Guyyoonni tokko tokko ni jiru; lammiileen imimmaaniin guyyittii kan yaadatu, wanti akkanaas lammaffaa akka hin deebine kan hawwu. Guyyoonni sukanessaan dhala namaa mudatan seenaa keessatti mul’achuu malanis garuu dogongora akkasii kana irraa immoo dhaloonni akka baratuuf yaadachuun barbaachisaadha. Guyyoonni kunniin onnee lammiilee keessatti yaadannoo addaa fi godaannsa kaahanii hafanis, seenaan barabaraan isaan yaadata. Onkololessa 24 bara 2013 guyyaa kana gootonni waggootaaf ummata isaanii tiksaa fi gaachana ta’aafii turan qaama itti amananiin ganamanii miseensonni raayyaa ittisaa kabaja biyyaa fi ummataaf dhaabbatan diina fuuldura isaan tiksaa tureen osoo hin taane, qaama isaan lammiikoo jedhanii abdatanii fi diina irraa eegaa turan duubaan isaan gane. Raayyaa kabajaa fi ulfina biyyaa ta’ee lubbuu isaa tokkittii osoo hin mararfatiin lammiisaaf aarsaa kaffalu duubaan ganame. Nageenyi ummataa akka eegamu, lammiileen bilisaan seenuu fi ba’uu, biyyi nagaan jiraachuu akka danda’uuf nageenya ofii osoo hin miidhin lubbuu ofii balaaf saaxiluun gootota ummata tiksanidha guyyaa har’aa kan ganame. Miseensonni Raayyaa Ittisa Itoophiyaa bosona keessatti jireenya isaanii gaggeessanii eegduu biyyaa ta’an, seenaa kunuunsuun diinota irraa birmadummaa biyyaa eegsisan fakkeenya gootummaati. Gootota kana kan walitti fide jaalala biyyaaf qaban, alaabaa irratti boonanii, waadaa Itoophiyaaf galan dha. Loltoonni biyya tokkotti amanan, kan Itoophiyaa ta’anii mana waloo keessa jiraatan, guyyaa sana gantummaa hamaan isaan mudate. Onkololessa 24, 2013, guyyaa lammiileen Itoophiyaa oduu garaa nama nyaatu dhaga’anii, haadholiin du’a gaddisiisaa ijoollee isaaniitiin gadda itti boo’anii, biyyi ganamte ta’uun seenaa keessatti galmaa’ee jira. Haa ta’u malee, gootonni ganaman gaddaafi abdii kutannaa jalatti hin kufne. Biyya isaaniif kutannoo qabaniifi birmadummaa isheef amantaa cimaa qaban irratti hundaa’uun tokkummaafi miira jaalala biyyaan ka’ani. Gantummaa fi rakkina keessa jiraatanis dirqama biyya isaaniif qaban hin dhiisne; cimina isaanii mirkaneessanii dandeettii waraanaa fi gootummaan seenaa hojjetan. Gantummaa balaaleffachuu, wareegama waraanaa kabajuuf, walitti dhufeenya ummataa fi Raayyaa ittisaa gidduu jiru cimsuuf, seenaa irraa barachuun akka inni irra hin deebi’amne ni yaadanna. Seenaan gantummaa akkasii akka irra hin deebi’amneef yoomiyyuu ni yaadanna! Raayyaa Ittisa FDRI Onkololessa 24, 2019 #Biyya Guddoo, Ummata Guddaa # Mul'ata Guddaa #Mootummaa Ida’amuu

