Fulbaana 12/2019 (ENA): Ayyaanni bara haaraa Hadiyyaa ‘Yaahodee’ Hadiyyi naferan taateewwan Aadaa adda addaatiin kabajamaa jira. Ayyaanichi Pirezidaantii Nannoo gidduugaleessa Itoophiyaa Dr.Endashaaw Xaasoo fi hoggantoonni hojii olaanoon Federaalaa, Naannoo fi Godinaa bakka argamanitti dammaqinaan kabajamaa jira. Ayyaanni ‘Yaahodee’ Hadiyyaa biratti ce’umsa dukkana irraa gara ifattii fi gara boqonnaa haaraatti bara haaraa jalqabaarratti Ayyaana kabajamudha.   Ayyaanichi namoota kan walitti fiduu waan ta’eef yaadama jibbinsaa fi walitti bu'insaa kan hambisu, tokkummaa fi wal gargaarsa kan cimsu waan ta'eef haala addaatiin kabajama. Ayyaanni kun Magaalaa Hadiyyaa Hoosa'inaatti ‘Nafera’ bakka taateewwan hawaasummaaf qophaa'etti kabajama.   Hadiyaatti ayyaanni kun duudhaalee isaa irratti hundaa'uun namoota walitti fiduun dhimmoota hawaasummaa mariidhaan furuu, tokkummaa cimsuu fi misooma naannoo isaanii ariifachiisuuf gumaacha guddaa qaba.

Fulbaana 12 /2019(ENA) : Ayyaanni bara haaraa Kafaa ‘Mashqaaroo’ magaalaa Boongaa Boonjii Shambattootti bifa ho’aa ta’een kabajamaa jira. Ayyaanni bara haaraa saba Kafaa ‘Mashqaroon’ ayyaana nagaa,tokkummaa fi aadaa hojii cimanii hojjechuuti. Ayyaannichi ayyaana bara haaraatti isaan ceesise Uumaa kadhachuu fi galateeffachuu yoo ta’u, hojiiwwan bara darbe hojjetaman kan itti gamaaggamamaniifi karoorri hojii gara fuula duraa kan itti karoorfamu dha. Kunis faayidaalee siyaasaa,hawaas diinagdee fi eegumsa naannoo kan qabudha. Miidiyaa Dijitaalaa ENA hordofaa- https://www.ena.et/web/links

Fulbaana 12/2019(ENA)- Mootummaan Naannoo Oromiyaa Aadaa fi duudhaa ummata dhalootaf dabarsuuf hojiiwwan bal'aa raawwachaa jiraachuu Hoggantoontuun Biiroo Aadaa fi Tuurizimii Oromiyaa Aadde Jamiilaa Sinbirruu ibsan. Ayyaanni Irreechaa bara 2019 mata-duree “Irreechaa waliigaltee Biyyaalessaaf ”jedhuun kabajamaa. Haala kabaja ayyaana irreechaa fi guyyaa kabaja ayyaanicha ilaalchisuun Waltajjiin marii magaalaa Bishooftuutti gaggeeffamaa jira. Waltajjii kanarratti abbootiin Gadaa, haadhooliin Siinqee, Hoggantoontu Biiroo Aadaa fi Tuurizimii Oromiyaa Aadde Jamiilaa Sinbirruu dabalatee qooda fudhatoonni gara garaa hirmaachaa jiru. Yeroo kanatti Aadde Jamiilaa Sinbirruu akka ibsnanitti, sirna Gadaa Oromoo akka as gahuuf ga'een abbootii keenyaa olaanaa ture. Irreecha bara kanaa adda kan taasisu mootummaa naannoo Oromiyaa yeroo misooma aadaa fi duudhaa ummata dagagsuuf xiyyeeffannoo kennee hojjechaa jiruutti kan kabajamu ta'uu himaniriru. Irreechi sadarkaa olaanaan akka kabajamu mootummaan naannoo Oromiyaa xiyyeeffannoo guddaa kennee hojjechaa jiraachuu himan. Ardaalee Irreechaa misoomsuu fi ayyaanni haala gaariin akka kabajamuu hojiiwwan murteessaa raawwatamu dubbataniiru. Ayyaanni fi aadaan ummata akka kunuunfamuu fi misoomu taasifamaa jiraachuu ibsaniiru. Sona Irreechaa beeksisuuf Hojiin hedduu hojjatama jira jedhan. Haaluma kanaan Fiigicha guddicha Irreechaa,Konsartiiwwan sirba gara garaa, dorgommii miis Tuurizimii fi hojiin beeksisaa adda addaa hojjetamaa jiraachuu ibsaniiru.

Fulbaana 11/2019 (ENA)- Sagantaan soorata barattootaa Finfinneetti hojiirra oolaa jiru hirmaannaa fi fooyya’insaa qabxii barattootaarratti gumaacha guddaa taasisaa jiraachuu biiroon barnootaa magaalaa Finfinnee ibse. Bulchiinsi magaalaa Finfinnee pirojektoota namarratti xiyyeeffataniin fayyadama jiraattotaa mirkaneessaa kan jiran pirojrktoota hedduu hojjechuun xumureera. Pirojektoota namarratti xiyyeeffatan keessaa bara 2011 irraa eegalee barattoonni barumsa idileen duraa irraa amma sadarkaa tokkoffaatti jiran guyyaatti ciree fi laaqana akka sooratan taasiseera. Sagantaa soorata barattootaa kun qabxii barattootaarratti jijjiirama guddaa fiduudhaan maatii barattootaas haara galfachiiseera. Itti aanaa itti gaafatamaan biiroo barnootaa magaalaa Finfinnee Saamsoon Mallasaa ENA’f akka ibsanitti. Sagantaa soorata barattootaa kun barattoonni barumsarraa akka hin hafne, qalbiidhaan akka baratan gochuudhaan bu’a qabeessummaasaaniirratti fooyya’insi akka dhufu gochaa jira. Sagantaan kun naamusa barattootaa fi hirmaannaa barattootaarrattis qooda guddaa bahachaa akka jiru obbo Saamsoon dubbataniiru. Sagantaan kun haadholii barattoota sooran hedduuf carraa hojii uumuusaas dabalanii ibsaniiru. Sagantichi kan eegalame barattoota kuma 300 sooruun yoo ta’u yeroo ammaa barattoonni miiliyoona ta’an guyyaatti al lama soorata argachaa jiru jedhaniiru. Bara barnootaa 2019 sagantaa soorataa kana qulqullinaan itti fufsiisuuf deeggarsi, hordoffii fi to’annoon taasifamu caalaa cimee akka itti fufu beeksisaniiru.

