Adoolessa 06/2017(TOI) -Tajaajila geejjibaa qilleensaa biyya keessaa qulqullinaanis baay’inaanis fooyyessuuf hojiiwwan hedduun hojjetamaa jiaachuu hojii raawwachiisaan olaanaa garee daandii qilleensaa Itiyoophiyaa ibsan Tarminaaliin Kombolchaa xumura baatii Adoolessaa akka eebbifame himameera. TOI waliin turtii kan taasisan hojii raawwachiisaan olaanaa garee daandii Itiyoophiyaa Masfin Xaasoo, Itiyoophiyaa keessatti geejjiba qilleensaa baay’inaan kan kennu daandii qilleensaa qofa akka ta’e ibsaniiru. Yeroo ammaa magaalaawwan 22tti tajaajila kennaa kennaa akka jiru ibsanii, kunis Afriikaa keessaa tajaajila guddaa ta’uu eeraniiru. Tajaajilli kun gahaa akka hintaane ibsanii, qulqullinaanis ta’e baay’inaan guddisuuf hedduu hojjetamaa akka jiru dubbataniiru. Kanneen keessaa terminaalonni imaltoonni itti keessummeeffaman sadarkaasaanii kan eeggatan gama gochuufn erpoortota hedduu keessatti hojiin guddaan hojjetamuu beeksisaniiru. Dabalataanis Shiree, Naqamtee fi Dambii Doolloottii terminaalota haaraa ijaaruuf karoorfamuu eeraniiru. Bakka xiyyaaronni irraa ka’an haaromsuun xiyyaaronni gurguddoo qubachiisuu akka danda’an gochuuf hojjetamaa akka jiru himaniiru. Erpoortoonni bakka hinjirrettis erpoortonni jaha hojjetamaa akka jiran ibsaniiru. Kanneen keessaa erpoortiin Yaa’a Bal’oo baatii Hagayyaa akka eebbifamu dubbataniiru.a

Adoolessa 06/2017(TO)- Bara oomishaa 2017/18 qonna gannaatiin amma ammaatti lafti heektaarri miiliyoona 7 sanyiin facaafamuu Ministirri qonnaa Dr.Girmaa Amantee ibsan. Ministirri qonnaa Dr. Girmaa Amantee TOI’f akka ibsanitti, birmadummaa nyaataa Itiyoophiyaa mirkaneessuuf hojjetamaa jira. Waggoottan darban hojii damee qonnaatiin qonna gannaa, Arfaasaa fi akkasumas misooma jallisiitiin hojjetamaniin bu’aan quubsaan galmaa’uusaa yaadachiisaniiru. Bara kana guutuu biyyaatti lafti heektaara miiliyoona 21 qonna gannaatiin midhaag garagaraa nifacaafamu. Yeroo ammaa midhaan agadaa kan akka Boqqoolloo facaafamuu eeranii, Xaafii, Qamadii, Garbuu fi haala naannawaarratti hundaa’uun facaafamaa akka jiran dubbataniiru. Teeknooloojii ammayyaa fayyadamuu fi qonnaan bulaaf hubannoon kennamee waan hojjetameef barana oomisha caalaatu eegama jedhaniiru. Xaa’oon, sanyyiin filatamaa fi galteewwan garagaraa qonnaan bulaafyeroon akka qaqqaban taasifamuus dubbataniiru. Qonni gannaa Itiyoophiyaaf yeroo oomishaa isa guddaa ta’uu ibsanii, oomisha waliigalaa keessaa harki 70 yeroo kana kan oomishamu ta’uu dubbataniiru. Akka ibsa ministirichaatti,barana lafti heektaara miiliyoona 13 kilaastaraan kan misoomu yoo ta’u, kan bardheengaddaa yeroo walfakkaataa waliin yoo madaalamu guddachuu ibsaniiru. Qonnaan bulaan kilaastaraan wayita facaasu oomishtummaan caalaa akka dabalu yaadachiisanii, caalaa cimuu akka qabu beeksisaniiru. Lafti heektaarri miiliyoona 6 mekaanaayizeeshiniin qotamuusaa ibsanii, lafa heektaara miiliyoona 1 kan bardheengaddaa akka caalu eeraniiru. Damee qonnaa ammayyeessuu fi oomishaa fi oomishtummaa dabaluuf jijjiiramni guddaan baay’inni qonnaan bulaa teeknooloojii fayyadamuu oolee bulee guddachaa waan dhufeef ta’uu dubbataniiru. Qonna gannaatiin lafa heektaara miiliyoona 21 facaasuun calla kuntaala miiliyoona 659 caalaa galchuuf karoorfamee hojjetamaa jira.

