Hagayya 4/2018 (ENA): Itoophiyaan Shaampiyoonaa Addunyaa Umurii 20 gadiitin Meedaaliyaa 6 Argachuun dorgommii ishee xumurteetti. Halkan edaa sagantaa guyyaa dhumaa gaggeeffameen gosa dorgommii fiigicha meeitra 1500 koorniyaa lamaaniin kan hirmaatte Itoophiyaan, meedaaliyaa argachuu hin dandeenye. Dorgommii dubartootaan Elsaabeet Amaaree 4ffaa, Haragawayin Kaalaayuu 9ffaa ta'uun xumuraniiru. Dhiiraan immoo Dastaa Taaddee sadarkaa 12ffaa qabachuun xumureera. Itoophiyaan walumaagalatti medaaliyaa Warqee 2, Meetii 3 fi Nahaasa 1 argatteetti. Waggaa lamaan dura dorgommii walfakkaataa Peeruu, Liimaatti gaggeeffameen Itoophiyaan medaaliyaa warqee 6 dabalatee walumaagalatti medaaliyaawwan 10 argachuun xumuruun ishee ni yaadatama. Dorgommii baranaatiin biyyi qopheessituu turte Ameerikaan medaaliyaawwan 24 walitti qabachuun sadarkaa jalqabaatiin xumurteetti. Keeniyaan medaaliyaa 11’n sadarkaa 2ffaa kan qabatte yoo ta'u, Itoophiyaan Addunyaarraa 5ffaa, Afrikaa irraa immoo sadarkaa 2ffaa qabachuun dorgommii ishee xumurteetti. #Ena Afaan Oromoo #TOI #Ena #

Hagayya 3/2018 (ENA) Dorgommii Atileetiksii Addunyaa 21ffaa Amerikaa Oregoonitti gaggeefamaa jiruun Itoophiyaan madaaliyaa warqee lammaffaa argatteetti. Dorommii Fiigicha meetira 3000 umrii 20 gadii atileetiksii addunyaa irratti dorgomameen Atileeti Yordaanos Tsiggaa’ab madaaliyaa warqee mo'atteetti. Atileetiin kun sa'aatii fooyya'aa dhuunfaa ishee 8:43.65 galmeessuudhaan biyya isheetiif madaaliyaa warqee argamsiisteetti. Atileetiin kan biraan Shittoo Gumii sa'aatii 8:45.06n lammaffaa ba'uudhaan madaaliyaa meetii (biirrii) argamsiisteetti. Atileetiin kun waldorgommmii meetira 5000tiinis madaaliyaa meetii argachuun ishee ni yaadatama. Shampiyoonaan Atileetiksii Addunyaa Umrii 20 Gadii Amerikaa Oregoonitti gaggeefamaa jiru har'a kan xumuramu ta'a. Itoophiyaan dorgommii kanaan madaaliyaa warqee 2, meetii(birrii) 3 fi meedaaliyaa naasii 1 argachuun gabatee madaaliyaatiin sadarkaa 3ffaa irratti argamti

Hagayya 2/2018 (ENA): Kilabiin Kaaba Landan Arsenaal taphataa sarara gidduu lammii Biraazil ganna 28 Biruunoo Gumaareesh Niwukaastil Yunaayitid irraa jijjiirraa isaa xumuruu isaa har'a beeksise.   Shaampiyoononni Piriimiyerliigii ammaa taphatichaaf kaffaltii paawundii miiliyoona 75 kan kaffalan yoo ta'u, Gumaareesh waggaa afuriif mallatteessee waggaa dabalataa filachuu danda'a. Garee Miikel Arteettaa keessatti shamizii lakkoofsa 39 uffatee taphata. Biruunoo Gumaareesh qormaata haaraa mudatee waancaa gurguddaa injifachuuf gara Arsenaalitti makamuu akka barbaadu dubbateera. Taphataan ganna 28 kun akka lakkoofsa warra Awurooppaatti ji'a Adoolessa 2026tti Arsenaalitti makamuuf waliigaltee dhuunfaa isaa kan mallatteesse ta’uun ni yaadatama. Taphataan kun bara 2022tti kilaba Keliyoon irraa gara Niwuukaastil yunaayitiditti jijjiramuun taphachaa tureera. Biruunoo Gumaareesh Kiristoos Zoolisii fi Ilaan Meesliyer hordofuun taphataa 3ffaa jijjiirraa ganna kanaan Arsenaalitti makame ta'eera. #Ena Afaan Oromoo #TOI #Ena #

