Bitootessa 22/2018 (ENA): Sirni filannoo Meeshaa ijaarsa aadaa dimookiraasii qabatamaan abbummaa Aangoo uummataa mirkaneessu ta’uu Paartiileen Siyaasaa ibsan. Akka sagantaa yeroo Boordii Filannoo Biyyaalessa Itoophiyaatti, filannoo waliigalaa baranaa kan sagaleen itti kennamu Caamsaa 24 bara 2018 keessatti, galmeen filattootaa Guraandhala 28 bara 2018 irraa eegalee adeemsifamaa jira. Kanaanis appilikeeshinii “Mircaayeenii” fi buufatalee filannootti argamuun hanga Bitootessa 18 bara 2018tti walii gala filattoonni miiliyoona 28 ol galmaa’uusaanii boordichi beeksiseera. Filannoo waliigalaa 7ffaa kanaan Paartilee Siyaasaa Morkattootaa dorgoman 47 ta’an kaadhimamtoota kuma 10 fi 934galmeessisuun,filannoowwan Miidiyaatti fayyadamanii imaammatasaanii uummata beeksisaa jiru. paartileen siyaasaa dorgomtoonni Adeemsa filannoo ilaalchisuun (ENA) waliin turtii taasisaniin,filannoo waliigalaa 7ffaa kana irratti dorgomtoota dammaqoo ta'uuf qophii taasisaa jiraachuu ibsaniiru. Pireezidantiin Paartii Dhaloota Haaraa fi Walitti qabaan Mana Maree Waliinii Paartilee Siyaasaa Naannoo Oromiyaa Obbo SalamoonTafasaa,filannoon adeemsa Dimookiraasii Abbummaan Aangoo Uummataa itti mirkanaa'u dha jedhaniiru. Boordiin Filannoo Biyyaalessa Itiyoophiyaas galmee kaadhimamtootaa fi filattoota filannoo walii galaa 7ffaa Sirna Dijiitaalaa dabalatee gaggeessuun, haala filannoo dandeessisu uumuusaa ibseera. Kanaafis, filannoo waliigalaa Baatii Caamsaatti gaggeeffamu kanaaf dimookiraasummaasaa eegsisuuf qophii dursa barbaachisu xumuruun adeemsichatti hirmaannaa ho’aa taasisaa jiraachuu isaanii dubbataniiru. Itti gaafatamaan waajjira Paartii Dimookiraasii Uummata Qucaa Baandiraa Balachoo gamasaaniitiin,Jijjiiramnibiyyaalessa Itiyoophiyaa sirna hedduumina paartiileef dorgommii mijataa fi hirmaachisaa ta'e uumuusaa kaasaniiru.   Kanaanis, filannoo waliigalaa 7ffaa irratti dorgommii olaantummaa yaadaa irratti hundaa'e taasisuun, ijaarsa Sirna Dimookiraasiitiif gahee ijaaraa gamasaanii akka bahatan mirkaneessaniiru. Barreessaa fi Itti gaafatamaan Quunnamtii Uummataa Paartii Dimokiraatawaa Itiyoophiyaa Tokkoo barsiisaa Salamoon Aniibaal; jijjiiramni biyyaalessa Itiyoophiyaa hundeeffama paartiisaaniitiif dirree siyaasaa bal'aa uumuusaa ibsaniiru.   Filannoon waliigalaa torbaffaan Abbummaa Aangoo Uummataa mirkaneessuun, ce’umsa siyaasaa qaroome taasisuuf waltajjii murteessaa ta’uusaa dubbataniiru. Sirni filannoo meeshaa Ijaarsa Aadaa Dimookiraasii Abbummaa Aangoo uummataa mirkaneessudha kan jedhan itti gaafatamaan kun, adeemsa filannoo keessatti faayidaa biyyaalessaa fi tokkummaa uummataatiif xiyyeeffannoon kennamuu qaba jedhaniiru. Waltajjiiwwan falmii Miidiyaaleen qopheessan filannoowwan Imaammataa paartilee uummata waliin walitti fiduun, shaakala dimookiraasii dhalootaaf darbu gumaachaa jiraachuu ibsaniiru. Paartileen Siyaasaa waltajjiwwan falmii miidiyaalee yaadaa , Imaammataa bilchaataa uummataa fi biyya ceessisu dhiheessuun itti fayyadamuu qabna jedhaniiru.

