Onkololessa 26/2019 (ENA)- Itiyoophiyaa fi Chaayinaan hojii dabalataa toora baaburaa Itiyoo-Jibutii hojjechuuf kan oolu walii galtee deeggarsa maallaqaa mallatteessaniiru. Haala walii galtee mallatteeffameetiin toorri baaburaa kun fulla’insa, amansiisummaa fi saffisa hojii guddisuuf kan oolu doolaarri miil. 15 deeggarsa ni taasifama. De’eetaan ministira maallaqaa Tigisti Fissahaa fi Itiyoophiyaatti dippilomaatiin olaanaa embaasii Chaayinaa Liiyuu Ziiya’oguwaangi walii galtee kana mallatteessaniiru. Deeggarsi maallaqaa kun baabura elektiriikii guutummaatti hojiitti galchuuf kan gargaaran meshaawwan jijjiiramaa, nageenya toora muummee kan deeggaran meeshaalee hadiidaa fi buufataalee of keessatti qabata. Kana malees maashinaroonni sakatta’insaa fi suphaa hadiidaa idileef ajaajilan ni dhiheessu. Walii galteen kun tumsa misoomaaa fi dinagdee Itiyoophiyaa fi Chaayinaa kan agarsiisu ta’uu odeeffannoon ministeera maallaqaa ni mul’isa.

Onkoloolessa 26/2019 (ENA) -Finfinneen magaalaa muummee Itiyoophiyaa qofa osoo hin ta’iin, magaalaa muummee Afriikaanotaa, wiirtuu marii, tumsaa, dippilomaasii fi furmaanni waloo Afriikaanotaa keessaa maddan ta’aa dhufteetti. Ilaalama mootummaa Ida’amuu keessatti guddinni misooma magaalotaa Finfinneen yeroo gabaabaa keessatti galmeessite, bifa magaalattii jijjiiruu bira darbee dandeettii idil-addunyaatti bakka filatamaa ta’uu ishee guddisuu danda’eera. Kooridooroonni magaalotaa ammayyaa, misoomni qarqara laggeenii, misoomni magariisaa fi bu’uuraaleen geejjibaa magaalattii bakka taateewwan idil-addunyaa itti gaggeeffamaniif filatamaa taasisaa jiru. Finfinneen hoggantoota Afrikaa, dhaabbilee idil-addunyaa, invastaroota, turistootaa fi michoota misoomaa walitti fiduu qofa osoo hin taane, giddugala marii fi tumsa waliinii ardii Afrikaa taateetti. Kunis turizimii konfiraansii, sochii dinagdee fi carraa hojii guddisuu keessatti gahee olaanaa qaba. Kanaafis, paartileen siyaasaa Afrikaa golambaa Yaadannoo Injifannoo Adwaa seena-qabeessa ta’e keessatti walgahii isaanii gaggeessuun hiika seenaa fi ardii bal’aa qaba. Adawaan mallattoo tokkummaa, bilisummaa, gootummaa fi dandeettii ofiin of murteessuu ummattoota Afrikaati. Bakka seenaa qabeessa kanatti humnoonni siyaasaa Afrikaa walitti dhufuun isaanii injifannoo waliinii darbe yaadachuu qofa osoo hin taane, rakkoolee waliinii ardichaa marii, waliigaltee fi tumsa waliin furuuf kutannoo qabaachuu isaanii agarsiisa. Finfinneen duudhaa seenaa fi aadaa ishee misooma magaalaa ammayyaa wajjin walitti qindeessuun giddugala taateewwan siyaasaa, dipilomaasii, dinagdee, aadaa fi saayinsii ta'uu ishee cimsaa jirti. Finfinneen magaalaa addunyaan keessatti wal argu, irratti mari'atuu fi furmaata waliinii itti maddisiiu; magaalaa Afriikaanotaati!

Onkoloolessa 26/2019 (ENA) – Faayidaa dinagdee bunarraa argatan guddisuuf sadarkaa oomishaa hundatti buna qulqullinaan funaanaa jiraachuu godina kibba lixa Oromiyaatti qonnaan bultoonni aanaa Mattuu dubbatan. Bakki kun bosonaa fi oomisha bunaa boroo fi lafa mijataa, biyyoo gabbataa fi rooba gahaa waan qabuuf buna dhamdhama uumamaa qabu oomishuun beekama. Qonnaan bulaan jiraataa aanaa Mattuu Gizaachoo Qannaa ija bunaa diimaa fi guutummaatti bilchaate qofa funaanuudhaan oogdii qulqulluurratti gogsaa akka jiran ibsaniiru. Maasaarraa eegalee gogee amma mankuusaatti qulqullinasaa eeguun galii bunarraa argatan guddisuuf hojjechaa akka jiran dubbataniiru. Qonnaan bulaa Taaddalaa Guddataa gamasaaniin, buna diimaa qofa funaanuun fi oogdii sadarkaasaa eegerratti gogsuun buna qulqulluu gabaaf dhiheessuuf hojjechaa akka jiran ibsaniiru. Qonnaan bulaan Abdulwahaab maasaarraa amma gabaa baasanitti sadarkaa hundatti qulqullinni bunaa eegamuu akka qabu eeraniiru. Itti aanaan bulchaa godina aanaa Mattuu obbo Iyyoob Zinaabuu akka ibsanitti, maasaa bunaa hektaara kuma 14 irraa buna toonii kuma 6 fi 600 gabaa giddu galeessaaf dhiheessuuf karoorfameera. Godinichatti walumaa gala buna toonii kuma 700 walitti qabuu fi kana keessaa toonii kuma 200 gabaa giddugaleessaaf dhiheessuuf karoorfamuusaa itti aanaan bulchaa godina kibba lixaa Oromiyaa obbo Indaalkaachioo Tafarii ibsaniiru. Qulqullina bunaa fi qisaasama ittisuuf hubannoo kennuun, hordoffii fi deeggarsi taasifamaa jiraachuu dabalanii ibsaniiru.

