Caamsaa 13/2018 (ENA): Hariiroo seena qabeessa Itiyoophiyaa fi Ameerikaa gara sadarkaa olaanaatti kan guddise hojiin dippiloomaasii milkaa’aa hojjetameera jedhan Dubbi himaan Ministeera Dhimma Alaa Ambaasaaddar Nabiyaat Geetaachoo. Hariiroon biyyoota lamaanii fi biyyoota hedduu Itiyoophiyaa gara marsaa olaanaatti akka tarkaanfatu kan dandeessise hojiin dippilomaasii milkaa’aan hojjetamuusaas ibsaniiru.   Dubbi himaan Ministeera Dhimma Alaa Ambaasaaddar Nabiyaat Geetaachoo taateewwan gurguddoo waltajjiiwwan dippilomaasii biyyoota lamaanii fi biyyoota hedduu irratti raawwataman irratti ibsa Miidiyaaleef kennaniiru. Ibsa kennaniin, torbee darbe waltajjiiwwan dippilomaasii biyyoota lamaanii fi biyyoota hedduu irratti hojjetamee tumsa, walta’iinsaa fi carraa invastimantii Itiyoophiyaa mirkaneesse ta’uu ibsaniiru. Waltajjiiwwan qunnamtii biyyoota lamaanii fi biyyoota hedduunis hirmaannaa dippilomaasii cimaa fi dammaqina qabeessa ta’e akka dandeessisan yaadachiisaniiru. Fakkeenyaaf, walii galteen biyyoota lamaanii Itiyoophiyaa fi Ameerikaa gidduutti taasifameen michummaa seena qabeessaa fi cimaan biyyoota lamaanii waggoota 120 oliif kan turee fi dhaabbataa taasisuu isaa dubbataniiru. Waltajjiin marii caasaa biyyoota lamaanii fi waliigalteen biyyoota gidduutti taasifames hariiroo dippilomaasii cimsuu fi hariiroo naannoo fi idil-addunyaa cimsuu isaa ibsaniiru. Waliigalteen biyyoota lamaanii kun tumsa daldalaa fi invastimantii, nageenyaa fi ittisa biyyootaa sadarkaa haaraatti ceesisuun badhaadhina diinagdee waliinii mirkaneessuu irratti kan xiyyeeffate ta’uus hubachiisaniiru. Mariin dippilomaasii hoggantoota olaanoo mootummaa Itiyoophiyaa fi Ameerikaatiin gaggeeffame michummaa seenaa gara walta’iinsa guddaatti jijjiiruu keessatti hiika guddaa akka qabu ibsaniiru. Waltajjiiwwan biyyoota lamaanii irrattis fakkeenya guddina diinagdee fi badhaadhina Itiyoophiyaa fi haala ji’oo-siyaasaa Gaanfa Afrikaa irrattis mari’achuu ibsaniiru. Pireezidaantiin Faransaay Imaanu’eel Maakiroon daawwannaa hojiif Itiyoophiyaatti taasisanis waliigalteewwan tumsaa michummaa seena qabeessa biyyoota lamaanii daran cimsan mallatteessuun isaanii ni yaadatama. Dhaabbanni Mootummoota Gamtoomanii waggaa 80ffaa hundeeffama Itiyoophiyaa, ergama nagaa eegsisuu milkaa’aa fi seenaa waliin qabdu yaadachuuf ashaaraa addaa kaa’uu isaa eeraniiru. Itiyoophiyaan tumsa dippilomaasii biyyoota hedduu fi walitti dhufeenya seenaa qabduuf kutannoo qabaachuu isheetiif ragaadha jedhan. Walgahii Ministiroota Dhimma Alaa ‘BRICS’ Hinditti gaggeeffame irrattis Itiyoophiyaan sirni biyyoota hunda tajaajilu haqaan akka diriiru ejjennoo qabdu ibsiteetti. Walgahii ‘BRICS’ kanaan alattis hariiroo biyyoota lamaanii cimsuuf biyyoota miseensa ta’an waliin marii bu’a qabeessa ta’e gaggeessuu isaanii ibsaniiru. Dippilomaasii lammiilee giddu galeessa godhateen nageenya lammiilee Itiyoophiyaa Afrikaa Kibbaa fi Sa’uudii Arabiyaa keessa jiraatan mirkaneessuuf mariin gaggeeffamaa akka tures eeraniiru. Itiyoophiyaan abbummaa haqa qabeessa, seera qabeessa, teessuma lafaa fi seenaa Buufata galaanaa kanarratti qabdu irratti hubannoo uumuuf tattaaffiin dippilomaasii taasifamu cimee itti fufuus mirkaneessaniiru. #ENA_Afaan_Oromoo #ENA

Caamsaa 12/2018(ENA): Paartiin Badhaadhinaa naannoo Oromiyaatti dameewwan Qonnaa, Industirii, Tajaajilaa fi kanneen birootiin hojiiwwan fayyadamummaa uummataa guddisan raawwachuusaa Itti-anaan Pireezidanti Mootummaa Naannoo Oromiyaa obbo Awwaluu Abdii ibsan. Paartiin Badhaadhinaa Godina Shawaa Lixaa fi Bulchiinsa Magaalaa Ambootti duula nafiladhaa gaggeesseera.   Sirna duula nafiladhaa kana irratti kan argaman Itti Aanaan Pireezidantii Mootummaa Naannoo Oromiyaa obbo Awwaluu Abdii akka ibsanitti, Paartiin Badhaadhinaa waggoottan darban keessa hojiiwwan misoomaa jireenya uummataa fooyyessan raawwateera jedhaniiru. Dabalataanis, fayyadamummaa haqa qabeessa lammiilee mirkaneessuuf hojii hojjetameen bu'aan hundagaleessi argamaa jiraachuu dubbataniiru. Keessattuu naannoo Oromiyaatti dameewwan qonnaa, industirii, tajaajilaa fi kanneen birootiin hojiiwwan fayyadamtummaa uummataa guddisuu danda'an hedduun raawwatamuu isaanii eeraniiru. Paartichi misooma hawaas-dinagdee mirkaneessuun, haqni, wal-qixxummaanii fi tokkummaan dimokiraasii akka guddatu akkasumas waliin jireenyi akka cimu hojjechaa jiraachuu ibsaniiru. Bulchaa olaanaan Godina Shawaa Lixaa obbo Diidhaa Guddataa akka ibsanitti; Badhaadhinni paartii jijjiirama hawaas-dinagdee mandhaalee qabatee ka'eedha jedhaniiru. Godinichatti waggoottan jijjiiramaa darban keessa inisheetivoota misoomaa mootummaan naannichaa qopheesseen hojiiwwan bal'aan fayyadamummaa hawaasaa mirkaneessan hojjetamuu isaanii dubbataniiru. Waggoottan jijjiiramaa darban keessa Amboo dabalatee magaalaawwan biroo keessattis sadarkaa jireenya lammiilee fooyyessuuf hojiin bal'aan hojjetamuu kan ibsan immoo Kantiibaa Magaalaa Amboo obbo Haacaaluu Gammachuuti. Paartichi hojiiwwan misoomaa qabatamaa qonna magaalaa fi dameewwan biroo keessatti qulqullinaan hojjechuusaa addeessaniiru.