Bitootessa 21/2018 (ENA): Itiyoophiyaan Yaa’ii 11ffaa dhaabbilee haggantoota biyyoota Afrikaa, Kaaribiyaanii fi Paasifikii irratti dammaqinaan hirmaachuu ishee biyyoota Beenluuksittii fi dhaabbata mootummoota gamtoomaniitti argamaa addaa FDRI, ambaasaaddar Isheetee Xilahuun ibsani. Yaa'iin 11ffaan dhaabbile hoggantoota biyyoota Afrikaa, Kaaribiyaanii fi Paasifik mata duree "kan jijjiiramee fi haarome Yaa'ii dhaabbilee hoggantoota biyyoota Afrikaa, Kaaribiyaanii fi Paasifik Addunyaa Qormaanni itti hedduummate " mata duree jedhuun Bitootessa 19 fi 20, 2018 Ikuwaatooriyaal Giinii Maalabootti gaggeeffameera. Konfiraansii kana irratti argamuun haasaa kan taasisan pireezdaanti Taayyee Asqasillaaseen, dhaabbatichi dinagdee fi siyaasa addunyaa jijjiiramaa jiru keessatti dantaa biyyoota miseensa isaa eegu jaarmiyaa cimaa ta’ee itti fufuu akka qabu cimsanii dubbataniiru. Ambaassaaddar Isheetuun yaada piresidaanti kennan yaada ijaarsaa fi biyyoota miseensaa sana fayyadu ta’uu himaniiru. Biyyi kamuu qophaa ishee dhaabbachuu hin dandeessu kan jedhan ambaassaaddarri kuni, dantaa biyyaalessaa biyya keenyaa fayyaduu kan danda’urratti biyyoota biroo waliin hojjechuun barbaachisaa dha jedhani.

Bitootessa 21/2018 (ENA): Hojiin dhaabbilee utubaa ijaarsa mootummaa ta’an ijaaruu fi gurmeessuu kutannoo addaatiin raawwatamuusaa Tajaajilli Komunikeeshinii Mootummaa beeksise. Tajaajilli Komunikeeshinii Mootummaa Rippabiliika Dimokiraatawaa Federaalawaa Itiyoophiyaa (FDRE) ibsa mata duree Jijjiirama Siyaasaa hunda hirmaachisaa Bu'uura Biyyoolessaa Cimaaf jedhu baaseera. Barreeffamni guutuun Tajaajila Komunikeeshinii Mootummaa akka armaan gadiitti dhiyaateera: Jijjiirama Siyaasaa hirmaachisaa Bu'uura Biyyaalessaa Cimaaf Mootummaan Rippabiliika Dimookiraatawaa Federaalawaa Itiyoophiyaa biyyi keenya rakkoo siyaasaa hundee gadi fageeffate keessa turte irraa gara sirna dimokiraatawaa guutuutti ceesisuuf galmoota tarsiimoo kaa’e ciminaa fi milkaa’ina guddaadhaan hojiirra oolcheera. Ce’umsi seena qabeessi kuni milkaa’inni inni guddaan seeneffama siyaasaa namoota adda qoodu ture jaarraa hedduuf Itiyoophiyaa rakkisee ture cabsuun tokkummaa biyyaalessaa lammiin kamuu fi naannoon hundi aangoo fi qabeenya wal qixa horachuu danda'u ijaaruudha. Jijjiiramni kun injifannoo bu’uuraa Itiyoophiyaan qe’ee namoota muraasaa osoo hin taane kan hunda keenyaa ta’uu qabatamaan mirkaneesseedha. Injifannoowwan ijaarsa seeneffama waloo kan nagaa waaraa fi birmadummaa sabaa mirkaneessuuf dhaloota gidduutti riqicha ta’ee tajaajilu keessatti galmaa’an bu’aa siyaasaa guddaa mootummaa ce’umsaa ti. Seenaawwan ala ta’an jaarraa hedduuf