Fulbaana 4/2017(TOI) - Naannoo Oromiyaatti bara barnootaa kana barattoonni miliyoonni 10 ol fayyadamtoota taajila soorataa mana barnootaatti dhihaatuu akka ta'an Biiroon Barnootaa naannichaa beeksise. Dhiheessiin sorootaa mana barnootatti barattootaaf taasifamu hanga barattoota mana barnootaa irraa hafanii kan xiqqeessu qofaa osoo hin taane bu'a qabeessas akka ta'aniif fayidaa guddaa qaba. Akka biyyaatti tajaajilli kun waggaa afuriin dura kan jalqabame yoo ta'u tasimoo fi imaammannii raawwiif barbaachisu qophaa'eefii bal'inaan hojiirra oolaa jira. Naannolee sagantaan kun hojiirra itti oolaa jiru keessaa Oromiyaan tokkodha. Itti aanaan hogganaa biiroo Barnoota Oromiyaa obbo Girmaa Baay'isaa TOI'tti akka himanitti; naannichatti dhiheesiin nyaataa barattootaf mana barnootaatti taasifamu waliin gahinsa barnootaa fi qulqullina barnootaa keessaatti gahee olaanaa bahaa jira. Manneen barnootaa nyaanni barattootaaf itti dhihaatutti hirmaannaan barnootaa fi bu'aan qabeesummaan irratti rakkoo jiru furuuf akka mala ijootti tajaajilaa jira jedhaniiru. Kana ilaalacha keessa galchuun sagantaa kana babal'isu fi cimsuu irratti xiyyeeffannoon hojjetama jira jedhaniiru. Haaluma kanaan bara 2016 barattoonnii miliyoonni 6.8 fayyadamtoota nyaata mana barnootaatti dhihaatuufii ta'uu himaniiru. Bara bajataa 2017tti manneen barnootaa kuma 20tti barattoonni miliyoonni 10.1 fayyadamtoota tajaajila dhiheessii soorata mana bartootatti dhihaatuu ni ta'u jedhaniiru. Sagantaan kun akka milkaa'uu karaa Buusaa Gonofaa qophiin dursaa taasifama jirachuus ibsaniiru.

Fulbaana 3/2017 (TOI) - Bulchiinsi magaalaa Finfinneetti bara baajataa kanatti lammiilee kuma 300'f carraa hojii uumuuf hojjechaa jiraachuu Waajjirri Hojii fi Ogummaa Bulchiinsa Magaalichaa beeksise. Sadarkaa hogganaa waajjiraatti itti gaafatamaan damee hojii fi wabii nyaataa obbo Asfaaw Laggasee TOI'tti akka himanitti; Hojii barbaaddonni magaalichaa keessa jiran carraa hojii akka argatan hojjetamaa jira. Fakkeenyaaf Mootummaan dargaggoota gurmaa’aniif carraa hojii uumuuf, liqii mijeessuu irraa eegalee walitti hidhamiinsa gabaa, bakka hojii fi iddoo gurgurtaatti waan jiru mijeesuuf xiyyeeffannaa kennee hojjecha jira jedhaniiru. Yeroo ammaa kana magaalaa Finfineetti intarpiraayizoonni kuma 34 fi 350 damee omishaa, konistiraakshinii, qonna magaalaa, daldalaa fi tajaajilaa irratti bobba’anii hojii bu’a qabeessa ta’e hojjecha jirachuu eeraniiru. Intarpiraayizoonni Finfinnee keessatti argaman dargaggootaaf carraa hojii uumuu qofa osoo hin taane, misooma itti fufiinsa qabuu fi badhaadhina magaalichaa keessattis gahee olaanaa tbahachaa jirachuu ibsaniiru. Bara baajataa xumurame kana lammiileen kuma 291 fi 577 carraa hojii argachuu eeruun bara bajataa kanatti lammiilee kuma 300 ta’aniif carraa hojii uumuuf karoorfamee hojjetama jira jedhaniiru. Lammiileen carraan hojii uumamuf damee hojii irratti bobba'an irratti milkaa'oo fi bu’a qabeessa akka ta’aniif hojiin ijaarsa dandeetti, carraa hojii uumuu fi walitti hidhamiinsa gabaa kan uumuuf kan hojjetamu ta'uus ibsaniiru. Hojii barbaaddonni leenjii ogummaa fudhatanii madaallii gahumsaa erga darbanii booda carraan hojii akka mijaa'u fi gara fuulduraattis cimee itti fufa jedhaniiru. Like Comment Send Share  

