Adoolessa 18/2018 (ENA): Sagantaan Ashaaraa Magariisaa mallattoo hambaa dippilomaasii Itiyoophiyaa fi tokkummaa biyyaalessaa ta’uu Waajjira Ministira Muummeetti Ministirri Qindeessaa Giddugala Ijaarsa Dimokiraasii Dr. Biqilaa Hurrisaa himaniiru. Miseensonni hoggansa ENAfi mata duree “Abdii Haa Dhaabnu” jedhuun Ashaaraa Magariisa isaanii magaalaa Bishooftuu qarqara haroo Hora Arsadii irratti kaa’aniiru. Dr. Biqilaa Hurrisaan Ministira Qindeessaa Giddugala Ijaarsa Dimokiraasii Waajjira Ministira Muummee fi Dura taa’aan Boordii ENA akka jedhanitti, Ashaaraan Magariisaa jalqabbii biyyaalessaa dirree idil-addunyaa irratti maqaa Itiyoophiyaa guddisaa jirudha.   Ce'umsa biyyaalessaa booda Itiyoophiyaatti biqiltuuwwan biliyoonaan lakkaa'aman dhaabuun biyyattiin gara diinagdee magariisaatti ce'uu ishee qabatamaan kan agarsiisu ta'uu ibsaniiru. Ajandaan Magariisaa hojii eegumsa naannoo biyya keessaa bira darbee, tumsa naannoo keessatti ergaa dippilomaasii haaraa dabarsuu isaa hubachiisaniiru. Itiyoophiyaan biyyoota ollaatiif furmaata kennuu fi muuxannoo eegumsa naannoo waliif qooduun walitti dhufeenya naannoo cimsaa jiraachuu eeruun, kunis bu’aa dippilomaasii hedduu argamsiisaa jira jedhani. Jijjiirama qilleensaa ittisuuf tarkaanfiiwwan qabatamaan fudhanne addunyaan akka muuxannootti fudhachaa akka jirus hubachiisaniiru. Kunis Itiyoophiyaan beekamtii fi dinqisiifannaa idil addunyaa akka argattu taasiseera jechuun ibsaniiru. Akkasumas, Ajandaan Ashaaraa Magariisaa ajandaa misooma biyyaalessaa hirmaannaa waloo lammiilee guddisuun, amantii, umurii, saalaan osoo hin daangahiin kaayyoo tokko irratti kan walitti fide ta’uu himaniiru. Sagantaan kun dhimma biyyaalessaa irratti waliin hojjechuun barbaachisaa ta’uu kan agarsiisuu fi tokkummaa biyyaalessaa cimsuu isaa hubachiisaniiru. Gama diinagdeetiin, Ashaaraan Magariisaa oomishaa fi oomishtummaa guddisuun, akkasumas sadarkaa maatiitti jireenya fooyya’aa uumuudhaan dinagdee baadiyyaa fi magaalaa cimsuun gumaacha taasisaa akka jiru ibsaniiru.   Hojii gaggeessaan olaanaa ENA obbo Saayifee Darribee gama isaaniitiin, ENA’n akka dhaabbataatti sagantaa Ashaaraa Magariisaa keessatti hirmaannaa isaa cimsuu itti fufeera jedhan. Magaalaa Bishooftuutti biqiltuu dhaabuun hojii Ashaaraa Magariisaa ENA’n Ganna kana gaggeesse isa lammataa ta’uu ibsuun, gara fuulduraattis naannolee keessatti sagantaalee biqiltuu dhaabuu adda addaa gaggeessuu akka itti fufu ibsaniiru.   Akkasumas ENA’n hojii lammiilee Ashaaraa Magariisaa irratti dammaqinaan akka hirmaatan beeksisuu fi sochoosuu akka itti fufu mirkaneessaniiru. #Ena Afaan Oromoo #TOI # Ena #

Adoolessa 18/2018 (ENA): Hojiin eegumsa naannoo Itiyoophiyaa beekamtii ardii fi idil-addunyaa argachuun bifa biyyattiif gumaacha olaanaa taasisaa jiraachuu Daarektarri Olaantuun Abbaa Taayitaa Eegumsa Naannoo Dr. Injiinar Lalisee Namee ibsaniiru. Duulli eegumsa naannoo biyyaalessaa magaalaa guutuu mata duree “Itiyoophiyaa Qulqulluu;Dhalootaaf” jedhuun kan gaggeeffamu marsaa sadaffaan ifatti eegalameera.   Daarektarri Olaantuun Abbaa Taayitaa Eegumsa Naannoo Dr. Injiinar Lalisee Namee wayita sana akka jedhanitti, Hojiin eegumsa naannoo Itiyoophiyaa beekamtii ardii fi idil-addunyaa horachuun bifa biyyattiif gumaacha olaanaa taasisaa jira. Hojiin eegumsa naannoo lammiileen naannoo eeguun naannoo fayya qabeessaa fi qulqulluu ta’e keessa akka jiraataniif haala dandeessisu uumuus ibsaniiru. Sochii Itiyoophiyaa Qulqulluu marsaa sadaffaatiin ji’a tokkoffaan balfa pilaastikaa, ji’a lammaffaa balfa balaafamaa fi elektirooniksii, ji’a sadaffaan ammoo hojiin ittisa faalama sagalee kan hojjetamu ta’a.   Itti aanaan kantiibaa magaalaa Finfinnee fi Hogganaan Biiroo Misooma Industirii obbo Jaanxiraar Abbay akka jedhanitti, Magaalichatti pirojektoonni bu’uuraalee misoomaa koridaraa fi qarqara lagaa naannoo fi fayyaa lammiilee waliin walsimsiisuun ijaaramaa jiru. Magaalaa Finfinneetti lakkoofsi buufataalee warshaalee bishaan xuraa’aa qulqulleessan gara 44tti ol guddisuun, uwwisni bishaan xuraa’aa magaalichaa qulqulleessu gara dhibbeentaa 43tti ol guddachuu ibsaniiru. Hojii uwwisa magariisaa magaalichaa haalaan guddisuuf hojjetamaa jiru keessatti lageen 76 kiiloo meetira 600 uwwisan faalama irraa eeguun tattaaffiin guddaan taasifamaa jiraachuu ibsaniiru.   Hogganaa Waliigalaa Abbaa Taayitaa Eegumsa Naannoo Magaalaa Finfinnee kan ta’an Dr. Isheetuu Lammaa gama isaaniin akka himanitti, qulqullinni mul’ata qaroomina magaalaa ta’uu ibsuun, hawaasni hundi sochii kana keessatti dammaqinaan akka hirmaatu waamicha dhiyeessaniiru. #Ena Afaan Oromoo #TOI # Ena #

