Mudde 01/2018(TOI)-Itiyoophiyaa fi Zaambiyaan damee waraanaa irratti tumsaan waliin hojjechuuf dhimmoota isaan dandeessisu irratti waliif mallatteessaniiru. Walii galtichi hariiroo yeroo dheeraa biyyoota gidduu ture cimsuu fi damee waraanaa adda addaatiin faayidaa waloo irratti hojjechuuf kan kaayyeffate ta’uun ibsameera. Haaluma kanaan Itaamaajoor shuumiin walii galaa humnoota waraanaa Fiildi Maarshaal Birhaanuu Juulaa fi Itaamaajoor shuumiin Waliigalaa Zaambiyaa Jeneraal Jeefri zi'eel gidduutti erga mari'ataniin booda hoggantoonni ittisaa sadarkaan jiranis waliigaltee kana mallatteessaniiru. Itiyoophiyaan nageenyaa naannawaa fi biyyootaa tasgabbeessuuf kutannoon kan hojjettu ta’uu himan Fiild Maarshaal Birhaanuu Juulaan. Hariiroo Zaambiyaa waliin jiru daran cimsuuf kan hojjetan ta’uu mirkaneessaniiru. Leetanaan Jeefrii Zi’eel gama isaaniin, waliigalteen loltummaa biyyoonni lamaan mallatteessan tumsa fooyya’aa uumuun fayyadamummaa waloo caalmaatti guddisuuf shoora qabaachuu dubbataniiru. Hoggantoonni Raayyaa Ittisaa biyyoota lameenii waliigalticha kan mallatteessan yoo ta’u, kunis hariiroo bara dheeraa biyyoota lamaanii caalmaatti cimsuu fi dameewwan loltummaa adda addaan fayyadamummaa waloof hojjechuuf kan kaayyeffate ta'uu ibsameera.

Sadaasa 30/2018(TOI)-Filannoon Biyyoolessaa 7ffaan baranaa Caamsaa 24 bara 2018 akka gaggeeffamu Boordiin Filannoo biyyoolessaa beeksise. Boordiin filannoo biyyoolessaa Itiyoophiyaa filannoo biyyoolessaa marsaa 7ffaa gaggeessuuf hojiiwwan haalduree filannoo duraa ilaalchisuun ibsa miidiyaaf kenneera. Hoggantuun boordii filannoo biyyoolessaa Itiyoophiyaa Meelaatwarqi Haayiluu boordichi hojii filannoon duraa hanga ammaatti hojjetee fi dhimmoota Kanaan walqabatan ilaachisuun ibsa taassisaniiru. Filannoo biyyoolessaa 7ffaa gaggeessuuf hojiiwwan adda addaa hojjetamaa turuu ibsaniiru. Waajjiraalee damee gurmeessuu fi buufanni filannoo Mijataa akka ta’u hojiin hojjetamuu ibsaniiru. Paartiileen siyaasaa sagantaasaanii ummatatti akka beeksisaniif leenjiin kennameera. Galmeen kaadhimamtootaa karaa sooftiweerii akka gaggeeffamu ibsaniiru. Kanaafis paartiileen yookiin dhuunfaan kan dorgoman of galmeessuuf akka hojjetan ibsuun, kanaafis boordichi leenjii kennuu dubbataniiru. Akkasumas warri filatan sooftiweerii boordichaan misoomeenii fi hojmaata ammaan dura tureen galmee akka gaggeessan dubbataniiru. Filattoonni odeeffannoo galmeef dhiheessan haaluma ammaan duraan kan itti fufu ta’uu beeksisaniiru. Eeyyama taajjabdummaa warra gaafataniif sooftiweerii Boordichi hojjeteen kennuuf adeemsa dhumaarra jiraachuu dubbachuun, Caamsaa 24 bara 2018 guyyaa sagaleen kennamu ta’uu eeraniiru. Wantoota kanaaf gargaaran ilaalchisee marii fuulduratti qabaniin qaamolee qooda fudhattoota dhimmichi ilaallatu waliin mariin akka gaggeeffamu dubbataniiru.

Sadaasa 30/2018(TOI)-Boordiin filannoo biyyoolessaa Itiyoophiyaa Paartii Simirat Tigiraayii (SMRT)’f waraqaa ragaa paartii naannoo kenneera. Boordichi bu’uura Aangoo labsiin kennameefiin Paartii Simiratiif waraqaa ragaa seera qabeessa Paartii siyaasaa sadaasa 29 bara 2018 kennuu beeksiseera. Paartiin Dimokiraatawaa Tigiraay Simirat (smrt) yaa’ii hundeeffamasaa Onkoloolessa 14 bara 2014 Magaalaa Finfinneetti gaggeessuunsaa ni yaadatama. Pirezidaantiin Paartichaa Geetaachoo Raddaa Haasaa baninsa yaa’ichaarratti taasisaniin, Partichi ummanni Tigiraay dhiibbaa ABUT isa irraan gahaa jiru karaa nagaan qabsa’uuf kan hundeffame ta’uu dubbataniiru.

