Waxabajjii 17/2018 (ENA)- Filannoon walii galaa torbaffaan ga’umsa keessummeessuu, gaggeessuu fi to’achuu boordii filannoo biyyaalessaa qabatamaan kan agarsiise ta’uu hayyoonni ibsan. Adeemsi filannichaa karaa qaroomeen dorgommiin yaadaa kan ittiin mul’atee fi ijaarsa sirna demokiraasii Itiyoophiyaaf bu’ura gaarii kan buusedha jedhaniiru. Filannoon walii galaa waggaa shan-shaniin gaggeeffamu, ummanni abbaa aangoo ta’uusaa fi ijaarsa sirna demokiraasii mirkaneessuuf kan gaggeeffamu taatee biyyaalessaa isa guddaadha. Paartiin badhaadhinaa filannoo walii galaa torbaffaadhaan teessoo mana maree caalmaa argachuun mo’ateera. Paartileen siyaasaa morkattootaas paartii badhaadhinaa dorgommicha mo’ateef hawwii gaarii ibsanii, filannichi bilchinni siyaasaa akkasumas ummanni abbaa aangoo birmaduu ta’uusaa qabatamaan mirkaneessuusaa ibsaniiru. Yunivarsiitii Jimmaatti barsiisaan kutaa barnoota bulchiinsaa Dr. Fiqaaduu Tolasaa ENA’f akka ibsanitti, filannoon walii galaa torbaffaan seenaa biyya keenyaa keessatti filattoonni hedduun kan itti hirmaatan, dorgommiin siyaasaa bilisaa fi haqa qabeessi kan itti taasifame filannoo seena qabeessa ta’uusaa dubbataniiru. Boordiin filannoo biyyaalessaa Itiyoophiyaas filannichi akka milkaa’u baay’ee kan hojjetee fi ga’umsaan gaggeessuusaa taajjabdoonnillee dhugaa ba’aniiruuf jedhaniiru. Akka walii galaatti qophiirraa eegalee filannoon dura, yeroo filannoo fi filannoon booda akkaataan boordiin filannoo biyyaalessaa Itiyoophiyaa ittiin gaggeesse kan raajeffatamu ta’uu kaasaniiru. Filannoon walii galaa 7ffaan paartileen siyaasaa 42 kan itti dorgomanii fi filattoonni miiliyoona 54 caalan kan galmaa’an dirreen demokiraasii bal’atee kan itti mul’ate ta’uun ibsameera.

Waxabajjii 17/2018 (ENA): Afriikaa nagaa qabeettii fi badhaate ijaaruuf Itiyoophiyaa fi Burundiin waliin dhaabbatu jedhan Ministirri Muummee Dr. Abiyyi Ahimad. Ministirri Muummee Dr. Abiyyi Ahimad Pireezidaantii Burundii Ivaristee Nidaayishimiyee maqa biyya isaanii fi Gamtaa Afriikaatiin ergaa baga gammaddanii dabarsuun isaanii miira jajjabina guddaa kan namatti horudha jedhan. Itiyoophiyaa fi Burundiin hariiroo obbolummaa gadi fagoo fi waadaa waloon Afriikaa badhaateefi ijaarsa nageenyaaf waliin dhaabbatu jedhaniiru. Michummaa biyyoota lamaaniitiif gatii guddaa akka kennan kan ibsan Ministirri Muummee Dr. Abiyyi Ahimad, Itiyoophiyaan tumsa fayyadamummaa ummatoota fi Afriikaa mirkaneessu kana daran cimsuuf qophii ta’uu eeraniiru. #ENA_Afaan_Oromoo #ENA  

Waxabajjii 17/2018 (ENA) - Eemiiriin kuwaataar Sheek Tamiim Biin Haamad Al-Taanii, Ministira Muummee Dr. Abiyyi Ahimadii fi Paartii Badhaadhinaaf filannoo waliigalaa 7ffaa injifachuusaanii baga gammaddan jechuun ergaa dabarsaniiru. Eemiiriin kuwaataar, injifannoo Paartiin Badhaadhinaa filannoo waliigalaa kanaan galmeessise hordofuun Ministira Muummee Dr. Abiyyi Ahimadiif ergaa gammachuu isanii ibsu erganiiru. Eemiirichi Ministira muummeetiif milkaa'ina kan hawwan yoo ta'u, hariiroon biyyoota lamaan gidduu jiru caalaatti akka guddatuu fi akka cimu fedhii jabaa qabanis ibsaniiru.

Waxabajjii 17/2018 (ENA): Ministirri Muummee Dr.Abiyyi Ahimad Itiyoophiyaan tumsa dameelee hedduu Maaleezhiyaa waliin qabdu daran guddisuuf fedhii guddaa akka qabdu ibsaniiru. Ministirri Muummee Dr. Abiyyi Ahimad ergaa Ministira Muummee Maaleezhiyaa Anwaar Ibraahimiif erganiin, Maaleezhiyaan michuu ijoo mul’ata gamtaa Kibba Addunyaa fi wal kabajuu kan qooddattu ta’uu ibsaniiru. Mnistirri Muummee Dooktar Abiyyi Ahimad daawwannaa waliinii hoggantoota lamaan gidduutti taasifamaa ture yaadachuun, daawwannaa kana irratti wal-hubannoo gadi fagoo gidduu isaaniitti ijaaruu danda’uu uumamuu ibsaniiru. Itti dabaluunis Itiyoophiyaan tumsa dameelee hedduu biyyoonni lamaan waliin ta’uun jalqaban daran guddisuuf fedhii guddaa akka qabdu ibsaniiru. #ENA_Afaan_Oromoo #ENA  

Waxabajjii 17/2018 (ENA)- Itiyoophiyaan tumsa tarsiimawaa Hindi waliin qabdu caalaatti cimsuu akka barbaaddu Ministirri muummee Dr. Abiyyi Ahimad ibsan. Ministirri muummee Dr. Abiyyi Ahimad ministira muummee Hindi Narendiraa Moodiif ergaa dabarsaniin, Moodiin bakka bu’ummaan ummataa seena qabeessi argatan demokiraasii addunyaa keesnyaa isa guddicha kan taate Hindi cimina demokiraasii fulla’aa qabdu kan agarsiisudha jedhaniiru. Ministirri muummee Abiyyi gita isaanii Hindii michuu amanamaa fi obboleessa koo angafa jechuun kan ibsan yoo ta’u, hariiroon biyyoota lamaan jidduu jirus seenaa, tumsaa fi hawwii waloo ummatasaaniif qaban irratti kan hundaa’e walitti hidhamiinsa cimaa ta’uu ibsaniiru. Itiyoophiyaa fi Hindi tumsa tarsiimawaa qaban caalaatti cimsuu fi imala waloo eegalan waliin itti fufuuf Itiyoophiyaan fedhii akka qabdu ministirri muummee ibsaniiru.

