Sadaasa 4/2019 (ENA)- Bu’uraaleen misoomaa qindaa’aan Finfinneetti hojjetaman sirna ramaddii fi to’annoo konkolaattotaa ammayyaa uumuu isaa, dura taa’aan koree dhaabbataa dhimma bu’uuraalee misoomaa fi mana qopheessaa mana Maree bulchiinsa magaalaa Finfinnee doktar Gizaachoo Ayikaa ibsaniiru. Biiroon Geejjibaa Magaalaa Finfinnee sirna haaraa qindaa’aa ramaddii fi to’annoo konkolaattotaa eebbisiisuu fi beeksisuuf sagantaa qopheesseera. Saganticharratti kan argaman dura taa’aan koree dhaabbataa bu’ura misoomaa fi dhimmoota mana qopheessaa bulchiinsa magaalaa Finfinnee doktar Gizaachoo Ayikaa, sirni hojii dijitaalaa qisaasama qabeenyaa, malaammaltummaa fi dararama ummataa hambisuun tajaajila saffisaa kennuuf akka dandeessisu ibsaniiru. Magaalaan Finfinnee wiirtuu tajaajila bakka tokkoo Mesob hojiirra oolchuun tajaajiloota iftoominaa fi saffisa qaban kennuun quufinsa jiraattotaa mirkaneessaa fi bu’aawwan galmeessaa akka jirtu eeraniiru. Sirni haaraan ramaddii fi to’annoo konkolaattotaa kunis qaama hojii kanaa ta’uu ibsuun, damee geejjibaa magaalattii ammayyeessuu fi saffisiisuu keessatti gahee olaanaa akka qabu dubbataniiru. Itti gaafatamaan biiroo geejjibaa magaalaa Finfinnee, Doktar Tafarraa Molaa, yeroo ammaa itti quufinsa hawaasaa mirkaneessuu fi tajaajila saffisaa kennuuf teeknooloojii fayyadamuun dirqama ammaa ta’uu ibsaniiru. Sirni haaraan kun rakkoolee duraan ramaddii fi to’annoo konkolaattotaa keessatti mudachaa turan furuun adeemsi hojii teeknooloojiin akka deeggaramu ni taasisa jedhaniiru. Kunis sochiin tiraafikaa mijataa akka jiraatuuf haala mijeessuun tajaajilli geejjibaa saffisaa, amanamaa fi nageenya qabu akka ta’u ni gargaara jedhaniiru. Dabalataanis, sirni kun konkolaattota seeraan alaa hordofuu fi cufamuu tiraafikaa hir’isuu keessatti gahee olaanaa akka qabu hundeessaan akkasumas hoji gaggeessaan dhaabbata AG Technology, dargaggoo Getaasaaw Ababa ibsaniiru. Sirni kun ramaddii konkolaattotaa, ramaddii to’attootaa, galmee argama konkolaattotaa, yaada tajaajilamtootaa, gabaasa dhaabbilee dhimmi ilaallatuu fi gabaasa taateewwan guyyaa guyyaa of keessatti akka hammatu ibsaniiru. Hogganaan Waldaa Taaksii Nagaa Finfinnee, Obbo Geetuu Tasfaayee, sirni kun rakkoo fi walitti bu’iinsa to’attootaa fi konkolaachistoota taaksii gidduutti uumamaa ture furuuf akka gargaaru dubbataniiru. Miseensi Waldaa aksiyoona geejjiba Aday Abbaa, Birhaanee Yehuwaalaasheet, sirnichi mala hojii tuttuqaa harkaa hambisuun sirna dijitaalaa akka babal’isu ibsaniiru.

Sadaasa 4/2019 (ENA) – Ijaarsi biyyaa dhimma yeroo tokkoo ykn bara tokkoo osoo hin taane, itti gaafatamummaa dhalootaa ciminaan fi tokkummaan dhaabbachuun hojjetamu ta’uu Ministirri Muummee Dr. Abiyyi Ahimad ibsaniiru. Ministirri Muummee akka jedhanitti, hojiiwwan misoomaa raawwataman hundi, manneen jireenyaa dabalatee, kan yeroo dheeraa turanii, itti fufanii fi jireenya namoota hedduu qabatamaan jijjiiran ta’uu qabu. Hojiiwwan hanga ammaatti jalqabamanis galma kana milkeessuun akka danda’amu qabatamaan kan agarsiisan ta’uu dubbataniiru. Badhaadhinni biyyaalessaa karoorfame dhugoomuu kan danda’u jireenya haadholii fi lammiilee galii gadi aanaa qabanii fooyyessuu yeroo dandeenyu qofa ta’uu hubachiisaniiru. Lammiileen qabeenya uumuu danda’an akka guddatan fi ciman taasifamaa osoo jiranii, qabeenyi uumamu kun jireenya nama hundaa akka fooyyessu, akkasumas lammiileen hundi sadarkaa fi dandeettii isaaniitiin haala jireenyaa isaanii akka fooyyeffatan sirna haqaa qabeessa ijaaruun kaayyoo ijoo ta’uu ibsaniiru. Itiyoophiyaan dameewwan hundaan abdii bal’aa akka qabdu daawwannaa biyyoota alaa keessatti taasifaman fi hojiiwwan milkaa’inaan biyya keessatti jalqabaman irraa hubachuun akka danda’amu dubbataniiru. Hojii malee karaa kamiinuu jijjiiramni dhufuu waan hin dandeenyeef, hanqinoota jiran sirreessaa fi fooyyessaa, hojii cimaa fi tokkummaan yoo tattaafanne, waggoota muraasa keessatti biyyoota biroo waliin dorgomuu dandeessu, biyya bareedduu fi badhaate ijaaruun akka danda’amu ibsaniiru. Ijaarsi biyyaa dhimma yeroo tokkoo ykn bara tokkoo osoo hin taane, itti gaafatamummaa dhalootaa ciminaan fi tokkummaan hojjetamu ta’uu ibsaniiru.

