በመቅደስ ወልዴ ብሪክስ እ.ኤ.አ በ2009 ዓለም አቀፍ የኢኮኖሚና ፖለቲካዊ ተፅዕኖ ፈጣሪነታቸው በፍጥነት እያደጉ ባሉት በቻይና፣ ሩሲያ፣ ህንድ እና ብራዚል የተመሰረተ የደቡብ ደቡብ ትብብር ነው። ብሪክ /BRIC/ በሚል መጠሪያ የመጀመሪየውን ስብሰባውን ያደረገውም በወርሃ ሰኔ እ.ኤ.አ በ2009 በሩሲያዋ የካተሪንበርግ ከተማ ነበር። ጥምረቱ እ.ኤ.አ 2011 ደቡብ አፍሪካን በማካተት ስያሜውን ወደ ብሪክስ /BRICS/ ቀይሯል። የማህበራዊና የባህል መስተጋብር፣ የጂኦ ፖለቲካና የባለብዙ ወገን ትስስር፣ የኢኮኖሚና የፋይናንስ ትብብር በመፍጠር የጸጥታ፣ የህዝብ ለህዝብና ማህበራዊ ጉዳዮችን ዕድገት ማሳለጥ ያለመ ነው። ኢትዮጵያ፣ ግብፅ፣ የተባበሩት ዐረብ ኢምሬቶች፣ ሳዑዲ ዓረቢያና ኢራን እ.ኤ.አ በ2024 ቀጥሎም ኢንዶኔዥያ እ.ኤ.አ በ2025 ጥምረቱን መቀላቀላቸውን ከብሪክስ ድረገጽ የተገኘው መረጃ ያመላክታል። እንደ መረጃው ከሆነ ጥምረቱ የዓለምን 49 ነጥብ 5 በመቶ የህዝብ ብዛት የሚሸፍኑ 11 ሀገራትን በአባልነት የያዘ እንዲሁም የዓለማችንን 40 በመቶ ጠቅላላ የሀገር ውስጥ ምርት የሚሸፍን ስብስብ ነው። ብሪክስ በዓለም አቀፍ ደረጃ ተፅዕኖ ፈጣሪነትን ማሳደግ፣ ፈጣን የኢኮኖሚ እድገት ማስመዝገብ እንዲሁም እንደ መንግስታቱ ድርጅትና መሰል ዓለም አቀፍ ተቋማት የዘረጉት ኢ-ፍትሐዊ ተቋማዊ አሰራር እንዲሻሻል ተፅዕኖ በመፍጠር ተጨባጭ ለውጥ የማየት ግብ ይዟል። ኢትዮጵያ እንዴት የብሪክስ አባል ሆነች በጠቅላይ ሚኒስትር ዐቢይ አሕመድ (ዶ/ር) ጠንካራ እና በሳል ዲፕሎማሲያዊ ጥረት የኢትዮጵያ ዓለም አቀፍ ተሰሚነት አቅምና ተፅዕኖ ፈጣሪነት እያደገ መጥቷል። በዚህም ኢትዮጵያ የአፍሪካ መግቢያ በር፣ የአፍሪካ ህብረት መስራችና መቀመጫ፣ የተለያዩ አህጉራዊና ዓለም አቀፋዊ ተቋማት መገኛ፤ የዲፕሎማቶች መናኸሪያ፣ ሰፊ ህዝብና በፍጥነት እያደገ ያለ ኢኮኖሚ ያላት የአፍሪካውያን የአይን ማረፊያ ሆናለች። ኢትዮጵያ የአየር ንብረት ለውጥ ተፅዕኖን መቀነስና መቋቋም በአረንጓዴ ዐሻራ፣ በኮሪደር ልማት፣ በወንዝ ዳርቻዎች እንዲሁም በገጠርና በከተሞች ያስመዘገበቻቸው የልማት ውጤቶች የዓለም ቀልብ ስቧል። በአህጉርና በዓለም አቀፍ መድረኮች የራሷን ብሔራዊ ጥቅም ከማስከበር ባለፈ አፍሪካውያንን በመወከል ድምጽ በማስማት ተፅዕኖ ፈጣሪነቷን አሳይታለች። ኢትዮጵያ በቀጣናው ያላት ተጽዕኖ ፈጣሪነት፣ ለጋራ ልማት ለትብብርና ለፍትሐዊ ተጠቃሚነት የምታደርገው ጥረትና ባላት የጠራ የዲፕሎማሲና የውጭ ግንኙነት ፖሊሲ የብሪክስ ጥምረትን እንድትቀላቀል በር ከፍቶላታል። በዚህም የኢትዮጵያ የብሪክስ ጥምረት አባልነት ተቀባይነት አግኝቶ እ.ኤ.አ በወርሃ ጥር 2024 በይፋ ተቀላቅላለች። ኢትዮጵያ ጥምረቱን እንድትቀላቀል ጠቅላይ ሚኒስትር ዐቢይ አሕመድ (ዶ/ር) በሁለትዮሽና በባለብዙ ወገን መድረኮች ብስለት የተሞላበት የዲፕሎማሲ ጥረት ስለማድረጋቸው በወቅቱ በደቡብ አፍሪካ የኢትዮጵያ አምባሳደር የነበሩት አምባሳደር ሙክታር ከድር (ዶ/ር) በሰጡት ማብራሪያ መግለጻቸው ይታወሳል። ጠቅላይ ሚኒስትር ዐቢይ አሕመድ (ዶ/ር) ኢትዮጵያ የጥምረቱ አባል መሆን የሚያስችሏትን አሳማኝ ምክንያቶች ሲያስረዱም ኢትዮጵያ ነጻነቷን ያስጠበቀች፣ ለተገፉ ሀገራት ድምፅ የሆነች፣ ለአህጉራዊና ዓለም አቀፋዊ ተቋማት መመስረት ሰፊ ሚና የተጫወተች ሀገር መሆኗን እና ሁለንተናዊ የለውጥ ጉዞ ላይ የምትገኝ ሀገር መሆኗን በማንሳት የደቡብ - ደቡብ ትብብርን ለማጠናከር ይህችን ታላቅ ሀገር ማካተት ተገቢ ነው ሲሉ በአፅንኦት ማስረዳታቸውና ማሳመናቸው ጥያቄው ተቀባይነት እንዲያገኝ አስችሏል። የጠቅላይ ሚኒስትር ዐቢይ አሕመድ (ዶ/ር) የዲፕሎማሲ አሰራር ብስለትን ካረጋገጡ ሂደቶች መካከል ኢትዮጵያን የብሪክስ ጥምረት አባል ለማድረግ የተጠቀሙት የዲፕሎማሲ ስልት ተጠቃሽ ነው። ይህውም ኢትዮጵያን የጥምረቱ አባል ማድረግ ለጥምረቱ አባል ሀገራት እና በጥቅሉ ለጥምረቱ የሚያስገኘውን ጠቀሜታ በተመለከተ ለአባል ሀገራት መሪዎች በተናጥልና በጋራ መድረኮች ተገቢውን ግንዛቤ ማስጨበጣቸው ዋነኛው ነው። በዚህም ጠቅላይ ሚኒስትር ዐቢይ አሕመድ (ዶ/ር) ኢትዮጵያ የጥምረቱ አባል እንድትሆን ያቀረቧቸው ኢኮኖሚያዊ፣ ፖለቲካዊ፣ ዲፕሎማሲያዊ እና ስትራቴጂካዊ አመክንዮዎች የጥምረቱን አባል ሀገራት ልብ መግዛቱ ጥያቄው አወንታዊ ምላሽ እንዲያገኝ አስችሏል። ጠቅላይ ሚኒስትር ዐቢይ አሕመድ (ዶ/ር) በወቅቱ ኢትዮጵያ የብሪክስ አባል መሆኗ በባለ ብዙ ወገን