Waxabajjii 17/2018 (ENA): Sirna dimokiraasii Itiyoophiyaa milkeessuu fi haaromsa(riifoormii) dhaabbilee mirkaneessuuf hojiiwwan bu’a qabeessa ta’an hedduun raawwatamuu ibsani Dura taa’aan Koree Dhaabbii Dhimmoota Dimokiraasii Mana Maree Bakka Bu’oota Ummataa obbo Iwunatee Allanaa. Keessattuu, filannoo waliigalaa torbaffaan Caamsaa 24, 2018 gaggeeffame milkaa’inaan xumuramuun isaa, ijaarsa sirna dimokiraasii kana kan agarsiisu ta’uu eeraniiru. Waggoota shanan darban keessatti dhaabbilee bilisaa fi walaba ta’anii fi bu’uura dimokiraasii ta’an ijaaruuf hojiiwwan bu’a qabeessa ta’an hojjetamaa turaniiru jedhani. Milkaa’ina kana galmaan ga’uuf haaromsi seeraa hundee qabu, jijjiiramni gurmaa’insaa fi hojiiwwan ijaarsa dandeettii dhaabbileen walabummaa guutuudhaan akka socho’an kan taasise bal’inaan hojiirra ooleera jedhan. Akka Dura Taa’aan Koree Dhaabbii Dhimma Dimokiraasii Mana Maree Bakka Bu’oota Ummataa obbo Iwunatee Allanaa himanitti; manni marichaa waggoota shanan darban keessatti sirna dimokiraasii biyyattii cimsuuf gahee tarsiimoo taphateera jedhan. Seerota jijjiirama kanaan dura turan, kanneen mirga namoomaa fi dimokraatawaa lammiilee sarban fooyyessuuf hojiin bal’aan hojjetamuu hubachiisuun, kunis fayyadamummaa hunda galeessa ummataa guddisuuf bu’uura kaa’eera jedhani. Dura taa’aan Koree Dhaabbii, dhaabbileen dimokiraasii hojiiwwan haaromsa hundee qabu akka hojjetan carraan kennameefii jiraachuu eeruun; fooyya’iinsi seeraa, jijjiiramni jaarmiyaa, fi tattaaffiin dijitaalaayizeeshinii hojii isaaniif haala mijataa uumuun bal’inaan hojiirra ooluu isaanii ibsaniiru. Hundeeffama Komishiniin Marii Biyyaalessaa aadaa siyaasaa Itiyoophiyaa irratti jijjiirama bu’uuraa kan fidu ta’uu hubachiisaniiru. Adeemsi kun hirmaannaa lammiilee ijaarsa biyyaa keessatti akka dabaluu fi waldhabdeen mariidhaan akka hiikaman kan taasisu ta’uu eeraniiru. Itti aanaan dura taa’aa koree dhaabbii seeraa fi haqaa mana maree bakka bu’oota ummataa obbo Isaa Boruu waggoottan shanan darban hojiileen dimokiraasii mul’isan kanaan dura hin argamne mul’ateera jedhan. Manni marichaa gaaffiin ummataa akka deebi’uuf qaamolee dhimmi ilaallatu sadarkaa sadarkaan jiran waliin qindoominaan hojii hojjete irratti jijjiirama jajjabeessaa galmeessee jiraachuu ibsaniiru. Filannoon waliigalaa torbaffaan milkaa’inaan xumurame guddina sirna dimokiraasii Itiyoophiyaa kan agarsiise ta’uu ibsaniiru. #ENA_Afaan_Oromoo #ENA

Waxabajjii 17/2018 (ENA): Manni Maree Waloo Paartilee Siyaasaa Naannoo Hararii Paartii Badhaadhinaa, kan filannoo injifatee mootummaa ijaaru waliin hojii misoomaa fi ijaarsa naannoo eegalame akka itti fufu beeksise. Turtii ENA waliin taasisaniin, Dura teessuun Mana Maree Waloo paartiilee siyaasaa naannoo Hararii Aadde Hasanat Muummee akka jedhanitti, bu’aa Boordiin Filannoo Biyyaalessaa Itiyoophiyaa baaseen, Paartiin Badhaadhinaa filannoo waliigalaa 7ffaa irratti teessoo paarlaamaa harka caaluun injifateera. Dura teessuun kun Paartii Badhaadhinaa ummataan filatamee injifate, akkasumas paartilee siyaasaa filannoo kana irratti hirmaataniifi bakka bu’ummaa Mana Maree Waliiniitiin teessoo mana maree injifataniif ergaa baga gammaddanii dabarsaniiru. Itti dabaluudhaan adeemsa filannoo olaantummaa ummataa mirkaneesse, sagalee ummataa kenname, injifannoo ummataa galmaa’e ni kabajna jedhan. Aadde Hasanat Manni Maree Waloo kanaan dura pirojektoota nagaa fi misoomaa, sirna dimokiraasii ijaaruu, haaromsaa fi pirojektoota biroo irratti mootummaa waliin hojjechuu isaa yaadachiisaniiru. Itti dabaluunis Manni Maree Waloo hojii kallattii hedduu qabu kan Paartii Badhaadhinaa waliin jalqabame, kan filannoo irratti sagalee caalmaa argatee mootummaa ijaaree biyya bulchaa jiru waliin akka caalmaatti hojjechuun akka itti fufu ibsaniiru. Paartiin Badhaadhinaa pirojektoota misoomaa fi faayidaa ummataa hedduu biyyattii keessatti raawwachuu isaa eeraniiru. Itti dabaluunis miseensonni beekumsaa fi dandeettii biyyaaf fayyadu qabaniifi adeemsa filannootti carraa hin arganne akka hammataman gaafataniiru. Dhaabbileen siyaasaa Manni Maree Waloo meeshaaleen cimsuu fi gahumsa miseensota isaa ijaaruu keessatti hojiin deeggarsaa akka cimu dhaamsa dabarsaniiru. #ENA_Afaan_Oromoo #ENA