Sadaasa 4/2019 (ENA)- Lammiileen salphaatti mana akka bitatan baankotaa fi gurmaa’insoota fandii faayinaansii waliin qindaa’uun haalli keessa jiraachaa kaffalan mijeeffamaa akka jiru Ministirri muummee Dr. Abiyyi Ahimad ibsan. Ministirri Muummee Dr. Abiyyi Ahimad akka ibsanitti, manneen jireenyaa miiliyoona 1 tuqaa 5 sadarkaa biyyaalessaatti ijaaruuf taasifamaa jiru keessatti, meeshaalee ijaarsaa kanneen akka sibiilaa, geejjibaa fi seraamikaa biyya keessatti oomishuuf dandeettii oomishaa guddisuurratti xiyyeeffannoon bal'aan kennamee hojjetamaa jira. Adeemsa ijaarsa manneenii keessatti sirni faayinaansii fi tajaajilli liqii morgaajii waliin yoo hin diriirfamin, lammiileen manneen sana salphaatti bitachuu akka hin dandeenye ibsaniiru. Kanaaf, baankotaa fi dhaabbilee faayinaansii waliin qindoominaan hojjechuun, lammiileen manneen keessa jiraachaa kaffaltii isaanii suuta suutaan akka raawwatan sirni mijataan diriirfamaa jiraachuu eeraniiru. Mootummaa fi damee dhuunfaa waliin ta'uun, Finfinnee keessatti qofa manneen kuma 100 ol ijaarsi isaanii jalqabamee, yeroo waggaa tokkoo gaditti haala gaariin xumuramuu isaanii ibsaniiru. Keessumaa naannolee akka Markaatoo qixal taraatti jijjiiramni saffisaa ijaarsa manneenii fi jireenya hawaasaa keessatti mul'ate bu'aa guddaa yeroo gabaabaa keessatti argame ta'uu ibsanii, manneen kuma 100 kunneen erga xumuramanii booda muuxannoon argame kun bal'inaan akka itti fufu dubbataniiru. Itiyoophiyaa keessatti jireenya qonnaan bultootaa baadiyyaatti fooyyessuu, akkasumas rakkoo lammiilee magaalota keessatti tajaajila bu'uuraa osoo hin argatin jiraatanii furuuf manneen jireenyaa miliyoonaan lakkaa'aman akka barbaachisan ibsaniiru. Hanqina guddaa kana furuuf maallaqa qofa osoo hin taane beekumsa, dizaayinii qulqullina qabuu fi ijaarsa waaraa ta'e waan barbaachisuuf, hojii kana saffisaa fi qulqullinaan raawwachuuf qaamoleen dhimmi ilaallatu hundi tumsaa fi qindoominaan akka hojjetan ministirri muummee hubachiisaniiru.

Sadaasa 4/2019 (ENA)- Guyyaa sabootaa, sablammootaa fi ummattootaa 21ffaa keessummeessuuf qophiirra kan jirtu magaalaan Jimmaa misooma kooriidaraa boqonnaa lammaffaatiin magaalattii miidhagsuun gamatti carraa hojii hedduu uumaa akka jirtu jiraattonni dubbatan. Jiraattonni ENA’f yaada kennanakka ibsanitti, misoomni kooriidarii miidhagina magaalattii dabaluun sirna tiraafikaa si’achiisuun olitti daldala dadammaqsaa jira. Obbo Miliyoona Zallaqaa, misoomni koridaraa bifa magaalaa fooyyessuu bira darbee, wiirtuulee daldalaa babal’isuu fi balaa tiraafikaa hir’isuun jiraattotaaf naannoo mijataa uumuu isaa ibsaniiru. Dargaggoo Naaziif Biyaa gama isaatiin, misooma koridaraa kanaan carraa hojii argatee hojjechuun baasii maatii isaa danda’aa akka jiru ibsuun, misoomichi dargaggoota hedduuf carraa hojii uumuu dubbateera. Obbo Ahimad Bushuraa immoo, bifa magaalattii fooyya’uu fi wiirtuuleen daldalaa babal’achuun daldala isaanii guddisuuf carraa gaarii uumuu isaa ibsaniiru. Obbo Damallaash Zawudee gama isaaniin, magaalaan Jimmaa waggoota hedduu booda sadarkaa ishee eeggateen misoomaa fi bareedaa jiraachuun isaa akka isaan gammachiise dubbataniiru. Misoomni koridaraa magaalaa Jimmaa boqonnaan jalqabaa kan xumurame yoo ta’u, boqonnaa lammaffaa ammoo ayyaana guyyaa saboota, sablammootaa fi ummattoota Itoophiyaa 21ffaa Fulbaana 29 dhufu magaalaa Jimmaatti kabajamuuf qophaa’aa akka ta’uuf hojiiwwan xumuraa hojjetamaa jiru. Jiraattonni magaalattii misoomni kun hirmaattotaa fi keessummoota ayyaanichaaf bifa magaalaa bareedaa gochuu bira darbee, ayyaanicha booda illee bu’aa misoomaa waaraa magaalattii fi jiraattota isheef argamsiisa jedhanii akka abdatan ibsaniiru.

Sadaasa 3/2019(ENA)-Godina Kibba Bahaa Oromiyaatti sanyii beelladaa fooyyessuun faayidaa damee horsiisa beelladaa irraa argamu guddisuuf hojiiwwan hojjetaman bu'aa agarsiisaa dhufuu Waajjirri Qonnaa Godinichaa beeksise. Godinichatti hojii sanyii loon aannanii mala namaatiin fooyyessuu Aanaa Goobaatti gaggeeffameera. Qonnaan bultoonni Aanaa Gobbaa, kanaan dura loon naannoo hedduminaan qabaatus, oomishaa fi bu’aan isaan irraa argachaa turan baay’ee xiqqaa ta’uu himan. Haa ta’u malee, yeroo ammaa mala saayinsawaafayyadamuun loon diqaalomsuun sanyii fooyya’oo ta’an horsiisuu eegaluusaanii fi kanaan bu’aa gaarii argachaa jiraachuusaanii ibsaniiru. Itti gaafatamaan Waajjira Qonnaa Aanaa Goobbaa, Obbo Abbabaa Getaachoo, aanichatti erga sanyii loonii fooyyessuun jalqabamee as qonnaan bultoonni faayidaa guddaa arggachaa jiraachuu ibsaniiru. Keessattuu, mala saayinsawaa diqaalomsuu fayyadamuun sanyii loonii fooyyessuun oomisha aannaniifi foonii dabaluuf carraa bal’aa uumuu himaniiru. Akkasumas, bara kana bu’aa loon irraa argamu dachaan dabaluuf aanichatti looniin kuma 20 ol mala saayinsawaa diqaalomsuun sanyii isaanii fooyyessuun fayyadamummaa qonnaan bultootaafi horsiisee bultoota aanichaa mirkaneessuuf hojjechaa jiraachuusaanii dubbataniiru. Itti gaafatamaan Itti Aanaan Waajjira Qonnaa Godina Kibba Baha Oromiyaa, Obbo Zalaalam Alamaayyoo, godinichatti karoora addaa gama sanyii beeyladoota aannaniifi foonii fooyyessuun qabame milkeessuuf xiyyeeffannoon hojjetamaa jiraachuu ibsaniiru. Karoora kanaan, oomishaafi oomishtummaa beeyladootaa guddisuun galii maatii qonnaan bultootaafi horsiisee bultootaa dabaluun imala badhaadhina maatii dhugoomsuuf hojiiwwan garaagaraa hojjetamaa jiraachuusaanii himaniiru. Dabalataanis, bara kana godinichatti loon kuma 900 ol mala saayinsawaa diqaalomsuu fayyadamuun sanyii isaanii fooyyessuuf hojjetamaa jiraachuu ibsaniiru. Hojii sanyii beeyladootaa fooyyessuu kanaan oomisha aannaniifi foonii guddisuun galii qonnaan bultootaafi horsiisee bultootaa dabaluun akkasumas, fayyadamummaa maatii isaanii mirkaneessuuf xiyyeeffannoon hojjetamaa jiraachuu eeran.