waldhabdee keessatti wal-xaxaa turan diigamanii, bakka isaaniitti seeneffama waloo seenaa fi hambaa hunda keenyaa yaadatu qabatamaan guddateera. Haala kanaan Yaadannoo Injifannoo Adwaa, Hidhi Haaromsaa Guddichii fi bakkeewwan turizimii gurguddoon Sagantaa Maaddii Shaggar,Maaddii Biyyaa fi Maaddiin Dhaloota irratti ijaaraman boonsaa sabaa waliin qabnu guddiseera. Godaannisa darbe yaaluun fayyisuu; adda addummaa miidhaginaan hammachuudhaan Waltajjii Marii Biyyaalessaa itti fufee jir; suuta suutaan Mariin biyyaalessaa shakkii fi qoqqoodinsa jiru gara 'obbolummaa fi badhaadhina waloo' mirkanaa'etti akka ceesisuuf hojiin hojjetamaa jira. Hojiin dhaabbilee utubaa ijaarsa mootummaa ta’an ijaaruu fi gurmeessuu kutannoo addaatiin hojjetamaa tureera. Keessattuu haaromsi dhaabbilee nageenyaa, haqaa fi dimokiraasii ummataa fi seera qofaaf akka bitaman taasifame jijjiirama qabatamaa bu’uuraa fideera. Haaluma kanaan dhaabbileen dimokiraatawaa kanneen akka Boordii Filannoo fi Komishiniin Mirga Namoomaa hoggansa walabaa jalatti hundeeffamuun, dhaabbileen ittisaa fi nageenyaa aangoo biyyaalessaa isaaniitiin ala gidduu seenummaa siyaasaa kamirraayyuu bilisoomsuun, sirna haqaa walaba ta’ee akka hojjetu diriirsuun fakkeenyota haaromsa dhaabbilee keenyaati. Jijjiiramni siyaasaa bu’uurraa jijjiirame kuni, tasgabbii keessoo fi waliigaltee biyyaalessaa irratti hundaa’e Itiyoophiyaan balaa jiraachuu ishee mudate akka mo’attu taasiseera. Bilchina siyaasaa fi cimina hooggansaatiin dandeettii birmadummaa keenya kabachiisuuf qabnu guddifachuun dandeettii imaammata mootummaan raawwachuu agarsiisuu qofa osoo hin taane, biyyattii sadarkaa guddinaa fooyya’aa ta’etti ceesiseera. Injifannoowwan siyaasaa kunniin bu’aa kallattiin nagaa walqabataa keessoo keessatti argame, bal’ina iddoo siyaasaa fi dhaabbilee cimsuu irraa kan ka’e yoo ta’u, imala biyyi keenya gara badhaadhinaatti taasiftuuf bu’uura kaa’aa jiru. Walumaagalatti, guddinni siyaasaa kunniinii fi bu’aan dadhabbii kunniin Itiyoophiyaa gara muuxannoo dimokiraasii haaraa fi fooyya’aa ta’etti ceesiseera. Guddinni hirmaannaa paartilee morkattootaa, fudhatamummaa mootummaan uummata biratti qabu guddachaa dhufuu isaaf agarsiiftuu waan ta’eef, kuni immoo milkaa’ina tattaaffii haaromsaa imala keenya gara badhaadhinaatti taasifnuuf wabii amanamaa dha. Mootummaan daandii dimokiraasii fi badhaadhina kana cimsee itti fufuun itti gaafatamummaa seena qabeessa Itiyoophiyaa badhaatuu fi birmadummaan ishee kabajame kan dhaloota dhufuuf mijatu ijaaruu itti fufa. Bitootessa 21/2018 Tajaajila Kominikeeshinii Mootummaa Rippabiliika Dimookiraatawaa Federaalaa Itiyoophiyaa.

