Adoolessa 24/2018 (ENA): Ministirri Muummee Doktar Abiyyi Ahimad uummanni naannoo Amaaraa akkuma ummatoota Itoophiyaa hunda tasgabbii biyyattii fi babal’ina iddoo siyaasaa isheef gumaacha guddaa gumaacheera jedhan. Ministirri Muummee Dr. Abiyyi Ahimad Dhaabbata Miidiyaa Amaaraa (AMC) waliin marii taasisaniiru. Ummanni naannoo Amaaraa akkuma ummatoota Itoophiyaa hunda sirna siyaasaa fooyyessuu, imala diinagdee saffisiisuu fi hunda hammatee taasisuuf yeroo jijjiirama biyyaalessaa ammaa fi kanaan duraa keessatti qabsaa’aa turuu yaadachiisaniiru. Imala jijjiirama kana hordofe keessatti ummanni naannoo Amaaraa fi ummanni Itiyoophiyaa guutuun harka isaa diriirsuun jijjiirama kana fudhachuun biyya tasgabbeessuu keessatti ga’ee isaanii akka ba’an hubachiisaniiru. Mootummaan haala siyaasaa fi diinagdee jijjiirama kanaan dura ture jijjiiruuf hojiiwwan bal’aa hawaasummaa raawwachuu isaa eeruun, adeemsa baniinsaa kana keessatti wanti gaariin mul’ateera jedhan. Haa ta'u malee, humnoonni karaa baname irratti dantaa sabaa Itiyoophiyaa mormuu fi miidhuuf hiriiran jiraachuus hubachiisaniiru. Qormaatni jiraatus ummanni naannoo Amaaraa karaan ida’amuu filannoo qofa ta’uu fi badhaadhinaaf carraaqqiin taasifamu sirrii ta’uu waan amanuuf, filannoon bara kanaa amantaa sana qabatamaan mirkaneessee jira. Kana malees, waliin hojjechuun, ciminaan hojjechuun, akka biyyaatti tokkummaan biyya seena qabeettii cimsuu akka dandeenyu ummanni yeroon itti amanu amma ta’uu ibsaniiru. #TOI #ENA Afaan Oromoo

Adoolessa 24/2018(ENA) : Yaa’ii ijoon gareewwan saddet hirmaattota 500 qabaniin Wiixata dhufu ni eegala jedhan Komishinarri Komishinii Marii Biyyaalessaa Piroofeesar Masfin Ara’aayaan. Piroofeesar Masfin Ara’aayaan adeemsa yaa’ii marii biyyaalessaa ilaalchisee ibsa kennaniin, gareewwan 16 hirmaattota 250 qaban ajandaalee irratti mari’achaa turan gabbisuun gareewwan 8 hirmaattota 500 qabaniif kan dhiyeessan ta’uu ibsaniiru. Mari’attoonni ajandaalee irratti waliigalteerra gahuun akka irraa eegamu eeranii, waliigalteerra gahuun seeraafi sirna mataasaa qaba jedhaniiru. Adeemsa waliigalteerra gahuu keessatti guutummaatti waliigalamuu yoo baate adeemsi ittiin hiikamu jiraachuus kaasaniiru. Kanaaf immoo gareen bakka bu’oota sadarkaa naannoo fi federaalaatti filatan jiraachuu eeruun, garichis garee naannoo fi bulchiinsa magaalotaa yookaan garee dhaabbilee federaalaa akka jedhamu ibsaniiru. Ogeeyyiin garaagaraa guyyoottan itti aanan hirmaattotaaf deeggarsa akka taasisan kaasanii, ogeeyyiin kunneen Kanaan duras deeggarsa gochaa turuu eeraniiru. Yaa’iin marii biyyaalessaa Itiyoophiyaa Adoolessa 8, 2018 irraa eegalee adeemsifamaa jira. #TOI #ENA Afaan Oromoo

Adoolessa 23/ 2018(ENA): Manni Maree naannoo Amaaraa yaa’ii idilee 12ffaa bara hojii 5ffaa marsaa 6ffaa gaggeessuu eegaleera. Yaa’ichaan gabaasa raawwii karooraa bara baajataa 2018 irratti ni mari’atamaan eegama. Labsiiwwan garaagaraafi baajanni bara 2019 naannichaa mana marichaaf dhiyaachuun ni raggaasifamu jedhamee eegama. #Ena Afaan Oromoo #TOI #Ena#