Adoolessa 13/2018 (ENA): Ispeen tapha xumuraa waancaa addunyaa 23ffaa irratti Arjentiinaa 1 fi 0’n injifatte. Taphichi Niiw Yoorkitti Istaadiyeemii Niiw Jeersii keessatti kan gaggeeffame kun yeroo xapha idilee booda goolii malee qixa xumurame. Taphataan sarara gidduu Arjentiinaa Enzoo Fernandez daqiiqaa 93ffaa irratti kaardii keelloo lamaa fi kaardii diimaa erga argateen booda dirreedhaa lakkisee baheera. Gareen kunneen daqiiqaa 90 booda osoo hin injifatiin gara sa'aatii dabalataatti seenaniiru. Taphataan jijjiirraa Feeraan Toorees daqiiqaa 106ffaa irratti goolii injifannoo galcheera. Ispeen tapha kana irratti ol'aantummaa qabattee jirti. Goolii eegaa Arjentiinaa Emiliyaanoo Maartineez kubbaa hedduu qusachuu danda'eera. Morkattoonni Arjentiinaa tapha kana irratti ga’umsa gaarii agarsiisaniiru. Gareen kun carraa goolii galchuu tokkollee uumuu hin dandeenye. Bu'aa kana hordofuun Ispeen waancaa addunyaa ishee lammaffaa injifatte. Biyyi Awurooppaa kun waancaa addunyaa 19ffaa akka lakkoofsa Awurooppaa bara 2010 Afrikaa Kibbaatti gaggeeffame irratti injifchuun ishee ni yaadatama. Arjentiinaan ulfina waancaa addunyaa ishee itti fufsiisuuf turte hin dandeenye. Abjuun isaanii yeroo 4ffaaf waancaa kana injifachuuf qaban diigameera.

Adoolessa 4/2018 (ENA)- Ciminni Ispoortii ummataa dhaloonni fayyaa buleessi akka jiraatu gochuun olitti duudhaa waloomaa kan guddisu ta’uu komishiniin ispoortii naannoo Hararii beeksise. Magaalaa Hararitti kan argamu bakka bashannanaa Abaadir Pilaazaatti sosochiin qaamaa gaggeeffameera. Hoggantoonni olaanoo naannichaa, qopheessitoonni fiigicha guddichaa Itiyoophiyaa, hojjettoonni waajjiraalee sektarootaa, dargaggoonni, daa’immanii fi jiraattonni magaalaa hedduun saganticharratti argamaniiru. Komishinariin komishinii ispoortii naannichaa obbo Muraad Abdii wayita kana akka jedhanitti, sosochiin ga’umsa qaamaa cimina qaamaa guddina sammuu akkasumas lammii fayya buleessaa fi ga’oomaa horachuuf faayidaa inni qabu ibsaniiru. Sosochiin ga’umsa qaamaa faayidaa fayyaarra darbee duudhaa waloomaa lammiilee kan guddisuu fi dhaloota ofitti amanu bocuuf faayidaa olaanaa akka qabu dubbataniiru. Hojiiwwan ispoortii kana fakkaatan cimanii akka itti fufan komishinarichi hubachiisaniiru. Komishinariin komishinii turizimii naannoo Hararii Saamii Abdulwaasii gamasaaniin, damee turizimii naannichaa guddisuuf misoomni kooriidarii fi hojiiwwan eegumsa hambaa bal’inaan hojjetamaniiru jedhaniiru. Haala Kanaan hambaalee balaarra jiran baraaruuf gargaaruurra darbee, magaalaa Harar jiraattotaa fi daawwattootaaf caalaatti miidhagduu, hawattuu gochuun danda’amuusaa eeraniiru. Adoolessa 12 bara 2018 naannichatti mata duree “Fiigicha golambaa jiraataatti” jedhuun dorgommiin sadarkaa guutuu biyyaatti akka gaggeeffamu eeranii dorgommichi turizimii ispoortii beeksisuuf hojii hojjetamu keessaa tokko ta’uu dubbataniiru.

Waxabajjii 23/2018(ENA): Taphoota moo’anii darbuu Waancaa Addunyaa morkiin har’a Kootdivuwaar Noorweey waliin taasiftu ni eegama. Biyyoonni lamaan morkiin har’a galgala sa’aatii 2:00 eegalee waliin taasisan hawwiin eegama. Yeroo jalqabaaf har’a kan waliin taphatan biyyoonni kunneen marsaa itti aanutti darbuuf morkii cimaa taasisuun eegama.   Akkasuma halkan sa’aatii 6:00 eegalee Faransaay Siwiidiin waliin taphatti. Biyyoonni lamaan taphoota kana dura waliin taphatan 24 keessaa Faransaay yeroo 12 yoo injifattu, Siwiidiin si’a 6 injifachuun, taphoota 6 ammoo qabxii qooddataniiru. Taphoota halkan edaa fi barii kana taphatamaniin Paaraaguwaay Jarman injifachuun, Moorokoon ammoo Neezarlaandis injifachuun marsaa itti aanuuf darbaniiru.