ዲፕለማሲ መስክ ያላትን ተደማጭነት የሚያሳይ መሆኑንና በአረንጓዴ ዐሻራ፣ በግብርና እንዲሁም በሀገር ውስጥ ጥቅል ምርት እድገት እያስመዘገበችው ያለው ስኬት የአባልነት ጥያቄዋ ተቀባይነት እንዲያገኝ ከፍተኛ ሚና ማበርከታቸውን ማብራራታቸው የሚታወስ ነው፡፡ ብሪክስ ለኢትዮጵያ ምኗ ነው የኢትዮጵያ የጥምረቱ አባል መሆን ኢኮኖሚያዊ፣ ፖለቲካዊ እና ስትራቴጂካዊ ጥቅሞችን ታሳቢ ያደረገ ነው። ብሪክስ በጠንካራና የተቀናጀ ዲፕሎማሲ የጋራ ኢኮኖሚያዊና ፖለቲካዊ አቅም በመፍጠር አብሮ ማደግን መዳረሻው አድርጓል። የኢትዮጵያ የብሪክስ ጥምረት አባልነትም የዚህ ጥቅም ተጋሪነትን መርህ ታሳቢ ያደረገ ነው። ኢትዮጵያ የብሪክስ አባል በመሆኗ በፋይናንስና የኢንቨስትመንት የትብብር መስኮች ሰፊ ዕድል እንዲኖራት የሚያስችል መሆኑንና ለጀመረቻቸው የልማት ስራዎች ስኬትም ተጨማሪ የፋይናንስ አቅም እንድታገኝ እንዲሁም ወደ ውጭ ለምትልካቸው ምርቶች ሰፊ የገበያ አማራጭ የሚፈጥር መሆኑን በወቅቱ በደቡብ አፍሪካ የኢትዮጵያ አምባሳደር የነበሩት አምባሳደር ሙክታር ከድር (ዶ/ር) መግለጻቸው ይህንኑ የሚያረጋግጥ ነው። ኢትዮጵያ በቱሪዝም፣ ዲጂታል ቴክኖሎጂ፣ በሰው ሰራሽ አስተውሎት፣ በኢንዱስትሪ፣ ማዕድንና ግብርና ዘርፎች የጀመረችውን መዋቅራዊ ሽግግር ለማቀላጠፍ ከብሪክስ ተጨማሪ ልምድና ተሞክሮ ታገኝበታለች፤ ልምዷን ለሌሎች ለማካፈልም ምቹ ዕድል ይፈጥርላታል። ኢትዮጵያ በአፍሪካ ብሎም በዓለም ፈጣን የኢኮኖሚ ዕድገት እያስመዘገቡ ከሚገኙ ሀገራት መካከል ተጠቃሽ ናት። ይህ ደግሞ የብሪክስ አባል ሀገራትን ሰፊ የገበያና የኢንቨስትመንት ዕድል በመጠቀም የጀመረችውን የብልጽግና ጉዞ ዕውን ለማድረግ ተጨማሪ አቅም ይፈጥርላታል። ከዚህም ባለፈ ብሔራዊ ጥቅሟና የሌሎችን የጋራ ተጠቃሚነት መሳ ለመሳ የምታካሂድ ለመሆኗ ትልቅ ማሳያ ነው። ለዚህ ነው ጠቅላይ ሚኒስትር ዐቢይ አሕመድ (ዶ/ር) 18ኛው የጥምረቱ ጉባኤ ስትራቴጂካዊ ጥቅሞቻችንን ያረጋገጥንበትና የአፍሪካ ድምፅ በዓለም አቀፍ መድረክ ከፍ ብሎ የተሰማበት ታሪካዊ ስኬት ነው ማለታቸው። ጥምረቱ የደቡብ-ደቡብ ትብብርን ለማሳካት ትልቅ አስተዋፅኦ ያበረክታል። የአረንጓዴ ዐሻራ መርሃ ግብር፣ የአረንጓዴ ኢነርጂ ልማት፣ የምግብ ሉዓላዊነትን በራስ አቅም ማረጋገጥ በትብብሩ ጉልህ ሚና ይኖራቸዋል። ኢትዮጵይ በቀጣናው፣ በአህጉራዊና ዓለም አቀፍ ደረጃ ያለባትን ፖለቲካዊና ዲፕሎማሲያዊ ሃላፊነት ለመወጣት የብሪክስ ማዕቀፍ እና ሌሎችም ዓለም አቀፍ መድረኮች ወሳኝ አጀንዳዎችን ለማራመድ የጎላ ሚና ይኖራቸዋል። ከብሪክስ ጥምረት በኋላ የተገኙ የዲፕሎማሲና ኢኮኖሚ ስኬቶች 17ኛው የብሪክስ ጉባኤ እ.አ.አ በ2025 በብራዚል ሪዮ ዲጄኔሮ በተካሄደበት ወቅት በዓለም አቀፍ ሰላምና ደህንነት፣ ባለብዙ ወገን ተቋማት ማሻሻያ፣ የአየር ንብረት ፋይናንስ፣ ዓለም አቀፍ ጤና እና አርቲፊሻል ኢንተለጀንስ አጀንዳዎች ላይ መምከሩ ይታወሳል። ጠቅላይ ሚኒስትር ዐቢይ አሕመድ (ዶ/ር) በጉባኤው ብሪክስ ከጠንካራ አዲስ ሀሳብ ተነስቶ ለዓለም አቀፍ ለውጥ የሚሰራ ብርቱ ኃይል ወደመሆን መሸጋገሩን፤ ዓለም አቀፍ የገንዘብ ተቋማት የጋራ ደኅንነትን እና ሁሉን አካታች ብልጽግናን ለማምጣት በሚያስችል ሁኔታ አፋጣኝ ማሻሻያ ማድረግ እንደሚገባቸው፤ በብሪክስ አዳዲስ አባላት መጨመራቸው የጋራ ድምፃችን የበለጠ እንዲጠናከር ያስችላል የጋራ አላማችን የበለጠ ይጠራል። አቅማችንም ይሰፋል ሲሉ መናገራቸው ይታወሳል። በተጨማሪም እንደ ብሪክስ አባልነቷ ኢትዮጵያ እነዚህ ጥረቶች እንዲሳኩ በተለይም በአለምአቀፍ ውሳኔ ሰጪ መድረኮች ለአዳዲስ ገበያዎች እና በማደግ ላይ ላሉ ሀገራት ሰፋ ያለ ውክልና በሚገኝበት ሁኔታ ላይ በንቃት አስተዋፅኦ እንደምታደርግ ማንሳታቸው ኢትዮጵያ በዓለም አቀፍ መድረኮች ለአፍሪካ ጥቅም መከበር ሚናዋን መቼም የማትዘነጋ መሆኑን አመላካች ነው። ስለ ዓለም ሰላም፣ የተቀላጠፈ የኢኮኖሚ ሽግግርን በተመለከተ፣ ኢትዮጵያ ለቴክኖሎጂና ፈጠራ እንዲሁም ለቀጣናዊ ውህደት ያላትን ፍላጎትና ቁርጠኝነት በጉልህ ማሳየታቸው፤ ኢትዮጵያ ለቀጣናዊ ልማት፣ ኢኮኖሚያዊ ዕድገት ብሎም መሰረተ ልማት ዝርጋታና መስፋፋት ያላትን ርዕይ በግልጽ ማንጸባረቃቸው ኢትዮጵያ ለጋራ ሰላም፣ ልማትና ብልፅዕና ያላትን ቁርጠኝነት በግልጽ ያሳየ ነው። የብሪክስ ጥምረት የዓለም የዲፕሎማሲና የጂኦፖለቲካ ተፅዕኖን ለማሳደግ ካለው ሰፊ ዕድል አንጻር ሲታይም በዓለም አቀፍ መድረኮችና ውሳኔዎች ላይ የሀገሪቱንና የአህጉሪቱን ድምፅ ለማጠናከር ከምዕራባውያን ተፅዕኖ የተላቀቀ ሁለገብ የዲፕሎማሲ ግንኙነትን በጽኑ መሰረት ለመገንባት ወሳኝ ነው። ኢትዮጵያ በጥምረቱ የምታደርገው ተሳትፎ ይህንኑ ታሳቢ ያደረገ ነው። ጠቅላይ ሚኒስትር ዐቢይ አሕመድ (ዶ/ር) የአፍሪካና የሌሎች አህጉራት ታዳጊ ሀገራት በዓለም አቀፍ ባለብዙ ወገን ተቋማት ፍትሃዊ ውክልና ማግኘት እንዳለባቸው በተገኙባቸው ዓለም አቀፍ መድረኮች ሁሉ ሲሞግቱ የሚደመጡትም ይህንኑ የሚያመላክት ነው። ዓለም አቀፍ ውሳኔ ሰጪና የባለብዘዙ ወገን የፋይናንስ ተቋማትንና የተባበሩት መንግስታት የጸጥታው ምክር ቤትን ጨምሮ ማሻሻያ እንደሚያስፈልጋቸው አጽንኦት መስጠታቸውም እንዲሁ። 18ኛው የብሪክስ ጉባኤ ኢትዮጵያ ለአፍሪካ ጥቅሞች መከበር ያለባትን ሀላፊነት በውል እንደምትገነዘብ እና ድምጿን ማስተጋባቷን አጠናክራ እንደምትቀጥል ያረጋገጠችበት መድረክ ነው። የብሪክስ ጥምረት ሀገራትን በአባልነት ለማቀፍ ያስቀመጣቸው ቅድመ ሁኔታዎች እና መስፈርቶች የሀገራቱን ዓለም አቀፍ ተፈላጊነትና ተፅዕኖ ፈጣሪነት ታሳቢ ያደረገ መሆኑ ደግሞ የኢትዮጵያ ዓለም አቀፍ ተደማጭነትና ተፅዕኖ ፈጣሪነት በግልጽ አሳይቷል። ኢትዮጵያ የብሪክስ አባልነትን በተቀላቀለችበት ወቅት ከ40 በላይ ሀገራት ጥምረቱን ለመቀላቀል ፍላጎት አሳይተው ነበር። የአባልነት ጥያቄ ካቀረቡት መካከል ኢትዮጵያን ጨምሮ ስድስት ሀገራት ብቻ መመረጣቸው ኢትዮጵያ በዓለም መድረክ ያላትን ግዙፍ የዲፕሎማሲ ተፅዕኖ ፈጣሪነት ማሳያ ነው። በጠቅላይ ሚኒስትር ዐቢይ አሕመድ (ዶ/ር) በሳልና አሳታፊ የዲፕሎማሲ ጥረት የተገኘው የብሪክስ ጥምረት አባልነት ባለፉት ጥቂት አስርት ዓመታት ከተመዘገቡ የዲፕሎማሲ ስኬቶች አንፃር ትልቁና አንጸባራቂ ድል ተብሎ ይወሰዳል። ጠቅላይ ሚኒስትር ዐቢይ አሕመድ (ዶ/ር) ጥምረቱ የኢትዮጵያን የአባልነት ጥያቄ ሙሉ በሙሉ ተቀብሎ ባጸደቀበት ወቅት እንደተናገሩት የኢትዮጵያ ጥምረቱን መቀላቀል የኢትዮጵያ የዲፕሎማሲያዊ ልዕልና ማሳያ ነው ሲሉ መግለጻቸውም ይህንኑ ያጠይቃል። የብሪክስ ጥምረት ኢፍትሃዊውን ዓለም አቀፍ መዋቅርና ሥርዓት ወደ ሚዛናዊ መንገድ በማምጣት በዓለም የፖለቲካ እና የዲፕሎማሲ ውሳኔ አሰጣጥ ላይ ሁሉም ሀገራት ፍትሃዊ ውክልና እንዲኖራቸው ያስችላል። ብሪክስ ይህ ስርዓት መሬት እንዲረግጥ የራሱ አስተዋጽኦ አለው። ለኢትዮጵያም እነዚህ የተዛነፉ ዓለም አቀፍ ባለብዙ ወገን ተቋማት አሰራር ፈር እንዲይዝ የራሷን ሚና ለመወጣትና ዓለም አቀፍ ተፅዕኖዋን ለማሳደግ ከፍተኛ ሚና ይጫወታል። የብሪክስ ጥምረት ውጤት የሆነው የአዲሱ የልማት ባንክ ያለምንም ፖለቲካዊ ቅድመ ሁኔታ ሀገራት መሰረተ ልማት ማስፋፋት የሚችሉበትን ብድር ያቀርባል። ኢትዮጵያም ከሀገር ውስጥ ባለፈ ቀጣናውንና አህጉሪቱን በኤሌክትሪክ ሀይል እና በሌሎች መሰረተ ልማቶች የማስተሳሰር ውጥኗን ዕውን እንድታደርግ ያስችላታል። ኢትዮጵያ ለጀመረችው መጠነ ሰፊ የመሰረተ ልማት ግንባታ አስተማማኝ የፋይናንስ ምንጭ ይሆናል። እንደ ቻይና፣ ሕንድ እና ሩሲያ ካሉ የዓለምን ኢኮኖሚ ከሚያንቀሳቅሱ ሀገራት ጋር ያላትን የወጭ ንግድና ኢንቨስትመንት ማስፋት፣ የውጭ ቀጥታ ኢንቨስትመንቷንና የውጭ ምንዛሬ ክምችቷን ማሳደግ፣ የወጪ ንግዷን በራሷ የመገበያያ ገንዘብ ለማከናወን ምቹ ዕድል ይፈጥርላታል። የጥምረቱ አባል ሀገራት በቴክኖሎጂ ውጤቶች ፈጠራ እና የማምረት ብቃትና የተወዳዳሪነት አቅም መጠቀም የሚያስችል የቴክኖሎጂና የእውቀት ሽግግር ለመፍጠርም በር ከፍቶላታል። ኢትዮጵያ በ18ኛው የብሪክስ ጉባኤ ጠቅላይ ሚኒስትር ዐቢይ አሕመድ (ዶ/ር) በ17ኛ የብሪክስ መሪዎች ጉባዔ የአፍሪካን ድምጽ ለዓለም ማሰማታቸው በ18ኛ የብሪክስ ጉባዔ አመርቂ የዲፕሎማሲ ስኬት እንዲመዘገብ አስችሏል። የአፍሪካን ጥቅም ማስጠበቅ፣ የአፍሪካ ህብረት የሰላም ማስከበር ሥራዎች የጎላ ድጋፍ እንዲገኙ፣ ኢትዮጵያ የዓለም ንግድ ድርጅት አባልነት ጥረት ለውጤት እንዲበቃ የብሪክስ ሀገራት መሪዎች በኒው ዴልሂ ቃላቸውን ሰጥተዋል። የብሪክስ ሀገራት በአዲሱ የልማት ባንክ የአባልነት ጥያቄያቸው በፍጥነት እንዲታይ፣ በታዳጊ ሀገራት መካከለ ዘላቂ የዕዳ አስተዳደር ስምምነቶች እንዲኖሩ በማድረግ ኢትዮጵያ ገንቢ ሚና ተጫውታለች። ጠቅላይ ሚኒስትር ዐቢይ አሕመድ (ዶ/ር) በ18ኛው የብሪክስ ጉባኤ የኢትዮጵያን ውጤታማ ስኬቶች በጉልህ አንስተዋል። ኢትዮጵያ ከውጭ ከሚገባ የስንዴ ጥገኝነት ተላቃ በምግብ ራሷን መቻሏን፣ በቅድመ መከላከል የጤና ፖሊሲ ውጤት ማስመዝገቧን፣ የህክምና ቁሳቁሶችና መድኃኒቶች በሀገር ውስጥ በማምረት አክሞ የማዳን አቅሟን ማሳደጓን፣ በዲጂታል ቴክኖሎጂ ደህንነቱ የተጠበቀ አጠቃቀምና ሽግግር መፍጠሯን፣ በጥናትና ምርምር እንዲሁም አዳጊ ፍላጎቶችን ሊያሳካ የሚችለውን የመደመር ሰው ሰራሽ አስተውሎት ዩኒቨርሲቲ ግንባታን በማንሳት ኢትዮጵያ የዓለም አቀፍ ትብብርና ልማት ያላትን ቀናኢነት አንስተዋል። የዲጂታል ቴክኖሎጂና ሰው ሰራሽ አስተወሎት ያመጣቸው ዕድሎችን መጠቀምና ስጋቶችን ለመፍታት ከብሪክስ አባል ሀገራት ጋር መሥራት አስፈላጊ መሆኑን አጽንኦት ሰጥተው መናገራቸውም ይታወሳል። አፍሪካ ጠንካራ ውክልና እንዲኖራት፣ የፋይናንስ እና የገበያ ተደራሽነት ይበልጥ እንዲሰፋ፤ ንግድ፣ ኢንቨስትመንትና ትስስርን ለማሳደግ ተግባራዊ እርምጃዎች እንዲወሰዱ ጠቅላይ ሚኒስትሩ ጥሪ ያቀረቡበት መድረክ ነበር። አዲሱ የልማት ባንክ በመላው አፍሪካ አድማሱን በማስፋት በአዲስ አበባ ቢሮውን እንዲከፍት የጠየቁበት፤ ለዚህ ደግሞ ኢትዮጵያ በሙሉ አቅም ዝግጁ መሆኗን ማረጋገጣቸው፣ በአጠቃላይ 18ኛ የብሪክስ የመሪዎች ጉባዔ ኢትዮጵያ ለአፍሪካ ጥቅሞች መከበር ፊት አውራሪነቷን በድጋሚ ያረጋገጠችበት ሆኖ ተጠናቋል። እንደ መውጫ ኢትዮጵያ ከፍተኛ የመልማት አቅም ያላት ሀገር ናት። ለያዘቻቸው የልማት ርዕዮች መሳካት አማራጭ የፋይናንስ ምንጮች ያስፈልጓታል። ለዚህ ደግሞ ብሄራዊ ጥቅሟን ያስከበረና ሚዛናዊነቱን የጠበቀ የዲፕሎማሲ ስኬት እያስመዘገበች በልዩ ጥንካሬ ወደፊት እየገሰገሰች ትገኛለች። በታሪካዊው 18ኛው የብሪክስ የመሪዎች ጉባዔ የተገኘውን ወርቃማ የዲፕሎማሲ ድል ወደ ዘላቂ ልማት ለመቀየር የተቀናጀ ጥረት ያስፈልጋል። ለዚህ ደግሞ የመንግሥት ተቋማት፣ የንግዱ ማህበረሰብ፣ ወጣቶች እና ታዋቂ ግለሰቦች የጋራ ሀገራዊ ራዕይ በመሰነቅ፣ ብሄራዊ አንድነትንና ጥንካሬን በማንገብ ለኢትዮጵያ ዕድገትና ብልጽግና በቁርጠኝነት መሰለፍ ይገባቸዋል።  

በዓለም አቀፍ ደረጃ ከ466 ሚሊየን በላይ የሚሆኑ ህጻናት በትምህርት ቤት የምገባ ፕሮግራም ተጠቃሚ መሆናቸውን መረጃዎች ያመለክታሉ። የትምህርት ቤት ምገባ ፕሮግራሞች የምግብ አማራጭ ብቻ ሳይሆኑ በትምህርት፣ በጤና እና በኢኮኖሚያዊ መረጋጋት ላይ ያላቸው አዎንታዊ ተጽእኖ እጅግ የገዘፈ ነው። መርሃ ግብሩ የተማሪዎችን የመማር ምጣኔ በመጨመር በተቃራኒው መጠነ ማቋረጥን በእጅጉ በመቀነስ ረገድ ጉልህ ፋይዳ አለው። ፕሮግራም በተለይም በአደጋ ተጋላጭና ድርቅ ባለባቸው አካባቢዎች ወደ ትምህርት ገበታ የሚመጡ ልጆችን ቁጥር እንዲጨምር ትልቅ አስተዋጽኦ አድርጓል። ተማሪዎች በቀን ውስጥ የሚያገኙት የተመጣጠነ ምግብ በክፍል ውስጥ ያላቸውን የንቃት፣ የማስታወስ እና የትምህርት መቀበል አቅም በማሳደግ የትምህርት ውጤታቸውን በከፍተኛ ደረጃ አሻሽሏል። የኢትዮጵያ የህብረተስብ ጤና ኢንስቲትዩት (EPHI) እና የዓለም የምግብ ድርጅት መረጃዎች እንደሚያሳዩት፣ ምገባው ህጻናት ከስድስቱ የምግብ ምድቦች የተውጣጡ አልሚ ምግቦችን እንዲያገኙ በማድረግ የተመጣጠነ ምግብ እጥረትንና የጤና አደጋን ይቀንሳል። የተመጣጠነ ምግብ አቅርቦቱ የህጻናትን አጠቃላይ አካላዊ እድገት፣ የበሽታ መከላከል አቅም (Immunity) እና የአዕምሮ ጤና በመጠበቅ ጤናማ ትውልድ እንዲፈጠር የሚያስችል ነው። የተባበሩት መንግስታት ድርጅት የዓለም የምግብ ፕሮግራም (WFP) እ.አ.አ በ2030 ሁሉም ህጻናት የተመጣጠነ ምግብ እንዲያገኙ አቅዶ እየሰራ ይገኛል።   በአፍሪካ ደረጃ ከ100 ሚሊዮን በላይ ህጻናት የተለያዩ የትምህርት ቤት ምገባ መርሃ ግብሮች ተጠቃሚ እንደሆኑ መረጃዎች ያሳያሉ። በኢትዮጵያም የትምህርት ቤቶች ምገባ መርሃ ግብር በሚሊዮኖች የሚቆጠሩ ህጻናትን ተጠቃሚ እያደረገ ይገኛል። ጠቅላይ ሚኒስትር ዐቢይ አሕመድ (ዶ/ር) በኢትዮጵያ የተማሪዎች ምገባ መርሃ ግብር ከ9 ነጥብ 5 ሚሊየን በላይ ተማሪዎች በቀን ሁለት ጊዜ አገልግሎቱን እያገኙ መሆኑን ገልጸው፤ ሀገሪቱ የምትመግበው ህጻናት ቁጥር ከአንዳንድ ሀገራት የህዝብ ቁጥር ጋር የሚስተካከል መሆኑን መግለጻቸው ይታወሳል። ጠቅላይ ሚኒስትሩ ታዳጊ ህፃናት ትምህርት ቤት መሄድ ሲገባቸው በዳቦ ምክንያት እንዳይስተጓጎሉ ማድረግ ሊተኮርበት የሚገባ ዋነኛ የሀገር ግንባታ ጉዳይ መሆኑን አጽንኦት ሰጥተዋል።   