Adoolessa 16/2018(ENA)- Sagantaan ashaaraa magariisaa biqiltuu dhaabuun olitti dhalootaaf kan darbu hojii fakkeenya qabu ta’uusaa daarektarri olaanaa abbaa taayitaa miidiyaalee Hayimaanoot Zallaqaa ibsan. Abbaan taayitaa miidiyaalee Itiyoophiyaa qooda fudhattoota waliin qindaa’uudhaan mata duree “abdii haa dhaabnu” jedhuun sagantaa dhaabbii biqiltuu ashaaraa magariisaa gannaa kan baranaa qarqara lagaa Beellaa ganda 18tti gaggeesseera. Daarektarri olaanaa abbaa taayitichaa Hayimaanot Zallaqaa saganticharratti, sagantaan ashaaraa magariisaa biqiltuu dhaabuun olitti dhaloota dhufuuf seenaa kan keenyu hojii fakkeenya qabudha jedhaniiru. Xiyyeeffannoon keenya biqiltuu dhaabuun qofa osoo hin daangeffamiin, kan dhaabaman kunuunsuun guddisuu fi qabachuusaanii mirkaneessuu ta’uu akka qabu hubachiisaniiru. Sagantichi muduraawwan wabii nyaataaf gargaaranii fi sanyii mukaa kunuunsa naannoof faayidaa qaban kan of keessatti qabatu ta’uu ibsaniiru. Abbaan taayitichaa sagantaa ashaaraa magariisaa 8ffaatiin biqiltuu kuma 45 fi 125 dhaabuuf karoorfatee amma ammaatti naannawa magaalota garagaraatti biqiltuun kuma 43 dhaabamuunsaa ibsameera.

Adoolessa 15/2018 (ENA): Naannoo Oromiyaa Godina Iluu Abbaa Booraatti biqiltuu bunaa fooyya’aa ta’ee fi oomisha yeroo gabaabaa keessatti argamsiisu lafa heektaara kuma 26 ol irratti yeroo Gannaa dhaabamaa jiraachuu Waajjirri Qonna Godinichaa beeksise. Akka itti gaafatamaan waajjirichaa obbo Addaamuu Taakkalaa jedhanitti, gosoota bunaa fooyya’aa ta’an kanneen dhukkuba dandamatan, oomisha yeroo gabaabaa keessatti kennanii fi oomishtummaan isaanii mirkanaa’e Godinicha keessatti dhaabamaa jira. Bu’uuruma kanaan Ganna amma jiru kana keessatti biqiltuun bunaa miiliyoona 200 ol lafa heektaara kuma 26 ol irratti dhaabamaa jiraachuu ibsaniiru. Hojiin biqiltuu bunaa dhaabuu lafa haaraa fi bakka biqiltuu bunaa goggogaan keessatti bal’inaan hojjetamaa jiraachuu ibsuun, kan dulloomee fi oomisha hin kennine buqqisuun hojiin bu’a qabeessa ta’e hojjetamaa jira jedhan. Qonnaan bulaan Godinichaa Aanaa Hurrumuu obbo Taammiruu Farrisaa biqiltoota bunaa yeroo Bonaa gamashan callaa gaarii irraa argachuuf kunuunsaa jiraachuu dubbataniiru. Yeroo ammaa kana biqiltuu bunaa fooyya’aa dhaabuun callaa bunaa babal’isuun caalaatti fayyadamoo ta’uu isaaniis akeekaniiru. Qonnaan bulaan Geetaachoo Jifaaris gargaarsa ogeeyyii qonnaatiin deeggaramuun hojiiwwan oomishaa fi oomishtummaa bunaa guddisan irratti bobba’uu isaanii ibsaniiru. Sagantaa Ashaaraa Magariisaa bara kanaa jalatti biqiltuu bunaa fooyya’aa ta’e bal’inaan dhaabuun fayyadamummaa isaanii guddisuuf hojjechaa jiraachuus ibsaniiru. #Ena Afaan Oromoo #TOI #Ena#

Adoolessa 14/2018 (ENA): Itiyoophiyaan eegumsa qabeenya uumamaa fi lubbu-qabeeyyiif sadarkaa addunyaatti gumaachi taasisaa jirtu ol’aanaa ta’uusaa Barreessituu hojii raawwachiiftuu waliigaltee qabeenya lubbuu qabeeyyii Dhaabbata Mootummoota Gamtoomanii (CBD) Astiriid Shomaker ibsan. Abbaan Taayitaa Eegumsa Bosonaa fi Bineensota Itiyoophiyaa ayyaana hundeeffama isaa waggaa 60ffaa kabajachaa jira. Waltajjii kanarratti Pirezidaantiin Ripaabilika Dimokiraatawaa Federaala Itiyoophiyaa Taayyee Atsqa-Sillaasee, Ministira Muummee duraanii fi walitti qabaa Boordii faawondeeshinii Haayilemaaramii fi Roomaan ,Haayilemaram Dassaaleny, De’eetaa Ministira Turiizimii Dr.Endegena Abbabaa, Daayirektara Olaanaa Abbaa Taayitaa Eegumsa Bosonaa fi Bineensota Itiyoophiyaa Kumarraa Waaqjiraa dabalatee hoggantoonni mootummaa olaanoo fi keessummoonni dhaabbilee addunyaa affeeraman argamaniiru. Barreessituun hojiiraawwachiiftuu Waliigaltee qabeenya lubbuu qabeeyyii Dhaabbata Mootummoota Gamtoomanii (CBD) Astiriid Shoomaker, Itiyoophiyaan iddoo biqiltuu fi bineensota adda ta'an hedduu fi handhuura qabeenya uumamaa fi lubbuu qabeeyyii ta'uushee dubbataniiru. Shoorri biyyattiin eegumsa lubbuu qabeeyyii addunyaatiif gumaachaa jirtus caalaatti guddaa ta'uu ibsaniiru. Itiyoophiyaan sanyiiwwan bineensotaa adda addaa addunyaa irratti bakka biraatti hinargamne ta'uushee eeruun; hambaan uumama addaa kun boonsaa Itiyoophiyaa qofa osoo hin taane, addunyaa guutuufis gatii shallagamuu hin danda’amnee ol ta'e akka qabu dubbataniiru. Dhaabbatichi waggoottan jaataman darbaniif qabeenya uumamaa fi lubbuu qabeeyyiif eeguuf kutannoo agarsiiseefis dinqisiifannaa isaanii ibsaniiru. Biyyattiin bakkeewwan eegumsaa sirnaan bulchuu, sanyiiwwan balaa irra jiran baraaruu fi walitti bu'iinsa namaa fi bineensota gidduutti uumamu to'achuuf carraaqqiin taassifamu jajjabeessaa ta'uu ibsaniiru. Galmawwan qabeenya lubbuu qabeeyyii kaa’ame milkeessuuf hawaasni addunyaa qabeenya bosonaa eeguu, sanyiiwwan balaa irraa baraaruu fi daldala bineensota seeraan alaa to'achuuf tarkaanfii ariifachiisaa fudhachuu akka qabu hubachiisaniiru.