Waxabajjii 22/2018 (ENA): Itiyoophiyaa giddu-gala ispoortii Afriikaa fi Addunyaa taasisuuf hojiileen misooma dippilomaasii fi bu'uuraalee misooma ispoortii raawwatamaa jiraachuu Ministeerri Aadaa fi Ispoortii beeksise. De’eetaan Ministira Aadaa fi Ispoortii Makiyyuu Mahaammad ENA’f akka ibsanitti,jijjiirramaa booda damee misooma ispoortiif xiyyeeffannoon kenname jijjiirrama dachaa galmeessisuu danda’eera jedhani. Waltajjiiwwan Idil-Addunyaa irratti bakka bu'insa Itiyoophiyaa guddisuudhaan bifa biyyattii ijaaruu fi dippilomaasii ispoortii jabeessuuf hojjetamaa jira jedhaniiru. Kanaanis hoggantoonni waldaalee Ispoortii biyyaalessaa 14 sadarkaa Ardii fi Idil-Addunyaatti hogganaa ta'anii tajaajilaa akka jiranii fi hojiin kun cimee akka itti fufu dubbataniiru. Itiyoophiyaanonni waltajjii dorgommii ispoortii Idil-addunyaa irratti hirmaannaa fi bu'aa qabeessummaan isaanii dabalaa jiraachuu isaas ibsaniiru. Itiyoophiyaan sagantaalee Ispoortii sadarkaa Ardii fi Idil-Addunyaa keessummeessaa jiraachuu ishee eeranii, kunis bifa biyyattii ijaaruu keessatti shoora olaanaa akka qabu ibsaniiru. Finfinnee giddu-galeessa sagantaalee isportii Afriikaa fi addunyaa gochuudhaan Itiyoophiyaa damee kanaan caalaatti fayyadamtuu taasisuuf xiyyeeffannoodhaan hojjetamaa jira jedhan. Kanaafis hojiileen babal'isuu bu'uuraalee misooma ispoortii sadarkaa isaanii eeggatan raawwatamaa jiraachuu kaasanii, Istadiyeemoonni gurguddoon shan sadarkaa idil-addunyaa akka guutan hojjetamaa jira jedhaniir

Waxabajjii 21/ 2018 (ENA): Taphoonni ramaddii waancaa addunyaa 2026 qopheessummaa Ameerikaa, Kaanaadaa fi Meeksiikoon taphatamaa turan xumurameera. Ramaddii isaaniirraa biyyoonni sadarkaa 1ffaafi 2ffaan xumuran kallattiin akkasumas biyyoonni dabalataa 8 ammoo sadarkaa 3ffaa filatamoo ta’uun taphoota mo’anii darbuu 32’tti makamaniiru. Haaluma Kanaan taphni mo’anii darbuu tapha’a har’a galgala sa’aatii 4:00 irraa eegalee Kaanaadaafi Afrikaan Kibbaa taphataniin eegala. Ramaddii 3ffaa irraa olaantummaan kan xumurte Biraazil Jaappaan waliin akkasumas ramaddii 5ffaa irraa mo’attee kan darbite Jarman Paaraaguwaay waliin ramadamaniiru. Kana malees Neezerlaandii fi Moorookoo, Kootdiivaar fi Noorweey, Faransaay fi ISwiidiin, Meeksiikoofi Ikkuwaadoor, Ingiliz fi RD Koongoo akkasumas Beeljiyeem fi Seenegaal kan waliin taphatan ta’u. Ameerikaa fi Boosniyaan, Ispeen fi Oostiriyaan, Poorchugaal fi Kirooshiyaan, Siwiizarlaandii fi Aljeeriyaan, Awustaraaliyaafi Ijipt, Arjentiinaafi Keeppi Verdeen akkasumas Kolombiyaafi Gaanaan waliin ramadamaniiru.

Waxabajjii 10/2018 (ENA): Federeeshiniin Atileetiksii Itiyoophiyaa sirna dijitaalaa haaraa ataileetota lafaa dhufeeyyii filachuu fi hordoffiif tajaajilu dhaabbataadhaan hiiku hojiirra oolchuuf hojjechaa jiraachuu beeksise. Akkasumas, teeknooloojiin dijitaalaa dhimmoota umurii wajjin walqabatan furuu keessatti gahee olaanaa akka qabu agarsiiseera. Itiyoophiyaan biyya atileetota gootota taate, injifannoo ijoolleen ishee galmeessisaniin maqaa ishee beekamtii fi alaabaa ishee dirree addunyaa irratti ol kaasaa jirti. Haa ta'u malee yeroo dhiyoo asitti bu'aan eegamu gama atileetiksiitiin galmaa'uu dhabuun isaa ni himama. Milkaa’ina atileetiksii idil-addunyaa Itiyoophiyaa eegsisuuf jecha atileetota itti aanan oomishuun dhimma xiyyeeffannoo argachuu qabu ta’uun isaa ifaadha. Hojii gaggeessaan olaanaa Federeeshinii Atileetiksii Itiyoophiyaa Dr. Amansiisaa Kabbadaa ENA waliin turtii taasisaniin akka himanitti, milkaa’ina itti fufiinsa qabu damichaa mirkaneessuuf atileetota dargaggoota irratti xiyyeeffachuun hojii hin hafnee fi murteessaa ta’uu ibsaniiru. Kanaaf Federeeshiniin Atileetiksii atileetota itti aanan bu’a qabeessa ta’anii fi biyyaaf ulfina fidan oomishuuf tooftaalee adda addaa qopheessaa fi hojiirra oolchaa akka jiru akeekaniiru. Federeeshinichi pirojektoonni akka biyyaatti hordofu sirna madaallii wal irraa hin cinne akka hordofan hojii jalqabuu isaa, akkasumas bu’a qabeessummaan pirojektootaa guddifamee atileetota dargaggoota oomishuuf akka ta’e hubachiisaniiru. Sirni haaraan kun rakkoolee adeemsi madaallii gaarii hin taanee fi pirojektoota keessatti deeggarsa maallaqaa yeroodhaan argachuu dhabuun mul’atu fureera jechuun hubachiisaniiru. Pirojektoota keessatti atileetota dargaggootaa itti dhiyeenyaan hordofuu fi atileetota gahumsa qaban oomishuuf sirni dijitaalaa hojiirra oolaa jiraachuu akeekaniiru. Sirni dijitaalaa kun keessumaa gufuulee umuriin walqabatan sirreessuun atileetiin tokko umurii isaaf malu irraa akka hirmaatu kan taasisu ta’uu ibsaniiru. Sirni dijitaalaa kun guutumaan guututti hojirra yommuu oolu dargaggoota atileetota gahumsa qaban akka dorgomanii fi biyya bakka bu’an jajjabeessuu keessatti ga’ee ol’aanaa qaba jedhaniiru. #TOI #ENA Afaan Oromoo #  

