Guraandhala 29/2018 (ENA): Jiraattonni Godina Boorana Bahaa magaalaa Nagallee Booranaa, filannoo waliigalaa 7ffaa irratti hirmaachuuf isaan dandeessisu kaardii galmee filattootaa fudhachuun sagalee kennuudhaaf qophaa’aa akka jiran himani. Galmeen filattotaa tokkoon tokkoon buufata filannootti Guraandhala 28/ 2018 akka sagantaa Boordiin Filannoo Biyyaalessaa Itiyoophiyaa kaa’etti eegaluun isaa ni yaadatama. Haaluma sagantaa kanaatiin ENA’n jiraattota buufata filannoo magaalaa Nagallee Booraanaatti kaardii galmee filattootaa fudhachaa turan dubbiseera. Jiraattota magaalattii keessaa obbo Gurraachaa Jaataniin filannoo waliigalaa ji’a Caamsaa keessa gaggeeffamu irratti hirmaachuuf dursanii qophii ta’uu himan. Kanaafis kaardii galmee filattoataa fudhachuun paartii guddinaa fi misooma biyyaatiif ni hojjeta jedhanii amananiif sagalee keenya ni laatna jedhaniiru. Filannoo waliigalaa 7ffaa irratti hirmaachuuf kaardii filattootaa fudhachuuf kan dhufan jiraataan Ganda Gobichaa kan ta’an obbo Turaa Liiban mirga lammummaakootti fayyadameen hiree biyya keenyaa kan murteessu sagaleekoo kennuuf kaardii filattootaa fudhadheera jedhani. Jiraataan magaalattii kan biraa dargaggoo Maammush Fayisaa kaardii filattootaa kan fudhate paartii biyyaaf ta’a jedheen amane filachuuf qophaaheera jedheera. Qindeessaan filannoo Nagallee obbo Abbaynaa Warquu akka ibsanitti, galmeen filattotaa buufata filannoo Godinichaa hundattii fi magaalaa Nagallee Booranaa keessatti karaa nagaa gaggeeffamaa jira jedhani. Akkasumas qindeessitoonni filannoo 167 adeemsa galmee filattotaa itti dhiyeenyaan hordofaa akka jiranii fi gaggeessitoonni filannoo 668 galmee kanas raawwachaa akka jiran beeksisaniiru.

Guraandhala 29/2018 (ENA): Ummanni naannoo Tigraay nagaa fi misooma itti fufiinsa qabuuf tumsa cimsu akka itti fufuu qabu hayyoonni Yuunivarsiitii ibsaniiru. Ministirri Muummee Doktar Abiyyi Ahimad turtii ENA Afaan Tigree waliin taasisaniin akka ibsanitti, misooma hunda galeessaa fi nageenya sadarkaa biyyaatti galmaa’aa jiru irraa ummanni Tigraay fayyadamoo ta’uu akka qabu eeruun isaanii ni yaadatama. Mootummaan misooma hunda galeessa fi fayyadamummaa ummata naannichaaf kutannoon hojjechaa akka jiru ibsuun gareen ABUT waraana biraatiif hojjechaa akka jiru ibsaniiru. Ibsa Ministira Muummee ilaalchisee, Yunivarsiitii Boongaatti barsiisaan kutaa Saayinsii Siyaasaa fi Hariiroo Idil-addunyaa Gargaaraa Piroofeesaraa Yaareed Ayyaaloo ENA waliin turtii taasisaniin, gareen ABUT ilaalcha siyaasaa yeroo waliin hin deemne qabatee waraanaaf dargaggoota qopheessuun sirrii akka hin taane hubachiisani. Kunis naannoon Tigraay fi ummanni ishee jijjiirama irraa akka hin fayyadamne gufuu ta’uu eeraniiru. Ibsi Ministeera Muummee ejjennoo cimaa mootummaan ummanni Tigraay nagaa fi misooma irraa fayyadamoo ta’uu qaba jedhu ta’uu ibsuun, gareen ABUT faallaa kanaa ta’ee hojjechaa jiraachuu ibsaniiru. Kanaaf, keessumattuu ummanni naannichaa kaka’umsa guddaa fudhachuun yaada garee ABUT yeroon isaa