Guraandhala 16/2018 (ENA): Boordiin Filannoo Biyyaalessaa murtoo Manni Maree Federeeshinii Naannolee Amaaraa fi Tigraayitti Naannoolee Filannoo walfalmisiisoo ta’an irratti Murtii dabarse ifoomseera. Murtiin Boordii Filannoo akka armaan gadiitti dhiyaateera: Boordiin Filannoo Biyyaalessaa gabatee Filannoo waliigalaa marsaa 7ffaa ilaalchisee Amajjii 22/2018 irraa eegalee galmee filattootaa gaggeessuuf buufataalee filannoo fi naannoolee filannoo ummataaf ifoomsuun ni yaadatama. Naannolee fi Buufataalee filannoo Boordichi ifoomse hordofee Manni Maree Federeeshinii Amajjii 25/ 2018 xalayaa Boordichaaf barreeesseen Naannolee Amaaraa fi Tigraayitti gaaffii anaaf malaan naannoolee filannoo 5 jechuunis Humaraa, Adiramatsi, Kooram Aflaa, Xaallaamtii fi Raayyaa Allamaaxaan irratti ka’aa ture hanga furamutti nannoleen filannoo kunneen Bulchiinsa Naannoo Tigraayin ala ta’anii qofaa isaanii kallattiin Mana Maree Bakka Bu’ootaan filannoo akka taasisan manni marichaa murteessuun boordichaaf beeksiseera. Filannoon Mana Maree Naannoo waldhabdeen naaf malaa naannawaa kanneen irratti ka’e murtoo heera mootummaan furamee gara fuulduraatti kan gaggeeffamu ta’uus ibseera. Kanaafuu, Boordiin filannoo waliigalaa 7ffaa bu’uura seeraa fi hojmaata armaan olitti ibsameen hojiirra akka oolchu beeksisa.

Guraandhala 15/2018 (ENA): Tooftaa lolaa kan beekuu fi gaachana biyyaa kan ta’e Iiziin Ajaja duula Addaa dirqama isatti kenname gahumsaan ba'achuuf qophii ta’uu Ajajaan ajaja duula addaa Letenaal Jeneraal Shumaa Abdataa ibsaniiru. Ayyaanni hundeeffama Ajaja duula addaa waggaa 65ffaan qophiilee adda addaatiin kabajamaa jira. Ajajaan ajaja duula addaa Letenaal Jeneraal Shumaa Abdataa ayyaana kana sababeeffachuun ergaa dabarsaniin, ayyaanni kun guyyoota muraasa darbanitti qophiilee adda addaatiin kabajamaa turuusaa himani.   Fakkeenyaaf, Duulli addaa kunniin, kitaaba, asxaa haaraa, faaruu Iizichaa fi dokumantariin qophahee kan eebbifaman ta’uu himaniiru. Fiigichi kiiloo meetira 10 fi agarsiisni adda addaa dhiyaachuu himaniiru. Kabajni ayyaana hundeeffama waggaa 65ffaa Ajaja duula Addaa sababoota gurguddoo sadiif barbaachisaa ta’uus eeraniiru. Tokko imala haaromsa Raayyaa Ittisa Biyyaa waggaa 65 haala dhaloota itti aanuu fayyaduu danda’uun dabarsuu ta’uu ibsaniiru. Inni lammaffaa immoo haala yeroo ammaa Ajajni duula Addaa bu'aa haaromsa taasifameen gahumsa maalirra akka jiru uummataaf, mootummaa fi diinaaf kan agarsiifnu dha jedhani. Kunis biyyaaf gaachana ta’uu kan danda’u ta’uu akka hubatanii fi diinotaaf immoo ergaa guddaa kan qabu akka of adabatanii taa’aniif jechuu himani. Ta’uu baannan garuu yoo lola jalqaban akka salphachuu danda’aniif ergaa guddaa dabarsuuf ta’u himaniiru.   