Mudde 2/2018(TOI)–Naannoo Oromiyaatti miidhaa daa'immanii fi dubartootarra ga'u hiri’isuu fi fayyadamummaa isaanii gama hundaan mirkaneessuuf xiyyeeffannoon hojjetama jiraachuu Biiroon Dhimma Dubartootaa fi Daa'immanii Oromiyaa beeksise. Biiroo Kominikeeshinii Oromiyaan kan qophaa'uu sagantaan Gumii Balballoomii irratti hoggantoonni Biiroo Dhimma Dubartootaa fi Daa’imanii fi ogeeyyiin seeraa Biiroo Haqaa naannichaa mari’ataniiru. Sagantaa kanaanis naannichaatti mirga dubartootaa fi daa'immanii kabachiisuu akkasumas miidhaa dubartootaa fi daa'immanirra gahu hir'isuuf hojii hojjetama jiru irratti mari'atameera. Biiroon Kominikeeshinii Oromiyaas godinaalee Oromiyaa 16 fi magaalaatoota 14tti miidhaa dubartootaa fi daa'immanirra gahuu ilaalichisuun qorannoo taasise haala ka’umsa marichaaf ta’uun dhiheesera. Qorannoo kanaanis naannichaatti hojiileen mirgaa dubartootaa fi daa'immanii kabachiisurratti erga jijjiirama asii hojjetameen jijjiiramni fooyyee qabu argamus; bakka tokko tokkotti garuu ammas miidhaan jiru furmaata waaraa kan hin arganne ta'uu ibsameera. Keessattu iddoo qorannoon kun itti taaisifame tokko tokkootti yakki gudeeddii, godaansa seeraan alaaf dubartoonni akka saaxilaman taasisuu, hirmaannaan dubartoonni sekteraalee hojii mootummaa keessatti qaban sadarkaa gandaa fi aanaatti xiqqaa ta'uu qorannoo kanaan hubatamuu Biirichii ibseera. Waltajicharratti argamuun qorannicha irratti yaada kan kennaan Hoggantuun Biiroo Dhimma Dubartootaa fi Daa’imman Oromiyaa Aadde Mabiraat Baacaa naannichatti mirga dubartootaa fi daa'immanii kabachiisuu fi fayyadamummaa isaanii gama maraan mirkaneesuu irratti xiyyeeffannoo addan hojjetama jira jedhaniiru. Biirichi mirga dubartootaa fi daa’immanii kabachiisuu, miidhaa dubartootaa fi daa’imanirra gahu hiri’isuu fi kanneen miidhaan irra gaheef deeggarsa barbaachisu taasisuu irratti qooda fudhatoota biroo waaliin qindaa’ee hojjecha jirachuus eeraniiru. Hojiin qindoominaa fi walitti fufinsa qabu hojjetamuus ammas bakka tokko tokkotti rakkoon kun jiraachuu ibsaniiru. Rakkoo kana waraan furuufis hojiin gama adda addaan dubartoota gahoomsuu fi miidhaa dubartootaa fi daa’immanirra gahu hir’isuuf hojiin hubannoo uumuu hojjetama jiraachuu himaniiru. Miidhaa dubartootaa fi daa’imanirra gahu hiri’isuuf hirma nnaan hawaasaas cimuu akka qabu hubachiisaniiru.

