Itiyoophiyaa badhaate, birmadummaa dijitaalaashee eegatte, kalaqaa fi teeknooloojiin ga’oomte Galmoota mootummaan badhaadhina mirkaneessuuf murteessoodha jechuun karoorse keessaa Dijiitaalla Itiyoophiyaa Ijaaruun dhimmoota xiyyeeffannoon kennameefidha. Carraa Itiyoophiyaa fuulduraa guddina kalaqaa fi teekinooloojii irratti ijaaruuf Tarsiimoo Diinagdee dijiitaalaa qulqullina qabuu fi yeroo waliin tarkaanfatu dinagdee hirmaachisaa ijaaruu kan dandeessisu bu’aan argamaa jira. Akkuma beekamu galma kana milkeessuuf Mootummaan tarsiimoo Dijiitaalaa 2025n bocee gara hojiitti galee ture. Dijiitaalli Itiyoophiyaa 2025 kallattii hundaan bu’aan ajaa’ibsiisaan kan itti galmaa’e yoo ta’u, Tarsiimichi ergamasaa milkaa’inaan xumuree Dijiitaala Itiyoophiyaa 2030’f dabarsee kenneera. Dijiitaala 2025 gabaa teeleekoomii banuu fi babal’isuun dhaqqabamummaa tajaajila Intarneetaa fi mobaayilaa guddisuun akka danda’au taasiseera. Pirojektiin enyummeessaa Dijiitaalaa Biyyoolessaa (Fayida) nageenyisaa eegame Itiyoophiyaanota hundaan gahuuf hojjetame, tajaajiloonni bulchiinsa dujutaalaa, tajaajilli dijitaalaa wiirtuu tokkoo Masoob tajaajila ammayyaa fi si’ataa gama qaqqabsiisuutiin tarkaanfiin guddaan kan itti argamedha. Kan biroon Sagantaa Koodarsii Miiliyoona 5nii dandeettii Dijiitaalii babal’isuurratti bu’aan boonsaan argameera. Dabalatais Inistitiyuutiin hubannoo nam-tolchee hundaa’uun, bu’uuraalee misoomaa Hawaasaa (PKI) eegalamuu, Faayibarii Intarneetaa 4G/5G babal’isuu, gurgurtaa faayinaansii Dijiitaalaa kanneen fakkaatan hundi agarsiistuu milkaa’ina ergama Dijiitaala 2025 ti. Kana ka’umsa godhachuun mootummaan Tarsiimoo Dijiitaalaa 2030 bocee hojirra oolchuu eegaleera. Tarsiimoon kun birmadummaa Djiitaalaa kan eege, Itiyoophiyaa Kalaqaa fi Teekinooloojiin hundoofte uumuuf tarsiimoo deeggaru yoo ta’u, Tarsiimichi teekinooloojii Mala Jireenyaa gochuun badhaadhina hunda galeessa mirkaneessuuf kan kaayyeffatedha. Utubaawwan Tarsiimichaa jedhamanii kan eeraman keessaa - 1. Dhaqqabamummaa babal’isuu- garagarummaa Dijiitaalaa magalaa fi baadiyaa gidduu jiru dhiphisuun lammiileen bakka kamittuu fayydamoo teekinooloojii akka ta’an gochuu. 2. Carraa wal-qixa uumuu - Lammiileen Diinagdee Dijiitalaa keessatti hirmaannaa fi fayyadamummaa wal-qixaa akka qabaatan haala mijataa uumuu. 3. Wal amantaa ijaaruu - dhaabbilee fi lammiilee gidduutti nageenyaa saayibarii fi eegumsa Daataa mirkaneessuun sirna Dijiitaalaa nageenyisaa eegame ijaaruun keessatti argama. Akkasumas Tarsiimoon kun Itiyoophiyaan Diinagdee dijiitaalaa Addunyaa Keessatti dorgommii qabdu kan itti mirkaneessituu fi tajaajiloonni mootummaa ifaan lammiileef karaa itti dhiyaatan kan mijeessudha. Kanarra darbees tarsiimichi gama qonnaan, Meeshaalee Dijiitalaa Ammayaa hammachiisuun, omishtummaa fi qulqullina tajajilaa guddisuu, faayinaansii fi barnootaan, hirmaachisummaa