ጅግጅጋ፤ ግንቦት 29/2018(ኢዜአ)፦ ከፍተኛ የመንግስት የስራ ኃላፊዎችን ጨምሮ የክልሎች ርዕሳነ መስዳድሮችና የከተማ አስተዳደር ከንቲባዎች ጂግጂጋ ተገኝተዋል።   በምክትል ጠቅላይ ሚኒስትር ማዕረግ የዴሞክራሲ ስርዓት ግንባታ ማስተባበሪያ ማዕከል ኃላፊና የብልጽግና ፓርቲ ምክትል ፕሬዚዳንት አደም ፋራህ እና በብሔራዊ መረጃና ደህንነት አገልግሎት ዋና ዳይሬክተር አምባሳደር ሬድዋን ሁሴን የተመራው የክልል ርዕሳነ መስተዳድሮች እና የከተማ አስተዳደር ከንቲባዎች ቡድን ጂግጂጋ ገብቷል።

ባህር ዳር፤ ግንቦት 29/2018 (ኢዜአ)፦ ህዝቡ ለሰላም ባለው ፅኑ አቋም የጽንፈኛ ቡድኖችን የተቀናጀ ሰባተኛውን ጠቅላላ ምርጫ የማደናቀፍ ጥረት ሙሉ በሙሉ ማክሸፉን የሰላም ሚኒስትሩ መሀመድ እድሪስ ገለፁ። የሰላም ሚኒስትሩ በኦሮሚያ ክልል አርሲ ዞን አሰኮ ወረዳ በሸኔ የሽብር ቡድን የደረሰው ጥቃት የሚወገዝ መሆኑን ተናግረዋል። ሚኒስትር መሀመድ እድሪስ በሰጡት መግለጫ እንዳሉት፤ በኢትዮጵያ የዲሞክራሲ የበላይነት እንዲረጋገጥና የፀና መንግስትና ሀገር እንዲኖር ምርጫ ወሳኝ ምዕራፍ ነው። በዚህም በ7ኛው ጠቅላላ ምርጫ በታሪክ ሊጠቀስ በሚችል አግባብ ሰፊው የኢትዮጵያ ህዝብ የተሳተፈበትን ሰላማዊ ምርጫ ማካሄድ ተችሏል ብለዋል። ምርጫው በሁሉም መለኪያዎች በውጭ ታዛቢዎች ጭምር የተረጋገጠ፣ ሰላማዊና ዴሞክራሲያዊ በሆነ አግባብ ሊከናወን መቻሉን ገልፀዋል። ይሁን እንጂ ፅንፈኛ ቡድኖች ያለ የሌለ አቅማቸውን ተጠቅመው ምርጫውን ለማደናቀፍ ያደረጉትን የተቀናጀ ጥረት ሰላም ወዳዱ ህዝብ ሂደቱን ሰላማዊ በማድረግ ሴራቸውን አክሽፎታል ሲሉም ተናግረዋል። የባዕዳን ሴራ ተሸካሚ የሆኑ ፅንፈኛ ቡድኖች ከምርጫ በፊት ህዝብ ካርድ እንዳያወጣ፣ የድጋፍ ሰልፍ እንዳይወጣና በምርጫው ዕለት ድምፅ እንዳይሰጥ የተቀናጀ ጥረት ሲያደርጉ እንደነበር አስታውሰዋል። ሆኖም በሀገሩ የማይደራደረው የኢትዮጵያ ህዝብ ማስፈራሪያና ዛቻቸውን ብሎም የጥቃት ሙከራዎችን ተቋቁሞ ምርጫውን በማካሄድ ሴራቸውን በማክሸፍ የዲሞክራሲ የበላይነት እንዲረጋገጥ ማድረጉን አብራርተዋል። በምርጫው ሴራቸው የከሸፈባቸው ፅንፈኞች አሁንም ሌላ የጥፋት ካርድ በመምዘዝ የኢትዮጵያውያንን አንድነት፣ ህብረትና መተሳሰብ በማይመጥን መንገድ ሀገርን አደጋ ላይ የሚጥል ጥቃት መፈፀማቸውን ገልፀዋል። የሸኔ የሽብር ቡድን ከሰሞኑ በአርሲ ዞን አሰኮ ወረዳ ጥቃት ማድረሱን አንስተው፤ ድርጊቱ በሁሉም ዘንድ መወገዝ ያለበትና ዳግም እንዳይከሰት በቅንጅት ይሰራል ብለዋል። ሆኖም አሳሳች ምስሎችን ጭምር በመጠቀም ችግሩን ለማባባስ በሴረኞች የተደረገው ጥረት በህዝቡ አስተዋይነት እና ሰላም ወዳድነት ሊከሽፍ መቻሉን ገልጸዋል። የህብረተሰቡን፣ የሃይማኖት ተቋማትን ብሎም በአማኞች መካከል ለዘመናት የተገነባውን የአብሮነት እሴት በማፍረስ ግጭት ለመቀስቀስ የተሄደበት ርቀት የሚወገዝ መሆኑን አንስተዋል። ጉዳዩ እንዳይራገብ ያደረጉ የመንፈሳዊ ማህበራት ወጣቶችን ያመሰገኑት ሚኒስትሩ በቀጣይ ችግሩን በማባባስ ሀገርና ህዝብን አደጋ ላይ ለመጣል የሚደረገውን ሴራ ሁሉም ሊከላከለው እንደሚገባም አሳስበዋል። ህዝቡ የጽንፈኞችን ምርጫን የማደናቀፍ ሴራ እንዳከሸፈው ሁሉ አብሮነትን በማጠናከር ሀገር የመገንባትና የማፅናት ተግባሩን አጠናክሮ እንዲቀጥልም አስገንዝበዋል።

