Guraandhala 14/ 2018(ENA) - Paartiileen siyaasaa Boordiin filannoo Biyyoolessaa Itiyoophiyaa filannoo walii galaa 7ffaaf danbii naamusaa kaadhimamtootaa qopheesse mallatteessan. Danbbiin naamusaa filannichi haala naamusa qabaateen daandii nagaan akka gaggeeffamu kan dandeessisu ta’uun hubatameera. Sirna mallattoo sanarratti miseensonnii hojii gaggeessitoota boordichaa, hoggantoota paartiilee siyaasaa fi bakka bu’oonni akkasumas bakka bu’oota Dhaabbilee Hawaasa Sivilii argamaniiru. Hoggantuun boordii filannoo biyyaalessaa Itiyoophiyaa Meelatwarq Hayiluu wayitasana, boordichi paartiileen walfalmanii yaada filannoosaanii sagantaa uummataaf itti dhiheessan qopheessaa jira jedhaniiru. Uummanni filatus beekumsarratti hundaa’ee akka filatuuf paartiileerraa hojii hedduun ni eegama kan jedhan hoggantuun kun, miidiyaaleen paartiilee morkattootaa yeroo qilleensa walqixa ramaduun itti gaafatamummaasaanii bahuu akka qaban hubachisaniiru. Boordiin filannoo deeggarsa barbaachisaa akka taasisu mirkaneessaniiru.

Guraandhala 14/ 2018(ENA):- Boordiin filannoo biyyaalessaa Itiyoophiyaa mallattoo paartiilee siyaasaa filannoo biyyoolessaa 7ffaa dorgomuuf galmaa’anii ifoomseera. Boordichi sagantaa mallatteessuu danbii naamusaa kaadhimamtootaa gaggeessaa kan jiru yoo ta’u, saganticha irratti,miseensonni Boordiin filannoo biyyaalessaa Itiyoophiyaa, hoggantoonni paartiilee siyaasaa fi miseensonni, akkasumas bakka bu’oonni Hawaasa Dhaabbilee Sivilii argamaniiru. Dura teessuun Boordichaa Meelaatwarqi Haayiluu wayita sana akka jedhanitti, boordichi filannoo gaggeessuuf qophiin taasisaa jiru cimsee itti fufa.   Paartiileen siyaasaa hedduun kaadhimamtoota galmeessaa jiraachuu ibsuun, galmee filattootaa gaggeesuuf qophii barbaachisaa taasisaa jirra jedhaniiru. Raawwachiiftota filannoof leenjii leenjiftootaaf kennaa jiraachuu eeruun, dhaabbilee Hawaasa siivilii 169’f leenjii kennuusaa dubbataniiru. Boordichi haala qophii meeshaalee filannoo ilaalchisee miidiyaalee adda addaa daawwachiisuu eeraniiru.   Mallattoon filannoo paartiilee har’a ifooman filattoonni paartii barbaadan mallattoosaa baranii akka filatan gochuuf kan kaayyeffatedha jedhaniiru. Filannichi nagaa qabeessaa fi haqa qabeessa akka ta’u, danbiin sirna naamusaa kaadimamtoota kan qophaa’e ta’uu hubachiisuun, paariileen siyaasaa danbicha akka mallatteessan dubbataniiru.   Filannichi haqa qabeessa, dimokiraatawaa fi nagaa qabeessa ta’ee akka gaggeeffamuuf qaamoleen qooda fudhattootaa qooda isaanirra egamu bahuu akka qaban hubachiisaniiru.  

