Bitootessa 14/2015(TOI) - Chaayinaan Walta’iinsa dinagdee Itiyoophiyaa Waliin Qabdu Cimsitee akka Itti fuftu Itiyoophiyaatti Ambaasaaddarri Chaayinaa Jaan Jiyuwaan ibsan. Jilli mootummaa olaanaa ministira maallaqaa federaalaa Ahimad Shideen durfamu daawwannaan hojii dhiheenya Chaayinaatti taasise hariiroo biyyppta lamaanii gama cimsuutiin gumaacha olaanaa qaba jedhaniiru. Jilli kun turtiisaatiin hooggantoota mootummaa olaanoo waliin dhimmoota addaddaa hariiroon biyyoota lamaanii cimuu danda’urratti mari’achuusaanii dubbataniiru. Dhimmoota daldalaa fi Invastimantii, ijaarsi bu’ura misoomaa hariiroo cimsuun danda’anirratti mari’atamuu eeranii, barbaachisummaa sirreeffama liqii ilaalchisuunis waliigalteerra gahamuu eeraniiru. Itiyoophiyaatti hirmaannaan Kaampaaniiwwan Chaayinaa dameewwan qonnaa, turizimii, fayyaa, misooma anniisaa fi albuudaan caalaa akka cimu akka jajjabeeffaman mirkaneesaniiru jedhan. Kana malees koreen waloo invastimantii fi walta’iinsi dinagdee mijeessuu dandeessisu akka hundaa’u waliigalteerra gahamuu kaasaniiru. Walta’iinsa dinagdee biyyoota lamaanii guddachaa dhufe caalaatti cimsuu fi ittifayyadama waloo mirkaneessuuf xiyyeeffatamee akka hijjetamu ambaasaaddarichi mirkaneessaniiru. Chaayinaan bu’uraalee misoomaa gurguddoo adeemsisuuf “inisheetiiviin Beelt endi rood” barana waggaa 10 akka qabatu ibsanii, waggootii kana keessatti Itiyoophiyaan hariiroo cimaa akka qabdu yaadataniiru. Fuuladuras hojiiwwan bu’ura misoomaa Itiyoophiyaatti Inisheetiivii kana keessatti hojjetaman mijeessuu fi walta’iinsa kana caalaatti cimsuuf akka hojjetamu ibsaniiru. Walta’iinsa gama Saayinsii fi Teeknooloojiin jiru cimsuuf hojjetamaa akka jiru eeranii, keessumaa barattoonni Itiyoophiyaa carraan leenjii damee Kanaan Chaayinaatti kennamu bal’isuuf xiyyeeffannoon kennameera jedhan. Kaampaaniiwwan Chaayinaa bebbeekamoon hojii nvastimantii Itiyoophiyaarratti akka hirmaatan nihojjetama jedhaniiru. Gama biraatiin waraana kutaa Kaaba biyyattiitti ture waliigaltee nagaatiin xumuramuunsaa Chaayinaan akka dinqisiifattu ibsanii, waliigaltichi biyyattiitti nageenya waaraa buusuuf qooda akka qabaatu eeraniiru. Nageenyi Itiyoophiyaa gaanfa Afriikaa fi Afriikaa bahaaf murteessaadha kan jedhan ambaasaaddarichi, waliigaltichi Itiyoophiyaan gara nageenyaa fi ijaarsa dinagdee duraaniitti deebisuuf qooda olaanaa qaba jedhaniiru. Yaalii mootummaan Itiyoophiyaa iddoowwan waraanaan miidhaman deebisee ijaaruu fi lammiilee rakkoof saaxilaman deeggaruuf taasisu Chaayinaan akka deeggartu dubbataniiru. Gojiin deebisanii dhaabuu erga xumuramee booda abbootiin qabeenyaa Chaayinaa iddoowwan kanneenitti invast akka taasisan gochuuf yaaliin nitaasifama jedhaniiru. Akkaataa Chaayinaan nageenya addunyaa mirkaneessuuf “Inisheetiiviin nageenyaa idil addunyaa” waggaa darbe baafteen mootummaa Itiyoophiyaa waliin ta’uun gaanfa Afriikaa fi Afriikaa bahaatti nagaa fi tasgabbii cimsuuf qindoominaan akka hojjettu dubbataniiru. Akka lakkoofsa Awurooppaatti bara 2022 waljijjiirraan dinagdee biyyoota lamaan jidduu jiru doolaara biiliyoona 2 tuqaa 19 yemmuu ta’u, Itiyoophiyaatti Invastimantiin kallattii Chaayinaa doolaara biiliyoona 3 tuqaa 3 qaqqabeera. Hariiroon dippilomaasii Itiyoophiyaa fi Chaayinaa kan jalqabame akka lakkoofsa Awurooppaatti bara 1970 dha.