ባህር ዳር፤ ግንቦት 29/2018(ኢዜአ)፦ ሰባተኛው ጠቅላላ ምርጫ በኢትዮጵያ የፖለቲካ ታሪክ ውስጥ በታላቅ ድል የሚታይ መሆኑን የሰላም ሚኒስትር መሀመድ እድሪስ አስታወቁ። ምርጫውን ለማደናቀፍ የተደረጉ በርካታ ሙከራዎችን በማክሸፍ ስኬታማ ምርጫ ማካሄድ መቻሉንም ገልጸዋል። ሚኒስትሩ በወቅታዊ ጉዳዮች ላይ በሰጡት መግለጫ ምርጫውን ለማደናቀፍ የተደረጉ የተለያዩ የጥፋት ሙከራዎች በሙሉ ከሽፈው የተሳካ ምርጫ መካሄዱን አንስተዋል። በታሪካቸው ከትጥቅ ትግል ውጪ የምርጫ ኮሮጆን የማያውቁ የኢትዮጵያ ጠላቶችን የጥፋት አጀንዳ ተቀብለው በህዝብ ላይ ስጋትን ለመፍጠር ሁሌ የሚውተረተሩ አካላት ምርጫውን ለማደናቀፍ ሙከራ እድርገዋል ብለዋል። እነዚህ ተገዢ ባንዳዎች በመቀናጀት ሰባተኛው ጠቅላላ ምርጫ እንዳይካሄድ ለማድረግ ከምርጫ በፊት፣ በምርጫ ወቅት እና ከምርጫ በኋላ የተለያዩ ሙከራዎችን አድርገዋ ሲሉ ገልጸዋል። ሆኖም ሰባተኛው ጠቅላላ ምርጫ ኢትዮጵያውያን በጋራ በመቆም ለጠንካራ ዴሞክራሲያዊ ሥርዓት ግንባታ ያላቸውን ቁርጠኝነት ያሳዩበት መድረክ መሆኑንም አክለዋል። በተለይም ጽንፈኛ ቡድኖች ከቅድመ ምርጫ ጀምሮ የተዛቡ መረጃዎችን ሲያሰራጩ መቆየታቸውን አስታውሰው፣ በምርጫው ሰሞንም የሽብር ድርጊቶችን ጭምር ለመፈጸም መሞከራቸውን አንስተዋል። ለአብነትም በጎንደር ዩኒቨርሲቲ ኳስ እየተመለከቱ በነበሩ ተማሪዎች ላይ ቦምብ በመወርወር የአንድ ተማሪ ሕይወት እንዲያልፍ ያደረጉ ሲሆን፣ በሌሎች ተማሪዎች ላይ ደግሞ የመቁሰል አደጋ አድርሰዋል ብለዋል። ጽንፈኞች የምርጫውን ዕለት ጨምሮ የተለያዩ ትንኮሳዎችን ያደረጉ ቢሆንም ሙከራው ሳይሳካ ቀርቷል ያሉት ሚኒስትሩ ይህ አልሳካ ያላቸው የጥፋት ኃይሎች በኦሮሚያ ክልል አርሲ ዞን አሰኮ ወረዳ በዜጎች ላይ ጥቃት መሰንዘራቸውን ገልጸዋል። በጥቃቱም በጸጥታ አካላት፣ በቤተ እምነት፣ በመኖሪያ ቤቶች እና በመሠረተ ልማቶች ላይ ጉዳት ያደረሱ ሲሆን በተመሳሳይም በዞኑ ሀንቀሎ ዋቤ እና በሺርካ ወረዳዎች ተመሳሳይ ችግሮች መፍጠራቸውን ሚኒስትሩ ጠቁመዋል። ችግሩን በዘላቂነት ለመፍታት ሁሉን አቀፍ ጥረት እየተደረገ መሆኑን ጠቅሰው በዚህ ሂደትም ከኢትዮጵያ ኦርቶዶክስ ተዋሕዶ ቤተክርስቲያን አባቶች፣ ከኦሮሚያ ክልል አመራሮች እና ጉዳዩ ከሚመለከታቸው አካላት ጋር ውይይት ተደርጓል ብለዋል። እውነታው ይህ ሆኖ ሳለ፣ የተፈጠረውን ችግር ላልተገባ የፖለቲካ ጥቅም ለማዋል የሚደረገው ሙከራ ፍጹም ተቀባይነት እንደሌለውም ሚኒስትሩ አፅንኦት ሰጥተዋል። ሁኔታውን መነሻ በማድረግ የራስን የፖለቲካ ፍላጎት ለማሟላት የሚሯሯጡ አካላት ከድርጊታቸው ሊቆጠቡ እንደሚገባ አሳስበው፣ ጥፋተኛውን አካል በጋራ ማውገዝ እንደሚገባም አስገንዝበዋል። በአጠቃላይ፣ ሰባተኛውን ጠቅላላ ምርጫ ለማደናቀፍ በተለያዩ መንገዶች የሚገለጹ ሙከራዎች የነበሩ ቢሆንም፣ ምርጫው በተሳካ ሁኔታ ተጠናቆ በኢትዮጵያ የፖለቲካ ታሪክ አዲስ ምዕራፍ ተከፍቷል ብለዋል።

አዲስ አበባ፤ ግንቦት 28/2018 (ኢዜአ)፦ አሁናዊውንና ተለዋዋጩን ዓለም አቀፋዊ እንዲሁም ቀጣናዊ ሁኔታዎችን በሳይንሳዊ መንገድ በመተንተን ለሀገር ብሔራዊ ጥቅም መከበር ቅድሚያ ተሰጥቶ እየተሠራ መሆኑን የውጭ ጉዳይ ሚኒስትር ጌዲዮን ጢሞቴዎስ (ዶ/ር) ገለጹ። የውጭ ጉዳይ ሚኒስቴር የሰው ኃይሉን ለማብቃትና ተወዳዳሪነቱን ለማሳደግ በጀመረው አጠቃላይ የሪፎርም ሥራ መሠረት፣ ባለፉት ቀናት በነባራዊ ዓለም አቀፍና ቀጣናዊ ጉዳዮች ላይ ሥልጠና ሲከታተሉ ለቆዩ አመራሮችና ሠራተኞች የሥልጠና ማጠናቀቂያ መርሃ ግብር አካሂዷል።   