Onkoloolessa 28/2019 (ENA) - Magaalaa Maqalee kutaa magaalaa Haawultiitti nyaannii fi lojistiksiin garee ABUT seeraan alaaf kennamuuf qophaa’an eeruu ummataa fi sakatta’insa qaamolee nageenyaa waliin taasifameen qabamuun ibsame. Wantoota qabaman keessaa kopheewwan Koongoo kaayyoo loltummaaf oolanii fi buddeen gogaa akkasumas daakuu furnoo, zayitii, Xaafii, shiroofi saamunaan keessatti argamu. Wantoonni qabaman kun birrii miiliyoona 1 tuqaa 4 kan tilmaamaman yoo ta’u, bulchiinsi magaalaa Maqalee warra humna hinqabneef akka qoodamu taasiseera. Gorsaan dhimma hawaasummaa fi itti gaafatamaan dhimmoota hawaasaa kantiibaa magaalaa Maqalee obbo Mulawu Abrihallee akka jedhanitti, wantoonni qabaman kun kanneen humna hin qabneef akka qoodamu taasifameera. Fuulduras jiraattonni magaalaa Maqalee qaamolee nageenyaa waliin qindoominaan hojjechuun wantoota shakkisiisan yoo argu eeruu akka kennan dhaamaniiru.

Onkoloolessa 28/2019 (ENA)-- Barnootni madda beekumsaa, bu'uura yaada haaraa fi jijjiiramaa ta’uu kantiibaan magaalaa shaggar Dr.Tashoomaa Addunyaa ibsan.   Magaalaa Shaggaritti waltajjiin gamaaggama gumii tiraanisfoormeeshinii misooma barnootaa fi sirni beekamtii kennuu barattoota qabxii olaanaa galmeessanii gaggeeffameera. Mootummaan dhaloota beekumsa saayinsii fi tekinooloojiin gahoomee fi guddina biyyaa keessatti qooda bahatu horachuuf cabinsa sirna Barnootaa keessa turan hundeerraa furuuf hojiiwwan garagaraa tarkaanfii addaan masakuun hojjechaa jira.   Magaalaa Shaggarittis dhaloota dorgomaa ta'an horachuuf tarkaanfiiwwan addaa sirna barnootaa keessatti bocaman hojiirra oolchuun hojii hojjetameen yeroo gara yerootti fooyya'insi gurguddaan argamaa jira. Haaluma kanaan Magaalaa Shaggaritti Shaggaritti waltajjiin gamaaggama gumii tiraanisfoormeeshinii misooma Barnootaa fi sirni beekamtii kennuu barattoota qabxii olaanaa galmeessanii gaggeeffamaa jira. Saganticha irrattis kantiibaa Magaalaa Shaggar Dr.Tashoomaa Addunyaa, ittigaafatamaa Waajjira Paartii Badhaadhinaa damee Magaalaa Shaggar Obbo Alamaayyoo Tulluu dabalatee hooggantoota akkasumas barattootaa fi qooda fudhattootni damee barnootaa sadarkaan jiran argamaniiru.   kantiibaa Magaalaa Shaggar Dr.Tashoomaa Addunyaa barnootni madda beekumsaa fi bu'uura jijjiiramaa ta'uu kan himan, Shaggarittis dhaloota dorgomaa horachuuf hojiiwwan bu'a-qabeessummaa damee Barnootaa dhugoomsan argamuus himaniiru. Magaalichatti carraawwan uwwisa Barnootaa guddisuun hirmaannaa barattootaa akkasumas baay'ina manneen Barnootaa fi dhibbeentaa darbinsa barattootaa dabaluun kan danda'ame ta'uus himaniiru. Ittigaafatamaa Waajjira Barnootaa Magaalaa Shaggar Obbo Firakiyyaa Kaasahuun; gumiin tiraanisfoormeeshinii misooma Barnootaa hojiiwwan ijaarsa manneen Barnootaa milkeessuun carraa Barnootaa akka babal'atu taasisuu fi kanaanis bu'aan barachuu barattootaa dabalaaa dhufuus himaniiru. T/Koomunikeeshinii Magaalichaarraa

Onkoloolessa 27/2019 (ENA) – Abbaan taayitaa miidiyaalee Itiyoophiyaa moggaasa haaraan beekamtii seera qabeessa kan kenneef tajaajila biroodkaastii miidiyaa korporeeshinii Tigraayiif waraqaa raga eyyamaa kenneera. Daarektarri Olaanaa abbaa taayitichaa Aadde Hayimaanoot Zallaqaa ragaa hayyamaa kana itti gaafatamaa dhimma siyaasaa fi gurmaa'insa ummataa bulchiinsa yeroo naannoo Tigraay obbo Radaa’ii Halafoomiif dabarsaniiru. Kana malees, qaqqabummaa odeeffannoo ummataa mirkaneessuu, dandeettii ogeessotaa cimsuu fi deeggarsa teeknikaa miidiyaaf kennuu irratti mariin taasifameera. Obbo Radaa’iin bulchiinsi yeroo naannichaa nageenya waaraa, tasgabbii fi hojiiwwan misoomaa saffisiisuuf qaqqabummaa odeeffannoo ummataa mirkaneessuuf hojjechaa akka jiru ibsaniiru. Akkasumas, korporeeshinichi deeggarsa miidiyaaf taasisaa jiru akka itti fufu gaafataniiru. Aadde Hayimaanoot Zallaqaan gama isaaniin, miidiyaalee naannichaa seerota biyyaalessaa, faayidaa biyyaalessaa, ijaarsa nageenyaa fi naamusa ogummaa gaazexeessummaa irratti leenjii kennuuf karoorfamuu ibsaniiru. Leenjiin kun giddugala loojistikii fi gahumsa miidiyaa Itoophiyaa keessatti kan kennamu ta'uu eeruun, deeggarsi teeknikaa miidiyaaleef taasifamuus cimee akka itti fufu mirkaneessaniiru.

