Hagayya 5/2018 (ENA): Yuunivarsiitii Madda Walaabuu Kolleejjii Saayinsii Fayyaa fi Wal'aansaa Hospitaala Riifaraalaa Gobbaa Tajaajila tola ooltummaa gannaan namoota kuma 150 ol ta’aniif tajaajila qorannoo fi wal’aansa fayyaa bilisaa kennuu isaa ibse. Hospitaalli Riifaraalichaa tajaajila qorannoo fi wal’aansa fayyaa bilisaa kennuusaan namoonni qoratamuun haala fayyaa isaanii akka beekan gargaaraa jiraachuu jiraattonni Godina Baalee Magaalaa Roobee ibsaniiru. Daarektarri Olaanaan Hospitaala Riifaraalaa Kolleejjii Saayinsii Fayyaa Gobbaa fi Wal’aansaa Yuunivarsiitichaa gargaaraa piroofeesaraa MahaammadAmaan Maamaa ENA’f akka ibsanitti, hospitaalli riifaraalaa tajaajila wal’aansaa fooyya’aa hawaasicha qaqqabsiisuuf hojjechaa jira. Keessattuu hospitaalli riifaraalichaa tajaajila wal’aansaa idilee kennurra darbee tajaajila tola ooltummaa gannaan kutaa hawaasaa rakkoo garaagaraan dhaabbata fayyaa deemuuf hin dandeenye fayyadamaa gochaa jira. Tajaajilichi hawaasa fayyaalessa uumuu fi namoota utuu hin beekiin dhukkuboota garaagaraaf saaxilaman wal’aansaa barbaachisaa ta’e hordofuu akka danda’an kaayyoo kan godhate ta’uu ibsaniiru. Kanaanis yeroo gannaa kanaatti namoota kuma 120 ol ta'aniif tajaajila kennuuf karoorfamee hanga ammaatti lammiilee kuma 150 fayyadamaa gochuun danda'amuu fi hojiichi cimee itti fufuu isaa hubachiisaniiru. Daareektarri olaanaan kun akka jedhanitti, tajaajila tola ooltummaa gannaa bara kanaatiin tajaajiloota qorannoo bilisaa fi adda baafannaa dhukkubaa kennaman cinaatti yeroo tajaajila wal’aansaa idilee hiriirri wal’aansaa baqaqsanii yaaluu eegaa turan dabalataan kan keessummeeffaman ta’uun qophiin taasifamuu sagantichaa adda taasisa jechuun ibsaniiru. Kolleejjii Saayinsii Fayyaa fi Wal’aansaa Yuunivarsiitichaatti Daareektarri Koorporeetii Barnootaa Fayyaa fi Tajaajila Wal’aansaa Obbo Abeel Balihuu gamasaaniitiin Yuunivarsiitichi tajaajila qorannoo fi wal’aansaa hawaasichaaf kennu cinaatti saaxilamummaa dhukkubaa fi haala tatamsa’ina irratti hubannoo walitti fufaa uumaa jiraachuu dubbataniiru.   Tajaajilli tola ooltummaa gannaan tajaajila qorannoo fi wal’aansaa bilisaa ta’uu fi kutaan hawaasaa hedduun qoratamuun haala fayyaa isaanii akka beekan gargaaraa dhufuu isaa dubbataniiru. Mata duree ‘ Gaarumman fayyaa keenyaaf ‘ akka biyyattiitti eegalame tajaajila tola ooltummaa fayyaa gannaatiin fayyaa irra darbee biqiltuu dhaabuu, dhiiga arjoomuu fi hojiileen tola ooltummaa biroon raawwatamaa jiraachuun beekameera. Qindeessaan duula tajaajila tola ooltummaa Hospitaalichaa, Ogeessi Fayyaa Waliigalaa Doktar Salamoon Kiflee gamasaaniitiin akka jedhanitti, gareen ogeeyyii fayyaa tajaajila kennan