Waxabajjii 8 /2018 (ENA): Sagantaa lammaffaa ramaddii shanaffaa Waancaa Addunyaa FIFA 23ffaa irratti Kootdivowar Ikuwaadooriin 1 fi 0'n mo’atteetti. Tapha halkan walakkaa Istadiyeemii Fiilaadelfiyaatti taasifameen, taphataan jijjiiramee seene Amaadii Diyaaloo daqiiqaa 90ffaa irratti goolii injifannoo lakkoofsiseera. Biyyi Afriikaa Kootdivowar tapha kanaan carraawwan goolii argamsiisan fooyya'oo ta'an uumtee turte. Ikuwaadoor dambalii kubbaa harka qabaachuu irratti caalmaa haa qabaattu malee, yaalii goolii kallattii isaa eege tokko qofa qofa taasifteetti. Kootdivowaar Waancaa Addunyaa baranaatiin biyya Afriikaa injifannoo galmeessite ishee jalqabaa taateetti. Seenaa Waancaa Addunyaa keessatti yeroo jalqabaatiif biyyoonni Afriikaa 10 hirmaachaa jiru. Ramaddii Shanaffaa kanaan tapha kaleessa taasifame biraatiin, Jarman Kuraasa’aan 7 fi 1n injifatteetti. Gara fuulduraatti taphni ramaddii Jarmanii fi Kootdivowaar gidduutti taasifamu kan eegamu dha. Ikuwaadoor fi Kuraasaa’oo sagantaa ramaddii lammaffaa kanaan tapha biraa kan taasisan ta'a.

Waxabajjii 8 /2018 (ENA): Sagantaa Waancaa Addunyaa FIFA 23ffaa irratti Neezerlaandisii fi Jaappaan lama fi lamaan qixa bahan. Istaadiyaamii Daalaasitti tapha jalqabaa Ramaddii 6ffaa galgala taasifameen,Varjiil VaanDaayik fi Kireesensiyoo Saamarviil Neezerlaandisiitiif galchiiwwan lakkoofsiseera. Keetoo Naakamuraa fi Daachii Kaamaadaa immoo galchiiwwan Jaappaaniif galchaniiru. Galchiin Kaamaadaa daqiiqaa 88ffaa irratti lakkoofsise Jaappaaniin qixa taasiseera. Gooliiwwan afran keessatti galchan, tapha walakkaa lammaffaa keessa sochii gaarii taasifameeni. Biyyoonni lamaan ramaddii 6ffaa keessatti qabxiisaanii jalqabaa argataniiru. Ramaddii kanaan biyyi Siwiidin fi Tuuniziyaa waliin barii sa'aatii 11:00 irratti Istadiyaamii Moontireeyitti tapha isaanii taasisaniiru.

