Onkoloolessa 20/2018 (TOI)- Itiyoophiyaan Faayidaa dinagdeeshee fi eenyummaashee eegsisuuf bakka turte gara galaana diimaatti deebi’uu dirqama jechuun ibsan Piroofeesar Biruuk Hayiluu Bashaah Ministirri muummee Dr. Abiyyi Ahimad walgahii idilee lammaffaa bara hojii shanaffaa mana maree bakka bu’oota ummataa irratti gaaffiiwwan miseensota mana mareerraa dhihaataniif deebii fi ibsa kennaniin, dhimmi galaana diimaa gaaffii seera qabeessa, seena qabeessa, teessuma lafaa fi dinagdee ta’uu kaasaniiru. Yuunivarsiitiiwwan Itiyoophiyaa fi Ameerikaa garagaraatti barsiisaa kan ta’an Piroofeesar Biruuk Hayiluu Bashaah TOI’tti akka himanitti, akkaataan Itiyoophiyaan galaana diimaarraa gargar cite bu’ura seeraa akka hin qabne kaasanii, biyyoota ulaa galaanaa hin qabne 44 keessa baay’inaan akka caaltu ibsaniiru. Itiyoophiyaan riijinii galaana diimaaf haraa miti kan jedhan piroofeesar Biruuk, Pershiyaarraa amma Babel Mandabii fi Hinditti kan deeman dooniiwwan cimaa kan qabdu akka ture yaadataniiru. Galaannii diimaa kan ishee wayita turetti bulchiinsota Roomaa fi Giriik waliin walitti hidhata daldalaa cimaa qabaachaa akka turte ibsanii, faayidaa dinagdee fi eenyummaa biyyaalessaa Itiyoophiyaa eegsisuuf gara galaana diimaatti deebi’uun dirqama jedhaniiru. Itiyoophiyaan imaammata hariiroo alaa tumsarratti hundaa’e akka qabdu eeranii, gara galaana diimaatti deebi’uun riijinichaaf faayidaa hedduu akka qabu ibsaniiru. Biyyoota addunyaarraa ulaa galaanaa hin qabne keessaa 16 Afriikaa keessatti akka argaman ibsanii, Itiyoophiyaan waggaa 34 dura ulaa galaanaa km. kuma lama ta’u qabdi ture jedhaniiru. Afriikaarraa Zimbaabuwee fi Maalaawiin ulaa galaanaa Moozaambiik akka fayyadaman yaadatanii, gaaffiin sera qabeessii fi karaa nagaa Itiyoophiyaan gaafatte biyyoota ollaatiin qajeeltummaan ilaalamuu akka qabu ibsaniiru. Itiyoophiyaan eenyummaashee eegsisuuf hammattoo seeraa amma mana murtii idil addunyaatti geessuuf ishee dandeessisu ifatti akka qabdu dubbataniiru. Itiyoophiyaan ulaa galaanaatti akka hin fayyadamne dhorkuuf mirga kan qabu hin jiru kan jedhan piroofeessar Biruuk, biyyi ulaa galaanaa qabu tumsuuf dirqama akka qabu ibsaniiru. Haala Kanaan biyyoota gurguddoo dabalatee adeemsa karaa nagaa Itiyoophiyaan hoedofte ulaa galaanaa akka ishee barbaachisu fudhataniiru jedhaniiru. Ulaan galaanaa Itiyoophiyaaf barbaachisaa akka ta’e Awurooppaarraa amma biyyoota galoo galaanaatti beekamtii kennuu eegaluusaanii bu’aa carraaqqii dippilomaasii ta’uu ibsaniiru.

Onkoloolessa20/2018(TOI)-Madin Itiyoophiyaan shaampiyoonsii liigii “CAF” marsaa 2ffaa har’a injifataasaa wayita sanaa Piiraamidii Gibtsii waliin taphasaa ni gaggeessa. Taphni Gareewwan Lameenii galgala sa’aatii12:00kaayirootti kan argamu Istaadiyeemii June 30 er diffeensitti gaggeeffama. Kilaboonni kun Onkoloolessa16 bara2018 tapha marsaa jalqabaa gaggeessaniin tokko gitaan addaan bahaniiru. Burk Mulgeetaa Madin Itiyoophiyaaf, Fiisten Mayelee piraamidiif goolii kan lakkoofsisanidha. Madin Itiyoophiyaan tapha deebi’aa yoo injifate gara garee shaampiyoonsi liigii CAF tti ,makama.   Madin bara kana shaampiyoonsi liigii CAF irratti yeroo jalqabaaf hirmaachuusaati. Garichi seenaasaa keessatti piriimer liigii Itiyoophiyaa yeroo jalqabaaf injifachuun carraa dorgommii Ardiirratti hirmaatu akka argatuuf dandeessiseera. Kilabiin Gibtsi Piiraamid abbaa waancaa Shaampiyoonsi liigii CAFti. Kilabichi waancaa mo’attoota waancaa CAF injifateera.  

Onkoloolessa 20/2018(TOI)-Paartiin badhaadhinaa leenjii waggaa hooggantoota olaanoo bara 2018 gaggeessuu eegaleera. Leenjichi mataduree “ Ilaalcha Mootummaa Ida’amuutiin, milkaa’inoota damichaa’’ guyyoota walitti fufaan 10f kan kennamu ta’a. Leenjichi mata dureewwan adda addaa daandeettii, beekumsaa fi humna hoggansaa dagaagsan kan itti dhihaatan ta’uun ibsameera. Leenjicharratti Qondaaltonni Olaanoon Federaalaa fi Naannoolee irraa dhufan kuma 2 ol akka hirmaatan eerameera. Leenjicha cinaatti daawwannaan hojii dirree akka gaggeeffamu eerameera.

