Hagayya 27/2018 (ENA)- Fooyyessi dinagdee gooroo guutuun daldala biyya alaaf haala mijataa uumuun gabaa haaraa banuudhaan qooda gaarii qaba bahaa akka jiru dureeyyiinii fi hoggantoonni damee kanarratti hojjetanii ibsan. Misooma Hortiikaalcharii Itiyoophiyaa fi eksipoortiirratti kan hojjetan obbo Tsaggaayee Abbabaa akka ibsanitti, birokiraasiin waggoottan darban ture yeroo har’a guddaa furameera jedhan. Yeroo riifoormiin dinagdee gaggeeffamee fi haalli invastimantii mijataan uumamerra waan jirruuf dureeyyiin biyya keessaa fi biyya alaa haala mijataa keessatti akka hojjetanii fi faayidaa akka argatan kan gargaaru ta’uu himaniiru. Invastaroonni biyya Chaayinaa, Hindii fi Awurooppaa dabalataanis invastaroonni biyyoota baha fagoo akka Veetinaam damee garagaraarratti invasti gochuuf dhufaa akka jiran eeranii, kun bu’aa fooyyessa dinagdee gaggeeffamee ta’uusaa ibsaniiru. Gama biraatiin hojii gaggeessaan olaanaa agiroo indistirii Biikoo obbo Taammiraat Addunyaa gamasaaniin, dhaabbannisaanii irra guddeessaan oomishoota istiroobarii biyyoota jiddu galeessa bahaa, baha fagoo, Afriikaa fi Awurooppaaf ergaa akka jiran ibsaniiru. Mootummaan fooyyessa dinagdee gooroon wal qabatee dhaabbilee oomishanii erganiif deeggarsi taasisaa jiru caalaatti hojjechuuf kan nama onnachiisudha jedhaniiru. Keessumaa dhiheessii sharafa alaa, hojmaata waraqaa liqiin wal qabatee hojmaanni Baankii guddaa kan mijate ta’uu dubbataniiru. Hojmaanni kun hariiroo daldalaa dhaabbannisaanii biyyoota baha fagoo kanneen akka Siingaapoorii fi taayilaandi waliin jiru cimsuudhaan gara gaba haaraatti salphaatti akka galu carraa guddaa akka uumu dubbataniiru. የMaanaajariin ekispartii Shaavaamoo Eksipoortii waldaa dhuunfaa itti gaafatamnisaa murtaa’e obbo Taarikuu Guuttataa Gabaan Awurooppaa damee eksiportii Bunaatiin eeramaa akka ture dubbataniiru. Yeroo ammaa garuu daangeffama daldalaa fi seerota gamtaan Awurooppaa baasu waliin wal qabatee gabaa filaataa babal’isuun barbaachisaa ta’uu ibsaniiru. Mootummaa gabaa haaraa fi filaataa babal’isuuf carraaqqii taasisu baay’ina ekispoortii kan bal’isuu fi maxxantummaa gabaa tokko qofaarratti qabnu waan hir’isuuf faayidaa guddaa akka qabu ibsaniiru.

