Caamsaa 25/2018 (ENA) - Naannoo Oromiyaa bakkeewwan adda addaatti Sagaleen kenname lakkaa’ame Xumuramee bu’aan qabxii yeroo maxxanfamaa jira , jiraattonnis qabxii kana ilaalaa jiru. Rippoortaroonni ENA Magaalota Gimbii, Jimma, Mattuu fi Adaamaatti irra deemanii akka ilaalanitti, qabxiin yeroo maxxanfameera . Jiraattonni Magaalota kanneenii bu’aa filannoo yeroo buufata filannootti maxxanfame ilaalaa jiru.

Caamsaa 25/2018(ENA) : Tajaajilli Nageenya Odeeffannoo Biyyaalessaa qaamolee nageenya adeemsa kenniinsa sagalee filannoo waliigalaa 7ffaa keessatti qooda isaanii bahatan galateeffateera. Hoggantoonni olanoon Tajaajilichaa filannoon waliigalaa 7ffaan milkaa’inaan akkka xumuramuuf hoggansa tarsiimawaa kennuu ibseera. Miseensonni guutuunis bobbii itti kenname miira jaalala biyyaa olaanaan halkaniifi guyyaa hojjechuun gahee olaanaa bahachuu himeera. Faayidaa filannoon nageenya biyyaaf qabu ergama dhaabbatummaa waliin walitti hidhuun hoggantoonni gahumsa olaanaan hoggantaniifi miseensonni hojiirra oolchitan, adeemsi isaa milkaa’inaan akka goolabamuuf gaheen bahattan agarsiiftuu milkaa’ina tajaajilichaa waan ta’eef galata qabdu jedheera. Filannichi milkaa’inaan akka xumuramuuf qaamolee tasgabbii fi odeeffannoo federaalaafi naannolee tajaajilicha wajjiin tumsaan hojjetanis galateeffateera. Kutannoo fi bilchina uummanni biyyattii milkaa’ina filannoof agarsiiseefis galateeffateera. Filannichi milkaa’inaan akka xumuramuuf teeknooloojiiwwan dandeessisan misoomsuun, guuttachuunii fi hidhachuun milkaa’ina isaaf hojiirra oolchuu Tajaajilichi ibseera. Konfiransii nageenya biyyaalessaa 2ffaa dhaabbatichi qopheesseen haalota nageenyaa biyyaalessaa hanga idil-addunyaa irratti gamaaggama gaggeessuun, filannoo waliigalaa 7ffaaf qophiin gama maraa taasifamuu yaadachiiseera. Dhaabbatichi haalli filannoon boodaa naga qabeessi akka mirkanaa’uuf guutuu biyyattiitti bobbii nageenyaa fi odeeffannoo cimsee kan itti fufu ta’uu ragaan Tajaajila Nageenya Odeeffannoo Biyyaalessaa ENA’f erge ni mul’isa. Itiyoophiyaan_Filatteetti! #ENA_Afaan_Oromoo #TOI #ENA#

Caamsaa 25/2018(ENA)- Qabxiin filannoo walii galaa torbaffaa kan yeroo magaalaawwanii fi bakkeewwan garagaraatti maxxanfamaa jira. Filannoo walii galaa kaleessa gaggeeffameen ummanni halkan qorraan, guyyaa aduu fi hiriira dheeraadhaaf osoo hin jilbeeffatiin amma halkan walakkaatti sagaleen koo gatii qaba jedhee buufataalee filannoo garagaraatti filachaa ooleera. Guyyaa har’aas buufataalee garagaraatti lakkoofsi sagalee xumuramee qabxiiwwan filannoo kan yeroo maxxanfamaa jira. Agabaasonni ENA buufataalee filannoo garagaraa magaalaawwan Hawaasaa, Jiinkaa, Walaayittaa Sooddoo, Diillaa, Alattaa Wandoo, Shaashamannee fi Walqixxee irra deemuun qabxiileen filannoo kan yeroo maxxanfamaa fi ummataaf ifoomaa jiraachuu mirkaneessaniiru. Ummanni filates har’a ganama irraa eegalee buufataalee filannoo kaleessa itti filachaa oole dhaquudhaan qabxiilee filannoo kan yeroo ilaalaa jira. Filannoon walii galaa torbaffaan adeemsa isaatiin hirmaannaa cimaa lammiilee fi abbummaa aangoo qabatamaan kan itti mul’ate ta’uun olitti sirni demokiraasii akka gabbatu ashaaraa isaa kaa’eera. #Itiyoophiyaan Filatteetti # Itiyoophiyaan mo’atteetti See less