Onkoloolessa 27/2019 (ENA)- Sirni haqaa Itiyoophiyaa humna namaa ga’oomeen, dhaabbilee cimoon, teeknooloojii ammayyaa fi hojmaata gurmaa’een ijaaramaa jiraachuu daarektarri olaanaa inistiitiyuutii seeraa fi haqaa federaalaa ambaasaaddar Daggefee Bulaa ibsan. Inistiitiyuutichi mata duree Itiyoophiyaatti hammattoo seeraa abbaa seerummaa fi hojiirra oolmaasaa jedhuun qooda fudhattoota waliin simpooziyeemii marii gaggeessaa jira. Daarektarri olaanaa inistiitiyuutii seeraa fi haqaa federaalaa ambaasaaddar Daggefee Bulaa Simpooziyeemicharratti akka ibsanitti, sirni abbaa seerummaa hawaasa keessatti bu’ura cimaa kan qabu wabii kabaja heera mootummaa fi namoomaati. Sirni haqaa abbootii murtii qofaan osoo hin ta’iin dhaabbilee cimootiin,humna namaa ga’oomaa , teeknooloojii ammayyaa fi hojmaata gurmaa’een ijaaramaa akka jiru ibsaniiru. Abbootiin murtii seera hojiirra kan oolchan qofa osoo hin ta’iin utubaa cimaa hawaasa biratti wal amantaa kan eeganii fi haqa cimsanii dhaabanidha. Hawaasni ol’aantummaa seeraa eegsisuuf, sirna seeraa irratti amantaa akka qabaatuu fi sirna haqaa ammayyeessuuf, nageenya qaamolee abbaa seerummaa mirkaneessuu akkasumas sirna seeraa fi hojimaataa cimsuun barbaachisaa ta’uu ibsaniiru. Kanaafis, dhaabbatichi qaamolee dhimmi ilaallatu waliin qindoominaan hojjechuun, hayyoota seeraa, qaamolee imaammata baasanii fi hoggantoota dhaabbilee haqaa walitti fiduun nageenya abbootii seeraa fi dhaabbilee haqaa cimsuuf hojjechaa jiraachuu ibsaniiru. Hojimaata abbaa seerummaa teeknooloojii dijitaalaatiin kan deeggarame gochuun sirna odeeffannoo ammayyeessuu fi ba’aa hojii hir’isuu waan dandeessuuf, irratti xiyyeeffatanii hojjechuun barbaachisaa ta’uu akeekkachiisaniiru. Biyya Guddoo, Ummata Guddaa , Mul’ata Guddaa

  Onkoloolessa 27/2019 (ENA) - Ogeeyyiin waraanaa biyyaa Niijer gola hambaa Raayyaa ittisa biyya Itoophiyaa daawwataniiru. Daawwannaan kun gola hambaa waraanaa irratti muuxannoo wal jijjiiruuf kan kaayyeeffate dha. Ogeeyyonni kunneen haala yeroo ammaa gola hambaa fi gola hambaa waraanaa ammayyaa’aa fuulduratti ijaaramuuf karoorfame irratti ibsi bal'aan taasifameeraaf.   daawwattoonni kunneen gama isaaniitiin,gola hambaa Niijeritti ijaaramuuf karoorfame irratti ibsa kan kennan yoo ta'u, daawwannaan kunis hojii fuulduratti hojjetaniif galtee guddaa akka ta'uuf ibsaniiru. Itti gaafatamaan Kutaa man kuusaa fi mana Kitaaba Waraanaa gola hambaa Raayyaa Ittisa Biyya Itoophiyaa Koloneel Tasfaayee Taaddasaa keessummoonni kunniin wanta arganitti gammaduu isaanii ibsuun, dhimmoota fuulduratti waliin hojjetan irratti mari'achuu isaanii dubbataniiru. Daawwannaan kun hubannoo waa'ee seenaa Raayyaa Ittisa Biyya Itoophiyaa qaban akka isaaniif gabbise ibsaniiru. dursaan garee ogeeyyii kanaa Koloneel Siniyar Hamduu Dijiboo gola hambaan Niijeritti ijaaramuuf hojiif muuxannoo guddaa argachuu isaanii ibsaniiru. Dabalataanis, fuulduratti wajjin ta'uudhaan hojiilee hedduu waliin akka hojjetan ibsuu isaanii ragaan Raayyaa Ittisa Biyyaarraa argame ni mul'isa.  

