Onkololeessa 19/2019 (Ira) -BRICS tumsa industirii Afrikaa waliin qabdu cimsuuf hojmaattota haaraa ta’an ifoomseera. Kun kan ibsame Yaa’ii Ruusiyaa-Afriikaa 3ffaa Moskootti mata duree “Waltajjiin BRICS guddina tumsa daldalaa Ruusiyaa fi Afrikaa” jedhuun qophaa’e irrattidha. Ministirri misooma diinagdee Raashiyaa Maksim Reshetniikov, BRICS biyyoota Afrikaatiif gabaa banaa ta’uu bira darbee, teeknooloojii, oomishaalee industirii fi invastimantii dhiyeessuufis akka tajaajilaa jiru ibsaniiru. Akka ibsa ministirichaatti, sirnoota haaraa qophaa’aa jiran keessaa tokko tokkoon isaanii Gamtaa Naannolee Dinagdee Addaa fi Dhaabbata Waljijjiirraa Daldala Midhaanii (Grain Exchange) kanneen jedhaman ni argamu. Kana malees, ministiroonni industirii biyyoota miseensota BRICS, damee industirii keessatti dijitaalaayizeeshinii fi tumsa teeknooloojii guddisuuf bu’uura tumsa waliinii diriirsuuf yaada dhiyeessuu isaanii gabaasni TV BRICS ni mul’isa. Reshetniikov itti dabaluunis, BRICS yeroo ammaa tumsa isaa marii siyaasaa qofa irratti daangessuu dhiisee, gara sagantaalee bu’aa qabatamaa argamsiisanitti jijjiiruuf hojjechaa akka jiru ibsaniiru. Akkasumas, mootummoonni gufuuwwan tumsa daldalaa fi industirii gufachiisan akka kaasan gaafataniiru. Hawaasni daldalaa sirnoota haaraa kana bu’a qabeessa taasisuu keessatti gahee murteessaa akka qabuus hubachiisaniiru. Waltajjicharratti, biyyoota Afrikaa adda addaa fi Ruusiyaa gidduutti naannolee tumsa industirii uumamuun walitti dhufeenya fi hariiroo dinagdee gama lamaan cimsuuf gahee olaanaa akka qabu ibsameera. Bu’uuraalee misoomaa, geejjibaa, loojistikii, anniisaa fi nageenya saayibarii irratti pirojektoota bu’aa qabatamaa argamsiisan waliin hojjechuun barbaachisaa ta’uunis waltajjicharratti irratti mari’atameera. Biyyoonni miseensota BRICS ta’an sirna kaffaltii walaba ta’e diriirsuu, invastimantii hawwachuu fi haala mijataa uumuu fi tumsa industirii isaanii babal’isuuf hojjechaa akka jiranis ibsameera. Dabalataanis, dura taa’aan waltajjichaa fi Daayirektarri Inistiitiyuutii Qorannoo Afrikaa kan Akkaadamii Saayinsii Ruusiyaa Irina Abramova, yeroo ammaa barattoonni Afrikaa kuma 37 ol ta’an Ruusiyaa keessatti barnoota isaanii hordofaa akka jiran ibsuu isaanii odeeffannoon TV BRICS ni mul’isa.

  Onkoloolessa 19/2019 (ENA) Hariiroon Itoophiyaan Galaana Diimaa wajjin qabdu bu'aa qindoomina seenaa, dinagdee fi jii’oopolotikaati jedhan hayyoonni seenaa fi saayinsii siyaasaa Yuunivarsiitii Jimma. Walitti hidhaminsi seenaa, jii’oopolotikaa fi dinagdee Itoophiyaan Galaana Diimaa wajjin qabdu kan dhalootaa dhalootatti ce'ee fi bu’uura guddina biyyattii ta'ee tureera. Ta'us, haalawwan seenaa keessa turanii fi shira irratti raawwatameen biyyattiin hula galaanaa uumamaa qabdu ture akka dhabdu ta’eera. Yuunivarsiitii Jimmaatti barsiisaa fi qorataan maandisa qabeenya bishaananii Dr.Daawud Tamaam bara qaroomina Aksumitti Itoophiyaan karaa hulaa Adulisiin kutaa addunyaa garagaraa wajjin hariiroo daldalaa qabaachaa turuushe eeraaniiru. Faayidaan tarsiimawaan Galaana Diimaa daldala addunyaa fi nageenya naannichaa wajjin kan walqabatu waan ta'eef, Itoophiyaan daandii daldala murteessaa kana wajjin hariiroo qabdu cimsuunii fi hulaa galaanaa argachuun ishee hirmaannaa riijiniif faayidaa guddaa kan qabu ta'uu hubachiisaniiru. Galaana Diimaa waljijjiirraa daldala addunyaatiif baay’ee murteessaa ta’uu kan eeran hayyuun kun hirmaannaan biyyoonni riijinichaa humna waraanaa fi dinagdee qabaniif faayidaa tarsiimo’aa kan agarsiisudha jedhaniiru. Itoophiyaan hirmaannaa daldala addunyaa keessatti qabdu guddisuuf, dhiibbaa naannichatti qabdu cimsuufi faayidaa dinagdee ishee eegsisuuf Hulaa Galaanaa argachuun ishee barbaachisaa fi dhimma jiraachuu fi jiraachuu dhabuu ta'uusaa ibsaniiru. Yuunivarsiitii Boongaatti barsiisaa fi qorataan seenaa Salamoon Kidaanee gamasaaniin, Itoophiyaan hulaa galaanaa dhabuu isheen daldalli Al-ergee fi Alaa galuuf bu'uuraan hulaa galaanaa biyyoota biraa irratti akka hirkatu taasiseera jedhaniiru. Kunis dhimma hulaa galaanaa argachuu dhimma nageenya biyyaalessaa fi dinagdee ta’ee akka turuusaa ibsaniiru. Itoophiyaan ummata miliyoona 130 ol qabdu dhiibbaa dinagdee fi siyaasa gaanfa Afrikaa keessatti qabduun hulaa galaana argachuun ishee hariiroo daldalaa fi guddina isheetiif barbaachisaa ta'uu eeraniiru. See less

Onkoloolessa 19/2019 (ENA) - Magaalaa Shaggaritti karoora nyaataan of danda’uu milkeessuuf oomishaa fi oomishtummaa guddisuuf xiyyeeffatameera. Magaalaan Shaggar naannoo Oromiyaatti guddinni magaalaa si’ataa fi naannawoota baay’inni ummataa keessatti dabalaa jiru keessaa tokkodha. Magaalichi bakkeewwan gama tokkoon amaloota magaalaa fi gama tokkoon amaloota baadiyyaa qaban of keessatti kan qabate waan ta’eef, misooma qonnaa guddina magaalaa waliin walitti hidhuun gaggeessuun barbaachisaa ta’eera. Fedhii nyaataa ummataa fulla’insaan guutuu fi qaala’insa jireenyaa tasgabbeessuuf inisheetiivonni qonnaa garagaraa qama mul’ata nyaataan of danda’uu sadarkaa biyyaalessaa fi naannoo ta’an hojiirra oolaniiru. Guyyaa har’aas magaalaa Shaggar kutaa magaalaa Malkaa Noonnoo, hoggantoonni sadarkaa garagaraan jiranii fi qonnaan bultoonni bakka argamanitti inisheetiivonni misooma qonnaa garagaraa fi badhaadhina maatii bakka argamanitti daawwannaan oyiruu taasifameera. Kantiibaan magaalaa Shaggar Dr. Tashoomaa Addunyaa, paartii badhaadhinaatti hogganaan waajjira dame magaalaa Shaggar obbo Alamaayyoo Tulluu, akkasumas hoggantoonni magaalaa fi kutaa magaalaa daawwannaa oyiruu irratti argamaniiru. Daawwannaa Kanaan inisheetiivonni horsiisa lukkuu, misoomni kilaastaraa Garbuu fi Qamadii, horsiifni saawwan aannanii, kilaastarri Muuzii fi sanyii Garbuu filatamaa baay’isuu daawwatameera.

