Mudde 14/2018(ENA)–Godina Shawaa Lixaatti Misooma Qamadii Jallisii Boneen lafti hektaarri kuma 300 sanyiin facaafamuu Waajjirri Qonnaa Godinichaa beeksise. Godinichatti Aanaa tokkee kuttaayeetti hojiin Misooma Jallisii Qamadii Bonee hoggantoota godinaa fi Aanaaleen daawwatameera. Itti Aanaan Waajjira Qonnaa Godina Shawaa Lixaa Abdiisaa Haayiluu akka jedhanitti, Qamadii jallisii Boneen lafa hektaara kuma 400 misoomsuuf karoorfamee hojjetamaa jira. Adeemsa hanga ammaan lafti hektaarri kuma 320 qophiin ooyruu xumuramee lafti hektaarri kuma 300 sanyiin facaafamuu eeruun waliigala lafa misoomerraa callaan kuntaalli Milliyoona 12 tuqaa 6 ni abdatama jedhaniiru. Misoma Jallisii Qamadii Bonee milkaa’aa taassisuuf Muuxannoo waggoottan darban irraa fudhachuun omishaa fi omishtummaa guddisuuf hojjetamaa jiraachuu ibsaniiru. Keessuma Xaa’oo Biyyee fi sanyii failatamaa haala fooyyee qabuun dhiheessuun danda’amuu fi qonnaan bulaan paakeejiiwwan qonnaa hojiirra akka oolchaniif deeggarsi ogummaa taassifamaa jiraachuu ibsaniiru. Bulchaan Aanaa Tokkee Kuttaayee Obbo wayyeessaa Alamuu gamasaaniin, Aanichatti qonna kilaastaraa hojiirra oolchuun misoomni jallisii bonee hojjetamaa jira. Aanichatti lafti hektaara kuma 20 qamadiin misoomsuuf karoorfamee hanga ammaatti lafti hektaarri kuma 10 ol sanyiin facaafamuu ibsaniiru. Aanichatti ganda Imala dawweetti Aajootti Qaama karoorichaa kan ta’e lafa hektaara 102 irratti sagantaan sanyiin qamadii facaafasuu gaggeeffamuu eeruun hojii misoomaa kanarratti qonnaan bultoonni 208 kilaastaraan hirmaachaa jiru jedhaniiru. Qonnaan bultoota Aanichaa ENA ‘n dubbise akka jedhanitti, misooma jallisii boneen hirkattummaarra bahuun waggaatti yeroo sadii misoomsuu danda’usaanii dubbataniiru. Qonnaan bulaan Araarsaa Dilgaasaa akka jedhanitti erga misooma Qamdii Jallisii eegalanii asitti wabii nyaataa mirkaneessuurra darbee galiinsaanii guddachaa maatiisaanii haala fooya’een gaggeeffachaa jiraachu ibsaniiru. Bara kanas qonnaan bultoota biroo kilaastaraan gurmaa’uun qamadii facaasuusaanii ibsuun hektaara tokkorraa callaa kuntaala 35 akka abdatan ibsaniiru. Qonnaan bulaan Biroon aanichaa Gammachuu Dandanaa waggoottan sadan darban qonnaan bultoota naannichaa waliin kilaastaraan Qamadii jallisii misoomsaa jiraachuu ibsuun, kanaanis fayyadamoo ta’uu ibsaniiru. Bara kana gama waajjira Qonnaa Aanichaan galteewwan omisha guddisanii fi Tiraaktarri dhihaateefii hojicha bal’inaan hojjechaa jiraachuu ibsaniiru.