Adoolessa 23/2018(ENA) : Mariin Biyyaalessaa adeemsifamaa jiru biyya waloo, tasgabbii fi nageenya waaraa qabdu ijaaruuf carraa guddaa seenaa keessatti argame ta'uu Oggeessi Saayinsii Hawaasaa Dr. Biraanuu Leenjisoo ibsan.   Dr. Biraanuu Leenjisoo ENA waliin turtii taasisaniin akka himanitti, biyyi tokko kan ijaaramuu danda'u marii fi waliigaltee lammiilee fooyyessuun waan ta'eef, adeemsi kun bu'uura cimaa ijaarsa biyyaati jedhani. Itoophiyaa keessatti aadaan marii fi wal dhaggeeffachuu kan hin guddanne ta'uu kan eeran Dr. Biraanuun, seenaa siyaasaa darbe keessatti wal-amantaa fi garaagarummaa keessatti furmaata waliinii barbaaduu caalaa walitti bu'iinsatu baay'inaan calaqqisaa ture jedhaniiru. Kanaafuu, jalqabbiin aadaa marii kanaa guutummaan guutuutti rakkoo hunda yoo furuu baateyyuu, marii jalqabuun mataan isaa injifannoo fi milkaa'ina guddaa akka ta'e eeran. Komishinii Marii Biyyaalessaatiin dhimmoota seenaa fi ajandaa dhiyaatan irratti mari'achuu fi uummata gara waliigaltee walootti fiduuf adeemsi taasifamaa jiru kun haalaan barbaachisaa dha jedhaniiru. Biyya mariin keessatti hin dagaagiinii fi waliigaltee uummataatiin hin ijaaramiin keessatti sirna dimookiraasii bu'uureessuuf adeemsi marii kun mataan isaa bu'aa guddaa ta'uu fi wal-hubannoo waloo uumuu irratti gahee murteessaa akka qabu himaniiru. Itoophiyaan biyya sab-daneessaa, aadaa-daneessaa fi afaan-daneessaa ta'uushiitiin, uummatoonni biyyattii dhimmoota ijoo irratti waliigaltee waloo uumuu fi waan waloo tokko wajjin ijaaruun murteessaa akka ta'e eeraniiru. Yeroo amma kana rakkoolee jiran hiikuun kan danda'amu mari'achuun malee akka jaarraa 19ffaa humnaa fi afaan qawweetiin ijaarsa biyyaa itti fufuun akka hin danda'amne Dr. Biraanuun hubachiisaniiru. Rakkoolee fi wal-waraansa seenaa waggaa baay'ee ture hundee irraa furuudhaan biyya tasgabbii, nageenyaa fi misooma qabdu fiduuf jalqabbiin marii aadaa godhachuun amma jalqabame abdachiisaa ta'uu dubbataniiru. Mariin biyyaalessaa kun adeemsa isaatiinuu bu'aa guddaa kan qabudha; sababni isaas Itoophiyaa keessatti wajjin gadi taa'anii dubbii hiikuun aadaa waan hin ta'iniif, aadaa marii jalqabuun waan guddaa ta'uu himaniiru. Hanqinaaleen gara garaa mul'atanis, jalqabbii kana xiqqeessanii ilaaluu osoo hin taane, muuxannoo irraa argachaa fi hanqina jiran hiikaa deemuun barbaachisaa ta'uu dubbataniiru. Ijaarsa biyyaa keessatti hayyoonni siyaasaa wajjin gadi taa'anii mari'achuun, mul'ata waloo kaayyachuufi biyya eenyummaa lammiilee wal-qixxummaatti bakka bu'u ijaaruu irratti hojjechuu qabu jedhaniiru. Seenessi biyyattii seenessa gara tokkotti qofa deebi'ee osoo hin taane, seenessa uummattoota biyya kanaa wal-qixxummaan calaqqisiisu ta'uu danda'uu qabas jedhaniiru. Jalqabbii marii kana kunuunsuudhaan, rakkoolee fi hanqinoota adeemsa keessatti mul'atan sirreessaa deemuun biyya tasgabbii fi badhaatuu ijaaruun ni danda'amas jedhaniiru. Itoophiyaa keessatti abdiin marii biyyaalessaa irratti kaa'ame guddaa waan ta'eef, dogoggora malee waan hundumaa raawwachuuf eeguu caalaa, yaalii fi adeemsa keessa sirreessaa deemuun amala marii ta'uu akka qabu dubbataniiru. Aadaa siyaasa wal-mari'achuu hin baratamne keessaa gara marii fi wal-dhaggeeffachuutti ce'uun adeemsa barumsa guddaa biyya fayyadu ta'uu himaniiru. #Ena Afaan Oromoo #TOI #Ena#

