Ebla 21/2018(ENA)-Tajaajilli Elektirikii Itiyoophiyaa, maamiltoota humna elektiriikii haaraa argachuu barbaadaniif hojmaata kafaltii yeroo dheeraan fayyadamaa isaan taasisu ifoomseera. Hojii gaggeessaan maarkeetiingii gurgurtaa fi tajaajila maamiltootaa obbo Isayaas Dandir, sirna hojmaataa kaffaltii haaraa kana ilaalchisuun miidiyaaleef ibsa kennaniiru. Ibsa isaaniinis,Tajaajilli Elektirikii Itiyoophiyaa qulqullina tajaajila maamiltootaa fi dhaqqabamummaasaa mirkaneessuuf sirna hojmaata ammayyaa hojiirra oolchaa akka jiru himaniiru. Hojiiwwan qulqullina tajaajilaa fi dhaqqabamummaasa babal'isuuf hojjetaman, baay'ina maamiltootaa dabaluu keessatti gahee olaanaa bahachaa akka jiru ibsaniiru. Sirni tajaajilaa haaraan kun Maamiltoota Elektirikii barbaadanii fi yeroo tokkoon kaffaluu hin dandeenye fayyadamoo kan taasisu ta’uu beeksisaniiru. Sirni kun, maamiltoonni lakkooftuu elektirikii haaraa barbaadan hundi rakkoo mallaqaan akka hin hafne yaadamee kan qophaaye ta'uu himaniiru. Rakkoo kaffaltii tajaajila haaraa furuuf, hanga ji'a 24 (waggaa lama) kan turu sirni kaffaltii yeroo dheeraa hojiirra kan oolu ta’uu ibsaniiru. Maamiltoonni kaffaltii kana kaffaltii tajaajilaa baatii baatiin kaffalanitti ida’uun kaffaluu akka danda'an dubbataniiru. Sirnichi maamiltoota kaffaltii guutuu yeroo tokkoon kaffaluu hin dandeenye fi rakkoo kaffaltii qabaniif furmaata kennuuf kan karoorfame ta'uu ibsaniiru. Fayyadamoo sirna kaffaltii yeroo dheeraa ta’uuf Iyyannoo dhiyeeffachuu, Kaffaltii dursaa (Advance payment) harka kudhan (10%) kaffaluu, Kaffaltii baatii baatii hafe waliigaltee mallatteessuun raawwachuu fi waliigaltee sana kabajuuf fedhii qabaachuu fi ulaagaalee kana fakkaatan of keessaa akka qabu dubbataniiru. Hojiirra oolchi kun maamiltoota lakkooftuu elektiriikaa sarara baaqqee "single phase" barbaadan hundaaf kan hojjetu ta'uu beeksisaniiru.

Ebla 21/2018 (ENA): Waajjirri Qonna godina Jimmaa hojii qonna Ganna bara 2018/19tti lafa heektaara kuma 883 irratti midhaan adda addaa misoomsuun, omisha kuntaala miiliyoona 36 argachuuf karoorfatee hojiitti galuu beeksise.   Itti gaafatamaan waajjirichaa obbo Tijaanii Tamaam ENAtti akka himanitti, oomishaa fi itti fufiinsa guddisuuf qonna godinichaa babal’isuu fi ammayyeessuun xiyyeeffannoon kennamee hojjetameen bu’aa jajjabeessaan argamaa jira jedhani. Hanga ammaatti lafa waliigalaa keessaa dhibbentaan 13 qotamee boqqolloo fi bishingaan facaafamuu himaniiru. Galteewwan yeroo oomishaaf barbaachisan qonnaan bultootaaf yeroon dhiyaachaa akka jiran eeruun, hanga ammaatti xaa’oon kuntaala kuma 780 ol galfamee qonnaan bultootaaf raabsamuu eeraniiru. Sanyiin filatamaa kuntaala kuma 21 ta’u kennamaa akka jirus eeruun, galteewwan yeroodhaan dhiyeessuun hojii midhaan facaasuu yeroodhaan akka raawwatamuuf gargaareera jedhan.   Akkasumas, rooba Gannaa fayyadamuun xaafii fi ruuzii dabalatee gosoota midhaan biroo akka facaafaman ibsaniiru. Jijjiirama kanaan booda qonna ammayyeessuuf qonnaan bultoota aanaalee Godinichaa 20 keessatti tiraaktaroota kuma 1 fi 426 kennuunis beeksisaniiru. Godina Jimmaa Aanaa Qarsaatti qonnaan bultoonni Muhaammad Abbaaboor fi Muhaammad Nuur Abbaatamaam dursanii galtee qonnaa barbaachisoo fudhachuun lafa isaanii sanyii facaasuu eegaluu isaanii ibsaniiru. Deeggarsa ogummaa ogeeyyii qonnaa irraa argachaa akka jiran kan eeran yoo ta’u, omisha bara darberraa fooyya’aa ta’e aragachuuf hojjechaa akka jiran ibsaniiru. Godinichatti bara omisha Gannaa kanaan qonnaan bultoonni 420,000 ol qonna kanarratti akka hirmaatan ibsameera. #Ena Afaan Oromoo #TOI #ENA