Caamsaa12/2018(ENA): Dhaabbileen siivikii filannoo waliigalaa torbaffaa keessatti gahee hordoffii fi deeggarsaa qaban cimsaanii itti fufuu akka qaban Itti Aanaan Daarektara Ol’aanaa Abbaa Taayitaa Dhaabbilee Hawaasa Siivikii Itiyoophiyaa Fasiikaaw Mollaa hubachiisan. Waltajjii marii ENA fi Abbaa Taayitaa Dhaabbilee Hawaasa Siivilii Itiyoophiyaa waliin ta'uun mata-duree “Gahee Miidiyaalee Milkaa'ina Filannoo Dimokiraasii Keessatti” jedhuun waliin qopheessan magaalaa Adaamaatti gaggeessaa jiru. Waltajjiin kun filannoo dimokiraasii fi haqa qabeessa ta’e gaggeessuun itti gaafatamummaa qaama dhimmi ilaallatu hundaa ta’uusaa hubachiisuuf kan qophaa’eedha. Marii kanarratti Ministira Tajaajila komunikeeshinii Mootummaa Innaataalam Mallas, De’eetaa Ministira Tajaajila Komunikeeshinii Mootummaa Tasfaahun Gobazaay, hojii raawwachiisaa olaanaa ENA Sayifee Darribee, itti aanaa dariktara Abbaa Taayitaa Dhaabbilee hawaasa siivilii Itiyoophiyaa Faasikaaw Mollaa, gaggeessitoonni Abbaa Taayitaa Miidiyaalee,hoggantoonni miidiyaalee fi gaazexeessitoonni hirmaataniiru. Waltajjicharratti,Itti Aanaan Daarektera Olaanaa Dhaabbilee Hawaasa siivikii Fasiikaaw Mollaa akka jedhanitti hawaasni siivikii filannoo walii galaa 7ffaa keessatti gahee hordoffii fi deeggarsaa qaban cimsuu akka qaban hubachiisaniiru. Filannoo dimokiraasii fi haqa qabeessa ta’e gaggeessuun dirqama waliinii ta’uu eeranii, gaheen dhaabbilee siivikiis baay'ee murteessaa ta'uu kaasaniiru. Gaheen dhaabbilee siivikii yeroo filannoo taajjabdummaa qofa osoo hin ta’iin, lammiileen ijaara sirna dimokiraasiitiif itti gaafatamummaa fi abbummaadhaan akka dhaabbatan gochuu keessatti itti gaafatamummaa guddaa qabu jedhaniiru. Kanaanis, dhaabbileen kun lammiileen waa’ee barbaachisummaa filannoo irratti hubannoo gahaa akka argatan gochuu keessatti gaheen isaanii ol’aanaa ta’uu ibsaniiru. Hawaasni adeemsa filannichaa keessatti hirmaannaa ho’aa akka ta’u dandeessisuurratti xiyyeeffatanii hojjachaa akka turan eeranii, tattaaffii isaanii kana cimsuun itti fufuu akka qabanis dubbataniiru. Gama biraatiin, itti aanaan Daarektera Ol’aanaa Abbaa Taayitaa Miidiyaalee Itiyoophiyaa obbo Gizawuu Tasfaayee, miidiyaaleen gabaasa filannoo ilaalchisee hojjatan seera hordofanii hojjachaa jiraachuu isaanii hordofamaa akka jiru ibsaniiru. Miidiyaaleen kakaasii fi yeroo beeksisa bilisaa paartilee siyaasaatiif ramadame fayyadamuu irratti rakkoon akka hin uumamne dubbataniiru. Miidiyaaleen yeroo filannootti ijaarsa nageenyaa irratti akka xiyyeeffatan abbaan taayitichaa hojjachaa akka turee fi cimsee kan itti fufu ta'uu mirkaneessaniiru. Yeroo filannootti naamusni eegamuu qabu akka kabajamu; hojiiwwan hojjatamaa jiranii fi qaamolee dhimmi ilaallatuuf hojiin dandeettii raawwachiisummaa cimsuu hojjatameera jedhaniiru. Miidiyaaleen sagantaa Boordiin Filannoo Biyaalessaa baase bu’uura godhachuun gabaasaalee adda addaa filannoo ilaalchisan uummataaf dhaqqabamaa gochaa turuu isaanii eeranii, kanaanis ijaarsa sirna dimokiraasiitiif gahee isaanii ba’achaa turaniiru jedhaniiru. Xumura irratti, hirmaattota paanalichaa irraa gahee miidiyaalee fi dhaabbilee hawaasa siivikii yeroo filannoo ilaalchisee yaadonnii fi gaaffileen kan ka'an yoo ta'u, mariisistootaan deebii fi ibsi irratti kennameera.

Caamsaa 12/2018 (ENA): Paartiin Badhaadhinaa bu’uura fayyadamummaa lammiilee kaa’uuf tattaaffii taasisaa jiru itti fufa jedhan Hogganaan Damee Siyaasaa Waajjira Damee Mootummaa Naannoo Oromiyaa Paartii Badhaadhinaa obbo Namarraa Bulii. Duulli filannoo paartichaa Godina Iluu Abbaa Booraa Aanaa Haluutti bakka hooggantoonni naannoo fi godinaa argamaniiru gaggeeffameera.   Duula filannoo kanarratti hirmaattotaaf haasawa kan taasisan Itti Gaafatamaan Damee Siyaasaa Paartii Badhaadhinaa Oromiyaa obbo Namarraa Bulii, Paartiin Badhaadhinaa waggoota darban keessatti pirojektoota fayyadamummaa lammiilee fi guddina biyyaa mirkaneessu caalaatti cimsuuf kutannoo akka qabu ibsaniiru. Paartichi pirojektoota misooma magaalaa fi baadiyyaa fayyadamummaa ummataa mirkaneessu raawwachuudhaan gama bulchiinsaatiin hawaasa walitti dhiyeenyaa fi haqaan tajaajiluuf ciminaan kan hojjatu ta’uu ibsaniiru. Itti dabaluunis lammiileen hiyyummaa jalaa bilisa ta’anii jireenya fooyya’aa akka jiraataniifi nageenyi waliigalaa isaanii akka mirkanaa’uuf ciminaan kan hojjetamu ta’uu ibsaniiru. Lammiilee aadaa hojii isaanii naannicha keessatti fooyyessanii fi fayyadamummaa ofii fi badhaadhina biyyaa mirkaneessuuf kutannoo qaban oomishuun biyyi keenya mallattoo badhaadhina akka taatu ciminaan hojjachuu itti fufa jechuun ibsaniiru obbo Namarraan.   Bulchaan Olaanaan Godina Iluu Abbaa Booraa obbo Indaalkachoo Tafarii akka ibsanitti, Paartiin Badhaadhinaa waggoota darban keessatti hojiiwwan bal’aa Godinicha keessatti hojjetee fayyadamummaa waliigalaa lammiilee mirkaneessu cimsee itti fufa jedhaniiru. Akkasumas, yaada ida’amuutiin qajeelfamuun guddinaa fi badhaadhina Godinichaa mirkaneessuuf hojii isaa cimsee kan itti fufu ta’uu ibsaniiru. Sagantaan sagalee kennuu filannoo waliigalaa 7ffaa Caamsaa 24, 2018 akka gaggeeffamu beekamaadha. #ENA_Afaan_Oromoo #ENA

Caamsaa 12/2018 (ENA): Miidiyaan hubannoo waloo lammiileen Itiyoophiyaa dantaa biyyaalessaa irratti qaban cimsuuf ga’ee olaanaa qaba jedhan De’eetaan Ministira Tajaajila Kominikeeshinii Mootummaa obbo Tasfaahun Gobazaayi. Waltajjiin ENA fi Abbaa Taayitaa Dhaabbilee Hawaasa Siivilii Itiyoophiyaa mata duree “Gahee Miidiyaa Milkaa’ina Filannoo Dimokiraatawaaf” jedhuun qopheessan magaalaa Adaamaatti gaggeeffamaa jira. Waltajjiin kun filannoo dimokiraatawaa fi haqa qabeessa gaggeessuun itti gaafatamummaa waloo qooda fudhattoota hundaa ta’uu ibsuuf kan qophaa’edha.   Waltajjicharratti Ministirri Tajaajila Komunikeeshinii Mootummaa, Innaataalam Mallas, De’eetaan Ministira Tajaajila Komunikeeshinii Mootummaa, Tasfaahun Gobazaay, Hojii Gaggeessaa Olaanaa ENA Sayifee Darribee, Itti aanaa Daarektarri Olaanaa Abbaa Taayitaa Dhaabbilee Waldaalee Siivilii Itiyoophiyaa Faasikaaw Mollaa, hoggantoonni Abbaa Taayitaa Miidiyaa, hoggantoonni miidiyaa fi gaazexeessitoonni argamaniiru. Obbo Tasfaahuun Gobazay, Gaazexeessitoonni Filannoo waliigalaa 7ffaa yeroo gabaasa dhiyeessan karaa dantaa biyyaalessaa itti eegan ta’uu isaa haala mirkaneessu danda’uun hojjechuu akka qaban dubbataniiru.   