የውጭ ጉዳይ ሚኒስትሩ ጌዲዮን ጢሞቴዎስ (ዶ/ር) በአሁኑ ወቅት የዓለም አቀፍ ነባራዊ ሁኔታዎች በከፍተኛ ፍጥነት እየተቀያየሩ በመሆናቸው፣ ሂደቶቹን በሳይንሳዊ መንገድ መገምገም እጅግ አስፈላጊ መሆኑን ጠቁመዋል። ተለዋዋጭ ሁኔታዎች በጥልቀት በመገንዘብ፣ ለፖሊሲ ውሳኔዎችና ስልታዊ እርምጃዎች የሚጠቅሙ ምክረ-ሐሳቦችን ለማቅረብ የዲፕሎማቶችን ሙያዊ ብቃት ማጎልበት እንደሚገባም አስገንዝበዋል። የተዘጋጀው ሥልጠና ተሳታፊዎቹ ወቅታዊ የዓለም ክስተቶችን በሙያዊ ዕይታ ለመተንተንና ክህሎታቸውን ለማሳደግ የላቀ ጠቀሜታ እንዳለው አስረድተዋል።   የውጭ ጉዳይ ሚኒስትር ዴኤታ አምባሳደር ብርሃኑ ፀጋዬ በበኩላቸው፣ ሥልጠናው የተቋሙን የሰው ኃይል ክህሎትና ብቃት ለመገንባት የታለመው የሦስት ዓመት ስትራቴጂክ ዕቅድ አካል መሆኑን ገልጸዋል። ይህ ስትራቴጂክ ዕቅድ በተለያዩ እርከኖች ላይ የሚገኙ ሠራተኞች የኢትዮጵያን ብሔራዊ ጥቅም በአገር ውስጥም ሆነ በዓለም አቀፍ መድረኮች ላይ በተሻለ ሁኔታ ለማስከበር የሚያስችላቸውን አቅም የሚፈጥር ነው። ስልጠናውን የሰጡት የቪየና ዓለም አቀፍ ጥናቶች ትምህርት ቤት ፕሮፌሰር ማርከስ ኮርንፕሮብስት (ዶ/ር) የምንኖርበት ዓለም በየወቅቱ ተለዋዋጭ እና ውስብስብ እየሆነ መምጣቱን ገልጸዋል። በመሆኑም ስለ ወቅታዊ ለውጦች፣ ስለ ዓለም አቀፉ ሥርዓት፣ ስለ መላው አፍሪካ እንዲሁም ስለ ውሳኔ አሰጣጥ ሂደት ጠቃሚ ውይይቶች የተደረጉበት የሥልጠና ጊዜ መሆኑንም አስረድተዋል።

ወላይታ ሶዶ፤ ግንቦት 28/2018(ኢዜአ)፦ 7ኛው ጠቅላላ ምርጫ የሴቶች ሁለንተናዊ ተሳትፎ በጉልህ የታየበት መሆኑን የደቡብ ኢትዮጵያ ክልል ሴቶች ፌዴሬሽን አስታወቀ። የደቡብ ኢትዮጵያ ክልል ሴቶች ፌዴሬሽን ሰባተኛውን ጠቅላላ ምርጫ አስመልክቶ ዛሬ መግለጫ ሰጥቷል። የፌዴሬሽኑ ፕሬዚዳንት ወይዘሮ አለሚቱ ሀይለሚካኤል በዚህ ወቅት እንደገለጹት ምርጫው ሰላማዊ፣ ፍትሐዊ፣ ተአማኒ እና ዴሞክራሲያዊ እንዲሆን ፌደሬሽኑ የድርሻውን ተወጥቷል፡፡ በምርጫው ሂደት ሴቶች ከመራጭነት ባለፈ በቋሚ እና ተንቀሳቃሽ ታዛቢነት በመሳተፍ ለምርጫው ስኬታማነት ኃላፊነታቸውን መወጣታቸውን ተናግረዋል። በዚህም በተንቀሳቀሱባቸው አካባቢዎች ጠቅላላ ምርጫው ሰላማዊ፣ ፍትሐዊ እና ዴሞክራሲያዊ በሆነ መንገድ እንደተካሄደ ማረጋገጣቸውን ፕሬዚዳንቷ ገልጸዋል፡፡ የፌደሬሽኑ ዋና ፀሐፊ ወይዘሮ ማስረሻ ዘሪሁን በበኩላቸው በዘንድሮ ምርጫ ሴቶች የነቃ ተሳትፎ ማድረጋቸውን ጠቁመው፣ ይህም ሴቶች ዴሞክራሲን በማጽናት ሀገርን ለማስቀጠል ያላቸውን ቁርጠኝነት ያሳያል ብለዋል። ሴቶች በምርጫው ሂደት እንዲሁም በአጠቃላይ የዴሞክራሲ ስርዓት ግንባታ ያደረጉት ንቁ ተሳትፎ ተጠናክሮ እንዲቀጥል በትኩረት ይሰራል ብለዋል። 7ኛው ጠቅላላ ምርጫ ሰላማዊ፣ ዴሞክራሲያዊና አሳታፊ በሆነ መንገድ መካሄዱን ያነሱት ደግሞ የፌደሬሽኑ ሥራ አስኪያጅ ወይዘሮ ማስረሻ ከበደ ናቸው። በምርጫው አጠቃላይ ሂደት የፌዴሬሽኑ አባል አደረጃጀቶች በንቃት ተሳትፈዋል ብለዋል። ሴቶች በታዛቢነት ያደረጉት ከፍተኛ ተሳትፎ ለምርጫው ተአማኒነት እና አካታችነት የራሱን ሚና መጫወቱንም አመልክተዋል። የዘንድሮ ጠቅላላ ምርጫ የዴሞክራሲ ሥርዓት ግንባታ እያደገና የፖለቲካ ምህዳሩ እየሰፋ መምጣቱን ያሳያል ብለዋል።      