darbe jijjiiruuf socho’uu akka qabu hubachiisaniiru. Gareen ABUT ummata Tigraay keessattuu dargaggoonni jijjiirama akka biyyaatti dhufe irraa akka hin fayyadamne gochuun miidhaa hamaaf isaan saaxilaa jira jedhani. Doktar Yaareed akka himanitti, ibsi Ministirr Muummee kennan kan agarsiisu mootummaan ummanni Tigraay gara nagaatti deebi’ee misooma irraa fayyadamoo akka ta’uuf fedhii cimaa akka qabu kan agarsiisu ta’uu jedhani. Kanaaf ummanni Tigraay tattaaffii mootummaa deeggaruun jijjiiramaaf hojjechuutu irraa eegama.   Ministirri Muummee Dr. Abiyyi Ahimad yaada ijoo ummata Tigray ni fayyada jedhanii eeran barbaachisaa waan ta’eef uummanni carraa kanatti fayyadamuu qaba kan jedhani immo Yunivarsiitii Dillaatti barsiisaa fi qorataa kan ta’an Doktar Addisuu Firiinjoo dha. Ilaalchi siyaasaa kamiyyuu yeroo waliin adeemuu kan qabu ta’uu kan eeran hayyuun kuni, gareen ABUT ilaalcha fudhatama hin qabnee fi yeroon isaa irra darbeen deemuun sirrii akka hin taane dubbatani. Dargaggoonni yeroo hunda nagaaf dhaabbachuu akka qabanis dubbataniiru.   Ergaa fi ibsi Ministira Muummee kennan haala amma naannoo Tigraay keessa jiru irra darbee sirna siyaasa Itiyoophiyaa kan agarsiise ta’uu Yunivarsiitii Miizaan Teeppiitti barsiisaan saayinsii siyaasaa Bimarriq Barihuun himaniiru. Kunis nageenyaa fi tasgabbii naannichaaf hiika guddaa qabaachuu eeruun, keessattuu dargaggoonni Tigraay garee ABUT duubatti hafaa waliin jiru dhiisuun filannoo fooyya’aa waliin dhaabbachuu qabu jedhani.

Guraandhala 28/2018(ENA)- Injifannoon Adwaa kutannoo Itiyoophiyaanonni biyyasaaniif qaban kan agarsiise injifannoo idil addunyaati jedhan Pirezidaantiin FDRI Taayyee Atsqasillaasee. Sagantaan eebba kitaabaa “Adwaan injifannoo Itiyoophiyaanotaa baratti darbuu fi yaadannoo waloo” jedhamu kan qindeessummaa magaalaa Finfinneetiin qophaa’e yaadannoo injifannoo Adwaatti gaggeeffamaa jira. Kitaabni kun yaadaanis ta’e qabiyyeedhaan cimaa fi seenaa milkaa’edha jedhan pirezidaantiin FDRI Taayyee Astqasillaasee wayita eebbaa kana. Kitaaba “Adwaan injifannoo Itiyoophiyaanotaa baratti darbuu fi yaadannoo waloo” irratti dubbiin ijoon seenaan qabachuu qabu hammatamuusaa ibsaniiru. Gootota Adwaa seenaan dagate sirriitti yaadachuudhaan carraaqqiin taasise kan dinqisiifamu ta’uu dubbataniiru. Dubbiin ijoo Yaadama kitaabichaa miira Itiyoophiyummaa kan qabsiisu abdii fi hawwii haaraaf kan kakaasu galmee seenaa ta’uusaa kaasaniiru. Kitaabni “Adwaan injifannoo Itiyoophiyaanotaa baratti darbuu fi yaadannoo waloo” bara keessa jirru kan ittiin hojjennuu fi boru immoo kan ittiin hordofnuta’uu himaniiru. Injifannoon Adwaa kutannoo Itiyoophiyaanonni biyyasaaniif qaban kan agarsiise injifannoo idil addunyaati kan jedhan Pirezidaanti Taayyeen, kitaabni kun injifannoon Adwaa Itiyoophiyaarra darbee faayidaa idil addunyaatti qabu agarsiiseera jedhan. Kitaabni kun sanada beekumsa babal’isu, hir’uu kan guutu, of sakatta’uuf, of qorachuuf kan kakaasuu fi yaadama sababa qabeessa kan gabbisu ta’uu eeraniiru.

