Fulbaana 30/2019 (ENA) Miseensonni hidhattoota Naannoo Tigraay keessa socho’an gara haaromsaatti akka galaniif wiirtuleen simannaa bakkeewwan garagaraatti qophaa’uu isaa Komishiiniin Haaromsaa Biyyaalessaa beeksiseera. Itti aanaan komishineera Komishinii Haaromsaa Biyyaalessaa, Birgaadeer Jeneraal Darribee Makuriyaaw haala yeroo ilaalchisuun ibsa miidiyaaf kennaniiru. Birgaader Jeneraal Darribee Makuriyaaw ibsa kennaniin, Yeroo ammaa hidhattoonni Tigiraay keessa socho'an gara wiirtulee mootummaan qopheesseetti galuuf waamicha eeggachaa jiru jedhaniiru. Kanaaf, Komishinichi hidhattoota kana simachuudhaan gara jireenya nagaatti akka deebi'aniif qophii barbaachisaa ta'e hundumaa taasisuu isaa ibsaniiru. Hidhattoonni gara wiirtulee komishinichi qopheessetti dhufuun gara jireenya nagaatti akka deebi'an waamicha dhiheessaniiru. Mootummaan godinaalee fi magaalota garagaraatti wiirtulee simannaa qopheessuu isaa eeruun; Godina Kibbaatti magaalota Maaycewuu fi magaala Mahooniitiin; Godina Kibba Bahaatti immoo wiirtulee magaalaa Maqallee keessatti argamanitti akka galan Birgaader Jeneraal Darribee gaafataniiru. Godina Bahaatti magaalota Addigiraatii fi Wuqrootiin; Godina Gidduugaleessaatti magaalota Adwaa, Aksumii fi Abii Addiitti akkasumas Godina Kaaba Dhihaatti magaalaa Shiree keessatti wiirtulee simannaa jiranitti akka galan waamicha dhiheessaniiru. Kanaanis kanneen hidhattoota kana simatan qophaa’uu isaanii eeruudhaan, hidhattoonni carraa kanatti fayyadamanii gara jireenya nagaatti dhufuun ofis akka baraaran waamicha dhiheessaniiru. Yeroo ammaa ummanni Tigiraay garee faallaa nagaa kan mormu ta'uu eeruudhaan, ammas hidhattoonni gara wiirtulee qophaa'aniitti galuudhaan gara jireenya nagaatti akka deebi'an taasisuu keessatti gahee isaanii akka bahatan waamicha dhiheessaniiru. #Mootummaa Ida'amuu

Naannoon Oromiyaa ijaarsa Itoophiyaafi utubaa itti fufinsa biyyaati. Ummanni Oromoo, Sirna Bulchiinsa Gadaa tokko ijaarratee jiruu fi jireenya hawaasummaa, siyaas-dinagdee fi misoomaa isaa gaggeeffachaa tureera. Kana cinaattis, sabaa fi sablammoota ollaan nagaa qabaatee, walooma leellisee, jaalala qooddatee, tokkummaan hariiroo waliin jireenya hawaasummaa isaa gabbisee baroota dheeraaf ummata waliin jiraachaa turedha.   Naannoon Oromiyaa, Naannolee hedduu waliin daangaa bulchiinsaa qooddatee wayita waliin jiraatu, sabaa fi sablammoota hedduu waliin duudhaalee waloo waliif qooduun nagaafi jaalalaan waliin jiraachaa tureera. Guyyaan Saboota, Sablammootaa fi Ummattoota Itoophiyaa waggoottan darban keessatti kabajamaa ture akka milkaa’uufis Naannoon Oromiyaa gahee olaanaa taphachaa kan ture yammuu ta’u, bara kana ammoo, Ummattoota Obbolaa isaa qe’ee isaatti simata. Aadaa fi duudhaa qabuun keessummeessee, guddummaa Oromummaa, fakkeenya abbaa biyyummaa qabu gochaan kan itti dhugoomsudha.   Kana milkeessuudhaafis, Oromiyaan Magaalaa Jimmaatti jila tokkummaa, obbolummaafi waloomaa sabaafi sablammoota walitti fidu qopheessuu irratti argamti. Kanaafis, milkaa’ina hojii kanaaf, sadarkaa Naannootti Mana Maree Federeeshinii Biyyaalessaa waliin qindaa’uun akkaataa itti hojichi milkaa’u irratti bakka Afa-yaa’iin Caffee Oromiyaa Abdusalaam Waariyoo argamanitti Waajjira Caffeetti mari’atamee jira.   Bifuma walfakkaatuun, Magaalaa Jimmaatti Hooggansi Gurmaa’iinsa Haaraan Godina Kibba Lixa Oromiya, Magaalaan Jimmaa fi Yuunivarsiitiin Jimmaa bakka Sadarkaa Itti Aanaa Pireezidaantiitti Bulchaan Kibba Lixa Oromiyaa Dr.Rashaad Kamaal, Kantiibaan Magaalichaa Obbo Xahaa Qamarii fi Pireezidaantiin Yuunivarsiitii Jimmaa Dr. Darajjee Ingidaa argamanitti Magaalaa JImmaatti qooda fudhattoota hunda waliin mariin gaggeeffamejira. Madda caffee Oromiyaarraa

