አዲስ አበባ፤ ጥቅምት 6/2019 (ኢዜአ)፦የትግራይ ክልል የፌዴራል መንግሥት ባለአደራ አስተዳደር የክልሉን ህዝብ ሰላምና ልማት በዘላቂነት ለማስጠበቅ ከፍተኛ ጠቀሜታ ይኖረዋል ሲሉ የትግራይ ዴሞክራሲያዊ ፓርቲ (ትዴፓ) ሊቀ መንበር አረጋዊ በርሄ (ዶ/ር) አስታወቁ። የኢ.ፌ.ዲ.ሪ. የፌዴሬሽን ምክር ቤት በሕገ መንግሥቱ አንቀጽ 62 (9) እና በዐዋጅ ቁጥር 359/1995 አንቀጽ 14/2/ለ/ መሠረት የትግራይ ክልል ጊዜያዊ አስተዳደር እንዲቋቋም ባስተላለፈው ውሳኔ እና ለሚኒስትሮች ምክር ቤት በሰጠው ሥልጣን መሠረት፣ የኢፌዴሪ መንግሥት የትግራይ ክልልን የሚያጸና ውሳኔ ወስኗል። በዚህም ይህ የትግራይ ክልል የፌዴራል መንግሥት ባለአደራ አስተዳደር ለሚቀጥሉት ስድስት ወራት ትግራይን የሚያስተዳድር ይሆናል። የባለአደራ አስተዳደሩ በሚያከናውናቸው ሁሉም ተግባራት የኢትዮጵያን ብሔራዊ ጥቅሞች፣ የኢትዮጵያን የግዛት አንድነት፣ የትግራይ ሕዝብን መሠረታዊ ጥቅሞች መሠረት ማድረግ እንዳለበት ተመላክቷል። በሕዝብ የተመረጠ መንግሥት እስከሚቋቋም ድረስ የክልሉን የዕለት ተዕለት አገልግሎቶች ከማቅረብና ለቀጣይ ምርጫ አስቻይ ሁኔታዎችን ከመፍጠር በዘለለ ረዘም ያለ ስትራቴጂያዊ አንድምታ ባላቸው ጉዳዮች ላይ እንደማይንቀሳቀስም ተገልጿል። ባለአደራ አስተዳደሩም ተግባሩን ከፌዴራል መንግሥት በሚሰጠው አቅጣጫ እና መመሪያ መሠረት ያከናውናል ነው የተባለው። ከዚህ ጋር በተያያዘ የትግራይ ዴሞክራሲያዊ ፓርቲ ሊቀ መንበር አረጋዊ በርሄ (ዶ/ር) ለኢዜአ እንዳሉት፤ የፌዴራል መንግስት የትግራይ ክልልን ለስድስት ወራት የሚያስተዳድር አካል መመስረቱ አስፈላጊ እና አዎንታዊ እርምጃ ነው። የፌዴራል መንግስት በክልሉ ሁለንተናዊ ለውጥ እንዲመዘገብ ለሰጠው ትኩረት አድናቆታቸው ገልፀው፤ ባለአደራ አስተዳደሩ የትግራይ ክልልን ህዝብ ሰላምና ልማት በዘላቂነት ለማስጠበቅ ከፍተኛ ጠቀሜታ ይኖረዋል ብለዋል። የአስተዳደር አባላትም የትግራይን ህዝብ ዘላቂ ሰላምና ልማት ለማረጋገጥ በሚያስችል መልኩ ስራቸውን በታታሪነት በመከወን ሀላፊነታቸውን በአግባቡ እንዲወጡ ጠይቀው፤ የህዝቡን የልማት ተጠቃሚነት ለማረጋገጥ ጥብቅ ቁጥጥር ሊደረግበት እንደሚገባም ገልጸዋል። ለባለአደራ አስተዳደሩ የተሰጡትን ቁልፍ ኃላፊነቶች የምርጫ ዝግጅት ማካሄድ፣ ሰላምን ማረጋገጥ፣ የመንግስት መዋቅሮችን መልሶ መዘርጋት፣ መሰረተ-ልማቶችን መጠገን እና ተፈናቃዮችን መመለስን ጨምሮ በስኬት ለመወጣት ከፍተኛ ዲሲፕሊን እና ግልጽነት ሊኖር ይገባል ሲሉ አሳስበዋል። ፓርቲያቸው ትዴፓ ለትግራይ ክልል ህዝብ ሰላም፣ ልማት እና ህገ-መንግስታዊ ስርዓት መረጋገጥ ከህዝቡ ጎን በመቆም አስፈላጊውን ድጋፍ ሁሉ ለማድረግ ዝግጁ መሆኑን አረጋግጠዋል።

አዶላ/ነገሌ ቦረና፣ ጥቅምት 6/2019 (ኢዜአ) ፡-ከመደመር መንግሥት ጎን በመሰለፍ ለዘላቂ ሰላምና ልማት እቅዶች መሳካት የበኩላቸውን አስተዋጽኦ ለማበርከት ዝግጁ መሆናቸውን የደቡብ ኦሮሚያ ዞን ወጣቶች አስታወቁ። ትልቅ ሀገር፤ ትልቅ ህዝብ፤ ታላቅ ርዕይ ወጣቶች በሀገር ግንባታ፣ በሰላም ማስከበርና በልማት ስራዎች ላይ ንቁ ተሳታፊ መሆን ከቻሉ ለአንድ ሀገር ዘላቂ እድገት ወሳኝ ሚና ይጫወታል። በተለይም የሕዝብ ለሕዝብ ግንኙነትን ማጠናከር፣ የአካባቢን ሰላም ማስከበርና በኢኮኖሚ ጥረቶች ላይ መሳተፍ የዘመኑ ወጣቶች ዋነኛ ተግባር ተደርጎ ይወሰዳል። በደቡብ ኦሮሚያ ዞን የሚገኙ ወጣቶችም ከዚህ ቀደም በተለያዩ የልማትና የሰላም ግንባታ መድረኮች ላይ ንቁ ተሳትፎ ሲያደርጉ የቆዩ ሲሆን፣ አሁን ላይ ደግሞ የመደመር መንግሥት ከያዛቸው ሀገራዊና ክልላዊ እቅዶች ጋር በመሰለፍ የአካባቢያቸውን ሰላምና ልማት ለማረጋገጥ እንቅስቃሴያቸውን ማጠናከራቸውን ነው የገለጹት። የአዶላ ከተማ ነዋሪ ወጣት ሀሰን ኡመር አዲስ የተመሰረተው የመደመር መንግስት ዘላቂ ሰላምና ልማት ለማረጋገጥ የያዘው እቅድ የሚደገፍ መሆኑን ተናግሯል። ወጣቱ እንዳለው የባህር በር፣ የሀገር ሉዓላዊነትና ብሄራዊ ጥቅም የማስከበር ጉዳይ የትውልዱ ሁሉ መሻትና ጥያቄ ነው። ጠቅላይ ሚኒስትር ዐቢይ አሕመድ(ዶ/ር) ለቀጣይ አምስት ዓመታት ያስቀመጡት የሰላምና ልማት አቅጣጫ የወጣቱም እምነትና ፍላጎት በመሆኑ የሚጠበቅበት ሀላፊነት ለመወጣት ዝግጁ መሆኑን አስታውቋል። ፍትሃዊ ተጠቃሚነት እንዲረጋገጥ በመደመር መንግሥት የተሻሻለው የዞኖችና የቀበሌ አደረጃጀትም ተስፋ ያለው ነው ያለው ወጣቱ፣ የአብሮነት፣ የሰላምና የልማት እሴቶችን ለማጽናት ከመደመር መንግሥት ጎን እንሰለፋለን ብለዋል።   የዚሁ ከተማ ነዋሪ ወጣት ረቢራ ገመዳ ባለፉት አመታት የአረንጓዴ አሻራ፣ የሌማት ትሩፋት፣ የበጋ መስኖና የስራ እድል ፈጠራ ስራዎች ወጣቱን ለስራ ያነሳሱ መሆናቸው ጠቅሶ፣ የመሰረተ ልማት ስራዎች ተደራሽነትም አብዛኛውን የህብረተሰብ ክፍል ተጠቃሚነት ያረጋገጡ መሆናቸውን ተናግሯል። በዚሁ መሰረት የዘላቂ ልማት እቅዶችን ለማሳካት በሁለንተናዊ ድጋፍና ትብብር ከመደመር መንግስት ጎን በመሆን እኔም የድርሻዬን ለመወጣት ተዘጋጅቻለሁ ብሏል፡፡ የነገሌ ቦረና ከተማ ነዋሪ ወጣት አብዱባ ቦሩ፤ አብሮነት በዘላቂ ሰላምና ልማት የወጣቱን እድል ፈንታ የሚወስን እንደሆነ ገልጿል፡፡   የባህር በር ማግኘት የሀገርን ሉአላዊነትና ብሔራዊ ጥቅም ለማስከበር፣ እንዲሁም የዜጎችን ማህበራዊ ህይወት ለማሻሻል እጅግ ወሳኝ በመሆኑ ድጋፌን እገልጻለሁ ብሏል። በሀገር ውስጥ ሰርቶ በመለወጥ ሰላም፣ ልማትና ብልጽግናን ማረጋገጥ ዘወትር የወጣቱ ዋና ፍላጎትና ተስፋ መሆኑን አንስቶ፤ የመደመር መንግስት የያዛቸው የአምስት ዓመታት የልማት ዕቅዶች እንዲሳኩም የወጣቶች ንቁ ተሳትፎና ድርሻ እጅግ ከፍተኛ መሆኑን ገልጸዋል። በመደመር መንግስት ለወጣቶች በሀገር ውስጥ የተመቻቸው የሥራ ዕድል፣ የማምረቻ ቦታ እና የብድር አገልግሎትም ወደ ሥራ ለመሰማራት ትልቅ ማበረታቻና ተነሳሽነት እንደፈጠረላቸው ገልጸዋል።    