Mudde 02/2018(TOI)- Dhaabbileen Barnoota olaanoo ergama isaaniin adda baafamanii tumsaan waliin hojjechuun irra jireessa bu’a qabeessa akka ta’an xiyyeeffannoon kennamuufii ministeerri barnootaa ibse. Waldaan kompireensiivii Yuunivarsiitii Waliigalaa Itiyoophiyaa Yaa'ii Waliigalaa 2ffaa isaa Yuunivarsiitii Waraabeetti gaggeesseera.   Yaa’icha irratti bakka bu’aan Ministira Barnootaa fi Hogganaa Deeskii Tajaajila Dhaabbilee Barnoota Olaanoo Dhuunfaa kan ta’an doktar Iyyoob Ayyaanoo akka ibsanitti, ministeerichi dhaabbilee barnoota olaanoo qulqullina barnootaa mirkaneessuun ergama qaban adda baasee hojiitti seenuu isaa ibsaniiru. Dhaabbileen kunneen hojii baruufi barsiisuu isaanii sadarkaa qorannoon, saayinsii appilaayidii (hojii qabatamaan agarsiisuu), fi sadarkaa kompireensiiviitti adda baafamanii sirna baruufi barsiisuu isaanii irratti argamu. Dhaabbileen barnoota olaanoo uumama naannoo isaaniitti fayyadamanii bu’a qabeessa akka ta’aniif hojiin hojjetamuu eeruun, kaayyoon yaa’ii kanaas inni guddaan kana galmaan ga’uuf ta’uu ibsaniiru. Dhaabbileen kunneen ergama isaanii qindoominaan waliin hojjechuunii fi qulqullina barnootaatiif gumaacha akka taasisan ministeerichi ciminaan hojjechaa akka jirus beeksisaniiru.   Pireezidaantiin Yuunivarsiitii Gaambeellaa fi walitti qabaan kompireensiivii Waldaa Yuunivarsiitii Waliigalaa kan ta’an doktar Dirribaa Itichaa akka ibsanitti, baruufi barsiisuu fooyyessuuf waliin hojjechuun barbaachisaa ta’uu ibsuun, waldaan kun kaayyoo kanaaf kan hundeeffame ta’uu ibsaniiru. Yaa’iin waliigalaa kun qabeenya muraasa sadarkaa biyyaatti jiru sirnaan fayyadamuuf tumsaa fi qindoominaan akka itti fayyadamnu kan gargaaru dha kan jedhani immoo Pireezidaantii Yuunivarsiitii Qabrii Dahaar injiinar Abdulfattaa Ahimad dha.   Yuunivarsiitichi hojii baruu fi barsiisuu isaatiin dhaloota gahumsa qaban boru biyya bakka bu’anii tajaajilan horachuuf ergama isaa bahachaa jiraachuus hubachiisaniiru. Pireezidaantiin Yuunivarsiitii Waraabee Injiinar Toofiq Jamaal (PhD), akka jedhanitti, yunivarsiitiiwwan kompireensiivii lammiilee beekumsa qaban, ogummaa qabanii, fi namuusa gaarii qaban horachuuf ergama itti kenname ta’uu himaniiru.   Yuunivarsiitichi sanyii talbaa qorannoodhaan argamee fi kanaan dura naannoo sanatti hin baramne dabalatee loozii naannoo sana waliin wal simsiisuun,gabaa biyya keessa qofaaf osoo hin taanee gabaa biyya alaatti ergamuun gumaachaa jiraachuu eeraniiru. Yaa’ii waliigalaa kanarratti pireezdaantonni dhaabbilee barnoota olaanoo 21 Ministeera Barnootaatiin yunivarsiistii kompireensiivii jedhamanii kan adda baafaman hirmaataa jiru.

