Ammayyummaa fi guddina magaalotaa keessatti ijaarsaafi tajaajilli koriidaraa shoora guddaa fi tarsiimawaa taphata. Misoomni koriidaraa qofaatti sarara daandii fooyyessuu osoo hin taane, haaromsa dinagdee, hawaasummaa, miidhaginaa fi mala jireenya uummataa fooyyessuuf gahee olaanaa qaba. Magaalaan tokko sadarkaa idil-addunyaatti dorgomtuu fi jireenyaaf mijattuu akka taatuuf, akkasumas hawwata turizimii ta’uuf,yaa’insa turistootaa dabaluuf misoomni koriidaraa dhimma murteessaa fi isa olaanaadha. Mee gabaabsinee dhimma koriidaraa irratti isiniif haa dhiyeessinu. Misoomni koriidaraa faayidaalee hedduu qaba. Fayyadamummaa Hawaas-Dinagdee fi Haala Jireenya Hawaasaa Mijeessuu Misoomsi koriidaraa hojiiwwan madaallii jireenya uummataa ol kaasanii fi haala jireenya hawaasaa mijeessan keessaa isa tokkodha. Koriidaroonni ammayyaa tarsiimoon ijaaraman tajaajila daldalaa, bakka bashannanaa, bakkeewwan boqonnaa fi tajaajiloota adda addaa sarara tokko irratti walitti fiduun carraa hojii bal'aa hawaasaaf uumu. Kun immoo sochii dinagdee sa'aatii 24f gumaachuun sadarkaa galii fi dinagdee hawaasaa guddisa. Dabalataanis, daandiiwwan miilaa bal'aan, magariisummaanii fi mukkeeniin faayaman, tajaajila ibsaa ammayyaa dhiyeessuun hawaasni bakka qulqulluu fi tasgabbii qabutti akka walitti dhufu, bashannanuu fi imalu gargaara. Kun immoo haala jireenya jiraattota magaalotaa fooyyessuu fi tasgabbii hawaasummaa mirkaneessuu keessatti qooda guddaa qaba.   Nageenya Tiraafikaa fi Sochii Uummataa Tartiibessuu Gaheen koriidarri nageenya tiraafikaa fi wal-dhiibbaa uummataa hir'isuu keessatti qabu iddoo guddaa qaba. Daandiiwwan koriidaraa imaltoota lafoo, bishkiliitii fi konkolaatotaaf sarara adda baafame qabaachuu isaaniitiin balaa tiraafikaa hir'isuu keessatti shoora olaanaa taphatu. Kana malees, daandiin lafoo bal'aan fi mala qajeelcha hawaasaa ammayyaa ta'e uummanni bal'inaan osoo wal hin dhiibiin, haala nagaa fi bilisaan akka imalan gargaara.   Dabalataanis, sababa ummanni kan irra imalu hin qabneen konkolaataa waliin daandii tokkorra imalu ture hambisuun rakkoo gama kanaan dhufu hir’iseera. Miidhagina Magaalaa, Sadarkaa Idil-Addunyaa fi Hawwattummaa Turizimii Dabaluu keessatti Gahee Koriidarri qabu Koriidaroonni magaalaa guddina magaalaa dabaluu qofa osoo hin taane, halluu fi bifa ammayyaa magaalootaaf kennuun sadarkaa idil-addunyaatti akka dorgomtu taasisu. Qulqullina, magariisummaa, ibsaa ammayyaa fi ijaarsa aartii adda addaan faayamaniin dhiyeessuun magaalaa tokko iddoo hawwataa fi qulqulluu taasisa. Bakkeewwan kunniin turistonni idil-addunyaa akka magaalattii daawwataniif hawwata guddaa uumuun, tajaajila hooteelaa, aartii fi bakka bashannanaa adda addaan dabaalamuun galii turizimii irraa argamu guddisuun biyyaaf bu’aa olaanaa qaba. Magaalaan tokko fakkeenya idil-addunyaa akka taatuuf koriidarri bifa ammayyaawaa fi aadaa walitti qindeessuun dhiyeessuun faayidaa guddaa qaba.   