በትግራይ ክልል ለተዋቀረው የፌዴራል መንግሥት ባለአደራ አስተዳደር ተልዕኮዎችን በበላይነት የሚመሩ ዋና አስፈጻሚዎች እና የመቐለ ከተማ ከንቲባ መሾማቸው የጠቅላይ ሚኒስትር ጽሕፈት ቤት አስታውቋል። በዚህም መሠረት የባለአደራ አስተዳደሩን የሥራ ዘርፎች የሚመሩት ዋና አስፈጻሚዎች፦ አቶ አሰፋ አብርሃ ሐጎስ፦ የአስተዳደር እና የሕዝብ አገልግሎት ዋና አስፈጻሚ፤ ዶክተር ቴዎድሮስ አረጋይ ወ/ሥላሴ፦ የኢኮኖሚ እና መልሶ ግንባታ ዋና አስፈጻሚ፤ ብሪጋዴር ጄነራል ገብረ እግዚአብሔር በየነ ኃይሉ፦ የጸጥታና ሰላም ዋና አስፈጻሚ፤ አቶ ረዳኢ ኃለፎም ወ/ሥላሴ፦ የፖለቲካ እና ሕዝብ አደረጃጀት ዋና አስፈጻሚ ሆነው የተሾሙ ሲሆን፤ ዶክተር ሽሻይ አማረ፦ የመቐለ ከተማ ከንቲባ በመሆን ተሹመዋል። የተሾሙት አመራሮች በክልሉ የሰላም፣ የመልሶ ግንባታ፣ የመዋቅር ዝርጋታ እና የሕዝብ አገልግሎት መስጠት ዋና ዋና ባለአደራነቶችን በበላይነት የሚያስተባብሩ ይሆናል።

የትግራይ ክልል የፊዴራል መንግሥት ባለአደራ አስተዳደር ለሚቀጥሉት 6 ወራት ትግራይን የሚያስተዳድር ሲሆን የሚያከናውናቸው ዋና ዋና ተግባራትም፦ 1. በትግራይ ክልል ውስጥ ተፈጥሮ ያለውን የሰላምና የመረጋጋት ችግር በፍጥነት በመፍታት የተረጋጋ ሁኔታን መፍጠር፣ 2. የፈረሱ የመንግሥት መዋቅሮችን መልሶ በመዘርጋት ሕዝቡ የመደበኛ አገልግሎት ተጠቃሚ የሚሆንበትን ሁኔታ መፍጠር፤ 3. በጦርነት ምክንያት የተጎዱ መሠረተ ልማቶችን በመጠገንና ፈጥነው ወደ ሥራ እንዲገቡ በማድረግ በሀገር ደረጃ የሚታዩ የልማት ትሩፋቶች ትግራይ ውስጥም መስፋፋት የሚችሉበትን ሁኔታ ማመቻቸት፤ 4. የተፈናቀሉ የኅብረተሰብ ክፍሎችን ወደየቀያቸው መመለስ፤ 5. በክልሉ ውስጥ ተቋርጠው የነበሩ ማኅበራዊ አገልግሎቶች እንዲቀጥሉ ማድረግ፤ 6. እንዲሁም የተረጋጋ የፖለቲካ ሁኔታ ተፈጥሮ በ6 ወር ጊዜ ውስጥ ነጻና ግልጽ ምርጫ ተከናውኖ ትግራይ የፌዴሬሽኑ መደበኛ አካል የምትሆንበትን ሁኔታ ማመቻቸት፤ 7. ከፌዴራል የመከላከያ፣ የፖሊስና የደኅንነት ተቋማት እንዲሁም ከትግራይ የጸጥታ ኃይሎች ጋር በመቀናጀት ከክልል እስከ ቀበሌ ባለው መዋቅር ውስጥ የተረጋጋ ሁኔታ እንዲፈጠር፣ ታጣቂዎች ትጥቃቸውን በማስረከብ ወደ ሰላማዊ ኑሮ እንዲመለሱና ተሐድሶ እንዲያደርጉ ሁኔታውን ማመቻቸት፣ የክልሉን የጸጥታ መዋቅር እንደ አዲስ የማዋቀር ኃላፊነት ይኖረዋል፡፡ 8. ሰላም እንዲጸና ፣ የሕዝቡ ሥነ ልቡና እንዲስተካከልና ወደ ልማትና የመልሶ ግንባታ ሥራ ለመግባት የሚያስችለው ዝግጁነት እንዲኖረው ማድረግ፤ 9. የሚዲያ ሥራዎችን የማስተባበር፤ በየደረጃው የሚደረጉ የሕዝብ መድረኮችን የማዘጋጀት፤ 10. ለቀጣዩ ምርጫ ሰላማዊና አካታች እንዲሆን የሚያስችሉ ተግባራትን የማከናወን ኃላፊነት አለበት፡፡

የኢ.ፌ.ዲ.ሪ. የፌዴሬሽን ምክር ቤት በሕገ መንግሥቱ አንቀጽ 62 (9) እና በዐዋጅ ቁጥር 359/1995 አንቀጽ 14/2/ለ/ መሠረት የትግራይ ክልል ጊዜያዊ አስተዳደር እንዲቋቋም ባስተላለፈው ውሳኔ እና ለሚኒስትሮች ምክር ቤት በሰጠው ሥልጣን መሠረት፣ የኢፌዴሪ መንግሥት የትግራይ ክልልን የሚያጸና ውሳኔ ወስኗል። እንደሚታወቀው፣ በትግራይ ክልል ተፈጥሮ የነበረውን ግጭት በፕሪቶሪያ ስምምነት መሠረት ለመፍታት የተደረገው ተደጋጋሚ ጥረት በሕወሐት ዕንቅፋትነት የተነሣ ሳይሳካ ቀርቷል። ሰላምን ያልፈለገው የሕወሐት አመራር ለአራተኛ ጊዜ የጀመረው አውዳሚ ጦርነት ለአራተኛ ጊዜ በሕወሐት ሽንፈት ተጠናቋል። የትግራይ ሕዝብ የራቀውን ሰላም እንዲጎናጸፍ፣ ራስን በራስ የማስተዳደር መብቱ እንዲረጋገጥ፣ እንዲሁም ላለፉት በርካታ ዓመታት ያላገኛቸውን የልማት ትሩፋቶች ለማጣጣም እንዲችል ከግጭት አዙሪት መውጣት አለበት። ለዚህ ደግሞ በፌዴሬሽኑ ውስጥ የሚገባውን ቦታ አግኝቶ ሰላሙን ማስከበር፣ ትኩረቱን በልማት ላይ ማድረግና ከሌሎች የኢትዮጵያ ሕዝቦች ጋር በኅብረ ብሔራዊ አንድነት ጸንቶ መኖር አለበት። እነዚህን ሁኔታዎች ባጠረ ጊዜ ለማመቻቸት እንዲቻል የትግራይ ክልል የፌዴራል መንግሥት ባለአደራ አስተዳደር በሚኒስትሮች ምክር ቤት ደንብ መሠረት ተመሥርቷል፡፡ ይህ የትግራይ ክልል የፊዴራል መንግሥት ባለአደራ አስተዳደር ለሚቀጥሉት 6 ወራት ትግራይን የሚያስተዳድር ይሆናል። ዋና ተግባሩ፦ 1. በትግራይ ክልል ውስጥ ተፈጥሮ ያለውን የሰላምና የመረጋጋት ችግር በፍጥነት በመፍታት የተረጋጋ ሁኔታን መፍጠር፣ 2. የፈረሱ የመንግሥት መዋቅሮችን መልሶ በመዘርጋት ሕዝቡ የመደበኛ አገልግሎት ተጠቃሚ የሚሆንበትን ሁኔታ መፍጠር፤ 3. በጦርነት ምክንያት የተጎዱ መሠረተ ልማቶችን በመጠገንና ፈጥነው ወደ ሥራ እንዲገቡ በማድረግ በሀገር ደረጃ የሚታዩ የልማት ትሩፋቶች ትግራይ ውስጥም መስፋፋት የሚችሉበትን ሁኔታ ማመቻቸት፤ 4. የተፈናቀሉ የኅብረተሰብ ክፍሎችን ወደየቀያቸው መመለስ፤ 5. በክልሉ ውስጥ ተቋርጠው የነበሩ ማኅበራዊ አገልግሎቶች እንዲቀጥሉ ማድረግ፤ 6. እንዲሁም የተረጋጋ የፖለቲካ ሁኔታ ተፈጥሮ በ6 ወር ጊዜ ውስጥ ነጻና ግልጽ ምርጫ ተከናውኖ ትግራይ የፌዴሬሽኑ መደበኛ አካል የምትሆንበትን ሁኔታ ማመቻቸት፤ 7. ከፌዴራል የመከላከያ፣ የፖሊስና የደኅንነት ተቋማት እንዲሁም ከትግራይ የጸጥታ ኃይሎች ጋር በመቀናጀት ከክልል እስከ ቀበሌ ባለው መዋቅር ውስጥ የተረጋጋ ሁኔታ እንዲፈጠር፣ ታጣቂዎች ትጥቃቸውን በማስረከብ ወደ ሰላማዊ ኑሮ እንዲመለሱና ተሐድሶ እንዲያደርጉ ሁኔታውን ማመቻቸት፣ የክልሉን የጸጥታ መዋቅር እንደ አዲስ የማዋቀር ኃላፊነት ይኖረዋል፡፡ 8. ሰላም እንዲጸና ፣ የሕዝቡ ሥነ ልቡና እንዲስተካከልና ወደ ልማትና የመልሶ ግንባታ ሥራ ለመግባት የሚያስችለው ዝግጁነት እንዲኖረው ማድረግ፤ 9. የሚዲያ ሥራዎችን የማስተባበር፤ በየደረጃው የሚደረጉ የሕዝብ መድረኮችን የማዘጋጀት፤ 10. ለቀጣዩ ምርጫ ሰላማዊና አካታች እንዲሆን የሚያስችሉ ተግባራትን የማከናወን ኃላፊነት አለበት፡፡ የባለአደራ አስተዳደሩ በሚያከናውናቸው ሁሉም ተግባራት የኢትዮጵያን ብሔራዊ ጥቅሞች፣ የኢትዮጵያን የግዛት አንድነት፣ የትግራይ ሕዝብን መሠረታዊ ጥቅሞች መሠረት ማድረግ አለበት። በሕዝብ የተመረጠ መንግሥት እስከሚቋቋም ድረስ የክልሉን የዕለት ተዕለት አገልግሎቶች ከማቅረብና ለቀጣይ ምርጫ አስቻይ ሁኔታዎችን ከመፍጠር በዘለለ ረዘም ያለ ስትራቴጂያዊ አንድምታ ባላቸው ጉዳዮች ላይ አይንቀሳቀስም፡፡ ተግባሩንም ከፌዴራል መንግሥት በሚሰጠው አቅጣጫ እና መመሪያ መሠረት ያከናውናል። የባለአደራ አስተዳደሩ ዋና አስፈጻሚዎች 1. አቶ አሰፋ አብርሃ ሐጎስ የአስተዳደር እና የሕዝብ አገልግሎት ዋና አስፈጻሚ 2. ⁠ዶክተር ቴዎድሮስ አረጋይ ወ/ሥላሴ - የኢኮኖሚ እና መልሶ ግንባታ ዋና አስፈጻሚ 3. ⁠ብ/ጄ ገብረ እግዚአብሔር በየነ ኃይሉ - የጸጥታና ሰላም ዋና አስፈጻሚ 4. ⁠አቶ ረዳኢ ኃለፎም ወ/ሥላሴ - የፖለቲካ እና ሕዝብ አደረጃጀት ዋና አስፈጻሚ 5. ⁠ዶክተር ሽሻይ አማረ - የመቐለ ከተማ ከንቲባ በመሆን ተሹመዋል። ለሚያከናውኗቸው ሁሉም እንቅስቃሴዎች የፌዴራል መንግሥቱ መመሪያ፣ አቅጣጫ፣ ድጋፍና ክትትል ይደረግላቸዋል።

