Sadaasa 2/2019 (ENA)- Itoophiyaan gahee seena qabeessummaa nageenya idil-addunyaa fi tasgabbii waliigalaatiif qabdu cimsitee akka itti fuftu Hogganaan giddugala Nageenya Kabachiisa Raayyaa Ittisa Biyyaa Mejer Jeneraal Addaamneh Mangistuu ibsaniiru. Guyyaan tumsa kabachiisa nageenya Idil-Addunyaa Maakaziichaa Nageenya Kabachiisa Raayyaa Ittisa Biyyaa mata duree “Nageenya irratti invastii gochuun tasgabbii Idil-Addunyaatiif tumsa cimaa ijaaruu” jedhuun kabajameera. Sirna kana irratti Hogganaan giddugala Nageenya Kabachiisaa Mejer Jeneraal Addaamneh Mangistuu dabalatee Atachoonni waraanaa biyyoota garaagaraa, bakka bu’oonni dhaabbilee Idil-Addunyaa fi dhaabbileen tumsaa argamaniiru. Hogganaan giddugalichaa Mejer Jeneraal Addamneh Mangistuu akka ibsanitti, Itoophiyaan waraana Kooriyaa bara 1951 irraa kaasee Koongoo, Ruwaandaa, Laayibeeriyaa, Buruundi, Daarfuur, Abiyee, Sudaan Kibbaa fi Somaaliyaatti duula gaggeessiteen waggoota kurnan hedduuf gumaacha nageenya idil-addunyaatiif goote jirti jedhaniiru.

Rifoormiin guutuun gaggeeffamuu qaba erga jennee booda, rifoormicha gulantaa afuritti qoodnee hojjachuun barbaachisaa ture. Rifoormiin tokko yeroo takkaatti guutummaan raawwatamuun of-dhabuu fida. Jeequmsa uumuu ykn kufaatii qabaachuu waan danda’uuf, haala tartiibaafi sakatta’amee deemu filannee jirra. Gulantaan jalqabaa aangoofi tajaajila sadarkaa naannoofi godinootaatti tuulamee ture gadi buusuu irratti xiyyeeffate. Waggoottan darban keessatti, osoo namni baayyeen ‘agenda’ hin taasifatin, tajaajilaa fi hojiin godinaa fi naannoorra ture suuta suutaan gadi bu’eera. Duraan namni heyyama tokko argachuuf Oromiyaa keessatti Mooyyaleerraa ykn Gidaamiirraa ka’ee as dhufa ture. Haalli kun fudhatama hin qabu ture. Kanaaf tajaajila kana suuta suutaan gadi buusuun hojii bu’aa qabeessa naannoo keenyaatti hojjatame ta’eera. Gulantaan lammaffaan seektaroonni hojii isaanii jalqabaa hanga dhumaatti hoggananii osoo hin ta’in bibbixxilamanii hojjatu turan sirreessuu irratti xiyyeeffate. Waggoottan darban keessatti hojiilee yaa’iinsa hojiitiin walitti hidhuun bal’inaan hojjatameera. Imaammata hordofnu giddugaleessa godhachuun caasaan seektaroota sirrachuu akka danda’u taasifameera. Gulantaan sadaffaan waggaa lama dura raawwatame. Seenaa biyya keenyaa keessatti rifoormii guddaa jedhamuu kan danda’udha. Bara Dargii irraa kaasee mootummaa kanaan dura, bulchaan Gandaa namni tokko ykn koree muraasa kan ta’eefi yeroo boqonnaa qofa tajaajilu ture. Amma garuu Ganda Oromiyaa 7,342 keessatti ogummaa qaban, karaa idilee, itti gaafatamummaa guutuun, mootummaa guutuu hundeessineerra. Kanaaf nama kuma 50’tti dhiyaatu Aanaa irraa gara gandaatti deebisneerra. Tajaajilli Aanaa irra ture guutumaan gandatti geeffameera, aangoon Aanaa irra ture illee