Caamsaa 18/ 2018(ENA) : Manni Maree Ministirootaa walga’ii idilee 55ffaa gaggeesseen murtoowwan garaagaraa dabarseera.    

Caamsaa 18/2018 (ENA): Paartii biyyaa fi uummataaf ni fayyada jennu filachuuf qophoofneerra jechuun jiraattonni Magaalaa Harar ibsan. Filannoo waliigalaa 7ffaan, lammiilee hedduun sagalee kennuuf kaardii fudhatanii fi paartileen siyaasaa adda addaa keessatti hirmaatan, Caamsaa 24 bara 2018 kan gaggeeffamu ta'uun ni beekama. Jiraattota Magaalaa Harar kanneen kaardii filannoo fudhatanii filannichaaf qophaa'an keessaa ENA’f kan yaada kennan, mirga demookiraasii keenya fayyadamuun paartii biyyaa fi uummataaf ta'u filachuuf guyyaa sagalee kenninsaa eeggachaa jirra jedhaniiru. Jiraattota magaalattii keessaa aadde Asiraat Wubsheet fi Kaaliid Yuusuf; kaardii filannoo fudhannetti fayyadamuun sagalee keenyaan murteessuuf qophoofneerra jechuun dubbataniiru. Adeemsi filannoo ibsituu mirga demookiraasii lammiilee ta'uu kaasuun, hamma kaardii filannoo fudachuuf hirmaatan sanatti sagalee kennuudhaanis mirkaneessuuf qophaa'uu isaanii ibsaniiru. Jiraattuun magaalattii biroon Alfiyaa Abdoosh; guyyaa sagalee kenninsaa sanatti keessumaa paartii dhimma fayyadamummaa waliigala dubartootaaf hojjetu filachuuf qophaa'uu ibsaniiru. Gama biraatiin jiraataan magaalattii obbo Assaggid Shifarraa filannichi paartii biyyaa fi uummataaf ni fayyada jedhan kan itti filatanii fi sagalee isaaniitiin kan murteessan waan ta'eef, filachuuf qophaa'uu isaanii dubbataniiru.

Caamsaa 18/2018 (ENA): Duulli filannoo Paartii Badhaadhinaa fi hiriirri deeggarsa ummataa naannoo Sidaamaa ganama har’aa irraa eegalee magaalaa Hawaasaatti adeemsifamaa jira.   Kutaaleen hawaasaa adda addaas ganama har’aa kana Istaadiyeemii Idil-addunyaa Hawaasaatti argamuun Paartii Badhaadhinaaf deeggarsa qaban agarsiisaniiru.

Caamsaa18/2018 (ENA): Naannoo Ummattoota Kibba Lixa Itiyoophiyaatti filannoo biyyaalessaa 7ffaa ilaalchisuun duulli nafiladhaa fi hiriirri deeggarsa Paartii Badhaadhinaa Magaalaa Boongaa keessatti gaggeeffamaa jira. Duulli nafiladhaa fi hiriirri deeggarsa paartichaa kan kanaan dura godinaalee naannichaa hundatti gaggeeffamaa ture, har'a bakka bu'oonni hawaasaa godinaalee hundarraa walitti dhufanii argamanii istaadiyeemii Magaalaa Boongaa keessatti sagantaan xumuraa gaggeeffamaa jira. Hirmaattonni hiriirichaa dhaadannoowwan akka "Filannoo nagaa fi dimookiraasii ijaarsa mootummaa cimaatiif! , Jijjiirama dhufeef beekamtii ni kennina!", "Itiyoophiyaa gara biyya fakkeenyummaattii" fi dhaadannoowwan biroo kanneen biroo dhageessisaa jiru. Saganticharratti hoggantoonni olaanoon naannichaa fi godinichaa, kutaaleen hawaasaa aanaalee fi bulchiinsa magaalota Godina Kafaa adda addaa irra walitti babba'an, akkasumas miseensonni baandii aartii aadaa hirmaachaa jiru.  