Adoolessa 14/2018 (ENA): Sagantaan Ashaaraa Magariisaa Itiyoophiyaa sirna ikkoo kunuunsuun dabalatatti, bineensota bosonaaf dahoofi bakka jireenyaa ta’uun carraa guddaa uumeera jedhan jedhan Pireezidaantin FDRI Taayyee Atsiqasillaaseen. Ayyaanni waggaa 60ffaa Abbaa Taayitaa Eegumsa Bineensota Bosonaa Itiyoophiyaa mata duree “Waggoota 60 Bineensota Bosonaa Itiyoophiyaaf” jedhuun magaalaa Finfinneetti gaggeeffameera. Pireezidaanti Taayyeen wayita kana, Itiyoophiyaanonni Eegumsa Bineensota bosonaa dhalootarraa dhalootatti dabarsuun duudhaa gaarii qabu jedhan. Sagantaan Ashaaraa Magariisaa Itiyoophiyaa nageenya sirnakkoo eeguun bineensonni bosonaa bakka jireenyaa mijataa akka argataniif carra uumuu kaasaniiru. Barii jijjiirama biyyaalessaa waggoottan darban keessa qabeenya uumamaa fi madaala sirnakkoo eeguun hojiileen hedduun hojjetamuu eeraniiru. Sirni aadaa kunuunsa bineensota bosonaa lammiilee Itiyoophiyaa biratti gatii ajaa’ibaa dhalootaa dhalootatti darbaa akka ta’es dubbataniiru. Mallattoo bineensota bosonaa Itiyoophiyaa kan ta’e Waaliyaa Ayibeeksi gadi bu’uun isaa dhimma yaaddessaa ta’uu eeruun, Kana baraaruuf dirqama biyyaalessaa fi idil-addunyaa qabna jedhan. Bineensota bosonaa kunuunsuun barbaachisaa akka ta’e gorsaniiru. Ministirri Muummee Dr. Abiyyi Ahimad Sagantaan Ashaaraa Magariisaa milkaa’ina hunda galeessa akka ta’u dandeessisuun nageenya heddummina lubbu qabeeyyiif gumaacha taasisaniif galateeffataniiru. Nageenya paarkiiwwanii mirkaneessuu fi bu’uuraalee misoomaa isaanii ammayyeessuun eegumsa bineensota bosonaa qofa osoo hin taane daawwattoota biyya keessaa fi alaa hawwachuuf tattaaffii taasifamaa jiruuf furtuu ta’aa jiraachuu ibsaniiru. Paarkoonni magaalota keessatti ijaaramaa jiran beekumsa hawaasni waa’ee bineensota bosonaa irratti qabus bal’isaa akka jiran hubachiisaniiru. Bu’aa damichaa irraa eegamu galmaan ga’uuf hojiin cimaan hojjetamuu akka qabu hubachiisuun, waggoota jaatama darban keessatti kunuunsa uumamaaf gumaacha guddaa aangawootaa fi michoota taasisaniif galateeffataniiru. Waltajjicharratti Pireezidaantiin Mootummaa Federaalaa Itiyoophiyaa, Taayyee Atsqasillaaseen, Ministira Muummee duraanii fi Dura taa’aan Boordii Faawundeeshinii Roomaa Hayilamaariyaam Dasaalee, De’eetaa Ministeera Tuurizimii Dr. Indaganaa Abbabaa, Daarektarri Olaanaa Abbaa Taayitaa Eegumsa Bineensota Bosonaa Itiyoophiyaa, Kumarraa Waakjiraa, akkasumas haggantoota hojii olaanoo mootummaa fi keessummoonni dhaabbilee idil addunyaa irraa affeeraman argamaniiru. #Ena Afaan Oromoo #TOI #Ena#

Adoolessa 11/2018(ENA)- Sagantaan ashaaraa magariisaa dhiibbaa jijjiirama haala qilleensaa damdamachuurra darbee aadaa tajaajila tola ooltummaa dargaggootaa guddisaa akka jiru waldaan dargaggoota Finfinnee ibse. Yaada ministirri muummee Dr. Abiyyi Ahimad maddisiisaniin bara 2011 kan eegalame sagantaan ashaaraa magariisaa bosona badaa dhufee fi biyyoo dhiqamaa ture ittisuudhaan gumaacha taasisaa jira. Waggoottan darban biqiltuuwwan biiliyoona 48 ol kan dhaabaman yoo ta’u baranas mata duree ‘abdii haa dhaabnu’ jedhuun biqiltuu biiliyoona 8 ol dhaabuuf hojiitti galameera. Sagantaan kun bosona dabaluun gamatti carraa hojiillee uumuuf gargaareera. Waldaan dargaggoota Finfinnee biiroo miidhagina magaalaa fi misooma magariisaa bulchiinsa magaalichaa waliin ta’uun guyyaa har’aa sagantaa ashaaraa magariisaa baranaa gaggeesseera. Gaggeessitoonnii fi dargaggoonni saganticharratti hirmaatan sagantaan ashaaraa magariisaa jijjiirama haala qilleensaa ittisuun gamatti aadaa tajaajila tola ooltummaa guddisuuf gumaacha taasisaa akka jiru ibsaniiru. Itti aantuun pirezidaantii waldaa dargaggoota Finfinnee Foolii Nugusee sagantaan ashaaraa magariisaa dhiibbaa jijjiirama haala qilleensaa damdamachuuf, miidhagina magaalattii eeguu fi bakka mijataa uumuuf gumaacha akka qabu dubbatteetti. Barreessaan waldichaa Ermiyaas Wandimmuu gamasaatiin, sagantaa ashaaraa magariisaa baranaa guyyaa ministira muummee Dr. Abiyyi Ahimadiin ifoomee eegalee dargaggoon hirmaachaa akka jiran dubbateera. Sagantichi biyya fooyyofte, badhaadhinaa fi abdiin guutamte dhaloota dhufuuf dabarsuuf kan gargaaru ta’uu ibseera. Sagantaan ashaaraa magariisaa magaalattii magariisa, qulqulluu fi mijattuu akka taatu taasiseera kan jedhan ammoo kutaa magaalaa Booleetti itti gaafatamaa waajjira qulqullinaa fi miidhaginaa aanaa tokkoo Yenuus Mahaammadi. Saganticharratti kan hirmaatan dargaggoo Katamaa Baalchaa fi dargaggoo Taganee Boonee gamasaaniin har’a biqiltuu kunuunsuun dhaloota dhufuuf ashaaraa kaa’uu waan ta’eef fulla’insaan biqiltuu akka kunuunsan dubbataniiru.

Adoolessa 7/2018 (ENA)–Sagantaa dhaabbii biqiltuu ashaaraa magariisaa mata duree “Abdii haa dhaabnu” jedhuun gaggeeffamaa jiruun bulchiinsa magaalaa Finfinneetti biqiltuuwwan miiliyoona 6 dhaabuuf karoorfannee hojjechaa jirra jedhan kantiibaa Adaanech Abeebee. Kantiibaa Adaanech hoggantootaa fi hojjettoota waajjirasaanii waliin ta’uun guyyaa har’aa Ynivarsiitii hubannoo namtolchee(AI)tti dhaabbii biqiltuu ashaaraa magariisaa gaggeessaniiru. Ganna kana sagantaa biqiltuu dhaabuutiin magaalaa keenyatti biqiltuu miiliyoona 6 dhaabuuf karoorsinee hojjechaa jirra jedhaniiru. Sagantaan biqiltuu dhaabuu ashaaraa magariisaa baranaa Waxabajjii 7 bara 2018 eegalchiisnee amma ammaatti biqiltuu miiliyoona 4 fi kuma 469 fi 710 dhaabneerra jedhan. Raawwiin isaas dhibbantaa 75 qaqqabeera kan jedhan yoo ta’u biqiltuu dhaabuun qofti qofaasaa galma kaaneef bira waan nungeenyeef biqiltuu dhaabnes ni kunuunsina jechuun ergaa dabarsaniiru.