  ግንቦት 24 ቀን 2018 ዓ.ም. ማለዳ ላይ፤ የመጀመሪያው የወገግታ ጭላንጭል በከፍታማዎቹ የኢትዮጵያ ተራሮች ላይ ፈንጥቆ ጨለማውን ሳይቀድ በፊት ኢትዮጵያውያን ረጃጅም ሰልፍ ተሰልፈዋል። በጅማ፣ በድሬዳዋ፣ በሐዋሳ፣ በባሕር ዳር እንዲሁም ስማቸው በዓለም አቀፍ የዜና ጋዜጣዎች ላይ ፈጽሞ ሊወጣ በማይችሉ ከተሞችና መንደሮች ውስጥ ያሉ ወንዶችና ሴቶች፤ ወሳኝ ተግባር ለመፈጸም በሰልፍ ቆሙ። ድምፅ ሰጡ! ይህንን ታሪካዊ ኃላፊነት ለመወጣት ከሃምሳ አራት ሚልዮን በላይ የሚሆኑ ዜጎች ተመዝግበው ነበር። ይህ ቁጥር ከአንዳንድ ሀገሮች አጠቃላይ ሕዝብ ቁጥር በላይ ነው። ይህ ምርጫ እውነተኛ ስለመሆኑ ጥያቄ ለሚያነሣ ለማንኛውም አካል ግልጽ እና የማያሻማ ምላሽ ሰጥቷል! ‎‎የኢትዮጵያ ሕዝብ ፍላጎት ‎የኢትዮጵያ ብሔራዊ ምርጫ ቦርድ ከ52,000 ምርጫ ጣቢያዎች መካከል ከ50,188 በላይ የሚሆኑት በሰዓቱ ተከፍተው ቀኑን ሙሉ መራጮችን ሲያስተናግዱ እንደነበር አረጋግጧል። ከ42 የፖለቲካ ፓርቲዎች የተወጣጡ ከ10,438 በላይ ዕጩዎች እና 80 የግል እጩዎች በሕዝብ ተወካዮች ምክር ቤት እና የክልል ምክር ቤት ወንበሮችን ለማሸነፍ ተወዳድረዋል። ይህ በማንኛውም ሊለካ በሚችል መሥፈርት በኢትዮጵያ ታሪክ ትልቁ እና በውሳኔ አሰጣጥም ሆነ በአስተዳደራዊ ረገድ እጅግ በረቀቀ ሁኔታ ተግባራዊ የተደረገ ዴሞክራሲያዊ ተሳትፎ የታየበት ኩነት ነበር። ‎የቀድሞው የኬንያ ፕሬዚዳንት ክቡር ኡሁሩ ኬንያታ የሚመሩትና ከ37 የአፍሪካ ሀገሮች የተወጣጡ 83 ታዛቢዎችን ያቀፈው የአፍሪካ ኅብረት የምርጫ ታዛቢ ቡድን ምርጫውን “ዴሞክራሲያዊ አስተዳደርን በሰፊው በሚደግፍ ሕጋዊና ተቋማዊ ማዕቀፍ ውስጥ የተካሄደ” ሲል ገምግሞታል። በቀድሞዋ የኡጋንዳ ምክትል ፕሬዚዳንት ክብርት ዶክተር ስፔሲዮዛ ዋንዲራ ካዚብዌ የሚመራው የኢጋድ የምርጫ ታዛቢ ቡድን ባወጣው የመጀመሪያ ደረጃ ሪፖርት፥ በታዘቡባቸው ጣቢያዎች ሁሉ የምርጫ ሳጥኖች በትክክል የታሸጉ መሆናቸውን፣ የፓርቲ ወኪሎች በሂደቱ በሙሉ መገኘታቸውን እንዲሁም ምርጫው አስደናቂ ተቋማዊ፣ አስተዳደራዊና የቴክኖሎጂ ዕድገትን ያሳየ መሆኑን አረጋግጧል። የኢጋድ የምርጫ ታዛቢ ልዑክ ይሄንን ምርጫ «የበርካታ አዳዲስ ምዕራፎች ምርጫ» ሲል ሰይሞታል። የኢትዮጵያ ሰብዓዊ መብቶች ኮሚሽን በድምፅ መስጠት ሂደት ውስጥ ምንም ዓይነት የሰብዓዊ መብት ጥሰት እንዳልተመለከተ አረጋግጧል። የሲቪክ ማኅበረሰብ ታዛቢዎች ጥምረት በምርጫ ቦርድ እውቅና ከተሰጣቸው 55 ድርጅቶች 65,299 የታዛቢዎችን በመላ ሀገሪቱ ያሠማራ ሲሆን፥ 99 በመቶ የምርጫ ጣቢያዎች ላይ ያለምንም ዕንቅፋት የመታዘብ ዕድል ማግኘቱን አረጋግጧል። እነዚህ ተዓማኒነት ያላቸው ሀገራዊ እና አኅጉራዊ ተቋማት ያደረጓቸው ግምገማዎችና የሰጧቸው እውነተኛ ፍርዶች ናቸው። እነዚህ ለአፍሪካ ጥላቻ ካላቸው ወይም የአፍሪካን ዴሞክራሲ በውጫዊ መሥፈርቶች ከሚለኩ ተቋማት የተደመጡ ድምፆች አይደሉም። ‎‎አንዳንድ ዓለም አቀፍ ተንታኞች ይሄንን ምርጫ እንደ ንግሥና በዓል አድርገው ያቆሸሹት ሲሆን ውጤቱም አስቀድሞ የተወሰነ ድራማ እንደነበር አድርገው ሊያቀርቡት ሞክረዋል። እነዚህን መግለጫዎች ከእውነታው ፈጽሞ የራቁ፣ በጥናትና ትንተና ላይ ያልተመሰረቱ እንዲሁም ነፃና የታሰበበት ዴሞክራሲያዊ ምርጫቸውን በኩራት ላደረጉ በሚልዮን የሚቆጠሩ ኢትዮጵያውያን ክብር የማይሰጡ በመሆናቸው የጠቅላይ ሚኒስትር ጽሕፈት ቤት ሙሉ በሙሉ የማይቀበላቸው መሆኑን ያረጋግጣል። አስቀድሞ የተወሰነ ውጤት ቢኖር ኖሮ፤ ከ37 የአፍሪካ ሀገሮች የተወጣጡ 83 ገለልተኛ ታዛቢዎችን፣ 65,299 የሀገር ውስጥ የሲቪል ማኅበረሰብ ታዛቢዎችን ወይም 1,100 ዕውቅና የተሰጣቸውን ዓለም አቀፍ ጋዜጠኞች መጋበዝ ባላስፈለገ ነበር። ‎‎ጠቅላይ ሚኒስትር ዐቢይ አሕመድ በዚህ ሀገራዊ ምርጫ ለተሳተፉ የኢትዮጵያ ዜጎች፣ ለብሔራዊ ምርጫ ቦርድ እና ላሠማራቸው ከ350,000 በላይ ኃላፊዎች፣ ሂደቱን ለጠበቁት የጸጥታ ኃይሎች እንዲሁም ኢትዮጵያ ለዴሞክራሲ ግንባታ መጎልበት እና ለሂደቱ መሳካት ያላትን ቁርጠኝነት ላረጋገጡት የአፍሪካ እና ቀጣናዊ የታዛቢ ቡድኖች ምስጋናቸውን ያቀርባሉ! ‎ ‎ስለ ኢትዮጵያ ልማት ‎ኢትዮጵያውያን ግንቦት 24 2018 ዓ.