Guraandhala 14/2018 (ENA)- Filannoon walii galaa 7ffaan waltajjii murteessaa ummanni naannoo Tigraayi bakka bu’ootasaa naaf ta’u jedhu bilisa ta’e itti filatuta’uu miseensi mana maree paartii Simirat doktar Shishaayi Amaaree ibsan. Ummanni Tigraayi jijjiirama waliin akka hin adeemne dhiibbaa keessa akka turu taasifamee yeroo dheeraaf gidirfameera jedhan doktar Shishaayi turtii ENA waliin taasisaniin. Haa ta’u malee akkaataa walii galtee Piriitooriyaatiin bulchiinsi yeroo hundeeffamee ummanni naannichaa tasgabbaa’ee nagaa akka argatu taasisuun jijjiiramni amma tokko dhufuusaa dubbataniiru. Filannoon walii galaa torbaffaa barana gaggeeffamuun ummanni bilisaan ba’ee filachuu akka barbaadu ibsanii, kanaaf ammoo filannoon hammataa fi hirmaachisaan naannicha keessatti gaggeeffamuu akka qabu hubachiisaniiru. Kanaaf kanneen dhimmi ilaallatu xiyyeeffannoo addaatiin tumsaan hojjechuun akka irraa eegamu cimsanii kaasaniiru. Beekamtii seeraa boordii filannoorraa kan hin qabne gareen ABUT naannoo Tigraayitti filannoon akka hin gaggeeffamne fedhii akka qabu eeranii, haalli kun karaa seeraatiin deebii argachuu qaba jedhaniiru. Filannoon akka gaggeeffamu tumsa qindaa’aa gochuun ummata naannichaaf aara galfii guddaa ta’uu kaasaniiru. Kun ammoo gaaffiin ummanni Tigraayi gaafatu deebii haqa qabeessa akka argatuu fi dhageettii akka argatu gumaacha guddaa qaba jechuun ibsaniiru. Mariin biyyaalessaa Itiyoophiyaa keessatti adeemsarra jiru fayyadama haqa qabeessa lammiilee hundaa hubannoo keessa karaa galcheen hundeeffamuunsaa garaagarummaa bakkaa bakkatti mudatanii fi sirrii hin taaneef furmaata kan ta’udha jedhaniiru. Keessumaa ummata naannoo Tigraayiif carraalee hedduu fidee kan dhufu furmaata guddaa ta’uusaas hubachiisaniiru.

Guraandhala 13/2018(ENA)- Waltajjiin Gumiin Balal marsaa 49ffaan mata duree "Adwaa: Injifannoo Waloo Yaadannoo Waliinii!" jedhuun qindeessummaa Biiroo Komunikeeshinii fi Waajjira Pirezidaantii Mootummaa Naannoo Oromiyaatiin guyyaa har'aa gaggeeffamaa jira. Waltajjichi bakka hoggantoonni mootummaa, haayyoonni fi keessummoonni dhaabbilee garaa garaa irraa affeeraman argamanitti galma Waajjira Pirezidaantiitti gaggeeffamaa jira

Guraandhala 13/2018(ENA): Gumii Balal marsaa 49ffaa Waajjira Pirezidaantii Oromiyaatti mata duree "Adwaa: Injifannoo waloo yaadannoo waliinii" jedhuun qophaa'e irratti waraqaa qorannoo kan dhiyeessan Yuunivarsiitii Haromaayaatti barsiisaa fi qorataa seenaa kan ta'an Dr.Rattaa Dhugumaa, ibsa kennaniin injifannoon Adwaa seenaa waloo uummanni biyya keenyaa waggoota dheeraaf waliin qabu dha jedhan. Saba,sablammoonnii fi uummattoonni waamicha biyya baraaruuf taasifame osoo wal hin qoodiin ba'ee injifannoo galmaa'e ta'uus eeraniiru.   