Guraandhala 28/2018 (ENA)- Paartii biyyaa fi ummataaf ni hojjeta jennu filachuuf kaardii filannoo fudhachaa jirra jedhdhan jiraattonni Samaraa Loogiyaatti kaardii filannoo fudhatan. Akkaataa sagantaa boordii filannoo biyyaalessaa Itiyoophiyaatiin har’a Guraandhala 28 bara 2018 irraa eegalee galmeen filattootaa buufataalee filannootti eegalameera. Riippoortarri ENA buufataalee filannoo Samaraa Loogiyaa irraa jiraattota kaardii filannoo osoo fudhatanii arge dubbiseera. Jirattonni yaada kennan paartii biyyaa fi ummata fayyada jennu filachuuf kaardii filannoo fudhachaa jirra jedhaniiru. Adeemsa filannoo Kanaan mirga demokiraasii fayyadamuun kan danda’amu kaardii filannoo fudhachuun ta’uu kaasanii, kanaaf ammoo yeroo osoo hin fudhatiin guyyaa jalqabaa fudhanneerra jedhan. Jiraattota magaalichaa buufataalee filannootti dubbifne keessaa Afki’ee Alii, Mahaammad Yaayyee fi dargaggoo Habiib Mahaammad paartii biyya gaggeessuu fi ummata fayyadu filachuuf kaardii fudhanneerra, ittis gammanneerra jedhaniiru. Boordii filannoo biyyaalessaa Itiyoophiyaa waajjira qindeessaa bordii filannoo naannoo Affaaritti hogganaan kutaa filannoo Dubtii Ibraahim Abdallaa, kutaa filannoo kanatti buufataaleen filannoo 124 qophaa’anii keessummeessuu eegalaniiru jedhaniiru. Walumaa gala buufataalee filannoo kana keessatti filannoo kan raawwachiisan 496 filattoota keessummeessuuf har’aa eegalee qophii ga’aarra jiraachuu mirkaneessaniiru.

Guraandhala 28/2018 (ENA)- Naannoo Oromiyaa bakkeewwan garagaraatti buufataalee filannootti argamuun kaardii filannoo fudhachuu eegalaniiru Akkaataa sagantaa filannoo walii galaa toorbaffaa boordii filannoo biyyaalessaa Itiyoophiyaatiin galmeen filattootaa har’a Guraandhala 28 bara 2018 eegaleera. Akkaataa Kanaan naannoo Oromiyaa bakkeewwan garagaraa galmeen filattootaa itti eegalame keessaa godinni Harargee Lixaa Ciroo, Boorana Bahaa magaalaan Nagallee, Wallaggi bahaa magaalaan Naqamtee ni eeramu. Magaalaa Cirootti jiraataan ganda Burqaa Ciroo Kadir Sayid ENAtti akka himanitti, filannoo kanaan nama guddinaa fi badhaadhina Itiyoophiyaan eegalte galmaan gahu filachuuf qophaa’aniiru. Mirga demokiraasii fayyadamuun dorgomaa bakka na bu’a jedhan filachuuf galmaa’uusaanii kan dubbatan ammoo magaalichatti jiraataa ganda Caffee Araaraa Mahaammad Hasani. ''Filannoowwan darban keessaa 4 irratti hirmaadheera” jedhanii filannoon baranaa imala guddina biyyaa si’achiisuuf murteessaa wan ta’eef xiyyeeffannoon hirmaachuuf qophaa’uusaanii ibsaniiru. Godina Boorana Bahaatti jiraattuun magaalaa Nagallee Booranaa adde Galiilaa Fiqaaduu, buufata filannoo Kahaloo Gaaftirootti argamuun kaardii filannoo fudhataniiru. Filannoo biyyaalessaa Caamsaa dhufu gaggeeffamurratti dorgomaa Paartii walooma, nagaa, misoomaa fi guddina biyyaaf hojjeta jettu filachuuf kaardii fudhachuu dubbatteetti. Hundi kaardii filannoo fudhachuun filannoo biyyaalessaarratti hirmaachuun paartii barbaadu akka filatu gorsiteetti. Godina Wallagga Bahaa magaalaa Naqamtee jiraataan ganda Burqaa Jaatoo obbo Fayyisaa Cimdeessaa, filannoo walii galaa Kanaan mirga demokiraasiitti fayyadamuuf kaardii filannoo fudhachuusaanii dubbataniiru. Kanneen biroos paartii siyaasaa biyyaa fi ummata caalaatti fayyadu filachuu akka danda’an sagantaa bahetti fayyadamuun kaardii akka fudhatan gorsaniiru.

