Bitootessa 12 /2015 (TOI) – Yaa’iin Idilee aAdraffaa Bara Hojii Lammaffaa Marsaa Jaahaffaa Mana Maree Naannoo Sidaamaa Hooggantoota Biiroo fi Muudama Abbootii Murtee Raggaasise. Manni Maree kun Labsiiwwan dhihaataniif Sadii Raggaasisuun Xumurameera. Hooggantoota Mana Mareef Dhihaatanii Muudamnisaanii Raggaasifame Keessaa- Obbo Maammiruu Mokkee Hoogganaa Biiroo Qonnaa Naannichaa, Obbo Kabbadaa Gannoolee Hoogganaa Biiroo Bishaanii, Obbo Asaffaa Gurraachaa hoogganaa biiroo Siviil Sarviisii fi Misooma Humna Namaa, Obbo Makuraa Marshaayee hoogganaa BiirooMisooma Magaalaa fi Konistiraakshinii akkasumas Doktar Daawiit Hayyeessoo Hoogganaa Biiroo Pilaanii fi Misoomaa Ta’uun Muudamaniiru. Pirezidaantiin Mana Muree Walii Galaa Naannichaa Obbo Damisee Daalachaa Mana Murtee Walii Galaa Naannichaaf Abbootii Murtee Afur, Mana murtee Olaanaa Naannawa Hawaasaafjaaha, Mana Murtee Olaanaa Naannawa Bansaaf Lama, Mana Murtee Sadarkaa Tokkoffaa Hawaasaaf Jaha, Mana Murtee Sadarkaa Tokkoffaa Bansaaf Kudhan fi Mana murtee Sadarkaa Tokkoffaa Hawaasaaf Abbootii Murtee Lama Dhiheessanii Muudamaniiru. Kana Malees Manni Marichaa Labsii Mana Sirreessaa Mootummaa Naannoo Sidaamaa, Labsii Dhaabbilee Misoomaa fi Labsii Bulchiinsaa fi Itti FayyadamaLafa Baadiyyaa Raggaasisuun Yaa’iisaa Xumureera.

Bitootessa 12/2015 (TOI) – Itiyoophiyaan Waliigaltee Nageenyaa Hojiirra Oolchaa wayita Jirtutti Adeemsi Qoqqoodaa fi Almadaalawaa Waajjira Dhimma Alaa Ameerikaatti Mul’ate Marii Nageenyaa Itiyoophiyaan Adeemsisaa Jirtuuf Gufuu Akka Ta’u Ministeerri Dhimma Alaa Federaalaa Ibse. Gabaasni Sarbamuu Mirga Namoomaa Ilaalchisuun Waajjira Dhimma Alaa Ameerikaan Bahe Sirrii Akka Hintaane Mootummaan Itiyoophiyaa Beeksiseera. Gabaasni Waajjirri Dhimma Alaa Ameerikaa Dhimmicha Ilaalchisuun Baase Komishiniin Mirga Namoomaa Itiyoophiyaa fi Komishinariin Mirga Namoomaa Dhaabbata Mootummoota Gamtoomanii Ija Qorannoo Waliin Taasisaniin Yemmuu Ilaalamu Argannoon Haaraan Akka Hinjirre Ta’uusaa Ministeerichi Beeksiseera. Kanaaf Gabaasa Waajjirri dhimma Alaa Ameerikaa Baase Mootummaan Itiyoophiyaa Akka Hinfudhanne Ibseera. Ibsi Waajjirri Dhimma Alaa Ameerikaa Baase Gamtokko Qofa Komachuurratti Kan Kaayyeffate Ta’uu Akeekeera. Gama Biraatiin Gabaasichi Itiyoophiyaan Filmaata Imaammata Haqaa Cehumsaa Adda Baasuuf Hojjechaa Wayita Jirtutti, Maree Biyyaalessaa Jalqabuuf Wayita Qophooftetti Kan Bahe Waan Taheef Yeroosaa Kan Hineegne Ta’uu Ibseera. Kana Malees Kaayyoon Gabaasa Kanaa Kamiyyuu Yoo Ta’e Biyyattii Keessatti Qaama Tokko Kan Biraarratti kakaasuuf Akka Fakkaatu Ministeerri Dhimma Alaa Ibsa Baaseen Beeksiseera. Gabaasni Mootummaa Ameerikaatiin Bahe Adeemsi nageenyaa hunda hirmaachisu Kan Itiyoophiyaan deeggarsa Taasisaa Turte kan karaatti Hanbisudha jedhe Ibsi