  Ministirri Muummee Dooktar Abiyyi Ahimad, Obbo Geetaachoo Raddaa Fulbaana 30,2019 irraa eegalee Gorsaa Dhimmoota Baha Afrikaa gochuun irra deebiin muudaniiru  

Fulbaana 29/2019(ENA)- Hojiiwwan Siyaasaa , Nageenyaa fi misoomaa yeroo kamiyyuu caalaa cimee itti fufa jedhan, Sadarkaa Itti Aanaa Pirezidaantii Naannoo Oromiyaatti Bulchaan Godina Lixa Oromiyaa Obbo Masfin Malaakuu. Karoora Of danda'uu qopheessuun,hojiiwwan imala Badhaadhinaa saffisiisan irratti xiyyeeffannoo olaanaadhaan kan hojjetamu ta’uu Obbo Masfin ibsaniiru. Godina Lixa Oromiyaatti Mariin Hojii Siyaasaa, nageenyaa fi misoomaa bu’a qabeessa ta’ee itti fufsiisuuf karoora of danda'uu milkeessuu irratti xiyyeeffate geggeeffamee jira. Maree kanaanis Hirkatummaa irraa gara oomishtummaatti ce'uu, galii guddisuu, carraa hojii uumuu, jiruuf jireenya hawaasa keenyaa fooyyeessuun Badhaadhinaa hunda galeessa itti fufisa qabu milkeessuuf cimee akka hojjettamu ibsamee jira.Madda Koominikeeshinii Godinichaarraa #Mootummaa Ida'amuu

Barruun Nagaarii Itti fayyadama bishaan laga Abbayyaa fi fedhii hulaa galaanaa Itoophiyaa bal’inaan ibsiteetti Ministirri Muummee Doktar Abiyyi Ahimad Fulbana 25/ 2019 hundeeffama Mootummaa Ida’amuu irratti, "Qaroomiinsi Itoophiyaa hulaa galaanaa malee dhugoomuu hin danda'u" jechuun biyyattiin hulaa Galaanaa akka argattu cimsitee akka hojjettu mirkaneessaniiru. Tattaaffiin kun marii nagaan, fayyadamummaa waliinii fi seera "kennanii fudhachuun" akka gaggeeffamu hubachiisuun dhimma kana Gaanfa Afrikaa, Galaana Diimaa fi Baha gidduugaleessaatti haala jii’oo polotikaa fi dinagdee waliin walqabsiisuun dhihaateera. Barruun kun maxxansa ishee fulbaana 2019n irratti mataduree 'Daandii olka’insa Itoophiyaa Abbayyaa hanga Siyaasa galaanaa diimaatti ' muddamsa jiru qabeenya bishaanii, Hulaa galaanaa , daldala Idil- Addunyaa fi dhimmoota tasgabbii naannoo xiinxalteetti. Akka Xiinxala barruu kanaatti , Abbayyaa fi Galaana Diimaani uumamaan qaama bishaan adda addaa ta'anis, xiinxala jii’opolitikaa ammayyaa keessatti itti fayyadama bishaanii, fayyada diinagdee, hulaa galaanaa fi dhimmoota tasgabbiin walitti hidhamaniiru. Lagni Abbayyaa Itoophiyaa fi biyyoota sululichaaf faayidaa Anniisaa fi misoomaaf faayidaa kan qabu yoo ta'u, Galaana Diimaani immoo Afrikaa, Eeshiyaa fi Awurooppaa kan walqunnamsiisu karra daldala idil-addunyaa fi dabarsa Galaanaa murteessaadha. Keessattuu Hidha haaromsaa Guddicha Itoophiyaa, gaaffii bishaan Abbayyaa haqaa fi fayyadamummaa waliiniin bulchuu fi fedhii hula galaanaa Itoophiyaa dhiibbaa siyaasaa fi tasgabbii naannoo irratti qaban burruun kun bal’inaan xiinxalteetti. Waliigaltee bishaanii bara 1929 fi 1959 fayyada biyyoota malkaa gubbaa gahaatti kan hin hammanne ta'uu ibsuun, itti fayyadama bishaan lagichaa haqa, waliin hojjechuu fi fayyada waliinii irratti hundaa'uu akka qabu ibsiti.. Itoophiyaan bara 1993 A.L.I booda hula galaanaa dhabuu ishee hordoftee, dhimmi kun fayyada diinagdeen olitti tasgabbii biyyaalessaa fi fedhii misooma yeroo dheeraa waliin akka walqabatu barruun kun qaaccesseera. Hulaa Galaanaa argachuun baasii daldalaa xiqqeessuu, filannoo buufataa daldalaa babal'isuu fi guddina diinagdee deeggaruuf murteessaa ta'uu isaas ibseera. Gama biraatiin, Galaanni Diimaani hulaa daldala Eeshiyaa, Afrikaa fi Awurooppaa waliin kan walquunnamsiisu hula galaanaa tarsiimo’aa ta’uusaan , haalli tasgabbii naannichaa walitti dhufeenya naannoo irra darbee yaa'a daldala idil-addunyaa miidha. Barruun kun barbaachisummaa jii’opolitikaa Galaana Diimaa Sulula Suweez fi Babel-Mandeb waliin wal-qabsiisee kan xiinxalte yoo ta'u, dorgommiin humnaa naannichatti gaggeeffamu yaaddoo daldalaa fi tasgabbii akka hammeessu xiinxalteetti. Odeeffannoo dabalataaf liinkii kana cuqaasaa https://www.ena.et/web/negari/w/negari_9696604