አዲስ አበባ፤ ጥቅምት 6/2019 (ኢዜአ)፦ የመደመር መንግሥት የዜጎችን ሁለንተናዊ የላቀ ተጠቃሚነት የሚያረጋግጡ ስራዎችን እንደሚያጠናክር ባለፉት ዓመታት ያስመዘገባቸው ስኬቶች አመላካች ናቸው ሲሉ የሲቪክ ማህበራት ገለጹ። የመደመር መንግሥት የወጣቶችና ስፖርት በሚኒስቴር ደረጃ በአዲስ መልክ መደራጀቱ ለወጣቶች ተሳታፊነትና ተጠቃሚነት መጠናከር የተሰጠውን ትኩረት አመላካች መሆኑም ተገልጿል። የኢትዮጵያ ፌዴራላዊ ዴሞክራሲያዊ ሪፐብሊክ 7ኛው የሕዝብ ተወካዮች ምክር ቤት የ1ኛ ዓመት የሥራ ዘመን የምክር ቤቱ መመሥረቻ 1ኛ መደበኛ ስብሰባውን ማካሄዱ የሚታወስ ነው። ጠቅላይ ሚኒስትር ዐቢይ አሕመድ (ዶ/ር) የመደመር መንግሥት ካቢኔያቸውን በሕዝብ ተወካዮች ምክር ቤት ባጸደቁበት ወቅት የካቢኔ መረጣው ብቃትን፣ የሕዝብ አደራ መሸከምን፣ ሙስናን መጸየፍንና ስብጥርን ዋነኛ መስፈርት ተደርጓል ብለዋል። የካቢኔ አባላት የተሰጣቸው ኃላፊነት ትልቅ በመሆኑ በትጋት መስራት እንደሚጠበቅባቸውና የሹመቱ ዋና ግብም ሕዝብን ማገልገልና የኢትዮጵያን መሻት፣ የሕዝብን ጥቅም ማዕከል አድርጎ መስራት መሆን እንዳለበት አስገንዝበዋል። የኢትዮጵያ ሲቪክ ማህበረሰብ ድርጅቶች ምክር ቤት ፕሬዝዳንት አህመድ ሁሴን ለኢዜአ እንደገለጹት በምርጫ አሸንፎ መንግሥት መመስረት ማለት አደራ መቀበል፣ መሸከም፣ መወጣት እና በውጤታማነት መፈጸም ማለት ነው። ከማህበረሰብ ጋር በቅርበት የመስራትና የማገልገል፣ ችግሮችን ተረድቶ ፈጣን ምላሽ መስጠት፣ ሰላም ማስፈን፣ ኢኮኖሚን ማሳደግ ማለት እንደሆነም ጨምረው ገልጸዋል። የተለያዩ የፖለቲካ ፓርቲዎች በሹመቱ መካተታቸው ለሀገር የሚጠቅሙ ጉዳዮች ላይ በትብብር መስራቱ የሚበረታታ መሆኑን ተናግረዋል። ከተሿሚዎችም በትብብር፣ በብቃት እና በታማኝነት ህዝብን ማገልገል እንደሚጠበቅ ጠቁመው ሁሉም የህብረተሰብ ክፍል ከባለድርሻ አካላት ጋር በጋራ ለሀገሪቱ እድገት መስራት ይጠበቃል ብለዋል።   የአዲስ አበባ ከተማ ሴቶች ማህበር ፕሬዝዳንት እናትአለም እንዳለ በበኩላቸው በ7ኛው ጠቅላላ ምርጫ በሀገሪቱ የዲሞክራሲ ስርዓት መጎልበቱንና ምቹ ሁኔታ መፈጠሩን ያመላከተ መሆኑን አንስተዋል። በመንግስት ምስረታውም ተፎካካሪ የፖለቲካ ፓርቲዎች፣ የጾታና ሌሎች ስብጥሮች መካተታቸው ኢትዮጵያን ወደ ተሻለ ደረጃ ማሻገር የሚችል ምስረታ ተመልክተናል ብለዋል። በካቢኔው በሀላፊነት የተካተቱ ሴቶችም በሀገር ሁለንተናዊ የልማት ጉዞ ላይ የራሳቸውን አሻራ በማበርከት ውጤታማ እንደሚሆኑ ያላቸውን እምነት ገልጸዋል። ሁሉም የህብረተሰብ ክፍል በመንግስት ምስረታው ላይ የቀረቡ የትኩረት አቅጣጫዎች ለሀገሪቱ ፈጣን እድገት ያላቸውን ፋይዳ በመገንዘብ ከመንግስት ጎን በመቆም ለውጤታማነታቸው የበኩሉን ድርሻ ማበርከት እንደሚገባም ተናግረዋል።   የአዲስ አበባ ወጣቶች ማህበር ፕሬዝዳንት በረከት ብርብርሳ ቀደም ሲል በመደመር መንግሥት ለወጣቶች የተሰጠው ትኩረት ተጠናክሮ እንደሚቀጥል ያለውን ተስፋ ገልጿል። በመንግሥት ምስረታው የወጣቶችና ስፖርት በሚኒስቴር ደረጃ በአዲስ መልክ እንዲደራጅ መደረጉ ለወጣቶች ተሳታፊነትና ተጠቃሚነት መጠናከር የተሰጠውን ትኩረት ያመላክታል ብሏል። በቀጣይም ወጣቶች በውሳኔ ሰጭነት፣ በልማትና በሌሎች ዘርፎች የሚኖራቸው አስተዋጽኦ የጎላ እንደሚሆን ይጠበቃል ሲል ተናግሯል። ወጣቶችን በኢኮኖሚ፣ በፖለቲካ እና በማህበራዊ ዘርፎች የማብቃት ተግባራት ተጠናክረው ሊቀጥሉ እንደሚገባ ጠቁሟል።