Waxabajjii 16/2018 (ENA)፦Pirezidantiin FDRI Taayyee Atsqasillaasee, xalayaa muudama ambaasaddaroota biyyota 11 haaraa muudamanii har'a Masaraa Mootummaa Biyyaalessaatti simataniiru. Ambaasaddaroonni kunniinis yeroo hojii isaanii Itiyoophiyaa keessatti, tumsa gam-dannee fi hariiroo uummataa fi uummata gidduu jiru gara sadarkaa caalutti guddisuuf kutannoon akka hojjetan mirkaneessaniiru. Ambaasaddaroota xalayaa muudama isaanii dhiyeessan,Ambaasaddara Sa'ud Arabiyaa, Abdallaah Biin Hasan Al-Zaahiraanii, Ambaasaddara aangoo guutuu Rippabiliika Koongoo, Ambaasaddar Andiree Pooh, Ambaasaddara aangoo guutuu Poortugaal, Joorji Peereeraa Doo Naasiimeentoo, Ambaasaddara Naayijeeriyaa, NaasiirAmiinoo, Ambaasaddara aangoo guutuu Sirilaankaa,Niirmaalaa Induumaatii Diyaas Paaraanaaviitaanaa, fiAmbaasaddara Malaawwii, Kiwaawulii Masiiskaa warreen xalayaa muudamaasaanii dhiheeffatanidha. Dabalataanis,Ambaasaddara Gaanaa, Maakaariyoos Akaanbiyaanaab Akaanboong,Ambaasaddara aangoo guutuu Uraagaay, Maariyoo Anjeel Siilvaa Kaasitroo, Ambaasaddara aangoo guutuu Siloovaakiyaa, Raasitislaav Kiriizyaan, Ambaasaddara aangoo guutuu Maadaagaasikaar, Ogasti Riichard Paareenaa, akkasumas Ambaasaddara Rippabiliika Uzbeekistaan, Ashraaf Xoojayeev xalayaa muudama isaanii piriizidantichaaf dhiyessaniiru. Dubbii himaan Ministeera Dhimma Alaa Ambaasaddar Nabiyat Geetaachoo ibsa kennaniin, Pirezidanti Taayyee Atsqasillaasee ambaasaddaroota kanaan waliin turtii taasisaniin, Itiyoophiyaan biyyoota kana waliin hariiroo seenaa fi dippilomaasii qabdu caalaatti cimsuu dandeessu irratti mari'achuu isaanii ibsaniiru. Ambaasaddaroonnis yeroo Itiyoophiyaa keessa turanitti, hariiroo gam-dannee fi qunnamtii uummataa fi uummata biyyoota isaanii gidduu jiru gara sadarkaa ol'aanaatti guddisuuf kutannoon akka hojjetan mirkaneessuu isaanii eeraniiru. Keessattuu, filannoon biyyaalesaa Itiyoophiyaa 7ffaan milkiidhaan xumurame Afriikaaf fakkeenya ta'uu isaa ibsuun, ergaa baga gammaddanii dabarsuu isaanii ibsaniiru.

Waxabajjii 16/2018 (ENA): Itiyoophiyaanonni filannoo waliigalaa 7ffaa milkaa’inaan gaggeessuun dimokiraasiif kutannoo qaban agarsiisaniiru jedhan Dura taa’aan Komishinii Gamtaa Afrikaa Mahmuud Alii Yuusuuf. Dura taa’aan kun filannoo waliigalaa 7ffaa Itiyoophiyaa milkaa’inaan gaggeessuun ummataa fi mootummaan Itiyoophiyaaf dinqisiifannaa qaban ibsaniiru. Paartii Badhaadhinaa injifatee fi Ministira Muummee Dr. Abiyyi Ahmad baga gammaddan jedhaniiru. Adeemsi filannoo kun Itiyoophiyaanonni dimokiraasiin guddina hawaasummaa fi dinagdeef bu’uura ta’uuf kutannoo qabaachuu isaanii kan agarsiisu ta’uu ibsaniiru. Filannoon waliigalaa milkaa’inaan akka xumuramuuf ogummaa fi kutannoo Boordiin Filannoo Biyyaalessaa Itiyoophiyaa agarsiise dinqisiifachuu isaanii odeeffannoon Gamtaa Afrikaa irraa argame ni mul’isa. Dura taa’aan kun adeemsa filannoo amanamaa, nagaa fi iftoomina qabuun biyyoota miseensa Gamtaa Afriikaa keessatti bulchiinsa dimokiraatawaa cimsuuf kutannoo Komishiniin Gamtaa Afriikaa qabu ibsaniiru. #ENA_Afaan_Oromoo #ENA