Bitootessa 18/2018(ENA) – Waltajjiin falmii boordiin filannoo biyyaalessaa Itiyoophiyaa qopheesse filannoon walii galaa torbaffaa dhufu caalaatti hammataa fi hirmaachisaa akka ta’u gochuuf kan yaadame falmii filannoo paartilee siyaasaa kan jalqabaati. Walitti qabduun boordii filannoo biyyaalessaa Itiyoophiyaa Meelaatwarqi Hayiluu wayita kana, boordichi baatiiwwan darban muraasa waltajjii falmii kana qopheessaa turuusaa ibsaniiru. Kaka’umsi kun paartileen siyaasaa yaada imaammataa qaban ummataaf kan itti ibsan carraa uumuun paartileen ejjennoosaanii beeksifachuuf akka gargaaruu fi ummanni filatus hubannoo caalaa akka argatu haala mijataa akka uumu eeraniiru. Akka walitti qabduun boordii kun jedhanitti, boordichi paartilee filannoo walii galaa torbaffaarratti dorgoman deeggaruuf leenjii dabalatee paartileen falmii yaalii akka gaggeessan carraa uumeera. Waltajjichi Paartilee siyaasaa, bakka bu’oota hawaasa Siviilii fi barattoota dhaabbilee barnootaa walitti fiduun dirreen siyaasaa akka bal’atu gumaacha gaarii akka taasisu ibsaniiru. Waltajjiin falmii kun qama filannoon Walii galaa biyyaalessaa caalaatti hammataa fi hirmaachisaa karaa ta’een akka gaggeeffamu tattaaffii taasisaa jiruu ta’uu walitti qabduun boordii kun ibsaniiru.

Bitootessa 18/2018 (ENA): Adeemsi Marii Ajandaa walitti qabuu naannoo Tigraay Bitooteessa 23 hanga 25, 2018 Finfinneetti akka gaggeeffamu Komishiniin Marii Biyyaalessaa Itiyoophiyaa beeksise. Adeemsa marii naannoo Tigraayitti gaggeeffamuuf jiru ilaalchisee komishiniin marii biyyaalessaa Itiyoophiyaa har’a miidiyaaleef ibsa kenneera. Adeemsichi hirmaachisaa fi hunda kan hammatee akka ta’uuf hojiin Komishinichi hanga ammaatti hojjechaa ture milkaa’aa ta’uu Komishinarri Olaanaan Komishinichaa Piroofeesar Masfin Ara’ayaan ibsaniiru. Hojiin kun aanaa irraa eegalee haala ummata hirmaachisuun hojjetamaa akka tures ibsaniiru. Lammiileen Naannoo Tigraay keessatti argaman adeemsa marii kanarratti hirmaachuuf mirga guutuu kan qaban ta’uu fi bu’a qabeessummaa adeemsichaaf gumaacha gaarii gumaachuu isaanii ibsaniiru. Komishinarri Olaanaan kun ibsa kennaniin Komishinichi adeemsa marii naannoo Tigraay keessatti eegaluu fi haala mijataa uumuuf tattaaffii bal’aa taasisaa turuu yaadachisaniiru. Bulchiinsa yeroo naannichaa, paartilee siyaasaa naannicha keessatti socho’anii fi qooda fudhattoota biroo magaalaa Maqalee fi Finfinnee waliin mariin yeroo 22 ol adeemsifamuu isaa hubachiisaniiru. Haa ta’u malee, tattaaffiin kun adeemsi naannicha keessatti gaggeeffamuuf haala mijataa waan hin uumneef, adeemsi ajandaa walitti qabuu fi filannoo bakka bu’ummaa Finfinneetti akka gaggeeffamu murtaa’eera. Adeemsi marii ajandaa walitti qabuu naannichatti Bitootessa 23 hanga 25, 2018 Finfinneetti akka gaggeeffamu beeksisaniiru. Adeemsa Bitootessa 23 irraa eegalee gaggeeffamu kana irratti qooda fudhattoonni sadarkaa sadarkaan jiran hundi dammaqinaan akka hirmaatan waamicha dhiyeessaniiru.

