Mudde 4/2018 (TOI)- Godinaalee wallaggaatti nageenya cimsuun fayyadamummaa misoomaa lammiilee mirkaneessuuf tattaaffiiwwan taassifaman bu’aa qabatamaa fidaniiru jechuun jiraattonni Magaalaa Naqamtee fi Godinalee wallagga lixaa dubbatan. Matad uree “ Labsiiwwan Guubaa bu’aawwan mootummaa Ida’amuu” jedhuun Mariin hawaasaa Jiraattota Magaalaa Naqamtee fi Godina wallagga bahaa hirmaachise gaggeeffameera. Marii Hawaasaa kanarratti Bulchaan naannoo Beniishaangul Gumuz Obbo Ashaadilii Hasan, Ministirri nageenyaa Mahaammad Idiriis, sadarkaa Itti Aanaa Pirezidaantii Naannoo Oromiyaatti qindeessaa kilaastara misooma Magaalaa Obbo Masfin Malaakuu fi hoggantoonni Godinaalee, Aanaalee fi Bulchinsota magaalaa argamaniiru. Hirmaattota Waltajjichaa kan ta’an jiraattonni magaalaa naqamtee fi naannooshee yaada kennaniin , mootummaan jijjiiramaa xiyyeeffannoo naannichaaf kenneen nageenya cimsuuu fi hojii misoomaa raawwachuuf haalli mijataan uumameera jedhaniiru. Hirmaattota marichaa keessaa Jiraataa Magaala Naqamtee fi jaarsa biyyaa Sheeh Naasir Nuuruu akka ibsanitti, godinichatti waggoottan darban rakkoon nageenyaa mudatee ture dhabamee, hojiin misoomaa hojjetamaa jira jedhaniiru. Kanaanis pirojektoota gurguddoo dabalatee misoomni hawaasummaa fi Diinagdee hedduun raawwatamaa waan jiruuf mootummaan galateeffamuu qaba jedhaniiru. Hojiiwwan misoomaa magaalichaaf carra gaarii fidan kanneen akka buufata Xiyyaara, ijaarsa daandii konkolaataa Naqamtee-Buree, misoomni koriidaraa, suphaa Daandii Naqamtee-Amboo, waarshaa industirii qindeessa qonnaa akka fakkeenyaatti kan kaasan sheeh Naasir nageenya uumameen misoomichi hirmaannaa keenyaan itti fufa jedhaniiru.   Jiraataan Aanaa Giddaa Ayyaanaa Damissoo Geetaachoo, hojiiwwan misoomaa naannichatti eegalaman itti fufinsa akka qabaataniif akka jiraataatti deeggarsa taassisan cimsanii akka ittifufan ibasaniiru. Dabalataanis Jiraataan Aanaa Eebantuu aanichi qabeenya dilbii qabu gara qabeenyatti jijjiiruun fayyadamummaa hawaasaaf oolchuu qaba jechuun obbo Fiqaaduu Taammiruu ibsaniiru. Akkasuma jiraattuun aanaa Biilaa Aadde Shubbituu Galaan bu’uuralee misoomaa daandii dabalatee hojiiwwan misoomaa biroon akkaa hojjetamaniif nageenya naannoo keenyaa cimsinee eegganna jedhaniiru. Waltajjii marichaa kan gaggeessan Bulchaan Naannoo Beniishaangul Obbo Ashaadilii Hasan, Ministirri Muummee Dr.Abiyyi Ahimad labsiiwwan Guubaatti ifoomsan kan milkaa’an hirmaanna qindaa’aa hawaasaan ta’uu ibsaniiru. Waggoottan jijiiramaa darban qonnaan, daandiin, Barnootaa fi misooma Hawaasummaa fi Dinagdee biroon fayyadamummaa hawaasaa kan guddisan hojjetamaniiru. Fuuldurattis ummanni mootummaa cinaa dhaabbachuun nageenya waaraa buusuun hojiiwwan misoomaa haala hunda galeessa ta’een akka raawwataman taassifamuu akka qaban hubachiisaniiru.   