Waxabajjii 07/2017 (TOI)-Sagantaa Ashaaraa Magariisaa bara Kanaan biqiltuuwwan faayidaa hedduu qabanii fi haala Ikooloojii bu’uureffateen dhaabuuf qophiin taassifamuun ibsame. Ministeera Qonnaatti Hojii Raawwachiisaa olaanaan Eegumsa Misooma Qabeenya Uumama fi itti fayyadamaa Faanosee Mokonnin TOI waliin Gaaf-deebii taassisaniin, sagantaa Ashaaraa Magariisaa ganna kanaaf qophii taassifameera Jedhan. Qophiin biqiltuu biliyoona 7 tuqaa 5 dhaabuu dandeessisu raawwatamuu ibsuun, biqiltuuwwan Mandhaalee fi faayidaa heduu qabaniif xiyyeeffannoon kennamuu ibsaniiru. Dhaabbiin biqiltuu haala ikooloojii bu’uura godhateen akka ta’e ibsuun, kanaafis hojiiwwan barbaachisoon raawwatamuu kaasaniiru. Sagantaa Ashaaraa magarisaa waggoottan darbaniin bu’aawwan hedduun argamuu kan ibsan gaggeessaan olaanaa, kunis yeroo ammaa wabii nyaataa mirkaneessuuf hirmaannaa taassifamuuf gahee guddaa qabaachuu fi carraa hojii uumuu danda’uu dubbataniiru. Daarekteerri olaanaan jiddugala biqiltuu Gullallee Injiinar Guutamaa Morodaa gama isaaniin akka ibsanitti, Magaalaa Finfinnee jiraattotaaf mijattuu taassisuuf uwwisa naannoo magariisaa guddisuun murteessaa dha jedhaniiru. Kunis faalama Qilleensaa Ittisuuf qooda guddaa qabaachuu kaasuun, biqiltuuwwan Mandhaaleen filatamaa ta’uu dubbataniiru. Biqiltuuwwan Sagantaa Ashaaraa Magariisaa bara Kanaaf giddugalichatti qophaa’an dhibbentaa 50 kan ta’an biqiltuuwwan Mandhaaleedha jedhaniiru.

Waxabajjii 05/2017(TOI)-Magaalaan Shaggar bakka jireenya qofa osoo hin ta’iin Magaalaa Omishaa akka taatu hojii hojjetameen bu’aan argamaa jiraachuu kantiibaan bulchiinsa magaalichaa Dr.Tashoomaa Addunyaa dubbatan. Bulchiinsa magaalaa Shaggar Kutaa Magaalaa Mana Abbichuutti sagantaan eegalchiisa dhaabbii biqiltuu Appilii bakka hoggantoonni Bulchinsa Magaalichaa, miseensonni raayyaa Ittisa biyyaa fi jiraattonni naannichaa argamanitti gaggeeffameera. Kantiibaan Bulchiinsa Magaalichaa Doktar Tashoomaa Addunyaa Sirna eegalchiisa irratti Akka Jedhanitti, Magaalaan Shaggar erga Hundeeffamtee eegalee hojiiwwan fayyadamummaa hawaasaa guddisan raawwatamaa jiraachuu ibsaniiru . Magaalittiin bakka jireenyaa qofaa osoo hin ta’iin giddugala Omishaa akka taatuuf hojii hedduun hojjetamuu dubbataniiru. Magaalittii giddugala Qonna ammayyaa gochuuf waggoottan darban sheediiwwan omishaa kuma 10 ol ta’an ijaaramanii namoota hedduuf carraan hojii uumamuu ibsaniiru. Sheedota kana keessaatti hojii Misooma Lukkuu, Misooma Saa’a Aannanii, Furdisa beellada foonii fi misooma kuduraa fi muduraan Hojjetamaa jira jedhaniiru. Ganna dhufu bulchiinsa magaalichaatti lafa hektaara kuma 1 irratti biqiltuun Avookaadoo fi Appilii akka dhaabamu ibsuun, guyyaa hara’aa Kutaa Magaalaa Mana Abbichuutti lafa hektaara 38 irratti biqiltuun appilii dhaabbachuu dubbataniru . Itti Aanaan Kantiiba Bulchiinsa Magaalaa Shaggarii fi Qindeessaan Kilaastera Qonnaa Obbo Girmaa Hayiluu, Bulchiinsa Magaalichaatti Misooma muduraa fi kuduraaf Xiyyeeffannoon addaa kennamuu ibsaniiru . Ganna kana wabii nyaataa mirkaneessuuf kan gargaaranii fi gabaa alaatiif kan oolan biqiltuuwwan faayidaa hedduu qaban nidhaabbamu jedhaniiru. Biqiltuuwwan Dhaabaman Keessaa Kuduraa fi Muduraa Dhaabaman Keessaa Dhibbantaan 50 ol Biqiltuu Appilii Ta’uu Dabalanii Ibsaniiru. Hogganaan paartii badhaadhinaa Waajjira damee kutaa magaalaa Mana Abbichuu obbo Fiqaaduu Hordofaa gamasaaniin, ganna kana biqiltuuwwan faayidaa heduu qaban dhaabuuf qophii barbaachisaa taassisuu dubbataniiru. Kutaa magaalichaatti lafa hektaara kuma 50 irratti dhaabbiin biqiltuu Appilii eegalamuu ibsuun, qonnaan bulaa naannichaa muuxannoo gaarii kana fudhatee biqituu dhaabbate akka kunuunsu hubachiisaniiru. Jiraattota Naannawichaa biqiltuu dhaabuu irratti hirmaatan keessaa obbo Masfin Malaakuu, ganna kana biqiltoota faayidaa hedduu qaban dhaabuuf qophaa’uu ibsaniiru. Faayidaan biqiltuu appilii guddaa ta’uu hubachuun Hirmaannaa Taasisuusaanii Dubbatanii, misoomni muduraa fi kuduraa naannawichatti cimuu qaba jedhaniiru.