Seenaa xiqqaa guddaa,beekaafi wallaalaa,dhiiraa fi dubartii osoo wal hin qoodiin qaama teeknoloojii hidhatee nu caalu injifachuun Afrikaaf seenaan addaa tokkummaan itti galmaa'e ta'uus ibsaniiru. Akkasumas Adwaan birmadummaa uummata Itiyoophiyaaf qofa osoo hin taanee mallattoo bilisummaa saboota gurraacha Addunyaa ta'uu ibsani. Dabalataanis Adwaan ka'umsa Paan Afrikaa ta'uun akka galmaa'ee jirus dubbataniiru. Adwaan alattis saba,sablammoonnifi uummanni Itoophiyaa aadaa,hawaasummaafi amantaan walitti hidhamuun seenaa waloos waliin qabaachuu himaniiru. Adwaa irraas tokkummaan humnaafi injifannoo akka argamsiisuu danda'u irraa baranneerra jechuunis himaniiru. Dhaloonnni amma jirus rakkoo biyya mudatuufi birmadummaa biyyaa sarbu walgargaarsa,tokkummaafi jaalalan ijaaramee injifachuu akka qabus Dr.Rattaan yaadachiisaniiru. Adwaan injifannoo abbootiinii fi haadholiin keenya galmeessan nutimmoo yeroo ammaa diinagdee fi birmadummaa biyyaa kabachiisuun seenaa haaraa galmeessuu qabna jedhaniiru. Dhaloonni yeroo ammaas bu'aan waloomaa fi tokkummaan injifannoo Adwaa seenaa waloo keenyaa bareeche, hubatee tokkummaan waliin taanee seenaa dhaloonni bara baraan hin daganne hojjechuu qabna jechuun dhaamaniiru.

Guraandhala 13/2018(ENA)- Waltajjiin Gumii Balal marsaa 49ffaa injifannoo Adwaa irratti xiyyeeffachuun mata duree ''Adwaa:Injifannoo waloo yaadannoo waliinii'' jedhuun bakka hooggantoonni mootummaa, haayyoonnii fi keessummoonni adda addaa argamanitti galma Waajjira Pireezidaantii mootummaa naannoo Oromiyaatti gaggeeffamaa jira. Hoogganaan Biiroo Kominikeeshinii Oromiyaa Obbo Hayiluu Addunyaa saganticharratti haasaa taasisaniin, Itiyoophiyaan biyya birmadummaan ishee wareegama qaalii Abboonii fi haadholiin keenya kaffalaniin tikfamaa kan dhufte fakkeenya bilisummaa Gurraachotaati jedhan.   Adwaan injifannoo seenessa koloneeffattootaa cabse; dabaafi shira diinaa hunda kan diige waltajjii guddaa Idil-Addunyaawaa dha jedhani. Dirree falmii haqaafi diddaa garbummaa finiinse, garaagarummaa akka miidhaginaatti tokkummaa akka humnaatti fayyadamuun ijaaramee hoggansa tarsiima’aanis masakamuun humni Koloneeffattootaa kaayyoo Afriikaa qircachuu qabatee duulaan dhufe kan itti injifatamedhas jedhan. Injifannoo yaadama sirna garboomsaa kan diige ilaalcha walqixxummaa namoomaaf boqonnaa haaraa kan saaqe akka ta'ees Obbo Hayiluun himaniiru. Adwaarratti gootonni Itiyoophiyaa bakka hundarraa walitti babbahanii garaagarummaa keessoo cinatti dhiisuun, mufiiwwan sirna bulchiinsaa irraa qaban bulfachuun gamtaan ka’anii wareegama qaalii waloon kaffalameen birmadummaan biyyaa kan itti tikfame gootummaa Itiyoophiyaa kan ittiin labsame dha jedhani.Injifannoon kun humna sabdaneessummaan kan galmaa’e Itiyoophiyaatti ulfina horuun diinota kan qaanesse ta'uus ibsani.Kanaaf, Adwaan qaama seenessa waloo tokkummaa cimsee gaaddisa waloomaa jalatti Itiyoophiyummaa kan walitti qabe eenyummaa Itiyoophiyaanota dhugaa yeroo hundaa akka ta'ees eeraniiru.   