Onkoloolessa 26/ 2019 (ENA)-Bakka bu’oonni mootummoota gamtoomanii fi Itiyoophiyaatti ambaasaaddaroonni biyyoota garagaraa wiirtuu leenjii haaromsaa fi deebisanii damdamachiisuu hidhattoota duraanii naannoo Tigraayitti argamu daawwataniiru. Wiirtuun Maqalee Kanaan dura naannichatti leenjiin haaromsaa fi deebisanii damdamachiisuu hidhattoota duraanii simatee keessummeessaa akka jiru ibsameera. Yeroo ammaa hidhattoonni duraanii kuma 5 fi 300 wiirtuuwwan kana keessatti leenjii haaromsaa leenji’aa jiru. Leenjiin haaromsaa kun hidhattoota duraanii hawaasatti makuun, jireenya idileesaanii akka jiraatan taasisuun gamatti ijaarsa nageenya biyyaa waaraaf gumaacha guddaa gochaa jiraachuun beekameera. Komishinarii komishinii haaromsaa biyyaalessaa Tamasgeen Xilahuun dabalatee hoggantoonni komishinichaa daawwannaa kanarratti argamaniiru.

Onkoloolessa 25/2019 (ENA): Naannoo Harariitti sagantaan nyaata barattootaa ittifufinsaan hojiirra ooluun bu’aan argamaa jiraachuu Pirezidaanti Ordiin Badrii beeksisan. Pirezidaanti Ordiin Badrii mana barumsaa magalaa fi baadiyyaa naannichaa keessatti sagantaa nyaata barattootaa bara barnootaa 2019 eegalchiisaniiru. Pirezidaantichi akka ibsanitti, mootummaan ida’amuu qulqullina barnootaa, hirmaannaa fi bu'aa barattootaa irratti xiyyeeffannoo kennuudhaan hojjechaa jira.   Naannichatti waggoottan darbanitti damichaan hojiiwwan hojjetaman jajjabeessaa ta'uu isaanii dubbataniiru. Keessattuu manneen barnootaa keessatti sagantaan nyaata barattootaa hojjetamu hirmaannaa barnoota barattootaa dabaluu fi addaan kutinsa barnootaa barattootaa hanbisuun bu'aa fidaa jiraachuu ibsaaniiru. Sagantichi dandeettii barnoota fudhachuu barattootaa akka dabalu gochuu irrattis bu'aa fidaa jiraachuu eeraniiru. Mootummaan Naannichaa bara barnootaa 2019f sagantaa nyaataaf baajata birrii miliyoona 46 ol ramaduusaa ibsaaniiru. Kanaan cinaatti sagantichi haadholii waldaan gurmaa'aniif carraa hojii uumuu dhaan galii mataa isaanii akka guddisan dandeessisuu ibsaniiru. Sagantichi baajata mootummaa naannichaatiinii fi hirmaannaa hawaasaatiin cimeen hojiirra oolaa akka jiru kan ibsan pirezidaantichi, itti fufiinsa sagantichaa mirkaneessuuf abbootin qabeenyaa, dhaabbileen deeggarsa kennanii fi qooda fudhattonni deeggarsa meeshaa fi maallaqaa jalqaban akka cimsaanii itti fufan dhaamaniiru. Naannichatti maneen barnootaa magalaa fi baadiyyaa 68 keessatti barattoota mana mabumsaa idileen duraatii hanga kutaa 4ffatti barattoota kuma 40 fi 672 saganticha irraa fayyadamaa akka ta'an odeeffannoon Biiroo Barnoota Naannichaa irraa argame ni mul’isa.

Onkololessa 25 /2019 (ENA): Maqaa haaraa Dhaabbata Miidiyaa Tigraay jedhuun Abbaa Taayitaa Miidiyaalee Itiyoophiyaan hayyama seera qabeessa kan argate Televiizhiniin Tigiraay har’a gara tamsaasa idileetti deebi’eera.   Bu’uura aangoo fi itti gaafatamummaa Abbaan Taayitaa Miidiyaalee Itiyoophiyaa labsii lakk. 1238/2013 qabuun argateen, hordoffii taasisaa tureen dhaabbatichi kanaan dura seeraa fi dambii biyyattii cabsuun,shororkessitoota deeggaruunii fi birmadummaa biyyaa balaarra kan buusu odeeffannoo dogongoraa tamsaasaa turuu himameera. Haaluma kanaan tamsaasa irraa dhorkamee kan ture yeroo ammaa maqaa haaraan gara tamsaasaatti deebi’eera.   Haaluma kanaan Abbaan Taayitaa Miidiyaalee Itiyoophiyaa maqaa haaraa Korporeeshinii Miidiyaa Tigraay jedhuun dhaabbatichaaf hayyama tajaajila tamsaasaa kan kenne yoo ta’u, dhaabbatichi har’a tamsaasaa eegale. Televizhiniin Tigiraay gara tamsaasaatti deebi’uun tajaajilli miidiyaa naannichatti deebi’ee akka eegaluuf carraa bal’aa kan uumu ta’uu abbaan taayitichaa beeksiseera. #Mootummaa Ida’amuu #Biyya Guddoo, Ummata Guddaa # Mul'ata Guddaa Miseensa Maatii Miidiyaa Dijiitaalaa ENA ta’aa https://www.ena.et/web/links  