keessaa dhiibbaa dhiigaa, HIV, dhukkuba sukkaaraa, kaansarii harmaa, dhukkuba tiruu, qorannoo ijaa fi dhukkuboota biroo adda baafannaa fi wal’aansaa argamu. Gareen wal’aansaa yeroo turtiitti, fayyadamtoota tajaajilaa adda baasuu, tajaajila qorannoo fi wal’aansaa kennuurraa darbee dhukkuboota dabalataan wal’aansa barbaadan adda baasuun qorannoo dabalataaf hospitaalicha waliin Wal-quunnamsiisuun kan hojjetamu ta'uu ibsaniiru. Namoota tajaajila bilisaa kana fayyadaman keessaa aaddee Alfiyyaa Huseen gamasaaniitiin hospitaalichaa duula jalqabeen salphaatti wal’aansa argachuudhaan sadarkaa fayyaa irra jiran beekuuf akka isaan dandeessise ibsaniiru. Obbo Ahimad Mahaammad gamasaaniitiin ogeeyyiin fayyaa tajaajila qorannoo bilisaan kennaniin sodaa dhukkubaa irraa bilisa ta’uun isaa gammachuu uumuu isaa dubbataniiru. Tajaajilichaan namoonni dhukkubaan miidhamuu isaanii dura ofumaan dursanii akka beekan waan isaan gargaareef dhaabbaticha galateeffataniiru.

Hagayya 4/2018 (ENA): Naannoo Oromiyaatti Tajaajilli Baankii Dhiiga Adaamaa bara bajataa darbe keessa dhiiga yuunitii kuma 21 ol arjoomtoota dhiigaa tola ooltummaa irraa walitti qabuun dhaabbilee fayyaaf raabsuu beeksise.   Du’a haadholii fi daa’immanii hir’isuu, yeroo balaa tasaa lubbuu baraaruuf, baqaqsanii hodhuu dhibeewwan gurguddaa adda addaatiif dhiheessi dhiigaa barbaachisaa ta’e mirkaneessuuf tajaajilli baankii dhiigaa damee fayyaa keessatti gahee olaanaa qaba. Tajaajilli Baankii Dhiigaa Adaamaas qaamota dhimmi ilaallatu waliin ta’uun duula arjooma dhiigaa wiirtuuwwan dhaabbataa fi socho’aa irratti qopheessuun dhiyeessii dhiigaa amanamaa ta’e mirkaneessuuf ni hojjeta. Hogganaan Tajaajila Baankii Dhiigaa obbo Katamaa Dhaqqabaa ENAtti akka himanitti, hanqina dhiigaa salphisuuf baankichi dhiiga hawaasa irraa walitti qabuun dhaabbilee fayyaaf raabsaa jira. Bara baajataa darbe keessa tola ooltota irraa dhiiga yuunitii kuma 24 walitti qabuuf karoorfachuun dhiiga yuunitii kuma 21 fi 700 walitti qabuu akka danda’e himani. Dhiigni walitti qabame gara Magaalaa Adaamaa, Shawa Bahaa fi Arsiitti erguun dhaabbilee fayyaa 50f raabsamee, itti fayyadamamaa akka tures ibsaniiru. Teeknooloojii fi meeshaalee ammayyaatiin baankii dhiigaa ijaaruun dhiyeessii dhiigaa gahaa fi amanamaa ta’e tola ooltota irraa walitti qabuuf hojiin hojjetame bu’a qabeessa ta’uu ibsaniiru. Hogganaan baankii dhiigaa kun bara bajataa 2019tti dhiiga yuunitii kuma 25 walitti qabuuf karoorfachuun hojii eegaluu beeksisaniiru. Milkaa’ina karoorichaatiif lakkoofsi namoota tola ooltota dhiiga arjoomtootaa dabaluu fi qindoomina qooda fudhattoota waliin cimsuuf tattaaffiin akka hojjetamu beeksisaniiru. Itti