኑንም ገልጸዋል።   የአካባቢው ነዋሪዎች ቦታው ለታላቅ ሀገራዊ ፋይዳ እንደሚውል ስናስረዳቸው፣ ዩኒቨርሲቲው ለልጆቻቸው የመማር ዕድልና ሀገርን በዓለም አቀፍ ደረጃ ተወዳዳሪ የመሆን አቅም እንደሚፈጥር በመገንዘብ በፈቃደኝነት ትብብራቸውን አድርገዋል ብለዋል። ለዚህ ከልብ እናመሰግናለን፤ ትልቅ ክብርም ይገባቸዋል ሲሉም ገልጸዋል። ይህ ተግባር በመደመርና በትብብር ስንሰራ ሁሉንም ወገኖች ተጠቃሚ ማድረግና ዘላቂ ልማትን ማረጋገጥ እንደምንችል ማሳያ ነው።   የቦሌ ሹቡ ኤጀርሳ ነዋሪዎች መንደር ይህንኑ ሰው ተኮር የልማት አቅጣጫችንን በተግባር የሚያሳይ ምሳሌ ነው ብለዋል። የምንገነባት አዲስ አበባ የሁሉም ነዋሪዎቿን ክብር፣ መብትና ጥቅም የምታስጠብቅ፣ ሁሉንም በእኩል የልማት ተጠቃሚ የምታደርግ ከተማ እንድትሆን ቁርጠኛ ነን ሲሉም ገልጸዋል።

አዲስ አበባ፤ ጥቅምት 22/2019 (ኢዜአ)፦ የአዲስ አበባ ከተማ ከንቲባ አዳነች አቤቤ ለልማት ተነሺ አርሶ አደሮች የተገነባውን የቦሌ ሹቡ ኤጀርሳ የተቀናጀ የመኖሪያ መንደር መርቀው ለተጠቃሚዎች አስተላልፈዋል። ከንቲባ አዳነች አቤቤ በዚሁ ወቅትአዲስ አበባን በጋራ፣ በትብብር እና በውጤታማነት እያለማን እንገኛለን ብለዋል።   ይህም አዲስ አበባን በዓለም አቀፍ መድረክ እንድትሸለም እያስቻላት መሆኑን ተናግረዋል። እውቅናው የሁሉም ትብብር ውጤት መሆኑን አንስተው፣ የልማት ተነሺዎች ለልማት ተባባሪ መሆናቸው ለዚህ ውጤታማነት አስተዋጽኦ ማድረጉን ገልጸዋል። አዲስ አበባን የማልማቱ ሥራ ተጠናክሮ ይቀጥላል ያሉት ከንቲባዋ፣ ዛሬም ለልማት ለተነሱ አርሶ አደሮች ዘመናዊ የሆነ የመኖሪያ ቤት ተገንብቶ መሰጠቱን ተናግረዋል። ልማት ማለት የዜጎችን የኑሮ ደረጃ ማሻሻል፣ የኢኮኖሚ አቅሙን ማጠናከርና የነገ ተስፋውን ማለምለም ጭምር ነው ሲሉ ተናግረዋል። መኖሪያ መንደሩ የነዋሪዎቹን ማኅበራዊ ትስስር በማጠናከር ወደ ተሻለ የአኗኗር ዘይቤ የሚያሸጋግርና ሰው ተኮር የአሠራር አቀራረብን የተከተለ ነው ብለዋል፡፡   ለአርሶ አደሮቹ የኑሮና የገቢ ምንጮቻቸውን የሚያሳድጉበትን ዕድል የሚፈጥሩ በርካታ አቅርቦቶችን ያካተተ መሆኑንም አብራርተዋል። በመንደሩ የወተት ላሞች ማደሪያ ሼዶችና የእንስሳት መኖ ማቀነባበሪያ፣የንግድ ሱቆች፣ የምርት ማከፋፈያና መሸጫ መጋዘን እንዲሁም ወፍጮዎች፣ የስፖርት ማዘውተሪያ፣ የሕፃናት መጫወቻና ማቆያ ማዕከል እና መሰብሰቢያ አዳራሽ ይገኙበታል ብለዋል።   ከንቲባዋ ለልጆቻችን እና ለመጪው ትውልድ ዘመናዊ እና የሚኮሩባትን ከተማ የመገንባቱ ሥራ ተጠናክሮ እንደሚቀጥልም ነው የተናገሩት። የቦሌ ክፍለ ከተማ ዋና ሥራ አስፈጻሚ አቶ አደፍርስ ኮራ በበኩላቸው፣ የተገነባው ቤት ነዋሪዎቹ የተሻለ ኑሮ እንዲኖሩ ለማስቻል ታስቦ በዘመናዊ መንገድ መገንባቱን አስታውቀዋል። የመኖሪያ ቤት የተረከቡ ነዋሪዎች በበኩላቸው፣ኑሯቸውን በአግባቡ ለመምራት የሚያስችሉ መሠረተ ልማቶች እንዲሁም ሌሎች አስፈላጊ አገልግሎቶች በተሟሉበት መንደር በመግባታቸው መደሰታቸውን ገልጸዋል። ለዚህም ለከተማ አስተዳደሩ ምስጋና አቅርበዋል።    