Caamsaa 25/2018 (ENA)- Magaalaa Giinciitti namoonni buufata filannoo dhaquudhaan qabxii filannoo 7ffaa kan yeroo ilaalaa jiru. Magaalaa Giinciitti qabxiin yeroo filannoo walii galaa 7ffaa buufataalee filannootti maxxanfamaa jira. Kaleessa Caamsaa 24 bara 2018 bokkaan, aduun, dukkanni osoo isaan hin daangessiin namoonni filachaa oolanii dhiisifataniiru. Lammiileen bariirraa eegalanii qabxii sagaleesaanii buufataalee filannootti argamuun ilaalaa jiru.

Caamsaa 25/2018 (ENA)- Qabxiin filannoo boordiidhaan amma ifoomutti odeeffannoowwan madda kamirraayyuu bahan tamsaasuurraa of qusachuun akka barbaachisu Boordiin filannoo biyyaalessaa hubachiise. Akkaataa seera filannootiin qabxiin boordichaan amma ifoomutti obsaan akka eegdan jechuun boordichi gaafateera. Boordichi ergaa fuula miidiyaa hawaasaa isaarratti dabarseen, kaleessa Caamsaa 24 bara 2018 filattoota dammaqinaa fi obsaan filatanis galateeffateera. Haala Kanaan akkaataa seera filannootiin qabxiin boordichaan amma ifoomutti obsaan eeguun akka barbaachisu ibsee, odeeffannoowwan madda biroo kamirraayyuu bahan tamsaasuurraa akka of qusattan jechuun boordichi beeksiseera.

Itiyoophiyaanonni filataniiru, Itiyoophiyaan mo’atteetti! Tajaajila komunikeeshinii mootummaa Itiyoophiyaan waan barbaaddu yeroo fi haala barbaaddetti biyya lammiisheerraa argattudha.Lammiilee Waan gaafataman hunda biyyasaaniif kennuuf duubatti hin deebine waan qabduuf guddaa boonteetti. Adwaarraa amma hidha haaromsaatti, lammiin lamii deeggaruurraa amma ashaaraa magariisaatti, hirmaannaa lammiishee gaafattee, fedhiisheen olitti milkoofteetti. Waanti har’a raawwatames kanuma. Itiyoophiyaan demokiraasii Itiyoophiyaa dagaagsuuf, filannoo ifaa fi demokiraatawaan mootummaa filachuu, heera mootummaa bu’ura cimaa qabsiisuu dandeesseetti. Kanaaf ammo filannoo biyyaalessaa torbaffaa akka carraa guddaatti fayyadamuuf ishee barbaachisee ture. Kanaaf deebii kan ta’u lammiileen miiliyoona 54 caalan filachuuf galmaa’anii guyyaa har’aa kana eeggachaa turaniiru. Kunoo waamicha biyyaa fudhachuun lammiileen baay’inaan bahanii filachaa oolaniiru,halkanis walakkeessaniiru. Seenaa filannoo Itiyoophiyaa keessatti namoonni sa’aatii dheeraa hiriiranii kan itti filatan filannoo addaatis. Filannichi akka hin gaggeeffamne Alagaa fi Baandaan qindoomanii waanti isaan hin goone, gufuun isaan hin tarreessine hin jiru. Haa ta’u malee Waamichi Itiyoophiyaan jaalattoota biyyaaf taasifteef waanti hin danda’amne waan hin jirreef milkaa’inaan xumurameera. Itiyoophiyaanonni karaa nagaa filatanii Itiyoophiyaan mo’atteetti. Ummata waamicha filannoo demokiraatawaa Itiyoophiyaan taasifte fudhatee ganamaa amma halkaniitti filachuun deebii kenneef, sirni heera mootummaa chichee akka dhaabatuu fi lammiileen nagana akka filatan haala mijataa kan uuman qaamolee nageenyaa, daqiiqaa daqiiqaadhaan odeeffannoo wayitaawaa fi sirrii qaqqabsiisaa turan dhaabbilee miidiyaa akkasumasadeemsa filannichaa kan gaggeessan, kan qindeessanii fi kan taajjaban hunda Itiyoophiyaan isaan galateeffatti. Tajaajila komunikeeshinii mootummaa FDRI Caamsaa 25, 2018, Finfinnee Itiyoophiyaa See less