Waxabajjii 7/2018 (ENA) — Milkaa'inni bu'uraalee misooma iddoowwan ispoortii Finfinnee, guddattoonni gahumsa ispoortii isaanii akka gabbifatan bu'uura guddaa kaa'uusaa Biroon Dargaggootaa fi Ispoortii Magaalaa Finfinnee beeksise. Magaalittii keessatti pirojektoonni koriidaraa fi lageen qarqaraa miidhagoon ijaaraman, bu'uraaleen misooma iddoowwan ispoortii hedduun akka ijaaraman dandeessiseera. Iddoowwan ispoortii ijaaraman kunneenis, naamusaa fi eenyummaa dargaggoota magaalattii ijaaruun, dandeettii ispoortii isaanii akka gabbifataniif haala mijataa uumeera. Kunis hanqina iddoowwan ispoortii furuudhaan, dameewwan ispoortii hundaan dargaggoota bakka bu'oo ta'anii fi gahumsa qaban horachuuf haala mijataa uumaa jira. Hogganaan Biiroo Dargaggootaa fi Isportii Finfinnee Obbo Assagidaw Hayilagoorgis ENA'f akka ibsanitti; milkaa'inni misooma magaalattii ijaarama bu'uraalee misooma ispoortiitiif haala mijataa uumuu isaa eeraniiru. Bu’aan Misooma miidhagsuu Finfinnee kunis, ispoortessitoota dorgamtootaa fi gahumsa qaban horachuu kan dandeessisan, gidduu galaa fi iddoowwan ispoortii bu'a-qabeeyyii ta'an akka ijaaraman gochuu isaa dubbataniiru. Kanaanis, jijjiirama biyyaalessaa booda, guddattoota ispoortessitoota gahumsaa fi qulqullina qaban horachuu kan dandeessisan, bakkeewwan shaakala ispoortii kuma 2 fi 581 ijaaramuusaanii dubbataniiru. Ijaarsi iddoowwanii fi gidduugalli ispoortii kunis, manneen barnootaa, dhaabbilee leenjii ogummaa fi teeknikaa, dhaabbata fayyaa dabalatee, naannawa jireenya uummataa keessattis pirojektoonni bu'uraalee misooma ispoortii hirmaachisoo ta'an ijaaramuusaanii hubachiisaniiru. Gidduugalli leenjii fi iddoowwan ispoortii magaalattii, isportessitoota bakka bu'oo horachuu bira dabree, faayidaa hawaasummaa fi dinagdee damee hedduu argamsiisaa akka jiran kaasaniiru. Lammii naamusa gaariin bocame horachuu keessattis, dargaggoonni fi ijoolleen yeroo isaanii bakka hin mallee fi faayidaa hin qabneerraa akka fageeffatan haala mijataa uumuusaa eeraniiru. Iddoowwan ispoortii Finfinnee kanneen ammayyaa fi sadarkaa isaanii eeggatan, Itiyoophiyaan dorgommiiwwan idil-addunyaa keessummeessuuf dandeettii akka argattu kan taasisan ta'uusaa ibsaniiru. Yeroo ammaas, gidduugala leenjii fi iddoowwan ispoortii kanaan guddattoonni leenjifaman, gara kilaboota adda addaa fi garee biyyaalessaatti sadarkaa isportii ol'aanaatti ce'aa akka jiran ibsaniiru. Kunis, misooma isportii Itiyoophiyaa keessatti faayidaa guddaa buusuun, guddattonni dandeettii ispoortii isaanii akka gabbifatan bu'uura kaa'amuu isaa kan agarsiisudha jedhaniiru. Gara fuulduraattis, ispoortessitoota bakka bu'oo horachuu kan dandeessisan, hojiin ijaarsa bu'uraalee misooma giddugala leenjii fi iddoowwan ispoortii cimsee kan itti fufu ta'uu mirkaneessaniiru.

Waxabajjii 6/2018 (ENA): Finfinneen dorgommii ispoortii Afriikaa fi idil-addunyaa keessummeessuuf magaalaa filatamtuu ta’uu Waajjirri Kantiibaa beeksise. Bulchiinsi Magaalaa Finfinnee xiyyeeffannoo addaa damee ispoortii fi ijaarsa bu’uuraalee ispoortii gurguddaa raawwateen wiirtuu ispoortii filatamaa ta’uu agarsiiseera. Giddu-galli ispoortii ummataa fi dargaggootaa waggoota darban keessatti magaalattii keessatti ijaaraman 1,580 ol ta’an hirmaannaa hawaasummaa guddisuu qofa osoo hin taane dorgommiiwwan biyyaalessaa fi idil-addunyaa keessummeessuuf bu’uura guddaa ta’uu ibsameera. Magaalattiin dorgommiiwwan ispoortii idil-addunyaa adda addaa, atileetiksii, fiigicha daandii fi kanneen biroo dabalatee, fiigicha Walakkaa Maaraatoonii Itiyoophiyaa 19ffaa dhiheenya kana xumuramee Addabaabayii Masqalaa irratti gaggeeffame dabalatee, magaalattiin magaalaa mijataa fi adda duree ta’uu ishee agarsiisa jedhameera. Finfinneen amma magaalaa nagaa fi bareedduu taateewwan ispoortii gurguddoo fi deeggartoota keessummeessitu ta’uu waajjirri kun beeksiseera. Waggoota dhiyoo as bulchiinsi magaalichaa pirojektoota misooma koridarii qindoomina qaban, misooma qarqara lagaa fi babal’ina wiirtuuwwan ispoortii ammayyaa hojiirra oolchuun, haala magaalattii jijjiiruu qofa osoo hin taane guddina turizimii ispoortiitif carraa guddaa uumeera. Guddinni turizimii ispoortii kun, faayidaa ispoortii isaatiin alatti, industirii hoteelotaa, damee geejjibaa fi daldala xixiqqaa fi giddu galeessaa biyya keessaaf carraa hojii uumuudhaanis sochii dinagdee fi hawaasummaa guddaa uumeera. Kunis kaayyoo bulchiinsi magaalichaa fayyadamummaa hunda galeessa dargaggootaa mirkaneessuu fi carraa hojii uumuu dabaluu waliin kan walsimu ta’uu waajjirichi beeksiseera. #ENA_Afaan_Oromoo #TOI #ENA