guutuun gandatti gadi bu’eera. Namoonni kuma 50’tti dhiyaatan kunniin hoggansa barnootaa dabalatee muuxannoofi ogummaa qabaniidha, hundi isaanii Aanaa irraa gara gandaatti gadi bu’aniiru. Rifoormiin kun hojii hamma barbaadametti hin bal’ifamne ta’us, rifoormii biyya kanatti hojjatame keessaa isa guddaa jennee kan ilaalludha. Dhimma mana murtiitiif malee, namni tokko iyyuu ganda irraa gara Aanaatti akka hin deemne murteessineerra. Kanaaf hoggansaafi raawwattoonni gandatti buufaman hojii kana achumatti akka xumuran taasifameera. Amma caasaafi hojiin dhibbeentaan 63 gandarra jira, gandi hoggansa mataa isaa qaba. Inisheetivoonni duraan Aanaa irraa deddeebi’amaa ture ganda irratti hoggansa nama torbaan akka qabaatan taasifameera. Hawaasni duraan waraqaa dhuma takkaa fudhachuuf, heyyama takkaa argachuufis dhimmoota adda addaa xumuruuf Aanaatti deddeebi’aa ture. Amma garuu tajaajilli kun gandatti dhiyaateera. Kanaaf Oromiyaa keessatti “Mootummaa Gandaa” jennee ibsinu rifoormiifi ce’umsa guddaa kan fideedha. Aangoon qindeessummaa godinaarra ture waggaa lama dura Aanaadhaaf kennameera. Aanaan aangoo guutuu akka qabaatu gochuun hojiin duraan Aanaan hojjatu Gandaaf kennameera, Aanaadhaaf immoo gahee godinaa kennineerra. Kanaan waggoottan darban keessatti aangoon godinaafi naannoorra ture banaa ta’eera. Qorannoon keenyaas yeroo takkaatti rifoormii guutuu raawwachuun of-dhabuu akka ta’u agarsiise. Jeequmsa uumuu ykn hojii diduu waan danda’uuf, sadarkaa naannoofi godinaa gulantaa itti aanutti hambifneerra. Rifoormiin magaalootaa haala walfakkaatuun raawwatameera. Fakkeenyaaf, magaalota xixiqqoo 7 turan, gandoota baadiyyaafi aanaalee jiran walitti ijaarreerra. Bishooftuu waliin Dukamfi magaalota xixiqqoo baadiyyaa keessa turan walitti qabnee Bishooftuu jennee gurmeessineerra. Naannoo Adaamaa keessatti bibbixxilamanii turan walitti qabnee, Shaashamanneen, Bishaan Gurraachaafi Kuyyaraa dabalnee magaalaa tokko goone. Roobeefi Gobbaas walitti qindeessinee magaalaa tokko goone. Magaalotarrattis rifoormii bal’aa gaggeessineerra. Gulantaan afraffaan rifoormii amma gaggeeffamaa jirudha. Raawwii gulantaa sadanii erga sakatta’aneen booda, tajaajila maaltuun hafe, seektaraa sirreessuuf hojii maalii hojjannee maaltu hafe, hanqinni maali qabu jedhee gaafachuun hojjatamaa jira. Dabalataan, caasaa, qabeenyaafi humni barbaachisu ijaarramee jiraachuu isaa mirkaneessuu irratti hojjatamaa jira. Caasaan qophaa’eef ergamni kennameera. Tajaajilaafi opereeshiniin Gandaafi Aanaatti fudhatameera, kanaaf Godinaaf hojii biraa kennineerra. Hojiiwwan naannoon hojjataa ture hundi Godinaaf kennamaniiru. Naannoon immoo yaada tarsima’aa irratti xiyyeeffachuun, tarsiimoo bocuu, imaammataafi seeroota baasuu, hojiimaata haaraa diriirsuu, akkasumas pirojektoota guguddoo tapha Oromiyaa jijjiiruu danda’an irratti xiyyeeffata. #oromiapresidentoffice2026