Waxabajjii 16/2018 (ENA): Paartiin Badhaadhinaa filannoo waliigalaa 7ffaa injifate waadaa uummataaf gale hojiitti hiikuun nagaa fi misooma waaraa mirkaneesuuf cimee akka hojjetu Jiraattonni magaalaa Gambeellaa ibsan. Filannoo waliigalaa keessatti paartiin Badhaadhinaa Mana Maree Bakka Bu’oota Uummataa fi Manneen Maree Naannootiif jidduu galeessaan teessuma baay’ee argachuun injifachuu isaa Boordiin Filannoo Biyaalessaa Itiyoophiyaa beeksisuun isaa ni yaadatama. Bu’aa filannichaa ilaalchisuun jiraattonni magaalaa Gambeellaa ENA’f yaada kennaniin, paartiin Badhaadhinaa filannichaan mo’ate waadaa gale hojiirra oolchuudhaan fayyadamummaa uummataa gama hundaan jiru mirkaneessuuf carraaquu akka qabu ibsaniiru. Jiraattota magaalichaa keessaa obbo Andaargee Waasihuun, paartiin Badhaadhinaa mo'ate maaniifeestoo fi sagantaa isaatiin waadaa uummataaf gale hojiirra oolchuudhaan, gaaffilee misoomaa fi bulchiinsa gaarii uummataan ka'aniif deebii kennuuf cimee hojjechuu akka qabu dubbataniiru. Uummannis mootummaa cinaa dhaabbachuun hirmaannaa filannicha irratti agarsiise misooma irrattis irra deebi'uun, tokkummaa isaa cimsee waliin hojjechuu akka qabus ibsaniiru. Paartiin Badhaadhina Filannoo biyyaalessaatiin mo’ate, hojiiwwan misoomaa waggoottan darban keessatti eegalaman itti fufsiisuun fayyadamummaa misooma uummataa mirkaneessuuf cimee hojjechuu akka qabu kan dubbate immoo dargaggoo Umood Umood dha. Keessattuu akka Naannoo Gambeellaatti waggoottan darban keessa misoomni eegalaman cimanii akka itti fufan fedhii qabna, kanaafis mootummaa cinaa ni dhaabbanna jedheera. Jiraataa magaalattii biraan obbo Zallaqaa Dabalee yaada kennaniin, paartiin mo'ate tokkummaa fi waliin jireenya uummataa cimsuudhaan nagaa fi misooma waaraa mirkaneessuu irratti xiyyeeffachuu akka qabu ibsaniiru. Paartichi waggoottan shanan dhufan keessatti gaaffilee misoomaa fi bulchiinsa gaarii uummataa deebii kan itti kennu ta’uu akka qabus yaada kennaniiru. Maaniifeestoo fi sagantaalee paartichaan karoorawwan uummataaf ibsaman hojiirra oolchuudhaan bu’aa misoomaa qabatamaa galmeessisuuf hojjechuu akka qabu kan dubbate immoo jiraataa magaalichaa dargaggoo Kaamaa Ubongii dha. Paartiin Badhaadhinaa filannicha injifachuun isaa hojiiwwan kanaan dura eegale galmaan gahuuf carraa gaarii akka uumu kan ibse dargaggoon kun, nutis akka dargaggootti cinaa isaa dhaabbannee ni tattaafanna jedheera.

Waxabajjii 16/2018 (ENA): Uggurri viizaa Ameerikaan hoggantoota garee finxaaleyyii ABUT duraanii fi maatii isaanii irratti dhiyeenya kaa’e ergaa ifa ta’ee fi gareen kuni sochii badinsaa raawwatu hatattamaan akka dhaabuuf murtee cimaa ta’uu itti gaafatamtuun waajjira Paartii Simrat Aadde Almaaz Gabratsaadiq himaniiru. Hoggantuun bulchiinsa Yeroo Mootummaa Naannoo Tigraay duraanii fi itti gaafatamtuun waajjira Paartii Simrat aadde Almaaz Gabratsaadiq waa’ee uggura viizaa tibbana Ameerikaan hoggantoota ABUT duraanii fi maatii isaanii irra kaa’e ilaalchisee haala naannoo Tigraay ENAtti himaniiru. Akka itti gaafatamaan kun himanitti, Ameerikaan hoggantoota TPLF duraanii fi maatii isaanii irratti dhiyeenya uggurri viizaa darbe gareen kun hatattamaan hojii badii seeraan alaa raawwachaa jiru akka dhaabu ergaa ifa ta’e dha jedhani. Murteen kun gareen kun dhaabbatee akka itti yaaduu fi Waliigaltee Nageenyaa Piriitooriyaa guutummaatti hojiirra akka oolchuuf gumaacha guddaa akka taasisa jedhan. Gareen finxaaleyyii TPLF duraanii naannoo Tigraay keessatti waraanaaf qophaa’aa akka jiru kan ibsan itti gaafatamtuun waajjira Paartii Simrat, naannicha keessatti dargaggoota sadarkaa olaanaan dirqisiisuun waraanatti guuraa akka jirus akeekaniiru. Dargaggoonni naannicha keessatti garee hidhattootatti makamuu didan labsii seeraan alaatiin garee hidhattootaa kana akka makaman dirqisiifamaa akka jiran akeekaniiru. Dargaggoonni kunniin naannoo sanaa miliqaa akka jiran kan eeran yoo ta’u, dirqiin waraanatti guuramuu kana mormuun gara Finfinnee fi kutaalee biyyattii birootti baqachaa akka jiran ibsaniiru. Baandaaleen farra nageenyaa maqaa "Tsimdoo" jedhuun humnoota diina alaa waliin ta'uun Itiyoophiyaa dadhabsiisuuf hojjechaa akka jiran kan ibsan itti gaafatamtuun waajjira Paartii Samrit, gareen finxaaleyyii kuni walitti makamuun kun waraana haaraa banuuf qophaa'aa akka jiran kan mirkaneessu ta'uu ibsaniiru. Kaayyoon inni guddaan piroojektii Tsimdoo jedhamu kun Itiyoophiyaan nageenya dhabdee jeequmsa dhaabbataa keessa tursiisuu akka ta’es hubachiisaniiru. Gareen finxaaleyyii wayyaanee duraanii Shabiyaa waliin tumsa uumuun ergamaa fi meeshaa ajandaa jeequmsaa kanaa ta’ee socho’aa akka jiru ibsaniiru. Kanaaf dargaggoonni Tigraay garee finxaaleyyii TPLF duraanii, kan humna alaa waliin tumsa uumuun aangoo seeraan alaa dheereffachuu fi biyyattii tasgabbii dhabsiisuun isin gaha jechuu qaba jedhaniiru. #ENA_Afaan_Oromoo #ENA