Hojiin misooma koriidaraa magaala Naqamteetti eegalame magaalicha jiijiiraa jiraachuu ibsuun kunis cimee akka ittfufuuf tattaafachuu qabna jedhaniiru. Gaaffiiwwan hirmaattota waltajjichaarra ka’an sirrii fi wayitaawaa ta’uu ibsuun qaammni mootummaa dhimmichi ilaallatu sadarkaa sadarkaan deebii akka itti kennu hubachiisaniiru. Ministirri nageenyaa Mahaammad Idiriis Mootummaan naannichatti nageenyi waaraan akka bu’uuf xiyyeeffannoo kennee hojjechuusaan bu’an argameera jedhaniiru. Ministirri Muummee Boqonnaa malee Halkanii fi Guyyaa hojjechuun biyya keenya jijiiraa jiru, nuyis bakka jirrutti boqonnaa malee hojjechuun biyya keenya jijiiruu qabna jechuun ibsaniiru. Sadarkaa Itti Aanaa Pirezidaantii Naannoo Oromiyaatti Qindeessaa Kilaastara Misooma Magaalaa Obbo Masfin Malaakuu, naannichatti hojiiwwan misoomaa abdachiisoon hojjetamaa kan jiran waan ta’aniif hawaasni nageenyasaa cimsuun hojiiwwan kun itti fufinsa akka qabaatan gochuu akka qaban hubachiisaniiru. Gaaffiiwwan hirmaattonni waltajjichaa kaasan deebii ariifataa akka argatuuf mootummaan naannichaa xiyyeeffannoo kennee akka hojjetu mirkaneessaniiru.

Mudde 4/2018(TOI)- Milkaa’inoota qindoomina mootummaa fi ummataan argaman gabbisuun biyya badhaate dhaloota dhufuuf dabarsuuf akka hojjetan jiraattonni marii ummataa jimmatti gaggeeffamerratti hirmaatanibsan. Kutaaleen hawaasaa godinaa fi bulchiinsa magaalaa Jimmaarraa walitti dhufan mata duree Labsiiwwan Gubaa bu’aalee mootummaa ida’amuu” jedhuun haala yeroo biyyaarratti marii gaggeessaniiru. Hirmaattonni yaada kaasaniin akka ibsanitti, jijjiiramaan asitti mootummaan milkaa’inoota misoomaa dinqisiisoo hedduu galmeessiseera. Misoomni magaalaa, hojiileen qonnaa baratti darban magaalaa jimmaatti hojjetamaa jiraachuu ibsaniiru. Haala Kanaan Itiyoophityaa badhaate dhugoomsuun dhaloota dhufuuf dabarsuuf galmoota qabaman milkaa’uunsaanii eerameera. Bulchaan naannoo Hararii Ordiin Badrii haasaa baniinsaa taasisaniin, bu’aaleen misoomaa qabatamaan badhaadhina Itiyoophiyaa dhugoomsan galmaa’aniiru jedhaniiru. Gama qonnaa, Industirii, Turizimii, albuudaa fi dijitaalaan akkasumas carraa hojii gama uumuutiin dameelee misooma magaalaa fi kanneen biroonis hojiileen quubsaan hojjetamuusaanii dubbataniiru.   Labsiiwwan Gubaa ministira muummee DR Abiyyi Ahimadiin labsaman bayyanachuu Itiyoophiyaa kan dhugoomsanii fi guddina biyyaa si’oomsuu kan dandeessisanidha jedhaniiru. Hojiileen hojjetaman bu’a qabeessa waan ta’aniif baandaan keessaa fi alagaan alaa gaaffii abbummaa ulaa galaanaa dhaabsisuu akka hin dandeenye ibsaniiru. Injifannoowwan gurguddoo qindoomina mootummaa fi ummataan argaman dhamdhamachaa milka’ina caaluuf qophaa’uun akka barbaachisu eeraniiru. Kantiibaan magaalaa Jimmaa Xahaa Qamar barreeffama ka’umsa mariif dhiheessaniin, jijjiiramaan asitti gaaffilee misoomaa fi bulchiinsa gaarii deebisuuf magaalaa Jimmaatti hojiileen bu’a qabeessi raawwatamuu dubbataniiru. Gama carraa hojii uumuu, misooma magaalaa, bu’ura misoomaa babal’isuu, oomishtummaa guddisuun, fayyadama hawaasummaa fi dinagdee ummataa caalaa mirkaneessuutiin bu’aaleen quubsaan galmaa’aniiru. Gaaffilee bulchiinsa gaarii ummatatti dhihaachuun deebisuuf bulchiinsi gandaa hedduun gurmaa’uusaanii eeranii, gama nageenyaatiinis ummata hirmaachisuun bu’aaleen galmaa’uu dubbataniiru.   