Caamsaa 24/2018(ENA)- Filannoo walii galaa Itiyoophiyaa torbaffaatiin Paartii nuuf mala jedhaniif sagalee kennuusaanii jiraattonni magaalaa Finfinnee yaadasaanii ENA’f kennan ibsan. Har’a Caamsaa 24 bara 2018 ganama sa’aatii 12 irraa eegalee filannoon walii galaa Itiyoophiyaa torbaffaan gaggeeffamaa jira. ENA’n Kutaa magaalaa Araadaa aanaa 6 buufata filannoo ‘Wafcoo Beet’ lamatti kan dubbise obbo Alamaayyoo Taammiruu akka ibsanitti, qama itti amananiif sagaleesaanii kennaniiru. Obbo Birhaanuu Awwaqaa fi obbo Salamoon Nagaasha gamasaaniin, paartii naaf mala jedhaniif bilisa ta’anii sagalee kennuusaanii dubbataniiru. Kutaa magaalaa Ekkaa aanaa 11 buufata filannoo ‘11 sheed’ qaxanaa 4/5 tti osoo filatanii kan argine obbo Taaddasaa Geetaachoo fi adde Xuruwarqi Fiqrasalaam Fiqrayohaannis gamasaaniin, paartii nu gaggeessa nu bulcha jedhanii itti amananiif sagalee kennuusaanii dubbataniiru.

Caamsaa 24/2018(ENA)- Taajjabdoonni filannoo gamtaa dhaabbilee waldaalee siviilii Itiyoophiyaa daangaa tokko malee buufataalee dhaquun adeemsa filannoo taajjabuu danda’uusaanii beeksisaniiru. Gamtichi argannoo gabaasa taajjabbii walakkaa guyyaa filannoo walii galaa torbaffaa ilaalchisee ibsa gaazexessummaa kenneera. Dura taa’aan boordii gamtichaa Saahilasillaasee Abbabaa, gamtichi gabaasa walakkaa guyyaa taajjabdoota filannichaaf bobbaasee dubbisaan dhageessisaniiru. Gamtichi filannoo walii galaa 7ffaaf taajjabdoota taa’anii taajjaban kuma 2 fi 258 akkasumas kan irra deemanii taajjaban 891 walumaa gala taajjabdoota kuma 3 fi 149 bobbaaseera. Taajjabdoonni kunneen buufataalee filannoo kuma 2 fi 258tti bobba’uusaanii ibsaniiru. Akkaataa taajjabbii gamtichaatiin waraqaan sagaleen ittiin kennamu, chaappaan boordichaa, halluu qubaa hin gadhiifne, kan sagaleen itti kenname ittiin saamsaman, galmee filattootaa, saanduqa boordichaa sagaleen itti kennamu dabalatee meeshaaleen filannoo hundu guutamaniiru jedhaniiru. Gabaasota fudhatan keessaa buufataaleen filannoo harka sagaltamii sagal irratti taajjabdoonni daangaa tokko malee gara buufataa dhaqanii taajjabuusaanii eeraniiru.