Sadaasa 03/2019 (ENA)-Qonnaan bultoonni godina kibba bahaa Oromiyaa aanaa Heexosaa sanyiin filatamaa fi teeknooloojiin ammayyaa wiirtuu qorannoo qonnaa Qulumsaarraaargatanitti fayyadamuun oomishnii fi oomishtummaan isaanii guddachaa jiraachuu ibsan. Qonnaan bultoonni ENA’f yaada kennan Kanaan dura mala qonnaa aadaa fi sanyii fooyya’aa waan hin arganneef oomisha xiqqaa akka argatan dubbataniiru. Wiirtuu qorannoo qonnaa kanarraa deeggarsa sanyii qamadii fi garbuu fooyya’aa, teeknooloojii fi gorsa ogeeyyotaa waan argataniif bu’a qabeessa ta’uusaanii dubbataniiru. Qonnaan bulaan Bookii Dinquu, qorannoo qonnaa Qulumsaa waliin qindaa’uun hojjechuusaaniin bu’a qabeessa ta’aniiru. Sanyii qamadii filatamaa wiirtuu qorannoo kun baay’ise, haala hojmaataa fi gorsa ogummaa argachuusaaniin hojii qonnaan bu’a qabeessa akka taanu nu gargaareera jedhan. Bara oomishaa 2018/19 gorsarraa eegalee sanyii qamadii filatamaa fudhannee teeknooloojiitti fayyadamnee facaasuu keenyaan yeroo ammaa midhaan facaasan dhaabbii gaariirra jira jedhaniiru. Wiirtuu qorannoo qonnaa Qulumsaa waliin tumsaan hojjechuu keenyaan oomishnii fi oomishtummaan keenya guddatee baay’ee fayyadamaa jirra kan jedhan ammoo qonnaan bulaa Nagaash Lammaati. Sanyii filatamaa Qamadii fi Garbuu qorannoo qonnichaarraa bahan fudhannee oomisha gaarii argachaa jirra kan jedhan qonnaan bulaan kun, barana Qamadii heektaararraa kuntaala 50 ol akka abdatan eeraniiru. Wiirtuu qorannoo qonnaa Qulumsaatti qorataan midhaanii obbo Hayiluu Mangistuu gamasaaniin, wiirtuun kun sanyii qamadii fooyya’aa 100 ol qorannoon argachuun qonnaan bulaa biraan gahuusaa ibsaniiru. Keessumaa sanyiiwwan qamadii hongee fi dhukkuba dandamatan, ciidha xiqqoon yeroo gabaabaatti gahan kanneen akka Abbaayi fi Malkaa barsiisuusaanii dubbataniiru.

Sadaasa 03/2019 (ENA)-Jiraattonni bulchiinsa magaalaa Adaamaatti qonna magaalaatti hirmaatan galii fooyya’aan achirraa argataniin fayyadamoo dinagdee ta’uusaanii ibsan. Jiraattonni kunneen midhaan, kuduraa boroo, saawwan aannanii, horsiisa lukkuu, kanniisa horsiisuu fi misooma muduraatiin madda galiisaanii bal’ifataniiru. Qonnaan bula Mangistuu Raggaasaa laga hawaas jallisiin fayyadamuun Qamadii, Shunkurtii fi Timaatima oomishuun galiisaanii guddifachaa akka jiran ibsaniiru. Deeggarsa teekinikaa ogeeyyiin qonnaa taasisaniifitti gargaaramuun laga Hawaas maqsanii Qamadii, Shunkurtaa fi Timaatima misoomsuun madda galiisaanii guddifachaa jiraachuu dubbataniiru. Qonnaan bulaa Shuraa Baqqalaa yaada kennaniin, jallisiitti gargaaramuun Paappaayaa oomishuu eegaluusaanii fi galii fooyya’aa argachuuf hojjechaa jiraachuu beeksisaniiru. Muduraa kana qonnaan bultoota birooo waliin ta’uun kilaastaraan misoomsaa akka jiran eeranii, bishaan jallisii fi galteewwan qonnaa sirriitti itti gargaaramuun oomishtummaasaanii guddisuuf hojjechaa jiraachuu dubbataniiru. Itti gaafatamaan waajjira qonnaa magaalaa Adaamaa obbo Alamuu Qilxuu akka jedhanitti, amma ammaatti jiraattonni kuma 30 ta’an inisheetiivota qonna magaalaa 13 irratti hirmaatanii fayyadamoo ta’aniiru. Bulchiinsi magaalichaa gaagura ammayyaa,motora bishaanii fi deeggarsa teekniikaa dheheessuun damee kana cimsaa akka jiru ibsaniiru. Walumaa gala qonni magaalaa carraa hojii uumuu fi wabii nyaataa cimsuurra darbee fayyadama dinagdee jiraattotaa guddisaa jiraachiin ibsameera.