ministeerri Dhimma Alaa Federaalaa Baase. Daawwannaan Ministira Alaa Ameerikaa Antoonii Biliinken Itiyoopiyaatti taasisan Hariiroo Biyyoota Lamaanii Akka Cimsu Abdii Kan Agarsiisedha Kan Jedhe Ibsi Kun, Mareen Taasifamee fi Waliigalteen Irra Gahame gamtoomina Tarsiimawaa Biyyoota Lamaanii Ittifufsiisuuf Akka Gargaaru Amantaa Itiyoophiyaa Akka Ta’e Ibsameera. Haqaa Ce’umsaa fi Marii Biyyaalessaatiin waliigaltee Uumuu dabalatee tarkaanfiiwwan itti gaafatamummaa miidhamtootaaf mirkaneessuuf akka fudhataman kan mirkaneesse ibsichi, Michoonni Itiyoophiyaa deggersa ijaaraa taasisuun adeemsa kana akka gargaaran waamicha dhiyeesseera.

Bitootessa 12/2015 (TOI) - Manni Maree Ministirootaa Walgahii Idilee 8ffaa Har’a Adeemsiseen Dhimmoota Addaddaarratti Mari’atee Murtee Dabarsuusaa Waajjirri Mana Maree Ministira Muummee Beeksise. Manni Marichaa Jalqaba Wixinee Labsii Dhaabbilee Misoomaa Mootummaa Kan Mootummaan Qabamanii Irratti Yemmuu Ta’u Wixineen Labsii Dhihaates Sirni Korporeetiin Dhaabbilee Misoomaa Mootummaa Iftoominaa fi Ittigaafatama Kan Mirkaneessu Akka Ta’u, Bulchiinsi Faayinaansii Korporeetii Sirnasaanii Ammayyeessuun Dorgomuu Danda’uusaanii fi Bu’aqabeessummaasaanii Cimsuun kan Barbaachisu Waan Ta’eef, Bu’aasaanii Karaa Hinmiineen Dirqama Tajaajila Hawaasaa Karaa Bu’aqabeessa Ta’een Akka Bahan Idaa Irra Jiru Fooyyessuu Kan Dandeessisu Waan Ta’eef Walumaa Gala Wixineen Labsii Guddina Dinagdee Biyyaarratti Gumaacha Olaanaa Akkka Bahan Dandeessisu Qophaa’ee Mana Mareef Dhihaateera. Manni Marees Wixinee Labsii Kanarratti Erga Mari’atee Booda Galtee Itti Dabaluun Akka Ragga’u Mana Maree Bakka Bu’oota Ummataaf Akka Darbu Sagalee Guutuun Murteesseera. Itti Aansuun Waliigaltee Wixinee Labsii Itiyoophiyaan Gibira Walirra Dhufu Hanbisuu fi Waliin dhahuu Taaksii Ittisuuf Mootummaa Logzambarg Akkasumas Konfedereeshinii Siwiiz Waliin Waliigalteewwan Taasifte Akka Ragga’an Irratti. Waliigalteewwan Taaksii Walirradhufu Hanbisuu fi Waliindhahuu Ittisuuf Itiyoophiyaan Mootummoota Lamaan Waliin Taasifte Abbootiin Qabeenyaa Biyyoota Lamaanii Qabeenyasaanii Biyya Keenyatti Invast Akka godhan Gama Jajjabeessuutiin Gumaacha Olaanaa Qabaachuun Olitti Abbootiin Qabeenyaa Galii Tokkoof Gibira Altokkoo Ol Akka Hinkafalle Kan Taasisu Waan Ta’eef Waliigalteewwan Kana Raggaasisuuf Wixineen Labsii Qophaa’ee Mana Maree Ministirootaaf Dhihaateera. Manni Marees Wixinee Labsii Kanarratti Erga Mari’atee Booda Galtee Ittidabaluun Akka Raggaasifamu Mana Maree Bakka Ummataaf Akka Darbu Sagalee Guutuun Murteesseera. Xumurarrattis Manni Maree Kun Wixinee Danbii Korporeeshiniin Baabura Lafoo Itiyoophiyaa Ittiin hundaa’u Fooyyessuuf Dhihaaterratti Mari’ateera. Kaappitaala Korporeeshinichaa Kan Eeyyamamee fi Kan Kafalame Fooyyessuun Kaayyoo fi Ergama