Sadaasa 30/03/2018(TOI)- Naannoo Harariitti hojii nagaa fi tasgabbii cimsuu ittifufa jechuun Itti Aantuun Bulchaa Naannichaa Roozaa Umar dubbatan. Gidduu gala leenjii Ajaja Bahaa qaamolee nageenyaa Naannoo Hararii leenjii fudhachaa turan har’a eebbifamaniiru. Itti Aantuun Bulchaa Naannichaa Roozaa Umar sirna eebbaa sanarratti argamuun akka jedhanitti, naannichatti nagaa fi tasgabbii cimsuurratti hojiin bu’aa qabeessi raawwatameera. Kanaafis qaamoleen nageenyaa ummataa fi gurmaa’insootni nageenyaa hojii qindoominaan hojjetan qooda olaanaa gumaachuu dubbataniiru. Misoomaa fi guddina caalaatti dagaagsuu hojiiwwan eegalaman cimanii akka itti fufan Aadde Roozaan ibsaniiru. Raayyaa ittisa biyyaatti Ajajni Bahaa birmadummaa biyyaa fi nageenya uummataa eeguuf ergamasaa ciminaan bahaa jira jechuun Itti Aanaan Iizzii Bahaa Mejer Jeneraal Fiqaaduu Tsaggaayee ibsaniiru. Keessumaa Iizzichi qaxanichatti tasgabbii fi misooma dabalatee dameelee hundaan hojiin raawwatan bu’aa argamsiisaa jira jedhaniiru. Iizzichi hojii hojjechaa jiru gara fuulduraattis cimsee akka ittifufu mirkaneessaniiru. Raayyaa Ittisa biyyaatti Iizziin Bahaa qaamolee nageenyaa naaannichaaf leenjii kennuun deeggarsa taassisaniif Itti Gaafatamaan Biiroo Nagaa fi Tasgabbii Naannichaa Obbo Toofiiq Mahaammad galateeffataniiru. Saganticharratti Qondaaltonni Olaanoon waraanaa Raayyaa ittisa biyyaa Ajaja Bahaa Somaalee, Hoggantoonni Olaanoon Naannoo Hrarii fi keessummoonni biroon argamaniiru.

Sadaasa 30/2018(TOI)- Boordiin filannoo biyyaalessaa yeroo filannoon waliigalaa 7ffaa baranaa itti gaggeeffamu ifoomseera. Haala Kanaan filannoo walii galaa 7ffaaf guyyaan sagaleen itti kennamu Caamsaa 24 bara 2018 ta’uu beeksiseera.

Sadaasa 29/2018(TOI)-Tokkummaa sab-daneessummaa keenya bu’uura haqaa, wal-qixxummaan irratti ijaaruun Itiyoophiyaa Laliste, Kabajamtee fi sodaatamte Cimsuu qabna jedhuun ibsan Pirezidaant Taayyee Atsqasillaasee ibsan. Guyyaan sabootaa, sablammootaa fi ummattootaa Itiyoophiyasa 20ffaan mata duree “walii galteen Dimokiraatawaa tokkummaa sab-daneessummaaf“ jedhuun bakka Ministirri Muummee Dr. Abiyyi Ahimad argamanitti naannoo gidduu galeessa Itiyoophiyaa Magaalaa Hosaa’inaatti har’a kabajameera. Pirezidaant Taayyee Atsqsillaasee fuula Miidiyaa X (tiwuuterii)isaanniin ibsaniin, baga guyyaa sabootaa, sablammootaa fi uummattootaa Itiyoophiyaa yeroo 20ffaanf mata duree “walii galteen Dimokiraatawaa tokkummaa sab-daneessummaaf ” jedhuun kabajamuun isin gahe jedhaniiru. Tokkummaa sab-daneessummaa keenya bu’uura Haqaa fi wal-qixxummaarratti hundeessuun Itiyoophiyaa Laliste, Kabajamtee fi sodaatamte cimsina jechuun waamicha dhiheessaniiru.