ም ውሳኔያቸውን ሲያስቀምጡ፣ ሀገራቸውን በፍጹም የዴሞክራሲ ባህል ውስጥ ለማንበር ነው። በሌላ በኩል ኢትዮጵያ ባላት ጸጋ ልክ የሚያስፈልጋትን ሁለንተናዊ ልማት በፍጥነት እውን የማድረግ ባህል እንዲቀጥል ሕዝባችን ተናግሯል። ‎ባለፉት ዓመታት የታየው እውነት እንደሚያሳየን የኢፌዴሪ መንግሥት የተስፋ ቃል መንግሥት አልነበረም። ይልቁንም በተጨባጭ የሚታዩ ውጤቶች የተመዘገቡበት ውጤት ተኮር መንግሥት ሲሆን፤ እነዚህም ውጤቶች በግልጽ የሚታዩ ናቸው። የኢትዮጵያ ኢኮኖሚ በ2017 በጀት ዓመት የ9.2 በመቶ ዕድገት ያስመዘገበ ሲሆን፥ ይሄም በዓለም ላይ ፈጣን ዕድገት ካስመዘገቡ ኢኮኖሚዎች አንዱ ያደርገዋል። ይሄንን መነቃቃት መሠረት በማድረግ በ2018 በጀት ዓመት የኢኮኖሚ ዕድገቱ 10.2 በመቶ ይደርሳል ተብሎ ይጠበቃል። ዕድገቱ ግብርናን፣ ኢንዱስትሪንና የአገልግሎት ዘርፎችን በከፍተኛ ደረጃ ያካተተ ሰፊ መሠረት ያለው ቢሆንም፥ ከጊዜ ወደ ጊዜ ግን ኢንዱስትሪው ለዕድገቱ ዋነኛ አንቀሳቃሽ ኃይል ሆኖ እየመጣ ይገኛል። ይሄም መንግሥት ለማኑፋክቸሪንግ፣ ለኢንዱስትሪ ልማት፣ ለዕሴት ጭማሪና ለውጭ ገበያ ተኮር ምርቶች የሰጠውን ቀጣይነት ያለው ትኩረት ያሳያል። ‎እነዚህ ውጤቶች እንዲሁ ግምቶች ብቻ ሳይሆኑ፥ በጠቅላይ ሚኒስትሩ የ100 ቀናት የሥራ አፈጻጸም ግምገማ ሥርዓት አማካኝነት ክትትል የሚደረግባቸው የተጠያቂነትና የታቀደ አመራር ፍሬዎች ናቸው። አጠቃላይ የወጪ ንግድ ገቢ 20 ቢልዮን የአሜሪካ ዶላር ይደርሳል ተብሎ የሚጠበቅ ሲሆን፥ ይህም ከ2016 ዓ.ም. ወዲህ የ100 በመቶ ገደማ ጭማሪ አሳይቷል። የዋጋ ግሽበትም ወደ ታች ማሽቆልቆሉን በመቀጠል አሁን ላይ ወደ አንድ አሐዝ ደረጃ እየተቃረበ ይገኛል፤ ይሄም በቅርብ ዓመታት ውስጥ በቤተሰቦችና በንግዶች ላይ ከባድ ጫና ፈጥሮ ከነበረው ባለ ሁለት አሐዝ የዋጋ ግሽበት አንጻር ትልቅ መሻሻል ነው። ይህ ስኬት የተመዘገበው ዓለም አቀፍ የኃይል አቅርቦትና ሌሎች ስትራቴጂካዊ ቁሳቁሶችን ገበያ ያናጋው የመካከለኛው ምስራቅ ወቅታዊ ጂኦፖለቲካዊ ውጥረት ጨምሮ፣ ውጫዊ ጫናዎች በነበሩበት ወቅት ነው። ‎የሀገር በቀል ኢኮኖሚ ማሻሻያ አጀንዳ ከተጀመረ ወዲህ መንግሥት ከውጭ ምንጮች ምንም ዓይነት አዲስ የንግድ ብድር ስምምነት ያላደረገ ሲሆን፥ ይሄም የሀገሪቱን የብድር ዕዳ ጫና በከፍተኛ ሁኔታ አቅልሎታል። ከእነዚህ ቁጥሮች በስተጀርባ ኢትዮጵያውያን በዓይናቸው የሚያዩትና በእጃቸው የሚዳስሱት ተጨባጭ ለውጥ አለ። ታላቁ የኢትዮጵያ ሕዳሴ ግድብ ለመኖሪያ ቤቶች፣ ለንግድ ተቋማትና ለጎረቤት ሀገራት የኤሌክትሪክ ኃይል እያመነጨ ይገኛል። ይህ ግድብ በራሳቸው በኢትዮጵያውያን የተደገፈ፣ በኢትዮጵያውያን መሐንዲሶች የተገነባና ቀጣይነት የነበረውን ውጫዊ ጫናዎችን ተቋቁሞ የተጠናቀቀ ነው። ከሃይድሮ ፓወር ጎን ለጎን፥ በኢትዮጵያ ሶማሌ ክልል የሚገኘውን የአይሻ ሁለት የንፋስ ኃይል ማመንጫ እና በአርሲ ዞን የሚገኘውን የአሰላ የንፋስ ኃይል ማመንጫ ፕሮጀክቶች፤ በመሳሰሉ ሥራዎች የታዳሽ ኃይል አቅርቦቷን እያሰፋች ሲሆን፥ ይህም የቀጣናዊ ኢነርጂ ትብብርን እያሳደገ የብሔራዊ ኃይል አቅርቦት መረቡን የመቋቋም ዐቅም ያጠናክራል። በአፍሪካ አህጉር ታሪክ ውስጥ ትልቁ የመሠረተ ልማት ኢንቨስትመንት አንዱ የሆነው የቢሾፍቱ ዓለም አቀፍ አውሮፕላን