Caamsaa 30/2017(TOI)- Misoomni Kooriidarii Magaalaa Bishooftuu Akkaataa Yaad Rimee ‘Smaar Siitii’ Dhugoomsuu fi Wiirtuu Tuuristii Xiyyeeffannoo Keessa Galchuun Hojjetamaa Jiraachuu Manni Qopheessaa Magaalichaa Beeksise. Bulchiinsi Magaalaa Bishooftuu Waggaa Darbe Sadarkaa Riijioopooliitaantiin Caaseffamuunshee Kan Yaadatamu Yoo Ta’u Magaalota Hojiin Misooma Kooriidaraa Haala Gaariin Keessatti Hojjetamaa Jiran Keessaa tokko Ta’uun Eerameera. Hojii Gaggeessaan Bulchiinsa Magaalaa Bishooftuu Obbo Gabree Dhaabbii TOItti Akka Himanitti, Hojiin Misooma Kooriidaraa Magaalattii Inisheetiivii Addaatiin Hojjetamaa Jira. Bulchiinsi Magaalichaa Hojii Jalqabuun Dura Hooggansa, Jiraataa fi Qooda Fudhattootaaf Hubannoo Uumuun hojiitti Galamuu Dubbataniiru. Misooma Kooriidaraaf Jecha Manneen Dhuunfaa, Mootummaa fi Daldalaa Diiguun Gamatti Sararoota Ibsaa, Telekoomii fi Bishaanii Qindoominaan Ofeeggannoon Akka Kaafaman Taasifamaa Turuu Ibsaniiru. Misoomni Kooriidarii Daandii asfaaltii KM. 24, Ujummoowwan Ammayyaa Dhangala’aan Ittiin Dhabamsiifamu, Qargara Daandii Miidhagsuu fi Bakkeewwan Magariisaa, Daandii Bishkileetii fi Lafoo Akka Ofkeessaa Qabu Ibsaniiru. Keessumaa Ibsaan Telekoomii fi Kaameeraan Nageenyaa Karaa Ammayyaatiin Misooma Kooriidaraa Waliin Walsimanii Akka Diriirfaman Taasifamaa Jiraachuu Himaniiru. Misoomni Kooriidarii Magaalaa Bishooftuu Irra Caalaa Akkaataa Yaad rimee ‘Smaar Siitii’ Magaalattii Dhugoomsuu fi Wiirtuu Tuurizimii Ta’uushee Xiyyeeffannoo Keessa Galchuun Raawwatamaa Waan Jiruuf Hojichi Bifuma Kanaan Hojjetamaa Jira Jedhan. Bishooftuun Uumamaan Kan Badhaatee fi Haroowwan Torba Kan Qabdu Ta’uu Yaadachiisanii, Hojiin Misooma Kooriidaraa Hawannaa Magaalattiin Uumamaan Badhaate Irratti Miidhagina Dabalataa Karaa Uumuun Hojjetamaa Jira Jedhaniiru. Raawwiinsaa Akkaataa Karoorfameen Ta’uu Hojii Gaggeessaan Kun Kaasanii, Jiraataan Magaalaa, Dureeyyii fi Qooda Fudhattoonni Hirmaannaa Bal’aa Taasisuusaanii Dabaluun Ibsaniiru. Itti Aanaan Itti Waamamaa dhaabbata Misooma Kooriidaraa GorsaaTa’uun Hordofu Mahaandisa Kibabaa Bayyanaa, Misoomni Kooriidaraa Kun Yeroo Ammaa Harka 65 Raawwatamuu Himaniiru. Hojiin Misooma Kooriidaraa Daandii Asfaaltiin Gamatti, Daandiin Lafoo Meetira Shan, Daandiin Bishkileetii Meetira Sadii Sararri Ibsaa Lafa Jala Diriirfamuu fi ‘Smaar Pool’ Ofkeessaa Qabu Hojjetamaa Jiraachuu Dubbataniiru. Magaalattiitti Jiraataan Aanaa Dhakaa Booraa Obbo Gabii Waariyoo, “Misooma Kooriidaraa Kanaan Daandiin Bal’ifamaa Jira, Magaalaan Haaromfamaa Waan Jiruuf Hojii Kana Deeggaraa Jirra” Jedhaniiru. Keessumaa Bakkeewwan Magariisaa Ijaaramaa Jiran Jiraataan Qilleensa Gaarii Kan Itti Argatuu fi Dhimmoota Hawaasaa Biroo Bakka Itti Raawwatu Waan Ta’eef Hojiin Kun Jijjiirama Guddaa Fidaa Jiraachuu Eeraniiru. Daandii Asfaaltii Dabalataa Dabalatee Misooma Kooriidaraa Kanaan Daandiin Lafoo Ijaaramaa Jiraachuu Kan Dubbatan Ammoo Magaalichatti Jiraataa Kutaa Magaalaa Dukam Obbo Minishaa Dajanee Jedhamu. Hojiin Misooma Kooriidaraa Akka Si’atu Deeggarsa Barbaachisu Taasisuu Akka Itti Fufan Dubbataniiru. Barattuu Seenaa Kaasahun Gamasheetiin, Paarkiin Jiddugaleessi Sababa Misooma Kooriidaraan Ijaarame Jiraataaf Bakka Aara Galfii Ta’uu Eertee, Miidhaginni Naannawichaas Dabalaa Dhufuu Dubbateetti.