Mudde 01/2018(TOI)- Mootummaan Ida’amuu malaammaltummaa dhaabbilee irratti mudatan ciminaan balaaleffachuunii fi iitisuun milkaa’ina biyyoolessaa gurguddoo galmeessaa jiraachuu itti aanaan Minitira Muummee obbo Tamasgeen Xurunaa ibsan. Guyyaan Farra Malaammaltummaa Idil-addunyaa 22ffaan mata duree "Dhaloota Naamusaan, Dhaabbata Hojmaataan” jedhuun yaadannoo Golambaa injifannoo Adawaatti kabajameera. Itti aanaan ministeera muummee Tamasgeen Xurunaa ergaa dabarsaniin, malaammaltummaan sababa kufaatii naamusaa fi dadhabbina dhaabbilee ta’uu ibsaniiru. Itiyoophiyaan gocha badaa kana ittisuuf bu’uura hammattoo seeraa fi dhaabbata diriirsuun waggoota kurnan lamaaf hojjechaa jirti jedhan. Erga jijjiiramni biyyaalessaa dhufee jalqabee, Koreen Farra Malaammaltummaa Biyyaalessaa hundeeffamuu dabalatee, adeemsa malaammaltummaa biyyaalessaa madaaluu, hubannoo uumuu, furmaata itti fufiinsa qabu adda baasuuf hojiiwwan hojjetamaa akka turan eeraniiru. Milkaa’inoonni biyyaalessaa galmaa’aa kan jiran, mootummaan ida’amuu malaammaltummaa mootummaa ciminaan balaaleffatu waan ta’eefidha jedhaniiru. Fakkeenyaaf, dhaabbileen haaromsa irratti xiyyeeffatan malaammaltummaa qolachaa, iftoominaa fi itti gaafatamummaa jajjabeessuun hojiiwwan badaa dafanii sirreessaa akka jiran wayita daawwannaan taasifame hubatamuu ibsaniiru. Hidhi Haaromsa Guddicha Itiyoophiyaa xumuramuun, dhaabbileen misoomaa bajata dhabanii kisaaraa keessa turan, hanqina baajata guutuun dhaabbileen misoomaa bu’aa argamsiisuun xumuramuu, kaffaltoonni gibiraa badhaasa argatan hundi isaanii malaammaltummaa jibbuun agarsiiftuu ta’uu ibsaniiru. Qabeenyi mootummaa karaa malaammaltummaa fi yakkoota birootiin hatame,karaa hawaasa fayyaduun akka deebi’u haala dandeessisu uumuun labsiin qabeenya deebisuu kanaan dura hanqina qabu ture fooyya’uu isaa eeraniiru. Malaammaltummaa hambisuufi to’achuuf hojiiwwan hedduun hojjetamaa jiraachuu eeruun, akka fakkeenyaatti tajaajilli wiirtuu tokkoo(MESOB), iftoominaafi itti gaafatamummaa uumuun malaanmaltummaa ittisuuf shoora olaanaa qaba jedhani. Gama biraatiin malaammaltummaa ittisuuf furmaanni waaraa dhaloota namuusaan ijaaruufi lammiilee malaammaltummaa balaaleffatu uumuu akka ta’e cimsanii dubbataniiru. Malaammaltummaan sadarkaa biyya diiguu irra gahee ture yeroo ammaa wal’aansoo cimaan dhaabsifneerra jedhani. Dhaloota namuusaan ijaaruu, malaammaltummaa ittisuuf dhaabbilee ammayyeessuun, seera malaammaltummaa ittisuuf bahe kabachiisuuf hunduu kutannoo qabaachuu qaba jedhan.

Mudde 1/2018(TOI)-Feestivaaliin wagga haaraa ummata Walaayittaa Gifaataan hambaa dhala namaa bakka bu’u ta’uun Yuneeskootti galmaa’e. Yaa’ii koree eegumsa hambaalee kiliyyaa Yuneeskoo 20ffaa Hindi, Niwu Deelhiitti gaggeeffamaa jirurratti jijjiiramni wagga haaraa Walaayittaa “Giifaataa”n Yuuneeskootti akka galmaa’u akkaataa gaaffii Itiyoophiyaan dhiheessiteen hambaa addunyaa ta’uun galmaa’eera. "Giifaataa"n ayyaana guddaa ummata Walaayittaa biratti iddoon guddaan kennamuuf yoo ta’u, dhalootarraa dhalootatti darbaa kan dhufe ibsituu eenyummaa kan ta’e barri moofaan darbuusaa fi barri haaraa kan itti jalqabu cehumsa bara haaraati. Giifaataan umurii, saala, amantaa ykn sadarkaa hawaasummaa kamiyyuu osoo adda hin baasiin nageenyaa fi walitti hidhamiinsa hawaasummaa hundaaf gumaacha taasisuun dameelee Yuuneeskootti adda baafaman kan of keessatti qabatu hojiilee hunda hamate jajjabeessuun kan kabajamu ta’uunsaa hambaa addunyaa ta’ee akka galmaa’u isa taasiseera.