አዲስ አበባ፤ ጥቅምት 5/2019 (ኢዜአ)፦ኢትዮጵያ በቀይ ባህር ላይ የመገኘት እና የመጠቀም ሉዓላዊ መብት እንዳላት ግብጻዊው የፖለቲካ ተንታኝ ማግዲ ካሊሊ ገለጹ። ግብጻዊው ተንታኝ ከኢዜአ ጋር ባደረጉት ቆይታ የሀገሪቷ አመራሮች ኢትዮጵያ ወደ ቀይ ባህር ለመመለስ የምታደርገውን ጥረት በመቃወምና በማደናቀፍ ላይ የተመሠረተውን ፖሊሲያቸውን በጽኑ ተችተዋል። ግብጽ አርቆ አሳቢና ብልህ መሪዎች ቢኖሯት ኖሮ፣ ኢትዮጵያ በቀይ ባህር እንድትጠቀም ከማደናቀፍ እና ከመቃወም ይልቅ ድጋፍ ያደርጉ ነበር ሲሉ ገልጸዋል። ኢትዮጵያ በቆዳ ስፋቷና በሕዝብ ብዛቷ ትልቅ የሆነች እና በየብስ የተከበበች ሀገር በመሆኗ፣ ወደ ቀይ ባህር የመድረስና የመጠቀም ሉዓላዊ መብት እንዳላት ተናግረዋል። ኢትዮጵያ በታሪክ አጋጣሚ የባህር በር ባለቤት በነበረችበት ወቅት ቢሆን ለጎረቤት ሀገራት የስጋት ወይም የጉዳት ምንጭ ሆና እንደማታውቅ አስታውሰዋል። በቀይ ባህር ዙሪያ የሚገኙ ሀገራት በጋራ ፍላጎቶቻቸው ላይ ተነጋግረው ቀጣናዊ መግባባት ለመፍጠር የሚያስችላቸው ውይይት እንዲያደርጉ ተንታኙ ጥሪ አቅርበዋል። ጤናማ ያልሆነ ውድድርን አስወግዶ በትብብር መስራት ይገባል ያሉት ተንታኙ፣ሰላማዊ ስምምነቶች የኢትዮጵያን የባህር በር ፍላጎት በተግባር ለመመለስ መንገድ እንደሚከፍቱ ገልጸዋል። አንዳንድ ሀገራት ለኢትዮጵያ የባህር በር የሚያስገኝ ስምምነት ለመፈራረም ዝግጁ ናቸው፤ የረጅም ጊዜ ውሎች ደግሞ በአፍሪካ ቀንድና በቀይ ባህር ቀጣና ዘላቂ ሰላምና ትብብርን ለማስፈን ጉልህ አስተዋፅኦ አለው ነው ያሉት። ካይሮ በኤርትራ ጉዳይ የምትከተለውን የፖሊሲ አቅጣጫ የተቹ ሲሆን ግብፅና ሌሎች የዓረብ ሀገራት በ1960 እ.ኤ.አ ካይሮ ውስጥ ለተመሠረተው የኤርትራ ነፃነት ግንባር ያደርጉት የነበረውን ድጋፍ አውስተዋል። እ.አ.አ በ1991 የኤርትራ ነፃ መውጣትና ኢትዮጵያ የባህር በር ማጣት፣ ለዚህ ውሳኔ መነሻ የሆኑ የቀጣናውን የፖሊሲ አቋሞች በድጋሚ መፈተሽ አስፈላጊ መሆኑን አስረድተዋል። ተንታኙ ግብፅ የኤርትራን የነፃነት ግንባር መደገፏ በሁለቱ ሀገራት መካከል ሊኖር የሚገባውን የወንድማማችነትና የትብብር ግንኙነት የጎዳ ታሪካዊ ስህተት እንደነበር አመልክተዋል።

ኢትዮጵያ በታሪኳ ሉዓላዊነቷን ጠብቃ የኖረችበትና በአፍሪካም ሆነ በዓለም አቀፍ መድረኮች ያላት ተጽዕኖ ፈጣሪነት የተገነባው በጥንካሬና በብልሃት በተመራ የውጭ ግንኙነት መስመር ነው። ይህንን ታሪካዊ መሠረት ይበልጥ ለማስቀጠልና ከወቅቱ ዓለም አቀፋዊ የፖለቲካና የኢኮኖሚ ተለዋዋጭነት ጋር ለማጣጣም አዲስ መዋቅራዊ እሳቤ ማስፈለጉ አልቀረም። በዚህም መሠረት የሀገሪቱን ብሔራዊ ጥቅም ለማስከበርና የጋራ ተጠቃሚነትን ለማረጋገጥ የሚያስችል የመደመር የዲፕሎማሲ እሳቤ እንደ ዋና መንገድ እያገለገለ ይገኛል። ይህ እሳቤ የሀገሪቱን ሉዓላዊነት ከማስከበር ባለፈ፣ ከቅርብ ጎረቤቶች ጀምሮ እስከ ዓለም አቀፍ አጋሮች ድረስ ያለውን ግንኙነት በጋራ ዕድገትና በመከባበር መርህ ላይ መገንባት ትኩረቱን አድርጓል። በመደመር ስትራቴጂ ሥር የቀጣናዊ ትስስር እና የጎረቤት ሀገራት ዲፕሎማሲ ልዩ ትኩረት የተሰጠው ጉዳይ ነው። ኢትዮጵያ ከጎረቤቶቿ ጋር ያላትን ግንኙነት ከፖለቲካዊ ወዳጅነት ባለፈ በኢኮኖሚ፣ በኤሌክትሪክ ኃይል ሽያጭ፣ በባቡር መስመርና በወደብ ልማት አስተሳስራለች። ይህ ቅድሚያ ለጎረቤት መርህ በምሥራቅ አፍሪካ ቀጣና የሚነሱ አለመግባባቶችን በውይይት ለመፍታትና በአፍሪካ ቀንድ አስተማማኝ ሰላም ለማስፈን ትልቅ አስተዋጽኦ ያበረከተ ሲሆን፣ የኢትዮጵያን ቀጣናዊ መሪነትና ተፅዕኖ ፈጣሪነት ይበልጥ አጠናክሮታል። በሌላ በኩል፣ የብዝኃ-ወገን ዲፕሎማሲ እና ዓለም አቀፍ ተሳትፎ በመደመር እሳቤ ወደ አዲስ ምዕራፍ ተሻግሯል። ኢትዮጵያ ከተለምዷዊ የሁለትዮሽ ግንኙነቶች ባሻገር፣ ድምጿ በዓለም አቀፍ መድረኮች ጎልቶ እንዲሰማና ጥቅሟ እንዲከበር ሰፊ የዲፕሎማሲ ስራ እያከናወነችም ትገኛለች። ለዚህም ትልቁ ማረጋገጫ ሀገሪቱ የብሪክስ አባል መሆን መቻሏና በአየር ንብረት ለውጥ፣ በዓለም አቀፍ ፋይናንስ ሥርዓት ማሻሻያ እንዲሁም በአፍሪካ ድምፅ መከበር ዙሪያ የምታደርገው ተሳትፎ የፖሊሲው ስኬት ማሳያ ተደርጎ ይወሰዳል። የዜጋ ተኮር ዲፕሎማሲ የመደመር የውጭ ግንኙነት ዋና ምሰሶ ሆኖ ቀጥሏል። መንግሥት በውጭ ሀገራት የሚኖሩ የኢትዮጵያ ዳያስፖራ አባላት በሀገራዊ የልማት ፕሮጀክቶች፣ በዕውቀትና በቴክኖሎጂ ሽግግር እንዲሁም በበጎ አድራጎት ሥራዎች ላይ በንቃት እንዲሳተፉ ምቹ ሁኔታዎችን ፈጥሯል። በየጊዜው የሚደረጉ የዳያስፖራ ጥሪዎች፣ የኢንቨስትመንት ማበረታቻዎችና በስደት የሚገኙ ዜጎችን መብትና ደህንነት የማስከበር ሥራዎች ዲፕሎማሲውን ህዝባዊ መልክ እንዲኖረው አድርገውታል። ይህ የዲፕሎማሲ ስኬት ኢትዮጵያ በዓለም አቀፍ መድረክ ያላትን ተሰሚነት ከፍ እያደረገው የሚገኝ ሲሆን፣ ለዚህም ትልቅ ማሳያ ሀገሪቱ እ.ኤ.አ በ2027 የምታስተናግደው 32ኛው የተባበሩት መንግሥታት ድርጅት የአየር ንብረት ለውጥ ጉባኤ (ኮፕ 32) ነው። ይህ ታላቅ መድረክ መደመር በተግባር የተገለጠበት የአረንጓዴ አሻራ ልማት ውጤት ማረጋገጫም ነው።