Fulbaana 11/2019 (ENA)- Bara bajataa kana godina Shawaa Lixaa maneen barnootaa kuma 1 fi 950 keessatti sagantaan soorata barattootaa akka gaggeeffamu waajjirri barnootaa godinichaa beeksise. Itti aanaan itti gaafatamaa waajjira barnootaa godinichaa obbo Tashoomaa Faanaa ENA’f akka ibsanitti, bara bajataa kana sagantaa soorata barattootaa milkeessuuf qophiin taasifameera. Manneen barnootaa idileen duraa dabalatee maneen barnoota sadarkaa tokkoffaa aanaalee godinichaa 23 kuma 1 fi 950 keessatti sagantaa soorata barattootaa gaggeessuuf qooda fudhattoota dhimmi ilaallatu waliin qindoominaan hojjetamaa akka jiru dubbataniiru. Sagantaan soorata barattootaa qulqullina barnootaa eegsisuun alatti, dhaloota egeree fi ga’oome horachuuf gumaacha olaanaa akka qabaatu dabalanii ibsaniiru. Barattoonni kuma 561 fi 247 sagantaa soorata barattootaa bara kanaa akka fayyadaman dubbataniiru. Itti Gaafatamaan waajjira barnootaa aanaa Tokkee Kuttaayee obbo Taarikuu humneessaa gamasaaniin, sagantaan soorataa kun qabxi barattootaa fooyyessuu fi fedhii barumsaaf qaban akka dabaluuf gumaacha taasisaa jiraachuu ibsaniiru. Barattoota kuma 14 fi 518 manneen barnootaa idileen duraa fi sadarkaa tokkoffaa aanicha keessatti argaman 106 keessatti sagantaa soorataa gaggeessuuf qophiin xumuramuu ibsaniiru. Sagantaa kana aanicha keessatti raawwachiisuuf birria miiliyoona 11 ol akka barbaachisu eeranii, sagantaa soorataa kana guutummaan gaggeessuuf qooda fudhattoota dhimmi ilaalu wajjin qindaa’uun qophiin taasifamaa jiraachuu ibsaniiru.

Fulbaana 11/2019 (ENA) - Misoomni kooriidaraa magaalaa Harar bakkeewwan bashannanaa magariisaa dhugoomsuurra darbee aadaa dubbisuu gabbisuuf gumaacha taasisaa jiraachuu dargaggoonni magaalattii dubbatan. Bakkeewwan misooma kooriidaraa fi magariisaa magaalaa Hararitti ijaaraman miidhagina magaalattii dabaluun alatti akkasumas jiraattotaa fi daawwattootaaf mijeessuun alatti, dargaggootaaf bakka bashannanaa ta’uun tajaajilaa jiru. Bakkeewwan misooma kooriidaraa kunneen bakka bashannanaarra darbee wiirtuu beekumsaa ta’anii tajaajilaa jiraachuu dargaggoonni ni dubbatu. Jiraattonni magaalichaa ENA’f yaada kennan akka ibsanitti, misoomni kooriidaraa magaalaa Harar bakkeewwan bashannanaa magariisaa dhugoomsuun gamatti aadaa dubbisaa guddisuuf gumaacha taasisaa jira. Dargaggoota magaalichaa yaada kennan keessaa dargaggoo Iyyoob Abbabaa akka ibsetti, Kanaan dura bakki dargaggoonni itti bashannanan waan hin jirreef bakka hin maletti yeroo dabarsaa akka ture ibseera. Misoomni kooriidaraa mootummaan ida’amuu dhugoomse dargaggootaaf bakka bashannanaa fi carraa hojii uumuun gamatti bakka kitaabni itti dubbifamu waan ta’eef beekumsa akka argatu isa gargaaraa akka jiru dubbateera. Shamarree Ye’aabsiraa Dassaalenyi yaada kenniteen, misoomni kun magaalattii miidhagsuurra darbee dubbisuu fi beekumsa argachuuf bakka mijataa uumuudhaan gumaacha taasisaa jira. Bakkeewwan kooriidaraa fi magariisaa magaalattiitti tajaajila olaanaa kennaa jiran kana dargaggoota biroo waliin ta’uun kunuunsa gochaa jiran cimsanii akka itti fufan dubbatteetti. Yunivarsiitii Jigjigaatti barattuun Gaazexeessummaa wagga 4ffaa barattuu Iddilaawiit Baqqalaa, misoomni kooriidaraa magaalattii miidhagsuurra darbee aadaan dubbisuu akka dagaagu gumaachaa jiraachuu ibsiteetti. Viidiyoo miidiyaa hawaasummaarratti feetu waraabuuf salphaatti bakka miidhagaa akka argattu ishee taasisaa waan jiruuf itti gammaduushee dubbatteetti. Dargaggoo Naahoom Geetaachoo yaada kenneen, bakkeewwan bashannanaa fi magariisaa ijaaraman aadaa dubbisuu fi yaaduu guddisuun gamatti dandeettii kalaqaa fi hirmaannaa hawaasaa cimsuuf gumaacha olaanaa qaba jedheera. Hojii gaggeessaan mana qopheessaa magaalaa Harar obbo Kaaliid Abdii gamasaaniin, misoomni kooriidaraa kun magaalattii miidhagduu, hawattuu fi jiraattotaaf akkasumas daawwattootaaf akka mijattu gochuusaa dubbataniiru. Keessumaa carraa hojii uumuun gamatti keessumaa dargaggootaaf wiirtuu bashannanaa, bakka kitaaba itti dubbisan, kalaqaa fi beekumsaa ta’uun dargaggoonni bakka hin malle akka hin oole gargaaraa akka jiran eeraniiru.

Fulbaana 11/2019(ENA): Lammiilee fayyaqabeessa omishtummaa bu'a qabeessaaf imaammanni Fayyaa Mootummaan Ida'amuu hojiirra oolche bu'aa qabatamaa galmeessisaa jira. Mootummaan Ida'amuu waggootan 8 darban keessatti xiyyaaffannoo kennee hojjechaa jiru keessaa tokko damee fayyaati. Gama Fayyaatiin hojiilee itti fayyadamummaa lammiilee mirkaneessa hedduun hojjetamaniiru. Gama bu'uuraalee misoomaa damee fayyaa bababl'isuu,hospitaalota ijaaruun,buufataalee fayyaa,keellaa fayyaa naannoo hawaasni dhiyootti argatutti ijaaruun bu'aan olaanaan galmaa'aniiru.  

