Guraandhala 4/2018 (ENA) - Cancala qabeenya uumamaa Afrikaa fooyyessuun, guddina diinagdee Ardichaa ariifachiisuun barbaachisaadha jedhan barreessaan olaanaa Komishinii Diinagdee Mootummoota Gamtoomanii Afrikaa Kilaavar Gaateetee. Yaa’iin Idilee 48ffaa Mana Maree Hojii Raawwachiiftuu Gamtaa Afrikaa mata duree "Dhiyeessii bishaanii waaraa fi sirnoota eegumsa qulqullinaa nageenyummaan isaanii eegame mirkaneessuu; milkaa'ina galmoota Ajandaa 2063'f" jedhuun gaggeeffamuu eegaleera. Walgahii kana irratti Ministirri Dhimma Alaa, doktar Geediyoon Ximootiwoos, Dura taa’aan Komishinii Gamtaa Afrikaa, Mahamuud Alii Yuusuf, Ministirri Dhimma Alaa Angoolaa fi Dura taa’aan Mana Maree Hojii Raawwachiiftuu Ambaasaaddar Teetee Antooniyoo fi Ministiroonni Dhimma Alaa biyyoota miseensa ta’anii argamaniiru. Kanuma waliin barreessaan olaanaa Komishinii Diinagdee Dhaabbata Mootummoota Gamtoomanii Afrikaa Kilaavar Gaateetee mata dureen bishaanii fi qulqullina naannoo Gamtaa Awurooppaa milkaa’ina Ajandaa 2063tiif gahee guddaa qaba jedhan. Cancala qabeenya uumamaa Afrikaa, anniisaa haaromfamuu danda’u, albuudaa fi qabeenya uumamaa fooyyessuudhaan guddina dinagdee ardii kanaa saffisiisuun barbaachisaa ta’uu dubbataniiru. Madaalliin liqaa fi caasaa fiizikaalaa ardii kanaas daldalaa fi invastimantii quucarsaa jiraachuu eeruun, kunis guddina Afrikaa irratti dhiibbaa guddaa uuma jedhan. Daldalaa fi invastimantii Afrikaa guddisuun haala dinagdee babal’isuu qabu ijaaruuf walitti dhufeenya cimaa irratti hundaa’uun tumsa biyyoota miseensa ta’an cimsuun barbaachisaa ta’uu dubbataniiru. Gara fuula duraatti bu’uuraalee hawaas-diinagdee babal’isuun tatamsa’ina dhibeewwan bishaaniin daddarban Afrikaanota mudatan to’achuun barbaachisaa ta’uus ibsaniiru.   Waliigaltee Naannoo Daldala Walaba Ardii Afrikaa guutummaatti hojiirra oolchuu saffisiisuun walitti dhufeenya hawaas-dinagdee lammiilee ardii kanaa cimsuun barbaachisaa ta’uu eeraniiru. Manni Maree Hojii Raawwachiiftuu Ministiroota Dhimma Alaa Gamtaa Afrikaa ajandaa Yaa’ii Gamtaa Afrikaa 39ffaa Guraandhala 7 fi 8/ 2018 gaggeeffamuuf ni raggaasisa jedhamee eegama.

