አዲስ አበባ ፤ መስከረም 29/2019 (ኢዜአ) ፦የአረንጓዴ ዐሻራ መርሃ ግብር የኢትዮጵያን የደን ሽፋን በማሳደግ ዘርፈ ብዙ ኢኮኖሚያዊ ትሩፋት እያስገኘ መሆኑን የኢትዮጵያ ደን ልማት ገለጸ። ትልቅ ሀገር፤ ትልቅ ሕዝብ፤ ታላቅ ርዕይ የመደመር መንግሥት ምሥረታ እና ሰባተኛው የሕዝብ ተወካዮች ምክር ቤት መክፈቻ ሥነ ሥርዓት መስከረም 25 ቀን 2019 ዓ.ም ተካሂዷል። በዚህም የሕዝብ ተወካዮች ምክር ቤት ዐቢይ አሕመድ (ዶ/ር)ን ለቀጣይ አምስት ዓመታት የኢፌዴሪ ጠቅላይ ሚኒስትር አድርጎ ሰይሟል። ጠቅላይ ሚኒስትር ዐቢይ አሕመድ (ዶ/ር) በዚህ ወቅት፤ በአረንጓዴ ዐሻራ መርሃ ግብር የተተከሉት 56 ቢሊዮን ችግኞች የተራቆቱ መሬቶችን በማገገም ጉልህ ፋይዳ እያስገኙ መሆኑን ገልጸዋል። የአረንጓዴ ዐሻራ መርሃ ግብሩም የግብርና ምርታማነትን በማገዝ ዘርፈ ብዙ ኢኮኖሚያዊና ማህበራዊ ጠቀሜታ ያስገኘ ዓለም አቀፍ ተነሳሽነት ነው።   በኢትዮጵያ ደን ልማት የተፈጥሮ ደን መሪ ሥራ አስፈጻሚ ካብታሙ ግርማ ለኢዜአ እንዳሉት፤ ደን የአካባቢ መራቆትና የሥነ-ምኅዳር ደህንነትን በመጠበቅ ለግብርና ምርታማነት ጉልህ ጠቀሜታ አለው። የደን ሽፋን ዕድገትም አየር ንብረት ለውጥ ተፅዕኖን በመቀነስ ብርቅዬ እንስሳትና የብዝኅ ሕይወት ደኅንነትን ለማረጋገጥ ከፍተኛ ማኅበራዊና ኢኮኖሚያዊ ፋይዳ እንደሚኖረው ገልጸዋል። የመደመር መንግሥት በአረንጓዴ ዐሻራ መርሃ ግብር ለደን ልማት የሰጠው ትኩረት የአካባቢ ተጽዕኖ ውጤታማነትን በማሻሻል ተጨባጭ ውጤት እያመጣ መሆኑን ተናግረዋል። ይህም ዜጎች በአትክልትና ፍራፍሬ እንዲሁም ተያያዥ የልማት መስኮች የሚሰማሩበትን ዕድል በመፍጠር ዘርፈ ብዙ ኢኮኖሚያዊና ማኅበራዊ ፋይዳ እያስገኘ መሆኑን አንስተዋል። በጠቅላይ ሚኒስትር ዐቢይ አሕመድ (ዶ/ር) ሐሳብ አመንጭነት በ2011 ዓ.ም. የተጀመረው የአረንጓዴ ዐሻራም 17 ነጥብ 2 በመቶ የነበረውን ደን ሽፋን ወደ 23 ነጥብ 6 በመቶ ማሳደጉን አስታውሰዋል።   የአረንጓዴ ዐሻራ መርሃ ግብር የደን ጥበቃ ውጤታማነትን በማላቅ የተስተካከለ ሥነ-ምኅዳርና የብዝኅ ሕይወት እንዲፈጠር እያደረገ እንደሚገኝ ጠቅሰዋል። በተለይም የተራቆቱ አካባቢዎች እንዲያገግሙ በማድረግ ለምግብነት የሚውሉ የፍራፍሬ እፅዋት ልማትን በማስፋፋት የምግብ ዋስትናን ለማረጋገጥ መሠረት እየጣለ መሆኑን አብራርተዋል። የህብረተሰቡን የደን ጥበቃና እንክብካቤ ባህል በማሻሻል የደን አስተዳደር ሥርዓት ውጤታማነትን ማሳደግ የሚያስችል አቅም መፈጠሩንም አስረድተዋል። የኢትዮጵያ ደን ልማትም የተራቆቱ አካባቢዎች እንዲያገግሙ፣ የደን ሀብት በዘላቂነት እንዲጠበቅና እንዲለማ የሚያስችል ሥራ እየተሠራ እንደሚገኝ አንስተዋል። በተጨማሪም የደን ውጤቶች ምርታማነትን በማሻሻል የደን ሀብት ኢኮኖሚያዊና ማኅበራዊ ተጠቃሚነትን በማላቅ የአየር ንብረት ለውጥ ተፅዕኖን መቋቋም የሚያስችሉ ተግባራት እየተከናወኑ ነው ብለዋል።

አዲስ አበባ፤መስከረም 27/2019(ኢዜአ)፦ኢትዮጵያ በአረንጓዴ ዐሻራ መርሀ ግብር ያስመዘገበችው ውጤት ለሌሎች ሀገራት አርዓያ የሆነ ታላቅ ተግባር መሆኑን የዘርፉ ሙያተኞች ገልጸዋል። ኢትዮጵያ ትልቅ ሀገር፣ ትልቅ ህዝብ፣ ታላቅ ርዕይን አንግባ በትኩረት እየሰራችባቸው ከሚገኙ ውጤታማ ሀገራዊ ፕሮጀክቶች መካከል አረንጓዴ ዐሻራ አንዱ ነው። ኢትዮጵያ የአየር ንብረት ለውጥ መዛባትን ለመከላከል፣ የምግብ ሉዓላዊነትን ለማረጋገጥ ባለፉት ዓመታት በአርንጓዴ ዐሻራ መርሀ ግብር ዘርፈ ብዙ ጠቀሜታ ያላቸው ችግኞችን ተክላለች። የኢትዮጵያ ፌዴራላዊ ዴሞክራሲያዊ ሪፐብሊክ 7ኛው የሕዝብ ተወካዮች ምክር ቤት የ1ኛ ዓመት የሥራ ዘመን የምክር ቤቱ መመሥረቻ 1ኛ መደበኛ ስብሰባውን መካሄዱ ይታወቃል። በዚህ ወቅት ጠቅላይ ሚኒስትር ዐቢይ አሕመድ (ዶ/ር) እንደገለጹት፤ የአረንጓዴ ዐሻራ መርሀ ግብርን ከጀመረችበት ጊዜ ጀምሮ እስካሁን 56 ቢሊዮን ችግኞችን በመትከል የተራቆቱ መሬቶችን አረንጓዴ ማልበስ ተችሏል። በተጨማሪም ይህ መርሀ ግብር የመሬት መሸርሸርን እንዲቀንስ፣ ስነ ምህዳራን መጠበቅ እንዳስቻለም መግለጻቸው ይታወሳል። በተባበሩት መንግስታት የደን ፎረም ሴክሬታሪያት ዳይሬክተር ዶክተር ጁሊያት ቢያኦ ከኢዜአ ጋር ባደረጉት ቆይታ የደን ሽፋንን ለመጨመር የሚከናወኑ ተግባራት በአየር ንብረት ለውጥ ምክንያት ሊከሰቱ የሚችሉ ችግሮችን ለመቅረፍ ጉልህ ሚና እንደሚያበረክቱም ገልጸዋል። የደን መራቆትን ለመቅረፍና የመሬት ገጽታ ለመጠበቅ መንግስት ከሚያከናውናቸው ተግባራት በተጨማሪ የዘርፉን ተዋንያን ርብርብ የሚጠይቅ መሆኑን አብራርተዋል። የኢትዮጵያ መንግስት የአረንጓዴ ዐሻራ መርሀ ግብርን ነድፎ ባለፉት ዓመታት በመተግበር የአረንጓዴ ሽፋንን ለማሳደግ ያከናወነው ተግባር ውጤት ማስመዝገቡንም አክለዋል።   የአፍሪካ የደን ፎረም የደን ተመራማሪ የሆኑት ዶሪስ ሙታ (ዶ/ር) በበኩላቸው የአካባቢ ስነ ምህዳርን ለመጠበቅና በአየር ንብረት ለውጥ ምክንያት የሚከሰቱ ችግሮችን ለመከላከል የሚከናወኑ ተግባራት የመንግስትን ቁርጠኝነት የሚጠይቅ መሆኑን አንስተዋል። በመሆኑም ኢትዮጵያ በአረንጓዴ ዐሻራ መርሃ ግብር ያከናወነቻቸው ውጤታማ ተግባራት ከደን ሽፋን መመናመን ጋር ተያይዞ የሚከሰት የአየር ንብረት ለውጥ መዛባትን በመከላከል በኩል ጉልህ ሚና አለው ብለዋል። ኢትዮጵያ በአረንጓዴ ዐሻራ መርሀ ግብር ያስመዘገበችው ውጤት በዘርፉ በትኩረት ከተሰራ ታሪክ መቀየር እንደሚቻል ለዓለም ጥሩ ምሳሌ እንደሚሆን ተናግረዋል። እንደ አረንጓዴ ዐሻራ መርሃ ግብር አይነት ፕሮጀክት ነድፎ መተግበር ፋይዳው አካባቢን በደን ከመሸፈን በላይ መሆኑንም ነው የተናገሩት። በመሆኑም መሰል ምሳሌ የሚሆን ተግባር ሰዎች በምቹ ስነ ምህዳር እንዲኖሩ ዕድል የሚፈጥርና ምርታማነትን የሚያሳድግ አርዓያነት ያለው ተግባር እንደሆነም ነው ዶሪስ ሙታ ( ዶ/ር) የገለጹት።    

