Adoolessa 09/2017(TOI)-Bara baajataa xumurametti hojiileen qabeenya ofiin Birmadummaa Nyaataa Mirkaneessuu, Guddina fi badhaadhina walii galaa mirkaneessuu dandeessisan bal’aan hojjetamuu Ministirrii Hojii fi Ogummaa Mufariyaat Kamiil ibsan. Waltajjiin hojiiwwan gurguddoo walta’insa Mootummaa fi paartiin Bara baajataa xumurame hojjetaman gamaggamu Diree Dawaatti gaggeeffamaa jira. Waltajjicha Irratti Itti Aanaan Pirezidaantii Paartii Badhaadhinaa fi sadarkaa itti Aanaa Ministira Muummeetti hogganaan jiddugala Qindeessaa ijaarsa sirna demokiraasii Adam Faaraah dabalatee, hoggantoonni waajjira muummee paartii badhaadhinaa fi hogantoonni waajjira Dameelee , Minitiroonni, fi Hoggantoonni Olaannoon Naannoolee argamaniiru. Tattaaffii gargaaramuu keessaa bahuu, carraa hojii uumuu, tasagabbii gabaa fi qaala’insi gatii hir’achuun fi dhimmoota biroo ilaaluun hojiiwwan gurguddoo raawwattaman fi bu’aawwan galmaa’an ilaachisuun mariin bal’aan gaggeeffameera. Dhimmoota kana irratti ibsa kan kennan Ministirri hojii fi ogummaa Mufarihaat Kamiil, lammiileef carraa hojii biyya keessaa fi biyya alaatti mijeessuu fi uumuun milkaa’inni gaariin galmaa’eera. Itiyoophiyaatti carraan hojii ogummaan gaggeeffamu akka jiraatuuf gochuuf lammiileen beekumsaa fi dandaandeettii argataniin guddinaa fi badahaadhina biyyaa mirkaneessuuf qoodasaanii akka bahan ta’aa jiraachuu dubbataniiru. Carraa hojii uumuu irra darbe dameelee biroon bu’aan qabatamaan galmaa’uusaanii kaasuun fuulduratti jabaatee kan itti fufu ta’uu mirkaneessaniiru. Hogganaan Damee Siyaasaa fi Ijaarsa Dandeettii Paartii Badhaadhinaa Dr.Sammaa Xurunaa bara baajataa xumurame walta’insa Paartii fi Mootummaan hojiiwwan bal’aa raawwataman ibsaniiru. Bara baajataa qabametti, Bu’aawwan argaman itti fufsiisuun raawwiin caalu akka jiraatu tattaaffiin qindaa’aan nitaassifama jedhaniiru. De’eetaan Ministira Daldalaa fi walitti hidahaminisa Riijinii Dr.Abdulhakiim Muluu gama isaaniin, riifoormii Dinagdee Gooroo tassisuun guddinaa fi Misooma Damdaneessa itti saffisiisuu danda’uu kaasaniiru. Qaala’insa jireenyaa tasgabbeesuuf tattaaffiin bal’aan taassifamuu ibsaniiru.

Adoolessa 09/2017 (TOI)- Bu’aan misooma bunaan naannoo Oromiyaarraa argame bal’isuun fayyadama qonnaan bulaa caalaatti guddisuuf akka hojjetamu pirezidaantiin naannichaa Shimallis Abdiisaa beeksisan. Waltajjiin qorannoo raawwii fi milkaa’inoota omishaa fi omishtummaa Bunaa guddisuuf hojiilee bara bajataa 2017 hojjetamaniin argamanii fi karoora bara bajataa 2018 qoratu har’a magaalaa Adaamaatti gaggeeffameera. Waltajjicharratti Pirezidaantiin naannichaa obbo Shimallis Abdiisaa, imalli badhaadhinaa biyyattii akka milkaa’u Bunni gumaacha olaanaa taasisaa akka jiru dubbataniiru. Ommishaa fi omishtummaa Bunaa dabaluun fi qulqullinasaa fooyyessuun addunyaarratti dorgomaa akka ta’u cehumsa caasaa dinagdee dhugoomsuuf xiyyeeffannoo addaan hojjechuu ibsaniiru. Mootummaan, qonnaan bulaa fi alergitoonni Bunaa qindoomina uumaniin oomishtummaa fi galiin bu’aan fooyya’aan argameera jedhan. Haala Kanaan alergitoonni qonnaan bulaan fayyadamaa akka ta’u deeggarsa cimsuun alatti buna misoomsuurratti akka hirmaatan gaafatanii, mootummaan naannichaas deeggarsa malu akka taasisu himaniiru. Daarektarri olaanaa abbaa Taayitaa Bunaa fi Shaayee Itiyoophiyaa Dr. Addunyaa Dabalaa gamasaaniin akka biyyaatti waggoota muraasaan asitti misooma Bunaan bu’aan olaanaan argamaa jira. Misooma Bunaa babal’isuun gamatti argannoo alergiinis bu’aan olaanaan galmaa’aa jiraachuu eeranii, bu’aan kun naannolee fi qooda fudhattoota waliin qindoominaan hojjetamuusaatiin akka ta’e himaniiru. Alergiin Bunaa barootaaf to’annoo alergitoota muraasa harka kan ture jijjiiruun qonnaan bulaa dabalatee alergitoonni haaraas akka keessa galan hojmaanni kaa’ameera jedhan. Bara bajataa xumurame buna toonii kuma 469 irraa doolaariin biiliyoona 2 tuqaa 65 argamuu yaadachiisanii, bara bajataa 2018 buna toonii kuma 600 gabaa addunyaaf dhiheessuun galii doolaara biiliyoona 3 argachuuf karoorfamuu ibsaniiru. Hoogganaan biiroo qonnaa Oromiyaa obbo Geetuu Gammachuu,oomishtummaa fi qulqullina bunaa naannichaa guddisuuf inisheetiivonni garagaraa bocamanii tumsa taasifameen bu’aan quubsaan argameera jedhaniiru. Naannihatti buna babal’isuuf waggoottan shanan darban hojii hojjetameen baayina bunni waggaa waggaan dhaabamu harka 23 guddisuun akka danda’ame beeksisaniiru. Oomisha bunaa waggaatti naannichatti oomishamu kuntaala miiliyoona 4 irraa gara kuntaala miiliyoona 15 tuqaa 15tti guddisuun akka danda’ame himaniiru. Kana malees naannichatti lafti heektaara miiliyoona 3 tuqaa 3 irra Bunni misoomaa akka jiru eeranii, omishtummaa misooma Bunaa naannichaa heektaararraa kuntaala 6 tuqaa 5 irraa gara kuntaala 9tti guddisuun akka danda’ame himaniiru.

