በብዙ መውጣትና መውረድ፣ ውስጥ አልፏል። በውድ መስዋዕትነት የኢትዮጵያ ሉዓላዊነት አስከብሯል። በሁለት አሳዛኝና አስገራሚ አጋጣሚዎች የመፍረስ አደጋ ተደቅኖበት ነበር፤ አሳዛኙ በጣሊያን ወረራ ወቅት ወድሞ ከጥቅም ውጭ መሆኑ ነው። ሁለተኛውና አስገራሚው ነገር ደግሞ በ1983 ዓ.ም መንበረ ስልጣኑን በሀይል የተቆጣጠረው ጸረ ኢትዮጵያው ሕወሓት የባህር ኃይሉን ሙሉ በሙሉ በመበታተን የአየር ኃይሉን በማዳከም ለሀገሩ ያለውን ጥላቻ የገለጠበት የታሪክ አጋጣሚ ነው። የመፍረስ አደጋዎችን በማለፍ የማንሰራራት ዘመንን ዋጅቷል። የቀጣናው የሰላም ዘብ፣ የደህንነት ዋስትና መሆኑን በጀግንነት እያሳየ ድፍን 90 ዓመታትን ተሻግሯል፤ አንጋፋው የኢትዮጵያ አየር ኃይል። የኢፌዴሪ አየር ኃይል ዋና አዛዥ ሌተናል ጄኔራል ይልማ መርዳሳ፤ “ኢሕአዴግ ሀገሪቱን ሲቆጣጠር በጠቅላላ ነው የተበተነው፤ ኢትዮጵያ መልሳ ማግኘት የማትችላቸው ንብረቶች ወደ ጎረቤት ሀገር ተበትነዋል።” ብለዋል። ሕገወጡ ሕወሓት ምድረ በዳ ያደረገው አየር ሀይል ዛሬ ፈተናዎችን በጽናት ተሻግሮ ድል የማብሰር ምልክት ሆኗል። የጠንካራና አይበገሬ ተቋማት፣ የሉዓላዊነት ዋስትና የድል አድራጊነት አውራ ሆኗል። “ሰማዩ የእኛ ነው” በሚል መሪ ሀሳቡ እንደ ስሙ እያደረ ነው። የቀጣናው አስተማማኝ የሰላም ዘብ ነው የኢትዮጵያ አየር ኃይል። የአውሮፕላን አብራሪዎችና ቴክኒሻኖችን ማሰልጠኛ ማዕከል፣ ለሌሎች የሚተርፍ የጥገና አቅም ገንብቷል፤ መለዋወጫዎችን ያመርታል። ዓለም የደረሰበትን ቴክኖሎጂ የታጠቁ የሰማይ ላይ ንጉሶችን አፍርቷል። ጠቅላይ ሚኒስትር ዐቢይ አሕመድ (ዶ/ር) እንደገለጹት፤ የኢትዮጵያ አየር ኃይል የሰው ልጅ የማድረግ አቅምና ብቃት የታየበት፣ የዳበረ ቴክኖሎጂ ጥቅም ላይ የዋለበት የቴክኖሎጂም፣ የምርምርም፣ የውጊያም፣ የሰላምም ተቋም ሆኗል። ነገን መዋጀት፣ ኢትዮጵያን ማፅናትና ማስቀጠል የግብሩ መገለጫ መሆኑን አንስተዋል። የኢትዮጵያ ልጆች የጀመሩት ለውጥ በትናንሽ ሙከራዎች ሸብረክ የማይል በጽኑ መሰረተ ላይ የመገንባቱ ማረጋገጫ ማህተም ጭምር። የኢትዮጵያ አየር ኃይል በቀዳማዊ ኃይለሥላሴ በ1928 ዓ.ም ሲቋቋም የመጀመሪየው አዛዣ ሻለቃ ሚሽካ ባቢቼፍ ነበሩ። የመጀመሪያዋ የጦር አውሮፕላን ደግሞ "ንስረ ተፈሪ" /Nessre Tafari/ የተሰኘችው ባለሁለት ክንፍ የፈረንሳይ ስሪት Potez 25-ናት። ኢትዮጵያ ከብዙ የዓለም ሀገራት በፊት ቴሌኮሙኒኬሽን፣ ባንክና መሰል ዘመናዊ የመንግስት አገልግሎት ስትጀምር የኢፌዴሪ አየር ኃይል አንዱ ነበር። የኢትዮጵያ አየር ኃይል የነፃነትና የአንድነት አርማ፣ የሉዓላዊነትና የደህንነት ማረጋገጫ ማህተም መሆኑን በሰማይ ላይ ነግሦ በተግባር አረጋግጧል፤ እያረጋገጠም ይገኛል። ዛሬ የኢትዮጵያ የአየር ክልል በአስተማማኝነት በመጠበቅ የሰማይ ንግሥናውን ተቆናጧል። የኢትዮጵያ የታላቅነት ማንፀሪያ ሆኖም ያገለግላል። ሌተናል ጄኔራል ይልማ መርዳሳ፤ “90 ዓመታትን በተሻገረው የኢፌዴሪ አየር ኃይል ታሪክ ውስጥ የሀገርን ሉዓላዊነትና የግዛት አንድነት በአስተማማኝ ሁኔታ መጠበቅ የሚያስችል አቅም ፈጥሯል፤ ለኢትዮጵያ ሉዓላዊነት የህይወት መስዋዕትነት በመክፈል በደምና በአጥንታቸው ሀገር ያጸኑ ጀግኖቻችንን አፍርቷል” ብለዋል። የለውጡ መንግሥት አየር ኃይሉን ከመፍረስ ታድጎ በውጊያ መሰረተ ልማት፣ በሰው ኃይል ግንባታና ትጥቅ በማሟላት ኢትዮጵያን የሚመጥን ተቋም ገንብቷል። የኢፌዴሪ አየር ኃይልን በሁሉም ረገድ በማዘመንና ሁለንተናዊ ብቃቱን በማሳደግ የመከላከያ ሠራዊቱ ጠንካራ ክንድ፣ የሉዓላዊነት ዘብ፣ የኢትዮጵያውያን ኩራት ማድረግ ተችሏል። አየር ኃይል ከ1969 – 1970 ዓ.