ባህር ዳር፤ መስከረም 27/2019 (ኢዜአ)፦ በአማራ ክልል የተከሰተው የግሪሳ ወፍ መንጋ በሰብል ላይ ጉዳት እንዳያደርስ ለመከላከል የኬሚካል ርጭት እየተካሔደ መሆኑን የክልሉ ግብርና ቢሮ አስታወቀ። የቢሮው የሰብል ልማትና ጥበቃ ዳይሬክተር ማንደፍሮ አስላከ (ዶ/ር) ለኢዜአ እንደገለጹት፤ ከነሐሴ ወር 2018 ዓ.ም መጨረሻ ጀምሮ የተከሰተውን የግሪሳ ወፍ መንጋ በዘመናዊና ባህላዊ መንገድ የመከላከል ሥራ እየተሠራ ይገኛል።   በደቡብና ሰሜን ወሎ፣ በሰሜን ሸዋ እና በኦሮሞ ብሔረሰብ አስተዳደር ዞኖች በሚገኙ 15 ወረዳዎች የተከሰተው የግሪሳ ወፍ መንጋ በደረሰ ሰብል ላይ ጉዳት እንዳያደርስ በተቀናጀ አግባብ የመከላከል ሥራ እየተከናወነ መሆኑን ገልጸዋል። መንጋው የማሽላ፣ የጤፍ፣ የስንዴ፣ የገብስ፣ የዳጉሳ፣ የሩዝ እና የመሳሰሉ ሰብሎችን በእሸትነት ደረጃ ፍሬውን በመብላትና በማራገፍ ጥፋት የሚያስከትል ነው። በዚህም 74 የግሪሳ ወፍ መንጋ ማደሪያ ቦታዎችን በመለየት ከመስከረም 4 ቀን 2019 ዓ.ም ጀምሮ በአውሮፕላን የታገዘ የኬሚካል ርጭት በማከናወን አብዛኛውን የግሪሳ ወፍ ማስወገድ ተችሏል።   በተቀናጀ መንገድ በተካሄደ የመከላከል ሥራ ሰብሉን ሙሉ በሙሉ ከግሪሳ ወፍ ጉዳት መታደግ እንደተቻለ ነው ዳይሬክተሩ ያስገነዘቡት። አርሶ አደሩ በየእለቱ ሰብሉን አሰሳ በማድረግ ከግሪሳ ወፍ ጉዳት የመከላከል ሥራውን አጠናክሮ መቀጠል እንዳለበት አሳስበዋል። የኦሮሞ ብሔረሰብ አስተዳደር ዞን ግብርና መምሪያ የሰብል ልማት ቡድን መሪ አቶ ደጀኔ ከበደ በበኩላቸው፤ መንጋው የተከሰተው በከሚሴ ከተማ አስተዳደር፣ በዳዋ ጨፋ፣ በአርጡማ ፉርሲ፣ በጅሌ እና ባቲ ወረዳዎች መሆኑን ተናግረዋል። መንጋውን በአውሮፕላን የኬሚካል ርጭት ፈጥኖ በማከናወን የመከላከል ሥራ በመሠራቱ ከ70 በመቶ በላይ የሚሆነውን የግሪሳ ወፍ ማስወገድ መቻሉን ገልጸዋል። አሁንም መንጋውን የመከላከል ሥራ ተጠናክሮ መቀጠሉን አመልክተው፤ አርሶ አደሩም በባህላዊ መንገድ ድምፅ በማሰማት መንጋው በደረሱ ሰብሎች ላይ ጉዳት እንዳያደርስ እያደረገ መሆኑን ተናግረዋል።

አዲስ አበባ ፤መስከረም 23/2019 (ኢዜአ)፦የአረንጓዴ ዐሻራ መርሃ-ግብር የሀገሪቱን የአረንጓዴ ልማት ግቦች ከማሳካት ባለፈ፣ ከተሞችን ለኑሮ ምቹ እና ተስማሚ እያደረገ እንደሚገኝ የከተማና መሰረተ ልማት ሚኒስቴር ገለጸ። ኢትዮጵያ ለአየር ንብረት የማይበገር አረንጓዴ ኢኮኖሚ ለመገንባት በ2011 ዓ.ም በጠቅላይ ሚኒስትር ዐቢይ አሕመድ (ዶ/ር) መሪነት የጀመረችው ታሪካዊ የአረንጓዴ ዐሻራ መርኃ ግብር ለአፍሪካም ሆነ ለዓለም ትልቅ አርአያ መሆን ችሏል። በዚህ ግዙፍ ሀገራዊ ተነሳሽነት አማካኝነት ባለፉት 8 ዓመታት ውስጥ 56 ቢሊዮን ችግኞች ለመትከል ተችሏል። በመርሃ ግብሩ የተተከሉ ችግኞች ስነ-ምህዳርን ከማስጠበቅና ከተሞችን አረንጓዴ ከማላበስ ባለፈ ለምግብነት እና ለቱሪስት መዳረሻነት ምቹ ሁኔታን ፈጥረዋል። ይህ ሁሉን አቀፍ ጥረት ሀገሪቱ የተፈጥሮ ጸጋዎቿን ጠብቃ የምግብ ሉዓላዊነቷን ለማረጋገጥ ለምታደርገው ብሩህ ጉዞ ጠንካራ እና አዲስ መሰረት ጥሏል። በከተማና መሰረተ ልማት ሚኒስቴር የፖሊሲና ስትራቴጂ ጥናት ምርምር መሪ ስራ አስፈጻሚ አማን አሰፋ (ዶ/ር) ለኢዜአ እንደገለጹት፣ በከተሞች የሚካሄዱ የአረንጓዴ ዐሻራ ልማት ስራዎች ከተሞች ለኑሮ ምቹ፣ ዘመናዊና ማራኪ አድርጓቸዋል። በከተሞች አካበቢ ከፍተኛ የትራንስፖርት እንቅስቃሴ መኖር እና የኢንዱስትሪ ማዕከል መሆናቸው ለከፍተኛ ካርቦን ልቀትና ብክለት ተጋላጭ ናቸው ብለዋል። በመሆኑም የአረንጓዴ ዐሻራ መርሃ ግብር ይህንን ችግር በመቀነስ ረገድ ከፍተኛ አስተዋጽኦ እያበረከተ መሆኑን አንስተዋል። በዚህም የሙቀት መጠንን በመቀነስ፣ የአካባቢ ስነ-ምህዳርን በመጠበቅ እና በከተሞች አካባቢ ጎርፍ እንዳይከሰት በመከላከል ለአየር ንብረት ለውጥ ትልቅ አዎንታዊ ድርሻ እያበረከተ እንደሚገኝ ተናግረዋል። ሚኒስቴር መስሪያ ቤቱ ለአረንጓዴ ዐሻራ ልማት ልዩ ትኩረት በመስጠት አዳዲስ የከተማ ፕላን አሠራር ላይ ማሻሻያ ማድረጉንም ተናግረዋል። በዚህም አዲስ የሚዘጋጁ የከተማ ፕላኖች 30 በመቶ ለአረንጓዴ ልማት፣ 30 በመቶ ለመሠረተ ልማት እና 40 በመቶው ደግሞ ለመኖሪያነት እንዲውሉ የሚያስችል ሞዳሊቲ እንዲከተሉ ትኩረት ተሰጥቷል ብለዋል። በዚህ መሰረት የሚከናወኑ የከተማ ፕላን ዝግጅቶች የሀገሪቱን አረንጓዴ የልማት ግቦች ለማሳካት ጉልህ አስተዋጽኦ እንደሚኖራቸው ተገልጿል።      

አዲስ አበባ፤ መስከረም 21/2019 (ኢዜአ) ፦የጽዱ ኢትዮጵያ ሀገር አቀፍ ንቅናቄ የአካባቢ ጥበቃ ሕግጋት ትግበራ ውጤታማነትን በማጎልበት ጉልህ አስተዋጽኦ እያበረከተ መሆኑን የአካባቢ ጥበቃ ባለስልጣን ገለጸ። የባለሥልጣኑ ምክትል ዋና ዳይሬክተር ፍሬነሽ መኩሪያ ለኢዜአ እንዳሉት፤ በጠቅላይ ሚኒስትር ዐብይ አሕመድ (ዶ/ር) ሀሳብ አመንጪነት የተጀመረው የጽዱ ኢትዮጵያ ንቅናቄ ተጨባጭ ውጤት አምጥቷል። በተለይም የከተሞችን ሁለንተናዊ ጽዳትና ውበት ከማሻሻል ባሻገር ለአካባቢ ጥበቃና ሥነ-ምኅዳር ድኅንነት ከፍተኛ አስተዋጽኦ እያበረከተ መሆኑን ገልጸዋል። ይህም የጽዱ ኢትዮጵያ ተነሳሽነት ከተሞችን ለነዋሪዎቻቸው ዘመናዊ ምኅዳርን በማጎናጸፍ የኮሪደር፣ የወንዝ ዳርቻና መሰል ውጤታማ የልማት ሥራዎችን የሚያፋጥን አስቻይ ምኅዳር መፍጠሩን ተናግረዋል። የአካባቢ ጥበቃ ባለሥልጣንም የሕብረተሰብ ተሳትፎን በማሳደግ የጽዱ ኢትዮጵያን ግብ የሚያሳካ የአካባቢ ጥበቃ፣ የጽዳትና ውበት ባህልን የሚያጎለብት ሀገር አቀፍ ንቅናቄ እያካሄደ መሆኑን አመልክተዋል። በዚህም በመጀመሪያው ዙር "ውበት ይንቃ፤ ብክለት ይብቃ" በሚል መሪ ሀሳብ ለስድስት ወራት የብክለት ግንዛቤ ማስጨበጫ ሥራ መከናወኑን አስታውሰዋል። በሁለተኛው ዙር ደግሞ "ጽዱ ኢትዮጵያን ባህል እናድርግ" በሚል መሪ ሀሳብ የጽዳት ባህልን ማጠናከር የሚያስችል መሰረት መጣል እንደተቻለ አንስተዋል። በአሁኑ ወቅት ከሰኔ እስከ መስከረም ለ3 ወራት የሚቆይ 3ኛ ዙር ''የጽዱ ኢትዮጵያ ለትውልድ'' ሀገር አቀፍ ንቅናቄ እየተካሄደ መሆኑን አንስተዋል። በየዓመቱ የሚካሄዱት የጽዱ ኢትዮጵያ ሀገር አቀፍ ንቅናቄም የማኅበረሰቡን የአካባቢ ጥበቃ ግንዛቤ በማጎልበት ተቋማት በብክለት መከላከል ላይ የድርሻቸውን እንዲወጡ እያደረገ ነው ብለዋል። መርሐ ግብሩም የአካባቢ ጥበቃ ሕግጋትና መመሪያዎችን ሙሉ በሙሉ በውጤታማነት በማስፈጸም ለአካባቢ ጥበቃ ሥራዎች ምቹ ሁኔታ መፈጠሩን ጠቁመዋል። የተገኘውን ውጤት ይበልጥ ለማጠናከር በቀጣይም ዘላቂ የአካባቢ ጥበቃን ለማረጋገጥና ብክለትን ለመከላከል የተቀናጁ የአካባቢ የጽዳትና ውበት ጥበቃ ተግባራት ተጠናክረው እንደሚቀጥሉ ገልጸዋል።    