Onkoloolessa 26/2019 (ENA) – Faayidaa dinagdee bunarraa argatan guddisuuf sadarkaa oomishaa hundatti buna qulqullinaan funaanaa jiraachuu godina kibba lixa Oromiyaatti qonnaan bultoonni aanaa Mattuu dubbatan. Bakki kun bosonaa fi oomisha bunaa boroo fi lafa mijataa, biyyoo gabbataa fi rooba gahaa waan qabuuf buna dhamdhama uumamaa qabu oomishuun beekama. Qonnaan bulaan jiraataa aanaa Mattuu Gizaachoo Qannaa ija bunaa diimaa fi guutummaatti bilchaate qofa funaanuudhaan oogdii qulqulluurratti gogsaa akka jiran ibsaniiru. Maasaarraa eegalee gogee amma mankuusaatti qulqullinasaa eeguun galii bunarraa argatan guddisuuf hojjechaa akka jiran dubbataniiru. Qonnaan bulaa Taaddalaa Guddataa gamasaaniin, buna diimaa qofa funaanuun fi oogdii sadarkaasaa eegerratti gogsuun buna qulqulluu gabaaf dhiheessuuf hojjechaa akka jiran ibsaniiru. Qonnaan bulaan Abdulwahaab maasaarraa amma gabaa baasanitti sadarkaa hundatti qulqullinni bunaa eegamuu akka qabu eeraniiru. Itti aanaan bulchaa godina aanaa Mattuu obbo Iyyoob Zinaabuu akka ibsanitti, maasaa bunaa hektaara kuma 14 irraa buna toonii kuma 6 fi 600 gabaa giddu galeessaaf dhiheessuuf karoorfameera. Godinichatti walumaa gala buna toonii kuma 700 walitti qabuu fi kana keessaa toonii kuma 200 gabaa giddugaleessaaf dhiheessuuf karoorfamuusaa itti aanaan bulchaa godina kibba lixaa Oromiyaa obbo Indaalkaachioo Tafarii ibsaniiru. Qulqullina bunaa fi qisaasama ittisuuf hubannoo kennuun, hordoffii fi deeggarsi taasifamaa jiraachuu dabalanii ibsaniiru.

Bunni wiirtuu jireenya guyyaa guyyaa ummata Oromoo qofa osoo hin taane; eebba guddaa hiika hafuuraa, hawaasummaa fi falaasama gadi fagoo qabudha. Ummata Oromoo biratti bunni akka dhugaatii idilee qofaatti kan ilaalamu osoo hin taane, walitti dhufeenya seenaa gadi fagoo kan qabudha. Ummanni Oromoo bunaa fi nagaa adda baasee hin ilaalu;kanaafidha bunaa fi nagaa hin dhabiinaa jedha. Kanaaf Bunni akka nageenyaatti ilaalama. Ummanni Oromoo aadaa, duudhaa fi safuu gabbataa kan qabu yoo ta'u, jireenya isaa keessatti wantootni hafuu hin qabne hedduu ni jiru. Isaan keessaa bunni iddoo olaanaa fi addaa qaba. Bunni Oromoo biratti dhugaatii qofa miti; mallattoo kabajaa, nagaa, jaalalaa, tokkummaa fi araaraati. Oromoon buna waliin hidhata jireenyaa fi safuu cimaa qaba. Fakkeenyaaf, yeroo makmaaku, "Bunaa fi nagaa hin dhabiinaa" jedhee eebbisa. Eebbichi kun bu'uura jireenyaa fi nagaa waan ta'eef, bunaafis dursa kenna. Aadaa hawaasummaa Oromoo keessatti keessummaan yeroo mana namaa dhaqu, kabajni guddaan kennamuufii fi nagaa gaafachuun cinaatti, "Buna siniif dhaabna" ykn "Buna siif danfisna" jedhamee simatama. Kunis keessummaaf qalbii bal'aa, simannaa hoo'aa fi jaalala qaban kan argisiisudha. Jila, ayyaana ykn sirna kamirraattuu bunni iddoo olaanaa qabaata; jilli buna malee guutuu hin ta'u. Aadaa Oromoo keessatti buna qalaa jedhamee kan beekamu iddoo guddaa qaba. Kana malees, bultii guyyaa guyyaa keessatti hojiin guyyaa kan jalqabamu buna dhaabbachuunii fi eebbifataniidha. Namni hojiidhaaf deemu ganama barii buna dhugee eebba maatiitiin karaa saaqqata; akkasumas galgala hojiidhaa yeroo deebi’anis dhiphina guyyaa sanaa boqochuuf buna waliin dhuguun baramaadha. Bunni hariiroo hawaasaa cimsa. Bunni qofaa hin dhugamu. Buna Maatiin walitti qabamee qofaa isaa dhuga osoo hin taanee, ollaanii fi firoottanis akkaataa walitti dhiyeenya isaaniitiin waliin taa’anii buna dhugu. Yeroo kana walitti dhufeenyi hawaasummaa, jaalallii fi waliif yaaduun ni cima. Maatiinii fi ollaan buna waliin dhugaa, dhimma hawaasummaa, rakkoo fi waan garaa garaa irratti mari’atu; mariidhaanis furmaata walii kennuun dhimma waloo dhalootaa dhalootatti ceesisu. Dabalataan, bunni aadaa Oromoo keessatti araarsituu cimaa ta'ee tajaajila. Namoota gidduutti wal dhabdeen yeroo uumamu, maanguddoonni biyyaa araara buusuuf buna dhaabsifatu. Buna walii wajjin dhuguun miira jibbaa balleessisee garaa walii laaffisa. Sirna gurguddoo kan akka jaarsummaa ergachuu ykn gaa’elaaf deemuu fi kkf irrattis bunni ni dhaabbata ykn ni danfisama; kunis milkaa’ina dhimmichaa fi eebba maatiitiif mallattoo ta'a. Walumaagalatti, bunni ummata Oromoo biratti dhugaatii idilee qofa osoo hin taane, utubaa duudhaa, eenyummaa, safuu fi tokkummaa hawaasichaa ti. Jireenya guyyaa guyyaa irraa eegalees hanga sirna gurguddoo jilaa fi araaraatti, bunni iddoo olaanaa qaba. Oromoon jireenya isaa keessatti nagaa, jaalalaa fi walqixxummaa ibsuuf buna fayyadama. Kanaafuu, hariiroon bunni Oromoo waliin qabu kan baroota dheeraaf dhalootaa dhalootatti darbe, kabajaa fi jaalala guddaan kan eegamu dha. Itoophiyaan addunyaaf wantoota hedduu gumaachiteetti. isaan keessaa bunni isa tokkodha. Bunni kennaa uumamaa guddaa Itoophiyaan addunyaaf laatte keessaa tokko ta'e, aadaan buna dhuguu ummata Itoophiyaa mara birattillee haala kabaja guddaa qabuun kan beekamudha. Itoophiyaan lafa argama bunaa ta'uun addunyaa irratti maqaa guddaa qabdi. Bunni ishees buna orgaanikaa jedhamuun gabaa aadunyaa irratti jaalatamaa fi kabaja guddaa qaba. Aadaa kana keessatti, sabaa fi sablammoonni Itoophiyaa hundi buna akka aadaa fi duudhaa abootii irraa dhaalaniin walitti dabarsaa ulfina kennaafii waliin dhugu. Naannoolee biyyattii garaagaraa keessatti sirni qophii bunaa garagara ta’us kaayyoon isaa garuu tokkuma. Innis kabajaa keessummaa, araara buusuu, fi jaalala jajjabeessuudha. Bunni hawaasummaa cimsee, walii-galtee fi wajjin-jiraachuu saboota biyyattii jiran kan calaqqisiisu dha. Kanaafuu, bunni lafa kanarraa ka’ee addunyaa maratti urgaa’uun isaa qofa utuu hin ta’iin, biyya keessattis simboo tokkummaa fi aadaa gabbataa sabaa fi sablammoota Itoophiyaa ta’ee tajaajilaa jira. #Biyya Guddoo, Ummata Guddaa # Mul'ata Guddaa #Mootummaa Ida’amuu