Fulbaana 29/2019 (ENA) Itoophiyaan dameewwan misooma waliigalaa fi guddina daa’immanii sadarkaa jalqabaa irratti milkaa’inni galmeessite Afrikaaf abdii haaraa kan uumu ta’uu Itti Aanaan Pirezidaantii Naayijeeriyaa Kaashiim Sheettiimaan ibsan. Jilli Itti Aanaa Pirezidaantii Naayijeeriyaa Kaashiim Sheettiimaan durfamu daawwannaa hojii mootummaa taasisuuf Itoophiyaa daawwachaa jira. Jilichi har’a Kantiibaa Bulchiinsa Magaalaa Finfinnee Aadde Adaanech Abeebee waliin guddina daa’immanii fi misooma magaalotaa irratti muuxannoo waljijjiiruuf marii taasisaniiru. Itti Aanaan Pirezidaantii Naayijeeriyaa Kaashiim Sheettiimaan marii isaaniin, hojiiwwan misoomaa bu’a qabeessa ta’an Itoophiyaa fi Magaalaa Finfinnee keessatti hojjetamaa jiran, akkasumas bu’aawwan damee guddina daa’immanii sadarkaa jalqabaa irratti galmaa’an dinqisiifachuu isaanii ibsaniiru. Guddinni Itoophiyaa kan mul’atuu fi qabatamaa ta’uu kan eeran Sheettiimaan, Mootummaan Itoophiyaa kunuunsa daa’immanii fi guddina isaanii sadarkaa jalqabaa irratti xiyyeeffannoo addaa kennuu isaa dinqisiifataniiru. Hojiileen misoomaa fi sirnoonni kunuunsa daa’immanii Itoophiyaa keessatti hojiirra oolaa jiran jireenya namoota hedduu fooyyessuuf gumaacha olaanaa akka qabanis ibsaniiru. Itti Aanaan Pirezidaantichaa, Ministirri Muummee Itoophiyaa Doktar Abiyyi Ahimad fayyadamummaa fi nageenya uummata isaanii dursa kennuun hojjechaa jiraachuu isaanii dinqisiifataniiru. Naayijeeriyaa fi Itoophiyaan dameewwan garaagaraa irratti tumsa isaanii cimsuun bu’aa gaarii galmeessuu yoo danda’an, jaarraa kana jaarraa Afrikaa gochuun akka danda’amu amantaa qabaachuu isaanii ibsaniiru. Afrikaan qonnaa fi industirii irratti qofa hundaa’uurraa darbitee, gara dinagdee beekumsa irratti hundaa’ee fi teeknooloojii ammayyaa, keessumaa teeknooloojii hubannoo-namtolchee fi daataa gurguddaa irratti xiyyeeffatuutti ce’uuf dandeettii yaaduu, kalaqaa fi waa uumu dargaggootaa guddisuun murteessaa ta’uu hubachiisaniiru. Dabalataanis, Mootummaan fi uummanni Naayijeeriyaa muuxannoo idil-addunyaa bu’aa qabeessa ta’an irraa barachuu, akkasumas tumsa Itoophiyaa waliin qaban dameewwan garaagaraa irratti caalaatti cimsuuf qophii ta’uu isaanii ibsaniiru. Mootummaa Ida’amuu! Biyya Guddoo, Ummata Guddaa fi Mul'ata Guddaa!

  Fulbaana 29/2019(ENA)- waggoottan shanan dhufan Imala badhaadhina Itoophiyaa eegalame itti fufsiisuuf kutannoodhan ni hojjeenna jedhan miseensonni Kaabinee Mootummaa Ida’amuu haaraa muudaman. miseensonni Kaabinee Mootummaa Ida’amuu haaraa muudaman keessaa Ministirri Maallaqaa Dr.Fitsum Asaffaa, Ministirri Barnootaa Pirofeesar Birhaanuu Naggaa fi Ministirri Dargaggoo fi Ispoortii Dr. Akliiluu Taaddasaa waggoottan shanan dhufan imala badhaadhina jalqabame itti fufsiisuf kuttannoodhan akka hojjetan himaniru. Ministirri Maallaqaa Dr.Fitsum Asaffaa waggottan saddeettan darban qabeenya dilbii Itoophiyaa badhaadhinatti jijjiiruuf imala eegalame cimsinee itti fufsiisuun tarsiimoo ida’amuu hojiirra oolchuun dhimmoota bu’aa argamsiisan irratti xiyyeffannoon kan hojjetan ta’uu ibsaniiru. Bakka ramadamnerratti amanamummaan tajaajiluun itti quufinsa uummataa dabaluu, tajaajila si’ataa kennuu fi dijiitaala taasisuuf ni hojjetama jedhaniiru. Ministirri Barnootaa Pirofeesar Birhaanuu Naggaa gama saaniin waggootan shanan dhufan riifoormii eegalame itti fufsiisuun galmaan ga’uuf ni hojjenna jedhaniiru. Dhimmi ijoon Faayidaa biyyaalessaa bu’uura godhachuun deemuu ta’uu ibsuun, dhimmi mootummaa faayidaa biyyaalessaa eegsisuu waan ta’eef garaagarummaa siyaasa qabnuun olitti dhimma biyyaalessaa irratti tokkummaan ni hojjenna jedhaniiru. Ministirri Dargaggoo fi Ispoortii Dr. Akliiluu Taaddasaa gamasaaniin mootummaan ida’amuu dargaggootaaf xiyyeefannoo kennee kan hojjetu ta’uu ibsaniiru.   Humnaa fi dandeettii dargaggootaa misoomaaf oolchuun badhaadhina biyyaa eegalame dhugoomsuuf kan hojetan ta’uu dubbataniiru. Mootummaan Ida’amuu dargaggoo fi ispoortii bifa haaraan gurmeessuun dandeettii damee Kanaan jiru hojiitti hiikuun fayyadamummaa dargaggootaa mirkaneessuuf kan hojjetan ta’uu ibsaniiru. #Mootummaa Ida'amuu Biyya Guddoo, Ummata Guddaa fi Mul'ata Guddaa!  