Waxabajjii 5/2018 (ENA)- Tapha lammaffaa Waancaa Addunyaa FIFA 23ffaa irratti, Kooriyaan Kibbaa durfamuurraa kaatee Rippabliika Cheek 2 fi 1’n mo'atteetti. Taphni Ramaddii Tokkoffaa Istaadiyaamii Guwaadilaahaaraatti gaggeeffamee fi ganama kana xumurame irratti, Laadislav Kireeychii daqiiqaa 59ffaa irratti goolii galcheen Rippabliik Cheek akka dursitu taasiseera. Galchii Waangi In-boom daqiiqaa 67ffaa irratti fi Yoon-giyuu Oo daqiiqaa 80ffaa irratti lakkoofsisaniin Kooriyaan Kibbaa akka injifattu taasiseera. Kooriyaan Kibbaa adeemsa itti fufiinsaan daqiiqaa 30’n dhumaa irratti agarsiisan gooliiwwan kana akka lakkoofsisan isaan dandeessiseera. Ramaddii kanaan tapha banamiinsa Waancaa Addunyaa kaleessa gaggeeffameen, Meeksikoon Afriikaa Kibbaa 2 fi 0’n mo'achuun ishee ni yaadatama. Taphni Meeksikoon Kooriyaa Kibbaa waliin, akkasumas Afriikaan Kibbaa Rippabliika Cheek waliin taasisan taphoota ramaddii kanaan gara fuulduraatti eegamaniidha.

Waxabajjii 5/2018 (ENA) – Qajeelchi walii galaa olaanaan Poolisii Magaalaa Finfinnee hojii nageenya kabachiisuu itti kennameen alatti, isportessitoota kabaja biyyaa addunyaarratti ol kaasan horachaa jiraachuu Ajajaan Qajeelchichaa Letanal Jeneraal Asiraat Deeneeroo ibsan. Qajeelchi walii galaa olaanaan Poolisii Finfinnee ispoortessitoota miseensa poolisii bara 2018tti qabxii olaanaa galmeessisaniif guddina sadarkaa, badhaasa maallaqaa, akkasumas sagantaa beekamtii fi galateeffannaa qopheessee jira. Ajajaan qajeelcha walii galaa olaanaan Poolisii Finfinnee Letanal Jeneraal Asraat wayita sana akka jedhanitti, Adeemsi Filannoo Waliigalaa Biyyaalessaa 7ffaan guutummaatti nagaa fi tasgabbaa'aa ta'ee akka xumuramuuf poolisiin gahee murteessaa bahateera. Kanaafis miseensota poolisii magaalattii hundaaf galata guddaa dhiyeessaniiru. Poolisiin Finfinnee hojii nageenya eeguu dabalataan, isportessitoota kabaja biyyaa dirree ispoortii addunyaarratti ol kaasan horachaa jiraachuu isaas dubbataniiru. Ispoortessitoonni dhaabbaticha keessaa bahan dorgommiiwwan ardii fi addunyaarratti injifannoo argachuun medaaliyaa hedduu galmeessisuun kabajni biyyaa addunyaa irratti akka calaqqisu gochuu isaanii ibsaniiru. Milkaa'inni jajjabeessaan kun argamuu kan danda'e isportessitoota bakka bu'an horachuuf xiyyeeffannoo guddaan hojjetamuu isaatiin ta'uu dubbataniiru. Sagantaan beekamtii taasifame kun isportessitoota injifatan jajjabeessuuf kan kaayyeffate yoo ta'u, gara fuulduraattis dhaabbileen poolisii madda isportesitoota bakka bu'anii akka ta'an xiyyeeffannoon akka hojjetamu mirkaneessaniiru. Isportessitoonni guddina sadarkaa fi badhaasa argatan gamasaniitiin akka jedhanitti, badhaasni kun hojiiwwan keenya darbaniif beekamtii kennuu bira darbee, gara fuulduraatti cimnee hojechuun biyyaa fi kilaba keenya bu'aa caaluun waamsisuuf haamlee nutti uumeera jedhaniiru.