Ergaan inni sadaffaa, gootummaan kaleessa akka ture, har’as itti fufee akka jiru; garuu tooftaalee kaleessaa waliin deemuu hin dandeenyu, kanaaf muuxannoo kaleessaa fudhachuun, yeroo ammaa waliin walitti qindeessuunii fi muuxannoo taatee sanaa irraa barachuun kan kaayyeffatee fi bara waliin deemuu kan danda’u ta’uu hubachiisuuf kabajamaa jira jedhani. Akkasumas Ajajni Duula Addaa ajajaa tokko irraa gara sadarkaa har’a irra ga’etti bahii hedduu keessa darbee akka guddate eeraniiru. Harka tokkoon osoo waraannuu, harka kaaniin osoo leenjinuu, Ajaja Iizii Duula Addaa gurmeessuu qofa osoo hin taane, humna rukutuu danda’u Rippaabilikaan Gaardii(Eegdota Rippaabilikaanii) olaanaa biyyattii akka hundeffamu taasisuun danda’amuu himaniiru.   Guyyaa har’aas leenjii komaandoo marsaa 44ffaa xumuranii kan eebbifaman akka jiran eeruun,miseensonni hedduun leenjii irra akka jiran himaniiru. Ajajni Duula Addaa tokkummaa keessoo kan kaleessaa caalaa gubbaa hanga jalaatti kan qindaa’ee fi leenji’e horachuu isaa ibsaniiru. Galaanarrattis ta’e lafarratti, haala qilleensaa kam keessattiyyuu fi haala teessuma lafaa iddoo kamittiyyuu Ajajni Duula Addaa ergama Mootummaa, Uummataa fi Dhaabbata isaa eeguuf kutannoon kan hojjetuu fi ergama isaa milkaa’inaan kan galmaan ga’u ta’uu mirkaneessaniiru.

Guraandhala 15/2018 (ENA): Kabaja biyya isaa fi daangaa biyyaa kan kabachiisuuuf dirqama kamiifiyyuu qophii kan ta’e goota, gahoomaa fi jabina kan qabu Raayyaa Itisaa ijaarreerra jedhan Itaamaajoor Shuumiin Walii-galaa Humnoota Waraanaa Raayyaa Ittisa Biyyaa Fiildi Maarshaal Biraanuu Juulaa. Sirna cufiinsa kabaja waggaa 65ffaa Ajaja Duula Addaa Raayyaa Ittisa Biyyaa; istaadiyeemii Hawaasaatti bakka Ajajaan Olaanaa Raayyaa Ittisa Biyyaa fi Ministirri Muummee Dr. Abiyyi Ahimad, Giiftii Duree Zinnaash Taayyaachoo, Itaamaajoor Shuumiin Walii-galaa Humnoota Waraanaa Fiildii Maarshaal Biraanuu Juulaa fi qondaaltonni olaanoo Raayyaa Ittisa Biyyaa biroo, miseensonni Loltootaa fi kanneen biroo argamanitti gaggeeffameera.   Raayyaan Raayyaa Ittisa Biyyaa teknooloojii fi meeshaa waraanaa ammayyaa baay’ee akka gaariitti kan hidhate ta’uu ibsuun, Loltuun gootummaa qabu, dandeettii fi gahumsa qabu waan hundaa’eef, kabajaa fi daangaa biyyaa eeguuf dirqama kamiifuu qophii kan ta’e ijaaramuu isaa mirkaneessaniiru. Kanumaan walqabatee Ajajni Duula Addaa gama hundaan ajaja qindaa’ee fi qophaa’e ta’uu ibsuun, gootummaa kanaan dura raawwataman hedduu tarreessaniiru. Adeemsa jijjiiramaa keessatti qaamolee jeequmsa uumuuf carraaqan hordofuu fi seera kabachiisuun injifannoodhaan goolabuun akka danda’ame dubbataniiru.   Ayyaana kana waliin agarsiisni loltummaa qilleensaa, agarsiisa loltumaa bishaan irratti hundaa’ee fi agarsiisa loltummaa lafa irratti kan argamu yoo ta’u, sagantaan xumuraa har’a gaggeeffameera. Sagantaa har’aa kanaan eebbifamtoonni Komaandoo Raayyaa Ittisa Biyyaa 44ffaa kan eebbifaman yoo ta’u, bakka keessummoonni kabajaa argamanitti miseensonni Ajaja Duula Addaa agarsiisa hiriira loltummaa agarsiisaniiru. Miseensonni Raayyaa Ittisa Biyyaa kun yeroo gabaabaa keessatti ergama addaa raawwachuuf kan isaan dandeessisu agarsiisa qilleensarraas qophii ta’uu isaanii helikooptaraan agarsiisaniiru. Barattoonni manneen barnootaa adda addaa magaalaa Hawaasaa irraa dhufan agarsiisa adda addaa waliin dhiheessaniiru.