ማረፊያ ፕሮጀክት የመሠረት ድንጋይ ተጥሎ ግንባታው ተጀምሯል። እነዚህ ምኞቶች አይደሉም፤ ተጨባጭ ሐቆች ናቸው። ‎‎ግብርና፣ አምራች ኢንደስትሪና ቴክኖሎጂ ‎በግብርናው ዘርፍ፣ የመንግሥት የምግብ ሉዓላዊነት አጀንዳ ወቅታዊ ለውጦችን ሳይሆን መዋቅራዊ ውጤቶችን እያስገኘ ቀጥሏል። በሶማሌ ክልል የጎዴ ዩሪያ ማዳበሪያ ፋብሪካን ለመገንባት ከአሊኮ ዳንጎቴ ግሩፕ ጋር የተፈረመው አጋርነት የዘመኑ ጉልህ የኢንዱስትሪ ኢንቨስትመንቶች አንዱ ማረጋገጫ ነው። ፋብሪካው በዓመት 3 ሚልዮን ሜትሪክ ቶን ዩሪያ የማምረት አቅም እንዲኖረው ታቅዶ እየተገነባ ሲሆን፥ ይሄም ኢትዮጵያን በዓለም ትላልቅ ማዳበሪያ አምራች ሀገራት ተርታ ያሰልፋታል። ጠቅላይ ሚኒስትሩ ግንቦት 9 ቀን 2018 ዓ.ም. የፕሮጀክቱን የግንባታ ሂደት በጎበኙበት ወቅት እንደገለጹት፤ “ይህ ፕሮጀክት በግብርና ትራንስፎርሜሽን፣ በምግብ ዋስትና፣ በኢንዱስትሪ ዕድገትና በኢኮኖሚ ራስን መቻል ላይ የተደረገ ስትራቴጂካዊ ኢንቨስትመንት ነው” ብለዋል። አስተማማኝ ባልሆነና ውድ በሆነ የማዳበሪያ አቅርቦት ለረጅም ጊዜ ለተገደቡት ኢትዮጵያውያን አምራቾች የዚህ ፕሮጀክት ፋይዳ ፈጣንና ተጨባጭ ነው። ከዚህ ምርጫ ጥቂት ቀናት ቀደም ብሎ ጠቅላይ ሚኒስትሩ ግንቦት 19 ቀን 2018 ዓ.ም. በነገሌ ቦረና ገዳ አውሮፕላን ማረፊያ ምርቃት ላይ ሲገኙ የታየው ተምሳሌትነት ለቦረና ሕዝብ ትልቅ ትርጉም ነበረው። ይህ ዞን በዓለም አቀፍ ደረጃ የሚታወቅበት ስም የሀገርን አንገት ያስደፋ እንደነበር የቅርብ ጊዜ ትውስታ ሲሆን፤ እርሱም ድርቅ ነው። ለሦስት ተከታታይ ዓመታት የዝናብ መጥፋት በሚሊዮን የሚቆጠሩ ከብቶችን የገደለ፣ ቤተሰቦች ለውኃ ፍለጋ በመቶዎች የሚቆጠሩ ኪሎ ሜትሮችን እንዲጓዙ ያስገደደ፣ እንዲሁም በእነዚህ የግጦሽ መሬቶች ላይ ለዘመናት ራሳቸውን ችለው የኖሩ ማኅበረሰቦችን ለአስቸኳይ የምግብ እርዳታ እጅ እንዲዘረጉ አድርጎ ነበር። ዓለም የሚያውቃት ቦረና እርሷ ነበረች። የጠቅላይ ሚኒስትሩ የግንቦት ወር ጉብኝት ግን የተለየ ታሪክ አሳይቷል። አሁን ላይ ለአርብቶ አደር ማኅበረሰቦችና ለከብቶቻቸው ንጹሕ ውኃ እያቀረቡ ያሉትን የውኃና የመስኖ መሠረተ ልማቶችን የገመገሙ ሲሆን፥ ከጥቂት ዓመታት በፊት አቧራ ብቻ በነበረው መሬት ላይ የክላስተር እርሻዎችን ጎብኝተዋል፤ በያቤሎ የባህል ማዕከል መርቀዋል፤ እንዲሁም በአየር ንብረት ሁኔታዎች ምክንያት ቀድሞ ተገልሎ ለነበረው ቀጣና ዓመቱን ሙሉ ትስስር የሚፈጥር አውሮፕላን ማረፊያ መርቀው ከፍተዋል። ‎‎የአምራች ዘርፉም ተመሳሳይ የለውጥ ታሪክ አለው። በግንቦት 2018 ዓ.ም. በተካሄደው 4ኛው ኢትዮጵያ ታምርት ኤክስፖ ላይ፤ መንግሥት ለአራት ዓመታት የተመዘገበውን ቀጣይነት ያለው የኢንዱስትሪ መስፋፋት ውጤቶች አቅርቧል። የአምራች ዘርፉ የግብአት አቅርቦት በዓመት 9 ሚልዮን ቶን ወደ 15 ሚልዮን ቶን አድጓል። የምርት አቅም አጠቃቀም ከ47 በመቶ ወደ 67 በመቶ ከፍ ማለቱን፣ የማኑፋክቸሪንግ ዕድገት ከ4.8 በመቶ ወደ 10.7 በመቶ ማደጉን፣ እንዲሁም ለአነስተኛና መካከለኛ ኢንተርፕራይዞች የሚቀርበው ፋይናንስ ከ8.1 ቢልዮን ብር ወደ 50 ቢሊዮን ብር ማደጉን ያሳያል። እነዚህ ስኬቶች በሀገር ውስጥ ምርት ላይ በከፍተኛ ሁኔታ እየተንጸባረቁ ይገኛሉ። ኤክስፖው በተጠናቀቀ በሃያ ቀናት ውስጥ ጠቅላይ ሚኒስትሩ በዘጠኝ ወራት ውስጥ ብቻ ተጠናቆ ከ80 በመቶ በላይ ጥሬ ዕቃውን ከሀገር ውስጥ የሚያገኘውን ግዙፍ የኢንዱስትሪ ኢንቨስትመንት «ግራንዲዩር የሴራሚክ ማኑፋክቸሪንግ» ፋብሪካን