ም በተካሄደው የእናት አገር ጥሪ /የኦጋዴን ጦርነት/ የእብሪተኛውን የዚያድ ባሬ ወራሪ ጦር ግብዓተ መሬት በማፋጠን የፈጸመው ጀብዱ በዓለም ወታደራዊ ኢላማና ስኬት ታሪክ እጅግ አስደናቂ ሆኖ በታሪክ ተመዝግቧል። እንደነ ብርጋዴር ጄኔራል ለገሰ ተፈራ ባሉ ወደር የለሽ የአየር ላይ ቀዛፊዎች በቁጥር የላቀና ዘመናዊ ተዋጊ ጄቶችን የታጠቀው የሶማሊያ አየር ኃይል ላይ የአየር የበላይነት በመውሰድ መቅሰፍት አውርደውበታል። ይህ ኢትዮጵያውያን በኩራት የሚናገሩለት ገናና ታሪክ ነው። የኢትዮጵያ አየር ኃይል እንደ ታሪኩ ማደር የሚያስችለው ቅኝት ውስጥ ገብቷል፤ በጠላቶች የተቃጣበትን የመፍረስ አደጋ በጣጥሶ ወጥቷል። የአባቶቹ ልጅ መሆኑን አሳይቷል። ዛሬ እጅግ በረቀቁና በቴክኖሎጂ በዳበሩ የጦር ጄቶችና ሰው አልባ አውሮፕላኖች አቅሙን ገንብቷል። በጠላት ላይ ኢላማውን የጠበቀ ከፍተኛ አደጋ መፍጠር የሚችሉ ምስጉን ባለሙያዎችን አፍርቷል። የኢትዮጵያ አየር ኃይል ምክትል አዛዥ ብርጋዴር ጄኔራል መሰረት ጌታቸው እንደሚሉት፤ የአየር ኃይል የጥገና፣ የማምረትና የቴክኖሎጂ አቅም በአፍሪካውያን ጭምር የተመሰከረለት አስደናቂ ለውጥ ውጤት አምጥቷል። በአፍሪካ ካሉ ትልልቅ የአቬዬሽን ኢንዱስትሪዎች አንዱ ሆኗል፤ በዕውቀት በቴክኖሎጂና ራስን በመቻል አቅም ልቆ ተገኝቷል። ጠቅላይ ሚኒስትሩ የኢትዮጵያ አየር ኃይል “የኢትዮጵያን አንድነትና ነጻነት ሊገዳደሩ የሚፈልጉ ሀይሎች አቅሟን አይተው እንዲገቱ፤ ከሞከሩም እንዲቀጡ የማድረግ ሀገራዊ አቅም ገንብቷል። ጥቁር አንበሳ ማሸነፍ እንጂ መሸነፍ አያውቅም፤ እናም አትሞክሩት፤ ሰላምን ማጽናት እንፈልጋለን ደፍሮ የሚሞክር ካለ ግን ግብዓተ መሬቱን እናፋጥናለን።” በማለት ኢትዮጵያ ግዙፍ ተቋም መገንባቷን አብስረዋል። በኢትዮጵያ ባለፉት ዓመታት በጸጥታና ደህንነት ተቋማት ላይ የተደረገው ስር ነቀል ሪፎርም የኢትዮጵያ አየር ኃይል የጥገና፣ የሰው አልባ አውሮፕላን ምርት፣ የመለዋወጫና ሌሎች የማምረቻ ፋብሪካዎች አቅም በፍጥነት አድጓል። የኢትዮጵያ አየር ኃይል የማድረግ አቅም ጨምሯል፤ የትብብር ስምምነት በመፈራረም በጋራ ለመስራት የሚፈልጉ ሀገሮችም ተበራክተዋል። የኢትዮጵያ አየር ኃይል ምክትል አዛዥ ብርጋዴር ጄኔራል መሰረት ጌታቸው፤ ኢትዮጵያን የሚመጥንና ብሔራዊ ጥቅሟን የሚያስከብር አየር ኃይል መገንባት እንደሚቻል የተረዳነው፣ ዐይናችንን የገለጥነው፣ ወደ ተግባር የገባነው ከሪፎርሙ በኋላ ነው ይላሉ። ሪፎርሙ ቴክኖሎጂ እንዲታጠቅና እንዲያለማ፣ ሀብቱን በአግባቡ እንዲጠቀም በማድረግ ብዙ ሀብት እንዲያፈራ የማይገለጹ አቅሞችን እንዲገነባ ማድረጉንም አንስተዋል። “የማምረት አቅማችን ከአምናው ዘንድሮ ጨምሯል” የሚሉት ምክትል አዛዡ፤ በቀን ከ20 ያልበለጡ ምርቶችን ከማምረት አሁን 350 ተሸጋግሯል፤ አንዳንድ መለዋወጫዎችን በቀን እስከ 3 ሺህ 500 የማምረት አቅም ገንብቷል፤ በኢትዮጵያ አየር ኃይል እርካታ የሚባል ነገር የለም፤ አይፈቀድምም። በድል ላይ ድል መጎናጸፍ፤ የኢትዮጵያን ሀያልነት ማወጅ የግቡ መዳረሻ ነው። ስሙ በተነሳ ቁጥር ከኢትዮጵያ ውድቀት ጋር የሚቆራኘው ሕገ ወጡ ሕወሓት፤ ኢትዮጵያ ባህር በር አልቦ፣ ዜጎቿን የመልክዓ ምድር እስረኛ አድርጓል። ብርጋዴር ጄኔራል መሰረት ጌታቸው፤ የኢትዮጵያ ብሔራዊ ጥቅም አድማስ ተሻጋሪ ነው፤ በታላቁ የኢትዮጵያ ሕዳሴ ግድብ ላይ አይወሰንም፤ ህንድ ውቅያኖስ ይደርሳል፤ መሰረታዊ፣ ታሪካዊና ህጋዊ የባህር በር ባለቤትነቷ ምላሽ ማግኘት አለበት። የኢትዮጵያን ብሔራዊ ጥቅም የሚመጠን አቅም ለመገንባት ሌት ተቀን መትጋት ደግሞ የአየር ኃይል አድማስ ተሻጋሪ የዘወትር ግብር ነው። ኢትዮጵያን የመታደግ፣ ኢትዮጵያን የማኩራት፣ የተሰጠውን ተልዕኮ በአጭር ጊዜ የመፈጸም ብቃት ተቋማዊ አርማው ሆኗል። የኢትዮጵያ አየር ኃይል በትውልድ ቅብብሎሽ ሀገር አስቀጥሏል። ኢትዮጵያ “ማህጸን ለምለም ናት” የሚለውን በገቢር እየኖረ ሰማዩን እያሰሰ አውሮፕላኑ እየተንደቀደቀ … የኢትዮጵያውያንን ልብ እያሞቀ … ቀጥሏል፤ ንሥርነቱን በተግባር እየገለጠ ወዳጆቹን እያስደመመ፣ ጠላቶቹን እያኮሰመነ ይቀጥላል።  

መስከረም 25/2019 (ኢዜአ)፡- ከፖለቲካ ስብራት ወደ ማንሰራራት ትልቅ ሀገር- ትልቅ ህዝብ- ታላቅ ርእይ ኢትዮጵያ ረጅም የፖለቲካ ታሪክ ያላት ሀገር ብትሆንም፣ ይህ ታሪክ በተለያዩ ወቅቶች በፖለቲካዊ መገለል፣ በአለመተማመን፣ በአለመግባባትና በግጭት የተቆራረጠ መንገድ አልፏል። የፖለቲካ ስርዓቱ ውስጥ የሀገሪቱ ህዝቦች፣ ክልሎችና የተለያዩ የፖለቲካ ኃይሎች በእኩልነት እንዲሳተፉ የሚያስችል ምህዳር ለመፍጠርም ብዙ ፈተናዎች አልፈዋል። ከብዙ ልፋት በኋላ በሀገሪቷ የመጣው ለውጥ የተሻለ የፖለቲካ ባህል ለመገንባት፣ ምህዳሩን በማስፋትና ልዩነቶችን በሃሳብ ክርክር ለመፍታት የሚያስችል አዲስ የፖለቲካ አውድ ፈጥሯል። ይህም ከቆየው የፖለቲካ ስብራት ወደ ማንሰራራት የሚወስድ መልካም እድሎችን ይዞ የመጣ ሆኗል። ባለፉት ዓመታት በሀገሪቱ የፖለቲካ ተሳትፎ በመስፋቱ የፖለቲካ አውዱ የተለያዩ ድምፆች የሚሰሙበት ማድረግ አስችሏል። የሀገር ጉዳይ የአንድ ፓርቲ፣ የአንድ ቡድን ወይም የአንድ ክልል ጉዳይ ብቻ ሳይሆን፣ የሁሉም ዜጎች የጋራ ኃላፊነት እንዲሆን የሚያስችል የፖለቲካ አውድ መፈጠር አስችሏል። በኢትዮጵያ ፖለቲካ የተወሰኑ ክልሎች “አጋር” እየተባሉ በሀገራቸው ጉዳይ እንዳይወስኑ እና እኩል ተሳታፊ እንዳይሆኑ ተገድበው ቆይተዋል። አሁን ላይ ግን በሀገራቸው ጉዳይ ላይ እኩል ተሳትፎና ድምጽ እንዲኖራቸው ተደርጓል። በዴሞክራሲ ሥርዓት ተቃዋሚ ፓርቲዎች የሚኖራቸው ሚና መንግሥትን መቃወም ብቻ አይደለም። አማራጭ ፖሊሲዎችን ማቅረብ፣ ለህዝብ የተሻለ አማራጭ ማቅረብና በሀገር ጉዳይ ላይ ገንቢ ሚና መጫወትም ይጠበቅባቸዋል። በዚህ ረገድ ባለፉት ጥቂት አመታት በሃሳብ የበላይነት የሚመራና ክርክር የሚደረግበት እድል መኖሩ በተግባር ታይቷል። የተቃዋሚ ፖለቲካ ፓርቲ አመራሮችም በመንግሥት አመራር ውስጥ ሀላፊነት ተሰጥቷቸው ተቋማትን የመምራትና ህዝብን የማገልገል ዕድል ማግኘት ችለዋል። በአንድ ሀገር ውስጥ የፓርቲዎች እንዲሁም የመንግስት መምጣትና መሄድ የማይቀርና የተለመደ ነው፤ የዴሞክራሲ ተቋማት ግን ከግለሰቦችና ከፓርቲዎች በላይ ቆመው ለህግ፣ ለፍትሕና ለህዝብ ጥቅም መስራት አለባቸው። በመሆኑም በኢትዮጵያ መሰረቶች በመጠናከራቸው የዴሞክራሲ ተቋማት ነፃና ገለልተኛ ሆነው እንዲሰሩ ማድረግ የታቸለበት እድል ተፈጥሯል። የኢትዮጵያ የፖለቲካ ምህዳር እድገትና የሀገረ መንግስት ግንባታ በአንድ ፓርቲ ወይም በአንድ መንግሥት ብቻ የሚጠናቀቅ አይደለም። የሁሉም ዜጎች፣ የፖለቲካ ፓርቲዎች፣ የክልሎች፣ የዴሞክራሲ ተቋማትና የሲቪክ ማህበራት የጋራ አጀንዳ ሆኖ መቀጠል ይኖርበታል።  

