Bitootessa 7/2018 (ENA): Haaromsi dinagdee mandhalee mootummaan jijjiirama kana hordofee hojiirra oolche oomisha dabaluu fi galii sharafa alaa fooyyessuu keessatti bu’aa guddaa galmeessisaa jiraachuu hayyoonni dinagdee adda addaa ibsaniiru. Riifoormiin dinagdee mandhalee galii invastimantii kallattiin alaa dabalaa jira. Tarsiimoon diinagdee dameelee hedduu mootummaan hordofaa ture dinagdeen damee tokko qofa irratti akka hin hirkatamne gochuudhaan guddina biyyaalessaa itti fufiinsa qabuuf bu’uura cimaa akka kaa’es ibsaniiru. Akka ogeeyyiin diinagdee ENA waliin turtii taasisan jedhanitti,riifoormiin dinagdee mandhalee fi riifoormiin dinagdee Gooroo Itiyoophiyaa keessatti hojiirra oole qormaata caasaa jiru furuu fi tasgabbii gabaa fiduun gahee murteessaa taphachaa jira.   Caasaan diinagdee jijjirama kanaan dura ture hirmaannaa dhaabbileen biyya alaa hojii misoomaa biyyattii keessatti qaban daangeesseera jedhani qorataan olaanaa Inistiitiyuutii Qo’annoo Imaammata Itiyoophiyaatti Dr. Jamaal Mahaammad. Kunis invastaroota idil-addunyaa carraa gabaa bal’aa akka argatan irratti dhiibbaa guddaa kan qabuu fi yaa’insa invastimantii kallattiin alaa akka hin ariifanne taasisuu ibsaniiru. Biyyattiin hanqina sharafa alaa fi ba’aa liqaa ol’aanaa jala akka turteef kana ta’uu ibsaniiru. Jijjiirama kana hordofuun danqaaleen imaammataa kanaan dura turan maqsuu fi haala mijataa uumuun dorgomtummaa diinagdee guddisuu fi damee dhuunfaa kakaasuu keessatti gahee murteessaa taphateera jedhan. Riifoormiin dinagdee biyya keessaa dameewwan akka telekoomii, baankii, daldala gurgurtaa fi ijaarsaa invastaroota biyya alaatiif banuun carraa gabaa haaraa uumuun akka danda’amu himaniiru. Hojiirra oolmaan haaromsa kanaa dhaabbileen idil-addunyaa gurguddoon kanneen akka "Safaricom" Itiyoophiyaa keessatti invastimantii bal’aa akka hojjetan taasiseera jedhan. Dameewwan tarsiimoo kana keessatti dhaabbileen idil-addunyaa dammaqinaan hirmaannaan cehumsa teeknooloojii saffisiisuu, invastimantii kallattiin alaa hawwachuu, qulqullinaa fi dorgomtummaa tajaajila biyyattii guddisuu keessatti faayidaa guddaa akka qabu eeraniiru. Haaromsi kun sharafa alaa gabaa irratti hundaa’uun murteessuu, galii fi baasii mootummaa madaaluu, bu’uura gibiraa bal’isuun agarsiistota milkaa’ina dinagdee gurguddoo ta’uu ibsaniiru. Keessumaa xiyyeeffannoo addaa damee albuudaatiif kennameen bu’aan oomishaa fi daldala warqee irratti galmaa’e galii sharafa alaa biyyattii guddisuu keessatti gahee olaanaa taphachuu isaa ibsaniiru.   Waldaa Ogeessota Diinagdee Itiyoophiyaa keessatti qorataan olaanaa Dr. Mollaa Alamaayyoo akka jedhanitti, haaromsi kun imaammata invastimantii kallattiin alaa jajjabeessu hojiirra oolcheera. Kunis hirmaannaa invastaroota biyya alaa Itiyoophiyaa keessatti haalaan dabalaa jira jedhan. Itiyoophiyaa keessatti damee faayinaansii dijitaalaayizeeshiniin dorgommii dinagdee biyyattii waltajjii idil-addunyaa irratti dabalaa akka jirus hubachiisaniiru.