አዲስ አበባ፤ ጥቅምት 22/2019(ኢዜአ)፦ የከተማ ግብርና የምግብ ዋስትናን በማረጋገጥ የዜጎችን የኑሮ ደረጃ እያሻሻለ መሆኑን የአዲስ አበባ ከተማ አስተዳደር የአርሶ አደርና የከተማ ግብርና ልማት ቢሮ ገለጸ። ትልቅ ሀገር፤ ትልቅ ሕዝብ፤ ታላቅ ርዕይ የአዲስ አበባ የአርሶ አደርና ከተማ ግብርና ልማት ኮሚሽን የ2018/19 ዓ.ም በጀት ዓመት የሰብል ልማት አፈጻጸምን የመስክ ጉብኝት አድርጓል።   የኮሚሽኑ ምክትል ኮሚሽነር መሐመድ ሊጋኒ ለኢዜአ እንዳሉት፤ በአረንጓዴ ዐሻራ መርሃ ግብር የተተከሉ ችግኞች፣ ለአካባቢ ጥበቃና ለምግብ ዋስትና ማረጋገጥ ወሳኝ ሚና እየተጫወቱ ነው። ከኮሪደር ልማቱ ጋር ተያይዞ ለአካባቢ ጥበቃና ለምግብነት የሚውሉ ችግኞችን የመትከል ሥራ እየተስፋፋ መሆኑን ገልጸዋል። በከተማ ደረጃ በተቋቋመው የችግኝ ብዜት ማዕከል የአቮካዶና የአፕል ችግኞችን ጨምሮ የተለያዩ የፍራፍሬ ችግኞችን የማፍላት ተግባር እየተከናወነ መሆኑን ተናግረዋል። በአዲስ አበባ የከተማ ግብርና ተሳትፎን በማሳደግ ነዋሪዎች ለራሳቸው ከማምረት ባለፈ ለገበያ የሚቀርብ ምርት እንዲያመርቱ እየተደረገ እንደሚገኝም ገልጸዋል። ምርቶቹም በየወረዳው በሚዘጋጁ የቅዳሜና እሁድ ገበያዎች፣ በከተማ ግብርና ምርት መሸጫ ሱቆችና በተለያዩ የገበያ ማዕከላት ለተጠቃሚው እንዲደርሱ እየተሰራ መሆኑንም ጠቁመዋል። የከተማ ግብርና በነዋሪዎች ገቢ ላይ አወንታዊ ለውጥ እንዲመጣ ከማስቻል ባለፈ የማምረት ባህል እንዲዳብር አስተዋጽኦ እያበረከተ እንደሚገኝም ተናግረዋል።   በአርሶ አደርና ከተማ ግብርና ልማት ኮሚሽን የዕፅዋት ሀብት ልማት ዳይሬክቶሬት የሰብል ልማት ባለሙያ ተስፋዬ ኪዳነማርያም በበኩላቸው፤ አርሶ አደሩን በማሰልጠን የተሻለ እንዲያመርት እየተደረገ ነው ብለዋል። ይህም ማኅበረሰቡ በራሱ አቅም ምርት እንዲያመርትና በልማቱ በንቃት እንዲሳተፍ ከማድረግ ባለፈ ከሸማችነት ወደ አምራችነት የሚያሸጋግር አስተሳሰብን ለመገንባት እንደሚያግዝ አመልክተዋል።   አርሶ አደር ከበደ መንግሥቱ በሰጡት አስተያየትም፤ የከተማ ግብርና ሕብረተሰቡ በአካባቢው የሚያገኘውን የገበያ አማራጭ ዕድል እንደሚፈጥር ገልጸዋል። ከሌሎች አካባቢዎች ምርት ለማምጣት የሚወጣውን የትራንስፖርት ወጪና ጊዜ ለመቀነስ እንደሚያግዝም አስረድተዋል።   አርሶ አደር ታቡር በቀለ በበኩላቸው፣ ባገኙት ድጋፍ የማምረት አቅማቸው 20 ኩንታል ገደማ ከነበረበት ወደ 65 ኩንታል ማደጉን አመልክተዋል። በከተማ ግብርና ሥራ በመሳተፌ ከቤተሰቤ ጋር የተሻለ ኑሮና ሕይወት እንድመራ አስችሎኛል ሲሉም ተናግረዋል።

አዲስ አበባ፤ ጥቅምት 22/2019(ኢዜአ)፦ በአዲስ አበባ እየተከናወነ የሚገኘው የኮሪደር እና ወንዝ ዳርቻ ልማት በከፍተኛ ፍጥነትና ጥራት እየተገነባ በመሆኑ፣ መዲናዋን ለኑሮ፣ ለቱሪዝም እና ለሥራ ዕድል ፈጠራ ምቹ አድርጓታል ሲሉ የተለያዩ የሕብረተሰብ ክፍሎች ገለጹ። ኢዜአ ያነጋገራቸው የተለያዩ የሕብረተሰብ ክፍሎች፣ የወንዝ ዳርቻ ልማቱ የከተማዋን ውበት በማሳደግ፣ ለነዋሪዎች የመዝናኛ እና የማኅበራዊ ትስስር ለማጠናከር እንዲሁም ለቱሪዝም ምቹ ሁኔታ መፍጠሩን ተናግረዋል።   ከሐረር የመጣችው ወጣት ስጦታ ታሪኩ፣ በአዲስ አበባ የተሠሩት የልማት ሥራዎች እጅግ የሚያምሩና ለጎብኚዎች ሳቢ መሆናቸውን ተናግራለች። በተለይም ለወጣቶች አእምሮን የሚያድሱበት፣ ከዕለት ተዕለት ጫና ዘና የሚሉበትና ጊዜያቸውን በጥራት የሚያሳልፉባቸው ምቹ ሥፍራዎች ተመልክቻለሁ ብላለች። እነዚህ የልማት ሥራዎች ለሀገሪቱ የቱሪዝም ፍሰት ጉልህ አስተዋጽኦ እንደሚኖራቸው ተናግራለች።   አቶ ፍቃዱ ቶላ በበኩላቸው፣ ቀደም ሲል የከተማዋ ገጽታ ከንጽህና ጉድለትና ከመጥፎ ሽታ ጋር የተያያዙ ችግሮች የሚታዩባት እንደነበር አስታውሰዋል። አሁን ግን ከተማዋ በንጽህና፣ በውበትና በአጠቃላይ ገጽታዋ ረገድ ከፍተኛ ለውጥ ማሳየቷን ገልጸዋል። በተለይም ነዋሪዎች በቀንም ሆነ በማታ ከቤተሰቦቻቸው ጋር ወጥተው የሚዝናኑባትና ጥሩ ጊዜ የሚያሳልፉባት ምቹ ከተማ እየሆነች መምጣቷን አክለዋል። ከተማዋ ከአረንጓዴ ልማት ጋር ተቀናጅታ መገንባቷ የሚያስደስት መሆኑንና ለኑሮ ምቹ እንድትሆን አስተዋጽኦ ማበርከቱን የገለፀችው ደግሞ ሌላኛዋ አስተያየት ሰጪ በጸሎት ሸጋው ናት።   በከተማዋ የተፈጠሩት አረንጓዴ ሥፍራዎችና የመዝናኛ ቦታዎች ዜጎች መጻሕፍትን ለማንበብ፣ ከራሳቸው ጋር ጊዜ ለማሳለፍ፣ ለማሰላሰልና ከዕለታዊ የሕይወት ጫና ለማረፍ የተለያዩ አማራጮችን እንዲያገኙ ማስቻላቸውንም አብራርታለች። አቶ ዘካሪያስ ተሾመ ቀደም ሲል ከተማ የማስዋብና የመሰረተ ልማቶችን የማሻሻል ሥራ ባለመከናወኑ በርካታ አካባቢዎች ለሕዝብ እንቅስቃሴና ለአገልግሎት ዝግ ሆነው ቆይተዋል ብለዋል። አሁን ላይ ግን በኮሪደር እና በወንዝ ዳርቻ ልማት የተቀናጁና ፈጣን ሥራዎች በመከናወናቸው አካባቢዎች ንጹሕ፣ ማራኪና ለሕዝብ ክፍት እንዲሆኑ መደረጋቸውን ተናግረዋል።   ይህም ከተማዋ ለነዋሪዎቿ ጤናማና ምቹ የመኖሪያና የመዝናኛ ከባቢ እንድትሆን ማስቻሉን አብራርተዋል። አቶ አሻግሬ ከሲሳ በበኩላቸው ከተማዋ በተዋበችና የመሰረተ ልማት ዝግጅቷ በጨመረ ቁጥር የሀገር ውስጥና የውጭ ሀገር ቱሪስቶችን ትኩረት እንደሚስብ ተናግረዋል።   ይህም ለበርካታ ዜጎች ሰፊ የሥራ ዕድል የሚፈጥርና የከተማዋን የኢኮኖሚ እንቅስቃሴ የሚያነቃቃ መሆኑን ገልጸዋል።