አዲስ አበባ፤ ጥቅምት 5/2019 (ኢዜአ)፦ የሕዝብ ተወካዮች ምክር ቤት ዛሬ ባካሄደው 1ኛ ዓመት የስራ ዘመን 3ኛ መደበኛ ስብሰባው የቋሚ ኮሚቴዎች ዕጩ አመራርና አባላትን ምደባ አስመልክቶ የቀረበውን የውሳኔ ሀሳብ መርምሮ አፅድቋል። የሕዝብ ተወካዮች ምክር ቤት አፈ ጉባኤ አህመድ ሽዴ ባቀረቡት የውሳኔ ሀሳብ በእጩዎች የአመራረጥ ሂደት ከመንግስት ተጠሪ እና ከፖለቲካ ፓርቲ ተወካዮች ጋር ሰፊ ውይይት የተደረገበት መሆኑን ገልፀው ብዝሐነትን፣ ብቃትን፣ የሥራ ልምድን፣ በምክር ቤቱ መቀመጫ ያላቸውን የተፎካካሪ ፓርቲዎችን ታሳቢ ያደረገ እንዲሁም አዲስ እና ነባር አባላትን ያካተተ ለማድረግ ጥረት መደረጉን አንስተዋል። በዚህም መሰረት፡- ቀነአ ያደታ (ዶ/ር)፡- የሕግና ፍትህ ጉዳዮች ቋሚ ኮሚቴ ሰብሳቢ ‎አቶ ታርጃት ደቦል፡- የሕግና ፍትህ ጉዳዮች ቋሚ ኮሚቴ ምክትል ሰብሳቢ ‎አቶ መለሰ መና፡- የግብርና ጉዳዮች ቋሚ ኮሚቴ ሰብሳቢ ‎እሱባለው መብራት(ዶ/ር)፡- የግብርና ጉዳዮች ቋሚ ኮሚቴ ምክትል ሰብሳቢ ወይዘሮ እፀገነት መንግስቱ፡- የዲሞክራሲ ጉዳዮች ቋሚ ኮሚቴ ሰብሳቢ አቶ ጫላ ለሚ፡- የዲሞክራሲ ጉዳዮች ቋሚ ኮሚቴ ምክትል ሰብሳቢ ‎አቶ ሰለሞን ላሌ፡- የንግድ፣ ባህልና ቱሪዝም ጉዳዮች ቋሚ ኮሚቴ ሰብሳቢ አቶ ጣሂር መሀመድ፡- የንግድ፣ ባህልና ቱሪዝም ጉዳዮች ቋሚ ኮሚቴ ምክትል ሰብሳቢ ‎አቶ ደሳለኝ ወዳጄ፡- የኢንዱስትሪ እና ማዕድን ጉዳዮች ቋሚ ኮሚቴ ሰብሳቢ ‎ወ/ሮ ወላይቴ ቢቶ፡- የኢንዱስትሪ እና ማዕድን ጉዳዮች ቋሚ ኮሚቴ ምክትል ሰብሳቢ ‎ወይዘሮ ወሰነች ቶማስ፡- የብሔራዊ ስትራቴጂ፣ በጀትና ፋይናንስ ጉዳዮች ቋሚ ኮሚቴ ሰብሳቢ ወይዘሮ ዝናሽ ፀጋዬ ፡- የብሔራዊ ስትራቴጂ፣ በጀትና ፋይናንስ ጉዳዮች ቋሚ ኮሚቴ ምክትል ሰብሳቢ ‎ዲማ ኖጎ (ዶ/ር)፡- የውጭ ግንኙነት እና ሰላም ጉዳዮች ቋሚ ኮሚቴ ሰብሳቢ ፈትሒ ማሕዲ (ዶ/ር)፡- የውጭ ግንኙነት እና ሰላም ጉዳዮች ቋሚ ኮሚቴ ምክትል ሰብሳቢ ወይዘሮ የሺሀሳብ ፀጋው፡- የመንግስት ልማት ድርጅቶች ጉዳዮች ቋሚ ኮሚቴ ሰብሳቢ እሸቱ ተመስገን (ዶ/ር)፡- የመንግስት ልማት ድርጅቶች ጉዳዮች ቋሚ ኮሚቴ ምክትል ሰብሳቢ ‎አቶ አለማየሁ እጅጉ፡- የከተማ መሰረተ ልማት እና ሎጂስቲክስ ጉዳዮች ቋሚ ኮሚቴ ሰብሳቢ ‎አወቀ አምዛዬ (ዶ/ር)፡- የከተማ መሰረተ ልማት እና ሎጂስቲክስ ጉዳዮች ቋሚ ኮሚቴ ምክትል ሰብሳቢ አብርሃም አለማየሁ (ዶ/ር)፡- የመንግስት ወጪ፣ አስተዳደርና ቁጥጥር ጉዳዮች ቋሚ ኮሚቴ ሰብሳቢ ወይዘሮ አራሬ ሞሲሳ፡- የመንግስት ወጪ፣ አስተዳደርና ቁጥጥር ጉዳዮች ቋሚ ኮሚቴ ምክትል ሰብሳቢ ‎አቶ ንጋቱ ወልዴ፡- የውሃ፣ መስኖ፣ ቆላማ አካባቢ እና አካባቢ ልማት ጉዳዮች ቋሚ ኮሚቴ ሰብሳቢ ወይዘሮ ነፊሳ አልማህዲ፡- የውሃ፣ መስኖ፣ ቆላማ አካባቢ እና አካባቢ ልማት ጉዳዮች ቋሚ ኮሚቴ ምክትል ሰብሳቢ ‎ወይዘሮ መሰረት ኃይሌ፡- የጤና፣ ማህበራዊ ልማት እና ስፖርት ጉዳዮች ቋሚ ኮሚቴ ሰብሳቢ ‎ወይዘሮ ጀሚላ ሲምቢሮ፡- የጤና፣ ማህበራዊ ልማት እና ስፖርት ጉዳዮች ቋሚ ኮሚቴ ምክትል ሰብሳቢ ነገሪ ሌንጮ (ዶ/ር)፡- የሰው ሀብት ልማት፣ ስራ ስምሪት እና ቴክኖሎጂ ጉዳዮች ቋሚ ኮሚቴ ሰብሳቢ ወይዘሮ ዘሃራ ሰምሬ፡- የሰው ሀብት ልማት፣ ስራ ስምሪት እና ቴክኖሎጂ ጉዳዮች ቋሚ ኮሚቴ ምክትል ሰብሳቢ ሆነው ተሰይመዋል። ምክር ቤቱ የቋሚ ኮሚቴዎች ዕጩ አመራርና አባላትን ምደባ አስመልክቶ የቀረበውን የውሳኔ ሀሳብ፤ ውሳኔ ሀሳብ ቁጥር 4/2019 አድርጎ በሙሉ ድምፅ አፅድቆታል።

ገንዳውኃ፤ ጥቅምት 5/2019(ኢዜአ)፡- በምዕራብ ጎንደር ዞን ከፀጥታ አካላት ጋር በመቀናጀት የህብረተሰቡን ደህንነት ለማስጠበቅ የተከናወኑ ተግባራት ውጤታማ መሆናቸውን የዞኑ አስተዳደር አስታወቀ። በዞኑ የተከናወኑ ሰላምን የማረጋገጥ ስራዎችንና የወደፊት አቅጣጫዎችን አስመልክቶ የዞኑ ከፍተኛ የስራ ኃላፊዎችና የጸጥታ መዋቅር አመራሮች የጋራ ውይይት አካሂደዋል። የምዕራብ ጎንደር ዞን ዋና አስተዳዳሪ አቶ ሆናለም አሻግሬ እንደገለጹት፤ በዞኑ ሰላምን ከማፅናት ጎን ለጎን የህዝብን ተጠቃሚነት የሚያረጋግጡ የልማት ስራዎች ተጠናክረው ቀጥለዋል። ሰላም የሁሉም ነገር መሰረት በመሆኑም ህብረተሰቡ ከጸጥታ ሃይሎች ጋር በመሆን ሰላሙን በንቃት እንዲጠብቅ በማድረግ በተከናወኑ ተግባራት አበረታች ለውጥ መመዝገቡንም ገልጸዋል።   በሀገር መከላከያ ሰራዊት ምዕራብ ዕዝ የ50ኛ ክፍለ ጦር አዛዥ ሌተናል ኮሎኔል ዘመኑ አለባቸው በበኩላቸው፤ ሰራዊቱ ከሌሎች የጸጥታ አካላት ጋር በመተባበር የህብረተሰቡን ሰላምና ደህንነት እያስጠበቀ ይገኛል ብለዋል ። ሰራዊቱ የህዝብን ሰላም ለማደፍረስ የሚንቀሳቀሱ ኃይሎችን በመደምሰስ ህግና ስርዓትን የማስከበር ኃላፊነቱን በብቃት እየተወጣ እንደሚገኝም አስገንዝበዋል። የዞኑ ሰላምና ፀጥታ መምሪያ ኃላፊ አቶ ደረሰ አዱኛ በበኩላቸው፤ ከህብረተሰቡ ጋር በመተባበር የተሰሩ ስራዎች ተጨባጭ ውጤት እያመጡ እንደሚገኙም ጠቅሰዋል። ህብረተሰቡ የሰላሙ ባለቤት በመሆን አሁንም ጥርጣሬ የሚፈጥሩ አካላትን ለጸጥታ ሃይሎች በመጠቆም እያደረገ ያለውን ትብበር አጠናክሮ መቀጠል እንዳለበትም አስረድተዋል። ባለፉት ሶስት ወራት 115 የሚሆኑ በጫካ የነበሩ ዜጎች የመንግስትን የሰላም ጥሪ ተቀብለው እጅ መስጠታቸውን አብራርተዋል። የቋራ ወረዳ ዋና አስተዳዳሪ አቶ አንዳርጋቸው አስማረ በበኩላቸው፤ በወረዳው ሰላምን ማረጋገጥ ለቀጣናው ኢኮኖሚያዊና ማህበራዊ እንቅስቃሴ መሰረት መሆኑን በመገንዘብ በቅንጅት እየተሰራ ነው ብለዋል። አስተዳደሩ ከማህበረሰቡና ከጸጥታ ሃይሎች ጋር በመቀናጀት ህገ-ወጥ እንቅስቃሴዎችንና ስጋቶችን በመከላከል ዘላቂ ሰላም ለማስፈን እየሰራ እንደሚገኝም አስታውቀዋል። በመድረኩ የፌደራልና የክልል የፀጥታ አካላት፣ እንዲሁም የዞንና የወረዳ ከፍተኛ የስራ ኃላፊዎች ተገኝተዋል።  