Ebla 21/2018(ENA): Mootummaan Itiyoophiyaa baasii jireenyaa lammiilee hir’isuuf birrii biiliyoonaan lakkaa’amu ramaduun akkasumas filannoowwan hunda fayyadamuun dhiyeessii boba’aa itti fufsiisaa akka jiru Tajaajilli Kominikeeshinii Mootummaa beeksise. Mootummaan fedhiiwwan bu’uuraa ofii biyya bilisaa ofiin guuttatu taate uumuuf imaammata baasee hojjachaa jira. Keessattuu, hirkattummaa boba’aa irraa bilisa ba’uuf dursee gara hojiitti galuun isaa, rakkoo hawaasummaa fi dinagdee cimaa biyyattii mudachuu danda’u biyyoota biroo wajjin yoo madaalamu sadarkaa olaanaadhaan hambisuu akka danda’e ibseera.   Guutummaatti hirkattummaa boba’aa irraa bilisa ba’uuf carraaqqii mootummaa fi dhuunfaa bal’aa kan gaafatu ta’us, waggoottaan saddeet darban keessa damee dhiyeessii anniisaa haaromfamuurratti hojiin hojjatame rakkoo amma jiru kana dandamachuuf baay’ee deeggaruu eerameera. Dhiyeessiin humna elektirikii Itiyoophiyaa guutummaatti Madda Anniisaa haaromfamu, jechuunis Bishaan, Qilleensaa fi Aduu irraa kan argamu yoo ta’u, gara fuulduraattis Anniisaa Jii’ooteermaalii fi Niwukilera irraa maddisiisuun fedhii biyyattii sadarkaa amansiisaa ta’een guutuuf hojjatamaa jira jedheera tajaajilichi. Madda Anniisaa Haaromsuun danda’amuun rakkoo hanqina boba’aa addunyaa fi daballii gatii amma uumame waliin walqabatee industiriiwwan omishaa biyyattii irratti dhiibbaa uumamuu danda’u hambisuu akka dandeessise ibseera. Mootummaan waggoota darban keessa lammiileen filannoo anniisaa haaromfamu fayyadamuu akka danda’aniif sirnoota onnachiiftuu garaagaraa hojiirra oolcheera. Kanaanis, kallattii mootummaa fudhatanii Konkolaataa Elektirikiin lammiileen fayyadamuu eegalan amma rakkoo kanaaf saaxilamoo ta’uu dhabuusaanii odeeffannichi eereera. Kunis kanneen duubatti hafaniif barnoota kan kennu yoo ta’u, Mootummaaf ammoo kallattii imaammata hordofaa jiru sanaaf ofitti amanamummaa kan uumu ta’uusaa ka’eera. Yeroo ammaa Konkolaataan Elektirikii kuma 140 ol kan jiran yoo ta’u, yeroo gabaabaa keessatti lakkoofsa kana baay’inaan guddisuuf karoorfamee hojjatamaa akka jiru tajaajilichi eerera. Mootummaan birmadummaa anniisaa Madda Anniisaa haaromfamu irratti hundaa’ee mirkaneessuuf carraaqqii taasisaa jira. Hidhi haaromsa guddicha Itiyoophiyaa xumuramuun dhiyeessii humna Itiyoophiyaa sadarkaa olaanaadhaan yoo guddisu, humni qilleensaa yeroo yeroon eebbifamanii gara hojiitti galaa jiru. Afrikaa keessatti humna aduu gurguddaa ta’e, paaneelota soolaarii (solar panel) oomishuuf dandeettiin kan uumame yoo ta’u, hirmaannaan dhuunfaas akka jajjabeeffamu ibsameera. Kana malees, ijaarsi waarshaa qulqulleessituu boba’aa fi oomisha gaazii uumamaa saffisaa akka jiru eerameera. Carraaqqiiwwan hunda kana gidduutti, rakkoon Addunyaa amma uumame lammiilee irratti miidhaa hamaa akka hin geessisne ittisuuf, mootummaan kanaan dura gargaarsa taasisaa ture irratti dabalatee, ji’a ji’aan birrii biiliyoona 20 ramaduun akkasumas filannoowwan garagaraa fayyadamuun dhiyeessii boba’aa itti fufsiisaa akka jiru tajaajilichi beeksise. Mootummaan kallattii imaammata diinagdee magariisaa fayyadamuun rakkoo kana bu’uuraraa ummata wajjin akka darbuu fi balbalii ba’umsaas fagoo akka hin taane odeeffannichi ibseera.