Bitootessa 14/2015 (TOI) :- Ministirri Muummee FDRI Dr. Abiy Ahimad obbo Geetaachoo Raddaa Pireezidaantii yeroo Bulchiinsa Mootummaa Naannoo Tigiraay taasisuun muuduu Waajjirri Muummee Ministiraa beeksise. Manni Maree Federeeshinii bu’uura Heeraa mootummaa keeyyata 62/9, labsii lakkoofsa 359/1995 keeyyata 14/2/b’tiin bulchiinsi yeroo Naannoo Tigraay akka hundaa’uu murtoo dabarseera. Akkasumaas, nageenyaa waaraa mootummaa federaalaa fi ABUT gidduutti mirkaneessuu fi walitti bu’iinsaa dhaabuuf, bu’uuraa waliigalteen Piritooriyaa keeyyataa 10(1) bulchiinsa yeroo hirmaachisaa hundessuun waan barbaachiseef, Manni Maree Ministirootaa walga’ii idilee bitootessa 9, 2015 gaggeesseen dambii Bulchiinsa Yeroo Hirmaachisaa Naannoo Tigraay raggaasisuun eerameera. Bu’uura dambiichaa keeyyata 3(2)’n Muummeen Ministiraa FDRI Abiy Ahimad, Obbo Geetaachoo Raddaa Pireezidaantii yeroo Bulchiinsaa Mootummaa Naannoo Tigraay taasisuun muuduu ibseera. Pireezidaantichi bakka bu’iinsa humnoota siyaasaa garaagaraa naannichaatti socho’anii fi bulchiinsa hirmaachisaa hundeessuu, qaamolee raawwachiistotaa naannicha hogganuu fi qindeessuuf itti gaaftaamnii kennamuu beeksiseera.

Bitootessa 13/2015 (TOI) - Biyya Haqa Hawaasummaa Qabdu Ijaaruuf Bu’a Qabeessummaa Qabsoo Farra Malaammaltummaaf Hundi Gaheesaa Akka Bahu Komishiniin Naamusaa fi Farra Malaammaltumm Federaalaa Waamicha Dhiheesse. Komishinichi leenjiin kutaa naamusaa fi farra malaammaltummaa, tajaajila odiitii keessaa, tajaajila seeraa fi hooggantoota hojiiwwan jijjiiramaa dhaabbilee mootummaa jala jiraniif qopheesse har’a magaalaa Bishooftuutti jalqabameera. Hooggantoonni kutaa naamusaa fi farra malaammaltummaa Yunivarsiitiiwwanii leenjii kanarratti hirmaataniiru. Itti aanaa Komishinaraa komishinarii naamusaa fi farra malaammaltummaa federaalaa Waddoo Axxoo rakkoowwan gurguddoo Itiyoophiyaa mudatan keessaa malaammaltummaan tokko ta’uu ibsanii, malaammaltummaan bifasaa jijjiiruun guddina dinagdee gufachiisuun, tokkummaa diiguun mootummaa diiguuf balaa kan uumu ta’uu ibsaniiru. Rakkoon kun yaaddoo nageenyaa biyyaalessaa Itiyoophiyaa waan ta’eef mootummaan malaammaltummaarratti qabsaa’uuf koree biyyaalessaa hundeessee hojjechaa akka jiru dubbataniiru. Kanaaf biyya haqa hawaasummaa cimaa qabdu ijaaruuf qabsoon farra malaammaltummaa bu’aqabeessa akka ta’u hundi gaheessaa bahuu akka qabu dubbataniiru. Namni hundi qaama qabsoo farra malaammaltummaa ta’uu akka qabu ittiaanaa komishinaraa kun dubbataniiru. Hooggantoonni dhaabbilee federaalaa 260 ol leenjii har’aa kaasee guyyoota sadiif turu kanarratti akka hirmaatan ibsameera.