Caamsaa 18/2018 (ENA):Magaalaa Jinkaatti duulli nafiladhaa fi hiriirri deeggarsa uummataa Paartii Badhaadhinaa gaggeeffamaa jira. Paartiin Badhaadhinaa filannoo waliigalaa 7ffaaf mata duree "Itiyoophiyaa gara biyya fakkeenyummaatti" jedhuun sagantaa xumura duula na filadhaa Magaalaa Jinkaa keessatti gaggeessaa jira. Miseensonnii fi deeggartoonni paartichaa daandiiwwan gurguddoo magaalattii fi Istaadiyeemii hunda galeessa Jinkaa keessatti uummanni hedduun argamuun deeggarsaa fi michummaa Paartii Badhaadhinaaf qaban ibsaa jiru. Sagantaa xumura duula nafiladhaa fi deeggarsa uummataa kana irratti Af-yaa'ii Mana Maree Naannoo Kibbaa Itiyoophiyaa Alamaayyoo Bawudiin dabalatee hoggantoonni olaanoon paartichaa, miseensonniifi deeggartoonni argamaniiru.

Caamsaa 18/2018 (ENA): Duulli filannoo fi hiriirri deeggarsa Paartii Badhaadhinaa Walaayittaa Sooddootti geggeeffamaa jira. Hiriira deeggarsa kana irratti dargaggoonni, dubartoonnii fi kutaaleen hawaasaa biroo hirmaachaa jiru. Deeggartoonni kunneen yeroo ammaa gara Istaadiyeemii hundagaleessa Walaayittaa Sooddootti imalaa kan jiran yoo ta’u, deggersa dhaabichaaf qabanis ergaa dabarsaa jiru.

Caamsaa 18/2018 (ENA): Sagantaan xumuraa duula filannoo Paartii Badhaadhinaa bulchiinsa Dirree Dhawaatti hiriira deeggarsa ummataa guddaan adeemsifamaa jira.   Guyyaa har'aa miseensonnii fi deeggartoonni Paartii Badhaadhinaa godinaalee baadiyyaa fi magaalaa bulchiinsa kanaa daandii gurguddoo magaalattii keessa hiriira bahuun, dhaamsa qabatanii imaluun deeggarsa dhaabichaaf qaban ibsaa jiru. Paartiin Badhaadhinaa; dhaaba Itiyoophiyaa gara biyya fakkeenyummaatti jijjiirudha; kaayyoon keenya mootummaa cimaa ijaaruudha kan jedhaniifi ergaawwan biroo deeggartoonni qabatanii bahuun dhageessisaa jiranidha. Hiriira deeggarsa kanarratti ergaaleen dabarfaman, bulchiinsi Dirree Dhawaa pirojektoota misoomaa fi bulchiinsa gaarii jajjabeessaan ummata fayyadamoo taasisan hojiirra oolchaa turuusaa ibsaniiru. Hoggantoonni waajjira paartichaa Dirree Dhawaa, hoggantoonni waajjira kantiibaa fi miseensonni kaabinee hiriira deeggarsaa fi sagantaa xumuraa duula filannoo irratti hirmaataniiru. #ENA_Afaan_Oromoo #ENA

Caamsaa 18/2018 (ENA): Duulli filannoo Paartii Badhaadhinaa fi hiriirri deeggarsa ummataa magaalaa Asoosaatti geggeeffamaa jira.   Hoggantoonni olaanoo naannoo Beenishaangul Gumuuz, miseensonni paartichaa fi deeggartoonni hiriira kana irratti hirmaataniiru. Hirmaattonni hiriira mata duree "Itiyoophiyaa gara biyya fakkeenyummaatti" jedhuun gaggeeffamaa jiru kanarratti hirmaattonni ergaawwan hojiiwwan misoomaa paartiin hojjetamaa jiran agarsiisan qabatanii deeggarsa paartichaaf qaban ibsaa jiru. #ENA_Afaan_Oromoo #ENA

