Onkololeessa 2/2019 (ENA):-Itoophiyaa fi Baankiin Addunyaa hojiiwwan misoomaa bu’aa qabatamaafi waaraa uummataaf argamsiisan irratti tumsa isaanii cimsanii akka waliin hojjetan beeksisaniiru. Walgahiin waggaa Dhaabbata Maallaqa Idil-addunyaa (IMF) fi Baankii Addunyaa har’a Baankook, Taayilaanditti jalqabameera. Jilli olaanaa Itoophiyaa Bulchaa Baankii Biyyaalessaa Itoophiyaa, Doktar Iyyoob Takkalinyiin durfamu, walgahii waggaa Dhaabbata Maallaqa Idil-addunyaa fi Baankii Addunyaa irratti hirmaachuuf Baankook jira. De'eetaan Ministiraa Maallaqaa Aadde Tigist Fissahaa dabalatee, hooggantoonni mootummaa Itoophiyaa jila kana keessatti hammatamaniiru. Jilli Itoophiyaa walgahicha cinaatti Itti Aanaa Pirezidaantii Naannoo Afrikaa Bahaa fi Kibbaa Baankii Addunyaa, Dooktar Niidiyaamé Diyoop waliin marii taasiseera. Marichis tumsa misoomaa dameewwan garaagaraa irratti xiyyeeffateera.   Marii kanaanis hariiroon tumsa cimaa yeroo dheeraa Itoophiyaafi Baankiin Addunyaa gidduu jiru gamaaggamamuu, akkasumas kallattiiwwan tumsa gara fuulduraa fi dameewwan dursa kennamuuf qaban irratti mari’atamuun ibsameera. Dhimmoota marii keessatti xiyyeeffannoo argatan keessaa tokko Bu’uura Waliigaltee Tumsa Biyyaalessaa haaraa qopheessuudha. Itti fufiinsa dinagdee gooroo mirkaneessuu, dameen dhuunfaa dorgomaa ta’e akka dagaagu taasisuu fi daldala al-ergii guddisuun dhimmoota ijoo xiyyeeffannoo argatan keessaa isaan muraasa ta’uun eerameera. Kana malees, qonna ammayyeessuu fi jijjiirama qilleensaa dandamachuu danda’u guddisuu, sirna waliiti hidhamiinsa gatii qonnaa cimsuu, bu’uuraalee misoomaa waaraa babal’isuu fi walitti hidhamiinsa anniisaa naannawaa guddisuun dhimmoota dursa argatan keessaa ta’uun ibsameera.   Dabalataanis, misooma qabeenya namaa guddisuu fi sirna eegumsa hawaasaa cimsuun dhimmoota tumsa Itoophiyaafi Baankii Addunyaa keessatti xiyyeeffannoo argatan ta’uun himameera. Jilli Itoophiyaa, Waltajjii 32ffaa Jijjiirama Qilleensaa Dhaabbata Mootummoota Gamtoomanii (COP32), Itoophiyaan bara 2027 keessummeessuuf qophii taasisaa jirtu ilaalchisee deeggarsi teeknikaa Baankii Addunyaa cimee akka itti fufu gaaffii dhiyeesseera. Akkasumas, pirojektoonni misoomaa yeroo ammaa hojiirra jiran bu’aawwan barbaadaman yeroo gabaabaa keessatti akka argamsiisan raawwiin isaanii saffisiifamuu akka qabu waamicha dhiyeesseera. Dhuma irratti, Itoophiyaafi Baankiin Addunyaa hojiiwwan misoomaa bu’aa qabatamaafi waaraa uummata Itoophiyaaf argamsiisan milkeessuuf tumsa isaanii cimsanii fi kutannoo olaanaadhaan waliin hojjechuuf qophii qabaachuu isaanii mirkaneessaniiru. #Biyya Guddoo, Ummata Guddaa fi Mul'ata Guddaa!  