Bitootessa 7/2018 (ENA)– Itiyoophiyaan lammiilee Miiliyoonaan lakka’aman hirmaachisuun Dinagdee magariisaa jijjiirama haala qilleensaan hin raafamne ijaaruuf Sagantaan Ashaaraa magariisa raawwachaa jirtu biyyoota Sulula Zaambeeziitiif muuxannoo guddaa akka ta’u ibsameera. Waltajjiin sagantaa Ashaaraa Magariisaa Itiyoophiyaa Komishinii Sulula Laga Zaambeeziif muuxannoo qoodu gaggeeffamaa jira. Ministirri Bishaanii fi Inarjii doktar Habtaamuu Ittafaa waltajjicharratti akka ibsanitti, Itiyoophiyaan eegumsa jijjiirama haala qilleensaarratti waan dubbatte qabatamaan kan raawwattu ta’uushee mirkaneessiteetti .   Biqiltuuwwan biiliyoona 48 waggoottan darban dhaabbatan kutannoo hoggansaa fi hawasaan ta’uu ibsuun, sagantichi badhaadhina dhaloota dhufuuf bu’uura cimaa kan kaa’udha jedhaniiru. Miseensonni komishinichaaturtiisaanii Itiyoophiyaan hojiiwwan qabatamaa kanneen gara biyyasaaniitti fudhatanii kan deemanii fi Itiyoophiyaanis biyyoota biroorraa muuxannoo fudhachuuf qophii ta’uushee ibsaniiru.   Barreessa olaanaan Komishinii Sulula Laga Zaambiyaa Feeliksi Moosii Nigamlagosii gamasaniin, Itiyoophiyaan furmaatota uumamarratti hunda’e hojiirra oolchuun adda durummaa Ardiirratti qabdu qabatamaan argisiisuushee ibsaniiru. Keessumaa hawaasa hirmaachisuun milkaa’inni mul’ate biyyoota sulula Zaambiyaatiif barnoota guddaa akka ta’u eeraniiru. Barreessaa olaanaan kun itti dabaluun, milkaa’inoota bu’uuraalee misoomaa gurguddoodhaan galmeesiste dinqisiifataniiru.   Itiyoophiyaan pirojektoota kanneen akka Hidha Haaromsa Guddicha Itiyoophiyaa, Gibee 3 fi Kooyishaa wabii Anniisaa fi guddina Dinagdee mirkaneessuu danda’an Afrikaatti qabatamaan argisiifteetti jedhaniiru. Sulula Zaambiyaa keessatti hidhawwan kanneen akka Kaariibaa fi Kaabooraa Baasaa jiraatanis, qabeenyi bishaanii hedduun hojiirra hin oolle jiraachuusaa kan eeran barreessaa olaanaan kun, muuxannoon bu’uuraalee misoomaa gurguddaoo Itiyoophiyaa biyyoota sululichaaf kaka’umsa guddaa ta’uusaanii mirkaneessaniiru

Bitootessa 7/2018 (ENA): Naannoo Harariitti buufataalee daldala boba’aa seeraan alaa irratti bobba’an irratti tarkaanfiin seeraa akka fudhatamu Biiroon Misoomaa fi Industirii Intarpiraayizii naannichaa beeksise. Ministirri Muummee Doktar Abiyyi Ahimad har’a boba’aa hawaasni itti gaafatamummaan, fedhiiwwan bu’uuraatiif dursa kennuun itti fayyadamuu akka qabu yaadachiisuun isaanii ni yaadatama. Ministirri Muummee Raabsitoonni boba’aa, buufataaleenii fi fayyadamtoonni biroo boba’aa qusannaan akka fayyadamaniif ergaa dabarsaniiru. Kanumaan walqabatee biiroon misoomaa fi industirii interpiraayizii naannoo Harariitti daldala boba’aa irratti sochii seeraan alaa akkamitti ittisuu akka danda’amu irratti qooda fudhattoota waliin marii gaggeesseera.   Daldala boba'aa seeraan alaa ittisuu fi to'achuuf naannichatti “Taaski Foorsiin” hundeeffamee hojii adda addaa gaggeessaa jira jedhan itti Gaafatamaan Biiroo Misoomaa fi Industirii Intarpiraayizii Naannichaa obbo Usmaa'il Yuusuf. Kanaaf mootummaan boba’aa deeggarsa olaanaadhaan gara biyyaatti galchu fedhii bu’uuraatiif fayyadamuu dhiisanii al-kallattiin badhaadhina dhuunfaatiif baaduun sochii seeraan alaa ittisuuf ciminaan hojjechaa jira jedhan. Buufatni boba’aa buufata boba’aa seeraan eeyyamameefiin alatti daldala gaggeessan, taarifa kaa’amee ol gurguranii