Waxabajjii 15/2018(ENA)-Pirezidanti Taayyee Atsqasillaasee Komishinara Olaanaa Godaantotaa Dhaabbata Mootummoota Gamtoomanii Dr.Barhaam Saalihiin waajjira isaaniitti simatanii dubbisaniiru. Komishinarri Olaanaa Godaantotaa Dhaabbata Mootummoota Gamtoomanii Dr. Barhaam Saalihiin marii kana ilaalchisuun ENAtti akka ibsanitti, Pirezidant Taayyee Atsqasillaasee waliin marii bu’a qabeessa ta’e gaggeessuu isaanii eeraniiru. Mariin kun Itiyoophiyaan godaantota hedduu keessummeessuu keessatti shoora murteessaa bahachaa jirtuuf dhaabbanni isaanii dinqisiifannaa fi beekamtii qabu ibsuuf carraa guddaa uumuu isaa ibsaniiru. Keessattuu, biyyatiin godaantota sirna biyyaalessaa keessatti hammatuu fi gargaarsa namoomaa qofa irratti akka hin hirkamne gargaaruuf dhiyyeenya kana roodmaappii hammannaa isheen ifa goote akka fakkeenyaatti kaasaniiru. Adeemsa hojiirra oolmaa roodmaappii kanaan komishinichi mootummaa Itiyoophiyaa waliin kutannoon akka hojjetu kan mirkaneessan yoo ta'u; hawaasni addunyaas itti gaafatamummaa gamtaa isaa akka bahu waamicha dhiyeessaniiru. Gama biraatiin, Komishinar Barhaam Saalihiin Itiyoophiyaan dhiyyeenya kana filannoo waliigalaa torbaffaa milkiin xumuruu isheetiif gammachuu itti dhaga’ame ibsuun, ergaa baga gammaddanii dabarsaniiru.

Waxabajjii 15/2018 (ENA)-Hariiroon seenaa qabeessi Itiyoophiyaa fi Yunaayitid Kiingidam caalaatti akka cimu ministirri dhimma alaa Dr. Geediyoon Ximootiwoosa dhaaman.   Sagantaan irbaata dippilomaatikii gareen Sidaraa (Sidara Group) magaalaa Landanitti qopheesse akkasumas Leber Afriikaa Neetwoorkii (Labour African Network fi embsaaiin Yunaayitid Kingidam Itiyoophiyaatti argamuun waloomaan qophaa’e gaggeeffameera. Ministirri dhimma alaa Dr Geediyoon Ximootiwoos wayita kana akka jedhanitti, gufuulee idil addunyaa waloomaan furuuf akkasumas carraalee guddinaa fi badhaadhinaa haaraatti gargaaramuuf waltajjiiwwan maree fi tumsaa qooda ijoo qabu.   Hariiroon Itiyoophiyaa fi Yunaayitid Kiingidam dhaabbilee mootummaa jidduutti akka hin daangofne ibsaniiru. Tumsi kun walitti hidhamiinsa fulla’aa dhaabbilee daldalaa, dhaabbilee mootummaa, hawaasa diyaasporaa fi lammiilee biyyoota lamaanii jidduu jirurratti kan hundaa’e ta’uu ibsaniiru. Hariiroon ummattoota biyyoota lamaanii jiru kun tumsa cimaa fi egereef utubaa isa ijoodha jedhaniiru. Ministirri dhimma alaa kun dubbiisaanii keessatti ajandaa riifoomii Itiyoophiyaa yeroo ammaa fi karoora misoomaa yeroo dheeraa kaasaniiru. Keessumaa dinagdee jabeessuu, dargaggoof carraa hojii uumuuf akkasumas guddina hammataa fi fulla’aa fiduuf tattaaffii taasifamaa jiru kaasaniiru. Carraaleen tumsa daldalaa, Invastimantii, barnoota, qu’annoo teeknooloojii kalaqaa(Innoveeshinii) fi jijjiirama qilleensaa damdamachuu biyyoota lamaan jidduu jiraachuusaanii ministirichi eeraniiru.   Haala idil addunyaa yeroo yerootti wal xaxaa dhufe sirnaan bahachuu fi lammiilee biyyoota lamaaniif faayidaa qabatamaa argamsiisuuf tumsa idil-addunyaa cimaa uumuun dhimma filmaata hin qabne ta’uu hubachiisaniiru. Dura taa’aan Leber Afriikaa Netwoork (LAN) Ernasti Ambee dubbii dubbataniin, Neetwoorkichi sagaleen Afriikaa imaammata bocuu Yunaayitid keessatti, waltajjiiwwan daldalaa fi dippilomaasii irratti guddatee akka mul’atu gochuurratti qooda inni bahe dinqisiifataniiru. Dinagdeen Itiyoophiyaa Afriikaarraa gabaawwan isa guddaa fi guddina si’ataa galmeessisaa jiran keessaa isa tokko ta’uu haala addaan kaasaniiru. Yuunaayitid Kingidamitti ambaasaaddarri Itiyoophiyaa Buruuk Mokonnon gamasaaniin, taateen dippilomaasichaa tumsa daldalaa, Invastimantii fi innoveeshinii biyyoota lamaanii cimaa dhufe bal’isuuf carraa gaarii uumuusaa ibsaniiru. wal deeggarsi dinagdee itiyoophiyaa fi walumaa gala biyyoota afriikaa waliin qabdu guddachuunsaa carraalee haaraa, badhaadhina waloo fi guddina hammataa fulla’aa fiduuf akka gargaaru ibsuusaanii ministeerri dhimma alaa beeksiseera.