Adoolessa 05/2017(TOI)- Godina Shawaa Lixaatti lafti heektaara kuma 800 caalu qonna gannaatiin misoomaa akka jiru waajjirri qonnaa fi qabeenya uumamaa godinichaa beeksise. Sagantaan jalqabsiisa sanyii garbuu kilaastaraan misoomu qonna ganna misoomu godinicha aanaa Walmaraatti gaggeeffameera. Hoogganaan waajjira qonnaa fi qabeenya uumamaa godinichaa Tarrafaa Araarsaaakka ibsanitti, qonna gannaatiin lafti heektaara kuma 889 sanyiin facaafamaa jira. Kanaanis Boqqooloon, Garbuun, Misingaa fi Qamadiin Kilaastaraan kan misoomu yoo ta’u kana keessaa lafti heektaara kuma 60 fi 425 ta’u garbuub akka facaafamu dubbataniiru. Amma ammaattis lafa qotame keessaa heektaarri harki 50 facaafamuu ibsaniiru. Itti aanaan bulchaa fi hoogganaann waajjira qonnaa fi bulchiinsa lafaa aanaa Walmaraa Dassaaleny Tashoomaa, qonnaan bultoonni aanichaa mala qonnaa kilaastaraatti madaqaa akka jiran ibsaniiru. Qonna gannaatiin aanichatti lafa heektaara kuma 32 fi 760 midhaan garagaraa facaasuun kuntaala miiliyoona 2 fi tuqaa 7 galchuuf karoorfamee hojjetamaa jiraachuu ibsaniiru. Kana keessaa gandoota afuritti lafa heektaara kuma 5 fi 700 kilaastaraan garbuu biiraa facaasuun eegalameera jedhaniiru. Qonnaan bultoonni kuma 9 kilaastaraan gurmaa’anii lafa asiidiin miidhame nooraan waldhaanuun misooma qonnaa bu’a qabeessa gochuuf hojjetamaa jiraachuu ibsaniiru. Qonnaan bultoonni aanichaa gamasaaniin, kilaastaraan misoomsuun ammanatti akka hin baramne ta’uu ibsanii, deeggarsa waajjira qonnaan barana taasifameefiin garbuu kilaastaraan misoomsuun oomishasaanii warshaaf dhiheessuuf qophaa’uusaanii ibsaniiru. Qonnaan bulaan Asaffaa Angaasuu, lafasaanii asiidiin miidhame ogeessota qonnaa waliin ta’uun Nooraan waldhaanuun oomishtummaa guddisuuf hojjechaa jiru. Qonnaan bulaan Hundee Tolaa, lafasaanii asiidiin miidhame Nooraan waldhaananii oomishtummaa guddisuu erga eegalanii waggaa sadii akka guute yaadataniiru. Laftisaanii gara du turetti waan deebi’eef oomishni wagga waggaan argatan guddachaa dhufuusaa ibsaniiru.