Itti Hundaa’e Galmaan Gahuu Akka Dandahu Keessumaa Bu’uraaleen Misoomaa Baaburaa Ijaarsarra Jiran Akka Xumuraman Kan xumuramanis Hojii Akka Jalqaban, Bu’uraalee Misoomaa Baaburaa Fuuladura Ijaaramaniif Humna Cimaa Akka Qabaatu Kaappitaalli Eyyamameef Ammoo Birrii Biiliyoona 22tti Akka Guddatu Kaappitaallisaa Maallaqa Callaa fi Akaakuun Kafalame Ammoo Birrii Biiliyoona 120 Akka Ta’u Wixineen Danbii Qophaa’ee Dhihaateera. Manni Marichaas Wixinee Danbii Kanarratti Mari’atee Galtee Itti dabaluun Guyyaa Gaazexaa Magalataatti Maxxanfamee Baherraa Eegalee Hojiirra Akka Oolu Sagalee Guutuun Murteesseera.

Bitootessa 12/2015 (TOI - Hooggantoonni olaanaa fi jiddugaleessaa naannoo Harari dhimma biyaa fi nannoorratti mari’achuunsaanii ibsame. Mariin kun murteewwan koreen hojii raawwachiiftuu paartii badhaadhinaa marii jidduu kana adeemsiseen dabarse irratti akka kiyyeeffate ibsameera. Miseensi koree Hojii raawwachiiftuu Paartii Badhaadhinaa fi Ministirri galiiwwanii Aadde Ayinaalem Nugusee akkasumas itti Aantuun bulchaa naannoo Affaar fi miseensi Koree hojii raawwachiiftuu Paartii Badhaadhinaa Obbo Elemaa Abibeker, itti gaafatamaa waajjira paartii badhaadhinaa obbo Abdujebar Mohaammad Pirezidaantii itti Aanaa naannoo Hararii fi hoggantuun waajjira Misooma Qonnaa Aadde Misraa Abdullaah dabalatee hoggantoonni olaanoo fi giddu galeessaa naannichaa waltajjicharratti argamaniiru. Miseensi koree hojii raawwachiiftuu Paartii Badhaadhinaa fi ministirri Galiiwwanii adde Ayinaalem Nugusee sanada marii murteewwan koreen hojii raawwachiiftuu paartii badhaadhinaa jidduu kana dabarse qabate waltajjicharratti dhiheessaniiru. Mariin kun har’a dabalatee guyyoota lamaaf akka turuodeeffannoon waajjira komunikeeshinii naannicharraa argame ni eera.

Bitootessa 12/2015 (TOI) – Hariiroo seenaqabeessa Itiyoophiyaa fi Yemen haaromsuuf hariiroo ummattootaa Kanaan dura ture fayyadamuun akka barbaachisu itti aanaa ministira muummee fi ministirri dhimma alaa obbo Dammaqaa Mokonnin ibsan. Itti aanaa ministira muummee fi ministirri dhimma alaa obbo Dammaqaa Mokonnin ministira dhimma alaa Yemen doktar Ahimad Awaad Biin Mubaarak waliin mari’ataniiru. Marii kanaanis haala wayitaawaa Itiyoophiyaarratti ibsa kennaniiru. Kana malees hariiroo biyyoota lamaanii dameelee addaddaattiin jiru cimsuun akka barbaachisu eeranii, ministirri dhimma alaa kun yaalii hariiroo kana haaromsuuf taasifamu walitti dhiheenyaan akka hojjetan gaafataniiru. Ministirri dhimma alaa Yemen doktar Mubaarak gamasaaniin biyyoonni lamaan marii siyaasaa akka isaan barbaachisu kaasaniiru. Itti dabaluunis, mootummaan Yemen lammiilee Itiyoophiyaa biyyatti galuuf fedhii qaban deebisuuf yaalii taasifamuuf deeggarsa akka taasisu dubbachuusaanii odeeffannoon ministeera alaarraa argame nimul’isa.

