Guraandhala 28/2018 (ENA)- Paartii biyyaa fi ummataaf ni hojjeta jennu filachuuf kaardii filannoo fudhachaa jirra jedhdhan jiraattonni Samaraa Loogiyaatti kaardii filannoo fudhatan. Akkaataa sagantaa boordii filannoo biyyaalessaa Itiyoophiyaatiin har’a Guraandhala 28 bara 2018 irraa eegalee galmeen filattootaa buufataalee filannootti eegalameera. Riippoortarri ENA buufataalee filannoo Samaraa Loogiyaa irraa jiraattota kaardii filannoo osoo fudhatanii arge dubbiseera. Jirattonni yaada kennan paartii biyyaa fi ummata fayyada jennu filachuuf kaardii filannoo fudhachaa jirra jedhaniiru. Adeemsa filannoo Kanaan mirga demokiraasii fayyadamuun kan danda’amu kaardii filannoo fudhachuun ta’uu kaasanii, kanaaf ammoo yeroo osoo hin fudhatiin guyyaa jalqabaa fudhanneerra jedhan. Jiraattota magaalichaa buufataalee filannootti dubbifne keessaa Afki’ee Alii, Mahaammad Yaayyee fi dargaggoo Habiib Mahaammad paartii biyya gaggeessuu fi ummata fayyadu filachuuf kaardii fudhanneerra, ittis gammanneerra jedhaniiru. Boordii filannoo biyyaalessaa Itiyoophiyaa waajjira qindeessaa bordii filannoo naannoo Affaaritti hogganaan kutaa filannoo Dubtii Ibraahim Abdallaa, kutaa filannoo kanatti buufataaleen filannoo 124 qophaa’anii keessummeessuu eegalaniiru jedhaniiru. Walumaa gala buufataalee filannoo kana keessatti filannoo kan raawwachiisan 496 filattoota keessummeessuuf har’aa eegalee qophii ga’aarra jiraachuu mirkaneessaniiru.

Guraandhala 28/2018 (ENA)- Naannoo Oromiyaa bakkeewwan garagaraatti buufataalee filannootti argamuun kaardii filannoo fudhachuu eegalaniiru Akkaataa sagantaa filannoo walii galaa toorbaffaa boordii filannoo biyyaalessaa Itiyoophiyaatiin galmeen filattootaa har’a Guraandhala 28 bara 2018 eegaleera. Akkaataa Kanaan naannoo Oromiyaa bakkeewwan garagaraa galmeen filattootaa itti eegalame keessaa godinni Harargee Lixaa Ciroo, Boorana Bahaa magaalaan Nagallee, Wallaggi bahaa magaalaan Naqamtee ni eeramu. Magaalaa Cirootti jiraataan ganda Burqaa Ciroo Kadir Sayid ENAtti akka himanitti, filannoo kanaan nama guddinaa fi badhaadhina Itiyoophiyaan eegalte galmaan gahu filachuuf qophaa’aniiru. Mirga demokiraasii fayyadamuun dorgomaa bakka na bu’a jedhan filachuuf galmaa’uusaanii kan dubbatan ammoo magaalichatti jiraataa ganda Caffee Araaraa Mahaammad Hasani. ''Filannoowwan darban keessaa 4 irratti hirmaadheera” jedhanii filannoon baranaa imala guddina biyyaa si’achiisuuf murteessaa wan ta’eef xiyyeeffannoon hirmaachuuf qophaa’uusaanii ibsaniiru. Godina Boorana Bahaatti jiraattuun magaalaa Nagallee Booranaa adde Galiilaa Fiqaaduu, buufata filannoo Kahaloo Gaaftirootti argamuun kaardii filannoo fudhataniiru. Filannoo biyyaalessaa Caamsaa dhufu gaggeeffamurratti dorgomaa Paartii walooma, nagaa, misoomaa fi guddina biyyaaf hojjeta jettu filachuuf kaardii fudhachuu dubbatteetti. Hundi kaardii filannoo fudhachuun filannoo biyyaalessaarratti hirmaachuun paartii barbaadu akka filatu gorsiteetti. Godina Wallagga Bahaa magaalaa Naqamtee jiraataan ganda Burqaa Jaatoo obbo Fayyisaa Cimdeessaa, filannoo walii galaa Kanaan mirga demokiraasiitti fayyadamuuf kaardii filannoo fudhachuusaanii dubbataniiru. Kanneen biroos paartii siyaasaa biyyaa fi ummata caalaatti fayyadu filachuu akka danda’an sagantaa bahetti fayyadamuun kaardii akka fudhatan gorsaniiru.