Adoolessa 4/2018(ENA)-Tajaajilli oduu Itiyoophiyaa sagantaa ashaaraa magariisaa milkeessuuf hawaasa dammaqsuun gamatti qabatamaan irratti hirmaachuun qooda adda durummaasaa cimsee akka itti fufu hojii raawwachiisaan olaanaa Seeyifee Darribee ibsan. Hoggantoonnii fi hojjettoonni ENA mata duree “abdii haa dhaabnu” jedhuun Paarkii Inxooxxootti ashaaraa magariisaa kaa’aniiru. Hojii raawwachiisaan olaanaa dhaabbatichaa Seeyifee Darribee wayita kana akka ibsanitti, Itiyoophiyaan waggoottan jijjiiramaa darban ashaaraa magariisaaf xiyyeeffannoo addaa kennitee biqiltuu dhaabuu aadaa godhatteetti. Itiyoophiyaan milkaa’ina ashaaraa magariisaan galmeessisaa jirtu itti fufsiisuuf akkasumas jijjiirama haala qilleensaa addunyaa yaaddessaa jiru qolachuuf ga’ee bahachaa jirtu addunyaaf beeksisuudhaan ENA’n qoodasaa akka bahu dubbataniiru. Galmi biyyaalessaa akka milkaa’u ENA’n hawaasa dadammaqsuu fi odeeffannoo dabarsuun gamatti, adda durummaan qabatamaan hirmaachuudhaan qoodasaa akka cimsu beeksisaniiru. Keessumaa hojiiwwan Itiyoophiyaan wiirtuu ashaaraa magariisaa akka taatu hojjetaman beeksisuu fi hubannoo uumuuf hojii itti jiru cimsee akka itti fufu dubbataniiru. Hoggantoonnii fi hojjettoonni ENA saganticharratti hirmaatan gamasaaniin, dhaloota dhufuuf biyya fooyyofte dabarsuuf ashaaraasaanii kaa’uusaaniif gammaduusaanii ibsaniiru. ENAtti daarektarri sagantaa qabiyyee Raahel Abbabaa, sagantichi bosona biyyattii dabaluurra darbee Itiyoophiyaan dippilomaasii magariisaatiin akka beekamtu humna guddaa uumaa akka jiru ibsaniiru. Itti aantuun qopheessituu kitaabee Nagaariit Yeshiimmabeet Dammaqaa gamasaaniin, ogeeyyonni Miidiyaaleen odeeffannoo tamsaasuun cinaatti qabatamaan hirmaachuudhaan itti gaafatama biyyaalessaa bahachuu akka qaban dubbataniiru. Biqiltuu dhaabuun cinaatti firii akka kennan kunuunsuun barbaachisaa akka ta’e hubachiisaniiru. Qopheessaan olaanaa deeskii afaan biyya alaa Heenook Taaddalaa yaada kenneen, Itiyoophiyaan bosonashee guddisuuf hojiin hojjettu addunyaaf fakkeenya ta’aa jiraachuusaa eereera. Ogeeyyonni ENA Reedwaan Shamdasir fi Sarkaalam Zallaqaa gamasaaniin, Itiyoophiyaa lalistuu uumuuf ashaaraasaanii kaa’uusaaniitti gammaduusaanii ibsaniiru.

Adoolessa 4/2018 (ENA)- Sagantaan ashaaraa magariisaa Itiyoophiyaa furmaata jijjiirama haala qilleensaa addunyaaf agarsiiftuu adda dureedha jedhan ambaasaaddaroonni biyyoota garagaraa ibsan. Balaawwan uumamaa addunyaa qoraa jiran keessaa jijjiiramni haala qilleensaa adda durummaan eerama. Dhiimmaa kana qolachuuf yaada ministirri muummee Dr. Abiyyi Ahimad maddisiisaniin bara 2011 irraa eegalee hojiirra oolaa kan jiru sagantaan ashaaraa magariisaa qabatamaan jijjiirama agarsiisaa barana wagga saddettaffaa qabateera. Sagantaawwan dhaabbii biqiltuu waggoottan kanneen keessatti dhaabamaniin bosona biyyattii akka dabaluu fi haalli qilleensaa mijataan akka uumamu gochuun olitti guddina oomishaa fi oomishtummaa damee qonnaaf qooda olaanaa gumaachuusaa qaamonni garagaraa ni ibsu. Itiyoophiyaan waggoottan darban biqiltuuwwan biiliyoona 48 ol dhaabuudhaan hojii fakkeenyummaa qabu kan raawwate yoo ta’u bara kanas mata duree “abdii haa dhaabnu” jedhuun biqiltuu biiliyoona saddet dhaabuuf hojiitti galameera. Ambaasaaddaroonni biyyoota garagaraa ENA’n dubbise, hojiin Itiyoophiyaan sagantaa ashaaraa magariisaatiin hojjechaa jirtu hawaasa addunyaaf fakkeenya guddaa kan ta’u milkaa’ina olaanaadha jechuun dinqisiifataniiru. Itiyoophiyaatti ambaasaaddarri Israa’el Dr. Abrihaam Nugusee akka dubbatanitti, Imaammanni ashaaraa magariisaa fi adeemsi dhaabbii biqiltuu Itiyoophiyaan gaggeessitu guddaa barbaachisaa ta’uu ibsaniiru. Dhimmi haala qilleensaa guutuu addunyaa kan yaaddessu mudannoo idil addunyaa waan ta’eef Itiyoophiyaan adeemsa kana keessumaa ardii Afriikaarraa adda durummaan dursaa akka jirtu ibsaniiru. Itiyoophiyaatti ambaasaaddarri Siriilaankaa Niirmallaa Paranaviitaa akka dubbatanitti, Itiyoophiyaan sagantaa misooma magariisaa akkasii hojiirra oolchuunshee adeemsa abshaalummaa ta’uu ibsaniiru. Sagantaan ashaaraa magariisaa guddina dinagdee biyyaaf gumaacha olaanaa qabaachuusaa ibsuudhaan, Siriilaankaan damee Kanaan Itiyoophiyaa waliin tumsaan hojjechuuf fedhii qabdu karaa hojiira oolchitu qorachaa akka jirtu ta’uushee eeraniiru. Itiyoophiyaatti bakka bu’aan daldalaa fi dhimmoota Invastimantii Paakistaan Baasiit Saaliim Shaah gamasaaniin, sagantaan ashaaraa magariisaa Itiyoophiyaaf miidhaginaa fi hanannaa addaa gumaachuun olitti, naannawa faalama qilleensaarraa qulqullqq’e babal’isuuf gimaacha guddaa taasisuusaa eeraniiru. Ummannii fi mootummaan Itiyoophiyaa yeroo gabaabaa keessatti sadarkaa guddaa kanarraa ga’uunsaanii dinqisiifatamuu qaba jedhaniiru.