Fulbaana 10/2019 (ENA): Ayyaanni bara haaraa saba Booroo Shinaashaa ‘’ Gaarii Wooroo’’ kabajamaa jira. Ayyaanni jijjiirraa bara haaraa ’Gaarii Shaaroo tokkummaa fi misooma aadaaf’ jedhuun magaalaa Finfinneetti kabajamaa jira. Sagantaa kana irratti Af-yaa’iin Mana Maree Naannoo Beenishaangul Gumuz, Aadde Askaalech Albooroo, Af-yaa’iin Mana Maree Magaalaa Finfinnee Aadde Buzeenaa Alkadir, Ajajaa Ol’aanaa Poolisii Finfinnee, Letenaanti Jeneraal Asraat Deeneeroo, bakka bu’aan Ministeera Aadaa fi Ispoortii Federaalaa, Gargaaraa Piroofeesaraa Kaffaaloo Abdiisaa fi miseensonni dhalattoota sabichaa fi keessummoonni argamuun kabajameera. Af-yaa’iin Mana Maree Naannoo Beenishaangul Gumuz Aadde Askaalech Albooroon Gaarii Wooroon ayyaana dhiifamaa, jaalalaa, nagaa fi abdii ta’uu ibsaniiru. Miidiyaa Dijitaalaa ENA hordofaa- https://www.ena.et/web/links

Fulbaana 10/2019(ENA) : Ayyaanni jijjiirraa baraa saba Walaayittaa ‘Giifaataan’ magaalaa Walaayittaa Sooddootti kabajamaa jira. Ayyaanichi mata duree “ Hambaa dhalootaa haa eegnu; Giifaataa itti haa fufsiisnu” jedhuun kabajamaa jira.   Ayyaanni Gifaataan’ Muddee 2018 hambaa idil addunyaa Dhaabbata Mootummoota Gamtoomaniitti Dhaabbata Barnootaa, Saayinsii fi Aadaa ‘UNESCO’tti kan galmaa’e yoo ta’u, erga galmaa’ee yeroo jalqabaaf haala ho’aa ta’een kabajamaa jira. Ayyaana kana irratti piresidaantiin Naannoo Kibba Itiyoophiyaa obbo Xilahuun Kabbadaa, akkasumas hoggantoonni hojii mootummaa federaalaa, naannoo, godinaalee, bulchiinsa magaalaa fi aanaalee, maanguddoonni, abbootiin amantaa, bakka bu’oonni affeeramanii Itiyoophiyaa hunda irraa fi jiraattonni naannichaa hirmaachaa jiru.   Miidiyaa Dijitaalaa ENA hordofaa- https://www.ena.et/web/links

Fulbaana 9/2019 (ENA)- Dhiibbaa sababa jijjiirama haala qilleensaa idil addunyaan dhufuu danda’u qolachuuf qophiin taasifamuusaa komishiniin hooggansa hojii soda balaa Itiyoophiyaa beeksise. Elniinoon sadarkaa idil addunyaatti ho’i akka dabaluu fi haalli qilleensaa akka jijiiramu akka taasisu dhaabbanni mitiyoorooloojii addunyaa beeksiseera. Mudannoon kun Afriikaa bahaa fi Itiyoophiyaa bakkeewwan tokko tokkotti hongee guddaa, bakkeewwan birootti ammoo lolaa guddaa uumuu akka danda’u odeeffannoowwan garagaraa ni mul’isu. Itti aanaan komishinara komishinii hooggansa hojii soda balaa Itiyoophiyaa obbo Ayidrus Hasan ENA’f akka ibsanitti, Elniinoon kanaan dura wagga kudhanii fi shan keessatti irra deddeebi’ee mudateera. Balaa Elniinoo Kanaan dura Afriikaa bahaa keessatti mudaterraa wanti hedduun baratamuu ibsaniiru. Odeeffannoowwan inistiitiyuutii idil addunyaaa fi Itiyoophiyaarraa argaman akka hubachiisanitti, bara 2018/19 Elniinoon haaraan akka mudatu ni eegama. Kanarraa ka’uun komishinichi dhiibbaa kana hir’isuuf hojiiwwan haal duree walii galaa bal’inaan hojjechaa jira jedhaniiru. Dhaabbatichi rakkoo yeroof mudatu furuu qofa osoo hin ta’iin, rakkoolee fulla’aa furuuf dandeettiisaa guddifachaa akka jiru beeksisaniiru. Sadarkaa biyyaatti ammi Elniinoof saaxilamuun ammam akka ta’e adda baasuuuf, hir’isuu fi damdamachuu dandeessisu tarsiimoo qopheessuusaa ibsaniiru. Miidhaawwan sababa hir’ina roobaatiin mudatan dursanii qolachuuf qindeessummaa komisinichaatiin sektaroota federaalaarraa amma caasaa gadiitti jiran waliin hojiileen haal duree hojjetamaa akka jiran dubbataniiru. Balaa lolaa sababa Elniinootiin kibba bahaa fi kibba Itiyoophiyaatti mudachuu danda’u waliin wal qabatee sadarkaa federaalaa fi naannootti qophiin nyaataa, meeshaalee garagaraa fi meeshaaleen battalia taasifamaa jiraachuu ibsaniiru. Balaawwan uumamaa fi nam-tolchee Itiyoophiyaa keessatti mudatan ofiin damdamachuuf dandeettiin dabalaa jira. Deeggarsa namoomaa dandeettii ofiitiin qaqqabsiisuurra darbee biyyoota biraafillee deeggarsa kan taasisu dhaabbata ‘Itiyoophiyaa eed’ jedhamu hundeessuuf qophiin taasifamaa jira jedhaniiru. Sirna ofeeggannoo duraa cimsuu fi ammayyeessuuf qooda fudhattoota biro waliin qindaa’uun wiirtuun qindeessaa yeroo hatattamaa biyyaalessaa dhaabbachuusaa ibsaniiru. Qophiilee fi hojmaattonni haaraan taasifaman dandeettii biyyattiin balaa damdamachuuf taasiftu fulla’insaan akka cimsu ibsaniiru.