Hojii gaggeessaan ENA obbo Sayifee Darribee akka jedhanitti, filannoo kana ilaalchisee hojiiwwan walfakkaatan qooda fudhattoota waliin ta’uun hojiin hojjetamu cimanii itti fufu jedhaniiru. #ENA_Afaan_Oromoo #ENA

Caamsaa12/2018(ENA) : Filannoo waliigalaa 7ffaa kanaan hirmaannaa siyaasaa kutaa hawaasa hundaatiif haala mijeessu uumuun akka danda'ame Ministeerri Dhimma Dubartootaa fi Hawaasummaa beeksiise. Akka sagantaa boordii filannoo biyaalessaa Itiyoophiyaatti, filannoo waliigalaa Caamsaa 24/2018 sagaleen kan itti kennamu jedhamu kanaaf guyyoonni muraasni qofti hafaniiru. Galmeen filattootaa filannoo waliigalaa baranaa boqonnaawwan adda addaatiin dheerachuun gaggeefamaa turuun, Guraandhala 28 hanga Ebla 24/2018tti gaggeeffamee xumurameera. Filattoonnis tooftaa dijitaalaatiin appilikeeshinii "mircaayee" jedhamuu fi buufataalee filannootitti qaamaan argamuun, lammiileen miiliyoona 50 fi kumni 514 ol ta'an kaardii filannoo isaanii fudhatanii jiru. Filannoo waliigalaa torbaffaa kanaan paartileen morkattootaa 47 ta'an kaadhimamtoota kuma 10 fi 934 galmeessisuun, miidiyaalee adda addaatiin yaada imaammata isaanii uummataaf beeksisaa jiru. Boordii Filannoo Biyaalessaa irraa beekamtii kan argatan dhaabbileen biyya keessaa 55 naannoolee adda addaatti bakka bu'oota kuma 60 fi 277 ol bobbaasaniiru. Barnoota filattootaa irratti dhaabbileen siivikii beekamtii argatan 169 uummata filatuuf leenjii fi hubannoo uumuu kennaa jiru. De’eetaan Ministeera Dhimma Dubartootaa fi Hawaasummaa Huuriyaa Alii ENA’f akka ibsanitti; adeemsa filannoo kanaan hirmaannaa siyaasaa dubartootaa, dargaggootaa fi namoota qaama miidhamtootaa mirkaneessuuf haalli mijataan uumameera. Filannoo waliigalaa baranaatiif lakkoofsi uummataa ol’aanaan galmaa’uun isaa, hirmaannaa lammiilee guddisuu keessatti dhimma biyyaalessaa dandeessisu uumamuu isaa akka agarsiisu ibsaniiru. Adeemsa filannichaa dimokiraatawaa fi nageenyasaa eegsisuuf filannoowwan adda addaatiin hojiin uummata dammaqsuu fi hubannoo uumuu hojjetamuu isaa kaasaniiru. Fakkeenyaaf, buufatni filannoo namoota qaama miidhamtootaaf mijataa akka ta'uu fi hirmaannaa si'aawaa qoodamtoota hawaasa hundaatiif hojiin hojjetameera jedhan. Fuuldurattis filannichaa bilisa, dimokiraatawaa fi haqa-qabeessa gochuuf hirmaannaan ho’aa taasisuun akka isaanirraa eegamu kaasaniiru. Kutaan hawaasaa haalota adda addaa keessa kan jiranis filannicha irratti akka hirmaataniif haalli mijateera. Lammiileenis kaardii filannoo fudhatan bu'uura godhachuun paartii siyaasaa biyyaaf fayyada jedhaniif sagalee kennuun hirmaannaa siyaasaa ho’aa gochuu akka qaban hubachiisaniiru.