Caamsaa 18/2018 (ENA): Hiriirri deeggarsaa Paartii Badhaadhinaa magaalaa Gaambeellaatti geggeeffamaa jira. Hiriira kana irratti miseensonnii fi deeggartoonni paartichaa magaalaa Gaambeellaatti hirmaachaa jiru.   Hirmaattonni hiriira kanaas ergaa deeggarsa Paartii Badhaadhinaaf qaban ibsan qabatanii bahaniiru. Hoggantoonni olaanoo federaalaa fi naannolee magaalota dorgomaa jiran keessattis argamaniiru. #ENA_Afaan_Oromoo #ENA

Caamsaa 18/2018 (ENA): Duulli filannoo fi hiriirri deeggarsa Paartii Badhaadhinaa Magaalaa Dillaa Godina Geedi’oo keessatti adeemsifamaa jira. Sagantaan duula na filadhaa Paartii Badhaadhinaa filannoo waliigalaa torbaffaa magaalaa Dillaatti adeemsifamaa jira.   Hiriira deeggarsaa ganama irraa eegalee adeemsifamaa ture kana irratti kutaaleen hawaasaa adda addaa Godina Geedi’ooo fi magaalaa Dillaa irraa hirmaachaa jiru. Hiriirri kun ergaawwan "Itiyoophiyaa gara biyya fakkeenyummaatti haa jijjiirru" jedhus dabarsaa jira. #ENA_Afaan_Oromoo #ENA

Caamsaa 18/2018 (ENA): Sagantaan hiriira deeggarsa ummataa Paartii Badhaadhinaa magaalota gurguddoo naannoo Amaaraa keessatti adeemsifamaa jira. Sagantaan kun magaalota Baahir Daar, Gondar, Dassee, Kombolcha, Dabra Birhaan, Matammaa fi magaalota gurguddoo fi giddu galeessaa biroo keessatti gaggeeffamaa jira.   Hiriira kana irratti dhaadannoowwan deeggarsaa adda addaa dhagahamaa kan jiran yoo ta’u, daqiiqaawwan itti aanan keessatti hoggantoonni olaanoo argamuun ergaa ni dabarsu jedhamee eegama. Gaggeessitoonni olaanoo federaalaa fi naannolee magaalota dorgomaa jiran keessatti argamuun ergaa na filadhaa dabarsaa akka jiranis beekameera. #ENA_Afaan_Oromoo #ENA

Caamsaa 18/2018 (ENA): Paartiin Badhaadhinaa jecha isaaf amanamaa ta’ee qabatamaan qoramee injifannoodhaan kan ba’edha jedhan itti gaafatamaan Waajjira Paartii Badhaadhinaa Damee Magaalaa Finfinnee obbo Mogas Baalchaa. Duulli filannoo biyyaalessaa 7ffaa Paartii Badhaadhinaa magaalaa Finfinnee Adda baabaayi Masqalaatti gaggeeffameera.   Sagantaa ganama irraa eegale kana irratti Kantiibaan Magaalaa Finfinnee fi Miseensi Hojii Raawwachiiftuu Paartii Badhaadhinaa Aadde Adaanech Abeebee, Itti Aanaa Kantiibaa fi Miseensa Hojii Raawwachiiftuu Paartii Badhaadhinaa Jaanxiraar Abaaay fi Itti Gaafatamaan Waajjira Paartii Badhaadhinaa damee magaalaa Finfinnee obbo Mogos Baalchaa argamaniiru. Akkasumas Af-yaa'iin Mana Maree Magaalaa Finfinnee Buzeenaa Alkadir, kaadhimamtoota paartichaaf dorgoman, akkasumas miseensonnii fi deeggartoonni paartichaa argamaniiru. Hogganaan Waajjira Paartii Badhaadhinaa Damee Magaalaa Finfinnee obbo Mogas Baalchaa wayita sana akka himanitti hojiiwwan misoomaa waggoota darban keessatti hojjetaman fayyadamummaa hunda galeessa hawaasaa mirkaneessee jira jedhan. Hojiileen bu’a qabeessa ta’an karaa ida’amuun aadaa hojii cimaa ta’een hojjetamuu ibsaniiru. Hojiin waggaa 50 waggaa shan keessatti xumuramuu ibsaniiru. Paartiin Badhaadhinaa jecha isaaf amanamaa ta’ee qabatamaan qoramee milkaa’inaan xumurameera jedhan. Daandii ida’amuu irra imaluun galma keenya geenya kan jedhan itti gaafatamaan kun, hojiiwwan misoomaa hunda galeessa gaggeeffamaa jiran cimee akka itti fufuuf hawaasni Paartii Badhaadhinaaf sagalee akka kennu gaafataniiru. #ENA_Afaan_Oromoo #ENA

