Caamsaa 18/2018 (ENA): Naannoo Oromiyaa Godina Shawaa Kaabaa Aanaa Waacaaleetti Pirojektoonni Misoomaa garaa garaa fayyadamummaa hawaasaa mirkaneessan eebbifamuun tajaajilaaf banaa ta’aniiru. Aanichatti pirojektoonni baajata Mootummaa fi hirmaannaa hawaasaan hojjetaman 18 qarshii miiliyoona 186 oliin ijaaramaan xumuramuun tajaajilaaf ga’aniiru.   Sirna eebbaa kanarratti Waajjira Paartii Badhaadhinaa Damee Oromiyaatti Itti Gaafatamaa Biiroolee Oromiyaa obbo Huseen Fayyisoo, Itti Aanaan Bulchaa Godina Shawaa Kaabaa obbo Gabayyoo Habtee dabalatee , hoggantoonni Godinaa fi Aanaa akkasumas keessummoonni garaa garaa fi kutaan hawaasaa adda addaa argamiiru. Sagantaa eebbaa kanarratti Waajjira Paartii Badhaadhinaa Damee Oromiyaatti Itti Gaafatamaa Biiroolee Oromiyaa obbo Huseen Fayyisoo bu'uurri mootummaa gurmaa'insa Gandaa ta'uu fi iddoowwan hawaasni tajaajila si'ataa,ammayyaa'aa, qulqullina qabuu yeroon barbaadu argatee jireenya gaarii itti jiraatu ta’uu ibsaniiru.   Itti Aanaan Bulchaa Bulchiinsa Godina Shawaa Kaabaa obbo Gabayyoo Habtee mootummaan jijjiiramaa waggoottan saddeettanitti biyya hirkattummaa jalaa baasuuf innisheetivoota bocee hojiitti hiikuun jijjiiramni guddaan argamuu dubbataniiru. Waajjiraalee Gandoota dabalatee Piroojaktoonni garaagaraa Aanicha keessatti ijaaramaa turan gaaffii fi fedhii hawaasaa deebisuun rakkoolee kenniinsa tajaajila bu’uura irraa kan hiikan ta’uu Bulchaan Aanaa Waacaalee obbo Siyyum Kabbadaa ibsaniiru. Waajjira koomunikeeshinii Aanaa Waacaaleerraa

Caamsaa 18/2018 (ENA): Dhaabbata misoomaa mootummaa irraa gara Waldaa Aksiyoonaatti kan ce'e Itiyoo Teeleekoom, gurgurtaa aksiyoonaa harka 10 gaggeesse irratti namoonni kuma 47fi 377 hirmaachuu ibse.   Dhaabbatichi ibsa miidiyaaf kenneen, gurgurtaa aksiyoonaan abbootiin aksiyoonaa Kuma 45 abbaa qabeenyaa dhaabbatichaa ta'uu ibse. Sirna ifoomsuu irratti kan argaman Hojii Raawwachiistuu Olaantuun Dhaabbata Itiyoo Teeleekoom Firehiwoot Taammiruu, aksiyoonni Miliyoona 10fi Kuma 700, Birrii Biliyoona 3fi Miliyoona 200’tti gurguramuu himan. Aksiyoona gurgurame keessaa bittaan namoota Kuma 45 mirkanaa'uu kan himan Aadde Firehiwoot, kanaanis aksiyoonni Miliyoona 10fi Kuma 100 kan Birrii Biliyoona 3’n bitameen abbaan qabeenyummaa dhaabbatichaa abbootii aksiyoonaaf mirkanaa'uu ifoomsaniiru. Sababa ragaan waraqaa eenyummaa biyyaalessaa "Fayda" guutuu ta'uu dhabuutiin namoota kuma tokkoofi 646 aksiyoonni isaanii ammatti kan hin mirkanoofne wayita ta'u, iyyattoonni lammiilee biyya alaa 248, aksiyoona Itiyoo Teeleekom bituuf ulaagaa waan hin guunneef, maallaqni isaan kaffalan mirkanaa'ee kan deebifamuuf ta'uus Aadde Fireehiwoot himaniiru. Yaa'iin Waliigalaa Abbootii Aksiyoonaa Itiyoo Teeleekoom jalqabaas bara 2019 ji'a Fulbaanaa keessa kan taa'amuu ta'u Hojii Raawwachiistuu Olaantuun Dhaabbata Itiyoo Teeleekoom Firehiwoot Taammiruu himaniiru. #ENA_Afaan_Oromoo #ENA