ታሪክ ደጋግሞ እንደሚያስተምረን፤ የኢትዮጵያ ልማት፣ እድገት እና በቀጣናው ላይ የሚኖራት አዎንታዊ ተፅዕኖ ማደግ በካይሮ የፖለቲካ ሊሂቃን ዘንድ እንደ ስጋት ሲቆጠር ኖሯል።የዓባይን ውሃ በብቸኝነት የመቆጣጠር የቆየ ስትራቴጂ የምትከተለው ግብፅ፤ ኢትዮጵያ የተፈጥሮ ሀብቷን እንዳትጠቀም እና በኢኮኖሚ ጠንካራ ሀገር ሆና እንዳትወጣ ለማድረግ ያልፈነቀለችው ድንጋይ፣ ያልተጠቀመችበት የጂኦፖለቲካዊ ሴራ አልነበረም። ይሁን እንጂ፣ ኢትዮጵያን በውስጥ ባንዳዎች እና ቅጥረኞች በፋይናንስና በመሳሪያ በመደገፍ ሀገሪቱን ለማዳከም የተሄደባቸው መንገዶች በሙሉ በኢትዮጵያውያን አይበገሬነት እና በሉዓላዊነት ላይ ባላቸው የማይናወጥ ጽናት ምክንያት መና ቀርተዋል። በቅርቡ ደግሞ የታላቁ የኢትዮጵያ ሕዳሴ ግድብ ግንባታ መጠናቀቅ እና ወደ ሥራ መግባት፣ ያንን የቆየውን የቅኝ ግዛት ውል እና "እኔ ብቻ ልጠቀም" የሚለውን አግላይ እሳቤ ላይመለስ አክሽፎታል። በቀጥታ ወታደራዊ ግጭት ወይም በዲፕሎማሲያዊ መንገድ ኢትዮጵያን ማንበርከክ ያልቻለችው ካይሮ፣ አሁን ላይ የስልት ለውጥ በማድረግ የውክልና ጦርነት ስትራቴጂን በሰፊው ማካሄድ ጀምራለች። ለዚህ እኩይ አላማዋ ደግሞ በአስመራ የሚገኘውን የሻዕቢያ አስተዳደር እንደ ፈጻሚ አካል መጠቀም ከጀመረች ሰነባብታለች። ሁለቱን ወገኖች ያገናኛቸው የጋራ ፍላጎት ልማት ወይም የህዝቦች እድገት ሳይሆን፤ "ኢትዮጵያን የማዳከም፣ የማተራመስ እና በቀጣናው አቅም አልባ የማድረግ" እኩይ ግብ ነው። የዚህ ያልተቀደሰ ጋብቻ ዋና ስትራቴጂ፡ኢትዮጵያ ሁልጊዜም በውስጥ ግጭትና አለመረጋጋት እንድትጠመድ ማድረግ። ሀገሪቱ ትኩረቷን እና ሀብቷን ወደ ጸጥታ ማስከበር እንድታዞር በማድረግ በታላላቅ የልማት ፕሮጀክቶች ላይ ያላትን አቅም ማዳከም።የሀገሪቱን የመከላከል አቅም ለመበታተን በተለያዩ አቅጣጫዎች የጸጥታ ስጋት መፍጠር ናቸው። በአሁኑ ወቅት ይህ ጣልቃ ገብነት በግልጽ በሚታይ ደረጃ ላይ ደርሷል። የኤርትራ ሠራዊት የውስጥ ታጣቂዎችን በመደገፍ፣ በቀጥታ በጦርነት በመሳተፍ የጸጥታ ስጋት በመፍጠር እና የፌደራል መንግሥቱን ለማዳከም እየሰራ ይገኛል። ይህም ግብፅ በስተጀርባ ሆና በገንዘብ፣ በመሳሪያ እና በዲፕሎማሲ የምታግዘው ግልጽ የውክልና ጦርነት አካል ነው። ነገር ግን ታለቋ ኢትዮጵያ የሉዓላዊነቷን ወሰን እና የብሔራዊ ደህንነቷን አደጋ ላይ የሚጥሉ ማናቸውንም አህጉራዊ እና ቀጣናዊ ሴራዎች በዝምታ እንደማትመለከት በተግባር እያሳየች ትገኛለች። የውስጥ ሰላሟን ከመጠበቅ ጎን ለጎን፣ የውጭ ኃይላትን ድብቅ ሴራ የሚያከሽፉ ጠንካራ የዲፕሎማሲ እና የመከላከል እርምጃዎችንም ወስዳለች። በብሔራዊ ደህንነት ላይ አደጋ በሚደቅኑ ተግባራት ላይ በቀጥታ የተሳተፉ 10 የኤርትራ ዲፕሎማቶች ከሀገር እንዲወጡ የተደረገ ሲሆን፤ በአስመራ የሚገኘው የኤርትራ ኤምባሲም ሙሉ በሙሉ እንዲዘጋ ተደርጓል።በተመሳሳይ ሁኔታ ከግብፅ ጋር ያለውን ዲፕሎማሲያዊ ግንኙነት እና ድብቅ ጣልቃ ገብነት በተመለከተ፣ ኢትዮጵያ አንድ የግብፅ ዲፕሎማት ሀገር ለቆ እንዲወጣ በማድረግ ጠንካራ መልዕክት አዘል ማስጠንቀቂያ ሰጥታለች። ከዲፕሎማሲያዊ ውሳኔዎቹ ባሻገር፣ የሀገር መከላከያ ሰራዊት የኢትዮጵያን ድንበር ጥሰው የገቡትን እና በካይሮ እና በአስመራ የተላኩትን የሻዕቢያ ወታደራዊ ኃይሎች እንዲሁም የውስጥ ቅጥረኞችን የማጽዳት ስራንም በተሳካ ሁኔታ እያከናወነች ትገኛለች። ኢትዮጵያን በታሪክ አጋጣሚ ሁሉ በቀጥታ ወታደራዊ ወራራ ለመፈጸም ተደጋጋሚ ሙከራ አድርጋ ያልተሳካላት ግብጽ አስመራን እየላከች የሄደችበት የሴራ ቀመር ዛሬ ላይ መንቀሳቀስ የሚችል አይደለም። ኢትዮጵያ እንደ ትናንቱ አይደለችም። የዛሬዋ ኢትዮጵያ እንደ ትናንቱ የውስጥ ድክመቷን ተደግፎ የፈለጉትን ሴራ የሚያስኬዱባት ደካማ ሀገር አይደለችም። የዛሬዋ ኢትዮጵያ የታላቁ ሕዳሴ ግድብ ግንባታ መጠናቀቅ የናይልን የውሃ ፖለቲካ የበላይነት በቋሚነት ቀይሮታል። ሀገሪቱ በቀጣናው የኢነርጂ እና የኢኮኖሚ ማዕከል ሆና ብቅ ብላለች።