Guraandhala 27/2018 (ENA): Filannoo waliigalaa 7ffaa bara kana gaggeeffamu irratti dammaqinaan hirmaachuuf kan nu dandeessisu kaardii galmee filattootaa fudhachuuf qophoofneerra jedhani jiraattonni Naannoo Oromiyaa Godina Iluu Abbaa Booraa. Boordiin Filannoo Biyyaalessaa Itiyoophiyaa filannoon Caamsaa 24, 2018 dhufu dimokiraatawaa, nagaa fi hirmaachisaa akka ta’uuf sagantaalee adda addaa irratti hojjechaa jira. Qophii taasifamaa jiru keessaa galmeen filattootaa Boru, Guraandhala 28/2018 eegalama.   Boordichi dhiheenya kana galmee filannoo dijitaalaa buufataalee filannoo gara kuma 17tti akka dhaqqabamu gochuuf hojjechaa jiraachuu beeksiseera. Jiraattonni Godina Iluu Abbaa Booraa aanaa Hurrumuu ENA'tti akka himanitti, filannoo waliigalaa dhufu irratti mirga dimokiraasii keenyatti fayyadamuuf kaardii filannoo argachuuf eeggachaa akka jiran dubbatani   Jiraattonni aanaa Mattuu Zimaarguu Jamaal fi Naahawwii Daffaar gama isaaniitiin akka filattotaatti galmaa'uun mirga isaaniitti fayyadamuuf qophii taasisaa jirra jedhani. Filannoon kun ijaarsa naannichaa keessatti sadarkaa murteessaa waan ta’eef dirqama lammummaa itti gaafatamummaan bahachuuf qophii ta’uu kan hime dargaggeessi jiraataa magaalaa Mattuu Fiqaaduu Indaalaa dha.   Dargaggoo Fedhasaa Taarraqanyii fi Girmaa Firrisaa gama isaaniitiin akka ibsanitti, Filannoon waliigalaa dimokiraatawaa, haqa qabeessa, nagaa fi hirmaachisaa akka ta’uuf akka dargaggootaatti gahee keenya ba’uuf qophiidha jedhani.   Ijaarsa naannichaa keessatti gaheen dubartootaa fi dargaggoonni qaban hiika guddaa akka qabu hubachuun kaardii filannoo argachuu fi eenyu akka isaan bakka bu’u filachuuf qophii ta’uu himaniiru.   Dhaaba damee siyaasaa, dinagdee fi hawaasummaa keessatti nu fayyada jennee yaadnu filachuuf qophoofneerra jedhani.