Bitootessa 13/2015(TOI) - Manni Maree Bakka Bu’oota Ummataa FDRI walga’ii addaa har’a gaggeesseen murtee kanaan dura ABUT irratti akka shororkeessatti dabarsee ture irraa haqe. Mana marichaatti Ministirri Itti waamamaa Mootummaa Tasfaayee Beeljigee mana marichaaf ABUT tarree shororkeessaa keessa akka bahu ejjennoo mootummaa dhiheessaniiru. Manni marichaas dhimma dhihaate irratti erga mariyateen booda mormii 61, qoqqobbi sagalee 5fi harka caalmaan ABUT tarree shororkeessaa keessa akka bahu murteessera. Kunis waliigaltee Nageenyaa mootummaa Itoophiyaa fi ABUT gidduutti kanaan dura taasifame caalaatti gara hojiitti hiikuuf kan gargaarudha jedhameera. Kana qofaa osoo hin taane Waliigalteen nageenyaa kun guutummaan guutuutti gara hojiitti akka jijjiramuuf, akkasuma nageenya naannicha waaraa taasisuuf gahee olaanaa kan qabu ta'uun himaneera. Nageenyaafi Tasgabbi biyyaafis ABUT tarree shororkeessummaa keessa bafamuun gahee olaanaa qaba jedhameera. See insights and ads Boost post All reactions: 55

Bitootessa 13/2015(TOI) – Itti aanaa ministira muummee fi ministirri dhimma alaa Obbo Dammaqaa Mokonnin ministira minsoomaa Ingilizii fi dhimmoota Afriikaa Andriiwu Miisheel waajjirasaaniitti simatanii dubbisan. Itiyoophiyaa fi Ingiliz gamtoomina misoomaatiin michooma waggaa dheeraa akka qaban kan yaadachiisan Obbo Dammaqaan hariiroo kana cimsuuf cimanii hojjechuu akka qaban eeraniiru. Waliigaltee nageenyaa Piriitooriyaa hojiirra oolchuuf hojiiwwan hojjetamaa jiran ilaalchisuun ibsa kan taasisan yemmuu ta’u, adeemsi waliigaltichaa amma ammaatti jiru nageenya buusuuf abdiiqabeessa akka ta’e dubbataniiru. Qaamolee walitti bu’iinsichaan yakka raawwataniiru jedhamanii shakkaman gaafatamaa taasisuuf dirni haqa cehumsaa diriirfamee hojjetamaa akka jiru dubbataniiru. Deeggarsa namoomaa Ingiliz Itiyoophiyaaf taasisaa jirtuuf obbo Dammaqaan galateeffatanii, kojiin kun wayita ammaa lammiilee waraanaa fi ongeen miidhamaniif deeggaruudhaan cimee akka itti fufu gaafataniiru. Ingilizitti miseensi paarlaamaa kan ta’an fi ministirri misoomaa biyyattii fi dhimmoota Afriikaa Andriiwu Miisheel gamasaaniin, Itiyoophiyaatti nageenya buusuuf tarkaanfii mootummaan fudhatee fi kutannoo jiru biyyisaanii akka dinqisiiffattu ibsanii, Ingiliiz milkaa’in kanaaf deeggarsa barbaachisu akka gootu mirkaneessaniiru. Ongee fi dhimmoota biroon walqabatee qormaata Itiyoophiyaa mudate Ingiliiz akka hubattu ministirichi ibsanii, dhaabbilee gargaarsaa fi kanneen biroo waliin ta’uun deeggarsi kanaaf oolu akka taasifamu ibsaniiru. Kana malees Itiyoophiyaa fi Ingiliiz dameelee waloo fi kanneen birootiin dhimmoota hariiroosaanii cimsanirratti marii taasisaniiru.