Waxabajjii 28/2018 (ENA):- Sagantaan Ashaaraa Magariisaa hanga bosona biyyattii dabaluudhaan eegumsa naannoo fi haaromsa sirna-ikoolojiitiif gumaacha olaanaa taasiisaa akka jiru Daarektarri Olaantuu Abbaa Taayitaa Eegumsa Naannoo Itiyoophiyaa Dr. Injiiner Lalisee Namee ibsan. Itiyoophiyaan miidhaa jijjiirama haala qilleensaarraa maddu dandamachuuf, Uwwisa bosonaa guddisuufi wabii nyaataa mirkaneessuuf kan dandeessisu sagantaa Ashaaraa Magariisaa innisheetivii Ministira Muummee Dr. Abiyyi Ahimadiin bara 2011 irraa eegalee sadarkaa biyyaalessaatti hojiirra oolchaa jirti. Hirmaannaa biyyaalessaa guddaa kanaan dura waggoottan dabran keessatti biqiltuuwwan bosonaa, fuduraalee fi gaaddisaa biliyoona 48 ol misoomsuun danda'ameera. Sagantaa Ashaaraa Magariisaa bara kanaan mata duree "Abdii haa dhabbannu " jedhuun sadarkaa biyyaalessaatti biqiltuuwwan biliyoona saddeet dhaabuuf karoorfamee gara hojiitti galamuun isaa ibsameera. Har'as Eejensiin Bulchiinsa Qulqullina Magaalaa Finfinnee bakka kosii gogaa itti gatan Raphii jedhamutti sagantaa Ashaaraa Magariisaa gaggeesseera. Daarektarri Olaantuu Abbaa Taayitaa Eegumsa Naannoo Itiyoophiyaa Dr. Injiiner Lalisee Namee wayita kanatti akka jedhanitti; sagantaan Ashaaraa Magariisaa naannoo faalamaa fi manca'iinsa irraa kan itti eegnu keessaa tokkodha jedhan. Waggoottan dabran keessa sagantaan Ashaaraa Magariisaa hojiirra ooleen uwwisni bosona biyyattii akka dabale ibsaniiru. Kunis eegumsa qilleensa addunyaatiif fala ta'aa dhufuu isaa dubbachuun; birmadummaa wabiinyaataa mirkaneessuu keessattis qoodasaa ba’achaa akka jiru ibsaniiru. Uwwisa bosona biyyattii dabaluudhaan eegumsa naannoo fi haaromsa sirna-ikoolojiitiif gumaacha olaanaa gumaacha akka jiru eeraniiru. Sadarkaa Itti aanaa Kantiibaatti Hojii gaggeessaa Olaanaan Magaalaa Finfinnee Injiiner Wandimmuu Seettaa gama isaaniitiin; bakka gatinsa kosii gogaa Raphiitti yeroo ammaa hojii deebisanii misoomsuu hojjetameen sodaa balaa irraa gara qabeenyummaatti jijjiiramaa dhufeera jedhaniiru. Daarektarri Olaanaan Eejensii Bulchiinsa Qulqullina Magaalaa Finfinnee Gazzaahenyi Deesisaa gama isaaniitiin; Raphiin bakka kosii gogaa itti gatan yeroo ammaa biqiltuudhaan uwwifamaa akka jiru dubbataniiru. Kanaanis yeroo ammaa deebisanii fayyadamuun gara qabeenyummaatti jijjiiramaa akka jiru eeraniiru. Hirmaattonni sagantichaa ENA’f yaada kennan; erga Ashaaraan Magariisaa jalqabamee kaasee waggaa waggaan dammaqinaan hirmaachaa akka jiran ibsuun; kanaan dura naannoo isaaniitti bakkeewwan kosii itti gatamaa turan amma deebi'anii dandamachuun biqiltuuwwan magariisaan uwwifamuusaanii dubbataniiru.

Waxabajjii 27/2018 (ENA): Hambaa guddaan ijoollee keenyaaf hafu Itiyoophiyaa qulqulluu, lalistuu fi fayyaaleessaa taate ta'uu qaba jedhan Itti Aanaan ministira Muummee Tamasgeen Xurunaa. Itti Aanaan Ministira Muummee sosochii biyyaalessaa "Itiyoophiyaa Qulqulluu Dhalootaaf" 3ffaa har'a jalqabsiisaniiru. Itti Aanaan ministira Muummee ergaa isaaniitiin; sochiin kun ijoollee keenyaa fi dhaloota dhufuuf biyya qulqulluu, fayyaaleessaa fi lalistuu ijaaruuf waadaa waliinii galle bifa haaraa dhaan kan haaromsinedha jedhaniiru. Faalamni pilaastikii, kosii fi sagalee dhimmoota eegumsa naannoo qofa akka hin taane ibsuun; fayyaa uummataa, indaastirii Tuuriizimii, investimentii fi carraa egeree biyya keenyaa waliin kallattiin kan walqabatan dhimmoota nageenya biyyaalessaa fi misoomaa ta'uu isaanii ibsaniiru. Marsaan sochii kanaa inni amma Axaraashaa Magariisaa (Ashaaraa Magariisaa), misooma Koriidarii fi misooma qarqara laggeenii waliin qindaa'ee kan raawwatamu yoo ta'u; jechootaan alatti bu'aawwan lakkaa'amuu danda'an, itti-gaafatamummaa dhaabbataa fi jijjiirama amala waaraa irratti akka xiyyeeffatu eeraniiru.

Waxabajjii 27/2018 (ENA): Miseensonni Jila Hawaasa Dippilomaasii Sagantaa Dhaabbii Biqiltuu Ashaaraa Magariisaa Magaalaa seena qabeettii Lalibelaatti gaggeessan. Ambaasaaddaroonnii fi hoggantoonni dhaabbilee idil-addunyaa teessoo isaanii Finfinnee godhatan Ashaaraa magariisa isaanii kan UNESCO’n galmaa’e Manneen Kiristaanaa Laalibalaatti kaa’aniiru. Jilli dippilomaasii magaalaa seena qabeettii Laalibalaa daawwachaa jiru kun kaleessa Waldoota addunyaa irratti beekamoo ta’an dhagaa tokko irraa bocaman daawwataniiru. Daawwannaa isaaniitiin alattis har’a iddoo hambaa ta’e bataskaana Laalibalaa kanatti ashaaraa isaanii kaa’aniiru. Jilli kun biqiltuu dhaabuun isaa sagantaa ashaaraa magariisaa Itiyoophiyaa yoo ta’u, kunis ajandaa misooma addunyaa kan hambaalee fi eegumsa naannoo walitti fidu ta’uu ibsameera. Daawwannaan kun Itiyoophiyaan bakka turistootaaf nageenyaafi hawwataa ta’uu ishee addunyaaf kan agarsiise yoo ta’u, damee turizimii haaromsuuf carraa guddaa uumeera. Bakka bu’oonni hawaasa addunyaa bakka hambaa kana irratti biqiltuu dhaabuun isaaniis akka agarsiisa tumsa addunyaa hambaalee addunyaa kunuunsuu fi jijjiirama qilleensaa waliin qolachuutti ilaalama.  