fi hojiiwwan seeraan alaa kanaan walqabatan biroo irratti bobba’an akka jiran hubachiisaniiru. Buufatni boba’aa tokko tokko karaa sirna seeraatiin oomisha boba’aa akka hin raabsamne gochuun hojii seeraan alaa raawwachaa jiraachuus hubachiisaniiru. Qaamoleen maamiltoota gowwoomsuun daldala boba’aa seeraan alaa irratti bobba’an akka jiran eeruun buufataaleen boba’aa hojii kanaa fi kan kana fakkaatan irratti bobba’an gocha isaanii irraa of qusachuu fi seeraa fi dambii akka eegan dhaamaniiru. Buufata boba’aa hojmaata kaa’ameen ala socho’an irrattis tarkaanfiin sirreeffamaa cimaa, seeraa fi bulchiinsaa akka fudhatamu akeekkachiisaniiru. Komishinarri Poolisii Naannoo Hararii Ahimad Abdiin gama isaaniitiin hojiin hordoffii fi to’annoo daldala seeraan alaa fi hojiiwwan kanaan walqabatan biroo naannichatti cimee akka itti fufu mirkaneessaniiru. Qaamoleen damee kanarratti hirmaatan daldala seeraan gaggeessuu akka qaban, keessumaa mala tumsaa fi qindoomina cimsuu akka qaban hubachiisaniiru. Abbootii qabeenyaa buufata boba’aa waltajjicharratti argaman keessaa obbo Foozii Yahyaan hojii daldala boba’aa seeraan alaa bu’aa hin barbaachifne argachuuf raawwatamu ittisuu cimsinee to’achuu qabna jedhaniiru. Hirmaataan waltajjichaa obbo Abdushkur Jaamii gama isaatiin sirna daldalaa sirna seera bu’uura godhate hordofuun akka hojjetanii fi kanas qindoominaan waajjiricha waliin ta’uun hojiirra akka oolchan akeekaniiru.

Bitootessa 7/2018 (ENA):- Riifoormiin diinagdee mandalee Itiyoophiyaatti hojiirra oolaa jiru kun galii invastimantii kallatti alaa jajjabeessaa jira jedhan Komishinarri Komishinii Invastimantii Itiyoophiyaa Dr. Zallaqaa Tamasgeen. ENA’n Komishinii Invastimantii Itiyoophiyaa waliin ta’uun waltajjii marii mata duree “Itiyoophiyaa – haaraa Bakka Invastimantii ” jedhuun gaggeessaa jira.   Waltajjicharratti Ministirri Daldalaa fi walitti hidhaminsa naannoo Dr. Kaasahuun Gofee, Itti aanaa dura taa’aa koree dhaabbii dhimma daldalaa fi tuuriizimii mana maree bakka bu’oota ummataa obbo Yohaannis Masfin, akkasumas qooda fudhattoonni misooma invastimantii federaalaa fi naannoo argamaniiru.   Komishinarri Komishinii Invastimantii Itiyoophiyaa Dr. Zallaqaa Tamasgeen haasaa baniinsaa waltajjii kanarratti taasisaniin, riifoormiin diinagdee gooroo bal’aan mootummaan eegale invastaroota biyya alaa carraa bal’aa Itiyoophiyaa keessatti argamu qorachuun invastimantii bal’inaan akka hojjetan carraa uumeera jedhan. Haaromsi kun dameewwan diinagdee ijoo shan invastimantii kallattiin alaa hawwachuuf adda baafaman irratti jajjabina guddaa uumeera jedhan.   Haaluma kanaan Invastaroonni haaraa gara hojiitti seenuu, carraa hojii lammiileef uumuu fi ce’umsa teeknooloojiif gumaacha olaanaa taasisaa akka jirus himaniiru. Riifoormichi dameelee adda addaarratti jijjiirama qabatamaa fiduusaa eeranii, qabeenya uumamaa biyyattii teeknooloojiitiin misoomsuun oomishtummaa guddisuun akka danda'ame ibsaniiru. Omishaalee Gabaa alaaf dhihaatan guddisuuf haalli mijataan uumamuusaa eeraniiru. Dameelee Turizimii, ICT fi diinagdee dijitaalaatiin haala kallattii mootummaan kaa'en, diinagdee dijiitaalaa ammayyaa’aa ijaaruun invesitimentii harkisuun hojjetamaa jira jedhaniiru. Dameen misooma manneenii ammaan dura cufaa ture fooyya’insa seeraan dureeyyii Alaatiif banaa ta’uusaa beeksisaniiru.