Bitootessa 12 /2015 (TOI) – Yaa’iin Idilee aAdraffaa Bara Hojii Lammaffaa Marsaa Jaahaffaa Mana Maree Naannoo Sidaamaa Hooggantoota Biiroo fi Muudama Abbootii Murtee Raggaasise. Manni Maree kun Labsiiwwan dhihaataniif Sadii Raggaasisuun Xumurameera. Hooggantoota Mana Mareef Dhihaatanii Muudamnisaanii Raggaasifame Keessaa- Obbo Maammiruu Mokkee Hoogganaa Biiroo Qonnaa Naannichaa, Obbo Kabbadaa Gannoolee Hoogganaa Biiroo Bishaanii, Obbo Asaffaa Gurraachaa hoogganaa biiroo Siviil Sarviisii fi Misooma Humna Namaa, Obbo Makuraa Marshaayee hoogganaa BiirooMisooma Magaalaa fi Konistiraakshinii akkasumas Doktar Daawiit Hayyeessoo Hoogganaa Biiroo Pilaanii fi Misoomaa Ta’uun Muudamaniiru. Pirezidaantiin Mana Muree Walii Galaa Naannichaa Obbo Damisee Daalachaa Mana Murtee Walii Galaa Naannichaaf Abbootii Murtee Afur, Mana murtee Olaanaa Naannawa Hawaasaafjaaha, Mana Murtee Olaanaa Naannawa Bansaaf Lama, Mana Murtee Sadarkaa Tokkoffaa Hawaasaaf Jaha, Mana Murtee Sadarkaa Tokkoffaa Bansaaf Kudhan fi Mana murtee Sadarkaa Tokkoffaa Hawaasaaf Abbootii Murtee Lama Dhiheessanii Muudamaniiru. Kana Malees Manni Marichaa Labsii Mana Sirreessaa Mootummaa Naannoo Sidaamaa, Labsii Dhaabbilee Misoomaa fi Labsii Bulchiinsaa fi Itti FayyadamaLafa Baadiyyaa Raggaasisuun Yaa’iisaa Xumureera.

Bitootessa 12/2015 (TOI) – Itiyoophiyaan Waliigaltee Nageenyaa Hojiirra Oolchaa wayita Jirtutti Adeemsi Qoqqoodaa fi Almadaalawaa Waajjira Dhimma Alaa Ameerikaatti Mul’ate Marii Nageenyaa Itiyoophiyaan Adeemsisaa Jirtuuf Gufuu Akka Ta’u Ministeerri Dhimma Alaa Federaalaa Ibse. Gabaasni Sarbamuu Mirga Namoomaa Ilaalchisuun Waajjira Dhimma Alaa Ameerikaan Bahe Sirrii Akka Hintaane Mootummaan Itiyoophiyaa Beeksiseera. Gabaasni Waajjirri Dhimma Alaa Ameerikaa Dhimmicha Ilaalchisuun Baase Komishiniin Mirga Namoomaa Itiyoophiyaa fi Komishinariin Mirga Namoomaa Dhaabbata Mootummoota Gamtoomanii Ija Qorannoo Waliin Taasisaniin Yemmuu Ilaalamu Argannoon Haaraan Akka Hinjirre Ta’uusaa Ministeerichi Beeksiseera. Kanaaf Gabaasa Waajjirri dhimma Alaa Ameerikaa Baase Mootummaan Itiyoophiyaa Akka Hinfudhanne Ibseera. Ibsi Waajjirri Dhimma Alaa Ameerikaa Baase Gamtokko Qofa Komachuurratti Kan Kaayyeffate Ta’uu Akeekeera. Gama Biraatiin Gabaasichi Itiyoophiyaan Filmaata Imaammata Haqaa Cehumsaa Adda Baasuuf Hojjechaa Wayita Jirtutti, Maree Biyyaalessaa Jalqabuuf Wayita Qophooftetti Kan Bahe Waan Taheef Yeroosaa Kan Hineegne Ta’uu Ibseera. Kana Malees Kaayyoon Gabaasa Kanaa Kamiyyuu Yoo Ta’e Biyyattii Keessatti Qaama Tokko Kan Biraarratti kakaasuuf Akka Fakkaatu Ministeerri Dhimma Alaa Ibsa Baaseen Beeksiseera. Gabaasni Mootummaa Ameerikaatiin Bahe Adeemsi nageenyaa hunda hirmaachisu Kan Itiyoophiyaan deeggarsa Taasisaa Turte kan karaatti Hanbisudha jedhe Ibsi ministeerri Dhimma Alaa Federaalaa Baase. Daawwannaan Ministira Alaa Ameerikaa Antoonii Biliinken Itiyoopiyaatti taasisan Hariiroo Biyyoota Lamaanii Akka Cimsu Abdii Kan Agarsiisedha Kan Jedhe Ibsi Kun, Mareen Taasifamee fi Waliigalteen Irra Gahame gamtoomina Tarsiimawaa Biyyoota Lamaanii Ittifufsiisuuf Akka Gargaaru Amantaa Itiyoophiyaa Akka Ta’e Ibsameera. Haqaa Ce’umsaa fi Marii Biyyaalessaatiin waliigaltee Uumuu dabalatee tarkaanfiiwwan itti gaafatamummaa miidhamtootaaf mirkaneessuuf akka fudhataman kan mirkaneesse ibsichi, Michoonni Itiyoophiyaa deggersa ijaaraa taasisuun adeemsa kana akka gargaaran waamicha dhiyeesseera.