Hagayya 27/2018 (ENA) - Qonnaan bultoonni magaalaa Shaggaritti qonnarratti bobba’an haala mijataa mootummaan uumeefitti gargaaramuun galiisaanii guddifachaa jiraachuu qonnaan bultoonni magaalichaa ibsan. Guyyaan qonnaan bultootaa magaalaa Shaggar mata duree “qonnaan bulaa ammayyaa fi qonni ammayyaa badhaadhina walii galaaf” jedhuun magaalaa Shaggar kutaa magaalaa Sulultaatti sirnoota garagaraan kabajamaa jira. Waggaa haaraa sababeeffachuun baazaarii fi egzibiishiniin kan qophaa’e yoo ta’u, oomishaaleen qonnaa, maashinariiwwan, galteewwan calla guddiftuu fi kanneen biroos agarsiisaaf dhihaataniiru. Kaayyoon olaanaan kabajni guyyaa qonnaan bultootaa itti qophaa’e kun magaalonni qonna magaalaarratti hirmaachuun nyaataan of danda’uurra darbee, oomishaalee qonnaa kallattiin baay’inaa fi gatii madaalawaan argachuun qaala’insa jireenyaa hir’isuu fi gabaa tasgabbeessuu akka ta’e ibsameera. Qonnaan bultoonni saganticharratti hirmaatan yaada ENA’f kennaniin, bulchiinsi magaalichaa qonna magaalaa babal’isuunii fi hojiilee wabii nyaataa ammayyaa fi fulla’aa ta’e mirkaneesan raawwachuuf isaan gargaaraa akka jiru ibsaniiru. Qonnaan bultoota yaada kennan keessaa kanniisaa horsiisuun damma oomishaa jiran obbo Abarraa Sobbooqaa akka dubbatanitti, hojii hojjechaa jiraniin of fayyaduurra darbanii oomishasaanii gabaa baasuun galiisaanii guddifachaa jiru. Gara fuulduraattis oomisha biyya alaatti egramu guddisuun qooda keenya ni bahanna jedhaniiru. Adde Assagadach Simee bu’aawwan beelladaa dhiheessuurratti waldaan gurmaa’anii hojjechaa akka jiran ibsaniiru. Walitti hidhaminsa gabaa uumameen fayyadamaa ta’uusaanii eeranii, ogeeyyii fi mootummaa waliin qindoominaan hojjechaa akka jiranii fi hojii kana cimsanii akka itti fufan ibsaniiru. Itti gaafatamaan waajjira qonnaa magaalaa Shaggar obbo Dajanee Baqqalaa gamasaaniin, magaalattiin Kanaan dura oomishuu dhabuun bakkeerraa bitaa akka jirtu yaadachiisanii, yeroo ammaa qonna ammayyaatiin oomishuudhaan gabaaf dhiheessuu eegaluushee ibsaniiru. Sadarkaa magaalaattii hojiileen ammayyaa hojjetamuusaa dubbatanii, qonnaan bulaaf hubannoo uumuudhaan teeknooloojii waliin walitti fiduun hojii hojjetameen hojiileen onnachiisaan hojjetamuusaanii dubbataniiru.

Hagayya 27/2018 (ENA) – Hirkattummaa Roobaa irraa gara misooma jallisii fi makanaayizeeshinii ammayyaatti ce’uun taasifamaa jiru, qonna Itoophiyaa keessatti boqonnaa haaraa kan bane tarkaanfii seenaa qabeessa ta'uu isaa hayyoonni Yuunvarsiitii Jimmaa ibsan. Bu’uura Dinagdee Itoophiyaa kan kan ta’e Qonni baroota dheeraaf mala aadaan maarashaa fi bishaan roobaan qofa irratti hirkatee turuun isaanii kan beekamudha. Haalli kunis biyyattii jijjiirama qilleensaa fi hanqina wabii nyaataaf kan saaxilu ta'ee tureera. Haa ta'u malee, waggoota dhihoo asitti babal'inaan hojiirra oolaa kan jiran kanneen akka misooma qamadii jallisii, oomishtummaa jallisii bonaa fi makanaayizeeshinii meeshaalee qonnaa, oomishtummaa damichaa sadarkaa ol'aanaadhaan jijjiiraa jiru.   