Sadaasa 12/2018(TOI) Giddugaleessi Qorannoo Qonna Sinaanaa qorannoo akaakuu gara garaa 300 ol gaggeessaa jiraachuu beeksise. Giddugalichi qorannoolee haara'aa geeggessaa jiruun cinaatti isaan bara darbe gadhiifaman gosa gara garaa lafa heektaara 210 caalurratti sanyiilee ka'umsaa baay'isaa jiraachuunis ibsameera. Hojii gaggessaan Giddugalichaa Obbo Taammanaa Miidhaqsaa giddugalichi tattaffii wabii nyaataa qonnaan bulaa mirkaneessuuf taasifamaa jiru qorannoon deeggaraa jiraachuu dubbatan.   Qorannoolee akaakuu gara garaa 300 caalan bara bajatichaatti geeggeffamaa jiran agarsiiftuu carraaqqii kanaa ta'uu eeran. Qoranooleen geeggeffamaa jiran keessaa misooma midhaanii, qabeenya uumamaa, qorannoo bunaafii shaayii dabalatee adeemsa hojii saddeet jalatti geggeffamaa jiraachuus eeran. Giddugalichi qorannoolee geeggeffamaa jiran keessaa hanga xumura bara bajatichaatti isaan bu'a qabeessa ta'an 45 fayyadamtoota biraan gahuuf karoorfachuus yaadachiisan. Qorannoolee haara'aa geeggeffamaa jiraniin cinaatti sanyiilee ka'umsaa bara darbe keessa gadhiifaman akaakuu gara garaa lafa heektaara 210 irratti baay'isaa jiraachuus ibsaniiru. Sanyiileen baay'ifamaa jiranis oomishtummaa caalmaa dhibbantaa 10 olii isaan dura gadhiifamanirraa kan qaban ta'uus yaadachiisan. Giddugalichi baroottan dabran keessa akka adeemsa qorannoo midhaaniitti bu'aalee qorannoo 106 ta'an baasuun fayyadamtoota biraan gahuu kan yaadachiisan ammoo abbaa adeemsa qorannoo midhaanii fi qorataa ol'aanaa midhaan dheedhii fi dibataa Obbo Taaddalaa Taaddasaati.   Dhaabbilee seera qabeessa midhaan dheedhii fi dibataa bal'inaan baay'isuun qonnaan bulaa biraan gahurratti hojjatan wajjiin qindoominaan hojjachuuf fedhii kan qaban ta'uus yaadachiisan. Giddugalichatti qorataan dhibee midhaanii Obbo Daanyee Korraa gama isaaniitiin giddugalichi hudhaalee oomishtummaa kanneen akka aramaa, dhibee midhaani fi itti fayyadama keemikaalaa irratti qorannoo geeggessuun cinaatti leenjii hubannoo qonnaan bultootaaf kennaa jiraachuu kaasan.   Keessattuu dhibeen mataa shamsaa oomishtummaa qamadii miidhaa jiru qorannoo isaanii ijoo keessaa tokko ta'uus dubbatan. Bara 1978 kan hundaa'e Giddugaleessi Qorannoo Qonna Sinaanaa hanga ammaatti bu'aalee qorannoo akaakuu gara garaa 116 baasuun fayyadamtoota biraan gahuu odeeffannoon Giddugalichaa ni agarsiisa.

Dilbiiwwan qabeenya uumamaa fi haala mijaawaa qabnutti sirnaan fayyadamuu dhabuu irraa kan ka’e oomishaaleen gara garaa baasii olaanaan biyya alaarraa galfamaa turaniiru. Jijjiiramaan booda tarkaanfii haaraa cabiinsa dinagdee qolachuuf hojiirra oolfameen oomishaaleen biyya alaarraa galfamaa turan biyyuma keessatti misoomsuun milkaa’inootni galmaa’aa jiru. Mootummaan milkaa’inoota argaman babal’isuun galmoota misooma Baadiyaatiin qabaman wabii nyaataa mirkaneessuu, alergii guddisuu, oomishaa alaa galu biyya keessatti oomishuufi carraa hojii uumuuf hojii hojjetamaa jiruun boqonnaa haaraa saaquun danda’eera. Ergama hiyyummaa qolachuun badhaadhina amansiisaa fiduuf qabame kana galmaan ga’uufis Mootummaan Naannoo Oromiyaa damee Qonnaatiin Inisheetiiviiwwan garaagaraa 33 ol bocuun hojiitti hiike keessaa misoomni Ruuzii isa tokkodha. Misooma Ruuzii gaggeeffamaa jiruunis omisha alaa galu biyya keessatti oomishuun wabii nyaataa mirkaneessuu bira darbee alergii guddisuuf xiyyeeffannoon kennamee hojjetamaa jira. Misoomni Ruuzii bifa aadaatiin Lixa Oromiyaatti misoomaa kan ture yoo ta’u bara 2014 mootummaan labsii Beddellee labsuun hojiirra oolchee oomisha