Waxabajjii 27 /2018 (ENA): Itiyoophiyaan qormaata naannoo fi jijjiirama qilleensaa hiikuun imaammataa fi sagantaalee tarsiimoo misooma itti fufiinsa qabu mirkaneessuuf bu’a qabeessa ta’een hojiirra oolchuun bu’aa qabatamaa galmeessisaa jirti jedhan Ministirri Karooraa fi Misooma Dr. Fitsum Asaffaa Biyya qulqulluu, fayyaa fi magariisaa dhaloota itti aanuuf dabarsuudhaaf kan eegalame duulli “Itiyoophiyaa Qulqulleettii Dhalootaaf” akka biyyaatti gaggeeffamaa ture marsaa sadaffaa har’a bakka itti aanaan ministira muummee obbo Tamasgeen Xurunaa argamanitti ifatti eegalameera.   Ministirri Ministeera Karooraa fi Misooma Dr. Fitsum Asaffaa Duula Itiyoophiyaa qulqulluu jedhu marsaa sadaffaan bu’aa marsaa lamaan darban keessatti argame bal’inaan babal’isuun misooma itti fufiinsa qabuu fi eegumsa naannoo biyyattiif dandeettii guddaa kan uumu ta’uu ibsaniiru. Sochiin kun lammiileef naannoo fayya qabeessaa fi qulqulluu ta’e uumuu fi Itiyoophiyaa qulqulluu dhaloota dhufuuf dabarsuuf kutannoo waloo ta’uu ibsaniiru.   Babal’inni magaalaa, balfi pilaastikii baay’achaa dhufuu, keemikaalota balaafamaa fi balfa sirnaan bulchuu dhabuun, faalama sagalee fi rakkoolee naannoo biroo fayyaa lammiilee, nageenya naannoo fi imala keenya gara misooma itti fufiinsa qabuutti qormaata ta’uu ibsaniiru. Mootummaan Itiyoophiyaa qormaata naannoo fi jijjiirama qilleensaa hiikuun misooma itti fufiinsa qabu mirkaneessuuf imaammataa fi sagantaalee tarsiimoo hedduu hojiirra oolchaa jira jedhan. Daarektarri Olaantuu Abbaa Taayitaa Eegumsa Naannoo Dr. Injiinar Lalisee Namee akka jedhanitti, Sochiileen Itiyoophiyaa Qulqullina marsaa lamaan darban gaggeeffaman eegumsa naannoo irratti bu’a qabeessa ta’uu ibsaniiru. Marsaa jalqabaatiin namoota miliyoona 15 ol kan ,marsaa lammaffaatiin ammoo mala miidiyaa adda addaatiin namoota miliyoona 54 ol qaqqabsiisuun abbummaan akka hirmaatan taasifameera jedhani. Sochiin kun marsaa 3ffaan faalama pilaastikii, ittisa keemikaalota balaafamaa fi balfa balaafamaa, akkasumas ittisa faalama sagalee irratti kan xiyyeeffate ta’uu hubachiisaniiru. Sochiin Itiyoophiyaa Qulqulleettii eegumsa naannoo bu’uura kaa’aa jiraachuu ibsuun, milkaa’inni isaas hirmaannaa ummataa cimaa fi kutannoo waloo akka barbaadu ibsaniiru.

Waxabajjii 27/2018 (ENA): Itti aanaan ministira muummee obbo Tamasgeen Xurunaa faalama naannoo ittisuun fi eegumsi naannoo dhimmoota misoomaa fi nageenya biyyaalessaa oomishtummaa dinagdee fi egeree biyyattii waliin walqabatan ta’uu ibsaniiru. Itiyoophiyaan eegumsa naannoo fi misooma magariisaa Afrikaaf fakkeenya ta’uu akka dandeessus ibsaniiru. Itti aanaan ministira muummee obbo Tamasgeen Xurunaa duula "Itiyophiyaa Qulqulluu Dhalootaaf " jedhu kan marsaa 3ffaa akka biyyaatti ifatti eegalchiisaniiru.   Misoomni koridarii fi misoomni qarqara lagaa mootummaan Ida’amuu hooggansa MM Dr. Abiyyi Ahimad jalatti guutuu biyyattiitti raawwatamaa jiru, magaalota qulqulluu, magariisa, bareedduu fi jiraattotaaf mijataa taasisuu qofa osoo hin taane, hawwata turizimii isaaniis dabalaa jira jedhan. Sochiin Itiyoophiyaa Qulqulleettii marsaa sadaffaa sagantaalee biyyaalessaa kanneen waliin bifa qindoomina qabuun hojiirra kan oolu ta’uu ibsaniiru. Sochiin marsaa sadaffaa cimina kanneen kanaan duraa cimsuu fi qaawwa hordoffii, sirna gabaasaa fi qindoomina dhaabbilee gadi fageenyaan madaaluun qophaa’uu ibsaniiru. Sochiin kun hubannoo uumuu qofa osoo hin taane bu’aa safaramuu danda’u, hordoffii fi madaallii cimaa, itti gaafatamummaa dhaabbilee irratti kan xiyyeeffatu ta’uu beeksisaniiru. Abbaan Taayitaa Eegumsa Naannoo ittisa faalama, eegumsa naannoo fi seerota kanaan walqabatan, akkasumas hubannoo hawaasaa uumuu irratti hojii fakkeenyummaa qabu hojjechaa jiraachuu ibsaniiru. Milkaa’ina sochii kanaa mirkaneessuuf mootummoonni naannolee fi bulchiinsi magaalotaa hundi karoora raawwii ifa ta’e qopheessuun, baajata ramaduun, akkaataa haala naannoo isaaniitti sirna hordoffii fi gabaasa cimaa diriirsuun hojjechuun akka irraa eegamu dubbataniiru. Keessattuu, pirezidaantonni naannolee, kantiiboonni, fi hoggantoonni dhaabbilee eegumsa naannoo itti gaafatamummaa hoggansa isaanii bu’a qabeessa ta’een akka ba’atan waamicha dhiyeessaniiru. Milkaa’ina sochii biyyaalessaa kanaaf dameen dhuunfaa, dhaabbileen waldaalee siivikii, dhaabbileen amantaa, dubartoonni, dargaggoonni waliin hojjechuu akka qabanis waamicha dhiyeessaniiru.

