Sadaasa 4/2019 (ENA)- Itiyoophiyaa fi Faransaayi dhimmoota COP32 irratti waliin akka hojjetan ibsan. Yaa’iin jijjiirama haala qilleensaa dhaabbata mootummoota gamtoomanii 31ffaan Turkiyyee, Antaaliyaatti gaggeeffamaa jira. Ministirri maallaqaa fi mari’attuun muummee COP32 Dr. Fitsum Asaffaa yaa’ichaan cinaatti hojii raawwachiisaa ejensii misooma Faransaayi Kiriistoof Lekurtiyer waliin mari’ataniiru. Mariin isaanii Faransaayi tumsa Itiyoophiyaa waliin qabdu caalaatti cimsuu fi dhimmoota COP32 irratti itti fufiinsaan hojjechuurratti kan xiyyeeffatedha.

Sadaasa 4/2019 (ENA)- Lammiin Itiyoophiyaa hundi qophiin COP32’f taasifamu bu’a qabeessa akka ta’u itti gaafatamasaa bahu qaba jedhan itti gaafatamtuun sakireetaariyaatii pireesii waajjira ministira muummee Billanee Siyyum ibsan. Itiyoophiyaanonni biyya keessummaa simannu ta’uu keenya yaa’ii Kanaan agarsiisuu qabna jedhaniiru. Yaa’iin jijjiirama haala qilleensaa dhaabbata mootummoota gamtoomanii 31ffaan Turkiyyee, Antaaliyaatti gaggeeffamaa jira. Itti gaafatamtuun sakireetaariyaatii pireesii waajjira ministira muummee Billanee Siyyum ministirri muummee Dr. Abiyyi Ahimad COP31 irratti hojiiwwan gurguddoo raawwatan akkasumas haal duree biyyattiin COP32 qopheessuuf gochaa jirtuu fi maqaa gaarii biyyaalessaa haala Kanaan hojjetamu ilaalchisuun ibsa kennaniiru. Biilalnee Siyuum akka ibsanitti, hirmaannaan Itiyoophiyaa COP31 irratti taasiftu paaviliyoonii qofa irratti kan daangeffame osoo hin taane, marii fi marii jijjiirama qilleensaa irrattis dammaqinaan hirmaachaa jirti. Itiyoophiyaan gama jijjiirama qilleensaatiin dargaggoota beekumsa teeknikaa fi ogummaa gahaa qaban marii irratti hirmaatan horachaa akka jirtus ibsaniiru. Itiyoophiyaan COP32 kan keessummeessitu yoo ta’u biyyoota Afrikaatiin deeggaramtee filatamuu ishee kan yaadachiisan Billalneen, ajandaa biyyaalessaa qofa osoo hin taane, ajandaa ardichaa gara fuulduraatti dhiyeessuun mariiwwan irratti hirmaachuu akka itti fuftu dubbataniiru. Qophii COP 32’f koreen biyyaalessaa ministira muummee Dr. Abiyyi Ahimadiin durfamu hundaa'uu fi wantoota dhiyaachuu qaban akkasumas qophii barbaachisu irratti gamaaggamni taasifamaa akka jiru ibsaniiru. Yaa’iin kun keessummoota hanga kuma 80tti tilmaamaman kan keessummeessu waan ta'eef, dandeettii hoteelotaa, geejjibaa fi tajaajiloota biroo guddisuun akka barbaachisu hubachiisaniiru. Yaa’iin idil-addunyaa guddaan kun itti gaafatamummaa mootummaa qofa osoo hin taane, itti gaafatamummaa ummata Finfinnee fi ummata Itiyoophiyaa hundaati jedhaniiru. Simannaa keessummootaa gochaan agarsiisuuf, qaamoleen damee turizimii fi tajaajilaa keessatti bobba'an dandeettii gahaa akka horatan qophiin bal'aan taasifamaa jiraachuu ibsaniiru. Adeemsi kun keessummoota simachuu qofa osoo hin taane, biyya ittiin ijaarru, dhaabbilee ittiin cimsinu, akkasumas oomishtoonni biyya keessaa carraa guddaa ittiin argatan ta'uu isaa ibsaniiru. Kanaafuu, ji'oota dhufan keessatti mootummaan qophii saffisaa yeroo taasisaa jiru, ummanni hundi itti gaafatamummaa waliinii isaa akka bahatu waamicha dhiyeessaniiru.

Sadaasa 4/2019 (ENA)- Ministirri maallaqaa fi mari’attuun muummee COP32 Dr. Fitsum Asaffaa itti gaafatama olaanaa sagantaa misooma mootummoota gamtoomanii (UNDP) Aleksaandar De Kiruu waliin marii gamlamee bu’a qabeessa ta’e tasisaniiru. Yaa’ii COP31 Antaaliyaatti gaggeeffamu cinaatti marii taasifameen tumsa haala qilleensaa fi hojiilee misoomaa fulla’aa ilaalchisuun tumsa isaanii cimsuu haala dandeessisurratti mari’ataniiru. Keessumaa, Itiyoophiyaa fi UNDP’n dameewwan faayinaansii jijjiirama qilleensaa, invastimantii fi dandeettii jijjiirama qilleensaa dandamachuu guddisuu irratti hariiroo yeroo dheeraa qaban caalaatti cimsanii itti fufuuf carraawwan jiran irratti yaada wal jijjiiraniiru.

Sadaasa 4/2019 (ENA)- Hariiroon Itiyoophiyaa fi Turkiyyee sadarkaa olaanaatti akka guddatuuf mariin Ministirri Muummee Dr. Abiyyi Ahimad fi Pirezidaantiin Turkiyyee Resiip Xayyib Erdogaan gidduutti taasifame carraa gaarii uumuusaa itti gaafatamaan sekreetariyaatii miidiyaa waajjira ministira muummee Billanee Siyyum ibsaniiru. Yaa’iin jijjiirama haala qilleensaa dhaabbata mootummoota gamtoomanii (COP31) Turkiyyee magaalaa Antaaliyaa keessatti gaggeeffamaa jira. Itti gaafatamtuun waajjira sakireetariyaatii waajjira ministira muummee Billanee Siyyuum hojiiwwan Ministirri Muummee Dr. Abiyyi Ahimad COP31 irratti raawwatanii fi qophii Itiyoophiyaan COP32 keessummeessuuf taasisaa jirtu, akkasumas adeemsa ijaarsa maqaa gaarii biyyaalessaa irratti ibsa kennaniiru. Akka ibsa isaaniitti, Ministirri Muummee Abiyyi Ahimad turtii Turkiyyee marii gamlamee Pirezidaantii Turkii Resiip Xayiip Erdogaan waliin taasisuun jalqabaniiru. Itiyoophiyaa fi Turkiyyeen dameewwan dippilomaasii, diinagdee fi kanneen biroo irratti seenaa dheeraa tumsaa fi hariiroo akka qabanibsaniiru. Ministirri Muummee Dr. Abiyyi Ahimad yeroo garaagaraatti Turkiyyee daawwachuu fi waltajjiiwwan adda addaa irratti hirmaachuu isaanii yaadachiisaniiru. Bara darbes Pirezidaantiin Turkiyyee Resiip Xayyip Erdogaan garee mootummaa olaanaa waliin Itiyoophiyaa daawwachuun hariiroo biyyoota lamaanii sadarkaa olaanaatti guddisuuf mariin taasifamuu ibsaniiru. Mariin Turkiyyee Antaaliyaa keessatti taasifame kunis dhimmoota kanaan dura irratti waliigalame irratti hanga ammaatti guddinni argame maal akka ta'e gamaaggamuuf carraa gaarii ta'uu ibsaniiru. Kana malees, Itiyoophiyaan bara dhufu COP32 keessummeessuuf waan jirtuuf, muuxannoo Turkiyyeerraa argachuu dandeessuu fi deeggarsa barbaachisaa ta'e akkamitti argachuu akka dandeessu irratti mariin bal'aan taasifamuu eeraniiru. Turkiyeen qophii COP32 irratti Iiytoophiyaaf deeggarsa barbaachisaa ta'e hunda gochuuf qophii ta'uu mirkaneessiteetti. Dhimma qophii yaa’ichaa ilaalchisee Turkiyyeen Itiyoophiyaaf kabaja guddaa kennuun deeggarsa barbaachisaa ta'e akka godhan kutannoo qabaachuu ishee ibsuun isaanii Billanee Siyyum himaniiru