Caamsaa 18 /2018 (ENA): Hiriirri deeggarsa Paartii Badhaadhinaa ganama har’aa irraa eegalee magaalaa Finfinnee Addabaabayii Masqalaatti geggeeffamaa jira. Hiriira kanarratti kantiibaan Magaalaa Finfinnee aadde Adanech Abeebee, Itti Aanaan Kantiibaa Jaanxiraar Abbay fi itti gaafatamaan Waajjira Paartii Badhaadhinaa Waajjira Damee Magaalaa Finfinnee obbo Mogas Baalchaa argamaniiru. Af-yaa’iin Mana Maree Magaalaa Finfinnee, Buzeenaa Alkadir, kaadhimamtoonni paarticha bakka bu’an, akkasumas miseensonnii fi deeggartoonni paartichaas argamaniiru.  

Caamsaa 17/2018(ENA): Filannoo waliigalaa torbaffaa ilaalchisee dippiloomaatota Finfinnee jiranii fi bakka bu'oota dhaabbilee Idil-addunyaatiif ibsi kennameera. Boordii Filannoo Biyaalessaa Itiyoophiyaatti Walitti-qabduun Boordichaa Meelaatawarqi Haayiluu, dippiloomaatotaa fi bakka bu'oota dhaabbata Idil-Addunyaatiif qophii filannichaa,galmee filattootaa, hirmaannaa dubartootaa fi dargaggootaa,qophii nageenyaa fi itti fayyadama teekinoolojii ilaalchisee ibsa bal'aa kennaniiru. Kana malees, adeemsi filannichaa ifaa fi bilisa akka ta'uuf dhaabbata garaa garaa waliin qindoominaan hojjetamaa jiraachuu ibsaniiru. Walitti-qabduun boordichaa hojiiwwan dursanii raawwatamani ibsa bal'aa kan kennan yoo ta'u, filannichaaf filattoonni miiliyoona 50 ol galmaa’uu fi buufataaleen filannoo kuma 52 fi 29 hundeeffamuu isaanii ibsaniiru. Qe'ee isaanii irraa warreen buqqa'aniif, loltootaa fi barattootaaf buufataaleen filannoo addaa qophaa'uu isaanii fi kaardiiwwan sagalee kenninsaa buufataalee filannoo hundumaatti raabsamuu isaanii ibsaniiru. Dabalataanis, filannichi nagaa, hirmaachisaa fi bilisa akka ta'uuf boordichi qaamolee dhimmi ilaallatu waliin hojjetaa turuu isaa eeraniiru. Gama biraatiin De’eetaan Ministeera Dhimma Alaa Ambaasaaddar Birhaanuu Tsaggaayee, filannoon waliigalaa 7ffaan kun itti fufiinsa filannoowwan kanaan dura adeemsifamaa turanii ta'uu ibsuun, kunis sirna deemokiraasii biyyattii keessatti ijaaramaa jiruuf bu'uura kan kaa'e ta'uun isaa ibsaniiru. Ibsa kanaan booda marii taasifameen, bakka bu'oonni biyyoota garaa garaa fi dhaabbanni Idil-Addunyaa, filannichi nagaa fi hirmaachisaa akka ta'uuf sochii taasifamaa jiru irratti hubannoo gaarii argachuu isaanii ragaan ministeerichaa ni agarsiisa.