Waxabajjii 26/2018(ENA): Odeeffannoon raaga qilleensaa Istitiyuutii Meetirooloojii Itiyoophiyaa tamsaasu bu'aa barbaadamu akka fiduuf qaamoleen dhimmi ilaallatuufi hawaasni fayyadamaan qindoominaan hojjechuu akka qaban ibsame. Marii hojii keessatti raaga haala qilleensaa yeroo Arfaasaa darbe irratti gamaaggamni gaggeeffamee fi raaga yeroo Gannaa dhufu ilaalchisee mariin qaamolee dhimmi ilaallatu hirmaachise Magaalaa Roobeetti adeemsifamaa jira. Daayirektarri Giddugala Tajaajila Meetirooloojii Kibba Oromiyaa Inistitiyuutichaa obbo Mulaatuu Warqinaa akka ibsanitti, tajaajilli raaga qilleensaa caalaatti ammayyaa fi hawaasa bira ga'aa akka ta'uuf hojii bal'aan hojjetamaa jira jedhani. Tajaajila meetiyorooloojii babal'isuu fi ammayyeessuun raaga qilleensaa dhugaa waliin walitti dhiyeenya qabu kennuuf gargaara jedhan. Akka ibsanitti, yeroo Gannaa dhufu keessatti naannolee Kibba Oromiyaa keessatti roobni dhibbeentaa 20 ol idilee olii, dhibbeentaa 45 idilee, akkasumas dhibbeentaa 35 immoo idilee gadi akka ta'u tilmaamameera. Kanaaf qaamoleen dhimmi ilaallatu keessumaa naannolee roobni idilee gadi ta'uu danda'u jedhaman keessatti qonnaan bultoonni sanyii yeroo gabaabaa keessatti ga'u akka facaasan deeggarsaa fi hordoffii barbaachisaa akka taasisan jechuun dhaamaniiru. Akkasumas hoggantoonni sadarkaa garaagaraatti argamanii fi qaamoleen dhimmi ilaallatu odeeffannoo raaga haala qilleensaa sirnaan hojii irra oolchuun miidhaa uumamuu malu hir'isuuf xiyyeeffannoon hojjechuu akka qaban waamicha dhiyeessaniiru. Itti Aanaan Hogganaa Waajjira Qonnaa Godina Baalee obbo Mu’aawiyyaa Fu’aad gamasaaniin, odeeffannoon raaga qilleensaa yeroo yeroon kennamu carraa gaarii fayyadamuuf akkasumas balaa mudachuu malu hir'isuuf gargaarsa guddaa akka qabu ibsaniiru. Hirmaattonni marichaas odeeffannoon raaga qilleensaa yeroo yeroon Inistitiyuutii Meetirooloojii Itiyoophiyaatiin kennamu hojii hawaasummaa fi dinagdee milkeessuuf shoora olaanaa akka taphatu mootummaa fi hawaasaaf bu'aa qabaachuu isaa eeraniiru. Giddugalli Tajaajila Meetirooloojii Kibba Oromiyaa Godinaalee Baalee, Baalee Bahaa, Booranaa, Gujii, akkasumas kutaa Arsii fi Arsii Lixaa akka tajaajilu ibsameera.

Waxabajjii 25/2018( ENA) : Paartileen siyaasaa Miseensa Mana Marii Waloo Naannoo Oromiyaa guyyaa har’aa sagantaa Ashaaraa Magariisaa bara kanaa irratti qooda fudhachuun magaalaa Shaggar kutaa magaalaa Malkaa Noonnootti waloodhaan biqiltuu dhaabaniiru. Ergaa ijoo “ Abdii haa dhaabnu” jedhuun ashaaraa magariisaa kaa’uun biyya magariituu dhalootaaf mijattuu taate uumuuf saganticharrtti hirmaataniiru. Bara kana sosochiin sagantaa ashaaraa magariisaa guutuu Oromiyaatti itti fufee jira. Paartileen siyaasaa Miseensa Mana Maree Waloo Naannoo Oromiyaas guyyaa har’aa magalaa Shaggar Kutaa Magaalaa Malkaa Noonnootti waloodhaan biqiltuu dhaabuudhaan sagantaa Ashaaraa magariisaa bara kanaa keessatti qooda fudhataniiru. Miseensoonni mana marichaa sagantaa Ashaaraa Magariisaa kanarratti qooda fudhatanis dantaa biyyaaleessaa irratti garaagarummaa tokko malee waloodhaan dhaabachuun qajeeltoo keenya waan ta'eef,sagantaa ijaarsa biyyaa akkanaarratti qooda fudhachuun itti gaafatamummaa seenaa bahachuudhaaf har'a sagantaa kanarratti hirmaanneerra jedhaniiru. Barreessaan mana maree Paartilee siyaasaa Naannoo Oromiyaa Obbo Taarikuu Dinbaruu “Ashaaraan magariisaa dhimma waloota’uu ibsaniiru. Ajandichi dhalootaaf kan hojjetamu ta’uu ibsuun, bu’aan gama Kanaan argaa jiranis kan dhinqisiifatan ta’uu ibsaniiru. Hojiilee ijaarsa biyyaa fi dantaa biyyaaleessaarratti garaagarummaa hin qabnu; fulduraafis hin qabaannu jedhaniiru. Daawwit Waarisaa Araarsoo Paartii Sooshaal Dimokiraasii irraa akka himanitti,gaaffii misoomaa ummata keenyaa waliin deebisuu qabna jedhaniiru. Garaagarummaan siyaasaa jiraatullee, ijaarsa biyyaarratti itti gaafatamummaa waloo akka qaban ibsaniiru. Waamicha mootummaan waloon akka hojjennuuf dhiyeesse fudhannee qindoominaan hojjechaa jirra jedhaniiru. Waajjira Paartii Badhaadhinaa Damee Oromiyaatti Hogganaan Damee Ijaarsa Dimokiraasii obbo Mogos Ida’ee sagantaa kanarratti yaada kennaniin, dhimma waloo irratti waloon hojjechuun Kun aadaa siyaasaa biyya kana jijjiiruu keessatti tarkaanfii tokko ta’uu ibsaniiru. Manni Maree Waloo Paartiilee Siyaasaa yeroo filannoo duwwaa osoo hin taane, yeroo kamiyyuu dhimmoota waloo fi dantaa biyyaaleessaa irratti waliin hojjechuuf qajeeltoo fi ejjennoo cimaadhaan waloodhaan hojjechaa jira jedhan. Kunis aadaan siyaasaa biyya keenyaa adeemsaan jijjiramaa fi ammayyaa’aa dhufuu kan mul’isu ta’uu ibsaniiru. Hojii ashaaraa magariisaa kaa’uu guyyaa har’aa hojjetameen alattis manni marichaa hojiiwwan tajaajila lammummaa biroo ijaarsa biyyaa keessatti hiika qaban hojjechuuf karoorsee qindoominaan socho’aa jiras jedhan. Manni Mariichaa har’a waareen booda karoora waloo hojii itti aanuu irrattis kan mari'atan ta'uu ibsameera.  