የሀገር መከላከያ ሠራዊት ዘመናዊ የውጊያና የቴክኖሎጂ አቅም በመታጠቅ የሀገርን ሉዓላዊነት በጽኑ መደብ ላይ ገንብቷል፤ ማንኛውንም የውስጥና የውጭ ስጋት በከፍተኛ አቅም የመመከት፤ ሲያስፈልግም የማጥቃት ሙሉ ብቃት አለው። በመሆኑም ካይሮ እና አስመራ በጋራ የሸረቡት የማተራመስና የውክልና ጦርነት ሴራ የዛሬዋን ኢትዮጵያ አዲስ እውነታና ቁርጠኝነት ባላገናዘበ ስሁት ስልት ላይ የተመሠረተ ነው። ቀደም ሲል በታሪክ አጋጣሚዎች በውስጥ ባንዳዎችና በውጭ ጠላቶች የተጎነጎኑ ጥምረቶች ሁሉ በኢትዮጵያውያን አይበገሬነት መና እንደቀሩት ሁሉ፣ አሁንም በካይሮ ታቅዶ በአስመራ የሚፈጸመው እኩይ ድራማ የታሰበበት ግብ ሳይደርስ በጽኑ የኢትዮጵያ ክንድ የሚከሽፍ እና የትም የማይደርስ መሆኑ የማይቀር ሀቅ ነው።

✍️ትልቅ ሀገር፣ ትልቅ ህዝብ ፤ታላቅ ርዕይ የአፍሪካ ቀንድ ለረጅም ጊዜ በፖለቲካዊ ውጥረት፣ በግጭትና በተቋማዊ ድክመት የተፈተነ አካባቢ ነው። በዚህ አካባቢ ምርጫን በሰላም ማካሄድ፣ የሕዝብን ድምፅ ማክበር፣ ውጤትን በተቋማዊ መንገድ ማስተናገድ እና ወደ ሕጋዊ መንግሥት ምሥረታ መሸጋገር እጅግ ትልቅ ትርጉም አለው። የ7ኛው ጠቅላላ ምርጫ በዚህ ረገድ ለአፍሪካ የሚያስተላልፈው መልዕክት ግልጽ ነው። ኢትዮጵያ ጠንካራና ገለልተኛ ተቋማት መፍጠሯን፣ ከ54 ሚሊዮን በላይ ዜጎች በነጻነት ይበጀናል ያሉትን መንግሥት መምረጣቸውን፣ በዚህም በኃይል ሥልጣን ለመያዝ የቋመጡ አካላትን ሴራ ማክሸፋቸውን አሳይቷል። ኢትዮጵያ ነገ የምትጀምረው አዲስ ምእራፍ ከሕዝብ ድምፅ ወደ ሥልጣን፣ ከሥልጣን ወደ አደራ፣ ከአደራ ወደ ተግባር የሚወስድ የዴሞክራሲ ሂደት ነው። ከእያንዳንዱ ድምፅ ጀርባ አንድ ዜጋ አለ፤ ከእያንዳንዱ ዜጋ ጀርባ አንድ ቤተሰብ፣ አንድ ሕልም፣ አንድ ተስፋ እና አንድ የነገ ርዕይ አለ። ሕዝቡ ብዙ ፈተናዎችን ተቋቁሞ ከ52 ሺህ በላይ በሚሆኑ የምርጫ ጣቢያዎች ተሰልፎ ድምፁን ሲሰጥ በካርዱ ላይ የሰፈረውን የመረጠውን ፓርቲ የምርጫ ምልክት ሳይሆን ስለ ሀገሩ የሚያስበውን ተስፋ ነው። ኢትዮጵያውያን መንግሥታቸውን መርጠዋል። አዲሱ መንግሥት ደግሞ የተጣለበትን አደራ ለመወጣት ነገ በይፋ ሥራውን ይጀምራል።ኢትዮጵያውያን ጓጉተው ሲጠብቁት የነበረው ቀን ደርሷል።ጨበክልሎችና በከተማ አስተዳደሮች የመንግሥት ምስረታ ተካሂዷል። በነገው ዕለት ደግሞ ነገ አዲሱ የፓርላማ የሥራ ዘመን መክፈቻና የመንግሥት ምስረታ ይካሄዳል። የዚህ መንግስት ምስረታ ጉዞ የጀመረው ግንቦት 24 በተካሄደው ዴሞክራሲያዊ ምርጫ ነው። ሕዝብ ድምፁን ሲሰጥ ሥልጣንን ብቻ አይሰጥም፤ አደራ ይሰጣል። መንግሥት ሲመሠረትም የሚያገኘው የሥልጣን ወንበር ብቻ ሳይሆን የሕዝብ እምነትን የሚሸከም ከባድ ኃላፊነት ነው። ኢትዮጵያ በነገው ዕለት በ7ኛው ጠቅላላ ምርጫ ሕዝብ በድምፁ ያሳለፈውን ውሳኔ ወደ መንግሥት ምሥረታ በማሸጋገር አዲስ ምዕራፍ ትጀምራለች። ይህም ኢትዮጵያ በሰላማዊ፣ በሕጋዊና በተቋማዊ መንገድ የመንግሥትን ሥልጣን የምታሸጋግር ሀገር መሆኗን የምታሳይበት ታሪካዊ ክስተት ነው። በኢትዮጵያ ረጅም ታሪክ የፖለቲካ ሥልጣን ሽግግርና የልዩነት አፈታት ሁልጊዜ በሰላማዊ የሀሳብ የበላይነትና በዴሞክራሲያዊ ፉክክር አልተመራም። የኃይል አማራጭ ብዙ ጊዜ ተሞክሯል። ይህም ብዙ ችግር ወልዷል። ሰላማዊ የሥልጣን ሽግግርን አባክኗል። ሀገርን በአብዮት ፍዳ ደፍቋታል።