Caamsaa 18/2018 ENA Naannoo Oromiyaatti Ganna baranaa biqiltuun shaayii miiliyoon 42 ol kilaasteraan akka dhaabamu Biiroon Qonnaa Naannichaa ibseera. Biiroo Qonnaa Oromiyaatti Daayirektara Muduraa kan ta’an obbo Chaalaachoo Addunyaa ENA’f waliin turtii taasisaniin akka jedhanitti, hojiin kun muuxannoo hojii waggoota darban keessatti argaman irratti hundaa’uun kan adeemsifamu ta’uu isaati.   Kanaanis hanqinaalee kanaan dura mul’atan hiikuun, bara kanaaf biqiltuu gahaa ta’e qopheessuun gara hojii dhaabbiitti seenamaa jiraachuu eeraniiru. Hojii misooma baala shaayii kana milkeessuuf caasaalee jiran hunda biratti hubannoon uumuun danda'ameera jedhan. Biqiltuun qophaa’e haala qabatama qilleensa naannichaa irratti hundaa’ee akkamitti akka dhaabamuufi kunuunsi akkamii taasifamuuf akka qabu boqonnaa qophii keessatti xiyyeeffannoon irratti hojjetamaa akka jirus himaniru.   Misoomni baala shaayii kun bal’inaan godinaalee sadii keessatti kan gaggeeffamu yoo ta’u, godinaaleen kunneen Jimmaa, Iluu Abbaa Booraa fi Buunnoo Baddallee ta’uus eeraniru. Obbo Chaalaachoon akka jedhanitti,naannichatti barana biqiltuu shaayii miiliyoona 100 fi miliyoona 22 qophaa’e keessaa, miliyoona 42 kan dhaabamu yoo ta’u, biqiltuun kunis lafa hektaara kuma 3 fi 168 irratti ni misooma jedhan. Naannichatti hanga ammaa misoomni shaayii lafti hektaarri kuma 2 fi 700 kan haguugame ta’uu himanii, misooma kana irraa lafa hektaara kuma 1 fi 280 ol yeroo ammaa oomisha kennaa jiraachuu himaniiru. Misooma kanan qonnaan bultoonni seekteroota jiran keessaa itti kan hirmaatanii fi caalaatti fayyadamoo gochuuf qonnaan bultoota giddu galeessa kan godhatee ta’uu himanii,walitti hidhaminsa gabaa uumuuf karoorfamee xiyyeeffanno guddaan hojjetamaa jiraachuu dubbatani. Hojiin misoomaa kun bu’aa qabeessa akka ta’uuf, lafti misoomaaf malu guutummaatti kilaasteraan kan adda bahe ta’uu eeranii, biqiltuuwwan buufata keessatti qophaa’anis yeroo ammaa sadarkaa dhaabbii irra gahuun isaanii kan mirkanaa’e ta’uu himaniiru. Naannichatti misoomni baala shaayii kun biyyee dhangaggaa’aa dandamatee omishaa kennuu kan danda’u akka ta’ee himanii, kutaalee naannicha biroo keessatti qorannoon deeggaruun sochiin taasifamaa jiru hoijirra oolaa kan jiruu ta’uus dubbataniiru. #ENA_Afaan_Oromoo #ENA