Waancaa addunyaa Fiifaan 23ffaa Ameerikaa, Meeksikoo fi Kaanaadaan wal ta’uun kan qopheessan har’a ifatti eegalama. Dorgommiin kun seenaa keessatti yeroo jalqabaaf biyyoota hirmaatan 32 irraa gara 48tti kan guddisudha. Istaadiyeemota tapha kana keessummeessuuf filataman- Istaadiyeemota Ameerikaa keessatti argaman 1. Istaadiyeemii Meetlaayif (Niwuyoork/Niwujeersii), daawwattoota 82,500, tapha 8 keessummeessa. 2. Istaadiyeemii Etii Endi Tii (Daalaas,Teeksaas), daawwattoota 94,300 keessummeessa, hunda caalaa isa guddaadha, taphoota9 keessummeessa.   3. Istaadiyeemii Soofii (Loos Anjalas, Kaaliifoorniyaa) daawwattoota 70240 qabata, taphoota saddet keessummeessa. 4. Istaadiyeemii Mersadiis Beenzi (Atilaantaa, Joorjiyaa), daawwattoota 71,000 qabata, taphoota 8 keessummeessa. 5. Istaadiyeemii haardi rook (Miiyaamii, Filooriidaa),daawwattoota 64,767qabata, taphoota 7 keessummeessa. 6. Istaadiyeemii Arowu heed (Kansaas Siitii, Miizuurii) dawwattoota 76,416 qabata,taphoota 6 keessummeessa. 7. Istaadiyeemii Enerjii(Hiiwusten, Teeksaas),daawwattoota 72.220 qabata, taphoota 7 keessummeessa. 8. Istaadiyeemii Jiileet (Boostan,Masachuseetis), daawwattoota 65,878 qabata, taphoota 7keessummeessa. 9 Istaadiyeemii Liinkan Faayinaanshaal Fiildi(Fiilaadelfiyaa, Pensilveeniyaa), daawwattoota 67,594 qabata, taphoota 6 keessummeessa. 10. Istaadiyeemii Luman Fiildi(Siiyaatil, Waashiingitan) 11. 11. Istaadiyeemii Leeviis (Saan Firaansiiskoo,Kaaliifoorniyaa), daawwattoota 68,500qabata, taphoota 6 keessummeessa. Istaadiyeemota Meeksikootti argaman 12. staadiyeemii Azetekaa (Meeksikoo Siitii)daawwattoota 87,523 qabata, taphoota shan keessummeessa. 13. Istaadiyeemii BIBIVIE(Montereeyi), daawwattoota 53,500 qabata, taphoota 4 keessummeessa. 14. Istaadiyeemii Akiroon (Guaadlahaaraa),daawwattoota 48,071 qabata, taphoota 4 keessummeessa. Istaadiyeemota Kaanaadaatti argaman 15. Istaadiyeemii Biisii Pilees (Vaankuveer), daawwattoota 54,500 qabata, taphoota 7 keessummeessa 16. Istaadiyeemii Tooroontoo (Tooroontoo), daawwattoota 45,000qabata, taphoota 6 keessummeessa. Walumaa gala taphoota 104 keessaa Ameerikaan 78, Meeksiikoo fi Kaanaadaan haala wal fakkaataan tapha 13 keessummeessu. kaataan tapha 13 keessummeessu.    

Waxabajjii 4/2018 (ENA): Waancaa Addunyaa 23ffaan Ameerikaa, Kaanaadaa fi Meeksikoo waliin qopheessan har’a ni eegala. Dorgommiin lakkoofsi biyyoota hirmaatan gara 48tti ol guddate seenaa kubbaa miilaa waancaa addunyaa keessatti isa guddaa ta’e kun walumaa galatti taphoota 104 ni keessummeessa. Taphi baniinsaa waancaa addunyaa Meeksikoo Istaadiyeemii Azetekaatti kan daawwattoota kuma 80 keessummeessuu danda'utti halkan keessaa sa’aatii 4:00 irratti Meeksikoo fi Afriikaan Kibbaan ni gaggeeffama. Biyyoonni lamaan tapha baniinsaa waancaa addunyaa 19ffaa bara 2010 Afriikaa Kibbaatti gaggeeffameen haaluma wal fakkaatuun wal quunnamanii turani. Wayita sana taphichi galchii tokko tokkoon qixaan xumurame. Siwiippee Shabalaalaan Afriikaa Kibbaaf yoo galchu, Raafaa’el Maarquweez immoo Meeksikoof galchii kan lakkoofsise ture. Taphi har'aa yeroo seena qabeessa sana irra deebiin kan agarsiisu yoo ta'u, gammachuu guddaa uumeera. Meeksikoon taphoota michoomaa sadan waancaa addunyaatiin alatti taphatte keessaa lama yoo injifattu, Afrikaan Kibbaa ammoo yeroo tokko qofa injifatteetti. Meeksikoon dirree ishee irratti waan taphattuuf carraa injifachuu qabdi jedhamee yoo eegamu, kuni Afriikaa Kibbaaf immoo qormaata cimaa ta’a jedhamee eegama. Taphni garee kanaa inni lammaffaan Istaadiyeemii ammayyaa Akroon Meeksikoo Guwaadaalahaaraatti Rippabiliika Kooriyaa fi Rippabiliika Cheek gidduutti galgala sa'aatii 11 irratti taphatama. Biyyoonni lamaan waancaa addunyaa irratti yeroo wal argan kun isa jalqabaati. Kanaan dura taphoota michoomaa irratti yeroo sadii wal arganii yeroo tokko injifachuun tapha tokko qixa ba'aniiru. Xiinxaltoonni ispoortii biyyoota lamaaniif carraa walitti dhiyoo injifannoof kennaniiru. Seenaa waancaa addunyaa keessatti yeroo jalqabaaf biyya keessummeessituutti sirni baniinsaa adda addaa sadii kan gaggeeffamu yoo ta'u, sirni jalqabaa tapha jalqabuu daqiiqaa 90 dura kan raawwatamu ta'a. Guyyoota dhufan keessattis sirni baniinsaa Toroontoo, Kaanaadaa fi Los Anjeelees keessatti ni gaggeeffama. Sirna baniinsaa kana irratti namoonni beekamoo Keeti Peerii, Fuuchar, Liisaa fi Reemaa sirba kan dhiyeessan yoo ta’u, artistoonni idil-addunyaa kanneen akka Alejandiro Fernandez, J Balvin, Mana, Belinda fi Tayla’nis sirba ni dhiyeessu. Waancaan Addunyaa bara kanaas gama faayinaansiitiin isa guddaa yoo ta’u, gumaachi maallaqaa waliigalaa FIFA’n biyyoota hirmaatan doolaara Ameerikaa miiliyoona 871 ga’eera. Kana keessaa Doolaarri Ameerikaa miiliyoonni 655 kallattiin maallaqa badhaasaaf kan oolu yoo ta’u, waancaa addunyaa 22ffaa Qaxar keessatti gaggeeffame irraa dhibbeentaa 50’n dabaleera. Waancaa Addunyaa 23ffaan seenaa keessatti yeroo jalqabaaf dorgommii biyyoota sadii waliin keessummeessuun gareewwan 48 hirmaachisa. Dorgommiin kun magaalota keessummeessituu 16 keessatti istaadiyeemii 16 keessatti kan gaggeeffamu ta’a. Waancaa Addunyaa 23ffaan hanga Adoolessa 12, 2018tti ni adeemsifama. #ENA_Afaan_Oromoo #TOI #ENA

