Adooleessa18/2018(ENA)- Mani maree magaala shaggar yaa'ii idilee 14ffaa kurmaana 4ffaa bara 2018 har’a eegalera. Yaa'iicharratti gabaasni raawwii hojii qaama raawwachiiftuu kan bara 2018 fi kallattiin karooraa bara 2019 akkasuma gabaasni raawwii hojii qaama seera hiiktuu miseensota Mana Marichaaf dhiyaachuun irratti ni mari'atama. Af-yaa'ii Mana Maree Magaalaa Shaggar Obbo Qaabatoo Albee yaa’icha bananiiru.. Manni marichaa yaa'ii isaa kanaan qaboo yaa'ii idilee kurmaana 3ffaa mirkaneessuun ajandaawwan garagaraa irratti ni mari'ata. Afa-yaa'ii mana maree Magaalaa Shaggar kabajamoo Obbo Qaabatoo Albee akka ibsanitti, ajandaaleen yaa'ichaa gabaasa raawwii hojii qaama raawwachiisaa akkasumas raawwii hojii Mana murtii olaanaa Magaalaa Shaggar, Gabaasa raawwii hojii mana maree fi labsii taarifa galii mana qopheessaa Magaalaa Shaggar kan dhiyaatan ta'uu himaniiru. Sadarkaa Itti Aanaa Pirezidaantii Mootummaa Naannoo Oromiyaatti Kantiibaa Magaalaa Shaggar Dr. Tashoomaa Addunyaa, Itti gaafatamaa Waajjira Paartii Badhaadhinaa Damee Magaalaa Shaggarii fi Mana Maree Magaalaa Shaggaritti Bakka Bu'aa Mootummaa kan ta'an Obbo Alamaayyoo Tulluu dabalatee miseensonni Mana Marechaa fi Itti gaafatamtootni Waajjiraalee Magaalaa Shaggar yaa'ii kanarratti argamaniiru.

Adoolessa 18/2018(ENA)- Akkaadaamiin loltummaa Itiyoophiyaa Hoolotaa etaamaajoor shuumiin walii galaa humnoota waraanaa fiildi maarshaal Biraanuu Juulaa bakka argamanitti mooraa akkaadaamichaa Hoolotatti argamutti kan leenjise qondaaltota kaadhimamoo koorsii Matammaa 71ffaa eebbisiisaa jira. Etaamaajoor shuumiin walii galaa humnoota waraanaa fiildi maarshaal Biraanuu Juulaa, hogganaan qajeelcha olaanaa barnootaa fi leenjii ittisaa Jeneraal Yimar Mokonnon, ajajaan akkaadaamii loltummaa Itiyoophiyaa Birgaadiyeer Jeneraal Geetaachoo Habtaamuu, qondaaltonni jeneraalaa kabajamoo akkasumas ataasheewwan loltummaa biyyoota garagaraa sirna eebbaa kanarratti argamaniiru. Qondaaltonni kaadhimamoon leenjii Kanaan caalmaa argatan etaamaajoor shuumii walii galaa humnoota waraanaa fiildi maarshaal Biraanuu Juulaa sirni maaraga uwwisuu gaggeeffameera. Ajajaan akkaadaamii loltummaa Itiyoophiyaa Birgaadiyeer Jeneraal Geetaachoo Habtaamuu waltajjicharratti dubbiii dubbataniin, leenjiin eebbifamtoonni fudhatan cimina gaggeessummaa walii galaa kan gabbisu ta’uu ibsaniiru. Qondaaltonni kaadhimamoo beekumsaa fi ogummaa leenjicharraa argatan ergama dirqamaa raayyaa kamiyyuu bahachuuf kan isaan dandeessisu beekumsa isaan gonfachiiseera jedhaniiru. Miseensota raayyaa ittisaa Itiyoophiyaatiin alattis qondaaltonni kaadhimammoo biyyoota Afriikaa garagaraarraa dhufan leenjii xumuranii eebbifamuusaanii dubbataniiru.