Caamsaa 30/2017(TOI)- Godina Gujiitti Hojiileen Sagantaa Ashaaraa Magariisaan Ongee Jalaa Bahuuf Waggoottan Darban Hojjetaman Jijjiirama Fidaa Jiraachuu Waajjirri Qonnaa Naannichaa Ibse. Waajjirichatti Dursaan Garee Qabeenya Uumamaa Obbo Wandoo Sharbottee, Godinichatti Waggoottan Darban Biqiltuuwwan Garagaraa Lafa Heektaara 22 Irratti Dhaabamuu Ibsaniiru. Biqiltuun Dhaabaman Hirmaannaa Ummataan Kunuunfamanii Bal’inaan Qabachuu Dubbataniiru. Biqiltuun Dhabaman Biqiltuu Bosonaa, Muka Gaaddisaa, Nyaata Loonii fi Biqiltuuwwan Muduraa Ta’uu Fakkeenya Kaasaniiru. Ongee fi Naannawa Qullaatti Hafe Misooma Fulla’aan Damdamachuuf Baranas Biqiltuu Miiliyoona 87 caalu Dhaabuuf Qophiin Taasifameera. Aanaalee 13 Keessatti Lafti Sababa Namtolchee fi Uumamaan miidhame heekaara kuma 20 caalu Biqiltuu Dhaabuuf Qophaa’uu ibsaniiru. Waajjirichatti Dursaan Garee Bulchiinsa Bosonaa Obbo Tewoodiroos Gabree, Xiyyeeffannoon Asharaa Magariisaaf Kenname Naannawa Gullaatti Hafe Baraaraa Akka Jiru Ibsaniiru. Hojii godinichatti Hojjetameen Maddeen Gabbatanii Waggaa Amma Waggaatti Yaa’aa Akka Jiranii fi Beelladoonni Bosonaa Dahannoo Dhabanii Baqatan Deebi’aa Akka Jiran Dubbataniiru. Uwwifni Bosonaa Godinichaa Waggaa 6 dura Hekataara Kuma 274 gadi Ture Gara Heektaara Kuma 382tti Guddachuu Eeraniiru.

aamsaa 27/2017(TOI)-Hojiileen Dinagdee Magariisaa jijjiirama Haala Qilleensaan Hinmiidhamne Dhugoomsan Hojjetamaa Jiraachuu Abbaan Taayitaa Eegumsa Naannoo Magaalaa Finfinneetti Beeksise. Hojii Gaggeessaan Olaanaa Abbaa Taayitaa Eegumsa Naannoo Magaalaa Finfinnee Obbo Didhaa Dirribaa TOItti Akka Himanitti, Abbaan Taayitichaa Faalama Naannawaa, Qilleensaa fi Laggeenii Ittisuuf Hojjechaa Jiraachuu Dubbataniiru. Sadarkaa MagaalaattiHojiileen Dinagdee Magariisaa jijjiirama Haala Qilleensaan Hinmiidhamne Dhugoomsan hojjetamaa Jiraachuu Dubbataniiru. Faalama Laggeenii Ittisuun Tajaajila Hawaasummaa fi Dinagdee Akka Kennan Gochuuf Misoomni Qarqara Laggeenii Bal’inaan Hojjetamaa Akka Jiru Dubbataniiru. Gaara Inxooxxoorraa Amma Piikookitti K.M 42 irratti Eegumsi Biyyoo Fi Bishaanii Hojjetamaa Jiraachuu Ibsaniiru. Konkolaattonni Elektiriikiin Hojjetan Baayyachuunsaanii Akkasumas Xiyyeeffannoon Hawaasni Ashaaraa Magariisaaf Kenne Magaalattiitti Faalama Hir’isuuf Qooda Guddaa Bahaa Akka Jiru eeraniiru. Hundeessaa fi Hojii Gaggeessaan Waldaa Amaahee Meeshaalee Elektiriikii Oomishuu Obbo Yohaannis Ayyalaa, Waldaansaanii Faalama Qilleensaa fi Mancaatii Bosonaa Kan Oolchan Midijjaa Anniisaa Qusatan Oomishaa Jiraachuu Dubbataniiru. Jiraattuun Kutaa Magaalaa Eekkaa Adde Taayech Waldasanbat fi Jiraattuun Kutaa Magaalaa Lammii Kuraa Adde Masaayi Taklee Midijjaa fi Eelee Anniisaa Qusatuu Fayyadamaa Jiraachuu Ibsaniiru. Kun Ammoo Dinagdee Magariisaa Itiyoophiyaan Eegalte Kan Dhugoomsuu fi Yeroo Kan Qusatu Ta’uu Eeraniiru.

Caamsaa 25/2017(TOI)-Bulchiinsa Magaalaa Jimmaatti biqiltoonni faayidaa Garagaraa qaban sagantaa Ashaaraa Magaariisaa gannaatiin dhaabbatan qophaa’aniiru. Waajjira Qonnaa Magaalaa Jimmaatti dursaan garee bulchiinsa Qabeenya uumamaa obbo Mahaammad Hasan akka ibsanitti sagantaa dhaabbii biqiltuu Ashaaraa Magariisaa bara kanaaf biqiltuuwwan mukaa fi nyaataaf oolan qophaa’aniiru. waggoottan darban sagantichaan biqiltuuwwan dhaabbatan haala naannoo jijjiiruu fi miidhagina magaalaa dabaluu ilaalchisee sagantaa dhaabbii bara kanaaf kaka’umsa uumeera jedhaniiru. Biqiltuuwwan Dhaabbii Ganna Kanaaf qophaa’an keessaa baala shayii, muduraalee miidhagina magaalaaf oolanii fi nyaata beeyladaaf keessatti Argamu. Obbo Mahaammad dabaluunis biqiltuun soorataaf oolan muduraa fi kuduraan Kanneen Akka muuzii, Paappayaa, Avokaadoo, Maangoo fi kanneen Biroo Akka Ta’an Ibsaniiru. Qophiin Biqiltuu Buufataalee Biqiltuu gandoota shan Keessatti Kan Taasifame Yoo Ta’u, Kunuunsi Taasifamaa Jira Jedhameera. Buufata biqiltuu ganda Jireenitti Biqiltuu Kunuunsaa Kan JiranRoozaa Hasan, akka jedhanitti, biqiltuuwwan waktii Gannaa dhaabbatan kunuunsuun galii baatiin argatan irra sagantaa ashaaraa magariisaaf qooda isaanii bahaa jiraachuu ibsaniiru . Qotee Bulaan Ganda Jireen Obbo Ibrahim Abdallaa gama isaaniin, Biqiltuuwwan waktii gannaa dhaabaman dhunfaa isaaniin biqilchaa jiraachuu kasaniru.