Onkololeessa 24/2019 (ENA) : Fooyyessi sirna fayyaa Itoophiyaa milkaa'ina deebii yaalaa hatattamaatiif bu'uura ta'uu ministirri ministira fayyaa Itoophiyaa Dr. Maqdas Dhaabaa himani.. Gareen Yaala hatattamaa Biyyaaleessa Itiyoophiyaa beekamtii idil addunyaa sadarkaa 1ffaa Dhaabbata Fayyaa Addunyaa argateera. Yaa’iin Garee Yaala Hatattamaa Dhaabbata Fayyaa Addunyaa 7ffaan yeroo jalqabaaf Itoophiyaatti gaggeeffamaa jira.   Garichi Naannawaa Afrikaatti garee siiviilii isa jalqabaa, akkasuma ulaagaa qophummaa hundaa guute 2ffaa ta’uun boqonnaa seenaa galmeessuu Ministirri Ministira Fayyaa Doktar Maqdas Dhaabaan ibsaniiru. Gareen deeggarsa Yaalaa fi Ittisaa Balaa Itoophiyaa bara 2018 kan hundaa’e yoo ta’u, biyyoota 15 ol keessatti ergama isaa bahachuu fi ogeeyyii ga’umsa qaban 600 ol bobbaasuun tumsaa fi michummaa sadarkaa ardii agarsiisuu himan. Ministeera Fayyaa, Dhaabbata Fayyaa Addunyaa fi michoota biroo waliin qindoominaan hojjechuudhaan, Gareen Yaala Hatattamaa Biyyaalessaa Itiyoophiyaa gara sadarkaa ‘WHO Type-1tti’ akka ce'u taasifamuu isaa ibsameera. Garee yaalaa hatattamaa biyyaalessaa Itoophiyaa dabalatee gareewwan 77 biyyoota 42 irraa Dhaabbata Fayyaa Addunyaatiin beekamtii argataniiru jedhan. Gareen yaalaa hatattamaa siiviilii Afrikaa keessatti sadarkaa idil-addunyaatti beekamtii argate isa jalqabaa ta’uus hubachiisaniiru. Dhaabbanni Fayyaa Addunyaa biyyi kamiyyuu kophaa isaa balaan fayyaa hatattamaa akka hin mudanne hojjechuu isaa itti fufuu mirkaneessaniiru. Dhaabbata Fayyaatti (WHO) dariktarri naannoo Afrikaa Doktar Mahaammad Yaakuub Janaabii Afriikaan konfiraansii ardii kanarratti yeroo jalqabaaf gaggeeffamaa jirurratti akka keessummaa taatee osoo hin taanee hogganaa fi ajandaa kan baastu ta’uun yeroo hirmaachaa kan jirtu ta’uu himaniiru. Afrikaan waggaa waggaan balaawwan fayyaa hawaasaa gurguddoon akka mudatu kan ibsan yoo ta’u, mootummoonni waadaa galan gara karoora biyyaalessaatti akka jijjiiran gaafataniiru. Itti aanaan Daarektarri Olaanaa Inistiitiyuutii Fayyaa Hawaasaa Itoophiyaa Doktar Malkaamuu Abtee akka gama isaaniin, konfiraansichi muuxannoo waliif qooduuf, tumsaafi tarkaanfii waloo irratti murteessaa ta’uu dubbatani.   Inistiitiyuutiin Fayyaa Hawaasaa Itiyoophiyaa Ministeera Fayyaa, dhaabbilee fayyaa naannoo, Dhaabbata Fayyaa Addunyaa (WHO), fi dhaabbilee michuu biroo waliin walitti dhiyeenyaan hojjechuun ajandaa kana ceesisuuf gahee olaanaa taphachuu isaa ibsaniiru. #Biyya Guddoo, Ummata Guddaa # Mul'ata Guddaa #Mootummaa Ida’amuu