ዛሬ ግን በስድስተኛው ጠቅላላ ምርጫ መሠረት ላይ የዴሞክራሲ ድልድይ ፈጥሮ የተካሄደው የ7ኛው ጠቅላላ ምርጫ ይህን የቆየ የፖለቲካ መጥፎ ልማድ በመሻገር ሀገሪቱ ወደ ሰለጠነ የሀሳብ ፖለቲካና ወደ ዘመናዊ የመንግሥት ግንባታ እየተሻገረች መሆኗን አሳይቷል። የዚህ ለውጥ ትልቁ መሠረት የኢትዮጵያ ሕዝብ ነው። በ7ኛው ጠቅላላ ምርጫ ከ54 ሚሊዮን በላይ ዜጎች ተሳትፈዋል። ምርጫው እንዳይሳካ በጠላት የተሞከሩ ከባድ ፈተናዎችን አልፈው፣ ማስፈራሪያና እንግልትን በጽናት ተሻግረው ከማለዳ እስከ እኩለ ሌሊት ተሰልፈው፣ ቁርና ሐሩር ሳይበግራቸው ድምፃቸውን ሰጥተዋል። ይበጀናል ያሉትን መንግሥት መርጠዋል። ሕዝቡ ለመረጠው መንግሥት የሰጠው ባዶ ካርድ ሳይሆን የሚፈጸም አደራም ነው። ኢትዮጵያ ነገ የምትጀምረው አዲስ ምእራፍ ከሕዝብ ድምፅ ወደ ሥልጣን፣ ከሥልጣን ወደ አደራ፣ ከአደራ ወደ ተግባር የሚወስድ የዴሞክራሲ ሂደት ነው። ከእያንዳንዱ ድምፅ ጀርባ አንድ ዜጋ አለ፤ ከእያንዳንዱ ዜጋ ጀርባ አንድ ቤተሰብ፣ አንድ ሕልም፣ አንድ ተስፋ እና አንድ የነገ ርዕይ አለ።ሕዝቡ ብዙ ፈተናዎችን ተቋቁሞ ከ52 ሺህ በላይ በሚሆኑ የምርጫ ጣቢያዎች ተሰልፎ ድምፁን ሲሰጥ በካርዱ ላይ የሰፈረውን የመረጠውን ፓርቲ የምርጫ ምልክት ሳይሆን ስለ ሀገሩ የሚያስበውን ተስፋ ነው። “የትኛው ፖሊሲ የተሻለ ነው? የትኛውን አቅጣጫ እመርጣለሁ? ምን ዓይነት መንግሥት እፈልጋለሁ? ለልጆቼ ምን ዓይነት ኢትዮጵያን አስረክባለሁ?” የሚሉ ጥያቄዎችን አስቦ ነው ድምፅ የሰጠው። በዚህ ምርጫ 42 የፖለቲካ ፓርቲዎችና ከ10 ሺህ በላይ ዕጩዎች መሳተፋቸውም ይህንን የሕዝብ ምርጫ ለመወሰን ሰፊ የፖለቲካ አማራጭ ፈጥሯል። ስለዚህ የሰባተኛው ጠቅላላ ምርጫ አሸናፊነት በአንድ ፓርቲ ድል ብቻ የሚጠቃለል አይደለም። የዴሞክራሲ ሂደቱ ራሱ አሸናፊ ሆኗል። ኢትዮጵያ ረጅም ታሪክ ያላት ሀገር ናት። ግን በሀገሪቱ የፖለቲካ ሥልጣን ሽግግር ሁልጊዜ በሰላማዊ የሀሳብ ውድድር የተመራ አልነበረም። የኃይል አማራጭ ብዙ ጊዜ በዴሞክራሲ የሚመራ ፖለቲካ ውሳኔን ተክቷል። ሰባተኛው ምርጫ ግን አዲስ መንገድ አሳይቷል። ሥልጣን በኃይል ሳይሆን በሕዝብ ፈቃድና ምርጫ እንደሚመጣ አረጋግጧል። ይህም ለአፍሪካ ቀንድና ለመላው አፍሪካ ምሳሌ ሆኗል። የአፍሪካ ቀንድ ለረጅም ጊዜ በፖለቲካዊ ውጥረት፣ በግጭትና በተቋማዊ ድክመት የተፈተነ አካባቢ ነው። በዚህ አካባቢ ምርጫን በሰላም ማካሄድ፣ የሕዝብን ድምፅ ማክበር፣ ውጤትን በተቋማዊ መንገድ ማስተናገድ እና ወደ ሕጋዊ መንግሥት ምሥረታ መሸጋገር እጅግ ትልቅ ትርጉም አለው። የሰባተኛው ጠቅላላ ምርጫ በዚህ ረገድ ለአፍሪካ የሚያስተላልፈው መልዕክት ግልጽ ነው። ኢትዮጵያ ጠንካራና ገለልተኛ ብሔራዊ የምርጫ ቦርድ መፍጠሯን፣ ከ54 ሚሊዮን በላይ ዜጎች በነጻነት ይበጀናል ያሉትን መንግሥት መምረጣቸውን፣ በዚህም በኃይል ሥልጣን ለመያዝ የቋመጡ አካላትን ሴራ ማክሸፋቸውን አሳይቷል። ምርጫው እንዳይሳካ ብዙ የሴራ ድር በጠላትና በባንዳ ተተብትቦ ነበር። ጠቅላይ ሚኒስትር ዐቢይ አሕመድ (ዶ/ር) እንደተናገሩት፣ “ምርጫው ራሱ የጠላት ኢላማ ነበር” ምክንያቱም የምርጫው መሳካት የሚያሳፍራቸው ብዙ የስሁት መንገደኞች ነበሩ፤ ከግጭት የሚያተርፉ የደም ነጋዴዎችም ነበሩ፣ በኃይል ሥልጣን መናጠቅ የሚመኙ ከንቱ ሕልመኞችም ነበሩ።