Waliigaltee Investimenti holdingii Itoophiyaa fi Saam Pireeshiyas Meetaals gidduutti taasifameen, Naannoo Diinagdee Addaa Boolee Lammiitti Zoonii dinagdee addaa ijaarame waarshaa biyyaalessaa Albuudawwan qaalii qulqulleessu eebsiisee hojii eegalchiisuu kootti gammachuu guddaantu natti dhaga'ama. ‎Warrshaan qulqulleessaa kun waggaatti Albuudawwan qaalii ta'an toonii 600 ol qulqulleessuu danda'u kun; oomisha biyya keessatti sona dabaluuf, Damee Albuuda Itoophiyaa cimsuu fi biyya keenya riijinii Albuuda gatii qaalii ta’an taasisuuf imala eegalameef boqonnaa guddaadha. Mul'anni kun qabeenya keenya dandeettii indaastiriitiin wal-qabsiisuun galii daldala alaa guddisuuf, carraa hojii dandeettii irratti hundaa'e uumuuf, indaastirii miidhagaginaa deeggaruuf, akkasumas walitti hidhaminsa sona gatii warqee caalaatti dagaagsuuf iftoomina fi dorgomaa ta'e ijaaruuf kutannoo mootummaan 'Ida'amuu' qabu kan agarsiisudha

  Guyyaa har’aa, jila Pirezidaantii I/A Rippabiliika Federaalawaa Naayijeeriyaa, Kab. Kashiim Shettimaan durfamuufi qooda fudhattoota biroo waliin mariifi daawwannaa dirree taasifneerra. Sirni muuxannoo waljijjiirraa kun gama tokkoon magaalomsuu, gama birootiin ce’umsa qonnaafi baadiyyaa, akkasumas wabii nyaataafi soorata madaalawaa irratti kan xiyyeeffateedha. Muuxannoo ce’umsa qonnaafi baadiyyaa akkasumas wabii nyaataafi soorata madaalawaatiif, Oromiyaan gahiitii ta’eera. Marii keenya keessatti, ijaarsa cancala sonaa, babaldhina carraa hojiifi badhaadhinaa mirkaneessuu ilaalchisee, muuxannoo damee qonnaa keessatti horanne qoonneerra. Daawwannaan dirree ittaansee taasifnes, yaadi marii keessatti kaafne qabatamaan hojiitti hiikamaa jiraachuu mirkaneessuuf carraa kan uumedha. Kunis muuxannoo inisheetivoota ykn pirojektoota tokko tokkoon qooduu qofa osoo hintaane, imala ce’umsa qonnaafi baadiyyaa Oromiyaa keessatti maal jechuu akka ta’e; akkasumas wabii nyaataafi nyaata madaalawaa mirkaneessuu, oomishtummaa namaa dabaluu, carraa hojii uumuu, galii dabaluu, qusannaa guddisuu, invastimantii babaldhisuufi badhaadhina mirkaneessuu keessatti hiika maal akka qabu hubachuuf carraa ture. Nubiratti qonni damee omishaa qofa miti; madda carraa hojii, galii, wabii nyaataa, soorata madaalawaafi bu’uura jireenyaafi ce’umsa dinagdeeti. Kanaaf, qonna ammayyeessuun, ka’umsa ce’umsa dinagdeeti malee gahiitii miti. Galmi keenya qonnaan bulaa oomishtummaa olaanaa qabu, wabii nyaataafi soorata madaalawaa mirkaneeffate, cancala sonaafi gabaa keessatti hirmaatu, galii guddaa argatu, qusatu, qabeenya horatu, invastimantii keessatti hirmaatufi jireenya fooyya’aa jiraatu ijaaruudha. Daawwannaan Godina Giddugaleessa Oromiyaatti taasifnes, yaada kana qabatamaan muldhiseera. Kilaastara qamadii, inisheetivoota muuziifi paappayyaa, qonnaafi horsiisa qurxummii Qooqaa, Kurfeessa Qanna Lumee, Wiirtuu Leenjii Maaddii Guutuufi Badhaadhina Maatii Mojoo akkasumas Waldaa Aksiyoona Jabduu