Bitootessa 18/2018 (ENA): Itiyoophiyaa fi Faransaay walta’iinsa biyyoota lamaanii damee nageenya eegsisuu irratti qaban gara walta’iinsa tarsiimootti guddisuuf har’a waliigaltee biyyoota lamaanii mallatteessaniiru. Waliigaltee kana Ministirri Raayyaa Ittisa Biyyaa Injiinar Aayishaa Mahaammadii fi Itiyoophiyaatti Ambaasaaddara Faransaay Aleeksiis Laameech mallatteessaniiru. Waliigaltichi miseensonni Raayyaa Ittisaa Itiyoophiyaa ergama nagaa eegsisuutti bobbaafaman qophii hojii isaanii guddisuu fi dandeettii idil-addunyaa isaanii daran cimsuuf kan kaayyeffate ta’uu ibsameera. Waliigaltee kanaan ragaaleen leenjii Inistiitiyuutii Leenjii Deeggarsa Nagaa Idil-addunyaa (IPSTI) fi Mana Barumsaa Leenjii Mul’ataa (CTS) irraa kennaman sadarkaa idil-addunyaatti beekamtii kan argatan yoo ta’u, hojiin qorannoo sadarkaa idil-addunyaatti kan gaggeeffamu ta’a. Waliigaltichi ragaaleen leenjii Wiirtuun Nageenya Eegumsa Itiyoophiyaa kennan Dhaabbata Mootummoota Gamtoomanii fi Gamtaa Afriikaa biratti beekamtii olaanaa akka qabaatanis kan kaayyeffate ta’uu ibsameera. Milkaa’ina kanaaf mootummaan Faransaay deeggarsa teeknikaa fi meeshaa barbaachisaa ta’e kan kennu yoo ta’u, dandeettii nageenya eegsistoota dirree waraanaa keessatti balaa fanjii dhoo’au irraa of eeguu guddisuuf xiyyeeffannoon addaa ni kennama. Waliigalteen kun dippilomaasii waraanaa cimaa biyyoota lamaan gidduu jiru irratti kan hundaa’edha. Itiyoophiyaan ergama nageenya eegsisuu idil-addunyaa keessatti adda duree ta’uun hirmaachuu ishee fi loltoota nageenya eegsistoota addunyaa adda duree ta’an biratti argamuun ishee itti fufuun tumsa kana cimsuuf sababa ta’uun kaafamaniiru. Waliigalteen kun gumaacha Itiyoophiyaan nagaa fi tasgabbii addunyaaf qabdu caalaatti bu’a qabeessa akka taasisu himama. Kana malees, michummaa biyyoota lamaanii yeroo dheeraaf ture sadarkaa haaraatti akka ceesisu ibsameera jedha odeeffannoon ENA’n Miidiyaa Onlaayinii Raayyaa Ittisaa irraa ” irraa argate. #Ena Afaan Oromoo#TOI#Ena

Bitootessa 18/2018 (ENA) – Magaalummaan fi babal’inni magaalaa ammayyaa bu’ura cimaarratti ijaaramaa jiru dhalootaaf jireenya fooyya’aa akkasumas badhaadhina biyyaaf bu’uura ta’uu isaa Tajaajilli Komunikeeshinii Mootummaa hubachiise. Tajaajilichi odeeffannoo karaa miidiyaa hawaasaa isaa qoodateen; hojii guddaan misooma magaalaa fi kooridarii biyyattiin hojjechaa jirtu, bifa biyyattii jijjiiruu bira darbee sadarkaa jireenya lammiilee fooyyessuuf tarkaanfii seena qabeessadha jedheera. Odeeffannoon tajaajilli komunikeeshinii mootummaa qoode guutummaansaa kunoo- Magaalummaa fi babal’inni magaalaa ammayyaa bu’ura cimaa irratti ijaaramaa jiru, dhalootaaf jireenya gaarii fi badhaadhina biyyaaf bu’uura dha Hojiin misooma magaalaa fi kooridarii bal’aan Itoophiyaan gaggeessaa jirtu, bifa biyyattii jijjiiruu bira darbee, jireenya lammiilee fooyyessuuf tarkaanfii seena qabeessa fudhatame dha. Magaalonni bifa hiyyummaa yeroo dheeraaf ittiin beekamaa turan gama jijjiiruutiinii fi