አዲስ አበባ፤ ጥቅምት 22/2019 (ኢዜአ)፦ ባሕር ዳር ለተጨማሪ ውበት አሁንም ተግታ ስራ ጀምራለች ሲሉ ምክትል ጠቅላይ ሚኒስትር ተመስገን ጥሩነህ ገለጹ። ምክትል ጠቅላይ ሚኒስትሩ በማህበራዊ ትስስር ገጻቸው ባሰፈሩት መልእክት የባሕር ዳር ነዋሪዎች ለከተማዋ ሰላም ግንባታና ልማት መፋጠን እያደረጋችሁ ላለው ያልተቋረጠ ተሳትፎ ምስጋናዬ የላቀ ነው ብለዋል።

ሰመራ፤ ጥቅምት 21/2019 (ኢዜአ) ፦ በአፋር ክልል የመስኖ ልማት የምግብ ዋስትናን ለማረጋገጥ እያገዘ መሆኑን የክልሉ ርዕሰ መስተዳድር አወል አርባ አስታወቁ። ርዕሰ መስተዳድር አወል አርባ በክልሉ ገቢ ረሱ ዞን በአዋሽ ፈንታሌ ወረዳ እየተከናወኑ ያሉ የልማት ስራዎችን ተመልክተዋል ። ርዕሰ መስተዳድሩ በወቅቱ እንደገለጹት፤ በክልሉ የመስኖ ልማት ስራ የምግብ ዋስትናን ለማረጋገጥ እያገዘ ነው። በአዋሽ ፈንታሌ ወረዳ እየተካሄደ ያለው የመስኖ ልማት ስራም የዚሁ ማሳያ መሆኑን ተናግረዋል።   በወረዳው በ100 ሄክታር መሬት ላይ እየለማ ያለው ጤፍ ጥሩ ጅማሮ መሆኑን ጠቁመው በተመሳሳይ በ150 ሄክታር መሬት ላይ እየለማ ያለው በቆሎም በመልካም ተሞክሮነት የሚወሰድ መሆኑን ለአብነት ጠቅሰዋል። የመስኖ ልማቱ ተጠናክሮ ሊቀጥል እንደሚገባም አስገንዝበዋል። የአዋሽ ፈንታሌ ወረዳ አስተዳዳሪ አቶ አደን በልአ በበኩላቸው እንዳሉት፤ በወረዳው ዘንድሮ በበጋ መስኖ 9 ሺህ 200 ሄክታር መሬት ላይ የተለያዩ ሰብሎች እንዲሁም አትክልትና ፍራፍሬ ለማልማት ታቅዶ ተግባራዊ እየተደረገ ነው። እስካሁን ባለው ሂደት 4 ሺ 500 ሄክታር መሬት መልማቱን ተናግረዋል።   የበጋ መስኖ ልማት አርብቶ አደሩን ከእንስሳት እርባታ በተጓዳኝ በግብርና ስራ በመሰማራት ተጠቃሚ እያደረገው መሆኑን አመልክተዋል። የወረዳው አርብቶ አደሮች በመስኖ በመታገዝ ጤፍ፣ በቆሎ፣ ስንዴ፣ ሽንኩርት፣ ቲማቲም እንዲሁም ሀብሀብና ሙዝ በሰፊው በማምረት ለገበያ በማቅረብ ተጠቃሚ እየሆኑ መምጣታቸውን አስታውቀዋል። በመስክ ምልከታው የክልሉ፣ የዞንና የወረዳ የስራ ኀላፊዎች ተገኝተዋል።

ወልቂጤ፤ ጥቅምት 21/2019 (ኢዜአ) ፦ የወልቂጤ ግብርና ምርምር ማዕከል በአሲዳማነት የተጎዳ መሬትን በኖራ በማከም ለአርሶ አደሩ ምርታማነትና ተጠቃሚነት ማደግ እየሰራ መሆኑን ገለጸ። የተለያዩ ባለድርሻ አካላት በተገኙበት በጉራጌ ዞን በምሁር አክሊልና ጉመር ወረዳዎች ማኅበረሰብ አቀፍ የዘር ብዜት ማሳዎች ጉብኝት ተካሂዷል።   የወልቂጤ ግብርና ምርምር ማዕከል ዳይሬክተር አቶ ቤተል ነክር እንደገለጹት፣ ማዕከሉ በአሲዳማነት የተጎዳ መሬትን በኖራ በማከም ለአርሶ አደሩ ምርታማነትና ተጠቃሚነት ማደግ እየሰራ ነው።   ማዕከሉ አዳዲስ ቴክኖሎጂዎችን ከማፍለቅ ባሻገር የዘር ብዜትን በማስፋፋትና በአሲዳማነት የተጎዳን መሬት በኖራ በማከም በተለያዩ የሰብል ዓይነቶች እንዲሸፈኑ ማድረግ ማስቻሉን ገልጸዋል። በዚህም ከምርት ውጪ የነበረን 72 ሄክታር መሬት በኩታ ገጠም በአጭር ጊዜ በሚደርሱ፣ በሽታንና አሲዳማ መሬትን በሚቋቋሙ ሰብሎች ማልማት መቻሉን አንስተዋል። የጉመር ወረዳ ምክትል አስተዳዳሪና የግብርና ጽሕፈት ቤት ኃላፊ አቶ ደገሙ አለሙ በበኩላቸው፣ ግብርናን በማዘመን የምግብ ሉዓላዊነትን ለማረጋገጥ የሚያስችሉ ተግባራት እየተከናወኑ ነው ብለዋል። የግብርና ምርምር ተቋማት ቴክኖሎጂን በማፍለቅና በማስፋፋት፣ ዝርያዎችን በማባዛትና ተደራሽ በማድረግ በምርትና ምርታማነት ዕድገት ላይ ተጨባጭ ውጤት እንዲመጣ እየሰሩ መሆኑንም ተናግረዋል።   የጉመር ወረዳ አርሶ አደር አቶ ዓለማየሁ አርጋው፣ ከዚህ ቀደም መሬታቸው በአሲዳማነት በመጠቃቱ ካላቸው 1 ነጥብ 5 ሄክታር መሬት 25 ኩንታል ገብስ ብቻ ያገኙ እንደነበር ገልጸው፣ አሁን በኖራ ከታከመው እስከ 40 ኩንታል ምርት እንደሚጠብቁ ተናግረዋል።   የምሁር አክሊል ወረዳ አርሶ አደር ነስሩ ከማል በበኩላቸው፤ ጦም ያድር በነበረ 15 ሄክታር መሬት ላይ ስንዴን በኩታ ገጠም ለማምረት እየሰሩ መሆናቸውን ገልጸዋል። ይህም የምግብ ሉዓላዊነታቸውን ከማረጋገጥ ባለፈ የስንዴ ምርጥ ዘር በማቅረብ ኢኮኖሚያዊ ተጠቃሚ እንደሚያደርጋቸው ተናግረዋል።