Onkoloolessa 19/2019(ENA) - Magaalaa Maayaatti karoora ofdanda’uu waggoota shanan dhufaniif qophaa’e bu’uura godhachuun qabeenya uumamaa sirnaan fayyadamuu fi dinagdee dameewwan garaagaraa irratti hundaa’e cimsuun badhaadhina hunda galeessa mirkaneessuuf kan hojjetamu ta’uu Kantiibaan Magaalaa Maayaa, Dr. Ifrahaa Waziir ibsan. Dr. Ifrahaan Waziir ENAtti akka himanitti, karoorri of danda’uu kun hanqinoota raawwii karoora xiiqii keessatti mul’atan furuufi ciminoota galmaa’an itti fufsiisuun badhaadhinaafi birmadummaa dinagdee biyyaa mirkaneessuu keessatti gahee olaanaa qaba. Karooricha milkeessuuf oomisha tokko irratti qofa xiyyeeffachuu osoo hin taane, hojiiwwan misoomaa dameewwan garaagaraa irratti bobba’uun barbaachisaa ta’uu ibsaniiru. Keessumaa, of danda’uun sadarkaa maatii irraa eegaluun akka qabu eeranii, maatiin hundi qabeenya, ogummaafi dandeettii qabu sirnaan fayyadamuun maddoota galii garaagaraa uumuu akka qabu hubachiisaniiru. Kanaafis, mala qonnaa ammayyeessuu, misooma qonna magaalaa keessatti hirmaachuu, ogummaa garaagaraa gabbifachuufi hojiiwwan galii maddisiisan irratti bobba’uun murteessaa ta’uu ibsaniiru. Dabalataan, carraa hojii barbaachaaf asii fi achi deemuu irraa gara carraa hojii ofii uumuu fi namoota biroof uumuutti ce’uun karoora of danda’uu milkeessuu keessatti gahee olaanaa akka qabu dubbataniiru. Ogummaa gabbifachuun industiriiwwan xixiqqaa hundeessuufi humna waloo ijaaruun sadarkaa maatii, ganda, aanaa, kutaa magaalaafi magaalaatti of danda’uu mirkaneessuuf hojjechuun barbaachisaa ta’uus eeraniiru. Akka Dr. Ifrahaan ibsanitti, Magaalaan Maayaa karoora kana milkeessuuf haaldureewwan mijatoo qabdi. Isaan keessaa uummata bal’aa misoomaaf qophaa’ee fi ofitti amanamummaa qabu, akkasumas caasaalee mootummaa qormaataafi rakkoolee garaagaraa keessa darbanii milkaa’ina galmeessisuu danda’an qabaachuun kanneen ijoodha. Kana malees, muuxannoon gaariin karoora xiiqii waggoota lamaan darban keessatti hojiirra oolchuun argame, karoora of danda’uu kana milkeessuuf bu’uura cimaa ta’uu ibsaniiru. Haa ta’u malee, hanqinoota adeemsa raawwii keessatti mudachuu danda’an dursanii adda baasuun furmaata itti kennuun barbaachisaa ta’uu hubachiisaniiru. Karoora of danda’uu kana keessatti galii dabaluun, dargaggootaaf carraa hojii bal’aa uumuun, akkasumas qabeenya uumamaafi carraawwan misoomaa Magaalaan Maayaa qabdu guutummaatti fayyadamuun xiyyeeffannoo olaanaa kan argatan ta’uu himaniiru. Keessumaa, oomishaafi oomishtummaa guddisuun, oomishaalee naannawaatti argamanitti fayyadamuufi dinagdee dameewwan garaagaraa irratti hundaa’e cimsuun hojiiwwan xiyyeeffannoon irratti hojjetaman ta’uu ibsaniiru. Karoorri of danda’uu kun sadarkaa waraqaa irratti qofa kan hafu osoo hin taane, gara hojii qabatamaatti jijjiiramuun badhaadhinaafi birmadummaa dinagdee biyyaa mirkaneessuuf kutannoon kan hojjetamu ta’uu eeraniiru. Kanaafis karooricha milkeessuuf hawaasa Magaalaa Maayaa fi qooda fudhattoota hunda bira ga’uun hubannoo walfakkaataa uumuufi hirmaannaa hawaasaa cimsuuf xiyyeeffannoon kan hojjetamu ta’uu Kantiibaan Magaalaa Maayaa, Dr. Ifrahaa Waziir ibsaniiru.

Onkoloolessa 18/2019 (ENA)- Pirojektii misooma maneen miiliyoona 1 tuqaa 5 qaama labsii Gubaa ta’e milkeessuuf sadarkaa danda’amurra gahamuusaa ministirri magaalaa fi bu’ura misoomaa Injiinar Mahaammad Abdurahmaan ibsan. Ministirri muummee Dr. Abiyyi Ahimad Qaam’ee 4 bara 2017 hidhi haaromsaa Itiyoophiyaa eebbifamuusaa erga ifoomsanii booda, waggoottan muraasa itti aananitti pirojektoota gurguddoo doolaara biiliyoona 30’n ijaaraman ifoomsaniiru. Pirojektoonni Gubaarratti ifooman Itiyoophiyaa cabiinsa dinagdee keessaa baasuun gara badhaadhina hunda galeessaatti kan ceesisanidha. Pirojektoonni kun madda nuukilaaraa, warshaa Xaa’oo, buufata Xiyyaaraa idil addunyaa Bishooftuu, bakka gaaziin uumamaa itti oomishamu, calaltuu boba’aa fi misooma manneeniiti. Ministirri magaalaa fi bu’ura misoomaa injinar Mahaammad Abdurahmaan ENA’tti akka himanitti, mootummaan ida’amuu waggoottam muraasa dura hojiileen misooma magaalotaa fi ijaara maneen jireenyaatiin hojjete fayyadama walii galaa lammiilee kan mirkaneessanidha. Keessumaa Teeknooloojii fi tooftaaleen hojmaataa haaraan ijaarsa manneenii irratti hojiirra oolan qama labsii Gubaa kan ta’e pirojektiin misooma manneenii miiliyoona 1 tuqaa 5 muuxannoon guddaan kan irraa argame ta’uu ibsaniiru. Pirojekticha dhugoomsuuf gama faayinaansii, humna namaa, teeknooloojii fi hojiilee qophii bal’aa kana fakkaatan hojjetamuusaanii eeraniiru. Mootummaan ida’amuu fedhii dhiheessii manaa guutuuf hojiileen bu’a qabeessi hojjete keessaa hojiileen dame dhuunfaa waliin hojjetaman qooda guddaa akka qaban dabalanii ibsaniiru.