Raayyaan Ittisa Biyyaa Itoophiyaa, birmadummaa biyyaa eeguu bira darbee, misooma irratti hirmaachuunii fi tajaajila hawaasummaa kennuun, raayyaa aantummaa uummataa qabu ta’uu isaa gochaan kan mirkaneesse dha. Raayyaa gootaa fi uummataa ta’e kanaaf, kabajaa fi galata kennuun kan maluuf ta’ee osoo jiruu,gantummaan gocha gaddisiisaa dha. Onkololeessa 24 bara 2013 gantummaan irratti raawwatame gantummaa seenaan hin irraanfanne dha. Haata’u malee guyyaan har’a Rayyaan Ittisa Biyyaa Itoophiyaa birmadummaa biyyaa eeguuf halkanii fi guyyaa dachaa fi gaara bu’ee bahaa utuu jiruu gantuudhaan gantummaa seenaan hin dagatamne kan irratti raawwatamee fi cichoominaan bira darbe guyyaa itti yaadatamu ta’uunsaa ni beekama. Guyyaan kun yoo yaadatamu, raayyaa waggoota dhibbotaaf nagaa uummataa, dangaa biyyaa fi hojii misoomaa gargaaraa ture irratti, gantuu keessaatiin gochi farrummaa fi gantummaan seenaan hin daganne raawwatamuun isaa kan yaadatamu dha. Gochi guyyaa sana raawwatame hammeenyummaa fi gocha farrummaa jedhamuun danda’amu ture. Kanaafuu, Rayyaan Ittisa Biyyaa kabajaa fi birmadummaa biyyaaf, akkasumas jaalala fi kabajaa lammiitiif jecha aarsaa kaffale yoomiyyuu hin irraanfatamu. Uummanni Itoophiyaa gocha farrummaa kana balaaleffachuun, raayyaa cinaa dhaabbatee, rayyaan ittisa biyyaa utubaa biyyaati jedhee, deeggarsa isaa gochaan agarsiiseera. Uummanni gocha gantummaa kanaan gadduu fi aarun, garee badisaa kanatti duuluun qolachuu danda’eera. Ministirri Muummee Dr. Abiyyi Ahimad uffata waraanaa uffatanii gara adda waraatti bobba’uun biyya badisarraa oolchan isaanii qaama mudannoo seenaa kanaati. Haata’u malee Onkololessa 24 yoo yaadannu, miseensota raayyaa ittisa biyyaa fi lammiilee guyyaa sana dhumaniif kabajaa kennuun, gantummaan akkasii karoora biyya diiguu ta’uu isaa dhalootni beekaa akka deemu gochuu dha. Rayyaa ittisa biyyaaf kabajaa fi jaalala kennuun, hundi keenya ittigaafatamummaa keenyaa ba’uu qabna.

‎ Onkoloolessa 24/2019 (ENA)-- Walga'ii Fayyaa Hawaasaa Afrikaa 5ffaa magaala Finfinneetti gaggeeffamuuf qophiin taasifamuu isaa Ministeera Fayyaa ibse. Walga'iin Idil-addunyaa 5ffaa Fayyaa Hawaasaa Afrikaa Sadaasa 14 - 18/2019 Finfinneetti akka gaggeeffamuu ni beekama.   Ministirri Fayyaa Doktar Maqdas Dhaabaa, Itoophiyaan walga'iicha gaggeessuuf qophii gahaa taasisuu ibsaniiru. Walga'iin kun tumsa fayyaa biyyoota Afrikaa cimsuu, rakkoolee fayyaa waliinii irratti mari'achuu, oomishaalee fayyaa biyya keessaa guddisuu, dijitaalaayizeeshinii fi tuurizimii fayyaa babal'isuuf kan gargaaru ta'uu ibsaniiru. Daayirektarri Olaanaa Giddu Gala to’annoofi Ittisa Dhukkuboota Afrikaa Doktar Jiyaan Kaasiyaan gama isaaniin, Mootummaan Itoophiyaa qophii milkaa’ina walga'ichaaf taasiseef galateeffataniiru. Walga'icha irratti barruuleen qorannoo saayinsii Kuma tokko ol akka dhiyaatan eegama

Onkoloolessa 22/2019 (ENA)- Sagantaan soorata barattootaa magaalaa Ambootti hojiirra oole qulqullinni barnootaa akka fooyya’uu fi fedhiin barattoonni barachuuf qaban akka guddatu gumaacha taasisuusaa waajjirri barnootaa bulchiinsa magaalichaa beeksise. Sagantaan nyaata barattootaa bara 2014 irraa eegalee magaalaa Ambootti hojiirra oolaa jiru qulqullina barnootaa eeguu fi fedhii barattootaa barachuuf qaban guddisuu keessatti gahee olaanaa qabaachuu itti gaafatamaan waajjirichaa obbo Caalaa Magarsaa ibsaniiru. Bara kana manneen barnootaa idileen duraa fi sadarkaa tokkoffaaa 17 keessatti barattoonni kuma13 fi 970 sagantaa kana irraa fayyadamaa kan jiran yoo ta’u, sagantichaafis baajanni Birrii miliyoona 34 ramadameera. Hawaasni fi Buusaa Gonofaanis hanga ammaatti Birrii miliyoona 7 tuqaa 5 deeggarsa kan taasise yoo ta’u, hawaasni deeggarsa isaa akka cimsu itti gaafatamaan kun waamicha dhiyeessaniiru. Saganticha babal’isuu fi qulqullina barnootaa guddisuuf sadarkaa manneen barnootaa fooyyessuu fi meeshaalee barnootaa barbaachisan guutuufis hojjetamaa jiraachuu eeraniiru. Manni Barumsaa Sadarkaa 1ffaa Sadan Liibaan keessatti barattoonni kuma 2 fi 134 sagantaa nyaata barattootaa irraa fayyadamaa akka jiran daarektarri mana barumsichaa Caalaa Qananii ibsaniiru. Sagantichi keessumaa barattoota maatiin isaanii harka qalleeyyii barnoota isaanii rakkoo malee akka hordofanii fi bu’aa gaarii akka galmeessan gargaaraa jira jedhaniiru. Kana malees, baay’ina barattoota irra deddeebi’anii baratanii, barnoota addaan kutanii, hafanii fi barfatanii hir’isuun, dhibbeentaa darbuus dabaleera. Abbaan barataa Obbo Silashii Milkessaa fi barattuun Kiisee Dabalee gama isaaniitiin, sagantichi baasii fi yaaddoo maatii hir’isuu bira darbee barattoonni xiyyeeffannoo guutuu barnoota isaanii irratti akka xiyyeeffatanii fi bu’aa gaarii akka galmeessan gargaaraa jiraachuu ibsaniiru.

