Hagayya 2/2018 (ENA): Misoomni koridarii Itoophiyaa keessatti adeemsifamaa jiru jireenya fayya qabeessaa fi naannoo qulqulluu uumuun damee fayyaa keessatti gumaacha olaanaa taasiseera jedhan Ogeettiin Teeknikaa Waltajjii Deeggarsa Biyyaa Taaski Forsii To’annoo Koleeraa Addunyaa Dr. Kaateriin Maakiwee.   Itoophiyaan ittisa dhibee irratti mala kalaqaa fudhachuun tarkaanfii bu’a qabeessa ta’e fudhachaa akka jirtus ibsaniiru. Hojii fi hoggansa kutannoo Itoophiyaan jijjiirama qilleensaa waliin walqabatee fudhachaa jirtu irraas barumsi hedduun akka jiru dubbataniiru.   Itoophiyaan muuxannoo gama kanaan qabdu biyyoota biroof qooduun akka itti fayyadaman gochuu qabdi jedhan. Hojiin ittisaa fi to’annoo dhibee bu’a qabeessa ta’e tumsa qooda fudhattootaa waan barbaaduuf dhaabbileen mootummaa, arjoomtonnii fi michoota misoomaa waliin hojjechuu akka qabanis waamicha dhiyeessaniiru. #Ena Afaan Oromoo #TOI #Ena #

Hagayya 2/2018 (ENA): Guddinni oomishtummaa qamadii Itoophiyaa midhaan nyaataan of danda'uuf taasifamu, biyyoota Afrikaaf muxannoo fakkeenya ta'edha jechuun Gamtaa Afrikaatti Koomishinara Qonnaa, dhimmoota Misooma Baadiyyaa, Diinagdee Biluu fi Misooma Itti Fufiinsa Qabu duraanii kan turan Joosee Fuul Liyooneel Kooriyaa Saakuuu ibsaniiru. Biyyoonni Afrikaas muxannoo gaarii Itoophiyaa fi kanneen biroo fudhachuun sekteera qonnaatiin wabii nyaataa mirkaneessuuf dandeettii ofii ijaarrachuu akka qaban dhaamaniiru. Joosee Fuul Liyooneel Kooriyaa Saakuuu ENA’f akka ibsanitti, Afrikaan qonna dabalatee dandeettii oomishtummaa fi of-danda'iinsa nyaataa cimsuuf abdii fi qabeenya misoomaa bal'aa kan qabdu dha. Haaluma kanaan, abdii guddinaa fi badhaadhina Afrikaa gara carraatti geeddaruun fayyadamummaa waliigalaa lammiilee mirkaneessuuf oomishtummaa qonnaa guddisuun akka barbaachisu eeraniiru. Dandeettii fi qabeenyi oomishtummaa qonnaa afrikaa wabii nyaata Afrikaanotaa dandeettii ofiin uwwisuudhaan of danda'uu dandeessisu, qindoominaa fi tattaaffii waliinii kan gaafatu ta'uu ibsaniiru. Waliigaltee Naannawaa Daldala Bilisaa Afrikaa daldala keessoo Afrikaa dabaluun birmadummaa nyaataa cimsuu, beelaa fi hiyyummaa hir'isuu keessatti gahee olaanaa akka qabu ibsaniiru. Afrikaan guutummaatti deeggarsa alaa irraatti hirkachuu irra, qabeenyaa fi humna mataa ishee fayyadamtee pirojektoota bu'a qabeessummaan raawwachuu akka qabdu hubachiisaniiru. Milkaa'inoonni cehumsaa walii gala Itoophiyaan qonnaa, eegumsa naannoo fi misoomni magaalaa keessatti galmeessite abdii guddina Afrikaa bocuudhaaf akka muuxannoo fi leenjiitti fudhatamuu kan danda'an ta'uu isaanii kaasaniiru. Sagantaa Ashaaraa Magariisaa fi hojiin bu'uuraalee misooma magaalotaa eegalchiisuun raawwataman biroon biyyoota Afrikaa biraan muuxannoo Itoophiyaa irraa barachuu fi qooddachuu kan qaban ajandaa misoomaa murteessaa ta'uu isaa dubbataniiru. #Ena Afaan Oromoo #TOI #Ena #