አዲስ አበባ፤ መስከረም 19/2019 (ኢዜአ)፦የኤልኒኖ ክስተት የሚያመጣቸውን መልካም እድሎች ለመጠቀምና ሊያጋጥሙ የሚችሉ ተጽዕኖዎችን ለመከላከል ዝግጅት ማድረግ እንደሚገባ የኢትዮጵያ ሚቲዎሮሎጂ ኢንስቲትዩት አሳሰበ። የኢንስቲትዩቱ ምክትል ዋና ዳይሬክተር አሳምነው ተሾመ (ዶ/ር) እንደገለጹት፤ የኤልኒኖ ክስተት ከጥቅምት ወር ጀምሮ በከፍተኛ ሁኔታ እየጠnነከረ ይሄዳል። ኤልኒኖ በጋ ሁለተኛ የዝናብ ወቅታቸው በሆኑ አካባቢዎች እንዲሁም በልግ ዋነኛ የዝናብ ወቅታቸው በሆኑ የደቡብ አጋማሽ የሀገራችን ክፍሎች ከመደበኛ በላይ የሆነ የዝናብ መጠን እና ስርጭት እንዲኖር አስተዋፅኦ ያደርጋል ብለዋል። ከጥቅምት ጀምሮ የሚኖረው የዝናብ መጠንና ስርጭት በተለይም ለሱማሌ ክልል ደቡባዊ ክፍል፣ ለጉጂ፣ ለቦረና፣ ለሲዳማ እና ለደቡብ ኢትዮጵያ አካባቢዎች እጅግ ከፍተኛ ጠቀሜታ እንደሚኖረው ተናግረዋል። ይህም ዝናብ ከወዲሁ የመስኖ ስራዎችንና የተለያዩ የግብርና እንቅስቃሴዎችን ለማከናወን፣ እንዲሁም ለአርብቶ አደሩና ለከፊል አርብቶ አደሩ የእንስሳት መኖ አቅርቦትን በማሻሻል በእንስሳት ምርትና ምርታማነት ላይ ከፍተኛ አዎንታዊ አስተዋፅኦ እንደሚኖረው ገልጸዋል። በአሁኑ ወቅት የምዕራብ ህንድ ውቅያኖስም በከፍተኛ ሁኔታ እየሞቀ ይገኛል ያሉት ምክትል ዋና ዳይሬክተሩ የኤልኒኖ ክስተት እና የህንድ ውቅያኖስ ሙቀት መጨመር በአንድ ጊዜ በሚጣመሩበት ወቅት ወቅቱን ያልጠበቀ ዝናብ እንዲኖር ያደርጋል ብለዋል። በዚህም መሰረት ከጥቅምት አጋማሽ ጀምሮ በምስራቅ አማራ፣ በምስራቅ እና በመካከለኛው የሀገሪቱ አካባቢዎች ወቅቱን ያልጠበቀ ዝናብ የመፈጠር እድሉ ከፍተኛ መሆኑን ጠቅሰዋል፡፡ ከመደበኛ በላይ በሚኖረውና ተደጋጋሚነት ባለው ከባድ ዝናብ ምክንያት በዋቢ ሸበሌ እና በገናሌ ዳዋ ተፋሰሶች አካባቢዎች ቅጽበታዊ ጎርፍ የመከሰት እድሉ እጅግ ከፍተኛ እንደሆነ ጠቅሰዋል፡፡ ይህም በሰው፣ በእንስሳትና በአካባቢ ላይ አሉታዊ ተጽዕኖ ሊያሳድር ስለሚችል ከወዲሁ በዋቢ ሸበሌ፣ በኦጋዴን እና በገናሌ ዳዋ አካባቢዎች የተቀናጀ የወንዝ አመራር ስርዓትን መተግበር አስፈላጊ መሆኑ ገልጸዋል፡፡ በዘንድሮው የበጋ ወቅት ከመደበኛ በላይ የሚኖረው የዝናብ መጠን ያለው ከፍተኛ ጠቀሜታ እንደተጠበቀ ሆኖ፣ ሊከሰቱ የሚችሉ አሉታዊ ተጽዕኖዎችን ለመከላከል ለማህበረሰቡ ተደጋጋሚነት ያለው የግንዛቤ መፍጠሪያ ስራዎችን በመስራት ላይ መሆናቸውን ጠቁመዋል፡፡

ኢትዮጵያ በውሃ፣ በንፋስ፣ በፀሐይ እና በጂኦተርማል ሀብቶቿ ለታዳሽ ኃይል ልማት እጅግ ግዙፍ አቅም ያላት ሀገር ስትሆን፤ የመደመር መንግስት ይህንን የተፈጥሮ ጸጋ በብቃት በመጠቀም የኢትዮጵያን የኢነርጂ ሉዓላዊነት ለማረጋገጥ ታላላቅ ሥራዎችን አከናውኗል። በዚህ ረገድ የመደመር መንግስት ታላቁ የኢትዮጵያ ሕዳሴ ግድብን ከማጠናቀቅ ባሻገር ሌሎች የታዳሽ ኃይል አማራጮችን በማልማት ረገድ ያከናወነው ስራ ተጠቃሽ ነው። ኢትዮጵያ የታዳሽ ኃይል ልማቷን ከራሷ አልፎ ለጎረቤት አገራት በማዳረስ ቀጣናውን በኢነርጂ የማስተሳሰር ስትራቴጂካዊ ሚናዋን በተግባር እያሳየች ትገኛለች። እንደ ሱዳን፣ ጂቡቲ እና ኬንያ ላሉ አገራት የሚደረገው የኤሌክትሪክ ሃይል ንግድ የምስራቅ አፍሪካን አገራት በኢነርጂ በማስተሳሰር በጋራ ማደግ እንደሚገባ ያሳየ ነው።ይህ የሃይል ትብብር የአፍሪካን አህጉራዊ ነጻ የንግድ ቀጣና እውን ለማድረግ እና በቀጣናው የኃይል ዋስትናን ለማረጋገጥ ወሳኝ መሰረት ሆኖ ቀጥሏል።

የአረንጓዴ አሻራ መርሃ ግብር የዛሬን ጊዜያዊ ፍላጎት ለማሟላት ብቻ ሳይሆን፣ መጪው ትውልድ የተሻለች፣ ለኑሮ ምቹ እና በምግብ እራሷን የቻለች ኢትዮጵያን እንዲረከብ የተነደፈ ስትራቴጂካዊ ሀገራዊ ራዕይ ነው። በየዓመቱ በቢሊዮኖች የሚቆጠሩ ችግኞችን በመትከል የሚከናወነው ይህ ዘመቻ፣ ለበርካታ አስርት ዓመታት ተደምስሶ የነበረውን የደን ሽፋን በመመለስ፣ የአፈር መሸርሸርን በመግታት እና የስነ-ምህዳር ሚዛንን በማስተካከል ረገድ መሠረታዊ ቅያሬ እያመጣ ይገኛል። ዛሬ የሚተከለው እያንዳንዱ ችግኝ የነገዋ ኢትዮጵያ ንጹህ አየር፣ አስተማማኝ የውኃ ሀብት እና ለም መሬት እንዲኖራት የሚያስችል መሠረት በመሆኑ፣ የወደፊቱን ትውልድ ከድርቅ፣ ከበረሃማነት እና ከአየር ንብረት መዛባት ስጋት የሚታደግ ብሔራዊ ዋስትና ነው። ከዚህም በተጨማሪ ይህ መርሃ ግብር ከአካባቢ ጥበቃ ባለፈ ከግብርና ምርታማነት፣ ከኢኮኖሚ እድገት እና ከአረንጓዴ ኢነርጂ ልማት ጋር በመቀናጀት የሚተገበር በመሆኑ፣ ለወደፊቱ ትውልድ የተረጋገጠ የልማትና የህይወት መሰረት የሚጥል ነው። አረንጓዴ አሻራን የመትከልና የመንከባከብ ባህል በህፃናትና በወጣቶች ዘንድ እንዲሰርጽ በማድረግ፣ ሀገርን የመጠበቅና የመንከባከብ ኃላፊነት በትውልድ ቅብብሎሽ እንዲሸጋገር ያደርጋል። በመሆኑም የአረንጓዴ አሻራ ጥረት የዛሬው ትውልድ ለነገው ትውልድ የሚያስረክበው ታላቅ ተግባር ነው።