Adoolessa 08/2017(TOI)- Oomishtummaa damee qonnaa naannichaa guddisuun gargaaramuu jalaa bahuuf hojiin hojjetamu onnachiisaa ta’uu mana maree bakka bu’oota ummataatti Koree dhaabbataa dhimmoota qonnaa ibse. ‎Miseensonni koree dhaabbatichaa sochii hojii qonnaa wayitaawaa naannoo Gaambeellaa dawwataniiru. Dursituun garee miseensota koree dhaabbataa adde Lubaabaa Sayid daawwannaan booda yaada TOI’f kennaniin, mootummaan dqmee qonnaaf xiyyeeffannoo olaanaa kennee oomishtummaa guddisuuf hojjechaa akka jiru ibsaniiru. Naannoon Gaambeellaa damee Kanaan qabeenya dilbii waan qabuuf misooma cimsuun akka biyyaatti karoora gargaaramuu jalaa bahuuf qabameef humna guddaa ta’a jechuun ibsaniiru. Naannoon Gaambellaa oomishtummaa damee qonnaa guddisuun gargaaramuu jalaa bahuuf tattaaffiin taasifamu abdiqabeessa ta’uu ibsaniiru. Miseensi koree dhaabbataa adde Itaagany Isheetuu, naannichatti walabummaa nyaataa mirkaneessuu fi gargaaramuu jalaa bahuuf hojiin hojjetamaa jiru kan jajjabeeffamu ta’uu dubbataniiru. Qabeenya dilbii naannichaa sirnaan misoomsuun yoo danda’ame qabeenyi biyyaaf gahu akka jiru miraneessineerra jedhaniiru. Itti aanaan hoogganaa biiroo qonnaa fi misooma qabeenya uumamaa naannichaa Daagim Milashiin, ganna kana lafti heektaarri kuma 172 sanyiin facaafamuu kaasanii, oomisha fooyya’aa argachuuf hojiin qindoominaa ciminaan itti fufu jedhaniiru. Bara oomishaa kana lafa sanyiin facaafamerraa midhaan kuntaala miiliyoona 5 galchuuf karoorfamuu dubbataniiru.

Adoolessa 07/2017(TOI)- Baankiin alergii fi alaa gala (Afrii egziim bank) deeggarsa pirojektoota misoomaa fi walitti hidhamiinsaa Afriikaaf taasisu cimsee akka ittifufu beeksise. Manni maree hojii raawwachiisaa gamtaa Afriikaa 47ffaa fi walgahiin tumsa waloo walakkaa waggaa hawaasota riijinii gamtichaa 7ffaan Ikuwaatoor Giinii Maalaabootti Taa’ameera. Dura taa’aan komishinii gamtaa Afriikaa Mahaammud Alii Yuusuuf walgahichaan cinaatti yeroo hojiisaanii xumuramanii kan gaggeeffaman pirezidaantii baankii Afrii egziiim fi dura taa;’aa boordii piroofeesar Benediikt Ormaah waliin mari’ataniiru. Marii kanaanis tumsa tarsiimawaa gamtaa Afriikaa fi baankii Afrii egziim gabbisuu fi deeggarsa misoomaa fi walitti hidhamiinsa Afriikaaf taasisu caalaa cimsuuf akka hojjetan ibsniiru. Baankichi Kooveed-19 ittisuu dabalatee deeggarsa fulla’aa biyyoota miseensa gamtaa Afriikaa fi komishinichaaf taasisaa jiru dura taa’an kun leellisaniiru. Dabalataanis dura taa’ichi pirezidaantii baankichaa haaraa Dr. Joorgi Ilombii waliin kan mari’atan yoo ta’u gamtaan Afriikaa deeggarsa barbaachisu akka isaaniif taasisu mirkaneessuusanii odeeffannoon TOI’n gamticharraa argame nimul’isa.