Guraandhala 15/2018 (ENA): Humni Ittisaa baay’inaafi qulqullinaan leenji’ee, hundagaleessaa fi amansiisaa ta’e ijaaramuu isaa Itaamaajoor Shuumiin Walii-galaa Humnoota Waraanaa Raayyaa Ittisa Biyyaa Fiildi Maarshaal Biraanuu Juulaa beeksisaniiru. Sirni cufiinsa waggaa 65ffaa Ajaja Duula Addaa Raayyaa Ittisa Biyyaa istaadiyeemii Hawaasaatti gaggeeffameera.   Sagantaa kana irratti Ajajaan Olaanaa Raayyaa Ittisa Biyyaa fi Ministirri Muummee Dr. Abiyyi Ahimad, Giiftii Duree Zinnaash Taayyaachoo, Af-yaa’ii Mana Maree Bakka Bu’oota Ummataa obbo Taaggasaa Caafoo, Fiildii Maarshaal Biraanuu Juulaan, Bulchaan Bulchiinsa Mootummaa Naannoo Sidaamaa obbo Dastaa Leedamoo, Jeneraalonni Ol’aanoo Raayyaa Ittisa Biyyaa fi qondaaltonni federaalaa fi naannoo argamaniiru. Kanuma waliin Itiyoophiyaan qormaata alaa fi keessoo ishee mudate irra aanuun milkaa’ina guddaa galmeessitee jirti jedhan Itaamaajoor Shuumiin Walii-galaa Humnoota Waraanaa Raayyaa Ittisa Biyyaa Fiildi Maarshaal Biraanuu Juulaa. Jijjiirama biyyoolessaa irraa eegalee haaromsi Raayyaa Ittisa biyyaalessaa cimaan ijaaramuu ibsaniiru.   Kunis gaggeessummaa Ministirri Muummee Doktar Abiyyi Ahimad ijaarsa Raayyaa Ittisaa biyyoolessaa qaama kamirraayyuu bilisa ta’e ijaaruuf qajeelfama kennaniin kan hojjetamaa jiru ta’uu ibsaniiru. Ijaarsi loltummaa kun kan diigamee ture qindeessuun sadarkaa kanarra gahuu himani. Yeroo ammaa kanattis, loltoonni gahumsaa fi naamusa olaanaa qaban akka ijaaraman eeruun, ijaarsi kutaalee loltummaa adda addaa milkaa’inaan raawwatamuu ibsaniiru. Waggoota muraasa darban keessatti rakkoo nageenyaa naannoo adda addaatti uumame hiikuu cinaatti loltoonni cimaan ijaaramuusaa eeraniiru. Waraana booda kallattii kaa’ame galmaan ga’uuf guyyaatti sa’aatii 24 hojjechuun loltuu ittisa biyyaa amanamaa baay’ina, qulqullina, gurmaa’ina, gosa, teeknooloojii, misooma indaastirii ittisaa fi misooma bu’uuraalee misoomaa hunda galeessa ta’e ijaarree jirra jedhan. Ajajni Duula Addaa waraana cimaa biyyaa fi ummata boonse ta’uu ibsuun, Ajajni Duula Addaa yeroo yeroon qulqullina leenjii isaa guddisuu qofa osoo hin taane, Eegdonni Rippabilikaanotaas akka uumamu taasiseera jedhan.   Waggoota 65 darban keessatti lola naannoo hedduutti geggeeffame keessatti Ajajni Duula Addaa qabatamaan of mirkaneessee jira. Har’as leenjiin bu’uuraa komaandoo marsaa 44ffaa guyyaa hundeeffama Ajaja Duula Addaa akka ta’e ibsuun, eebbifamtootaaf baga gammaddan jechuun ibsaniiru. Raayyaan ittisa biyyaa haala nagaa waaraa biyyattii mirkaneessuu fi birmadummaa biyyaa mirkaneessuun ergama amma qabu bahachuu akka itti fufu mirkaneessaniiru.