dabaluunis yeroo ammaa haala mijataa tajaajila tola ooltummaa waktiin Gannaa uumetti fayyadamuun magaalota Adaamaa, Boqojjii fi Bishooftuutti duula dhiiga sassaabuun gaggeeffamaa jira jedhan. Dargaggoonni arjooma dhiigaa tola ooltummaa Gannaa magaalaa Adaamaa irratti hirmaatan ENAtti akka himanitti, Dhiiga arjoomuun nama arjoomu irratti miidhaa fayyaa tokkollee kan hin geessisne yoo ta'u, hojii gaarii lubbuu namootaa baraaruun nagaa keessoo fi qalbii argamsiisa jedhani.   Namoota yaada kennan keessaa Yoonaas Ashamoo yeroo 5ffaaf dhiiga kan arjoome ta’uu eeruun, dhiiga arjoomuun lubbuu baraaruudha jedheera. Yaada kennaan kan biraan Dagafaa Baalchaa gama isaatiin namni fayyaalessii fi umuriin isaa eeyyamuuf dhiiga ajoomuun lubbuu baraaruuf hirmaachu qaba jedheera. #Ena Afaan Oromoo #TOI #Ena #

Hagayya 2/2018 (ENA): Tajaalila tola ooltummaan deeggarsi taasifameefii rakkoo isaanii salphisaa fii jiraachuu jiraattonni fayyadamoo deeggarsichaa ta’an godina Harargee Lixaa magaalota Masalaa fi Ciroo dubbatani. Waajjirri Maallaqaa godinichaa akka beeksisetti, yeroo Ganna kanaa hanga ammaatti godina Harargee Lixaa keessatti tajaajilli tola ooltummaan birrii biiliyoona 10 oliin kan tilmaamamu adeemsifamaa jira jedhe.   Aadde Tsadaalee Irgaxee fi obbo Ibraahim Muummee jiraattonni magaala Masalaa sababa hanqina qabeenyaatiin mana isaanii suphuu waan hin dandeenyeef rakkoon cimaan isaan mudachaa akka ture dubbatu. Haa ta'u malee hojiin tola ooltummaa kun amma mana haaraa akka argatan gochuun rakkoo hawaasummaa fi diinagdee isaanii akka salphise himu. Tajaajila tola ooltummaatiin mana isaaniif ijaarame keessatti abdii fi gammachuu haaraa argachuun amma jireenya tasgabbaa’aa jiraachuu eegaluu isaanii ibsaniiru. Fayyadamtoota tajaajilichaa kan ta’an magaalaa Ciroo irraa Aadde Aayishaa Kadir; tajaajila tola ooltummaatiin manni mijataa akka isheef ijaaramee fi meeshaalee mana keessaas akka argatte dubbatti.   Hojii Gaggeessaa Bulchiinsa Magaalaa Masalaa obbo Kadir Aliyyii akka jedhanitti Ganna kana keessa manneen qaama miidhamtootaafi humna hin qabne manneen 16 ijaaramuu ibsaniiru. Lammiilee kunuunsa fayyaa barbaadaniif yaala fayyaa kennuu bira darbee dabtara darzaana 500 barattootaaf bitamuu ibsaniiru. Itti Gaafatamaan Waajjira Maallaqaa godina Harargee Lixaa obbo Huseyid Mu’azam ​​akka jedhanitti, Ijaarsa mana jireenyaa, deeggarsa meeshaalee barnootaa, fi arjooma dhiigaa dabalatee sektaroota 18 keessatti hojiin tajaajila tola ooltummaa birrii biiliyoona 10 ol hojjatamuu ibsaniiru.   Ijaarsa manneen barnootaa sadarkaa tokkoffaa 40 fi manneen barnootaa duraa 70 dabalatee pirojektoonni mana jireenyaa qaama miidhamtootaa 4,800 ol xumuramuu isaanii akeekaniiru. Walumaagalatti hirmaannaa hawaasaa cimsuun bara bajataa kana keessatti hojiiwwan tajaajila tola ooltummaa birrii biiliyoona 23 olitti tilmaamamu raawwachuuf karoorfamuu isaa obbo Huseyid ibsaniiru. #Ena Afaan Oromoo #TOI #Ena #  

