Mudde 15/2018(ENA)- Tarsiimoon Dijitaalaa Itiyoophiyaa 2030 guddinaa fi ce’umsa damee industirii ijaarsaa teekinooloojiin ammayyeessuun gara boqonnaa haaraatti ceesisuuf humna guddaa akka uumu Inistitiyuutii Manajimantii Konistiraakshiniitti daarektarri olaanaa injiinar Taammiraat Muluu ibsan. Ministirri Muummee doktar Abiyyi Ahimad hojiirra oolmaa Dijitaalaa Itiyoophiyaa 2030 wayita ifatti eegalsiisan, dhaqqabummaa babal’isuun, carraa walqixxummaa lammiilee uumuun, lammiilee fi dhaabbilee gidduutti wal amantaa uumuun galmoota ijoo tarsiimoo kanaa ta’uu ibsaniiru. Daarektarri Olaanaa Inistitiyuutii Manajimantii Konistiraakshinii Itiyoophiyaa injiinar Taammiraat Muluu ENA waliin turtii taasisaniin akka jedhanitti, ammayyaa’aa fi bara waliin dorgomaa ta’ee itti fufuuf dijitaalaayizeeshiniin murteessaa ta’uu eeraniiru. Dijitaalli Itiyoophiyaa 2030 damee ijaarsaaf carraa gaarii fidee dhufuu eeruun,damichaaf ce’umsa olaanaaf akka gargaaru ibsaniiru.   Inistitiyuutichi teekinooloojii Biimiin kan eegale, hojiirra oolmaa dijitaalaa hojii to’annoo, mirkaneessa qulqullinaa fi adeemsa hojii biroo keessatti hojiirra oolmaan tarsiimoo teeknooloojii murteessaa waan ta’eef ciminaan itti fufuu akka qabu eeraniiru. Tarsiimoo Dijitaalaa Itiyoophiyaan eegalte irraa inistitiyuutichi fayyadamoo ta’uu eeruun daarektarichi, tarsiimoon dijitaalaa 2030 damee ijaarsaa addunyaatti dorgomaa taasisuuf gahee olaanaa qaba jedhaniiru. Yunvarsiitii Saayinsii fi Teeknooloojii Finfinneetti barsiisaa fi qorataa kan ta’an doktar Yohaannis Raggaasaa akka ibsanitti, dameen ijaarsaa mala aadaa irraa gara dijitaalaatti milkaa’inaan cesisuuf tarsiimoon dijitaalaa bara 2030 murteessaa ta’uu ibsaniiru.   Itiyoophiyaa keessatti fedhii fi dhiyeessiin mana jireenyaa kan wal hin ginne, haala itti fufiinsa qabuun furuuf teeknooloojiin ijaarsaa ‘3D’ murteessaa ta’uu ibsuun, qabeenya naannootti argamu fayyadamuun manneen salphaatti ijaaruuf akka gargaaru ibsaniiru. Galmoonni tarsiimoo dijitaala Itiyoophiyaa 2030 qabattes, damee indaastirii ijaarsaa waliin waan wal simuuf, damicha ammayyeessuuf gahee olaanaa qaba jedhaiiru.