Adooleessa 16/2018 (ENA): Adeemsi yaa’ii marii biyyaalessaa Itiyoophiyaa milkaa'inaan gaggeeffamaa jiraachuu komishinarri Olaanaan Komishinii Marii Biyyaalessaa Itiyoophiyaa Pirofeesar Masfin Ari'ayaa ibsan. Komishinara Olaanaan marii biyyaalessaa Pirofeesar Masfin Ari'aayaa ibsa miidiyaaleef kennaniin, mariichi ajandaawwan kennaman irratti bal'inaan mari'achuunii fi ibsa hayyootaan deeggaramuun milkaa'inaan gaggeeffamaa jira. Guyyoota darbanitti waltajjiiwwan marii gaggeeffamaniin hirmaattonni gareen qoodamuun ajandaawwan kennamaniif irratti gadi fageenyaan mari'achuu, wal-dhaggeeffachuu fi wal-kabajuun gara adeemsa yaada qindeessutti ce'uu isaanii ibsaniiru. Yaa’iin marii Adoolessa 8 bara 2018 irraa eegalee gaggeeffamuun hirmaattonni miseensota 50 fi 10n qoodamuun adeemsa yaada maddisiisuu fi cimsuu isa jalqabaa raawwachuu isaanii dubbataniiru. Mariin miseensota 10n gurmeessuun gaggeeffamu hirmaattota gidduutti walitti dhiheenya uumuun wal-baruu fi ajandaawwan kennamaniif irratti gadi fageenyaan akka mari'atan kan dandeessisuu ta’uusaa ibsaniiru. Adeemsa kanaanis hirmaattonni walitti akka dhihaatanii fi ajandaawwan qulqullinaan akka irratti marii’atan sirna diriireen hojiin bu'a qabeessi hojjetamuu hubachiisaniiru. Miseensota 10 kanaan gabaasawwan qindaa’an irratti boruu jalqabee gareewwan miseensota 50 qabaniin walitti dhufanii mariin akka jalqabamu beeksisaniiru Guyyaa har’aa ogeeyyonni mata dureewwan garagaraa irratti mari’attoota mata dureewwan garagaraa irratti garee saddetitti qoqqoodamaniif ibsaa fi odeeffannoowwan kennuusaanii ibsaniiru. Ogeeyyonni dhimmoota ijaarsa biyyaa, seenaa, federaalizimii fi eenyummaarratti beekumsaa fi muuxannoo qaban mari’attootaaf ibsa galtee ta’u taasisuudhaan, gaaffilee hirmaattota irraa ka’aniifis deebii kennuusaanii dubbataniiru. Boru irraa eegalee gabaasota marii gareewwan miseensota 10 qabaniin gaggeeffameen qindeessan gareewwan miseensa 50 qabaniif dhiheessuudhaan adeemsi marii itti aanuu akka eegalamu ibsaniiru. Yaa’ii marii Kanaan mari’attoota kuma 4 keessummeessuun qophii guddaa kan barbaadu ta’us, deeggarsa qindaa’aa dhaabbileen fayyaa, nagaa fi tasgabbii akkasumas geejjibaa taasisaa jiran dinqisiifataniiru. Mariilee taasifamaniin gareewwan saddet keessatti hirmaattota 500niin gurmaa’anii gaggeeffamaa tureera jedhaniiru. Boru irraa eegalee gabaasa gareewwan miseensa 50 qabaniin qindeessan gareewwansaaniif dhiheessuudhaan mariin gareewwan miseensota 250 qaban shantamaan taasifamu akka eegali ibsaniiru. Torbee dhufu ammoo hirmaattonni kuma 4 bakkeewwan 16tti qoqqoodamanii marii akka itti fufan eeraniiru. Hirmaattonni wayita mariin kun gaggeeffamu wal’aansa isaan barbaachisu hoospitaalota federaalaa fi naannootti wa’aansa barbaachisu argachaa akka jiran ibsaniiru. Akkasumas dhaabbileen deeggarsa taasisan kan akka nagaa fi tasgabbii, geejjibaa fi kanneen biroo qindaa’anii hirmaattotaaf tajaajila barbaachisu gochaa akka jiran eeraniiru.