በአዲስ አበባ ከተማ አስተዳደር ደረጃ የምገባ ኤጀንሲ በማቋቋም ተማሪዎችን የአገልግሎቱ ተጠቃሚ የማድረግ ዘላቂ ተግባር በስኬት በመከናወን ላይ ይገኛል። የአዲስ አበባ ከተማ አስተዳደር ትምህርት ቢሮ መረጃዎች እንደሚያሳዩት፣ በመዲናዋ በሚገኙ በመንግሥት ትምህርት ቤቶች ከቅድመ-አንደኛ እስከ መካከለኛ ደረጃ ለሚማሩ አንድ ሚሊየን የሚጠጉ ተማሪዎች በቀን ሁለት ጊዜ (ቁርስ እና ምሳ) በነፃ ይመገባሉ። ከአዲስ አበባ ከተማ አስተዳደር ተሞክሮ በመነሳት ይህ ስራ በፈረንሳይ ፓሪስ እና በብራዚል ሪዮ ዲ ጄኔሮ በተከናወኑ ዓለም አቀፍ መድረኮች ላይ ተወዳድረው አሸናፊ በመሆን የሜላን ፓክት ሽልማት (Milan Pact Award) ተቀዳጅቷል። እ.አ.አ በ2022 በብራዚል ሪዮ ዲ ጄኔሮ በተካሄደው 8ኛው የዓለም አቀፍ የከተሞች የምግብ ፖሊሲ ስምምነት ጉባኤ ላይ የተበረከተው ይህ ታሪካዊ የሜላን ፓክት ሽልማት፣ አዲስ አበባ መርሃ ግብሩን በዘላቂነትና በተመጣጠነ ምግብ አቅርቦት ዘርፍ እጅግ ውጤታማ በሆነ መንገድ በመምራቷ የተሰጠ ነው። በተጨማሪም እ.አ.አ በ2021 በጣሊያን ሮም በተካሄደው የዓለም ሥነ ምግብ ኮንፈረንስ እና በሚላን የምገባ ፎረም ላይ መዲናዋ የምገባ ፎርም ምርጥ ተሞክሮ በሚል እውቅና አግኝታለች። እነዚህ ዓለም አቀፍ ሽልማቶች የተሰጡት መርሃ ግብሩ የተማሪዎችን የምገባ ችግር ከመቅረፍ ባለፈ፣ ከተማዋ የምግብ ስርዓትን በዘላቂነት በመምራትና ዝቅተኛ ገቢ ያላቸውን እናቶች በህብረት ስራ ማህበራት በማደራጀት ማህበራዊ ፍትህና የኢኮኖሚ ነፃነት እውን እንዲሆን በማድረጓ ነው። የአዲስ አበባ አርአያነት ያለው ተግባር አሁን ላይ ወደ ክልሎች እና ከተሞች በስፋት እየተዳረሰ ይገኛል፤ እንደ ኬንያ ያሉ የአፍሪካ ሀገራት የልዑካን ቡድኖችም መዲናዋን በመጎብኘት ልምድ እየቀሰሙ ይገኛሉ። የኢትዮጵያ የህብረተሰብ ጤና ኢንስቲትዩት (EPHI) የተማሪዎች የተመጣጠነ ምግብ አቅርቦትን የተመለከተ አዲስ የስነ ምግብ መጽሐፍ አዘጋጅቶ ተግባራዊ አድርጓል። ከንቲባ አዳነች አቤቤ መርሃ ግብሩ ተማሪዎች በኢኮኖሚ አቅም ማነስ ምክንያት ይሰማቸው የነበረውን የስነ-ልቦና ጫናና የድፍረት ማጣት ሙሉ በሙሉ በመቅረፍ ማህበራዊ ፍትህ ማረጋገጡን በአንድ ወቅት ገልጸዋል። ምግብ በማብሰልና በማቅረብ ሂደት ላይ ከ25 ሺህ በላይ ዝቅተኛ ገቢ ያላቸው እናቶች በህብረት ስራ ማህበራት ተደራጅተው ቋሚ የገቢ ምንጭ እንዲያገኙ በማድረግ የሴቶችን ማህበራዊና ኢኮኖሚያዊ አቅም ገንብቷል። የትምህርት ሚኒስቴር መረጃዎች እንደሚያሳዩት፣ በሀገር አቀፍ የተማሪዎች የምገባ መርሃ ግብሩ አብዛኛው በጀት በሀገር ውስጥ አቅም እና በመንግስት የሚሸፈን ነው። መርሃ ግብሩ ከተጀመረ ወዲህ በተለይም ድርቅና የአየር ንብረት ተጋላጭ በሆኑ አካባቢዎች የተማሪዎች ምዝገባ በ10 በመቶ እንዲጨምር እና የትምህርት ማቋረጥ ምጣኔ በእጅጉ እንዲቀንስ አድርጓል። ትምህርት ቤቶች የወጪ ጫናቸውን እንዲቀንሱ በትምህርት ቤቶች ግቢ ውስጥ የጓሮ አትክልት ልማት፣ የዶሮ እና የወተት ከብቶች እርባታ እንዲጀመር ተደርጓል። ኢትዮጵያ ይሄን መርሃ ግብር የምግብ አቅርቦትን ተደራሽ ማድረግ ብቻ ሳይሆን የሀገርን የረጅም ጊዜ የሰው ሀብት (Human Capital) መገንቢያ ስትራቴጂ አድርጋ እየሰራች ይገኛል። የምገባ ፕሮግራሙ ከትምህርት ተደራሽነትና ውጤታማነት ባሻገር ህጻናት በጤናማ አካልና አእምሮ እንዲያድጉ በማድረግ ለሀገር አቀፍ የጤና ጥበቃ ስራዎች ትልቅ አበርክቶ እያበረከተ ይገኛል። በምገባ ማዕከላት ዙሪያ የሚደረጉ የንፅህና አጠባበቅና የደህንነት ትምህርቶች ተማሪዎች በለጋ እድሜያቸው ጤናማ የኑሮ ዘይቤዎችን እንዲላመዱና የግል ንፅህናቸውን እንዲጠብቁ አቅም እየፈጠረ ይገኛል። በአጠቃላይ የምገባ ፕሮግራም በትምህርት ላይ እያሳረፈ ካለው በጎ አሻራ ባለፈ ምርታማ ትውልድ ለመፍጠር እና ለአንድ ሀገር እድገት እና ልማት ያለው አስተዋጽኦ ጉልህ ነው። በዚህ ረገድም ኢትዮጵያ በስኬት ጎዳና እና ለሌሎች አርአያ በሚሆን ተምሳሌታዊ ተግባር በግንባር ቀደምትነት የምትነሳ ሀገር ናት።