Mootors daawwachuun wanti argine, inisheetivootafi pirojektoota adda addaa qofa osoo hintaane 𝘀𝗶𝗿𝗻𝗮 𝗰𝗲’𝘂𝗺𝘀𝗮𝗮 𝗾𝗶𝗻𝗱𝗮𝗮’𝗮𝗮 𝘁𝗼𝗸𝗸𝗼 ture. Galmi keenya omisha baay’isuu qofa miti. Omisha argame kuusuu, qopheessuu, kurfeessuu, sona dabaluufi gabaaf dhiyeessuu; qoteefi horsiisee bultootarraa kaasee hanga indastiriifi gabaa baldhaatti, cancala sonaafi walitti hidhamiinsaa cimaa uumuudha. Teknooloojii, jallisii, faayinaansii, sirna galtee, qorannoo, gabaafi indastirii walitti hidhuun sirna oomishtummaa haaraa ijaaruudha. Qonna damee harkaa-gara-afaanii irraa gara 𝗺𝗼𝗼𝘁𝗼𝗿𝗮 𝗱𝗶𝗻𝗮𝗴𝗱𝗲𝗲tti ceesisuudha. Magaalaa Mojootti, mana maatii tokkootti goruun turtiin taasifne ammoo, bakka adeemsi keenya kun jalqabaa hanga dhumaatti itti madaalame ture. Maalifi yoojenne, gaaffiin dhumaa omishni hammam dabale ykn pirojektoonni hammam baay’atan kan jedhu qofa miti. Sochiin kun qabatamaan jireenya maatii jijjiireeraa? Maatiin nyaata madaalawaa mirkaneessaa jiraa? Galiin, qusannaafi qabeenyi isaa dabalaa jiraa? Carraan hojii umamaa jiraa? Dandeettiin of-danda’uu isaa cimeeraa? Bu’uuruma kanaan, haalli maatii kanaa, ce’umsi dinagdee jalqabame jireenya qabatamaatti ce’aafi badhaadhina maatii ce’aa jiraachuu kan mirkaneessedha. Daawwannaan buufata biqiltuu '𝗸𝗮𝗮𝘀𝗵𝗲𝘄' ammoo, hiika waljijjiirraa muuxannoo kanaa guutuu kan taasise. Mudurri gabaa ‘Kaashew’, yeroo duraatiif Naayijeeriyaarraa gara Itoophiyaa dhufe. Naannoon keenyas, haala qabatamaa biyya keenyatti madaqsuu irratti hojjechaa jira. Kunis naannoon keenya muuxannoo gaarii akkuma jirutti waraabuu osoo hintaane, hubachuu, madaqsuu, haaromsuufi gara sirna ofiitti galchuu irratti dandeettii horataa dhufuu kan mirkaneessedha. Adeemsa mara keessatti, Oromiyaan muuxannoo qonnaa qofa osoo hintaane, 𝘀𝗶𝗿𝗻𝗮 𝗷𝗶𝗷𝗷𝗶𝗶𝗿𝗮𝗺𝗮𝗮 𝗴𝘂𝘂𝘁𝘂𝘂 qoodaa jira. Muuxannoo ijaarsa sirna dinagdee ummata keenya daawwataa misoomaa ta’uurraa gara abbaa jijjiiramaatti ceesisuu irratti horanne qoodaa jirra. Qoteefi horsiisee bulaa, qonna, indastirii, faayinaansii, galtee, teknoolojii, cancala omishaafi sona dabalataa ooyruurraa kaasee hanga warshaafi gabaatti jiru gidduutti hariiroo cimaa waggoottan darban ijaaraa dhufne qoodaa jirra. Kanaaf, nuuf dhimmi qonnaafi baadiyyaa dhimma wabii nyaataa qofa miti; galmoota Qabsoo Ummata Oromoo milkeessufi milkeessuu dhabuu waliin walqabata. Galmi 𝗱𝗵𝗮𝗹𝗼𝗼𝘁𝗮 𝗱𝗼𝗿𝗴𝗼𝗺𝗮𝗮 𝘁𝗮’𝗲 𝗵𝗼𝗿𝗮𝗰𝗵𝘂𝘂𝗳 qabnu, dhaloota nyaata madaalawaa argatee guddina samuufi fayyaa qaamaa sirrii horateen utubama. Galmi 𝗵𝗮𝘄𝗮𝗮𝘀𝗮 𝗱𝗶𝗻𝗮𝗴𝗱𝗲𝗲𝗻 𝗮𝗮𝗻𝗴𝗼𝗺𝗲 𝘂𝘂𝗺𝘂𝘂𝗳 qabnu, teknooloojii, faayinaansii, galtee, indastirii, cancala sonaafi gabaa cimsuun, qonnaa madda carraa hojii, galii, dandeettii qusannaafi invastimantii taasisuun utubama. Galmi 𝘀𝗶𝗿𝗻𝗮 𝘂𝗺𝗺𝗮𝘁𝗮𝗮𝘄𝗮𝗮 𝗰𝗶𝗺𝗮𝗮 𝗶𝗷𝗮𝗮𝗿𝘂𝘂𝗳 qabnu, aadaa hojii cimaafi haaromaa, miira ofitti amananummaa, dandeettii ofiin dhaabachuufi harka-galfannaa alaa hambisuutiin utubama. Tokkos—sadis: dinagdeen yoo hinjabaatiin, carraan dhalootaa nidaangeffama; dhaloonni