Caamsaa 17/2018 (ENA): Paartiin Badhaadhinaa gaaffii ummanni yeroo dheeraaf dhiheesseef deebii kennuun fayyadamummaa isaa guddiseera jedhan piresidaantiin Mootummaa Naannoo Hararii fi miseensi Koree Hojii Raawwachiiftuu Paartii Badhaadhinaa obbo Ordin Badrii.   Paartichi duula filannoo waliigalaa 7ffaa isaa naannoo Harariitti mata duree "Itiyoophiyaa gara Biyya fakkeenyummaattii jijjiiruu" jedhuun gaggeesseera. Sagantaa duula filannoo paartichaa magaalaa Hararitti Istaadiyeemii Imaam Ahmad keessatti gaggeeffame irratti piresidaantiin mootummaa naannichaa fi miseensi koree hojii raawwachiiftuu paartii badhaadhinaa obbo Ordin Badrii, akkasumas hoggantoonni olaanoo paartii, kaadhimamtoonni, miseensonnii fi deeggartoonni paartii Badhaadhinaa argamaniiru. Duula na filadhaa sana irratti argamuun ergaa dabarsaniin piresidaanti Ordiin Badrii akka himanitti Paartiin Badhaadhinaa paartii dhimmoota siyaasaa naannicha keessatti yeroo dheeraaf ka’aa turan irratti deebii seeraa fi sirrii ta’e kan kenne ta’uu ibsaniiru. Itti dabaluunis, dhaabichi erga gara aangootti dhufee pirojektoota misoomaa hedduu ummata naannichaa giddu galeessa godhate raawwachuusaa ibsaniiru. Paartichi waadaa galee fi pirojektoota misoomaa eegale galmaan gahuuf kutannoon hojjechaa akka jiru, bu’aan isaas qabatamaan mul’achaa akka jiru akeekaniiru.   Itti gaafatamaan waajjira paartichaa damee naannoo Hararii obbo Geetuu Wayyeessaa gama isaaniitiin, Paartiin Badhaadhinaa waltajjii waloo ijaaruu, obbolummaa fi walooma cimsuu, adda addummaa kabajuun tokkummaa sabaa cimsuuf hojiilee hedduu raawwateera jedhan. Pirojektoota misoomaa dinqisiisoo fayyadamummaa hunda galeessa ummataa mirkaneessan raawwachuusaas eeraniiru. #ENA_Afaan_Oromoo #ENA