Guraandhala 15/2018 (ENA): Humni jabaanii fi amansiisaan akkuma kaleessaa nagaa Itiyoophiyaa, naannichaa fi Afriikaa eegsisu ijaarameera jedhan Ajajaan Olaanaa Raayyaa Ittisa Biyyaa Itiyoophiyaa Ministirri Muummee Dr. Abiyyi Ahimad. Ayyaanni hundeeffama Ajaja Duula Addaa Raayyaa Ittisa Biyyaa Itiyoophiyaa waggaa 65ffaan Ajajaan Olaanaa Raayyaa Ittisa Biyyaa Itiyoophiyaa Ministirri Muummee Dooktar Abiyyi Ahimad argamanitti sagantaalee adda addaatiin kabajameera.   Saganticha irratti haasaa taasisaniin Dr. Abiyyi Ahimad, Ilmi namaa aadaa, afaanii fi eenyummaa ofii qabaatee dhalata. Duultonni Addaa har’aa, haadhaa fi abbaa isaanii irraa, biyya isaanii Itiyoophiyaa irraa akkasumas qilleensa irraa kan dhalatan kennaa addaa Itiyoophiyaati jedhani. Humni addaa abbaan koochoo lamaa, kooffiyyaa diimaa uffatan, qilleensarraa furguggifamuun kan bu’an, harka tokkoon naamusa, harka biraan immoo kaayyoo akka qabatan ta’uu eeraniiru. Gootota lola qabsaa’anii xumuran, alaabaan keenya magariisa, keelloo, diimaa bilisummaa Afrikaa ta’uu eeruun, gootota kanaaf kabaja akka biyyaatti isaaniif malu kennineerraafii jedhani. Ministirri Muummee Dooktar Abiy Ahimad ergamni keenya dhaabbata mul’ata qabu kan dhaloota dhufuuf dabarsu uumuudha; ergamni keenya humna jabaa kan lola injifatu ijaaruu akka ta'e dubbataniiru. Ergamni miseensota Ajaja Duula Addaa Itiyoophiyaa ijaaruu, Itiyoophiyaa tiksuu, Itiyoophiyaa cimsuu, Itiyoophiyaa jijjiiruu akka ta’es dubbataniiru. Itiyoophiyaan dafqa ijoollee isheetiin hojjetamti; lafee fi dhiiga ijoollee isaatiin jabaatti jedhan Ministirri Muummee. Dhaabbanni keenya nagaa fi badhaadhina Afrikaa mirkaneessuu fi biyyoota naannichaaf gaachana ta'uu dha jedhani Dr. Abiyyi Ahimad. Kana qofa osoo hin taane ummatoota obbolaa keenya fiixee Somaaliyaa irraa kaasee hanga fiixee Mistuwwaatti deggeruun misoomaa fi badhaadhina naannichaa mirkaneessuuf ni hojjenna jedhani. Humni jabaan, teknooloojii hidhate, Itiyoophiyaa qofaaf osoo hin taane naannichaafis, dahannoo qofa osoo hin taane iddoowwan tarsiimoo keessatti qabsaa’u hundeessuu beeksisaniiru. Kanaafis biyyoota Afrikaa Bahaa fi biyyoota Afrikaa hundaan baga gammaddan jedhaniiru. Humni jabaan kuni ijaaramuun isaa waraannii fi shororkeessummaan naannoo keenyatti akka hin uumamneef yoo uumame immoo yeroo gabaabaa keessatti xumuruuf kan kaayyeffatee dha jedhani Dr.Abiyyi Ahimad. Humni nuti ijaarre akkuma kanaan dura ergama idil-addunyaa bahachaa ture kabajaan raawwate sana mirkaneessuuf kan kaayyeffate ergama addaa isaaf kenname hanga aarsaa lubbuutti kan raawwatu ta’uu fi kabaja Itiyoophiyaa ta’uu ibsani. Humni Itiyoophiyaan ijaarte yeroo ammaa kana humna jabaa fi amansiisaa akkuma kaleessaa birmadummaashee kan kabachiisu ta’uu ibsaniiru.