Onkoloolessa 26/2019 (ENA)- Giddugalli Qorannoo Qonnaa Amboo hojii qorannoon cinaatti, maloota Oomishitummaa dabalan irratti hojjechuun fayyadamummaa qonnaan bultootaa mirkaneessuuf hojjechaa akka jiru beeksiseera. Gidugalichi Ayyaanaa Qonnaan bultootaa sababeeffachuun damee qorannoo kutaa ekisteeshinii qonnaan hojjetaman godina giddugala oromiyaa aanaa dandiitti lafa qonnaan bultootaa hektaara 100 irratti sanyii Xaafii babal'isuu fi mi'eesituuwwaan gara garaa deeggarsa taasisuun misoomse bakka ogeeyyii , hoggansii fi Qonnaan bultoonni argamanitti daawwachiiseera. Bakka Bu’aan Daarektara Olaanaa Giddugala Qorannoo Qonnaa Amboo Dr. Salamoon Yilmaa akka jedhanitti, giddugallichi Godina Giddugala Oromiyaa Anaalee adda addaa keessatti midhaan gosa gara garaa misoomsaa jiraachuu himaniiru. Giddugalichi fayyadamummaa qonnaan bultootaa dabaluuf xiyyeeffannaan hojjechaa jiraachuu ibsaniiru. Itti Gaafatamtuu kutaa Ekisteenshinii Giduggala Qorannoo Qonnaa Amboo Aadde Yeenenesh Dhugumaa akka damee Ekisteeshinichaatti hojii kanaanis qonnaan bultoonni abbootii warraa 500 fayyadamaa ta’aa jiraachuu himuun, hojiin kilaastara sanyii xaafii babal'isuu Aanaa Dandiitti hojjetamee daawwannaaf dhiyaate kunis isa tokkodha jedhan. Giddugala Qorannoo Qonnaa Ambootti Itti Gaafatamaa kutaa Sanyii baayisuu Obbo Lammaa Dirribaa Giddugalli Qorannoo Qonnaa Amboo fedhii dhiyeessii sanyii filatamaa qonnaan bulaan barbaadu guutuuf sanyiiwwan gosa gara garaa oomishtummaa dabalan 6 qorannoon mirkaneessee qonnaan bultoota biraan qaqqabsiiseera jedhaniiru. Godina Giddugala Oromiyaa Aanaa Dandiittis sanyiin Xaafii haaraa Barakat jedhamu qonnaan bultootaaf kennnuun bu’a qabeessummaan isaas sadarkaa gaarii irratti argama jiraachuus himaniiru. Qonnaan bultoonni ooyiruun isaanii daawwatames, giddugalichi galtee qonnaa fi gorsa ogummaa nuuf taasiseen aadaa qonnaa duubatti hafaa irraa gara kilaastaraatti waan nu ceesiseef callaa gaarii abdanna jedhaniiru..

Onkoloolessa 25/2019 (ENA) – Afriikaan harka walqabattee yoo dhaabbatte ni jabaatti, waloomaan yoo hojjettu ni guddatti, waloomaan yoo murteessitucarraashee egeree ni bocci. Finfinneen mana waloo taatus amma dhihoo kanaatti sadarkaa ardiitti waltajjiiwwan hedduun keessatti qophaa’anii hin beekan. Sababnisaas hanqina bu’uraalee misoomaa magaalittii fi ammayyaa’uu dhabuu akkasumas dhaabbileen tajaajilaa mijataan waan hin jirreefi. Hir’uu kana guutuu fi gama hundaanuu Finfinnee wiirtuu hawattuu gochuuf hojiin waggoota muraasa keessatti hojjetaman bu’aalee hedduu nutti agarsiisaa jira. Bu’uraaleen misoomaa gurguddoon yeroo gabaabaa keessatti ijaaramanii fi dhaabbileen tajaajilaa ammayyaa jiraachuun magaalattiin turizimii konfaransii filatamtuu ishee taasiseera. Finfinneen yaa’iiwwan ardii fi idil-addunyaa kuma kudhaniin lakkaa’aman keessummeessuu akka dandeessu agarsiisaa jirti. Torban kana keessa mata duree “guddinaaf hogganuu, paartileen siyaasaa qiyyaastota carraa egeree dinagdee Afriikaa ta’anii” (Governing for Growth: Political Parties as Architects of Africa’s Economic Future) jedhuun yaa’iin paartilee siyaasaa Afriikaa Onkoloolessa 26 amma 28 bara 2019 golambaa yaadannoo injifannoo Adwaatti gaggeeffama. Yaa’iin kun Finfinneen yaadamnii fi ilaalchonni garagaraa kan itti walitti dhufan, Afriikaa fi addunyaaf furmaanni kan itti barbaadaman wiirtuu nagaa, dippilomaasii fimarii ta’iishee cimsa. Kana malees Finfinneen tokkummaa fi carraan waloo Afriikaa kan itti adda bahu, bakka walitti dhufeenya mul’ata waloo, cimina tumsaa fi badhaadhina walof galma taatee fulla’uushee agarsiisa.

