Caamsaa 18/2018(ENA): Itiyoophiyaan Gaanfa Afriikaatti tarkaanfiiwwan misooma dinagdee naannichaa mirkaneessan bu'a qabeessa ta'an fudhachaa jiraachuu Ishee Mana Maree Bakka Bu'oota Ummataatti Itti waamamaan olaanaan Mootummaa Ministir Doktar Tasfaayee Baljigee ibsan. Gaaffiin Itiyoophiyaan dhimma abbummaa hulaa Galaanaa qabdu, hojmaata dippilomaasii Idil-Addunyaatiin kan milkaa’uu danda’uu fi dhimma jireenyaa ta’uu isaa hubachiisaniiru. Ministirri Doktar Tasfaayee Baljigee ENA’f akka ibsanitti,Itiyoophiyaan Gaanfa Afriikaatti tokkummaa dinagdee naannichaa mirkaneessan tarkaanfiiwwan bu'a qabeessa ta'an fudhachaa jirti jedhani. Gaaffiin Itiyoophiyaan haqa abbummaa hulaa Galaanaa qabduus, carraaqqii ishee walitti hidhamiinsa dinagdee naannichaa uumuuf taasiftu irraa adda baafamee kan ilaalamu akka hin taane hubachiisaniiru. Humna elektiriikii Hidha haaromsaa Guddicha fedhii Itiyoophiyaatiin wareegama waliinii Itiyoophiyaanotaatiin ijaarame irraa maddu, walitti hidhamiinsa dinagdee naannichaatiif gumaacha guddaa gumaacha jira jedhaniiru. Gara fuulduraattis, Ajandaa Gamtaa Afriikaa 2063 bu'uura godhachuun, Itiyoophiyaan tokkummaa dinagdee Ardii ariifachiisuuf qabeenya isheetti fayyadamuun kutannoodhaan akka hojjettu ibsaniiru,. Itiyoophiyaan Galaana Diimaa wajjin hidhata ishee uumamaa, seenaan, teessuma lafaa fi seera qabeessummaa walitti hidhe ta'uu isaa ibsanii, akka isheen abbummaa hulaa Galaanaa dhabdu gochuuf kiyyoo fi dabaan dhimmi deemame gaddisiisaa fi yaada Itiyoophiyaa dadhabsiisuu irraa kan madde ta'uu isaa dubbataniiru. Herregni Itiyoophiyaan qabeenya isheetti fayyadamtee guddina ishee mirkaneessinaan sodaa keenya taati jedhu, murtii boodatti hafaa fi dogoggoraa diinota seenaati jedhaniiru. Kanaanis, gaaffiin Itiyoophiyaan abbummaa hulaa galaanaa qabdu bu'uura seenaa kan qabu, dhugaa uumamaa fi teessuma lafaa kan qabu, seera qabeessummaa fi loogii maleessummaa kan walitti hidhe dhimma jireenyaati jedhaniiru. Sadarkaa Idil-Addunyaatti biyyoota laatin Ameerikaa Booliviyaa fi Peeruu, Biraaziil fi Paaraaguway; Afriikaatti immoo muuxannoo Maalii, Senegaalii fi Kooti DiiVuwaar furmaata waliinii itti fayyadaman akka fakkeenyaatti ibsaniiru. Gaaffiin Itiyoophiyaan Abbummaa hulaa galaanaa qabdu, hojmaata dippilomaasii Idil-Addunyaatiin kan milkaa’uu danda’uu fi dhimma jireenyaa ta’uu isaa hubachiisaniiru Kanaanis, gaaffii Itiyoophiyaan abbummaa karra galaanaa seenaan, seeraa, teessuma lafaa fi madaalawaa qabdu karaa dippilomaasiitiin milkeessuun akka danda'amu dubbataniiru. Biyya ummata baay'ee qabduuf kun qananii osoo hin taane, dhimma faayidaa biyyaalessaa furtuu kabaja abbummaa dinagdee mirkaneessudha jechuun ibsaniiru. Tajaajila bufata doonii fi loojistiksiitiif qabeenyi guddaan waggaa waggaan baasii ta'u,dorgammii daldalaa Idil addunyaa fi imala guddinaa irratti dhiibbaa guddaa akka uume hubachiisaniiru.

