Adoolessa 1/2018 (ENA): Naannoo Harariitti hojiileen eegumsaafi kunuunsa hambaalee fi misooma koriidaraan hojjetaman yaa’insa Tuuristootaa haala olaanaan dabalaa akka jiran ogeeyyiin hojii daawwachiisummaarratti bobba’an beeksisan. Ministirri Muummeen Dr.Abiyyi Ahimad dhiheenya kana mata-duree “Tuurizimiin Motora Diinagdee Haaraadha!” jedhuun ibsa kennaniin, hojiilee sektera kanaan hojjetamaniifi bu'aawwan argaman kaasaniiru. Kunis filannoowwan diinagdee hedduu irratti hundaa'uun hojjechuun, keessattuu damee Tuurizimii kanaan milkaa'ina galmaa'e ragaa taasisanii dhiyeessaniiru. Harar keessatti hambaalee durii, amantiifi seenaa qaban suphuufi hojiileen misooma koriidarii guddinaafi dammaqiinsa damee Tuurizimiitiif humna gudhaa ta'uu bira dabranii, daawwattoota hawwachaa akka jiran ibsameera. Hambaaleen umurii waggoota dheeraa qaban kanneen balaa uumamaafi nam-tolcheerraa oolchuuf, mootummaa naannichaafi qooda fudhattootaan qindoominaan misooma koriidarii, eegumsaafi kunuunsi hambaalee hojjetamaa tureera. Waggoottan dhihoon asitti Jugol osoo qabiyyee seenaasaa gad-hin dhiisin hojiileen suphaafi haaromsaa hojjetaman, wiirtuulee tuuristootaa miidhagsuufi akkasumas miidhagina halkaniitiin bifa magaalaattii kan jijjiiranii fi pirojektoonni misooma koriidorii, umrii hambaalee dheeressuu bira dabranii daawwattootaaf naannoo mijataafi hawwataa uumuu danda'aniiru. Hojimaanni kun keessattuu tuuristonni biyya keessaafi alaa yeroo magaalattii keessa turan akka dheeressaniifi muuxannoo isaan duudhaalee aadaa irratti qaban akka gabbifatan carraa guddaa uumeera. Hojiin eegumsaafi fooyya'iinsa hambaalee kun galii Turizimii naannichaa dabaluu bira darbee,hojii daawwachiiftummaa, tajaajila hoteelaa, fi gurgurtaa oomishaalee harkaa (aadaa) irratti bobba'aniif carraa hojii bal'aafi madda galii ta'uun faayidaa olaanaa gumaachaa jira. Daawwachiisaan Tuurizimii naannichaa Haayiluu Gaashaawu akka ibsetti, Hambaa Idil-addunyaa Jugool dabalatee, aanaalee baadiyaafi magaalaa keessatti hambaalee seenaafi durii jiran irratti hojiileen eegumsaafi kunuunsa gahaan hojjetamaniiru. Hojiileen eegumsaafi kunuunsa hambaalee kunneen, akkasumas ayyaanni Shawwaalid dabalatee ayyaanni kabajaman daawwattoota biyya keessaafi alaa hawwachuu keessatti gumaacha guddaa gochaa akka jiran dubbateera. Keessattuu damee Tuurizimii guddisuuf mootummaan naannichaa filannoowwan adda addaatiin hojiin beeksisuu hojjete, abbootiin qabeenyaa magaalattii keessatti Riizoortotaafi hoteelota akka ijaaran carraa uumuu isaas dubbateera. Daawwachiisaa biraa Teediroos Balaay gama isaatiin, magaalattii keessatti misooma koriidariin hojiileen hojjetaman damee Tuurizimii irratti dammaqiinsa uumuusaa, magaalaattii miidhagsuufi qulqulleessuu bira darbanii daawwataan akka deebi'ee dhufu gochaa jiraachuu ibseera. Koomishinarri Koomishinii Tuurizimii Naannoo Hararii Saamii Abdulwaasii naannichatti damee Tuurizimiitiif xiyyeeffannoo kennameen, iddoowwan hawwata Tuurizimii misoomsuun, yeroo turtii tuuristootaa dheeressuufi humna diinagdee sektericharraa argamu guddisuun hojiileen fooyya'oon raawwatamuu isaanii ibsuuniiru.