Onkoloolessa 22/2019 (ENA) - Lammii waan hunda guuttate uumuuf kutaan hawaasaa hundi qooda irraa eegamu bahachuu akka qabu kantiibaa Adaanech Abeebee ibsan. Kitaabni “Mili’innat’ jedhamu kan qrataa seenaa fi siyaasaa Dr. Alamaayyoo Aradaan barreeffame eebbifameera. Kantiibaan bulchiinsa magaalaa Finfinnee Adaanech Abeebee wayita kana akka jedhanitti, barreessaan Dr. Alamaayyoo Araddaa yeroo dheeraaf nama ummata tajaajilanidha. Kitaabichi dhugaa yeroo uummata tajaajilaa turan argan kan ibsu ta’uu dubbatanii, yaada wal-qoodinsa uumu dhabamsiisuu, waliin hojjechuu fi seenessa waloo ijaaruun barbaachisaa ta’uu hubachiisa jedha. Humni walitti ida’ame hunda kan fayyadu waan ta’eef, garaagarummaa ciminaatti jijjiiruun akka barbaachisu dubbataniiru. Kalaqni dargaggootaa fi yaadni hayyootaa dhaloota yaada madaalawaa qabu uumuuf murteessaa ta’uu ibsanii, hawaasa guutuu ijaaruun mootummaa qofa osoo hin taane hirmaannaa qaamolee hawaasaa hunda akka gaafatu hubachiisaniiru. Kitaabichi yaadama ida’amuu cimsuun dhalootaaf karaa ifaa kan agarsiisuu fi yaadni walitti ida’ame hawaasa guutuu akka ijaaru agarsiisa jedhaniiru. Qorataa seenaa fi siyaasaa Dr. Alamaayyoo Araddaa gumaacha taasisaniif galateeffataniiru. Barreessaan kitaabichaa, qorataan seenaa fi siyaasaa Dr. Alamayyoo Araddaa, kitaabichi galteewwan hawaasa guutuu ijaaruuf barbaachisan dabarsuuf kan qophaa’e ta’uu ibsaniiru. Itiyoophiyaan yeroo dheeraaf walitti bu’iinsa yaada siyaasaa fi Ayidiyooloojii keessa turuu yaadachiisanii, yeroo ammaa garuu karaa namoomaa hordofaa akka jirtu dubbataniiru. Hayyoonni kitaabicha irratti yaada kennanis, kitaabichi hawaasa guutuu ijaaruuf yaadota furmaataa adda addaa kan dhiyeessuu fi gara fuulduraatti ce’uuf kan gargaaru ta’uu ibsaniiru. Kitaabichi kutaa afurii fi boqonnaa 16 kan qabu yoo ta’u, fuula 328 irratti qophaa’ee dubbistootaaf dhiyaateera. Yunivarsiitii pabiliik sarviisii Itiyoophiyaatti diiniin kolleejii qorannoo misooma saayinsii hawaasaa Dr. Waaqgaarii Nagarii, kitaabichi jaarraa 21ffaa wajjin wal-simuun akkamitti tarkaanfachuu akka qabnu kan agarsiisu ta’uu ibsaniiru. Kitaabichi yaada Ida’amuu kan cimsuu fi dhalootaaf ifa kan agarsiisu ta’uu kaasaniiru. Qorataan Saayinsii Hawaasaa fi dhimmoota daldalaa Damsee Gaaramaw gamasaaniin, yaadni walitti ida’ame guutummaa kan fiduu fi hawaasa guutuu ijaaruuf gahee olaanaa akka qabu kitaabichi bal’inaan kan ibsu ta’uu dubbataniiru. Kitaabichi kallattiiwwan furmaataa garaagaraas kan agarsiisu ta’uu hubachiisaniiru. Kitaabni ‘Milu’innat’ jedhu kutaa afurii fi boqonnaa 16 kan qabu yoo ta’u, fuula 328’n qophaa’ee dubbistootaaf dhiyaateera.