Guraandhala 4/2018(ENA)- Godina Gujii Magaalaa Adoolaa waayyuu Dargaggoonni Carraa hojii uumameefiin fayyadamoo ta’aa dhufuusaanii ibsan. Godinichatti Magaalaa Adoolaa waayyuutti dargaggoonni carraan hojii dameelee adda addaan isaaniif uumame fayyadamummaa Diinagdeesaanii guddachaa dhufuusaa ibsaniiru. Magaalichatti miseensa Waldaan IMX Horsiisa Lukkuu Baarkoot Dargaggoo Laamasgin Baqqalaa, hojiin misooma lukkuu ciminaa fi of-eeggannoon yoo hojjetame bu’aa qabeessa akka nama taasisu dubbateera.   Hojiisaanii waggaa sadiin dura Lukkuu 250n eegaluusaanii ibsuun, yeroo ammaa lukkuu killee buustu kuma sadii akka qaban ibsaniiru. Walitti hidhaminsa gabaa mootummaan isaaniif uumeen guyyaatti killee kuma tokko daldaltootaa fi fayyadamtootaaf dhiheessuun galiisaanii guddifachaa jiraachuu dubbataniiru. Yeroo ammaa hojiisaanii Invastimentiiin babal’isuuf gaaffii lafaa dhiheessuun bulchiinsa magaalaarra deebii argachuusaanii ibsaniiru. Dura ta’aan waldaa IMX Horsiisa lukkuu Ifa boruu Dubree Boontuu Waaree gamasheen waldaansaanii cuucii guyyaa tokkoo fudhatanii guddisuun lukkuu goromtii guyyaa 45n fi kaakkiftuu fayyadamtootaaf akka dhiheessan dubbatteetti. Barnoota ogummaa Qonnaan digiriin eebbifamuu kan ibsite Boontuun, damee hojii hiriyootashee waliin irratti bobbateen fayyadamoo ta’aa jiraachuu ibsiteetti.   Dura taa’aan Waldaan IMX omisha Gaagura kaannisaa Lalisee, Qumnagarii fi Alam, Abiraam Zawuduu gamasaan, gurmaa’anii gara hojiitti galanii baatii sadii keessatti gaagura ammayyaa 100 fayyadamtootaaf dhiheessuusaanii ibseera.   Hojichi bu’aa qabeessaa fi guddachaa kan deemu ta’uu ibsuun, yeroo ammaa namoota 10’f carraa hojii uumuun fayyadamtoota isaan taassisuu ibsaniiru. Itti Aanaa Kantiibaa Magaalaa Adoolaa Waayyuu fi Itti Gaafatamaan Waajjira Carraa Hojii Uumuu fi ogummaa Obbo Shimallis Irbaa, magaalichatti baatiiwwan ja’an darban dargaggoota kuma 1 fi 583 damee Qonnaan, Industirii fi dameelee misoomaa biroon carraan hojii isaaniif uumamuu eeraniiru.   Dargaggoota kanaaf liqaa birrii miiliyoona 31 ol isaaniif mijessuurra darbee bakka hojii fi gurgurtaa lafa karee kuma 6 fi 800 ol dhihaachuusaa ibsaniiru. Carraawwan gabaa fi humna damichaan jiru hunda guutummaan fayyadamuun sagantaa maaddii guutuu waliin walitti hidhuun faayidaa damicharraa argamu guddisuuf hojjetamaa jira jedhaniiru. Lammiilee hojicharratti bobba’aniif deeggarsi taassifamu cimee ittifufa jechuun obbo shimallis ibsaniiru.

Guraandhala 4/2018 (ENA) - Dura taa’aan Komishinii Gamtaa Afrikaa Mahammuud Alii Yuusuf, hojiiwwan misoomaa ardii kanaa saffisiisuuf maddoonni faayinaansii haaraan barbaadamuu akka qaban ibsaniiru. Yaa’iin Idilee 48ffaa Mana Maree Hojii Raawwachiiftuu Gamtaa Afrikaa waajjira muummee Gamtichaa Finfinneetti gaggeeffamuu eegaleera.   Walgahii kana irratti barreessaan olaanaa Komishinii Diinagdee Dhaabbata Mootummoota Gamtoomanii Afrikaa Kilaavar Gateetee, Ministirri Dhimma Alaa Angoolaa fi Dura taa’aan Mana Maree Hojii Raawwachiiftuu Ambaasaaddar Teetee Antooniyoo fi Ministiroonni Dhimma Alaa biyyoota miseensa ta’an argamaniiru. Dura taa’aan Komishinii Gamtaa Afrikaa Mahammuud Alii Yuusuf, Yaa’iin Gamtaa Afrikaa bara kanaa fedhii waloo fi walitti dhufeenya misoomaa ardii kanaa kan cimsu ta’uu ibsaniiru. Komishiniin Gamtaa Afrikaa hojiiwwan haaromsaa hedduu gaggeessaa akka jiru eeruun, Hojiiwwan hedduu gama nageenyaa fi tasgabbii, faayinaansii fi sirna haqaa irratti hojjetamaa jiran akka fakkeenyaatti kaasaniiru. Manni Marichaa dhimma nageenyaa fi tasgabbii ardii kanaa irratti deebii kennaa akka jiru eeruun, Giinii fi Gaaboon gara Gamtaa Afrikaatti deebi'uu isaaniitti gammadeera jedhani. Hojiiwwan misoomaa ardii kanaa saffisiisuuf maddoonni faayinaansii haaraan barbaadamuu akka qaban kan ibsan yoo ta’u, gama kanaan dameen dhuunfaa, waldaaleen siivikii fi dhaabbileen tola ooltummaa hirmaachuu qabu jedhaniiru dura taa’aan kuni. Waggaa darbe keessaa qaamolee Mana Maree Hojii Raawwachiiftuu haala gaariin hoogganan galateeffataniiru. Manni Maree Hojii Raawwachiiftuu Ministiroota Dhimma Alaa Gamtaa Afrikaa, Ajandaa Yaa’ii Gamtaa Afrikaa 39ffaa Guraandhala 7 fi 8/2018 gaggeeffamuuf ni raggaasisa jedhamee eegama.