Adoolessa 15/2018 (ENA): Mariin biyyaalessaa kun Itiyoophiyaan gara boqonnaa seenaa fi misoomaa haaraatti akka ceetu carraa uuma jedhan mari attoonni lammiileen Itiyoophiyaa biyya alaa jiraataniifi miseensonni hawaasa Itiyoophiyaa konfiraansii marii biyyaalessaa irratti hirmaatan. Komishiniin marii biyyaalessaa Itiyoophiyaa lammiilee Itiyoophiyaa biyya keessaa fi alaa hirmaachisuun ajandaalee marii saddeet adda baasuun isaa ni yaadatama. Ajandaawwan kunneen Giddugala Walgahii Idil-addunyaa Addis keessatti mari’atamaa kan jiran yoo ta’u, mari’attoonni kuma afur kan irratti hirmaataa jiranidha. Mari’attoonni kunneen Adoolessa 13, 2018 irraa eegalanii garee xiqqaatti qoodamanii ajandaa itti ramadaman irratti mari’achuu eegalaniiru. Bakka bu’oonni diyaaspooraa konfiraansii adeemsifamaa jiru kanarratti yaada isaanii kan kennan akka jedhanitti, mariin kun Itiyoophiyaan rakkoo waggoota darban mudate bira darbitee gara marsaa seenaa fi misoomaa fooyya’aa ta’etti ce’uuf carraa seena qabeessa ta’uu ibsaniiru. Adeemsi marii kun boqonnaa haaraa marii fi waliigalteedhaan rakkoolee sadrkaa gadii irraa gara oliitti hiikuuf karaa bane ta’uus hubachiisaniiru. Namoota yaada isaanii kennan keessaa Awustiraaliyaa irraa Paachi Aquweer akka jedhanitti; lammiileen Itiyoophiyaa kanaan dura haala akkanaa irratti marii’atanii akka hin beekne ibsuun, affeerraa kana gammachuu fi miira guutuudhaan kan fudhatan ta’uu eerani. Haalli lammiileen Itiyoophiyaa naannoo hundarraa walitti qabaman baay’ee namatti tolu ta’uu hubachiisuun, marii kanaan biyya dhaloota egereef mijattu uumuuf haala kan mijeessu ta’uu dubbatani. Haaluma walfakkaatuun Ameerikaa irraa kan dhufan Piroofeesar Alamaayyoo Gabramaariyaam akka jedhanitti; Itiyoophiyaaf boqonnaa haaraan jalqabamuu himani. Adeemsi marii kun walitti bu’iinsaa fi rakkoolee karaa qaroomina qabuun waliin marii’achuun furuu akka ta’e hubachiisaniiru. Mariin mari’attoonni kuma afur irratti kan hirmaatan kun egeree ifaa Itiyoophiyaaf gumaacha guddaa akka taasisu ibsaniiru. Kanas adeemsa guddaa Ityoophiyaa qofaaf osoo hin taane ummata Afrikaa fi addunyaaf hambaa fi muuxannoo ta’uu danda’u jechuun ibsaniiru. Biyya Ingilizii irraa kan dhufan Allebbaachoo Dassaalenyi Itiyoophiyaanonni sablammoota adda addaa fi jaarmiyaalee lammummaa adda addaa irraa dhufan biyya isaanii sadarkaa gaariitti jijjiiruuf kutannoo agarsiisan dinqisiifataniiru. Itiyoophiyaanota biyya alaa jiraataniifi miseensonni hawaasa Itiyoophiyaa nagaa biyyattiif gumaachuuf qophii ta’uu ibsaniiru. Rakkoon mariidhaan furuun hin danda’amne akka hin jirre eeruun, nagaa, tasgabbii fi misooma waaraa fiduuf ga’een adeemsi marii biyyaalessaa olaanaa ta’uu ibsaniiru. #Ena Afaan Oromoo #TOI #Ena#