Onkolooleessa 21/2019 (ENA Godina Kibba Lixa Oromiyaatti Ayyaanni Irreecha Malkaa Daabanaa bakka Birbirsa Lakkuutti karaa duudhaa ayyaanichaa eegeen kabajameera. Ayyaanicharratti kan argaman Abbaan Gadaa Maccaa Abbaa Gadaa Warqinaa Tarreessaa Irreechi eenyummaa Oromoo agarsiisuun alatti waliin jireenya Oromoo fi saboota biro kan cimsu ta’uu ibsaniiru. Duudhaaf aadaan Oromoo madda dimokraasiif safuuf nagaa waan ta'eef dhaloonni ammaas duudhaa Oromoo ganamaa fudhachuuf dagaagsuun ittifayyadamuu qaba jedhaniiru. Abbootiin Gadaa fi hirmaattotni ayyaanichaa duudhaa ayyaana irreechaa dagaagsuuf dhalootatti dabarsuuf kan hojjetan ta’uu ibsaniiru. Koomunikeeshinii Godinichaarraa #Biyya Guddoo, Ummata Guddaa # Mul'ata Guddaa  

Ministirri Muummee Dr. Abiyyi Ahimad Kitaaba Ida’amuu afaan Raashiyaatti hiikamee dubbistootaaf dhiyaate irratti argamuun ergaa dabarsaniir. Kitaabni kuni dubbistootaaf dhiyaachuu isaas karaa fuula miidiyaa hawaasaa isaaniin ibsaniiru. Ergaan isaanii akka itti aanutti dhiyaateera.   Har’a kitaabni Ida’amuu gara afaan Raashiyaatti hiikamee dubbistootaaf dhiyaateera. Sagantaa eebba kitaabaa irratti qaamaan argamuun gammachuu guddaan natti dhagahameera. Bu’aan seena qabeessa kun falaasamni Ida’amuu beekumsa dhalootaan Itoophiyaa keessaa bahee amma daangaa ce’ee addunyaa guutuutti babal’achaa akka jiru ragaa jiraataadha. Yeroo darbe kitaabni kun afaanota biyya keessaatiin alatti gara Ingiliffaa, Chaayinaa fi Arabiitti hiikamee dubbistoota bal’aa bira ga’uu isaa ni yaadatama. Amma garuu yaadni Itoophiyaa daangaa ce’ee balbala lammiilee Raashiyaa bal’aa bira ga’uun isaa, qaqqabummaa addunyaa fi hiika dippilomaasii falaasama kanaa daran guddiseera. Tarkaanfiin kun falaasamni, duudhaalee fi yaadni ida’amuu Itoophiyaan ala ummatoota biroo bira ga’uuf carraa haaraa uumuu qofa osoo hin taane, Itoophiyaan yaada bilchaataa mataa ishee addunyaaf gumaachuu qabdu ta’uu qabatamaan kan agarsiisudha. Akkuma Raashiyaan lammiilee Itoophiyaa hedduudhaaf lafa ogbarruu fi beekumsaa taatee tajaajilaa turte, amma yaadni Itoophiyaa afaan Raashiyaatiin dubbistoota Raashiyaa bira gahuun waljijjiirraa beekumsaati. Tattaaffii fi of kennuu ogeeyyiin miidiyaa fi hoggantoota dhaabbata ‘Russia Today’ (RT) milkaa’ina kana taasisaniifi qophii kitaabichaaf gumaacha guddaa godhan baay’een dinqisiifadha. Boqonnaan seenaa haaraan kun beekumsa, aadaa fi falaasama dhalootaan Itoophiyaa badhaadhaa ta’e waltajjii idil-addunyaa irratti daran guddisuu fi riqicha aadaa fi sammuu cimaa ummatoota gidduutti ijaaruu keessatti gahee olaanaa qaba. #Mootummaa Ida’amuu #Biyya Guddoo, Ummata Guddaa # Mul'ata Guddaa Miseensa Maatii Miidiyaa Dijiitaalaa ENA ta’aa https://www.ena.et/web/links

Onkoloolessa 16/2019 (ENA) Kantiibaan magaalaa Finfinnee Adaanech Abeebee sagantaa qubsuma namaa mootummoota gamtoomanii waliin misooma waaraa Finfinnee cimsuuf walii galtee mallatteessaniiru. Waliigaltichi magaalaatti odeeffannoo walitti qabuu fi xiinxaluu, hordoffii bu’aalee misoomaa, qophii pilaanii caasaa 11ffaa, gatii madaalawaan mana dhiheessuu fi qophiilee magaalichatti COP32 waliin wal qabatan irratti kan xiyyeeffatedha. Tumsi kun bulchiinsa magaalaa fooyyessuuf, carraalee invastimantii babal’isuu fi haala jireenya jiraattotaa cimsuuf kan gargaarudha.

Onkoloolessa 16/2019 (ENA)- Itiyoophiyaan koree fannoo diimaa idil addunyaa waliin tumsa dhimmoota namoomaarratti qabdu cimsuuf qophii ta’uushee pirezidaanti Taayyee Atsqasillaasee ibsan. Pirezidaanti Taayyee Atsqasillaasee daarektara koree naannoo Afriikaa Mamaduu Sowu fi jilasaanii waliin mari’ataniiru. Itiyoophiyaan koree fannoo diimaa idil addunyaa waliin tumsa yeroo dheeraa qabduuf iddoo guddaa akka kennitupirezidaantichi ibsaniiru. Itiyoophiyaan dhimmoota namoomaarratti koricha waliin tumsa qabdu cimsitee akka itti fuftu mirkaneessaniiru.