Adoolessa 05/2017(TOI)- Bu’uuraaleen Misoomaa Magaalaa Adaamaatti Ijaaramanii Eebbifaman Dhiheenyatti Tajaajila Argachuu akka isaan dandeessisu Jiraattonni magaalichaa ibsan. Naannoon Oromiyaa bara baajataa xumurametti bu’uuraaleen misoomaa ijaarsi isaanii xumurame tajaajilaaf banaa gochaa turuunsaa ni beekama. Bulchiinsi Magaalaa Adaamaas Bu’uuraalee Misoomaa Fayyadama hunda galeessa jiraattotaa magaalichaa guddisan tajaajilaaf geessiseera. Jiraattonni magaalichaa Yaadaa isaanii TOI’f kennan akka ibsanitti, bu’uuraaleen misoomaa gidduu kana eebbifamanii tajaajilaaf banaa ta’an, sochii Hawaas-Diinagdee isaanii saffisiisuun jireenya isaanii jijiiruuf kan isaan gargaaru ta’uu dubbataniiru. Jiraataan Magaalaa Adaamaa Kutaa Magaalaa Boolee Aanaa Gooroo Shariif Ibraahim akka ibsanitti, ammaan dura Manni Barumsaa Idileen Duraa Naannoo isaanii waan hin jirreef Daa’imman Umuriin Isaanii Mana Barumsaa Idileen Duraaf qaqqabe carraa barnootaa dhiheenyatti hin argatan ture. Mana Barumsaa Idileen Duraa Naannoo isaaniirraa fagaate jiru geessanii barsiisuuf daandii konkolaataan itti baay’atu qaxxaamuruun dirqama waan ta’eef nageenya isaaniif waan sodaataniif mana isaan oolchina turre jedhaniiiru. Yeroo ammaa Manni Barumsaa Idileen duraa ‘Bu’uura Boruu’’ naannoawa isaaniitti ijaarameefii ibsaniiru. Manni Barumsaa Ijaaramuunsaa Baasii Geejibaafi rakkoo ture hanbisuurra darbee , mana barumsaa dhiheenyatti argachuu isaanniin carraa daa’immn isaani fuulduraaf haala gaarii kan uumedha jedhaniiru. Gidduugalli Bashannanaa Bulchiinsa Magaalichaan IjaaramanSammuu keenya hojiin dadhabe bashannansiisuuf haala mijataa uumera ,jechuun jiraataa kutaa magaalaa Danbalaa dargaggoo Iyoob Kindee ibseera. Bakkeewwan bashannanaa dargaggoonni magaalichaa bakka hin taane ooluurra yeroo isaanii bakka midhaa fi gaariitti dabarsuuf haalla mijataa uumuu ibseera. Dabalataanis Jiraataan Aanichaa Biroon Obbo Lammii Baallammii gamasaaniin, bakki bashannanaa miidhagee naannoo isaaniitti amma ijaarame kanaan dura bakka balfi itti gatamu ijaaf hin tolle ture jedhaniiru. Bakkichi Dargaaggootaa fi Manguddooota magaalichaa dabalatee, kan itti bashannanan, kan itti boqotanii fi tajaajiloota adda addaa bakka itti argatan ta’eera jedhaniiru. Kutaa Magaalaa Danbalaatti Gidduugala Sa’a Aannaanii fi Furdisa Loonii Wanjiitti Fayyadamaa bakka hojii kan ta’an Qonnaan Bulaa Tasfaayee Kaasaa akka jedhanitti, ammaan dura loon ka furdisan mana jireenyaaasaanii keessatti ta’uu ibsaniiru. Yeroo ammaa Bulchiinsa Magaalichaangidduu gala sa’a aanaanii fi sangaa furdisaa ammayyaa argachuu isaaniif Mootummaa galateeffataniiru. Sa’a Aannan fooyya’aa kennan gara gidduu galichaatti galchuun haala ammayyaan horsiisuuf karoorfannee gara hojiitti galleera jedhaniiru. Bu’uuraaleen misoomaa eebbifamanii tajaajilaaf banaa ta’an tajaajila bu’uuraa dhiheenyatti argachuuf kan isaan dandaeessisu ta’uu jiraattonni Yaada kennaniiru.