Guraandhala 27/2018 (ENA): Filannoo waliigalaa 7ffaa bara kana gaggeeffamu irratti dammaqinaan hirmaachuuf kan nu dandeessisu kaardii galmee filattootaa fudhachuuf qophoofneerra jedhani jiraattonni Naannoo Oromiyaa Godina Iluu Abbaa Booraa. Boordiin Filannoo Biyyaalessaa Itiyoophiyaa filannoon Caamsaa 24, 2018 dhufu dimokiraatawaa, nagaa fi hirmaachisaa akka ta’uuf sagantaalee adda addaa irratti hojjechaa jira. Qophii taasifamaa jiru keessaa galmeen filattootaa Boru, Guraandhala 28/2018 eegalama.   Boordichi dhiheenya kana galmee filannoo dijitaalaa buufataalee filannoo gara kuma 17tti akka dhaqqabamu gochuuf hojjechaa jiraachuu beeksiseera. Jiraattonni Godina Iluu Abbaa Booraa aanaa Hurrumuu ENA'tti akka himanitti, filannoo waliigalaa dhufu irratti mirga dimokiraasii keenyatti fayyadamuuf kaardii filannoo argachuuf eeggachaa akka jiran dubbatani   Jiraattonni aanaa Mattuu Zimaarguu Jamaal fi Naahawwii Daffaar gama isaaniitiin akka filattotaatti galmaa'uun mirga isaaniitti fayyadamuuf qophii taasisaa jirra jedhani. Filannoon kun ijaarsa naannichaa keessatti sadarkaa murteessaa waan ta’eef dirqama lammummaa itti gaafatamummaan bahachuuf qophii ta’uu kan hime dargaggeessi jiraataa magaalaa Mattuu Fiqaaduu Indaalaa dha.   Dargaggoo Fedhasaa Taarraqanyii fi Girmaa Firrisaa gama isaaniitiin akka ibsanitti, Filannoon waliigalaa dimokiraatawaa, haqa qabeessa, nagaa fi hirmaachisaa akka ta’uuf akka dargaggootaatti gahee keenya ba’uuf qophiidha jedhani.   Ijaarsa naannichaa keessatti gaheen dubartootaa fi dargaggoonni qaban hiika guddaa akka qabu hubachuun kaardii filannoo argachuu fi eenyu akka isaan bakka bu’u filachuuf qophii ta’uu himaniiru.   Dhaaba damee siyaasaa, dinagdee fi hawaasummaa keessatti nu fayyada jennee yaadnu filachuuf qophoofneerra jedhani.

Guraandhala 27/2018(ENA)- Filannoo walii galaa 7ffaa irratti dammaqinaan hirmaachuun paartii guddina biyyaa fi ummattootaaf hojjeta jedhan filachuuf qophaa’uusaanii jiraattonni magaalaa Jijgjigaa ibsan. Boordiin filannoo biyyaalessaa Itiyoophiyaa filannoo walii galaa baranaaf boru Guraandhala 28 bara 2018 irraa kaasee filattoota galmeessuu akka eegalu beeksisuunsaa ni yaadadama. Filannoo walii galaa 7ffaa Caamsaa 24 bara 2028 gaggeeffamuuf sagalee kennuuf kaardii fudhachuuf qophaa’uusaanii jiraattonni magaalaa Jigjigaa yaadasaanii ENA’f kennan ibsaniiru. Paartii siyaasaa biyyaa fi ummataaf ni hojjeta jedhan filachuuf qophii ta’uu beeksisaniiru. Kanneen yaada kennan keessaa obbo Jamaal Ibraahiim, filannoon wagga shanitti si’a tokko gaggeeffamu lammiileen paartii biyyaa fi ummataaf ni hojjeta jedhan filachuuf carraa kan mijeessu ta’uu dubbataniiru. Jiraataan biraan Mahaammad Umar gamasaaniin, filannoon walii galaa kun ijaarsa sirna demokiraasii si’oomsuu fi sirna murteessaa guddina biyyaaf gargaaru ta’uu ibsaniiru. Paartii siyaasaa biyyaaf ni fayyada jedhan filachuuf qophii ta’uusaaniis dubbataniiru. Lammiileen filannoof qaqqaban filannoo kanarratti dammaqinaan akka hirmaatan dabalanii dubbataniiru. Filannoon agarsiiftuu ijaarsa sirna demokiraasii biyya tokkooti kan jedhan ammo obbo Farihaan Muhaammad kan jedhamanidha. Kaardii fudhachuudhaan paartii siyaasaa guddina biyyaaf ni hojjeta jedhan filachuun mirga demokiraasiisaaniitti akka fayyadaman dubbataniiru. Filannoo kanarratti hirmaachuuf kaardii fudhachuuf qophaa’uusaanii ibsaniiru.