Hagayya 1/2018 (ENA): Itoophiyaan hoggansa Ministira Muummee Abiyyi Ahmad (PhD) jalatti Afrikaa keessatti biyya humna qabdu ta'uuf ce'aa jirti jechuun miidiyaan beekamaan Hindii Firisti Posti gabaaseera. Xiinxala gara daqiiqaa sagaliif Itoophiyaa irratti gaggeesseen, Firisti Posti Miidiyaan,Itoophiyaan biyya madda dhala namaa taate, lafa mootummoota durii, daandii daldalaa fi bu’uura seenaa Afrikaa ol’aanaa ta’uu hubachiiseera. Erga Ministirri Muummee Abiyyi Ahimad (PhD) gara aangootti dhufanii as biyyattiin boqonnaa haaraa hamma seenaa ishee darbee fi ulfina qabeessa ta’e ijaaruuf cimtee hojjechaa akka jirtu hubachiiseera. Hoggansa Ministira Muummee Dr. Abiyyitiin diinagdee guddummaa ishee ibsutti ce’aa jiraachuu fi kan naannichaa fi Afrikaa keessatti biyya humna jabaa qabdu ta’uuf kan dandeessisu fi egeree ardii kanaa bocu ijaaruuf hojjechaa jira. Waggoota dheeraaf addunyaan Itoophiyaa waraana, hongee fi tasgabbii dhabuu siyaasaatiin akka beektu yaadachiisuun, har’a biyyattiin jijjiirama gammachiisaa bu’uuraalee anniisaa, aviyeeshinii, albuudaa fi dinagdee dijitaalaa irratti jijjiirama gammachiisaa ta’een seeneffama jallifame kana jijjiiruuf hojjechaa jirti jedha gabaasichi. Itoophiyaan qormaata mudate irra aantee diinagdee Afrikaa saffisaan guddachaa jirtu keessaa tokko ta’uu dandeesse gaaffi jedhuuf deebisuun bal’inaan ibseera. Gaaffii ijoo kanaaf deebiin bal’aan kan argamu pirojektoota gurguddaa kaka’umsa Ministira Muummee Dr. Abiyyi Ahimad jalatti hojjatamaa jiran kan egeree Itoophiyaa murteessan keessa akka ta’e ibsaniiru.   • Inni jalqabaa Warraaqsa anniisaa fi Hidha Haaromsa Guddaa Itoophiyaati. Imala jijjiirama Itoophiyaa keessatti wanti ijoo ta’e Hidha Haaromsa Itoophiyaa guddicha, pirojektii humna elektirikii bishaanii Afrikaa guddicha humna meeggaa waattii 5,000 ol maddisiisuu danda’u ta’uu Firsti Posti gabaaseera. Hidhichi bu’uura hawwii industirii Itoophiyaa, humna ibsaa maddisiisuu, sharafa alaa fi dhiibbaa naannoo ta’uu ibseera. Hidhicha adda kan godhu mootummaa fi ummanni Itoophiyaa, Baankii Addunyaa ykn Fandii Maallaqaa Idil-addunyaa irraa saantima tokkollee osoo hin liqeeffatiin, dhiiga, dafqaa fi maallaqa lammiilee Itoophiyaa biyya keessaa fi biyya alaa jiraataniin ijaaramee, Itoophiyaanonni matuma isaaniin abjuu isaanii galmaan gahuu akka danda’an agarsiisuu isaati. Hidhichi konkiriitii fi tarbaayinii caalaa Itoophiyaanotaaf hiika guddaa akka qabu kan ibsu gabaasni Firist Posti jedhamus siidaa of danda’uu fi walabummaa dinagdee ta’uu isaa xiinxalaan kaa’eera. Itoophiyaan humna ibsaa humna haaromfamuu danda’u Keeniyaa, Jibuutii fi Sudaanitti gurguruun gara galii guddaa maddisiisuutti jijjiiruun, naannoo Baha Afrikaa guutuuf wiirtuu walitti hidhamiinsa naannoo taatee jirti. • Guddina utubaa Dinagdee Itoophiyaa Aviyeeshinii fi walitti hidhamiinsa naannawaa Anniisaan qofaan isaa dandeettii dinagdee hin ijaaru; anniisaan industiricha kan kakaasu yoo ta’u, walitti hidhamiinsi daldala idil-addunyaa kan sooru ta’uu Firisti Posti gabaaseera. Daandiin qilleensaa guddichi Itoophiyaa, Daandiin Qilleensaa Itoophiyaa, amma imala dorgomtummaa addunyaa guddaa ta’e eegaluu ibseera. Buufatni Xiyyaaraa Idil-addunyaa Bishooftuu doolaara biiliyoona 12.5’n saffisaan ijaaramaa kan jiru yoo ta’u, waggaatti imaltoota hanga miiliyoona 110 fi fe’umsa gara toonii