Caamsaa 24/2018(ENA)- Paartii carraa egeree Itiyoophiyaa fooyya’aa taasisa jedhanii itti amaniif sagalee isaanii kennuusaanii Jiraattonni magaalaa Giincii ibsan. Har’a Caamsaa 24 bara 2018 filannoo walii galaa torbaffaatiin ganama sa’aatii 12 irraa eegalee filannoon gaggeeffamaa jira. Filattoonni naannoo Oromiyaa magaalaa Giincii yaadasaanii ENA’f kennan ganamaan buufata filannootti argamuun filachuusaanii ibsaniiru. Kanneen keessaa Hajjii Raahimatoo Huseen, mirga demokiraasii qabanitti fayyadamuun ganamaan bahanii paartii naaf mala jedhan filachuusaanii dubbataniiru. Paartii siyaasaa Itiyoophiyaa fi ummatasheef ni hojjeta jedhan filachuu isaanii kan ibsan ammoo Tsiggee Taaddasaati. Ijaarsa sirna demokiraasii biyyaaf filannoon murteessaa waan ta’eef bariin bahee filadheera kan jdhan ammo jiraattuu magaalichaa Zannabech Guddataati. Muluu Toleera gamasaaniin, barii sa’aaii 11tti bahuun ofirra darbee paartii ijoollee koo fi biyyaaf ni hojjeta jedhu filadheera jedhaniiru.

Caamsaa 24/2018 (ENA)- Adeemsa filannoo amma ammaatti jiruun qabannaa mirga namoomaa hin malle akka hin argine komishinariin olaanaa Komishinii mirga namoomaa Itiyoophiyaa Birhaanuu Addeelloo ibsan. Gareen Komishinichaa komishinarii olaanaa komishinii mirga namoomaa Itiyoophiyaa Biraanuu Addeelloon durfamu buufataalee filannoo Arbaa Mincii fi Jimmaatti adeemsa filannoo ilaaleera. Komishinariin olaanaa Biraanuu Addeelloo wayita kana akka jedhanitti ,qama miidhamtootaaf illee buufataaleen filannoo mijeeffaman ilaalaniiru. Adeemsa filannoo ulaagaalee filannoo guute taajjabuusaanii dubbataniiru. Adeemsi filannichaa guutummaatti naga qabeessaa fi bu’aa bayii kan hin qabne ta’uu eeranii, adeemsa filannoo amma ammaatti jiruun garichi qabannaa mirga namoomaa hin malle akka hin argine ibsaniiru. Komishinichi naannolee filannoo 175 fi buufataalee filannoo kuma 2 fi 700 caali keessatti filannicha taajjabaa akka jiru ibsaniiru. Karaa Sirna komii filannicharratti komii jiru keessummeessuuf qophaa’een adeemsa filannichaa hordofaa akka jiru himaniiru. Hawaasni waggoota shaman dhufaniif qama isa gaggeessu filannoodhaan kan mirkaneeffatu waan ta’eef ummanni akka biyyaatti filachuuf galmeeffame miiliyoona 54 caalu paartii isaaf malu filachuudhaan mirga heera mootummaan kennameefitti fayyadamuu dhaamaniiru.

Caamsaa 24/2018(ENA)- “Sagaleen koo gatii qaba” amantaa jedhuun bari sa’aatii 11፡30tti magaalaa Jimmaa buufata filannoo Daalool ganda Boosaa Addisitti argamtee kan turte adde Natsaannat Waldasanbat ciniinsuun itti dhaga’amnaan filannoo addaan kuttee bahuuf dirqamtee ture. Hoospitaa dhaqxee daa’ima dhiiraa nagana erga hofkaltee booda dirqama lammummaashee bahuuf cichitee gara buufata filannootti deebiteetti. Mirga filachuutti fayyadamtee erga filattee booda yaada kenniteen,bakkatti argamtee sagalee kennuusheetti guddaa gammaduushee ibsiteetti.

Caamsaa 24/2018(ENA)- Ministirri hoogganaa damee ijaarsaa waajjira muummee paartii badhaadhinaa Fiqaaduu Tasammaa fi kantiibaan Sandaafaa Bakkee Alamaayyoo Tonkoluu Sandaafaa Bakkee buufata filannoo addababayii Sandaafaa Bakkeetti argamanii filataniiru Itiyoophiyaanonni ganama sa’aatii 12 irraa eegaluun filannoo biyyaalessaa torbaffaarratti argamuun filachaa jiru. Haala Kanaan ministirri hoogganaa damee ijaarsaa waajjira muummee paartii badhaadhinaa Fiqaaduu Tasammaa fi kantiibaan Sandaafaa Bakkee Alamaayyoo Tonkoluu buufata filannoo addababayii Sandaafaa Bakkeetti argamanii filataniiru. ‎Filattoonni hedduun ganamarraa eegalee buufataalee filannootti argamuun filachaa akka jiran dubbataniiru. Hirmaannaan guddaan kun ummanni adeemsa demokiraasii irratti amantaa cimaa qabu kan itti agarsiise ta’uu beeksisaniiru. ‎ ‎Kaka’umsi guddaan ummanni filannicharratti agarsiise guddaa kan isa galateeffachiisuu fi akka biyyaatti kan itti boonnudha jedhaniiru. ‎‎ ‎Filattoonni hedduun ganamarraa eegalee buufata filannichaatti argamuun filachaa jiru. #Itiyoophiyaan filachaa jirti #ENA_Afaan Oromoo #filannoo See less