Onkoloolessa 20/2018(TOI)- Biyya akka Itiyoophiyaa seenaa qabeettii, guddoo fi ummanni hedduun keessa jiraatu deemsi Ulaa galaanaa akka hinqabaanne taassisan seeraanis ta’e siyaasaan fudhatama akka hin qabne hayyoonni ibsan. Gaaffiin ulaa galaanaa Itiyoophiyaa qananii osoo hin ta’iin dhimma jiraachuu ta’uusaa Yuunvarsiitii Yuunitiitti barsiisaan ogummaa Gaggeessummaa fi Quunnamtii Addunyaa Dr. Geetiyyee Tirfee hubachiisaniiru. Itiyoophiyaan ulaa galaanaa argachuuf tattaaffii taasisaa jirtu seenaan, ragaawwan seeraan, haala teessuma lafaan, ulaagaawwan Idil-Addunyaan amansiisaa fi fudhatama kan qabu ta’uu ibsaniiru. Adeemsa hanga ammaa jiruun madaalliiwwan hedduun fudhatama Idil-Addunyaa qabaachuusaa hubachuusaanii dubbataniiru. Yuunvarsiitii Wachaamootti barsiisaa Saayinsi siyaaasaa fi Quunnamtii Addunyaa Mulaalam Haayilamaariyaam gamasaaniin, Ulaa galaanaa fayidaa hedduu qabu argachuuf gaaffii Itiyoophiyaan kaaste deeggarsa ummataa qabaachuu eeruun sirrii ta’uusaa kaasaniiru. Of-eeggannoo Mootummaan ittiin deemaa jiru dinqisiifatanii Biyyi akka Itiyoophiyaa seenaa qabeettiin, guddoo fi ummata hedduu qabdu ulaa galaanaa akka hinqabaanne wantoonni taassisan seenaanis ta’e siyaasaan fudhatama akka hin qabne hubachiisaniiru. Itiyoophiyaan Adeemsa itti Ulaa Galaanaa dhabde Amansiisaa fi uumamaan osoo hinta’iin shira gareewwan tokkoo ta’uusaa kan kaasan immoo Yuunvarsiitii Diillaatti Barsiisaa Saayinsii Siyaasaa fi qorataa siyaasa Afriikaa Bahaa Daawwit Mazgab dha. Walitti hidhaminsa biiyyoolessa fi Riijinii cimsuurratti ulaa galaanaa argachuuf tattaaffiiwwan taassifaman fedhii mootummaa fi paartii tokkoo godhanii fudhachuu akka hin qabne hubachiisaniiru. Itiyoophiyaan Ulaa Galaanaa argachuu akka qabdu amanuun tattaaffii eegaluushee eeruun, walitti hidhaminsa ummataaf, biyyarra darbee tumsa riijinii fi waloon guddachuuf qoodni ulaa galaanaa guddaa ta’uu hubachiisaniiru. Tattaafficha milkeessuuf dippiloomaasii nagaa qabeessa gaggeessuun ni gorfama kan jedhan hayyoonni Itiyoophiyaan ulaa galaanaa argachuun faayidaan riijinichaaf qabu, guddinaa fi misooma waloof biyyoonni osoo tumsan bu’aa akka argatan TOI’f ibsaniiru. Itiyoophiyaan bu’uura seeraa qabdu, seenaa fi ragaa sanadaa sirnaan qindeeffattee Karaa Dippiloomaasii nagaa qabeesaanii fi tooftaan tattaaffiishee cimitee itti fufuun akka irraa eegamu hubachiisaniiru. Ministirri Muummee Dr. Abiyyi Ahimad Mana maree bakka bu’oota ummataa 6ffaa bara hojii 5ffaa yaa’ii Idilee 2ffaa gaggeeffamrerratti akka dubbatanitti, dhimmi ulaa galaanaa seenaan, teessuma lafaa fi gaaffii Diinagdee ta’uusaa ni amanna, dhimma jiraachuu fi jiraachuu dhabuu waan ta’eef Itiyoophiyaan itti cufameee jiraachuu waan hin dandeenyeef tattaaffiinshee itti fufa.

Onkoloolessa 19/2018(TOI)- Dameelee badhaadhinni waan hin oolle ta’uu mirkaneessan keessaa tokko qonna waan ta’eef hojiileen eegalaman cimanii itti fufuusaanii naannoo Oromiyaangodina Shawaa bahaatti argineerra jedhan Itti aanaan ministira muummere Tamasgeen Xurunaa. Itti aanaan ministira muummee, sagantaa Qamadii gannaa walitti qabuu fi jalqabsiisa Qamadii gannaa naannoo Oromiyaa godina Shawaa bahaatti gaggeeffamaa jiru irratti argamuusaanii ergaa fuula miidiyaa hawaasummaa isaaniirratti barreessaniin eeraniiru. Haala Kanaan dameelee badhaadhinni waan hin oolle ta’uu mirkaneessan keessaa tokko qonna waan ta’eef hojiileen eegalaman cimanii itti fufuusaanii arguusaanii ibsaniiru.