  Fulbaana 29/ 2019(ENA)- Guyyaan Alaabaa 19ffaan Wiixata dhufu Onkoloolessa 2/2019 akka kabajamu Manni Maree Bakka Bu’oota Uummataa beeksise. Guyyichi mata duree “ Alaabaan Keenya Waliigaltee biyyaalessaa fi tokkummaa keenyaaf” jedhuun bakka Pireezidaantiin RDFI Taayyee Atsqasillaaseen argamanitti sa’aatii 3:00 irraa eegalee Mana Marichaatti haala ho’aa ta’een akka kabajamu beeksiseera. Guyyaan kabaja Ayyaana Alaabaa Biyyaaleessaa wagga waggaatti seensa Ji'a Onkololeessaa guyyaa Wixataa torbee jalqabaa akka kabajamu labsii lakk. 863/2006 keewwata 2 irratti labsamee jira. haaluma kanaan Ayyaanni kun guutuu biyyaatti naannoolee fi bulchiinsota magaalotaatti, Waajjiraalee mootummaatti, maneen barnootaatti, Imbaasiiwwan Itoophiyaa biyya alaa jiranii fi Qonsilaatti akka kabajamu odeeffannoon Mana Maree Bakka bu’oota Ummataarraa argame mul’isa

Fulbaana 29/2019 (ENA) Miseensonni Mana Maree Ministiroota Mootummaa Ida'amuu Haaraan Itti gaafatamummaa isaanii ni bahatu jennee amanna jechuun jiraattonni Magaalaa Finfinnee yaada isanii ENA’f kennan ibsan. Ministeerri Muummeen Dr. Abiyyi Ahimad Mana Maree Bakka Bu'oota Ummataaf yeroo ibsan Miseensota mana maree ministirootaa mootummaa Ida'amuu haaraa galma biyyaalessaa milkeessuuf fi adaraa ummataa gahumsaan bahuuf hooggantoonni yeroo kamiyyuu caalaa naamusaa olaanaa qabaachuu akka qaban hubachiisaniiru. Hooggantoonni hojii isaanii guyyaa guyyaa keessatti naamusa gaariin miira tajaajiltummaan, harkaa fi garaasaanii qulqulluudhaan tajaajiluu akka qabanis hubachiisaniiru. Miirri tajaajiltummaa dhugaan kun ummata biratti amantaa jiru cimsuudhaan nagaa waaraa, misoomaa fi adeemsa ijaarsa dimokraasii mirkaneessuu keessatti shoora guddaa akka qabu ibsaniiru. Jiraattonni Finfinnee ENA’f yaada kennan ministiroonni haaraa muudaman ijaarsa mootummaa cimaa fi milkaa'aa raawwachuudhaan gumaacha ol’aanaa akka taasisan ni amanu. Jiraattota yaada isaanii kennan keessaa Doktar Taammiraat Warquu akka jedhanitti; qophiin barnootaa fi muuxannoon hojii ol’aanaan ministeerota haaraa muudamanii mul’ata misooma hunda-galeessa biyyattiin qabatte milkeessuuf dandeettii ol’aanaa ni uuma. Keessattuu, yaadama Ida'amuu bu'uura godhachuudhaan damee Teeknoolojii fi hubannoo namtolcheen hojiiwwan kalaqaa fi misooma dijiitaalaa gara sadarkaa ol’aanaatti ni ceesisu jedhaniiru. Obbo Masfin Mallasaa gamasaaniitiin; mul’ata biyyaalessaa gurguddaa dhugooomsuu fi Itoophiyaa gara badhaadhina ol’aanaatti ceesisuuf galma qabameef caasaa qaama raawwachiisatuu fi qophiin muudamtootaa faayidaa ol’aanaa akka qabu ibsaniiru. Jiraataan magaalattii biraan Obbo Malaakuu Taaddalaa, hooggantoonni mana maree ministirootaa haaraa keessatti hammataman dandeettiisaanii qindeessuun fayyadamuu fi gara hojiitti jijjiiruudhaan, imala misoomaa fi guddina hunda-galeessa biyyattiin qabatte milkeessuuf akka hojjetan amantaa isaanii ibsaniiru. Muudamtoonni gaaffii fi fedhii ummataa bu'uura godhachuudhaan raawwii dhaabbilee fooyyessuu fi tajaajila hunda-galeessa ariifachiisuu keessatti shoora isaanii bahuu akka qaban Obbo Taayyee Mangistee ibsaniiru. Obbo Addisuu Dinquu gamasaaniin hundeeffamni qaama raawwachiistuu haaraan guddina biyyaa fi fooyya'insa raawwii dhaabbileetiif dandeettii ol’aanaa qabatee kan dhufedha jedhaniiru. Obbo Nugusuu Girmaa gamasaaniin; dubartoonni gahumsaa fi qophii barnootaa qaban sadarkaa sadarkaadhan gara hooggansaatti dhufuu danda'uu isaanii ibsuun hirmaannaa wal-qixxummaa fi gahee murteessummaa dubartootaa cimsuu keessattis gumaacha guddaa ni qabaata jedhaniiru. Mootummaa Ida'amuu. Biyya Guddoo, Ummata Guddaa fi Mul'ata Guddaa!