Guraandhala 4/2018 (ENA)- Ministirri Industirii Malaakuu Alleebal haaromsi diinagdee Gooroo dameen industirii akka guddatu bu’uura kaa’uu ibsaniiru. Ministirri Muummee doktar Abiyyi Ahimad haasawa tibbana Mana Maree Bakka Bu’oota Uummataaf taasisaniin, Riifoormiin diinagdee Gooroo Itiyoophiyaa keessatti gaggeeffame damee hundaan bu’aa gaarii argamsiiseera jedhanii ture. Riifoormichi dinagdee qonna irratti hundaa’e irraa gara damee adda addaatti jijjiiruun guddina qulqullina qabu mirkaneessuu fi ba’aa liqaa hir’isuuf kan kaayyeffate ta’uu hubachiisaniiru. Riifoormiin dinagdee Gooroo bal’aan kun irra caalaa sharafa alaa gabaa irratti kan hundaa’e gochuu, imaammata faayinaansii fi maallaqaa sirreessuu, hirmaannaa damee dhuunfaa guddisuun madaallii daldalaa biyyattii sirreessuuf kan akeekedha. Akka Ministirri Industirii Malaakuu Alleebal turtii ENA waliin taasisaniin ibsanitti, Haaromsi diinagdee Gooroo kun dadhabbina caasaa waggootaaf diinagdee dhiphisaa ture suphuun bu’aa qabatamaa argamsiisaa jira jedhan. Damee omishaa keessatti rakkoolee mudatan furuu fi oomishtummaa guddisuuf gumaacha olaanaa taasisaniiru jedhaniiru. Garaagarummaan sharafa alaa kanaan dura ture omishtoonni omishasaanii gara alaatti erganii faayidaan argatan xiqqaa ta’uu yaadachiisuun, fooyya’insi haaraan taasifame garaagarummaa kana dhiphisuun Al-ergiin bu’aa qabeessa akka ta’u gargaareera jedhan. Gama biroon dhiheessiin sharafa alaa fooyya’uun, omishtoonni adeemsa omishaaf galteewwan barbaachisan salphaatti akka argatanii fi omisha alaa galan omisha biyya keessaan akka bakka bu’aniif carraa uumuu ibsaniiru. Fooyya’insichi madaalli daldalaa akka wal-gitu gochuurratti shoora olaanaa taphachaa jiraachuu fi kunis industirii omishaarratti bu’aa galmeessa jiraachuu ibsaniiru. Industiriin omishaa guddina biyyaa keessatti qooda qabu haala adda ta’een akka guddatu gochuusaa beeksisaniiru. Fooyya’insi Diinagdee Gooroo guutuu yaa’insa Investimantiiwwan haaraa harkisuurratti jijjiirama qabatamaa fidaa jiraachuu obbo Malaakuun dabalanii ibsaniiru.