Onkoloolessa 18/2018(ENA)-Tooftaawwan oomishtummaa qonnaa Itoophiyaa birmadummaa nyaataa mirkaneessuuf bu'aalee olaanoo galmeessisaa jiraachuu de’eetaan Ministira Tarsiimoo Biyyaalessaa Abbaas Mahaammad ibsan. Yaa'iin Imaammata Qonnaa Ardii Afrikaa, Inistiitiyuutii Qorannoo Imaammataa Itiyoophiyaa fi Inistiitiyuutii Qorannoo Imaammata Nyaataa fi Qonnaa Afrikaa waliin ta’uun qophaa'e Finfinneetti gaggeeffamuu eegaleera. Yaa'iin waggaa 13ffaan qooda fudhattoota ardii Afrikaa kun guyyaa har'aa dabalatee guyyoota sadiif kan turu yoo ta'u, mata duree “Dinagdee Nyaataa fi Qonnaa Dorgomaa Ijaaruu: Daandiiwwan Misooma Imaammataa, Daldalaa fi Industirii Afrikaa” jedhuun gaggeeffamaa jira. Deetaan Ministara Tarsiimoo Biyyaalessaa, Abbaas Mahaammad, yaa'icharratti akka ibsanitti, misoomni qamadii jallisii bonaa Itiyoophiyaa fedhii fayyadama biyya keessaa guutuun, biyyattii qamadii alaa galchuu irraa gara of danda'uutti ceesisuu danda'eera. Sagantaan Maaddii Guutuu oomishtummaa aannanii, lukkuu, damma, qurxummii, kuduraalee fi muduraalee guddisuun wabii nyaataa lammiilee mirkaneessuuf dandeettii guddaa uumuu ibsaniiru. Duulli Sagantaa Ashaaraa Magariisaas eegumsa biyyee fi bishaanii cimsuun oomishtummaa qonnaa waaraa mirkaneessuuf gumaacha olaanaa taasisaa jiraachuu himaniiru. Tattaaffiin Itiyoophiyaan oomishtummaa qonnaa gama maraan guddisuuf taasisaa jirtu, Afrikaa qabeenyaa fi dandeettii qonnaa bal'aa qabdu gara oomishtummaa dorgomaa ta'etti jijjiiruun birmadummaa nyaataa ardichaa mirkaneessuun akka danda'amu kan agarsiisu ta'uu ibsaniiru. Gara fuulduraattis, oomishtummaa qonnaa Afrikaa fooyyessuun sirna walitti hidhamiinsa gatii oomisha industirii jijjiirama qilleensaa dandamachuu danda'u diriirsuun barbaachisaa ta'uu hubachiisaniiru. Gama biraatiin, Daarektarri Olaanaan Inistiitiyuutii Qorannoo Imaammataa Itiyoophiyaa, Fiqaaduu Tsaggaa, fooyya'iinsi imaammata qonnaa Itoophiyaa damee qonnaa gara sirna ammayyaa fi gabaan hoogganamutti ceesisuu ibsaniiru. Keessumaa, maashinoota qonnaa gibira irraa bilisa ta'anii galchuu, gabaa dijitaalaa babal'isuu, misooma jallisii fi fooyya'iinsa sirna gabaa irratti hojiiwwan hojjetaman industiriiwwan oomisha qonnaa qindeessanii galtee itti dabalan guddisuu fi dargaggootaaf carraa hojii uumuuf gumaacha gaarii taasisaa jiraachuu himaniiru. Biyyoonni Afrikaas tarsiimoowwan oomishtummaa qonnaa Itiyoophiyaa irraa muuxannoo fudhachuun, sirna guddinaa fi badhaadhina waloo mirkaneessu hordofuu akka qaban ibsniiru. Walitti Qabaan Boordii Inistiitiyuutii Qorannoo Imaammata Nyaataa fi Qonnaa Afrikaa, Piroofeesar Andiruu Teemuu, gama isaanitiin, imaammattoonni qonnaa Afrikaa haala qabatamaa ardichaa irratti hundaa'uu akka qaban eeraniiru. Sagantaan Misooma Qonnaa Afrikaa Waliigalaa fi waliigalteen Naannoo Daldala Walabaa Ardii Afrikaa (AfCFTA) guddina ardichaa saffisiisuuf bu'uuraalee ifa ta'an ta'uu himaniiru. Daarektarri Olaanaan Inistiitiyuutii Qorannoo Imaammata Nyaataa fi Qonnaa Afrikaa, Dr Antoonii Chaapoottoo , sirna qonnaa fooyyessuuf qindoominni qooda fudhattoota damee qonnaa murteessaa ta'uu ibsaniiru. Yaa'iin qooda fudhattootaa kun bu'aalee qorannoo fi yaadota furmaataa oomishtummaa qonnaa Afrikaa guddisuu danda'an waljijjiiruun, tarkaanfiiwwan imaammataa qabatamoo fudhachuuf carraa kan uumu ta'uu himaniiru.

Onkoloolessa 18/2019 (ENA)- Naannoo Oromiyaa bulchiinsa magaalaa Adaamaatti lafa hektaara kuma 24 fi 900 rooba gannaan misoome rooba yeroo malee jalaa baasuuf midhaan dhibbantaa 90 duulaan walitti qabamuu waajjirri qonnaa bulchiinsichaa beeksise. Itti gaafatamaan waajjirichaa obbo Alamuu Qilxuu har’a ENA’f akka ibsanitti, bara oomishaa 2018/19 bulchiinsa magaalichaatti lafa hektaara kuma 24 fi 900 irra sanyiin garagaraan facaafameera. Midhaan kana rooba yeroo malee jalaa baasuuf qindoominaan hojjetamaa jiraachuu ibsaniiru. Duula Kanaan kombaayinaroota 15 dabalatee barattootaa fi qaamolee nageenyaa akkasumas tola ooltota hirmaachisuun midhaan dhibbantoaa 90 walitti qabamuu dubbataniiru. Qonnaan bultoonni gareewwan misoomaa fi gurmaa’insatti gargaaramuun daboodhaan walitti qabachaa akka jiran himaniiru. Kan osoo walitti hin qabamiin hafe kutaalee hawaasaa garagaraa hirmaachisuun amma torban dhufuutti xumuruuf hojjetamaa akka jiru beeksisaniiru. Boqqoolloo, Qamadii, Xaafii fi midhaan biroo qisaasama irraa oolchuuf maashinaroota xixiqqaa fi kombaayinaroonni gahaan hojiirra oolfamuu ibsaniiru.