Caamsaa 21/2017 (TOI)፡- Hojiin Eegumsa Biyyoo fi Bishaanii Naannoo Oromiyaatti Hojjetame Lafti Miidhame Qonnaaf Akka Oolu Gumaacha guddaa Taasisaa Akka Jiru Biiroon Qonnaa Naannichaa Ibse. Itti Aanaan Hoogganaa Biiroo Qonnaa Naannichaa Eliyaas Kadir, Bona Baranaa Hawaasa Hirmaachisuun Lafa Heektaara Miiliyoona Sadii Irratti Hojiin Eegumsa Biyyoo Fi Bishaanii Hojjetamuu Dubbataniiru. Hojiin Eegumsa Biyyoo fi Bishaanii Lafa Kanaan Dura Miidhame Misoomatti Galchuun Deeggarsa Olaanaa Taasisaa Akka Jiru Ibsaniiru. Keessumaa Hojiin Misooma Sululaa Naannawa Harargeetti Hojjetame Gaarren Faayuun alatti Hojiilee Wabii Nyaataa Qonnaan Bulaa Naannwaa Mirkaneessuuf Eegalaman Deeggaraa Akka Jiru Dubbataniiru. Hojiin Misooma Sululaa Bakka Kanaan Dura Hinhojjetamnetti fakkeenyaaf Godina Jimmatti Bal’inaan Hojjetamaa Akka Jiru Kaasaniiru. Qonnaan Bultota Godina Jimmaatti Misooma Sululaa Irratti Hirmaatan Keessaa Rashaad Abbaa Bulguu, Baatii Sadan Darbaniif Qonnaan Bultoota Biroo Waliin Tumsuun Bakkeewwan Lolaan Miidhaman Irratti Hojii Eegumsa Biyyoo fi Bishaanii Hojjechuusaanii Dubbataniiru. Kanaan Dura Hojiilee Eegumsa Biyyoo fi Bishaaniif Xuyyeeffannoon Waan Hinkennamneef Lafti Irraangadee Dhiqama Biyyoof Saaxilamuun Hanqinni Oomishaa Isaan Mudachuusaa Kan Dubbatan Qonnaan Bulaa Godina Jimmaa Mulaatuu Gaashaawu Jedhamu. Rakkoo Kana Furuuf Hojii Eegumsa biyyoo fi Bishaanii Mootummaan Qiyyaase Hojjechuun Oomishni isaanii Akka Dabalu Gochuusaa Dubbataniiru.

Caamsaa 21/2017(TOI)-Afriikaan furmaata Jijjiirama Qilleensaa Idila Addunyaa dhiheessuun qooda gaggeessummaashee bahuu akka qabdu de’eetan Ministira pilaanii fi Misoomaa Siyyum Mokonnin ibsan. Mariin Garee Teekniikaa Foramii Dinagdee Jijjiirama Qilleensaan Hinmiidhamnee Qopheessummaa Ministreera Pilaanii fi Misoonaa fi Tumsa Embaasota Noorweey Fi Ingiliz Finfinneetti Argamaniin Qophaa’e Taa’amaa Jira. Qaamoleen Mootummaa, deeggartoonni Misoomaa fi qooda fudhattoonni Maricharratti hirmaachaa kan jiran yoo ta’u, yaa’ii jijiirama qileensaa Afriikaa 2ffaa Qaammee bara 2017 magaalaa Finfinneetti gaggeeffamu Ilaalchisuun marii’chaa jiru. De’eetaan Ministiraa Pilaanii fi misoomaa Siyyum Mokonnin saganticha irratti akka jedhanitti, jijjiiramni qilleensaa gara fuulduraatti sodaa qofa osoo hin ta’iin yeroo ammaa rakkoo hordofiisaa kan jiru mudannoo addunyaati. Itiyoophiyaan walga’ii hoggantootaa Gamtaa Afriikaatti irratti yaa’ii jijiirama qilleensaa Afriikaa keessummeessuuf filatamuu ishee yaadachiisanii, yaa’ichi qormaata Jijjiirama Qilleensaa Damdamachuuf Afrikaanonnii fi Hawaasni Idil Addunyaa kan irratti marii’atu akka ta’u dubbataniiru. Afriikaan furmaata jijjiirama qilleensa Idil Addunyaa dhiheessuun qooda gaggeessummaa ishee bahu qabdi jedhaniiru. Yaa’ichi Hojiilee Itiyoophiyaa fi Guutuu Afriikaatti jijjiirama qilleensaa dandamachuuf dandeessisan agarsiisuu dandeessisa jedhaniiru.

Caamsaa19/2017(TOI)-Itiyoophiyaan misooma magariisaa fi Damee Konistiraakshiniin Carraa Hojii Bal’aa Uumuunshee Kan Dinqisiifamudha Jedhan Dhaabbata Hojii Addunyaatti hoggantuun Kutaa Hojii, Misoomaa fi Invastimantii Miitoo TisuuKamoto Ibsan. Itiyoophiyaan walga’ii Ardii dhaabbata hojii Idil Addunyaa 20ffaa gahumsaan keessummeessuu Isheef hirmaattota irraa beekamtii argatteetti Misooma Magariisaa, Bakkeewwan Tuurizimii, Paarkiiwwan Industirii fi Pirojektoota Misooma Kooriidarii Daawwachuun Itiyoophiyaan Carraa Hojii UUmuu fi Misooma Egereef Xiyyeeffannoo Kennuushee Mirkaneessaniiru. Hoogganaan Kutaa Hojii, Misoomaa Fi Invastimantii Dhaabbata Hojii Addunaa Miitoo Tisukamootoo TOItti akka himanitti, Dameen Konistiraakshinii Finfinneetti Eegalame Carraa hojii hedduu uumuusaa Kan Dinqisiifamudha. Finfinnee Kanin Dhufe Waggaa Saddet Dura Wayita ityoophiyaan Walgahii Ardii Daabbata Hojii Addunyaa 17ffaa Keessummeessitu Ture Kna jedhan Hooggantuun Kun, Yeroo ammaa Jijjiirama Dinqisiisaa Arguusaanii Ibsaniiru.