Guraandhala 27/2018(ENA)- Filannoo walii galaa 7ffaa irratti dammaqinaan hirmaachuun paartii guddina biyyaa fi ummattootaaf hojjeta jedhan filachuuf qophaa’uusaanii jiraattonni magaalaa Jijgjigaa ibsan. Boordiin filannoo biyyaalessaa Itiyoophiyaa filannoo walii galaa baranaaf boru Guraandhala 28 bara 2018 irraa kaasee filattoota galmeessuu akka eegalu beeksisuunsaa ni yaadadama. Filannoo walii galaa 7ffaa Caamsaa 24 bara 2028 gaggeeffamuuf sagalee kennuuf kaardii fudhachuuf qophaa’uusaanii jiraattonni magaalaa Jigjigaa yaadasaanii ENA’f kennan ibsaniiru. Paartii siyaasaa biyyaa fi ummataaf ni hojjeta jedhan filachuuf qophii ta’uu beeksisaniiru. Kanneen yaada kennan keessaa obbo Jamaal Ibraahiim, filannoon wagga shanitti si’a tokko gaggeeffamu lammiileen paartii biyyaa fi ummataaf ni hojjeta jedhan filachuuf carraa kan mijeessu ta’uu dubbataniiru. Jiraataan biraan Mahaammad Umar gamasaaniin, filannoon walii galaa kun ijaarsa sirna demokiraasii si’oomsuu fi sirna murteessaa guddina biyyaaf gargaaru ta’uu ibsaniiru. Paartii siyaasaa biyyaaf ni fayyada jedhan filachuuf qophii ta’uusaaniis dubbataniiru. Lammiileen filannoof qaqqaban filannoo kanarratti dammaqinaan akka hirmaatan dabalanii dubbataniiru. Filannoon agarsiiftuu ijaarsa sirna demokiraasii biyya tokkooti kan jedhan ammo obbo Farihaan Muhaammad kan jedhamanidha. Kaardii fudhachuudhaan paartii siyaasaa guddina biyyaaf ni hojjeta jedhan filachuun mirga demokiraasiisaaniitti akka fayyadaman dubbataniiru. Filannoo kanarratti hirmaachuuf kaardii fudhachuuf qophaa’uusaanii ibsaniiru.

Guraandhala 27/2018(ENA): Dhalattoonni Tigraay magaalota Hararii fi Asoosaa keessa jiraatan garee diigumsaaf kan dhaabbate ABUT balaaleffachuun nageenyaa fi misooma Tigraayiif gahee keenya ni baana jedhan. Ministirri Muummee Dr. Abiyyi Ahimad tibbana ENA Afaan Tigreetiin haasaa taasisaniin, ummanni Tigraay nagaa fi misoomaaf qabsaa'ee nagaa fi misoomaaf fedhii guddaa akka qabu ibsaniiru. Misoomni fi nageenyi naannolee hunda keessatti dhufaa jirus ummata Tigraayiif kan malu dha kan jedhan Ministirri Muummee Dr. Abiyyi Ahimad, yaada dulloomaa kan qabu gareen kuni ammas waraanaa fi dhumaatii biroof dhalattoota Tigraay affeeraa jira waan ta’eef dhiisi jedhamuu qaba jechuun isaanii ni yaadatama. Dhimma kana irratti ENA’n dhalattoota Tigraay magaalota Hararii fi Asoosaa keessa jiraatan dubbiseen, gareen ABUT garee diigumsaa fi karoora waraanaa malee nagaa fi misooma ummataaf hojjechuu hin barbaanne ta’uu ibsaniiru. Ministirri Muummee Dr. Abiyyi Ahimad akeeka badii garee kanaa fi fedhii ummanni nagaa fi misoomaaf qabu ilaalchisee ibsi kennan sirrii fi waqtaawaa ta’uu ibsaniiru. Kanaaf yaada Ministira Muummee deeggaruun garee diigumsaaf dhaabbate falmuun nagaa fi misooma Tigraayiif gahee keenya ni baana jedhan.   