Sadaasa 27/2018(TOI)-Lakkoofsi turistoota Paarkii Biyyoolessaa Gaarreen Baalee daawwatanii dabalaa jiraachuu waajjirri paarkichaa ibseera. Yaada Ministirri Muummeen doktar Abiyyi Ahimad maddisiisaniin, daandii fi bu’uuraaleen misoomaa paarkichaaf guutaman baay’inni turistootaa akka dabalu shoora olaanaa bahateera jedhan. Paarkiin Biyyoolessaa Gaarreen Baalee bal'ina iskuweer kiiloo meetira 2,000 ol kan qabu yoo ta'u, bineensota bosonaa fi simbirroota biyya birootti hin argamne hedduu kan qabudha. Kana malees, paarkiin biyyaalessaa gaarreen Baalee kun hambaa addunyaa ta’ee kan galmaa’e yoo ta’u, bakka argama bineensota akka Gadamsaa, Jeedala Diimtuu, Bosonuu,Qamalee Baalee fi bineensota biroo hedduu fi simbirrootaati. Akka itti gaafatamaan paarkichaa obbo Shaamil Kadir jedhanitti, bara baajataa kurmaana jalqabaa keessa turistoonni biyya keessaa fi biyya alaa kuma 3 fi 690 paarkicha daawwataniiru. Daawwattoota kana keessaa dhibbeentaan 45 turistoota biyya alaa ta’uu eeruun, bara darbe yeroo walfakkaatuun walbira qabamee yoo ilaalamu dhibbeentaa 17n dabaleera jedhani. Galiin gama turizimii irraa argamus dabalaa jiraachuu himaniiru. Waldaaleen gurmaa’anii hojjetanis kanarraa fayyadamoo ta’uu eeraniiru. Fakkeenyaaf kurmaana kana keessatti waldaaleen gurmaa’anii gama turizimiin hojjetan, galii miliyoona sagal, kan bara darbee yeroo walfakkaataa waliin gaafa ilaalamu caalmaa miliyoon lamaa qaba jedhan. Kana malees, galiin paarkichaa kurmaana kana birrii kuma 600 yoo ta’u, kan bara darbee irraa birrii kuma 200 caalmaa qaba jedhaniiru. Waajjira Tuurizimii godinichaatti dursaa garee misoomaa fi babal’ina turizimii obbo Shibbiruu Abdoo Gaarreen Baalee dabalatee hawwata turizimii godinichaa misoomsuu fi daran beeksisuun galii damicharraa argamu guddisuuf xiyyeeffannoon hojjetamaa jira jedhan. Hogganaa Waldaa Ikoo Tuurizimii paarkii kanaa obbo Mohaammad Kadir akka jedhanitti, bay’inni turistootaa dabaluun hojii kanarraa bu’aa akka argatan isaan gargaareera. Miseensonni waldichaa turistootaaf tajaajila adda addaa kennuun galii irraa argataniin jireenya isaanii fooyyeffachaa jiraachuu himaniiru. Paarkicha keessatti miseensa waldichaa ta’ee hojii nageenya turistootaa eegu irratti kan bobba’e jiraataan naannoo sanaa Huseen Kamaal gama isaatiin, mootummaan haala isaaniif mijeessetti gammaduu eeruun, paarkichas akka qabeenya ofiitti tiksaa fi kunuunsaa galii irraa argachaa jirra jedheera. #Tajaajila Oduu Itiyoophiyaa #TOI

Sadaasa 26/2018 (TOI)-Ilmaanii fi ilmaan ilmaansaanii hoggantoota Afriikaa hundeeffama gamtaa Afriikaa fi sosochii paan Afriikaaf gumaacha guddaa taasisan yaadannoo injifannoo Adwaa daawwataniiru. Hambaalee waliigalaa ibse taasifameeraaf godambaa kana keesa jiran ilaalchisee daawwannicharratti ibsi taasifameeraaf. Ilmi Ministira muummee demokiraatiik Rippaabiliikii Koongoo duraanii pPaatriis Lumumbaa, Intala pirezidaantii Gaanaa kan jalqabaa Kuwaamee Nukuruhamaa, Ilma ilmaa Kuwaamee Nukuruhamaa, Ilma pirezidaantii Zaambiyaa duraanii Keneet Kaawundaa, ilma ilmaa pirezidaantii Afriikaa Kibbaa duraanii Nelsan Mandeellaa fi ilma pirezidaantii Taanzaaniyaa jalqabaa Juliyees Nereeree daawwannaa kanarratti hirmaataniiru. Akkasumas Ilmi qabsaawaa farra Apaartaayidii lammii Afriikaa kibbaa fi ministira kan turan Istiiv Biikoo , Intalli qabsaawaa farra appaartaayidii fi ministira kan turan lammii Afriikaa Kibbaa Waltar Siisuluu, Intalli pirezidaantii Kongirasii biyyaalessaa Afriikaa (ANC), nama siyaasaa farra appaartaayidii fi aktiivistii Pliivar Taamboo fi kanneen biro argamaniiru. Daawwattoonni kunneen dabalataanis masaraa biyyaalessaa, Godambaa Saayinsii fi hojiilee misooma kooriidaraa magaalaa Finfinneetti hojjetamaa jiran akka daawwatan ni eegama.