Caamsaa 19/2017 (TOI)- Godina Shawaa Lixaatti Biqiltuuwwan Sagantaa Ashaaraa Magariisaan Ganna Dhufu Dhaabamuuf Boolli Qophaa’aa Akka Jiru Waajjirri Qonnaa Godinichaa Beeksise. Waajjirichatti Ogeessi Misooma Qabeenya Uumamaa Obbo Guddataa Xuurii,Biqiltuuwwan Garagaraa Sagantaa Ashaaraa Magariisaa Ganna Dhufuuf Qophaa’uu Ibsaniiru. Faayidaan Dinagdee eegumsa biyyee Biqiltuuwwan Waggoottan Darban Dhabaman Kennaa Jiran Ittifufuun Dhaabuuf Kaka’umsa Akka Ittihore dubbataniiru. Biqiltuu Barana Dhaabamuuf Biqiltuuwwan Hedduun Qophaa’uu fi Boolli Biqiltuus Qophaa’aa Akka Jiru Kaasaniiru. Biqiltuun Lafa Heektaara Kuma 138 Irratti Akka Dhaabamu Eeraniiru. Biqiltuuwwan Qophaa’an Biqiltuuwwan Mukaa Kan Akka Waddeessa, Gaattiraa, Ejersa, kanneen biroo fi Kan Muduraawwan Nyaataaf Oolan Avokaadoo, Muuzii, Maangoo fi Muduraalee Biroo Akka Ta’e Dubbataniiru. Kanneen Keessaa Harki 37 Tuqaa 1 Biqiltuu Muduraa Nyaataaf Oolan Ta’uu Ibsuun, Biqiltuun Kun Buufata Biqiltuu Mootummaa, Waldaalee fi Dhuunfaa Kuma 5tti Akka Ta’e Ibsaniiru.

Caamsaa 16/2017(TOI)- Sagantaan Ashaaraa magariisaa Itiyoophiyaa biyyoota oollaa waliin misooma waloo fi walitti hidhamiinsa uumuunsaa ibsame. Ministeera dhimma alaatti daarektar jeneraaliin paabiliik dippilomaasii ambaasaaddar Shibbiruu Maammoo TOI waliin gaaffii fi deebii taasisaniin, sagantaan Ashaaraa Magariisaa gama dippiloaasiin waltajjii addunyaatti beekamtii fi fudhatama argachuusaa himaniiru. Imaammanni dhimma alaa Itiyoophiyaa biyyoota ollaaf dursa kan kennu waanta’eef fayyadama waloo fi walitti hidhamiinsa riijinii caalaatti cimsuuf bu’ura misoomaa, daldala, eegumsa qabeenya uumamaan tumsaan hojjechaa akka jirtu dubbataniiru. Sagantaa Ashaaraa magariisaa Waggaa jaha dura yaada ministirri muummee Dr. Abiyyi Ahimad maddisiisaniin jalqabameen biyyoota ollaa waliin walitti dhiheenyaan hojjetamaa akka jiru ibsaniiru. Hojii paabiliik dippilomaasii hojjetaman keessaas kun tokko ta’uu eeraniiru. Kunis fakkeenyummaan akka fudhatames dubbataniiru. Jijjiirama haala qilleensaa fulla’insaan ittisuu fi qabeenya uumamaa eeguun bu’aan sagantaa Kanaan galmeessifte ilaalchisee sadarkaa idil addunyaatti muuxannoo qooduushee ambaasaaddar Shibbiruun ibsaniiru. Biqiltuuwwan biiliyoonaan lakkaa’aman wagga waggaan dhaabuun bu’aan galmeessifte waltajjii idil addunyaatti beekamtii argachuusaa himaniiru. Biyyoonni ollaa Itiyoophiyaarraa muuxannoo fudhachuun biqiltuu dhaabuuf kaka’umsa akka uume ibsaniiru. Ministeera qonnaatti dursaan hojii raawwachiisaa eegumsa misooma qabeenya uumamaa fi itti fayyadamaa Faanosee Mokonnon gamasaaniin, sagantaan Ashaaraa magariisaa lafti miidhame akka bayyanatu, ciidhinni lafaa akka dabalu, qaamoleen bishaanii akka dabalan gochuu ibsaniiru. Sagantaa Ashaaraa magariisaa bara 2017 biqiltuun biiliyoona toorba tuqaa shanii ol qopheeffamuu obbo Faanoseen dubbataniiru.

Caamsaa 15/2017 (TOI)- Ganna dhufu naannawoota biyyattii hedduutti roobni idilee fi idilee olii akka roobu inistiitiyuutiin Miitiwoorooloojii Itiyoophiyaa beeksise. Waltajjiin Inistiitiyuutichi raaga Waqtii Arfaasaa fi qabatamaan waan turee walbira qabuun fayyadamtoota tajaajilichaa fi qooda fudhattoota waliin qorachuu fi raga ganna dhufuu ifoomsuuf qopheesse Adaamaatti taa’amaa jira. Hojii raawwachiisaan Inistiitiyuutichaa obbo Faxxanaa Tashoomaa akka ibsanitti, waltajjichi kan qophaa’e dubdeebii raaga waqtii Arfaasaa fi raaga ganna dhufuu ibsuufi. Haala Kanaan raagni waqtii Arfaasaa haala qabatamaan yoo ilaalamu madaalawaa ta’ee argineerra jedhan. Naannawoonni rooba gannaa fayyadaman rooba idilee fi idilee olii akka argatan obbo Faxxanaan ibsaniiru. Roobni idilee olii roobuu waan danda’uuf ofeeggannoo n nibarbaachisa jedhaniiru. Ministeera bishaanii fi inarjiitti sadarkaa de’eetaa ministiraatti gorsaan addaa ministirichaa obbo Mootummaa Maqaasaa gamasaaniin, inistiitiiyuutichi hojii isaa ga’umsaan bahachaa akka jiru beeksisaniiru.