Onkololessa 18/2019 (ENA): Gaaffiin mirga abbummaa hulaa galaanaa Itoophiyaa guddina waloofi nageenya naannichaaf murteessaa waan ta’eef biyyoonni olla naannichaa mariif wal hubannaaf taa’uu qabu jedhan Ministirri mummee duraanii Hayilamaariyaam Dassaalanyi. Itoophiyaa fi Galaanni Diimaan adda bahanii jiraachuu hin danda’ani; galaanni Diimaan bu’uura jiraachuu lammiilee Itoophiyaati. Galaanni Diimaan qabeenya uumamaa Itoophiyaa, bu’uura daldalaa fi qaroomina akka ta’es seenaan, teessuma lafaa, aadaa fi seerri ni mirkaneessa. Ministirri Muummee Itiyoophiyaa duraanii Haayilamaariyaam Dassaalany ENAtti akka himanitti,Itoophiyaan biyya galaanaan hin marfamne, bal'ina lafaa bal'aa, baay'ina ummataa miliyoona 130 fi guddina dinagdee ariifataa qabdudha jedhani. Itoophiyaan galaana irraa km 60 fagaattee argamtus, karri galaanaa itti cufamuun sirrii akka hin taane dubbatan. Shirri Itoophiyaa hulaa gala irraa fageessuu akka lakkoofsa Awurooppaatti bara 1880moota keessa yeroo Awurooppaanonni Afrikaa weeraruuf qabatan akka ta’e yaadachiisuun, gaaffiin hulaa galaanaa Itoophiyaa yoo deebii sirrii hin arganne dhalootaa dhalootatti darbuun isaa waan hin oolledha jedhan. Gaaffiin hulaa galaanaa Itoophiyaa sirrii ta’uu ibsuun Hayilamariyaam Dassaalayni, akkaataa ittiin deebii sirrii argannu irratti qaamni hunduu tumsuu qaba jedhaniiru. Biyyoonni ollaas gaaffiin abbummaa hulaa galaanaa Itoophiyaa waliin guddachuu, nagaa fi tasgabbii eegsisuu, waan fooyya’aa dhaloota dhufuuf dabarsuu fi tasgabbiidhaan fi mariin taa’uu akka ta’e hubataniiru. #Mootummaa Ida’amuu #Biyya Guddoo, Ummata Guddaa # Mul'ata Guddaa Miseensa Maatii Miidiyaa Dijiitaalaa ENA ta’aa https://www.ena.et/web/links

Onkololessa 18/2019(ENA): Ruuziin dinagdee ittiin fooyyeffachuu qofa osoo hin taane, oomisha birmadummaa biyya keenyaa kabachiisedha jedhan qonnaan bultoonni Godina Lixa Oromiyaa. Qonnaan bultoonni Godina Lixa Oromiyaa Aanaa Hawaa Galaan Ruuzii alaa galu biyya keessatti oomishuun, wabii nyaataa mirkaneeffachaa jirra jedhan. Qonnaan bultootni kunniin Inisheetiivii Ruuzii kilaastaraan oomishaa jiran irraa fayyadamoo ta'aa jiraachuus himaniiru. ‎ Karoora Mootummaan oomisha alaa galan hambisuun biyya keessatti oomishuuf qabatee jiru milkeessuuf kilaastaraan Ruuzii misoomsuun fayyadamoo ta’uus dubbataniiru. Kanaanis aadaan qusannaa keenya gabbisuun diinagdeen keenya utubamaa waan jiruuf hojii oomisha ruuzii kana kan baroota darbaniirra dachaan dabaluun bal’ifnee hojjechaa jirras jedhan. Aanaa Hawaa Galaanitti bara kana Ruuzii lafa hektaara Kuma 16 ol irratti misoome irraa callaa kuntaala Kuma 74 ol argachuuf hojjetamaa jiraachuu, Bulchaa Itti Aanaafi Itti Gaafatamaan Waajjira Qonnaafi lafaa Aanichaa obbo Taarikuu Ittafaa himaniiru. Ruuziin misoomaa jiru kunis rooba yeroo maleetiin akka hin qisaasamneef qonnaan bultoonni waqtii isaa eeganii sassaabbachuu akka qabanis dhaamaniiru. #Mootummaa Ida’amuu #Biyya Guddoo, Ummata Guddaa # Mul'ata Guddaa Miseensa Maatii Miidiyaa Dijiitaalaa ENA ta’aa https://www.ena.et/web/links

Naannoo Tigraayitti daldalaa jajjabeessuu fi gabaa tasgabbeessuuf hojjetamaa jira Onkololeessa 17/2019 (ENA)-Naannoo Tigraayitti daldala jajjabeessuu fi gabaa tasgabbeessuuf hojjetamaa jiraachuu itti gaafatamaan olaanaa dhimma dinagdee fi deebisanii ijaaruu yeroo Ce’umsaa mootummaa federaalaa naannichaa Dr. Tewodiroos Aragaay ibsan. Naannichatti nageenyi akka mirkanaa’uu fi hojiiwwan deebisanii ijaaruu akka ciman mootummaan federaalaa xiyyeeffannoon hojjechaa jiraachuus ibsaniiru. Itti gaafatamaan olaanaa dhimma dinagdee fi deebisanii ijaaruu bulchiinsa yeroo ce’umsaa mootummaa federaalaa naannoo Tigraay Dr. Tewodiroos Aragaay har’a ENA’f akka ibsanitti, bulchiinsi yeroo ce’umsaa naannichatti erga hundeeffamee kaasee caasaalee hawaasummaa, dinagdee fi daldalaa miidhaman deebisanii ijaaruu fi rakkoolee uumaman furuuf ummanni jireenya isaa idilee akka itti fufuuf carraaqqiin guddaan taasifamaa jira. Sababa garee seeraan alaa ABUT’n dhaabbileen tajaajila idilee kennanii fi bu’uraaleen misoomaa yeroo dheeraaf addaan citanii turan gara hojii idileetti deebi’uu Dr. Tewodiroos ibsaniiru. Caasaalee mootummaa garee seeraan alaa ABUT’n diigaman deebisanii dhaabuu fi tajaajila ummataa itti fufsiisuuf qindeessitoota yeroo ramaduun cimee itti fufuu ibsaniiru. Naannichatti sochiin gabaa akka jabaatuu fi dhiyeessiin nyaataa fi meeshaaleen nyaataan walqabatan akka guutamuuf bulchiinsi yeroo ce’umsaa hawaasa daldalaa waliin ta’uun hojjechaa jiraachuu eeraniiru. Kanaanis hanqinni dhiyeessii jiru suuta suutaan furamaa jiraachuu ibsaniiru. Yeroo ammaa kana waltajjiiwwan hubannoo uummataa cimanii itti fufuu Dr.Tewodiroos ibsanii, fedhii fi gaaffieen ummataa waltajjiiwwanirratti kaafaman bu’ureffachuun deebiin kennamaa akka jiru ibsaniiru. Dhiyeessii meeshaalee barbaachisoo guutuu, sochii daldalaa jajjabeessuu fi gabaa tasgabbeessuuf abbootii qabeenyaa, baankotaa fi qaamolee dhimmi ilaallatu biroo waliin ta’uun hojiiwwan bu’a qabeessa ta’an hojjetamuu isaanii ibsaniiru. Yeroo ammaa kana meeshaaleen nyaataa fi oomishaaleen nyaataan walqabatan gara naannichaa galamaa jiraachuus eeraniiru. Bulchiinsa magaalaa Maqaleetti adeemsi baruu fi barsiisuu jalqabame naannichatti iddoowwan hundatti akka jalqabamuuf qophiin barbaachisaan taasifamaa jiraachuus Dr. Tewodiroos ibsaniiru. Naannoo Tigraayitti nageenyi akka cimuu fi hojiiwwan deebisanii ijaaruu akka jabaatan mootummaan federaalaa xiyyeeffannoo addaa kennee hojjechaa jiraachuu hubachiisaniiru.