Sadaasa 1/2019 (ENA) - Sagalee keenya olkaafnee,fedhii misoomaa, qaqqabama faayinaansii fi tumsa teeknooloojii magaalaawwan Afriikaa ni guddifna jedhan Kantiibaan magaalaa Finfinnee Adaanech Abeebee. Yaa’iin jijjiirama haala qilleensaa dhaabbata mootummoota gamtoomanii 31ffaan (COP31) Turkiyyee Antaaliyaatti gaggeeffamaa jira. COP31 Antaaliyaatti gaggeeffamaa jirurratti baankii misooma Afriikaatti daarektara jijjiirama haala qilleensaa piroofeessar Antoonii Okoon Niyoongi fi ambaasaaddara Global Covenant of Mayors fi kantiibaa Paariis duraanii Aan Hiidalgo waliin haala qilleensaa Finfinnee fi dhimmoota misoma magaalaa egereerratti mari’achuusaanii fuula miidiyaa hawaasaa isaaniirratti barreessaniiru. Keessumaa faayinaansii haala qilleensaa kallattiin magaalota qaqqabsiisuu, dandeettii qophii fi raawwii pirojektootaa cimsuu, akkasumas misooma magariisaa, misooma qarqara lagaa, muuxannoowwan magaalaa deebisanii misoomsuu fi qonna magaalaan argaman walirraa barachuu fi muuxannoo wal jijjiiruuf akka danda’amu dameewwan tumsaa cimsuuf walii galleerra jedhaniiru. Finfinneen COP32 waan qopheessituuf, magaalota Afriikaaf dura haala qilleensaa waloo, fedhiiwwan faayinaansii fi ajandaa misoomaa sagalee tokkoon addunyaaf dhiheessuuf kan dandeessisu waltajjii uumuuf carraa guddaa qabdi jechuun ibsaniiru. Sagalee keenya waloo cimsuun, fedhii misoomaa magaalaawwan Afriikaa, qaqqabama faayinaansii fi tumsa teeknooloojii ni cimsina jedhaniiru.

Sadaasa 1/2019 (ENA)- Falaasamni ida’amuu paartii badhaadhinaa Afriikaaf fakkeenya kan ta’u bu’aa siyaas-dinagdee hammataa galmeessisuusaa bakka bu’oonni paartii siyaasaa biyyoota Afriikaa ibsan. Walgahii Paartilee Siyaasaa Afrikaa 2ffaa, Onkoloolessa 26 hanga 28 bara 2019tti Finfinneetti gaggeeffame irratti bakka bu’oonni biyyoota Afrikaa garaagaraa hirmaatan, falaasama Ida’amuu fi muuxannoo misooma Itiyoophiyaa dinqisiifataniiru. Walgahii kana irratti hoggantoonni paartilee siyaasaa fi hirmaattonni kuma 1 ol ta’an biyyoota Afrikaa 54 irraa walitti dhufuun, gahee paartileen siyaasaa guddina dinagdee Afrikaa saffisiisuu keessatti qaban irratti mari’ataniiru. Bakka bu’aa Zimbaabuwee, Daaglaas Miwonzora, Misooma magaalaa Finfinnee fi kallattii misooma Itiyoophiyaa dinqisiifachuun, muuxannoo kana biyya isaanii Zimbaabuweetti hojiirra oolchuu akka barbaadan ibsaniiru. Bakka buutuun Lesoottoo, Ireene Mifahamaa, Dubartoota hoggansaa fi murtee kennuu keessatti hirmaachisuu, akkasumas misooma koridarii fi qarqara laggeenii Finfinnee dinqisiifataniiru. Karoora misoomaa fi yaad-rimeewwan hojii hanga bara 2040tti hojiirra oolan, Ajandaa Gamtaa Afrikaa 2063 waliin walsimatan irratti waliigalteen uumameera.