Bitootessa 12/2015 (TOI) - Manni Maree Ministirootaa Walgahii Idilee 8ffaa Har’a Adeemsiseen Dhimmoota Addaddaarratti Mari’atee Murtee Dabarsuusaa Waajjirri Mana Maree Ministira Muummee Beeksise. Manni Marichaa Jalqaba Wixinee Labsii Dhaabbilee Misoomaa Mootummaa Kan Mootummaan Qabamanii Irratti Yemmuu Ta’u Wixineen Labsii Dhihaates Sirni Korporeetiin Dhaabbilee Misoomaa Mootummaa Iftoominaa fi Ittigaafatama Kan Mirkaneessu Akka Ta’u, Bulchiinsi Faayinaansii Korporeetii Sirnasaanii Ammayyeessuun Dorgomuu Danda’uusaanii fi Bu’aqabeessummaasaanii Cimsuun kan Barbaachisu Waan Ta’eef, Bu’aasaanii Karaa Hinmiineen Dirqama Tajaajila Hawaasaa Karaa Bu’aqabeessa Ta’een Akka Bahan Idaa Irra Jiru Fooyyessuu Kan Dandeessisu Waan Ta’eef Walumaa Gala Wixineen Labsii Guddina Dinagdee Biyyaarratti Gumaacha Olaanaa Akkka Bahan Dandeessisu Qophaa’ee Mana Mareef Dhihaateera. Manni Marees Wixinee Labsii Kanarratti Erga Mari’atee Booda Galtee Itti Dabaluun Akka Ragga’u Mana Maree Bakka Bu’oota Ummataaf Akka Darbu Sagalee Guutuun Murteesseera. Itti Aansuun Waliigaltee Wixinee Labsii Itiyoophiyaan Gibira Walirra Dhufu Hanbisuu fi Waliin dhahuu Taaksii Ittisuuf Mootummaa Logzambarg Akkasumas Konfedereeshinii Siwiiz Waliin Waliigalteewwan Taasifte Akka Ragga’an Irratti. Waliigalteewwan Taaksii Walirradhufu Hanbisuu fi Waliindhahuu Ittisuuf Itiyoophiyaan Mootummoota Lamaan Waliin Taasifte Abbootiin Qabeenyaa Biyyoota Lamaanii Qabeenyasaanii Biyya Keenyatti Invast Akka godhan Gama Jajjabeessuutiin Gumaacha Olaanaa Qabaachuun Olitti Abbootiin Qabeenyaa Galii Tokkoof Gibira Altokkoo Ol Akka Hinkafalle Kan Taasisu Waan Ta’eef Waliigalteewwan Kana Raggaasisuuf Wixineen Labsii Qophaa’ee Mana Maree Ministirootaaf Dhihaateera. Manni Marees Wixinee Labsii Kanarratti Erga Mari’atee Booda Galtee Ittidabaluun Akka Raggaasifamu Mana Maree Bakka Ummataaf Akka Darbu Sagalee Guutuun Murteesseera. Xumurarrattis Manni Maree Kun Wixinee Danbii Korporeeshiniin Baabura Lafoo Itiyoophiyaa Ittiin hundaa’u Fooyyessuuf Dhihaaterratti Mari’ateera. Kaappitaala Korporeeshinichaa Kan Eeyyamamee fi Kan Kafalame Fooyyessuun Kaayyoo fi Ergama Itti Hundaa’e Galmaan Gahuu Akka Dandahu Keessumaa Bu’uraaleen Misoomaa Baaburaa Ijaarsarra Jiran Akka Xumuraman Kan xumuramanis Hojii Akka Jalqaban, Bu’uraalee Misoomaa Baaburaa Fuuladura Ijaaramaniif Humna Cimaa Akka Qabaatu Kaappitaalli Eyyamameef Ammoo Birrii Biiliyoona 22tti Akka Guddatu Kaappitaallisaa Maallaqa Callaa fi Akaakuun Kafalame Ammoo Birrii Biiliyoona 120 Akka Ta’u Wixineen Danbii Qophaa’ee Dhihaateera. Manni Marichaas Wixinee Danbii Kanarratti Mari’atee Galtee Itti dabaluun Guyyaa Gaazexaa Magalataatti Maxxanfamee Baherraa Eegalee Hojiirra Akka Oolu Sagalee Guutuun Murteesseera.