Onkoloolessa23/2019(ENA)--Milkaa'inni misooma Anniisa haaromfamaa Itoophiyaa fi kallattiiwwan isheen hordoftu biyyoota Afrikaa birootiif fakkeenya ta'uu danda'a jechuun Itoophiyaatti Imbaasii Deenmaarkitti gorsaan damee Inerjii Toomaas Filuuriin Soreensen ibsan. Itoophiyaatti gorsaan Imbaasii Deenmaark Toomaas Filuuriin Soreensen turtii ENA waliin taasisaniin kallattiin Itoophiyaan misooma humna haaromfamaa irratti hordoftu sirrii ta'uu ibsaniiru. Murteewwan Itoophiyaan misooma anniisaa irratti fudhattu biyyoota birootiif kaka’umsa ta'uu isaa ibsuun, guddinni damee kanaan jiru biyyoota Afriikaatiif muuxannoo akka ta'u hubachiisaniiru. Itoophiyaan omisha Annisa haaromfamaa irratti guddina gaarii agarsiisaa jiraachuu eeruun; karoorawwan fi kallattiiwwan misoomaa damichaan qabaman cimaa ta'uusaa ibsaniiru. Deenmaark Itoophiyaa waliin damee bishaanii fi inerjiitiin tumsa yeroo dheeraa fi cimaa ta'e akka qabdu ibsaniiru. Tumsi kun ijaarsa dandeettii dhaabbilee, muuxannoo waljijjiirraa dhaabbiilee damee wal-fakkaatu irratti hojjetan jiddutti taasifamu fi pirojektootamisooma bu'uuraa kan hammatudha jedhaniiru. Pirojektiin anniisa qilleensaa Asallaas tumsa biyyoota lamaanii kan agarsiisudha jechuun; Deenmaark dame bishaan fi inerjiitiin Itoophiyaaf michuu jabduu ta'uu ishee hubachiisaniiru. Tumsi biyyoota lamaan jiddus damee dhuunfaa hammachuun caalaatti jabaachuu akka danda'u fi kunis uummata biyyoota lamaaniitiif fayyidaa akka argamsiisu ibsaniiru. Deenmaark hojiiwwan Itoophiyaan misooma annisaa irratti raawwattuu fi taasiftuuf deeggarsa ishee akka itti fuftu dubbataniiru.

Onkololessa 23/2019(ENA): Gurmaa'insi Haaraan Waajjira Paartii Badhaadhinaa Lixa Oromiyaa hojiiwwan hanga ammaatti hojjetaman gamaaggamuun, hanqinoota jiran adda baasee, muuxannoo irraa baratame cimsuun kallattii hojii fuula duraa irratti mari'achaa jira. Kunis raawwii hojii fooyyessuu, gahumsa gurmaa'insa cimsuu fi galma misoomaa, nageenyaa fi badhaadhinaa milkeessuuf kan xiyyeeffate ta'uu Hoogganaan Waajjira Paartii Badhaadhinaa Godina Lixa Oromiyaa Obbo Taliilaa Tarrafaa ibsaniiru. Waltajjii gamaaggama hojii kana irratti Itti Gaafatamaa Damee Siyaasaa Waajjira Paartii Badhaadhinaa Damee Lixa Oromiyaa Obbo Badhaasaa Dhaabaa,Itti Gaafatamaa Damee Ijaarsaa Waajjira Paartii Badhaadhinaa Damee Lixa Oromiyaa Obbo Dassuu Lammii dabalatee hoggantootni Waajjira Paartii Damee Lixa Oromiyaa argamuun, raawwii hojii hanga ammaatti jiru gamaaggamuun kallattii hojii fuula duraa irratti mari'atamee jira. #Biyya Guddoo, Ummata Guddaa # Mul'ata Guddaa