Misoomni Koriidaraa magaalota biyya keenyaa keessatti haala miidhagaa fi adda ta’ee hawwattummaa qabuun ijaaramaa jira. Kunis akkaataa aadaa fi safuu ummataa eeggateen ijaaramuun isaa immoo hawwattummaa guddaa dabaluun alattis hawaasni naannichaa kan isaa akka ta’e itti amanuun dhalootaaf akka dabarsu kunuunsa taasisu gargaara. Misoomni koriidaraa wayita hawwasni hedduuminaan bahee aadaa adda baabahiitti kabajatu wal dhiphisuun akka hin uumamneef gahee olaanaa qaba. Daandiin dhiphachuun ummanni wal irra dhaabbachuun , wal ukkaamsuun balaan uumamuu ni mala’ Misoomni koriidaraa garuu kanneen haala olaanaan hambiseera.   Ayyaanota adda baabahiitti kabajaman keessaa tokko ayyaana Irreechaati. Ayyaanni Irreechaa keessummoota biyya keessaa fi biyya alaa miliyoona hedduutti lakkaahaman keessummeessa. Ummanni miliyoonaan tokkummaan,jaalalaa,waloomaan bahee kabajatu kana immoo nagaan bahee nagaan akka galuuf daandiin irra imalu mijachuun bu’aa olaanaa qaba. Magaalota ayyaanni Irreechaa hedduuminaan kabajamu keessaa magaalaan Bishooftuu ishee tokkdha. Magaalattiin yeroo ammaa kana keessummoota miliyoonaan lakkaahaman simatteetti. Dur daandiinishee dhiphaa fi imalaaf mijataa hin turre. Keessumaa immoo gaafa ummanni irreechaaf bahu baay’ee nama rakkisa ture. Garuu yeroo ammaa misooma koriidaraan daandiin ishee miidhaguun, miidhagina magaalattiif simboo addaa dabaluun cinatti keessummootaaf haala mijataa uumeera. Kan bahe nagaan akka galuuf haala mijeesseera.   Walumaagalatti, misoomni koriidaraa ijaarsa daandii qofa osoo hin taane, bu'uura guddina hawaas-dinagdee, qajeelfama tiraafikaa ammayyaa fi miidhagina magaalaati. Uummata wal-dhiibbaa daandii irraa ittisuun, nageenya imaltootaa mirkaneessuu bira darbee, magaalota hawwata turizimii fi dorgomtoota idil-addunyaa taasisuu keessatti shoora bakka bu'iinsa hin qabne taphata. Kanafuu, koriidara ammayyeessuu fi kunuunsuun haala jireenya hawaasaa fooyyessuuf tarsiimoowwan dursa kennamuufii qaban keessaa isa tokkodha.   #Biyya_Guddoo #Uummata_Guddaa #Mul'ata_Guddaa #Ethiopia #ENA Afaan Oromoo# Miseensa Maatii ENA ta’aa : https://www.ena.et/web/links

Fulbaana 21/2019 (ENA) - Itiyoophiyaan pirojektoota bishaanii Gibtsiin gufachiifamanii kasaaraawwanii fi carraalee misoomaa jala darban kan gamaaggamu koree biyyaalessaa hundeessuushee ministirri bishaanii fi inarjii Injiinar Habtaamuu Ittafaa beeksisan. Ministirri bishaanii fi inarjii Injiinar Habtaamuu Ittafaa ENA wliin turtii taasinaniin akka ibsanitti, hidha haaromsaa Itiyoophiyaa guddicha dabalatee pirojektoonni misoomaa Gibtsiin gufachiifaman 22 ol koree Kanaan adda baafamanii hojiitti galameera. Yaaddoowwan Itiyoophiyaa bara dheeraa misooma yaa’a Abbayyaarratti wal hin gitne ilaalchisee deeggarsi hayyootaa guddachaa dhufe jiraachuu himanii, kun ammoo kasaaraa dinagdee seenaa keessatti irra gahee fi carraalee misoomaa jala darbeef beenyaa akka argattu gaaffiishee ni cimsa jedhaniiru. Koreen haaraa hundeeffame kun pirojektootarratti ragaalee qindeessaa fi gaaffiiwwan beenyaa