alaa galu bakka buusuuf misoomsuun eegalame. Kanaanis bara oomishaa 2013/2014 lafa hektaara kuma 16 irratti misoomsuun callaa kuntaalli kuma 800 ol argameera. Muuxxannoo argame Godinaalee Kibba Lixaafi Lixa Oromiyaatti babal’isuun bara oomishaa 2014/2015 keessa lafa hektaara Kuma 100 ol misoomsuun callaan kuntaalli mil. Afur ol kan argame yoo ta’u bara oomisha 2017/2018 lafa hektaarri miliyoona 1.28 Ruuziin misoome irraa callaa kuntaala miliyoona 58.5 argachuuf xiyyeeffannoon kennamee hojjetamaa jira. Mootummaan Naannoo Oromiyaa sanyii Ruuzii fooyya’aa oomishtummaa olaanaa argamsiisu hojiirra oolchuun ergama Ruuzii biyya keessatti oomishuuf qabame milkeessuuf misooma Ruuzii Godinaalee Oromiyaa Saddeet keessatti babal’isuun danda’ameera Golli Oromiyaa Waqtiilee Hundaa Misooma! Biiroo Kominikeeshiinii Oromiyaa Sadaasa 2018 Finfinnee

Sadaasa 12/2018(TOI )-Sagantaan maaddii guutuu Itiyoophiyaa omishtummaa qabeenya qurxummii guddisuun bu’aa qabatamaa galmeessisaa jiraachuu Ministeerri Qonnaa beeksise. Sagantaan maaddii guutuu Onkoloolessa 23 bara 2015 Ministira Muummee Dr.Abiyyi Ahimadiin Magaalaa Arbaa Minichitti eegalame qabeenya beelladaa fi qurxummii irratti jijjiiramni boonsaan akka galmaa’u taassisaa jira. Sagantichi caalaatti misooma bu’aa beelladaa Aannan, Killee, foon, Dammaa fi qabeenya qurxummii guddisuun galma misooma biyyoolessaa sadarkaa maatiitti wabii nyaataa mirkaneessuuf kaayyeffate dha. Wabii nyaataa fi sirna soorataa fooyyessu, omishtummaa beelladaa fooyyessuu , sadarkaa maatiitti nyaataan of- danda’uu , magaalaa fi baadiyaatti omishaa fi waliti hidhaminsa gabaa guddisuun carraa hojii uumuu akkasumas, galii bu’aa beelladaa kan biyya keessaan bakka buusuun kaayyoo sagantichaa isaan ijoodha. Kanaanis misooma qabeenya beelladaa fi qurxummiin fayyadamummaa qonnaan bulaa fi horsiisee bulaa fooyyessuun fedhii omisha hawaasa shammata deebisuun jijiirama qabatamaa galmeessuurratti argama.   De’eetaan ministira Qonnaa Dr.Fiqiruu Raggaasaa turtii TOI waliin taassisaniin sagantaan maaddii guutuu birmadummaa nyaataa mirkaneessuuf tattaaffii taassifamuuf qooda murteessaa bahachaa jiraachuu ibsaniiru. Omishtummaa Qaama Sagantaan maadii guutuu kan ta’e misooma qurxummii guddisuuf hojii hojjetameen bara bajataa 2018 kurmaana jalqabaatti qabeenya qurxummii toonii kuma 48 ol ta’e omishuun danda’ameera jedhaniiru. Qaama bishaanii Misooma qurxummii idilee ta’een alatti dabalataan haroo nam-tolcheen misooma qurxummii babal’isuuf hojiiwwan hojjetaman bu’aawwan quubsaan akka galmaa’an gochuu ibsaniiru.   Qabeenya Qurxummii Itiyoophiyaatti guddisuuf hojiiwwan misoomaa hojjetamaa jiran guddina omishtummaarratti milkaa’ina gaarii galmeessisuu akka danda’ame hubachiisaniiru. Kurmaana waggaatti qurxummii toonii kuma 41 omishuuf karoorfamee toonii 48 omishuun danda’’ameera kan jedhan de’eetaan ministiraa kun, yeroo ammaa omishtummaa qurxummii waggaatti dachaa sadiin guddisun danda’amuu ibsaniiru. Omishtummaa qabeenya qurxummii guddisuuf gidduu gala raabsa cuucii qurxummii idilee haaressuunii fi gidduugala dabalataa ijaaruun hojii cuucii qurxummii rabsuu hojjetamaa jiraachuu hubachiisaniiru. Misomni qurxummii sirna soorataa fayyaa qabeessa ijaaruun lammiilee carra hojii uumuu fi wabii nyaataa mirkaneessuuf qooda olaanaa gumaachaa jiraachuu ibsaniiru. Bara kana cuucii qurxummii miiliyoona 13 ol rabsuuf karoorfamee ka’umsa karoora qabameen kurmaana waggaatti cuucii qurxummii miiliyoona 2 tuqaa 3 rabsuun danda’amuu beeksisaniiru.