faayinaansii mirkaneesuu fi yaadama kalaqa dijiitaalaa dhaloota boruu idileessuu, carraa hojii uumuu, dargaggoota kalqxoota hojii dijiitaalaaf haala mijataa uumuun dandeettii kalaqasaanii gara sona dinagdeetti akka jijjiiran dandeessisuuf faayida qaba. Itiyoophiyaa bakkeewwan hawata Tuuristii filannoowwan dijiitaalaan Addunyaaf beeksisuun galii sharafa alaa guddisuun galma tarsoomoo kanaa isa biroodha. Dijiitaalli Itioophiyaa 2030 appilikeeshinoota qabeenya uumaani fi dandeettii dijiitaalaa sadarka olaanaan guddisuun hirmaachisummaa faayinaansii karaa teekinooloojiin dijiitaalaa mirkaneessuu fi lammiileen sochii Diinagdee biyyaa keessatti hirmaannaa ho’aa akka taasisan dandeessisuuf ergama qaba. Tajaajila komunikeeshinii Mootummaa

  Mudde 19/2018(ENA)- Tattaaffii mootummaan diinagdee magariisaa ijaaruuf taasisu keessatti gahee isaanii bahachaa jiraachuu oomishtoonni ibsani. Fooramiinii fi agarsiifni sochii faalama hir’isuu lammaffaa ‘Green Mobility” 20125, Giddugala Konveenshinii Idil-addunyaa keessatti bakka itti aanaan Ministira Muummee obbo Tamasgeen Xurunaa argamanitti banameera.   Itti aanaan muummichi ministeeraa ergaa fuula miidiyaa hawaasummaa isaanii irratti dabarsaniin imalli biyya magariisaa fi badhaate dhaloota itti aanutti dhaalchisuu gama hundaan milkaa’inaan itti fufuu ibsuun isaanii ni yaadatama. Agarsiisni fi waltajjiin kun imala seena qabeessa Itiyoophiyaan ijaaruuf eegalte kan agarsiisu ta’uu ibsaniiru.   Dhaabbilee agarsiisa kanarratti oomisha isaanii dhiyeessan keessaa Daarektarri Olaanaa Beekaa Giruuppii Mikaa’el Kaasaa tokko yoo ta’an, yeroo jalqabaaf piroojektii konkolaattota elektirikaa gurguddoo hojjechuuf walitti qaqqabsiifaman hojjetamaa jiru agarsiisa kanarratti dhiyeessaniiru.   Yeroo ammaa kana hojiin meeshaalee konkolaattotaa walitti qaqqabsiisuu kun dhaabbata Chaayinaa Shaakmaan jedhamu waliin akka jalqabame eeruun, ji’a afur boodas hojii akka jalqabu dubbataniiru. Dhaabbata Giruuppii Balaaynaa Kindeetti daarektarri Komunikeeshinii obbo Saxxanyi Ingidaa akka jedhanitti, agarsiisni kun dhaabbatichi konkolaattota anniisaa haaromfamuu danda’an akka beeksisu carraa kan uume ta’uu ibsaniiru. Agarsiisa kana irratti anniisaalee baasii qusataniifi faalama hir’isuu danda’an konkolaattota elektirikaa dhiyeessuu eeruun, kanaanis gahee isaa bahachaa jiraachuu ibsaniiru. Deetaa Ministiraa Geejjibaa fi Loojistiksii Bara’oo Hasan gama isaaniin akka ibsanitti, Konkolaattota anniisaa haaromfamuu danda’aniif, sadarkaa (istaandaardii) irraa kaasee hanga imaammataatti xiyyeeffannoo addaa kennuun Afrikaa keessatti gahee adda duree akka taphatu isa dandeessiseera jedhan.   Bara 2030tti lakkoofsa konkolaattota elektirikaa gara kuma 500tti guddisuuf hojiin hojjetamaa jiraachuu eeruun, kanaan walqabatees invastimantii fi tumsa barbaachisu uumuuf agarsiisni kun murteessaa ta’uu hubachiisaniiru.  