Ebla 21/2018 (ENA)- Baay’inni dhiheessii boba’aa Naafxaa har’a irraa eegalee waraana jiddu galeessa bahaatiin dura bakka turetti akka deebi’u taasifamuusaa ministirri maallaqaa Ahimad Shidee beeksisan. Ministirri maallaqaa Ahimad Shidee haala boba’aa addunyaa yeroo ammaa ilaalchisuun miidiyaaleef ibsa kennaniiru. Waraanichaan dura dhiheessiin boba’aa Naafxaa guyyaatti liitira miiliyoona 9 akka ture ministirri maallaqaa yaadachiisaniiru. Waraana booda dhiheessiin Naafxaa walakkaan hir’atee gara liitira miiliyoona 4 tuqaa 5tti gadi bu’ee akka ture ibsaniiru. Kanaaf Har’a irraa eegalee naannolee fi bulchiinsa magaalotaa hundatti dhiheessiin Naafxaa waraana dura bakka turetti guyyaatti liitira miiliyoona sagalitti akka deebi’u murtaa’uusaa beeksisaniiru. Sababa waraanichaatiin mootummaan baatii tokkotti birria biiliyoona 20 ta’u deeggarsa akka taasisu eeranii, kuusaan deeggarsaa walumaa gala birria biiliyoona 300 qaqqabuusaa ibsaniiru. Haala Kanaan mootummaan qonna, daldala alergii fi hojiilee biroo tilmaama keessa galchuun yeroo dhiheessiin boba’aa addunyaa hir’atetti baasii guddaa gochuun dhiheessiin bakka turetti akka deebi’u gochuusaa ibsaniiru. Dhiheessii shaqaxa bu’uraa amansiisaa gochuuf hojiin guddaan guddaan hojjetamuusaa ibsuun, rakkoon lammiilee furamaa guddina si’ataa fulla’aa galmeessisuusaa dubbataniiru. Sababa waraanichaatiin mootummaan baatii tokkotti birria biiliyoona 20 ta’u deeggarsa akka taasisu eeranii, kuusaan deeggarsaa walumaa gala birria biiliyoona 300 qaqqabuusaa ibsaniiru. Haala Kanaan mootummaan qonna, daldala alergii fi hojiilee biroo tilmaama keessa galchuun yeroo dhiheessiin boba’aa addunyaa hir’atetti baasii guddaa gochuun dhiheessiin bakka turetti akka deebi’u gochuusaa ibsaniiru. Dhiheessii shaqaxa bu’uraa amansiisaa gochuuf hojiin guddaan guddaan hojjetamuusaa ibsuun, rakkoon lammiilee furamaa guddina si’ataa fulla’aa galmeessisuusaa dubbataniiru. Mootummaan dhiheessii boba’aa Naafxaa yeroo miidhametti fayyadama lammiilee mirkaneessuuf sa’aatii 24 haala kan kan hordofu hundeessuun hordoffii gochaa akka jiru ibsaniiru. Mootummaan bittaa hatattamaatiin Beenzilaa fi boba’aa Xiyyaaraa bituudhaan rakkinicha damdamachuuf dandeessiseera jedhaniiru. Mootummaan boba’aa bittaa addaatiin baasii guddaadhaan dhiheessaa dhiibbaa ummatarra gahu hir’isuuf tattaaffii gochuusaas ibsaniiru.