Mudde13/2018(ENA)–Naannoo Oromiyaa Godina wallaggaa Lixaatti misoomni Qamadii Jallisii Bonee wabii nyaataa mirkaneessuurra darabee Aadaa hojii jijjiiraa jiraadhufuu Qonnaan bultoonni ibsan. Innisheetiviin Misooma Qamadii jallisii Bonee Qamdii Jallisiin misoomsuun akka danda’amu beeksisuun olitti sadarkaa biyyoolessaatti bakkeewwan barteedhaann gammoojjii Misoomaaf hin ta’an jedhamanii beekaman dabalatee gara misoomaatti galaa jiru. Misoomni Qamadii Jallisii Bonee misoomicha bal’inaan beeksisuurra darbee omishtummaasaa babal’isuun Qannaan bulaafis ta’e Diinagdee biyyaaf faayidaa qaban guddisuurratti naannoolee argaman keessaa Naannoon Oromiyaa tokkodha.   Godinaalee naannicha jiran haala teessumaa qaban karaa eegeen innisheetifoota haarawaa Qamadii fi Ruuzii dabalatee baratamaa dhufeera. Qonnaan bultoonni Godina wallaga Lixaa jiran akka jedhanitti Misoomni Qamadii Jallisii Bonee Wabiinyaataa mirkaneessuurra darbee Aadaa hojiisaanii kan jijjiire dha.   Godinichatti Qonnaan bulaan Aanaa Baabboo Gambeellaa Addisuu Tarreessaa, Misooma qamadii Jallisii boneerratti hirmaachuu erga eegalanii wabiinyaataasaanii mirkaneessuun fayyadamoo ta’uusaanii ibsaniiru. Kanaan dura rooba eeguun waggaatti yeroo tokko qofa omishaa turuusanii ibsuun hojichaanis jireenyaa saanii fooyyeffachuu akka hin dandeenye himaniiru. Waggoota jijjiiramaa as garuu, misooma jallisii Boneen jireenya isaanii fooyyeffachuu kan danda’an yoo ta’u,aadaan hojii isaanii kan jijjiiramaa dhufe ta’uu ibsaniiru. Baranas qophii haal duree gahaa taasisuun,lafa heektaara kurmaana tokko irratti qamadii kilaastaraan oomishaa jiraachuu dubbataniiru.   Jiraataa qonnaan bulaa aanaa kanaa kan ta’an Beekuma Gabbisaa, bara kana lafa walakkaa heektaara jallisii Bonaa keessatti xaa’oo fayyadamuun akka misoomsan dubbataniiru. Misooma jallisii qamadii Bonee erga jalqabanii booda jireenyi isaanii kan fooyya’e ta’uu eeruun, hojiin misoomaa kuni waggaa guutuu hojii qonnaa irratti akka xiyyeeffatan kan isaan dandeessise ta’uu ibsaniiru. Godina Wallaggaa Lixaatti itti gaafatamaa Waajjira Qonnaa aanaa Baabboo Gambeel kan ta’an obbo Abarraa Dheeressaa akka jedhanitti, aanichatti lafti heektaara 9,000 qamadii jallisii Bonaan misoomeera. Kana irraas oomishni qamadii kuntaala kuma 100 ol akka eegamu ibsuun,qonnaan bultootaaf deeggarsiisfi hordoffiin taasifamaa jiraachuu himaniiru.   Waajjira Qonnaa godina Wallaggaa Lixaatti ogeessa misooma jallisii kan ta’an obbo Girmaa Jalataa gama isaaniin; godinichatti bara kana qamadii heektaara kuma 196 ol misoomsuuf karoorfamee, hojii hanga ammaatti hojjetameen heektaara kuma 195, 531 midhaaniin uwwifameera jedhan. Misoomichaan qonnaan bultoota kuma 91 ol hirmaachaa kan jiran yoo ta’u, callaa kuntaala miliyoona 7 ol argachuuf kan eegamu ta’uu ibsaniiru. Qonnaan bultootaaf dhiyeessiin galteewwan qonnaa dabalatee, paampiin bishaan harkisu dhiyaachuufii ibsuun deeggarsiifi hordoffiin taasifamaafii jiraachuu himaniiru. Akkasumas oomishaalee gahan osoo hin qisaasa’iin sassaabuuf hojjetamaa jira jedhani.