አዲስ አበባ፤ ጥቅምት 5/2019 (ኢዜአ)፦ የሕዝብ ተወካዮች ምክር ቤት የተለያዩ የውሳኔ ሀሳቦችን መርምሮ በሙሉ ድምጽ አጽድቋል። 7ኛው የህዝብ ተወካዮች ምክር ቤት 1ኛ ዓመት የስራ ዘመኑ 3ኛ መደበኛ ስብሰባ ተካሂዷል። ምክር ቤቱ በዛሬው መደበኛ ስብሰባው የምክር ቤት ጉዳዮች አማካሪ ኮሚቴ አባላትን ለመሰየም የቀረበውን የውሳኔ ሀሳብ መርምሮ አጽድቋል። በምክር ቤቱ የአሰራርና የአባላት የምክር ቤት ቋሚ ኮሚቴዎች አደረጃጀት፣ ተግባርና ኃላፊነት ለመወሰን የቀረበውን የውሳኔ ሀሳብንም እንዲሁ መርምሮ አጽድቋል። በተጨማሪም የቋሚ ኮሚቴዎች ዕጩ አመራር እና አባላትን ምደባ አስመልክቶ የቀረበውን የውሳኔ ሀሳብ አጽድቋል።

ማንነቱን በውድመትና ዝርፊያ እየገለጠ የቀጠለው ሕገወጡ የሕወሓት ቡድን፣ ለኢትዮጵያም ሆነ ለትግራይ ሕዝብ የማይበጅ ዘራፊና አጥፊ ስብስብ መሆኑን በተደጋጋሚ አሳይቷል።   ቡድኑ ከመቀሌ ከተማ ሲሸሽ የትግራይ ክልል ርዕሰ መስተዳደር ቢሮን ከጥቅም ውጭ በማድረግ በቅጥር ግቢው የሚገኙ የአገልግሎት መስጫ ተቋማትንም ዝርፊያና ውድመትን ተግብሯል። ‎ ‎በርዕሰ መስተዳደር ጊቢ እና ህንጻ ውስጥ የደረሰውን ጥፋት የጋዜጠኞች ቡድን በስፍራው ተገኝተው ተመልክተዋል።

ሐረር ፤ጥቅምት 5/2019 (ኢዜአ)፦ የመደመር መንግስት የገባውን ቃል ተግባር ላይ በማዋል የህዝብ ተጠቃሚነትን በማረጋገጥ ላይ ይገኛል ሲሉ የሐረሪ ክልል ርዕሰ መስተዳድር ኦርዲን በድሪ ተናገሩ። ትልቅ ሀገር፣ ትልቅ ሕዝብ፣ ታላቅ ርዕይ በሐረሪ ክልል የመንግስትና የፓርቲ የ2019 በጀት ዓመት የመጀመሪያው ሩብ ዓመት የዕቅድ አፈፃፀም ግምገማ በመካሄድ ላይ ይገኛል።   በግምገማ መድረኩ ላይ የክልሉ ርዕሰ መስተዳድር አቶ ኦርዲን በድሪ እንደገለፁት፤ በክልሉ ባለፉት ዓመታት በሁሉም ዘርፍ አበረታች ተግባራትን ማከናወን ተችሏል። መድረኩ የተዘጋጀው የህዝብ ተጠቃሚነት ለማሳደግ የታቀዱ የመንግስትና የፓርቲ የመጀመሪያው ሩብ ዓመት የስራ አፈጻጸምን በመገምገም ለቀጣይ ስራዎች ራስን ማዘጋጀት እንደሆነም አክለዋል። የመደመር መንግስት ፈጣን የኢኮኖሚ እድገት ማስመዘገብና አገርን በማሻገር የህዝቡን የልማት ተጠቃሚነት በማጎልበት ላይ ትኩረት መስጠቱን አንስተዋል።   አመራሩ ለህዝብ የገባውን ቃል ተግባራዊ በማድረግ ሃላፊነቱን መወጣት ይገባል ያሉት አቶ ኦርዲን በዚህም የታዩ ክፍተቶችን በማረም ጥንካሬዎችን ማስቀጠል ላይ በቅንጅት የሚሰራ መሆኑንም ጠቁመዋል። በግምገማ መድረኩ ላይ የክልሉ ምክር ቤት አፈ-ጉባኤ አቶ ሱልጣን አብዱሰላም፣ በብልጽግና ፓርቲ የሐረሪ ክልል ቅርንጫፍ ጽህፈት ቤት ሃላፊ አቶ ጌቱ ወዬሳን ጨምሮ የክልሉ የመንግስትና የፓርቲ ከፍተኛና መካከለኛ አመራሮች እየተሳተፉ ነው።

አዲስ አበባ፣ጥቅምት 4/2019 (ኢዜአ)፦የሕዝብ ተወካዮች ም/ቤት በ1ኛ ዓመት የስራ ዘመኑ 3ኛ መደበኛ ስብሰባውን ነገ ጥቅምት 5 ቀን 2019 ዓ.ም ያካሂዳል፡፡ ምክር ቤቱ በነገ መደበኛ ስብሰባው በህገ- መንግስቱ አንቀጽ 55/19/ እና በምክር ቤቱ የአሰራርና የአባላት ስነምግባር ደንብ ቁጥር ቁጥር 6/2008 አንቀጽ 152 መሰረት የምክር ቤት ጉዳዮች አማካሪ ኮሚቴ አባላትን ለመሰየም የቀረበውን የውሳኔ ሀሳብ መርምሮ እንደሚያጸድቅ ይጠበቃል፡፡ እንዲሁም በምክር ቤቱ የአሰራርና የአባላት ስነምግባር ደንብ ቁጥር 6/2008 አንቀጽ 4/1/ (መ) እና አንቀጽ 5/4/(መ) መሰረት የምክር ቤት ቋሚ ኮሚቴዎች አደረጃጀት፣ ተግባርና ኃላፊነት ለመወሰን የቀረበውን የውሳኔ ሃሳብ መርምሮ ያፀድቃል ተብሎ ይጠበቃል፡፡ በተጨማሪም ምክር ቤቱ የቋሚ ኮሚቴዎች ዕጩ አመራር እና አባላትን ምደባ አስመልክቶ የቀረበውን የውሳኔ ሃሳብ መርምሮ እንደሚያፀድቅ የምክር ቤቱ መረጃ ያመለክታል፡፡

አዲስ አበባ፤ ጥቅምት 4/2019 (ኢዜአ)፦ ጠቅላይ ሚኒስትር ዐቢይ አሕመድ (ዶ/ር) ከአሜሪካ የውጭ ጉዳይ ሚኒስትር ማርኮ ሩቢዮ ጋር የስልክ ውይይት አድርገዋል። ጠቅላይ ሚኒስትር ዐቢይ አሕመድ (ዶ/ር) በማህበራዊ ትስስር ገጻቸው ባስተላለፉት መልዕክት፤ ከማርኮ ሩቢዮ ጋር በሁለትዮሽ፣ በቀጣናዊ እና በባለብዙ ወገን የጋራ ትኩረትን በሚሹ ጉዳዮች ላይ እጅግ ፍሬያማ የሆነ የስልክ ውይይት ማካሄዳቸውን ገልጸዋል። ያካሄድነው ውይይት በኢትዮጵያና በዩናይትድ ስቴትስ መካከል ያለውን እድሜ ጠገብ ወዳጅነት ወደ ላቀ ስትራቴጂካዊና ተግባራዊ አጋርነት ለማሳደግ በሁለቱም አገራት በኩል ያለውን ቁርጠኝነት ማረጋገጫ ነው ሲሉ ገልጸዋል። ዩናይትድ ስቴትስ ለኢትዮጵያ የምታደርገውን ቀጣይነት ያለው ድጋፍ በተመለከተ የሰጠችውን ማረጋገጫ አድንቀዋል። የሁለትዮሽ ትብብራችንን ለማጠናከር እንዲሁም በቀጣናዊና ባለብዙ ወገን መድረኮች ቅድሚያ በምንሰጣቸው የጋራ ጉዳዮች ላይ አብረን ለመሥራት ያለንን ቁርጠኝነት አረጋግጣለሁ ብለዋል ጠቅላይ ሚኒስትሩ በመልዕክታቸው።