Onkoloolessa 16/2019 (ENA) Manneen barnootaa Bulchiinsa magaalaa Maqalee jalatti argaman hundatti hojiin baruu fi barsiisuu irra deebi’amee eegalameera. Manneen barnootaa sababa garee seeraan alaa TPLFn addaan citee ture hojiin barnootaa deebi’ee eegalamuun isaa; barattoonni gara gabatee barnootaa isaaniitti akka deebi’anii fi hojiin barnootaa adda cite akka itti fufu ta’eera. Magaalichaitti hojiin baruu fi barsiisuu har’a Onkoloolessa 16 bara 2019 irraa eegalee irra deebi’ee kan eegale yoo ta’u; kunis addaancitinsi barnoota irratti uumamee ture hambisuudhaan barattoonni barnoota isaanii akka itti fufan ni gargaara. Hojiin barnootaa eegalamuun isaa magaalaa Maqalaatti dhaabbileen barnootaa tajaajila idilee isaaniitti deebi’uu isaanii mirkaneessuu fi itti fufinsa barnootaa barattootaaf tarkaanfii barbaachisaa ta’uunsaa ibsameera.

Guyyaa ayyaana Raayyaa Ittisa Biyyaa 119ffaa irratti lammilee karaa add addaatiin raayyaichaaf gumaacha taasisaniif badhaasni miseensummaa kabajaa raayyaa ittisa biyyaa kenname Guyyaa ayyaana Raayyaa Ittisa Biyyaa 119ffaa irratti lammilee dhuunfaa isaaniitiin miidiyaa hawaasaa irratti dhiibbaa uumuudhaan, miidiyaalee add addaatiin akkasumas biyya alatti dabalatee raayyaa sana bira dhaabbachuun gumaacha ol’aanaa taasisaniif beekamtiin miseensummaa kabajaa Raayyaa Ittisa Biyyaa kennameeraaf.   Miseensonni kabajaa kunis Itaamaajoorshuumii walii gala raayyaa ittisaa FDRI Fiildi Maarshaal Birhaanuu Juulaa irraa beekamtii miseensummaa kabajaa Raayyaa Ittisa Biyyaa kana fuudhaniiru. Isaanis :   Obbo Afawarqi Badawwii Hasan Obbo Biiniyaam Geetaachaw Warqee Obbo Birruuk Asaffaa Balaay Obbo Daawwit Kahasaay Kalal Duree Fireehiywoot Yihaannis Somaa Aadde Hiriyyaa Dhufeeraa Balachaaw Obbo Jawaar Adam Umar Obbo Mu’aaz Ga/hiwoot Wa/sillaasee Obbo Taayyee Bogaala Aregaa Obbo Yohaannis Biniyaam I/tsiyoon Beekamtii miseensummaa kabajaa Raayyaa Ittisa Biyyaa kana argataniiru.  

  Onkoloolessa 13/2019(ENA) Boordiin Bulchiinsaa Yuunivarsiitii Finfinnee guddina sadarkaa piroofeesarummaa guutuu mirkaneesseera. Boordichi murtoo kana kan dabarse walga'ii kaleessa gaggeessaniini. Guddinni sadarkaa kun bu'aalee fi gumaacha ol'aanaa hayyoonni kunniin barnoota fi tajaajila akadaamii, qorannoo fi tajaajila hawaasummaa irratti galmeessan irratti hundaa'uun kan kenname ta'uu yuunivarsiitichi beeksiseera. Bu’uuruma Kanaan: Dr.Abrahaam GabreeTekkaaleenyi – Istiraakcharaal Injiinaringiin, Dr.Adaanee Bitaw Tagnyi– Medikaal Maayikiroobaayoolojiitiin, Dr. Adeey Felleqee Dastaa–Invaayiroonmentaal Maayikiroobaayoolojiin, Dr. Dassaaleny Yaayyeehii Ayyaal – Diizaaster riski manaajimantiin, Dr. Haayileli'uul Nugusee Dubbaalee – Veeterinaarii Eepideemiyaalojii Dr. Kaasaa Mikaa'el W/Yesuus – Barnoota Herregaa Dr. Salamoon Gannet Gabree – Baayyookeemistrii Dr. Salamoon Ara'aayaa Kaasaa – Barnoota Waliigalaa (General Education) Dr. Yaregaal Assaabee Laaqee – Arfiishaala Intaallajensii Dr. Yedilfaanaa Sexxe'argee Mekonnin – Fiizikaal Keemistrii (Physical Chemistry) Milkaa'inni kun gumaacha yuunivarsiitichi fooyyinsa akkadaamii, qorannoo fi kalaqa haaraa akkasumas tajaajila hawaasaaf kennaa jiruus fi kanaan dura kennees kan agarsiisu ta'uun ibsameera. Yuunivarsiitiin Finfinnee hayyoota sadarkaa ol'aanaa akkadaamiikii kanaaf ga’aniif baga gammaddan jechuun, fuulduraafis milkaa'ina akkadaamii, qorannoo fi tajaajila jalqabame kana cimsuun akka itti fufsiistan waamicha dhiyeesseera