Caamsaa 17/2018 (ENA): Naannoo Oromiyaa Godina Iluu Abbaa Booraa keessatti qonna kilaastara Gannaatiin dhibbeentaan 80 ol kan misoomu ta’uu Waajjirri Qonna Gonichaa beeksiseera. Akkasumas qonna Gannaa Godinicha keessatti midhaan gosa adda addaatiin lafa heektaara kuma 389 ol uwwisuuf hojiin eegalameera.   Naannoo Oromiyaa Godina Iluu Abbba Booraa keessatti qonna teeknooloojiin deeggaramu babal’isuun oomishtummaa guddisuuf tattaaffiin hojjetamaa akka jiru itti gaafatamaan Waajjira Qonna Godinaa obbo Addaamuu Taakkalaa beeksisaniiru. Qonna Gannaa keessatti boqqolloo, maashillaa, ruuzii, atooboonsituu fi gosootni midhaan biroo akka facaafaman akeekuun, lafti dhibbeentaa 80 ol kilaastaraan kan misoomu ta’uu ibsaniiru. Qonna kilaastaraaf xaa’oo fi sanyii qulqullina qabu dhiyeessuudhaan oomishtummaa guddisuu irratti xiyyeeffachuu isaaniis ibsaniiru. Qonna Gannaa kana keessatti xaa’oo keemikaalaa kuntaala kuma 161 ol fi sanyiiwwan filatamoo adda addaa qaban kuntaala kuma 24 ol kan hojiirra oolu ta’uu ibsaniiru. Kana keessaa lafti heektaara kuma 61 boqqolloodhaan kan uwwifamu yoo ta’u, itti dabaluudhaanis xaa’oon kuntaala kuma 50 ol kan ta’u dhimma kanaaf qophaa’uu ibsaniiru. Godinichatti qonnaan bultoonni Geetachoo Baqqalaa, Tasfaayee Habtamaariyaam fi Birhaanee Asaffaa qonnaan bultoota biroo waliin ta’uun lafa heektaara 116 ol irratti kilaastaraan boqqolloo facaasuu eegalaniiru. Sanyii filatamaas ta’e xaa’oo yeroon argachuun kan isaan fayyade ta’uu himaniiru. Bulchiinsi godinichaas tiraaktara fayyadamuun hojii qonnaa isaanii teknolojiidhaan akka deeggaran deeggarsa barbaachisu taasisuu isaa ibsaniiru. #ENA_Afaan_Oromoo #ENA

Caamsaa 17/2018(ENA): Bulchiinsi Magaalaa Finfinnee Ayyaana Iid Al-Adihaa (Arafaatiif) hanqinni oomishaa akka hin mudannee fi gabaan tasgabbaawaan akka jiraatu qophii gochuu isaa Kantiibaan Magaalichaa aadde Adaanech Abeebee ibsaniiru. Kantiibaa Adaanech Abeebee ergaa fuula miidiyaa hawaasummaa isaanii irratti dabarsaniin akka jedhanitti; Bulchiinsi magaalichaa hordoftoota Amantaa Islaamaa biratti ayyaana Iid Al-Adahaa (Arafaa) barana yeroo 1147ffaaf kabajamu sababeeffachuun, jiraattonni dhiibbaa gabaa fi dhiphina tokko malee ayyaanicha gammachuun akka kabajaniif, meeshaaleen bu'uuraa fi oomishoonni ayyaanichaa gatii madaalawaa fi hamma gahaadhaan akka dhiyaatan qophii bal'aa taasiseera. Keessattuu, wiirtuulee gurgurtaa oomishaalee qonnaa magaalattii keessatti argaman 7 keessatti, oomishoonni akaakuu midhaanii adda addaa, muduraa fi kuduraa baay’inaa fi gatii madaalawaan akka dhiyaatan hubachjiisaniiru. Bitattoonni salphaatti naannoo isaaniitti akka bitachuu danda'aniif, gabaaleen Sanbataa fi Dilbataa 250 bakkeewwan hundatti argaman hanga ayyaanichaatti banamanii akka hojjetan taasifamuu isaa ibsaniiru. Suuqota waldaalee hojii gamtaa shammattootaa kuma 2 fi 52 fi kuusaa dhaabbata daldalaa hojiiwwan Finfinnee keessatti oomishoonni zayitaa fi daakuu hamma gahaadhaan dhaqqabamaa ta'uusaanii ibsaniiru. Jiraattonni magaalattii filannoowwan gabaa eeraman keessaa kan naannoo isaaniitti dhiyoo jiru fayyadamuu akka danda'an Kantiibaa Adaanech Abeebee ergaa isaaniitiin ibsaniiru.

Caamsaa 17/2018(ENA) : Godina Baalee aanaa Dalloo Mannaatti pirojektiin jallisii Yaadot hojjatamee xumuramuun eebbifameera.   Sirna eebba pirojektichaa irratti hoggantoota mootummaa olaanoo naannoo Oromiyaa, Godinaafi aanaa akkasumas qaamoleen hawaasaa garagaraa argamaniiru. ‎‎Pirojektiin Jallisii Yaadot lafa hektaara kuma 3 misoomsuun, abbaa warraa kuma 6 ol fayyadamoo kan taasisudha jedhameera. Pirojektichichi hojjetamee xumuramuuf birrii miliyoona 936 ol baasii ta'uunis ibsameera.