አዲስ አበባ ፤ ጥቅምት 21/2019 (ኢዜአ) ፦የአዲስ አበባ ከተማ አስደናቂ ክትመትና የመሰረተ ልማት ዕድገት ለሌሎች የአፍሪካ ሀገራት አርዓያ ይሆናል ሲሉ የታንዛኒያ የካፒታል ገበያ ፍርድ ቤት ልዑካን ቡድን አባላት ገለጹ። ከጥቅምት 18 ጀምሮ ለሶስት ተከታታይ ቀናት በአዲስ አበባ ሲካሄድ የቆየው የኢትዮጵያ እና ታንዛኒያ የካፒታል ገበያ ፍርድ ቤቶች የልምድ ልውውጥ መድረክ ተጠናቋል።   የታንዛኒያ የካፒታል ገበያ ፍርድ ቤት ልዑካን ቡድን አባላት ከልምድ ልውውጡ ባሻገር በአዲስ አበባ የሚገኙ የቱሪስት መዳረሻዎችን ጎብኝተዋል። በጉብኝታቸውም በመዲናዋ ባለው ፈጣን የመሰረተ ልማትና የከተሜነት ዕድገት እንዲሁም በሳቢነቷ ተደንቀዋል። የልዑካን ቡድኑ አባል ዶርካስ ዳዊዶ ለኢዜአ እንዳሉት፤ የአዲስ አበባ የኮሪደር ልማት ለነዋሪዎች ምቹ፣ ለጎብኝዎች ደግሞ አስደማሚ ነው።   በሁሉን አቀፍ መሰረተ ልማትና በአረንጓዴ ሥፍራዎች ያጌጠች መሆኗን ገልጸው፤ ታንዛኒያ የኢትዮጵያ የልማት ተሞክሮ እንድትወስድ የድርሻዬን እወጣለሁ ብለዋል። የታንዛኒያ የካፒታል ገበያ ፍርድ ቤት የሕግ ባለሙያ ኤልያድ ኢ-መንደም፤ የከተማዋን ፈጣን ዕድገትና የኢትዮጵያውያንን ታሪካዊ አርበኝነት የሚያስደንቅ መሆኑን ገልጸዋል።   በአዲስ አበባ ከተማ በእግር ጉዞ የተለያዩ አካባቢዎችን መጎብኘታቸውን ገልጸው፤ የመዲናዋ መሠረተ ልማት፣ የመንገዶችና የሕንፃዎች ግንባታ በማራኪ ሁኔታ ተለውጧል ብለዋል። አንድነት ፓርክንና የዓድዋ ድል መታሰቢያን በጎበኙበት ወቅት ያዩት የኢትዮጵያውያን ጽናት እና ቁርጠኝነት ለአፍሪካውያን ትልቅ ትምህርት እንደሚሰጥ አንስተዋል። የታንዛኒያ ፋይናንስ ሚኒስቴር የዕቅድ መምሪያ ኃላፊ ኤልያስ ሬይመንድ ማፑንዳ በበኩላቸው፤ ኢትዮጵያ በከተማ ዕቅድና በልማት ዘርፍ ያሳየችው ስኬት ለአፍሪካ ሀገራት ትልቅ ትምህርት ይሆናል ብለዋል።   የታንዛኒያ መንግሥት ከኢትዮጵያ የልማትና የቢዝነስ እንቅስቃሴዎች በርካታ ልምዶች መቅሰም እንደሚችል ገልጸዋል። ኢትዮጵያውያን በታሪካቸው ያሳዩትና አሁንም የሚያንፀባርቁት አንድነት ለሀገር ዕድገትና ልማት መሰረት መሆኑን ገልጸው፤ በምሥራቅ አፍሪካ ሀገራት መካከል ያለው ትብብር ተጠናክሮ መቀጠል አለበት ብለዋል። ትልቅ ሀገር፣ ትልቅ ህዝብ ፤ታላቅ ርዕይ #የመደመር_መንግሥት

አዲስ አበባ ፤ ጥቅምት 21/2019 (ኢዜአ) ፦አዲስ አበባ የ2026 የከተሞች ዘላቂ ልማት ዓለም አቀፍ ሽልማትን (2026 Global Award for Sustainable Development in Cities) ማግኘቷ፣ በከተማዋ የታየውን እድገት፣ ዘላቂ ልማትና ቀጣይነት ያለው ለውጥ የሚያረጋግጥ በመሆኑ ለኢትዮጵያ ታላቅ ኩራት መሆኑን የጠቅላይ ሚኒስትር ጽህፈት ቤት ገለጸ፡፡ ይህ ደግሞ ወደፊት ለመመልከት መልካም አጋጣሚ ነው ሲል የጠቅላይ ሚኒስትር ጽሕፈት ቤት በማኅበራዊ ትስስር ገጹ አስታውቋል። የእያንዳንዱን ከተማ ልዩ ታሪክ፣ ቅርስና ማንነትን እየጠበቅን ዘመናዊ፣ አካታችና ዘላቂ ከተሞችን መገንባታችንን መቀጠል ይኖርብናል ያለው ጽህፈት ቤቱ የከተማ ልማት ከመሠረተ ልማት በላይ መሆኑንም አመልክቷል። የከተሜነት ባህልን ማሳደግ፣ ጥራት ያላቸው የሕዝብ መዝናኛ ቦታዎችን መፍጠር እና ከተሞቻችንን ለመኖርና ለመሥራት የተሻሉ ቦታዎች ማድረግ ማለት ነውም ብሏል። ራዕያችን ከአዲስ አበባ ባሻገር ሊሰፋ ይገባል፤ ከሐረር እስከ ባሕር ዳር፣ ከሐዋሳ እስከ ጅማ፣ ከአርባ ምንጭ እስከ ድሬዳዋ እያንዳንዱ የኢትዮጵያ ከተማ የዘላቂ ከተማ ልማት ማሳያ የመሆን አቅም አለው ሲልም ገልጿል። ዛሬ አዲስ አበባ፤ ነገ ደግሞ ለእያንዳንዱ የኢትዮጵያ ከተማ አዲስ ምዕራፍ። ከታሪካቸው ሳይነጠሉ የወደፊቱን ጊዜ የሚመጥኑ ከተሞችን እንገንባ ሲል የጠቅላይ ሚኒስትር ጽህፈት ቤት መልዕክት አስተላልፏል።