Aadde Giyoorgis Haagos jiraattuu magaalaa Hararii kan ta’an akka himanitti, gareen diigumsaa kun ummata Tigraayiif nagaa fi misoomaaf hojjetee hin beeku jedhani. Mootummaa Shaabiyaa waliin nagaa fi misooma Itiyoophiyaa hin barbaanne waliin ijaaramuun naannicha gara naannoo waraanaatti jijjiiruuf hojjechaa jiraachuu ibsuun, akeeka badii kana cimsinee ni falmina jedhan.   Ilaalchi garee ABUT kan kan yeroon irra darbee fi eenyu iyyuu kan hin fayyadne ta’uu ibsuun, ummanni Tigraay akkuma naannolee biroo amma ilaalcha haaraa fi dhaloota haaraatiin hoogganamuu cimsee hawwa jedhan obbo Goytom Bayyanaa jiraataa magaalaa Asoosaa kan ta’an. Kanaaf, ilaalcha garee ABUT yeroon isaa irra darbe ofirraa qolachuun nagaa, misoomaa fi fayyadamummaa naannichaaf ni hojjenna jedhaniiru.   Magaalaa Harar kan jiraatan Sheenook Leelaay gama isaaniin,ergaan Ministirri Muummee Dr. Abiyyi Ahimad dabarsan nagaa fi misooma biyyaatiif bu'aa qaba waan ta’eef hundi keenya ni deeggarra jedhan.   Dargaggeessi biraa Kibroom Gabramadin magaalaa Asoosaa jiraatu akka himetti, ummanni Tigraay jijjiiramaa fi karoora misoomaa hunda galeessa Itiyoophiyaatti dhufe irraa fayyadamoo ta’uuf fedhii cimaa qaba jedhe. Kana galmaan ga’uuf garee diigumsaa ABUT kan walitti bu’iinsaa fi waraanaaf hojjatu waliin ta’uun qolachuun kan danda’amu ta’uu ibsuun, kanaafis keessumaa dargaggoonni keenya gufuulee isaan mudatan akka mo’atan gargaaruuf ni hojjenna jedhaniiru.   Dargaggoo Saamu’eel Mallasaa fi shamarree Fireehiwoot Biraanee jiraattota magaalaa Harar akka jedhanitti, yeroo ammaa dargaggoonni Tigraay waraana gareen ABUT labsaa jiru jalaa godaansaa jiru, garuu godaanuun furmaata waan hin fidneef waliin taanee ummata Tigraayiif nagaa, misoomaa fi badhaadhina fiduuf ni hojjenna.

Guraandhala 27/2018(ENA) -Ummani Naannoo Tigraay fayyadamummaa nageenyaa fi misoomasaanii mirkaneeffachuuf, garee badii ABUT irratti ejjennoon qabsaa'uu qaba jechuun Hayyoonni Yunivarsitii ENA’f yaada kennan ibsan. Ministirri Muummee doktar Abiyyi Ahimad turtii guyyoota muraaasaan dura ENA Afaan Tigiriffaa waliin taasisaniin ummanni Tigraay Nagaa fi misoomaaf kan qabsaa’e ta’uu kaasuun, fedhii nageenyaa fi misoomaasaa guddaa ta’uu ibsaniiru. Lolli Kaabaa kan Mudateef ABUT jijjiiramicha fudhachuu diduusaanii fi sababa ilaalcha moofaa itti fufsiisuu barbaadeef ta’uu Ministirri Muummee doktar Abiyyi Ahimad dubbataniiru. Misoomaa fi nageenya naannolee hundatti dhufaa jiru ummata Tigraayiifis ni mala kan jedhan Ministirri Muummee Doktar Abiyyi, ilaalcha dulloomaan Lola lammataa fi badiif kan tattaafatu gareen ABUT, dhaabaa jedhamuu qabu. Mootummaan fedhii ummataa bu’uura godhatee deeggaruuf qophii ta’uu mirkaneessaniiru. Dhimma kanarratti Hayyoonni Yunvarsiitii Asoosaa, Arsii fi Walaayittaa Sooddoo ENA’f yaada kennan dheebuu Nageenyaa Ummata naannichaa fi garee ABUT badiif socho’u ilaalchisuun ibsi Ministirri Muummee Kennan ergaa murteessaan kan itti darbe ta’uu ibsaniiru. Ummanni Tigraay fayyadamummaa nageenyaa fi Misoomaasaa