Oromiyaan carraa misooma anniisaa fi albuudaa qabdu invastimantii hawwachuu fi bu’uura dinagdee cimsuuf carraa ta’uu danda’a. Keessumaa misoomni anniisaa ji’ootermaalii fi dameen albuudaa kaappitaala, teknoolojii fi beekumsa teeknikaa barbaadu. Kanaaf, qabeenya umamaa kana gara bu’aa dinagdeetti jijjiiruuf invastimantii dhuunfaa fi tumsa michoota misoomaa waliin hojjechuun kallattii imaammataa barbaachisaadha. Garuu qabeenya umamaa qabaachuun qofti bu’aa misoomaa hin mirkaneessu. Pirojektoonni dameewwan kana keessatti gaggeeffaman haal-duree teeknikaa, faayinaansiifi eegumsa naannoo irratti hundaa’anii qophaa’uu, akkasumas faayidaa dinagdeefi hawaasummaa isaanii madaaluu qabu. Qindoominni mootummaa fi invastarootaa, dandeettii ogummaa guddisuun, akkasumas walitti hidhamiinsa dameewwan anniisaafi albuudaa waliin indastiriifi tajaajiloota biroo cimsuun barbaachisaadha. Imaammanni qabeenya uumamaa irratti hundaa’e kaappitaala hawwachuu qofa osoo hin taane, faayidaa yeroo dheeraa uumu irratti xiyyeeffachuu qaba. Qabeenyi umamaa gara anniisaa, omisha, hojiifi galii itti fufiinsa qabuutti jijjiiramuun, dinagdee naannichaa cimsuu danda’a. Kanaaf, invastimantii dameewwan kanaa qindoomina, itti gaafatamummaafi madaallii bu’aa irratti hundeessuun barbaachisaadha. #oromiapresidentoffice202

Sadaasa 2/2019 (ENA)- Itiyoophiyaa fi baankiin invastimantii Infiraastiraakcharii Isiyaa hojiilee tumsaan hojjetan itti fufsiisuuf marii gamlamee gaggeessaniiru. Yaa’iin jijjiirama haala qilleensaa 31ffaa dhaabbata mootummoota gamtoomanii Turkiyyee Antaaliyaatti gaggeeffamaa jira. Yaa’ichi mata duree “Imala gara bara egereen, of danda’ee fi haqni keesstii mirkanaa’eetti jedhuun gaggeeffamaa jira. Ministirri dhimma alaa Itiyoophiyaa fi pirezidaantii COP32 ta’uun kan filataman Dr. Geediyoon Ximootiwoos fi ministirri maallaqaa fi mari’attuun olaanaa COP32 Dr. Fitsum Asaffaa yaa’icha cinaatti pirezidaantii baankii invastimantii infiraastiraakchariiIsiyaa(AIIB) Zoo Jayaayi waliin marii gamlamee taasisaniiru.   Mariin kun hojiilee tumsaan hojjetaman itti fufsiisuuf kan akeekamedha. Ijaarsa buufata xiyyaaraa idil addunyaa Bishooftuu faayinaansiin deeggaruuf marii Kanaan dura eegalamee ture itti fufsiisuuf yeroo dheeraa waliin hojjechuu fi pirojektoota biroo bocuuf mari’ataniiru. Akkasumas COP32 Kan Itiyoophiyaan keessummeessitu ilaalchisee wal deeggaruun haala danda’amurratti mari’ataniiru.

Sadaasa 2/2019 (ENA) - Shallaga oomisha biyya keessaa ammayyeessuun dandeettii fi guddina dinagdee sirriitti madaaluuf akka gargaaru ogeessi dinagdee Zamadeenee Nigaatuu ibsan. Ministeerri tarsiimoo biyyaalessaa tilmaama oomisha biyya keessaa walii galaa fooyya’e wayitaawaa gochuu ifatti beeksisuunsaa ni yaadatama. Odeeffannoon biyya keessaa walii galaa fooyya’e waggaan dhaabbataan bara 2008 irraa gara 2017tti akka jijjiiramu taasifameera. Akka tilmaama yeroo ammaa kan shallaggii waggaa bu'uuraa haaromsameetti, Omishni Waliigalaa Biyya Keessaa Itiyoophiyaa dhibbantaa 59 tuqaa 2 guddachuun ibsameera. Ogeessi dinagdee Zamadeeneh Nigatu, gaaffii fi deebii ENA waliin taasisaniin, guddina saffisaa fi dameewwan hedduu irratti galmaa'aa jiru sirriitti agarsiisuuf safartuun shallaggii Omisha Waliigalaa Biyya Keessaa (Rebased) haaromfamuu isaa barbaachisaa ta'uu ibsaniiru. Akka ibsa ogeessichatti, safartuuwwan duraanii yeroo dinagdeen biyyattii irra caalaa qonna irratti hundaa'ee turetti kan qophaa'an waan ta'aniif, guddina dameewwan telekoomii, tajaajila faayinaansii, teeknooloojii dijitaalaa fi oomishaa (Manufacturing) haala gahaa ta'een hin hammatan. Safartuun haaromfame kun raawwii dameewwan dinagdee sirriitti madaaluuf, dameewwan xiyyeeffannoo barbaadan adda baasuuf, amantaa invastaroota biyya alaa guddisuuf, hawwattummaa invastimantii cimsuuf, ba'aa liqaa hir'isuuf akkasumas bu'uura gibiraa bal'isuuf gumaacha guddaa qabaachuu ogeessichi ibsaniiru. Kana jechuunis, hojii kana ogeeyyiin fi hayyoonni damee kanaa yeroo gahaa itti kennuudhaan kan raawwatan ta’uu ibsaniiru. Raawwii dameewwan dinagdee Itiyoophiyaa karaa ammayyaa ta’een madaaluun, gumaacha guddina dinagdee keessatti qaban qorachuu fi dameewwan xiyyeeffannoo barbaadan salphaatti adda baasuuf akka gargaaru dubbataniiru. Keessumaa, haala dhugaa guddina dinagdee biyyattiin galmeessaa jirtu ifatti kan mul’isu waan ta’eef, invastaroota biyya alaa biratti amantaa guddaa uuma jedhaniiru. Dabalataanis, hawwattummaa invastimantii biyyattii guddisuun Itiyoophiyaan bakka invastimantiif filatamaa taate akka taatuuf carraa bal’aa kan banu ta’uu ibsanii, akkasumas, ba’aa liqaa waliigalaa hir’isuuf gahee olaanaa qaba. Sirna gibiraa ammayyeessuu fi bu’uura gibiraa bal’isuuf taasifamu keessatti gahee guddaa qaba.