Ministirri Muummee Doktar Abiyyi Ahimad har’a miseensota Kaabinee Mootummaa Ida’amuu muudamaaf dhiyaatan Mana Maree Bakka Bu’oota Ummataatti dhiyeessuun, muudamni isaanii akka ragga’u taasisaniiru. Muudamni miseensota Kaabinee kun dandeettii fi fedhii uummata tajaajiluu, qophii barnootaa, muuxannoo hojii fi bu’aqabeessummaa waliigalaa bu’uura godhatee kan raawwatamedha. Akka waliigalaatti, itti gaafatamummaa fi imaanaa guddaan Itoophiyaa gara sadarkaa guddinaa fi olka’iinsaa fooyya’aatti ceesisuu isaan irra kaa’ameera. Kana malees, raawwii hojii olaanaadhaan guddina biyyattii itti fufsiisuu fi jireenya guyyaa guyyaa lammiilee keessatti jijjiirama mul’atu fiduuf ciminaan hojjechuun isaan irraa eegama. Mootummaan Ida’amuu itti fufiinsa dhaabbilee, ijaarsa sirnaa fi bu’aqabeessummaa tajaajila uummataa irratti hundaa’uun adeemsa ijaarsa biyyaalessaa itti fufsiisuuf xiyyeeffannoo guddaa kennuun akka hojjetu ni eegama. Milkaa’inni dhaabbilee mootummaa kan madaalamu tajaajila uummataaf saffisaa, si’aawaa fi bu’a qabeessa ta’een waan ta’eef, ministiroonni haaluma kanaan qophaa’anii hojjechuu qabu. Lammiileen fayyadamaa akka ta’an mirkaneessuu fi tajaajiltoota dhugaa uummataa ta’uuf ciminaan hojjechuu qabu. Ministirri Muummee Doktar Abiyyi Ahimad, kaadhimamtoonni miseensota Kaabinee Mootummaa Ida’amuu dandeettii fi fedhii hojii raawwachuu, muuxannoo hojii fi qophii barnootaa akka ulaagaalee bu’uuraa ta’anitti fudhatamuun, fayyadamummaa lammiilee mirkaneessuu fi tajaajiltoota dhugaa uummataa ta’uuf qophaa’uu akka qaban hubachiisaniiru. Muudamni mootummaa “kan ittiin bashannanan osoo hin taane, kan ittiin hojjetan” fi imaanaa uummataa olaanaa ta’uu kan eeran Ministirri Muummee Doktar Abiyyi Ahimad, miseensonni Kaabinee biyya isaanii fi uummata isaanii amanamummaa fi qulqullina yaadaatiin tajaajiluuf ciminaan akka hojjetan dhaamaniiru. Mootummaan Ida’amuu carraa biyya bulchu argate kanaan, hojiiwwan misoomaa jalqabaman itti fufsiisuu, ijaarsa dhaabbilee cimsuu, olaantummaa seeraa mirkaneessuu fi fayyadamummaa lammiilee itti fufsiisuuf hojjechuun isaa eegama. Mootummaa Ida'amuu.

