Fulbaana 08/2018(TOI)-Milkaa’ina Kaayyoosheetiif cimtee hojjechuusheetiin qabxii argattetti gammaduushee Dirree Dawaatti barattuu Mana Barumsaa Immabeetaachiin Afoomiyaa Gashuu ibsite. Qormaata biyyoolessaa kutaa 12ffaa bara 2017 qabxii olaanaa kan galmeessan keessaa Dirree Dawaatti barattuu Mana Barumsaa Immabeetaachiin kan taate Afoomiyaa Gashuu ishee tokko. Barattuun kun cimtuu, naamusaan kan guutamtee fi namoota biroof fakkeenya ta’uunshee, qabxiin fidde kan eegamu ta’uu barsiisotashee nidubbatu Qormaanni biyyoolessaa kutaa 12ffaa Ifoomuusaa hordofee Barattoonni qabxiisaanii ifatti beekanii gahumsasaanii itti aanu tilmaamaa jiru. Barattoota kana keessaa akka biyyaa fi Diree Dawaatti barattoota qabxii olaanaa galmeessisan keessaa barattuu Mana Barumsaa Immabeetaachiin Afoomiyaa Gashuu ni eeramti. Barattuun kun qabxii walii galaa 600 keessaa 574 galmeessisuun Diree Dawaarra adda duree ta’uu dandeesseetti. Barattuu Afomiyaan Gashuu qabxiin galmeessiste Cimtee hojjechuusheen, bu’aa dadhabbiishee ta’uu TOI’f ibsiteetti. Teekinooloojii Dijiitaalaa Beekumsa barnootaa gabbifachuuf akka fayyadamtu eeruun, barnootashee naamusa guddaan hordofuusheen bu’aa miidhagaaf akka ishee gargaare dubbatteetti. Maatiinshee fi deeggarsi fi hordoffiin barsiisotaa bu’aa qabxii miidhagaa kanaaf olaanaa ta’uu kan ibsite barattuu Afoomiyaan, keessumaa dubartoonni bu’aa fimilkaa’ina kaayyoosaanii egereef yeroo fi humnasaanii Barnootaaf kennuu akka qaban muuxannooshee qooddeetti. Damee saayinsii fi teekinooloojiitiif fedhii guddaa qabaachuusee kan ibsite barattuun kun, fuulduratti toora kanatti beekumsaa fi dandeettii fooyya’aa qabachuun mataashee fi maatiisheerra darbitee hojii biyyaaf fayyadu akka milkeessitu dubbatteetti. Milkaa’ina kaayyookootiif cimee hojjechuu kootiin qabxiin argadhetti gammadeera jetti Afoomiyaan. Barattoonni milkaa’oo fi dhaloota biyya ijaaran akka ta’aniif hordoffii fi deeggarsi maatii cimaan qooda olaanaa qabaachuu kan ibsan immoo abbaa barattuu Afoomiyaa Gashuu Muluuti. Ijoollumaasheerraa eegaltee barnootaaf xiyyeeffannoo addaa akka kennituu fi akka milkooftuuf akka maatiitti qooda keenya baaneerra, Barsiisotashee waliin kan facaafne bu’aasaa gammachuun haammanneera, kanaattis gammanneera jedhaniiru. Barattuu Afoomiyaa Gashuu barnootasheerratti dadhabe, nuffe osoo hin jedhiin barattuu kaayyoo qabdu ta’uushee kan ibsan immoo Barsiisaa Barnoota Fiiziksii fi to’ataa dareeshee kan ture barsiisaa Haayilemariyam Rattaa ti . Barattuun kun naamusa gaarii gahumsaa fi cimina waliin qabachuun fakkeenyummaan kan eeramtu barattuu sadarkaa ta’uushee ibsaniiru. Itti Aanaan Daarektara Mana Barumsaa Immabeetachiin obbo Bayyanaa Daggafaa , barattuu Afoomiyaan qabxii olanaa akka fiddu hundisaanii kan eegan ta’uu dubbataniru. Barattuun kun gara fuulduraatti damee Teekinooloojiin hojii biyya waamsisu akka hojjettu abdii guutuun dubbachuu nan barbaada jedhaniiru. Barattoonni bara kana naamusaan qulqullaa’anii akka barattuu Afoomiyaa bu’aa qabeessa akka ta’aniif maatiin barsiisota waliin qindaa’anii hordoffii fi deeggarsa gochuu akka qaban ergaa dabarsaniiru.