Onkoloolessa 25 /2019 (ENA)-Dinagdeen keenya danda’aa ta’ee qormaatilee uumamaa fi Namtolchee akka damdamatu, dursanii qophaa’uu fi filmaattota bal’isuun murteessaa ta’uu ministirri muummee Dr. Abiyyi Ahimad ibsan. Ministirri muummee Dr. Abiyyi Ahimad fuula miidiyaa hawaasaa isaaniin eragaa dabarsaniin, Baaleetti raawwii qonna gannaa daawwachuusaanii beeksisaniiru. Ganna baranaa hanqinni roobaa jiraatus mootummaa fi ummanni dursee qophii gochuusaaniin raawwiin gaariin galmaa’eera jedhan. Dinagdeen keenya danda’aa ta’ee rakkoolee uumamaa fi namtolchee akka damdamatu,dursanii filmaata bal’isuun dirqama jdhaniiru.

Onkololeessa 25/2019 (ENA) : Hojiin shallaggii oomisha waliigalaa biyya keessaa (GDP) dhaabbataa taasisuu imaammata dinagdee fooyya’aa bocuufi karoora misoomaa fooyya’aa ta’eef gargaara jedhan Ministirri Maallaqaa Dr. Fitsum Asaffaa. Ministeerri Tarsiimoo biyyaalessaa fi Tajaajilli Istaatiksii Itiyoophiyaa waliin ta’uun mala haaraa oomishni waliigalaa biyya keessaa ittiin shallagamu ifoomsaniiru. Ministirri Ministeera Maallaqaa Doktar Fitsum Asaffaa, hojii guddaan kun ogeeyyii biyya keessaan kan hojjetame waan ta’eef birmadummaa Istaatiksii mirkaneessuu akka danda’e ibsaniiru. Odeeffannichi kan idil-addunyaan walbira qabamuun fi haala amansiisaa ta’een kan hojjetame ta’uu kaasanii, hammattoon fooyya’e kun imaammata Fiiskaalaafi Maallaqaaf akkasumas qabeenya biyya keessaa walitti qabuuf akka deeggaru eeraniiru. Malli kunis bara 2019 irraa eegalee hojiirra oola jedhameera. Kana dura haalli shallaggii odeeffaannoo diinagdee haaraa kan hamate waan hin turree fi mala moofaan shallagamaa turuu ibsaniiru. Shallaggiin haaraan ragaalee dhiyeenyaa kan hammatee fi haala diinagdee waqtaawaa kan ibsu ta’uu eeran. Bara baajataa 2017tti bara bu’uuraa haaraa fayyadamuun GDP'n Itiyoophiyaa irra deebiin yeroo shallagamu guddinni diinagdee biyyattii gara birrii tiriliyoona 24.03 akka guddate akeekaniiru. Akkasumas bara bajataa 2018tti guddinni diinagdee biyyattii gara birrii tiriliyoona 31.86tti ol guddachuusaa ibsaniiru. Shallaggiin kun haala dinagdee Itiyoophiyaa yeroo ammaa jiru kan agarsiisu, karooraa fi imaammata mootummaan galtee sirrii ta’uu isaaa, akkasumas qaamolee michuu waliin marii fi waliigaltee taasiftu keessatti dandeettii marii dabaluuf faayidaa olaanaa qabaachuu ibsaniiru. Sagantaa kana irratti Ministirri Tarsiimoo Biyyaalessaa obbo Barakat Fissahaatsihoon,, Ministirri Ministeera Barnootaa Piroofeesar Biraanuu Naggaa, Bulchaan Baankii Biyyaalessaa Itiyoophiyaa Dr. Iyyoob Takkaallinyii fi hoggantoonni olaanoo biroo argamaniiru. #Mootummaa Ida’amuu #Biyya Guddoo, Ummata Guddaa # Mul'ata Guddaa Miseensa Maatii Miidiyaa Dijiitaalaa ENA ta’aa https://www.ena.et/web/links

Onkololessa 25/2019(ENA): Magaalaa Shaggar keessatti jalqabbii inisheetivoota misooma qonnaa adda addaa hojiirra oolchuun bu’aa qabatamaan fayyadamummaa ummataa mirkaneessu galmaa’aa jira jedhan Kantiibaan magaalichaa Tashoomaa Addunyaa(PhD). Keessattuu damee qonnaa, barnoota, fayyaa fi teeknooloojii irratti xiyyeeffannoo addaa kennuun hojiiwwan milkaa’oo ta’an hojjetamuu isaanii ibsaniiru. Kanaafuu hojiin fedhii misoomaa magaalichaa deebisuu fi fayyadamummaa mirkaneessuu cimee itti fufa jedhaniiru.   Jijjiirama gurguddaa magaalaa keenya keessatti fiduuf jalqabbii inisheetivoota qonnaa, jalqabbii inisheetivoota barnootaa, fayyaa, teeknooloojii fi kanneen biroo hojiirra oolaa jiru jedhan. Wabii nyaataa mirkaneessuuf oomisha baay’inaan fi bal’inaan oomishuun barbaachisaa ta’uu cimsanii kan ibsan kantiibaan kun, misooma qamadii, midhaan gosa adda addaa fi muduraa fi kuduraa irratti xiyyeeffannaan addaa kennamaa jira jedhan. Misooma qamadii yeroo idilee fi jallisii Bonaa hojiirra oolchuun nyaataan of danda’uu guddisuuf tattaaffiin taasifamu cimee jira jedhan.   Magaalaa Shaggar keessatti qamadiin bal’iaan akka omishamaa jiru eeruun,fakkeenyaaf kanaan dura osoo Shaggar hin hundeeffamiin qamadiin kuntaala kuma 500 hin caalle ture yeroo ammaa waggaatti qamadii kuntaala miliyoona dhibba sadii omishuun danda’ameera jedhan Dr. Tashoomaa Addunyaan.   Akkuma midhaan nyaataan hojiin bal’aan hojjetamaa jiru, jalqabbii misooma aannanii, horsiisa looniifi furdisni loonii bu’aa qabatamaa fidaa jira jiradhan. keessumaa qonna ammayyeessuun Shaggar keessatti sheedii kuma 20 ol ijaaramuun akka danda’ame himaniiru.   #Mootummaa Ida’amuu #Biyya Guddoo, Ummata Guddaa # Mul'ata Guddaa Miseensa Maatii Miidiyaa Dijiitaalaa ENA ta’aa https://www.ena.et/web/links