Sadaasa 02/2019 (ENA)- Godina Kibba Bahaa Oromiyaatti hojiilee qonnaa fooyya’an bal’inaan hojiirra oolchuun oomishaa fi oomishtummaa guddisaa jiraachuu biiroon qonnaa godinichaa beeksise. Ministirri muummee Dr. Abiyyi Ahimad dhihoo kana raawwii qonna gannaa Godina Oromiyaa Kibba Bahaa daawwachuun isaanii ni yaadatama. Yeroo kanattis hanqinni roobaa jiraatus, hojii qophii duraa mootummaan fi uummanni taasisan bu’aa jajjabeessaa galmeessisuu ibsanii, diinagdeen keenya qormaata uumamaa fi namtolchee dandamatee akka itti fufuuf dursee qophaa’uunii fi filannoowwan adda addaa babal’isuun murteessaa ta’uu hubachiisaniiru. Itti gaafatamaan itti aanaan Biiroo Qonnaa Godina Oromiyaa Kibba Bahaa Obbo Zalaalam Alamayyoo akka ibsanitti, bara kana qonna gannaatiin lafti hektaara miliyoona 2 tuqaa 5 ol meeshaalee qonnaa ammayyaa fayyadamuun midhaan garaagaraatiin misoomaa jira. Godinichatti qonna ammayyeessuun oomishaa fi oomishtummaa guddisuuf sanyii filatamaa, dhiyeessii galteewwan qonnaa, ijaarsa dandeettii qonnaan bultootaa fi makaanayizeeshinii qonnaa bal’inaan hojiirra oolaa jiraachuu ibsanii, lafti qonnaa dhibbantaa 85 ol kilaastara qonna gannaan qotamerraa oomishni kuntala miiliyoona 96 olakka abdatamu dubbataniiru. Kana malees, oomisha qonnaa irratti sona dabaluun warshaalee zayitaa, daakuu, paastaa fi makaroonaa babal’isuun xiyyeeffannoo argatee hojjetamaa jiraachuu ibsaniiru. Aanaalee horsiisee bultootaa keessatti of danda’uun nyaata argachuu mirkaneessuuf hojiiwwan hojjetamanis bu’aa gaarii galmeessisuu eeranii, bara darbe horsiisee bultoota sagantaa Seefitineetii keessatti hammataman keessaa dhibbeentaan 70 saganticha irraa eebbifamuu isaanii ibsaniir Horsiisee bultoota dhibbeentaa 30 hafanis bara baajataa kana keessa of danda’anii akka jiraatan taasisuuf hojiiwwan itti fufanii hojjetamaa jiraachuu dabaluun ibsaniiru. Aanaa Siinnaanaatti qonna kulaastaraa keessatti qonnaan bulaa ta’anii kan hojjetan Obbo Takaliny Fallaqaa, yeroo ammaa qonnaan bultoota naannoo isaanii waliin gurmaa’uun sanyii filatamaa qamadii fayyadamuudhaan hojjechaa akka jiran ibsanii, hektaara tokko irraa qamadii kuntaala 55 argachuuf ciminaan hojjechaa jiraachuu dubbataniiru. Qonnaan bulaan aanaa sanaa kan biraan Obbo Diriibaa Magarsaa gama isaaniin, waggoota afran darban sanyii filatamaa fi hojiilee qonnaa fooyya’an fayyadamuu erga jalqabanii kaasee hektaara tokko irraa giddugaleessaan qamadii kuntaala 50 argachaa jiraachuu ibsaniiru. Kanaanis ijoollee isaanii haala gaariin barsiisuu fi mana jireenyaa sadarkaa isaa eeggate ijaaruu akka danda’an dubbataniiru.

Sadaasa 1/2019 (ENA) – Hojiiwwan misoomaa invastimantii qonnaa Magaalaa Harar keessatti hojjetaman gara boqonnaa haaraatti ce’aa jiraachuu Itti Aanaan Ministira Muummee Tamasgeen Xurunaa ibsan. Itti Aanaan Ministira Muummee ergaa fuula miidiyaa hawaasaa isaanii irratti dabarsaniin, invastimantoonni kaappitaala jalqabaa xiqqaan hojii isaanii jalqaban waggoota muraasa keessatti humna kaappitaalaa isaanii guddisuu akka danda’an ibsaniiru. Sangoonni Harar erga furdisamanii booda, ji’oota sadii sadiin gabaa alaa irratti dhiyaachuun galiin sharafa alaa akka cimuuf gumaacha olaanaa taasisaa jiraachuu isaanii himaniiru. Fuuldurattis, damee kana irratti bal’inaan bobba’uun dinagdee Itoophiyaa fi galii sharafa alaa guddisuuf tattaaffii taasifamu keessatti hoggantoonni sadarkaa gara garaa, ogeeyyii fi qaamoleen dhimmi ilaallatu biroon ciminaan akka hojjetan Itti Aanaan Ministira Muummee yaadachiisaniiru.