Fulbaana 08/2018(TOI)- Naannoo Harariitti manneen barnootaa haaraa ijaaramanii fi kutaaleen dabalataa babal’ifamanii fi suphaan taasifameef eebbifamanii tajaajila eegalan. Manneen barnootaa fi kutaaleen barumsaa babal’ifaman hojii kan eegalan bulchaan naannichaa Ordiin Badrii fi de’eetaan ministira barnootaa Ayyalach Isheetee dabalatee hooggantoonni olaanoo naannichaa argamanittidha. Itti aanaan hoogganaa biiroo barnootaa naannoo Hararii obbo Zakariyaa Abdulaziiz akka dubbatanitti, kan har’a eebbifaman keessaa manni marumsaa idileen duraa Hasan Geeyi naannicha Dirree Xayyaaraatti ijaarame isa tokkodha. Manni barumsaa sadarkaa tokkoffaa la’abokor magaalichatti argamu babal’ifni gamoo abbaa darbii sadii kan hojjetameef ta’uu ibsanii, mana barumsaa sadarkaa lammaffaa waliigalaa Harariif ammoo suphaan taasifamuu dubbataniiru. Kutaaleen barumsaa kunneen qulqullinaa fi hatattamaan kan hojjetamanii fi galteen barnootaa barbaachisaan kan guutameef ta’uu eeranii ijaarsasaaniifis birriin miiliyoona 150 ol bahuu dubbataniiru. Eebba manneen barnootaa fi kutaalee barumsaatti aanuun yaa’iin barnootaa naannichaa nigaggeeffama jedhameetu eegama.

Fulbaana 06/2018(TOI)-Sirni awwaalchaa Gaazexessaan Tajaajila Oduu Itiyoophiyaa duraanii Gabrahiywoot Kaahisay michoonnii fi firoottansaa waa’iltoonni isaa ogummaa bakka argamanitti Adaamaa bataskaana kaateediraalii madaana alam qulqulluutti raawwatame. Tajaajila Oduu Itiyoophiyaatti waggaa 30’f kan tajaajile Gaazexessaan Gabrahiywoot Kaahisaay rakkoo fayyaa battalaa isa mudateen kaleessa addunyaa kanarraa boqoteera. Gaazexessaa Gabrahiywoot Kaahisaayi abbaasaa obbo Kaahisaayi Abrahaa fi haadhasaa adde Balaayinash Quwaaletaayi irraa naannoo Tigraayi Awuraajjaa Indartaa Mudde 5 bara 1953 ture kan dhalate. Gaazexessaa Gabrahiywoot Tajaajila Oduu Itiyoophiyaatti hojii erga eegalee baatii Adoolessa bara 1983 irraa amma Amajjii 1 bara 2015 soorama bahetti riippoortararraa amma Itti aanaa gulaalaatti tajaajileera. Damee barnootaa Gaazexessummaa fi Komunikeeshinii digirii jalqabaa kan qabu Gabrahiywoota miiltoo hojii biratti kan jaalatamu gaazexessaa cimaa ture. Oduu qindeessuun gamatti barreeffamoonni garagaraa mata dureewwan garagaraarratti barreesse gaazexaa Addis zamanii fi kitaabeewwanirratti maxxanfamaniiru. Gaazexessaa Gabrahiywoot Kaahisaayi jireenya hawaasummaasaatiin waliigalee kan jiraatu, miiltoowwan hojii biratti kan jaalatamu, dadhabe osoo hinjedhiin kan hojjetu gaazexessaa cimaa ta’uu miiltoon isaa gaazexessaa Ballaxaa Adinoo nidubbata. Miiltoonsaa Gaazexessaa Mattaafaraa Girmaa, gaazexessaa Gabrahiywoot Kaahisaayi hojiisaan kan galateeffame cimaa fi gazexessoota dargaggoof fakkeenya ta’uu dubbateera. Gaazexessaa Gabrahitwoot Kaahisaayi bultii kan qabuu fi abbaa ijoollee durbaa lamaa fi dhiira tokkooti.