Onkoloolessa 17/2019(ENA)-Godina Baha Oromiyaa Aanaa Daaroo Labuutti Oomisha Buna qulqullinaan dhiheessuun bu'aa gaariin irraa argachaa jirra jedhan qonnaan bultoonni buna oomishan. Aanichi Oomisha Bunaan bara dheeraa kan beekamu ta'us sababa rakkoo hanqina qulqullinaatiin faayidaa argachuu malan akka hin arganne dubbataniiru. Yeroo ammaa sanyii filatamaa Bunaa babal'isuun oomisha dabaluu fi qulqullina isaaf ammoo ulaagaa kaa'ame guutuun gabaaf dhiheessanii galiin argatan dabalaa jiraachuu qonnaan bultoonni aanichaa ibsaniiru. Qonnaan bultoonni kunneen yeroo ammaa galii dhuunfaa isaanii fooyyessuun sharafa alaas argamsiisuun dinagdee biyyaaf tumsaa jiraachuu dubbataniiru. Bulchaa Itti Aanaa fi Itti Gaafatamaan waajjira Qonnaa fi Lafaa Aanaa Daaroo Labuu Dr. Najjaash Abdallaa Buna sanyii filatamaa Jiddu gala Qorannoo Qonna Machaaraan mirkanaa’e babal’isuun oomishitummaa isaa gandoota aanichaa 32 keessatti dabaluuf hojjechaa jirra jedhan. Qulqullina Bunaaf immoo xiyyeeffannoon addaa kennamee hojjetamaa jiraachuu himaniiru. Bara kana Buna toonii kuma 3 gabaa jidduu galeessaaf dhiyeessuuf hojjechaa jiraachuu himaniiru.

Onkololessa 17/2019 (ENA): Mootummaan Ityoophiyaa wabii nyaataa mirkaneessuufi wabii nyaataa mirkaneessuuf carraaqqiin taasisaa jiru kan galateeffamu ta’uu Itiyoophiyaatti Daarektarri Sagantaa Nyaata Addunyaa Zilaataan Milisiik ibsaniiru. Afrikaa keessatti biyya omishtuu qamadii olaanaa taate Itoophiyaan, wabii nyaataa fi birmadummaa damee qonnaa mirkaneessuuf tattaaffii gooteen bu’aa qabatamaa galmeessitee jirti.   Keessattuu hojii irra oolmaan misooma qamadii jallisii Bonaa, Sagantaa maaddii guutuun, fi qonna haaraa gara oomishtummaatti jijjiiruun hanqina nyaataa kanaan dura ture salphisuuf gargaareera. Tooftaaleen misoomaa hunda galeessa ta’an kunneen biyyattiin nyaataan of danda’uu bira darbee fedhii namoota biyyoota biroo guutuuf tattaaffii taasiftu bu’uura cimaa kaa’aniiru. Kanarraa kan ka’e Itiyoophiyaan birmadummaa nyaataa ishee bu’a qabeessa ta’een mirkaneessaa akka jirtu hojiin jajjabeessaan damee kanarratti galmaa’e ragaadha. Daarektarri Sagantaa Nyaata Addunyaa Itiyoophiyaa Zilaataan Milisik, Itiyoophiyaan damee qonnaatiin guddina olaanaa fi dinqisiisaa agarsiisaa jirti jedhan. Mootummaan teeknooloojii, bu’uuraalee misoomaa, bulchiinsa bishaanii, fi dameewwan ijoo guddina qonnaa deeggaran irratti invastimantii guddaa akka taasise hubachiisaniiru. Fayyadama sanyii omisha olaanaa fi lafa kanaan dura hin misoomne gara lafa oomishaatti jijjiiruun jijjiiramni guddaan galmaa’uu isaa hubachiisaniiru. Jallisii, sirna bulchiinsa bishaanii fi bulchiinsa lolaa misoomsuuf tattaaffiin taasifamuus hubachiisaniiru. Itti fayyadamni teeknooloojii qonnaa biyyattiin oomishaalee baay’ee oomishuuf, oomishtummaa akka dabalu taasisuus hubachiisaniiru. Itoophiyaatti omishni waggoota kurnan duraa waliin wal bira qabamee yoo ilaalamu dachaa kudhaniin akka dabale, oomishaaleen hedduun oomishamaa akka jiran hubachiisaniiru. Dhiyeessiin nyaataa biyyattii yeroo ammaa dabalaa akka jiru eeruun, galteen alaa hir’achaa akka jiru himuun, dandeettiin al-ergii dabalaa akka jirus hubachiisaniiru. Bu’aan gaariin damee qonnaa keessatti galmaa’aa jiru kun invastimantii deeggaruun damichi gahumsa akka qabaatu kan agarsiisu ta’uu ibsaniiru. Dandeettii dandamachuu hawaasaa guddisuu, hammatama faayinaansii mirkaneessuu, qonnaan bultoota gabaa waliin wal qunnamsiisuuf tattaaffiin taasifamu cimee itti fufuus ibsaniiru. #Mootummaa Ida’amuu #Biyya Guddoo, Ummata Guddaa # Mul'ata Guddaa Miseensa Maatii Miidiyaa Dijiitaalaa ENA ta’aa https://www.ena.et/web/links

Onkololessa 17/2019 (ENA): Midhaan gahe rooba hin malleef saaxilamuun akka hin qisaasofneef karaa makaanaayizeeshinii fi humna namaan walitti qabamaa jiraachuu Waajjirri Godina Giddugaleessa Oromiyaa beeksise.   Hogganaan Waajjira Qonnaa Godina Giddugaleessa Oromiyaa obbo Masfin Tashoomaa ENAtti akka himanitti, midhaan yeroo omisha Gannaa keessatti misoomsame walitti qabuun rooba waqtii hin malleef saaxilamuun akka hin miidhamneef tattaaffiin taasifamaa jira jedhani. Bara omisha 2018/19tti qamadii, garbuu biiraa, xaafii, ruuzii, boloqqee fi midhaan dheedhii biroo godinicha keessatti omishaman keessaa isaan ijoo ta’uu himaniiru. Qonnaan bultoonni godinichaa midhaan gahe dafanii sassaabuun barbaachisaa ta’uu gorsaniiru. Godina Giddugaleessa Oromiyaatti lafa heektaara miiliyoona 2.8 yeroo omisha Gannaa misoome irraa callaan kuntaala miiliyoona 130 ol ni eegama jedhan. #Mootummaa Ida’amuu #Biyya Guddoo, Ummata Guddaa # Mul'ata Guddaa Miseensa Maatii Miidiyaa Dijiitaalaa ENA ta’aa https://www.ena.et/web/links