Fulbaana 8/2019 (ENA)- Godina Boorana bahaatti namoonni kuma 57 caalan fayyadamaa inshuraansii fayyaa hawaasaa ta’uusaanii waajjirri fayyaa godinichaa ibse. Inshuraansiin fayyaa hawaasaa kutaaleen hawaasaa galii xiqqaa fi jiddu galeessaa qaban yeroo dhukkubsatan baasii waldhaansaa guddaaf akka hin saaxilamnee fi waldhaansa barbaachisu gatii xiqqaan akka argatan yaadamee kan sirneeffamedha. Godina Boorana bahaatti hubannoo hawaasaa cimsuun akkasumas kaffaltii miseensummaa si’achiisuun inshuraansii fayyaa aanaalee fi gandoota baadiyyaa hundatti babal’isuuf hojjetamaa tureera. Waajjira fayyaa godinichaatti qindeessaan qabeenya maddisiisuu fi hirmaannaa hawaasaa obbo Nagaash Qananii, barana abbaa warraa kuma 102 ol fayyadamaa inshuraansii fayyaa taasisuuf yaadamee hojiin eegalamuu ibsaniiru. Hojii amma ammaatti hojjetameen bulchiinsa magaalaa Nagallee Booranaa dabalatee aanaalee godinichaa hundatti namoonni kuma 57 fi 453 fayyadamoo inshuraansii fayyaa ta’uusaanii eeraniiru. Kanneen keessaa kuma 7 fi 450 ol kan ta’an miseensota haaraa tajaajila inshuraansii fayyaa argatan ta’uu ibsaniiru. Abbootiin warraa kuma 50 fi 100 fayyadamoo inshuraansii fayyaa kan turanii fi waraqaa eenyummaa tajaajilichaa kan haaromsan miseensota duraanii ta’uu eeraniiru. Aanaa fi bulchiinsi magaalaa harka qalleeyyii kuma 12 fi 54’f kafaltii duraa kaffaluufii eeraniiru. Tajaajilli kun hospitaalota godinichaa 3 fi buufataalee fayyaa 28 keessatti tajaajilli waldhaansaa guutuun tolan kennamaa akka jiru qindeessaan kun mirkaneessaniiru. Kana malees Hospitaalota ispeeshaalaayizdii Hawaasaa, Meeggaa, Moyyaalee, Yaa’aballoo, Dalloo Mannaa, Gobbaa fi hospitaala rifaraalaa Gobbaa waliin walii galtee mallatteessanii hojjechaa akka jiran dubbataniiru. Magaalaa Nagallee Booranaa dabalatee aanaaleen hundi mana qorichaa hawaasaa haaraa 13 banuusaanii ibsaniiru. Bardheengaddaa godinichatti namoonni fayyadamoo inshuraansii fayyaa ta’an kuma 370 fi 273 tajaajila fayyaa tolaan argachuusaanii beeksisaniiru. Fayyadamtoota keessaa jiraattuun magaalaa Nagallee Booranaa adde Ababachi Warquu; kaffaltii duraa kan waggaa kaffaluudhaan maatiisaanii sadii waliin wagga guutuu inshuraansii fayyaa fayyadamuusaanii ibsaniiru. Jiraattuun magaalichaa adde Taarukuwaa Damisee miseensa inshuraansii fayyaa waan ta’aniif rakkoo tokko malee tolan waldhaansa argachuusaanii dubbataniiru. Tajaajilli inshuraansii fayyaa baasii qorannoo, qorichaa fi kanneen biroo waan danda’uuf rakkoo dinagdee kan furu akka ta’e ibsaniiru.

Fulbaana 07/2019(ENA): Af-Yaa’iin Mana Maree Federeeshinii Obbo Aaganyoo Tashaagar Manni Marichaa ergama Heera Mootummaa itti kennameen dabalataan dirqama hawaasummaa isaa bahachaa akka jiru ibsaniiru. Manni Maree Federeeshinii fi dhaabbileen itti waamamni isaanii Mana mare Federeeshinii ta’an manneen tola ooltummaa Gannaatiin Naannoo Somaalee Magaalaa Goodeetti ijaaran fayyadamtootaaf dabarsanii kennaniiru.   Manni Marichaa lammiilee galii gadi aanaa qabanii fi namoota humna hin qabne deeggaruun sadarkaa jireenya isaanii fooyyessuuf hojjechaa akka jiru Obbo Aaganyoo Tashaagar ibsaniiru. Mana duwwaa qofa osoo hin ta’iin meeshaalee mana keessaa fi midhaan nyaataaf oolu kan ji’a tokkoof itti gargaaraman waliin dabarsanii akka kennanis ibsameera. Tola ooltummaan akkanaa kunis aantummaa Manni Maree Federeeshinii ummataaf qabu kan agarsiisu yoo ta’u, gara fuulduraattis caalaatti cimsanii akka itti fufan ibsaniiru.   Tola ooltummaan Manni Maree Federeeshinii hojjete kuni mootummaan misooma ummataa mirkaneessuuf hammam kutannoo akka qabu kan agarsiisu ta’uu Hoggantuun Biiroo Dubartootaa fi Daa’immanii Naannoo Somaalee, Haliimaa Hasan dubbataniiru.   Namoonni Manni ammayyaa isaaniif kenname yaaddoo roobaa yeroo Gannaa fi aduu yeroo Bonaa kan irraa hambisee ta’uu ibsuun deeggarsa Manni Marichaa fi Dhaabbilee itti waamama isaa taasisanif galateeffachuu ibsaniiru.

Fulbaana7/2019 (ENA):Finfinneetti ayyaanonni haala ho'aan kan kabajaman ayyaanonni Damaraa, Masqalaa fi Irreechaa duudhaa isaanii eeggatanii akka kabajamaniif dargaggoonni gahee isaanii bahachuu akka qaban Biiroon Bulchiinsa Nageenyaa fi Tasgabbii Finfinnee hubachise. Biirichi Biiroo Dargaggoo fi Ispoortii Finfinnee waliin ta'uun mata duree "Waliigaltee waloo nageenya fulla’aatiif" jedhuun konfiraansii dargaggoota sadarkaa magaalaatti gaggeessaa jira. Itti aanaan hoji gaggeessaa Biiroo Bulchiinsa Nageenyaa fi Tasgabbii Finfinnee obbo Tasfaaye Dandir wayita sana akka jedhanitti, ayyaanonni Damaraa ,Masqalaa fi Irreechaa ayyaana jaalalaa, obbolumma, Nageenyaa fi galateeffannaati. Ayyaanonni kunneen hedduumminaa fi miidhagina biyya keenyaa addunyaaf kan beeksisan, tuuristoota hedduu gara magaalaa keenyaatti kan hawwatan qabeenya keenya gudaa waan ta'aniif, ayyaanonni kunniin milkaa'inaan akka kabajamaniif dargaggoonni gahee isaanii bahachuu qabu jedhaniiru. Keessummoota ayyaana kanarratti hirmaatan kabaja guddaa fi duudhaa keessummaa simannaa keenyaan keessummeessuudhaan fooyya’ina magaalaa keenyaa addunyaaf agarsiisuuf dargaggoonni itti gaafatamummaa isaanii akka bahanis waamicha dhiyeessaniiru.

