Sadaasa 5/2018(TOI)-Misooma koriidaraa Magaalaa Gambeellaatti eegalame saffisiisuun magaalitti jiraattotasheetiif mijattuu fi hawata Turiizimii gochuuf hojiin hojjetamu cimee Itti Fufuu Bulchiinsi Magaalichaa Beeksise. Magaalaan Gambeellaa bakka gahumsa Turistii kan ta’an qabeenya uumamaan kan marfamte yoo ta’u keessumaa lagni baaroo magaalittii lamatti qoodee keessa darbu miidhaginaa fi dammaqina addaa magaalittiif kan kennuu ta’uun hubatameera.   Kantibaan bulchiinsa magaalaa Tuut Jiik TOI’f akka ibsanitti, miidhaginaa fi kennaa Gambeellaa caalaatti mul’isuuf inisheetivii misooma koridaraa akka biyyaatti eegalame magaalittiittiis eegalamee hojjetamaa jira. Misooma Koriidaraa magaalaa Gambeellaatti eegalaman saffisiisuun magaalittii jiraattotaa fi daawwattootaf mijattuu taassisuuf hojiiwwan hojjetamaa jiran cimanii itti fufuu dubbataniiru.   Magaalaa Gaambeellaatti Misooma Koriidaraa Boqonnaa jalqabaan dheerina km. 14 ol kan qaban daandiiwwan gurguddoon 4 galma misoomaaf qabame milkeessuuf hojicha saffisiisaa jiraachuu ibsaniiru. Milkaa’ina hojii misooma koriidaraatiif jiraattotarraa qarshii walitti qabuurraa eegalee deeggarsaa fi hirmaannaan taassisaa jiru kan jajamu ta’uu kaasaniiru. Misooma koriidaraa cinaatti sadarkaa daandii keessa keessaa magaalittii fooyyessuun fayyadamummaa uummataa guddisuuf xiyyeeffannoon hojjetamaa jiraachuu dubbataniiru. Misoomni koriidaraa eegalame magalittii qulqulluu, miidhagduu fi hawattuu gochuurra darbee lammiilee hedduuf carraa hojii uumaa jiraachuu kantiibaan kun beeksisaniiru. Misooma koriideraan carraan hojii namoota uumameefii keessaa dargaggoo Axinaafuu Asaffaa fi Misikkir Ashannaafii yaada kennaniin, carraa hojii misoomni koriideraa uumeefiin jireenya maatiisaanii jijjiiraa jiraachuu dubbataniiru.   Misoomni koriidaraa magaalittii miidhagduu fi hawwattuu taassisuurra darbee ogummaan haarawaa akka baran haala mijataa uumuu ibsaniiru.

Sadaasa 05/2018(TOI)-Naannoo Oromiyaatti magaalota ammayyaa fi jireenyaaf mijataa taasisuuf hojiin qorannoo fi qo’annoon deeggaramee hojjetamaa jiraachuu inistitiyuutiin pilaanii magaalaa naannichaa ibseera. Inistitiyuutichi qorannoo fi qo’annoo rakkoolee pilaanii magaalotaa furan kan magaalota naannichaarratti gaggeessee simpooziyeemiin qooda fudhattootaaf dhiheesse magaalaa Cirootti gaggeeffameera. Daarekatarri olaanaa inistituutichaa obbo Margaa Oliiqaa waltajjicharratti haasaa tasisaniin pilaaniin magaalotaa haala jireenya hawaasaa fooyyessuu fi jireenya uummataa ammayyeessuun rakkoolee jiran furuuf qorannoof i qo’annoon deeggaramee hojjetamaa jiraachuu eeraniiru. Inistituyuutichi magaalota naannichaa hedduu keessatti pilaanii sadarkaa isaa eeggate hojjechuu isaa ibsuun, iddoowwan lolaaf saaxilamoo ta’an, misooma naannoo fi misooma magariisaa irratti kan xiyyeeffate qorannoo rakkoolee furan sadii magaalota 14 irratti hojjechuu isaa ibseera. Inistituyuutichi pilaanii magaalotaa qopheessuun dabalatatti gaggeessitootaa fi hojjettootaaaf leenjii fi deeggarsa kennaa jiraachuu eereera. Naannichi magaalota ammayyaa pilaaniin deeggarame ijaaruun kan jalqabame guutummaan guutuutti magaalonni pilaanii sadarkaa isaa eeggatee fi qulqullina qabu akka qabaatan hojjechuun cimee itti fufa jedhaniiru. Kana milkeessuufis ciminaan hojjechaa jiraachuu kaasaniiru. Simpooziyeemiin magaalaa Cirootti adeemsifame kunis hojiilee qo’annoo fi qorannoorratti hundaa’anii rakkoolee kana waliin walqabatan kan furanii fi muuxannoolee argaman qooda fudhattootaaf qoodamaniiru. Pilaaniin magaalota akka Mattuu, Galamsoo, Asallaa fi Baabbillee irratti hojjetaman hawaasa kan hin hirmaachifne waan turaniif akka rakkootti warreen eeraman keessaati. Kanaafuu Pilaaniin gaafa hojjetamu hawaasa kan hirmaachise ta’uu akka qabu himameera. Gama biraan immoo magaalonni akka Baddeessaa, Saaguree, Dheeraa, Bulee Horaa fi Bishooftuu misoomni magariisaa magaalotaa kunniin irratti qorannoon dhiyaate akka jalqabbii fakkeenya gaariitti kan fudhatamu ta’uu eerameera. Ogeessota qorannoo isaanii dhiyeessan keessaa Isteet Yunivarsiitii Oromiyaatti barsiisaa kan ta’an Doktar Nugusee Dabaleen akka jedhanitti, ijaarsi magaalota Oromiyaa keesatti ijaaraman kanaan dura pilaaniin waan hin deeggaramneef magaalonni kunniin mijatoo fi ammaayyaa akka hin taane godheera jedhan. Yeroo ammaa mootummaan maagalonni ammayyaa fi jireenyaaf mijatoo akka ta’aniif qorannoon deeggaramee hojjetamaa jiraachuu eeraniiru. Mootummaan ijaarsa pilaanii yeroo ammaa kana eegale jireenya hawaasaa ammayyeessuun akka mijatu taasisuun dabalataan badhaadhina hundagaleessaaf shoora olaanaa waan bahatuuf hawaasni deeggaruu qabaa dhaamaniru doktar Nugusee Dabaleen. Inistityuutichi qorannoo fi qo’annoo gaggeesseen magaalota ammayyaa fi jireenyaaf mijatoo ta’an uumuun rakkoolee gama kanaan jiran hedduu furuu kan eeran immoo Kantiibaa magaalaa Galamsoo obbo Mahaammad Abdallaati. Simpooziyeemichi ogeessota magaalota Oromiyaa adda addaarraa walitti dhufanii fi akkasumas jiraattota magaalaa Ciroo hirmaachisuun gaggeeffameera.