Sadaasa 1/2019 (ENA) – Guddina dinagdee Itoophiyaa itti fufiinsa qabu saffisiisuu, daldala alaa babal’isuufi fayyadamummaa lammiilee mirkaneessuuf abbummaa hulaa galaanaa mirkaneessuun qaama ijoo tarsiimoo guddaa Ida’amuu keessaa tokko ta’uu Ministirri Bishaaniifi Inarjii, doktar Injiinar Habtaamuu Ittafaa ibsan. Doktar Injiinar Habtaamuun ENAtti akka himanitti, Itoophiyaan gaaffii laga Abbayyaa misoomsuu irratti qabdu ijaarsa Hidha Haaromsaa Guddicha Itoophiyaatiin dhugoomsuun seenaa haaraa barreessiteetti. Amma immoo gaaffii seena-qabeessaa abbummaa hulaa galaanaa deebii argamsisuu fi mirkaneessuuf hojjechaa jirti jechuun ibsaniiru. Dhimmi abbummaa hulaa galaanaa kun gaaffii seenaa Itoophiyaanota biratti ka’aa ture, hanga ammaatti deebii hin arganneefi akka gaabbii biyyaalessaatti ilaalamaa ture keessaa tokko ta’uu himaniiru. Itoophiyaan hulaa galaanaa dhabuun ishee imala seenaa, siyaasaa fi faayidaa biyyaalessaa irratti dhiibbaa guddaa geessisaa turuu kaasaniiru. Yeroo sana hoggansi siyaasaa ture faayidaa biyyaalessaa fi gaaffii uummataa dagachuun murtoo faayidaa biyyattii hin eegne fudhachuu isaa madaa guddaa seenaa ta’uu dubbataniiru. Haa ta’u malee, Itoophiyaan yeroo ammaa tarkaanfiiwwan dipilomaasii olaanaa fudhachaa jirtuun, yaadni Itoophiyaan hulaa galaanaa argachuu qabdi jedhu dhimma Itoophiyaa qofa osoo hin taane, dhimma xiyyeeffannoo hawaasa addunyaa ta’aa dhufuu isaanii ibsaniiru. Akkuma shira diinoonni seenaa Hidha Haaromsaa Guddicha Itoophiyaa akka hin ijaaramne gufachiisuuf taasisaa turan tokkummaa uummataatiin fashaleessine, hulaa galaanaa shiraan dhabne kana illee tokkummaa keenya cimsachuun mirkaneessinee qaroomina Itoophiyaa sadarkaa olaanaatti ni ijaarra jechuun dubbataniiru. Kallattiin qaroominaa fi ammayyummaa Itoophiyaan yeroo ammaa hordofaa jirtu fedhii yeroo qofa kan ilaalu osoo hin taane, carraa fi egeree dhaloota dhufu murteessuuf kallattii tarsiimoo ta’uu ibsaniiru. Tarsiimoo guddaan Ida’amuu bara 2050tti Itoophiyaa badhaadhina ishee mirkaneessite, sadarkaa addunyaatti kabajamtuu fi humna isheetiin beekamtu ijaaruu akka kaayyeffate hubachiisaniiru. Tarsiimoon kun rakkoolee yeroo ammaa qofa furuuf osoo hin taane, fedhii misoomaa, dinagdee fi birmadummaa dhaloota boruu giddugaleessa godhatee kan hojjetu ta’uu himaniiru. Kana irraa ka’uun, Itoophiyaan qabeenya uumamaa mootummaa birmadummaa ishee keessatti argaman sirnaan misoomsuu, dabalataanis laga Abbayyaa fi qabeenya biroo qabdu fayyadamummaa uummataaf oolchuun humna dinagdee biyyattii guddisuu kallattiiwwan misoomaa ijoo keessaa taasifatte jechuun ibsaniiru. Dhimmi abbummaa hulaa galaanaa mirkaneessuus