Itoophiyaan qormaatilee jijjiirama haala qilleensaan dhufu dandamachuuf tooftaawwan adda addaa bocuun erga hojiitti galtee oolee buleera.Itoophiyaanis Qormaatilee jijjiirama haala qilleensaa gara carraawwan gaariitti jijjiiruuf kutannoon hojjechaa jirti. Kanaafis, Sagantaan Ashaaraa Magariisaa fi tarsiimoon diinagdee magariisaa Itoophiyaan dhaloota dhufuuf naannoo qulqulluu fi jireenyaaf mijataa ta’e dhaalchisuuf tattaaffiin taasisaa jirtu ifatti kan mul’atanidha. Bu’uuruma kanaan egeree magariisaa Itoophiyaa ijaaruuf karoorfamee hojiitti galameen imalli waggoota saddeetii Itoophiyaa jijjiireera.   Sagantaan Ashaaraa Magariisaa Itoophiyaa sochii biyyaalessaa Ministira Muummee Dr. Abiyyi Ahimadiin jalqabamee fi waggaa waggaan qindaa’ee hojiirra oolaa jiru , mul’ata guddaa Itoophiyaa gammoojjii ta’uu irraa baraaruu fi lafa magariisa ishee deebisanii ijaaruu of keessaa qaba. Waggoota saddeetan darban, bara 2011 irraa hanga 2018tti, Sagantaan Ashaaraa Magariisaa Itoophiyaanota biyya keessaa fi biyya alaa jiran qindeessuun seenaa milkaa’inaa ajaa'ibsiisaan galmaa’eera. Sagantaan Ashaaraa Magariisaa Ministira Muummee Dr. Abiyyi Ahimadiin jalqabame, baay’ina bosonaa yeroo kamiyyuu caalaa guddisuu fi gadi-lakkisa gaazota faalama qilleensaa hir’isuun gahee olaanaa bahateera. Biqiltuuwwan biiliyoona hedduun dhaabaman lafa qullaa ture deebisanii dandamachiisuu, bishaan lafa jalaa akka deebi’ee argamu taasisuu, manca’insa biyyee ittisuu fi lubbuu qabeeyyiin adda addaa (Biodiversity) deebi’anii akka dagaagan gochuu keessatti gahee guddaa gumaacheera.   Sagantaan kun bara 2011 kan jalqabame yoo ta’u, biqiltuuwwan biiliyoona 4 ol dhaabuun bu’uura Itoophiyaa magariisa har’aa kaa’eera. Bara 2012 immoo, kaka’umsa biyyaalessaan mataduree ‘‘eeggachaa haa dhaabnu ” jedhuun biqiltuuwwan biiliyoona 5 ol dhaabamaniiru.   Fedhiin hawaasni naannoo magariisaan uwwisuu irratti qabu dabalaa dhufeera. Bara 2013, dhaadannoo “Itoophiyaa Magariisa haa taasisnu” jedhuun biqiltuuwwan biiliyoona 6.8 ol dhaabamaniiru. Bara 2014 immoo, biqiltuuwwan biiliyoona 7.2 ol dhaabamaniiru. Aadaan Ashaaraa Magariisaa hawaasa keessatti bu’uura cimaa qabachaa dhufeera. Bara 2015, danbalii hawaasa bal’aa hirmaachisuun biqiltuuwwan biiliyoona 7.5 ol dhaabamaniiru. Bara 2016 immoo, mata-duree “Biyya dhaabdu, dhaloota kununsu” jedhuun biqiltuuwwan biiliyoona 7.5 ol dachee Itoophiyaa irratti dhaabamaniiru. Itoophiyaanonni bara 2017 lakkoofsa biqiltuu dhaabanii galma biyyaalessaa bira darbee, rikoordii galmee addunyaas cabsuun biqiltuuwwan biiliyoona 8 ol dhaabuun danda’ameera. Bara 2018 immoo sagantaan kun imala guddinasaa dabalee itti fufuun biqiltuuwwan biiliyoona 8.5 dhaabuun danda’ameera. Imalli Ashaaraa Magariisaa waggoota saddeetii kun injifannoo biyyaalessaa dinqisiisaa ta’ee, kutannoo Itoophiyaan jijjiirama haala qilleensaa dandamachuuf qabdu kan agarsiisuudha. Ashaaraan Magariisaa dhaala dhaloota boruuti; har’a haa dhaabnu, egeree magariisa haa taasisnu jechuun imala magariisummaa eegalte cimsitee itti fuftee jirti. kanaanis xiyyeeffannoo guddaa sadarkaa idil-Addunyaatti argatteettti. Muuxannoon kun biyyoota ollaa kanneen akka Keeniyaa, Jibuutii, Somaaliyaa, Sudaan Kibbaa fi Sudaaniif biqiltuuwwan gumaachuu fi beekumsa waljijjiiruun jijjiirama haala qilleensaa waliin dandamachuuf fakkeenya guddaa ta’eera. Gama biraatiin, Itoophiyaan gadi-lakkisa gaazota faalama qilleensaa to’achuun misooma qulqulluu fi itti fufiinsa qabu mirkaneessaa jirti.   Dhiyeessiin anniisaa biyyattii guutummaatti madda anniisaa haaromfamuu danda’an irratti kan hundaa’e waan ta’eef, anniisaa qulqulluu fayyadama biyya keessaa fi biyyoota ollaa biraan ga’uun danda’ameera. Kana malees, Mootummaan konkolaattota elektirikii guutummaatti walitti qabamanii biyya alaatii galan gibira gumurukaa irraa guutummaatti bilisa gochuun, hirkatummaa boba’aa fi baasii sharafa alaa hir’isuu bira darbee qulqullina qilleensa magaalotaa eeguu keessatti gahee olaanaa bahachaa jira. Imala misooma magariisaa fi itti fufiinsa qabu kana sadarkaa idil-addunyaatti beeksisuu fi sagalee Afrikaa dhageessisuuf Itoophiyaan yaa’ii Jijjiirama haala qilleensaa31ffaa Dhaabbata Mootummoota Gamtoomanii (COP31),Turkiyyee magaalaa Antaaliyaatti gaggeeffamaa jiru irratti hirmaachaa jirti.   Waltajjii guddaa kana irratti Itoophiyaan saaxilamummaa addaa Afrikaa fi biyyoota guddachaa jiranii jijjiirama qilleensaatiif qabanii fi Addunyaatti beeksisuun addunyaaf hubachiisuun gumaachaa jirti. Itoophiyaan yaa’ii Idil-addunyaa COP32 bara 2027tti gaggeeffamu keessummeessuuf biyya filatamte ta’uu isheetiin, yaa’ii kana irraa muuxannoo keessummeessummaa COP, tajaajila loojistikii idil-addunyaa, akkasumas qophiiwwan nageenyaa fi geejjibaa irratti muuxannoo barbaachisaa ta’e argachuun itti gaafatamummaa seenaa qabeessa itti aanu fudhachuun of qopheessiti. Walumaagalatti, imalli misooma walitti hidhame Itoophiyaa misooma bosonaa, sirna qonnaa itti fufinsa qabu fi teeknooloojii geejjibaa qulqulluu waliin qindeessuun, dhaloota ammaaaf boqonnaa diinagdee haaraa kennuu bira darbee addunyaa baraaruu fi ardii Afrikaaf fakkeenya ta’e, boqonnaa diinagdee itti fufiinsa qabu ijaaraa jirra. Ashaaraan Magariisaa bu’uura misooma itti fufiinsa qabuuti; Itoophiyaan har’a magariisummaa dhaloota egereef magariisaa ijaaraa jirti!