ሀረር፤ መስከረም 14/2019 (ኢዜአ):- ከአየር ንብረት ለውጥ ጋር ተያይዞ ለሚያጋጥሙ አደጋዎች ፈጣን ምላሽ መስጠት የሚያስችል የተሟላ ዝግጅት መደረጉን የሐረሪ ክልል ምክትል ርዕሰ መስተዳድርና የግብርና ልማት ቢሮ ሃላፊ ሮዛ ኡመር ገለጹ። በአየር ንብረት መለዋወጥ ሳቢያ በዓለም አቀፍ ደረጃ የኤልኒኖ ክስተት ጋር የተያያዘ ችግር ስለመኖሩ የኢትዮጵያ ሚቲዎሮሎጂ ኢንስቲትዩት ሰሞኑን አመላክቷል። ከዚሁ ጋር ተያይዞ በዘንድሮው የበጋ ወቅት በደቡብና ደቡብ ምሥራቅ የኢትዮጵያ አካባቢዎች የተሻለ የዝናብ መጠን እንደሚኖር ይጠበቃል ብሏል፡፡ በአንጻሩ በመካከለኛውና በሰሜኑ የሀገሪቱ ክፍሎች አልፎ አልፎ ያልተጠበቀ ዝናብ ሊኖር ይችላል ሲልም አሳውቋል። በመሆኑም ለሚያጋጥሙ ችግሮች ፈጣን ምላሽ በመስጠት ረገድ በሐረሪ ክልል ያለውን ዝግጁነት በተመለከተ ኢዜአ የክልሉን ምክትል ርዕሰ መስተዳድር አነጋግሯል። የሐረሪ ክልል ምክትል ርዕሰ መስተዳድርና የግብርና ልማት ቢሮ ሃላፊ ሮዛ ኡመር፤ በማብራሪያቸው በክልሉ በአየር ንብረት ለውጥ ሊያጋጥም የሚችልን ችግር ለመቋቋም የሚያስችል ቅድመ ዝግጅት ስለመደረጉ ገልጸዋል። በራስ አቅም የተቀናጀ ቅድመ ዝግጅት ስራ ሲከናወን መቆየቱን በማስታወስ ለሚያጋጥሙ አደጋዎች አፋጣኝ ምላሽ መስጠት የሚያስችል የተሟላ ዝግጅት ተደርጓል ብለዋል። በክልሉ ለድርቅ ተጋላጭ የሆኑ አካባቢዎችን ቀደም ብሎ በመለየት የመስኖና የከርሰ ምድር ውሃ በመጠቀም የማልማትና የምርት አማራጮችን የማስፋት ስራ መከናወኑን ገልጸዋል። በዚህም በቤተሰብ ደረጃ ጭምር በምግብ ራስን የመቻል ስኬት መኖሩን አንስተው የሌማት ትሩፋትና ሌሎችም ኢንሸቲቮች መሰረታዊ ለውጥ ያመጡ መሆኑንም ተናግረዋል። የምርትና ምርታማነት አቅምን በማሳደግ ከተረጅነት ለመላቀቅ በተከናወኑ ተግባራት አበረታች ውጤት መመዝገቡንም ተናግረዋል። በዚህም በተለይ የዝናብ እጥረት ሲያጋጥም ክስተቱን በራስ አቅም ለመቋቋም የሚያስችል አቅም እየተፈጠረ መሆኑን ጠቁመው ፈጥነው የሚደርሱ ምርጥ ዘሮች በመለየት የውሃ እጥረትን የሚቋቋሙ ሰብሎች በስፋት ጥቅም ላይ እንዲውሉ እየተደረገ መሆኑን ለአብነት ጠቅሰዋል። በተጨማሪም የምርት ክምችት የማድረግና ድጋፍ የመስጠት እንዲሁም የከብት መኖ የማቅረብ ስራ እየተከናወነ መሆኑን ጠቁመዋል። አሁን ላይም እየጣለ የሚገኘውን ዝናብ በማጠራቀም አርሶ አደሩ ባለው መሬት እንዲያለማ እየተደረገ መሆኑን አመልክተዋል። በቀጣይም የአየር ንብረትና ሁኔታ መረጃን ለአርሶ አደሩ የማድረስና የመስኖና የከርሰ ምድር ውሃ ሃብትን በመጠቀም ምርትና ምርታማነትን የበለጠ የማሳደግ ስራዎች እንደሚጠናከሩ አስታውቀዋል።   የሐረሪ ክልል አደጋ መከላከልና ምግብ ዋስትና ቢሮ ሃላፊ አቶ ኤልያስ መሀመድ በበኩላቸው የኤልኒኖ ክስተት በአንዳንድ አካባቢዎች ጉዳት እንዳያስከትልና አፋጣኝ ምላሽ መስጠት እንዲቻል የአደጋ መከላከልና ፈጣን ምላሽ ሰጪ ምክር ቤት መቋቋሙን ተናግረዋል። በዚህም ችግሩ የታየባቸውን አካባቢዎች የመለየትና ምርጥ ዘር በማከፋፈል ወደ ምርት እንዲገቡ መደረጉን ጠቅሰዋል። በተለይም የምግብ እጥረት እንዳይከሰት በራስ አቅም መቋቋም የሚያስችል የምርት ክምችት የማድረግ ስራም መከናወኑን ገልጸዋል።

በሀገራችን አንዱ የማድረግ ዐቅም ማሳያ የአረንጓዴ ዐሻራ መርሐ ግብር ነው።የአረንጓዴ ዐሻራ መርሐ ግብር በዓለም በስፋት እየተስተዋለ ካለው የአየር ንብረት ግብዝነት (Greenwashing) ፍጹም ተቃራኒ በሆነ መንገድ ከንግግር ተግባርን ያስቀደመ መርሐ ግብር ዓላማው የደን ሽፋንን ማሳደግና የደን መጨፍጨፍ፣ የመሬት መራቆትና የአየር ንብረት ለውጥ ችግሮችን መፍታት የሆነው የኢትዮጵያ አረንጓዴ ዐሻራ መርሐ ግብር፤ የአካባቢ መራቆትና የአየር ንብረት ለውጥ ተግዳሮቶችን ተጨባጭ በሆኑ ተግባራት ለመፍታት መሰጠ ሰፊና የላቀ ውጤት የተመዘገበበት ተግባራዊ ጥረት ነው። እንዲህ ያለው ትልቅ ፕሮጀክት በፌዴራል፣ በክልልና በአካባቢ ደረጃና ልዩ የሆነ የአመራር ቁርጠኝነትና ቅንጅትን ይፈልጋል። ይህ የአመራር ጥበብና ቅንጅት የተለያዩ ማኅረሰቦችን፣ ትምህርት ቤቶችን፣ የንግድ ተቋማትና ዓለም አቀፍ አጋሮችን ያሳተፈ አካታች መርሐ ግብር ነው። የአረንጓዴ ዐሻራ ፕሮግራም የጋራ የኃላፊነት ስሜትን በማጎልበት፣ ተነሣሽነቱ ከዛፍ ተከላ በላይ ሆኖ ወደ ሀገራዊ ንቅናቄ አድጓል። የተለያዩ ቡድኖች ለጋራ ዓላማ ተባብረው እንዲሠሩ አስችሏል። የማስፈጸም ሂደቱ ዛፍ በመትከል ላይ ብቻ ያተኮረ አልነበረም። ሁሉንም ማኅበረሰብ ያሳተፈ ነበር። አካሄዱም ሊላካ የሚችል ከባቢያዊ ጥቅም የሚያስገኝ እንቅስቃሴ መፍጠር ነበር። የአረንጓዴ ዐሻራ መርሐ ግብር ስኬት ሀገራዊ ኩራትና ጽናት እንዲጎለብት አስችሏል። አጣዳፊ ሀገራዊና ዓለም አቀፍ ተግዳሮቶችን ለመፍታት በመደመር ስሌት ጠንካራ የአፈጻጸም ጥበብ ያለውን ዐቅምም አሳይቷል። የመደመር መንግሥት ገጽ 127 እና 128

ሀዋሳ፤ መስከረም 14/2019 (ኢዜአ):- የኢትዮጵያ የአረንጓዴ አሻራ መርሃ ግብር የአየር ንብረት ለውጥ የሚያስከትለውን ተፅዕኖ በመቋቋም ለምግብ ዋስትና መረጋገጥ ትልቅ አቅም እየሆነ መምጣቱን በሀዋሳ ዩኒቨርሲቲ የዘርፉ ምሁራን ገለጹ። በሀዋሳ ዩኒቨርሲቲ የወንዶ ገነት ደንና ተፈጥሮ ሀብት ኮሌጅ የዘርፉ ተመራማሪዎች ለኢዜአ እንደገለጹት፤ የኢትዮጵያ የአረንጓዴ አሻራ ልማት የአየር ንብረት ለውጥ የሚያስከትለውን ተፅዕኖ በመቋቋም ዘላቂ የምግብ ዋስትና ለማረጋገጥ እያስቻለ ነው። ችግኞችን መትከል ብቻ ሳይሆን ለመንከባከብ የተሰጠው ሀገራዊ ትኩረት ሁለንተናዊ ዕድገትን ለማፋጠን ጉልህ ሚና እየተጫወተ መሆኑንም አመልክተዋል። በሀዋሳ ዩኒቨርሲቲ የወንዶ ገነት ደንና ተፈጥሮ ሀብት ኮሌጅ መምህርና ተመራማሪ ፕሮፌሰር ፀጋዬ በቀለ እንዳሉት፤ በኢትዮጵያ ባለፉት ዓመታት የአረንጓዴ አሻራ ልማት ንቅናቄን በመፍጠር መላውን ማህበረሰብ በማሳተፍ የተከናወነው ተግባር በዘርፉ አስደናቂ ውጤት አስመዝግቧል። በሀገር አቀፍ ደረጃ ችግኝን የመትከልና የመንከባከብ ባህል እያደገ በመምጣቱ ዘርፍን የተሻለ ውጤት እንዲታይበት አድርጓል ብለዋል። ይህም ተፈጥሮን በመጠበቅ የአየር ንብረት ለውጥ የሚያስከትለውን ችግር በመቋቋም የምግብ ዋስትና ለማረጋገጥ የጎላ ሚና እየተጫወተ መሆኑን ፕሮፌሰር ፀጋዬ ተናግረዋል። መርሃ ግብሩ የመሬት ለምነትና የውሃ አቅም በማሻሻል የግብርና ምርትና ምርታማነት ለመጨመር ማስቻሉንም ተናግረዋል። ንብ ማነብን ጨምሮ አዳዲስ የስራ ዘርፎች በስፋት እንዲፈጠሩ በማድረግ የዜጎች ተጠቃሚነት እንዲጎለብት ማስቻሉንም ጠቁመዋል። የኮሌጁ ዲን ተሻለ ወልደአማኑኤል (ዶ/ር) በበኩላቸው እንዳሉት፤ ባለፉት ዓመታት የተከናወነው የአረንጓዴ አሻራ ልማት አመርቂ ውጤቶች እያስገኘ ነው።   ኢትዮጵያ ለአየር ንብረት የማይበገር አረንጓዴ ኢኮኖሚ ለመገንባት የምታከናውነው የአረንጓዴ አሻራ መርሃ ግብር ለአፍሪካም ሆነ ለዓለም ትልቅ አርአያ መሆኑን ተናግረዋል። የስነ-ምህዳር እና ብዝሃ ህይወት በዘላቂነት እንዲጠበቅ በማድረግ ረገድ መርሃ ግብሩ የማይተካ ሚና እየተጫወተ መሆኑን አብራርተዋል፡፡ ኮሌጁ ከሀገሪቱ መልክአ ምድርና ስነምህዳር ጋር የሚስማሙ ችግኞችን በምርምር በማውጣት እንዲሁም በማፍላትና በማሰራጨት መርሃ ግብሩን በመደገፍ የሚጠበቅበትን ሀላፊነት እየተወጣ መሆኑን ጠቅሰዋል። ኮሌጁ የኢትዮጵያን የአረንጓዴ አሻራ ልማት ልምድ ወደ ሌሎች ሀገራት እንዲስፋፋ በጥናት የተደገፉ ሰነዶች በማዘጋጀት የጀመረውን ጥረት አጠናክሮ እንደሚቀጥል ተሻለ (ዶ/ር) አስታውቀዋል።