Dhimma kana irratti ENA waliin turtii kan taasisan hayyoonni Yuunivarsiitii Jimmaa Itoophiyaan waggoota darban keessa qonna aadaa irraa ce'uudhaan gara Manaakaayizeeshinii misooma jallisii fi ammayyeessuu oomishtummaatti ceesisuuf tarsiimoowwan fi imaammata babal'aa hojiirra oolchaa jirti jedhaniiru. Yuunvarsiitichatti barsiisaa fi qorataan Koleejjiin Qonnaa fi wal’aansa Beelladaa Dr. Waasihuun Hasan, jijjiiramni damee qonnaa keessatti mul'ate hanga oomishaa bira darbee sirna oomishtummaa kan jijjiiru ta'uu isaa ibsaaniiru. Keessattuu babal'achuun misooma jallisii qonni hirkattummaa roobaa irraa akka bilisa ta'u kan taasise yoo ta'u, kunis waggaa keessatti waqtiiwwan adda addaatti oomishuu dandeessisuudhaan waqtii oomishaa babal'iseera. Jijjiirama damee qonnaa kanaaf agarsiistuu kan biroo Makanaayizeeshiniin babal'achuu isaa ta’uu hayyoonni kun ibsaniiru. Haaluma kanaan, toftaalee qonna aadaa irraa gara meeshaalee ammayyaa kanneen akka tiraakteraa fi maashinaroota qonnaa biroo fayyadamuu, kan haamuu fi dhahuun hojii makanaayizeeshiniitiin raawwachuuf tattaaffiin taasifame jijjiirama saffisaa qonna irratti mul'atuuf agarsiistuu isa tokkodha jedhaniiru. Kunis yeroo humna namaatiin fudhatamuu fi qisaasama omishaa hir'isuun, oomisha qulqullinaa fi baay'inaan dabaluuf gumaacha gochaa jira.   Dabalataanis, babal'achuun misooma qamadii jallisii bonaa Itoophiyaan fedhii qamadii mataa ishee bira darbee gara gabaa alatti erguuf kan dandeessise jijjiirama qonnaa ijoodha jedhaniiru. Sana malees, sosochiinsii sagantaa maaddii guutuun qonna qe’ee ofiin, misooma loonii, lukkuu fi horsiisa kannisaan hojjetaman sirna nyaata maatii fooyyessuu bira darbee galii dabalataa uumuuf carraa kan bane ta'uu kan dubbatan immoo Yuunvarsiitii Jimmaatti Diinii Kolleejjiin Qonnaa fi wal’aansa Beelladaa fi wal’aansa Beeyladaa fi ogeessa misooma biyyee, kunuunsa biqiltuu fi qulqullinaa Dr. Salamoon Tulluu ibsaniiru.   Haaluma kanaan oomishni Aannanii fi hanqaaquu dabaluu isaa ibsuun, hawaasni baadiyyaa fi magaalaa hojiiwwan qonnaa kana irratti bal'inaan akka hirmaatu taasifamuu ibsaniiru. Oomisha midhaaniitiin alatti hojiiwwan misooma kuduraa fi fuduraa irratti hojjetamanis Itoophiyaaf galii sharafa alaa dabaluuf gumaacha taasisuu isaaniif akka fakkeenyaatti ibsaniiru. Keessattuu babal'achuun oomisha avokaadoo fi Al- ergiin bunaa galii ol'aanaa galchuu isaanii jijjiirama gurguddoo damichaan kan mul'atan keessaa isaani ijoodha jedhaniiru. Guddina fi babal'ina oomishaa bira darbee qonni waggoota darban keessa namoota baay’eef carraa hojii kan uume ta'uu dubbataniiru.   Naannoo isaaniitti gamtaadhaan gurmaa'anii kan oomishan dargaggoonni fi qonnaan bultoonni mataa isaanii bira darbuun lammiilee biroosaaniif carraa hojii babal'aa kan uuman ta'uu ibsaniiru. Waliigalatti jijjiiramoonni kunniin qonna Itoophiyaa hirkattummaa roobaa jalaa baasuun mala aadaa irraa fooyyessuudhaan gara makaanayizeeshinii jallisii, fi mala ammayyeessuun omishuutti ceesisaa kan jiran ta’uusaaf agarsiistuu ijoodha jedhaniiru. Kunis dhiheessii nyaataa fooyyessuu bira darbee madda galii, carraa hojii fi sharafa alaa dabaluuf gumaacha gochaa kan jiru ta'uu ibsaniiru.  