qaama tarsiimoo kana keessaa tokko ta’uu hubachiisaniiru. Itoophiyaan uummata miliyoona 130 ol qabduufi biyyoota Afrikaa keessaa baay’ina uummataatiin sadarkaa jalqabaarratti argamtu hulaa galaanaa dhabuun ishee daldala, geejjibaa fi walitti hidhamiinsa dinagdee irratti dhiibbaa guddaa geessisaa jiraachuu ibsaniiru. Kanaaf, gaaffiin abbummaa hulaa galaanaa karaa seera qabeessa, nagaa fi dipilomaasii irratti hundaa’een furmaata argachuun guddinaafi egeree biyyattii keessatti murteessaa ta’uu himaniiru. Gibxiifi ergamtoonni ishee Itoophiyaan hiyyummaa keessatti akka turte fedhii akka qabanis kaasaniiru. Akkuma Itoophiyaan Hidha Haaromsaa Guddicha Itoophiyaatiin fedhii seenaa dheeraa bishaan laga Abbayyaa misoomsuu irratti qabdu hojiin dhugoomsite, gaaffii abbummaa hulaa galaanaa ishees tokkummaa biyyaalessaa, dipilomaasii cimaa fi karaa seera qabeessa ta’een mirkaneessuuf kutannoo qabaachuu ishee ibsaniiru.

Onkoloolessa 1/2019 (ENA)- Kabaja ayyaana saboota, sablammootaa fi ummattoota Itoophiyaa marsa 21ffaa Godina Kibba Lixa Oromiyaatti kabajamu haala milkeessuun danda’amu irratti giddugaleessa Mattuutti mariyatamee jira. Ittigaafatamaan Siyaasa Paartii Badhaadhinaa Damee Godina Kibba Lixa Oromiyaa Obbo Mahammaad Xahaa Abbaa Fiixaa ayyaanni sabootaa, sablammootaa fi ummattoota Itoophiyaa bara kanaa barii lammiileen biyyatti sagalee isaaniin mootummaa haaraa hundeeffatanitti kan kabajamu tahuu isaatiin ijaarsa biyyaaf mootummaa ida'amuu keessatti seenaa addaa qabaa jedhaniiru. Ayyaanni kun agarsiiftuu tokkummaa sabdaneessummaa uummataa, ibsituu walqixxummaaf eenyummaa sabootaa waan ta'eef ayyaanichi karaa miidhagaaf aadaaf dudhaa lammiilee agarsiisuun kabajamaa jedhan. Ayyaanni kun akkaataa dudhaa Oromoon itti keessummaa simatuu fi saboota biroo ofitti qabuun waloomaan jiraatu giddugaleeffachuun kabajama kan jedhan Obbo Mohammad Xahaan ; ayyaanichi carraa dame tuurizimii fi simannaa investimentii guddisu waan qabuuf qaamoleen hawaasaaf hoggansi sadarkaan jiru xiyyeeffannoon qophii ayyaana kanaarratti hojjechuu qabaa dhaaman. koomunikeeshinii Godinichaarraa

Sadaasa1/2019(ENA)—Yaa’iin Dhaabbata Mootummoota Gamtoomanii 32ffaa dhimma jijjiirama qilleensaa (COP32) Itoophiyaatti gaggeeffamu furmaata itti fufinsaa fi tarkaanfiin qabatamaan itti fudhatamu ta'uu akka abdatan hirmaattootni COP31 ibsan. yaa’iin kun Itoophiyaatti gaggeeffamuun isaa Afriikaaf injifannoo guddaa ta'uu dubbataniiru. yaa’iin Dhaabbata Mootummoota Gamtoomanii 31ffaa dhimma jijjiirama qilleensaa (cop31) Antaliyaa Turkiitti eegalameera. Bakka bu’aan Ministeera Qonnaa, eegumsa naannoo fi qabeenya Qurxummii Mozaambiik Luwiis