Caamsaa 17/2018(ENA) : Guyyaan Afriikaa 63ffaan mata duree “Waggoota 63 tokkummaa, hariiroo fi misoomaa,waliin haa kabajnu” jedhuun har’a ni kabajama. Biyyoonni Afriikaafi diyaaspooraan Afriikaa kutaalee Addunyaa adda addaa keessa jiran guyyaa kana sagantaalee adda addaan ni kabaju.   Guyyaan kun har’a magaalaa teessoo Gamtaa Afriikaa kan taatee Finfinneetti, sirnoota adda addaan ni kabajama. Gamtichi ibsa baaseen, guyyaan Afriikaa baranaa waggaa 63ffaa hundeeffama Dhaabbata Tokkummaa Afriikaa (Gamtaa Afriikaa isa ammaa) kan yaadatu ta’uu hubachiisaniiru. Guyyaan Afriikaa guyyoota lamaan darbaniif dorgommiiwwan ispoortii, agarsiisota, baazaarii, taphoota bohaartii fi taateewwan adda addaan kabajamaa tureera. Xumurri sirna kabaja guyyaa kanaa har’a teessoo muummee Gamtaa Afriikaa Finfinneetti kan gaggeeffamu yoo ta’u, sirnicharratti Dura taa’aan Komishinii Gamtaa Afriikaa Mahaammud Alii Yuusuf, hoggantoonni olaanon gamtichaa, bakka bu’oonni biyyoota miseensotaa,diyaaspooraan Afriikaa, dippiloomaatonni, michoonni misoomaafi keessummoonni affeeraman kan argaman ta’uu odeeffannoo gamtichi ENA’f erge ni mul’isa. Guyyaan kun Afriikaa seenaafi aadaadhaan badhaate keessatti, uummatoonni ardittii aadaa, Aartii fi muuxannoo isaanii kanneen biroo waltajjii waliif itti beeksisanidha. Guyyaan Afriikaa Komishinii Gamtaa Afriikaafi Waldaa Hojjettoota Gamtichaa, akkasumas biyyoota miseensotaa, gurmaa’insoota gamtichaa fi hawaasawwan dinagdee naannoo (RECs) waliin ta’uun qophaa’e. Waggaa waggaadhan Guyyaan Afriikaa kabajamuu kan eegale hundeeffama Dhaabbata Tokkummaa Afriikaa (Gamtaa Afriikaa isa ammaa) A.L.A bara 1963 hordofeeti. Moggaasni Dhaabbata Tokkummaa Afriikaa, A.L.A bara 2002 yaa’ii Afriikaa Kibbaa, Darbanitti gaggeeffameen gara Gamtaa Afriikaatti jijjiiramuun isaa ni yaadatama. Guyyaan kun waggaa waggaadhaan A.L.A Caamsaa 25 ni kabajama. Ayyaanni kun Guyyaa Afriikaa jedhamuun dura "Guyyaa Birmadummaa Afriikaa" jedhamee kabajamaa ture.

Caamsaa 17/2018 (ENA): Ministirri Muummee Dr. Abiyyi Ahmad guyyaa Afriikaa ilaachisuun ergaa baga ittiin isin gahee dabarsaniiru. Ministirri Muummee ergaa isaanii keessatti waggoota 63 dura abbootiin Afriikaa as Finfinneetti walitti qabamuun abjuu guddaa ardii walabaa fi tokkummaa qabdu ijaaruu abjoochaa akka turan yaadachiisaniiru. Abjuun tokkummaa abbootii kun hanga har’aatti osoo hin badiin itti fufee akka jiru ibsaniiru. Itiyoophiyaan wiirtuu seenaa Gamtaa Afrikaa ta’uu eeruun Ministirri Muummee, biyya Afriikaa hunda waliin hafuura seenaa tokkummaa tokkoon waliin dhaabbachuuf kutannoo qabaachuu mirkaneessaniiru. Haa ta’u malee, ammas ardii kana badhaatuu taasisuuf waan baay’een hojjetamuu akka qabu eeruun,; sadarkaa amma jiru irra darbuuf jecha irraa gara gochaatti, waadaa irraa gara guddina qabatamaatti ce’uun barbaachisaa ta’uu dubbataniiru. Qabeenyi Afriikaa inni guddaan fi barbaachisaan yeroo hunda ummata ishee ta’uu kan ibsan Ministirri Muummee, dandeettii ardii kanaatti fayyadamuudhaan waliin olka’iinsa olaanaarra geenya jechuun ibsaniiru.