አዲስ አበባ፤ መስከረም 12/2019 (ኢዜአ)፦በሚቀጥሉት አስር ቀናት የክረምት ዝናብ ተጠቃሚ በሆኑ የሀገሪቱ አካባቢዎች ከቀላል እስከ መካከለኛ መጠን ያለው ዝናብና እርጥበት እንደሚኖር የኢትዮጵያ ሚቲዎሮሎጂ ኢንስቲትዩት አስታወቀ። ኢንስቲትዩቱ ለኢዜአ በላከው መግለጫ እንዳመለከተው፤ በሚቀጥሉት ቀናት በምዕራብ፣ በሰሜን ምዕራብ፣ በደቡብ ምዕራብ እና በመካከለኛው የሀገሪቱ ክፍሎች በሚገኙ አብዛኛዎቹ ቦታዎች ላይ ከቀላል እስከ መካከለኛ መጠን ያለው የአፈር ውስጥ እርጥበት ይኖራል። በተመሳሳይ በሰሜን ምስራቅ እና ምስራቅ የሀገሪቱ አካባቢዎች ቀላል መጠን ያለው እርጥበት እንደሚኖርና በክረምት ዝናብ ተጠቃሚ ተፋሰሶች ላይ ደግሞ ከመካከለኛ እስከ ከባድ መጠን ያለው የገጽ ምድር የውኃ ፍሰት እንደሚኖር መግለጫው ጠቅሷል። ምዕራብ ወለጋ፣ ኢሉባቦር፣ አርሲ፣ አብዛኞቹ የሸዋ ዞኖች፣ የምዕራብ፣ መካከለኛ፣ ደቡብ እና ሰሜን ጎንደር፣ የሰሜን፣ የምዕራብ እና የምስራቅ ጎጃም፣ አዊ፣ ማኦ ኮሞ፣ ምዕራብ ኦሞ እና አሶሳ ከመካከለኛ እስከ ከባድ እርጥበት የሚያገኙ አካባቢዎች መሆናቸውን አስታውቋል፡፡ በተጨማሪም ምስራቅ እና ምዕራብ ሀረርጌ፣ ደቡብ እና ሰሜን ወሎ፣ ሰሜን ሸዋ፣ ምስራቅ ጉራጌ፣ ማረቆ ልዩ ወረዳ፣ ምዕራብ እና ሰሜን ምዕራብ ትግራይ፣ የሲዳማ ሁሉም ዞኖች እና የወላይታ አካባቢዎች ከቀላል እስከ መካከለኛ እርጥበት የሚያገኙ አካባቢዎች መሆናቸውን ጠቅሷል፡፡ ይህ የአየር ሁኔታ የአፈር እርጥበትን ለማሻሻል፣ ለረጅም እና መካከለኛ ጊዜ ሰብሎች እድገት እንዲሁም ዘግይተው ተዘርተው በተለያየ የእድገት ደረጃ ላይ ለሚገኙ ሰብሎች ፍሬያማነት ከፍተኛ አስተዋፅኦ እንዳለውም አስታውቋል፡፡ በተጨማሪም ለቋሚ ተክሎች ልምላሜ፣ ለእንስሳት መኖና ለመጠጥ ውኃ አቅርቦት መጎልበት እንዲሁም የዝናብ ውኃን አሰባስቦ ለማስቀረት ምቹ ሁኔታን ይፈጥራል ብሏል። የመኸር ሰብል አብቃይ አከባቢዊች አርብቶ አደርና ከፊል አርብቶ አደር አካባቢዎች ምርታማነትን ለመጨመር የሰብል በሽታና አረምን አስቀድመው እንዲከላከሉ፤ ፀረ-አረምና ፀረ-ተባይ ኬሚካሎችንም የግብርና ባለሙያዎችን በማማከር ብቻ እንዲጠቀሙ አሳስቧል። የውኃ ትነትን ለመቀነስ የሚያስችሉ የግብርና ስራዎችን ማከናወን፣ የሚገኘውን እርጥበት በአግባቡ ለልማት ማዋል፣ ለእንስሳት ግጦሽ ሳርን በተቆጠበ መንገድ መጠቀም እና የዝናብ ውኃን አጠናክሮ ማከማቸት እንደሚገባ መክሯል።    

አዲስ አበባ፤ መስከረም 11/2019 (ኢዜአ)፦የአረንጓዴ ዐሻራ መርሐ ግብር የብዝሃ ሕይወትና ሥነ-ምኅዳር ደኅንነት በማስጠበቅ የምግብ ሉዓላዊነትን ማረጋገጥ የሚያስችል ዘርፈ ብዙ ፋይዳ እያስገኘ መሆኑን የኢትዮጵያ ብዝኅ ሕይወት ኢንስቲትዩት ገለጸ፡፡ ኢትዮጵያ ለአየር ንብረት የማይበገር አረንጓዴ ኢኮኖሚ ለመገንባት በ2011 ዓ.ም. በጠቅላይ ሚኒስትር ዐቢይ አሕመድ (ዶ/ር) መሪነት የጀመረችው ታሪካዊ የአረንጓዴ አሻራ መርኃ ግብር ለአፍሪካም ሆነ ለዓለም ትልቅ አርአያ መሆን ችሏል። በዚህ ግዙፍ ሀገራዊ ተነሳሽነት አማካኝነት ባለፉት 8 ዓመታት ውስጥ 56 ቢሊዮን ችግኞች ተተክለው የሀገሪቱ ስነ-ምህዳር እና ብዝሃ ህይወት በዘላቂነት እንዲጠበቅ የሚያስችል ጠንካራ መሰረት ተቀምጧል።   ይህ ሁሉን አቀፍ ጥረት ሀገሪቱ የተፈጥሮ ጸጋዎቿን ጠብቃ የምግብ ሉዓላዊነቷን ለማረጋገጥ ለምታደርገው ብሩህ ጉዞ ጠንካራ እና አዲስ መሰረት ጥሏል። የኢትዮጵያ ብዝኅ ሕይወት ኢንስቲትዩት የደንና ግጦሽ መሬት ዕፅዋት ብዝሀ ህይወት ምርምር መሪ ሥራ አስፈጻሚ አቶ አበራ ስዩም ለኢዜአ እንዳሉት፣ ኢትዮጵያ በዓለም ከታወቁት ከፍተኛ የብዝሃ ሕይወት ሀብት ካላቸው ሀገራት መካከል አንዷ ናት። እስካሁን በተደረጉ ጥናቶች ከ6 ሺህ በላይ የዕፅዋት ዝርያዎች መለያታቸውንና ከ10 እስከ 12 በመቶ የሚሆኑት በኢትዮጵያ ብቻ የሚገኙ ብርቅዬ ዝርያዎች መሆናቸውንም ገልጸዋል። ይህ እምቅ የብዝሀ ህይወት ሀብት መኖር ሀገሪቱ የተለያዩ የምግብ ስርዓቶች እንዲኖራት መደላደል የፈጠረ ከመሆኑም በላይ የምግብ ሉዓላዊነትን ለማረጋገጥ ትልቅ አቅም መፍጠሩን ተናግረዋል። የብዝሀ ህይወት ሀብቶች ለውሃ ሀብት፣ ለስነ ምህዳር መጠበቅ፣ ለባህላዊና ዘመናዊ ህክምና መድኃኒትነት እንዲሁም ለኢንዱስትሪ ግብዓትነት በመዋል ከፍተኛ ማህበራዊና ኢኮኖሚያዊ ጠቀሜታ እንዳላቸው ገልጸዋል። በመሆኑም የብዝሀ ሕይወት ሀብቶቻችንን ጠብቆ ማቆየት ለሀገር ህልውና ወሳኝ በመሆኑ በልዩ ትኩረት እየተሰራበት ነው ብለዋል።   በጠቅላይ ሚኒስትር ዐቢይ አሕመድ (ዶ/ር) መሪነት የተጀመረው አርአያነት ያለው የአረንጓዴ አሻራ መርኃ ግብር ብዝሃ ህይወትን በመጠበቅ እና የአየር ንብረት ለውጥን በብቃት በመቋቋም ረገድ ከፍተኛ ሚና በመወጣት ላይ መሆኑን ገልጸዋል። ይህ ስኬታማ መርኃ ግብር በመጀመሩ ምክንያት ቀደም ሲል የተራቆቱ ቦታዎች እንዲያገግሙ የተደረገ ሲሆን፣ በሂደትም የጠፉ ዝርያዎች ተመልሰው መተካት በመጀመራቸው የተጎዳው ስነ-ምህዳር እየተስተካከለ መጥቷል ብለዋል። ባለፉት ዓመታት በተከናወኑት ተግባራት ኢንስቲትዩቱ 26 ሚሊዮን የሚደርሱ የሀገር በቀል የዛፍ ዝርያዎችን በማዘጋጀት ማሰራጨቱን ተናግረዋል። በዚህም የሀገሪቱን የምግብ ሉዓላዊነት በዘላቂነት ለማረጋገጥ የሚያስችል ጠንካራ አቅም እየገነባ ይገኛል ነው ያሉት። በቀጣይም ለትውልድ የሚተርፍ አረንጓዴ ሀብት የመገንባት ሥራውን ተጠናክሮ እንደሚቀጥል ገልጸዋል።