Adoolessa 15/2018 (ENA)- Itiyoophiyaan ijaarsa sirna demokiraasii Afriikaa keessatti qooda adda durummaa bahaa akka jirtu miseensi mana maree bakka bu’oota Naayijeeriyaa Agbeedii Firederiik ibsan. Itiyoophiyaan tumsa ardii cimsuunii fi qoodni seena qabeessi dandeettii ofiitiin misooma mirkaneessuuf bahatte guddaa kan raajeffatamu ta’uu ibsaniiru. Itiyoophiyaan biyyoota sirna paarlaamaatiin seenaa ture qaban keessaa tokko ta’uusheetiin qoodni ijaarsa sirna demokiraasiif gumaachaa jirtu kan raajeffatamudha. Keessumaa kallattii tumsa riijinii fi dandeettii ofiitiin dhaabbachuu jabeessuuf qoondi baate olaanaa ta’uu kaasaniiru. Filannoon walii galaa torbaffaan milkaa’inaan xumuruunshees kutannoo adeemsa demokiraasiif qabdu qabatamaan kan itti agarsiifte ta’uusaa dubbataniiru. Ijaarsa sirna demokiraasiif kan barbaachisu inni ijoon fedhii lammiilee kan deebisu, nagaa kan buusuu fi gaggeessaa guddina biyyaalessaa si’achiisu kan itti gaafatamni itti dhagahamu ta’uu hubachiisaniiru. Kanaaf Itiyoophiyaan gama hundaanuu birmadummaashee mirkaneessuuf tattaaffiin qabatamaa itti jirtuu fi milkaa’inni galmeessisaa jirtu Afriikaaf calaqqee ifaa ishee taasiseera jedhaniiru. Hariiroon Itiyoophiyaa fi Naayijeeriyaa guddachaa dhufuusaa kan kaasan miseensi mana maree kun, carraaqqiin dippilomaasii michooma paarlaamaa fi hariiroo paarlaamaa biyyoota lamaan jidduutti cimsuuf taasifame kan raajeffatamu ta’uu eeraniiru. Kun ammoo tumsa hunda galeessa gamlamee dhaabbilee demokiraasii biyyoota lamaanii cimsuuf qaban guddisuuf kan kaayyeffate ta’uu ibsaniiru. Hariiroo gamlameen gamatti Itiyoophiyaan tumsa Ardii fi dandeettii ofiitiin dhaabachuu gama guddisuutiin qooda seena qabeessa bahatte raajeffataniiru. Biyyoonni Afriikaa tumsaa fi walgargaarsa jidduusaanii jiru cimsuuf xiyyeeffatanii hojjechuu akka qaban dubbataniiru.

Rakkoolee yeroo dheeraaf Itiyoophiyaa keessatti turan hundee irraa furuuf, Komishiiniin Marii Biyyaalessaa Itiyoophiyaa Labsii Lakk. 1265/2014, Mana Maree Bakka Bu'oota Ummataatiin ragga'een hundaa’e hojiitti galeera. Kaayyoo Guddaa Hundeeffama Komishenii Marii Biyyaalessaa · Marii Biyyaalessaan Waliigaltee Uumuu: Dhimmoota bu'uuraa biyyaalessaa irratti hoggantoota siyaasaa, hayyootaa fi kutaalee hawaasaa garaagaraa hirmaachisuudhaan marii bal'aa fi hunda-galeessa ta'e gaggeessuu; ta'us waliigaltee biyyaalessaa waaraa bira gahuu dha. · Wal-dhabdeewwan Mariidhaan Furuu: Garaagarummaa fi wal-dhabdeewwan siyaasaa fi hawaasummaa kanneen seeraanis ta'e dhiyeenya kana uumaman karaa nagaa fi marii qofaaan furuu. · Duudhaalee Hawaasummaa Haaromsuu: Duudhaalee biyyaalessaa wal-kabajuu fi waliin hojjechuu cimsan suphuu, akkasumas wal-amantaa hawaasaa fi qaamolee adda addaa gidduutti ijaaruu dha. Komishiiniin kunis komishinaroota bilisaa fi walaba ta'an 11 qabatee kan hundaa’e dha. Haaluma kanaan, waldhabdee fi rakkoolee biyyattii keessatti yeroo dheeraaf turaan furuuf hojiin bal'aan eegalamee jira. Akkuma beekamu, Itiyoophiyaan seenaa sirna mootummaa yeroo dheeraa kan qabduu fi biyya saboota, sab-lammoota,Ummatoota, afaani fi aadaawwan hedduti. Ta'us, adeemsa sirna hundeeffama ishee keessatti dhimmootni seenaa, eenyummaa, abbaa biyyummaa fi haqaafi kanneen wal-qabatan hedduun utuu furmaata sirrii hin argatiin yeroo lakkoofsiisaniiru. Rakkooleen caasaa irraa furmaata dhaban kunniinis, yeroo baay’ee biyyattii gara walitti