Adoolessa 7/2018 (ENA)- Ministirri muummee Dr. Abiyyi Ahimad har’a Oliiseenguun Obasaanjoo waajjirasaaniitti simatanii mari’ataniiru. Jala bulti marii biyyaalessaa seena qabeessaatti, michuu Itiyoophiyaa kan ta’an angafticha Oliiseeguun Obasaanjoo waliin marii taasisuusaanii ministirri muummee Dr. Abiyyi Ahimad ergaasaaniirratti barreessaniiru. Yeroo itti aanu marii biyyaalessaa ilaalchisuun mari’achuuf akkasumas hojiilee Kanaan dura raawwatan irraa ogummaa horachuun kan danda’ame yoo ta’u, keessumaa adeemsa nageenyaa Biyaafiraan gaggeessuudhaan muuxannoo horatan qooduusaanii ibsaniiru. Kun ammoo tokkummaa fi imala nageenyaa Itiyoophiyaan mariidhaan mirkaneessitu irratti barumsa guddaa kan kennu ta’uu dubbataniiru. Itiyoophiyaan gumaacha tilmaamuun hin danda’amne kan Obasaanjoon gumaachaniif yoomiyyuu ni galateeffatti jedhan ministirri muummee ergaa dabarsaniin.

Adoolessa 7/2018 (ENA)- Manni marichaa walgahii ariifachiisaa har’a taa’een wixineewwan labsii waliigaltee liqii lama irratti mari’atee raggaase. Manni maree bakka bu’oota ummataa jahaffaan bara hojii wagga shanaffaa walgahii ariifachiisaa 2ffaa gaggeesseera. Manni marichaa walgahiisaa har’aatiin mootummaa Itiyoophiyaa fi rippaabiliikii Xaaliyaanii akkasumas baankii addunyaarraa karaa raawwii imaammata guddinaa fi misooma Itiyoophiyaa waliin wal simeen misooma fulla’aa fi amansiisaa Itiyoophiyaaf kan kennamu walii galtee liqii bajata deeggarsa raawwachiisuuf oolu sagalee raggaaseera. Mana maree bakka bu’oota ummataatti ministirri itti waamamaa mootummaa Tasfaayee beeljigee waliigaltee liqichaa ilaalchisuun ibsa kennaniin, waliigalteen liqii kun Yuuroo miiliyoona 70 yoo ta’u, kaffaltii tajaajilaa tokkollee akka hin qabaanne ibsaniiru. Liqiin kun kallattiidhaan gara bajata mootummaa keessa akka galu ibsanii, hojiirra oolmaa dinagdee gooroo si’achiisuudhaan guddina ariifachiisuuf ni gargaara jedhaniiru. Walii galteen kun yeroo bayyanannaa wagga 16 kan qabu yoo ta’u, wagga 30 keessatti kaffalamee kan xumuramu liqii yeroo dheeraa akka ta’e dubbataniiru. Manni marichaa wixinee labsii waliigaltee liqii kana sagalee guutuun raddaaseera. Akkasumas manni marichaa walii galtee liqii pirojektii dijitaalaayizeeshinii mootummaa Itiyoophiyaa fi mootummaa Faransaayi jidduutti sadarkaa sirnoota to’annoo ajajaa fi bulchiinsa qabeenyaa raawwachiisuuf oolu mari’atee raggaaseera. Mana marichaatti ministirri itti waamamaa mootummaa waliigalticha ilaalchisuun ibsa taasisaniin, waliigalteen kun deeggarsa faayinaansii Yuuroo miiliyoona 54 fi kuma 600 kan ofkeessatti qabate ta’uu dubbataniiru. Walii galteen liqii kun bayyanannaa wagga 10 keessatti wagga 25tti kaffalamee kan xumuramu ta’uu eeranii, dhallisaas 0 tuqaa 347 dhala xiqqaa kan qabu ta’uu ibsaniiru. Walii galteen liqii kun imala dijitaalaayizeeshinii Itiyoophiyaa kan si’achiisu akka ta’e eeraniiru.

Yeroo Itiyoophiyaan marii biyyaalessaa seena qabeessaa fi guddaa ta’eef qophaa’aa jirtu yeroo seenaa murteessaa ta’e kanatti, Lammii biyya koo hundaaf waamicha guddaa fi kabajamaa dabarsun qaba. Mariin boru eegalu waltajjii siyaasaa guutuu qofa osoo hin taane, boqonnaa seenaa haaraa hiree fi abdii egeree dhaloota keenyaa guutummaatti murteessudha. Nageenya waaraa, tasgabbii fi badhaadhina waliigalaa biyya keenyaaf kan tattaafattan, guddummaa Itiyoophiyaaf kan dhimmaman hundi, fardis dirreenis kunooti. Akkuma abboonnii fi haadholiin keenya kaleessa Adwaatti bilisummaa, birmadummaa fi kabaja biyyaaf dhiigaa, lafee fi lubbuu isaanii wareegan, Itiyoophiyaan har’as ijoollee ishee kutannoo qaban kan hambaa seenaa baatanii deeman barbaaddi. Haa ta'u malee, har'a biyyi keenya meeshaa waraanaa osoo hin taane, kan isheen barbaaddu qabsaa'ota nagaa ogummaa, dhugaa, beekumsaa fi ciminaan hidhatan dha. Har’as akkuma kaleessaa jala bultii injifannoo guddaa irra jirra; sababni isaas injifannoon Itiyoophiyaa fi ummata ishee waan hin oolleef! Haasaa qaroome, marii karaa nagaa fi waliigaltee sabaatiin, qormaata nu mudate hunda irra aanuun gara badhaadhinaatti waliin tarkaanfanna! #Ena Afaan Oromoo #TOI #Ena#