Waxabajjii 15/2018 (ENA): Jiraattonni Magaalaa Harar pirojektoota misoomaa jalqabaman Paartii Badhaadhinaa waliin ta’uun cimsuun fayyadamummaa ummataa mirkaneessuuf kutannoon akka hojjetan beeksisan. Bulchiinsi Magaalaa Harar waggoota darban keessa gaaffii jiraattotaa bishaan dhugaatii, bu’uuraalee daandii fi carraa hojii uumuu irratti gaaffii dhiyeessan deebisuuf pirojektoota misoomaa adda addaa raawwachaa akka ture ni beekama. Keessattuu pirojektoonni misoomaa fayyadamummaa hawaasummaa fi dinagdee jiraattotaa mirkaneessan, seenaa fi aadaa magaalichaa irratti dhiibbaa osoo hin geessisin mirkaneessu bu’aa jajjabeessaa galmeessaa jira. Kutannoon amma jiraattonni agarsiisan bu’aa misoomaa hanga ammaatti argame itti fufiinsa akka qabaatu fi gatiiwwan bulchiinsa gaarii daran guddisuuf fedhii ummanni qabus agarsiisa. Boordiin Filannoo Biyyaalessaa Itiyoophiyaa kaleessa filannoo waliigalaa 7ffaa Bakka Bu'oota Ummataa fi Mana Maree Naannoolee irratti Paartiin Badhaadhinaa teessoo caalmaa injifachuu isaa beeksiseera. Haaluma kanaan jiraattonni magaalaa Harar yaada isaanii ENA’f kennan hojiiwwan misoomaa fi bulchiinsa gaarii Paartii Badhaadhinaa waliin ta’uun eegalaman cimsuun fayyadamummaa ummataa mirkaneessuuf tattaaffii taasifamaa jiru cimsinee deggerra jedhaniiru. Jiraattonni kunneen hojiiwwan misoomaa, nageenya, dippilomaasii fi hojiiwwan kanaan walqabatan biroo paarticha waliin ta’uun hojjechaa jiran cimsuu itti fufna jedhaniiru. Jiraattota yaada isaanii kennan keessaa Paartiin Badhaadhinaa misooma koridarii, carraa hojii uumuu, ashaaraa magariisaa fi hojiiwwan misoomaa biroo irratti jijjiirama qabatamaa galmeessisaa jira jedhan obbo Jamaal Mahaammad. Hojiin kun itti fufuu akka qabu, ummannis hojii dhaabicha waliin eegalame itti fufuu akka qabu hubachiisaniiru. Yaada isaanii kan kennan qaama miidhamaa obbo Imraan Ahmad waggoota shanan dhufan keessatti paartiin kun fooyya’aa akka hojjetu amantaa qaban ibsaniiru. Pirojektoota misoomaa eegalaman xumuruu fi fayyadamummaa ummataa daran guddisuuf ciminaan hojjechuun barbaachisaa ta’uus hubachiisaniiru. Filannoo waliigalaa 7ffaa irratti hirmaachuudhaan sagaleen keenya gatii akka qabu ifatti arginee jirra; akkasumas Paartiin Badhaadhinaa injifachuu isaatti gammachuu qabdu ibsachuun, paartiin kuni kanaan ol akka hojjetu abdii qabdu ibsachuun cinaa dhaabbachuu akka qabdu kan ibsite immoo Yaabsiraa Dassaalenyidha. Dargaggoo Abdulaaziiz Shakib gama biraatiin Paartiin Badhaadhinaa paartii biyya ceesisu ta'uu dubbachuun,waggoota shanan dhufan keessatti hojiiwwan misoomaa fooyya’oo ta’an raawwachuudhaan fayyadamummaa ummataa akka guddisu amantaa akka qaban ibseera. Dargaggoo Abdulaaziiz akka jedhetti, paartichi pirojektoota gurguddoo hedduu ijaaruu fi hojiirra oolchuudhaan ''waadaa gochaan agarsiiseera''; Fuuldurattis hojii misoomaa eegalame dhaabicha waliin cimsinee itti fufna jedheera. #TOI #ENA Afaan Oromoo

Waxabajjii 15/2018 (ENA)- Filannichi ummanni keenya nagaaf jecha gatii qaalii kaffalee kan itti mo’ate filannoo seena-qabeessa ta’uusaa Sochiin Biyyaalessaa Amaaraa(SBA)ibse. Boordiin filannoo biyyaalessaa bu’aa filannoo biyyaalessaa 7ffaa kaleessa ifoomsuunsaa ni beekama. Haala Kanaan paartileen siyaasaa garagaraa adeemsi filannichaa milkaa’aa ta’uusaa ibsuudhaan, bu’aasaa fudhachuusaanii fi paartii badhaadhinaa sagalee caalmaan mo’ateef hawwii gaarii dabarsaa jiru. Sochiin Biyyaalessaa Amaaraa(SBA) ibsa baaseen filannoon walii galaa 7ffaa, nagaaf jecha ummanni keenya gatii qaalii kaffalee kan itti mo’ate filannoo seena qabeessadha jedheera. Filannoon walii galaa 7ffaan ummanni gara boqonnaa siyaasaa fi hawaas-dinagdee fooyya’aatti cehuuf kutannoosaa kan itti agarsiise murtoo cimaa ta’uusaa ibseera. Milkaa’inni galmaa’e bu’aa ummanni keenya fageessee ilaaluu danda’uusaa waan ta’eef seenaa guddaatti fudhatamuu kan qabudha jedhe ibsa baaseen. Filannichi diinota Itiyoophiyaa alaas abdii kan kutachiise taatee guddaa ta’uu SBA ibseera. Diyaasporaan misoomaa fi hojii misoomaa akka deeggaru akkasumas tasgabbii biyyaaf jecha ajandaawwan bu’aa hinbuufnerraa akka fagaatu waamicha godheera. Xumurarrattis paartii badhaadhinaa filannoo walii galaa 7ffaan sagalee caalmaa argateen ergaa baga gammaddanii ibsee, yeroon itti aanu biyya keenya boqonnaa hunda galeessa fooyyee qabutti kan itti ceesifnu akka ta’u ibseera.

Waxabajjii 15/2018(ENA) – Filannoo waliigalaa 7ffaa keessatti sagalee uummataan kenname ni kabajna jechuun Paartiin Demokraatawaa Ummatoota Walloo (PADUW) ibse. Paartichi ibsa ENA’f ergeen, filannoon waliigalaa 7ffaan nagaan xumuramuusaa gammachuu itti dhaga'ame kanaan dura ibsuu isaa yaadachiisee, bu'aa Boordiin Filannoo biyyaalessaa ibse irratti hundaa’uun sagalee uummataan kenname kan kabaju ta'uu beeksiseera. Ibsa boordichaa irratti hunda’uun, Paartiin Badhaadhinaa Mana Maree Bakka Bu'oota Uummataa fi manneen maree magaalaafi naannootiif mootummaa hundeessuu kan dandeessisu sagalee argachuu isaa eeruun, hoggantoota paartichaa, miseensotaafi uummata filataaf ergaa baga gammaddanii dabarseera. Waggoottan shanan dhufan keessattis Itiyoophiyaan rakkoolee ishee mudatan guutumaan guutuutti kan itti furaman, mariin isheen eegaltee jirtus bu'aadhaan kan itti xumuramu ta'as jedhee amantaa qabus ibseera. Paartichi ergaa dabarseen, biyya keenya jalqabbii sirna deemokiraasii keessa jirtuuf yeroo ce’umsa nagaafi guddinaa akka ta'u hawwaa, paartiin keenya birmadummaa biyyaa, deemsa misoomaafi guddinaa kan gufachiisan humnoota badii alaas ta'e keessaa, mootummaa cinaa dhaabbannee kan qabsoofnu ta'uu ni mirkaneessina, jechuun ergaa dabarseera.