Guraandhala 27/2018(ENA): Dhalattoonni Tigraay magaalota Hararii fi Asoosaa keessa jiraatan garee diigumsaaf kan dhaabbate ABUT balaaleffachuun nageenyaa fi misooma Tigraayiif gahee keenya ni baana jedhan. Ministirri Muummee Dr. Abiyyi Ahimad tibbana ENA Afaan Tigreetiin haasaa taasisaniin, ummanni Tigraay nagaa fi misoomaaf qabsaa'ee nagaa fi misoomaaf fedhii guddaa akka qabu ibsaniiru. Misoomni fi nageenyi naannolee hunda keessatti dhufaa jirus ummata Tigraayiif kan malu dha kan jedhan Ministirri Muummee Dr. Abiyyi Ahimad, yaada dulloomaa kan qabu gareen kuni ammas waraanaa fi dhumaatii biroof dhalattoota Tigraay affeeraa jira waan ta’eef dhiisi jedhamuu qaba jechuun isaanii ni yaadatama. Dhimma kana irratti ENA’n dhalattoota Tigraay magaalota Hararii fi Asoosaa keessa jiraatan dubbiseen, gareen ABUT garee diigumsaa fi karoora waraanaa malee nagaa fi misooma ummataaf hojjechuu hin barbaanne ta’uu ibsaniiru. Ministirri Muummee Dr. Abiyyi Ahimad akeeka badii garee kanaa fi fedhii ummanni nagaa fi misoomaaf qabu ilaalchisee ibsi kennan sirrii fi waqtaawaa ta’uu ibsaniiru. Kanaaf yaada Ministira Muummee deeggaruun garee diigumsaaf dhaabbate falmuun nagaa fi misooma Tigraayiif gahee keenya ni baana jedhan.   Aadde Giyoorgis Haagos jiraattuu magaalaa Hararii kan ta’an akka himanitti, gareen diigumsaa kun ummata Tigraayiif nagaa fi misoomaaf hojjetee hin beeku jedhani. Mootummaa Shaabiyaa waliin nagaa fi misooma Itiyoophiyaa hin barbaanne waliin ijaaramuun naannicha gara naannoo waraanaatti jijjiiruuf hojjechaa jiraachuu ibsuun, akeeka badii kana cimsinee ni falmina jedhan.   Ilaalchi garee ABUT kan kan yeroon irra darbee fi eenyu iyyuu kan hin fayyadne ta’uu ibsuun, ummanni Tigraay akkuma naannolee biroo amma ilaalcha haaraa fi dhaloota haaraatiin hoogganamuu cimsee hawwa jedhan obbo Goytom Bayyanaa jiraataa magaalaa Asoosaa kan ta’an. Kanaaf, ilaalcha garee ABUT yeroon isaa irra darbe ofirraa qolachuun nagaa, misoomaa fi fayyadamummaa naannichaaf ni hojjenna jedhaniiru.   Magaalaa Harar kan jiraatan Sheenook Leelaay gama isaaniin,ergaan Ministirri Muummee Dr. Abiyyi Ahimad dabarsan nagaa fi misooma biyyaatiif bu'aa qaba waan ta’eef hundi keenya ni deeggarra jedhan.   Dargaggeessi biraa Kibroom Gabramadin magaalaa Asoosaa jiraatu akka himetti, ummanni Tigraay jijjiiramaa fi karoora misoomaa hunda galeessa Itiyoophiyaatti dhufe irraa fayyadamoo ta’uuf fedhii cimaa qaba jedhe. Kana galmaan ga’uuf garee diigumsaa ABUT kan walitti bu’iinsaa fi waraanaaf hojjatu waliin ta’uun qolachuun kan danda’amu ta’uu ibsuun, kanaafis keessumaa dargaggoonni keenya gufuulee isaan mudatan akka mo’atan gargaaruuf ni hojjenna jedhaniiru.   Dargaggoo Saamu’eel Mallasaa fi shamarree Fireehiwoot Biraanee jiraattota magaalaa Harar akka jedhanitti, yeroo ammaa dargaggoonni Tigraay waraana gareen ABUT labsaa jiru jalaa godaansaa jiru, garuu godaanuun furmaata waan hin fidneef waliin taanee ummata Tigraayiif nagaa, misoomaa fi badhaadhina fiduuf ni hojjenna.