Onkololeessa 24/2019 (ENA): Annisaan niwuukileera fedhii Anniisaa fuulduraa Itoophiyaatti ariitiidhaan guddachaa jiru haala amansiisaa ta'een guutuuf kan dandeessisu ta'uu Itti aanaan Komishineera komishinii Annisaa Niwukileeraa Itoophiyaa Obbo Shifarraaw Taliilaa ibsan. Itti aanaan Komishineera komishinii Annisaa kun turtii ENA waliin taasisaniin; guddinni diinagdee Itoophiyaa, babal'achuun magaalaawwan babal’achuu, dabaluun baay'ina uummataa fi guddinni indaastirii fedhiin anniisaa dabalaa jiraachuu eeraniiru. Keessattuu indaastiriawwanii fi dameen dinagdee dijiitaalaa dhiyeessii elektriikaa addaan hin cittiin kan barbaadan ta'uu yaadachiisuudhaan; kanaafis madda Anniisaa amansiisaafi itti fufiinsa qabu misoomsuun barbaachisaa ta'uu ibsuu isaanii eeraniiru. Haaluma Kanaan misooma Anniisaa bishaan, aduu, qilleensaa fi jii’ootarmaalii itti fufsiisuun cinaatti, dandeettii dandeettii maddisiisuu olaanaa kan qabuu fi filannoo dhiyeessii addaan hin cittiin mirkaneessuu kan danda'u ta'uu hubachiisaniiru. Itoophiyaan sagantaa humna niwukileeraa raawwachuuf kan murteessite guddina diinagdee fuulduraa kan deeggaruu fi dhiyeessii humnaa kan mirkaneessu madda misoomsuuf ta'uu eeraniiru

Onkololeessa 24/2019 (ENA) – Qonnaan bultoonni godina Kibba Baha Oromiyaa aanaalee Heexosaa fi Xiyyoo jiraatan, bara kana teeknooloojii fooyya’aa fi mala hojii haaraa fayyadamuun waan facaasa raawwataniif oomisha fooyya’aa akka abdatan ibsan. Aanaaleen Heexosaa fi Xiyyo godina Kibba Baha Oromiyaa keessatti argaman, wiirtuuwwan oomisha midhaanii gurguddoo wabii nyaataa biyya keenyaa mirkaneessuu keessatti gahee olaanaa qaban keessaa tokko ta’uun beekamu. Bara oomishaa kana qonnaan bultoonni teeknooloojiiwwan qonnaa ammayyaa fi mala hojii haaraa bara darbe caalaa fooyya’aa ta’een hojii irra oolchaniiru. Kanaafis oomisha fooyya’aa akka abdatan dubbatu. Qonnaan bulaan aanaa Heexosaa, ganda Odaa Jiilaa jiraataa Obbo Bookii Dinqaa ENA’f yaada kennaniin, qonnaan bultoota biroo waliin kilaastaraan lafa misoomsuu fi lafa heektaara tokko irratti sanyii filatamaa qamadii facaafachuu isaanii ibsaniiru. Haalli midhaan isaanii gaarii waan ta’eef heektaara tokko irraa kuntaala 60 akka abdatan eegaa jiru. Maashina qonnaa fayyadamuu, gorsa ogeessotaa hordofuu fi sararaan facaasuun oomishni isaanii haala gaariirra akka jiru dubbataniiru. Jiraataan aanaa heexosaa ganda odaa jiilaa qonnaan bulaan Nagash Laamaa immoo wagga waggaan sanyiiwwan qamadii filatamoo fayyadamuun oomisha isaanii guddisuu akka danda’an ibsaniiru. Teeknooloojiiwwan haaraa fayyadamuun muuxannoo fi dandeettii isaanii akka fooyyeffatanis dubbataniiru. Jiraataan aanaa Xiyyo ganda Odaa Dawwaataa qonnaan bulaan Goosaa Namoo sanyii filatamaa fayyadamuun qonna kilaastaraan lafa isaanii misoomsuu ibsaniiru. Midhaan isaanii gahaa waan jiruuf maashina haamaa (Kombaayinar) fayyadamuun sassaabuuf qophii ta’uu fi hanqinni maashinaa akka isaan hin mudanneef dursee qophii gochaa akka jiran dubbataniiru. Itti gaafatamaan itti aanaa waajjira qonnaa godina Kibba Baha Oromiyaa Obbo Ibraahim Qaaso, bara oomishaa kana godinichatti lafti heektaara miliyoona 2 tuqaa 5 ol ta’u midhaan gurguddoon misoomeera jedhaniiru. Oomishaa fi oomishtummaa guddisuu, akkasumas wabii nyaataa waaraa mirkaneessuuf sanyii filatamaa, xaa’oo albuudaa fi uumamaa, teeknooloojiiwwan haaraa, gorsa ogeessotaa fi deeggarsa misooma qonnaa bal’inaan fayyadamuu isaanii ibsaniiru. Kanaafis haalli guddina midhaan gurguddoo bara kanaa fooyya’aa ta’uu ibsanii, bara oomishaa 2018/19 godina Kibba Baha Oromiyaa keessatti lafa rooba gannaan misoome irraa oomishni kuntaala miliyoona 96 tuqaa 8 ol akka eegamu beeksisaniiru.

Onkoloolessa 24/2019 (ENA)- Naannoo Tigraayitti nagaa fi tasgabbiin guyya guyyaatti mirkanaa’aa dhufuusaafii namoonni yaaddoo malee akkuma kanaan duraa jireenya dinagdee fi hawaasummaa bilisummaan gaggeessuu haalli itti danda’an uumamuun ibsame. Bulchiinsi imaanaa naannicha bakkeewwan hunda qaqqabuun nagaa fi tasgabbii bu’uraa buusuun dhaabbileen humna guutuun akka tajaajilan gochuuf hojiin hojjetame milkaa’inaan itti fufaa jira. Qindeessaan garee gurmeessaa hooggansa imaanaa Birhaanee Gabratsaadiq akka ibsanitti, nagaa fi bilisummaa hawaasni argate kana itti fufsiisuuf hoggansa jijjiiramaa fi mootummaa waliin kutannoo olaanaan hojjechaa jira. Filannoo kallattii fi bilisaa ummataatiin hojii hojjetamaa jiruun hoggansa imaanaa amma caasaa gadiitti dhibbantaan 60 xumuramuusaa qindeessaan kun mirkaneessaniiru. Yeroo ammaa Baankiin, dhaabbileen daldalaa fi waajjiraaleen mootummaa gara tajaajilaatti galaniiru. Kanaan wal qabatee bulachiinsa imaanaatti qindeessaan dame dinagdee Dr. Tewoodiroos Aragaayi akka ibsanitti, hojjettoota mootummaaf mindaan akka kaffalamu tattaaffii taasifameen har’a irraa eegalee midaa kaffaluun ni eegalama jedhaniiru. Ummanni Tigraayi nagaa fi tasgabbiin naannichaa amansiisaa ta’ee akka itti fufu deeggarsa hunda galeessa fi kutannoo agarsiise cimsee akka itti fufu bulchiinsi imaanaa dhaameera.