አዲስ አበባ፤ መስከረም 9/2019 (ኢዜአ):- የኢትዮጵያ የአረንጓዴ ትራንስፖርት ውጤታማ የፖሊሲ እርምጃ የአፍሪካና የዓለም ሀገራት በአርአያነት ሊወስዱት የሚገባ መሆኑን የዘርፉ ሙያተኞችና የዲፕሎማቲክ ማህበረሰብ አባላት ገለጹ። የአፍሪካን የኤሌክትሪክ ተሽከርካሪዎች ሽግግር ከኖርዲክ ሀገራት የቴክኖሎጂና የኃይል ልማት ልምድ ጋር የሚያገናኘው የኖርዲክ-አፍሪካ የኤሌክትሪክ ተሽከርካሪዎች ጉባኤ በአዲስ አበባ መካሄዱ ይታወቃል። በጉባኤው የተገኙ የዘርፉ ባለሙያዎች፣ የዲፕሎማቲክ ማህበረሰብ አባላትና የአለም አቀፍ ተቋማት ተወካዮች ኢትዮጵያ የአረንጓዴ ትራንስፖርትን ለማስፋፋት የወሰደችው የፖሊሲ እርምጃ እና እያደረገች ያለውን እንቅስቃሴ ለአፍሪካና ለቀሪው ዓለም በአርአያነት የሚጠቀስ መሆኑን ተናግረዋል።   በተባበሩት መንግሥታት የአፍሪካ ኢኮኖሚክ ኮሚሽን የቴክኖሎጂ፣ ኢኖቬሽን፣ ግንኙነትና መሠረተ ልማት ክፍል ዳይሬክተር ሮበርት ታማ ሊሲንጌ ለኢዜአ እንዳሉት፤ በአህጉራችን በኤሌክትሪክ ተሽከርካሪዎች መስክ ውጤት እያመጡ ያሉ ሀገራት እንደ ኢትዮጵያ ግልጽ ራዕይ፣ ስትራቴጂና የትግበራ እቅድ ያላቸው ናቸው።   ሌሎች የአፍሪካ ሀገራት ከኢትዮጵያ ልምድ በመውሰድ በበቂ መሠረተ ልማትና የሀገር ውስጥ ባለሙያዎች አቅም ግንባታ ላይ ኢንቨስት ማድረግ እንደሚገባቸው ጠቁመዋል። ኢትዮጵያ በአረንጓዴ ትራንስፖርት ዘርፍ እያደረገች ያለው ሽግግር ጠንካራ የፖለቲካ ቁርጠኝነትን የሚያሳይና ለዓለም አቀፍ ማህበረሰብ ትልቅ ትምህርት የሚሰጥ ነው ብለዋል። በኢትዮጵያ የፊንላንድ ኤምባሲ የንግድና ልማት ሃላፊ ቶሚ ሳርኬ፤ የኢትዮጵያ የኤሌክትሪክ ተሽከርካሪዎች ቴክኖሎጂን በማስፋፋት ውጤታማ ሥራ እሰራች ነው ብለዋል።   ባለፉት ሁለት ዓመታት በኢትዮጵያ በነበራቸው ቆይታ በአረንጓዴ ትራንስፖርት ዘርፍ የታዩት ለውጦች እጅግ ማራኪ መሆናቸውን ገልጸዋል። የተወሰዱት የፖሊሲ እርምጃዎችና የመሪዎችን ቁርጠኝነት ህዝቡ ለራዕዩ መሳካት በጋራ እንዲንቀሳቀስ ትልቅ መነሳሳት መፍጠራቸውንም ገልጸዋል። ኢትዮጵያ አረንጓዴ ትራንስፖርትን ለማስፋፋት የምታደርገው ፈጣን ሽግግር የሀገሪቱን ብሩህ የወደፊት አቅጣጫ የሚያመላክት እንደሆነም ተናግረዋል። የኤሌክትሪክ ተሽከርካሪዎች ወደ ኢትዮጵያ ገበያ በስፋት እየገቡ ነው ያሉት ደግሞ የኖርዲክ-አፍሪካ የኤሌክትሪክ ተሽከርካሪዎች ጉባኤ የሀሳብ መሪ ሚከል ቤከር አከርቪክ ናቸው።   ይህ ታላቅ ስኬት በአውሮፓና በሌሎች ዓለም ሀገራት በዘርፉ ላይ ለሚሰሩ ባለድርሻ አካላት ትልቅ የአጋርነት ዕድል እንደሚፈጥር ገልጸዋል። በአረንጓዴ ትራንስፖርትም በአረንጓዴ ቴክኖሎጂ ላይ የበለጠ ለመስራት የኢትዮጵያ እንዲሁም የአፍሪካ ጊዜ አሁን በመሆኑ ሁሉም የዚህ አረንጓዴ ሽግግር አካል እንዲሆኑ ጥሪ አቅርበዋል።

ጋምቤላ ፤መስከረም 8/ 2018 (ኢዜአ) ፡-በጋምቤላ ክልል በሚቀጥሉት ወራት መደበኛና ከመደበኛ በላይ የዝናብ ስርጭት ሊኖር እንደሚችል በኢትዮጵያ ሚቲዎሮሎጂ ኢንስቲትዮት የጋምቤላ ክልል የሚቲዎሮሎጂ አገልግሎት ማዕከል አስታወቀ። በክልሉ የሚኖረው የዝናብ ስርጭት ለእርሻ ስራ አወንታዊ ሚና እንዳለው ሁሉ ቅጽበታዊ ጎርፍ በመፍጠርም አሉታዊ ተጽኖ ሊኖረው እንደሚችል ማዕከሉ ገልጿል። የማዕከሉ መሪ ስራ አስፈፃሚ አቶ ተስፋሁን ዓለሙ ለኢዜአ እንደገለጹት ከተያዘው መስከረም አጋማሽ ጀምሮ በቀጣዮቹ ወራት መደበኛና ከመደበኛ በላይ የዝናብ ስርጭት ሊኖር እንደሚችል የአየር ትንበያ መረጃዎች ያመለክታሉ ። በክልሉ በተለይም በጥቅምትና ህዳር 2019 ዓም መደበኛና ከመደበኛ በላይ ጠንከር ያለ የዝናብ ስርጭት እንደሚኖር ገልጸዋል። በክልሉ ሊኖር የሚችልው የዝናብ ስርጭት ዘግይተው ለሚዘሩና ለረጅም ጊዜ ሰብሎች አመች ሁኔታ እንደሚኖረው ተናግረዋል። እንዲሁም ለበጋ የግብርና ልማት ስራዎች እርጥበታማ አፈርን በመፍጠርና የውሃ አቅሞችን በማሳደግ ረገድ አዎንታዊ አስተዋፆ እንደሚኖረው ገልጸዋል። በአንፃሩ የክልሉ መልከአ ምድራዊ አቀመማጥ ዝቅተኛ ከመሆኑ ጋር ተያይዞ በአጎራባችና በአካባቢው የሚጥለው ጠንክር ያለ ዝናብ የጎርፍ አደጋ ሊያስከትል ይችለል ብለዋል። በተለይም ባሮን ጨምሮ ክልሉን አቋርጠው የሚያልፉ አራት ታላላቅ ወንዞች ሞልተው በመፍሰስ ለጎርፍ ሊያጋልጡ ስለሚችሉ በወንዞች አካባቢ የሚገኙ ነዋሪዎች ጥንቃቄ ሊያደርጉ እንደሚገባ ምክረ ሃሳብ ለግሰዋል። በተጨማሪም የዝናቡ ስርጭት ለወባ ትንኝ መራባት ምቹ ሁኔታን ስለሚፈጥርና የወባ በሽታ ሊጨምር ስለሚችል አስፈላጊው ጥንቃቄ ሊደረግ እንደሚገባ አስገንዝበዋል።