Sadaasa 4/2018(TOI)-Qabeenyiota Itioyoophiyaa milkaa’ina badhaadhina hunda galeessaaf fayyadamuun guddina Itiyoophiyaa mirkaneessuuf hojjetamaa jiraachuu Itti Aanaan Ministira Muumee Tamasgeen Xurunaa ibsan. Itti Aanaan Ministira Muumee Tamasgeen Xurunaa eksipoo waggaa 4ffaa Albuuda fi Teekinoloojii (MINTEX Ethiopia 2025 ) Konveenshinii Idil-Addunyaatti ifatti bananiiru.   Itti Aanaan Ministira Muumee ergaa fuula Miidiya Hawaasummaasaaniin dabarsaniin Itiyoophiyaan laftishees, ijoolleenshees dureeyyiidha hanga jedhamnutti takkayyuu hin dhaabbannu jedhaniiru. Itiyoophiyaa laftishee qabeenya dacha sadii kan qabatte ta’uu ibsuun qabeenya lafa keessaa , qabeenya teessuma lafaa fi haala qabeenya qilleensa addaan kan badhaate ta’uu ibsaniiru.   Qabeenya kuufamaa kanan akka ture dagannaa jalaa bahuun milkaa’ina badhaadhina hunda galeessaaf fayyadamuun guddina Itiyoophiyaa mirkaneessuuf imala eegalleerra jedhaniru.   Xiyyeeffannoo addaa mootummaan kennee fi tarkaanfiiwwan fudhatameen dadammaqinsa damichaaf Abdii fiduun Invastimantii Albuudaa fi al-ergii daldalaaf milaaka’ina guddaa uumuusaanii dubbataniiru.   Ekispoon Idil-Addunyaa qaamolee qooda fudhattootaa, abbootii qabeenyaa, omishtoota teekinooloojii fi hayyoota walitti qabuun carraawwan gaarii qabnu kan itti argisiisnuu fi waltajjii gufuuwwan qindoominaan itti hiiknudha jedhaniiru Itti Aanaan Ministira Muummee Tamasgeen Xurunaa ergaasaaniin.  

Sadaasa 4/2018(TOI)-Yaa’iin midhaan dheedhii fi dibataa idil addunyaa 14ffaan humna dilbii Itiyoophiyaan damee Kanaan qabdu addunyaaf agarsiisuu fi walitti hidhamiinsa gabaa uumuuf akka gargaaru ministeerri daldalaa fi walitti hidhamiinsa riijinii beeksise. Yaa’ii kana ilaalchisuun ministeerri daldalaa fi walitti hidhamiinsa riijinii fi waldaan al-ergii midhaan dheedhii fi dibataa waloomaan ibsa kennaniiru. De’eetaan ministiraa daldalaa fi walitti hidhamiinsa riijinii Dr. Abdulhakiim Muluu wayita kana yaa’ii Sadaasa 9 fi 10 bara 2018 Finfinneetti taa’amurratti hirmaattonni biyya keessaa fi biyya alaa 600 caalan ni argamu. Yaa’ichi Itiyoophiyaan qabeenya dilbii damee Kanaan qabdu beeksisuu fi gabaa bal’isuuf kan gargaaru ta’uu kaasaniiru. Ppmishtoota, Alergitootaa fi qooda fudhattoota jidduutti walitti hidhamiinsa gabaa uumuuf faayidaa akka qabaatus dubbataniiru. Akka ibsa de’eetaa ministirichaatti, Yaa’iin kun Itiyoophiyaan humna daldalaa fi invastimantiin qabdu addunyaaf beeksisuu fi invastimantii hawachuuf carraa gaarii kan uumudha. Pirezidaantiin waldaa alergitoota midhaan dheedhii fi dibataa Itiyoophiyaa Eda’oo Abdii gamasaaniin, biyyoonni garagaraa 16 caalan yaa’icharratti akka hirmaatan ibsaniiru. Omishtoonni biyya keessaa, alergitoonni, sadarkaa idil addunyaatti warri bitan,kanneen imaammata baasan, dhaabbileen faayinaansii,hooggantoonni mootummaa olaanoon fi dippilomaatota dabalatee keessummoonni waamaman ni hirmaatu jedhameetu eegama. #Tajaajila Oduu Itiyoophiyaa #TOI