Fuulduras dhiibbaa qaala;insa jireenyaa xiqqeessuuf, kenninsa tajaajilaa caalaa ammayyeessuu fi bu’uraalee misoomaa caalaa babal’isuuf xiyyeeffannoon olaanaa kennamuu eeraniiru. Hirmaattonni yaada kaasaniin, jijjiiramaan asitti milkaa’inoonni akka misooma magaalaa, gama qonnaan ammo Qamadii, Shaayee akkasumas oomisha Ruuziitiin hojiileen baratti darban hojjetamaa jiru jedhaniiru. Itiyoophiyaan ulaa galaanaa shiraan dhabde abbummaan akka harkatti galfattu qoodasaanii akka bahan eeranii, dhaloonni sirriitti akka hubatu maneen barnootaatti hubannoon akka uumamu dubbataniiru. Paartii badhaadhinaatti hoogganaan waajjira damee ijaarsaa naannoo Oromiyaa Namarraa Bulii yada kennaniin, dhiibbaa qaala’insa jireenyaa xiqqeessuuf oomishtummaa guddisuuf xiyyeeffannoon olaanaan taasifamuu eeranii, maaddii guutuu fi qonna magaalaatiin hojiileen bu’a qabeessi hojjetamaa akka jiru ibsaniiru.   Rakkoolee kenniinsa tajaajilaa fi bulchiinsa gaarii furuuf bakka hundatti bulchiinsi gandaa diriirfamuu eeranii, tajaajilli wiirtuu tokkoo Masoob naannicha bakkee shanitti gurmeeffamaa akka jiru eeraniiru. Itti aanaan kantiibaa fi hoogganaan biiroo misooma Industirii magaalaa Finfinnee Jaanxiraar Abbaayi waltajjicharratti akka jedhanitti, mootummaan fayyadama hunda galeessa lammiilee mirkaneessuuf misooma raawwacha akka jirudubbataniiru. Bulchaan naannoo Hararii Ordiin Badrii, Itti aanaan Kntiibaa fi hogganaan biiroo misooma Industirii magaalaa Finfinnee Jaanxiraar Abbaayi, Paartii badhaadhinaatti hoogganaan dame ijaarsaa waajjira damee naannoo Oromiyaa Namarraa Bulii, bulchaan godina Jimmaa Tiijaanii Naasir fi hirmaattonni magaalicharraa walitti dhufan waltajjicharratti argamaniiru.

Mudde 3/2018(TOI)-Manni maree waloo paartilee siyaasaa Itiyoophiyaa ijaarsa sirna demokiraasii guddisuuf hojii hojjetamuu keessatti qoodasaa bahuuf xiyyeeffatee hojjechaa akka jiru beeksise. Manni maree waloo paartilee siyaasaa Itiyoophiyaa maneen maree waloo siyaasaa naannolee wajjin waltajjii maree gaggeessaa jira. Gabaasni waggaa kan bara 2017 fi karoorri bara 2018 Mana maree waloo paartilee siyaasaa Itiyoophiyaa fi maneen maree waloo naannoo dihaatee akka mari’atamu ibsameera. Walitti qabaan mana maree waloo paartilee Siyaasaa obbo Salamoon Ayyalaa wayita kana akka dubbatanitti, manni marichaa ijaarsa sirna demokiraasii biyyattiitti guddisuuf xiyyeeffatee hojjechaa jira. Manni marichaa nageenya waaraa biyyaalessaa mirkaneessuuf qaamolee qooda fudhattootaa waliin waliin hojjechaa akka jiru eeraniiru. Mariin biyyaalessaa akka milkaa’u ajandaa walitti qabuun dhiheessuu irraa eegalee komishinicha waliin hojjechaa akka jiru beeksisaniiru. Filannoon biyyaalessaa torbaffaan haqa qabeessa, of danda’aa fi iftooma kan qabu akka ta’u qaamolee dhimmi ilaallatu waliin ta’uun hojjechaa akka jiru dubbataniiru.