Niyaamush akka ibsanitti, Itoophiyaan damee jijjiirama qilleensaa fi misooma magariisaan fakkeenyummaan agarsiisaa jirtu biyyoota Afriikaaf barnoota guddaa kan kennuudha jedhaniiru. Finfinneenis magaalaa ammayyaa fi magariisa ta’uun guddachaa jirti jedhaniiru. Itoophiyaan naannoo hongeen miidhame gara lafa omishaatti jijjiiruun, hojiilee dandamachiisummaa jijjiirama qilleensaa hawaasarratti hundaa’an hojiirra oolchuun fi muuxannoo qabatamaarratti hundaa’uun walga’ii COP addunyaa kana ga’umsaan simachuuf dandeettii olaanaa akka qabdu ibsaniiru. Ogeessi miidiyaa Sagantaa dandamachiisummaa qilleensaa naannoolee Baankii Addunyaa (RCRP2) Yuvoon Suunduu gama isaaniitiin, ItoophiyaanAshaaraa Magariisaatiin akka biyyattiitti biqiltuu biiliyoona 56 ol dhaabuun hojiin qabatamaan deeggarame hojjechaa akka jirtuu fi kunis kanneen akka Maalaawii biyyoota balaaf saaxilaman biroof fakkeenya guddaa ta’uu dubbataniiru. Gaazexeessaan Televizhinii Habertuurk (Haberturk TV) biyya Turkii Emree Karachaa akka ibsetti, Itoophiyaan dhiibbaa hamaa jijjiirama qilleensaa ittisuu fi hir’isuuf tarkaanfiiwwan murteessoo fi gaarii fudhachaa jirti jedhaniiru. Misooma magariisaa fi itti fufiinsa qabu kan Itoophiyaan hordofaa jirtu carraa boruu uummata ishee calaqqisiisuu irra darbee, hogganoonni addunyaa fi biyyootni biroon bulchiinsa Itoophiyaa fi tarkaanfiiwwan qabatamaa irraa muuxannoo fudhachuun biyyasaaniitti hojiirra oolchuu kan qaban akka ta’u dubbataniiru.

Onkololeessa 29/ 2019 (ENA) : Gamaaggamni raawwii hojii kurmaana jalqabaa bara baajataa 2019 Paartii Badhaadhinaa gaggeeffameera. Waltajjicharratti hoggantoonni olaanoo waajjira muummee fi waajjiraalee damee Paartii Badhaadhinaa hirmaataniiru. Gabaasni raawwii karoora hojii dhaabichaa kurmaana jalqabaa bara 2019 itti gaafatamaa damee dhimma tarsiimoo Paartii Badhaadhinaa Ministir Dr. Darajjee Dhugumaan dhiyaate irratti mari’atameera.   Kunis bu’aa kurmaana kana keessatti galmaa’e, qormaata mudate, akkasumas kallattii hojii gara fuula duraa xiyyeeffannoo barbaadu qoratameera. Waltajjichaan ciminaa fi hanqina raawwii hojii adda baasuun madaalameera. Kana malees, muuxannoowwan argaman cimsuu, qaawwa raawwii hojii sirreessuu, kallattii hojiiwwan gara fuula duraa bu’a qabeessa ta’een akka hojjetaman dandeessisan irratti xiyyeeffannoon kennameera. Odeeffannoon waajjira paartichaarraa argame akka mul’isutti Pireezidaantii Ittaanaa fi Itti Gaafatamaan Waajjira Muummee Paartii Badhaadhinaa obbo Adam Faarahi waltajjicharratti raawwii hojii gara fuula duraa cimsuuf dhimmoota xiyyeeffannoo barbaadan irratti kallattii kennaniiru. #Biyya Guddoo, Ummata Guddaa # Mul'ata Guddaa