ሀዋሳ፤ መስከረም 8/2019 (ኢዜአ) :- የኢትዮጵያ የአረንጓዴ አሻራ መርሃ ግብር አስደናቂና በዘርፉ ልማት በጥሩ ተሞክሮነት የሚወሰድ መሆኑን የተለያዩ ሀገራት የደን ዘርፍ ተመራማሪዎች ገለጹ። ኢትዮጵያ ባለፉት ስምንት ዓመታት በድምሩ 56 ነጥብ 2 ቢሊዮን ችግኞችን በመትከል በዘርፉ ልማት የመሪነት ሚናዋን አጠናክራ ቀጥላለች። የኢትዮጵያ የአረንጓዴ አሻራ መርሃ ግብር ዓለም አቀፍ የአየር ንብረት ለውጥን ከመከላከል ባለፈ ዘርፈ ብዙ ጠቀሜታ ያለው በመሆኑ ለምግብ ዋስትናም መሰረት እያኖረ መሆኑ ይታወቃል። በመሆኑም የኢትዮጵያን የአረንጓዴ አሻራ መርሃ ግብር በተመለከተ ኢዜአ ያነጋገራቸው የተለያዩ ሀገራት የዘርፉ ባለሙያዎች፤ በጥቂት ዓመታት ውስጥ ትልቅ ስኬት የተመዘገበበት አስደናቂ የልማት ስራ መሆኑን ገልጸዋል። ኒዘርላንዳዊው የዘርፉ ተመራማሪ አልበርት ስቼንክ፤ ኢትዮጵያ የዓለም ፈተና የሆነውን የአየር ንብረት ለውጥ በመካላከል ረገድ ከፍተኛ አስተዋጽኦ እያደረገች መሆኑን በተግባር እያሳየች መሆኑን ተናግረዋል። የኢትዮጵያ የአረንጓዴ አሻራ መርሃ ግብር አስደናቂና በዘርፉ ልማት በጥሩ ተሞክሮነት የሚወሰድና ሁሉም ሊደግፈው የሚገባ መልካም ተግባር መሆኑን አንስተዋል። የአየር ንብረት ለውጥን የመከላከል ጉዳይ የሁሉም ሀገራት የጋራ ሃላፊነት መሆኑን የተናገሩት ተመራማሪው ሀገራት የኢትዮጵያን ፈለግ መከተል ይገባቸዋል ብለዋል። የተፈጥሮ ሀብትና ደንን ለመንከባከብ የሚደረግ ጥረት ለአየር ንብረት ለውጥ የማይበገር ኢኮኖሚን ለመገንባት ወሳኝ መሆኑን ጠቅሰው በአረንጓዴ ልማት ላይ የሚውል ጉልበትና ገንዘብ መልሶ የሚከፍል ሀብት በመሆኑ ሊተኮርበት እንደሚገባ አሳስበዋል። ሌላኛው ኡጋንዳዊው የደን ሃብት ልማት ተመራማሪ ሮበርት አቱጎንዛ፤ በደን ልማትና የተፈጥሮ ሃብት ጥበቃ ኢትዮጵያ ትልቅ እቅድ ሰንቃ እየሰራችና በተግባርም እያሳየች ትገኛለች ብለዋል።   የኢትዮጵያ የአረንጓዴ አሻራ ልማት የዓለም ፈተና የሆነውን የአየር ንብረት ለውጥ የመከላከል ጥረት፣ የተፈጥሮ ሃብትን የመጠበቅና የምግብ ዋስትናን የማረጋገጥ መሰረት ሆኖ መቀጠሉ የሚደነቅ መሆኑን ገልጸዋል። በመሆኑም የአፍሪካ ሀገራት በተለይም የምስራቅ አፍሪካ ሀገራት ከኢትዮጵያ ልምድ በመቀመር በተባበረ አቅም የልማት ስራውን ማስቀጠል ይኖርባቸዋል ሲሉ ምክራቸውን ለግሰዋል። በታንዛኒያ የደን ጥበቃ ፕሮግራም አስተባባሪና የደንና የተፈጥሮ ሀብት ተመራማሪ አልማስ ካሽንዲዬ፤ በኢትዮጵያ የችግኝ ተከላ እና እንክብካቤ ስራ የህዝብ አጀንዳ ሆኖ የቀጠለ አስደናቂ መርሃ ግብር ነው ሲሉ ተናግረዋል።   የተፈጥሮ ሀብትን መጠበቅና መንከባከብ የብዝሃ ህይወትንና የውሃ አካላትን መጠበቅ፤ የአየር ንብረት ለውጥን የመከላከልና የምግብ ዋስትና መሰረት በመሆኑ ዘርፈ ብዙ ጠቀሜታ አለው ሲሉ አስረድተዋል። የዘርፉ ምሁር የሆኑት ቦሊቪያዊው ሁምቤርቶ ጎሜዝ፤ ኢትዮጵያውያን ባለፉት ስምንት ዓመታት የተከሏቸው ችግኞች በዓለም አቀፍ ደረጃ እየተከናወነ ላለው የአየር ንብረት ለውጥ መከላከል ትልቅ ትርጉም ያላቸው መሆኑን ገልጸዋል።   በመሆኑም ኢትዮጵያና ዜጎቿ በአረንጓዴ አሻራ ልማት እያደረጉት ላለው አስተዋጽኦ የላቀ ምስጋና ይገባቸዋል ብለዋል።

አዲስ አበባ ፤ መስከረም 7/2019 (ኢዜአ)፦የአየር ንብረት ለውጥ ተፅዕኖን በመቋቋም የምግብ ዋስትናን ማረጋገጥ የቀጣናው ሀገራት ወሳኝ የትብብር ማዕከል መሆን እንዳለበት የምሥራቅ አፍሪካ የልማት በይነ መንግሥታት ባለስልጣን (ኢጋድ) ዋና ጸሐፊ ወርቅነህ ገበየሁ (ዶ/ር) ገለጹ። ኢጋድ እንደ አውሮፓውያን የዘመን አቆጣጠር ከ2026 እስከ 2035 ለ10 ዓመታት የሚተገብረውን የቀጣናው የግብርና ምርትና የምግብ ሥርዓት ኢንቨስትመንት ዕቅድ እና የኢጋድ ቀጣና የግብርና ዘር ፖሊሲ የባለሙያዎች ግምገማ በማድረግ በሚኒስትሮች አጸድቋል። የኢጋድ ዋና ጸሐፊ ወርቅነህ ገበየሁ (ዶ/ር) በዚህ ወቅት፤ በምሥራቅ አፍሪካ ቀጣና ሊከሰቱ የሚችሉ አደጋዎችን ለመከላከልና ለመቋቋም በትብብር የምንቆምበት ወሳኝ ወቅት ላይ ነው ያለነው ብለዋል ። ኢጋድ በቀጣናው ሀገራት የምግብ ዋስትናን በማረጋገጥ የማይበገር ኢኮኖሚ መገንባት ቀዳሚ መርሁ መሆኑን ገልጸዋል።   የኢጋድ የግብርና ምርትና የምግብ ሥርዓት ኢንቨስትመንት የ10 ዓመት ዕቅድ በቀጣናው ቀጣይነት ያለውና አይበገሬ የምግብ ሥርዓት መገንባት ያስችላል ብለዋል። የኢጋድ ቀጣናዊ የግብርና ዘር ፖሊሲም የአየር ንብረት ለውጥ ተፅዕኖን የሚቋቋም ዘላቂ ኢኮኖሚ ማንበር እንደሚያስችል ገልጸዋል። በአፍሪካ አህጉራዊ ሽግግር ለመፍጠር የኢጋድ ኢኒሼቲቮች ጉልህ አበርክቶ እንዳላቸው ጠቁመው፤ የአየር ንብረት ለውጥ ተፅዕኖን በመቋቋም የምግብ ዋስትናን ለማረጋገጥ የቀጣናው ሀገራት በትብብር መሥራት እንዳለባቸው አስገንዝበዋል። ለዚህ ደግሞ የኢጋድ ቀጣና ሀገራት ሕዝባቸውን፣ ሀብታቸውንና እውቀትን በማስተባበር፣ የፋይናንስ አቅምን ማጠናከርና ተጠያቂነትን ማስፈን እንደሚገባቸው ገልጸዋል።   የግብርና ሚኒስትር ከፍተኛ አማካሪ ጌታቸው ድሪባ (ዶ/ር) በበኩላቸው፤ የኢጋድ ቀጣና ሀገራት በባህል፣ በታሪክና በኢኮኖሚ የተሳሰሩ መሆናቸውን ተናግረዋል። የምግብ ዋስትና ማረጋገጥ በዓለም አቀፍ የሥርዓተ ምግብ መዋቅር ትኩረት የተሰጠው መሆኑን ጠቅሰው፤ ለተግባራዊነቱ መረባረብ ይገባል ብለዋል። ኢትዮጵያ ሥርዓተ ምግብና የግብርና ዘር ፖሊሲ ዋና አጀንዳዋ ነው ያሉት ከፍተኛ አማካሪው፤ የምግብ ዋስትናን ማረጋገጥ የሚያስችል የትኩረት ማዕከል መሆኑንም ገልጸዋል።  

አዳማ፤ መስከረም 7/2019(ኢዜአ )፡-የአየር ጠባይ ሁኔታ ትንበያ መረጃዎችን በስፋት ተደራሽ በማድረግ የተሻለ ዝግጁነትና ቅድመ ጥንቃቄ እንዲኖር በቅንጅት እየተሰራ መሆኑን የኢትዮጵያ ሚቲዎሮሎጂ ኢንስቲትዩት አስታወቀ። ኢንስቲትዩቱ የባለድርሻ አካላት የተሳተፉበት የክረምት ወቅት የአየር ጠባይ ግምገማና የመጪው በጋ ወራት የአየር ጠባይ ሁኔታ ትንበያ መድረክ በአዳማ በማካሄድ ላይ ይገኛል።   የኢንስቲትዩቱ ዋና ዳይሬክተር ፈጠነ ተሾመ(ዶ/ር) በወቅቱ እንደገለፁት፤ ኢንስቲትዩቱ ለሀገሪቷ ማህበራዊና ኢኮኖሚያዊ ልማት ጠቀሜታ ያላቸውን የአጭርና የረዥም ጊዜ የአየር ፀባይ ትንበያዎችን በወቅቱ በማቅረብ ሚናውን እየተወጣ ይገኛል። መረጃዎቹ በተለይም ለግብርና፣ ለውሃ ሀብት አስተዳደር፣ ለአደጋ ስጋት ቅነሳ፣ ለአቪየሽንና ትራንስፖርት፣ ለመስኖ ልማት እንዲሁም ለትምህርትና ጤና ዘርፎች እንቅስቃሴዎችን ለማከናወን ቁልፍ አጋዥ መሆናቸውን ገልጸዋል። በመሆኑም ወቅታዊና አስተማማኝ የአየር ፀባይ መረጃዎችን ለተጠቃሚው ህብረተሰብና ለባለድርሻ አካላት ተደራሽ የማድረጉ ስራ ተጠናክሮ እንደሚቀጥል አብራርተዋል። ወቅቱን የጠበቀና ትክክለኛ የአየር ፀባይ መረጃ ተደራሽነትን ማረጋገጥ ለሀገሪቱ ሁለንተናዊ ልማትና ዕድገት ወሳኝ መሆኑንም ዳይሬክተሩ ገልጸዋል። ባለድርሻ አካላትም በየወቅቱ ተደራሽ የሚደረጉ የአየር ፀባይ ሁኔታዎችን በአግባቡ እንዲጠቀሙ በማድረግ ሀገራችን የጀመረችው ልማትና ዕደገት እንዲፋጠን እያደረግን ያለነውን ጥረት አጠናክረን እንቀጥላለን ብለዋል። መድረኩ የክረምት የአየር ፀባይ ሁኔታን ከመገምገም ባለፈ በመጪው የበጋ ወቅት ሊኖር የሚችለውን የአየር ሁኔታ ትንበያ መረጃን ለተጠቃሚዎች በወቅቱ ተደራሽ በማድረግ ቀድመን ለማዘጋጀትና ተገቢውን ምላሽ ለመስጠት እንዲቻል መሆኑንም ገልጿል። የአየር ፀባይ ሁኔታ ትንበያን መሰረት በማድረግ የቅድመ ዝግጅት እርምጃዎችን መውሰድ ከባለድርሻ አካላት ይጠበቃል ያሉት ፈጠነ(ዶ/ር)፤ የአየር ፀባይ ተፅዕኖን ለመቋቋምና ቅድመ እርምጃ ለመውሰድ መድረኩ ወሳኝ ሚና አለው ብለዋል።   የመጪውን የበጋ ወቅት የአየር ፀባይ ሁኔታ ትንበያ ያቀረቡት የኢንስቲትዩቱ ምክትል ዋና ዳይሬክተር አሳምነው ተሾመ (ዶ/ር) እንደገለጹት፤ በመጪው የበጋ ወቅት በአርብቶ አደር አካባቢዎች ለግብርና ልማት ምቹ የሆነ የተሻለ የዝናብ ስርጭት ይኖራል ብለዋል። በተለይም ምስራቅ ሐረርጌን ጨምሮ የቦረናና ጉጂ ዞኖች፣ ሲዳማና ደቡብ ኢትዮጵያ አከባቢዎች በበጋ ወቅት የተሻለ የዝናብ ስርጭት ያገኛሉ ብለዋል። አብዛኞቹ የበጋ ወቅት ዝናብ ተጠቃሚ አካባቢዎች ዓመታዊ የዝናብ ስርጭታቸውን ከ75 በመቶ በላይ የሚያገኙት በዚህ ወቅት መሆኑን ምክትል ዳይሬክተሩ ገልጸዋል። ይህም የአየር ፀባይ ተፅዕኖ ለመቋቋምና የውሃ ሀብትን አቅቦ ለመጠቀም ጥሩ አጋጣሚ እንደሚፈጥር ተናግረዋል። በዘንድሮው የበጋ ወቅት በኦሮሚያ ክልል በቦረና እና ጉጂ ዞኖች፣ በሶማሌ ክልል ዞኖች፣ እንዲሁም በሲዳማና ደቡብ ኢትዮጵያ ክልሎች አከባቢዎች ከ75 በመቶ በላይ መደበኛና ከመደበኛ በላይ የዝናብ ስርጭት ይኖራል ተብሎ እንደሚጠበቅም ምክትል ዳይሬክተሩ ገልጸዋል። የበጋ ወቅት ዝናብ ተጠቃሚ የሆኑ አከባቢዎች ከመጪው ጥቅምት ወር ጀምሮ የዝናብ ስርጭቱን የሚያገኙ መሆናቸውንም ጨምረው ገልጸዋል።    