Caamsaa 24/2018(ENA)- Filannoo walii galaa Itiyoophiyaa torbaffaan akkaataa saganteeffameen haala gaariin gaggeeffamaa akka jiru dura teessuun boordii filannoo Itiyoophiyaa Meelaat Warqi Hayiluu ibsan. Dura teessuun boordii filannoo Itiyoophiyaa Meelaat Warqi Hayiluu filannoo waliigalaa torbaffaa gaggeeffamaa jiru ilaalchisuun miidiyaaleef ibsa kennaniiru. Boordiin filannoo adeemsi filannichaa erga eegalamee kaasee filannoof qophii haalduree garagaraa hojjechaa tureera jedhan ibsa kennaniin. Filannichi bilisa, demokiraatawaa fi loogiirraa adda gochuuf hojjechaa turuusaa dubbataniiru. Boordichi qophiilee filannoon duraa xumuree ganama har’aa sa’aatii 12 irraa eegalee filannoon walii galaa torbaffaa gaggeeffamaa jira jedhaniiru. Filattoonni ganama sa’aatii 12 irraa eegalee buufataalee filannootti argamuun bilisummaadhaan filachaa akka jiru ibsaniiru.

Caamsaa 24/2018(ENA)-Kutaaleen hawaasa Finfinnee kutaa magaalaa Nifaas Silki Laaftoo naannoo filannoo 19 ganamaan bahanii filachaa jiru. Filannoon walii galaa 7ffaan har’a barii sa’aatii 12 irraa eegalee gaggeeffamaa jira. Filattoota bariin bahanii filchuuf buufata filannootti argaman keessaa obbo Daanyaachoo Guutaa keessatti argamu. Daanyaachoo Guutaa wayita kana akka jedhanitti, miidhamni qaamaa mirga filachuu kootti fayyadamuurraa nan-daangessine, paartii naaf mala biyyaaf ni fayyada jedhu filadheera jedhaniiru. Qaama miidhamtootaa fi maanguddootaaf dursi kennamee filachuusaanii ibsaniiru. #Itiyoophiyaan filachaa jirti #ENA_Afaan Oromoo #filannoo #TOI See less

Caamsaa 24/2018 (ENA)- Sadarkaa itti aanaa ministira muummeetti hogganaan qindeessaan giddugaleessa ijaarsa sirna demokiraasii fi itti aanaan pirezidaantii paartii badhaadhinaa Adam Faaraah naannoo Somaalee aanaa Shinilleetti argamuun Sagalee kennaniiru.

Caamsaa 24/2018(ENA)- Af-yaa’iin mana mana maree bakka bu’oota ummataa Taaggasaa Caafoo magaalaa Argaa Mincitti argamuun sagalee kennaniiru. Af-yaa’iin mana maree bakka bu’oota ummataa Taaggasee Caafoo naannoo filannoo Arbaa Mincitti argamuun sagalee kennaniiru. Lammiileen ganama sa’aatii 12 irraa eegaluun naannoo filannoo Arbaa Minci jalatti kan argaman buufataalee filannoo 227tti sagalee kennaa jiru.

Caamsaa 24/2018(ENA)- Af-yaa’iin mana maree federeeshinii Aganyoo Tashaagar bakka itti dorgoman magaalaa Gondor buufata filannoo tokkotti sagalee kennaniiru. Dabalataanis mana maree naannoof kan dorgoman dursaan kantiibaa magaalaa Gondar Chaalaachoo Daanyaawus sagalee kennaniiru.