Fulbaana 6/2019 (ENA): Bulchiinsa Dirree Dhawaatti tajaajilli Lammummaa aadaa wal-deeggarsaa cimsuudhaan rakkoo hawaasummaafi dinagdee salphisuu keessatti gumaacha taasisaa jiraachuun ibsame. Komishinarri Komishinii Dargaggoo fi Ispoortii Bulchiinsa Dirree Dhawaa Kaalid Mahaammad akka ENA’f ibsanitti; tajaajila Lammummaa Gannaa bara kanaatiin dargaggootaa fi kutaa hawaasaa garagaraa kuma 90 ol hirmaachisuudhaan damelee 14 keessatti hojiiwwan garaagaraa raawwatamaa jiru. Hojiiwwan tajaajila kanaan raawwatamaa jiran keessaa maaddii qooddachuu, dhiiga arjoomuu, ashaaraa magariisaa, barnoota deeggarsaa, ijaarsa duudhaa nageenyaa fi meeshaalee barnootaa barattootaa walitti qabuu kanneen jedhaman keessatti argamu.   Dameewwan kanaan hanga ammaatti hojiiwwan raawwatamaniin kutaaleen hawaasaa kuma 250 ol fayyadamoo ta'uu isaanii dubbataniiru. Sektarota Mootummaa Federaalaa fi manneen hojii bulchiinsichaa qindeessuudhaan manneen manguddootaa haaraa 250 ijaarsarra kan jiran yoo ta'u, hanga ammaattis manneen 100 ol ijaarramanii xumuramuun dabarfamanii kennamanii jiraachuun ibsameera. Tajaajila Lammummaan Manneen 150 haaromsamaa jiran keessaas 80 xumuramuun manguddootaaf kan dabarfaman ta'uus beeksisaniiru. Hojiin tajaajila Lammummaa aadaa wal-gargaarsaa cimsuudhaan rakkoo hawaasummaafi dinagdee salphisuu keessatti shoora guddaa taphachaa jiraachuu isaanii dubbataniiru. Hojiin kun waldeeggasa cimaa uumudhaan rakkoo hawaasummaafi dinagdee salphisuuf bu'uura waan kaa'eef fuulduraafis cimee kan ittifuufu ta'uu hubachiisaniiru. Namoonni tajaajila lammummaa kanaan manni ijaarameefis; tajaajilli Lammummaa haala ulfaataa kanaan dura maatii isaanii waliin keessa jiraachaa turan kan jijjiire ta'uu ibsataniiru. Deeggarsi hawaasummaa kun rakkina isaanii salphisuu bira darbee, namni isaan yaadatu jiraachuu isaanii gochaan kan agarsiise ta'uu isaanii ibsaniiru.

Fulbaana 6/2019 (ENA): Biiroon Barnoota Bulchiinsa Dirree Dhawaa waliin gahinsaa fi qulqullina barnootaa mirkaneessuuf hojiiwwan eegalaman sadarkaa ol'aanaan itti fufsiisuun hojiin dhaloota bu'a qabeessa horachuu cimee itti fufuu ibseera. Hogganaan Biiroo Barnoota Bulchiinsichaa obbo Sulxaan Aliiyyii ENA’f akka ibsanitti bara barnootaa haarawa kana keessatti qulqullinaa fi waliin gahinsa Barnootaa fooyyessuudhaan adeemsa baruu fi barsiisuu bu'aa qabeessa taasisuuf hojiiwwan garaagaraa raawwatamaniiru. Keessattuu waktii Gannaatti sochii "Barnoota Dhalootaaf" jedhuun hirmaannaa uummataatiin ijaarsa manneen barnootaa Idileen duraa haarawaa, manneen barnootaa suphuu fi mooraa bareechuudhaan adeemsa baruu fi barsiisuutiif mijataa gochuudhaaf hojiin hojjetameera jedhan. Manneen Barnootaa sadarkaa 1ffaa haarawaa dabalataa saddeet ijaarsi isaanii xumuramaa jiranis tajaajilaaf oolchuuf tattaaffiin taasifamaa jiraachuu dubbataniiru. Dabalataanis, adeemsa baruu fi barsiisuu dijitaalaatti ceesisuuf leenjii fi kompiitaroota, meeshaalee laaboraatorii fi kitabaa guutuuf hojjetamaa jira. Bara baajataa darbe keessatti qormaata biyyaaleessa kutaa 12ffaa bulchiinsichatti bu'aa gaarii galmeeffame cimsanii itti fufuun dhaloota gahumsa qabu oomishuuf hojiin eegalame cimee itti fufa jedhaniiru. Itti gaafatamaan Mana Barumsaa Sadarkaa 2ffaa Saabiyaan Obbo Ejjetaa Mokonnon waggoottan darban keessatti qulqullina barnootaa mirkaneessuuf hojiiwwan hojjetamaniin barattoota gahumsa qabanii fi dorgomaa ta'an horachuun danda'ameera jedhaniiru. Ganna keessa dandeettii barsiisotaa cimsuu fi meeshaalee barnootaa guutuuf hojiin bal'aan hojjetamuu isaatiin barana bu'aa caalu fiduuf hojiin gargaaru hojjetameera jedhaniiru. Itti aantuun mana barumsaa Sadarkaa 1ffaa "Misraaq Jagnoochi" Fireehiwoot Taaddasee gama isaaniitiin; Barnoota daa'immanii irratti xiyyeeffannoo guddaa kennuudhaan barnoota gochaan deggarame daa'immaniif kennuu eegalleera jedhaniiru. Maatii barattootaa keessaa Dr. Seeyifuu Taaddasaa akka ibsaniti; Maatiin manneen barnootaa waliin hariiroo fi deeggarsa isaanii cimsachuudhaan ijoolleen isaanii bu’aa gaarii akka galmeessan deeggarsa isaanii akka itti fufan ibsataniiru.