Fulbaana 29/2019 (ENA): Jiraattonni Godina Kibba Lixa Oromiyaa Magaalaa Mattuu Kallattiiwwan xiyyeeffannoo mootummaa ida'amuu haaraa waggoota shanan dhufaniif qabaman, fayyadamummaa hunda-galeessa uummataa fi fakkeenyummaa badhaadhina Itoophiyaa Afrikaatti mirkaneessuuf qabaman milkeessuuf qooda isaan irraa eegamu bahuuf akka hojjetan ibsaniiru. Waggoota shanan darbanitti Damee Qonnaa, Misoomni Magaalaa, Fayyaa, Barnoota, Misooma Hawaasummaa, Ashaaraa magariisaa fi dameewwan biroon bu'aawwan nama gammachiisan galmeeffamuu isaanii kan yaadachiisan jiraattonni kun, waggoota shanan dhufanittis bu'aa caaluu ni galmeessama jedhanii kan amanan ta'uusaanii kaasaniiru. Jiraataan magaalaa Mattuu Obbo Dassee Danuu akka jedhanitti, mootummaan fulbaana 25/2019 hundaa'e waggoota shanan darbanti dameewwan garaa garaatiin hojiiwwan misoomaa raawwateen biyyattiin imala guddina ariifachiisaa akka galmeessiftu taasisuu ibsaniiru. Mootummaan ida'amuu haaraas waggoota dhufan keessatti hojiiwwan misoomaa jalqabaman caalaatti cimsee akka itti fufu amantaa qaban ibsaniiru. Keessattuu mootummaan ida'amuu haaraa waggoota shanan dhufaniif nagaa mirkaneessuu, dameewwan misooma hawaasummaafi diinagdeefi fayyadamummaa, dippiloomaasiifi qunnamtii alaatiin, akkasumas dhimma hula galaanaa fi kallattiiwwan xiyyeeffannoo biroo irratti kutannoo guddaa kan irraa eegalamu ta'uu isaas eeraniiru. Dargaggoo Amaanu’eel Warquu gama isaatiin, mootummaan ida'amuu haaraa waggoota shanan dhufaniif kallattii xiyyeeffannoo ta'u jedhee dhimmootni kaa'e Itoophiyaan fakkeenya badhaadhina Afrikaa ta'uu ishee kan murteessan ta’uu dubbateera. Keessattuu hojiiwwan damee qonnaafi indaastiriitiin waggoota darbanti jalqabaman cimanii kan itti fufan ta’uus dubbateera. Aadde Faleq'iissaa Tamaam gama isaaniitiin mootummaan haaraa bara hojii isaanii dhufan keessatti hojiiwwan biyyaa caalaatti fayyadan ni raawwata jedhanii akka amanan dubbataniiru. Kanaafis , milkaa'ina nagaafi kallattiiwwan misoomaa birootiif mootummaa cinaa kan dhaabbatan ta'uu isaanii jiraattonni dubbataniiru.

Fulbaana 28/2019 (ENA) Itti Aantuu Barreessaa Olaanaa Dhaabbata Mootummoota Gamtoomanii (UN) Aminaa Muhaammad daawwannaa hojiitiif Finfinnee galaniiru.   Itti Aantuun Barreessaa Olaanaa yeroo Buufata Xiyyaara Idil-addunyaa Boolee gahan, De’eetaan Ministira Dhimma Alaa Ambaasaaddar Birhaanuu Tsaggaayeetiin simannaan taasifaseeraf.   De’eetaan Ministiraa akka ibsanitti, daawwannaan Itti Aantuu Barreessaa Olaanaa kun dhimmoota waloo Itoophiyaan fi Dhaabbanni Mootummoota Gamtoomanii dursa kennaniif irratti marii’achuu fi hariiroo waggoota dheeraa qaban caalaatti cimsuuf carraa dabalataa kan uumu ta'uu ibsaanii odeeffannoon Ministeera Dhimma Alaa irraa argame mul’isa

Miseensota Kaabinee Mootummaa Ida’amuu Dooktar Abiyyi Ahimad Mana Maree Bakka Bu’oota Ummataaf dhiyeessun muudaman.   Haaluma kanaan: 1. Dooktar Geediyoon Xiimootiwoos – Ministira Dhimma Alaa 2. Obbo Addisuu Araggaa – Ministira Qonnaa 3. Dooktar Fitsum Asaffaa-Ministira Maallaqaa 4. Obbo Mahaammad Idiriis- Ministira Raayyaa Ittisa Biyyaa 5. Pirofeesar Birhaanuu Naggaa – Ministira Barnootaa 6. Aadde Haannaa Ar’aayaasillaasee – Ministira Haqaa 7. Aadde Yaasmiin Wahaabirabbii- Ministira Daldalaafi Walitti Hidhamiinsa Naannawaa 8. Dooktar Fissahaa Yittaagasuu- Ministira Indaastirii 9. Dooktar Injiinar Habtaamuu Ittafaa- Ministira Bishaaniifi Inarjii 10. Dooktar Maqdas Dhaabaa- Ministira Fayyaa 11. Obbo Awwaluu Abdii- Ministira Hojiifi Ogummaa 12. Aadde Ayinaaleem Nigusee – Minsitira Galiiwwanii 13. Obbo Barakat Fissahaatsiyoon – Ministeera Tarsiimoo Biyyaalessaa 14. Aadde Salamaawiit Kaasaa – Ministira Aadaa fi Turizimii 15. Aadde Alemtsahaay Phaawuloos – Ministira Albuudaa 16. Obbo Sadaat Nashaa – Ministira Loojistiksii 17. Aadde Shawiit Shaankaa – Ministira Dhimma Dubartootaa fi Hawaasummaa 18. Obbo Muusaa Adam – Ministira Nageenyaa 19. Aadde Fireehiyiwaat Taammiruu – Ministira Innooveeshinii fi Teeknooloojii 20. Injinar Mahammaad Abdurrahimaan – Ministira Magaalaa fi Bu’uuraalee Misoomaa 21.Dooktar Injinar Sulxaan Walii - Ministira Jallisii fi Gammoojjii 22. Dooktar Akliiluu Taaddasaa - Ministira Dargaggoo fi Ispoortii ta’uun kaadhimamaniiru.