Waxabajjii 4/2018 (ENA): Waancaa Addunyaa 23ffaan Ameerikaa, Kaanaadaa fi Meeksikoo waliin qopheessan galgala kana eegala. Seenaa dorgommii kanaa keessatti yeroo jalqabaatiif biyyoonni 48 ni hirmaatu. Waancaa Addunyaa galgala kana garee tokko waliin kan eegalu yoo ta'u, Meeksikoon galgala sa'aatii 4 irratti Istaadiyeemii Meeksikoo Siitiitti Afriikaa Kibbaa waliin taphatti. Gareema kanaan Rippabilikni Kooriyaa galgala sa'aatii 11tti Istaadiyeemii Guwaadilaahaaraatti Rippabiliika Cheek waliin taphatu. Biyyoonni 48 garee 12tti qoodamuun taphatu. Taphni Waancaa Addunyaa 23ffaan hanga Adoolessa 12, 2018tti ni adeemsifama. #ENA_Afaan_Oromoo #TOI #ENA

Waxabajjii 3/2018 (ENA) – Dorgommiin kubbaa miilaa dippilomaatotaa afraffaan Sanbata Waxabajjii 6 bara 2018 ni gaggeeffama. Federeeshiniin kubbaa miilaa Itiyoophiyaa Embaasiiwwan Yunaayitid Kingidam, Kaanaadaa fi Meeksikoo Waliin ta’uun dorgommii kana qopheesseera. Bakka bu’oonni federeeshinichaa fi Embaasotaa waliin ta’uun kaayyoo dorgommichaa irratti ibsa gaazexeessummaa kennaniiru. Embaasonni 30 ol teessoon isaanii Finfinnee ta’e, misiyoononni dippilomaasii, dhaabbileen idil addunyaa fi tumsitoonni dorgommii kanarratti ni hirmaatu. Dorgommichi dippilomaasii Ispoortii beeksisuuf, hariiroo idil addunyaa fi wal jijjiirraa aadaa cimsuuf kan akeekame ta’uu himameera. Dorgommiin kun Sanbata Waxabajjii 6 bara 2018 Finfinnee Istaadiyoomii Abbabaa Biqilaatti kan gaggeeffamu yoo ta’u, guyyaa kanatti Embaasotaa fi dhaabbilee garagaraa kan bakka bu’an gareewwan kubbaa miilaa 25 ni dorgomu. Namoonni kuma 2 fi 500 caalan dorgommicharratti ni argamu jedhameetu eegama. Dorgommii kummaa miilaa kana malees taateewwan garagaraa akka gaggeeffaman beekameera. Dorgommii kanatti fayyadamuudhaan tumsitoota dippilomaasii, daldalaa fi siyaasaa cimsuuf akeekameera. Dorgommiin kun magaalaan Finfinnee wiirtuu hariiroo idil addunyaa ishee murteessituu ta’uushee akka mul’isu ibsameera. Biiroon dargaggootaa fi Ispoortii Finfinnee, komishiniin turizimii Finfinnee qophii dorgommichaaf deeggarsa gochuunsaanii dubbatameera.

Caamsaa 30/2018 (ENA): Dorgommii Walakkaa Maraatoonii Itiyoophiyaa 19ffaa irratti atileet Geetachoo Masrashaa magaalaa Shaggar irraa, dorgommii dubartootaatiin ammoo atileet Massalach Alamaaayyoo Poolisii Finfinnee irraa injifataniiru.   Dorgommii dhiirotaatiin atileet Balaylinyi Tashaagar Itiyoo-Elektirika irraa 2ffaa yoo ba’u, atileet Balaay Xilahuun Poolisii Finfinnee irraa 3ffaa bahuun xumureera. Haaluma walfakkaatuun dorgommii walakkaa Maraatoonii Itiyoophiyaa 19ffaa dubartootaan Atileet Massalach Alamaayyoo Poolisii magaalaa Finfinnee irraa yoo injifattu, atileet Zimaam Baaraakii Baankii Daldalaa Itiyoophiyaa irraa 2ffaa, Baqqalach Takkuu ammoo Magaalaa Shaggar irraa 3ffaa baateetti. Walumaagalatti atileetotni 638 kan hirmaatan yoo ta’u, dhiirota 455 fi dubartoonni 183 kan hirmaatan fiigicha addabaabayii Masqalaa irraa eegalamee gaggeeffamaa ture xumurameera. #ENA_Afaan_Oromoo #TOI #ENA