Sadaasa 03/2019 (ENA) – Sagantaan Ashaaraa Magariisaa Itiyoophiyaa qabeenya uumamaa eeguu qofa osoo hin taane, tattaaffii sadarkaa addunyaatti jijjiirama qilleensaa ittisuuf taasifamuuf gumaacha olaanaa taasisaa jiraachuu hayyoonni Yunivarsiitii Jimmaa ibsan. Itiyoophiyaan naannolee manca'an deebisanii misoomsuu fi dhiibbaa jijjiirama qilleensaa dandamachuuf bara 2011 irraa eegalee Sagantaa Ashaaraa Magariisaa biyyaalessaa hojiirra oolchaa jirti. Sagantaan kun baay’inabosonaa guddisuu, manca'insa biyyee hir'isuu fi wabii nyaataa cimsuuf gumaacha taasisaa jira. Barsiisaa fi qorataan Ikooloojii Yunivarsiitii Jimmaa doktar Xibbabuu Alamuu akka ibsanitti, sagantaan kun lafa manca'e deebisanii misoomsuu, baay’ina bosonaa babal'isuu fi balaa lolaa hir'isuu keessatti gahee olaanaa qaba. Kana malees hirmaannaa ummataa fi hariiroo hawaasaa cimsaa jira. Barsiisaa fi qorataan Kutaa Eegumsa Qabeenya uumamaa kolleejjichaa Geetinnat Sayid gama isaaniin, hojii Ashaaraa Magariisaa hojiiwwan eegumsa biyyee fi bishaanii waliin qindoominaan raawwachuun qabeenya bishaanii, misooma jallisii fi oomishtummaa qonnaa guddisuuf akka gargaaru ibsaniiru. Hayyoonni kun Itiyoophiyaan yaa'ii COP32 keessummeessuuf filatamuun ishee damee eegumsa naannoo fi misooma magariisaa irratti gahee qabdu sadarkaa idil-addunyaatti cimsuuf carraa dabalataa akka uumu hubachiisaniiru.

Sadaasa 2/2019 (ENA)- Qophiiwwan COP31 Antaaliyaatti gaggeeffaman cinaatti, ministirri dhimma alaa fi pirezidaantii COP32 ta’uun kan filataman Dr. Geediyoon Ximootiwoos duraa taa’aa garee marii Afriikaa Dr. Antiwii – Bo’aasiyaakoo Amo’a waliin marii gamlamee gaggeessaniiru. Mariin kun dhimmoota biyyoota Afrikaaf dursa qaban kanneen akka jijjiirama haala qilleensaa wajjin madaquu (Adaptation), faayinaansii jijjiirama qilleensaaf oolu (Climate Finance), ce’umsa haqaqabeessa (Just Transition) fi hojii irra oolmaa irratti kan xiyyeeffatu akka ta’e ibsameera. Dabalataanis, biyyoonni guddachaa jiran gumaacha biyyaalessaa murtaa’an (NDCs) fi karoora biyyaalessaa jijjiirama qilleensaa wajjin madaquu (NAPs) hojii irra oolchuu keessatti deeggarsa dabalataa akka argatan, akkasumas tarkaanfiileen jijjiirama qilleensaa dursa misoomaa Afrikaa akka calaqqisiisan barbaachisaa ta’uu irratti mari’achuun ibsameera. PirezidaantiinCOP32, qophiiwwan COP32 yeroo itti cimaa dhufan Itiyoophiyaan Garee Afrikaa Marii Jijjiirama Qilleensaa (AGN) waliin marii dhihoo akka taasistu mirkaneessaniiru. Akkasumas, Antaaliyaa keessatti bu’aa milkaa’aa galmeessuun, amantaa adeemsa marii cimsuun, waadaa irraa gara hojii qabatamaatti ce’uun barbaachisaa ta’uu ibsaniiru. Itiyoophiyaan dursa fi ilaalcha Afrikaa (Africa’s Priorities and Perspectives) qophii fi marii COP32 keessatti haala cimaadhaan akka calaqqisuuf AGN waliin dhiyeenyaan hojjechuu akka itti fuftu dubbataniiru.