Mudde15/2018(ENA)– Sirni Faayinaansii Dijiitaalawaan qabeenyi uummataa fi mootummaa murtaa’aa ta’e kaayyoo qabameefiif oolchuu fi hojmaata badaa ittisuurra darbee tajaajila si’ataa kennuuf shoorrisaa olaanaa ta’uu Biirooon Faayinaansii Magaala Finfinnee ibse. Hojmaatni dijiitaalaa yeroon kan barbaaduu fi sirni qabannaa ragaa ammayyaa’aan akka jiraatu dandeessisuurra darbee faayidaa hedduu qaba. Keessumaa damee faayinaansiin hojmaata badaa ittisuu fi qabeenya Mootummaa hojii karoorfameefirra oolchuuf murteessaa ta’uu ogeeyyiin damichaa fi hoggantoonni hojii ibsan. Sadarkaa Itti Aanaa Kantiibaatti Itti gaafatamaan biiroo faayinaansii magaalaa Finfinnee Abdulqaadir Reediwaan ENA‘f akka ibsanitti, galma ”Ismaarti siitii”Magaalaa Finfinnee dhugoomsuuf tajaajilli Dijiitaa dhaabbileen kennan Murteessaa ta’uu ibsaniiru.   Yeroo ammaa dhaabbileen Bulchiinsa Magaalichaa keesatti argaman hundi hojmaata saanii Dijiitaala taasisuurratti akka argaman eeruun, kunis tajaajila si’ataa kennuurra darbee, tajaajilamtoonni bakka jiran ta’anii tajaajila akka argatanii fi hojmaata badaa ittisuuf kan dandeessisudha jedhaniiru. Biirichi hanga ammaatti gabaasota herregaa, Baajata, Miindaa hojjettootaa fi bittaa elektirooniksii dijiitaala taasisuu kan ibsan hogganaan kun, gara fuulduraattis tajaajiloota biroo Dijiitaalaan eegalchiisuuf xiyyeeffannoon hojjetamaa jiraachuu mirkaneessaniiru.   Komishinii naamusaa fi farra malaammaltummaa magaalaa Finfiinneetti Daarekatarri Karooraa fi faayinaansii Tabaarak Yooseef gamasaaniin, dhaabbata keessatti hojmaanni dijiitaalaa hojiirra ooluun baajanni mootummaa murtaa’aan eeyyamame karoora qabameefiif qofa akka oolu gochuurratti faayidaa guddaa qaba. Haaluma wal fakkaatuun komishinii hooggansa hojii ibiddaa fi balaa magaalaa Finfinneetti daarektarri karoora faayinaansii fi bajataa sodaa balaa fi ibidaa Magaalaa Finfinnee Damee Aqaaqii Qaallittii Aaddee Shittaayee Gabree, Hojmaatni Faayinaansii dijiitaalaa hojii saffisiisuuf, dogoggora hojii sirreessuu fi yeroo qusachuuf faayidaa guddaa qaba jedhaniiru.   Mistirri Muummee Doktar Abiyyi Ahimad Mudde 11 bara 2018 Dijiitaala Itiyoophiyaa 2030 yeroo ifoomsanitti bu’uuraalee misomaa tajaajila hawaasaan hojiin bu’aa qabeessi hojjetamuu ibsuun isaanii ni yaadatama. Itiyoophiyaan sadarkaa murteessaa jedhamuun gurgurtaa maallaqa callaarraa gara sirna faayinaansii Dijiitaalatti ce’uushee ibsaniiru.