mirkaneeffachuuf garee badii ABUT irratti ejjennoon qabsaa’uu qabu jechuun dubbataniiru. Yunvarsiitii Asoosaatti Barsiisaan Federaalizimii gargaaraan piroofeesaraa Addaamuu Jibaat, ibsa Ministirri Muummee kennan Ummanni Tigraay nageenyaa fi misoomaaf kan qabsaa’e ta’uu kaasuun, gareen ABUT faallaa Kanaan walitti bu’insaa fi waraanaaf qophii qabu kan gidduu galeeffate ta’uu ibsaniiru. Mootummaan Federaalaa garaa bal’ina agarsiise fedhii nageenyaa barbaadhuu ummata Tigraay hubachuun akkasumas, hammeenya waraanaa beekuun ta’uusaa ibsaniiru. Qorataa Seenaa fi Aadaa akkasumas Barsiisaa Yunivarsitii Arsii kan ta'an Doktar Muhammad Namoo, ummanni Tigraay balballi nagaa baname akka hin cufamneef, garee badii waraanaaf kakaasu cimsee mormuu fi qabsaa'uu qaba jedhaniiru. Ibsi Ministira Muummee doktar Abiyyi Ahimad kaayyoo hammeenyaa garee ABUT kan saaxilee fi mirga nagaa, misoomaa akkasumas fayyadamummaa ummataa bu'uura kan godhate ta'uusaa kaasaniiru. Yuniversitii Walaayittaa Soddotti Barsiisaa fi qorataa seenaa kutaa Barnoota Seenaa kan ta'an Phawuloos Baalchaa; ibsi Ministira Muummee ejjennoo cimaa mootummaan nagaa fi misoomaaf qabu kan agarsiisedha jedhaniiru. Ergaan isaan dhiheenya kana ummata Tigraayiif dabarsan, tattaaffii qabatamaa mootummaan fayyadamummaa nagaa fi misoomaa ummata naannichaaf taasisaa jiru kan agarsiisudha jedhaniiru. Kanaaf, ummanni Tigraay keessattuu dargaggoonni waraana mormuudhaan, nagaa fi misoomaaf carraaquun tattaaffii mootummaa deeggaruu fi gargaaruu akka qaban hubachiisaniiru. Ministirri Muummee ergaa isaaniitiin dargaggoonni Tigraay abbaa aangoo akka ta'anii fi qaamolee ilaalcha moofaan gara waraanaatti isaan dhiibanirraa of eeggachuu akka qaban gorsuun isaanii ni yaadatama.

Guraandhala 26/2018(ENA)-Injifannoon Kaaraamaarraa, Itiyoophiyaanonni rakkoo keessoo keessa utuu jiraniiyyuu, weerara biyya isaanii irratti banamu tokkummaan akka qolatan Addunyaatti kan itti Mul’isan injifannoo seena qabeessa ta’uun ibsameera.   Guyyaan Injifannoo Kaaraamaarraa 48ffaan mataduree “Injifannoo Kaaraamaarraa irratti arganne Galaana Diimaarratti ni dabalama” jedhuun kabajameera. Ministirri Raayyaa Ittisa biyyaa duraanii Leetenaal Jeneraal Addis Tadilaa wayita sana akka jedhanitti, Injifannoon Kaaraamaarraa mallattoo “Adwaa lammaffaa”ilmaan Itiyoophiyaa birmadummaa biyya isaanii kabachiisaniidha jedhaniiru.   Itiyoophiyaanonni rakkoo keessoo qabatanis haleellaa biyyarratti raawwatamu kamiyyuu waloon akka qolatan addunyaaf kan ragaa bahan ta’uu hubachiisaniiru. Dhaloonni ammaa misooma fi faayidaa biyyaalessaa kabachiisuurratti qophaa’oo ta’uusaaniin akka boonan ibsuusaanii Odeeffannoon onlaayinii Miidiyaa Raayya Ittisaa irraa aragame ni mul’isa. Itiyoophiyaatti Ambaasaaddarri Kuubaa Viilmaa Toomaas gamasaaniin, injifannoon kaarramaarraa Itiyoophiyaa fi kuubaa gidduutti hariiroo yeroo dheeraa ture caalaatti kan cimse ta’uu eeraniiru.  