Mudde18/2018(ENA)-Tarsiimoon Dijiitaala Itiyoophiyaa 2030 magaalota Teekinooloojiin ammayaa’an ijaaruu fi haala jireenya lammiilee foyyessuuf humna guddaa akka uumu Ministirri Magaalaa fi Bu’uura Misoomaa Aadde Caaltuu Saanii ibsan. Ministirri Mummee Doktar Abiyyi Ahimad Dijiitaala Itiyoophiyaa 2030 yeroo jalqabsiisan dhaqqabamummaa babal’isuu, Lammiileef Carraa walqixa uumuu akkasumas lammiilee fi dhaabbilee gidduutti wal amantaa dagaagsuun galma ijoo tarsiimichaa ta’uu ibsuunsaanii ni yaadatama.   Karoorawwan kana milkeessuuf bu’uuraaleen misooma ummataa babal’isuu hojiiwwan ijoo ta’uu ibsuun, teekinooloojii kan namarratti xiyyeeffachuun haala jireenya guyyaa guyyaa lammiilee fooyyessuuf humna guddaa uuma jedhaniiru. Ministirri magaalaa fi bu’uuraalee Misoomaa Caaltuu Saanii turtii ENA waliin taasisaniin Mootummaan ida’amuu magaalonni kan kalaqaa, teekinooloojii fi agarsiistuu badhaadhinaa akka ta’aniif hojjechaa jira. Tarsiimoon Dijiitaala Itiyoophiyaa 2025 magaalota “smart City” gochuuf kan dandeessisu bu’uurri cimaan kaa’amuu dubbataniiru. Kunis magaalonni qophii karooraa eegalee dijiitaalaan akka gaggeeffaman taasisuunii fi kenna tajaajilaa ammayyeessuurratti qooda olaanaa gumaachuu ibsaniiru. Kanaanis jiraattotaaf magaala mijattuu, gurgurtaa elektirooniksii, kenna tajaajilaa si’ataa lammmiileef kennuun kan danda’ame akka ture kaasaniiru. Kanaanis bu’aa argamuu fi guddina magaalotaaf bu’uura guddaa kaa’ee milkaa’inaan xumuramuu kaasaniiru. Tarsiimoon Dijiitala Itiyoophiyaa haaraan 2030 magalummaa “smart City “ irra darbee teekinoloojiin kan ammayaa’an akka ta’an kan isaan dandeessisu ta’uu eeraniiru. Immaammata misooma magaalaa Haarawaa waliin kallatttiin kan walitti dhufu yoo ta’u, itti fayyadama Aannisaa, sochi Diinagdee, kenna tajaajilaa kan idileesu ta’uu hubachiisaniiru. Dijiitaalayizeeshiniin lammiilee fi Mootummaa akkasumas tajaajila kan kennanii fi fudhatan gidduutti wal amantaa kan uumuu ta’uu ibsaniiru. Nageenya odeeffannoo mirkaneessuun muuxannoo odeeffannoo guddina biyyaaf fayyadamuu yeroo gara yerootti babal’achaa dhufuu akka fakkeenyaatti kaasaniiru. Mootummaan ida’amuu magaalonni kan kalaqaa, Teekinooloojii fi agarsiistuu Badhaahinaa akka ta’aniif xiyyeeffannoo keennee hojjechaa jiraachuu fi milkaa’ina kanaaf humna ittiin furguggifamaa guddaa ta’uu eeraniiru.

Mudde 17/2018(ENA)- Leenjiin Itiyoo Koodarsii beekumsa Teekinooloojiin qaban guddisuun hojiisaanii saffisiisuu fi bu’aa qabeessa taassisuuf isaan gargaaruu leenjifamtoonni magaalaa walqixxee dubbatan. Inisheetivii Ministira Muummee Doktar Abiyyi Ahimadiin kan eegalame Leenjiin Itiyoo-Koodarsii Dijiitaala Itiyoophiyaa dhugoomsuuf leenjichi lammiilee miiliyoona 5f dhaqqabamaa akka ta’u galmi qabameera. Leenjichi lammiileen beekumsa Teekinooloojiisaanii akka gabbifatani fi tajaajila Teekinooloojiin deeggarame babal’isuuf faayidaan qabu olaanaa ta’uun amanamee hojiitti kan gale waggaa 3ffaa qabateera. Leenjiin Itiyoo-Koodarsii naannoowwan itti kennamaa jiru keessaa Nannoon Giddugala Itiyoophiyaa Magaalaan walqixxee tokko yoo taatu, hirmaattonni leenjichaa beekumsa teekinoloojiisaanii guddifachuun hojisaanii saffisiisuuf isaan gargaaruusaa dubbataniiru.   Namoota yaadasaanii ENA’f kennan keessaa Dargaggoo Heenook Waldagoorgis akka ibsetti, dameelee adda addaa Afuriin beekumsii fi dandeettiin Teekinooloojii argate ogeesa gahoomee fi dorgoma isa taassisuu ibseera. Leenji’aa biroon Dargaggoo waldatinsaay waldaamlaak gamasaan leenjiin Itiyoo-koodarsii softiweerota tajaajila adda addaa kennan hojjetee fayyadamaa ta’uu ibseera. Hojii daldalaa kan hojjetan Aadde Roozaa Aggizaa gamasaaniin leenjiin fudhatan beekumsaa fi dandeettii Teekinooloojiisaanii guddisuun hojii daldalaasaaniin bu’aa qabeessa isaan taassisuu dubbataniiru.   Leenjiin Itiyoo koodarsii godina Guraageetti yeroo eegalee kaasee lammiileen kuma 58 leenjicha akka fudhatan Itti Gaafatamaan Qajeelcha Saayinsii fi Teekinooloojii Godina Guraagee Damissi Gabree ibsaniiru. Godinichatti bara baajataa qabametti lammiileen kuma 24 leenjisuuf karoorfamee hanga ammaatti lammiilee kuma 36’f leenjiin kennamuusaa fi isaan keessaa lammiileen kuma 28 waragaa ragaa fudhachuusaanii ibsaniiru. Gara Fuulduraattis Leenjicha Manneen Barnootaa sadarkaa 2ffaa hundatti dhaqqabamaa taassisuuf hojjetamaa jiraachuu ibsaniiru