Fulbaana 06 /2019 (ENA): Gareen yaala hatattamaa Itoophiyaa Dhaabbata Fayyaa Addunyaa (WHO) irraa beekamtii Sadarkaa 1ffaa dhaabbataa argachuun isaa milkaa'ina guddaa dandeettii deebii yeroo balaa tasaa biyyattii agarsiisudha jechuun Ministirri Fayyaa Doktar Maqdas Dhaabaa ibsan. Itoophiyaan sadarkaa Afriikaatti isa jalqaba kan ta'e beekamtii Dhaabbata Fayyaa Addunyaa kan argatte yoo ta'u, sagantaan beekamtii kanaa ifatti gaggeeffameera. Ministirri Fayyaa Dr. Maqdas Dhaabaa akka ibsanitti Beekamtiin kun qophiifi dandeettii deebii yeroo balaa tasaa biyyattii kan agarsiisuudha jedhaniiru.   Balaawwan uumamaa fi dhukkuboota tatamsa'aniif dursanii qopha'uun cimina fayyadama sirna fayyaa, itti fufinsaa fi birmadummaa fayyaa cimsuuf murteessaa ta’uu ibsaniiru. Beekamtiin kunis qophii yeroo dheeraa, muuxannoo, filannoo ogeessotaa fi deeggarsa dhaabbilee michootaa irraa kan argamedha jedhaniiru. De’eetaan Ministira Fayyaa Doktar Darajjee Dhugumaa gamasaanii Milkaa'inni kun dandeettii deebii yeroo balaa tasaa Itoophiyaa qindaa'aa fi cimaa ta'e agarsiisa jedhaniiru. Itoophiyaan damichaaf xiyyeeffannoo kennuu fi dandeettii gabbifatteen bu'aa kanaaf ga’uushee kan agarsiisudha jedhaniiru. Beekamtiin argame gabbisa dandeettii fi babal'ina bu'uuraalee misoomaa kan itti fufsiisu yoo ta'u, dandeettii garee wal’ansa hatattamaa gara naannooleetti babal'isuun barbaachisaa ta'uus eeraniiru. Daarektarri Olaanaan Inistitiyuutii Fayyaa Hawaasa Itoophiyaa Doktar Masaay Haayiluu Beekamtiin dhaabbata fayyaa Addunyaa (WHO) kun qophiin yeroo balaa tasaa fi ciminni sirna fayyaa Itoophiyaa safartuu Idil-Addunyaatiin madaalamee kan mirkanaa'e ta'uu ibsaniiru. Kunis deebii biyya keessaa bira darbee hojii yaala saffisaa waliinii Idil-Addunyaa irratti hirmaachuuf dandeettii haaraa uumeera. Itoophiyaatti bakka bu'aan dhaabbata Fayyaa Addunyaa Piroofeesar Firansiis Chisaaka Kosolo Beekamtiin Idil-Addunyaa Itoophiyaan argatte kun bu'aa hogganummaa biyyaalessaa, investimantii, ijaarsa dandeettii fi tumsa waggoota hedduuti jedhaniiru. Gaareen wal’aansa balaa tasaa Itoophiyaa Riijinii Afriikaatti beekamtii Idil-Addunyaa argate isa jalqabaa fi ulaagaalee dhaabbata fayyaa Addunyaa guutummaan guutuutti kan guutu ta’uu mirkaneessaniiru. Beekamtiin kun xumuraa osoo hin taane, qophii, leenjii, shaakala fi dandeettii deebii saffisaa itti fufiinsaan cimsachuu kan gaafatu itti gaafatamummaa ta’uusaa ibsaniiru. Itoophiyaan muuxannoo ishee biyyoota Afriikaa birootiif qooduufis carraa uuma jedhaniiru.

Fulbaana 05/2019 (ENA): Bara baajataa 2018 keessa Finfinneetti balaa tiraafikaa ittisuuf hojiiwwan qindoominaa hojjetamaniin bu’aan gaariin galmaa’uu Qajeelchi Waliigalaa Poolisii Finfinnee ibseera.   Qajeelchichatti Ajajaan Olaanaa To’annoo Nageenya Tiraafikaa Komaandar Abarraa Baay’isaa sagantaa jalqabbii bara barnootaa 2019 sababeeffachuun, mata-duree “Dogoggora ani itti fayyadama daandiirratti raawwadhuun, balaan tiraafikaa uumamu haa dhaabbatu” jedhuun, sosochii nageenya daandii Addabaabaayii Araat Kiilootti gaggeeffameerratti argamuun ergaa dabarsaniin bara baajataa 2018tti balaa tiraafikaa ittisuuf hojiiwwan qindoominaan hojjetaman irraa kan ka’e bu’aan gaariin galmaa’eeraa kaasaniiru. Bu’aa argame kana caalmaatti itti fufsiisuuf hojiiwwan qindoominaa ciman akka itti fufan eeranii, hubannoo hawaasaa waa’ee itti fayyadama daandii guddisuun kaayyoo ijoo sochichaa ta’uu ibsaniiru. Fayyadamaan daandii hundi balaa tiraafikaa ittisuuf gahee mataa isaa akka qabuufi itti gaafatamummaa isaa sirnaan bahuu akka qabuus dabalan ibsaniiru. Keessumaa konkolaachiftootni dursa daandii miiltootaaf kennuun barbaachisaa ta’uu sirriitti hubatanii konkolaachisuu akka qaban hubachiisaniiru. Bara baajataa 2018’tti qindoominaa fi sirna hojii waloo taasifameen, baay’inni balaa du’a, balaa cimaa fi balaa salphaa haala hiika qabuun hir’isuun danda’amuu ibsaniiru. Bu’aan kun kan galmaa’e, nageenya daandii mirkaneessuu fi balaa tiraafikaa ittisuuf hawaasaa fi qaamolee dhimmi ilaallatu hunda hirmaachisuun hojiiwwan hojjetamuu isaaniitiin ta’uu ibsaniiru. Bara baajataa 2019’tti balaa tiraafikaa caalmaatti hir’isuuf hirmaannaa hawaasaa cimsuun, nageenya daandii magaalaa mirkaneessuuf hojiiwwan gargaaran daran ciman akka itti fufan ibsaniiru. Itti Aanaan Hoji Raawwachiisaa Olaanaa Kutaa Magaalaa Araadaafi Itti Gaafatamaan Waajjira Hojii fi Ogummaa Obbo Abdii Mulunaa, kutaa magaalaa Araadaatti bu’uuraaleen misooma daandii qulqullina isaanii eeggatanii ijaaraman sochii tiraafikaa naannawichaaf haala mijataa uumaniiruun kaasaniiru. Keessumaa, Addabaabaayii Araat Kiiloo irratti daandii miiltootaa bal’aa fi ammayyaa ijaarame, hawaasni aadaa itti fayyadama daandii duraan ture akka fooyyeffatuuf gahee guddaa taphachuu isaa eeraniiru. Bu’uuraaleen misooma daandii ammayyaa kunis lafoo deemtonni sodaa tokko malee bilisaan akka socho’an gochuu keessatti gumaacha olaanaa taasisaa jiraachuu isaanii hubachiisaniiru.