  Mudde 15/2018(ENA)- Hojiirra oolmaan tarsiimoo Dijitaalaa Itiyoophiyaa 2025 lammiilee Itiyoophiyaaf carraa itti fayyadama teeknooloojii mijeessuunii fi babal’isuun kaka’umsa guddaa uumeera jedhan ogeessonni damichaa Yunivarsiitii Madda Walaabuu. Ministirri Muummee doktar Abiyyi Ahimad tibbana sagantaa jalqabsiisa dijitaala Itiyoophiyaa 2030 irratti argamuun ibsa kennaniin, dijitaalli Itiyoophiyaa 2025 milkaa’inaan hojiirra ooluun goolabamuu isaa ibsuun isaanii kan yaadatamudha. Milkaa’inni Dijitaalaa Itiyoophiyaa karaa hedduun ibsamuu danda’uu fi kenniinsi tajaajilaa dhaabbileen kennan karaa dijitaalaa ta’uu cimuu, keessumaa dhaabbileen faayinaansii milkaa’ina damichaaf agarsiiftuu gaarii ta’uu hubachiisaniiru. Ogeessonni damichaa turtii ENA waliin taasisaniin hojiirra oolmaan tarsiimoo dijitaala Itiyoophiyaa 2025 lammiileen carraa teekinooloojiitti fayyadaman guddiseera jedhani. Yunivarsiitii Madda Walaabuutti barsiisaa Saayinsii kompiitaraa fi Diiniin Kolleejjii Kompiitiingii Miiliyoon Simee akka jedhanitti, tarsiimoon Dijitaalli Itiyoophiyaa bara 2025 guddina damichaaf bu’uura guddaa kaa’eera.   Hojiirra oolmaan Tarsiimoo Dijitaalaa Itiyoophiyaa bara 2025 uummanni tajaajiloota teekinooloojii adda addaa akka fayyadamu carraa baneera jedhani. Fakkeenyaaf hawaasni ‘Telebirr’, mala kaffaltii elektirooniksii, waraqaa eenyummaa dijitaalaa faayidaa fi teeknooloojiiwwan biroo fayyadamuun akka jalqabu carraa uumeera jechuun ibsaniiru. Keessattuu hojiiwwan tajaajila mootummaa bakka tokkotti kennuuf jalqabaman kan akka ‘Masob’ bu’aa gaarii damichaa agarsiisaniiru waan ta’eef cimee itti fufuu akka qabu hubachiisaniiru.   Sagantaa hojiirra oolmaa Dijiitaalaa Itiyoophiyaa bara 2025 keessatti dandeettii fi gahumsa dijitaalaa lammiilee guddisuu, galii mootummaa dabaluu, sirna odeeffannoo qindaa’aa diriirsuu irratti bu’aa jajjabeessaan galmaa’uu isaa Diiniin Kolleejjii Manaajimantii fi Ikkonoomiksii Yuunivarsiitichaa Husaa Aloon ibsaniiru. Keessattuu, bu’uuraalee misoomaa dijitaalaa tajaajila mootummaaf milkeessuun milkaa’inaan hojiirra oolchuu eeruun, Itiyoophiyaan daldala maallaqaa callaa irraa gara sirna faayinaansii dijitaalaatti ce’uu ishee akka fakkeenya milkaa’ina damichaatti ibsaniiru. Dijiitaalli Itiyoophiyaa 2030 hojiiwwan waggoota shanan darban keessatti hojjetaman bu’uura godhachuun kan qophaa’e yoo ta’u, damee kanarratti bu’aa fooyya’aa argachuuf daandii kan saaqu ta’uu ibsaniiru. Yunivarsiitichatti barsiisaa Sirna Odeeffannoo fi Kolleejjii Kompiyuutingitti daayreektarri qorannoo fi tajaajila hawaasaa kan ta’an Dibaabaa Adabaa, tarsiimoon Dijitaalaa Itiyoophiyaa 2025 kenniinsa tajaajilaa irratti bu’aa qabatamaa argamsiisuu isaa hubachiisaniiru.   Fakkeenyaaf, walitti hidhamiinsi dijitaalaa giddugala irraa gara aanaaleetti milkaa’ina kanaaf daran babal’achuu akka qabu ibsaniiru.