Mudde 3/2018 (TOI)-Biyyoonni Afriikaa Bahaa walitti hidhamiinsa riijinii fi mirkanaa’uu nageenya waaraaf kutannoon hojjechuu akka qaban barreessaan olaanaa IGAD Dr. Warqinaa Gabayyoo hubachiisan. Wal gahiin koree ambaasaaddaroota IGAD kaleessa Jibutiitti gaggeeffameera. Barreessaan olaanaa IGAD Dr. Warqinaa Gabayyoo fi miseensonni koree ambaasaaddarootaa walgahicharratti argamaniiru. Koreen ambaasaaddarootaa IGAD tarsiimoo IGAD A.L.A bara 2026 amma 2030tti turu raggaasiseera. Dabalataanis Koreen kun bajata IGAD 2026 irratti mari’achuun hojiitti akka galu murteesseera. Kallattiiwwan hojii fuulduraa dhaabbata riijinichaas akeekeera. Riijinii nagaa, walitti hidhamee fi qormaata damdamatu ijaaruuf tumsii fi kutannoon waloo biyyootaa miseensotaa murteessaa ta’uu barreessaan olaanaa IGAD Dr. Warqunaa Gabayyoo wayita kana dubbataniiru. Karaa wal qabateen Koreen ambaasaaddarootaa IGAD walgahichaan cinaatti ijaarsi waajjira muummee haaraan IGAD maalirra akka jiru ilaaleera. Ijaarsi bu’ura misoomaa kun dandeettii dhaabbatummaa fi tumsa waloo cimsuuf akka gargaaru barreessaan olaanaa kun dubbachuusaanii odeeffannoon Tajaajilli Oduu Itiyoophyaa Sakireetaariyaatii IGAD irraa argate nimul’isa. Koreen ambaasaaddaroota IGAD ambaasaaddarootaa fi dippiloomaatota biyyoota miseensaa dhaabbata riijinichaa ofkeessatti qabata. Hojiileen ijoo Koree kanaa IGADiin gorsuu, hordoffii fi deeggarsa hojiirra oolmaa imaammataa, hojmaata biyyoota miseensotaa qindaa’aa gochuu, yaada gorsaa fi yaadota murtoo dhiheessuu ykn rggaasuudha.

Mudde 03/2018(TOI)-Mariin Biyyoolessaa carraa jireenya keessatti yeroo tokko qofaa argamuu kan danda’u waan ta’eef, milkaa'ina isaaf garaagarummaa malee hirmaachuu qabna jedhe Manni Maree Bakka Bu'oota Uummataa. Komishiniin Marii Biyyoolessaa Itiyoophiyaa Yaa’ii Guutuu Biyyaalessaa (National Plenary) jalqabuuf qophii xumuraa jiraachuu marii Mana Maree Bakka Bu’oota Ummataa keessatti gaggeeffameen beeksiseera. Marichaan dhimmoota naannoo Tigraay dabalatee hojiiwwan hafan tokko tokko saffisaan xumuramuu kan dandeessisanii fi yeroo gabaabaa keessatti konfiraansii Marii Biyyoolessaa eegaluu danda’an irratti mariin bal’aan gaggeeffameera. Marii naannoo Tigraayitti gaggeeffamuuf hojiin haaldureewwanii raawwatamuu haala qindaa’aa ta’een kan gaggeeffame yoo ta’u, waltajjiiwwan duraa adda addaa kan bulchiinsa yeroo fi qooda fudhattoota biroo hirmaachise gaggeeffameera. Akkasumas waltajjiiwwan kanneen irraas yaadni galtee gaarii ta’u argamuu himameera. Dabalataan, Komishiniin Marii Biyyaalessaa mala haala naannichaa jiru tilmaama keessa galche fayyadamuun, ajandaa naannichaa qindeessuun, hirmaattoota