Bitootessa 11/2015 (TOI) - Gaaffiiwwan misoomaa fi bulchiinsa gaarii ummanni gaafatu deebisuuf miseensonni mana maree xiyyeeffannoon hojjechuu akka qaban Af-yaa’iin mana maree naannoo Sidaamaa hubachiisan. Yaa’iin idilee 4ffaa bara hojii 2ffaa marsaa 6ffaa mana maree naannoo Sidaamaa adeemsisaa jira. Af-yaa’iin mana maree naannichaa adde Faantaayee Kabbadaa baniinsa yaa’ichaarratti akka jedhanitti, miseensonni mana maree karoora mootummaan naannichaa qabate hojiirra ooluusaanii hordofuu qabu. Miseensonni mana maree ummata isaan filate waliin dubbachuun qindoominaan hojjechuu akka qaban eeraniiru. Marii ummata waliin taasifameen gaaffiiwwan misoomaa fi bulchiinsa gaarii hedduun akka jiran af-yaa’iin kun yaadatanii, gaaffilee kanneeniif deebiin kennamuusaa miseensonni mana maree hordofuu akka qaban hubachiisaniiru. Yaa’iin kun turtii guyyoota lamaatiin raawwii hojii mootummaa baatiiwwan torba darbanii niqorata, labsiiwwan addaddaarratti mari’atee niraggaasisa jedhameetu eegama.

Bitootessa 11/2015 (TOI) - Qabeenya Afriikaa misoomsuun lammiishee rakkinaa fi hiyyuma jalaa baasuuf gamtoominaa waloo fi yaalii hundakeenyaa gaafata jedhan ministirri maallaqaa RDFI obbo Ahimad Shidee. Eeggataan barreessaa muummee komishinii dinagdee Afriikaa Antooniyoo Peedroo gamasaaniin, Afriikaatti guddina dinagdee galmeessisuuf walitti hidhiinsa zoonii cimsuun nibarbaachisa jedhaniiru. Yaa’iin ministiroota faayinaansii, dinagdee fi pilaaniikomishinii dinagdee Afriikaa 55ffaa Finfinneetti taa’amaa jira,. Ministirri maallaqaa RDFI obbi Ahimad Shidee Itiyoophiyaa bakka bu’uun baniinsa yaa’ichaarratti haasawa taasisaniin, mudannoowwan uumamaa fi namtolchee guddina dinagdee Afriikaa jeequudhaan qormaata ta’aa dhufan kaasaniiru. Weerarri kooviid-19, lolli Ruusiyaa fi Yuukireen fi jijjiiramni haala qilleensaa yeroo ammaa guddina dinagdee Afriikaarratti gufuu ta’uun lammiishee rakkoof saaxiluusaanii ibsaniiru. Waan kana ta’eef rakkinoota Afriikaarratti dhiibbaa taasisaa jiran egereef hiikuu fi qabeenya Afriikaa misoomsuudhaan lammishee rakkoo fi hiyyuma jalaa baasuuf yaaliin waloo fi gamtoominni keenya dirqama ta’a jedhaniiru. Guddinaa fi badhaadhina Afriikaa mirkaneessuuf qabeenyii fi filmaanni hedduun waan jiruuf waltaanee yoo hojjenne rakkoo fi hiyyuma keessaa bahuu nidandeenya jedhaniiru. Faayinaansii misoomaaf barbaachisun of danda’uuf akkaataa galiin itti sassaabamu ammayyeessuu fi imaammata fooyyessuun nibarbaachisa jechuun ibsaniiru. Misooma waaraa Afriikaaf dinagdee cimaa fi carraa hojii amansiisaa uumuurra darbee cehumsa caasaa fiduun nibarbaachisa jedhan obbo Ahimad Shidee. Itiyoophiyaan hojii fooyyessa dinagdee biyya keessaarratti hojjechaa jirtuu fi tarkaanfiiwwan jijjiiramaa dameelee biroorratti jalqabde ibsaniiru. Eeggataan barreessaa muummee komishinii dinagdee Afriikaa Antooniyoo Peedroo gamasaaniin, Afriikaatti guddina dinagdee galmeessisuuf walitti hidhiinsa zoonii cimsuun nibarbaachisa jedhaniiru. Guddina dinagdee Afriikaa milkeessuun kan danda’amu qabeenya ofii misoomsuun faayidaarra oolchuun wayita danda’amu ta’uu ibsaniiru.