Guraandhala 26/2018(ENA) -Riifoormiin dhaabbiilee Dimokiraasii dandeettii bulchiinsa Boordii filannoo biyaalessaa Itiyoophiyaa guddisuun dorgommiin siyaasaa Fayyaalessi akka uumamu gochaa jiraachuu Ministirri haqaa Haannaa Ari’ayasillaasee ibsan. Filannoon waligalaa 7ffaarratti gochaalee seera filannoo fi seera yakkaa waliin walfaallessan raawwatamaniif deebii ariifachiisaa kennuuf qophiin dandeessisu taasifamuu beeksisaniiru. Boordiin Filannoo biyyaalessaa Itiyoophiyaa Caamsaa 24 bara 2018 filannoo walii galaa 7ffaa raawwachuuf hojjechaa jiraachuu ibseera. Kanaanis Boordichi Paartiilee Siyaasaa beekamtii argatanii galmaa’an filannicharratti dorgomuuf mallattoo filannoo fi kaayyoosaanii beeksifachaa jiru. Ministirri haqaa Haannaa Ari’ayasillaasee turtii ENA waliin taasisaaniin akka ibsanitti, Boordiin filaannoo tarkaanfiiwwan riifoormii milkaa’ina qabu dhaabbileee dimokiraasii gaggeessan keessaa tokko ta’uu ibsaniiru. Jijiiramni bu’uuraa boordii filannootti gaggeeffame filannichi bilisa, haqa qabeessaa fi dimokiraatawaa akka ta’uuf haala mijataa uumuun sirna dimokiraasiif qooda murteessaa akka bahuuf taasisuu ibsaniiru. Boordiin filannoo biyyaalessaa fooyya’insa seeraa taasisee fi muudama hoggansaa gaggeesseen paartiilee siyaasaa gidduutti walabummaan wal-morkiin Siyaasaa fayyaalessaa uumuun jijiirama murteessaa fiduusaa dubbataniiru. Muuxannoowwan filannoo walii galaa marsaa 6ffaarraa argamee Qindeessuun Filannoo biyyaalessaa caamsaa 24 bara 2018 gaggeeffamu irratti dabaluuf qophiin taasifamaa jiraachuu ibsaniiru. Gama Mootummaatiin adeemsi filannichaa Bilisa, haqa qabeessaa fi loogii kan hin qabne ta’uusaa mirkaneessuuf boordii filannoo, paartiilee dorgomtootaa fi Dhaabbiilee Hawaasa Siviliitiif deeggarsa barbaachisaan taasifamaa akka jiru dubbataniiru. Filannoon walii galaa 7ffaa bilisa, haqa qabeessaa fi dimokitaarawaa akka ta’uuf paartiileen siyaasaa dorgomtootaa, dhaabbileen Hawaasa siivilii fi qaamoleen qooda fudhattoonni itti gaafatmummaa guddaan hojjechuu akka qaban hubachisaniiru. Filannoon waliigalaa bara kanaa Itiyoophiyaa keessatti aadaa dimookiraasii fooyya'aa ijaaruu haala mijataa uumuun faayidaa guddaa akka qabaatu ibsaniiru. Ministeerri Haqaa fi dhaabbileen itti waamaman filannoon walii galaa 7ffaan bilisa, haqa qabeessaa fi loogiirra bilisa akka ta’uuf qophii barbaachisaan taassifamuu dubbataniiru.