Fulbaana 6/ 2019 (ENA) : Jilli dargaggoota Itiyoophiyaa feestivaala dargaggoota idil addunyaa Raashiyaatti gaggeeffamaa jirurratti qabeenya aadaa Itiyoophiyaa haala hawwataa ta’een beeksiseera.   Jilli dargaggoota Itiyoophiyaa, Feestivaala Dargaggoota Addunyaa Raashiyaatti gaggeeffamaa jiru irratti qabeenya aadaa miidhagaa, hambaa seenaa, bakkeewwan hawwata turizimii fi mallattoolee eenyummaa biyyaalessaa addaa ta’an hawaasa idil-addunyaa biratti beeksisaniiru. Dargaggoonni kunneen waltajjii addunyaa guddaa kana irratti dargaggoota kutaalee addunyaa gara garaa irraa dhufan waliin hariiroo cimaa uumuun, seenaa Itiyoophiyaa, aadaa keessummaa simachuu fi iddoowwan hawwata turizimii biyyattii sirriitti beeksisuun hojii dippiloomaasii ummataa bu’a qabeessa ta’e hojjetaniiru.

Ministirri Muummee Dr. Abiyyi Ahimad bara barnootaa haaraa 2019 sababeeffachuun ergaa dabarsaniiru. Ergaan guutuun isaa akka itti aanutti dhiyaateera:   Barattoota guutuu Itoophiyaa irraa bara barnootaa 2019 jalqaban hundaaf milkaa’inan hawwa. Bara barnootaa haaraa akka gaariitti akka jalqaban ergaa koon dabarsa. Dhaloonni dargaggoon qabeenya keenya guddaadha ; barattoonni fedhii fi kaka’umsa barachuuf qaban cimsanii akka baratan, hojii isaanii keessatti bu’aa olaanaa galmeessuuf akka tattaafatan, akkasumas dandeettii gara fuulduraatti biyya isaanii ijaaruuf isaan gargaaru akka horatan waamicha koon dhiyeessa. Wantoonni har’a ijaaramaa jiran hedduun dhaloota dhufuuf kan qophaa’an ta’uu yoo ta’u, barattoonni dhaloota fuulduraa akka fayyadamtootaa fi eegdotaa ta’anii gahee olaanaa akka qaban hubachiisuun barbaada. Barattoonni, dhaala seenaa egeree fi qaroomina Itoophiyaan qabdu gara dhaloota dhufuuf dabarsuuf kutannoo fi barnoota isaaniitiin gahee isaanii akka bahan waamicha koon dhiyeessa. Barsiisonnis, dhaloota dandeettii fi ofitti amanamummaa qaban ijaaruuf gaheen isaanii murteessaa waan ta’eef jabaatanii dhaloota egere biyya bakka bu’u horachuu qabu. Barattoota dadammaksuu , dandeettii isaanii guddisuu, akkasumas beekumsaa fi duudhaa jireenya keessatti milkaa’uuf isaan gargaaran barsiisonni horachiisuu akka itti fufan dhaamuun barbaada. Qaamolee damee barnootaa keessatti hirmaatan hundumaaf bara barnootaa milkaa’aa fi bu’aa qabeessa akka ta’u isiniif hawweera.