Mudde15/2018(ENA)– Dijiitaalli Itiyoophiyaa 2030 biyya gara boqonnaa teekinooloojii olaanaatti ceessisuun cehumsa diinagdee fiduuf qooda olaanaa akka taphatu hoggantoonni hojii mootummaa Olaanaoon ibsan. Ministirri Muummee Dr.Abiyyi Ahimad Dijiitaala Itiyoophiyaa 2030 ifatti eegalchiisuun isaanii ni yaadatama. Dijiitaala Itiyoophiyaa 2030 waggoottan shanan darban hojiiwwan hojjetaman bu’uura godhachuun qophaa’uusaa wayita sana kaasaniiru. Dijiitaalli Itiyoophiyaa 2030 galmoota ijoo sadii akka qabu kan dubbatan Ministirri Muummee doktar Abiyyi Ahimad, isaan kunis dhaqqabamummaa babal’isuu, Carraa walqixaa mijeessuu, dhaabbataa fi uummata gidduutti wal-amantaa uumuu ta’uu ibsaniiru. Daarektarri Olaanaan Bulchiinsa Nageenya Odeeffannoo fi Neetwoorkii Tigisti Hamiid akka ibsanitti, tarsiimoo Dijiitaalaa Itiyoophiyaa 2025 Keessaatti nageenya Saayibarii irratti bu’uurri hojii cimaa hojjechiisuu dandeessisu hedduun kaa’ameera. Kanaanis bu’uuraalee misoomaa Kilaawudii mataa keenyaa ijaarraachuu danda’uun tajaajila Dijiitaalaa Itiyoophiyaa amantaa qabu uumuun danda’amuu eeraniiru. Dhaabbilee Nageenyaaf mana qorannoo Fooransiikii Dijiitaalaa ijaaruun gara hojiitti akka galu taassifamuu eeruun, Dijiitaalli Itiyoophiyaa 2030 tarsiimoo nageenyaa Saayibarii irratti xiyyeeffannoon hojjetamaa jira jedhaniiru. Kanaanis bu’uuraalee misoomaa cimaa ijaaruu, Bu’uuraalee misoomaa hawaasaa ammayyeessuu, dhaabbata yeroo balaa deebii kennuu hundeessuu fi hojiilee nageeenyaa dhaabbilee dhunfaa dabalatee hojiin Saayibarii akka cimuuf kan hojjetamu ta’uu akka qabu dubbataniiru. Dijiitaala Itiyoophiyaa 2030 guddisuuf hubannoo namtolchee babal’isuuf kan dandeessisan hojiiwwan hedduun hojjetamuu kan ibsani immoo Daarektara Olaanaa Inistitiyuutii Hubannoo Namtolchee Itiyoophiyaa doktar Warquu Gaachaanaa dha. Kilaawudii mataa keenyaa fayyadamuun dabalatatti, sirna bulchiinsa odeeffannoo bu’aa qabeessa akka qabaannu akka taassifamu ibsaniiiru. Kanaafis haala qindaa’een odeeffannoon murtee kennuuf akka ooluuf kan hojjetamu yoo ta’u, kanaan wal-qabatee Abbaan Taayitaa Odeeffannoo walabaa Biyyaalessaa gara hojiitti akka galu himaniiru. Tajaajila Dijiitaalaa walsimsiisuu fi hojii itti fufinsa qabu hojjechuu irratti xiyyeeffannoo argachuu ibsniiru. Hojii Raawwachiiftuu Olaanaa Itiyoo-Teeleekoom Fireehiwoot Taammiruu gama isaaniin akka jedhanitti, Dijiitaalli Itiyoophiyaa 2025 damee teeleekoomiin bu’aawwan hedduun galmaa’eera. Fakkeenyaaf lakkoofsi maamilaa mobaayilii miiliyoona 97 geessisuu danda’amuu , kana keessaas miiliyoonni 57 fayyadamtoota Interneetaa ta’uusaanii dubbataniiru. Neetiworkiin dhaloota 4ffaa(4G) magaalota kuma 1 fi 30 qaqqabuu eeruun ,Tarsiimoo dijiitaala Itiyoophiyaa 2030 lakkoofsa fayyadamtoota mobaayilii Miiliyoona 128 geessisuuf karoorfamuu dubbataniiru. Akkasumas waliin gahinsa neetwoorkii 5G magaalota 100f ni qaqqabsiisna jedhaniiru. Dijiitaala Itiyoophiyaa 2030 kaffaltii dijiitaalaa haala Oomisha biyya keessaan kan amma jirurra dachaa 7n olitti akka guddatuuf xiyyeeffannoo addaan hojjetama jedhaniiru. Hojiiwwan dijiitaala Itiyoophiyaan hojjetaman kaayyoo Mootummaan Ida’amuu qabatee galmaan ga’uuf hojjetu hojmaata badaa hambisuuf galma isaa gahuuf, tarsiimoo gurguddoo dhugoomsuu waliin kan wal qabu ta’uu Ministirri Muummee doktar Abiyyi Ahimad ibsuun isaanii ni yaadatama.