Jijjiiramni qilleensaa rakkoo addunyaa yeroo ammaa keessaa isa ijoo ta’ee itti fufeera. Hongee, lolaa, ho’a garmalee dabalaa dhufee fi balaa uumamaa biroo irratti dhiibbaa geessisaa jiru qolachuuf biyyoonni addunyaa tumsa isaanii cimsuun furmaata waaraa barbaadaa jiru. Yaa’iin Jijjiirama Qilleensaa Dhaabbata Mootummoota Gamtoomanii, jechuun COP, waltajjii biyyoonni addunyaa rakkoo kana irratti mariyachuun kallattii fi murtii waliinii itti kaa’an keessaa isa ijoo dha. Waltajjii kana irratti gadi lakkisa gaasota ho’a addunyaa dabalan hir’isuu, biyyoota jijjiirama qilleensaatiin miidhaman deeggaruu fi haala jijjiirama qilleensaa waliin madaquuf tarkaanfiiwwan fudhatamuu qaban irratti mariin taasifama. Itoophiyaanis, dhiibbaa jijjiirama qilleensaa irraa kan ka’e biyyoota rakkoolee gara garaatiif saaxilamoo ta’an keessaa tokko taatus, rakkoo kana qolachuu fi dandamannaa hawaasummaa fi dinagdee cimsuuf hojiiwwan qabatamaa bal’inaan hojjechaa jirti. Kana keessatti Sagantaan Ashaaraa Magariisaa, dinagdee magariisaa ijaaruu, madda humna haaromfamaa babal’isuu fi qonna haala qilleensaa dandamatu irratti xiyyeeffachuun hojiiwwan ijoo ta’anii itti fufaniiru. Keessumaa, biqiltuu biliyoonaan lakka’aman dhaabuu fi kunuunsuun bosona deebisanii misoomsuu, dhiqama biyyee ittisuu fi naannoo tikfachuu keessatti bu’aan qabatamaan galmaa’aa jira. Hojiileen kunneen rakkoo jijjiirama qilleensaa qolachuu qofa osoo hin taane, jireenya hawaasaa fooyyessuu fi misooma itti fufiinsa qabu mirkaneessuu keessattis gahee olaanaa qabu. Damee humna haaromfamaatiinis, humna bishaanii, qilleensaa fi aduu irraa maddisiifamu babal’isuun madda humna qulqulluu fayyadamuuf xiyyeeffannoon hojjetamaa jira. Akkasumas, damee qonnaatti sanyiiwwan hongee fi lolaa dandamatan fayyadamuu, qabeenya bishaanii sirnaan bulchuu fi mala qonnaa ammayyaa babal’isuun qonnaan bultoonni haala qilleensaa jijjiiramaa jiru waliin akka madaqan taasifamaa jira. Itoophiyaan COP31rraatti muuxannoo ishee Addunyaaf qoodaa jirti   Itoophiyaan mariiwwan jijjiirama qilleensaa sadarkaa addunyaa irratti hirmaachuu qofa osoo hin taane, hojiiwwan qabatamaa biyya keessatti hojjechaa jirtu muuxannoo ishee hawaasa addunyaatiif qoodaa jirti. Haaluma kanaan, Yaa’ii COP31 Turkiyyee, magaalaa Antaaliyaatti gaggeeffamaa jiru irratti Paaviliyoonii mataa ishee banuun bu’aalee qabatamaa Sagantaa Ashaaraa Magariisaa fi hojiiwwan eegumsa naannoo irratti galmeessite addunyaatti agarsiisaa jirti.   Akkasumas, mariiwwan paanaalii adda addaa irratti hirmaachuun muuxannoo Itoophiyaan jijjiirama qilleensaa qolachuu fi haala isaa waliin madaquuf qabatamaan hojjechaa jirtu qoodaa jirti. Ministirri Dhimma Alaa Doktar Geediyoon Xiimootiwoos akka ibsanitti, Itoophiyaan tumsa jijjiirama haala qilleensaa addunyaa keessatti amanamummaa laafee ture deebisanii ijaaruuf xiyyeeffannoo olaanaa kennitee hojjechaa jirti. Jijjiirama qilleensaa to’achuun dhimma biyya tokko qofaan furamuu danda’u osoo hin taane, tumsa addunyaa kan gaafatu ta’uu hubachuun, Itoophiyaan gahee irraa eegamu bahuu fi tumsa biyyoota biroo waliin qabdu cimsuuf xiyyeeffannoon hojjechaa jirti. COP31 fi waltajjiiwwan idil-addunyaa biroo irratti fedhii biyyoota guddachaa jiran, keessumaa biyyoota Afrikaa, calaqqisiisuun maallaqa, teeknoolojii fi deeggarsa madaqiinsaa jijjiirama qilleensaan walqabatu akka argatan gaafachuunis gahee Itoophiyaan bahaa jirtu keessaa isa tokko dha. Biyyoonni guddachaa jiran dhiibbaa jijjiirama qilleensaa irraa miidhaa guddaa kan baatan ta’us, rakkoo kanaaf sababa guddaa ta’an keessaa akka hin taane yeroo hubatamu, tumsi idil-addunyaa fi haqa qilleensaa mirkaneessuun murteessaa ta’a. Bu’aa Qabatamaa fi Gahee Idil-addunyaa Hojiileen Itoophiyaan Sagantaa Ashaaraa Magariisaa, dinagdee magariisaa, humna haaromfamaa fi qonna haala qilleensaa dandamatu irratti hojjechaa jirtu, rakkoo kana qolachuuf kutannoo qabdu kan mul’isan dha. Kana malees, biyyattiin muuxannoo ishee biyyoota biroo waliin qooduun, sagalee biyyoota guddachaa jiran waltajjiiwwan idil-addunyaa irratti dhageessisuu fi tumsa hawaasa addunyaa keessatti gahee ishee bahuuf xiyyeeffannoon hojjechaa jirti. Jijjiirama qilleensaa dandamachuun naannoo eeguu fi guddina dinagdee itti fufiinsa qabu mirkaneessuun wal irraa hin cinne. Kanaaf, waliigaltee sadarkaa addunyaa irratti taasifamu hojii qabatamaatti jijjiiruun, maallaqaa fi teeknoolojii barbaachisu biyyoota guddachaa jiraniif dhiheessuun murteessaa dha. Itoophiyaanis, hojiiwwan qabatamaa biyya keessatti jalqabde cimsuun, muuxannoo ishee addunyaatti qooduu fi tumsa idil-addunyaa keessatti gahee ishee bahuu irratti xiyyeeffannoo itti fufuun, furmaata rakkoo jijjiirama qilleensaatiif taasifamu keessatti gahee olaanaa bahaa jirti.

Sadaasa 2/2019(ENA)- Itiyoophiyaan marii COP31’n cinaatti marii taasifameen ogummaa magariisaa fi carraa hojii uumuuf kutannoo qabdu ibsite. Itiyoophiyaan waltajjii “dinagdee kaarboonii xiqqaa ijaaruuf ogummaa guddisuu fi carraa hojii uumuu” jedhuun dhaabbata mootummoota gamtoomaniitti yaa’ii jijjiirama haala qilleensaa COP31 cinaatti gaggeeffamerratti misooma ogummaa magariisaa irratti kutannooshee mirkaneessiteetti. Waltajjicharratti kan argaman ministirri tarsiimoo biyyaalessaa obbo Barakat Fissahaa tsuyoon akka ibsanitti, Itiyoophiyaan misooma humna namaarratti invast gochuun carraa hojii dargaggootaa babal’isuu fi cehumsa dinagdee magariisaa haqa qabeessa mirkaneessuuf xiyyeeffannoon hojjechaa jirti. Qopheessituu haaraa kan taate Finfinnee yaa’ii COP32’f qophii akka taatu carraaqqii taasifamu keessatti, anniisaa haaromfamu si’achiisuu fi sagantaa ashaaraa magariisaa dargaggootaaf carraa hojii hedduu akka uumanii fi ammas carraawwan haaraa banaa akka jiran ministirichi cimsanii dubbataniiru.

Sadaasa 2/2019 (ENA): Dhaqqabummaa maallaqa jijjiirama haala qilleensaa bal'isuu fi biyyoota guddachaa jiranii akka deeggaran taasisuun barbaachisaa ta’uu Ministirri Maallaqaa fi Gaggeessaa olaanaan COP32 Dr. Fitsum Asaffaa ibsan. Gamaaggama COP31 cinaatti mata duree “Fandii Maallaqa Jijjiirama Qilleensaa baay'ee giddu-galeessa ta'an dhaqqabummaa fooyya'aa fi dhiibbaa ol'aanaaf waliin hojjechuu” jedhuun qophaa'e irratti Ministirri Maallaqaafi Gaggeessaan Daldala Guddicha COP32 Dr. Dr. Fitsum Asaffaa haasawa taasisaniiru. Haasawa isaaniitiinis hirmaannaa idil-addunyaa cimsachuu, dhaqqabummaa maallaqa jijjiirama qilleensaa bal'isuu, akkasumas biyyoota guddachaa jiraniif hojiwwan dursaa jijjiirama qilleensaa isaanii akka deeggaran waamicha dhiyeessaniiru. Kessumaa immoo karaa kanaa bu'aa qabeessummaa kuusaawwan maallaqa jijjiirama qilleensaa baay'ee gurgudoo dabaluun barbaachisaa ta'uu isaa hubachiisaniiru.