Adoolessa 6/2018 (ENA)- Ministirri muummee Dr. Abiyyi Ahimad pirezidaantii Beeniin Romuwald Wadagnii waliin har’a mari’ataniiru. Ministirri muummee Dr. Abiyyi Ahimad pirezidaantii Baaniin waliin dhimmoota waloorratti mari’achuusaanii ergaa fuula miidiyaa hawaasummaa isaaniirratti dabarsaniin ibsaniiru. ‎Hariiroo gam-lamee cimsuu fi faayidaalee waloorratti tumsa olaanaa gochuuf carraalee jiranirratti marii bu’a qabeessa taasisuusaanii ibsaniiru. Kutannoo waloo tumsa gadi fagoo fi michooma fulla’aaf qabnu caalaatti guddisuuf fedhii cimaa qabna jedhan ministirri muummee ergaa dabarsaniin.

Adoolessa 6/2018 (ENA) : Naannoo Oromiyaatti waggoota shanan darban keessatti hojiiwwan misoomaa gaaffiiwwan bu’uuraa uummataa furuu dandeessisan raawwatamuu isaanii Pireezidantiin Naannichaa Obbo Shimallis Abdiisaa ibsan. Gamaggamni raawwii karoora hojii mootummaa fi paartii kan bara baajataa 2018 Naannoo Oromiyaa Magaalaa Adaamaa Galma Abbaa Gadaatti gaggeeffamaa jira.   Wayita sana Pireezidantiin Naannichaa Obbo Shimallis Abdiisaa, waggoottan shanan darbanitti gaaffiiwwan misoomaa uummata naannichaan ka'aa turan qabatamaan deebii argataniiru jedhan. Keessattuu bara baajataa xumurame keessa dameewwan hundaan bu'aawwan milkaa'oon galmeeffamuu isaanii ibsuun; adeemsa kanaan hoggansi nageenya naannichaa mirkaneessuu dhaan, misoomni hawaasummaa fi dinagdee akka ariifatu taasiseera jedhaniiru. Baajata mootummaa fi hirmaannaa uummataa qindeessuudhaan gaaffii misoomaa uummataa deebisuuf carraaqqiin taasifame bu'a qabeessa akka turees kaasaniiru. Kanaanis, hoggansi naannichaa injifannoowwan argaman cimsanii itti fuufsiisuuf tooftaawwan dandeessisan sakatta'uu fi hanqinoota mul'atan adda baasuun hojiiwwan itti aananiif qophaa'uu akka qaban ibsaniiru. Bara baajataa itti aanuttis poteenshaala jiruu fi fedhii misoomaa naannicha jiruun kan walsimu karoora hiixataa qopheessuun,filannoowwan jiran hundatti guutummaatti fayyadamuun akka barbaachisu ibsaniiru. Keessattuu badhaadhina maatii mirkaneessuuf qusannaa irratti xiyyeeffannoon hojjechuun kan qaban yoo ta'u; yaa'insa investimantii ariifachiisuuf godinaalee ,Aanaalee fi magaalota keessa haalawwan mijatoo jiran sakatta'uu fi hojii irra oolchuun akka qaban hubachiisaniiru. Dabalataanis, dandeettii fi gahumsa hoggansa ganda irraa kaasee hanga naannootti jiru gamaggamaan sakatta'uun, bu'aawwan murtaa'a argamaniin osoo hin dagatiin ammas dandeettii guutuun socho'uun akka barbaachisu dubataniiru. Itti gaafatamaan Waajjira Paartii Badhaadhinaa damee Naannoo Oromiyaa Obbo Kafyaalawu Tafarraa gama isaaniitiin, bara baajataa kanatti riifoormii siyaasaa, hawaasummaa fi dinagdee gara qabatamaatti jijjiiruu keessatti injifannoowwan abdii namatti horan galmeeffamuu ibsaniiru. Bara baajataa xumurame qofa keessatti pirojeektonni gara kuma 21 ta'an ijaaramanii tajaajila uummataaf akka oolan taasifamuu kaasanii; kunis raawwii karoora waggichaa bu'a qabeessa kan taasise yoo ta'u, raawwiinsaa guutuu Godinaalee fi magaalotaatti wal-fakkaataa ta'uu dhabuu isaa eeraniiru. Filannoo biyyaalessaa torbaffaa irratti uummatni ba’ee hirmaachuun fedhii jabaa dimokiraasiif qabu kan agarsiise fi injifannoon siyaasaa guddaan kan galmeeffame ta’uu kan eeran hoggantoonni kun; bara baajataa haaraa qabame kanatti hoggansi guutummaa dandeettii fi kutannoon socho'uu akka qabu dhaamaniiru.    