Adoolessa 1/ 2018 (ENA): Itiyoophiyaan oomishaalee sharafa alaa gatii guddaa qaban oomisha biyya keessaatiin bakka buusuuf itti jirtu jijjiirama qabatamaa agarsiisaa jira jedhan hayyoonni. Ministirri Muummee Dr. Abiyyi Ahimad ibsa kaleessa Mana Maree Bakka Bu’oota Ummataaf kennaniin, dinagdee biyyattii babal’isuu fi ammayyeessuuf dameewwan ijoo ta’an keessaa dinagdeen industirii ijoo fi xiyyeeffannoo ta’uu eeraniiru. Jijjiirama kanaan dura dandeettiin oomishaa industiriiwwan biyyattii dhibbeentaa 47 gadi akka ture hubachiisuun, kanaafis rakkoon akka faayinaansii, lafaa fi dhiyeessii humna ibsaa akka sababaatti ka’uu ibsaniiru. Rakkoo kana furuuf mootummaan koree addaa hundeessuun tokkoon tokkoon industirii daawwachuun rakkoo isaanii sadarkaa sadarkaan jiru furuu kan danda’e yoo ta’u, carraaqqii cimaa taasifameen dandeettiin oomishaa industiriiwwan duraanii har’a dhibbeentaa 67tti ol guddateera. Industiriiwwan Itiyoophiyaa guddachaa jiran oomisha hedduu omishuudhaan biyya alaatii kan galfamu biyya keessaan bakka buusuu qofa osoo hin taane, hanga biyya alaatti ergamus dabaleera. Akka ogeeyyiin damee kanaa dhimma kana irratti ENA waliin turtii taasisan jedhanitti, akkaataan mootummaan oomishaalee biyya alaatii galfaman biyya keessaa bakka buusuuf hojtete jijjiirama qabatamaa agarsiisaa jira. Yunivarsiitii Dirree Dhawaatti kutaa Bizinasii fi Diinagdee keessatti barsiisaa kan ta’an Dr. Masfin Mokonnon akka himanitti, waggoota dhiyoo asitti hanqinni sharafa alaa qormaata guddaa ta’us, amma rakkoon kun saffisaan furmaata argachaa jira jedhan. Ijaarsi paarkiiwwan industirii haaraa fi dandeettii oomisha isaanii itti fufiinsaan guddisuuf tattaaffii taasifamaa jiru seenaa Itiyoophiyaa keessatti sharafa alaa guddaa qusateera jedhan. Itti dabaluunis, industiriiwwan oomisha biyya keessaa haala salphaa fi gatii madaalawaadhaan dhiyeessuun oomisha biyya alaa bakka bu’aa jiru jedhan. Oomishaalee huccuu fi gogaa akka fakkeenyaatti kaasuun, dandeettiin teeknooloojii dijitaalaa biyyattii guddachaa dhufe adeemsa kana keessatti itti fayyadamuu isaa ibsaniiru. Akkasumas hojiin qonna ammayyeessuun oomisha babal’isuun of nyaataan of danda’uu galmaan ga’uuf hojjetamaa jiru biyyoota Afrikaa biroof fakkeenya ta’uu akka danda’u, dhimmoonni mootummaan labsee fi irratti hojjechaa jiru kana caalaa jijjiirama gaarii kan fidan ta’uu ibsaniiru. Yunivarsiitii Jimmaatti ogeessa diinagdee qonnaa fi qorataa kan ta’an Dr. Adabaa Gammachuu akka himanitti, Itiyoophiyaan midhaan akka qamadii fi ruuzii bal’inaan oomishuun oomishaalee biyya alaatii galfaman hir’isuu fi dhabamsiisuuf hojiiwwan milkaa’inaan raawwatteetti jedhani. Oomishaalee biyya alaatii galfaman biyya keessaa uwwisuuf tattaaffiin taasifamaa jiru dargaggootaafi lammiilee hedduudhaaf carraa hojii bal’aa fi walitti hidhamiinsa gabaa uumaa jira jedhan. Tattaaffiin kun hirkattummaa oomisha nyaataaf biyyoota alaa irratti qabnu hir’isuu fi wabii nyaataa biyyaalessaa mirkaneessuuf kan gargaaru ta’uu ibsuun, Itiyoophiyaan milkaa’ina qabatamaa kanaaf cimtee hojjechaa akka jirtu ibsaniiru. Warshaalee babal’isuunis kaayyoo kana galmaan ga’uuf bu’uura ta’aa akka jiru hubachiisaniiru. #Ena Afaan Oromoo #TOI #Ena