Onkololessa 24/2019(ENA) : Magaalaa Shaggar kutaa Magaalaa Galaan Aanaa Andoodeetti sagantaan facaasaa Qamadii jallisii eegalchiifamera.   Mootummaan cehumsa dinagdee damee Qonnaa mirkaneessuun Badhaadhina hunda-galeessaafi imala karoora of-danda'uu galmaan gahuuf hojiiwwan gargaaran tarsiimoon masakuun hojjechaa jira. Kanaanis Qonna Aadaa amma dura ture gara ammayyaatti ceesisuun wabii nyaataa mirkaneessuurra darbee guddina dinagdee biyyaa keessatti gahee olaanaa bahachaa jira. Mootummaan Naannoo Oromiyaas horataalee karoora xiiqiin argaman ittifufsiisuuf karoora of-danda'uu diriirsuun hojjechaa kan jiru yoo ta'u, kana galmaan gahuufis carraawwaniifi poteenshaalaa Oomishtummaa guddisuuf dandeessisan fayyadamuun hojjetamaa jira. Keessumattuu imala karoora of-danda'uu gama wabi midhaan nyaataan dhugoomsuuf Ganna roobaan,Bona ammoo jallisii makanaayizeeshinii tekinooloojii qonnaatti fayyadamuun Oomishaafi Oomishtummaa guddisuuf hojii hojjetameen bu'aawwan jiruufi jireenya hawaasaa jijjiiran argamaa jiru. Haaluma kanaan Magaalaa Shaggar kutaa Magaalaa Galaan Aanaa Andoodeetti facaasaan Qamadii jallisii Bonee eegalchiifameera jechuun Tajaajilli Komunikeeshinii magaalaa Shaggar ibseera. Facaasaa Qamadii jallisii Bonee kana irratti kantiibaa magaalaa Shaggar Dr. Tashoomaa Addunyaa dabalatee hoggantoonni garagaraa argamaniiru. #Biyya Guddoo, Ummata Guddaa # Mul'ata Guddaa #Mootummaa Ida’amuu

Onkoloolessa 24/2019(ENA)- Gareen hoggansa hogganaa Waajjira Qonnaa Godina Lixa Oromiyaa Obbo Lulluu Qixxaataa durfamu fi hoggansi Sadarkaan jiru Aanaa Leeqaa Dullachaa fi Guutoo Giddaatti Oomisha Kilaastara Muuzii erga daawwateen booda dabalataanis lafa qoohaa'erratti muuzii dhaabaniiru. Inisheetiviin misooma Muuzii oomishtummaa guddisuu, galii qonnaan bultootaa dabaluu, carraa hojii bal’isuu, wabii nyaataa mirkaneessuu fi hirkattummaa hir’isuun badhaadhina sadarkaa maatii fi biyyaatti mirkaneessuuf kan kaayyeffate ta'uu Obbo Lulluun wayita kana ibsaniiru. Hogganaa I/A'n Waajjira Qonnaa Godina Lixa Oromiyaa Obbo Fayisaa Hambisaa daawwannicha irratti Aanaa Gullisootti inisheetiivii haaraa Misooma baala Shaayii irraa hawaasa fayyadamoo taasisuuf hojjetamaa jiraachuu dubbataniiru. Haala Kanaan Biqiltuuwwan Baala Shaayii kuma 600 misoomsuuf hojjetamaa jiraachuu fi hanga ammaatti Poliiteriin kumni 150 biyyoon guutamaniiru jedhan.

Onkololeessa 23/2019 (ENA) - Godina giddu gala Oromiyaa Aanaa Waacaaleetti Sagantaan Daawwaannaa fi Muuxannoo wal-jijjiirraa hojii misoomaa gaggeeffameera. Godina giddu gala Oromiyaa Aanaa Waacaaleetti, qonna gannaatiin ganda usmaaniitti oomisha xaafii fi qamadii kilaastaraan facaafamee misoomaa jiru hooggantoota sadarkaa adda addaa fi qonnaan bultootaan daawwatameera. Aanichatti Oomishaa fi Oomishtummaa qonnaan bultootaa dachaan dabaluuf qonnaan bultoonni teekinoloojjii qonnaatti madaqsanii, qonnaa ammayyeessun hojii hojjatamaa jiruun milkaa'inni guddaan argamaa jiraachuu Bulchaan Aanaa Waacaalee obbo Salamoon Abbabaa himaniiru. Qonnaan Bultoonni oomisha argatan sirnaan fayyadamuu fi qusachuun jiruu fi jireenya isaanii bu'uura irraa jijjiiruudhan badhaadhinaa eegalame milkeessuu qabdu jedhaniiru. Imala karoora of-danda’uu milkeessuf qonna gannaa bara 2018 tin gandoota garaagaraa keessatti meeggaa kilaastarii hundeessun midhaan sanyiiwwan gosa garaagaraan facaafamee hojjetamaa jiruun callaa gaarii kan abdatamu ta'uu itti Aanaa bulchaa fi itti Gaafatamaan waajjira Qonnaa fi Lafaa Aanaa Waacaalee obbo Darajjee Nugusuu ibsaniiru. Fuldurattis qonnaan bultoonni hundi bifa wal fakkaatun cimee hojjechuun wabii midhaan nyaataa mirkaneessuu bira darbee oomisha gabaa Addunyaaf barbaachisu dhiheessuuf hojjechuu qabdu jedhaniiru obbo Darajjeen . Fayyadamummaa hawaasaa mirkaneessuuf tarsiimoo misooma qonnaa mootummaan gadi buuse hordofuudhan gorsaa fi hubannoo ogeessa qonnaa irraa argataniin lafa isaanii kilaastaraan xaafii fi qamadii facaasanii milkaa'aa kan jiran ta'uu qonnaan bultoonni gandichaa ibsaniiru. Koomunikeeshinii Aanichaarraa.