bu'iinsaa, tasgabbaa'uu dhabuu fi wal-waraansaatti galchuun gaaga’ama hama uumaniiru. Rakkoolee kanneen hundee irraa furuuf, walitti bu'iinsa siyaasaa fi hawaasummaa bifa mariitiin hiikuudhaaf Mariin Biyyaalessaarratti abdatameera. Haaluma Kanaan komiishiin marii biyyaaleessa Itiyoophiyaa haala duree hedduu keessa darbeera. Rakkoolee kanneen hundee irraa furuuf, walitti bu'iinsa siyaasaa fi hawaasummaa bifa mariitiin hiikuudhaaf Marii Biyyaaleessaa irratti abdatameera. Ministirri Muummee Itiyoophiyaa Doktor Abiyyi Ahimad guyyaa jalqabbii Marii kana Irratti akka jedhanitti “Mariin kun salphaatti kan deebi’ee hin argamne, seenaa Itiyoophiyaa ammayyaa keessatti kaayyoo fi galma guddaa kan qabudha.” Mariin biyyaaleessaa Itiyoophiyaa kun seenaa keessatti iddoo guddaa kan qabuufi Afriikaaf fakkeenya guddaa kan ta’uu fi Marii hunda hirmaachise ta’uu ibsani turan. Itiyoophiyaanoonni rakkina gurguddaa bira darbaniiru kan jedhan Ministirri Muummeen; mariin kun furmaata waldhabdee akka ta’e ibsaniiru. Dhaloota dhufuuf biyyaa mijaata ta’e ijaaruuf eegeree tolchuuf mariin kun carraa gaarii ta’uu ibsuun; milka’ina isaaf hunduu akka tumsaan dhaamaniru. Komishinarri Ol'aanaan Komishinii Marii Biyyaalessaa Itiyoophiyaa Pirofeesar Masfin Ara'ayaa gama isaaniitiin, 'Mariin Biyyaalessaa Itiyoophiyaa dhaloota dhufuuf biyya cimtuufi nageenya amansiisaa taate qabdu ijaaruuf carraa guddaa kan uumuudha,' jechuun yeroo sana ibsanii turaan. Mariin kun keessattuu, gaaffileen siyaasaafi sirnaa walxaxaan waggoota dheeraaf kuufaman har'as nagaafi tokkummaa biyya keenyaa qoraa akka jiran yaadachiisaniiru. Garaagarummaan yaadaa rakkoo akka hin taaneefi ilaalchota adda addaa karaa tasgabbaa'aafi diimokiraatawaa ta'een mariin furuun murteessaa ta'uu isaa himaniiru. Rakkoolee hidda fageeffatan humnaan, furmaata yeroon yookaan adeemsa qoodinsaafi alatti hambisuutiin waaraatti furuun akka hin danda'amne seenaan kan nu barsiise ta'uu isaa irratti xiyyeeffannaa kennanii dubbataniiru. Furmaanni waaraafi tokkichis marii biyyaalessaa amanamummaa, hirmaachisummaafi karaa saayinsaawaa ta'een gaggeessuu qofa ta'uu isaa ibsaniiru. Mariin kun garaagarummaa jiru haala sodaa tokko maleefi karaa qaroomina qabuun waliin mari'achuun waan filannoo hin qabne ta'uu isaa ibsaniiru. Komishiiniin Marii Biyyaaleessaa Itiyoophiyaa haala dureewwan hedduu keessa darbee jira. Isaanis: · Ajandaa Walitti Qabuu fi Qooda Fudhattoota Adda Baasuu:   Komishinichi kutaalee biyyaattii gara garaatti, akkasumas diyaasporaawwan ala jiraatan biratti socho'uudhaan waldaalee adda addaa, abbootii Gadaa, abbootii amantaa, dubartoota, dargaggoota, paartilee siyaasaa fi kutaalee hawaasaa irraa ajandaa marii walitti qabaa tureera. · Bakka Bu'oota Marii Adda Baasuu: Ummanni mataan isaa kallattiidhaan bakka bu'oota filachuun, sagaleen sadarkaa gadii irratti argamu gara waltajjii marii gidduugaleessaatti akka dhihaatu taasisameera. · Ajandaawwan Gurmeessuu: Hawaasa adda addaa biraa ajandaawwan kumaatamaan walitti qabaman gosagosaan adda baasuu fi gurmeessuu hojiin isaa