Itiyoophiyaan gaafattu bu’urasaanii qorachaa akka jiru ministirri Injiinar Habtaamuun dubbataniiru. Korichi ogeeyyota, ministiroota duraanii, gorsitootaa fi ogeeyyota seeraa kasaaraa qaqqabee fi kana furuuf kan gargaaran akkaataa itti dhiheeffamu qorachaa jiran akka of keessaa qabu eeraniiru. Yeroo ammaa hidha haaromsaa dabalatee pirojektoota Gibtsiin gufachiifaman ilaalchisee ragaawwan walitti qabamuusaanii dubbatanii, hawaasa addunyaa fuulduratti wantoota yakka ta’aniin Itiyoophiyaa doorsisuuf yaalaa turuusaanii kaasaniiru. Gamaaggamni Koreen kun gaggeessu akka hin hojjetamne kan taasifaman pirojektoota qofaa osoo hin taane tattaaffii eegumsa naannoo Itiyoophiyaan itti jirtuu fi bu’uraaleen bulchiinsa bishaanii faayidaa yaa’a gajjallaaf kennan akka xiinxalu ibsaniiru. Sagantaa biqiltuu ashaaraa magariisaatiin mukkeen biiliyoona 50 caalan dhaabamuusaanii yaadachiisanii, Baaroo, Abbayya fi Takazee dabalatee laggeen gurguddoorratti hojiin misooma sululaa gaggeeffamuu eeraniiru. Hojiiwwan eegumsa naannoo kunneen qabeenya bishaanii Itiyoophiyaa eeguu fi yaa’a Abbayyaa keessatti dhiibbaawwan haala qilleensaa qolachuuf gumaacha taasifte akka xiinxalu injiinar Habtaamuun ibsaniiru. Akkasumas hidhi haaromsaa guddichi yaa’a laga Abbaayyaa to’achuudhaan qooda guddaa inni qabu kan ibsan ministirichi, akkaataan hidhi kun itti hojjetame biyyoota yaa’a gadii balaa lolaarraa baraaruu fi yeroo roobni xiqqaatutti bishaan akka addaan hin cinne akka gargaaru ibsaniiru. Haalawwan roobaa elniinoon walqabatanii amma jiran bulchiinsa bishaanii qindaa’aa akka barbaachisu kan eeran ministirichi, yaa’a bishaanii to’achuun Sudaanii fi Gibtsi dabalatee biyyoota yaa’a gadiif faayidaa kennuu akka danda’u eeraniiru. Adeemsi Itiyoophiyaa boqonnaawwan ifa ta’an akka qabaatan akka ta’u, mari’achuunii fi walii galtee waloorra gahuun filmaata yoo ta’u, kanneen biroo ammoo Itiyoophiyaan tarkaanfiiwwan dabalataa kan taasisan beenyaa argachuuf filmaattota hordofamuu qaban akka ta’an ministirri injiinar Habtaamuun ibsaniiru.

Fulbaana 20/2019 (ENA): – Itoophiyaa fi Jaappaan misooma ruuzii ammayyeessuu fi oomishtummaa isaa guddisuuf waliigaltee deeggarsa Birrii miliyoona 300 fi miliyoona 75 mallatteessaniiru. Waliigalticha Ministirri Ministeera Maallaqaa Obbo Ahimad Shiidee fi Itoophiyaatti Ambaasaaddarri Jaappaan Shiibaataa Hiiroonooriin mallatteessaniiru. Sirna waliigalticha mallatteessuu irratti, oomishtummaa ruuzii guddisuu, jireenya lammiilee fooyyeessuu fi cehumsa teeknooloojii qonnaa saffisiisuun hojiiwwan xiyyeeffannoo olaanaa argatan ta’uu ibsameera. Dameen qonnaa cehumsa diinagdee, wabii midhaan nyaataa fi badhaadhina baadiyyaa mirkaneessuu keessatti gahee olaanaa qabaachuu Ministirri Maallaqaa Obbo Ahimad Shiideen ibsaniiru. Waliigalteen biyyoota lamaan gidduutti mallatteeffames hariiroo fi tumsa Itoophiyaa fi Jaappaan gidduu jiru caalaatti cimsuuf kutannoo waloo qaban kan agarsiisu ta’uu ragaan Ministeera Maallaqaarraa argame ni mul’isa.