Dhalootni haaraan kunis waggoota Torban darbe gama tokkoon birmadummaa biyyaa tiksaa gama biraatiin pirojektootaa fi hojiiwwan misoomaatiin injifannoo galmeessuun ashaaraa isaa kaa’aa jira jedhan. Kanaanis akkuma Abboonnii fi haadholiin keenya Adwaarratti seenaa hojjetan, dhaaloonni haaraan Hidha Haaromsaa Guddicha Itiyoophiyaa ijaaree xumuruun injifannoo fakkeenya Adwaa 2ffaa ta’e kaa’uun kan danda’ame ta'uu ibsaniiru. Pirojektiin Hidha Haaromsaa xumuramuu hordofee labsiiwwan seena qabeessa Gubaarratti labsamaniiru. Ajandaan waloo hojmanee hunda keenyaa ta’ee jirus imala haaraa hidharraa gara Ulaa Galaanaatti tarkaanfate jiru dha jedhani. Kunis qabeenya Ulaa Galaanaa shiraan dhabne karaa seera Idil-Addunyaa eegeen deebisuuf mootummaan xiyyeeffannoo kennee hojjechaa jira jedhaniiru. Akkuma abbootiinii fi haafholiin keenya tokko ta'anii injifannoo Adwaa galmeessan, nuti immoo birmadummaa biyya keenyaa murteessaa kan ta'e tokko taanee ulaa galaanaa fi marii biyyaalessaa jalqabamee jiru fiixaan baasuun, imala ijaarsa biyya jabduufi mootummaa cimaa jalqabame milkeessuuf dhimmoota waloon irraanfachuu qabnu waloon irraanfachaa dhiifamaan ce’uun dhimmoota waloon yaadatamuu qaban utubaa ijaarsa biyyaa taasisuun yaadachaa egeree ijaaruun murteessaa ta'uu himaniiru obbo Hayiluun.

Guraandhala 13/2018(ENA)- Mariin Biyaaolessaa seenessa hirmaachisaa bu’uura cimaarratti ijaaruu fi meeshaa furmaata waaraa fiduu ta’uusaa Hayyoonni Yunvarsiitii Mattuutti hojjetan ibsan. Mariin biyyaalessaa garaagarummaawwan jiran dhiphisuuf, waldhabdeewwan turan bu’uurraa dhabamsiisuu fi walii galtee biyyoolessaa uumuuf murteessaadha. Hayyoonni Yunvarsiitii Mattuutti hojjetanii fi dhimmicharratti yaadasaanii ENA’f kennan faayidaa marii biyyaalessaa ilaalchisuun yaadasaanii kennaniiru. Yunvarsiitichatti kan hojjetan barsiisaa fi qorataa Badhaasaa Amsaaluu akka dubbatanitti, marichi seenessa waloo biyyaalessaa bu’uura cimarratti ijaaruu fi furmaataa waaraa barbaaduuf meeshaa guddaa ta’uu dubbataniiru. Fedhii fi faayidaa biyyaalessaa kan durse ajandaa dhaabbataa qabachuu fi hojiirra oolmaasaaf waloon hirmaachuuf hunda dammaqsuuf dandeettii kan qabu ta’uu hubachiisaniiru. Hawaasni adeemsa marii biyyoolessarratti dammaqinaan hirmaachuun ijaarsa nageenyaaf yaada furmaata barbaachisa jedhu miira abbummaan gumaachuu akka qabu marii’ateera. Barsiisaan Yuunvarsiitichaa biroon Saabiit Zeeyinuu gamasaaniin mariin biyyoolessaa Ijaarsa seenessa waloof kan barbaachisu yaadama haaraa fi duudhaa barbaachisaa ni fida jedhaniiru. Biyyoonni Adduyaarratti Diinagdeen guddatanii fi dhiibbaa geessisan bu’uurasaanii seenessa waloorratti ijaaruun, fedhii fi faayidaa biyyoolessaaf dursa kennuun ta’uu dubbataniiru. Marichaan seenessa waloo cimaa ijaaramuun adeemsicha lammiileen hundi qoodasaanii bahuu akka qaban hubachiisuun kanarraas fayyadamoo kan ta’an hawaasicha ta’uu ibsaniiru. Biyyi seenessa waloon ijaaramte rakkoolee xixiqqaan akka hin raafamne qooda olaanaa kan qabu ta’uusaa fi Itiyoophiyaan damee siyaasa fi Diinagdeen akka dursituuf seenessa waloorratti hojiin hojjettu qooda olaanaa akka qabu hubachiisaniiru.