Caamsaa 16/2018 (ENA): Poolisiin Federaalaa Itiyoophiyaa dhaabbilee ciccimoo ijaaruu fi humna poolisii gahumsa qabu horachuu itti fufee jira jedhan Komishinarri Poolisii Federaalaa Itiyoophiyaa Jeneraal Dammallaash Gabramikaa’el. Poolisiin Federaalaa Itiyoophiyaa Giddugala Poolisii ammayyaa humna poolisii dafee qaqqabaa Bahaa Dirree Dhawaatti ijaare eebbisee tajaajila eegalchiise.   Giddugalicha ifatti kan eebbisan Komishinarri Poolisii Federaalaa Itiyoophiyaa Jeneraal Dammallaash Gabramikaa’el akka jedhanitti, haaromsa biyyaalessaa hordofuun Poolisiin Federaalaa Itiyoophiyaa ergama biyyaalessaa isaa gahumsa guddaadhaan, gargaarsa jaarmiyaa ammayyaa fi cimaa ta’een bahachuuf keessa jira. Giddugalli humna dafee qaqqabaa ammayyaa Dirree Dhawaatti ijaarame agarsiiftuu tattaaffii kanaa ta’uu ibsuun, Poolisiin Federaalaa Itiyoophiyaa bu’a qabeessa ta’een dhaabbata cimaa ijaaruu fi humna poolisii gahumsa qabu uumuu itti fufuusaa ibsaniiru. Humna qorannoo yakkaa giddugalichatti gurmeessuun yakka sadarkaa ol’aanaa fi fooyya’aa ta’een ittisuuf haala mijataa ni uuma jedhaniiru. Dabalataanis Poolisiin Federaalaa Itiyoophiyaa ijaarsa dhaabbilee ammayyaa fi misooma humna namaa cimsuu itti fufuu mirkaneessaniiru.   Kantiibaan Bulchiinsa Magaalaa Dirree Dhawaa obbo Kadir Juhaar akka himanitti, Giddugalli Poolisii humna dafee qaqqabaa ammayyaa Dirree Dhawaatti ijaarame naannolee ollaa Bahaa keessatti nageenya mirkaneessuuf carraa guddaa qaba jedhani. Hojii daldala al-ergii fi galtee haala nageenya qabuun gaggeessuufi naannichatti nageenya buusuuf murteessaa ta’uu ibsaniiru. Kanaafuu, hojii giddugalichatti hojjetamaa jiruuf bulchiinsi deeggarsa barbaachisu kan taasisu ta’uu ibsaniiru.   Sagantaa kana irratti dhaabbilee ijaarsa giddugalichaaf gumaacha olaanaa taasisaniif badhaasni fi beekamtiin kennameera. #ENA_Afaan_Oromoo #ENA

Caamsaa 16 /2018 (ENA): Paartiin Badhaadhinaa waggoota darban keessatti hojiiwwan ummata fayyadamoo ta’an raawwachuun bu’aa qabatamaa galmeessisuu isaa Afyaa’iin Caffee Naannoo Oromiyaa Sa’aadaa Abdurahman ibsaniiru. Sagantaan duula filannoo Paartii Badhaadhinaa “Itiyoophiyaa gara Biyya fakkeenyaatti” jedhu magaalaa Shaggar keessatti bakka deeggartoonni baay’inaan argamanitti gaggeeffameera.   Ganama irraa eegalee jiraattonni magaalichaa fi deeggartoonni paartichaa istaadiyeemii Lagaxaafootti argamuun deeggarsa dhaabichaaf qaban ibsaniiru. Sagantaa kana irratti Af-yaa’iin Caffee Naannoo Oromiyaa Sa’aadaa Abdurahman, Kantiibaan Magaalaa Shaggar Dr. Tashoomaa Addunyaa fi hoggantoonni olaanoo paartilee biroo argamaniiru.   Waltajjicharratti haasawaa kan taasisan Afyaa’iin Caffee Naannoo Oromiyaa aadde Sa’aadaa Abdurahman, Paartiin Badhaadhinaa imala biyya ijaaruu fi misoomsuu itti fufeera jedhan. Pirojektoonni hedduun damee hawaasummaa fi diinagdee qulqullinaa fi saffisaan qajeelchuudhaan sadarkaa ol’aanaatti ceesisuuf qophaa’uu, hojiin ummata fayyadamoo taasise raawwatamuu eeraniiru.   Paartichi waadaa galee fi hojiiwwan misoomaa eegale galmaan gahuuf kutannoon hojjechaa akka jiru, bu’aan isaas qabatamaan mul’achaa jira jedhan. Hojiilee fayyadamummaa hunda galeessa ummataa naannichaa mirkaneessan raawwatamuusaa ibsaniiru. Kantiibaan Magaalaa Shggar Dr. Tashoomaa Addunyaa gamasaaniitiin waggoota sadan darbanitti magaalaa Shaggar keessatti magaalaa ammayyaa ijaaruuf hojjetamaa akka ture himaniiru. Ijaarsa bu’uuraalee daandii, hospitaalotaa fi manneen barnootaatiin jijjiiramni hawaasummaa guddaan galmaa’uu ibsaniiru. Karoora qonnaa fi diinagdee akka biyyaatti bocame sadarkaa magaalaatti milkaa’inaan hojiirra oolchuuf kan dandeessise ta’uus himaniiru. Hojiin kun yaadaan badhaadhina fiduu qofa osoo hin taane qabatamaan bu’aa bal’aa galmeessiseera jedhani. #ENA_Afaan_Oromoo