Fulbaana 06/2018(TOI )-Godina Shawaa Lixaatti Manneen Barnootaa Idileen duraa fi sadarkaa 1ffaa tajaajila tola ooltummaa Gannaan ijaaraman tajaajila kennuu eegaluusaanii Waajjirri Barnootaa Godinichaa Beeksise. Hojiin baruu Barsiisuu bara Barnootaa 2018 itti gaafatamtoonni Waajjira Barnootaa Godinichaa bakka argamanitti Aanaa Ejersa Lafoo Mana Barumsaa Gabaa Dilbataa sadarkaa 1ffaatti kaleessa eegalameera. Itti Gaafatamaan Waajira Barnootaa Godina Shawaa Lixaa Obbo Baandiraa Galaanaa, bara barnootichaa bu’aa qabeessa taassisuuuf baatiiwwan gannaatti hojiiwwan adda addaa raawwatamuusaanii ibsaniiru. Keessumaa hojii tola ooltummaa gannaan Manneen Barumsaa Idileen duraa fi sadarkaa 1ffaa, Mannni Jireenyaa Barsiisotaa fi Manni Kitaabaa Dijiitaalaa ijaaramuusaanii dubbataniiru. Bara Barnootaa kanatti barattoonni kuma 700 dhaabbilee Barnootaa Godinichatti argaman kuma 2 fi 167 keessatti barachaa jiru jedhaniiru. Itti Gaafatamaan Waajjira Barnootaa Aanaa Ejersa Lafoo Obbo Takkaalliny Fiqiree gamasaaniin, Manneen Barnootaa Idileen duraa Tajaajila tola Ooltummaa Gannaan ijaramnan tajaajila eegalaniiru. Kananis Aanichatti bara Bara kana barattoonni kuma 17 galmaa’anii Barnoota eegaluusaanii ibsanii, hojiin baruu fi barsiisuu cimee kan itti fufu ta’uu himaniiru. Aanichatti kan argamu Daarektarri Mana Barumsaa Idileen Duraa Oolmaa Odaa kan ta’an Bayyanach Qaqqabaa gamasaaniin, Manni Barumsaa Idileen duraa hojii eegaluun isaa jiraattota naannichaaf faayidaa guddaa qaba jedhaniiru. Aanichatti barattuu kutaa 8ffaa kan taate Haannaa Maammoo, baatii gannaa barachaa turuushee himuun, barnoota idilees sirnaan hordofuuf qophaa’uushee ibsiteetti. Haaluma wal fakkattuun hojiin baruu fi Barsiisuu bara barnootaa baranaa Godina Wallaga Lixaa fi Iluu Abbaabooritti guyyaa kaleessa eegaleera. Waajjira Barnootaa Godina Wallaga Lixaatti Ogeessi Madaallii Barnoota Idileen duraa Kennasaa Kabbadaa TOI’f akka ibsaniti, hojiin baruu fi barsiisuu bara Barnootaa 2018 eegaleera. Godinichatti bara Barnootaa kanatti Barattoonni kuma 540 ol Idileen duraa irraa eegalee hanga sadarkaa 2ffaatti barsiisuuf haaldureen xumuramuu ibsaniiru. Godina Iluu Abbaaboor Aanaalee hundatti dhaabbiileen Barnootaa kuma 1 ol har’a barsiisuu eegaluu Itti Aanaan Waajjira Barnootaa Godinichaa Obbo Goobanaa Alamaayyoo beeksisaniiru. kanaanis Godinichatti, manneen barnootaa kuma 1 fi 35 Idileen duraa hanga kutaa 12ffaatti Barnoonni Idilee kennamu kan eegale yoo ta’u, walii gala barattoota kuma 200 ol simatee barsiisuuf karorsuun hojiin eegalamuu ibsaniiru.