Onkololessa 17/2019(ENA) : Waajjirri Qonnaa Godina Giddugaleessa Oromiyaa Bona baranaa kana lafa heektaara miiliyoona 1.1 ol qamadii jallisiin misoomsuuf karoorfachuu isaa beeksiseera.   Itti Gaafatamaan Waajjira Qonnaa Godina Giddugaleessa Oromiyaa obbo Masfin Tashoomaa ENAtti akka himanitti godinichatti qamadii jallisiin misoomuumsuuf karoora bal’aa qabatanii hojii qabatamaatti seenuu ibsaniiru. Bona kana qamadii jallisii heektaara miiliyoona 1.1 misoomsuuf karoorfachuu isaanii ibsaniiru. Karoora kana galmaan ga’uuf tattaaffii qindoominaan taasisaa jirra jedhaniiru.   Qabeenya bishaan lafarraa fi lafa jalaa godinicha keessa jirutti fayyadamuudhaan qamadii jallisiin misoomsuun lafa bal’aa uwwisuuf kaayyoo qabatanii hojiitti seenuu isaanii ibsaniiru. Laga Awaash dabalatee boolla gadi fagootti fayyadamnee qamadii jallisii Bonaa misoomsuuf hojjechaa jirra jedhani. Haaluma kanaan jenereetaroota bishaan harkisan kumaatamaan lakkaa’aman qonnaan bultootaaf akka dhiyaatan taasifameera jedhan. Itti dabaluunis, jenereetaroota bishaan harkisan haaraan qonnaan bultootaaf, keessattuu kanneen kanaan dura harka isaanii keessa turan dabalatee kan biraas dhiyeessuuniif taasisuun misooma kana haala qindoomina qabuun raawwachuuf qophiin duraa xumuramee hojiitti hiikameera jedhan. Galteewwan oomishaa fi oomishtummaa guddisan keessumattuu xaa’oo biyyee dhiyeessuuf qophiin taasifamuu eeruun, sanyiiwwan filatamaa fi xaa’oo uumamaa baay’ina gahaa ta’een dhiyeessuun kan itti fufu ta’uu himuun, xaa’oon biyyee yeroo ammaa qonnaan bultootaaf hamma isaan barbaachisuun kennamaa akka jiru dubbataniiru. Hoggantoonni godinaa sadarkaa sadarkaan jiran; itti gaafatamtoota kutaalee hojii; ogeessonnii fi hojjettoonni buufata misoomaa deggersaa fi hordoffii guyyaa guyyaa kennuu irratti ciminaan hojjechaa jiru jedhani. Yeroo ammaa kana aanaalee Booraa fi Dugdaa akkasumas Godinicha keessatti hojiin qamadii Bonaa jallisiin oomishuu eegaleera jedhani obbo Masfin. #Mootummaa Ida’amuu #Biyya Guddoo, Ummata Guddaa # Mul'ata Guddaa Miseensa Maatii Miidiyaa Dijiitaalaa ENA ta’aa https://www.ena.et/web/links

Onkololeessa 17/2019 (ENA): Waajjirri Lafaa Magaalaa Amboo rakkinaa fi baasii dhabamsiisuudhaan tajaajila saffisaa akka argannu nu taasiseera jedhan fayyadamtoonni magaalattii. Fayyadamtoonni ENA waliin turtii taasisan akka himanitti, waajjirri lafa magaalattii dijiitaala ta’uu isaa dura, duraan dhimma tokkoof torban lamaa ol eegaa akka turan eeruun, amma garuu tajaajila saffisaa fi bu’a qabeessa ta’e argachaa jiraachuu dubbatani.   Jiraataan Magaalaa Amboo obbo Xibabee Yimaanee akka himanitti, dhimma kaadastara mana jireenyaa xumuruuf gara waajjiraatti akka dhufan kan dubbatan yoo ta’u, dur dhimma isaanii xumurachuuf torban lamaa hanga sadii akka fudhatu eeranii, wayita ammaa garuu daqiiqaa kudhanii hanga digdamaa keessatti tajaajila saffisaa akka argatan himaniiru.   Fayyadamaan biraa obbo Biraanuu Tasfaayee gama isaaniin kaartaa lafaa ammayyaa fudhachuuf kan dhufan yoo ta’uu himuun, kanaan dura sirni kaadastaraa waajjirichatti hojjetamaa ture rakkoo hamaaf kan isaan saaxile ta’uu eeruun, amma garuu haala gaariinii fi yeroo gabaabaa keessatti dhimma isaanii xumurachuu dubbataniiru.   Aadde Wayinisheet Atoomsaas gama isaaniin kabajaa fi tajaajila gahumsa qabu waajjirichi kennuu isaatti kan gammadan ta’uu himaniiru.   Waajjira magaalaa Ambootti ogeessi galmee kaadaastaraa obbo Malkaa Araggaa akka jedhanitti, kanaan dura haalli ture malaanmaltummaafi hojmaata badaaf kan saaxilaa ture ta’uu eeruun, wayita ammaa garuu erga kadaastarri lafaa eegalee rakkoolee kanneen furuun lammiileen tajaajila gahumsa qabu yeroo gabaabaa keessatti akka argatan haala mijeesseera jedha. Gandoota jahan Magaalaa Amboo jala jiraniif tajaajilli kaadastaraa kennamaa jiraachuu eeruun, hanga ammaatti hojii deeggarsa teeknooloojiin bifa qindaa’een hojjetameen lammiileen kuma 11 ol ta’an kaadaastara ammayyaatiin galmaa’anii kaartaa fudhachuu isaanii ibsaniiru. Akka karoora bara 2019tti jiraattota magaalaa 2,500 ta’aniif kaartaa dijitaalaa kennuuf karoorfamee kan ture yoo ta’u, ji’oota sadan darban qofa keessa jiraattota magaalaa 700 ta’aniif kaartaa lafaa dijiitaalaa kennameefii jira jedhani. #Mootummaa Ida’amuu #Biyya Guddoo, Ummata Guddaa # Mul'ata Guddaa Miseensa Maatii Miidiyaa Dijiitaalaa ENA ta’aa https://www.ena.et/web/links