Caamsaa 13 /2017(TOI)-Naannoo Kibba Itiyoophiyaatti sagantaa Ashaaraa Magariisaan bara Kana lafa hektaara kuma 83 ol biqiltuu dhaabuuf qophiin taassifamuu Biiroon Bosonaa, Kunuunsaa fi misooma Naannoo beeksise. Hogganaan Biirichaa Obbo Gizaatee Gijee TOI’f akka isanitti, naannichatti sagantaa ashaaraa magariisaan biqiltuuwwan lafa hektaarakuma 83 fi 395 irra dhaabuuf qophiin taassifamu himaniiru. Biqiltuuwwankun Naannichatti Godinaalee12tti Mootummaan, Namoota dhuunfaan, waldaalee fi dhaabbilee Mit-Mootummaan buufata biqiltuu kuma 1 fi 495 qophaa’uu isaanii dubbataniiru. Biqiltuuwwan qophaa’an eegumsa naannoo dabalatee faayidaa hedduu qabaachuu isaanii ibsaniiru. Amma irratti dhaabbii isaa milkeessuuf kan deeggaran qophii boollaa fi haaldureewwan hojii biroon cimanii itti fufuu ibsaniiru. Obbo Gizaateen Sagantaan Ashaaraa magariisaa faayidaa hedduu kan qabu ta’uu ibsuun, madaala Qilleensaa sirreessuu irra darbee, gabbina biyyee fi hamma bishaanii dabaluun omishaa fi omishtummaan mirkanaa’u akka dandeessisuu dubbataniiru. Dabalataanis tattaaffii hirkattummaa iraatii gara omishitummaatti ce’uuf taassifamu deeggaruu irra darbee dadammaqinsa Ikkoo Turiizimiitiif bu’aa buusaa jiraachuu ibsaniiru. Naannoo kibba Itiyoophiyaatti bara 2011 uwwisni bosonaa dhibbentaa 17 kan ture yoo ta’u, sochii Ashaaraa magariisaa itti fufinsaan taassifameen uwwisni bosonaa gara dhibbentaa 23 tuqaa 17tti guddachuu ibsaniiru.

Caamsaa 04/2017(TOI)- Sagantaa biqiltuu dhaabuu ashaaraa magariisaa naannoo Oromiyaa baranaaf qophiin taasifamu cinmee itti fufuu biiroon qonnaa naannichaa beeksise. Itti aanaan hoogganaa biiroo qonnaa naannichaa Eliyaas Kadir TOI’f akka ibsanitti, sagantaa kana milkaa’inaan raawwachuuf biqiltuun addaddaa qopheeffamaa jira. Biqiltuun Mukkeen Mandhalee, muduraa fi nyaata looniif xiyyeeffannoo taasifameera jedhan. Biqiltuu naannichatti barana qopheeffaman keessaa harki 11 nyaataaf kan oolan Avokaadoo, Muuzii, Paappaayyaa, Zayituunaa, Temirii, maangoo akka akka ta’an dubbataniiru. Kan hafan misooma bosonaa fi tajaajila biroof kan oolan ta’uu himaniiru. Biqiltuu barana dhaabamuuf lafti heektaara miiliyoona 1 caalu qophaa’ee boolla biqiltuu qopheessuun itti fufuu ibsaniiru. Daarektarri olaanaa abbaa taayitaa eegumsa naannoo Oromiyaa Sayifaddiin Mahaadii gamasaaniin, biqiltuun buufataalee biqiltuutti qopheeffaman yeroo yerootti dhaabbiif qaqqabuunsaa hordofamaa akka jiru ibsaniiru. Xiyyeeffannoon bara kanaa mukeen mandhaleerratti ta’uu dubbataniiru. Biqiltuun Muduraa baddaa keessumaammoo Appiliin bal’inaan qophaa’uu himaniiru.

Caamsaa 02/2017(TOI)-Godina Boorana Bahaatti hongee fi mancaati naanaannoo ittisuuf sululawwan 99 irratti hojiin qabeenya uumamaa kunuunsuu Qajeelchi Qonnaa Godinichaa Beeksise. Hojii misooma sululaa kanarratti uummanni Godinicha kuma 188 ol hirmaachun yoo ibsame, lafa margaa hektaara kuma 12 ol tutuqqaa irraa daanga’uu ibsaniiru. Waajjirichatti Dursaan Garee Qabeenya Uumamaa Obbo Aliyyi Arebaa hojii misooma sululaa qindaa’aan irra caalaan naannichatti mancaatii mudatuu fi hongee ittisuuf yaadamee hojjetamaa kan jiru ta’uu ibsaniiru. Kanaanis baatiiwwan Bonaa Godinichatti Aanaa hundatti lafa hektaara kuma 63 irratti Eegumsi Misooma Biyyee fi bishaanii gaggeeffameera. Hojiin misooma sululaa, Oyiruu, gaarreen irratti daagaa ijaaruu , burqaa bishaanii kunuunsuu fi biqiltuu qopheessuun hojjetamuu ibsaniiru. Hojii sululawwan 99 irratti hojjetamee irratti uummanni kuma 188 ol hirmaachuu ibsuun, boolla biqiltuu keessa dhaabamu kuma 500 qophaa’uu ibsaniiru. Akkasumas gosa bishaanii Baatii Bonaatti tajaajila kennan12 qophaa’uu ibsaniiru. Misooma Sululaatiin Lafa hektaara kuma 10tti dhihaatu loon akka hin dheedne daangessuuf karoorfamee heltaarri kuma 12 ol daanga’uu ibsaniiru. Jiraattonni Godinichaa harki caalaan horsiisa looniin jireenya isaanii kan gaggeeffatan yoo ta’u, lafti margaa Daangeffame beelladoota Kuma 60 Ol Fayyadamoo nitaasisa jedhaniiru.