Guraandhala 4/2018 (ENA) - Ministirri Dhimma Alaa doktar Geediyoon Ximootiwoos Afrikaan biyya qabeenya uumamaa fi abdii hedduu qabduu fi michoota misoomaa dhugaa barbaaddu malee kan harka biyyoota biroo ilaaltu miti jedhan. Yaa’iin Idilee 48ffaa Mana Maree Hojii Raawwachiiftuu Gamtaa Afrikaa mata duree "Dhiyeessii bishaanii waaraa fi sirnoota eegumsa qulqullinaa nageenyummaan isaanii eegame mirkaneessuu; milkaa'ina galmoota Ajandaa 2063'f" jedhuun gaggeeffamuu eegaleera.   Walgahii kana irratti Dura Taa’aan Komishinii Gamtaa Afrikaa Mahamuud Alii Yuusuf, Ministirri Dhimma Alaa Angoolaa fi Dura Taa’aan Mana Maree Hojii Raawwachiiftuu Ambaasaaddar Teetee Antooniyoo fi Ministiroonni Dhimma Alaa biyyoota miseensa ta’anii argamaniiru. Wayita sanatti Ministirri Dhimma Alaa Geediyoon Ximootiwoos, Afrikaan haaromsa Mana Maree Nageenyaa Dhaabbata Mootummoota Gamtoomanii, haala qilleensaa fi ijaarsa faayinaansii idil-addunyaa irratti ejjennoo waloo akka qabdu ibsaniiru. Kunis gahee Afrikaan addunyaa irratti qabdu guddisuuf yaa’ii Biyyoota Garee 20 (G20) Afrikaa Kibbaa Piritooriyaatti gaggeeffame irratti ifatti akka mul’ate hubachiisaniiru. Biyyoota Afrikaa hedduu filannoo biyyoolessaa gaggeessan keessaa Rippaabilikni Giinii fi Rippaabilikni Gaaboon sirna heera mootummaatti deebi’uun gara Gamtichaatti deebi’uu isaanii akka fakkeenyaatti eeraniiru. Yeroo ammaa kaayyoo hundeeffama Gamtaa Afrikaan ala kan ta’an, al-seerummaa jijjiirama mootummaarratti taasifamanii fi haalli ji’oopoolitikaa addunyaa nagaa fi tasgabbii ardii kanaaf qormaata ta’uu hubachiisaniiru. Ol’aantummaan teeknooloojii, to’annoon qabeenya albuudaa fi daandii loojistiskii dorgommiin cimaan sadarkaa addunyaatti dabalaa akka jirus ibsaniiru. Maariin Biyyaalessaa Ituyoophiyaa rakkoo jiruuf furmaata waaraa fiduuf kan dandeesisudha Humnoonni gurguddoo fi gidduugaleeyyiin Afriikaa akka dirree dorgommii fi iddoo fedhiisaanii itti guuttatan, rakkoolee gama kamiinuu dhufan ittisuuf gamtaa cimsuun akka barbaachisu ibsaniiru. Afriikaan waan xiqqaa isheef kennamu osoo hin ta’iin deeggartoota misoomaa dhugaa ishee barbaachisa kan jedhan Ministirichi, kanaafis tokkummaa Ardii fi misooma waloof, milkaa’ina kaayyoo misooma waloof kutannoon hojjechuu akka qaban xiyyeeffataniiru. Ajanda 2063’f Afriikaa barbaannu dhugoomsuuf waliigaltee daldala bilisaa Ardii Afriikaa bifa addaan haala fooya’een hojiirra oolaa jiraachuu ibsaniiru. Ardichatti jijiirama haala qilleensaa hir’isuun, Fayyaan, Qonnaa fi tajaajiloota dameelee Hawaasummaa fi Diinagdeen guddinni tasgabbaa’aan galmaa’aa jirachuu eeraniiru.   Gara fuula duraattis shora ijaarsaa gamtaa Afriikaa caalaatti guddisuun , carraa fooya’aa waloof tokkummaa fi kutannoon hojjechuu akka gaafatu hubachiisaniiru. Rakkoo Afriikaanotaa furmaata Afriikaan kennuun nageenya fulla’aa fi Qajeeltoowwan heeraan bitamuun Ardii badhaate ijaaruu akka qaban ibsaniiru. Dabalataanis Afriikaan Murtiiwwan dhaabbilee Idil- Addunyaarratti bakka sirrii hanga argattutti gaaffiin deeggarsa Idil- Addunyaa cimee ittifufuu akka qabu hubachiisaniiru. Manni Maree hojii raawwachiiftuu Misistirotaa dhimma Alaa Gamataa Afriikaa Ajandaawwan yaa’ii hoggantoota Gamtaa Afriikaa 39ffaa Guraandhala 7 fi 8 bara 2018 gaggeeffamuuf dhihaatu akka mirkaneessan ni eegama.