Mootummaan Naannoo Oromiyaa, kallattii tarsiimawaa jijjiirama dinagdee naannichaaf murteessaa ta'e bocuun sochii eegaleera. Innis hawaasa keenya daawwatummaa dinagdee irraa gara hirmaattummaa guutuu oomishaa, invastimantiifi qabeenya umuutti ceesisuudha. Murtoon tarsiimawaa kun kaayyoo siyaasaa qofa osoo hin taane, bu'uura tarsiimoo qabeenya mootummaafi hawaasaa gara sirna oomishtummaatti qajeelchuufi dhaabbilee faayinaansii naannichaa kan qajeelchudha. Akka "Karoora Of-danda'uu" Naannoo Oromiyaatti, milkaa’inni dhaabbilee faayinaansii; keessumaa Baankii Siinqee, kuufama kaappitaalaa qofaan osoo hin taane, hangam kaappitaala sana gara oomishtummaa, intarpiraayizoota babal’isuu, carraa hojii uumuufi jireenya hawaasaa jijjiirutti ceesisuudhan kan madaalamudha. Bu'uurri tarsiimoo kanas, faayinaansii oomishaa (productive finance) dameewwan murteessoo dinagdee keessatti faayidaa olaanaa qabanirra oolchuudha. Tarsiimoon mootummaa kun qonnaan bultootaafi horsiisee bultootaa, akkasumas Interpiraayizoota xixxiqqaaf tajaajila liqiifi faayinaansii mijataa dhiyeessuudhaan oomishtummaa qonnaa ammayyeessuufi galii isaanii guddisuuf dursa kenna. Kana malees, dandeettiifi yaada dargaggootaafi dubartootaa gara intarpiraayizoota giddugaleessaafi xixiqqootti jijjiiruuf deeggarsa kaappitaalaa, liiziifi gorsa faayinaansii dhiyeessuun akka milkaa'an kan gargaarudha. Dabalataanis hirmaannaa faayinaansii walqixaafi hammataa ta’e lammiileef dhiyeessuuf, tajaajila faayinaansii dijitaalaa babal’isuun, keessumaa tajaajila dijitaalaa Wabii Baankii Siinqeen fayyadamummaa hawaasaa sadarkaa adda adaarra jiran mirkaneessurratti argama. Tarsiimoon faayinaansii kun imaammata dinagdee bal’aa Oromiyaa Soveriin Fandii (OSF) waliin walitti hidhata cimaa kan qabuudha. OSF’n qabeenya mootummaa tarsiimoon qindeessuun kaappitaala gara dameewwan oomishtummaa olaanaa qabaniitti gaggeessaa kan jiruudha. Kanaan walqabatee, Garee Siinqee keessatti tajaajila Baankii, Liizii, Inshuraansiifi Invastimantii walitti hidhuun sirna faayinaansii guutuufi wal-utubuu danda'u ijaaruun danda’ameera. Sirni faayinaansii walitti hidhame kun kuufama kaappitaalaa irraa kaasee hanga wabii inshuraansii, dhiyeessii liiziifi invastimantii tarsiimawaatti abbootii qabeenyaafi intarpiraayizoota gargaaruun imala sochii dinagdee naannicha kan ariifachiisudha. Bu'aan madaallii tarsiimoo kana kan safaramus oomisha galma’een, carraa hojii uumameen, galii maatii fooyya’eeniifi galma "Of-danda’uu Oromiyaa" dhugoomeeni. Mootummaan Naannoo Oromiyaa kaappitaala gara dameewwan oomishtummaa olaanaatti ceesisuuf invastimantii dhuunfaa dadammaksuu, faayinaansii dijitaalaa babal’isuufi qonna ceesisuu irratti kan xiyyeeffatu ta'a. Walumaagalaan, kaappitaalli kuufame gara oomishtummaatti, oomishtummaan gara invastimantiitti, invastimantiin gara carraa hojiitti, carraan hojii ammoo gara jireenya fooyya'aa ummata keenyatti yoo jijjiirame qofa imaammanni faayinaansii keenya galma kan gahu yoota'u, mootummaanis, Baankiin Siinqee dhaabbata faayinaansii ummataa ta’e akka guddattuufi ergama isaa guutumaan guutuutti akka bahatu deeggarsaafi hordoffii barbaachisaa kan gaggeessu ta'a. Maddiin, Waajjira Pireezidaantii Mootummaa Naannoo Oromiyaa