Fulbaana 28 /2019 (ENA): Gamtaan Awurooppaa mootummaa Itoophiyaa haaraa ijaarameef ergaa baga gammaddanii jedhu dabarseera.   Gamtaan Awurooppaa ibsa kenneen mootummaan haaraan kun ummata Itoophiyaa tajaajiluu fi biyya nagaa, tasgabbii fi badhaateef bu’uura kaa’uu irratti milkaa’ina hawweera. ‎#Mootummaa Ida'amuu #Biyya Guddoo, Ummata Guddaa fi Mul’ata Guddaa! Miseensa Maatii ENA ta’aa: https://www.ena.et/web/links

  Fulbaana 28/2019(ENA Miseensonni kaabinee hawwii Itoophiyaa kan dhugoomsanii fi ummata amanamummaadhan kan tajaajilan ta'uu akka qaban Ministirri Muummee Dr.Abiyyi Ahimad ibsan. Miseensi Mana Maree Bakka Bu'oota Ummataa 7ffaa bara hojii 1ffaa walgahii idilee 1ffaa isaanii gaggeessaniiru. Ministirri Muummee Dr.Abiyyi Ahimad kaabinee mootummaa Ida’amuu Mana Maree Bakka Bu'oota Ummataatiif dhiyeessaniiru. Manni marichaas muudama kaabinee kanaa mirkaneesseera. Ministirri Muummee Dr.Abiyyi Ahimad muudamicha ilaalchisee yaadonni miseensota mana maree irraa kennaman guutummaatti kan fudhatamuufi ijaarsa kan qabu ta'uu ibsaniiru. Ulaagaa jalqabaa irratti miseensonni kaabinee yeroo hunda barachuuf qophaa'oo ta'uun akka isaan irraa eegamu dubbataniiru. Harki keenyaa fi garaan keenya qulqulluu ta'uu akka qabuu fi tajaajiltoota ta'uu akka qabanis ibsaniiru. Ministiroonni kunis hanna irratti qabsaa’uu, fi ittisuu irratti cimanii hojjechuu akka qabanis ibsaniiru. Ministiroonni kunneen kutannoodhaan hojechuu fi tajaajiluun akka isaan irraa eegamu hubachiisaniiru. Kaabinee kana gurmeessuuf ji'oota baay'ee fudhatamee kan irratti hojjetame ta'uu ibsuun, hamma danda'ametti ulaagaa barbaachisu guutuu isaanii mirkaneessuuf tattaaffiin taasifamuu hubachiisaniiru. Muudama miseensota kaabinee keessatti hirmaannaan dubartootaa hirmachisummaa kan agarsiisuufi biyyoonni biroos muuxannoon irraa fudhachuu kan qaban ta'uu dubbataniiru. Miseensonni kaabinee dubartoota ta'an kan filataman saala qofaaniin osoo hin ta’iin dadeettii hojii fi dandeettii raawwachiisuun ta'uu ibsaniiru. Ministiroonni kun hawwii Itoophiyaa raawwachuu fi tajaajila lammiilee giddu-galeessa kan godhate hojechuu qabu jedhaniiru. Mani marichaa dandeettiifi hojii miseensota kaabinee irratti hordoffii barbaachisu gochuudhaan yaada gorsaa akka dhiyeessu waamicha dhiyeessaniiru.

Fulbaana 28/2019 (ENA) Ministirri Muummee Dooktar Abiyyi Ahimad Kaabinee Mootummaa Ida’amuu haaraa har’a Mana Maree Bakka Bu’oota Ummataatti muudamaaf dhiyeessaa jiru. Miseensonni kaabinee muudamaaf dhiyaatan kun karoora biyyaalessaa qabame milkeessuu, badhaadhina Itoophiyaa itti fufsiisuu fi cichoomina biyyattii cimsuu keessatti gahee olaanaa akka bahaatan kan irraa eegamu ta’u Ministirri Muummee Dooktar Abiyyi Ahimad dubbatan. Miseensonni kaabinee kunneen dandeettii raawwachiisummaa, muuxannoo hojii, sadarkaa barnootaa fi gahumsa isaaniin mootummaa gahumsa qabu ijaaruu fi hojii mootummaa itti fufsiisuuf dandeettii qaban irratti hundaa’uun muudamaaf dhiyaataniiru. Dabalataanis, imaammatawwan mootummaa milkeessuu, rakkoolee hawaasaa furuufi jijjiirama jireenyaafi jireenyaa uummataa keessatti bu’aa qabatamaa fiduu danda’an ta’uun isaanii xiyyeeffannoo keessa galfameera. Muudama kaabinee kana keessatti sabdaneessummaa biyyattii calaqqisiisuuf bakka bu’ummaa naannolee, sabootaafi sablammoota akkasumas saalaaf xiyyeeffannoon kennamu himan Miseensonni kaabinee har’a muudamaaf dhiyaatan, kaayyoo mootummaa galmaan ga’uu, karoora biyyaalessaa qabame hojiitti hiikuu fi fedhii uummataa deebisuuf imaanaa guddaa kan itti kennamu ta’uun isaanii eegama jedhan. Walumaagalatti, kaabineen haaraan kun badhaadhina Itoophiyaa itti fufsiisuu, cichoomina biyyattii caalaatti mirkaneessuu fi karoora misoomaa biyyaalessaa milkeessuu keessatti gahee murteessaa akka taphatan irraa eegama. Biyya Guddoo, Ummata Guddaa fi Mul'ata Guddaa!