በሞጆ ከተማ መርቀዋል። ቀደም ሲል በገቢ የሴራሚክ ምርቶች ላይ ጥገኛ የነበረችው ኢትዮጵያ አሁን ላይ የሴራሚክ ምርቶችን ከውጭ ማስገባት ሙሉ በሙሉ ለማቆምና ለውጭ ገበያ የሚሆን ምርት ለማስፋፋት እየተዘጋጀች ትገኛለች። ‎በቴክኖሎጂው ዘርፍም፥ ዘመናዊ ልማት ከጊዜ ወደ ጊዜ በዳታ፣ በፈጠራና በዲጂታል ሥርዓቶች የሚወሰን መሆኑን በመገንዘብ፥ መንግሥት ኢትዮጵያን ሰው ሠራሽ አስተውሎት እና የኢንዱስትሪ 5.0 ማሕቀፎችን ቀድመው ከተገበሩ ሀገራት ተርታ እያሰለፋት ይገኛል። ‎‎የጽንፈኝነትን ፖለቲካ ውድቅ ማድረግ ‎በኦነግ ሸኔ ዐማጽያን በንጹሐን ዜጎች ላይ በተለይም በሃይማኖት ተቋማት ውስጥ ዒላማ ተደርገው የተፈጸሙ ጥቃቶችን ተከትሎ፤ የቤተሰብ እና የወዳጆቻቸውን ሕይወት ላጡ፣ የአካል ጉዳት ለደረሰባቸው እና የቤት ንብረታቸው ለወደመባቸው በአርሲ ዞን ለሚገኙ ወገኖቻችን ጠቅላይ ሚኒስትር ዐቢይ አሕመድ በኢትዮጵያ መንግሥት ስም የተሰማቸውን ጥልቅ ኀዘን ይገልጻሉ። እነዚህ ጥቃቶች የሀገሪቱን ብሔራዊ ዕድገት ለማደናቀፍ ከሚሹ አካላት፣ በአማራ ክልል ከሚንቀሳቀሱ የሀገር ውስጥ አማፂ ቡድኖች እና ለሀገሪቱ ሁለንተናዊ ዕድገት ጥላቻ ካላቸው የውጭ ኃይሎች ጋር በጥምረት የተከናወኑ ሲሆኑ፤ ዓላማቸውም በኢትዮጵያ አለመረጋጋትንና የምርጫ መስተጓጎልን ለመፍጠር ሲደረግ የነበረ የጥፋት ውጥን ተከታይ ነው። መንግሥት 7ኛው ጠቅላላ ምርጫ ያለ አንዳች የፀጥታ ችግር ፍትሐዊና አሳታፊ ሆኖ እንዲጠናቀቅ ከአንድ ዓመት በላይ የዘለቀ ልዩ ትኩረትና ዝግጅት በማድረግ በቁርጠኝነት ሲሠራ ቆይቷል። በሌላ በኩል የጥፋት ኃይሎች ከባዕዳን ጋር 'ፅምዶ' የሚል ቁርኝት በመፍጠር ዕኩይ ዓላማቸውን ለማሳካት ሰፊ የጥፋት ዝግጅት ሲያድርጉ ቆይተዋል፣ ሀገራዊ ምርጫው እንዳይከናወን ሰፊ ርብርብ አድርገዋል። በተጨባጭም በቅድመ ምርጫ እና በምርጫ ወቅት የዜጎችን የመምረጥ መብትና ነጻነት ለመጋፋትና ለማደናቀፍ አለን የሚሉትን የጥፋት እጅ ዘርግተዋል። ‎እነዚህ የጠላት ኃይሎች በመደጋገፍና በመናበብ ዐመፅና ሁከት ለማነሳሳት፣ ከተሞችን በሽብር ጥቃት ለማወክ፣ በመንገዶች የደፈጣ ጥቃት በመፈጸም እንቅስቃሴ ለመገደብ እና በተወሰኑ አካባቢዎች ዒላማ አድርገው ነጥሎ ለማጥቃት ተንቀሳቅሰዋል። እንደ ማሳያ የጦር መሣሪያ፣ ተተኳሾችንና ሌሎች ሎጀስቲክሶችን በድጋፍ በማቅረብ በደቡባዊ ትግራይ በሚገኙ አዋሳኝ የአማራ ክልል አንዳንድ ቦታዎች ላይ ትንኮሳ ፈጽመዋል፣ በአማራ ክልል ባሕር ዳር፣ ጎንደር፣ ደብረ ብርሃን እና ወልድያ ከተሞችን ጨምሮ በክልሉ ዋና ዋና ከተሞች እና ሲቪሎች ላይ ዒላማ በማድረግ ያካሄደው የሽብር እንቅስቃሴና ዝግጅት፣ በአዲስ አበባ ከተማ ባደራጃቸው የኅቡዕ ሴሎች አማካኝነት በተመረጡ አከባቢዎች ላይ ጥቃት እንዲፈጸም ተንቀሳቅሰው የነበረ ቢሆንም ይሄን የጥፋት ሴራ እና ድርጊት እንዲከሽፍ ማድረግ ተችሏል። ‎በተመሳሳይ በኦሮሚያ ክልል የሸኔ ሽብር ቡድን ከጽንፈኛው ፋኖ ታጣቂ ቡድን ጋር በመናበብ በአንዳንድ አካባቢዎች መንገዶችን በመዝጋት እንቅስቃሴ ለማስቆምና ለማስተጓጎል ፍላጎት የተንቀሳቀሰ ቢሆንም በጸጥታ ኃይሉ በተወሰደበት የተጠናከረ እርምጃ ፍላጎቱን ማሳካት አልቻለም። ቡድኑ በፀጥታ ኃይሉ የተወሰደበትን ርምጃ መቋቋም ባለመቻሉ እና ፍላጎቱን ማሳካት ባለመቻሉ ስስ ዒላማዎች ላይ ያተኮረ ርምጃ በመውሰድ የሃይማኖት እና የብሔር ግጭት ለመቀስቀስ በማለም በአርሲ ዞን አሰኮ እና አካባቢው ጥቃት በመፈጸም ሁሉን አይነት የጥፋት ርብርብ ያደረገ ቢሆንም ሁኔታውን በመቆጣጠር ፀጥታ ኃይላችን በእነዚህ ኃይሎች ላይ የተቀናጀ ርምጃ እየወሰደ ይገኛል። መንግሥት መሰል ሥጋቶችን በንቃት በመከታተል ላይ ሲሆን፣ በምርጫው ወቅትም በብዙ የሀገሪቱ አካባቢዎች የተቀነባበሩ ተመሳሳይ ዕቅዶችን በስኬት ማክሸፍ ችሏል። በንጹሐን ዜጎች ላይ የሚፈጸሙ ጥቃቶችን፤ ፍርሃትና ክፍፍልን ከሚያጎሉ የሚዲያ ዘመቻዎች ጋር በማስተሣሠር የተቀነባበረው ይህ እኩይ ተግባር፤ በመንግሥት የደኅንነት መዋቅርና ኦፕሬሽኖች አማካኝነት በከፍተኛ ሁኔታ እንዲስተጓጎል ተደርጓል። ብሔራዊ እና ሃይማኖታዊ ክፍፍልን ለመዝራት የኃይል ጥቃትን እና ውድመትን እንደ መሣሪያ የሚጠቀሙ አካላት በሁሉም ኢትዮጵያውያን ዘንድ በግልጽ ሊወገዙ ይገባል። መሰል ተግባሮች በኢትዮጵያ ውስጥ ምንም ዓይነት የወደፊት ዕድል እንደሌላቸው ለማሳየት የተቀናጀ ብሔራዊ ምላሽ በመስጠት ወሳኝ ርምጃዎችን ይቀጥላል። ‎በንጹሐን ዜጎች ላይ ጥቃት የሚፈጽሙ አካላት፣ ድርጊታቸውን ምክንያታዊ ለማስመሰል ምንም ዓይነት የፖለቲካ ንግግር ቢጠቀሙ፤ ወሳኝ ዓላማን እያሳኩ ሳይሆን ወንጀል እየፈጸሙ ነው። የፖለቲካ ቅሬታዎች በኢትዮጵያ ሕገ መንግሥታዊ ሥርዓት፣ በብሔራዊ ምክክር ሂደት እና በዴሞክራሲያዊ ተቋማት አማካኝነት መፍትሔ ሊያገኙ የሚችሉ እና ሊያገኙ የሚገባቸው ናቸው። ‎ ‎ጽንፈኝነት ግን በኢትዮጵያ ምድር ፈጽሞ ቦታ የለውም! // #PMOEthiopia

ሸገር ፤ግንቦት 28/2018 (ኢዜአ)፦ በሰባተኛው ጠቅላላ ምርጫ የታየውን አንድነት በሀገር ልማት ላይም መድገም እንደሚገባ የሸገር ከተማ ነዋሪዎች ገለጹ። አስተያየታቸውን ለኢዜአ ከሰጡ በሸገር ከተማ የቡራዩ ክፍለ ከተማ ነዋሪዎች መካከል፤ ሃደ ሲንቄ ካባ በየና ህዝቡ በምርጫው ላይ ተሳትፎ ለሚፈልገው ፓርቲ ድምጽ መስጠቱ ለሀገር ልማት መረጋገጥና ቀጣይነት ትልቅ ዋስትና ነው። በመሆኑም በምርጫው የታየውን የአንድነት መንፈስ ቀጣይነት ላለው ልማትና ሀገር ግንባታ መድገም እንደሚገባ ገልጸዋል።   ሌላው የከተማዋ ነዋሪ ኢላላ ዲሮ በበኩላቸው፤ በምርጫው ወቅት የታየውን ጠንካራ ተሳትፎ ወደ ልማት በማዞር ሀገራችንን ማሳደግ ይጠበቅብናል ብለዋል።   በዘንድሮ ጠቅላላ ምርጫ እጅግ በርካታ ህዝብ መሳተፉን የገለጹት አባ ገዳ ቶሊ ኤግዱ፤ ይህንን የጋራ ተሳትፎ ለሀገር ሰላምና ግንባታ ልንጠቀምበት ይገባል ነው ያሉት።   ወጣት ታምሩ ደባ በበኩሉ፤ ምርጫው የነቃ የህዝብ ተሳትፎ የታየበት መሆኑንና በምርጫው የታየው ታላቅ ተነሳሽነት ለሀገር ግንባታ ሊውል ይገባል ሲል ተናግሯል።    

አዲስ አበባ፤ ግንቦት 28/2018 (ኢዜአ)፦ሴቶች ሰባተኛው ጠቅላላ ምርጫ በመራጭነትና በታዛቢነት አበረታች ተሳትፎ ማድረጋቸውን የኢትዮጵያ ሴቶች ፌዴሬሽን ገለፀ። የኢትዮጵያ ሴቶች ፌዴሬሽን በሰባተኛው ጠቅላላ ምርጫ የነበረውን አጠቃላይ የድምጽ አሰጣጥ ሂደትን አስመልክቶ መግለጫ ሰጥቷል። የኢትዮጵያ ሴቶች ፌዴሬሽን ዋና ዳይሬክተር ገነት ስዩም በመግለጫቸው፤ ሰባተኛው ጠቅላላ ምርጫ ሰላማዊና ዴሞክራሲያዊ ሆኖ እንዲጠናቀቅ ፌዴሬሽኑ የበኩሉን ድርሻ ተወጥቷል። በዚህም የፌዴሬሽኑ አባላት ገለልተኝነታቸው ጠብቀው የታዛቢነት ሚናቸውን በአግባቡ እንደተወጡ ተናግረዋል። ፌዴሬሽኑ በሰባተኛው ጠቅላላ ምርጫ አጠቃላይ ከ14 ሺህ በላይ ታዛቢዎችን በማሰማራት 25 ሺህ 384 የምርጫ ጣቢያዎች ላይ የመታዘብ ስራ ማከናወኑን ጠቁመዋል። የሴቶች ተሳተፎ ከቀደሙት የምርጫ ጊዚያቶች ሲነፃፀር መሻሻል ማሳየቱ ገልጸው፤ በሰባተኛው ጠቅላላ ምርጫ በመራጭነትና በታዛቢነት አበረታች ተሳትፎ ማድረጋቸውን ተናግረዋል።