  Onkoloolessa 1/2019 (ENA)—Itoophiyaa fi Dhaabbanni Meetorooloojii Addunyaa qindoomina isaanii ittisa qilleensaa fi akeekkachiisa duraa caalaatti cimsuun hojjechuuf kutannoo qaban beeksisan. Yaa’iin Jijjiirrama haala qilleensaa Dhaabbata Biyoota Gamtoomanii 31ffaan (COP 31) biyya Turkii Antaaliyaa gaggeeffamaa jira.   Yaa'ichi Mata-dureen “Fuuldura itti fufiinsa qabu, dandamannaa fi haqa mirkanaa'eetti imaluu” jedhu gaggeeffamaa jira.   Yaa’icharratti Itoophiyaan hirmaachaa jirti. Ministirri Istiraateejii Biyyaalessaa Barakat Fissahaatsiyoon yaa’icha cinaatti barreessaa olaanaa Dhaabbata Meetorooloojii Addunyaa (WMO) Piroofeesar Seeleste Saawloo waliin mari’ataniiru. Mariin kun dhimmoota sirna hordoffii qilleensaa fi haala qilleensaa irratti qindoomina cimsuu, dandeettii akeekkachiisa duraa gabbisuu, dhiyeessii odeeffannoo qilleensaa haqa qabeessa ta’e jajjabeessuu fi Finfinneetti yaa’ii COP 32 dura saayinsii irratti kan hundaa’e ittisa qilleensaa cimsachuu irratti kan xiyyeeffatedha. Mariin kun marsariitii hordoffii cimaa, haqa qabeessummaa odeeffannoo, ijaarsa dandeettii fi qindoomina addunyaatiin dandeettii dandamachuu cimsachuuf kutannoo qaban kan mirkaneessedha.

Sadaasa 1/2019 (ENA) – Itoophiyaan tumsa jijjiirama haala qilleensaa addunyaa keessatti amanamummaa laafee ture deebisanii ijaaruuf xiyyeeffannoo olaanaa kennitee hojjechaa jirti jechuun Ministirri Dhimma Alaa fi Pirezidaantiin COP32, Doktar Geediyoon Ximootiwoos, ibsan. Galmawwan jijjiirama haala qilleensaa milkeessuuf dhiyeessiin faayinaansii addunyaa haqa qabeessa ta'uun barbaachisaa ta'uusaa hubachiisaniiru. Yaa'iin Dhaabbata Mootummoota Gamtoomanii Jijjiirama Qabeenya Qilleensaa 31ffaan (COP31) Turkiyyee, magaalaa Antaaliyaa keessatti gaggeeffamaa jira. yaa'ichi Mata-dureen “Fuuldura itti fufiinsa qabu, dandamannaa fi haqa mirkanaa'eetti imaluu” jedhu ta'uu ibsameera. Itoophiyaanis yaa'icha kanarratti hirmaachaa jirti. Ministirri Ministeera Dhimma Alaa fi Pirezidaantiin COP32, Doktar Geediyoon Xiimootiwoos, yaa'icharatti irratti hirmaataniiru. Doktar Geediyoon walgahicharratti haasawa taasisaniin biyyoota rakkoo jijjiirama haala qilleensaatiin miidhaman cinaa dhaabbachuu isaanii ibsaniiru. Hawaasni addunyaa yeroo ammaa kana qormaatawwan seena qabeessa, ulfaatoo fi murtee furmaata barbaadan hedduu akka isa mudatanis dubbataniiru. Rakkoon jijjiirama qabeenya qilleensaa yeroodha gara yerootti hammaachaa dhufuu kan kaasan ministirichi, dhiphina ji'oopoolitikaa jechuunis tumsa addunyaa qormaata keessa galchaa jiraachuu ibsaniiru. Hariiroon dinagdee addunyaa fedhii nageenya biyyaalessaa irraa ka'uun akka qoratamaa jiru kaasaniiru. Dorgommii biyyoonni teeknooloojii, invastimantii fi daldala irratti taasisaa jiran irraa kan ka'e, tattaaffiin addunyaa jijjiirama qabeenya qilleensaa ittisuuf taasifamaa jiru laafaa dhufuu isaa ministirichi ibsaniiru. Biyyoonni faayinaansii jijjiirama qabeenya qilleensaaf barbaachisu osoo hin argatin gadi lakkifama gaazota ho'a addunyaa dabalan hir'isuu fi dhiibbaa rakkoo kanaa dandamachuuf itti gaafatamummaa olaanaa akka isaan irratti fe'amaa jiru dubbataniiru. Gabaasota saayinsii Sagantaa Eegumsa Naannoo Dhaabbata Mootummoota Gamtoomanii wabii godhachuun, daballii ho'a addunyaa to'achuu, qaawwa qophii dhiibbaa isaa dandamachuuf jiru cufuu fi miidhaa fi kasaaraaf furmaata ariifachiisaa kennuun dhimma jiraachuu ta'uu isaanii hubachiisaniiru. Qaawwi dhiyeessii faayinaansii osoo hin guutamin gadi lakkifama hir'isuu fi humna dandamannaa cimsuun yaada keessa galuu kan hin dandeenye ta'uu isaanii cimsanii ibsaniiru. Itoophiyaan yaa'ii COP32 pirezidaantummaan gaggeessuuf yeroo qophaa'aa jirtu kanatti, tumsa jijjiirama qabeenya qilleensaa addunyaa keessatti amanamummaa laafee ture deebisanii ijaaruu xiyyeeffannoo ishee isa guddaa taasifachuun akka hojjettu Doktar Geediyoon dubbataniiru. Amanamummaa kana deebisanii argachuuf raawwii bu'a qabeessa irratti hundaa'e, sirna hunda hirmaachisu, garaagarummaa mariin furuu fi galmawwan addunyaa karoora biyya keessaa waliin qindeesuun barbaachisaa ta'uu hubachiisaniiru. Tumsa jijjiirama qabeenya qilleensaa tokkummaa addunyaatiif bu'uura ijoo taasisuunis akka barbaachisu ibsaniiru.

Onkoloolessa 28/2019 (ENA)--Bu'uuraalee misoomaa ammayyaa adda addaa magaalaa guddittiitti ijaarame sirna geejjibaa magaalaa ammayyeessuu isaanii Biiroon Geejjibaa Magaalaa Finfinnee ibse. Mootummaan ida’amuu misooma magaalaatiif xiyyeeffannoo kennuun hojiileen misoomaa faayidaa hedduu qaban raawwatamaniiru. Keessattuu misooma koridarii fi qarqara lagaa miidhagina magaalotaa kanaan duraa jijjiiruun lammiileef jireenya mijataa, qulqulluu uumuun danda'meera. Jijjiirrama gaarii kanaaf fakkeenya guddaan magaalaa Finfinnee yoo taatu, kanaan dura lafoo deemtootaa fi hanqina paarkingii irraa kan ka'e balaan tiraafikaa mudachaa ture sadarkaa olaanaatti hambisuun danda'ameera.   Itti-aanaan hogganaa Biiroo Geejjibaa Magaalaa Finfinnee Obbo Daanyaachoo Shifarawu ENA’f akka ibsanitti, hojiileen misoomaa saffisaa fi dinqisiisoo ta’an magaalaa guddittii keessatti raawwataman magaalaan kun mijattuu fi nageenyi ishee mirkanaa'e filatamtuu ishee taasiseera jedhaniiru. Keessattuu misooma koridaraa daandiiwwan lafoo deemtootaa bal'aan ijaaramuun Miilaan shaakala deemuu gabbisuun jireenya haaraa fideera. Kunis fayyaaf, baasii akkasumas qilleensi akka hin faalamneef gumaacha ol'aanaa taasisaa jira. Kanaan dura magaalaattiitti kan hin baratamne kanneen akka saayikilii tajaajilli geejjibaa mootor-maleeyyiin amma bal'inaan eegaluu isaanii eeraniiru. Filannoowwan haaraan kun rakkina geejjibaa jiraattotaa hambisuu irra darbee geejjibaa magariisaa ijaaruuf faayidaa guddaa akka qaban dubbataniiru.   Walumaagalatti hojiileen misoomaa raawwataman filannoowwan geejjibaa magaalaatiif bal'isuun jireenya guyyaa guyyaa jiraattotaa salphaa taasisaa jira jedhaniiru. Magaalattitti kanaan dura paarkingii lama kan hin caalle turuusaa yaadachiisanii, amma garuu yeroo tokkotti konkolaattota kuma kudhaniin lakkaa'aman keessummeessuu kan danda'an paarkingiiwwan hedduu ijaaramuu isaanii ibsaniiru. Bu'uuraaleen misoomaa haaraan kun sirna geejjibaa magaalaatti ammayyaa’aa fi qabatamaa gochuu irratti jijjiirrama guddaa fidaa jiraachuu Obbo Daanyachoon dubbataniiru.  