Sadaasa 29/03/2018(TOI)- Guyyaan sabootaa, sab-lammootaa fi uummattootaa Itiyoophiyaa 20ffaan Imbaasiiwwanii fi qonsilaawwan Itiyoophiyaa Ala jiraniin kabajameera.   Ayyaanichi Mata duree “waliigaltee demokiraatawaan tokkummaa sab-daneessummaaf” jedhuun kabajamaa jira. Sirna kabajaa kanarratti, hoggantoonni misiyoonotaa, Dippiloomaatotaa fi hojjettoonni, Abbootiin Amantaa , bakka bu’oonni hawaasaa fi keessummoonni biroon argamaniiru.   Guyyaan sabootaa, sab-lammootaa fi ummattootaa Itiyoophiyaan Fakkeenya heddumminaa fi tokkummaa sab-daneessummaa haala mul’iseen kabajameera. Nyaataa fi Uffannaan aadaa Itiyoophiyaa agarsiisaaf kan dhihaate yoo ta’u, sirboonnii sabotaa, sablammootaa fi shubbisawwan aadaa taatteewwan itti agarsiifaman dhihaataniiru.   Ayyaanichi biyyootaa Chaayinaa, Ameerikaa, Jarman Emereetota Araboota Gamtoomanitti, Sawudi Arabiyaa Kuwaaterii fi Sudaan Kibbaa, Beljiyeem, Paakistaan , Kootdivaarii fi Siwiidin, Ripaabilika Kooriyaa , Afriikaa Kibbaa, Awustiraaliyaa, Yugaandaa, Ruwaandaa, Jibuutii, Keeniyaa fi Somaaliyaatti biyyoota guyyichi itti kabajamee oole keessaa ta’uu ibsaniiru. Guyyaan sabootaa, sablammootaa fi ummattootaa Itiyoophiyaa 20ffaan mata duree “walii galtee Dimokiraatawaa tokkummaa sab- daneessummaaf “ jedhuun bakka Ministirri Muummee Dr. Abiyyi Ahimad argamanitti Naannoo Gidduu galeessa itiyoophiyaa Magaalaa Hosaa’inaatti har’a kabajameera.  

Sadaasa 29/03/2018(TOI)- Ayyaanichi waggoottan jijiiramaa darban tokkummaa sabdaneessummaa Uummattootaa fi duudhaa waloon jiraachuu cimsuun misooma fulla’aa fi badhaadhina hunda galeessa saffisiisuuf qooda olaanaa gumaachuusaa Af-yaa’iin Mana Maree Federeeshinii Aaganyoo Tashagar ibsan. Guyyaan Sabootaa, Sab-lammootaa fi Uummattoota Itiyoophiyaa 20ffaanMata duree “waliigaltee demokiraatawaan tokkummaa sab-daneessummaaf” jedhuun Bakka Ministirri Muummee Dr. Abiyyi Ahimad argamanitti Naannoo gidduugala Itiyoophiyaa Magaalaa Hosaa’inaatti kabajamaa jira.   Ayyaanicharratti ergaa kan dabarsan Af-yaa’iin mana maree Federeeshiinii Aganyoo Tashaagar, Manni marichi guyyaa sabootaa,sab-lammootaa fi ummattootaa akka kabajamu yeroo murteessu sabaa fi sab-lammoonni akka wal beekan, duudhaa Aadaa fi muuxannoo gaarii isaanii akka wal-jijjiiranii fi tokkummaa Dimokiraatawaa sab-daneessummaa akka cimsaniif ta’uu ibsaniiru.   Nageenya fulla’aa, ijaarsa mootummaa biyyaa fi misoomaaf waloon akka dhaabbataniif gochuuf ta’uu dubbataniisu. Waggoottan 19n darban qindeessummaa mana maree Federeeshiitiin Naannoolee fi bulchiinsota magaalotaa adda addaatti kabajamaa turuu yaadachuun Afa-Yaa’iin kunis tokkummaa sab-daneessumma biyyoolessaarrati bu’aan akka galmaa’an dandeessisuu dubbataniiru. Keessumaa waggoottan jijiiramaa daraban tokkummaa biyyoolessaa ummataa fi duudhaa waloon jiraachuu cimsuun ijaarasa Mootummaa,misooma fulla’aa fi badhaadhina hunda galeessa saffisiisuuf qooda olaanaa gumaachuu ibsaniiru.   Guyyaan sabootaa, sab-lammootaa fi ummattootaa bara kanaa, bu’aa seenessa waloo kan ta’e Hidha Haaromsa Guddicha Itiyoophiyaa yeroo xumurametti kan kabajamu ta’uu fi pirojektoonni gurguddoon imala bayyanachuu Itiyoophiyaa dhugoomsuu dandeessisan yeroo eegalamanitti kan kabajamu ta’uun adda isa taassisa jedhaniiru. Guyyaan Sabootaa, Sab-Lammootaa fi uummattootaa 20ffaan tokkummaa sab- daneessummaan dammaqee, hedduummina Addunyaattti kan argisiisnudha kan jedhan Af-yaa’iin kun, eenyummaan hundi qixa kan itti keessummeeffamu, adeemsa sirna federaalizimii dhugaa ijaaruun keessa ta’uu keenya kan itti argisiisnudha jedhaniiru.   Bara quucaruu irraa gara bayyanachuutti, yaaddooraa gara dadammaqinaatti, dukkanaa gara Abdii ifaati, ta’uu kan argisiisnu dha jedhaniiru ergaasaanin. Guyyichi kabajamuun , wal-deeggaruun, wal-qixxummaanii fi tokkummaan jiraachuun, waadaa waloon misoomuu keenya guuyyaa itti haaromsinu ta’uu qaba jedhaniiru. Eenyummaa Itiyoophiyuummaa keenya waloo kana cimsuu fi waloooma hawaasaa baroota dheeraa akka eegametti itti fufsiisuuf seenessa hammataa sab-daneessummaa biyyoolessaa ijaaruun akka barbaachisu ibsaniiru.