Adoolessa 1/ 2018 (ENA): Naannoo Oromiyaa Godina Baaleetti bara bajataa kana keessatti qonnaan bultoonni adda duree 719 qonna irraa gara invastimantiitti ce’uu Waajjirri Invastimantii fi Industirii Godinichaa beeksise. Qonnaan bultootaa fi waldaalee damee hojii isaaniitiin gara invastimantiitti milkaa’inaan ce’aniif jajjabinni kennamu kanaan ol fooyya’aa akka hojjetan kan isaan kakaasu ta’uu ibsaniiru. Akka Itti Gaafatamaan Waajjira Invastimantii fi Industirii Godinaa obbo Mahaammad Ibroo dubbatanitti, Qonnaan bultoonni Godinichaa gara invastimantii damee hojii isaaniitti milkaa’inaan akka ce’aniif deeggarsi taasifamaa jira. Haaluma kanaan bara baajataa Godinicha keessatti xumuramaa jiru kana keessatti qonnaan bultoonni adda duree 719 qonna irraa gara invastimantiitti ce’uun hayyama invastimantii argachuun hojii eegaluu isaanii agarsiisaniiru. Qonnaan bultootaa fi intarpiraayizoonni waggoota darbanitti damee hojii isaaniitiin milkaa’ina kan argatan yoo ta’u, kaappitaala nama tokkoof Birrii miiliyoona 1.5 ol galmeessuun isaanii ni yaadatama. Qonnaan bultootaa fi waldaaleen kunneen kaappitaala galmeessan Birrii biiliyoona 2.5’n gara invastimantiitti ce’uu isaaniis ibsaniiru. Itti dabaluunis qonnaan bultoonni gara invastimantiitti ce’an kunniin gaafa guutummaan guutuutti hojiitti seenan lammiilee kuma 14 fi 400 ol ta’aniif carraa hojii dhaabbataa fi yeroof ni uuma jedhan. Dameewwan hojii qonnaan bultoonni adda duree ta’an irratti bobba’anii turan omisha, tajaajila, industirii fi dameewwan biroo kan hammatu ta’uu ibsaniiru. Qonnaan bultoota gara invastimantiitti ce’an keessaa tokko kan ta’an obbo Ibraahim Kadir hojii qonnaa irratti bobba’uudhaan qamadii fi midhaan biroo oomishuun milkaa’inaan gara invastimantiitti ce’uu isaanii dubbataniiru. Amma lafa invastimantii argachuun sanyii baay’isuu qulqullina olaanaa qabu irratti bobba’uu himaniiru. Waggoota darban damee qonnaa keessatti hojii milkaa’aa hojjataniif ragaa beekamtii argatan malees, bakki hojii akka onnachiiftuu invastimantiitti argatan kana caalaa akka hojjataniif isaan gargaaruu isaa kan himan immoo obbo Bayyan Mahaammadidha. #Ena Afaan Oromoo #TOI #Ena

Waxabajjii 30/2018(ENA) Naannoo Oromiyaa Godina Shawaa Kaabaa Magaalaa Fiicheetti pirojektoonni garaa garaa baajata mootummaafi Hirmaannaa uummataan birrii Miliyona 629 ijaaraman xumuramuun tajaajilaaf banaa ta’an. Sirna eebbaa kanarrattis hoggantoonni mootummaa Oolaanoon argamaniiru. Pirojektoota eebbifamuun tajaajilaaf ga’an Gamoo Waajjira Paartii Badhaadhinaa Damee Godinichaa abbaa darbii afurii, Wiirtuun kenniinsa tajaajila iddoo tokkoo (Masoob),Waajjiraalee bulchiinsa Gandaa , Mana Barumsaa sadarkaa 1ffaa Magarsaa Badhaasaa fi kanneen biroon xumuraman bakka hoggantoonni olaanoon Naannoo,Godinaa fi Aanaa argamanitti eebbifamanii tajaajilaaf banaa ta’aniiru. Sirna eebbaa kanarratti itti aanaan Pireezidaantii Mootummaa Naannoo Oromiyaatti obbo Awwaluu Abdii,Motummaan jijjiiramaa gaaffilee hawaasa deebisuuf hojii hojjetaa jiruun wiirtuu kenniinsa tajaajilaa iddoo tokkoo ‘Masoob’ daran babal'isuu irratti xiyyeeffannaa addaa kennaa jiraachuu ibsaniiru.   Pirojektoonni kunneen qulqullinaafi aariitiin ijaaramanii xumuramuun rakkowwan kanaan dura kenniinsa tajaajilaa irratti mul’achaa ture furuun fayyadamummaa hawaasaa kan mirkaneessan ta’uusaanii, Ministirri hogganaa damee gurmaa’insaa waajjira muummee paartii badhaadhinaa fi walitti qabaan koree qindeessaa dhaabbilee federaalaa obbo Fiqaaduu Tasammaa ibsaniiru. Bulchaan Godina Shawaa Kaabaa obbo Kifaloo Adaree, Mootummaan rakkoo bulchiinsa gaarii furuu irratti fulleffatee hojjechuun pirojektoonni wiirtuu kenna tajaajila iddoo tokkoo ‘masoobii’fi ijaarsawwan mana Gandaa babal'isuun hawaasni tajaajila itti dhiyeenyaafi bakka tokkotti akka argatu ciminaan hojjetamaa jiraachuu dubbataniiru. Jiraatoonni Godinichaa tokko tokko yaada kennaniin, pirojektoonni kun tajaajila si'ataa,haqa-qabeessaa fi qulqulluu kennuun fayyadamummaa isanii kan mirkaneessu ta’uu ragaan Komunikeeshinii Godina Shawaa Kaabaa irraa arganne ni mul’isa.