Onkololessa 29/2019 (ENA): Dhiibbaan alaa tattaaffii misooma qabeenya bishaanii Itoophiyaa gufachiisuuf yaalu tokkummaa ummata Itoophiyaa kan mancaasu osoo hin taane, cimsee akka waliin dhaabbatu taasisa jedhan Ministirri Bishaanii fi Inarjii Injinar Habtaamuu Ittafaa (PhD). Hojiin misoomaa Itoophiyaan hojjachaa jirtu biyyoota naannichaaf bu'aa kan qabuu fi eenyuuyyuu kan hin miine ta'uu hubachiisaniiru.   Injiinar Habtaamuu Ittafana (PhD) turtii ENA waliin taasisaniin akka ibsanitti; Seenaa keessatti itti fayyadama qabeenya bishaanii Itoophiyaa ilaalchisee odeeffannoon qaamolee faallaa misooma Itoophiyaan dubbatamu dhugaarraa kan fagaatedha jedhani. Kaayyoon Itoophiyaa yeroo hunda faayidaa waloon tajaajila argachuudha malee qofaan fayyadamuu akka hin taane eeraniiru. Haa ta’u malee, Itiyoophiyaan bishaan kana fayyadamuu yoo jalqabde miidhaan nurra ga’a jedhu irratti hundaa’uun, milkaa’ina pirojektii Hidha Haaromsa Guddicha Itiyoophiyaa irratti qaamotni alaa gufuulee adda addaa uumaa akka turan yaadachiisaniiru. Haa ta’u malee dhiibbaan alaa jiraatus ummannii fi mootummaan Itiyoophiyaa hidha haaromsa guddicha Itiyoophiyaa dabalatee pirojektoota misoomaa hedduu dhugoomsuu danda’aniiru jedhan Ministirri kun.   Dhiibbaan alaa fi duulli miidiyaa dogoggoraa Itiyoophiyaan qabeenya bishaanii ishee misoomsuuf taasiftu jeequuf kaayyeffate tokkummaa Itoophiyaanotaa kan hin miinee fi daran tokkummaa kan cimsu ta’uu dubbataniiru. Ministirri kun pirojektoonni misoomaa Itiyoophiyaan hidha haaromsa guddicha Itiyoophiyaa fi dameewwan misoomaa adda addaa keessatti raawwachaa jirtu Masrii dabalatee biyyoota naannichaaf bu’aa kan qaban ta’uu fi balaa kan hin taane ta’uu ibsaniiru. Hojiin misoomaa amma hojjachaa jirru kun Itoophiyaas ta’e Masriif bu’aa kan qabu ta’uu, kanaaf yaadda’uu akka hin qabne ibsaniiru. Marii fi ololli sochii misooma biyya keenyaa gufachiisuuf taasifamaa jirus, xiyyeeffannaan Itiyoophiyaa yeroo hunda misooma waloo fi bu’aa waloo irratti akka ta’e ibsaniiru. Ministirri kun itti dabaluudhaan pirojektoota misoomaa biyyi keenya raawwachaa jirtu haala qabatamaa fi ejjennoo sirrii ta’e afaanota adda addaatiin hawaasa addunyaa biraan ga’uuf tattaaffii cimsuun barbaachisaa ta’uu ibsaniiru. #Biyya Guddoo, Ummata Guddaa # Mul'ata Guddaa

Onkololessa 29/2019 (ENA): Godina Lixa Oromiyaatti bara kana yeroo jallisii Bonaan lafa heektaara kuma 900 qamadiin misoomsuuf hojjetamaa jira. Itiyoophiyaan waggoota muraasa darbanitti misooma qamadii jallisii Bonaa akka tarsiimoo dinagdee fi wabii nyaataa mirkaneessuutti bal’inaan hojiirra oolchaa jirti.   Kanaan dura oomishni qamadii rooba uumamaa Ganna qofa irratti kan hundaa’e yoo ta’u, amma garuu babal’ina teeknooloojii fi hojmaata jallisiitiin Bonaan bal’inaan misoomsaa jira. Gama kanaan naannoon Oromiyaa wiirtuu misoomaa ijoo jalqabbii guddaa kanaa ta’uun gara fuulduraatti tarkaanfachaa jira. Keessattuu, Godina Lixa Oromiyaa keessatti argaman qabeenya bishaanii ol’aanaa, lafa bal’aa fi lalisaa, akkasumas haala qilleensaa mijataa ta’uu isaanii irraa kan ka’e naannoowwan misooma qamadii jallisii Bonaaf filatamaadha. Bona kana Godina Lixa Oromiyaa keessatti lafa heektaara kuma 900 qamadiidhaan misoomsuuf karoorfame xiyyeeffannoo guddaadhaan hojiirra oolaa jira.   Bakka bu’aan itti aanaa Waajjira Qonna Godinichaa obbo Koorsaa Waaqjiraa ENAtti akka himanitti ,Qonnaan bultoonni oomishtummaa isaanii akka guddisanii fi wabii nyaataa isaanii akka mirkaneeffataniif waan gargaaruuf faayidaan misooma jallisii Bonaa olaanaadha jedhan. Misoomni qamadii waggoota darban hojiirra oole bu’aa guddaa kan argamsiise yoo ta’u, fayyadamummaa qonnaan bulaa fi dargaggootaa mirkaneessee akka jiru eeraniiru.   Hanga ammaatti lafti heektaara kuma 300 misoomee sanyiidhaan uwwifamaa jiraachuu eeraniiru. Misooma kanaaf tiraaktaroota qonnaa dabalatee galteewwan barbaachisoo ta’an baay’ina gahaa ta’een kan dhiyaatan ta’uu ibsaniiru.   Qonnaan bulaan Alamaayyoo Waaqtolaa ENA’f yaada kennaniin akka himanitti, qamadii jallisii Bonaan fayyadamoo ta’u isaanii ibsuun, baranas oomisha fooyya’aa argachuuf akka hojjetan dubbataniiru. Baranas qonnaan bultoota naannoo isaanii waliin ta’uun lafa heektaara 12 irratti qamadii misoomsaa akka jiran himaniiru. Qonnaan bulaan biraa Balaay Hiikaa akka himanitti, dursanii lafa isaanii kilaastaraan qotuu fi galtee gahaa ta’e waan argataniif bu’aan gaariin ni eegama jedhaniiru. Itti aanaan bulchaa aanaa Guutoo Giddaa fi itti gaafatamaan Waajjira Qonnaa fi Lafaa obbo Alamaayyoo Mulaatuu gamasaaniitiin akka himanitti, bara kana lafa heektaara kuma 18 ol qamadii jallisii Bonaan misoomsuuf karoorfameera jedhani. Hojiin sanyii qamadii facaasuu yeroo ammaa bifa qindaa’een hojjetamaa akka jiru eeruun, gandoota aanichaa keessatti misooma jallisiif mijatoo ta’an babal’isuuf tattaaffiin taasifamaa jiraachuu ibsaniiru. #Mootummaa Ida’amuu #Biyya Guddoo, Ummata Guddaa # Mul'ata Guddaa

Onkoloolessa 28/2019 (ENA) - Naannoo Harariitti dandeettii oomishtummaa guddisuudhaan birmadummaa nyaataa mirkaneessuuf qindoominaan hojjetamaa jiraachuu itti aantuun pirezidaantii naannichaa Roozaa Umar ibsan. Pirezidaantiin naannoo Hararii Ordiin Badrii, naannicha aanaa Soofii ganda qileetti argamuun misooma jallisii bonee baranaa ifatti eegalchiisaniiru. Itti aantuun pirezidaantii fi hoggantuun biiroo misooma qonnaa naannichaa Roozaa Umar akkasumas hooggantoonni naannichaa biroon sagantaa eegalchiisaa kanarratti argamaniiru. Itti aantuun pirezidaantii fi hoggantuun biiroo misooma qonnaa naannichaa Roozaa Umar, misooma jallisii boneetiin barana lafti hektaara kuma 5 ol ni misooma jedhaniiru. Lafa kanarraa oomisha kuntaala miiliyoona 1 ol galchuuf qophiin taasifamuu dubbataniiru. Jallisii bonee Kanaan Qamadii dabalatee midhaan garagaraa akkasumas kuduraa fi muduraan ni misooma jedhaniiru. Itti fayyadama bishaan lafa keessaa waliin qindeessuun waggaatti al sadii misoomsuun baramaa dhufuusaas kaasaniiru.