Waxabajjii 15/2018 (ENA) – Paartii mo'ate cinaa dhaabbachuun nageenya naannoo keenyaa eeguu fi hojiiwwan misoomaa eegalaman akka saffisaniif hirmaannaa goonu cimsanii kan itti fufan ta'uu dargaggoonni Magaalaa Amboo beeksisan. Filannoo waliigalaa keessatti Paartiin Badhaadhinaa Mana Maree Bakka bu'oota uummataafi manneen maree naannoof teessuma caalmaa argachuun mo'achuu isaa Boordiin Filannoo Biyyaalessaa Itiyoophiyaa beeksisuun ni yaadatama. Dhimma kana irratti dargaggoonni magaalaa Amboo ENA’n dubbise; nageenya naannoo isaanii eeguun hojiiwwan misoomaa jalqabaman akka saffisaniif paartii mo'ate cinaa dhaabbachuun hirmaannaa taasisan kan itti fufan ta'uu ibsaniiru. Yaada kennitoota keessaa dargaggoo Shibbiruu Nagarii Paartiin Badhaadhinaa gaaffii uummataa deebisuu kan danda'anii fi kanaan dura sadarkaa biyyaalessaafi naannootti pirojektoota gurguddoo eegalaman cimsee itti fufsiisuu akka qabu himeera. Hojiiwwan misoomaa gurguddoo sadarkaa biyyaalessaatti karoorfaman akka milkaa'aniif paarticha cinaa dhaabbachuun qooda isaa kan bahu ta'uu ibseera. Dargaggoon Yohaannis Miidhagsaa gama isaatiin, magaalicha keessatti dameewwan hundaan hojiiwwan misoomaa hojjetamaa jiran deeggaruuf qophaa'uu isaa ibseera. Paartii mo'ate waliin ta'uun hojiiwwan misoomaa jalqabaman irratti hirmaachuun, akkasumas dargaggoota naannichaa qindeessuun gahee isaarraa eegamu bahachuuf qophii ta'uu isaa ibseera. Dargaggoon Cimdeessaa Nagarii gama isaatiin; paartiin teessuma mana maree caalmaa argate kanaan dura gaaffiiwwan misoomaa lammiileen kaasaa turan deebisuu akka qabu eeruun, pirojektoonni misoomaa jalqabamanifi fayyadamummaa uummataa dabalan akka itti fufaniif qooda isaa kan bahu ta'uu ibseera.

Waxabajjii 15/2018 (ENA): Paartiin Badhaadhinaa hogganaa ta’ee akka itti fufuuf kan fialatameefi akkasumas dorgomtoonni dorgommii kana irratti hirmaatanii bakka bu’ummaa ummataa galmaan ga’an baga gammaddan jechuun paartiin haqa hawaasummaa lammiilee Itiyoophiyaaf (IZEMA)’n beeksiseera. Boordiin Filannoo Biyyaalessaa Itiyoophiyaa ibsa kaleessa baaseen filannoo waliigalaa 7ffaa irratti naannolee filannoo irra caalaan Paartiin Badhaadhinaa injifataa ta’uu beeksiseera. Kana hordofuun, Paartii Haqa Hawaasummaa Lammiilee Itiyoophiyaatiif (IZEMA) ergaa har’a dabarseen paartichi bakka itti dorgometti mana maree bakka bu’oota ummatootaa 13 fi teessoo mana maree naannoo fi magaalaa 73 injifachuu isaaniitiin deeggartootaa fi paartichaan baga gammaddan jechuun ergaa dabarseera. Filannoo waliigalaa 7ffaa irrattis sadarkaa biyyaatti paartii morkataa ta'ee akka xumures ibseera. Kaadhimamaa, miseensootaa fi deeggartoota paartichaa milkaa'ina galmeessisaniif baga gammaddan jechuun, waggoota filannoo itti aanuuf dursanii jiran keessatti cimina isaa itti fufsiisuun, tarsiimoo fi hojiiwwan barbaachisoo birootiin qaawwa jiru guutuudhaan, yeroo osoo hin qisaasessiin gahee dorgomaa isaa akka bahatu ammumarraa akka eegalus ibseera. Akkuma kanaan dura gochaa turre dhimmoota dantaa biyyaa tajaajilan irratti humnoota Itiyoophiyaa hunda waliin ta’uun ni hojjenna jedhaniiru. Garaagarummaa fi qeeqa keenya ajandaa dorgommii irratti qaroomina hawaasa keenyaaf malu qabannee dhiyeessuun jalqabne aadaa siyaasaa fayya qabeessaa fi ammayyaa horachuuf hojii keenya itti fufna, milkaa’ina dabalataaf ni carraaqna jedheera. Paartii Badhaadhinaa paartii biyya bulchu ta’ee itti fufuuf filatame, akkasumas dorgomtoota dorgommii kana irratti hirmaatan bakka bu’ummaa ummataa galmaan ga’an baga gammaddan jenna jechuun paartichi ergaa isaa keessatti ibseera. Dhaabbilee dimokiraasii ijaaruu fi haala siyaasaa haqa qabeessa ta’e har’a irraa eegalee hundaaf qixa dhaqqabamaa taasisuuf kutannoon akka hojjatu dhaameera. Paartiin injifate yaada uummataa dhaggeeffachuu; yaadonni misoomaa fi jijjiirama biyyattiif faayidaa qaban gama kamirraayyuu argamuu akka danda’aniifi kan hunda hirmaachise akka ta’u ergaa isaa keessatti himeera. Akkasumas qeeqa gara bal’inaan fudhachaa ,waliin ta'uun dimokiraasii biyyi keenya barbaaddu akka ijaarru jechuun Paartiin Haqa Hawaasummaa Lammiilee Itiyoophiyaaf (IZEMA)’n ibsa isaa keessatti eereera. #TOI #ENA Afaan Oromoo