Caamsaa 12/2018(ENA) : Adeemsota biyyaalessaa murteessoo kanneen akka filannoo keessatti gaheen miidiyaalee baay'ee ol'aanaa ta'uu Ministirri Tajaajila Komunikeeshinii Mootummaa Innaataalam Mallas ibsan. Waltajjii marii ENA fi Abbaa Taayitaa Dhaabbilee Hawaasa Siivilii Itiyoophiyaa waliin ta'uun mata duree “Milkaa'ina Filannoo Dimokiraatawaatiif gahee Miidiyaalee” jedhuun qophaa'e magaalaa Adaamaatti adeemsifamaa jira. Waltajjiin kun filannoo dimokiraatawaa fi haqa qabeessa ta'e gaggeessuun itti gaafatamummaa waliinii qooda fudhattoota hundaa ta'uu hubachiisuuf kan qophaa'e dha. Marii kanarratti Ministira Tajaajila komunikeeshinii Mootummaa Innaataalam Mallas, De’eetaa Ministira Tajaajila Komunikeeshinii Mootummaa Tasfaahun Gobazaay, hojii raawwachiisaa olaanaa ENA Sayifee Darribee, itti aanaa dariktara Abbaa Taayitaa Dhaabbilee hawaasa siivilii Itiyoophiyaa Faasikaaw Mollaa, gaggeessitoonni Abbaa Taayitaa Miidiyaalee,hoggantoonni miidiyaalee fi gaazexeessitoonni hirmaataniiru.   Ministirri Tajaajila Komunikeeshinii Mootummaa Innaataalam Mallas waltajjicharratti haasaa taasisaniin, adeemsota biyyaalessaa murteessoo akka filannoo keessatti gaheen miidiyaalee baay'ee ol'aanaadha jedhaniiru. Miidiyaaleen waliigaltee biyyaalessaa uumuu, dammaqinsa siyaasaa lammiilee guddisuu fi sirni itti-gaafatamummaa qabu akka uumamu gochuu keessatti dandeettii guddaa qabu jedhaniiru. Kana malees, ijaarsa biyyaa keessatti, uummata beksisuu fi hojiif kakaasuu keessatti gahee bakka bu'uu hin qabne akka qaban eeranii, keessattuu adeemsota biyyaalessaa murteessoo akka filannoo keessatti gaheen miidiyaalee baay'ee ol'aanaa ta'uu ibsaniiru. Adeemsa filannichaa iftoomina fi itti-gaafatamummaa qabuun hordofuu fi gabaasuun, nagaa, dimokraatawaa, hirmaachisaa fi amanamamaa ta'ee akka xumuramuuf itti gaafatamummaa isaanii bahachuu akka qabanis hubachiisaniiru. Guyyoota filannoof hafan keessattis miidiyaaleen hojii isaanii kana cimsanii akka itti fufan dhaamaniiru. Gama biraatiin, hojii raawwachiisaa olaanaa ENA Sayifee Darribee, filannoo waliigalaa 7ffaa kanaan uummata qopheessuu keessatti hojiileen hedduun hojjetamaa turuu dubbataniiru. Waltajjiin kunis qaama hojii kanaa ta'uu eeranii, cimee kan itti fufu ta'us ibsaniiru.

Caamsaa 12/2018(ENA): Waltajjiin marii mata duree “Milkaa'ina Filannoo dimokiraatawaatiif gahee Miidiyaalee” jedhuun qophaa'e magaalaa Adaamaatti adeemsifamaa jira. Marii kana ENA fi Abbaan Taayitaa Dhaabbilee Hawaasa Siivilii Itiyoophiyaa waliin ta'uun qopheessaniiru. Marii kanarratti Ministira Tajaajila komunikeeshinii Mootummaa Innaataalam Mallas, De’eetaa Ministira Tajaajila Komunikeeshinii Mootummaa Tasfaahun Gobazaay, hojii raawwachiisaa olaanaa ENA Sayifee Darribee, itti aanaa dariktara Abbaa Taayitaa Dhaabbilee hawaasa siivilii Itiyoophiyaa Faasikaaw Mollaa, gaggeessitoonni Abbaa Taayitaa Miidiyaalee, hoggantoonni miidiyaalee fi gaazexeessitoonni hirmaataniiru. Waltajjiin kun filannoo dimokiraatawaa fi haqa qabeessa ta'e gaggeessuun itti gaafatamummaa waliinii qooda fudhattoota hundaa ta'uu hubachiisuuf kan qophaa'edha. Adeemsa kana keessattis gaheen miidiyaalee fi dhaabbilee hawaasa siivilii baay'ee murteessaa ta'uun ibsameera.