Waxabajjii 22/2018 (ENA): Faayidaa sagantaa ashaaraa magariisaa qabatamaan argachaa waan jirruuf, saganticharratti waggaa waggaadhaan hirmaachaa jirra jechuun jiraattonni Godina Jimmaa ENA’n dubbise ibsaniiru. Godina Jimmaa Aanaa Sokorruutti sagantaan jalqabsiisa biqiltuu dhaabuu ashaaraa magariisaa, Waajjira Paartii Badhaadhinaa Damee Oromiyaatti itti gaafatamaan Damee Siyaasaa Obbo Namarraa Bulii, Hogganaa Biiroo Qonna Oromiyaa Obbo Geetuu Gammachuu fi hoggantoonni mootummaa Godinaa fi aanaa biroon bakka argamanitti eegalameera. Kana malees, miseensonni Raayyaa Ittisa Biyyaa Ajaja Giddugaleessaa fi hojjettonni dhaabbilee mootummaa dabalatee kutaaleen hawaasaa garaagaraa hirmaachaa jiru. Jiraattota godinichaa biqiltuu dhaaburratti hirmaatan keessaa tokko kan ta'an Barsiisaa Biyyaa Abbaadiggaa, faayidaa sagantaa ashaaraa magariisaa qabatamaan argachaa waan jirruuf saganticharratti hirmaachaa jirra jedhani.   Waggoottan darbatanitti biqiltuun naannoo isaaniitti dhaabaman naannicha, magariisaa taasisuu isaanii ibsuun, dhuunfaan biqiltuu dhaaban irraas fayyadamoo ta'uu jalqabuu isaanii dubbataniiru. Hundi namaa hirmaannaa sagantaa biqiltuu dhaaburratti taasisu akka jabeessus dhaamsa dabarsaniiru. Qonnaan bultoonni Abbaaraayyaa Sheekii fi Mahaammadsaanii Abbaadiggaa gamasaaniitiin, biqiltuun waggoottan darbatanitti dhaabaman bifa naannoo isaanii jijjiiruu irra cinatti dhiqama biyyee akka ittiseef ibsaniiru. Biqiltuu kanaan dura dhaabamerraa faayidaa argachaa jiran hordofuun, har'as roobni utuu isaan hin daangessin biqiltuu dhaaburratti hirmaachaa akka jiran dubbataniiru. Hogganaan Waajjira Paartii Badhaadhinaa Damee Oromiyaatti Damee Siyaasaa Obbo Namarraa Bulli; biqiltuun waggoottan darbatanitti dhaabaman faayidaalee hedduu argamsiisaniiru jedhan.   Kunis jijjiirama qilleensaa ittisuu fi dhiqama biyyoo hanbisuu dabalatee faayidaa guddaan kan irratti argamedha jedhaniiru. Sagantaa kanaan naannichatti omishtummaan bunaa fi dammaa guddachuu isaa ibsuun, qabeenya bishaanii keenya eeguu fi lammiileef carraa hojii uumuu dandeessiseera jedhaniiru. Hogganaan Biiroo Qonna Oromiyaa Obbo Geetuu Gammachuu gama isaaniitiin; naannichatti waggoottan torban darban keessatti biqiltuu dhaabaman keessaa dhibbeentaa 85 kan ta'an qabachuu isaanii dubbataniiru. Naannichatti sagantaan ashaaraa magariisaa bu'aa qabatamaa fidaa waan jiruuf cimee akka itti fufus hubachiisaniiru. Godina Jimmaatti Ganna kana biqiltuu miiliyoona 365 dhaabuuf karoorfachuu kan ibsan ammoo Bulchaa Ol'aanaa Godinichaa Obbo Tijjaanii Naasiridha.   Miseensi Raayyaa Ittisa Biyyaa Ajaja Giddugaleessaa Dalool, Ajajaa kudhanii Ashannafii Alamuu sagantaa ashaaraa magariisaarratti yeroo shanaffaatiif hirmaachaa akka jiran dubbataniiru. Ashaaraan magariisaa faayidaalee dinagdee damee hedduu akka qabu hubachuu isaaniitiin ganamaan saganticharratti hirmaachaa akka jiran ibsaniiru.  

Waxabajjii 22/2018 (ENA): Biqiltoonni har’a dhaabnu kun biyya keenya qofaaf osoo hin taane addunyaa guutuuf furmaata jijjiirama qilleensaa ta’u jedhan Af-yaa’iin Mootummaa Naannoo Oromiyaa aadde Sa’aadaa Abdurahmaan. Sagantaan Ashaaraa Magariisaa bara kanaa naannoo Oromiyaa Godinoota adda addaatti eegalamaa jira. Sagantaan biqiltuu dhaabuu kun magaalaa Shaggar, kutaa magaalaa Buraayyuu, aanaa annee Diimaatti, bakka Afyaa’iin Bulchiinsa Mootummaa Naannoo Oromiyaa Sa’aadaa Abdurahmaan fi Kantiibaan bulchiinsa magaalaa Shaggar Dr. Tashoomaa Addunyaa hawaasa naannoo waliin ta’uun gaggeeffameera. Aadde Sa’aadaan wayita sana akka himanitti, Sagantaan Ashaaraa Magariisaa jijjiirama qilleensaa ittisuu qofa osoo hin taane, wabii nyaataa mirkaneessuu keessatti gahee olaanaa taphataa jira jedhani. Kantiibaan Magaalaa Shaggar Dr. Tashoomaa Addunyaa ammayyummaa magaalaaf gaheen ashaaraa magariisaa olaanaa dha jedhan. Waggoota darbanitti magaalichatti biqiltuun miiliyoona 71 ol dhaabamuu eeruun kantiibaan kun, lafti manca’e deebi’ee akka dandamatu kan taasisee fi namoota hedduuf carraa hojii kan uume ta’uu ibsaniiru. Sagantaa ashaaraa magariisaa bara kanaatiin magaalichatti biqiltuuwwan gosa adda addaa fi faayidaa adda addaa qaban miiliyoona 19.1 dhaabuuf qophiin taasifamuus kantiibaan kun eeraniiru. Biqiltuun dhaabame kaayyoo yaadameef akka ooluuf hawaasni of eeggannoo addaa gochuu fi eegumsa gochuu akka qabus dubbataniiru.

Waxabajjii 22/2018(ENA): Naannoo Oromiyaatti Ganna kana biqiltuuwwan faayidaa adda addaa qaban akka dhaabaman Itti aanaan Pireezidaantii Naannichaa obbo Awwaluu Abdii ibsan. Godinaalee naannichaa adda addaa keessatti sagantaan jalqabsiisa Ashaaraa Magariisaa baranaa kan adeemsifame yoo ta'u, Itti Aanaan Pireezidaantii naannoo Oromiyaa obbo Awwaluu Abdii Godina Shawaa Lixaa Aanaa Dandiitti argamuun ashaaraa isaanii kaa'aniiru. Itti aanaan Pireezidaantii obbo Awwaluu Abdii wayita sana akka dubbatanitti, hojiilee sagantaa ashaaraa magariisaa waggoota darban raawwatamaniin hojii misooma diinagdeetiif bu'uura kaa’aa jiru jedhani. Keessattuu sagantichaan biqiltuuwwan dhaabaman kan nyaataaf oolan madda diinagdee dabalataa ta'uu eegaluu isaanii ibsaniiru.   Kana qofa osoo hin taane, sagantichi naannichaa keessatti dargaggoota baay'eedhaaf carraa hojii kan uume yoo ta'u, gabbina biyyee fi magariisummaa naannoo dabaluu isaas dubbataniiru. Sagantichi imala gargaarsarraa gara oomishtummaatti taasifamaa jiru galmaan ga'uufis gargaaraa akka jiru eeraniiru. Ganna kanaan sagantaa ashaaraa magariisaatiin naannichatti biqiltuuwwan faayidaa hedduu qaban lafa hektaara kuma 94 irratti ni dhaabamu jedhaniiru. Bulchaan Godina Shawaa Lixaa obbo Diidhaa Guddataa gama isaaniitiin, Godinichatti sagantaan biqiltuu ashaaraa magariisaa dhaabuu adeemsifamaa ture faayidaa hedduu argamsiisaa jira jedhaniiru. Waggoota darbanitti biqiltuuwwan dhaabamee kanaan miidhaginni Haroo Dandii dabalaa dhufuu isaa kaasanii, biqiltuun har'a dhaabnu kun dhaloota boruutiif faayidaa guddaa qaba jechuun ibsaniiru. Sagantaa biqiltuu dhaabbii kana irratti jiraattonni naannichaa bal'inaan hirmaataniiru.