  Hojii Oppireeshiniifi olaantummaa Seeraa mirkaneessuu fudhatameen, namoonni 73 to'atamanii qorannoon irratti gaggeeffamaa kan jiru ta'uufi Gandoota 6 humni Tsimdoo keessatti of mul’isu qulqulleessuun danda’amuus ibsameera. Onkoloolessaa 23/2019(ENA) – Uummanni Oromoo tokkummaa keessoo isaa fi sabootaafi sab-lammoota biroo waliin qabu cimsachuun, toftaa diigumsaa biyyaa fashalsuu, injifannoowwan galmeesse eeguu fi tokkummaan gara fuulduraatti tarkaanfachuu akka qabu Hogganaan Tajaajila Kominikeeshinii Oromiyaa, Obbo Hayiluu Addunyaa ibsan. Obbo Hayiluun ibsa dhimma haleellaa garee Tsimdoo jedhamuun Godina Oromiyaa Kibba Bahaa, Aanaa Shirkaa, Ganda Birboo Coolleetti raawwatame ilaalchisee kennaniin, mootummaan olaantummaa seeraa mirkaneessuu fi hawaasa miidhame deebisee dhaabuuf hojiiwwan garaagaraa hojjechaa jiraachuu ibsaniiru. Akka ibsa isaanii kanaatti, humnoonni kun adeemsa misoomaa fi jijjiiramaa haaraa eegalaman gufachiisuuf sochii shororkeessummaa irratti bobba’uun namoota nagaa ofirraa ittisuu hin dandeenye irratti haleellaa raawwataniiru. Haleellaa Onkoloolessa 14, bara 2019 A.L.I. Ganda Birboo Coollee, Aanaa Shirkaa keessatti raawwatameen lubbuun lammiilee nagaa darbuu, qabeenyi mootummaa fi uummataa gubachuu, akkasumas jiraattonni manneen jireenyaa fi qabeenya isaanii irraa buqqa’uu ibsameera. Haleellaa kana hordofee, olaantummaa seeraa mirkaneessuuf hojiiwwan nageenyaa gaggeeffamaniin namoonni 73 to’annoo jala ooluun qorannoon irratti gaggeeffamaa jiraachuu, akkasumas gandoonni humnoonni kunneen sochii itti taasisan jahan qulqulleeffamuu ibsaniiru. Mootummaan gama tokkoon olaantummaa seeraa mirkaneessuuf tarkaanfii fudhachaa, gama biraatiin ammoo lammiilee qe’ee fi qabeenya isaanii irraa buqqa’aniif deeggarsa namoomaa, nyaataa fi yaalaa dhiyeessaa jira. Akkasumas, lammiilee buqqa’an gara manneen jireenyaa fi qabeenya isaaniitti deebisuuf hojii hojjetamaa jiraachuu ibsichi ni mul’isa. Dabalataanis, sadarkaa garaagaraatti mariin hawaasaa gaggeeffamaa jiraachuu fi hawaasni gocha humnoota walta’anii kana balaaleffachaa jiraachuun ibsameera. Mootummaan Naannoo Oromiyaa tarkaanfiiwwan olaantummaa seeraa mirkaneessuuf fudhatu cimsuun akka itti fufuus ibsameera. Dhumarrattis, hawaasni miidiyaalee hawaasaa irratti odeeffannoowwan sobaa tamsa’an irraa of eeggachuu, odeeffannoowwan hin mirkanoofne dabarsuu irraa of qusachuu fi tokkummaa hawaasaa cimsuu akka qabu Obbo Hayiluun dhaamaniiru.

Onkololessa 23/2019 (ENA): Manni Maree Bulchiinsa Dirree Dhawaa walgahii ariifachiisaa jalqabaa Boru, waggaa 1ffaa bara hojii 4ffaa isaa ni gaggeessa jedhan Af-yaa’iin mana marichaa Caaltuu Huseen. Akka Afyaa’iin kun ibsa miidiyaaleef kennaniin, manni marichaa walga’ii ariifachiisaa kanarratti dambiiwwanii fi muudama adda addaa ni raggaasisa. Itti dabaluunis manni marichaa muudama dura taa’oota koree dhaabbii adda addaa ni raggaasisa; gibirri qabeenyaafi dambiiwwan biroos ni ragga’u.