ነገር ግን ኢትዮጵያውያን ለፕሮፓጋንዳም ሆነ በጠላት ለተደቀነባቸው አፈሙዝ ሳይበገሩ ድምፅ ሰጥተዋል። ከማለዳ እስከ እኩለ ሌሊት በጽናት ተሰልፈው ሀገርን ለማሻገር ይበጀናል ያሉትን መርጠዋል። በዚህም ጠላት ሲያፍር ኢትዮጵያ ግን አሸንፋለች። ይህ በኢትዮጵያና በአፍሪካ የፖለቲካ ባህል ላይ ትልቅ ለውጥ ነው። የሰባተኛው ጠቅላላ ምርጫ ሌላኛው ድል የሚለካው በውጤቱ ብቻ አይደለም፤ በፖለቲካዊ ተሳትፎ ስፋትና በአካታች ዴሞክራሲ ግንባታ ላይ ባሳረፈው ጉልህ አሻራም ጭምር ነው።በዚህ ምርጫ ከ42 በላይ የፖለቲካ ፓርቲዎችና ከ10 ሺህ በላይ ዕጩዎች በምርጫ ሜዳው ተሳትፈዋል። ይህም የሀገሪቱ የፖለቲካ ምህዳር ለተለያዩ ሐሳቦች፣ አማራጮችና የፖለቲካ ተወዳዳሪዎች በር የከፈተ መሆኑን ያሳያል። የዚህ ምርጫ ልዩ ገጽታ ግን በተወዳዳሪዎቹ ቁጥር ብቻ አይወሰንም። ከዚያ በላይ፣ ገዥው ፓርቲ ለተፎካካሪዎች የበለጠ የመወዳደሪያ ዕድል እንዲፈጠር ያደረገው ውሳኔ በራሱ ግዙፍ የፖለቲካ ትርጉም አለው። ብልፅግና ፓርቲ 15 በመቶ የምክር ቤት ወንበሮችን በሚያስገኙ የምርጫ ክልሎች ላይ እንዳይወዳደር መወሰኑ፣ ለሌሎች ፓርቲዎች የተለየ የፉክክር ሜዳ የፈጠረ እርምጃ ነበር። በሌላ አገላለጽ፣ ገዥው ፓርቲ የራሱን የምርጫ ዕድል በመገደብ ሌሎች የፖለቲካ ድምፆች ወደ ምክር ቤቱ እንዲገቡ ተጨማሪ ቦታ ከፍቷል። ጠቅላይ ሚኒስትሩ ዐቢይ አሕመድ (ዶ/ር) ይህንን ውሳኔ ሲያብራሩ፣ ዓላማው ብዙ ድምፆች ወደ ፓርላማ እንዲገቡና አካታች ዴሞክራሲ እንዲጠናከር ማድረግ መሆኑን ገልጸዋል። በእርግጥም ይህ አንዱ የዴሞክራሲ ጥንካሬ መለኪያ ነው። ይህ ውሳኔ በምርጫ ወቅት የተወዳዳሪዎችን ቁጥር ለማሳደግ የተደረገ ብቻ ሳይሆን፣ የሀገሪቱን ፓርላማ የተለያዩ የሕዝብ ሐሳቦች የሚወከሉበት የበለጠ ውክልና ያለው መድረክ ለማድረግ የተወሰደ የፖለቲካ ቁርጠኝነት ነው። ምርጫው የአንድን ፓርቲ ድል ብቻ ሳይሆን በዴሞክራሲያዊ ሂደት ብዝሃ ድምፆች እንዲሰሙ ዕድል የፈጠረ ነው። በዚህ ረገድ የሰባተኛው ምርጫ ዋና ትርጉም ከምርጫ ውጤቱ በላይ ነው። 15 በመቶውን የምርጫ ሜዳ ለሌሎች ተወዳዳሪዎች መተው ደግሞ የአካታችነት መርህን በተግባር ለማሳየት የተወሰደ እርምጃ ሆኗል። ይህ በየትኛውም አፍሪካ ሀገር ያልተደረገ ነው። ብዙ ድምፆች ወደ ፓርላማ ሲገቡ፣ ዴሞክራሲም የበለጠ ይሰፋል። ይህም የሰባተኛው ምርጫ ከውጤቱ በላይ የሚታይበት ሌላኛው ድል ነው። አዲስ የሚመሠረተው መንግሥትም የበርካታ ፖለቲካ ፓርቲዎችና የግል ዕጩዎች የሚሳተፉበት አካታች መንግሥት ነው። የምርጫ ድል የመንግሥት አደራ ነው። የብልፅግና ፓርቲ የሕዝብ ድምፅ አግኝቶ መንግሥት የመመሥረት ሕጋዊ መብት አግኝቷል። ሰኔ 14 ቀን 2018 ዓ.ም. በኢትዮጵያ ብሔራዊ ምርጫ ቦርድ ይፋ በሆነው የ501 የምርጫ ክልሎች ውጤት መሠረትም 438 የፌዴራል ፓርላማ መቀመጫዎችን አሸንፏል። ግን የምርጫ ድል የምክር ቤት ወንበርን በማሸነፍ ቢጀምርም በዚህ አያበቃም። ለሕዝብ የገባውን ቃል በተግባር መፈጸም ቅቡልነትን ያጸናል። ይህም ነገ የሚመሠረተው መንግሥት የሚጠብቀው ትልቁ ኃላፊነት ነው። ሕዝቡ መርጧል። አሁን ደግሞ አዲሱ መንግሥት የተጣለበትን አደራ ለመወጣት ነገ በይፋ ሥራውን ይጀምራል። በመንግሥት ምሥረታው ከመራጩ ወደ ተመራጩ የሚሸጋገረው የአደራ ኪዳንም ይህ ነው። ቅቡልነት ያለው ሕጋዊ መንግሥት በምርጫ ይመሠረታል። የሚጸናው ግን በሥራ ውጤቱ ነው። የጠንካራ መንግሥትነት መለያውም በሕዝብ የተጣለበትን እምነትና አደራ የሚወጣ፣ ጠንካራ ተቋማትን የገነባ፣ ሕግን ያስከበረ፣ ተፎካካሪ ሐሳቦች የሚደመጡበት እና የሕዝብን ጥያቄ በተጨባጭ ውጤት የሚመልስ መንግሥት ሲሆን ነው። ስለዚህ ነገ የሚመሠረተው መንግሥት በምርጫ ማኒፌስቶው የገባውን ቃልና በሕዝብ የተጣለበትን አደራ ለመወጣት የአምሥት ዓመት ጉዞውን በተግባር የሚጀምር መሆን አለበት። ይህ እንደሚሆን ደግሞ ብዙ እርሾዎች አሉት። አሁን የተመረጠው መንግሥት ባለፉት አምሥት ዓመታት ለሕዝብ ቃል ገብቶ ባሳካቸው ድሎች ዳግም ዕድል የተሰጠው ነው። በምግብ ራስን የመቻል ግብን በማሳካት ተረጅነትን አስቀርቷል። ታላቁን የኢትዮጵያ ሕዳሴ ግድብ ለሕዝብ ቃል በገባው መሠረት አሳክቷል። ሕዝብን ያማረረውን የሌብነትና ብልሹ አሠራርን ለመቅረፍ ከሰው ንክኪ ነፃ የሆነ ዲጂታል የመሶብ አገልግሎትን በመላ ሀገሪቱ አስጀምሯል። የኑሮ ውድነትን ለማቃለልም ምርትና ምርታማነትን በብዙ እጥፍ በማሳደግ እና የተበላሸ የገበያ ሰንሰለትን በማስተካከል ወሳኝ ለውጥ አምጥቷል። ታላቋን ኢትዮጵያን የሚመጥኑ የክብርና የሉዓላዊነቷ ዘብ የሆኑ የጸጥታና ደህንነት ተቋማትን ገንብቷል። በታላቅ ርዕይ በመመራትም ኢትዮጵያን ከኩስመና የዲፕሎማሲ ምዕራፍ ወደ ተደማጭና ተፅዕኖ ፈጣሪ ከፍታ አሸጋግሯታል። በቱሪዝም ልማት የኢትዮጵያን መልክ አድምቋል።በከተሞች ኮሪደር ልማት ጉስቁልናን አስወግዶ ከተሞችን ውብ የመዝናኛ፣ የሥራና የምቹ መኖሪያ ማዕከል እያደረገ ይገኛል። ኢትዮጵያ በቴክኖሎጂ ከቀደሟት እኩል እንድትራመድ እያደረገ ይገኛል። ማዕድኗን ገልጣ ወደ ሀብት እንድትቀይር በውጤት የታጀበ መንገድን ጀምሯል። በኢንዱስትሪ ረገድም ኢትዮጵያ ከውጭ የምታስገባቸውን ስትራቴጂክ ምርቶች እንድትተካ ጠንካራ መሠረት ጥሏል። የሕዝብን የመኖሪያ ቤት ጥያቄ ለመመለስም ባለፉት ዓመታት 1 ነጥብ 2 ሚሊዮን ቤቶች ከመገንባት ባለፈ በሚቀጥሉት አምሥት ዓመታት 1 ነጥብ 5 ሚሊዮን ተጨማሪ ቤቶችን እንደሚገነባ በማብሰር ወደ ሥራ ገብቷል። ከሁሉም በላይ ኢትዮጵያን ለዘመናት ከኖረችበት ውስብስብ የመከራ አዙሪት ተላቃ ጠንካራ ብሔራዊ መግባባትና ሕብረ ብሔራዊ አንድነት እንዲኖራት ችግሮችን በምክክር ለመፍታት የገባውን ቃል በተግባር ፈጽሟል። አራት ዓመት ተኩል የፈጀ ሀገራዊ ምክክር በማካሄድ በወሳኝ ሀገራዊ አጀንዳዎች ላይ ኢትዮጵያውያን መግባባት ላይ እንዲደርሱ በማድረግ አዲስ ታሪክ ጽፏል። እንዲሁም ኢትዮጵያ ሰላምና ዕድገቷን የሚመኙትም ሆኑ የማይመኙትን የምታጓጓ ሀገር እንድትሆን አስችሏል። ይህ ጉዞ በአዲሱ መንግሥት ተጠናክሮ መቀጠል አለበት። ሰላምን ማጽናት፣ ሕግን ማስከበር፣ ለሌብነት የማይመች አሠራርን ማጠናከር፣ ጠንካራ ተቋማትን መገንባት፣ የኑሮ ውድነትን መግራት፣ የሕዝብን ኑሮ በተጨባጭ መለወጥ፣ የኢትዮጵያን ብሔራዊ መሻቶች ማሳካትና ኢኮኖሚያዊ፣ ማኅበራዊና ፖለቲካዊ አካታችነትን ያረጋገጠችና ሁለንተናዊ ብልፅግናዋን ያረጋገጠች የአፍሪካ ተምሳሌት ሀገርን መገንባት ለአዲሱ መንግሥት ከሕዝብ የተሰጡ አደራዎች ናቸው። መንግሥት አደራውን እንዲወጣ ደግሞ የሕዝብ፣ የግሉ ዘርፍ፣ የፖለቲካ ፓርቲዎች፣ የሲቪክ ማኅበራት፣ መገናኛ ብዙኃንና የእያንዳንዱ ተቋም የተደመረ ትጋት ወሳኝ ነው። ይህ ከተሳካ፣ ኢትዮጵያ በዴሞክራሲያዊ የምርጫ ባህል ብቻ ሳይሆን በሕጋዊ የሥልጣን መሠረት፣ የሕዝብን አደራ በመወጣት፣ በአካታች መንግሥትና በልማት ድል የአፍሪካ ሞዴል መሆኗን በተግባር ታረጋግጣለች።