Onkoloolessa 21/2019 (ENA): Babal'achuun buufataalee chaarjii konkolaattota elektirikii magaalaa Bishooftuutti sochii turizimiifi misooma margaa fooyyessuuf ni gargaara jechuun Kantiibaan Magaalaa Bishooftuu Obbo Alamaayyoo Asaffaa ibsan. Tajaajilli Elektiriikii Itoophiyaa buufataalee chaarjii elektirikii Bishooftuu, Moojoo, Adaamaa, Baatuu fi Hawaasaa akkasumas bakkeewwan shan Finfinneetti ijaarsise eebbisiisaa jira. Kantiibaan Magaalaa Bishooftuu Obbo Alamayyoo Asaffaa sirna eebba buufataalee chaarjii elektriikii Bishooftuutti ijaaramaanii irratti haasaa taasisaniin akka ibsanitti; Bishooftuun Finfinnee irraa kiilomeetira 47 fagaattee kan argamtu, qabeenya uumamaa fi haroowwan isheetiin kan beekamtu wiirtuu turizimii fi diinagdeeti jedhaniiru. Buufataaleen magaalattiitti ijaaramaan kun konkolaattota elektirikii salphaatti chaarjii gochuuf kan dandeessisan ta'uu yaadachiisuun, imaltoonni sababoota adda addaatiin gara Bishooftuu dhufan magaalattii keessa akka turan ni gargaara jedhaniiru.   Konkolaattota elektiriikii fayyadamuun fedhii boba'aa xiqqeessuuf, faalama qilleensaa hir'isuufi misooma margiisaa cimsuuf filannoo barbaachisaa ta'uu dubbataniiru. Fuulduraafis Bishooftuu fi naannoo isheetti buufataaleen chaarjii elektriikii dabalataa yeroo ijaaraman, bakka pirojektoota kanaatiif barbaachisu qopheessuu irraa eegalee hanga hojii jalqabsiisuutti bulchiinsi magaalichaa deeggarsa irraa eegamu hunda akka taasisu mirkaneessaniiru. hojii raawwachiisaa Olaanaa Tajaajila Elektriikii Itoophiyaa Injiinar Geetuu Garramaawu gamasaaniin; magaalota gurguddoo ja'a keessatti buufataaleen chaarjii saffisaa konkolaattota elektriikii ammayyaa 11 ijaaraman yeroo tokkotti konkolaattota 96 chaarjii gochuu kan danda'an ta'uu ibsaniiru. Dhaabbichi yeroo tokkotti hanga konkolaattota 150 chaarjii elektiriikii taasisuu kan dandeessisu uumuu isaas eeraniiru.   Babal'achuun buufataalee chaarjii konkolaattota elektriikii fayyadama anniisaa qulqulluu jajjabeessuu bira darbee, faalama qilleensaa fi boba'aa irratti hirkattummaa jiru hir'isuuf akka gargaaru ibsaniiru. Fuulduraafis Maqalee, Baahir Daar, Gondar, Jigjigaa, Dirredawaa, Jimmaa, Arbaa Minchii fi magaalota biroo keessatti buufataalee chaarjii elektriikii dabalataa babal'isuuf karoorri qabamuu isaa beeksisaniiru. #Biyya Guddoo, Ummata Guddaa # Mul'ata Guddaa  

Addunyaan Itoophiyaa maqaa qofaan ishee beeka malee haala gaariin seenaa fi qabeenya ishee sirriitti hin hubanne. Kunis karaalee ittiin Itoophiyaan beeksifamtu dhibuu isaati. Har'a garuu Marsareetiin Itoophiyaa fi qabeenya ishee addunyaatti sirriitti beeksisu ifatti eegaleera. Itoophiyaan, lafa argama buna buna bosonaa addunyaaf gumaachitedha. Maal kana qofaree Itoophiyaan bakka madda dhala namaatis. Maddi dhala namaa kuni immoo yeroo ammaa kana qilleensa qulqulluu ashaaraa magariisaa isaan dhaabeen aara galfachaa jira. Itoophiyaan laggeen ishee, qilleensaa fi humna aduu gara anniisaatti jijjiirtee of bira darbitee ollaa isheef ifa taateetti. Magaalonni Itoophiyaa miidhaganii abaaboo Afrikaa ta’anii mul’achaa jiru. Itoophiyaan fakkeenya gootummaa, Boonsituu Afriikaanotaa, sagalee tokkummaa Paan Afriikaa taateetti. Itoophiyaan qaroomina ishee durii har’as siidaan, barreeffama mataa isheen, weedduu fi sirbootaan fi pirojektii isheetiin dhalootaaf kaa’aa jirti. Atileetonni ishee miira injifannootiin bakka deeman maratti kan injifatan, Itoophiyaa fi faajjii ishee addunyaaf beeksisaniiru. Imala seena qabeessa gara ‘COP32’tti, marsariitiin kun waltajjii birmadummaa, qabeenyaa fi abdii Itoophiyaa, seenaa keenya irraa kaasee hanga raawwii keenya ammaatti, qaroomina keenya irraa eegalee hanga mul’ata egeree keenyaatti addunyaaf itti dhiheessinudha. Hambaa ishee durii beekaa; Seenaa Itoophiyaa dhugaa ba'aa! #Mootummaa Ida’amuu #Biyya Guddoo, Ummata Guddaa # Mul'ata Guddaa Miseensa Maatii Miidiyaa Dijiitaalaa ENA ta’aa https://www.ena.et/web/links

Onkoloolessa 4/2019 (ENA)- Itiyoophiyaa fi Denmaark jijjiirama haala qilleensaarratti tumsasaanii caalaatti cimsuuf walii galtee mallatteessaniiru. Ministirri maallaqaa Dr. Fitsum Asaffaa fi Itiyoophiyaatti ambaasaaddarri Deenmaark Sunee Kiroogsitirup walii galticha mallatteessaniiru. Akkaataa walii galtee kanaatti Itiyoophiyaan jijjiirama haala qilleensaa ilaalchisee ajandaa duraa fi kallattii xiyyeeffannoo sadarkaa idil addunyaatti beeksisuu fi agarsiisuuf gootuuf Deenmaark deeggarsa maallaqaa akka taasiftu himameera. Walii galteen haaraan kun hirmaannaa Itiyoophiyaan Kanaan dura taateewwan jijjiirama haala qilleensaarratti taasisaa turterratti hundaa’uun kan raawwatame yoo ta’u michoomaa fi tumsa egeree biyyoota lamaanii caalaatti akka cimsu ibsameera.

Inistitiyuutii Metiworooloojii Itoophiyaa daawwachuuf carraa argadheen ture. Dhaabbatichi tajaajila raaga qilleensaa guutuu kennuudhaan dhaabbata humna misoomaa biyyattiif hojiiwwan murteessaa ta'an hojjechuudhaan umurii bara dheeraa qabudha. Daawwannichaan haala qilleensaafi amala qilleensaa jijjiiramaa jiru ilaalchisee haalota hubachuufi deebii kennuudhaan humna qabnu cimsuudhaaf odeeffannoo meetiriiwooloojii funaanuun, qorannoon saayinsaawaafi guddinni teknooloojii faayidaa olaanaa qabu kan mirkaneesse ta'uu argeera.   Dhaabbilee akka Inistitiyuutii Metiworooloojii Itoophiyaa jiran cimsuun baay'ee barbaachisaadha. Tajaajiloota dameewwan ijoo akka qonnaa, bishaan, fayyaa, aviyeeshiniifi hooggansi hojii yaaddoo balaa itti hirkatan fooyyessuuf ijaarsa dandeettii humna namaa, teknooloojiiwwan ammayyaafi misooma bu'uraa odeeffannoo irratti qabeenya ramadanii hojechuun murteessaadha. Keessaayyuu balaawwan dursanii tilmaamuuf, naannaawwan kamitti dafanii qaqqabuun caalaatti akka barbaachisu murteessuuf akkasumas karaa wayitawaa fi bu'a-qabeessa ta'e akka sochoonu gochuuf faayidaa sirnoonni dursanii akeekkachiisuu qaban najajjabeesseera. Odeeffannoo amansiisaan gara qajeelfamoota qabatamaatti yoo jijjiiramu lubbuu baraara; qabeenya kunuunsa, akkasumas murtii fooyya'aa kennuuf gargaara. Hojiin akkasii saatalaayitii ilaaluu bira kan darbudha. Hojichi odeeffannoowwan funaanamanii, qindaawwaaniifi qaacceffamanii tarkaanfii wayitaawaa fudhachuuf akka gargaaran, buufatawwan funaansa odeeffannoofi man'ee giddugala odeeffannoo ciccimoo guutummaa biyyattiitti argaman irraattis kan hundaa'edha.

Waggoota kurnan darban keessa uwwisni bosonaa ishee baay’ee haphatee ture. Haalli kunis biyyattii jijjiirama haala qilleensaa fi eegumsa naannoof qormaata itti ta’aa tureera. Kaka’umsa Ministira Muummee Dr. Abiyyi Ahimadiin ifatti bara 2011 kan jalqabame sagantaan ashaaraa magariisaa bu’aa olaanaa fidaa jira. Sagantaa ashaaraa magariisaa kanas ummanni Itoophiyaa qajeelfama hoggansa isaa fudhachuun duulaan biqiloota dhaabuun adda duree akka ta’e Zegaardiyaan gabaasa isaa keessatti bal’inaan ibseera. Haliimaa Kadir yeroo jalqabaaf gaafa biqiltuu dhaabuu jalqabdu namoonni akka ishee shakkanii fi itti qoosan akka turte illee Zegaardiyaan gabaasa isaa keessatti eereera. Biqiloonni dhaabaman kunniin muuzii,zayituunaafi Giraaviiliyaa, akkasumas gosoota kuduraa fi muduraa adda addaan oyiruu uwwifame bira teessoo mukaarra teessee gaafa biqiltuu dbaabuuf jettu sana gara duubatti yaadatti. Olloonni koo abdii na kutachiisanii ture jetti. Garuu waan ajaa’ibaa hojjette. Namoota Tokkoo tokkoo isaaniif ifaajii homaa hin baafne itti fakkaatee ture;garuu booda biqiloonni dhaabaman kunniin jijjiirama qilleensaa fi wabii nyaataa mirkaneessuuf furmaata ta’ee gaafa argamu dhugaa jiru hubachaa dhufuu isaanii ibsiti. Naannoo Oromiyaa aanaa Barbareetti kan kan argamtu Haliimaa Kadir umuriin waggaa 35 kan taate,biqiloota kumaatamaan lakkaa’aman dhaabuun eegumsa naannoof modeela taateetti. Biyya akka Itoophiyaa mancaatiin bosonaa mudatuti hojiin Haalimaa salphaa hin turre; ija jabina naamusaa fi cimina guddaa gaafata ture. Amma garuu wanti hundi jijjiirameera jetti Haalimaan. Biqiltoonni isheen dhaabde guddachuu fi naannoon ishee magariisa ta'aa dhufuun, warri jalqaba abdii kutachiisuuf yaalan illee hojii cimaa fi kutannoo ishee akka dinqisiifatan ibsiteetti. Haalimaaf biqiltuun isheen dhaabdu muka ofii isaatii irra darbee hiika qaba; isaanis hiriyyoota ishee dhiyootiin akkasumas qormaata hawaasa ishee addunyaa irratti jijjiirama qilleensaaf saaxilamoo ta’an keessaa tokko ta’eef furmaata ta’anii ilaalamu. Akkuma ‘The Guardian’ gabaasetti; Itiyoophiyaan babal’ina qonnaa, biqiltuu qoraaniif oolan fi itti fayyadama cileef irraa kan ka’e uwwisa bosona ishee bal’aa dhabdeetti. Kunis heddummina lubbu qabeeyyii, gabbina biyyee fi qabeenya bishaanii irratti miidhaa guddaa kan geessise yoo ta’u, balaawwan haala qilleensaatiin walqabatan hammeesseera. Inishiyeetiiwwan hedduu mootummaan Itiyoophiyaan eegalte keessaa tokko kan ta’e Ashaaraa Magariisaan, jijjiirama qilleensaa fi mancaatii bosonaa hir’isuu keessatti gahee olaanaa taphateera. Gabaasni kun akka mul’isutti waggoota torban darban keessatti biqiltuun biiliyoona 48 ta’u sagantaa kanaan dhaabameera, kan amma jiru osoo hin dabalatiin jechuudha. Ollaan Haalimaa Faxee Abdullaahi milkaa’ina Haalimaa erga argitee booda eegumsa naannoo irratti hirmaattetti. Isheenis nuti akka hin dogoggorre nutti agarsiifte jechuun Haalimaa jajuun, rakkoon furmaata biyya keessaatiin rakkoo addunyaa furuun furuun akka danda’amu agarsiisuudhaan fakkeenya taatee jirti jette. Hawaasni Oromoo daa’ima nama biraa irraa dhalate abbaa fi haadha uumamaa ykn walitti dhufeenya dhalootaa tokko malee fudhachuun akka dhala ofiitti guddifachuun, akka ilmoo ofiitti guddisee, faayidaa dinagdee fi hawaasummaa isaa eeguun aadaa qaba. Ummanni Oromoo biqiltuu akka ilmoo isaatti ilaala. Haalimaan duudhaa kana irraa ka’uun biqiloota dhaabuun kunuunsuun akka ishee gargaare ibsiteetti. Akkasumas walitti dhufeenya ijoollee ishee waliin qabdu miira haadhummaa waliin walqabsiistee jirti. ''Akkuma aadaa keenya keessatti ijoollee guddifnu, biqiltuus akka ijoollee kootti nan ilaala,'' jetteetti. Naannoo hanqinni bishaanii hamaan jiru keessa kan jiraattu Haalimaan gara sa'aatii tokkoo deemtee biqiltuu ishee bishaan obaasti. Ilmi Haalimaa ganna 13, Anwaar Hasan, haadha isaatti akka boonu ibsuun, kaayyoo ishee hordofuu akka barbaadu dubbata. Jijjiirama qilleensaa ittisuuf umurii guutuu waadaa galuu akka barbaadus himeera. Maatiin fi dubartoonni kumaatamaan lakkaa’aman ganda naannoo sana jiranis sagantaa biqiltuu dhaabuu kana irratti hirmaataniiru. Akka qorattoonni naannoo fi ogeeyyiin jedhanitti, gosoonni mukaa dhalootaan maatii fi dhaabbilee adda addaatti raabsaman hedduun isaanii guddataniiru. Naannolee gammoojjii fi haala qilleensaaf miira qaban keessatti tattaaffiin kun hawaasni jijjiirama qilleensaa caalaatti akka dandamatu gargaaruu danda’a. Qindeessaan Sagantaa Biyyaalessaa ‘REDD+’ Misooma Bosonaa Itiyoophiyaa Doktar Xibabuu Mogas sagantaa dhaabbii biqiltuu hanga ammaatti milkaa’inni guddaan argame badda dareetti ta’uu dubbatu. Itiyoophiyaan jijjiirama qilleensaa ittisuuf kutannoon hin raafamne akka biyyaattis ta’e idil-addunyaatti guddachaa fi babal’achaa dhufeera. Miidiyaa Dijitaalaa ENA hordofaa- https://www.ena.et/web/links