Onkoloolessa 23/2019 (ENA) –Itoophiyaan hirmaannaa fi dippiloomaasii waltajjiiwwan naannoo fi addunyaa irratti agarsiisaa jirtu guddachuunsaa, faayidaa biyyaaleessa ishee kabachiisuu bira darbee, dhageettii fi dhiibbaa isheen waltajjii addunyaa irratti qabdu ol kaasaa dhufuu isaa hayyoonni ibsaniiru. Itoophiyaan nageenyaa, wabii nageenyaa fi walitti hidhaminsa dinagdee Gaanfa Afrikaa keessatti gahee seenaa fi dhiibbaa qabu kan qabdu yoo ta'u, dhiyeenya kana dippiloomaasii karaa hedduutiin dhiibbaa uumuu ishee mul’isaa jirti. Biyyittiin miseensa BRICS ta'uu isheetiin sadarkaa Addunyaatti dhageettiin dippiloomaasii Itoophiyaan qabdu kan haaroomse fi dinagdee, daldala dabalataanis damee investimentiitiin balbala walta'insaa haarawa kan bane ta'ee jira. Keessattuu yaa'ii Afriikaa-Raashiyaa 3ffaa Mooskootti gaggeeffame irratti hirmaannaa fi mariiwwan gamlamee dippiloomaasii yaa’ichaan cinaatti Itoophiyaan raawwatte, biyyoota gurguddoo addunyaa waliin tumsa tarsiimawaa qabdu cimsuu ishee kan agarsiisuudha. Waltajjiin kun Itoophiyaan damee daldalaa, investimentii, teeknoolojii, misooma anniisaa fi wabii nyaataa irratti waliigalteewwan faayidaa biyyaaleessa ishee kabachiisan akka mijeessitu, akkasumas dhimmooqan naannoo fi addunyaa irratti ejjennoo cimaa qabdu akka calaqqisiistu carraa guddaa uumeera. Kunis dhageettii fi dhiibbaa dippiloomaasii Itoophiyaan yeroo kaanii caalaa irra deebiiin akka dabalu taasisuu isaa hayyoonni siyaasaa fi dippiloomaasii hedduun ni ibsu. Barsiisaa Saayinsii siyaasaa fi hariiroo Alaa Yuunivarsiitii Bulee Horaa Iddoosaa Daggafaa akka jedhanitti; Itoophiyaan waltajjiiwwan dippiloomaasii addunyaa irratti faayidaa biyyaaleessa fi ejjennoo cimaa ishee eeggachuun furmaata waliinii barbaaduu fi dandeettii marii fi araaraa ishee sadarkaa ol'aanaatti guddisaa jirti. Barsiisaa Iddoosaan itti dabaluudhaanis; Itoophiyaan yaa'ii Addunyaa COP32 akka keessummeessitu filatamuu ishee fi biyyoota Baha gidduu galeessaa waliin tumsa dippiloomaasii qabdu cimsuu ishee akka fakkeenyaatti kaasaniiru. Yuunivarsiitii Jimmaatti kutaa barnoota seeraa fi bulchiinsaatti barsiisaa Dalliil Ahimeed gama isaaniitiin, dandeettiin dippiloomaasii Itoophiyaa fi hirmaannaa isheen waltajjii addunyaa irratti qabdu yeroo kaan caalaa guddachaa dhufuu isaa ibsaniiru. Keessattuu humnoota nagaa, wabii nageenyaa fi birmadummaa biyyattii booressuuf socho'an qolachuu bira darbee, haala dhugaa biyyattii ilaalchisee hawaasa addunyaatiif odeeffannoo qulqulluu dhiheessuudhaan hojiiwwan dippiloomaasii ishee cimsuun dandeettii fooyya'aa ijaaraa dhufuu isaa kan agarsiisu ta'uu ibsaniiru. Ministirri Muummee Dr. Abiyyi Ahimed yaa'ii Afrikaa-Raashiyaa 3ffaa irratti hirmaannaa taasisan walitti dhufeenyi alaa biyyattii bal'achaa dhufuu isaa kan agarsiisu keessaa isa tokko ta'uu kaasaniiru. Akka ibsa barsiisaa kanaatti, barbaachisummaan yaa'ii kanaa walitti dhufeenya Afrikaa fi Raashiyaa jiru cimsuu bira darbee, gahee dippiloomaasii Itoophiyaan Gaanfa Afrikaa fi waltajjii addunyaa irratti qabdu kan guddisuuf kan gargaaruudha. #Biyya Guddoo, Ummata Guddaa # Mul'ata Guddaa