Fulbaana 28/2019(ENA) Ministirri Muummee Dr. Abiyyi Ahimad kaadhimamtoota kaabinee dhiheessaniiru. Ministirri Muummee Dr. Abiyyi Ahimad Aadde Haannaa Ar’aayaasillaasee Ministira Haqaa ta’anii akka tajaajilan, Mana Maree bakka bu'oota uummataatiif kaadhimamummaan dhiheessaniiru. Haaluma walfakkaatuun , Dooktar Fissahaa Yittaagasuu- Ministira Indaastirii, Dooktar Maqdas Dhaabaa- Ministira Fayyaa, Aadde Ayinaaleem Nigusee – Minsitira Galiiwwanii ta’anii akka tajaajilaniif kaadhimammuummaan dhiheessaniiru.

Fulbaana 28/2019(ENA) Ministirri Muummee Muummee Dr. Abiyyi Ahimad , Pirofeesar Birhaanuu Naggaa Ministira Barnootaa ta’anii akka tajaajilaniif kaadhimamummaan dhiheessaniiru. Ministirri Muummee Dr. Abiyyi Ahimad Muudama Ministirootaa Bakka Bu’oota Ummataaf dhiyaassaa jiru.

Fulbaana 28/2019(ENA) Ministirri Muummee Dr. Abiyyi Ahimad , kaadhimamtoota kaabinee Mana maree bakka bu'oota uummataaf dhiheessaniiru. Ministirri Muummee Dr. Abiyyi Ahimad , Obbo Saadaat Nashaa ministira Loojistiksii ta’anii akka tajaajilaniif Bakka Bu’oota Ummataaf dhiyaassaniiru. Akkasumas Ministirri Mummee Dr. Abiyyi Ahimad, Aadde Alamtsahay Phaawulos Ministira Albuudaa, ta'anii akka tajaajilaniif Mana Maree bakka bu'oota uummataaf dhiyeessaniiru. Haaluma walfakkaatuun , Ministirri Mummee Dr. Abiyyi Ahimad, Dr.Akliiluu Taaddasaa Ministira Dargaggoo fi Ispoortii , Aadde Shawwiit Shaankaa ministira dhimmaa dubartootaa fi Hawaasummaa , Dr.Sulxaan Walee Ministira Jallisii fi Naannawaa gammoojjii ta’anii akka tajaajilaniif kaadhimammuun dhiheessan. Ministirri Muummee Dr. Abiyyi Ahimad Muudama Ministirootaa Bakka Bu’oota Ummataaf dhiyaassaa jiru.

Fulbaana 28/2019(ENA): Ministirri Muummee Dr. Abiyyi Ahimad Muudama Ministirootaa Bakka Bu’oota Ummataaf dhiyaassaniiru. Haaluma kanaan Ministirri Muummee Abiyyi Ahimad (PhD), obbo Barakat Fissahaatsiyoon Ministira Tarsiimoo Biyyaalessaa ta'uun akka tajaajiluuf Mana Maree Bakka Bu'oota Ummataatti kaadhimamamummaan dhiyeessaniiru. Ministirri Muummee Dr. Abiyyi Ahimad obbo Awwaluu Abdii Ministira hojii fi ogummaa ta’anii akka tajaajilaniif kadhimamummaan bakka bu’oota ummataaf dhiyeessaniiru. Akkasumas Ministirri Muummee Dr. Abiyyi Ahimad Injinar Muhaammad Abdurraahimaan ministira magaalaa fi bu’uuraalee misoomaa ta’uun akka tajaajilaniif dhiyeessaniiru. Ministirri Muummee Dr. Abiyyi Ahimad, aadde Salamaawiit Kaasaa Ministira Aadaa fi Turizimii ta’anii akka tajaajilaniif kadhimamummaan bakka bu’oota ummataaf dhiyeessaniiru. Ministirri Muummee Dr. Abiyyi Ahimad, Aadde Fireehiyiwoot Taammiruu Ministira Innooveeshinii fi Teeknooloojii ta’anii akka tajaajilaniif kadhimamummaan bakka bu’oota ummataaf dhiyeessaniiru. Ministirri Muummee Dr. Abiyyi Ahimad, Obbo Muusaa Adam Ministira Nageenyaa ta’anii akka tajaajilaniif kadhimamummaan bakka bu’oota ummataaf dhiyeessaniiru. ‎#Mootummaa Ida'amuu #Biyya Guddoo, Ummata Guddaa fi Mul’ata Guddaa! Miseensa Maatii ENA ta’aa: https://www.ena.et/web/links