ኢትዮጵያ አስደማሚ የተፈጥሮ እና ሰው ሰራሽ የሚዳሰሱና የማይዳሰሱ የቱሪዝም ሀብቶች ባለቤት ናት ። የጎብኚዎችን ቀልብ የሚስቡ ደጋግመው ቢያዩዋቸው ፣ ቢታደሙባቸው የማይሰለቹ ተጠንተውም የማያልቁ ፀጋዎች ቢኖሯትም ለዘመናት በወጉ ሳትገልጣቸው የሚጠበቀውን ያክልም ሳይጎበኙ ሳይተዋወቁም ቆይተዋል። ይህን ባለማድረጓ ደግሞ ከዕልፍ የቱሪዝም ጸዋጋዎቿ ሳትቋደስ ዘመናትን ተሻግራለች። “በታሪክም ሆነ በተፈጥሮ ጸጋዎች ከኛ ጋር ሊወዳደሩ የማይችሉ ብዙ ሀገራት ከኢንዱስትሪው ብዙ አትርፈዋል። እኛ ግን እንቁዎቻችንን ደብቀን ታሪካችንን አቧራ አልብሰን ለዘመናት ቆይተናል።” የመደመር መንግሥት መጽሐፍ ገጽ 259 ዛሬ ግን ይህ ታሪክ እየተቀየረ ነው። ከመደመር መንግሥት አምስት ወሳኝ የኢኮኖሚ ምሰሶዎች አንዱ በሆነው ቱሪዝም ቅርሶችንና ወሳኝ ፀጋዎችን ከቁስ ወደ ቁርስ እየለወጠ፣ ኢትዮጵያን እየገለጠ እንዲመጣ እየተደረገ ነው። በጠቅላይ ሚኒስትር ዐቢይ አሕመድ (ዶ/ር) በአራት ኪሎ ቤተመንግስት “ሀ” ተብሎ የተጀመረው አዳዲስ የቱሪስት መዳረሻ ልማት በገበታ ፕሮጀክቶች አማካኝነት ወደ ሁሉም የሃገራችን ክፍሎች ተዳርሷል። በኢትዮጵያ ትኩረት ተነፍጓቸው የነበሩት የሀገራችን የቱሪዝም ሀብቶች በመደመር መንግሥት ቅድሚያ ተሰጥቷቸው ትንሳኤያቸው ተበስሯል። ለዘመናት አቧራ ለብሰው የኖሩ ዕንቁ የቱሪዝም ሀብቶች አቧሯቸው እየተራገፈ ነው። ከዳሎል እስከ ስሜን ተራሮች ማራኪ ተፈጥሯዊ መስህቦች ይበልጥ ለዓለም እየተዋወቁ ነው። አዳዲስ ተፈጥሯዊ ፀጋዎችም በቱሪዝም ልማት ኢኒሼቲቮች የመገለጥና የመታወቅ ዕድል አግኝተዋል። የመደመር እሳቤ የምናብ ከፍታና የመፈጸም ልክ አንዱ ጉልህ ማሳያ የቱሪዝሙ ዘርፍ ፕሮጀክቶች ናቸው። ከነዚህ ኢኒሼቲቮችም መካከል አንዱ ከቤተ መንግስት እደሳት ጀምሮ አዲስ አበባን እንደ ስሟ አዲስ ያደረጋት የገበታ ለሸገር ፕሮጀክት ነው። የገበታ ለሸገር ፕሮጀክት የቱሪዝም አብዮትን በመቀስቀስ የአንድነት ፓርክን፣ እንጦጦና ወዳጅነት ፓርክና ሌሎች ተያያዥ ፕሮጀክቶችን ዕውን አድርጓል። ዛሬ ላይ አዲስ አበባን አዲስ መልክ አጎናጽፎ፤ የነተቡ ሰፈሮች ወደ ውብ መልኮች ተቀይረው የሚሊዮኖች ጎብኚዎች መዳረሻ ሆነዋል። ከገበታ ለሸገር በመቀጠል የኢትዮጵያን አዳዲስ መልኮች የገለጠው ኢኒሸቲቭ ደግሞ የገበታ ለሀገር ፕሮጀክት ነው። ገበታ ለሀገር ከኦሮሚያ ክልል የደቡብ ምዕራብ ሸዋ ወንጪን፣ ከደቡብ ምዕራብ ኢትዮጵያ ህዝቦች ክልል ዳውሮና ኮንታን የሸፈነው ኮይሻን፣ከአማራ ክልል የጣናን ምዕራባዊ ዳርቻ የተንተራሰችውን ጎርጎራን ውብ አድርጓል። እነዚህ ፕሮጀክቶች የኢትዮጵያን አይነተ ብዙ ታሪክ፣ ተፈጥሮንና ባህል በመግለጥ ለኢትዮጵያ ተጨማሪ ሞገስና ድምቀት ሆነዋል። ከገበታ ለሀገር ቀጥሎ ገቢራዊ የተደረገው የገበታ ለትውልድ ፕሮጀክት አድማሱ በሶማሌ ክልል ሸበሌ ሪዞርትን፣ በደቡብ ምዕራብ ኢትዮጵያ የደንቢ ኢኮ ሎጅን፣ በአማራ ክልል የሐይቅ ሎጎ ሪዞርትን፣ በአፋር ክልል የኒዒን ሌ ፓልም ሎጅ እንዲሁም የአርባምንጭ ኮንፈረንስ ሪዞርትን እውን አድርጓል። ከገበታ ለሸገር እስከ ገበታ ለትውልድ ፕሮጀክቶች ባሻገር የመደመር መንግስት ታሪካዊ ቅርሶችን የመጠበቅ፣ እሴት ጨምሮ የመግለጥ አኩሪ ስራዎችንም አከናውኗል። ለዚህ ደግሞ ከብሔራዊ ቤተ መንግስት ጀምሮ ጥንታዊ አብያተ መንግስታት፣ ታሪካዊ፣ ሃይማኖታዊና ባህላዊ ቅርሶች ተጠግነዋል። የባለፉት ጥቂት ዓመታት የቱሪዝም ዘርፍ ለውጦች የኢትዮጵያን ገጽታ ያስተዋወቁ፤ በየአካባቢው ተስፋና ልማትን የፈነጠቁ፣ ዘመን ተሻጋሪ ስራዎች ናቸው። እነዚህ ፕሮጀክቶች በኢትዮጵያ የዕድገትና የብልጽግና ታሪክ ውስጥ በደማቁ የሚጻፉ አንቀጾች ሆነው ለትውልድ የተኖሩ ዓሻራዎች ናቸው።

''የብሪክስ ጉባዔ የጋራ ትብብርን ወደ የጋራ እሴት፣ ጽናት እና ዘላቂ ዕድገት የመለወጥ ሰፊ አቅምና ቁርጠኝነት አለው" በማለት ነው የገለጹት ጠቅላይ ሚኒስትር ዐቢይ አሕመድ (ዶ/ር) በ18ኛው የብሪክስ ጉባዔ ላይ ተገኝተው ባደረጉት ንግግር። 18ኛው የብሪክስ ጉባኤ የጥምረቱ አባል ሀገራት መሪዎች በተገኙበት “ጽናትን፣ ፈጠራን፣ ትብብርንና ዘላቂነትን መገንባት” በሚል መሪ ሀሳብ በህንድ ኒውዴልሂ እየተካሄደ ነው፡፡ ጠቅላይ ሚኒስትር ዐቢይ አሕመድ (ዶ/ር) እና የልዑክ ቡድናቸው በዚሁ ዓለም አቀፍ ተጽዕኖ በሚፈጥረው ጉባኤ ላይ እየተሳተፉ ይገኛሉ። ይህ የጠቅላይ ሚኒስትሩ እና የልዑክ ቡድናቸው የብሪክስ ጉባኤ ተሳትፎ ለኢትዮጵያ ብቻ ሳይሆን ለአፍሪካ ዘርፈ ብዙ ጠቀሜታ አለው። ብሪክስ ለአፍሪካ ቀጣና እና በተለይም ለኢትዮጵያ በርካታ የኢኮኖሚ፣ የፖለቲካ እና የጂኦ-ፖለቲካዊ ጥቅሞችን የሚያስገኝ አዲስ የዓለም ስርዓት እየተፈጠረበት የሚገኝ ጥምረት ነው። የብሪክስ ጥምረት ለኢትዮጵያ የውጭ ኢንቨስትመንት ፍሰት ዕድገት ከፍተኛ አስተዋጽኦ አለው። በዚህም እንደ ቻይና፣ ህንድ እና ሩሲያ ካሉ ታላላቅ ሀገራት ወደ ኢትዮጵያ የሚመጣውን የውጭ ቀጥታ ኢንቨስትመንት በተለይም በማኑፋክቸሪንግ፣ በግብርና እና በኢነርጂ ዘርፍ በማሳደግ በኩል አይነተኛ አማራጭ የኢንቨስትመንት መንገድ ነው። ጥምረቱ ለኢትዮጵያ ከሚያስገኘው ትሩፋት አንጻር ሲታይ የውጭ ምንዛሬ እጥረትን በመቅረፍ፤ ከብሪክስ አባል ሀገራት ጋር በሚደረጉ የንግድ ልውውጦች የሀገር ውስጥ ገንዘብን የመጠቀም ዕድልን ስለሚፈጥር፣ የውጭ ምንዛሬ ግኝት እጥረትን ከመቀነስ አኳያም እንዲሁ ከፍተኛ ጠቀሜታ አለው። ኢትዮጵያ በሀገር በቀል የኢኮኖሚ ማሻሻያ ዕቅዷ ኢኮኖሚዋን በመሠረታዊነት ለሚያሳድጉ መሠረተ ልማት ግንባታ እና ማስፋፊያ እንዲሁም ለቴክኖሎጂ ሽግግር ልዩ ትኩረት ሰጥታ እየሠራች ትገኛለች። ከዚህ አኳያ ብሪክስ የመንገድ፣ የባቡር፣ የኃይል ማመንጫዎችና ዲጂታል ቴክኖሎጂ እና መሰል የመሠረተ ልማት ፕሮጀክቶች የሚሆን የፋይናንስ ድጋፍ በማመቻቸት በኩል ኢትዮጵያ ለያዘችው ግብ ስኬት ከፍተኛ ጠቀሜታ የሚያስገኝ ጥምረት ነው። ባለፉት ዓመታት ኢትዮጵያ በዲፕሎማሲው ዘርፍ ላሳካቻቸው ውጤቶች የዓለም አቀፍ ግንኙነቷን የቃኘችበት አዲስ አካሄድ ተጠቃሽ ነው። ከእነዚህ ስኬቶች መካከል ደግሞ በብሪክስ ጥምረት ውስጥ አባል የሆነችበት መንገድ አንዱ ሲሆን፤ ይህ የብሪክስ ጥምረት ለኢትዮጵያ ዲፕሎማሲያዊ ተፅዕኖ ፈጣሪነት የራሱን ሚና በመጫወት ኢትዮጵያ በቀጣናው እና በአህጉሪቷ ያላትን መሪነትና ዲፕሎማሲያዊ የበላይነት በማጠናከር በዓለም አቀፍ መድረክ ያላትን ድምፅ እንድታጎላ እና ተጽዕኖ ፈጣሪነቷ እንዲያድግ እያስቻለ መሆኑም በተጨባጭ ታይቷል። የብሪክስ ጥምረት በአፍሪካ አለፍ ሲልም በጥምረቱ አባል ሀገራት መካከል ተመጣጣኝ ልማት እንዲኖር እና ሀገራቱ የኢኮኖሚ እና የፖለቲካ ትብብራቸውን እንዲያጠናክሩ አስቻይ ምህዳር እየፈጠረም ይገኛል። በተለይ አፍሪካ ያላትን የተፈጥሮ ሀብት በማልማት የኢኮኖሚ ዕድገቷን እንድታፋጥን አማራጭ የፋይናንስ ምንጭ መሆን የሚያስችለውን አደረጃጀት እና አሰራር እየዘረጋም ይገኛል። ይህ የጥምረቱ አዳዲስ አደረጃጀት እና አሰራር አዲሱ የልማት ባንክ እንዲወለድ አስችሏል። በዚህ ባንክ አማካኝነት የአፍሪካ ሀገራት ከዓለም አቀፍ የገንዘብ ድርጅት እና ከዓለም ባንክ ጥብቅ መስፈርቶች ነፃ በሆነ መንገድ ለተለያዩ የመሠረተ ልማት ፕሮጀክቶች አማራጭ የፋይናንስ ምንጭ ወይም ብድር እንዲያገኙ ምቹ ሁኔታ ይፈጥራል። በጥምረቱ አማካኝነት የተፈጠረው አዲሱ የልማት ባንክ የአፍሪካ ሀገራት በራሳቸው ሀገራዊ ገንዘብ እና ከአሜሪካ ዶላር ተጽእኖ ውጪ ከታላላቅ የብሪክስ ሀገራት ጋር የንግድ ልውውጥ እንዲያከናውኑ በር እየከፈተ ይገኛል። በተጨማሪም አፍሪካ በዓለም አቀፍ የፖለቲካ እና ኢኮኖሚ የውሳኔ መድረኮች ላይ ያላትን ተፅዕኖ ፈጣሪነት በማሳደግ፣ ፍትሐዊ የሆነ የዓለም አቀፍ ስርዓት እንዲፈጠር እያስቻለ መሆኑም የአደባባይ ምስጢር ከሆነ ሰነባብቷል። ይህ የብሪክስ ጥምረት መመስረት፣ መስፋፋትና መጠናከር በዓለም የፖለቲካ እና የኢኮኖሚ ስርዓት ላይ በርካታ የፖለቲካ እና የኢኮኖሚ መዋቅራዊ ለውጦችንና አንድምታዎችን እያስከተለ ይገኛል። የብሪክስ ጥምረት ተመስርቶ እየፈጠረ ያለው ዓለም አቀፍ የፖለቲካ ተጽዕኖ ከሁለተኛው የዓለም ጦርነት በኋላ የምዕራባውያን ሀገራት በዓለም ፖለቲካ ላይ የነበራቸውን የበላይነት በመገዳደር፣ ሥልጣንና ውሳኔ ሰጪነት ለተለያዩ የአህጉራት ኃይሎች እንዲከፋፈል፣ በዓለም አቀፍ ተቋማት ላይ የአሰራር እና የአደረጃጀት ማሻሻያ ጥያቄዎች ጎልተው እንዲሰሙ የማድረግ አቅም እየፈጠረ ነው። በተጨማሪም የብሪክስ ጥምረት አባል ሀገራት በንግድ ልውውጣቸው ወቅት በራሳቸው ሀገራዊ ገንዘቦች የመጠቀም ዝንባሌያቸው በመጨመሩ፣ የአሜሪካ ዶላር በዓለም ንግድና መጠባበቂያ ክምችት ላይ ያለውን ፍጹም የበላይነት በማዳከም፤ አዲሱ ልማት ባንክ የብሪክስ የድንገተኛ የገንዘብ ድጋፍ ማዕቀፍ የምዕራባውያኑን ጥብቅ የፖለቲካ መስፈርቶች ሳይከተሉ ለታዳጊ ሀገራት ፕሮጀክቶች ፋይናንስ እንዲያቀርቡ ብሎም የብሪክስ አባል ሀገራት የዓለምን ከፍተኛ የነዳጅ፣ የጋዝ፣ የብረታ ብረት እና የግብርና ምርቶች አቅርቦት የሚቆጣጠሩ በመሆናቸው፣ በዓለም አቀፍ የንግድ መስመሮች እና የዋጋ ውሳኔዎች ላይ ከፍተኛ ተፅዕኖ እንዲያሳድሩ የውሳኔ ሰጪነት አቅማቸውን እያሳደገ መጥቷል። ጠቅላይ ሚኒስትር ዐቢይ አሕመድ (ዶ/ር) በጉባኤው ላይ ባስተላለፉት መልዕክት፤ ኢትዮጵያም ሆነች አፍሪካ ያላቸውን የመልማት አቅም ለመጠቀም አማራጭ የልማት ፋይናንስ እጅግ አስፈላጊ መሆኑን አፅንኦት ሰጥተዋል። ለዚህ ደግሞ የብሪክስ ጥምረት ይዞት የመጣውን ዕድል በውል አንስተዋል። ለዚህም ነው በብሪክስ አባል ሀገራት ዘንድ ሀብት፣ ቴክኖሎጂ እና ሰፊ ገበያ አለን፤ አሁን ያለው መልካም ዕድል እነዚህን