ደብረ ብርሃን ፤ ጥቅምት 21/2019 (ኢዜአ) ፦በሰሜን ሸዋ ዞን ከ76 ሺህ ሄክታር በላይ መሬት በበጋ መስኖ እንደሚለማ የዞኑ አስተዳደር አስታወቀ። የሰሜን ሸዋ ዞን ግብርና መምሪያ የ2019 የበጋ መስኖ የንቅናቄ መድረክ በደብረ ብርሃን ከተማ አካሂዷል።   የዞኑ ዋና አስተዳዳሪ አቶ መካሻ ዓለማየሁ በመድረኩ ላይ እንደገለጹት፣ የበጋ መስኖ ልማት በምግብ ራስን ከመቻል ባለፈ ለኢንዱስትሪ ግብዓትና ለገበያ የሚተርፍ ምርት ለማምረት ምቹ ሁኔታ ፈጥሯል። በዘንድሮው በጋ ለሚካሄደው የመስኖ ልማትም አርሶ አደሩን በማንቃት፣ ግብዓትን በወቅቱ በማቅረብና አዳዲስ አሠራሮችን በመተግበር ውጤታማ ለማድረግ እየተሰራ ነው ብለዋል። በተያዘው ዓመትም በዞኑ ከ76 ሺህ ሄክታር በላይ መሬት በበጋ መስኖ ለማልማት ዕቅድ ተይዞ ወደ ተግባር መገባቱን ገልጸዋል። የዞኑ ግብርና መምሪያ ኃላፊ አቶ ታደሰ ማሙሻ በበኩላቸው፣ በበጋ መስኖ የሚለማው ስንዴ፣ አትክልትና ፍራፍሬ ለምግብ ብቻ ሳይሆን ለኢንዱስትሪዎች ግብዓት እንደሚውል ተናግረዋል።   የዛሬው የንቅናቄ መድረክም የተጀመሩ የመስኖ ልማት ሥራዎችን ይበልጥ አጠናክሮ በማስቀጠል የታቀደውን ለማሳካት ያለመ መሆኑንም አመልክተዋል። በመስኖ ከሚለማው 76 ሺህ ሄክታር መሬት ውስጥም 60 ሺህ ሄክታሩን በኩታ ገጠም ስንዴ በማልማት 2 ነጥብ 4 ሚሊዮን ኩንታል ምርት ለማምረት መታቀዱን አስታውቀዋል።   የቀወት ወረዳ ግብርና ጽሕፈት ቤት የመስኖ መሐንዲስ አቶ ታምሩ አሽኔ፣ የገጽና ከርሰ ምድር ውሃን በመጠቀም 4 ሺህ 438 ሄክታር መሬት በመስኖ ለማልማት እየተሰራ ይገኛል ብለዋል። እስካሁን በተደረገ ጥረትም 837 ሄክታር መሬት በበጋ ስንዴ ዘር መሸፈኑን አስረድተዋል።   በአጎለላና ጠራ ወረዳ ግብርና ጽሕፈት ቤት የመስኖ መሐንዲስ አቶ በላይነሀ ሲገኝ በበኩላቸው፣ በወረዳው በኩታ ገጠም ስንዴን በመስኖ የማልማት ሥራ መጀመሩን ተናግረዋል።

አዲስ አበባ ፤ ጥቅምት 21/2019 (ኢዜአ) ፦አዲስ አበባ በተባበሩት መንግሥታት የሰዎች ሰፈራ ፕሮግራም (UN-Habitat) በቻይና ያዘጋጀውን የ2026 እ.ኤ.አ የዓለም ከተሞች ቀን “የሸንሃይ አዋርድ” ሽልማት ማሸነፏን የአዲስ አበባ ከተማ ከንቲባ አዳነች አቤቤ ገለጹ፡፡ ከንቲባ አዳነች አቤቤ በማኅበራዊ ትስስር ገጻቸው ባስተላለፉት መልዕክት ፣ ይህ ድል ለአዲስ አበባ ብቻ ሳይሆን፣ ለመላው ኢትዮጵያ ታላቅ ኩራት ነው ብለዋል፡፡ በተባበሩት መንግሥታት የሰዎች ሰፈራ ፕሮግራም (UN-Habitat) በቻይና ያተዘጋጀው የሸንሃይ ሽልማት፣ በዘላቂ፣ አካታች፣ ሰው ተኮርና አይበገሬ የከተማ ልማት ውጤታማ ሥራዎችን ላከናወኑ በየዓመቱ ለአምስት ከተሞች የሚሰጥ ዓለም አቀፋዊ ዕውቅና ነው ያሉት ከንቲባዋ በዚህም አዲስ አበባ በ2026 ከተሸላሚ ከተሞች አንዷ ሆናለች ብለዋል። ይህ ለከተማችን የመጀመሪያ ዓለም አቀፍ ዕውቅና አይደለም ያሉት ከንቲባ አዳነች አቤቤ በ2024 በUN-Habitat እና በደቡብ ኮሪያዋ ሴኡል ከተማ የተዘጋጀው “የሴኡል ከተማ ሽልማት”አሸናፊ መሆኗን አስታውሰዋል።   እነዚህ ተከታታይ ዕውቅናዎች በከተማ ልማት የተከናወኑ ሥራዎችንና የከተማዋን ዓለም አቀፍ ተወዳዳሪነት ያመለክታሉ ብለዋል። ሽልማቱ በተለይም ባለፉት የለውጥ ዓመታት የተከናወኑት የከተማ ልማት ሥራዎች ውጤታማነት፣ ዘላቂነትና ለነዋሪዎች ያላቸው ጠቀሜታ ዓለም አቀፍ ዕውቅና ማግኘታቸውን እንደሚያሳይም ገልጸዋል። ለዚህ ስኬት ካበቋት ዋና ዋና የልማት አቅጣጫዎች መካከል፦ሰው ተኮር አቀራረብን ከከተማ መልሶ ማልማት ጋር በማቀናጀት የነዋሪዎችን ፍላጎት ቅድሚያ መስጠት፤ የመኖሪያ ቤት አቅርቦትን ለማሻሻል የተከናወኑ ሥራዎች፤ በከተማ ኮሪደሮችና በወንዝ ዳርቻ ፕሮጀክቶች አካታችና የተቀናጀ ልማትን ማረጋገጥ፤ የትራንስፖርት አገልግሎትንና ተደራሽነትን ለማሳደግ የተወሰዱ እርምጃዎች፤ አረንጓዴነትን፣ ጽዳትንና የከተማ ውበትን በማሻሻል ምቹና ለኑሮ ተስማሚ አካባቢ መፍጠር እንደሚገኙበትም አብራርተዋል። እነዚህ ተግባራት የከተማዋን እምቅ አቅም ወደ ተጨባጭ ውጤት በመቀየር፣ የነዋሪዎችን ተጠቃሚነት በማሳደግና አዲስ አበባን ተወዳዳሪ ከተማ በማድረግ ረገድ ያላቸውን አስተዋጽኦ ያሳያሉም ብለዋል። በተለይም በታዳጊ አገራት ከባድ ፈተና የሆነውን የከተማ መልሶ ማልማት በስኬት ማከናወን እንደሚቻል ያሳየችው ተሞክሮ፣ ለሌሎች ከተሞችም ተግባራዊ ትምህርት የሚሰጥ ምሳሌ ሆኗል ሲሉም ገልጸዋል። ይህ ድል የተግባር ስኬት፣ የጋራ ጥረትና የጋራ ውጤት ነውና ሁላችንም በድጋሚ እንኳን ደስ አለን ሲሉም ገልጸዋል፡፡