ሆሳዕና፤ ጥቅምት 4/2019(ኢዜአ)፦ በመደመር መንግሥት የተፎካካሪ ፓርቲዎችን በማሳተፍ በጋራ ሀገርን የመገንባት ቁርጠኝነት መኖሩን የማዕከላዊ ኢትዮጵያ ክልል የፖለቲካ ፓርቲዎች የጋራ ምክር ቤት ገለፀ። የጋራ ምክር ቤቱ በመደመር መንግስት ምስረታና ቀጣይ በትብብር በሚሰሩ ተግባራት ዙሪያ ለመገናኛ ብዙሃን መግለጫ ሰጥቷል። የጋራ ምክር ቤቱ ሰብሳቢ አቶ ደምስ ገብሬ በሰጡት መግለጫ፤ በመደመር መንግስት የተፎካካሪ ፓርቲዎችን በማሳተፍ በጋራ ሀገርን የመገንባት ቁርጠኝነት መኖሩን ገልጸዋል። በ7ኛው ጠቅላላ ምርጫ አሸናፊ መሆኑን ተከትሎ የመንግስት ምስረታውን ካከናወነው ብልጽግና ፓርቲ ጋር እንደከዚህ ቀደሙ በጋራ እንደሚሰሩም ተናግረዋል፡፡ የመደመር መንግስት በሀገር ሰላምና ልማት መጠናከር ዙሪያ ከተፎካካሪ የፖለቲካ ፓርቲዎች ጋር በመስራት የበለፀገች ሀገርን በጋራ ለመገንባት ያለውን ቁርጠኝነት የሚያሳይ ምስረታ ስለማከናወኑም ገልጸዋል፡፡ የጋራ ምክር ቤቱ በመደመር መንግስት የሚተገበሩ የህዝብ ተጠቃሚነትን የሚያረጋግጡ የሰላም ማስጠበቅና የልማት ስራዎችን በትብብር በመስራት የሚጠበቅበትን ኃላፊነት እንደሚወጣም ሰብሳቢው ገልጸዋል። የጋራ ምክር ቤቱ ምክትል ሰብሳቢ አቶ በረከት ከድር በበኩላቸው፤ የመደመር መንግስት በ7ኛው ጠቅላላ ምርጫ አሸናፊ መሆኑን ተከትሎ አካታችነትን ማዕከል ያደረገ መንግስት መመስረቱን ተናግረዋል። ይህም በኢትዮጵያ የሀሳብ ብዝሃነትን መሰረት ያደረገ የትብብር ዴሞክራሲ ስርዓትን በመተግበር ረገድ ተምሳሌት እንደሚያደርገው ጠቅሰዋል። በዚሀም በክልሉ የተፎካካሪ ፓርቲዎችን ያሳተፈ የአመራር አደረጃጀት ከመፍጠር ባሻገር በምክር ቤቱ 27 መቀመጫዎች ለተፎካካሪ ፓርቲ ተወካዮች ስለመለቀቃቸውም አስረድተዋል። የመደመር መንግስት የተፎካካሪ የፖለቲካ ፓርቲ አመራሮችን በማካተት ከተናጠል ይልቅ በጋራ ሀገር ለመገንባት ያለውን ተነሳሽነት በምስረታው ማረጋገጡን የገለጹት ደግሞ የነፃነትና እኩልነት ፓርቲ ሊቀ መንበርና የምክር ቤቱ ፀሐፊ አቶ ፈድሉ ጁሃር ናቸው፡፡ ፓርቲያቸው አዲስ ከተመሰረተው መንግስት ጋር በቅንጅት በመስራት የሀገረ መንግስት ግንባታ ሂደቱን የተሻለ ለማድረግ እንደሚሰራም ገልጸዋል። በእናት ፓርቲ የሆሳዕናና አካባቢ ፀሐፊና የጋራ ምክር ቤቱ ስራ አስፈፃሚ አቶ ተመስገን ሹመቱ በበኩላቸው፤ በ7ኛው ጠቅላላ ምርጫ አሸናፊ የሆነው የመደመር መንግስት ምስረታ የዲሞክራሲ ባህልንና የመድብለ ፓርቲ መርህን ተከትሎ የተፈፀመ ነው ብለዋል፡፡  

አዲስ አበባ፤ ጥቅምት 4/2019 (ኢዜአ)፦ የመደመር መንግሥት ሕብረ ብሔራዊ አንድነትን የማጎልበት ማዕከላዊ እሳቤ አካታች የፖለቲካ ምኅዳርን በማስፋት የኢትዮጵያን ብሔራዊ ጥቅሞች ለማስከበር ከፍተኛ አስተዋጽኦ እንደሚኖረው ምሁራን ገለጹ። ትልቅ ሀገር፣ ትልቅ ሕዝብ፣ ታላቅ ርዕይ 7ኛው የሕዝብ ተወካዮች ምክር ቤት መስከረም 25 ቀን 2019 ዓ.ም ባካሄደው 1ኛ ዓመት የሥራ ዘመን የምክር ቤቱ መመስረቻ 1ኛ መደበኛ ጉባዔው ዐቢይ አሕመድን (ዶ/ር)ን ጠቅላይ ሚኒስትር አድርጎ ሰይሟል። ጠቅላይ ሚኒስትር ዐቢይ አሕመድ (ዶ/ር) በዚሁ ወቅት ባስተላለፉት መልዕክትም፤ የመደመር መንግሥት አካታችነትንና አሳታፊነትን በማጎልበት የኢትዮጵያን ብልፅግና የሚያረጋግጥ መሠረት መጣሉን ገልጸዋል። ብልፅግና ፓርቲ ለዴሞክራሲ ስርዓት መጎልበት ባለው ቁርጠኝነት የመደመር መንግሥት የተፎካካሪ የፖለቲካ ፓርቲዎች ተሳትፎን እያሳደገ መሆኑንና ይህም ለብሔራዊ ጥቅም መጠበቅ አይነተኛ ሚና እንዳለው አስረድተዋል። ሰባተኛው ጠቅላላ ምርጫ በፈተናዎች የታጀበ ቢሆንም ሕዝቡ ያሳየው ቁርጠኝነት የሚደነቅ መሆኑን ጠቁመው የምርጫ ሂደቱ የዴሞክራሲ ባሕል እያደገ ስለመምጣቱም አመላካች ነው ብለዋል። በምርጫ ሂደት አሸናፊና ተሸናፊ ሊኖር ቢችልም ኢትዮጵያ አሸናፊ እንጂ ተሸናፊ ዜጋ እንደማይኖራትና በወንድማማችነት መንፈስ የሀገርን ዕድገት ለማስቀጠል እንደሚሰራ አረጋግጠዋል። በቀጣይም የመደመር መንግሥት የኢትዮጵያን ብሔራዊ ጥቅምና ፍላጎት ለማስጠበቅ በሁሉም መስክ በትብብር እንደሚሰራ ገልጸዋል። ኢዜአ ያነጋገራቸው ምሁራን እንዳሉት፤ የመደመር መንግሥት አካታችና አሳታፊ የፖለቲካ ምኅዳር የኢኮኖሚ ዕድገትን በማፋጠን ብሔራዊ ጥቅሞችን ለማስጠበቅ ጉልህ አስተዋፅኦ ይኖረዋል። በአዲስ አበባ ዩኒቨርሲቲ የፌዴራሊዝምና አስተዳደር መምህርና ተመራማሪ ተስፋዬ ጂማ (ዶ/ር) እንዳሉት፤ የመደመር መንግሥት የዴሞክራሲ ምኅዳርን በማስፋት በትብብር ላይ የተመሠረተ አውድ ፈጥሯል። ይህ የትብብርና አንድነት እሳቤም የኢትዮጵያን ዕድገትና ብልፅግና ለማፋጠን የተወሰደ ቁርጠኛ አቋም እንደሆነ ገልጸዋል። የመደመር መንግሥት ማዕከላዊ እሳቤም ሕብረ ብሔራዊ አንድነት ነው ያሉት ምሁሩ፤ ተፎካካሪ ፓርቲዎችን በማሳተፍ የዴሞክራሲ ምኅዳሩን ማስፋቱም ትብብርን ለማጎልበት ጉልህ ጠቀሜታ እንዳለው ተናግረዋል። የመደመር መንግሥት የባሕር በር ባለቤትነትን ለማረጋገጥ ያቀረበው ፍትሐዊና ምክንያታዊ ጥያቄም የሉዓላዊነትና ሕልውና ጉዳይ መሆኑን አስረድተዋል። የሥነ-አመራርና ዓለም አቀፍ ግንኙነት መምህር ጌትዬ ትርፌ (ዶ/ር) በበኩላቸው፤ የመደመር መንግሥት አካታች የአመራር መዋቅር አዳዲስ አመራሮችን ለማፍራት ከፍተኛ ጠቀሜታ እንዳለው ገልጸዋል። አዲሱ አካታችና አሳታፊ የመንግሥት የሥራ ኃላፊዎች መዋቅርም የኢትዮጵያን ፈጣን የዕድገት መሻት ለማፋጠን የሚያስችል አቅም ለማጎልበትም ጉልህ አስተዋፅኦ እንደሚኖረው ተናግረዋል። ጠቅላይ ሚኒስትር ዐቢይ አሕመድ (ዶ/ር) በመንግሥት ምስረታ ወቅት ያስተላለፏቸው የቀጣይ የልማት የትኩረት መስኮችም ኢትዮጵያ ማሳካት የምትሻቸውን ብሔራዊ ጥቅምና ፍላጎቶች ማዕከል ያደረጉ መሆናቸውን አንስተዋል። ይህም የሀገር ውስጥ ስብራቶችን በማከም ቀጣናዊ የጋራ ተጠቃሚነትን ለማረጋገጥ የሚያስችል አቅም የሚገነባ መሆኑንም አብራርተዋል። በቀጣይም ሕብረ-ብሔራዊ አንድነትን የበለጠ በማጎልበት የተጀመሩ የልማት ፕሮጀክቶች ግንባታን በማፋጠን ለሕዝብ ሁለንተናዊ ተጠቃሚነት በትኩረት መስራት እንዳለበት አስገንዝበዋል።  