አቅሞች በማስተሳሰር የላቀ እሴት መፍጠር እና ይህ እሴት ደግሞ ሀብቱ በሚገኝበት ቦታ መመረት እንዲችል ማድረግ ነው ሲሉ ያመላከቱት። ኢትዮጵያ በማዕድን ልማት፣ በታዳሽ ኃይል እና እያደገ በሚገኘው የኢንዱስትሪ መሠረቷ ላይ እነዚህን አጋርነቶች ለመገንባት ዝግጁ መሆኗን ያረጋገጡት ጠቅላይ ሚኒስትሩ፤ በአሠራር ሥርዓቶቻችን ውስጥ ጽናትን መገንባት፣ የሰው ሰራሽ አስተውሎት የአህጉራችንን ፍላጎት እንዲያገለግል ማድረግ፣ አስተማማኝ የዕዳ እፎይታ ሒደትን ማሳደግ እንዲሁም የአየር ንብረት ጥበቃ ሥራዎችን ከኢኮኖሚ ሽግግር ጋር ማስተሳሰር ከጥምረቱ የሚጠበቅ መሆኑንም ነው ያነሱት። ጠቅላይ ሚኒስትር ዐቢይ (ዶ/ር) እንደገለጹት፤ የብሪክስ ጉባዔ የጋራ ትብብርን ወደ የጋራ እሴት፣ ጽናት እና ዘላቂ ዕድገት የመለወጥ ሰፊ አቅምና ቁርጠኝነት አለው። የጥምረቱ አቅም ከተናጠል አካሄድ ይልቅ ትብብርና ለጋራ እሴት መጎልበት ያለውን ዕድል ያመላክታል። ኢትዮጵያ ለኮቪድ እና ኤልኒኖን ጨምሮ ለዓለም የኢኮኖሚ እና የንግድ ስርዓት መመሰቃቀል እጅ ሳትሰጥ፤ ይልቁንም መሰል ቀጣናዊ፣ አህጉራዊ እና ዓለም አቀፋዊ ችግሮችን ወደ ዕድል በመቀየር፤ ለችግሮች የማይበገር ኢኮኖሚ ለመገንባት ባከናወነቻቸው ተግባራት ጽናትን ገንዘቧ እያደረገች ትገኛለች። ለዚህም ነው "አካታች ዓለም አቀፍ አስተዳደር እና ባለ ብዙ ወገን ትብብርን ማጠናከር” በሚል አጀንዳ ላይ ትኩረት ባደረገው የጉባኤው የመጀመሪያ ቀን ውሎ ንግግር ያደረጉት ጠቅላይ ሚኒስትር ዐቢይ (ዶ/ር) ችግሮች ከመፈጠራቸው አስቀድሞ ጽናትን ማጠናከር እና የአስተዳደር ስርዓት አካል የማድረግን መሠረታዊ ጠቀሜታ የገለጹት። ይህ ጽኑ ስርዓት ግንባታ ኢትዮጵያ በፈታኝ ሁኔታዎች ውስጥ እንድትበረታ ማስቻሉን ለማሳያነት አቅርበዋል። ኢትዮጵያ ከውጭ ከሚገባ የስንዴ ጥገኝነት ተላቃ በምግብ ራሷን መቻሏን አንስተዋል። በጤና ቅድመ መከላከል ፖሊሲ አካል ሆኖ የሕክምና ቁሳቁሶችና መድኃኒቶች ማምረትን፣ የዲጂታል ስርዓት ሽግግርንና ደኅንነቱ የተጠበቀ አጠቃቀም የማስፈን አበይት ተግባራት መከናወናቸውን ነው አጽንኦት የሰጡት። በአሁኑ ወቅት ኢትዮጵያ የጀመረችው የመደመር አርቲፊሻል ኢንተለጀንስ ዩኒቨርሲቲ አፍሪካ የነገውን የቴክኖሎጂ ዘመን በባለቤትነት እንድትመራ ትልቅ ሚና የሚጫወት መሆኑን የገለጹት። በእነዚህና መሰል የልማት ትብብሮች ከጥምረቱ አባል ሀገራት ጋር አብሮ ለመስራት ዝግጁ መሆኗንም ነው ያረጋገጡት። ጠቅላይ ሚኒስትር ዐቢይ (ዶ/ር) ኢትዮጵያ ጥምረቱ የተቋቋመበትን ዓላማ እና መርህ በተጨባጭ እውን እያደረገች እንደምትገኝ በመጠቆም፤ ኢትዮጵያ በሰው ሰራሽ አስተውሎት እና የዲጂታል ስርዓት ማሻሻያ ባከናወነቻቸው አመርቂ ትግበራዎች፣ በታዳሽ ኃይል መስፋፋት እና የኢንዱስትሪ መሠረት ልማቶቿ፣ በግብርና ስርዓት ማሻሻያ እየተመዘገቡ ያሉ የምግብ ሉዓላዊነት መረጋገጥ ብሎም ዓለም አቀፍ ደረጃውን የጠበቀ ግዙፍ የአየር መንገድ ግንባታ የአኅጉራዊና ዓለም አቀፋዊ ንግድ ትሥሥርን ለማስፋፋት በምታደርገው ጥረት በጥምረቱ ለሚነሱ ተያያዥ የውይይት አጀንዳዎች መሪ ተዋናይ መሆን እንደሚያስችላትም አንስተዋል። ይህ የጠቅላይ ሚኒስትሩ እና የልዑክ ቡድናቸው የብሪክስ ጉባኤ ተሳትፎ ለኢትዮጵያ ብቻ ሳይሆን ለአፍሪካ ዘርፈ ብዙ ጠቀሜታ ያለው መሆኑ እሙን ነው። ጠቅላይ ሚኒስትር ዐቢይ አሕመድ (ዶ/ር) በጉባኤው እያደረጉት ካለው ተሳትፎ ጎን ለጎን ቀጣናዊና ዓለም አቀፍ ትብብሮችን በሚያጠናክሩ አጀንዳዎች ላይ ከተለያዩ የብሪክስ ስብስብ አባል ሀገራት መሪዎች ጋር ውጤታማ የሁለትዮሽ ውይይቶችን አድርገዋል። በዚህም ከህንድ ጠቅላይ ሚኒስትር ናሬንድራ ሞዲ፣ ከሩሲያው ፕሬዚዳንት ቭላድሚር ፑቲን፣ ከቻይናው ፕሬዚዳንት ሺ ጂንፒንግ፣ ከቪየትናም ጠቅላይ ሚኒስትር ሌ ሚን ሁንግ፣ ከካዛኪስታን ፕሬዚዳንት ቃሲም ጆማርት ቶካዬቭ፣ ከአቡ ዳቢ አልጋ ወራሽ ከልዑል ሼህ ኻሊድ ቢን ሙሀመድ ቢን ዛይድ አል ናህያ፣ ከማሌዢያ ጠቅላይ ሚኒስትር አንዋር ኢብራሂም፣ ከኢራኑ ፕሬዚዳንት መስዑድ ፔዜሽኪያ እንዲሁም ከሌሎች መሪዎች ጋር የሁለትዮሽ ትብብርን በሚያጠናክሩ አጀንዳዎች ላይ ውጤታማ ውይይቶችን አካሂደዋል። የውይይቶቹ ማጠንጠኛም የጥምረቱን አባል ሀገራት የጋራ ተጠቃሚነትን በሚያበረታቱ እንደ ኢንቨስትመንት፣ ቀጣናዊ ጉዳዮች፣ የቴክኖሎጂ ሽግግር፣ የአቅም ግንባታና ክህሎት፣ ቱሪዝም፣ የማዕድን ልማት እና ወደ ኮፕ 32 በሚደረገው ጉዞ ላይ ሊኖሩ ስለሚችሉ ትብብሮች ላይ ያተኮሩ እንደነበሩ ተመላክቷል።