Fulbaana 20/2019 (ENA) - Daandiin qilleensaa Itiyoophiyaa dandeettii kaargoo haala olaanaan kan guddisuuf xiyyaarotaa fe’isaa booyingi 777 jedhamu 10 bituuf kaampaanii Booyiingi waliin walii galtee mallatteesse. Milkaa’ina biyya guddoo, ummata guddaa fi mul’ata guddaaf gumaacha olaanaa taasisaa kan jiru daandiin qilleensaa Itiyoophiyaa walii galtee bittaa xiyyaaraa gara boqonnaa milkaa’inaa haaraatti isa ceesisu har’a mallatteesseera. Hojii raawwachiisaan olaanaa garee daandii qilleensaa Itiyoophiyaa obbo Masfin Xaasoo fi itti aanaan pirezidaantii olaanaa gurgurtaa daldalaa fi maarkeetiingii kaampaanii Booyingi Biraad Makmulan walii galtee kana mallatteessaniiru. Walii galtichi qooda geejjiba fe’isa qilleensaa naannoo fi idil addunyaa Itiyoophiyaan qabdu cimsuuf akkasumas daandiin qilleensichaa fedhii maamilootaa dabalaa dhufe guutuuf humnasaa cimsuuf kan akeekamedha. Kana malees daandiin qilleensaa Itiyoophiyaa qaqqabummaa fe’isaa bal’isuuf tarsiimoo yeroo dheeraaf karoorfate kan deeggaru ta’uun ibsameera. Hojii raawwachiisaan olaanaa garee daandii qilleensaa Itiyoophiyaa obbo Masfin Xaasoo sirna mallattoorratti akka ibsanitti, walii galteen har’a taasifame saddettansaa xiyyaarota ammayyaa B777-8F fi xiyyaarota fe’isaa B777 lama bituuf kan dandeessisudha. Walii galteen bittaa xiyyaaraa kun tarsiimoo guddinaa daandiin qilleensichaa bara 2040 qabate keessatti baayina xiyyaarotaa dabaluu fi teeknooloojiin ammayyeessuun utubaawwan ijoo keessaa tokko ta’uu dubbataniiru. Tokkoon tokkoon xiyyaarotaa fe’isa toonii 117 ta’u baachuu kan danda’anii fi boba’aa kan qusatan ta’uun hojii raawwachiisaa olaanaan kun eeraniiru. Daandiin qilleensichaa xiyyaarota teeknooloojiin deeggaraman harkatti galfachuun Afriikaarraa tajaajila adda duree kennaa jiru cimsee akka itti fufsiisu ta’uu ibsaniiru. itti aanaan pirezidaantii olaanaa gurgurtaa daldalaa fi maarkeetiingii kaampaanii Booyingi Biraad Makmulan gamasaaniin, tumsi daandii qilleensaa Itiyoophiyaa fi kaampaanii Booyingi jidduu jiru waggaa 80 guutuusaa ibsaniiru. Waggaa lama dura xiyyaara booyingi 777-9 ajajuusaa yaadachiisanii, daandiin qilleensaa Itiyoophiyaa xiyyaara kana ajajuudhaan Afriikaarraa kan jalqabaa akka ture eeraniiru. Daandiin qilleensichaa guyyaa har’aas xiyyaara fe’isaa 777-8f ajajuudhaan daandii qilleensaa Afriikaa kan jalqabaa ta’uu ibsaniiru. Walii galteen kun dandeettii dorgommii daandii qilleensichaa kan guddisuu fi fedhii kaargoo dabalaa dhufe guutuuf kan dandeessisu ta’uu ibsaniiru.