ኢትዮጵያ የረጅም ዘመን የነጻነት፣ የሉዓላዊነት እና የጥቁር ህዝቦች ኩራት ተምሳሌት በመሆን በአፍሪካ አህጉር ታሪክ ውስጥ ጉልህ ስፍራ አላት። ቅኝ ያልተገዛችው፣ ሉዓላዊነቷን ያላስደፈረችው እና ክብሯን አስጠብቃ ለዘመናት የቆየችው ኢትዮጵያ፤ አፍሪካውያንን ከቅኝ ግዛት ለመላቀቅ ባደረጉት ትግል ውስጥ ፋና ወጊ እና የነጻነት ተምሳሌት በመሆን ታሪካዊ አሻራዋን አሳርፋለች። ይህ ታሪካዊ ሚናዋ ዛሬም ድረስ በአዲስ መልክ እየቀጠለ ይገኛል። የቀድሞው የአፍሪካ አንድነት ድርጅት እና የአሁኑ የአፍሪካ ህብረት ምስረታ ላይ ትልቅ አሻራ ያላት ኢትዮጵያ የህብረቱ ዋና መቀመጫ በመሆን የአህጉሪቷ የዲፕሎማሲ መናኸሪያ ናት። ሀገሪቱ የአፍሪካውያን ነጻነት እና ራስን መቻል የሚያቀነቅነውን የፓን አፍሪካኒዝም እሳቤ ነፍስ እንዲዘራና ህያውነት እንዲላበስ በማድረግ የአህጉሪቱ ትልሞች እውን እንዲሆኑ የላቀ ሚና ተጫውታለች። በታሪክ የታየው ይህ የፓን አፍሪካኒዝም ስንቅ፣ ዛሬ ላይ በመደመር ፍልስፍና ታድሶ ድንበር ተሻጋሪ አህጉራዊ ኃይል እየሆነ መጥቷል። የአዲሱ የመደመር መንግሥት ምስረታ የሀገሪቱን የውስጥ ፖለቲካዊ ምዕራፍ የሚያድስ ብቻ አይደለም፤ ይልቁንም የመደመር እሳቤ የኢትዮጵያን ወሰን አልፎ ለመላው አፍሪካውያን የሚጠቅም አህጉራዊ ፍልስፍና መሆኑን በተግባር ያሳየበት ክስተት ነው። መደመር ሀገሪቷ ያሏት መልካም እሴቶች ላይ መጨመርን፣ ጉድለቶችን መሙላትን፣ ያለፈውን ስህተት አርሞ መልካሙን ማስቀጠልን እና በጋራ ማደግን የሚያስተምር ሀገር በቀል ፍልስፍና ቢሆንም፣ ዛሬ ላይ ግን ድንበር ተሻግሮ ለአህጉራዊው የፓን አፍሪካኒዝም ንቅናቄ፣ ለአፍሪካ ህብረት መጠናከር እና ለአፍሪካውያን በራስ የመተማመን መንፈስ አዲስ መነቃቃትን እየፈጠረ ይገኛል። ይህ እሳቤ ለአፍሪካ ጥንካሬ ያለው አንድምታ ከፍተኛ ነው። አፍሪካውያን ያላቸውን የተፈጥሮ እና የሰው ሀብት አስተባብረው በዚሁ ድንበር ተሻጋሪ የመደመር እሳቤ ከተመሩ፣ ከማንኛውም ጥገኝነት መውጣት ይችላሉ። ፍልስፍናው በአፍሪካ ሀገራት መካከል ያለውን የሁለትዮሽ እና የባለብዙ ግንኙነት በማጠናከር፣ ከፉክክር ፈንታ በትብብር ላይ የተመሰረተ አህጉራዊ ትስስርን ለመገንባት አስተማማኝ መሰረት እየሆነ ነው። በዚህ ማዕቀፍ ስር ኢትዮጵያ «የአፍሪካ ችግሮች በአፍሪካውያን ይፈቱ» የሚለውን የጸና አቋሟን ይበልጥ አጠናክራለች። አዲሱ የመደመር መንግሥት አፍሪካውያን የራሳቸውን ችግር በራሳቸው አቅምና እውቀት እንዲፈቱ የሚያስችሉ ስራዎችን በወሰን ተሻጋሪ ወንድማማችነት መንፈስ በተጠናከረ መልኩ ይቀጥላል። ይህ ድንበር የተሻገረው የመደመር እይታ አፍሪካውያን እንደ አፍሪካ ህብረት ያሉ አህጉራዊና ቀጣናዊ ተቋማት ላይ ያላቸውን እምነት የሚያጠናክር እና የውጭ ጣልቃ ገብነትን በጋራ ለመመከት የሚያስችል ትልቅ አህጉራዊ አቅም የሚፈጥር ነው። በመሆኑም በመደመር ፍልስፍና የሚመራ ጠንካራ የኢትዮጵያ መንግስት ምስረታ ለአፍሪካ እድገት እና ሰላም የሚኖረው ፋይዳ የጎላ ነው። ጠንካራ ኢትዮጵያ ማለት ለአፍሪካ ቀንድ አስተማማኝ ሰላም፣ ለምስራቅ አፍሪካ የኢኮኖሚ ትስስር ምሰሶ እና ለመላው አህጉሪቱ የነጻነት ፋኖስ ናት። የመደመር እሳቤ የኢትዮጵያን ድንበር ተሻግሮ ለአህጉሪቱ መፍትሔ መሆን መቻሉ፤ አፍሪካውያን በኢኮኖሚ ራሳቸውን እንዲችሉ እና በዓለም መድረክ ላይ የሚገባቸውን ክብርና ቦታ እንዲያገኙ ለማድረግ የጎላ ሚና ይጫወታል።

የኢፌዴሪ የመደመር መንግሥት ተቋማት ውስጥ የተሾሙ አመራሮች ስም ዝርዝር ጠቅላይ ሚኒስትር ዐቢይ አሕመድ (ዶ/ር) በዛሬው ዕለት አመራሮችን ሾመዋል፦ #PMOEthiopia

ባህርዳር፤ ጥቅምት 3 /2019 (ኢዜአ)፦ በባህር ዳር ከተማ የሚካሄደው የጣና ፎረም ታዳሚዎችን ተቀብሎ ለማስተናገድ ዝግጅት መደረጉን የአማራ ክልል መንግስት ኮሙኒኬሽን ቢሮ አስታወቀ። ቢሮው ፎረሙን ለማዘጋጀት እየተደረገ ባለው ዝግጅትና የኮሙኒኬሽን ስራዎች ላይ በማተኮር ዛሬ መግለጫ ሰጥቷል። የቢሮው ኃላፊ አቶ አባይ መንግስቴ በሰጡት መግለጫ እንዳስታወቁት፤ ከጥቅምት 13 እስከ 15 ቀን 2019 ዓ.ም ድረስ በባህርዳር ከተማ የሚካሔደው የጣና ፎረምን ስኬታማ በሆነ መንገድ ለማጠናቀቅ የተሟላ ዝግጅት ተደርጓል። ፎረሙ የኢትዮጵያን ገጽታ በሚገነባና እድገቷን አጉልቶ በሚያሳይ መልኩ የሚካሔድ መሆኑን ተናግረዋል። የጣና ፎረም አፍሪካውያን የራሳቸውን ችግር በራሳቸው ጥበብና አመራር ለመፍታት የሚካሄድ መሆኑንም አክለዋል። በባህርዳር ከተማ እስካሁን የተካሄዱ 11 የፎረሙ ስብሰባዎችም በአህጉሩ የሚያጋጥሙ ችግሮችን በመለየት ለመሪዎች ጉባኤ የመፍትሄ ሃሳብ በማቅረብ ጉልህ አስተዋጽኦ ማበርከታቸውን ገልጸዋል። በዚህም በአፍሪካ ሰላምና መረጋጋትን በማስፈን እድገትና ልማትን በማፋጠን ላይ በመምከር የመፍትሄ ሃሳቦችንና የቀጣይ እቅጣጫዎች እንዲመነጩ መደረጉን ጠቅሰዋል። በተጨማሪም አፍሪካ ያላትን ሃብት ተጠቅማ እንዳትለማ እንቅፋት በሆኑ ህገ- ወጥ የሰዎችና የገንዘብ ዝውውር ላይ በመወያየት ችግሩ የሚፈታበትን መንገድ ማመላከት እንደተቻለ አመልክተዋል። “በአፍሪካ የሰላም መንገዶች፣ የኢኮኖሚያዊ ሉዓላዊነትና የጂኦፖለቲካ ለውጥ” በሚል መሪ ሃሳብ የሚካሄደውን የዘንድሮው የ12ኛው የጣና ፎረም በአፍሪካ ሰላም፣ መረጋጋትና እድገት ላይ ይመክራል ተብሎ ይጠበቃል ብለዋል። በዚህ ረገድ ኢትዮጵያ ለመላው የጥቁር ህዝቦች ነጻነት እንደታገለችው ሁሉ ዛሬም የራሷን ልማትና እድገት በማረጋገጥ ወደ አህጉሩ አባል ሀገራት እንዲስፋፋ የበኩሏን ኃላፊነት እየተወጣች እንደምትገኝ አስረድተዋል። በባህርዳር ከተማ የሚገኙ ሆቴሎችና ሌሎች የአገልግሎት መስጫ ተቋማትም ለፎረሙ የሚመጡ የአፍሪካ መሪዎችን እንዲሁም ከፍተኛ ተመራማሪዎችና ባለሙያዎችን ለማስተናገድ የሚያስችል ዝግጅት ማድረጋቸውን ገልጸዋል። 12ኛው የጣና ፎረም በባህርዳር ከተማ ከጥቅምት 13 እስከ 15 ቀን 2019 ዓ.ም ይካሄዳል።