Ebla 30/2017(ToI)-Sagantaa Ashaaraa Magariisaatiin uwwisa Bosona Itiyoophiyaa irratti jijjiiramni guddaan dhufaa jiraachuu Daarektarri Olaanaan Misooma Bosonaa Obbo Kabbadaa Yimaam Ibsan. TOI Sagantaa Misooma Magariisaan Uwwisa Bosonaan faayidaa argisiisu irratti, Misooma Bosona Itiyoophiyaa fi Koree Olaanoo Ashaaraa Magariisaa waliin turtii taassisaniiru. Daarektarri Olaanaan Misooma Bosona Itiyoophiyaa Obbo Kabbadaa Yimaam akka jedhanitti, Itiyoophiyaan Dinagdee jijiirama qilleensaan hin miidhamne ijaaruuf karoora qabatte keessaa sagantaan Ashaaraa Magariisaa isa olaanaa ta’uu ibsaniiru. Sagantichi ammaan dura miidhaa qabeenya uumamaa irra gahaa ture ittisuu irra darbee uwwisa bosonaa guddisaa dhufuu ibsaniiru. Ammaan dura miidhaan Qabeenya Uumamaa irra gahaa turuu ibsuun, sagantaan Ashaaraa Magariisaa hojiirra ooluu erga jalqabee fedhii qoraanii fi Ijaarsaa Guutuu irra darbee Miidhaan Misooma Bosonaa irra gahu akka hir’atuuf gumaacha guddaa gumaachuu ibsaniiru. Sagantichi dhiqama biyyee ittisuun hidhi haaromsaa dubbishiin akka hin guutamne gochuu irra darbee lageen waggaa guutuu yaa’insa madaalawaa akka qabaatan gochuuf faayidaa olaanaa argamsiisuu himaniiru. Waggaa waggaan bosona hektaara kuma 29 irratti Mancaatiin gahaa kan ture Qorannoo Waggaa darbe gaggeeffameen gara hektaara kuma 27tti gad hir’achuun milkaa’ina guddaa ta’uu obbo Kabbadeen beeksisaniiru. Biqiltuuwwan dhaabaman xaawulaa fi omisha mukaa biroo sharafa Alaan argamu bakka bu’uuf abdiin kan ta’udha jedhaniiru. Walitti qabaan Koree Teeknikaa Ashaaraa MagariisaaDr.Adafris Warquu Biqiltuuwwan Sagantichaan Dhaabbaman uwwisa bosona biyyittii guddisuu kan danda’an gosa bosonaa dhibbentaa 40 hanga 48 ta’uu ibsaniiru. Kunis qabeenyi uumamaa akka hin badne uwwisa bosonaa guddisuun gosa sanyii Biqiltootaa eeguun dhalootaaf dabarsuuf fayidaa qabaachuu ibsaniiru. Bara kana Biqiltuuwwan dhaabbachuuf qophaa’an keessaa Biliyeena 2 tuqaa 3 kan ta’an gosa mandhaalee mukeen akka ta’an xiyyeeffannoon kennamuu ibsaniiru. Kunis milkaa’ina guddaa ta’uu himuun, gosni mukeenii mandhaaleen baduuf turan oolchuun faayidaa nannoof, hawaasummaa fi Dinagdeef qabaachuu Dr. Adafris Ibsaniiru.

Ebla 27/2017(TOI)-Pirojektoonni misoomaa fi Invastimantii haala oomishaa faalama naannoo hubannoo keessa galcheen ta’uu akka qabu to’annoo fi hordoffii taasisaa akka jiran hooggantoonni damee kanaa naannoo Amaaraa fi bulchhiinsa Dirree Dawaa TOI’n haasofsiise dubbatan. Abbaa taayitaa naannawaa fi eegumsa bosonaatti daarektarrai jijjiirama naannawaa fi jijjiirama haala qilleensa obbo Awwaqee Yittaay akka jedhanitti, faalamni geejjibni, hafteen industirii, sagalee fi kanneen biroo faalama naannawaaf sababa ta’uu dubbataniiru. Industiriiwwan hedduun naannicha keessatti akka argaman eeranii, Pirojektoonni Invastimantii fi misoomaa faalama naannoo hubannoo keessa galchuun oomishuu akka qaban to’annoo fi hordoffiin akka taasifamu himaniiru. Haala walfakkaatuun daarektarri abbaa taayitaa naannawaa, bosonaa fi eegumsa bineensa bosonaa naannawa bulchiinsa Dirree DawaaObbo Darajjee Abbittii, naannichatti faalama naannawaa, sagalee fi bishaaniif xiyyeeffannoon taasifamuu ibsaniiru. Industiriiwwan dabalatee pirojektoonni misoomaa fi dhaabbileen tajaajila kennan akkaataa seeraa fi danbiin akka hojjetan to’annaan taasifamaa akka jiru eeraniiru. Mariin dhiibbaa jijjiiramni haala qilleensaa geessisu bifa walsimee fi qindoominaan damdamachuun akka danda’amu tibbana mariin magaalaa Adaamaatti taa’amuun niyadatama.

Ebla 24/2017 (TOI)- Dargaggoonni Iluu Abbaa Booraa waldaan gurmaa’anii sagantaa ashaaraa magariisaaf biqiltuu qopheessaa akka jiran ibsan. Sagantaa ashaaraa magariisaaf biqiltuuwwan garagaraa qophheeffamaa akka jiran waajjirri qonnaa godinichaa ibseera. Dargaggoonni aanaa Yaayyoo TOIn haasofsiise waldaan gurmaa’anii biqiltuu qophheessuun faayidaa argachuuf hojjechaa akka jiran ibsaniiru. Carraan kun kan uumameef keessaa jiraataan aanaa Yayyoo dargaggoo Yohaannis Warquu keessumaa biqiltuu muduraa baay’inaan qopheessaa akka jiru ibseera. Biqiltuu amma ammaatti qopheessanirraa birrii kuma 400 akka abdatan eereera. Dargaggoo Fadluu Shaafii gamasaatiin hiriyyootasaa waliin ta’uun sagantaa ashaaraa magariisaaf biqiltuu qopheessaa akka jiru dubbatee, kanarraas birrii kuma 800 argachuuf karoorfateera. Dargaggoonni galii argataniin ala hojicharraa muuxannoo argachaa akka jiran dubbatee fuulduras caalaatti fayyadamuuf hojjechaa akka jiran eereera. Itti aanaan hoogganaa waajjira qonnaa godinichaa obbo Malkaamuu Caalii, biqiltuun mukaa, nyaata loonii, akkasumas muduraawwan nyaataaf oolanii fi kanneen biroo akka ta’an dubbataniiru. Keessumaa biqiltuuwwan kuduraa nyaataa fi faayidaa dinagdeef oolan qopheeffamaa akka jiran himaniieu. Erga sagantaan ashaaraa magariisaa eegalamee asitti namoota godinichaa hedduuf carraan hojii waan uumameef namoonni hojii kana hojjetan faayyadamoo dinagdee ta’uusaanii dubbataniiru. Biqiltuu ashaaraa magariisaa waggoottan darban dhaabamaniin bosonna naannichaa dhibbantaa 71tti guddisuun akka danda’ame himaniiru.