raawwatameera. Amma namootni marii irratti hirmaatan Kutaalee biyyattii adda addaarraa dhufaa kuma 4 akkasumas haala mijeessitootaan deeggaramuun mariin eegalameera. Haluma kanaan namootni marii irratti hirmaatan garee adda addaatti qoodamuun ajandalee adda baafaman irratti marii eegalaniiru. Marii biyyaalessaa – Egeree Waloof Waliigaltee Biyyaalessaa Uumuu Itiyoophiyaan seenaa ishee keessaatti adeemsa siyaasaa hiikkaa guddaa qabu keessa tokko kan ta’e Komishiinii Marii Biyyaalessaa Itiyoophiyaa hundeessuun erga hojii jalqabee wagga sadii ta’eera. Komishiiniin kun bu’uura labsii 1265/2014 Manni Maree Bakka Bu’oota Uummataa raggaaseen hundaa’ee hojii eegale. Kayyoon Komishiiniin Marii Biyyaalessaa hundaa’eef inni ijoonis rakkoowwaan siyaasaa fi hawaasummaa biyyattii keessa yeroo dheeraaf turan marii fi waliigaltee biyyaalessaan furuufidha. #Ena Afaan Oromoo #TOI #Ena#

Adoolessa 14/ 2018(ENA): Wantoota ijoo Yaa’ii Marii Biyyaalessaa Kaleessa Mari’attoonni gareedhaan qoodamanii marii kan jalqaban har’as garee isaaniitiin mari’achuu itti fufaniiru. Mari’attoota 50 kan hammate gareen 80’n kaleessa waaree booda irraa eegalee garee xiqqaa isaanii keessatti marii’achaa jiru. Adeemsi kun hanga boruutti kan itti fufu ta’a. Adeemsa kana keessatti mari’attoonni dhimmoota ajandaa irratti mari’achaa jiran irratti yaada fi ilaalcha hedduu dhiheessaa jiru. Adeemsi kun dhimmoota biyyaalessaa hunda caalaa bu’uuraa ta’an kanneen sababa waliigaltee dhabuu ta’an irratti ilaalchaa fi sababoota walii isaanii akka hubatan waltajjii uumuun ni eegama. Adeemsa kana galmaan gahuuf Komishiniin Marii Biyyaalessaa Itiyoophiyaa paanaalii ogeeyyii dhaabbilee adda addaa irraa dhufan, kanneen gama ogummaa, barnootaa fi ogeessota qaboo yaa’ii qabaniin gahumsa qaban walitti fidee Yaa’ii Marii Biyyaalessaa irratti hirmaachaa jiru. Yaa’ii kana irratti ogeessota gahumsa olaanaa qaban 80 walitti fidee marii kana akka deeggaran taasisaa jira. Ogeessonni kunneenis yaadota iftoomina barbaadan irratti ibsa kennaa mari’attoota deeggaraa jiru. Gama biraatiin, Yaa’ii Marii Biyyaalessaa kana keessatti, taajjabdoonni walaba ta’an 50 ol ta’an Tumsa Dhaabbilee Hawaasa Siivilii Itiyoophiyaa, waldaalee ogummaa adda addaa, Mana Maree Mirga Namoomaa Itiyoophiyaa fi Komishinii Mirga Namoomaa Itiyoophiyaa irraa, akkasumas dhaabbileen biyya keessaa adda addaa , adeemsa marii kana taajjabaa jiru. Komishinii Marii Biyyaalessaa Itiyoophiyaa Adoolessa 14, 2018 #Ena Afaan Oromoo #TOI #Ena#

Adoolessa 14/2018 (ENA): Giiftii Duree Zinnaash Taayyaachoon Giiftii Duree Rippabiliika Armeeniyaa Aanaa Hakoobiyaan waliin marii bu’a qabeessa ta’e akka taasisan beeksisan. Giiftiin dureen ergaa fuula miidiyaa hawaasaa isaanii irratti maxxansaniin, gita isaanii Armeeniyaa waliin wal arguun hojiilee adda addaa biyyoota isaanii keessatti raawwatamaa jiran irratti mari’ataniiru.   Giiftii duree Zinnaash Taayyaachoon ergaa isaaniin mariin Giiftii Duree lamaan gidduutti taasifame milkaa’aa fi bu’aa qabeessa ta’uu mirkaneessaniiru. #Ena Afaan Oromoo #TOI #Ena#