Caamsaa15/2018(ENA)-Paartiin Badhaadhinaa lammiilee hiyyummaa keessaa baasuun guddina fi bayyanachuu biyyaa dhugoomsuuf hojiiwwan misoomaa damee baay'eedhaan eegale cimsee kan itti fufu ta'uusaa Waajjira Ministeera Muummeetti Ministirri Qindeessaa giddugala ijaarsa sirna dimokiraasii Dr. Biqilaa Hurrisaa ibsan. Naannoo Oromiyaa Godina Jimma Aanaa Shabee Sombootti duula nafidhaa Paartiinbadhaadhinaa gaggeesserratti Dr. Biqilaa Hurrisaa argamaniiru. Sagantaa kanarratti Waajjira ministeera Muummee Ministirri qindeessaa giddugala ijaarsa sirna dimokraasii Ministira Dr. Biqilaa Hurrisaa, waggoottan jijjiiramaa keessatti Paartiin Badhaadhinaa fayyadamummaa lammiilee mirkaneessuufi biyya hiyyummaa keessaa baasuuf hojiiwwan misoomaa damee baay'ee hojjechuu isaa ibsaniiru. Misooma qonnaa keessattis keessattuu misooma qamadii jallisiitiin bu'aan nama gammachiisu argamuu isaa kaasanii, dameewwan birootiinis bu'aan qabatamaan argamuu isaa dubbataniiru. Paartiin Badhaadhinaa lammiilee hiyyummaa keessaa baasuun guddina fi bayyanachuu biyyaa dhugoomsuuf hojiiwwan misoomaa damee baay'eedhaan eegale cimsee kan itti fufu ta'uusaa dubbataniiru. Bulchaan Aanaa Shabee Somboo Obbo Mohaammadsanii Abbaa oolii, Paartiin Badhaadhinaa waggoottan jijjiiramaa keessatti hojiiwwan misoomaa bal'aa raawwachuun fayyadamummaa lammiilee mirkaneessuu danda'ee jira jedhaniiru. Keessattuu damee qonnaatiin oomishtummaa dabaluun gargaartummaa jalaa ba'uuf carraaqqiin qindoomina qabu taasifamaa jiraachuu kaasaniiru. Aanaan Shabee Somboo Oomisha Ruuziitiin kan beekamu ta'uu ishee ibsuun, dhiyeessanii, waggoottan muraasa darban keessatti omishichi dachaan akka dabalu taasifamuu isaa akka fakkeenyaatti kaasaniiru. .