Onkololessa 17/2019 (ENA): Daandiin Qilleensaa Itiyoophiyaa balalii haaraa gara biyya Mozaambiik magaalaa Nakalaatti eegaluu beeksise. Balaliin haaraan har’a eegalame kun Maaputoo fi Beeyiraatti aanee bakka gahumsa sadaffaa ta’uu ibsameera. Sagantaa jalqabsiisaa kana irratti keessummoonni affeeraman Ministeera Dhimma Alaatti Daayreektarri Olaanaa Dhimmoota Afrikaa jeneraal Ambaasaaddar Zarihuun Abbabee fi Itiyoophiyaatti Ambaasaaddar Moozaambiik Ambaasaaddar Nuunoo Toomaas argamaniiru. Ministeera Dhimma Alaatti Daayreektarri Olaanaa Dhimmoota Afrikaa Ambaasaaddar Zarihuun Abbabaa ergaa dabarsaniin, Itiyoophiyaa fi Mozaambiik walitti dhufeenya miira Paan Afriikaa irraa madde qabu jedhani. Balaliin Daandii Qilleensa Ityoophiyaa gara Mozaambiik magaalaa Nakalaatti eegaluun hariiroo biyyoota lamaanii sadarkaa haaraatti kan ceesisu ta’uu ibsaniiru. Hoggantoonni biyyoota lamaanii fooramii Xaanaa cinatti dhimmoota waloo irratti mari’achuu isaanii yaadachiisuun, kunis daangaa tumsa biyyoota lamaanii babal’isuuf bu’uura kan kaa’e ta’uu ibsaniiru. Itiyoophiyaatti Ambaasaaddarri Moozaambiik Nuunoo Toomaas akka himanitti, jalqabsiisni balalii kun turizimii, daldalaa fi invastimantii guddisuu keessatti gahee olaanaa qaba jedhani. Duudhaalee aadaa fi qabeenya keenya addunyaa waliin wal barsiisuuf carraa gaarii uumas jedhaniiru. Kana malees jalqabsiisni balalii kun walitti dhufeenya ummataa Itiyoophiyaa fi Moozaambiik cimsuuf gahee olaanaa qaba jedhan. Itti Gaafatamaan Olaanaa Garee Daandii Qilleensaa Itiyoophiyaa Rattaa Malaakuu gama isaaniin balaliin kun Mozaambiik keessatti bakka gahumsaa sadaffaa ta’uu ibsaniiru. Daandiin xiyyaaraa kun biyyoota Afrikaa walitti hidhuun daldala, invastimantii fi turizimii guddisuuf hojjechaa jiraachuu hubachiisuun, balaliin har'aa eegaluun qaama galma ardii kanaa ta'uu ibsaniiru. #Mootummaa Ida’amuu #Biyya Guddoo, Ummata Guddaa # Mul'ata Guddaa Miseensa Maatii Miidiyaa Dijiitaalaa ENA ta’aa https://www.ena.et/web/links  

Onkoloolessa 16/2019(ENA)-Inisheetiivii misooma ‘Kashew’tiin hanga ammaatti biqiltuun kuma 186 lafa hektaara 780 irratti dhaabbachuun misoomaa jiraachuun ibsame. Biiroon Qonnaa Oromiyaa itti gaafatamummaa Mootummaa fi ummataan itti kenname bahachuuf galmoota oomishaalee qonnaa wabii nyaataa mirkaneessan baayyinaa fi qulqullinaan oomishuun oomishaalee qonnaa alaa galan bakka buusuun sharafa alaa oolchaa jira. oomishaalee Qonnaa al-ergee bayyinaa fi qulqullinaan misoomsuun galii sharafa alaa guddisuu fi hojiiwwan qonnaa keessatti carraa hojii bal’aa dargaggootaa fi dubartootaaf uumuuf qabame milkeessuuf inisheetiiviiwwan qonnaa 33 hojiirra oolchuun guddina dingdee biyyaa fi qonnaa/Horsiisee bulaaf gumaacha olaanaa taasisuutti jira. Kanneen keessaa inisheetiiviin misooma ‘Kashew’ isa tokko yoo ta’u oomishinni kun oomisha iji isaa tajaajila nyaataaf, dhugaatiif, dibataaf oolu yoo ta’u, qabiyyee pirootiinii, cooma fayya qabeessa, Vaayitaaminii fi Albuudota qaama namaaf baayyee barbaachisoo ta’e of-keessaa qaba. Dabalataanis, gabaa addunyaarratti oomisha baayyee barbaadamaa ta’e, galtee industirii ta’uun zayitaa fi dibata adda addaaf kan oolu yoo ta’u biyyoonni kanneen akka Ayivorii Koosti, Hindi, Veetinaam, Indoonezhiyaa, Filiippiinsi fi Naayijeeriyaan gabaa addunyaaf dhiheessuun galii kan ittiin argatanidha. Naannoo keenya keessattis, inisheetiivii misooma ‘Kashew’ f haala qilleensaa mijataa qabduun misooma kana babal’isuun qonnaan/horsiisee bultoonni keenya oomisha al-ergee fi galtee industirii ta’e kanarraa dinagdeen akka fayyadamaniif Mootummaan Naannoo keenyaa Mootummaa biyya Naayijeeriyaa waliin michooma uumuun bara 2017 irraa eegalee sanyii biqiltuu kanaa galchuun buufataalee biqiltuurratti babal’isuun yeroo ammaatti biqiltuun kumni 295 qophaa’e keessaa kumni 186 lafa hektaara 780 irratti aanaalee naannoo keenyaa 212 keessatti misoomaa jira. Guyyaa har’aas biqiltuun ‘Kashew’ Godina Kibba Baha Oromiyaa aanaa Gindhiiritti dhaabbiin biqiltuu kanaa gaggeeffamee jira. Biiroo qonnaa Oromiyaa irraa

Onkololeessa 16/2019 (ENA) Ministirri Magaalaa fi Bu'uura Misoomaa Injiinar Mahaammad Abduraahimaan akka ibsanitti, hojiiwwan mootummaan Ida’amuun waggoottan darban misooma magaalaa, bu'uuraalee misoomaa diriirsuu fi ijaarsa mana jireenyaatiin raawwatame fayyadamummaa hunda galeessa lammiilee kan mirkaneessan ta'uusaanii ibsaniiru. Guyyaan Magaalota Addunyaa bara 2026 mata duree 'Magaalota Itoophiyaatti Magaalaa Haaromsuu; hundaaf kan ta’u mana jireenyaa ga’aa» jedhuun galma komishinii dinagdee mootummoota gamtoomanii (ECA)tti gaggeeffamaa jira. Sagantichi Ministeera Magaalaa fi Bu'uura Misoomaa, Bulchiinsa Magaalaa Finfinnee fi (UN-Habitat) waliin kan qopheessan yoo ta'u, xiyyeeffannoon isaas guddina magaalotaa, dhiyeessii mana jireenyaa fi hojiilee haaromsa magaalaa irratti kan xiyyeeffatedha . Ministeerri Magaalaa fi bu'uuraalee misoomaa Injiinar Mahaammad Abduraahimaan akka jedhanitti, hojiiwwan mootummaa ida’amuun waggoota muraasa darban misooma magaalaa fi ijaarsa mana jireenyaatiin raawwate fayyadamummaa hunda galeessa lammiilee kan mirkaneessanidha. Magaalonni wiirtuu sochii dinagdee, hojiilee kalaqaa,ce’umsa teeknooloojii fi walitti dhufeenya hawaasummaa akka ta’an xiyyeeffannoon hojjetamuusa ibsaniiru. Keessattuu hojiilee xiyyeeffannoo addaatiin hojjetamaa jiran keessaa misoomni manneenii isa ijoo ta’uu eeruudhaan, ijaarsi mana jireenyaa miiliyoona 1 tuqaa 5 mootummaa ida’amuutiin dhugoomaa jiru agarsiistuu kanaa ta’uu ibsaniiru. Misoomonni koriideraa fi hojiileen haaromsa magaalaa kutaa biyyattii garaa garaatti raawwataman magaaloonni keenya qulqulluu, jireenyaaf mijattuu fi eegumsa naannoof xiyyeeffannoo kan kennan akka ta'an taasiseera. Kunis magaalotni kun dandeettii hawwattummaa invastimantii olaanaa akka qabaatan kan taasise ta’uu ministirichi ibsaniiru. Ministirichi dabalaniis, michoota misoomaa, damee dhuunfaa fi hawaasa waliin walitti dhufeenya qaban cimsuun fedhii mana jireenyaa lammiilee guutuuf xiyyeeffannoon kan hojjetamu ta'uu mirkaneessaniiru. Hojiilee misooma magaalaa cimsanii itti fufuudhaan Itoophiyaa lammiilee isheetiif mijattuu dhugoomsuuf hojiin kun cimee akka ittifufu ibsaniiru.