Sadaasa 12/2018(TOI)-Itiyoophiyaa fi Raashiyaan qonna ammayyeessuun wabii nyaataa mirkaneessuuf mari’ataniiru. Ministirri Qonnaa obbo Addisuu Araggaan dhimma hariiroo qonna ammaeessuun wabii nyaataa mirkaneessuu biyyoota lameenii irratti itti aanaa Ministira Qonnaa Raashiyaa Andireey Raaziin fi jila isaanii waliin mari’ataniiru. Qonnaan diinagdee Itiyoophiyaaf damee ijoo ta’uu hubachiisuudhaan, Itiyoophiyaan Raashiyaa waliin tattaaffii wabii nyaataa mirkaneessuuf taasiftu keessatti muuxannoo wal jijjiiruun waliin hojjechuu akka dandeessu irratti mari’ataniiru. Mariin isaanii muuxannoo waljijjiiruu fi deeggarsa teeknikaa biyyoota lameenii irratti kan xiyyeeffate ta’uu ibsaniiru. Itiyoophiyaan wabii nyaataa mirkaneessuuf tattaaffii taasisaa jirtuuf deeggarsa teeknikaa olaanaa taasisuu fi waliigaltee biyyoota lameenii irratti waliin hojjechuuf walii mallatteessuuf waliigaluu isaanii marii kanarratti ibsameera. Keessumaa sanyii midhaan fooyya’aa irratti waliin hojjechuuf walii galuu fi cuunfaa zayitaaf kan oolu, biqilaa suufii itti fayyadamuuf haala dandeessisu irratti marii’atameera. Kunis Itiyoophiyaan zayita nyaataan of danda’uuf tattaaffii taasisaa jirtu dachaan kan dabalu ta’uu himameera. Karaa biraan biyyoonni lamaan karaa damee dhuunfaatiin qorannoo qonnaa fi saayinsii irratti invast gochuu, akkasumas damee qorannoo qonnaa keessatti carraa barnootaa mijeessuu irratti waliigalaniiru. Raashiyaan akkamiin wabii nyaataan akka of dandeesse muuxannoo ishee Itiyoophiyaaf akka qooddus walii galameera. Konfiraansiin idil-addunyaa biyyoota Afrikaa keessatti wabii nyaataa mirkaneessuuf kaayyeffate, Federeeshinii Raashiyaatiin qophaa’e kaleessa magaalaa Finfinneetti akka gaggeeffame ni yaadatama. Waltajjiin kun tumsa naannoo cimsuu, sirna qonnaa itti fufiinsa qabuu fi haala qilleensaa dandamatu dagaagsuu, biyyoonni Afrikaa ofuma isaaniitiin wabii nyaataa akka galmaan ga’an dandeessisuu akka ta’es ibsameera.

Sadaasa 12/2018(TOI)-Guyyaan ayyaana kabaja Saboota,Sablammootaa fi Ummatoota Itiyoophiyaa tokkummaa sabdaneessummaa cimsuun, badhaadhina biyyaaf shoora olaanaa bahachaa jiaraachuu Af-yaa’iin Mana Mare magaalaa Finfinnee Buzeenaa Alkadiir ibsani. Waltajjiin marii hawaasaa qaama kabaja guyyaa saboota, sablammootaa fi uummatoota Itiyoophiyaa 20ffaa ta'e, magaalaa Finfinneetti gaggeeffamaa jiru, irratti bakka bu'oonni Bulchiinsa Magaalaa Finfinneefi bakka bu’oonni naannolee irraa dhufan hirmaataa jiru. Af-yaa’iin Mana Maree Magaalaa Finfinnee,Buzeenaa Alkadir haasaa waltajjicharratti taasisaniin, guyyaan kun hariiroo walii gabbisuu fi wal baruu, akkasumas bu’aa misoomaa sadarkaa biyyaatti galmaa’aa jiru ilaaluuf gumaacha guddaa akka qabu ibsaniiru. Waltajjiin marii kun kan qophaa’e, hariiroo hawaasaa fi uummataa bu’aa qabatamaa mul’ata badhaadhinaa ilaaluu fi muuxannoo wal jijjiiruuf kan qophaa’e ta’uu ibsaniiru. Waggoota jijjiiramaa darban keessatti biyyittiin gama hawaasummaa, diinagdee fi siyaasaan guddina ajaa’ibsiisaa galmeessisaa jirti jedhan. Biyyi keenya wabii nyaataan of danda’uuf adeemsa jalqabdee hojjechaa jirtu bu’a qabeessa ta’uu kaasaniiru. Bara kana yeroo abdiin guddinaa keenyaa sadarkaa olaanaa irra jiru, magaalaa Finfinneetti guyyaa kana waliin kabajuun injifannoo irratti gammachuu qooddachuu qofa osoo hin taane, abdii egeree galmaan ga’uuf qormaata ogummaadhaan injifachuuf yerootti waadaa galamu akka ta’e cimsanii dubbataniiru. Misoomni hunda galeessa milkaa’uu kan danda’u, tattaaffii mootummaan qofa osoo hin taanee hirmaannaa uummataatiin, tattaaffii waloo akka barbaadu Af-yaa’iin kuni hubachiisaniiru. Nageenya waaraa fi Itiyoophiyaa badhaate dhaloota egereef dabarsuu keessatti lammiileen hundi gumaacha barbaachisaa gochuun akka irraa eegamu cimsanii dubbataniiru.