Adoolessa 6/2018 (ENA): Itti aanaan Ministira Muumee obbo Tamasgeen Xurunaa Pirezidaantii Rippabiliika Beeniin, Roomuwaldi Wadagni simatan. Itti aanaan Ministira Muummee ergaa fuula miidiyaa hawaasaa isaanii irratti dabarsaniin, Pirezedaantii Rippabiliika Beeniin, Roomuwaldi Wadagni, baga gara biyya argama dhala namaa nagaan dhuftan jedhaniiru. “Imala Jijjiirama olaanaa keessa kan jirtu Itiyoophiyaan, turtiin keessan milkaa’aa akka isiniif ta’u nan hawwa jedhani.” #Ena Afaan Oromoo #TOI #Ena#

Adoolessa 6/2018 (ENA): Mootummaan Naannoo Oromiyaa gamaggama raawwii hojiiwwan mootummaa fi paartii kan bara baajataa 2018 gaggeessuu eegaleera. Waltajjii gamaggamaa kana irratti Pireezidaantii Naannoo Oromiyaa Obbo Shimallis Abdiisaa dabalatee hoggantoonni hojii ol'aanoon mootummaa naannichaa argamaniiru. Gamaggama raawwii hojii kanaan milkaa’inawwan gurguddoo dameewwan hedduun galmeeffamanii fi hanqinoota turan sakatta'uudhaan, kallattii karoora hojii bara 2019 ni kaa’ama jedhamee akka eegamu ibsameera.    

Adoolessa 5 / 2018 (ENA): Magaalaan Finfinnee ijaarsa seenessa waloo fi tokkummaa cimsuudhaan gidduu-gala nageenyaa fi misoomaa ta'aa dhufuushee Kantiibaan Magaalaa Finfinnee Adaanech Abeebee ibsan. Manni Maree Magaalaa Finfinnee yaa'ii idilee 4ffaa bara hojii 5ffaa isaa galma yaa'ii mana marichaa Giddu-gala Yaadannoo Injifannoo Adwaatti gaggeessaa jira. Kantiibaan Magaalaa Finfinnee Adaanech Abeebee yaa'ii idilee mana marichaa kana irratti gabaasa raawwii hojii waggaa kan bara baajataa 2018 Bulchiinsa Magaalichaa dhiyeessaa jiru. Kantiibaa Adaanech Abeebee gabaasa isaaniitiin; Finfinnee akka maqaa ishiitti miidhagsuuf waadaa gallerratti hundaa'uun, waggoottan shanan darban keessatti jijjiiramoota bu'uuraa fi hundee-qabeessa ta'an hedduu raawwachuu dandeenyee jirra jedhaniiru. Dabalataanis, ilaalchota boodatti hafoo fi rakkoolee hundee gadi fageeffatanirratti, jabeenyaan qabsaa’uun, Finfinnee siyaasa faayidaa hin qabne wal-dhiibuu fi wal-harkisuurraa walaba kan taate, gidduu-gala nageenyaa fi misoomaa gochuun akka danda'ame dubbataniiru. Akka fakkeenyaattis, Gidduu-gala Yaadannoo Injifannoo Adwaa ijaaruudhaan, bu'uura seenessa waloo fi walitti qabaa ta'e ijaaruu dandeessisu ta’uusaa akka ragaatti hubachiisaniiru. Finfinneetti nageenyi fulla'aan akka mirkanaa'u, miidhagduu, magariisaa fi qulqulluu gochuun, fakkeenya badhaadhina Itiyoophiyaa akka taatuuf bu'uuraaleen dandeessisan lafa qabachaa jiraachuu ibsaniiru. Magaalattii jijjiiruudhaan, magaalittiin Afriikaa keessaa magaalota qulqulluu kudhan keessaa tokko ta'uun beekamtii idil-addunyaa argachuu ishee kaasaniiru. Uwwisni Magariisummaa Magaalattii dhibbeentaa 2tuqaa8 irra ture gara dhibbeentaa 24tti ol guddachuun isaas ragaa jijjiirama bu'uuraa kan biroo ta'uusaa eeraniiru. Daandileen Finfinnee bal'aa, dukkana magaalittii dura ture ifaatti jijjiiramuu kan ibsan kantiiba Adaanech; kunis dandeettii Magaalittiin yaa'iiwwanii fi daawwattootaa hedduu keessumsiisuuf qabdu akka dabale ibsaniiru. Giddu-gala dippilomaasii ta'uunshees caalaatti cimee, Itiyoophiyaanota qofa osoo hin taane, Afriikaanotni hundi 'Magaalaa guddoo keenya' jedhanii kan waamanii fi hunda keenyaa kan boonsu ta'uu ishee ibsaniiru.