  Onkololeessa 24/2019 (ENA) – Itti Aanaa Bulchaa fi Hogganaan damee misoomaa Godina Kibba Lixa Oromiyaa Obbo Indaalkaachoo Tafarii lafa misoomaaf oolu mara bonaa ganna misoomsuun karoora ofdanda'uu qabanne dhugoomsuuf bu'uura ta’uu ibsan. Godina Kibba Lixa Oromiyaa Aanaa Cooraatti facaasaan qamadii jallisii bonee eegalameera.   Bara kana godinichatti lafa hektaara kuma 700 ol qamadii jallisii bonaatiin misoomsuuf karoorfamee hojiitti seenamuun dhibbentaa 60 ol qotamuusaa eeraniiru. Qonnaan bultootni aanichaa lafa ganna darbe midhaan adda addaatiin misoomsanirraa caallaa galfachuun qamadii jallisii irratti facaasaa jiru. Waggoottan darban qamadii bonaa misoomsaa turaniin fayyadamoo diinagdee ta’uu isaaniitiin bara kanas kilaasteraan facaasaa jiraachuu himaniiru. Bulchaan Aanaa Cooraa Obbo Mustajiib Aliiyyii aanichatti bara kana lafa hektaara kuma 23 ol qamadii jallisii bonaa kilaasteraan misoomsuuf hojjetamaa jiraachuu himaniiru. Qonna keenya ammayyeessuuf ammoo fayyadama makanaayizeeshinii dabaluuf kilaasteraan misoomsuun kan hojjetamu ta’uu ibsuun kanaafis dhiheessiiwwan barbaadaman guutamaa jiraachuu himaniiru. Lafa jallisii jiru mara oomishaan uwwisuuf paampiiwwan bishaan harkisan kuma 20 ta'aninis fayyadamuun oomisha qonna bonaarraa argamu guddisuuf hojjetama jedhaniiru.

Onkolooleessa 23/2019(ENA)- Godina Giddugaleessa Oromiyaa Aanaa Baakkoo Tibbeetti Boqqolloo Sanyii Filataa Yuuniiyeenii Waldaa Hojii Gamtaa Qonnaan Bultoota Booree Baakkootiin Oomishame daawwatameera. Daawwannaa Sanyii Filataa Yuuniiyeenii Waldaa Hojii Gamtaa Qonnaan Bultoota Booree Baakkootiin Oomishame irratti itti Aanaa Qonnaa fi itti Gaafatamaa Damee Misooma Qonnaa Qonnaa Godina Giddugaleessa Oromiyaa obbo Tarrafaa Araarsaa dabalatee hoggantooni waajjiraalee adda addaa aanichaa argamaniiru. Kaayyoon Daawwannaa kanaas hanqina Sanyii Filatamaa Boqqolloo Qonnaan Bultoota mudachaa jiru hambisuun badhaadhina maatii mirkaneessuuf ta'uu ibsameera. Itti Aanaan Waajjira Qonnaa fi itti gaafatamaa Damee Misooma Qonnaa Godina Giddugaleessa Oromiyaa Obbo Tarrafaa Araarsaa rakkoo sanyii filatamaa qonnaan bultoota mudachaa jiru furuuf Yuuniyeenii waliin ta'uun hojjechaa jiraachuu himaniiru. Bulchaan Aanaa Baakkoo Tibbee obbo Maamuyyee Dilboo Aanichatti dinagdee qonnaan bultootaa guddisuuf innisheetiiviiwwan bocamanii gadi bu'an hojiirra oolchuun hojjechaa jiraachuu himaniiru. Hojigaggeessaan Yuuniyeenii Waldaa Hojii Gamtaa Qonnaan Bultoota Booree Baakkoo Obbo Ittafaa Sambatoo yuuniyeenichi rakkoo dhiyeessii sanyii boqqolloo filatamaa BH-661 Oomishuun Oomishaa fi Oomishitummaa Qonnaan Bulaa dabaluuf xiyyeeffannoon hojjetamaa jiraachuu ibsaniiru. Koomunikeeeshinii aanichaarraa #Biyya Guddoo, Ummata Guddaa # Mul'ata Guddaa  