Fulbaana 3/2017(TOI) - Sirna bulchiinsa odeeffannoo magaalaa Finfinnee ammayyeesuuf galmee siviilii dirqamaan hojiirra oolchuuf hojjechaa jiraachuu Ejensiin Galmee Siivilii fi Tajaajila Jiraattotaa magaalaa Finfinnee beeksise. Sirni tajaajila galmee murteessaa biyya tokkoo karaa lama ijaaramuu akka danda’u ogeeyyiin damee kanaa ni ibsu. Gama tokkoon hojii hubannoo uumuun gama biraatiin immoo hojimaata dirqamaa diriirsuun tajaajila galmee siiviilii dhaqqabamaa gochuun akka danda’amu akeeku. Itoophiyaatti tajaajilli galmee murteessaa kun bara 2008 irraa eegalee hojiirra ooleera. Magaalaa Finfinneetti tajaajilli kun erga hojiirra oolee hubannoo uummataa dabaluuf hojiileen adda addaa hojjetamaa turuu daayreektarri olaanaa ejensii galmee siiviilii fi tajaajila jiraattota magaalichaa obbo Yoonaas Alamaayyoo TOI'tti himaniiru. Ta'uus garuu hubannoon hawaasni galmee siiviilii irratti qabu guddachaa jiraatus bu'aan isaa sadarkaa barbaadamerra akka hin jirre himaniiru. Biyyoota guddatan keessatti galmeen siiviilii hubannoo hawaasaa guddisuun qofa bu'a qabeessa akka hin taane eeranii; sirnoota dirqamsiisuus hojiirra akka oolchaan ibsaniiru. Gama kanaan magaalaa Finfinneetti tajaajilli galmee siiviilii fedhii irratti kan hundaa’e waan ta’eef sirni bulchiinsa odeeffannoo ammayyaa akka hin uumamnee eeraniiru. Rakkoo kana hiikuuf dhaabbile adda addaa waliin ta’uun galmeen siviilii kan dhalootaa, gaa’ela, wal hiikkaa gaa'ilaa fi du’aa dirqamaan akka ta'u taasifamaa jirachuu himaniiru. Kana waliin walqabatee galmee dirqamaa hayyama konkolaachisummaa fi sirna awwaalchaa waliin walqabatu guutummaatti hojiirra oolchuuf tattaaffiin taasifamaa jira jedhan. Rakkoolee hawaasummaaf furmaata barbaaduuf galmeen siiviilii barbaachisaa waan ta’eef, lammiileen yeroo murtaa’etti taateewwan barbaachisoo ta’an galmeessisuuf dirqama isaanii sirnaan akka ba’an waamicha dhiyeessaniiru.    

Fulbaana 3/2017(TOI)- Manni barnootaa sadarkaa lammaffaa birrii miiliyoona 179n naannoo Tigraayitti ijaarame xumuramee tajaajilaaf qophaa’uusaabulchiinsa yeroo naannichaatti waajjirri barnootaa magaalaa Shiree Indaasillaasee beeksise. Hoogganaan waajjirichaa obbo G/madin W/Goorgis TOTf akka ibsanitti, manni barnootaa sadarkaa lammaffaa baasii guutuu mootummaan naannoo Oromiyaa taasiseen magaalaa Shireetti ijaaramaa ture kun bara haaraatti tajaajila nijalqaba. Manni barumsaa sa’aatii duraa fi boodaan barattoota kuma 2 fi 160 simachuu danda’u kun kutaalee barnootaa akkasumas kutaalee tajaajiloota addaddaaf oolan kan qabu ta’uu hoogganaan kun ibsaniiru. Bilookonni gamoo kunneen mana kitaabaa dijitaalaa, Laaboraatoorii, jiddugaleessa teeknooloojii komunikeeshinii odeeffannoo, woorkishooppii, galma walgahii fi kiliniikii akka qabu himaniiru. Hojii gaggeessaan pirojektichaa obbo Galataa Caalaa gamasaaniin, manni barnootaa sadarkaa lammaffaa kun lafa heektaara afur tuqaa lama irratti akka ijaarame ibsaniiru. Manni barumsaa kun baatii 10 keessatti xumuramee barumsa baranaaf akka qaqqabu deeggarsi bulchiinsa magaalaa Shiree Indasillaasee olaanaa akka ture ibsaniiru. Ijaarsi mana barnootaa kun xumuramee tajaajilaaf gahuusaatti gammaduusaanii jiraattonni gammachuusaanii ibsaniiru. Jiraattota TOIf yaada kennan ijaarsi mana barumsichaa qulqullinaa fi yeroo gabaabaatti xumuramuunsaa pirojektoota biroofis fakkeenya gaarii ta’uusaa ibsaniiru. Barsiisaan magaalaa Shiree Indasillaasee jiraatan Muluu Ar’ayaa, manni barumsichaa yeroo gabaabaatti qulqullinaan ijaaramuunsaa barumsaaf haala mijataa ni’uuma jedhaniiru.