ቦንጋ ፤ ጥቅምት 21/2019 (ኢዜአ) ፦ በመደመር መንግሥት የግብርናውን ዘርፍ ለማዘመንና ተወዳዳሪ ለማድረግ የተከናወኑ ተግባራት ውጤታማ መሆናቸውን የደቡብ ምዕራብ ኢትዮጵያ ሕዝቦች ክልል ርዕሰ መስተዳድር ፍቅሬ አማን ገለጹ። የክልሉ ግብርና ቢሮ ከኢትዮጵያ ግብርና ትራንስፎርሜሽን ኢንስቲትዩት ጋር በመተባበር የግብርና ቢዝነስ ኩባንያ አዋጅ የማስተዋወቂያ መድረክ በቦንጋ ከተማ አካሂዷል።   በመድረኩ የተገኙት ርዕሰ መስተዳድር ፍቅሬ አማን እንዳሉት፣ የመደመር መንግሥት ግብርናውን ከልማዳዊና ከእጅ ወደ አፍ አሠራር በማላቀቅ ዘመናዊና ተወዳዳሪ ለማድረግ የዘረጋቸው አሠራሮች ተጨባጭ ውጤቶችን እያመጡ ነው። በዚህም ረገድ የግብርናው ዘርፍ ሀገራዊ የኢኮኖሚ ሪፎርምን በመከተል፣ የዘርፉን ዕድገት እውን ለማድረግ አስቻይ የፖሊሲና የሕግ ማዕቀፎችን እንዲሁም የልማት ኢኒሼቲቮችን በመቅረጽ ተግባራዊ በማድረግ ላይ ይገኛል ብለዋል። ይህም የመልማት ጸጋን በአግባቡ በመጠቀም የግብርናና የገጠር ትራንስፎርሜሽን ብሎም ሁለንተናዊ ብልጽግናን ለማረጋገጥ የሚያስችል መሆኑን ገልጸው፣ የዘርፉን ተዋንያን ተጠቃሚነት የሚያሳድግ መሆኑን አመልክተዋል። የግብርና ቢዝነስ ኩባንያዎች መስፋፋት የገጠር ኢኮኖሚን በማነቃቃት የሥራ ዕድሎችን የሚያሰፋ፣ የኢንዱስትሪና የግብርና ትስስርን በዘላቂነት የሚያጠናክርና የገጠር ትራንስፎርሜሽን እውን እንዲሆን የሚያስችል ነውም ብለዋል።   የኢትዮጵያ ግብርና ትራንስፎርሜሽን ኢኒስቲትዩት ዋና ዳይሬክተር ማንደፍሮ ንጉሴ(ዶ/ር) በበኩላቸው፡ አዋጁ ለአርሶና አርብቶ አደሩ በቂ ድጋፍ በማድረግ ተጠቃሚነታቸውን በዘላቂነት ማረጋገጥን ታሳቢ ያደረገ መሆኑን ተናግረዋል። ለግብርናው ዘርፍ በተሰጠው ትኩረት አርሶ አደሩ ቀደም ሲል ከነበረው የተበታተነ አሠራር ተላቅቆ በክላስተር ማምረት በመቻሉ ምርታማነቱ እየጨመረ ቢመጣም፣ ተጠቃሚነቱን በዘላቂነት ለማረጋገጥ ሕጋዊ ሰውነት ማግኘት ወሳኝ ነው ብለዋል። ይህን መነሻ በማድረግ አዋጁ መዘጋጀቱን አንስተው አዋጁ የአነስተኛ ይዞታ አምራቾችን ማደራጀት ወደ መካከለኛ አልሚነት በማሻገር እንዲሁም የግብዓትና ቴክኖሎጂ አቅርቦትን በማሳለጥ ገቢን የሚያሳድግ ነው ብለዋል።   የክልሉ ምክትል ርዕሰ መስተዳድርና የግብርና ቢሮ ኃላፊ አቶ ማስረሻ በላቸው፣ አርሶ አደሩ ከተለመደው አመራረት ተላቅቆ በክላስተር በማልማት አምርቶ ከመብላትና ከመሸጥ ባለፈ ወደ ኩባንያ ደረጃ እንዲሸጋገር እየተደረገ መሆኑን ጠቁመዋል። በዚህም በክልሉ ከ3 ሺህ 400 በላይ አርሶ አደሮችን በሁለት ኩባንያዎች በማደራጀት ተግባራዊ እንቅስቃሴ መጀመሩን ገልጸዋል። በመድረኩም የክልሉ የመንግሥት ዋና ተጠሪ አቶ ተክሌ በዛብህን ጨምሮ የክልልና የኢንስቲትዩቱ የሥራ ኃላፊዎችና ባለሙያዎች ተሳትፈዋል።

ዱራሜ ፤ ጥቅምት 21/2019 (ኢዜአ) ፦ በማዕከላዊ ኢትዮጵያ ክልል በግብርናው መስክ ያሉ እድሎችን በመለየት የማህበረሰቡን ተጠቃሚነት ለማረጋገጥ የተጀመሩ ተግባራት ተጠናክረው እንደሚቀጥሉ የክልሉ ግብርና ቢሮ ገለፀ። የክልሉ መስኖና ቆላማ አካባቢዎች ልማት ቢሮ የ2019 በጀት ዓመት የበጋ መስኖ ንቅናቄ መድረክ በዱራሜ ከተማ አካሂዷል።   በወቅቱም የክልሉ ግብርና ቢሮ ኃላፊ አቶ ዑስማን ሱሩር እንደገለፁት፣ ክልሉ በግብርናው መስክ ያሉትን ዕድሎች በመጠቀም ምርትና ምርታማነትን በማሳደግ የሕዝቡን ኑሮ ለማሻሻል በትጋት እየሰራ ነው። በዚህም ከድህነት የተላቀቀ፣ የምግብ ሉዓላዊነቱን ያረጋገጠና በኢኮኖሚ ራሱን የቻለ ማኅበረሰብ መፍጠር የሚያስችለውን የመደመር መንግሥት እሳቤ እየተገበረ ይገኛል ብለዋል። በቴክኖሎጂ የተደገፈ፣ ከዝናብ ጥገኝነት የተላቀቀና በውሃ አማራጮች ላይ የተመሠረተ የግብርና አሠራርን ተግባራዊ በማድረግ ትርፍ አምርቶ ለገበያ በማቅረብ የኑሮ ውድነቱን በማረጋጋት ረገድ ተጨባጭ ውጤት እየተመዘገበ እንደሚገኝም ተናግረዋል። አመራሩ በግብርናው መስክ እየተመዘገቡ የሚገኙ ስኬቶችን አጠናክሮ በማስቀጠል የሚጠበቅበትን ሚና ሊወጣ እንደሚገባም አሳስበዋል። የመስኖ ተቋማትን በማጠናከር የግብርና ምርትና ምርታማነትን የማሳደግና ለሥራ ዕድል ፈጠራ እንዲውሉ የማድረግ ሥራ እንደሚሠራ የገለጹት ደግሞ የክልሉ መስኖና ቆላማ አካባቢዎች ልማት ቢሮ ኃላፊ አቶ ሰላሙ አማዶ ናቸው።   የንቅናቄ መድረኩ በክልሉ የሚገኙ የመስኖ መሠረተ ልማት አውታሮች ያሉባቸውን ማነቆዎች በመፍታት በሙሉ አቅማቸው እንዲያለሙ በማድረግ በዘርፉ የተያዘውን ግብ ለማሳካት የጋራ ተግባቦት መፍጠርን ያለመ መሆኑን ገልጸዋል። በክልሉ 12 የመስኖ ፕሮጀክቶች በሙሉ አቅማቸው፣ 88ቱ ደግሞ በከፊል እያለሙ እንደሚገኙ፣ እንዲሁም ግንባታቸው ተጠናቆ አገልግሎት መስጠት ያልጀመሩ 11 የመስኖ ፕሮጀክቶች መኖራቸውን ጠቁመዋል። የመስኖ ፕሮጀክቶቹን ከደለል የመታደግ፣ የመጥረግና የውሃ አጠቃቀም ሂደቱን በዕውቀት ላይ የተመሠረተ በማድረግ በዘርፉ የሚፈለገውን ውጤት ለማስመዝገብ በቅንጅት መስራት እንደሚገባም አስረድተዋል። ከመድረኩ ተሳታፊዎች መካከል የምሥራቅ ጉራጌ ዞን ውሃ፣ ማዕድንና ኢነርጂ መምሪያ ኃላፊ አቶ መሐመድ አማን እንደገለጹት፣ በዞኑ ከ1 ሺህ 300 ሄክታር በላይ ማሳ በተለያዩ ሰብሎች በመስኖ ይለማል። የመስኖ ልማቱ አርሶ አደሩ በወቅት ሳይገደብ አልምቶ እንዲጠቀም ከማስቻሉም በተጨማሪ ገበያን በማረጋጋት ረገድ ዋነኛ ሚና እየተጫወተ እንደሚገኝ ጠቅሰዋል። በክልሉ በ2019 የበጋ መስኖ ልማት ሥራ 149 ሺህ ሄክታር ማሳን በተለያዩ ሰብሎች በማልማት ከ38 ሚሊዮን ኩንታል በላይ ምርት ለማግኘት ግብ ተጥሎ ወደ ትግበራ ምዕራፍ መገባቱን ከክልሉ ግብርና ቢሮ የተገኘው መረጃ ያመለክታል።