yoo hinyaadiin, hinkalaqin, dorgomaa hinta’in, dinagdeen boruu nidadhaba; sirni yoo hinjabaatin, dandeettii ummataa gara bu’aa dinagdeefi dorgomtummaatti jijjiiruun nirakkisa. Kab. Kashiim Shettimaan yeroo lammaffaaf gara Itoophiyaafi Oromiyaa dhufuun isaanii, adeemsa muuxannoo waljijjiirraa akkanaa Afrikaanota gidduutti cimsuuf carraa gaariidha. Rakkooleen jiran hedduun kan walooti; furmaanni isaaniis waloomina barbaada. Kanaaf, dandeettii keenya walitti fiduu, muuxannoowwan fakkeenya ta’an qooddachuu, milkaa’inoota jiranirraa barachuufi wal-sirreessuun gara fuulduraatti waliin socho’uun dhimma cimee ittifufuu qabuudha. Walumaagalatti, adeemsa muuxannoo waljijjiirraa Itoophiyaafi Naajeeriyaa kana keessatti, MNO muuxannoo isaa qoodera. Kanaaniis qonnaa ammayyeessuun galma dhumaa osoo hintaane, ka’umsa ce’umsa dinagdee ta’uu agarsiifnerra. Akkasumas, muuxannoowwan biroo irraa qooddachaa, irraa barachaafi haala ofiitti madaqsinee gara sirna omishaa keenyatti galchaa jiraachuu mirkaneessineerra. Dhumarratti, sochii mara hawaasa boru arguu barbaannu — 𝗱𝗵𝗮𝗹𝗼𝗼𝘁𝗮 𝗱𝗼𝗿𝗴𝗼𝗺𝗮𝗮, 𝘂𝗺𝗺𝗮𝘁𝗮 𝗱𝗶𝗻𝗮𝗴𝗱𝗲𝗲 𝘆𝗮𝗯𝗯𝘂𝘂𝗳𝗶 𝘀𝗶𝗿𝗻𝗮 𝗰𝗶𝗺𝗮𝗮 — dhugoomsuu keessatti gahee qabuun kan madaallu ta’uu hubachiifnerra. Kun, 𝗜𝗺𝗮𝗹𝗮 𝗢𝗿𝗼𝗺𝗶𝘆𝗮𝗮ti! Maddaa-Oromia President Office

Fulbaana 28/2019 (ENA) Gaaffiin hulaa galaanaa gaaffii jiraachuu fi jiraachuu dhabuu waan ta’eef, deebii sirrii hanga argatutti tattaaffii mootummaan taasisaa jiru akka deeggaran jiraattonni Godina Kibba Oromiyaa ibsan. Jiraattonni yaada isaanii ENA’f kennan;akka ibsanitti Gaaffii hulaa galaanaa mootummaan gaafachaa jiru dhimma jiraachuu fi jiraachuu dhabuu waan ta’eeef tattaaffii mootummaan hulaa galaanaa karaa nagaatiin argachuuf taasisaa jiru ni deeggarra jedhaniiru. Gaaffiin hulaa galaanaa guddina dinagdee fi wabii nageenyaatiif murteessaa waan ta’eef deebii madaalawaa barbaada; nutis gaaffichi hanga deebiii argatutti mootummaa cinaa dhaabbachuun shoora nu irraa eegamu bahuuf qophiidha jechuun jiraattonni ibsaniiru. Jiraattota kanneen keessaa jiraataan magaalaa Adoolaa Obbo Ashannaafii Daanqoo, guddina magaallichatti eegalame caalaatti cimsuudhaan itti fufsiisuuf shoora isaanii akka bahatan eeraniiru. Jiraataan magaalaa kan biraan Obbo Isheetuu Haayiluu gama isaaniitiin; mootummaan karaa nagaatiin hulaa galaanaa argachuuf tattaaffii gochaa jiru kan dinqisiifatamudha jedhaniiru. Tattaaffiin diploomaasii mootummaan gochaa jiru gara hojiitti hanga jijjiiramutti mootummaa bira dhaabbachuun shoora isaanii bahuuf qophii ta’uu isaanii ibsaniiru. Jiraattuu magaalaa Nagellee Booranaa Aadde Rahimaa Abdullaahii gama isaaniitiin; mootummaan badhaadhina biyyaalessaa mirkaneessuuf kallattii kaa’e guutummaatti akka deeggaran ibsaniiru. Bu’aawwan misoomaa kanaan dura galmeeffaman cimsuudhaan itti fufsiisuuf hulaa galaanaa argachuun dhimma filannoo hin qabneedha jechuun ibsaniiru. #Biyya Guddoo, Ummata Guddaa# fi Mul'ata Guddaa#