Adoolessa 22/2018(ENA): Marii Biyyaalessaa irratti dhimmoota gurguddoo falmisiisoo ta’an irratti dammaqinaan marii'achaa jiraachuusaanii Jaal Sanyii Nagaasaa ibsan. Marii biyyaalessaa irratti hirmaachaa kan jiran Jaal Sanyiin akka jedhanitti, hanga ammatti mariicha irratti dhimmoota gurguddoo falmisiisoo ta’an irratti dammaqinaan marii’atamaa jiraachuu ibsaniiru. Waldhabdeewwan biyya keessa jiran hunda karaa nagaa fi mariitiin hiikuuf Mariin Biyyaaleessaa furtuu murteessaa ta’uu Jaal Sanyiin ibsaniiru. Waldhabdee biyya keessatti waggoota hedduudhaaf ture karaa nagaatiin furuuf mariin baay'ee murteessaa ta'uu dubbataniiru. Itti dabaluunis, yeroo ammaa wanti bosonatti nama hambisu hin jiru; kanaaf karaa nagaa fi marii akka filannootti fudhanneerra jechuun ibsaniiru. Rakkoolee siyaasaa afaan qawweetiin hiikuun furmaata filatamaa akka hin taane kan eeran Jaal Sanyiin, kanaan dura sababa karaan nagaa cufamee tureef qawwee kaasuun dirqama ta’ee akka turee fi amma garuu carraa argameen rakkoolee jiran karaa nagaan furuuf filachuu isaanii dubbataniiru. Hanga ammatitti ajaandawwan adda addaa irratti garee gareen ta’uudhaan dammaqinaan mari’atamaa akka jiru himaniiru. Mariin Biyyaaleessaa kun siyaasa biyyaa keessattis ta’e rakkoolee biroo karaa nagaan furuuf carraa guddaa argameedha jedhaniiru. Hirmaattonni marichaa naannoolee hunda irraa dhufan irratti hirmaachuun isaanis rakkoolee jiran mariin furuuf carraa gaarii akka ta’e eeraniiru. Ena Afaan Oromoo #TOI #Ena#mariidhaan# See less

Adoolessa 22/2018 (ENA): Afa-yaa’iin Mana Maree Federeeshinii Obbo Aganyoo Tashaagar Af-Yaa’ii Paarlaamaa Azarbaajan Dr.Sahiibaa Gafaroovaa fi miseensaota isaanii waliin mari’ataniiru. Mariichaanis dhimmoota hojiiwwan paarlaamaa, walitti dhufeenya dinagdee, dhimmoota naannoo fi Idil-Addunyaa irratti mari’ataniiru. Obbo Aganyoo Tashaagar wayita sana akka ibsanitti, daawwannaan kun walitti dhufeenya Itiyoophiyaa fi Azarbaajan cimaa dhufaa jiru gara bu’aa qabatamaatti jijjiiruuf kutannoo waliinii qaban kan agarsiisu ta’uu hubachiisaniiru. Ministirri Muummee Dr.Abiyyi Ahimad yeroo dhiyoo daawwannaa Baakuutti taasisan walitti dhufeenya Itiyoophiyaa fi Azarbaajan gidduutti boqonnaa haaraa banuu isaa yaadachiisaniiru. Keessattuu Azarbaajaan tajaajila gama "Masoob" tajaajila wiirtuu tokkoo fooyyessuuf deeggarsa taasiftee dinqisiifachuun, tumsi kun ammayyummaa tajaajila mootummaa irratti gumaacha olaanaa taasisuu isaa ibsaniiru. Itiyoophiyaan jijjiirama biyyaalessaa gaggeessaa jirtu bal’inaan ibsuun, komishiniin marii biyyaalessaa adeemsa ijaarsa nageenyaa fi waliigaltee biyyaalessaa cimsuuf gahee qabu ibsaniiru. Dabalataanis sagantaan Ashaaraa Magariisaa fi pirojektoota misooma koriidaraa eegumsa naannoo, misooma waaraa fi ammayyummaa magaalotaa saffisiisuuf kan tajaajilan ta’uu hubachiisaniiru. Damee dippiloomaasii paarlamaatiin, gareewwan michummaa biyyoota lamaanii seera baasuu, ijaarsa dandeettii dhaabbataa, sirna paarlamaa dijiitaalaa, akkasumas hirmaannaa ummataa gabbisuu irratti tumsa isaanii guddisuu akka danda'an ibsanii, keessattuu walitti dhufeenyi miseensota paarlaamaa dargaggootaa fi dubartootaa cimuun walitti dhufeenya ummataa fi ummataa biyyoota lamaanii kan guddisu ta’uu kaasaniiru.  