miiliyoona 4tti dhiyaatu keessummeessuu danda’a. Guutummaatti yeroo xumuramu wiirtuuwwan aviyeeshinii addunyaa gurguddoo keessaa tokko ta’a jedheera. Pirojektiin kun wiirtuu geejjibaa guddaa Finfinnee, wiirtuu dippilomaasii Afrikaa fi idil-addunyaa, akkasumas Afrikaa kutaalee addunyaa biroo waliin kan walqunnamsiisu ta’a. Kanaaf Buufatni Xiyyaaraa Bishooftuu haaraan kun daldala, invastimantii fi turizimii, akkasumas tumsa dippilomaasii addunyaa irratti gahee olaanaa akka taphatuuf ijaaramaa jira.   • Invastimantii Albuudaa fi wabii nyaataa mirkaneessuun Gama biraatiin Itoophiyaan qabeenya albuudaa biyyee ishee jala jiru irratti xiyyeeffachuun warraaqsa misoomaa gaggeessaa akka jirtu xiinxalameera. Biyyattiin pirojektoota gurguddoo warqee fi albuuda baasuu biroo babal’isuun madda sharafa alaa haaraa maddisiisuudhaan industirii albuudaa ishee babal’isaa jirti. Warqeen saffisaan oomishaalee al-ergii Itoophiyaa keessatti adda duree ta’uun dinagdee yeroo dheeraaf qonna irratti hirkataa ture gara damee adda addaatti jijjiiraa jira. Gama biraatiin, gabaasni Gaazexaa Feristii Poostiin, jijjiiramni diinagdee kamiyyuu wabii nyaataa mirkaneessuu malee guutuu ta’uu akka hin dandeenye ibsee, qonni lafee dugdaa diinagdee Itoophiyaa ta’uu hubachiiseera. Mootummaan Ministira Muummee Abiyyi Ahimad (PhD)’n durfamu Itoophiyaan nyaataan of danda’uuf imala jijjiiramaa taasisaa jirtu keessatti bu’aa dinqisiisaa galmeessisaa jira jedha. Kanumaan walqabatee piroojektii kana keessatti wantoota ijoo ta’an keessaa tokko pirojektiin warshaa xaa’oo naannoo Somaaleetti ijaaramaa jiru yoo ta’u, waggaatti xaa’oo yuuriyaa gara toonii miliyoona 3 oomishuuf kan danda’u ta’uu ibsameera. Kunis hirkattummaa xaa’oo biyya alaatii galfamu hir’isuun oomishtummaa qonnaa Itoophiyaa akka dabalu ibseera. "Nageenyi nyaataa gidduu seentumaa tarsiimoo keenyaati. Galma sana galmaan ga'uuf galtee irratti hojjechuu qabna. Galtee irratti hojjechuu yoo dadhabne karaan wabii nyaataa galmaan ga'uu dandeenyu hin jiru" jedhu yaada Ministira Muummee Dr. Abiyyi Ahimad dabalatee uwwisa bal'aa kenneera. Dijiitaalaayizeeshinii, Invastimantii fi Riifoormii Gabaa Jijjiiramni Itoophiyaa keessatti deemaa jirus gara dijitaalaatti ce'aa jira. Ministirri Muummee Abiyyi Ahimad (PhD) leenjiin Inishiyeetiivii Koodaroota Miiliyoona 5 dursee milkaa’uu fi dargaggoonni hedduun dijiitaala dubbisuu fi barreessuu akka danda’an taasiseera jedhan. Haaluma walfakkaatuun walitti hidhamiinsi dijitaalaa babal’achaa kan jiru yoo ta’u, amma magaalota hedduu keessatti tajaajilli interneetii ‘4G fi 5G’ ni argama. Itoophiyaan dameewwan akka telekoomii, baankii fi gabaa kaappitaalaa waggoota kurnaniif cufamanii turan invastaroota biyya alaatiif banuu ishees jajataniiru. Gabaa kaappitaalaa eegaluun jijjiirraa kaappitaalaa dhuunfaa guddisuun guddina dinagdee keessatti gahee olaanaa akka qabus xiinxalaniiru. Haaromsi kun akka waliigalaatti dinagdee mootummaan to’atu irraa gara invastimantii damee dhuunfaatiin socho’utti jijjiirama bu’uuraa keessa akka jiru kan agarsiisu ta’uu ibseera. Qaala’iinsi gatii, rakkoon liqii, qormaanni nageenya naannoo fi dhiibbaan Galaana Diimaa (Red Sea) yoo jiraatanillee, Itoophiyaan miseensa ‘BRICS’ ta'uun, Baankii Addunyaa fi Chaayinaa waliin hariiroo cimsachuun dinagdee ishee jijjiiraa jirti. Kunis fuuldura ishee fi naannichaa kan jijjiirudha. #Ena Afaan Oromoo #TOI #Ena #

Hagayya 1/2018 (ENA) :Godina Shawaa Lixaatti oomsha gannaa bara kanaaan lafti hektaarri kuma 184 ol ta’u kilaastaraan misoomaa jiraachuu Waajjirri Qonnaa Godinichaa ibse. Godinni Shawaa Lixaa haala qilleensa mijataa fi biyyee gabbataa qabuun godinaalee naannoo oromiyaa keessaa naannoowwan oomisha midhaaniin beekaman keessaa tokko dha. Godinichatti midhaan oomishaman ijoo keessaa boqqolloon sadarkaa duraa kan qabatu yoo ta'u, maatiwwan naannichaaf wabii nyaataa fi madda galii isa ijoodha. Naannichatti waggoota muraasa darban keessatti mala qonna kilaastaraan fayyadamuun qonnaan bulaan lafa xiqqaaqaban walitti qindeessuudhaan waliin akka qotan kan dandeessisuu dha. Sirni kunis teeknolojii fi galtee itti fayyadamuudhaan oomishtummaa guddisuuf, oomisha dabaluu fi hidhannoo gabaa uumuuf gahee olaanaa qaba. Itti gaafatamaan Waajjira Qonnaa Godinichaa Obbo Tarrafaa Araarsaa ENA’f akka ibsanitti bara oomshaa 2108/19 yeroo gannaa kana lafti hektara kuma 219 fi 767 boqqolloodhaan facaafamuuf karoorfamuun karoorarra darbuudhaan lafti hektara kuma 226 fi 788 misoomsuun danda’ameera. Kana keessaa kan lafti hektara kuma 184 ol ta'u mala kilaastaraan misoomaa jiraachu beeksisaniiru. Keessumaa akka biyyaatti hiyyummaa balleessuu fi wabii nyaataa mirkaneessuuf kallattiwwan kaa’aman hordofuudhuun, naannichatti yaadota haaraa irratti hundaa’an gara hojiitti jijjiiruuf hirmaannaa qindoomina ummataa fi hoggansaa taassifamaa jira jedhaniiru. Kallattii kanaan teeknolojii qonnaa haaraa qonnaan bulaa beeksisuu fi barsiisuun, wabii nyaataa mirkaneessuun olitti gabaa fi Industiriif galteewwan dhiyeessuuf xiyyeeffannoon addaa kennamuu isaa eeraniiru. Bara oomshaa kana godinichatti lafa boqqolloon uwwifame irraa waliigalaan oomishni kuntaalli miliyoona 13 ni argama jedhamee akka eegamu ibsaniiru. Godinichatti bulchaan Aanaa Noonnoo Obbo Wandafiraash Luleessaa akka ibsanitti bara oomshaa kana aanichaatti lafti hektarri kuma 54 fi 433 midhaani addaddaan facaafamuura. Kana keessaa lafti hektara kuma 26 ta’u boqqolloodhaan misoomusaa eeraniiru. Qonnaan bultoonni aanichaa ENA’f yaada kennan akka dubbatanitti, duraan lafa hektara tokko irraa oomishni argatan kuntaala 12 kan hin caalle ta’uu ibsaniiru. Haa ta’u malee bara kana mala kilaastaraa kanaan boqqolloo misoomsuun hektara tokko irraa oomisha dachaa ol argachuuf karoorfatanii kunuunsa barbaachisaa ta’e gochaa jiraachuu ibsaniiru. Qonnaan bultoota kana keessaa Obbo Shallamaa Warquu mala kilaastaraa kanaan sanyii facaasuu isaanii eeranii, teeknolojii qonnaa ammayyaa fayyadamuun isaanii oomisha fooyya’aa akka eegan dubbataniiru. Qonnaan bulaan aanichaa biroon Obbo Garramuu Iddoosaa gama isaaniitiin, waggaa waggaatti gorsa ogeessaan deeggaramuun boqqolloo bal’inaan oomishuu isaanii fi bara kanaas oomisha fooyya’aa akka eegan dubbataniiru.