Onkololessa 16/2019 (ENA): Misoomni qabeenya bishaanii Itiyoophiyaa daangaa ce’u tumsa haqa qabeessaa fi madaalawaa irratti kan hundaa’e ta’uu Ministirri Bishaanii fi Inarjii Injinar Habtaamuu Ittafaa (PhD) ibsaniiru.   Torban Bishaanii fi Inarjii Itiyoophiyaa 3ffaa mata duree “wabii bishaanii fi inarjiif Imaammataa fi walta’iinsa Saayinsii irratti hundaa’e guddisuu” jedhuun eegalameera. Sagantaa Golambaa Saayinsii Finfinneetti ifatti baname kanarratti Ambaasaaddaroonni, qorattoonni, imaammata baastonnii fi qooda fudhattoonni hirmaataniiru. Ministirri Bishaanii fi Inarjii Injinar Habtaamuu Ittafaa (PhD) karaa bakka bu’aa isaaniitiin ergaa dabarsaniin, eegumsa naannoo guddisuun misooma biyyaalessaa hunda galeessa ta’e bu’uura ta’uu ibsaniiru. Qabeenyi bu’uuraa lamaan kun oomishtummaa qonnaa, wabii nyaataa, fayyaa hawaasaa, guddina industirii, carraa hojii uumuu fi itti fufiinsa naannoo fooyyessuuf murteessaa ta’uu ibsaniiru.   Teeknooloojiiwwan dandeettii dhaabbilee cimsuu danda’an qorannoo saayinsii fi odeeffannoo imaammataa mirkanaa’een dandeettii bishaanii fi anniisaa haaromfamuu Itiyoophiyaa deeggaruuf hojjetamaa akka jiran himaniiru. Fakkeenyaaf, dhiyeessii humna ibsaa, sirna bishaanii fi qulqullina naannoo, misooma jallisii fi itti fayyadama bishaanii, akkasumas misooma qabeenya bishaan gubbaa fi lafa jalaa irratti xiyyeeffannaan kennamee akka ture eeraniiru. Bu’uuraalee bishaanii fi anniisaa Itiyoophiyaa babal’isuun fedhii tajaajila lammiilee guutuuf hojiin bal’aan hojjetamaa akka jirus eeraniiru. Misooma bishaanii fi anniisaa Itiyoophiyaa saffisiisuuf tumsa mootummaa, dhaabbilee barnoota olaanoo fi qorannoo, damee dhuunfaa fi michoota misoomaa cimsuun barbaachisaa ta’uus hubachiisaniiru. Qabeenyi bishaanii daangaa ce’u haqa qabeessaa fi madaalawaa ta’een akka itti fayyadamu gochuu fi tumsaa fi wal amantaan badhaadhina waliinii galmaan gahuun barbaachisaa ta’uu ibsaniiru. Misoomni bishaanii fi anniisaa Itiyoophiyaa tumsa, itti fayyadama qabeenya haqa qabeessaa fi madaalawaa, akkasumas tumsa badhaadhina waliinii mirkaneessu irratti kan hundaa’e ta’uu ibsaniiru. Waltajjiin kun imaammataa fi tumsa ragaa saayinsii irratti hundaa’e cimsuu fi yaada, hojmaataa fi furmaata wabii bishaanii fi anniisaa itti fufiinsa qabuuf gumaachan wal jijjiiruuf kan akeekedha. #Mootummaa Ida’amuu #Biyya Guddoo, Ummata Guddaa # Mul'ata Guddaa Miseensa Maatii Miidiyaa Dijiitaalaa ENA ta’aa https://www.ena.et/web/links

Mootummaan Itiyoophiyaa hirkattummaa meeshaalee alaa galan irratti qabu hir’isuu fi walmadaalummaa daldalaa biyyattii itti fufiinsaan sirreessuuf riifoormii diinagdee caasaa hojiirra oolchaa jira. Meeshaaleen bakka bu’aan eegaluun adda durummaan baasii sharafa alaa biliyoonaan lakkaa’amu hambisuun birmadummaa dinagdee mirkaneessuu irratti kan xiyyeeffatedha. Duraan hojiin omishaa bifa adda cicciteeniifi gadi aanaan omishamaa ture,omisha bakka bu’aa tarsiimoo biyyaalessaan raggaasifamee hojiirra ooleera.   Tarsiimoon kun waggoottan kurnan itti aananiif roodimaappii kan kaa’u yoo ta’u, Sochiin Badhaadhina Biyyaalessaa Itiyoophiyaa Bitootessa 2014 hoggansa Ministira Muummee Abiyyi Ahmad (PhD) jalatti eegalame hojiirra oolmaa isaaf motora guddaa ta’ee tajaajilaa jira. Sochiin biyyaalessaa kun Tarsiimoo Omisha Biyyaalessaa bara 2016 hojiirra ooluu eegaleef carraa guddaa uumeera.   Eebbaa fi hojiirra oolmaan tarsiimoo kanaa dinagdee Gooroo biyyattiif bu’aa hawaasummaa fi dinagdee kallattii hedduu fiduu eegaleera. Gaheen gabaa oomishtoota biyya keessaa gara dhibbeentaa 45tti kan ol guddate yoo ta’u, dandeettiin oomishaa warshaalee giddu galeessaan dhibbeentaa 47 irraa gara dhibbeentaa 67tti ol guddateera. Haaromsi kun lammiilee kumaatamaan lakkaa’amaniif carraa hojii dhaabbataa kan uume yoo ta’u, fedhii meeshaalee jallisii warshaalee oomishaalee qonnaa fi albuudaa biyya keessaa waliin walqabsiisuudhaan dhiyeessii cimsee jira. Akka addunyaatti sababa dhiyeessii xaa’oon hanqina nyaataa mudateeru, Itoophiyaan omisha qamadii jallisii Bonaan rakkoo hamaa ishee mudachutu ture irra aanteetti jechuun Ministirri Muummee Dr. Abiyyi Ahimad dubbataniiru.   Omishni bakka bu’aan Itiyoophiyaaf dhimma nageenya biyyaa fi birmadummaa ta’uu hubachiisuun; kanaan dura doolaara miliyoon hedduun kan itti bahu ture dhagaan cilee fi omishni chiippuudii yeroo ammaa kanaa biyya keessatti bal’inaan omishamaa jiraachuu dubbataniiru.   #Mootummaa Ida’amuu #Biyya Guddoo, Ummata Guddaa # Mul'ata Guddaa Miseensa Maatii Miidiyaa Dijiitaalaa ENA ta’aa https://www.ena.et/web/links