  Guraandhala12/2018(ENA):- Filannoo waliigalaa 7ffaa lammiileen hubannaa gahaa argartanii hirmaanaa bu’aa qabeessa akka qabaataniif hojjechaa jiraachuu Miseensonni Hawaasa Siivikii Godina baalee jiran beeksisan. Hawaasni Siivikii uummanni filannoo biyyoolessaa 7ffaa hubannaa gahaa qabaatee carraa dammaqinaan akka itti hirmaatu kaayyeffachuun hojjechaa jiraachuu ibsaniiru. Hawaasa Siivikii Godinicha jiraniif hubannoo filannoo biyyoolessaa 7ffaa uumuu fi adeemsa filannoo taajjabuuf boordii filannoo biyyaalessaarraa eeyyama fudhachuun sochii qabatamaa taasisaa jiru. Dhimmicha ilaalchisuun hawaasni Siivikii yaadasaanii ENA’f kennan akka ibsanitti, filannoo biyyoolessaaf lammiileen hubannaa gahaa qabaatanii hirmaannaa akka qabaataniif hojjechaa jira jedhaniiru. Pirezidaantiin Federeeshinii waldaa dargaggootaa Godinichaa Dargaggoo Iissaa Xaahir milkaa’ina filannichaaf odeeffanno sirrii hawaasa biraan gahuun qooda keenya baana jedheera. Keessumaa dargaggoonni filatan hubannaa waa’ee filannoo qaban caalaatti guddisuuf barumsa kennuu fi taajjabii filannoorratti dammaqinaan hirmaachuuf itti faagatamummaasaanii bahuuf kutannoo qabaachuusaanii ibsaniiru. Pirezidaantiin Federeeshinii Dubartootaa Godinichaa Aadde Sukkaaree Muliyyee gamasaaniin milkaa’ina filannoo biyyoolessaaf qoodasaanii akka bahan ibsaniiru. Filannoo biyyoolessaa torbaffaarratti dubartoonni hirmaanaa ho’aa akka taassisaniif itti gaafatamummaa hawaasummaasaanii bahuuf akka hojjetan ibsaniiru. Adeemsota filannoo duraa, yeroo filannoo fi filannoo booda keessatti hirmaannaa filattootaa ilaalchisee leenjii hubannoo uumuu kennuu eegaluu durataa’aa waldaa dargaggoota Godinichaa Abdul Hakiim Maahimus ibseera. Leenjiin kennamaa jiru kun, filattoonni adeemsa filannoo sirriitti hubachuun mirga dimookiraasii isaaniitti akka fayyadaman gochuuf faayidaa akka qabaatu ibseera. Durateessuun Waldaa Dubartoota Godinichaa AaddeGannnat Kaasaahuun, filannichi nagaa, dimookiraasii, bilisaa fi loogii-maleessa ta’ee akka xumuramuuf hawaasni hubannoo gahaa akka argatu hojjechaa jirra jedhaniiru. Akkasumas filattootaaf barnoota kennuun hubannoo uumuu bira dabree,gahee taajjabummaa keenya sirriitti bahachuuf itti-gaafatamummaa keenya bachuuf jirra jedhaniiru. Godinichatti filannoo waliigalaa7ffaaf buufataalee filannoo 395 keessatti hubannoo kennuu fi filannicha taajjabuuf, miseensonni dhaabbilee siivikii 1,000 ol ta'an Boordii Filannoo biiyyoolessaarraa Eeyyama argachuu isaanii beekuun danda'ameera.