Ebla 24/2017(TOI)-Sagantaan ashaaraa magariisaa Itiyoophiyaan raawwachaa jirtu faayidaan gurgurtaa Kaarbooniirraa argamu akka dabalu gumaacha guddaa kan qabu ta’uu hayyoonni damee kanarratti hojjetan ibsan. Dhiibbaa jijjiiramni haala qilleensaa geessisu qolachuuf biyyoonni addattis ta’e waloomaan tarkaanfiiwwan garagaraa nifudhatu. Jijjiirama haala qilleensaaf sababadha jedhamuun kan eeraman biyyoota guddatan ta’us rakkoof kan saaxilaman garuu biyyoota guddachaa jiran ta’uu hayyoonni damee kanaa nidubbatu. Addunyaan hoo’ina olaanaa, lolaa fi ongeen qoramaa yoo jiraattu, bosonni manca’uun, lafti qullaatti hafuun, gaaziin Industiriiwwan keessaa bahan kanaaf ka’umsa ta’uu ni’ibsu. Sagantaan ashaaraa magariisaa dhiibbaa kana qolachuuf Itiyoophiyaan itti jirtu bosona dabaluu fi naannawa eeguuf qooda guddaa bahaa akka jiru hayyoonni TOI waliin gaaffii fi deebii taasisan ni’ibsu. Qindeessaan sagantaa ashaaraa magariisaa biyyaalessaa Dr.Adafris Warquu sagantaan ashaaraa magariisaa Itiyoophiyaan itti jirtu bosona haphatee ture akka fooyya’u gumaachuusaa ibsaniiru. Uwwisi bosonaa yeroo ammaa dhibbantaa 23 ol qaqqabuusaa qorannoon bara darbe taasifame ifoomsuusaa eeraniiru. Kuusaan Kaarboonii guddaan Itiyoophiyaa keessa akka jiru fi kana keessaa irra caalaan bosona keessatti kan argamu ta’uu kaasaniiru. Sagantaan ashaaraa magariisaa bosona dabaluun alatti galii gurgurtaarraa Itiyoophiyaan argattu akka dabalu qooda olaanaa akka bahu dubbataniiru. Itiyoophiyaan kuusaa kaarboonii guddaa akka qabdu ibsaniiru. Yuunivarsiitii Finfinneetti hoogganaan kutaa barnoota saayinsii uumamaa fi barsiisaa fi qorataan ikoo siistamaa Dr. Biqilaa Warqinaa gamasaaniin, Itiyoophiyaan dhiibbaa jijjiirama haala qilleensaa hinmalle qolachuuf hojiilee eegumsa qabeenya uumamaa hojjechaa jirti jedhan. Bosona guddisuun faayidaa gurgurtaa kaarbooniirraa argamu guddisuuf nigargaara jedhaniiru. Faayidaa bosona dabaluun Itiyoophiyaan argatte keessaa gurgurtaa faayinaansii kaarboonii raawwachuushee fi kun wayita hojiirra oolu ikoo siistama caalaatti eegsisuuf jireenya qonnaan bulaa fi horsiisee bulaa jijjiiruuf nidandeessisa jedhaniiru. Waliigaltee gama Kanaan Itiyoophiyaan baankii addunyaa fi Noorweey waliin mallatteessite Waabeffataniiru. Dabalataanis Itiyoophiyaan deeggarsa maallaqaa pirojektoota eegumsa qabeenya uumamaa hojiirra oolchaa jirtuuf oolu argachaa akka jirtu ibsaniiru. Ashaaraa magariisaa dabalatee hojiileen Itiyoophiyaan eegumsa naannoo fulla’aa irratti hojjechaa jirtu sirriitti akka beekaman dippilomaasii jijjiirama haala qilleensaa cimsuun nibarbaachisa jedhaniiru.

Ebla 18/2017 (TOI):-Naannoo Oromiyaa godina Wallagaa Bahaa fi Harargee Lixaatti biqiltuuwwan akaakuu garagaraa ganna dhufu Sagantaa ashaaraa Magariisaan dhaabamu qophaa’aa jiraachuu waajjiraalee qonnaa godinootaa beeksisaniiru. Akka itti gaafatamaan Waajjira Qonnaa godina Wallagaa Bahaa Asfaaw Hambisaa ibsanitti, Sagantaa ashaaraa Magariisaa bara kanaatiin biqiltuu miiliyoona 544 ol godinicha keessatti dhaabuuf qophiin taasifamaa jira. Waggoota darbanitti biqiltuu dhaabame irraa hawaasni fayyadamoo ta’uu hubachiisuudhaan, bara kana kana caalaa hojjechuuf qophiin taasifamaa jira jedhan. Waajjirichatti gaggeessaan adeemsa hojii sululaa fi misooma bosonaa Obbo Dassaleny Bal’ataa, godinichatti sagantaa ganna bara kanaatiif biqiltuuwwan bosonaa, nyaata horii, fuduraalee fi biqiltoota biroo qophaa’uu ibsaniiru. Haaluma walfakkaatuun, Itti Gaafatamaan Garee Misooma Qabeenya Uumamaa Waajjira Qonnaa fi Misooma Qabeenya Uumamaa godina Harargee Lixaa obbo Waasee Baqqalaa Sagantaa ashaaraa Magariisaa bara kanaaf baroota darban caalaa haala fooyya’aa ta’een qophiin taasifamaa jira jedhan. Bara kanas biqiltuuwwan gosa adda addaa miiliyoona 413 ol godinicha keessatti dhaabuuf qopheeffamaa kan jiran yoo ta’u, kana keessaa miiliyoona 82 ol biqiltuu firii kan akka giishxaa, avokaadoo; maangoo akka ta’an ibsaniiru. Lakkoofsi gosoota muka firii bara kana dhaabuuf karoorfame kan bara darbee miiliyoona 20 ol ta’uu agarsiisaniiru. Biqiltuun firii waggaa waggaan godinicha keessatti dhaabamaa jiru galii qonnaan bulaa dabaluu fi wabii nyaataa mirkaneessuuf gumaacha taasisaa jiraachuu ibsaniiru.