Caamsaa 24/2018(ENA)- Ministirri nageenyaa Mahaammad Idriis bakka itti dorgoman magaalaa Gondar naannoo filannoo lamatti argamuun sagalee kennaniiru. Magaalaa Gondar buufataalee filannoo garagaraatti ganama sa’aatii 12 irraa eegalee filannoo walii galaa torbaffaaf sagaleen kennamaa jira. Magaalaa Gondaritti naannolee filannoo lamaa fi buufataalee filannoo 240tu jiru. Jiraattonni magaalaa Gondar har’a ganama sa’aatii 12 dura bahanii buufata filannootti argamuun filachaa jiru. Filattoonni magaalattii ganda Shawaa Barri buufata filannoo ‘yeseetoochi Wafcoo’tti sa’aatii 12 irraa eegaluun filachuu eegalaniiru.   Dargaggoonni, Qaama miidhamtoonni, maanguddoonnii fi kutaaleen hawaasaa garagaraa filannicharratti hirmaachaa jiru. Ministirri nageenyaa Mahaammad Idriis bakka itti dorgoman magaalaa Gondar naannoo filannoo lamatti argamuun Buufata ‘seetooch Wafcoo’tti argamanii filataniiru. Dabalataanis hogganaan biiroo magaalaa fi bu’ura misooma naannoo Amaaraa Dr. Mollaa Malkaamuu fi mana maree federeeshiniitti barreessituun koree dhaabbataa hariiroo mootummootaa, tokkummaa demokiraasii fi barsiisa heera mootummaa adde Baanchiiyirgaa Mallasaa filataniiru.

Caamsaa 24/2018 (ENA)-Naannoo Oromiyaa magaalota Gimbii, Amboo fi Naqamtee keessatti adeemsi kenniinsa sagalee Filannoo waliigalaa 7ffaa ganama sa'aatii 12:00 jalqabee gaggeeffamaa jira. Magaalaa Gimbiitti kan argaman filattoonni ganama barraaqaan ka'uun, buufataalee filannoo isaanitti dhiyoo jiranitti argamuun sagalee isaanii kennaa jiru. Magaalaa Gimbiitti jiraataa ganda Warra sayyoo kan ta'an Obbo Oljirraa Tasgaraa, ganamaan ka'anii sagalee isaanii kennuu isaanii ibsaniiru. Yaada kan kennan kan biraan jiraattuu Magaalaa Gimbii ganda 06 kan ta'an Aadde Roomee Abrahaam gamasaaniitiin, paartii faayidaa waliigala biyyattiitiif ni mijata jedhaniif sagalee isaanii kennuu dubbataniiru. Magaalaa Ambootti, buufata filannoo Amboo tokko jalatti buufataalee filannoo 42n argaman hunduma keessatti, raawwachiistonni filannoo fi taajjabdoonni argamanii adeemsi kenninsa sagalee gaggeeffamaa jira. Ummanni filataanis mirga isaatti fayyadamuuf halkan ka'ee buufataalee filannootti argamuun sagalee isaa kennaa jira. Haaluma walfakkaatuun, Magaalaa Naqamteetti Buufata Filannoo Addabaabaayii Masqalaatti adeemsi kenniinsa sagalee Filannoo Waliigalaa 7ffaa ganama sa'aatii 12:00 irraa jalqabee gaggeeffamaa jira. Adeemsa kanaanis, raawwachiistonni filannoo fi taajjabdoonni bakka argamanitti ummanni filataan sagalee isaa kennaa jira.

Caamsaa 24/2018 (ENA)- Filannoo biyyaalessaa 7ffaatiin Paartii siyaasaa bakka nu bu’a jedhanii amanan karaa demokiraatawaatiin filachuusaanii dargaggoonni magaalaa Shaggar ibsan. Filattoota keessaa Baaroo Xilahuun fi Gammachiis Sambatoo akka ibsanitti, filannoo walii galaa kanarratti hirmaachuuf jalqabarraa eegalee qophii barbaachisaa gochaa turaniiru. Karaa wal fakkaatuun kantiibaan kutaa magaalaa Burraayyuu obbo Abaataa Asraat buufata filannootti argamuun kan filatan yoo ta’u, gaggeessaa ofii karaa demokiraatawaa filachuun qaroomina ta’uu ibsaniiruu.