Onkololeessa 28/2019 (ENA)- Bulchiinsa Magaalaa Adaamaatti Sagantaan jalqabsiisa gurgurtaa oomisha paappayyaa al-ergitootaa fi daldaltoota jimilaa gaggeeffameera. Saganticharratti Itti aanaan Hoogganaa Biiroo Qonna Oromiyaa Dr. Alamuu Dasaa argamuun haasaa taaaisaniin qabeenya bishaanii, lafa mijaawaa fi humna oomishu gahaa osoo qabnuu waggoota dheeraaf lafti oomisha malee ta'aa ture oomisha wabii nyaataa mirkaneessaniii fi ce'umsa dinagdee qonnaan bulaa mirkaneessan misoomsuurratti jalqabbiin hojii gaarii jiru itti fufsiisuuf kan hojjetamu ta’uu ibsaniiru.   Hojii gaarii eegalame kana qorannoofi ogummaan deeggaruun qindoominaan babal'isuurratti kan hojjetamu ta'uu ibsaniiru. Qabeenya guddaa hojii misooma qonnaatiif naannoon keenya lafa, bishaanii fi humna namaarratti qabdu qixa sirriitti hojiirra oolchuun ce'umsa dinagdee qonnaan bulaa fi horsiisee bulaa keenyaa milkeessuuf Ogeessii fi hooggansi sadarkaan jiru cimee hojjechuu akka qabu dhaamaniiru. Kantiibaan Bulchiinsa Magaalaa Adaamaa Obbo Hayiluu Jaldee badhaadhinni uumamaa fi uummata walitti araarsuun Qonnnaan bulaan keenya hojjetee hiyyummaa keessaa akka bahuuf galma qabateen badhaadhina hunda-galeessa mirkaneessuuf hojjetamaa jira jedhaniiru.   Guyyaa har'aa qonnaan bultoonni oomisha paappayyaa al-ergitootaa fi daldaltoota jimilaaf dhiheessaa jiraachuu himaniiru. Dabalataanis Bulchiinsi magaalaa Adaamaa Lafa qonnaa hektaara kuma 17 qabu tekinooloojii fi galteewwan qonnaatti gargaaramuun Qonnaan bultoonni oomishuun gabaaf dhiheessuun fayyadamoo akka ta'aniif qorannoodhaan oomishaalee misoomaniin adda baasuun hojiin jalqabame cimsuun babal'isuun hawaasni magaalaa Adaamaa nyaataan akka of-danda'uuf kan hojjetamu ta'uu ibsuuniiru. BQO irraa

Onkoloolessa 28/2019 (ENA)--Bu'uuraalee misoomaa ammayyaa adda addaa magaalaa guddittiitti ijaarame sirna geejjibaa magaalaa ammayyeessuu isaanii Biiroon Geejjibaa Magaalaa Finfinnee ibse. Mootummaan ida’amuu misooma magaalaatiif xiyyeeffannoo kennuun hojiileen misoomaa faayidaa hedduu qaban raawwatamaniiru. Keessattuu misooma koridarii fi qarqara lagaa miidhagina magaalotaa kanaan duraa jijjiiruun lammiileef jireenya mijataa, qulqulluu uumuun danda'meera. Jijjiirrama gaarii kanaaf fakkeenya guddaan magaalaa Finfinnee yoo taatu, kanaan dura lafoo deemtootaa fi hanqina paarkingii irraa kan ka'e balaan tiraafikaa mudachaa ture sadarkaa olaanaatti hambisuun danda'ameera.   Itti-aanaan hogganaa Biiroo Geejjibaa Magaalaa Finfinnee Obbo Daanyaachoo Shifarawu ENA’f akka ibsanitti, hojiileen misoomaa saffisaa fi dinqisiisoo ta’an magaalaa guddittii keessatti raawwataman magaalaan kun mijattuu fi nageenyi ishee mirkanaa'e filatamtuu ishee taasiseera jedhaniiru. Keessattuu misooma koridaraa daandiiwwan lafoo deemtootaa bal'aan ijaaramuun Miilaan shaakala deemuu gabbisuun jireenya haaraa fideera. Kunis fayyaaf, baasii akkasumas qilleensi akka hin faalamneef gumaacha ol'aanaa taasisaa jira. Kanaan dura magaalaattiitti kan hin baratamne kanneen akka saayikilii tajaajilli geejjibaa mootor-maleeyyiin amma bal'inaan eegaluu isaanii eeraniiru. Filannoowwan haaraan kun rakkina geejjibaa jiraattotaa hambisuu irra darbee geejjibaa magariisaa ijaaruuf faayidaa guddaa akka qaban dubbataniiru.   Walumaagalatti hojiileen misoomaa raawwataman filannoowwan geejjibaa magaalaatiif bal'isuun jireenya guyyaa guyyaa jiraattotaa salphaa taasisaa jira jedhaniiru. Magaalattitti kanaan dura paarkingii lama kan hin caalle turuusaa yaadachiisanii, amma garuu yeroo tokkotti konkolaattota kuma kudhaniin lakkaa'aman keessummeessuu kan danda'an paarkingiiwwan hedduu ijaaramuu isaanii ibsaniiru. Bu'uuraaleen misoomaa haaraan kun sirna geejjibaa magaalaatti ammayyaa’aa fi qabatamaa gochuu irratti jijjiirrama guddaa fidaa jiraachuu Obbo Daanyachoon dubbataniiru.  