Waxabajjii 12/2018 (ENA)- Mariin biyyaalessaa Itiyoophiyaa keessatti gaggeeffamaa jiru hubannoo waloo biyyaalessaa uumuun tokkummaa kan cimsu ta'uu Itiyoophiyaatti bakka bu'aan sagantaa Misooma Dhaabbata Mootummoota Gamtoomanii (UNDP) Saamu'eel Doo ibsan. Komiishiniin marii biyyaalessaa Itiyoophiyaa yaa’ii isaa Adooleessa 8 bara 2018 irraa jalqabee akka gaggeessu beeksiseera. Komiishinichi yaa’ii kana gaggeessuuf qophiiwwan barbaachisoo taasisaa jira. Itiyoophiyaatti Bakka Bu'aan Sagantaa Misooma Dhaabbata Mootummoota Gamtoomanii Saamu'eel Doo ENA waliin turtii taasisaniin, Komiishiniin Marii Biyyaalessaa Itiyoophiyaa erga hundaa'ee kaasee hojii nama dinqisiisu hojjechuu isaa ibsaniiru. Mariin rakkina bu'uuraa biyya tokko keessatti mul'atu mariidhaan furuun hubannoo waloo biyyaalessaa uumuu kan dandeessisu ta'uu eeraniiru. Adeemsa marii Itiyoophiyaan gaggeessaa jirtu milkiin itti fufsiisuuf kutannoo agarsiisaniif mootummaan fi ummanni Itiyoophiyaa akkasumas komiishinichi galata guddaan isaaniif mala jedhaniiru. Muxannoo Laayibeeriyaa dabalatee, Kolombiyaa, Ameerikaa Latiini, Eeshiyaa fi kutaalee Afrikaa adda addaa keessatti mariiwwan biyyaalessaa taasifaman qo'achuu isaanii eeranii; adeemsi marii furmaata filannoo hin qabne ta'uu ibsaniiru. Hojiin akkasii fedhii guddaa, kutannoo ol'aanaa fi waliin gara fuulduraatti deemuuf obsa cimaa kan gaafatu ta'uu hubachiisaniiru. Filannoowwan nagaa fi marii carraa fuulduraa hawaasaa caalaatti kan ifa taasisan ta'uu ibsuun; Itiyoophiyaa saboota baay'ee fi seenaa nama dinqisiisu qabdu keessatti tokkummaa biyyaalessaa fi misooma waaraa caalaatti cimsuuf mariin waliinii murteessaa ta'uu ibsaniiru. Kanaafuu, Itiyoophiyaanonni adeemsa marii kana keessatti dammaqinaan hirmaachuun milkaa'ina isaatiif gahee ijaarsaa taphachuu akka qaban hubachiisaniiru.

Waxabajjii 12/2018 (ENA)-Magaalaa Shaggar Kutaa Magaalaa Gafarsa Gujeetti waltajjiin marii hawaasaa rakkoo bulchiinsa gaarii fi kenna tajaajilaan wal qabatanii ka’aa turan furuun Mootummaa fi Ummata gidduutti wal hubannaa gaariin akka jiraatuuf mariin gaggeeffamuu waajjirri komunikeeshinii kutaa magaalichaa beeeksise. Waltajjicha irratti kan argaman Itti Aanaan Bulchaa Kutaa Magaalichaa Obbo Haacaaluu Lachiisaa Mootummaan fayyadamummaa ummataa mirkaneessuuf imaammataa fi tarsiimoowwan garaagaraa baasuun hojjechaa jira jedhaniiru. Waltajjii fuulaa fi fuulaatiin komataafi komatamaa walitti fiduun rakkooleen jiran furmaata waarawaa ta'e akka argatan taasifamaa jiraachuu himuun, gaaffilee fi komiilee hawaasaa hiikuuf qindoominaan hojjechuun murteessaa ta'uu himaniiru.   Waajjira Paartii Badhaadhinaa Damee Kutaa Magaalichaatti Itti Gaafatamaan Siyaasaa obbo Wanduu Nagaash Mootummaan rakkoolee Kenna tajaajilaafi Bulchiinsa gaarii sadarkaan jiran hiikuuf hojjechaa jiraachuu ibsaniiru. Hawaasni tajaajila argachuu qabu karaa guutuu akka argatu taasisuuf hojjechuun murteessaa ta'uu himuun, rakkoo bishaan dhugaatii akka Kutaa Magaalichaatti jiru hiikuuf hawaasa waliin qindoomuun kan hojjetan ta'uu himaniiru.   Rakkooleen Kenna tajaajilaa fi Bulchiinsa gaarii sadarkaan jiran akka furamaniif waltajjii fuulaa fi fuulaatiin komataa fi komatamaa walitti fiduun wal hubannaan gaarii fi kallattiin furmaataa akka jiraatuuf xiyyeeffannoon hojjetamaa jiraachuu Itti Gaafatamtuun Waajjira Komunikeshinii Kutaa Magaalichaa Daraartuu Kabbadaa ibsaniiru.   Kanaaf guyyaa har’aa rakkoo bishaan dhugaatii jiru furuuf Komataa fi komatamaa walitti fiduun iftoomina uumuufi hawaasa keenyaaf furmaata kennuuf waltajjiin fuulaa fi fuulaa kun kan qophaa'e ta’uu ibsaniiru. Hirmaattonni Waltajjichaa tokko tokkos rakkoon bishaan dhugaatii isaan muudachaa jiraachuu himuun, Mootummaan rakkoo kanaaf furmaata akka isaaniif kennu gaafataniiru. Waltajjicha irratti qooda fudhattoonni garaagaraa komii rakkoo bishaan dhugaatii sadarkaan jiran furuuf qindoominaan kan hojjetan ta'uu himaniiru.   Waajjira koomunikeeshinii Kutaa magaalichaarraa