jiraattotaaf mijataa fi hawwataa ta’anii akka gurmaa’an mootummaa bajata guddaa ramaduu fi humna namaa qindeessuun hojjechuun danda’ameera. Keessumaa hojiileen bu’uuraalee misoomaa diriirsuu, haaromsaa magaalaa, naannolee miidhagsuu, hojiileen suphaa bakkeewwan seenaa fi hambaalee Fnfinnee fi magaalota guguddoo birootti hojjetaman akkasumas hojiin misooma kooridarii hojjetamaa jiran ni eeramu. Hojii bu’uuraalee misoomaa kanaan, hawaasni bishaan dhugaatii qulqulluu, daandii fooyya’aa, tajaajila fayyaa sadarkaa gaarii qabu, barnoota qulqulluu fi humna ibsaa akka argatu taasifameera. Gama biraatiin kallattii Ministirrri Muummee doktar Abiy Ahmed kaa’aniin waggoota jijjiiramaa saddet darban keessatti hojiiwwan misoomaa hedduun kan raawwataman yoo ta’u isaan keessaa hojii magaalaa miidhagsuu isa ijoo dha. Xiyyeeffannoon Hojii misooma kooridarii fi haaromsaa magaalaaf kenname magaalota Itiyoophiyaa gurguddoo qofa osoo hin taane magaalota 78 keessatti hojiirra ooleera. Misoomni kooridarii kun jireenya magaalotaa duubatti hafaa jijjiiruun jireenya ammayyaa uumuurra darbee eeggumsa naannoo, jijjiirama yaadaa, fi naannoo jireenyaa mijataa uumuun gumaacha guddaa qaba. Kunis jireenya gaarii lammiilee abdii itti horuun alatti madda boonsaa ta’ee jira. Akkasumas lammiileen biyyoota biraa dinqisiifannaa guddaa itti agarsiisaniiru. Haaromsaa fi suphaan dhaabbilee seenaa, duudhaa isaanii eeguun dhalootaaf dabarsuu fi miidhagina magaalaa dabaluun turistoota hawachuu danda’eera. Kanaanis turistoonni hedduun yeroo dheeraaf Itiyoophiyaa keessa akka turan gochuun galiin guddaa akka argamu taasisuun danda’ameera. Bu’aa badhaadhinaa kana itti fufsiisuuf hojii dabalataa ciminaan hojjechuun barbaachisaa dha. Itiyoophiyaan Afriikaaf fakkeenya badhaadhinaa ta’uu fi mul’atashee milkeessuuf, hirmaannaan lammiilee murteessaa waan ta’eef, tumsa cimaa itti fufsiisuun barbaachisaa dha. Walumaagalatti, imalli badhaadhina magaalummaa Itiyoophiyaan eegalte dhaloota dhufu xiyyeeffannoo keessa galchuun kan raawwatame yoo ta’u, mootummaa teeknooloojii dijitaalaa fi sirna hojii ammayyaa walitti qindeessuun, magaalonni keenya bakka turizimii fi invastimantii ta’uurra darbanii wiirrtuu carraa hojii mijataa fi madda boonsaa akka ta’an gochuuf tattaaffii walirraa hin cinne akka taasisu ni mirkaneessa.

Bitootessa 17/2018 (ENA): Filannoo waliigalaa 7ffaa irratti dargaggoonni dammaqinaan akka hirmaatan hojiin hojjetamaa jiraachuu Manni Maree Dargaggoota Naannoo Somaalee beeksise. Pireezidaantiin Mana Marichaa Mahaammad Ahimad Nuur adeemsa dimokiraatawaa filannoof hirmaannaan dargaggootaa murteessaa ta’uu eeruun, kanaafis manni marichaa hojii dadammaksuu gaggeessaa akka jiru ENAtti himeera. Dargaggoonni biyyaa kan bakka bu’an ta’uu isaanii hubatanii sochii waliigalaa biyyattii keessatti dammaqinaan hirmaachuu akka qaban hubachiisaniiru. Filannoo irratti hirmaannaa isaanii cinaatti tajaajila tola ooltummaa isaanii itti fufuun akka isaan irraa eegamus akeekeera.