Fulbaana 8/2019 (ENA) Odeeffannoo raaga haala qilleensaa bal'inaan dhiyeessuun qophii fi offeeggannoo duraa akka jiraatuuf dhiyeenyaan hojjetamaa jiraachuusaa Inistitiyuutiin Meetiroloojii Itoophiyaa beeksise. Inistitiyuutichi gamaggama haala qilleensa gannaa fi raaga haala qilleensa bonaa fuulduraa hirmaannaa qooda fudhattootaatiin Adaamaatti gaggeessaa jira. Daarektarri Olaanaan Inistitiyuutichaa Dr.Faxxanaa Tashoomaa akka jedhanitti, Inistitiyuutichi misoomawwan hawaasummaafi dinagdee biyyaattif faayidaa kan qaban raaga haala qilleensaa yeroo gabaabaa fi dheeraa yeroosaa eeggatee dhiyeessuun gaheesaa ba'achaa jira.   Odeeffannoon kunneen keessattuu dameelee Qonnaafi misooma jallisiif, Bulchiinsa qabeenya bishaaniif, hir’ina sodaa balaatiif,Aviyeeshinii fi geejibaatiif ,Barnootaafi fayyaaf gaggeesuuf murteessaa ta’uusaanii ibsaniiru. Akkasumas,odeeffannoo haala qilleensaa yeroosaa eeggatee fi amansiisaa ta'e uummataafi qooda fudhattootaaf dhiyeessuun misoomaa fi guddina biyyaatiif murteessaa ta'uu isaafi hojiin kun cimee kan ittifufu ta'uu ibsaniiru. odeeffannoo raaga haala qilleensaa yeroodhaan dhiyeessuun qophii fi deebii sirrii kennuuf kan gargaaruudhas jedhan. Qooda fudhattoonnis odeeffannoo kanatti fayyadamanii tarkaanfii qophiitiif akka itti fayyadaman waamicha dhiyeessaniiru. Gara biraatiin, raaga haala qilleensa Bonaa kan dhiyeessan Itti Aanaa Daarektara Inistitiyuutichaa Dr.Asaamminnoo Tashoomaa akka ibsanitti,Bona dhufu kanatti naannowwan horsiise bulaatti haalli qilleensaa misooma qonnaatiif mijaawaa ta'ee fi roobni gaariin akka jiraatu ibsaniiru. Naannoowwan kunniin rooba kana jalqaba baatii Onkololeessaatii jalqabanii kan argatan ta'uun ibsameera. See less  

Fulbaana 6/2019 (ENA) — Naannoo Harariitti biqiltuuwwan Sagantaa Ashaaraa Magariisaan dhaabaman kunuunsuun cimee akka itti fufu Pirezidaantiin Naannichaa Obbo Ordiin Badirii ibsan. Pirezidaantiin Naannoo Hararii Ordiin Badirii fi hoggantoonni naannichaa biqiltuuwwan ji’oota gannaa keessa dhaabaman kunuunsaniiru. Hoggantoonni kunneen biqiltuuwwan dhaabaman haala gaariin akka guddatan taasisuuf hojii kunuunsaa barbaachisaa ta’e irratti xiyyeeffachuun hojiiwwan adda addaa raawwataniiru. Naannichatti sagantaalee dhaabbii biqiltuu Ashaaraa Magariisaan biqiltuuwwan faayidaa hedduu qaban dhaabamuu isaanii ni yaadatama. Hojii dhaabbii biqiltuuwwanii irratti hoggantoonni olaanoo naannichaa, qaamoleen ittisaa fi nageenyaa, hojjettoonni mootummaa, dargaggoonni fi dubartoonni, qonnaan bultoonni akkasumas kutaaleen hawaasaa gara garaa hirmaataniiru. Har’as Pirezidaantiin Naannichaa Obbo Ordiin Badirii fi hoggantoonni olaanoo naannichaa Gaara “Haakim” irratti biqiltuuwwan yeroo gannaa dhaabaman bishaan obaasuu fi kunuunsuu isaanii ibsameera. Naannicha keessatti biqiltuuwwan yeroo ji’oota gannaa dhaabaman hanga muka guddaa ta’anitti kunuunsi barbaachisaa ta’ee xiyyeeffannaan kennamee hojjetamaa jira. Pirezidaantiin Naannichaa Obbo Ordiin Badirii yeroo kanatti akka jedhanitti, biqiltuuwwan yeroo gannaa naannichatti dhaabaman sirnaan akka latanii fi guddatan gochuuf kunuunsa barbaachisaa ta’e taasisuun murteessaadha. Yeroo ammaa kanas, keessumaa biqiltuuwwan dhaabaman kaayyoo barbaadameef akka oolan qaamoleen adda addaa hojii kunuunsaa hojjechaa jiran jajjabeeffamuu akka qaban hubachiisaniiru. Itti aansuunis biqiltuuwwan bishaan obaasuu fi marga irraa qulqulleessuun sirnaan akka latanii fi guddatan gochuun barbaachisaa ta’uu Pirezidaantiin Naannichaa hubachiisaniiru. Kana malees, Pirezidaantiin Naannichaa Obbo Ordiin Badirii hojii pirojektii Inisheetivii gaara Haakim daawwachuu isaanii ibsameera. Hojiin pirojektichaa karoora yeroo qabame keessatti saffisaa fi qulqullinaan raawwatamaa jiraachuu isaa eeraniiru.