Hagayya 2/2018(ENA): Godina Boorana Bahaatti Miidhaa Uumamaas ta’ee Nam-tolchee Humna Ofiin damdamachuuf j’a tokko keessatti qabeenyi birrii miiliyoona 48 Ol ta'u qarshiifi gosaan kan walitti qabame ta’uu Waajjirri Buusaa Gonofaa Godinichaa beeksiseera. Godinichi rooba xiqqaa fi balaa hongeef kan saaxilamu waan ta'eef, rakkoon midhaan nyaataa, bishaan dhugaatii fi nyaatni beeyladaa akka mudatu ni beekama. Hoogganaan waajjirichaa Obbo Liiban Dabbasoo akka jedhanitti, rakkoolee kana humna ofiin furuuf uummata kuma 62 fi 931 waliin marii taasiisameen walhubannan uumameera. Godinichatti aanaalee 9 keessatti uummata kuma 481 fi 700 ol ta’an miseensummaa Buusaa Gonofaatiin galmeessuun danda'ameera jedhaniiru. Barana miseensotaa fi deeggartoota irraa qabeenya gosaanii fi maallaqa callaan deeggarsa Qarshii Miiliyoona 179 fi Kuutaa 700 ol ta'u sassaabuuf gara hojiitti galamuu eeraniiru. Ji'a Adoolessaa 2018 qofaatti aanaalee godinichaa hunda irraa qabeenyi gosaa fi qarshii Miiliyoona 48 olitti tilmaamamu sassaabamuu ibsaniiru. Godinichatti bara darbe balaawwan uumamuu danda’an qolachuuf humna ofiin furuuf hojii qabeenyaa waliitti qabu taasiifameen Qarshii Miiliyoona 78 ol sassaabamuus ibsaniiru. Kanneen keessaas qarshii miiliyoona 25 ol kan ta’u namoota arjoomtota miseensa Buusaa Gonofaa hin taaneen kaka’umsa mataa isaaniitiin deeggarsa taasiisame akka ta'e eeraniiru. Godinichatti aanaalee 8 keessatti lafa uummataa heektaara 172 misoomsuun, qamadii fi midhaan adda addaa irratti oomishuudhaan harka namaa eegu irraa gara oomishtummaatti ce'uuf tattaaffiin taasiifamaa jira jedhaniiru. Godinichatti balaa uumamaatiin namoonni hanqina midhaan nyaataaf saaxilaman kuma 96 ol akka jiran eeraniiru. Jiraataan magaalaa Nagallee Booranaa fi hojjetaan mootummaa obbo Mokkonnin Gashir fedhii fi kaka'umsa mataa isaaniitiin Buusaa Gonofaaf deeggarsa kan taasiisan keessaa nama tokkodha. Balaa uumamaa fi nam-tolchee humna ofiin furuuf deeggarsa gosaa fi qarshii taasiisan cimsanii kan ittifuufan ta'uu ibsaniiru. Jiraataan magaalaa kanaa dargaggoo Dhibbaa Diidhaa rakkoolee hawaasummaa humna ofiin furuuf qarshiidhaan, beekumsaa fi humnaan hundumti keenya walgargaaruu qabna jedheera. Dargaggoon kun kaka'umsa mataa isaatiin miseensa Buusaa Gonofaa ta'uudhaan dhaabbataan ji'a ji'aan deeggarsa qarshii taasiisaa akka jiru ibseera. #Ena Afaan Oromoo #TOI #Ena #