Sadaasa 26/2018(TOI)- Itiyoophiyaan biyyootaa fi magaalota Afrikaa hunda keessaa filatamtee waltajjii miidiyaa guddaa kana keessummeessuun ishee kabaja olaanaa agarsiisa jedhe tajaajilli komunikeshinii mootummaa. Tajaajilli Komunikeeshinii Mootummaa sirna badhaasaa Paan-Afrikaa magaalaa Finfinneetti gaggeeffame ilaalchisee ibsa kenneera. Waltajjiin kuni, Teessoo Gamtaa Afrikaa fi dippiloomaasii Idil-Addunyaa kan taate magaalli Finfinnee biyyoota Afrikaa keessaa magaalaa waltajjii gurguddoo keessummeessuuf mijattu ta'uun ishee irra deebiin kan itti mirkaneesse ta’uu ibseera. Magaalaan Finfinnee waltajjii guddaa kana keessummeessuun injifannoo guddaa kan ittiin boonnu dha jechuun ibseera. Badhaasaa Miidiyaa Afrikaa 2025 kana akka keessummeessitu kan filatamte, akkanumaan osoo hin taanee, guddina sadarkaa idil addunyaatti madaalu galmeessaa jiraachuu isheen ta’uu ibseera. Filannoo kanaaf sababni guddaan magaalattiin waggoota dhiyoo asitti jijjiirama ariifachiisaa fi jijjiirama damee hedduun galmeessifte ta’uu eeruun, dabalataan guddina magaalota idil-addunyaa wajjin kan wal madaalu galmeessisuu isheeti jechuun ibseera. Bu’uuraaleen misoomaa waggoottan lamaan darban keessa hojjetaman Gaazexeessitoota guutuu Afrikaaf, hojii miidiyaa fi hoggantoota siyaasaaf bakka walga’ii filatamtuu ta’uu ibseera. Itiyoophiyaan mallattoo bilisummaa Afrikaa fi utubaa seenaa Paan Afrikaanizimii ta’uu himeera. Kanaaf sagantaa guddaa kana qopheessuuf filatamuun ishee adeemsa sirrii akka ta’e hime. Badhaasni kunis fedhii Afrikaa bu’uura godhachuun kan qophaa’e ta’uu eera ibsa isaatiin. Ogeeyyiin miidiyaa 800 biyyoota 40 irraa walitti babba’an saganticharratti gosoota adda addaan kan hirmaatan yoo ta’u,kunis beekkamtii fi abdii miidiyaaleen Afrikaa idil addunyaa irratti qaban agarsiisa jedheera. Miidiyaan guddinaa fi kufaatii hawaasaa murteessuu keessatti humna guddaa qabaachuu ibseera. Keessattuu seenessa dogoggoraa alaa itti fe’aman sirreessuun eenyummaa Afrikaa isa sirrii gabaasuu qabu jedhe ibsi kuni. Badhaasni kun Gaazexeessummaa, Biroodkaastingii, Miidiyaa Diijitaalaa fi ijaarsa seenessaan hojiilee fakeenyummaa qaban kanneen hojjetaniif beekamtii kan kenne waltajjii guddaa ta’uu himeera. Kaayyoo olaanaan waltajjichaa Afrikaanoonni waa’ee eenyummaa isaanii karaa sirriin akka seenessaan carraa uumuu ta’uu himeera. Hanqina kalaqaa damee miidiyaan mul’atu furuun sadarkaa ogummaa caalmaatti guddisuu ta’uu ibse. Ogeeyyii miidiyaa Ardichaa guutuu walitti qabuun, beekumsa, ogummaa fi tumsa waliinii cimsuudha jedheera. Kanaaf mootummaan dameen miidiyaa bu’uura ijaarsa sirna diimokiraasii fi misooma biyyoolessaa ta’uu isaan tumsa hundagaleessa taasisuu cimsee kan itti fufu ta’uu mirkaneesseera.

Sadaasa 25/2018 (TOI)- Naannoo Gambeellaatti midhaan deeggarsa namoomaaf oolu kan bara oomishaa 2017/18 qonna gannaan lafa hektaara kuma 1 fi 244 tuqaa 5 irratti misoome walitti qabamaa jiraachuun ibsame. Omisha walitti qabamaa jirurraamidhaan kuntaala kuma 10 fi 542 ol akka abdatamu kan dubbatan biiroo misooma qonnaa fi qabeenya uumamaa naannichaatti daarektarri ekisteenshin komunikeeshinii fi barreessaan addaa koree teekiniikaa inisheetiivii gargaaramuu jalaa bahu Geetaachoo Waldeeti. Gama biraan misoomni jallisii bonee hawaasa hirmaachisuun raawwachuuf qindoominaan hojjetamaa jira jedhaniiru. Komishinii hoggansa hojii yaaddoo balaa naannoo Gaambeellaatti daarektarri deebii akeekkachiisa duraa Seeyifuu Waldee gamasaaniin, deeggarsa namoomaa naannichaaf barbaachisu ofiin guuttachuuf hojjetamaa jiraachuu ibsaniiru. Haala Kanaan, oomishuudhaan, bittaa fi hawaasarraa walitti qabuun bara 2017 midhaan kuntaala kuma 1 fi 590 ofeeggannoof man-kuusaa keessatti kuufamuu dubbataniiru. Haala Kanaan naannichatti midhaan deeggarsa namoomaaf oolu bara oomisha gannaa 2017/18 kan misoome jiddu galarraa amma aanaatti walitti qabamaa akka jiru eeraniiru. Gama biraatiin bara bajataa 2018 birrii miiliyoona 15 mootummaan naannichaa ramadeen midhaan nyaataa fi meeshaaleen garagaraa bituuf adeemsarra akka jiru beeksisaniiru. Mankuusaan deeggarsa namoomaaf midhaan itti kuusuuf gargaaran tokkoon tokkoonsaanii kuntaala kuma 10 qabatan sadarkaa naannootti lama sadarkaa aanaatti shan jiraachuu TOI’f mirkaneessaniiru. Mootumman naannichaa mankuusaa dabalataa tajaajila wal fakkaataaf oolu ijaaruuf birria miiliyoona 20 ramaduusaa himaiiru.