Yaa’ii Marii Biyyaalessaa filachuun hojii hafe xumuruuf waliigaltee irra ga’uu isaa ibsameera. Kanaafis ummanni Tigraay guutuun, paartileen siyaasaa naannicha keessa socho’an, hayyoonni, dhaabbileen hawaasa siivilii fi qooda fudhattoonni dhimmi kuni ilaallatu hojii komishinichaa ajandaa isaa milkeessuu fi hirmaattota konfiraansii naannoo Tigraay filachuu irratti guutummaatti akka deeggaran ergaan dabarfameera. Mariin Biyyoolessaa seenaa keessatti al tokko qofaa argamuu waan danda’uuf,hunduu milkaa’ina isaaf tumsuu akka qabu dhaamaniiru. Har’as balballi nagaa banaa ta’uu ibsuun, humnoota hidhatanii naannoo adda addaatti walitti bu’iinsa keessa jiran dabalatee, qaamni dhimma siyaasaa qaba jedhu kamiyyuu ajandaa isaa Komishinii Marii Biyyoolessaaf karaa nagaa akka dhiyeessu irra deebi’anii waamicha dhiyeessaniiru. Aadaa siyaasaa keenya duubatti hafe bu’uuraan jijjiiruuf tattaaffii taasifamu keessatti namni hundi gahee isaa akka ba’uu fi Yaa’iin Marii Biyyaalessaa milkaa’inaan akka xumuramu waamicha dhiyeessuun Manni Marichaa marii kana xumureera. Marii kana irratti Afyaa’iin Mana Maree Bakka Bu’oota Uummataa, itti aanaa Afyaa’ii, Mana maree Bakka bu’oota uummataatti Ministira itti waamamaa mootummaa, Hogganaa fi itti Aanaa Hogganaa Komishinii Marii Biyyaalessaa, komishiniinaroonni hundi, hoggantoonni koree dhaabbii dhimma dimokiraasii fi qooda fudhattoonni biroo hirmaataniiru.

Mudde 02/2018(TOI)-Nageenya amansiisaa Baha Itiyoophiyaa itti fufsiisuun, Pirojektoonni misoomaa jalqabaman karaa nageenya amansiisaan akka milkaa’aniif qindoominaan akka hojjetamu itti aanaan ajajaa Iizii Bahaa Meejer Jeneraal Fiqaaduu Tsaggaayee ibsan. Naannoolee ollaa Baha Itiyoophiyaa, bulchitoota godinootaa fi aanotaa,human waloo Nageenyaa nageenyaa fi tasgabbii irratti mariin gaggeeffameera. Kaayyoon marii kanaa humnoota nageenyaa godinootaa fi bulchiinsa magaalotaa daran cimsuu fi nageenyaa fi tasgabbii naannoo eegsisuuf akka ta’e himameera. Naannichatti nageenyaa fi tasgabbii itti fufsiisuuf hunduu tumsaan hojjechuu qaba jedhan Meejer Jeneraal Fiqaaduu Tsaggaayeen. Kessumaa naannichi bakka kontiroobaandiin itti hedduummatuu fi shororkeessitoonni nageenya booressuuf socho’an waan ta’eef, qaamoleen nageenyaa hawaasa waliin ta’uun halkanii fi guyyaa nageenyaaf akka hojjetan ibsaniiru. Waltajjii marii kana irratti hoggantoonni nageenyaa fi komishinaroota poolisii naannoo Oromiyaa Godinoota Harargee Bahaa fi Lixaa, Godinoota Somaalee godinoota Siitii fi Faafen, bulchiinsa magaalaa Dirree Dhawaa fi bulchiinsa magaalaa Maayaa, akkasumas hoggantoonni olaanoo Ajaja Bahaa fi Poolisoonni Fedaraalaa argamaniiru.