Guraandhala 15/2018(ENA)- Raayyaa FDRItti Ayyaanni hundeeffama wagga 65ffaa Izzii duulawwan addaa raayyaa ittisaa Istaadiyeemii idil addunyaa Hawaasaatti dammaqinaan kabajamaa jira. Kabajni ayyaana hundeeffamaa wagga 65ffaa Izzii duulawwan addaa kun fiigicha daandiirraan eegalameera. Ayyaanni hundeeffamaa kun agarsiisa qilleensarraa fi komaandoo dabalatee taateewwan garagaraatiin ni kabajama.

Guraandhala 14/ 2018(ENA) - Paartiileen siyaasaa Boordiin filannoo Biyyoolessaa Itiyoophiyaa filannoo walii galaa 7ffaaf danbii naamusaa kaadhimamtootaa qopheesse mallatteessan. Danbbiin naamusaa filannichi haala naamusa qabaateen daandii nagaan akka gaggeeffamu kan dandeessisu ta’uun hubatameera. Sirna mallattoo sanarratti miseensonnii hojii gaggeessitoota boordichaa, hoggantoota paartiilee siyaasaa fi bakka bu’oonni akkasumas bakka bu’oota Dhaabbilee Hawaasa Sivilii argamaniiru. Hoggantuun boordii filannoo biyyaalessaa Itiyoophiyaa Meelatwarq Hayiluu wayitasana, boordichi paartiileen walfalmanii yaada filannoosaanii sagantaa uummataaf itti dhiheessan qopheessaa jira jedhaniiru. Uummanni filatus beekumsarratti hundaa’ee akka filatuuf paartiileerraa hojii hedduun ni eegama kan jedhan hoggantuun kun, miidiyaaleen paartiilee morkattootaa yeroo qilleensa walqixa ramaduun itti gaafatamummaasaanii bahuu akka qaban hubachisaniiru. Boordiin filannoo deeggarsa barbaachisaa akka taasisu mirkaneessaniiru.

Guraandhala 14/ 2018(ENA):- Boordiin filannoo biyyaalessaa Itiyoophiyaa mallattoo paartiilee siyaasaa filannoo biyyoolessaa 7ffaa dorgomuuf galmaa’anii ifoomseera. Boordichi sagantaa mallatteessuu danbii naamusaa kaadhimamtootaa gaggeessaa kan jiru yoo ta’u, saganticha irratti,miseensonni Boordiin filannoo biyyaalessaa Itiyoophiyaa, hoggantoonni paartiilee siyaasaa fi miseensonni, akkasumas bakka bu’oonni Hawaasa Dhaabbilee Sivilii argamaniiru. Dura teessuun Boordichaa Meelaatwarqi Haayiluu wayita sana akka jedhanitti, boordichi filannoo gaggeessuuf qophiin taasisaa jiru cimsee itti fufa.   Paartiileen siyaasaa hedduun kaadhimamtoota galmeessaa jiraachuu ibsuun, galmee filattootaa gaggeesuuf qophii barbaachisaa taasisaa jirra jedhaniiru. Raawwachiiftota filannoof leenjii leenjiftootaaf kennaa jiraachuu eeruun, dhaabbilee Hawaasa siivilii 169’f leenjii kennuusaa dubbataniiru. Boordichi haala qophii meeshaalee filannoo ilaalchisee miidiyaalee adda addaa daawwachiisuu eeraniiru.   Mallattoon filannoo paartiilee har’a ifooman filattoonni paartii barbaadan mallattoosaa baranii akka filatan gochuuf kan kaayyeffatedha jedhaniiru. Filannichi nagaa qabeessaa fi haqa qabeessa akka ta’u, danbiin sirna naamusaa kaadimamtoota kan qophaa’e ta’uu hubachiisuun, paariileen siyaasaa danbicha akka mallatteessan dubbataniiru.   Filannichi haqa qabeessa, dimokiraatawaa fi nagaa qabeessa ta’ee akka gaggeeffamuuf qaamoleen qooda fudhattootaa qooda isaanirra egamu bahuu akka qaban hubachiisaniiru.