  Adoolessa 22/2018 (ENA): Yaa'iin Marii Biyyaalessaa Itiyoophiyaa gaaffilee uummataatiif furmaata dhugaa fiduun tokkummaa biyyaalessaa cimsuuf bu'uura kan kaa'u ta'uu hirmaattonni ibsan. Komishiniin Marii Biyyaalessaa Itiyoophiyaa Itiyoophiyaanoota biyya keessaa fi ala jiran mariisisuun ajandaawwan marii ijoo saddeet adda baasuun dhiyeessuun isaa ni yaadatama. Kaniinis hirmaattonni kuma afur Finfinnee Wiirtuu Konveenshinii Idil-Addunyaa Addisitti marii gaggeessaa jiru. Hirmaattonni mariichaa akka ENA’f ibsanitti; yaa'ii marii biyyaalessaa kana irratti dhimmoota biyyaalessaa murteessoo ta'an irratti haala ifa ta'een mariin taasifamaa jira. Yaada kennitoota keessaa Paastar Abbaayinee Bofee akka ibsanitti; mariin kun biyya keessaas ta'e biyya alaatti guutummaatti hawaasa Itiyoophiyaa kan hirmaachiseedha jedhaniiru. Mariin gaggeeffamu kun ijaarsa nageenya Itiyoophiyaatiif bu'uura kan kaa'u ta'uu ibsuun; ajandaawwan filataman irratti mariin gaggeeffamaa jiraachuu dubbataniiru,. Mariin biyyaalessaa hirmaachisaan kun rakkoolee Itiyoophiyaa yeroo dheeraaf turan furuun waliigaltee biyyaalessa uumuuf furmaata guddaa akka ta’u Obbo Tasfaayee Dhaabaa dubbataniiru. Kanaafis marii biyyaalisaa Itiyoophiyaaf guutuu biyyattiirra walitti dhufuun yaadasanii bilisaan ibsachaa jiraachuu ibsuun, kunis gaaffii uummataaf furmaata waaraa fiduuf bu’uura kan kaa’u ta’uu dubbataniiru.

Adoolessa 22/2018(ENA)- Itiyoophiyaan tumsa Azarbaajaan waliin qabdu cimisitee akka itti fuftu Af-yaa’iin mana maree bakka bu’oota ummataa Taaggasaa Caafoo ibsan. Obbo Taaggasaa Caafoo daawwannaa hojiif kan dhufan Af-yaa’ii Paarlaamaa rippaabiliikii Azarbaajaan Sahiibaa Gafaroovaa waliin marii taasisaniin, daawwannichi hariiroo dippilomaasii biyyoota lamaanii akka cimsu ibsaniiru. Itiyoophiyaa fi Azarbaajaan tumsaa fi hariiroo dippilomaasii paarlaamaa, Invastimantii, barnoota, aadaa fi daldalaan qaban akka cimsan marii taasifamerratti ibsameera. Muuxannoo Azarbaajaanirraa argameen dhiheenya hojiirra oolaa kan jiru tajaajilli wiirtuu tokkoo Masoob (MESOB) rakkoolee bulchiinsa gaarii dhaabbilee keessatti mul’atan furuudhaan bu’aa bayii tajaajilamtootarra gahu hambisaa akka jiru dubbataniiru. Itiyoophiyaan dameelee qonnaa, albuudaa fi maanufaakchariingiidhaan dandeettii Invastimatii guddaa akka qabdu af-yaa’iin kun ibsanii, dureeyyiin Azarbaajaan Itiyoophiyaa keessatti invasti akka godhan dhaamaniiru. Af-yaa’iin Paarlaamaa rippaabiliikii Azarbaajaan Sahiibaa Gafaroovaa gamasaaniin, sanadoonni walii galtee hariiroo dippilomaasii fi hunda galeessi Itiyoophiyaa fi Azarbaajaan jidduu jiru cimsan mallatteeffamanii dhiheenya hojiitti akka galamu ibsuusaanii manni maree bakka bu’oota ummataa beeksiseera. See less