Onkoloolessa 22/2019(ENA) : Kantiibaan Magaalaa Finfinnee Aadde Adaanech Abeebee misooma namooma giddu galeessa godhate ganda Ejersa Boolee Shubbuu tajaajilaaf banaa taasisan. Aadde Adaanech ergaa toora miidiyaa hawaasaa isaaniin dabarsaniin har’a ganda jiraattotaa walitti qindaa’e Boolee Shubbuu Ejersaa namoota misooma kanaan bakka jireenyaa isaanii irraa kaafamaniif ijaarame jiraattota naannichaaf dabarsinee kennineerra jedhan. Kaayyoon guddaan misooma magaalaa bu’uuraalee misoomaa ijaaruu qofa osoo hin taane, jireenya lammiilee fooyyessuu, mirgaa fi faayidaa isaanii eeguu akkasumas carraa jireenyaa fooyya’aa uumuudha.   Yuunivarsiitiin Hubannoo Namtolchee (AI) magaalaa Finfinneetti ijaaramaa jiru pirojektii biyyaalessaa guddaa guddina teeknooloojii fi dinagdee biyyattii saffisiisuu danda’uu tahuu kan kaasan Aadde Adaanech haa ta’u malee, pirojektiin kun qonnaan bultoota duraan lafa sana qonnaaf, dheedichaafii jireenyaaf itti fayyadamaa turan irratti dhiibbaa waan geessisuuf, isaan fayyadamtoota misoomaa akka ta’an malee miidhamtoota akka hin taane xiyyeeffannoo addaa kennineerra.   Kanaafuu, qonnaan bultoota Boolee Shubbuu Ejersaa pirojektii Yuunivarsiitii Hubannoo Namtolchee (AI) tiif jecha lafa qonnaa fi bakka jireenyaa isaanii irraa kaafamaniif ganda jireenyaa walitti qindaa’e ijaaruun, madda galii fi jireenya isaanii fooyyessuuf tajaajiloota barbaachisoo ta’anis keessatti hammachiifneerra jedhan Kantiibaa Adaanech. Kunis hariiroo hawaasummaa jiraattotaa eeguun haala jireenyaa fooyya’aa keessa akka jiraatan kan taasisu, sirna misoomaa namooma giddu galeessa godhate tahuu kaasaniiru. Gandichi manneen jireenyaa dabalatee tajaajiloota akka dallaa loonii,loon aannanii itti horsiisan, akkasumas nyaata beelladaa itti qopheessan,dhaabbilee daldalaa, suuqota, manneen kuusaafi raabsaa oomishaa, akkasumas daakuu midhaanii akka qabu ibsaniiru. Tajaajilootni kunneen jiraattotaaf haala jireenyaa fooyya’aa uumuun, misooma aannanii fi maddoota galii biroo akka guddisan, hariiroo hawaasummaa isaanii akka tikfatan, akkasumas daa’imman isaanii naannoo mijataa keessatti akka guddatan gargaaruuf qophaa’aniiru.   Misooma jechuun namoota bakka jireenyaa isaanii irraa kaasuu qofa osoo hin taane, sadarkaa jireenyaa isaanii fooyyessuu, dandeettii dinagdee isaanii cimsuu fi abdii egeree isaanii guddisuu dabalatas jedhan Kantiibaa Adaanech ergaa isaaniitiin. Jiraattota naannichaa waliin yeroo mari’annu, lafti isaanii kun pirojektii biyyaalessaa guddaa ta’eef akka oolu, yuunivarsiitichi ijoollee isaanii carraa barnootaa akka argatan, akkasumas Itoophiyaan sadarkaa addunyaatti dorgomaa akka taatuuf gahee guddaa akka qabu hubatanii, fedhii isaaniitiin tumsa taasisaniiru kan jedhan Kantiibaa Adaanech,tumsa garaa qulqulluudhaan nuuf taasisaniif galata guddaa qabna, kabaja guddaatuu isiinif mala jedhaniiru. Hojiin kun, tokkummaa fi tumsa irratti hundaa’uun yeroo hojjenne, qaamolee hunda fayyadamtoota taasisuu fi misooma waaraa mirkaneessuu akka dandeenyu kan agarsiisuudha jedhaniiru. Gandi jiraattota Ejersaa Boolee Shubbuu kun fakkeenya qabatamaa kallattii misooma namooma giddugaleessa godhatee deemnuuti. Finfinnee ijaaraa jirru, kabajaa, mirgaa fi faayidaa jiraattota ishee hunda kan eegdu, lammiilee hunda qixa fayyadamtoota misoomaa kan taasisitu akka taatuuf kutannoo qabnaas jechuun hubachiisaniiru. Hoggantoota Bulchiinsa Kutaa Magaalaa Boolee fi namoota adeemsa hojii kana keessatti gumaacha taasisan hundaaf garaa guutuudhaan galata guddaa qabna jechuun Kantiibaa Adaanech galata dhiyeessaniiru. #Biyya Guddoo, Ummata Guddaa # Mul'ata Guddaa #Mootummaa Ida’amuu

Onkololessa 22/2019 (ENA): Magaalaan Finfinnee misoomni koridarii fi qarqara lageenii gaggeeffamaa jiru saffisaa fi qulqullina olaanaan ijaaramaa akka jiru kutaaleen hawaasaa adda addaa ibsaniiru. Kunis magaalattiin jireenyaaf, turizimii fi carraa hojii uumuuf mijattuu akka taatu ishee taasiseera jedhani. Ministirri Muummee Abiyyi Ahimad (Dr.) Misooma Koridaarii qarqara Lageenii Qacanee hanga Ambaasaaddaraa-Giyoonii, Irreechaa- Baambis lafa bal’ina heektaara 351 qabu eebbisuun tajaajilaaf banaa taasisuun isaanii ni yaadatama. Pirojektiin guddaan kun eegumsa naannoo jijjiirama magaalaa waliin walitti makuun magaalaa Finfinnee ammayyaa, magariisaa fi jireenyaaf mijataa taasisuuf kan kaayyeffate ta’uu Ministirri Muummee ibsaniiru. Kutaaleen hawaasaa adda addaa ENA’n qarqara lageeniitti bashannanaa jiran dubbise akka himanitti, misoomni qarqara lageenii kun miidhagina magaalattii kan guddise, walitti dhufeenya hawaasummaa kan cimseefi turizimiidhaaf haala mijataa kan uumedha jedhani. Shamarreen Harar irraa dhufte Sixootaa Taarikuu pirojektoonni misoomaa magaalaa magaalaa Finfinneetti hojjetamaa jiran baay’ee kan miidhaganii fi daawwattoota kan hawwatan ta’uu dubbatteetti.   Shamarree Batsaloot Gaashaawuu gama isheetiin akka misoomni koriidaraa fi qarqara lageenii hawwattummaa magaalattii dabaluun jiruuf jireenyaaf akka mijattu taasiseera jette. Bakkeewwan dargaggoonni sammuu isaanii itti haaromsan, dhiibbaa jireenya guyyaa guyyaa irraa aaragalfatanii fi yeroo isaanii haala qulqullina qabuun itti dabarsan kan argite ta’uu himteetti. Obbo Fiqaaduu Tolaa gama isaaniin dur bifti magaalaa Finfiinnee rakkoo qulqullina dhabuu fi foolii badaan kan guutame ta’uu himuun, yeroo ammaa garuu haalli kuni jijjiiramee baay’ee kan namatti tolu ta’uu dubbatani.     Yaada isaanii ENA’f kan kennan Zakkaariyaas Tashoomaa gama isaaniin akka himanitti, kanaan dura bakkeewwan akkanaa cufaa ta’anii kan tursiifaman ta’uu eeruun,yeroo ammaa garuu misoomni qarqara lageenii hojjetamuun yaa’insa turistii kan dabale ta’uu dubbatani. Kana malees bakka aara galfii ta’uun jireenyaaf mijattuu taasiseera jedhani. Yaada kennaan kan biraan Ashaagiree Kasiisaa gama isaaniitiin akkuma magaalattiin miidhagaa deemtu yaa’insi turistootaas dabalaa deemaa jiraachuu dubbatani. Kunis lammiilee hedduudhaaf carraa hojii bal’aa kan uumuu fi sochii dinagdee magaalichaa kan kakaasu ta’uu ibsaniiru. #Biyya Guddoo, Ummata Guddaa # Mul'ata Guddaa #Mootummaa Ida’amuu