Caamsaa 18/2018(ENA): Itiyoophiyaan Gaanfa Afriikaatti tarkaanfiiwwan misooma dinagdee naannichaa mirkaneessan bu'a qabeessa ta'an fudhachaa jiraachuu Ishee Mana Maree Bakka Bu'oota Ummataatti Itti waamamaan olaanaan Mootummaa Ministir Doktar Tasfaayee Baljigee ibsan. Gaaffiin Itiyoophiyaan dhimma abbummaa hulaa Galaanaa qabdu, hojmaata dippilomaasii Idil-Addunyaatiin kan milkaa’uu danda’uu fi dhimma jireenyaa ta’uu isaa hubachiisaniiru. Ministirri Doktar Tasfaayee Baljigee ENA’f akka ibsanitti,Itiyoophiyaan Gaanfa Afriikaatti tokkummaa dinagdee naannichaa mirkaneessan tarkaanfiiwwan bu'a qabeessa ta'an fudhachaa jirti jedhani. Gaaffiin Itiyoophiyaan haqa abbummaa hulaa Galaanaa qabduus, carraaqqii ishee walitti hidhamiinsa dinagdee naannichaa uumuuf taasiftu irraa adda baafamee kan ilaalamu akka hin taane hubachiisaniiru. Humna elektiriikii Hidha haaromsaa Guddicha fedhii Itiyoophiyaatiin wareegama waliinii Itiyoophiyaanotaatiin ijaarame irraa maddu, walitti hidhamiinsa dinagdee naannichaatiif gumaacha guddaa gumaacha jira jedhaniiru. Gara fuulduraattis, Ajandaa Gamtaa Afriikaa 2063 bu'uura godhachuun, Itiyoophiyaan tokkummaa dinagdee Ardii ariifachiisuuf qabeenya isheetti fayyadamuun kutannoodhaan akka hojjettu ibsaniiru,. Itiyoophiyaan Galaana Diimaa wajjin hidhata ishee uumamaa, seenaan, teessuma lafaa fi seera qabeessummaa walitti hidhe ta'uu isaa ibsanii, akka isheen abbummaa hulaa Galaanaa dhabdu gochuuf kiyyoo fi dabaan dhimmi deemame gaddisiisaa fi yaada Itiyoophiyaa dadhabsiisuu irraa kan madde ta'uu isaa dubbataniiru. Herregni Itiyoophiyaan qabeenya isheetti fayyadamtee guddina ishee mirkaneessinaan sodaa keenya taati jedhu, murtii boodatti hafaa fi dogoggoraa diinota seenaati jedhaniiru. Kanaanis, gaaffiin Itiyoophiyaan abbummaa hulaa galaanaa qabdu bu'uura seenaa kan qabu, dhugaa uumamaa fi teessuma lafaa kan qabu, seera qabeessummaa fi loogii maleessummaa kan walitti hidhe dhimma jireenyaati jedhaniiru. Sadarkaa Idil-Addunyaatti biyyoota laatin Ameerikaa Booliviyaa fi Peeruu, Biraaziil fi Paaraaguway; Afriikaatti immoo muuxannoo Maalii, Senegaalii fi Kooti DiiVuwaar furmaata waliinii itti fayyadaman akka fakkeenyaatti ibsaniiru. Gaaffiin Itiyoophiyaan Abbummaa hulaa galaanaa qabdu, hojmaata dippilomaasii Idil-Addunyaatiin kan milkaa’uu danda’uu fi dhimma jireenyaa ta’uu isaa hubachiisaniiru Kanaanis, gaaffii Itiyoophiyaan abbummaa karra galaanaa seenaan, seeraa, teessuma lafaa fi madaalawaa qabdu karaa dippilomaasiitiin milkeessuun akka danda'amu dubbataniiru. Biyya ummata baay'ee qabduuf kun qananii osoo hin taane, dhimma faayidaa biyyaalessaa furtuu kabaja abbummaa dinagdee mirkaneessudha jechuun ibsaniiru. Tajaajila bufata doonii fi loojistiksiitiif qabeenyi guddaan waggaa waggaan baasii ta'u,dorgammii daldalaa Idil addunyaa fi imala guddinaa irratti dhiibbaa guddaa akka uume hubachiisaniiru.