Onkoloolessa 28/2019 (ENA) - Godina kibba lixa Oromiyaatti oomishni ruuzii kuntaala miliyoona 23 fi kuma 800 ol kan eegamu yoo ta'u, hojiin oomisha sassaabuu hojjetamaa jiraachuu Waajjirri Qonnaa Godinichaa ibseera. Itti gaafatamaan Waajjirri Qonnaa Godinichaa Obbo Tijjaanii Tamaam ENA’f akka ibsanitti, bara kana godinichatti lafti hektaarri kuma 594 fi 400 ol misooma Ruuziin facaafameera . Aanaawwan godinichatti hojiin sassaabbii oomisha ruuzii gaggeeffamaa jiraachuu kan ibsan itti gaafatamichi, qonnaan bulaaf leenjiin barbaachisaa ta'e dursuun kennamuun isaa oomishni midhaanichaa gaarii akka ta'u deeggaruusaa ibsaniiru. Hojiin oomisha ruuzii walitti qabuu kun kombayinaraan deeggaramaa waan jiruuf, qisaasama oomishaa ittisuuf akka dandeessisu ibsaniiru.   Godinichatti Aanaa Limmuu Kosaatti qonnaan bultoota ruuzii omishan keessaa Obbo Naasir Jamaal, misooma ruuzii jalqabuma irraa eegalee eeggannoo fi deeggarsa ogeeyyiitiin gaggeeffamuunsaa qisaasama kan hanbisu ta’uu ibsaniiru. oomishni isaanii haala gaariin guddatee sassaabamaa jiraachuu kan eeran qonnaan bulaan kun misooma ruuziirraa fayyadamoo ta'uu isaanii ibsaniiru. Qonnaan bulaan aanichaa biraan Obbo Tsaggaayee Seyfuu gama isaaniitiin, ruuzii karaa qindaa’aa ta'een omishuun isaanii fayyadamummaa isaanii akka guddise ibsaniiru. Bara kana oomisha guddaa eeguu isaanii eeruun, deeggarsa waajjirri qonnaa taasisaniin omishichi kookombayinarootaan walitti qabamuunsaa haala mijataa kan uumuuf ta'uu ibsaniiru.

Onkoloolessa 27/2019 (ENA)- Guddinni hatattamaa fi ammayyaa’uun magaalaa Finfinnee sadarkaa magaalaa idil addunyaa kan guutu ta’uu pirezidaantiin paartii sosochii jijjiirama demokiraatawaa Zimbaabuwee (Movement for Democratic Change) seenaatara Daagilaas Miwonzoraa ibsan. Yaa’iin paartilee siyaasaa Afriikaa lammaffaan Finfinneetti gaggeeffamaa jiru itti fufeera. Pirezidaantiin Paartii Jijjiirama Dimookiraasii Zimbaabuwee, seenaatara Daagilaas Miwonzoraa, guddinni saffisaa fi bifa ammayyaa Finfinnee sadarkaa magaalota addunyaa akka guutu ta’uu ibsaniiru. Seenaatarichi hirmaataa Walgahii Paartilee Siyaasaa Afrikaa lammaffaa ta’uun Finfinnee kan daawwatan yoo ta’u, guddina bu’uuraalee misoomaa fi jijjiirama magaalattii keessatti argan dinqisiifataniiru. Pirezidaantiin paartichaa waa’ee walgahichaa ilaalchisee yaada kennaniin, yeroo buufata xiyyaaraa ga’an irraa eegalee simannaa fi simannaan isaaniif taasifame baay’ee akka isaan dinqisiise dubbatan. Keessumaa ijaarsi bu’uuraalee misoomaa biyyattii keessatti gaggeeffamaa jiru sadarkaa ajaa’ibsiisaa irra ga’uu isaa kan ibsan bakka bu’aan kun, magaalattiin bifa magaalota biyyoota guddatan fi badhaadhanii wajjin wal madaalaa akka jirtu arguu isaanii ibsaniiru. Haala waggoota muraasa dura ture yaadachuun, jijjiiramni saffisaa yeroo gabaabaa keessatti galmaa’e baay’ee akka isaan dinqisiise, akkasumas wanti Itiyoophiyaa keessatti argan abdii fi kaka’umsa guddaa akka isaanitti uume ibsaniiru. Dabalataanis, qulqullinni ijaarsa bu’uuraalee misoomaa sadarkaa olaanaa irra ga’uu isaa olitti magaalaan Finfinnee baay’ee qulqulluu fi bareedduu ta’uun ishee xiyyeeffannoo isaanii akka hawate ibsanii, yeroo turtii isaanii keessatti baay’ee gammadaa ta’uu isaanii Seenaatarichi dubbataniiru.

Onkololeessa 27/2019( ENA)-- Godina Baha Oromiyaatti qabeenya albuudaa misoomsudhaan bu’aa dinagdee isaanii guddisuuf xiyyeeffannoon hojjetamaa jiraachuu Waajjirri Albuudaa fi Inarjii Godinichaa beeksise. Qabeenyawwan albuudaa adda addaa godinichatti argaman adda baasuun hojii misoomaa cimsanii gara oomishaatti akka galan akkasumas abbootiin qabeenyaa damee kana keessatti bal’inaan akka hirmaatan taasifamaa jiraachuun ibsameera. Ogeettiin kenninsa hayyama Albuudaa Waajjirri Albuudaa fi Inarjii Godinichaa Aadde Misraa Usoo ENA’f akka ibsanitti, qabeenya Albuudaa bal'inaan godinichatti bakkeewwan 7 keessatti argamu guutummaa guutuutti misoomsuuf tattaaffiin taasifamaa jira. Qabeenya Albuudaa bal'inaan bakka itti argamu Aanaalee Ciroo, Xuulluu, Doobbaa, Gammachiis, Daaroo Labuu, Haawwii Gudinaa, Mi’eessoo fi Gumbii Bordoddee keessatti bakkeewwan Albuudaa Iskuweer kiloomeetirii 407 ol ta'an adda baafamaniiru. Aanaalee kana keessattis abbootiin qabeenyaa 12 hayyama Albuudaa fudhatanii oomisha eegaluu isaanii dubbataniiru. Aanichatti kanneen akka dhagaa cilee, dhagaa gurraachaa fi adii, taantaalamii, baazaaltii, royyaaliitii fi kkf bal'inaan kan argaman yoo ta'u, abbootiin qabeenyaa damee kanaan bal'inaan akka hirmaatan hojjetamaa jiraachuu eeraniiru. #Biyya Guddoo, Ummata Guddaa # Mul'ata Guddaa