Mudde 02/2018(TOI)- Adeemsa Masriin laga Abbayyaa irratti Seenessa koloneeffataa adeemsisaa jirtu goolabameera jedhan Waajjira Ministira Muummeetti Ministirri Qindeessaa Ijaarsa Sirna Dimookiraasii doktar Biqilaa Hurrisaa. Yaadama bara koloneeffataan faaydaa mirkaneeffachuun akka hin danda’amne dubbataniiru doktar Biqilaa Hurrisaan. Doktar Biqilaa Hurrisaan Miidiyaa Palsi Of Afrikaa waliin haasaa taasisanin, Ministirri Dhimma Alaa Gibtsii Mahaammad Abdallaattii dhimma Hidha Haaromsaa Guddicha Itiyoophiyaa ilaachisee yaada kennan cimsanii balaaleffataniiru. Masiriin yaada nagaafi tasgabbii booressu irraa of qusachuu qabdi jedhaniiru. Dabalataanis yeroon seenessa koloneeffataa Masriin laga Abbayyaa irratti adeemsisaa jirtu barri isaa irra darbeera jedhani. Yaanni Ministira Dhimma Alaa Masriin dhiyaate yaada yeroo ammaa kan hin madaalle ta’uu eeraniiru. Masiriin Laga Naayil anumti qofaan olaantummaan fudhachuu qaba kan jettu seenessa yeroo hin madaalle waan ta’eef nageenya naannawaafis sodaa keessaa kan galchu dha jedhani. Yaanni isaanii kuni immoo faayidaa biyyoolessaa Itiyoophiyaa kan faallessuufi fudhatama kan hin qabne ta’uu himani. Mootummaan Masirii Itiyoophiyaan akka hin tasgabboofneef garee ergamtootaa deeggaruun,filachuun hojiitti bobbaasuu eeruun,kuni amala itti gaafatamummaa hin qabne goolii uumuu ta’uu ibsaniiru. Gama mirga itti fayyadama bishaanii fi tumsa naannootiin yaada isaanii kan kaasan Ministirri kun, Itiyoophiyaan laga Abbayyaa harka caalu kan ishee uwwisu qabeenya ishee fayyadamuuf mirga seeraa qabdi jedhan. Gama biraatiin, gaaffiin Itiyoophiyaa mirga abbummaa ulaa galaanaa seera qabeessaa fi qajeelfama irratti kan hundaa’e ta’uu ibsaniiru doktar Biqilaa Hurrisaan. Hawaasni Idil Addunyaas gaaffii mirga abbummaa kana beekamtii kennaa jiraachuu ibsaniiru. Ejjennoon Masriin laga Abbayyaa qofatti fayyadamuu ishee yeroon kan irra darbee fi yaada koloneeffataa ta’uu isaa, akkasumas yaadaafi mala yeroon barbaadu waliin kan wal hin simne ta’uu akeekaniiru. Adeemsa Masriin laga Abbayyaa irratti Seenessa koloneeffataa adeemsisaa jirtu goolabameera jedhani. #Tajaajila Oduu Itiyoophiyaa #TOI

Mudde 01/2018(TOI)-Itiyoophiyaa fi Zaambiyaan damee waraanaa irratti tumsaan waliin hojjechuuf dhimmoota isaan dandeessisu irratti waliif mallatteessaniiru. Walii galtichi hariiroo yeroo dheeraa biyyoota gidduu ture cimsuu fi damee waraanaa adda addaatiin faayidaa waloo irratti hojjechuuf kan kaayyeffate ta’uun ibsameera. Haaluma kanaan Itaamaajoor shuumiin walii galaa humnoota waraanaa Fiildi Maarshaal Birhaanuu Juulaa fi Itaamaajoor shuumiin Waliigalaa Zaambiyaa Jeneraal Jeefri zi'eel gidduutti erga mari'ataniin booda hoggantoonni ittisaa sadarkaan jiranis waliigaltee kana mallatteessaniiru. Itiyoophiyaan nageenyaa naannawaa fi biyyootaa tasgabbeessuuf kutannoon kan hojjettu ta’uu himan Fiild Maarshaal Birhaanuu Juulaan. Hariiroo Zaambiyaa waliin jiru daran cimsuuf kan hojjetan ta’uu mirkaneessaniiru. Leetanaan Jeefrii Zi’eel gama isaaniin, waliigalteen loltummaa biyyoonni lamaan mallatteessan tumsa fooyya’aa uumuun fayyadamummaa waloo caalmaatti guddisuuf shoora qabaachuu dubbataniiru. Hoggantoonni Raayyaa Ittisaa biyyoota lameenii waliigalticha kan mallatteessan yoo ta’u, kunis hariiroo bara dheeraa biyyoota lamaanii caalmaatti cimsuu fi dameewwan loltummaa adda addaan fayyadamummaa waloof hojjechuuf kan kaayyeffate ta'uu ibsameera.