Onkoloolessa 22/2019 (ENA) - Guuyyaa Sabaa fi Sablammoota Itiyoophiyaa 21ffaa Magaalaa Jimmaatti kabajamu sababeeffachuun mariin Abbootii qabeenyaa, Konkolaachiftoota fi gargaartota Taaksii waliin gaggeeffameera. Marichi qindoomina waajjira daandiif geejjibaa fi qajeelcha poolisii magaalaa Jimmaatiin kan qophaa'e yemmuu ta'u, hoggansi olaanoon irratti argamuun mariisisaniiru. Itti gaafatamaan Waajjira Paartii Badhaadhinaa Magaalaa Jimmaa Obbo Waasee Girmaa ergaa dabarsaniin kabaja guyyaa ayyaana sabaaf sablammootaa marsaa 21ffaa akka biyyaatti Magaalaa Jimmaatti kabajamu ilaalchisee hojiin isin hojjattan hundi dhimma safuu fi maqaa ummata Jimmaa waliin kan wal qabatu ta'uu hubattanii naamusa guutuun tajaajiluu qabdu jedhan. Obbo Waaseen itti dabaluun, qaamoleen hojii tajaajila taaksii irratti hirmaataa jirtan hojiiwwan misoomaa fi nageenyaa gurguddoo akka magaalaa Jimmaatti hojjatamaa turee fi jiru keessatti hirmaannaa ho'aa taasisaa turtaniif galata guddaa isiniif qabna jedhaniiru. Ayyaanni Sabaa fi Sablammoota Itiyoophiyaa 21ffaan bara kana akka biyyaatti magaalaa Jimmaatti kabajamu isinifis magaalaa Jimmaafis carraa guddaa fidee kan dhufu ta'uu hubachuun hirmaattotni ayyaana kanaaf magaalatti dhufan jaalala, nageenyaa fi kabaja magaalattiin ittiin beekamtu qabatamaan arganii ragaa ba'anii akka galaniif naamusa olaanaan tajaajiluu qabdu jedhaniiru. Itti gaafatamaan Waajjira Nagaa magaalattii Obbo Kadir Abdullee gama isaaniin, keessummootni ayyaana kanaaf gara magaalaa kanaatti dhufan karaa nagaa fi jaalalaan saganticha xumuuranii maqaa gaarii Jimmaan qabdu daran hubatanii akka galaniif ga'ee keessan ba'achuu qabdu jedhaniiru. Itti gaafatamaan Waajjira Daandii fi Geejjibaa Bulchiinsa Magaalaa Jimmaa Injinar Waaqjiraa Dhinsaa, gama isaaniin; tajaajilli Taaksii tajaajila bu'uraa waan ta'eef naamusa olaanaan hojjatamuu akka qabu kaasanii, dhimmoota akka rakkootti ka'an furuuf qindoominaan hojjanna jedhaniiru. Hirmaattotni gama isaaniin hojii keenya sirnaan hojjachuun keessummoota kana simannee tajaajiluun maqaa gaarii magaalattii ijaaruu keessatti ga'ee keenya ba'achuuf qophiidha jedhaniiru. waajjira komunikeeshinii magaalaa Jimmaarraa

Onkololessa 22/2019 (ENA): Itiyoophiyaan waltajjiiwwan naannoo fi idil-addunyaa irratti hirmaannaa cimaa fi dippiloomaasii cimsuun ishee dantaa biyyaalessaa biyyattii tajaajiluu qofa osoo hin taane dirree idil-addunyaa irrattis mul’achuun ishee akka dabale hayyoonni himan. Biyya Baha Afrikaa keessatti nageenyaa fi tasgabbii naannoo fi walitti hidhaminsa dinagdee keessatti gahee seenaa fi adda duree qabdu Itoophiyaan yeroo dhiyoo asitti dhiibbaa dippiloomaasii biyyoota hedduu keessatti qabdu haalaan babal’isaa jirti.   