  Mudde 13/2018(ENA)- Inistituyuutiin manaajimantii konistiraakshinii idustirii ijaarsaa isaa beekumsaa fi teekinooloojiin guddisuuf hojii eegale cimsee akka itti fufu Mana Maree Bakka Bu’oota Uummataatti Koreen Dhaabbataa Dhimma Magaalaa, Bu'uuraalee misoomaa fi Geejjibaa beeksiseera. Inistituyuutiin Manajimantii Konistiraakshinii hojii qorannoo fi qo’annoon deeggarame, damee konistiraakshinii deeggaru irratti kan xiyyeeffate, qooda fudhattoota adda addaa kan hirmaachise agarsiisa qo’annoo fi qorannoo gaggeessaa jira.   Agarsiisa qo’annoo fi qorannoo kana irratti kan argaman Dura taa'aan Koree Dhaabbataa Dhimmoota Magaalaa, Bu'uuraalee fi Geejjibaa Mana Maree Bakka Bu'oota Uummataa Piroofeesar Mohaammad Abdoo akka jedhanitti, inistiitiyuutichi dandeettii raawwii pirojektiii dame ijaarsaa guddisuuf hojiin hojjechaa jiru bu’aa agarsiisaa jira. Hanqina qulqullinaa, harkifannaa yeroo fi baasii olaanaa pirojektoota ijaarsaa kanaan dura mudate hir’isuuf hojiin qorannoo irratti hundaa’ee hojjetamaa jiru cimee itti fufuu akka qabu cimsanii dubbataniiru. Bu’aa damichaan argamu daran guddisuuf hojiiwwan ce’umsa teeknooloojii fi ijaarsa dandeettii humna namaa irratti xiyyeeffannoon kennamuu akka qabus dubbataniiru. Kanumaan walqabatee inistitiyuutichi beekumsaa fi teeknooloojiin industirii konistiraakshinii guddisuuf tattaaffii taasisaa jiru cimee akka itti fufu dhaamaniiru. Deetaan Ministira Misooma Magaalaa fi Bu’u Misoomaa doktar Yeetimgeetaa Asraat gama isaaniitiin, industiriin ijaarsaa sadarkaa barbaadamurra akka ga’uuf xiyyeeffannoon addaa kennamee jiraachuu ibsaniiru. Industiricha humna namaa gahoomee fi teeknooloojiin ammayyeessuun akkasumas hojmaata ariifachiisaa diriirsuuf hojjetamaa akka jiru hubachiisaniiru. Meeshaalee ijaarsaa biyya alaatii galfaman biyya keessatti oomishuuf qooda fudhattoota waliin qindoominaan hojjetamaa jiraachuus ibsaniiru. Inistiitiyuutii manajimantii Konistiraakshinii Itiyoophiyaatti Daarektarri Olaanaa injiinar Tammiraat Muluu akka ibsanitti, pirojektoonni qulqullina sadarkaa kaa’ameefiin, yeroo fi baasii kaa’ameen xumuramuu kan isaan dandeessisu qorannoo fi qo’annoo irratti xiyyeeffannoon kennamee hojjetamaa jiraachuu ibsaniiru.   Leenjiin beekumsa ijaarsa yeroo ammaa irratti xiyyeeffate ogeessotaa fi dhaabbilee damee kanarratti bobba’aniif kennamaa akka jiru himaniiru.

Mudde 12/2018(TOI)- Mariileen ummataa tibbana magaalaa Finfinnee fi magaalaawwan naannoleetti gaggeeffaman bayyanachuun Itiyoophiyaa qabatamaan ummata bira akka jiru kan itti mirkaneessinedha jedhan Ministirri magaalaa fi bu’ura nisoomaa Caaltuu Saanii. Marii gaggeeffaman irraa humnaa fi dandeettii dabalataa arganneerra jechuun dubbatan ministirri Caaltuu Saanii. Mariileen ummataa tibbana mata duree “labsiiwwan Gubaa bu’aalee mootummmaa ida’amuu” jedhuun Finfinnee fi magaalaawwan naannoleetti gaggeeffamuun ni yaadatama. Ministirri magaalaa fi bu’ura misoomaa Caaltuu Saanii marii ummataa naannoo jiddu gala Itiyoophiyaa magaalaa Hosaa’inaatti gaggeeffamerratti argamuun, bayyanachuun Itiyoophiyaa qabatamaan ummata bira akka jiru mariilee ummataarraa mirkaneessineerra jedhaniiru. Jijjiiramaan asitti kallattiin ummata bira gahuun mariisisuun aadaa ta’ee fulla’uu ibsaniiru. Ummanni gaaffii fi yaada qabu wallabaan ibsachuusaa eeranii, kun ammo dandeettii fi humna dabalataa akka argannu nugargaareera jedhaniiru. Ummanni Misooma kooriidarii dabalatee jijjiirama ijaarsa magaalaa fi bu’ura misoomaa irratti dhufe kaasuusaa fi dinqisiifachuusaa ibsaniiru. Gama biraan naannichatti akkasumas magaalattiitti rakkoon hojii dhabdummaa jiraachuusaa fi rakkoon kun akka furamu gaafachuusaa dubbataniiru. Gaaffilee misoomaa marii kanarratti kaafaman adeemsaan furuun walii galamuu ministirri kun ibsaniiru. Dhimmoonni Kanaan dura gaafatamanii turan maalirra akka jiran dursuun ibsi kan itti kenname ta’uunsaa marii kana adda akka isa taasisu eeranii, kun ammoo mootummaan ummata dhaggeeffachaa akka jiru agarsiisa jedhaniiru.