ደብረ ማርቆስ፤ ጥቅምት 21/2019 (ኢዜአ) ፦ በምስራቅ ጎጃም ዞን አርሶ አደሩ ከሰብል ልማቱ ጎን ለጎን በቡናና ፍራፍሬ ልማት ዘላቂ ተጠቃሚነቱን የማረጋገጥ ተግባር ተጠናክሮ መቀጠሉን የዞኑ ግብርና መምሪያ አስታወቀ። በመምሪያው የመስኖ ልማት ቡድን መሪ አቶ ሃብታሙ ማሕመድ ለኢዜአ እንደገለጹት፤ በዞኑ አርሶ አደሩ ከሰብል ልማቱ ጎን ለጎን በቡናና ፍራፍሬ ልማት ዘላቂ ተጠቃሚነቱን የማረጋገጥ ተግባር እየተከናወነ ነው።   በዚህም ለመስኖና ለመኸር ችግኝ ተከላ ከ5 ሚሊዮን በላይ የፍራፍሬ ችግኝ ማዘጋጀት መቻሉን ጠቁመው፣ ከዚህ ውስጥ ከ100 ሺህ በላይ የሚሆነውን በመስኖ የመትከል ሥራ እየተካሄደ ነው ብለዋል። ባለፈው ዓመት ከ50 ሺህ በላይ የፍራፍሬና የቡና ችግኝ በመስኖ ማልማት መቻሉን ጠቁመው፣ ዘንድሮ ይህንን በእጥፍ ለማሳደግ እየተሰራ እንደሚገኝ አስረድተዋል። ይህም አርሶ አደሩ ከሰብል ልማቱ ጎን ለጎን በቆላ ፍራፍሬ ልማት ዘላቂ ተጠቃሚነቱን ለማረጋገጥ የሚያስችል መሆኑንም አስረድተዋል። በደብረ ኤሊያስ ወረዳ የገነቴ ቀበሌ ነዋሪ አርሶ አደር ያደለው ገዳሙ በበኩላቸው ቡና፣ አቮካዶና ማንጎ በክረምትና በበጋ በመትከል እያለሙ መሆኑን ተናግረዋል።   በዚህ ዓመት ደግሞ አቮካዶን በመስኖ ለማልማት ከሩብ ሄክታር በላይ መሬት ማዘጋጀታቸውን ገልጸዋል። በባሶ ሊበን ወረዳ የልምጭም ቀበሌ ነዋሪ የሆኑት አርሶ አደር ጌታቸው ቢሻው በበኩላቸው፤ በዚህ ዓመት ከ50 በላይ የፓፓያና የማንጎ ችግኝ በመስኖ ለማልማት ዝግጅት እያደረጉ መሆናቸውን ተናግረዋል። በዞኑ ከ6 ሺህ ሄክታር በላይ መሬት በቆላ ፍራፍሬ የተሸፈነ መሆኑንም ከመምሪያው የተገኘው መረጃ ያመላክታል።

አዲስ አበባ ፤ ጥቅምት 21/2019 (ኢዜአ) ፦ በዘንድሮው የበጋ መስኖ ስንዴ ልማት መርሐ ግብር ከአራት ነጥብ አምስት ሚሊዮን ሔክታር በላይ መሬት በዘር እንደሚሸፈን የግብርና ሚኒስቴር አስታወቀ። ትልቅ ሀገር፣ ትልቅ ሕዝብ፣ ታላቅ ርዕይ የሰነቀችው ኢትዮጵያ ዓመታዊ የስንዴ ምርት ፍላጎቷ ከ107 ሚሊዮን ኩንታል በላይ እንደነበር የቅርብ ጊዜ ትውስታ ነው። ይህንን የሀገር ውስጥ የፍጆታ ፍላጎት ለማሟላትም ለዓመታት ከ700 ሚሊዮን እስከ 1 ቢሊዮን የአሜሪካ ዶላር በሚደርስ የውጭ ምንዛሬ ወጪ ለስንዴ ግዢ ስታወጣ ቆይታለች። የኢትዮጵያ የለውጥ መሻት የወለደው የመደመር መንግሥት የዘመናት የተረጅነት እሳቤን ለመስበር የተገበራቸው የግብርና ልማት መርሐ ግብሮችም ከራስ ፍላጎት የተሻገረ የምርት አቅም ፈጥረዋል።   በጠቅላይ ሚኒስትር ዐቢይ አሕመድ (ዶ/ር) አነሳሽነት ተግባራዊ የተደረገው የበጋ መስኖ ስንዴ ልማት ተጨባጭ ውጤት አምጥቷል። ይህም ከ2014 ዓ.ም ጀምሮ ኢትዮጵያ በከፍተኛ የውጭ ምንዛሬ የገንዘብ ወጪ የምታስገባውን የስንዴ ምርት ሙሉ በሙሉ በማቆም ለውጭ ገበያ ማቅረብ የምትችልበትን አስተማማኝ ምኅዳር ገንብቷል። በግብርና ሚኒስቴር የሰብል ልማት መሪ ሥራ አስፈጻሚ አቶ ተሾመ ገለቱ ለኢዜአ እንዳሉት፤ የግብርና ዘርፍ እመርታ የአርሶና አርብቶ አደሩን የዝናብ ጥገኝነት በማስቀረት አዲስ የልማት ባህል ፈጥሯል። በተለይም በጠቅላይ ሚኒስትር ዐቢይ አሕመድ (ዶ/ር) የተበሰረው የበጋ መስኖ ስንዴ ልማት አርሶና አርብቶ አደሩ የተለዩ አማራጮችን በመጠቀም በዓመት ሦስት ጊዜ የሚያመርቱበትን ዕድል እንደፈጠረ ገልጸዋል። ይህም ከዚህ ቀደም በደጋና ወይና ደጋ አካባቢ በአንድ ወቅት ብቻ ተወስኖ ነበረውን የስንዴ ሰብል ልማት ባህል በመስበር በሰፋፊ የቆላማ አካባቢዎች አዲስ የምርታማነት ባህል መፍጠሩን ተናግረዋል።   በዚህም የበጋ መስኖ ስንዴ ልማት መርሐ ግብር ሲበሰር የነበረው 20 ሺህ ሔክታር መሬት አሁን ላይ ከ3 ነጥብ 78 ሚሊዮን ሔክታር መሬት በላይ ማድረስ መቻሉን አስረድተዋል። የበጋ መስኖ ስንዴ ልማት ውጤታማ ልምምድም የአርሶና አርብቶ አደሩን የኢኮኖሚ ተጠቃሚነት በማላቅ የዘመናት የተረጅነት አስተሳሰብን የሰበረ አዲስ የምርታማነት ባህል መገንባቱን አብራርተዋል። በ2018 ዓ.ም የበጋ መስኖ ስንዴ ልማት 3 ነጥብ 78 ሚሊዮን ሔክታር መሬት በዘር በመሸፈን 149 ሚሊዮን ኩንታል ምርት ማግኘት እንደተቻለ አስታውሰዋል። በዘንድሮው የበጋ መስኖ ስንዴ ልማት መርሐ ግብርም ከሚቀጥለው ሕዳር ወር ጀምሮ ከ4 ነጥብ 5 ሚሊዮን ሔክታር በላይ መሬት በዘር በመሸፈን 189 ሚሊዮን ኩንታል ለማምረት ዕቅድ መያዙን አስታውቀዋል።