Biyyattiin gara ‘BRICS’tti makamuun ishee waltajjii idil-addunyaa irratti guddina dippiloomaasii ishee haaromsuun damee dinagdee, daldalaa fi invastimantii irratti balbala walta’iinsa haaraa baneera. Keessattuu, Itoophiyaan yaa’ii Afrikaa fi Raashiyaa 3ffaa Moskootti gaggeeffame irratti hirmaannaa cimaa gochuun ishee fi marii dippiloomaasii cinaatti taasifamu irratti hirmaannaa cimaa gochuun ishee, biyyittiin tumsa tarsiimoo humnoota addunyaa gurguddoo waliin qabdu cimsuu ishee agarsiisa.   Waltajjiin kun Itoophiyaan gama daldalaa, invastimantii, teeknooloojii, misooma anniisaa fi wabii nyaataatiin waliigalteewwan dantaa biyyaalessaa ishee kabachiisan haala mijeessuuf, akkasumas dhimmoota naannoo fi idil-addunyaa irratti ejjennoo cimaa qabdu calaqqisiisuuf carraa guddaa uumeera. Hayyoonni siyaasaa fi dippiloomaasii hedduun kunniin sagalee fi dhiibbaan Itoophiyaan damee dippilomaasii keessatti qabdu yeroo kamiyyuu caalaa akka socho’u taasiseera jedhu.   Yunivarsiitii Bulee Horaa keessatti barsiisaa saayinsii siyaasaa fi hariiroo alaa kan ta’an Iddoosaa Daggafaa akka jedhanitti; Itoophiyaan waltajjiiwwan dippilomaasii idil-addunyaa irratti ejjennoo cimaa dantaa biyyaalessaa fi ejjennoo cimaa ishee eegu furmaata waloo barbaaduu fi mari’achuuf dandeettii qabdu haalaan guddifachaa jirti. Barsiisaa Iddoosaan Itoophiyaan konfiraansii idil-addunyaa ‘COP32’ keessummeessituu ta’uun filatamtee fi biyyoota Baha Giddu Galeessaa waliin tumsa dippiloomaasii cimsuu ishee akka fakkeenyaatti kaasaniiru. Sochiin qaqqabummaa Galaana Diimaa galmaan gahuuf taasifamaa jiru of eeggannoo fi gaarii ta’uu ibsaniiru.   Yuunivarsiitii Jimmaatti kutaa seeraa fi Bulchiinsa irraa Barsiisaan Dalil Ahimad gama isaaniitiin dandeettiin dippiloomaasii Itoophiyaa fi hirmaannaan waltajjiiwwan idil-addunyaa irratti qabdu kan duraanii caalaa guddachaa akka jiru ibsaniiru. Keessattuu, humnoota nageenyaa, tasgabbii fi birmadummaa biyyattii miidhuuf hojjetan qolachuuf tarkaanfiiwwan fudhataman malees, haala dhugaa biyyattii ilaalchisee odeeffannoo ifa ta’e hawaasa addunyaaf kennuudhaan hojii dippiloomaasii cimsuun dandeettii fooyya’aa ijaaraa akka jiru kan agarsiisu ta’uu ibsaniiru. Walga’ii 3ffaa Afrikaa fi Raashiyaa irratti hirmaannaa cimaa Ministirri muummee Abiy yiAhimad (PhD) taasisan taateewwan hariiroon alaa biyyattii babal’achuu agarsiisan keessaa tokko ta’uu eeraniiru. Akka barsiisaan kun jedhanitti, barbaachisummaan yaa’ii kanaa walitti dhufeenya Afrikaa fi Raashiyaa cimsuu qofa osoo hin taane, ga’ee dippiloomaasii Itoophiyaan Gaanfa Afrikaa fi dirree bal’aa idil-addunyaa keessatti qabdu guddisuuf gargaara. Kunis kallattii hariiroo alaa biyyattiin hordofaa jirtu kan agarsiisu ta’uu isaa, qaama tokko qofa irratti kan daangeffame osoo hin taane michoota idil-addunyaa adda addaa waliin hariiroo wal-fayyadu uumuuf akka ta’e akeekeera. Kanaaf Itoophiyaan dhimmoota naannoo fi idil-addunyaa irratti hirmaannaan qabdu, hariiroon biyyoota adda addaa waliin qabdu guddachaa dhufuu, akkasumas waltajjiiwwan idil-addunyaa irratti ejjennoo mataa ishee dabarsuu danda’uun ishee cimee akka jiru ibsaniiru.