Bitootessa 11/2015(TOI) - Nagaa fi tasgabbii Itiyoophiyaa keessattii dhufaa jiru gama dippilomaasii fi misooma dinagdeetiin bu’aa jajjabeessaa galmeessisaa akka jiru itti aanaa ministira muummee fi ministirri dhimma alaa obbo Dammaqaa Mokonnin ibsan. Waltajjiin qindoomina biyyaa dippilomaasii dinagdee 7ffaan Finfinneetti taa’amaa jira. Waltajjiin kun mata duree “hojii farra kontirobaandii cimsuun misooma hawaas dinagdee fi nageenya biyya keenyaa nimirkaneessina, hojmaata qindoominaa cimsinee misooma biyya keenyaa nisaffisiifna” jedhuun adeemsifamaa jira. Itti aanaa ministira muummee fi ministirri dhimma alaa obbo Dammaqaa Mokonnin, pirezidaantota naannoo dabalatee kantiibonni magaalaa, ministiroonni, ambaasaaddaroonni biyyoota addaddaatti Itiyoophiyaa bakka bu’an, hooggantoonni federaalaa fi naannoo waltajjicharratti hirmaachaa jiru. Itti aanaa ministira muummee fi ministirri dhimma alaa obbo Dammaqaa Mokonnin, nageenyii fi tasgabbiin Itiyoophiyaa keessatti dhufaa jiru gama dippilomaasii fi misooma dinagdeetiin bu’aa jajjabeessaa galmeessaa akka jiru ibsaniiru. Nageenya argame cimsuun invastimantii kallattii alaa fi misoomaaf haala mijataa uumuun hojii hundarraa eegamudha jedhaniiru. Guddina dinagdee biyyaa mirkaneessuuf hanqinoota damee Invastimantiin mul’atan sirreessuun dirree misoomaa mijataa uumuun akka barbaachisu dubbataniiru. Ommishoota qonnaa fi kanneen biroo karaa kontirobaandii Itiyoophiyaarraa bahaniin biyyoonni biroo dorgomaa ta’uu danda’uusaanii kaasaniiru. Hanqina sirna daldalaa alaarratti mul’atuun qabeenyiItiyoophiyaa karaa seeraan alaa bahaa akka jiran eeranii, alseerummaan kun hafuu akka qabu dubbataniiru. Kontirobaandiin guddina quucarsuun sochii dinagdee biyyaa faallessuun dhiibbaa olaanaa akka akka geessisu eeraniiru. Sochii daldala seeraa alaatiif furmaata kennuudhaan Invastimantii jajjabeessuuf hoggantoonni mootummaa federaalaa amma naannoleetti jiran ittigaafatamasaanii sirriitti akka bahan hubachiisaniiru. Waltajjii kanarratti waraqaan barreeffamaa dhimmoota “rakkoolee invastimantii quunnamanii fi yaada furmaataa” akkasumas “ Itiyoophiyaatti haala qabatamaa kontirobaandii fi daldalaa” jedhu komishinara Invastimantii Lalisee Namee fi komishinara Gumuruukaa Dabalee Qaabataan dhihaatee mariin taasifamaa jira. Waltajjiin qindoomina biyyaa dippilomaasii dinagdee bara 2003 kan hundaa’e yemmuu ta’u, waltajjiin kun hudhaalee dameelee Invastimantii furmaata kennuun haala Invastimantii mijataa uumuuf kan kaayyeffatedha. Kaayyoon olaanaa qophii waltajjii kanaa dameelee Invastimantiim tuurizimii, daldala alaa fi kanneen biroorratti qindoominaan hojjechuuf yaaduun akka ta’e ibsameera. Waltajjichi gamtoomina dinagdee biyyaa cimsuun fayyadamummaa lammiilee mirkaneessuuf kan xiyyeeffate ta’uun eerameera.