አዲስ አበባ፤ ጥቅምት 21/2019 (ኢዜአ)፦‎ በመደመር መንግሥት ለተኪ ምርትና ወጭ ንግድ የተሰጠው ትኩረት ምርትና ምርታማነትን ከማሳደጉም ባሻገር ዓለም አቀፍ ተወዳዳሪነት እንዲያድግ ማስቻሉን አምራቾች ገለጹ። በኢንዱስትሪ ዘርፍ የነበሩ ማነቆዎችን ለማሻሻል ሀገር በቀል የኢኮኖሚ ማሻሻያ፣ የማክሮ ኢኮኖሚ ሪፎርምና ኢትዮጵያ ታምርት ንቅናቄ ተተግብረዋል። በዚህም ከውጭ በሚገቡ ምርቶች ላይ ያለውን ጥገኝነት ለመቀነስ እና የሀገሪቱን የንግድ ሚዛን መዛባት በዘላቂነት ለማስተካከል መዋቅራዊ የኢኮኖሚ ለውጥ ተካሂዷል። የኢትዮጵያ ታምርት ሀገራዊ ንቅናቄ በተለይ በአምራች ዘርፉ የነበሩ ማነቆዎችን በመፍታት ተኪ ምርትና የወጪ ንግድ እንዲያድግ እያስቻለ ይገኛል።   የስርጉ ኑሪ ኢብራሂም ድርጅት ምክትል ስራ አስኪያጅ ሙራድ በድሩ እንዳሉት፤ ድርጅቱ በስሩ ባሉት አልፋ ፉድስ ኮምፕሌክስና ኦሜጋ ኢምፖርት ኤክስፖርት ድርጅቶች ተኪ ምርትና የወጭ ንግድ ላይ ተሰማርቷል። ድርጅቱ በምግብ ማቀነባበርና በላኪና አስመጪነት የተሰማራ ሲሆን ለ800 ቋሚና ከ100 በላይ ጊዜያዊ የስራ ዕድል ፈጥሯል። የመደመር መንግሥት ለአምራች ዘርፉ ትኩረት በመስጠት በሀገር በቀል ኢኮኖሚ ማሻሻያ፣ ኢትዮጵያ ታምርት ንቅናቄና የማክሮ ኢኮኖሚ ሪፎርም መደረጉ ለዘርፉ እድገት አስተዋፅኦ አድርጓል ብለዋል። ድርጅቱ ስጋ ወደውጭ እንደሚልክ ተናግረው የተደረጉ ማሻሻያዎች የስጋ ወጭ ንግድ እንዲያድግ ማስቻሉን ተናግረዋል።   የኒውዊንግ አዲስ ጫማ ፋብሪካ የሰው ኃይል ስራ አስኪያጅ ብዙአየሁ ወርቁ በበኩላቸው፤ ድርጅቱ ቆዳና የቆዳ ውጤቶችን ለሀገር ውስጥ ፋብሪካዎችና ለአውሮፓና አሜሪካ ገበያ እያቀረበ መሆኑን ተናግረዋል። ለአምራች ዘርፉ የተሰጠው ትኩረትና የተደረጉ ማሻሻያዎች ከዚህ ቀደም ይገጥም የነበረው የውጭ ምንዛሬ እጥረት ችግር እንዲፈታ ማስቻሉንም ገልጸዋል። ኢትዮጵያ የአፍሪካ አህጉራዊ የነጻ ንግድ ቀጣና ስምምነት መተግበሯም የበለጠ ዓለም አቀፍ ተወዳዳሪነትን የሚያሳድግ እንደሆነም አስረድተዋል።   የኢትዮጵያ ስጋ አምራችና ላኪዎች ማህበር ቦርድ ፕሬዝዳንት ከሊፋ ሁሴን፤ በአምራች ኢንዱስትሪው ዘርፍ የተደረጉ ማሻሻያዎች ምርትና ምርታማነት እንዲጨምር እያስቻሉ መሆኑን ተናግረዋል። የተደረጉ ማሻሻያዎች በዘርፉ ለነበሩ ችግሮች መፍትሄ በማበጀት ዓለም አቀፍ ተወዳዳሪነት እያሳደገ መምጣቱን ተናግረዋል።   የኢንዱስትሪ ሚኒስትር ዴኤታ ሀሰን መሐመድ (ዶ/ር) በበኩላቸው እንደገለጹት፤ ለአምራች ዘርፉ በተሰጠው ትኩረት የሀገር ውስጥ አምራቾች በገበያ ላይ ያላቸው የምርት ድርሻ ወደ 45 በመቶ ያደገ ሲሆን፣ የፋብሪካዎች አማካይ የማምረት አቅምም ከነበረበት 47 በመቶ ወደ ከ69 በመቶ በላይ ከፍ ብሏል። የማምረቻው ዘርፍ እድገት በ2013 ዓ.ም 4 ነጥብ 8 ከነበረው በ2018 ዓ.ም 15 ነጥብ 8 በመቶ መድረሱን አንስተው ይህንን እድገት በዘላቂነት ለማስቀጠል የተጀመሩ ስራዎች ተጠናክረው ይቀጥላሉ ብለዋል።