‎አዲስ አበባ፤ መስከረም 7/2019 (ኢዜአ):- በአፍሪካ ቀንድ ኢልኒኖ ሊያስከትል የሚችለውን የአየር ንብረት ለውጥ ተጽዕኖ ለመቋቋም የቀጣናው ሀገራት የቅድመ ማስጠንቀቂያና ቅድመ ትንበያ እርምጃ መውሰድ እንዳለባቸው የምስራቅ አፍሪካ የልማት በይነ መንግሥታት (ኢጋድ) አስታወቀ። ኢጋድ በአፍሪካ ቀንድ ኤልኒኖ የሚያስከትለውን የአየር ንብረት ለውጥ ተጽዕኖ ለመቋቋም የቀጣናው ሀገራት የሚያደርጉትን ዝግጅት በተመለከተ በአዲስ አበባ ምክክር እያደረገ ነው። የኢጋድ ምክትል ዋና ጸሐፊ መሐመድ አብዲ ዋሬ በዚህ ወቅት እንዳሉት፤ የኤልኒኖ ክስተት በአፍሪካ ቀንድ በሕይወትና በንብረት ላይ አደጋ ሊያስከትል ይችላል። በአፍሪካ ቀንድ ከወትሮው የተለየ ከፍተኛ መጠን ያለው ዝናብ ሊያስከትል እንደሚችል የአየር ትንበያ መረጃዎች ያሳያሉ ብለዋል። የኤልኒኖ መከሰት ተፈጥሯዊ መሆኑን በማንሳት፤ የዝናቡ መጠን በግብርና፣ በእንስሳት እርባታ እና በምግብ ዋስትና ላይ ሊያስከትል የሚችለውን ጫና መቀነስ እንደሚቻል ገልጸዋል። ለዚህ ደግሞ ኤልኒኖ በአፍሪካ ቀንድ ሊያስከትለው የሚችለውን የአየር ንብረት ለውጥ ተፅዕኖ ለመቋቋም የቀጣናው ሀገራት የቅድመ ማስጠንቀቂያና ቅድመ ትንበያ እርምጃዎችን መውሰድ አለባቸው ብለዋል። የቅድመ ማስጠንቀቂያ መረጃዎችን ከ24 ሰዓታት በፊት ማድረስ ብቻ የአደጋውን መጠን በ30 በመቶ መቀነስ እንደሚያስችል ገልጸዋል። ለቅድመ ዝግጅትና ቅድመ ትንበያ እርምጃዎች ፋይናንስ አስፈላጊ መሆኑን በመግለጽ፤ አደጋውን ለመከላከል ከወዲሁ የድጋፍና መልሶ ማቋቋም ወጪን ማሳደግ ይገባል ብለዋል። የኢጋድ አባል ሀገራት ዕቅዶቻቸውን ማቅረብ፣ ግብዓቶችን አስቀድመው ማከማቸትና ድንበር ተሻጋሪ የማስጠንቀቂያ መረጃዎችን ማጋራት እንዳለባቸው አሳስበዋል። አህጉር አቀፍና ዓለም አቀፍ አጋሮች ኤልኒኖ ሊያስከትለው የሚችለውን አደጋ መከላከል የሚያስችል ድጋፍና አብሮነታቸውን እንዲያሳዩም ጥሪ አቅርበዋል።

አዲስ አበባ፤ መስከረም 5/2019 (ኢዜአ):- ኢትዮጵያ ዘላቂና የአየር ንብረት ለውጥን የሚቋቋም አረንጓዴ ኢኮኖሚ የመገንባት ራዕይዋን ውጤታማ በሆነ መልኩ አጠናክራ መቀጠሏን የትራንስፖርት እና ሎጂስቲክስ ሚኒስትሩ አለሙ ስሜ (ዶ/ር) ገለጹ። ሚኒስትሩ ይህንን የገለጹት በአዲስ አበባ እየተካሄደ በሚገኘው የኖርዲክ-አፍሪካ የኤሌክትሪክ ተሽከርካሪ (Nordic Africa EV Summit) ጉባኤ ላይ ተገኝተው ባደረጉት ንግግር ነው።   ሚኒስትሩ በዚሁ ወቅት ባደረጉት ንግግር እንደገለጹት፤ ኢትዮጵያ በጠቅላይ ሚኒስትር ዐቢይ አሕመድ (ዶ/ር) መሪነት አረንጓዴና የአየር ንብረት ለውጥን የሚቋቋም የልማት ስትራቴጂን በሀገራዊ የልማት ዕቅዷ ማዕከል አድርጋ እየሰራች ትገኛለች። የአረንጓዴ አሻራ፣ የታዳሽ ኃይል ማስፋፋት፣ የአረንጓዴ ከተማ ልማት እና ዝቅተኛ የካርቦን ልቀት ያለው ኢኮኖሚ የመገንባት ጥረት ኢትዮጵያ የልማት አቅጣጫዋን ለመለወጥ ያላትን ቁርጠኝነት ያሳያል ብለዋል። የሀገሪቱ የረጅም ጊዜ የአየር ንብረት ስትራቴጂ የትራንስፖርት ዘርፉን ከካርቦን ነፃ ማድረግን ዋነኛ መንገድ አድርጎ ማስቀመጡንም ጠቁመዋል።   የኤሌክትሪክ ተሽከርካሪዎችን፣ የሕዝብ ትራንስፖርትን፣ የአረንጓዴ ከተማ ኮሪደሮችን እና ንፁህ የትራንስፖርት ሥርዓቶችን ከታዳሽ ኃይል አቅም ጋር የማዋሃድ ሥራ እየተከናወነ መሆኑንም አብራርተዋል። ይህ ጥረት ከአካባቢ ጥበቃ ባለፈ የኢኮኖሚ ትራንስፎርሜሽን፣ የኃይል ደህንነት፣ የቴክኖሎጂ ፈጠራ፣ የኢንዱስትሪ ልማት እና የዜጎችን የኑሮ ጥራት የማሻሻል አጀንዳ መሆኑን አስገንዝበዋል።   የተባበሩት መንግሥታት የአፍሪካ ኢኮኖሚክ ኮሚሽን የቴክኖሎጂ፣ ኢኖቬሽን፣ ግንኙነት እና መሠረተ ልማት ክፍል ዳይሬክተር ሮበርት ታማ ሊሲንጌ በበኩላቸው፤ በአፍሪካ የኤሌክትሪክ ተሽከርካሪዎችን የመጠቀምና የማምረት አጠቃላይ አዝማሚያ እየጨመረ መምጣቱን ገልጸዋል። አህጉሪቱ ኃይል በማመንጨት ላይ ብቻ ሳትወሰን የኤሌክትሪክ ተሽከርካሪዎችን በማምረት ለሀገር ውስጥ ገበያ እንዲሁም ወደ አውሮፓና እስያ ለመላክም መስራት እንዳለባት ገልጸው፤ ሀገራት ተሽከርካሪዎቹን ለማስገባት የሚያስችሉ ማበረታቻዎችንና የተሟላ ስነ-ምህዳር በመፍጠር ላይ እንደሚገኙ አብራርተዋል።   የኖርዲክ-አፍሪካ ኢቪ ሳሚት ሮድ ቱ አፍሪካ የሀሳብ መሪ ሚከል ቤከር አከርቪክ እንደተናገሩት፤ ከተሞችን ከካርቦን ነፃና ንፁህ አየር እንዲኖር ማድረግ አስፈላጊ መሆኑን ጠቁመዋል። በትራንስፖርት ዘርፍ የሚፈጠረው የልቀት መጠን ከፍተኛ በመሆኑ፣ የኤሌክትሪክ ተሽከርካሪዎችን አሰራር መተግበር በኢኮኖሚ ደረጃ ብቻ ሳይሆን ለአካባቢ ጥበቃም እውነተኛ ትራንስፎርሜሽን እንደሚያመጣ አስረድተዋል።