Itoophiyaan imaammata fayyaa haaraa egeree tilmaama keessa galchuun hojiirra oolchite, dandeettii mootummaa Ida’amuu waadaa gale hojii irra oolchuu agarsiisan keessaa isa ijoo dha. Mootummaan Ida’amuu waggoota saddettan darban keessatti dameewwan xiyyeeffannoo itti kenne keessaa tokko misooma hawaasummaatti. Dameewwan misooma hawaasummaa jalatti ramadaman keessaa dameen fayyaa immoo isa ijoo dha. Ummanni Itoophiyaa tajaajila fayyaa haqaqabeessaa fi qaqqabamaa akka argatuuf, fooyya’insa imaammataa gochuu, bu’uuraalee misooma fayyaa ijaaruu fi humna namaa ogeeyyii fayyaa leenjifamanii cimsuu irratti hojiiwwan bu’aa qabeessa hedduun hojjetamaniiru. Ministirri Muummee Dr. Abiyyi Ahimad, imaammata fayyaa duraan ittisa dhibee irratti xiyyeeffate gamaggamuun, dhibeen erga mudatee booda yaaluu fi fayyisuufis xiyyeeffannoo akka kennamu taasifamuu ibsaniiru. Mootummaan waggoota darban keessatti damee kana irratti invastimantii olaanaa taasisuun hospitaalota hedduu ijaaree hojii akka jalqaban taasisuu fi kanaanis hojiiwwan bu’a qabeessi hojjetamuu himaniiru. Mootummaan Ida’amuu fayyaan hawaasaa guutummaatti yoo eegame oomishtummaa irratti gahee gaarii qabaachuu isaa hubachuun, bu’uuraalee fayyaa ijaaruu qofa osoo hin taane, hawaasni dursee fayyaa isaa akka eeggatuuf bu’uuraalee misoomaa biroo irratti xiyyeeffatee hojjechaa jira. Kanaaf, yeroo ammaa Magaalaa Finfinnee dabalatee naannolee biyyattii garaagaraatti misooma koridarii fi misooma qarqara lagaa irratti xiyyeeffannoon hojjetamaa jira. Carraaqqii mootummaa kana cinaattis, dameen dhuunfaa fayyaa hawaasaa eeguufi bu’a qabeessummaa imaammata kanaaf gahee isaa akka bahuu danda’uuf carraan uumameera. Itoophiyaan imaammata fayyaa haaraa hojiirra oolchiteefi tarkaanfiiwwan damee fayyaa keessatti fudhatte, sirna fayyaa dandamataa fi rakkoo dandamatu diriirsuu akka dandeesse taasiseera. Mootummaan hawaasni fayyaan isaa eegame guddinaa fi badhaadhina biyyaaf murteessaa ta’uu hubachuun, waggoota darban keessatti fooyya’iinsa imaammataa bu’a qabeessa ta’an fudhateera. Tarkaanfiiwwan kunneenis dorgommii turizimii fayyaa cimsuu danda’an akka galmaa’an taasiseera. Jijjiirama dura, imaammanni fayyaa Itoophiyaan hordofaa turte irra caalaa ittisa dhibee irratti kan xiyyeeffate ture. Kunis gama kenninsa tajaajila fayyaa, ijaarsa dhaabbilee fayyaa fi fayyadama teeknooloojii damee fayyaa keessatti hanqina qabaachuun bu’a qabeessummaa sirnichaa irratti rakkoo uumee ture. Mootummaan Ida’amuu imaammanni damee fayyaa guutuu kan ta’u, ittisa dhibee irratti qofa xiyyeeffachuu osoo hin taane, dhibeen erga mudatee booda yaaluu fi fayyisuunis wiirtuu xiyyeeffannoo imaammataa ta’uu qaba jedhee amanuun, imaammata fayyaa haala kana hammateen akka fooyya’u taasiseera. Kana malees, Finfinnee giddugala turizimii fayyaa taasisuu danda’an ijaarsa bu’uuraalee misooma fayyaa, tajaajila fayyaa hunda hammataa, maallaqa fayyaa fi fayyadama teeknooloojii irratti xiyyeeffannoo addaa kennuun hojjetamaa jira. Kana irraa kan ka’e, mootummaa fi damee dhuunfaa keessatti bu’uuraaleen fayyaa teeknooloojii ammayyaa ta’an hedduun ijaaramani, tajaajilaafis oolaniiru. Kanaaf, Magaalaa Finfinneetti qaqqabamummaa tajaajila fayyaa ammayyeessuu, babal’isuu fi qulqullina isaa guddisuun, meeshaalee tajaajila yaalaa ammayyaa fi sadarkaa isaa eeggate kennuu danda’an galchuun damee fayyaa ammayyeessuuf hojjetamaa jiraachuu Kantiibaan Bulchiinsa Magaalaa Finfinnee Aadde Adaanech Abeebee himaniiru. Damee fayyaa keessatti qulqullina, qaqqabamummaa fi haqaqabeessummaa tajaajilaa mirkaneessuun dhimma ijoodha. Mootummaan Ida’amuu rakkoolee kana furuuf hospitaalotaa fi buufataalee fayyaa haaraa ijaaruu, akkasumas dhaabbilee fayyaa jiran fooyyessuu fi ammayyeessuu irratti hojiiwwan hedduu raawwachuun, qulqullina, qaqqabamummaa fi haqaqabeessummaa tajaajila fayyaa mirkaneessuu keessatti bu’aawwan galmeesseera. Keessumaa, dhaabbilee yaalaa Magaalaa Finfinnee keessatti argaman meeshaalee fi galteewwan yaalaa ammayyaatiin guutuu fi dandeettii isaanii cimsuun, tajaajila yaalaa haqaqabeessa, qaqqabamaa fi amanamaa kennuuf, akkasumas Finfinnee giddugala turizimii fayyaa taasisuuf mul’ata qabame galmaan ga’u keessatti gahee olaanaa qaba. Waggoota saddeettan darban keessatti damee fayyaa keessatti hanqinoota turan furuuf hojiiwwan hojjetamuu isaanii kan ibsan Ministirri Fayyaa Dr. Maqdas Dhaabaa, lakkoofsi dhaabbilee fayyaa mootummaa fi qooda oomisha biyya keessaa guddachuu himaniiru. Akkasumas, haguuggiin inshuraansii fayyaa hawaasaa fi fayyadamummaa lammiilee guddisuun guddina damee kanaa agarsiistu jechuun ibsaniiru. Waggoota saddeettan darban keessatti hojiiwwan damee kana irratti hojjetamaniin guddinni galmaa’uu isaa kan ibsan Ministirittiin, oomishaa fi dhiyeessii qorichaa, talaallii fi galteewwan yaalaa, akkasumas to’annoon isaanii dabalaa dhufuu fi jijjiiramni sirna maallaqa fayyaa keessatti galmaa’e agarsiistota guddina kanaa ta’uu eeraniiru. Itoophiyaan waggoota darban keessatti, keessumaa damee fayyaa irratti, weerarawwan dhibee addunyaa mudatan fi qormaatawwan damee kana keessatti mul’atan gara carraatti jijjiiruun bu’aawwan gaarii galmeessuu dandeesseetti. Haaluma kanaan, adda baasuu fi to’achuu weerara dhibee, kunuunsa fayyaa sadarkaa jalqabaa, ogeeyyii fayyaa gahoomsuu fi lakkoofsa isaanii guddisuu, fayyaa dijitaalaa fi hojiiwwan tola ooltummaa garaagaraa damee fayyaa keessatti hojjetaman milkaa’inoota galmaa’an ta’uu Ministirittiin eeruun, dandeettii damee fayyaa keessatti uumameef fakkeenya gaarii ta’uu ibsaniiru. Mootummaan Ida’amuu misooma hawaasummaa, keessumaa damee fayyaaf xiyyeeffannoo kenneen, hojiiwwan bu’a qabeessa hedduun raawwatamaniiru.Hojiiwwan bu’a qabeessa damee kana keessatti raawwataman damee dippiloomaasii fayyaa guddisuu keessatti gahee olaanaa qabaachuu Ministirri Fayyaa Dr. Maqdas Daabaa ibsaniiru. Kunis Itoophiyaan walga’iiwwan idil-addunyaa damee fayyaa garaagaraa akka keessummeessituuf filatamtuufi, Afrikaa keessaa dursa argachuun mariiwwan fi haasawaalee idil-addunyaa dhimma fayyaa irratti taasifaman akka gaggeessituuf akka ishee dandeessise ibsameera